Advent-2

SERMON JAMITA TU MINGGU ADVENT-2, 5 DESEMBER 2010
Luk.21:25-33

Patujolo

Godangan sian isi ni bd.21 on (ay.5-38 pat.Mrk.13 dohot Mat.24) digoar do apocalypse (pangungkapon, penyingkapan ni peristiwa-peristiwa masa datang na marhahonaan tu panggohion ni tahi ni Debata na taringot tu portibi dohot hajolmaon). Maol do i antusan, ai campur-baur do disi ragam ni unsur tradisi apocalypse. Na parjolo, diambil alih jala diintegrasihon Evangelis Lukas do disi konsepsi ni aliran apocaliptic di Padan na Robi na taringot tu ari ni Tuhan i. Na dirajumi do ari i songon paruhuman na gabe parsirangan (peralihan) ni tingki nuaeng (na jahat) tu tingki na ro (na denggan; pat.Am.5:18 duu). Na paduahon, bayangan manang ramalan ni panurirang taringot tu hasesega ni Jerusalem dohot bagas joro. Peristiwa i jotjot disejajarkan (bahkan diidentikkan) tu ari ni Tuhan i (pat.Jer.7; Luk.13:34 du; 19:41 duu; 21:5, 20 duu). Na patoluhon, penyatupaduan ni konsepsi na taringot tu ari ni Tuhan i tu panghirimon ni Padan na Imbaru na taringot tu parousia (haroro ni Kristus na paduahalihon). Dung i paopathon, bayangan taringot tu hasosahan na naeng masa mareakhon eskhaton (tingki parpudi). Padan na Robi dohot Padan na Imbaru rap mamereng do paboa mandapothon ari parpudi manggasagasa do huaso ni hagolapon di portibi on. Tarsosak jala hapusohan ma angka na porsea (Dan.7:13 du; pat.Luk.21:27 duu). Di mulana, unsur-unsur ni bagian on dihatahon Tuhan Jesus do di inganan dohot tingki na paasingasinng. Alai dipapungu jala disadur si Lukas ma i gabe sada jamita eskhatologis songon na tarjaha di bindu on. Turpukta on na tarjadi sian dua bagian, i ma:
Haroro ni Anak ni Jolma i (25-28)
Tudosan sian hau ara (29-33).
Bagian na paduahon i, ra ndang langsung udut ni bagian na parjolo, alai godangan do kemungkinanna na marpardomuan tu na di jolona dope i (20-24).

Hatorangan

“Dung i masa ma angka tanda di mata ni ari.” Pandohan on ndang mangalehon patokan taringot tu tingki manang hamamasa ni parousia i, alai songon catatan peralihan do sian turpuk na di jolona (20-24). Si Mateus tumangkas paboahon rumang ni angka tanda i, i ma, mangholom ma mata ni ari dohot bulan jala mardabuan angka bintang (Mat.24:29). Luhutna i mangondolhon hasasalpu ni tingki dohot portibi on. Mata ni ari dohot bulan na ditontuhon Debata do i bahen pangguruan ni tingki (na ‘mangatur’ pardalan ni ari, bulan dohot taon; pat.1 Mus.1:14). Molo so mardalan be na dua i di fungsina, na marlapatan ma i nunga mansohot be perputaran ni tingki. Marongrong ma portibi on ala ni bintang na mardekdehan dohot ala ni galumbang ro di hagogoon ni parlangitan na manggasagasa jala humuntal so terkendali. Marnida i, hapusohan ma angka bangso jala tarhatos (mati ketakutan) angka jolma. Ihut tusi, ro ma Anak ni Jolma i. Ro do Ibana songon Raja jala Panguhum ni hajolmaon. Mansai sangap do parroNa, dihaliangi angka surusuruan. Molo hapusohan angka bangso, sabalikna do anggo na porsea, dirgak do nasida jala dipasindak uluna. Boasa? Ai asing sian sangkap na hinarohonNa na tu angka anak hamagoan, i ma na mandabu uhum, na manggohi (melengkapkan) haluaonNa do Ibana di angka naung tartobus. Dison, tarhilala do ciri khas ni Barita na Uli na sinurathon ni si Lukas songon evagelium las ni roha (pat.2:10), ai di bagasan konteks panindangionna na taringot tu ari ni Tuhan i pe diondolhon do tong aspek keselamatan. Tradisi hajahudion justru sabalikna do mangondolhon hajorbuton dohot hasonggoton. Hatop manang lambat, ro do Kristus i tu tano on. Hombar tusi, haluaon ni angka na porsea (na tarsosak jala hapusohan di tano on) pasti do digohi. Porsea jala manghirim diri, tarapul ma rohana di haporsuhonna; dung i di na jumpang hamamasana, dirgak ma sude manomunomu.

Hau ara, suansuanan na mangalehon parbue (pohon buah-buahan). Tarmasuk pansarian na utama do i di Palestina. Parbueana, dua bagian. Parduru, buah semu; parbagasan, buah sejati. Buah semu dipangan langsung, buah sejati dipahiang bahen pelapis roti. Suman tu suansuanan na asing, di partaonan ngali marurus do bulungna. Tolu bulan sian i, diulahi ma marbulung; dua bulan nari muse, martunas. Pangalaho i partanda na pasti do paboa naung jonok partaonan las. Songon i, peristiwa angka na hebat i na gabe partanda do i paboa naung jonok harajaon ni Debata. Harajaon ni Debata i nunga songgop i nian di haroro ni Kristus na parjolo (pat.Mrk.1:15a), alai buni (di bagasan kesementaraan) dope. Sogot di haroroNa na paduahalihon i, disi pe asa patar (di bagasan kesempurnaan). Pasti do i. Taringot tusi diondolhon do di ay.33: “Salpu pe sogot langit dohot tano on, anggo hatangki na so tupa salpu.” Sangkap utama ni ayat on ndadan na mempertentangkan na laho salpu (fana) dohot na so olo salpu (kekal), alai hasisintong ni hataNa i do. Ndang gaitgait manang gabus boaboaNa na taringot tu haroroNa i, hata sintong do i na ingkon masa. Anggo taringot tu na sinangkap ni ay.32 golap do. Godang sungkunsungkun dohot pandapot taringot tusi. Rupani, dia do hahonaanna; hasesega ni Jerusalem do manang na parousia? Adong do na cenderung tu na parjolo, alai ndang hurang tong tu na paduahon. Mura do i antusan molo mangonai hasesega ni Jerusalem, alai bahat do sungkunsungkun molo mangonai parousia. Rupani, ise do na nidokna ‘na sabangso’ (sagenerasi) on, halak Jahudi donganNa satingki do? Molo i do, tagamon do na adong hian anggapan ni Jesus na tibu do Ibana ro (tagan so salpu dope generasiNa), hape ... silap? Mustahil do i, na so masuk akal; Debata do Ibana, na so tagamon silap. Na deba manghonahon i tu Jahudi selaku bangso. Taringot tusi didok, hot do haadongon ni halak Jahudi sahat tu ari parpudi, ndang tagamon salpu. Hona do i nian tu Rom 9-11, alai ndang tarpartahanhon sian segi pengertian naskah. Ala ni i, ra dengganan do i honahonon tu na parjolo, tu hasesega ni Jerusalem. Tutu, taon 70 M sega do huta i. Hatiha i ndang tagamon so torop dope dongan torbang ni Jesus na mangolu jala na dohot mangalami na masa i, ai marholang 37 taon dope (taon 33 tu 70 M). Hasasaut ni lumbalumbaNa i, petunjuk na pasti do i taringot tu hasisintong ni hataNa na taringot tu parousia i. Molo ramalanNa taringot tu na jonok saut, taringot tu na dao pe ndang tagamon so sintong.

Rancangan Homiletis

Nunga padua minggu on dung na bongot hita tu Advent. Didok roha, ganup hita nunga be umboto lapatan dohot na sinangkap ni Advent i di hurianta. Haroro, i do lapatanna, jala pangaradeon di haroro ni Kristus do tujuanna. Taboto do, adong do opat minggu Advent di hita di sada taon parhuriaon. Ganup minggu i, adong be do niondolhonna. Advent-2 songon miggunta on, dikhusushon do mangondolhon pangaradeonta managam haroro ni Kristus di ari parpudi. Ibana na naeng ro i, I do naung ro tu portibi on; ro di hatutubuNa songon na naeng ingoton jala pestahononta di Natal na ro. So manjalo Ibana naung ro i di ngolunta sinuaeng on, ndang tarjalo hita Ibana na naeng ro muse di tingki parpudi. Ala ni i do asa rap diondolhon na dua haroroNa i di Advent. HaroroNa na paduahon i, di sada sisi tung hasonggoton do i, ai na ro do Ibana laho manguhumi portibi on. Alai di sisi na asing hahilason do i, ai gohanNa ma disi haluaon ni nasa naung tartobus. Lam tu jonokna ari i, lam tu jonokna do nang panggohion ni haluaon i. Apala i do na hinatindanghon ni jamita on tu hita di na nidokna: “Nunga jonok haluaonmuna!”. Taringot tusi adong ma dua na naeng hangoluhononta.

Na parjolo, marlas ni roha ma hita manghirim. Tagan so ro Kristus i sogot, masa do tanda angka na balga, i ma mangholom mata ni ari dohot bulan, mardabuan bintang, marhasak galumbang ni laut jala humuntal angka hagogoon ni parlangitan. Sudena i mangondolhon hasasalpu ni tingki ni hasiangan on. Marnida i, tarsonggot jala tarhatos do hajomaon. Lam tu songgotna tahe, ai apala disi ma ro Kristus i. Ndang hinata, ai Ibana naung ro na jolo di bagasan haleaon, na nirehean jala na pinarsilanghonnasida i, i do na ro di ombas i songon Raja jala Panguhum na marhasangapon. Ndang songon i anggo na porsea, dirgak do uluna jala dipasindak panailina ala naung jonok haluaonna, jonok di bagasan harajaon ni Debata na naeng patar di bagasan kesempurnaanna di haroroNa i.

Songon i ma hita, naeng marlas jala marolop rohanta manghirim dohot manomunomu Kristus i ala ni pamotoan di hadodonok ni haluaonta di bagasan harajaon ni Debata na naeng patar i. Ndang na mandok na di ari sogot i pe asa patupaon ni Kristus i haluaonta i, ndang. Nunga dipatupa i di tano on, jala nunga disagihon i tu na porsea, tu hita. Songon i harajaon i, di bagasan kesementaraan manang hapataranna ‘na buni’ nunga dipasonggop i di haroroNa na parjolo i. Dohot hata na asing, haluaon dohot harajaon i nunga be milik ni angka na porsea i di tano on, panggohion manang penyempurnaanna nama sipaimaon. Angka naung manjalo jala memiliki haluaon dohot harajaon i di tano on, angka i do na boi marlas ni roha jala manghirim di hasasautna, na jumpangan jala maneansa saleleng ni lelengna. Apala i ma na mansai ringkot parrohahononta. So porsea di Kristus naung ro i, ndang tarharaphon hita panggohionna di ari sogot i. Ala ni i tapamanat be ma dirinta, tapatangkas roha dohot haporseaonta, nunga boi hita mandok naung jambarta do haluaon i di ngolunta on? Molo pinamanat ngolu ni halak Kristen tongon di tingki Advent, na boi gabe sungkunsungkun do roha manang na diantusi halak dope lapatan ni haluaon na di bagasan Kristus justru na naeng pestahononna di Natal. Boasa? Taida sandiri ma, sadia godang halak na holsoan ‘ala’ Natal; holsoan di abit, hiasan, konsumsi dohot na asing. Nda suhar i, haluaon do naeng pestahonon, hape ... holso do na ro? Lam boha ma molo di jamanta on ro hasusaan songon na nilumbahon ni Tuhanta di jamita on, tahan dope hita dirgak dohot pasindak ulu? Manang lobi holsoan hita tagamon jala talpe tu na marbalik? Tauji be ma jolo mamarungkilhon i. Ra, molo taalusi i dohot sintong, tarbahen hita do tu joloan on mamestahon Natal di bagasan rumang na lebih sederhana. Nang pe lam susa ekonomi jala lam maol na mangalului ngolu gabe so boi hita manggohi kebutuhanta lobi sian na somal, ndang sundat hita marlas ni roha. Jala molo taalami pe angka bencana, lam pahehe rohanta ma i manghirim haroro ni Tuhanta Jesus Kristus i.

Na paduahon, marpos ni roha ma hita maimaimahon. Sian na jolo tu nuaeng, torop do na so porsea di haroro ni Kristus paduahalihon i. “Ndang tutu i,” ninna (pat.2 Ptr.3:4). Alai Jesus pasingothon siseanNa asa marpos ni roha disi. Ndang gaitgait hataNa, ndang gabus; hata sintong do i na so boi so saut. Hombar tusi, diajari do sisean i mambuat tudosan sian dua pangalaho. Na parjolo, hau ara. Molo dung martunasi hau ara, sada partanda na pasti do i di haroro ni partaonan las. Ganup jolma di Israel diboto do i, jala ndang adong na menyangsikan i. Songon i, ndang adong sisangsihonon taringot tu haroro ni Kristus na paduahalihon i. Na paduahon, halelengse ni Jerusalem dohot bagas joro i. Uju i, di sada ombas dilumbahon Jesus do hasesega ni huta Jerusalem. Di jolo ni turpuk on pe diulahi do i. Taringot tusi didok: “Na so tupa salpu na sabangso on so jolo songgop saluhutna i.” Tutu do i, taon 70 M sega do huta i; toho huhut, godang dope dongan torbang ni Jesus na dohot marnida jala mangalami na masa i. Molo ramalan taringot tu hasesega ni huta i sintong masa, aha alasan so manghaporseai boaboaNa na taringot tu haroroNa na parpudi i? Nda duansa i rap dilumbahon dao andorang so hamamasana? Tolupulupitu taon ndang tingki na jonok be i tu sada ramalan jala ndang ummura meramalkan na naeng masa tolupulupitu taon na ro sian na meramalkan na naeng masa ribuan taon na naeng ro. Hinasintong ni boaboaNa i ma na niondolhonNa di pandohanNa na mandok: “Salpu pe sogot langit dohot tano on, anggo hatangKi na so tupa salpu.”

Laos i ma sipaingot ni jamita on tu hita, marpos ni roha ma hita maimaimahon haroro ni Kristus i. Pasti do Ibana ro. Sai unang ma adong sian tongatonganta na menyangsikan manang na manghangoluhon sikap na patuduhon kecenderungan tu na so manghaporseai. Lan do tanda angka na paingot jala menyadarkan hita tusi. Rupani, molo taida ragam ni hasusaan, molo tabege manang taalami bencana angka na masa ala ni parhusoran ni alam manang ala ni benturan-benturan di tonga ni masyarakat, naeng sadarhonon ni i do hita paboa naung lam matua do portibi on jala lam manjonok tu ujungna, tu haroro ni Kristus paduahalihon. Andigan Ibana ro, di tingki na jonok manang na di ombas na mansai dao dope ndang i na ringkot, pos ni rohanta do. Laos songon i di na tabolus nuaeng Advent, di jolonta dohot Natal sipestahononta, luhutna i naeng do gabe hataridaan ni panghaposion dohot panghaporseaionta di Kristus na naeng ro i. Ala ni i, sai unang ma adong sian hita na nilalapan ni manang aha pe gabe so marningot na tongon maimaima do hita di Kristus i. Ninna roha, sipaingot na mansai hona do i tu hita ai ndang sai haampinan hita taringot tusi. Rupani, di angka parhobason dohot di na mamestahon Natal tung torop do halak na lalap mamingkiri na asing, na sinoratan ni sipanganon dohot siinumon ro di kebutuhan dohot kepuasan sisangombas. Adong na masihansitan roha ala merasa diperlakukan tidak adil di pembagian konsumsi Natal. Sai hira holan i nama na hinirim sian sada pesta Natal, ndang adong na asing. Alai taingot ma, Advent dohot Natal sarana penantian do i di hita di Tuhanta Jesus Kristus na naeng ro i. Aut so gari ro Ibana topet di Natal i, naeng sude hita rade didapot; sai unang ma adong na hatadingan ala ni na manggulut kue manang hadiah Natal.

jkt.10.11.2010/mvs

Read More..

Advent-1

SERMON JAMITA TU MINGGU ADVENT-1, 28 NOPEMBER 2010
Jes.32:1-8

Patujolo

Mangula do Panurirang Jesaya di Juda di tingki hinarajahon ni si Usia (785-747 SM), si Jotam (745-42 SM), si Ahas (741-726 SM) dohot si Hiskia (725-697 SM; ida Jes.1:1). Ndang torus manorus, alai marujuuju do hombar tu haroro ni pangungkapon sian Debata. Tarbagi tolu do tingki ni pangulaonna. Periode-I, sian panjouonna sahat tu hamamasa ni Porang Siria-Efraimistis (747-734 SM); Periode-II, sian Porang Siria-Efraimitis sahat tu habubuang ni Israel Utara (734-721 SM); jala Periode-III sian habubuang ni Israel Utara sahat tu hatutungkum ni Jerusalem (721-700 SM).

Turpuk on tarrajum do tu hasadaon na umbidang, i ma 28:1-35:10. Masuk tu Periode-III. Tingki i, hot (berdaulat) dope Harajaon Juda, alai tarsosak situtu jala ingkon manggarar jombabahal tu Asur. Ala so tahan, dohot ala ni jujujuju ni Misir, memberontak do nasida dua hali, alai jalojalo do i diintopi Asur. Sudena i dibereng Panurirang Jesaya do songon panginona ni uhum ni Debata tu bangso i. Mansai balga do dosanasida, ai ndang porsea be nasida tu Debata, tu Misir nama. Mangulahon angkal dohot sipaototo do nasida, ndang olo manangihon hataNa (28:7 duu); jonok Debata di pamanganna, alai dao do sian rohana (29:17). Nang pe songon i, ndang laos sepi jamitana sian bagabaga haluaon. Sada sian i ma turpuk di hita ari on, na marbagahon haroro ni raja dohot harajaon hatigoran.

Hatorangan

Digombarhon dison, di angka ari sogot ni si Jesaya, na bangkit do sada raja di Israel na mangarajai hombar tu hatigoran (Hb.latsedeq, righteousness, kebenaran, hasintongan). Hata dohot patik ni Debata do hasintongan. Jadi, na mangarajai hombar tu hasintongan, mandok mamarenta hombar tu hata ni Debata, hombar tu patik dohot lomo ni rohaNa. Pamarentaon na sintong, ndang boi non i hirimon sian sahalak raja sambing, ingkon na tinungkol ni angka panuturina do i, angka pangurupi dohot parripena. Songon i ma didok dison, angka induk di harajaon hatigoran na naeng ro i, i ma angka parhobas ni harajaon mamungka sian tirket parginjang sahat ro di partoru manggomgomi do hombar tu uhum. Uhum (Hb.lamishpaat, judgment, keputusan hukum), i ma haputusan na binuat jala na nidabuhon ni panguhum taringot tu sadasada pangalaho manang parkaro. Ndang na sian roharohana, alai na hombar tu poda (petunjuk) na sian Tuhan i do.

Didok pandohan ni Batak: “Lobi rias, lobi palang, gota ni simarimponan; lobi palias, lobi pagar, molo raja jongjong di hasintongan.” Palias dohot pagar, i ma ulaula ni Batak laho mangondingi dohot paluahon diri sian parmaraan dohot jea ro. Alai boha pe togu ni palias dohot pagar, tumogu dope hasintongan na tiniop ni raja laho mangondingi jala paluahon parripena sian parmaraan. Suman tusi do na digombarhon di ayat on, singkop do hatuaon dohot hasonangan ni bangso i di gomgoman ni raja na magarajai hombar tu hasintongan dohot angka induk na mamarenta hombar tu uhum i. Taringot tusi pola do dipatudos raja i tu haporusan maradophon alogo, i ma inganan parondingondingan maradophon alogo na gogo na mansai jotjot mangombus di Palestina. Na mangihut, tu panisioan maradophon ari, i ma inganan partabunian maradophon mohop ni ari na maringarringar. Na mangihut muse, tu sunge di halongonan. Di Palestina godang do parhorsihan. Pasupasu na balga do molo adong sunge di sada parhorsihan, na boi pambuatan ni aek inumon dohot paridian. Na parpudi, tu parlinggoman ni dolok batu bolon di tano na marsilopak. Lopak, bontar; tano na marsilopak, i ma tano na mamontar ala hurang ditinggang udan. Di halak angka na mamolus di tano na songon i, lumobi di hos ni ari, ndang adong be inganan na tumabo jala na lumambok sian linggom ni dolok batu bolon na jumpang disi.

Di ay.3 didok: “Jala ndang mamereng dompak pudi mata ni jolma na marnida, jala pinggol ni jolma na marbinege manangihon disi.” Tar maol do antusan ayat on, lumobi bagian parjolona ala hurang hona panalinna. Ala ni i, niuji do patariparhon i songon on: “Jala mata ni halak angka na mamereng ndang rambon, jala pinggol ni halak angka na marbinege manangihon.” Na marhahonaan do i tu angka panurirang dohot guru ni bangso i. Somal do digoar panurirang di halak Israel paralatan, partondung, penglihat, seer (pat. Jes.29:10; 30:10; 1 Sam.9:9). Dijalo panuriang i do alatan jala dibege hata na sian Debata sipasahaton jala sipatubegehononna tu bangso i. Alai di hadadabu ni sandok bangso i tu hajahaton, jotjot do masa ndang adong be panurirang na ungkap mata dohot pinggolna tu alatan dohot hata na sian Debata. Molo tung adong pe na manggoari dirina panurirang, angka pargapgap do, sipaotooto; parmata na rambon dohot parpinggol na penge. Alai di pamarentaon ni raja hatigoran na hombar tu hasintongan na naeng ro i dohot angka induk na manggomgomi hombar tu uhum i paheheon ni Debata do angka panurirang parmata dohot parpinggol na ungkap tu alatan dohot tu hata na sian Ibana. Na marlapatan ma i, mulak denggan muse parsaoran ni bangso i tu Debata, jala sai dapotan ajar nasida sian alatan dohot hata na sian Ibana i.

Basabasahonon ni Debata huhut hahisaron ni harohaon dohot pardagingon. Taringot tusi didok di aya.4: “Jala roha ni jolma na bodo marpanimbangon, jala tiar marpangkuling dila ni jolma angka na hapot hian.” Pamurahon pangantusion, niuji do patariparhon ayat on gabe songon on: “Jala roha ni halak na harojor gabe mangantusi parbinotoan, jala dila ni halak na hapot hian gabe tiar manghatai.” Harojor dison mandok, ceroboh, gegabah, buru-buru mandabuhon uhum manang patupahon sipatupaon; ndang olo marpanungkun manang pasadahon tahi tu na asing, ndang sanga mambahen panimbangion gabe madabu tu hasalaan. Sabalikna do anggo na mangantusi parbinotoan, diparade do godang tingkina pahusorhusorhon haputusan manang sipatupaonna gabe jumpangsa pangantusion dohot parbinotoan na tangkas taringot tu masalah dohot uhum sidabuhononna. Hapot mandok, hallang manang gagap, ndang tiar, ndang tio manang torang panghulingna. Alai ndang holan tu hambatan fisik, na marhahonaan do i nang tu hambatan psikhis, i ma halak na so boi pasahathon isi ni rohana tarmasuk pangantusionna di hata Debata di bagasan rumang na taratur, na torang jala na haantusan. Sabalikna do na tiar manghatai, torang do soarana jala boi antusan. Laos songon i ma na tiar manghatai di bagasan artian na psikhis, boi do i pasahathon isi ni rohana tarmasuk taringot tu hasintongan ni hata ni Debata di bagasan angka pingkiran dohot pandohan na taratur, na torang jala na haantusan.

Andorang so raja hatigoran i, di toru ni panggomgomi na marhuaso di bagasan hajahaton, masa do pembalikan ni nilai-nilai, ai angka na oto i do digoar raja, jala angka parjahat i do na digoar namora. Na oto (Hb.lanaabaal, vile, kotor/keji), i ma na holit, elat rohana, mongkus, tertutup, berpikir sempit (pat.si Nabal: 1 Sam.25:3 duu). Alai angka i do na digoar raja (Hb.naadiyb, liberal, bangsawan, murah hati, penuh kebaikan), i ma aloalo (lawan arti) ni oto. Ra, ala ni holit dohot mongkusna gabe angka na mora do halak on jala gabe diparaja halak. Parjahat (Hb.uwlkiylay, churl/bad-tempered person, kasar/tidak tahu aturan). Alai angka i do na digoar namora (Hb.showa’, bountiful, murah hati), lapatanna na uli basa. Ra, tong ma i ala ni morana gabe boi mangalehon otikotik dohot manggaji halak umbahen digoar i na uli basa. Alai di gomgoman ni raja hatigoran i ndang masa be na songon i. Pandangan angka na palsu dohot gelar-gelar kosong justru na gabe parondingondingan ni hajahaton ndang jumpang be disi.

Di ay.6-7, dipatorang do tumangkas pangalaho ni angka na oto dohot parjahat na di ay.5 i, didok: “Ai manghatahon haotoon do halak na oto i, jala marsangkap hajahaton do rohana laho mangulahon haramunon, jala mandok poda haliluon dompak Jahowa asa mangarapari roha ni jolma na male, jala mangarampas siinumon ni na mauas.” Goarna do daina, hombar tu haotoonna dihatahon jala diulahon do haotoon (kekejian), marsangkapi rohana mangulahon haramunon angka na maralo tu paho (susila), dipodahon haliluon, dihatahon angka na sala taringot tu Jahowa. Hata ni Debata dohot poda na polin taringot tu Ibana, i do sipanganon dohot siinumon di angka na mauas male di partondion. Marhite na mamodahon na lipe i, songon na dirampas angka na oto i do sipanganon ni na male, jala diusehon aek siinumon ni na mauas. Na mangihut didok: “Jala marparulaon na jahat do halak parjahat i sai angkal ditahi roha laho mangago halak na tarjepol marhitehite hata gabus, nang pe hata uhum didok na pogos.” Parulaon na jahat (Hb.keelaayw, instrument), maksudna sude na marhahonaan tu hasasaut ni hajahaton ni parjahat, isara pingkiranna, hatana, haputusanna, angkal bisukna, alat perlengkapanna, dohot na asing. Sasaranna, angka na pogos ai ummura i angkalan, ai ndang adong gogona mampartahanhon hakna; nang hata sintong na nidokna, sae do gabus dibahen alusna.

Alai ndang sude songon i, di toru ni pangarajai na marhuaso di bagasan hajahaton tagan so raja hatigoran i pe adong do tong angka parlidang. Parlidang (Hb. wanaadiyb, liberal, bangsawan), i ma halak angka na basa, na ringgas roha marsilehonlehon, na lambas roha, parroha hatopan, na manghasiholi jala mangalului hasonangan ni dongan dohot luatna. Halidangon (Hb.nadiybowt, liberal tings), i ma ulaon dohot parbue ni ulaon ni parlidang i, isara hasonangan manang kesejahteraan umum. Sai i do dipingkiri rohana, i do ditahi jala diulahon. Di panggomgomion ni raja hatigoran i, marujung ma ulaon haotoon dohot hajahaton, alai hot do anggo halidangon i.

Panggohionna

Sadihari do hasasaut ni bagabaga on? Godang do sian panurirangon di Padan na Robi na bertingkat-tingkat panggohionna (Dr.Mr.D.C.Mulder). Adong do panggohion na jonok na masa di tingki ni panurirang i raphon halak angka na manangihonsa, alai adong do panggohion na dao bahkan na mansai dao na so dung hehe di roha ni panurirang i sandiri. Songon i ma taringot tu bagabaga na di turpuk on, angka halak na satingki dohot si Jesaya boi do marnida panggohionna di sada peristiwa sejarah na adong hahonaanna tu nasida. Rupani, uju hinarajahon ni si Ahas, marbungaran situtu do hasipelebeguon di Juda. Diungkap raja i do pintu ni bagas joro tu parsombaon di angka debata sileban, dipauba rumang dohot parpeak ni peralatan kebaktian di joro i laho pahombarhon tu na niidana di parsantian ni sipelebegu na di Damaskus (2 Raj.16:1 duu), gabe mangolu bangso i di haotoon dohot di hajahaton ni rohana be. Dung mate ibana, bangkit raja ma si Hiskia, anakna i. Diulahon si Hiskia do lomo ni roha ni Debata; dilohai do angka ulaula dohot pusat ni hasipelebeguon, dipaulak parsombaon tu Jahowa, jala mangarajai ibana hombar tu patik dohot uhum ni Debata (pat.2 Raj.18:1 duu). Baik si Jesaya, songon i nang halak Israel satingkina, na boi do mamereng i songon panggohion ni bagabaga on. (Sian angka penafsir modern pe adong do na marpingkir songon i). Alai panggohion na sasingkopna masa do i di ari ni Kristus Jesus. Ibana do Raja ni Hadameon i (Jes.9:5), na mamarenta di bagasan hatigoran dohot hasintongan (Jes.11:1 duu). Marhite haroroNa tu portibi on, nunga songgop harajaon hatigoran i, alai sipasingkoponNa dope i muse di ari sogot.

Rancangan Homiletis

Sian asi ni roha ni Debata, di ari on nunga sahat hita tu Taon Parhuriaon na imbaru. Na laos bertepatan do i tu Advent. Advent, lapatanna haroro (coming). Di sejarah ni angka ugamo, dihonahon do i tu haroro ni sada dewa tu daerah kultusna. Diambil alih angka na porsea do istilah i jala diintegrasihon tu parngoluon ni huria laho manggombarhon haroro ni Debata tumopot bangsoNa, haroroNa di bagasan AnakNa Jesus Kristus khususna. Ro do Kristus i manopot hajolmaon. Parjolo sahali di haroroNa na marhite hatutubuNa, jala paduahon di haroroNa di ari na parpudi. Laos hombar tusi ma hahonaan ni Advent i tu parngoluon ni huria. Na marhahonaan do i parjolo, tu parningotan dohot panjangkonon ni huria di Kristus naung ro tu portibi on na marhite hatutubuNa na secara khusus diingot jala dipestahon di Natal; dohot paduahon, tu panghirimon dohot panagamon di Ibana na naeng ro dope di ari parpudi. Tu na dua haroroNa i, manang na boha pe antong ringkot do pangaradeon manang parhobason. Ala ni ringkotna, pola do gabe hira na morot lapatan dohot ondolan ni Advent i sian haroro tu parhobason. Godang do tutu sihobasan. Ala ni godangna, sampe do adong halak na mirdong. Alai asa unang sala jala lalap hita di pangaradeon i, na parjolo sahali ingkon adong do di hita pamotoan na tontu taringot tu Ibana naung ro jala na naeng ro i. Ise jala boha do Ibana umbahen ingkon maradvent hita marningot dohot mamestahon hatutubuNa; ise jala boha do Ibana umbahen na ingkon maradvent hita manghirim dohot managam di haroroNa na paduahon di ari parpudi? Tapamanat ma i marhaborhatan sian turpuk jamita di hita ari on.

Na mangula do si Jesaya di tano Juda di sada partingkian na maol jala na mubauba, na gok parhusoran na balga di percaturan politik ni angka bangso di Asia Barat Daya. Na marhinorhon situtu do angka i tu parngoluon ni bangso i. Ndang holan di bidang politik, dohot do di parugamaon. Masa do ragam ni na so uhum, ai ndang porsea be toropan halak tu Debata, tu Misir nama; ndang olo be nasida manangihon hata ni Debata, alai ganup do mangulahon angkal dohot sipaototo; jonok Debata di pamanganna, alai dao sian rohana. Uju hinarajahon ni si Ahas, diungkap raja i do bagas joro tu parsombaon di angka debata sileban, dipauba rumang dohot parpeak ni ulaula na badia di joro i laho pahombarhon tu na niidana di parsantian ni sipelebegu na di Damaskus, gabe mangolu bangso i di haotoon dohot hajahaton ni rohana be. Di tingki i, aktif do si Jesaya manjamitahon uhum na sian Debata. Alai ndang holan uhum, bagabaga haluaon pe tong do dipatubegehon. Sada sian i ma turpukta ari on. Na marhahonaan do i tu hababangkit ni si Hiskia, raja na manggonti si Ahas. Diulahon si Hiskia do lomo ni roha ni Debata; dilohai do angka ulaula dohot pusat ni hasipelebeguon, dipaulak parsombaon tu Jahowa, jala mangarajai ibana hombar tu hasintongan, i ma patik dohot lomo ni roha ni Debata, tinungkol ni angka panuturina na manggomgomi hombar tu uhum, i ma keputusan hukum na hombar tu petunjuk na sian Debata. Di pangalaho na songon i na gabe gombaran patujolo do si Hiskia di Messias na pinarbagabaga i, Kristus na sian Debata.

Apala i ma na parjolo sibotoon jala siingotonta sian jamita Minggu Advent na parjolo on: Raja do Kristus naung ro jala na naeng ro i. Nang pe metmet jala lea huhut pogos Ibana di haroroNa i, Ibana do nampuna saluhut hagogoon dohot parhuasoon. Raja Hasintongan dohot Hatigoran do Ibana. Ala ni i, angka hasintongan dohot hatigoran do siparadeonta manjangkon Ibana. Taringot tusi didok si Jesaya do: “Soara ni na joujou di halongonan, pauli hamu dalan di Jahowa, patigor hamu di adaran dalan balobung ni Debatanta!” Mansai ringkot do i ingoton jala sorminhononta di Advent on dohot di Natal sipatupaonta di angka ari na ro on. Ndang sala na manarihon dohot paradehon angka na ringkot di pardagingon, pahean na imbaru jala na uli rupani; angkup ni kebaktian Natal ndang sala na merencanakan dohot na patupahon angka pesta manang perayaan na diisi marhite hiburan manang parmanganon, ai angka na marguna do i manghehei dohot pahilashon roha dohot partondion. Alai unang lalap hita di angka i, so tung gabe agoan hita maon di sintuhu ni Advent dohot Natal i. Apostel Paulus mandok: “Ndada sipanganon manang siinumon harajaon ni Debata; hatigoran do dohot hadameon dohot las ni roha di bagasan Tondi Parbadia” (Rm.14:17). Ala ni i, naeng di bagasan hatigoran dohot hasintongan hita di na maradvent dohot marnatal. Siparungkilhonon jala sisarihononta do huhut asa adong dampak ni Advent dohot Natal na tapatupa i di halak angka na malungun di hatigoran dohot hasintongan di tongatonga ni huria, masyarakat dohot bangsonta. Alai dia ma na hinarohon ni Kristus i, umbahen na ro Ibana manopot hita?

Mulak tu turpukta ari on, nunga nidok na mamarenta do si Hiskia di bagasan hasintongan dohot hatigoran. Di bagasan pangalaho i, na gabe haluaon do ibana di bangso i. Taringot tusi didok si Jesaya do: “Jadi marhaporusan tu ibana ganup jolma maradophon alogo, jala marpanisioan maradophon ari, tudoshon sunge di halongonan, tudoshon parlinggoman ni dolok batu bolon di tano na marsilopak.” I ma haluaon sian parmaraan angka na rongom sian alam na mansai ganas, manang tadok ma haluaon di rumang ni pardagingon. Alai ndang holan pardagingon, dohot do haluaon partondion, ai di tingkina dipahehe Debata do muse angka panurirang na buha matana tu alatan dohot pinggolna tu hata ni Tuhan i, angka guru na mangajari nasida taringot tu hasintongan dohot hatigoran. Na marlapatan ma i, mulak denggan muse parsaoran dohot komunikasi ni bangso i tu Debata, gabe sai dapotan ajar nasida di pardalanan dohot di parsoalan ni ngolunasida ariari. Dipahisar huhut rohanasida, angka na harojor hian gabe mangantusi parbinotoan, jala dila ni halak na hapot hian gabe tiar manghatai. Marhite na songon i gabe boi nasida lam marmanat di sibahenonna be, boi pasahathon isi ni rohana tarmasuk pangantusionna di hata ni Debata di bagasan rumang na taratur jala na haantusan, gabe lam ture parsaorannasida. Marujung ma dohot tingki ni parhuasoon ni na oto dohot haotoonna, panggomgomion ni na jahat dohot hajahatonna. Pandangan angka na palsu dohot gelar-gelar kosong justru na gabe parondingondingan ni haotoon dohot hajahaton ndang jumpang be disi. Alai sabalikna hot jala lam marhamonangan do anggo parlidang, i ma halak angka na basa, na ringgas roha marsilehonlehon, na lambas roha, parroha hatopan, na manghasiholi jala mangalului hasonangan ni dongan dohot luatna.

Songon i ma di bagasan dohot marhite Jesus Kristus naung ro jala na naeng ro i adong haluaon di jolma. Haluaon na utuh, pardagingon dohot partondion. Uju Ibana hadir jala mangula di portibi on, dipalua do angka na targogot, dilehon mangan angka na male, dipamalum angka na marsahit dohot na martihas, dipaias angka na huliton, dibaritahon Barita na Uli tu angkan na pogos jala diseahon hosaNa, mate Ibana di hau pinarsilang bahen haluaon ni saluhut pardosa. Marhite Barita na Uli na niulahon ni Tondi Porbadia, nunga dipatupa i dohot di hita. Dipaojak huriaNa di tongatonganta, dijangkon hita tu harajaonNa jala gabe panean di hasangapon sipapataronNa di ari sogot, di haroroNa na paduahalihon i. Siangkup ni silehonlehon sijaloon, na gabe tanggungjawabta do i huhut. Songon angka naung pinaluaNa, na tarjou do hita manorushon dohot managihon haluaon i tu angka na ginosagosa ni alam, tu angka na mangae sahit dohot tihas, dohot tu angka na mian di gomgoman ni haotoon dohot hajahaton. Ninna roha, naeng mansai tangkas do i parungkilhonon jala sarihononta marningot na mangolu do toropan ruas ni bangsonta di lingkungan alam na sangat berisiko. Tung so holang do dohonon bangsonta digosagosa bencana, isara halisungsung, aek magodang, rob, tsunami, dolok mapultak, dohot na asing. Ndang hapintoran hita dirinta, adong do sian i ala ni hasalaan dohot hamongkuson ni jolma, ala ni na mangarabasi tombak rupani dohot na mengkuras sumber-sumber daya mineral; alai gumodang do na di ruar ni huaso ni jolma. Taringot tusi, ra, apala na parjolo ingkon hobasanta i ma na paradehon angka ruas ni huria dohot warga ni masyarakat di daerah na sangat berisiko asa gabe angka halak na tanggap bencana. Ndang hasundatan ro angka bencana, alai marhite na tanggap bencana, saotikotikna na mangorui korban boi do ulahononta. Siparungkilhononta do huhut asa angka lembaga na martanggungjawab taringot tu bencana tongtong tanggap, unang sai gamang di hamamasana, lumobi unang gabe manambai luha ni korban manang mangalului paruntungan politis sian na masa i. Sisarihonon jala siurupanta do angka na korban. Ndang holan di pardagingon, alai dohot do di harohaon dohot partondion. Gari di na dohot hita tahe gabe korban, ndang sae hita holan siurupan, alai na tarjou do gabe angka na mabugang na pamalumhon. Angkup ni i ingkon jongjong hita songon panurirang ni Debata di tingki on na patubegehon hatigoran dohot hasintongan asa malua halak sian haotoon dohot hajahatonna, gabe mangolu jala marpangalaho di bagasan halidangon.

jkt.09.11.2010/mvs

Read More..

25 Trinitatis

SERMON JAMITA TU MINGGU 25 TRINITATIS, 21 NOPEMBER 2010
2 Kor.5:1-10

Patujolo

Surat 2 Korint songon na tatanda nuaeng on, hadomuan ni manang piga surat do i, na tinongos ni si Paulus tu Korint sadalan tu pangalaho ni pardomuan dohot parsaoranna na mubauba tu huria na di huta i. Na ro do tu huta i angka ‘parbarita na uli’ na asing. Disegai nasida do pardomuan ni si Paulus tu huria i, ai didok do na so apostel na tutu ibana, ai ndang tarida ninna di ulaonna tanda ni apostel na sintong. Angkup ni i, adong hian do tahi ni si Paulus naeng manopot huria i, alai gabe ndang tarpatulussa. Dipabalgabalga nasida ma i, didok ma ibana halak na martahi sian neang ni rohana jala marguru tu sibukna (pat.2 Kor.1:12). Ala ni i lam sega ma parsaoran apostel i tu huria i. Ihut tusi, adong ma angka usaho tu pardengganan na pinatupa ni apostel i, i ma marhite panopoton, marhite utusan dohot surat. Hombar tu perkembangan, ditongos ibana ma manang na piga surat tu huria i. Di mulana maol do, alai di pudi marparbue do angka usaho i, muba do roha halak Korint jala diokui muse otoritas haapostelon ni si Paulus. Dung mate apostel i, dipasada huria i do muse angka suratna i. Ndang dikompilasi, alai diedit gabe sada hasadaon na utuh. Ala ni i ndang jumpang hita be isi lengkap ni surat i sadasada. Dung i ditambahon do muse tusi sada surat, i ma surat umum ni si Paulus tu angka huria na di Akhaya na taringot tu kolekte na tu huria Jerusalem, i ma 2 Kor.9. Punguan ni angka surat i ma muse na gabe digoar 2 Korint di kanon Padan na Imbaru. Tema pokokna, i ma pembelaan taringot tu haapostelonna. Ala ni ‘paraloanna’ tu huria i, di suratna i, tarpaksa do ibana godang manaringoti dirina, manaringoti pengalamanna, hasurunganna, dohot sitaononna. Songon i pe i, ndang surat pribadi i, surat huria do. Panaringotion di dirina dijalin do i dohot bahasan teologi angka na arga.

Di hata Batak, ulu ni turpuk on: Sihol ni roha di daging na imbaru. Tarmasuk tu hasadaon na umbidang do i, i ma: Pembelaan taringot tu tohonan haapostelon (2:14-7:4). Di jolo (4:7-18), ditaringoti do sitaonon ni haapostelon i. Ndang holan ala ni paraloan sian duru i, alai tarmasuk hakikat ni haapostelon i do i. Hamamate dohot hangongolu ni Kristus, i do sintuhu ni Barita na Uli i. Ala ni i, pamaritahonon di Barita na Uli i ndang boi i sepi sian pamaritahonon di hamamate dohot hangongolu ni Kristus i. Alai ndang sae i dibaritahon holan marhitehite hata, ingkon dohot do marhitehite ngolu. Hombar tusi didok si Paulus na dipausungusung ibana do tongtong hamamate ni Jesus i di dagingna, asa gabe patar nang hangongolu ni Jesus i na laos tong dipausungusung ibana di dagingna (4:10). Jadi sitaonon i hapataran ni hamamate ni Kristus do i di daging ni apostel i. Alai di na so binasa ibana di sitaonon i, i ma tandana na laos manggomgomi do di ibana hangongolu ni Kristus na manuju tu hangongolu na imbaru, na manongtong ro di saleleng ni lelengna. Na manghirim do si Paulus disi, gabe ndang marnaloja ibana mamaritahon Barita na Uli i. Pingkiran i ditorushon dope di turpuk on.

Hatorangan

Di ay.1, ditaringoti si Paulus do parasingan (kontras) ni ngolu sinuaeng on tu na naeng ro. Taringot tusi, dipangke do gombaran angka na suman tu na jumpang di filsafat Gorik. Mangihuthon filsafat i, dua bagian do jolma i, i ma daging dohot tondi. Na sian portibi on do daging i, na jahat jala na laho salpu; alai na sian ginjang do anggo tondi i, sian debata; na badia jala na ilahi. Na tarhurung tondi i di bagasan daging na jahat i. Tujuan akhir ni tondi i, i ma na malua sian hurungan daging i, dung i mulak tu debata, haroroanna i, jala i ma na ginoaran haluaon ni tondi. Mamangke gombaran na marasing, sambolus idaon, sai hira na ditohoi si Paulus do dison pingkiran i. Sai hira na naeng sejajarhononna do daging tano on tu lapelape, pangisina tondi; daging na imbaru sogot i tu bagas, jala pangisina laos tondi na sasada i. Sasintongna, pingkiran sisongon i sangat asing do i di hata ni Debata. Ndang ditanda Bibel pingkiran taringot tu dikhotomi ni manisia, i ma daging dohot tondi; alai sisada hasadaon (totus homo) do jolma i, i ma daging jala tondi, tondi jala daging. Hibul do jolma i madabu, hibul diuhumi jala mate, ndang holan dagingna; laos songon i hibul do ditobus jala dipalua, ndang holan tondina. Jadi na naeng ondolhonon ni si Paulus dison parasingan ni ngolu sinuaeng on do dohot ngolu na naeng ro sogot i. Taringot tusi, dipatudos do i tu parasingan ni parmianon na di lapelape dohot parmianon na di bagas. Somalna, bangunan sementara do lapelape, bangunan na menetap (permanen) do ia bagas; tempat tinggal sementara do lapelape, tempat tinggal tetap do anggo bagas. Halak Israel rupani, sapanjang pardalanan sian Misir tu Kanaan, mian di lapelape do nasida, di kemah na setiap saat siap dibongkar. Songon i ma pangalahona, parsatongkinan do ngolu na mardaginghon daging tano on, alai manongtong do anggo ngolu na mardaginghon daging na imbaru i. Di na ro tingkina, marujung do sinuaeng on, mate; alai di ari parpudi, paheheon ni Debata do i muse di bagasan rumang na imbaru. Panghirimon na tontu do i di Apostel Paulus dohot di angka donganna. Ala ni i do asa so marnaloja nasida manghatindanghon Barita na Uli i.

Saleleng dison, marhoi do na porsea i. Boasa? Parjolo, ala ni haporsuhon na mangonai tu nasida (pat.4:17). Nunga nidok, sitaonon i huhut do i songon hataridaan ni hamamate ni Jesus di daging ni na porsea i (ida Patujolo). Na marlapatan ma i, lam jonok do saluhut tu hamatean, lam tunduk tu habusuhon (pat.Rom 8:20). Paduahon, ala ni sihol ni rohana tu na sian ginjang i. Nunga laos nidok, hangongolu ni Jesus i pe dipausungusung na porsea i do di dangina. I do na gabe gogona pausungusunghon hamatean i, na manjamin so gabe mago boti nasida manang binasa. Sambolus, sangat tidak memuaskan do na mangolu di ketegangan antara ni hamatean dohot hangoluan songon i. Nda ingkon hangoluan i do na monang? Molo i do, boasa ingkon jolo tunduk saluhut tu habusuhon? Nda dumenggan do nian molo pintor dipataripar tu hangoluan i so pola ingkon mamolus hamatean? Taringot tu hatataripar tu ngolu na naeng ro i, di ay.2 on mimbar do panggombarhon ni apostel i sian na di ay.1 i, ai dipangke do hata solukhononhon (mengenakan). Sian ay.3-4 torang do sangkapna, i ma na patudoshon ngolu i tu na marabit. Dison pe, na manginjam do si Paulus di gombaran na jumpang filsafat Gorik. Hombar tu na nidok nangkin (ida ay.1), di hamamate ni jolma i, malua do tondi i sian hurungan daging na jahat i, dung i mulak ma tu debata haroroanna i. Ndang marholiholi, ndang marsibuk, ndang marrumang. I ma na nidokna ketelanjangan jiwa. Mamangke pingkiran i songon bingkai ni panindangionna, digombarhon si Paulus do, di portibi on marpahean daging tano on do jolma i, daging na lam buruk jala na laho mate; alai di ari sogot i, pangkeonna ma na sian ginjang i, i ma daging haheheon na manongtong ro di saleleng ni lelengna. Jadi, ndang songon na piningkir ni halak Gorik i, gabe angka tondi na marsaemara jolma i disi, angka na tanpa bentuk. Porsea situtu do si Paulus disi umbahen na didok: “Ai nda tung songon na marsaemara hami tardapot disi, tung marabit do.” Marningot siholna sandok marhoi ma rohana naeng gira sahat tusi so pola mamolus hamatean. Sihol dohot hoihoina i na marpardomuan do i tu panghirimon ni rohana na di tingki ngoluna dope ro Kristus i paduahalihon (pat.1 Kor.15:51-52;1 Tes.4:15).

Ndang tubutubu ni roha ni jolma i, ndang nipi manang parbue ni perenungan ala ni sihol ni rohana tu na dumenggan, alai pamotoan na sian Debata do i. Ibana do na paradehon jolma tusi marhite na manuanhon haporseaon. Tu sangkap i, diusehon do Tondi Porbadia tu jolma. Marhitehite Tondi Porbadia i gabe tontu jala pasti do pemilikan ni jolma di na imbaru i. Hombar tusi ma digoar Tondi Porbadia i dison patujolo, lapatanna uang muka. Marhitehite na manggarar uang muka dipastihon manang dijamin do na ingkon adong panggararan na mangihut. Molo so i, seang do antong uang muka i. Songon i, molo pola diusehon Debata TondiNa na badia i tu jolma, dipaian jala mangula di bagasanna laho patupahon haimbaruon dohot manubuhon tu bagasan haporseaon, tung tagamon ma so paujungonNa i manogihonsa sahat tu hangoluan sogot?

Ala ni i, “pos do rohanami tongtong,” ninna apostel i, lapatanna marsihohot di bagasan panghirimon, sabar jala togu rohana, ringgas mangulahon panjouonna, ndang marsak jala ndang mandele. Dao dope nian na porsea i sian Tuhan i, lapatanna di portibi on dope jala di bagasan daging; di gomgoman ni kefanaan jala tunduk tu habusukon. Di keadaanna na songon i, sai manosak jala mangonai dope sitaonon dohot haporsuhon. Alai panghirimon di hamuliaon sogot i, tuk do manubuhon habengeton dohot parsihohoton.

Pingkiran taringot tu hadaoon sian Tuhan i, diuduti dope di ay.7, didok: “Ai di bagasan haporseaon do hami, ndada dope di bagasan na marnida.” Keadaan na di bagasan daging na laho salpu (fana), na mangigil haporseaon do i, ndada na mengandalkan parnidaon. Molo mengandalkan parnidaon do antong, ndang tagamon so marujung i di pandelean, ai kefanaan i do na nalnal tarida jala manggomgomi saluhut. Alai molo lam surut jala lam tanggal pe daging i, ala ni haporseaon i tangkas do botoon ni na porsea i paboa na so i ujungna, alai adong do haheheon dohot hangongolu na manongtong. Haporseaon i do na tuk mandodo i, ai haporseaon i pos ni roha do i di angka sihirimon jala pamotoan na tontu taringot tu na so niida (Heb.11:1).

Marningot sihirimon i, “lam pos do rohanami,” ninna si Paulus muse di ay.8. Na nidokna, lam togu rohana jala lam marsilohot tusi. Ndang parsoalan be di ibana mate. Nian, di jolo didok, tagonan do di rohana unang jolo mate, alai dilampishon ma daging na imbaru i tu daging na olo mate i, asa dibondut hangoluan i hamatean i. Alai – sahali nari – marningot sihirimon i, nunga lasan rohana bungkas sian daging on, lapatanna rade jala las rohana mate.

Alai panghirimon di na imbaru i ndang paloashon na porsea mansohot sian panghobasion dohot panindangion. Sabalikna do tahe, saleleng dipaloas Tuhan i, lapatanna saleleng di bagasan daging ingkon tongtong do halashonon jala hasiholanna panghobasion dohot panindangion i. Dohot hata na asing, ndang gabe halomohononna hamatean lobi sian hangoluan, alai ingkon di ketegangan antara ni na malungun mate dohot marlomo ni roha mangolu do. Taringot tusi, di suratna na tu halak Pilippi didok si Paulus do: “Duansa do manosak ahu: Malungun do ahu borhat, asa rap dohot Kristus; ai dumenggan situtu do i. Alai rumingkot do mian di bagasan daging ala ni hamu” (Plp.1:23-24). Na nidokna, ala ni panghirimon i lasan do rohana mate; alai demi panghobasion di huria i, rumingkot dope ibana mangolu. Angka na marlas ni roha mangolu jala na mamangke hangoluanna tu panghobasion dohot tu panindangion, angka i do na na gabe halomoan di roha ni Tuhan i di ngolu on dohot di tingki sogot.
Di ay.10 diondolhon, andorang so sahat tu haimbaruon i, adong do jolo paruhuman. Disi, ndang holan si Paulus, alai ganup do ingkon mampartanggunjawabhon manang songon dia ibana mangolu. Nasa na mangolu di bagasan haporseaon jala na mamangke ngoluna tu panghobasion dohot panindangion di Kristus i, i do na targoar siulahon na denggan. Halomoan ma i di Tuhan i, jala manjalo di hangoluan na di bagasan daging na imbaru i. Sabalikna do angka na mangolu so di bagasan haporseaon, targoar siula na roa do i jala hona uhum tu hamagoan na saleleng ni lelengna, ai nasa na so tubu sian haporseaon dosa do i (Rom 14:23). Ndang na mandok na niomo ni ulaon do hangoluan sogot i, ndang; asi ni roha ni Debata sambing do i, ai gogo laho mangulahon na denggan i pe, na sian Ibana do. Jadi molo dilehon pe hangoluan na imbaru i, asi ni roha do i, basabasaNa sambing.

Rancangan Homilietis

Ari on, Minggu 25 dung Trinitatis, tongon do Minggu Ujung ni Taon Parhuriaon. Goarna i do daina, di minggu on marujung ma taon parhuriaon na tadalani on, dung i di Minggu na ro, di Advent-I, datdatanta ma muse pardalananta i, di Taon Parhuriaon na imbaru. Songon taon na sai marujung i, sude do ingkon marujung. Portibi on ro di isina sude, marujung do; ngolunta pe marujung do. Hombar tusi, Minggu Ujung ni Taon Parhuriaon songon on, laos ditontuhon angka ama ni huria do gabe Minggu Parningotan di Angka na Monding. Aha do lapatan ni i?

Di Konfessi ni hurianta HKBP taon 1996 didok do songon on: “Dipatupa huria i do parningotan di angka na monding laho padungohon haporseaonta marningot ajalta sandiri huhut pahothon panghirimon di hamonangan ni Kristus na manaluhon hamatean, songon i nang panghirimon di banua ginjang sambulo ni tondinta dohot di hadodomu ni na porsea i dohot Tuhan Debata sahat tu na ro Jesus Kristus paduahalihon.” Sian i torang, godangan marhahonaan tu hita do parningotan i jala godangan mamereng tu jolo. Marhite na marningot donganta angka naung jumolo monding i, naeng gabe tarsunggul do rohanta marningot hamamatenta be, ai songon nasida, mate do hita muse. Alai molo mate hita, tu dia do hita? Mangalusi i, naeng marsiajar do hita sian turpuk jamita di hita ari on.

Didok si Paulus nangkin: “Ai on do huboto hami: Di na tanggal bagas parlapelapeannami na sian tano on, adong ma di hami inganan na sian Debata, bagas na so pinauli ni tangan, na mian salelenglelengna di banua ginjang i.” Sada panindangion haporseaon do i sian apostel i di na mengalami kefanaan ni ngolu. Songon jolma na somal manang pe songon apostel ni Tuhan i lam tu burukna do ngoluna ariari, lam manjonok tu hamatean. Anggo di pangantusion ni halak satingkina, angka jolma na marsitiopan tu filsafat Gorik, hamatean i do ujung ni saluhut. Molo mate jolma, songon i ma mangihuthon poda i, sae ma saluhut; busuk ma dagingna, mulak ia tondina i tu haroroanna, ndang marholiholi, ndang marsibuk, tanpa bentuk, tanpa daya jala marsaemara, ndang adong sihirimon. Maradophon i, dihatindanghon Apostel Paulus do, ia monding pe jolma adong dope sihirimon. Sintong do, ala ni dosa i, tunduk do sude tu habusukon. Alai ala ni asi ni roha ni Debata na di bagasan dohot na marhitehite AnakNa, Tuhan Jesus Kristus naung ro tu tano on, nunga dipadiri haluaon di angka na porsea. Nunga mate Kristus i, hehe jala mangolu. Marhitehite hamamate dohot haheheonNa i ditaluhon do hamatean i. Ala Ibana, angka na mate di bagasan haporseaon pe hehe do muse di bagasan daging na imbaru, daging haheheon na mian ro di saleleng ni lelengna di banua ginjang i.

Na gabe apulapul jala sipapos rohanta ma i di hita di Minggu Parningotan di Angka na Monding on. Molo taingot nuaeng donganta na porsea angka naung pajolohon sian hita, molo marhohondo pe hita marningot angka na itahaholongi, angka sisolhot, haha anggi, iboto manang natorasta angka naung jumolo monding, taboto ma ndang na tu dia jala ndang na mago nasida, alai di bagasan pangaramotion ni Debata do nasida tongtong. Ndang gaitgait i, alai hasintongan do molo didok di liturgi pananomon i: “Tuhan Debata na manompa ho, dohot Tuhan Jesus Kristus na paluahon ho sian dosa, dohot Tondi Porbadia na manjou ho tu hangoluan na so ra suda, i ma mangramoti orbuk ni bangkem paima ro ari parpudi.” Laos songon i ma nang di hita, molo lam suda pe gogonta jala lam tanggal hita sian daging on, dung i di na ro muse tingkina marujung pardalananta di portibi on, pos ma rohanta manghirim na ramotan ni Debata do orbuk ni bangkenta, dung i paheheonNa do hita di ari parpudi di bagasan daging haheheon laho manjalo hangoluan na manongtong, na so marujung be saleleng ni lelengna. Ala ni i – sahali nari – Barita na Uli ni Minggu Parningotan di Angka na Monding on manghatindanghon tu hita: “Di na tanggal bagas parlapelapeannami na sian tano on, adong ma di hami inganan na sian Debata, bagas na so pinauli ni tangan, na mian salelenglelengna di banua ginjang i.” Alai songon dia do hasasahatta tu haporseaon sisongon i?

Taringot tusi didok si Paulus do di jamita on: “Alai na patauhon hami tusi, Debata do i, dung jolo dilehon tu hami Tondi i, patujolona i.” Na nidokna disi, haporseaon na taringot tu hangoluan sogot i ndang tubutubu ni roha ni manisia i, ndang nipi manang parbue ni perenungan ala ni sihol ni rohana tu na dumenggan, alai pamotoan na sian Debata do i. Ibana do na paradehon jolma tusi. Tu sangkap i, diusehon do Tondi Porbadia tu jolma i, dipaian di bagasanna asa mangula patupa haimbaruon dohot manubuhon tu haporseaon. Marhite i gabe pasti do pemilikan ni jolma di hagoluan sogot i. Hombar tusi, digoari do Tondi Porbadia i dison patujolo, mandok uang muka. Marhite na manggarar uang muka dijamin do na ingkon adong pelunasan, ai molo so i, siseasea do uang muka i. Songon i, molo pola dipaian Debata TondiNa di bagasan jolma, tung tagamon ma so paujungonNa i manogihonsa sahat tu hangoluan sogot? Ala ni i pos do roha disi. Nang pe so tarida dope, baliksa tahe kefanaan i dope na nalnal sian ari tu ari, ndada i ujungna, alai hatongtonggon do na monang ro di salelenglelengna. Haporseaon i do na tuk mandodo i, ai haporseaon i pos ni roha do i di angka sihirimon jala pamotoan na tontu taringot tu na so niida (Heb. 11:1). Marningot i, manang sadihari pe ro panjou ni Tuhan i, ndang mabiar be na porsea i, alai di bagasan pos ni roha nama manjalo dohot mamongoti hamateanna.

I ma muse apulapul jala sipapos rohanta di Minggu Parningotan di Angka na Monding on. Ndang na sian jolma, alai na sian Debata do panghirimanta i. Maol do i siat tu roha ni jolma, angka na mengandalkan parnidaon manang kenyataan empiris. Ala kefanaan i do na nalnal sian ari tu ari, gabe ndang tarjalosa haadongon ni haheheon dohot hangoluan sogot. Halak na kuno, manang pe na moderen. Di sada laporan penginjilan sian tingki na galia tarjaha do na marjamita do sahali sahalak parbarita na uli di sada luat, ditaringoti do haheheon sian angka na mate. Simpul na marjamita i manungkun ma sada halak, didok: “Nunga piga halak naung hehe sian na mate jala nunga hea diida ho sada sian i?” Alus ni parjamita i: “Ndang dope.” Dung i, mengkel ma na manungkun i, didok: “Nunga huboto hian ingkon i alusmu, ai dijamitahon ho pe i, ndang ala na adong haheheon i, alai ala na didok halak do i tu ho.” Di roha ni angka ompunta pe, ndang adong sihirimon do balik ni hamatean i, ai didok do: “Langge luluk, mate busuk, sae.” Ala ni i, di na marjamita sahali parbarita na uli di sada huta, didok sada sian angka ompunta do: “Aha nimmu, hangoluan na saleleng ni lelengna? Ah, ndang adong i. Anggo di rohangku, gadong do hangoluan na saleleng ni lelengna, ai molo dung hinali parbuena, tarsuan dope andorna.” Laos songon i do di tingki na maju on, sai marmullopan do halak na marsitiopan tu saiens manang ilmu pengetahuan sambing angka na mandok na so adong hangoluan di balik ni hamatean. Di nasida, songon pinahan do jolma i, molo mate, sae ma sude, ndang adong be sihirimon. Jamita ari on ma na gabe gogonta mangadopi angka sipangalilu sisongon i. Ndang adong sigangguhonon taringot tu haheheon dohot hangoluan sogot i, ai na sian Debata do i. Alai boha do asa partohap hita disi?

Taringot tusi didok si Paulus do: “Ala ni i huhut huringkoti hami, naeng halomoan ni rohaNa hami, manang naung sahat tu sambulo, manang di pardalanan dope.” Molo naeng parjambar halak di hangoluan dohot haimbaruon sogot i ingkon halomoan do ibana di Debata. Songon dia ma tarpatupa i? Ingkon pangkeonna ngoluna na fana i tu na denggan, unang tu na roa. Deba sian ulaon na denggan i, i ma na patupahon panghobasion dohot panindangion di goar ni Tuhan i. Angka na masihol di haheheon dohot hangoluan sogot i ingkon mangolu do di ketegangan antara ni na maimaima di haroro ni Kristus dohot na patupahon angka panghobasion dohot panindangion di goarNa. Taringot tu saluhutna i ingkon gabe patar do saluhutna sogot di jolo ni habangsa paruhuman ni Kristus i. Angka na mangolu jala mangula di bagasan haporseaon, manjalo di hangoluan dohot daging na imbaru i. Sabalikna do angka na mangolu jala na mangula so di bagasan haporseaon, targoar siula na roa do i jala hona uhum tu hamagoan na saleleng ni lelengna, ai nasa na so tubu sian haporseaon dosa do i (Rom 14:23).

Apala i ma joujou na mansai ringkot parrohahononta sian jamita Minggu Parningotan di Angka na Monding on, naeng hita gabe halomoan di roha ni Debata. Ndang masalpuhu ia nidok, mansai jotjot do hita ummanat mamingkirhon naeng gabe halomoan hita di jolma asa di Debata; tumangkas manjamothon asa unang tarhartuk panghilalaan ni dongan sian na mangaramothon unang gabe tarrimas nian Debata. Baik taringot tu na mangolu, laos songon i do nang taringot tu na mate. Taparrohahon ma rupani, molo monding natutua, tung mansai radot do ianakhonna di ruhut ni adat dohot hasomalan, ndang maralangalang na deba patupahon saluhut asal sonang roha ni raja adat, dongan sahuta, dongan tubu, boru, hulahula dohot angka na asing jala dipuji huhut diparhatua nasida; alai ndang sai apala songon i anggo taringot tu na marhahonaan tu hata ni Debata. Mardomu tusi, ganup hita on patut do marsiajar sian barita ni halak na mora dohot si Lasarus na pogos. Mate do
si Lasarus i, ndang adong barita taringot tu hamamatena; ditanom do ibana manang na ditimpalhon songon i tu ronggangronggang, ndang dipaboa. Alai na pasti, diboan angka surusuruan do ibana tu ampuan ni si Abraham. Mate ma dohot na mora i jala ditanom. Ala ni morana, tontu di bagasan hatongamon; torop paningkir angka na papujipuji ibana. Alai marisuang, tu banuatoru do ibana. Songon i ma angka na gabe halomoan di jolma, alai ndang halomoan ia di Debata. Tapasiding ma na songon i, alai tapareahi ma asa gabe halomoan hita di Debata, tapangke ma ngolunta tu na denggan, tu panghobasion dohot tu panindangion di Tuhan i.

jkt.01.11.2010/mvs

Read More..

24 Trinitatis

SERMON JAMITA TU MINGGU 24 TRINITATIS, 14 NOPEMBER 2010
Pjm.11:1-6

Patujolo

Di Padan na Robi na marhata Heber, buku Parjamita tarrajum do tu bagian Surat manang Ketubim. Di hata Heber digoar do buku i Kohelet (ro sian hata kahal), lapatanna huria (jemaat). Na marhahonaan do istilah i tu sada jabatan di huria dohot tu halak na maniop jabatan i, i ma parjamita manang pangajari. Di buku i, digombarhon panurat i do dirina songon sahalak kohelet na marjamita manang mangajari taringot tu kesiasiaan (1:14, 17; 2:21 dna). Mangihuthon kohelet i ndang tarojakhon agia ise ngolu dohot panghirimanna tu angka na di tano on, ai kesiasiaan (alogo sambing) do i. Dung dipaujung panghataion taringot tu kesiasiaan i, di bagian parujungan na mamungka sian turpuk ari on, ditaringoti ma muse hasopamotoan ni jolma taringot tu tingki naeng na ro. Alai nang pe alogo sambing sude jala ndang adong na binoto taringot tu tingki na ro, ingkon las do roha ni jolma mangula (pat.3:22; 5:18), optimis jala ringgas songon na niondolhon ni turpuk ari on.

Hatorangan

“Padalan ma sagusagum tu bariba ni laut, ai di laonlaon ni ari dapot ho do i marbunga.” Pinatudos tu hata aslina, hurang hona do salinan on, gabe niuji do patariparhon i songon on: Baorhon ma rotim di sisik ni aek, ai di laonlaon ni ari dapot ho do i muse. Ragam do pangantusion ni halak taringot tu ayat on. Adong do na manghonahon i tu partigatigaon antar pulau manang benua. (I do ra na melatarbelakangi salinan Batak mamangke hata ’tu bariba ni laut’ dohot ’marbunga’ atik pe so adong i di teks asli). Hombar tusi, roti manang sagusagu dison dibereng do i songon metafor ni hasil pertanian lumobi gandum na ditigatigahon jala diangkut mamostang laut marhitehite hopal. Partigatigaon umumna, partigatigaon antar pulau khususna, usaho na gok risiko do i; boi manjadi, boi ndang. Di bona ni ulaon i, tung so adong do na binoto ni jolma i taringot tu na manjadi i manang na ndang. Nang pe songon i ingkon barani do jolma i mamungka dohot mangulahonsa, ai molo so adong do na dipungka dohot na diulahon ndang na laho adong sitagamon na manjadi, alai molo dung adong na dipungka dohot na diulahon adong ma sitagamon na manjadi. Hombar tusi ma dipasingothon dison: “Baorhon (padalan) ma!” Na paduahon, adong do muse na manghonahon i tu na marsilehonlehon, isara ni na mamonggoli dohot mambagibagihon roti tu halak na male (pat.Jes.58:7). I pe ulaon na so pasti do. Molo diponggoli sasahalak rotina di tingki haadongonna jala dibagibagihon tu na male, ndang adong jaminan na ponggolan ni halak muse rotina jala bagihononna tu ibana tung sura gabe marbalik na masa, madabu ibana tu hapogoson. Unang be na asing, gari halak naung niurupanna i boi do ndang parduli di ibana. Nang pe songon i ndang gabe so ulahononhon na marsilehonlehon, ai siangkup ni kemungkinan so marparbue, kemungkinan marparbue pe tong do adong. Na patoluhon, adong do na mangalapathon i secara harfiah, i ma na mangulahon ulaon haotoon alai gabe marguna. Ulaon haotoon do na mambaorhon roti tu aek, ai maup do i jala malala. Alai adong do tong kemungkinanna ndang malala jala sangkot di sada inganan gabe boi dapot muse. Na gabe sipaingot ma i tu hamanaton na malobihu gabe so barani patupahon dohot mangulahon agia aha. Samanatmanat ni jolma di na martahihon dohot mangulahon sadasada siulaon, ndang adong jaminan na ingkon manjadi, boi do tong gagal; gari gabe jea bolon tahe boi do. Pardalan ni angka na masa ndang tarparetonghon i secara pasti andorang so hamamasana; angka ulaon na tardok haotoon nian boi do marparbuehon na denggan na so hinirimhirim hian, sabalikna angka ulaon na mansai tangkas direncanahon jala diulahon di bagasan sandok hamanaton boi do gabe songon alogo sambing. Ndang na mandok na sude ma ulaon na asal diulahon i manjadi, ndang; godang do tong na gagal; suang le do songon i, ndang na mandok na so marguna angka perencanaan na matang dohot hamanaton, marguna do jala patut do i parrohahonon jala ulahonon. Na paopathon, dihonahon na deba dope i tu partanion. Jadi, roti dibereng do i songon metafor ni boni. Taringot tusi didok, ingkon saburhon do boni tu tano na maraek asa boi hirimon suha ni gotilon. Di na opat pingkiran i, adong do sada benang merah, i ma: Ndang tarpastihon hajajadi ni sada ulaon di pamungkaanna, alai nang pe songon i ingkon barani do jolma mamungka dohot mangulahon, ai holan marhite na songon i do adong hirimon sitapuon di tingki na ro.

“Bahen marjambar pitu manang ualu halak, ai ndang diboto ho manang jea dia ro tu atas tano on.” Manang dia pe sian na nidok ondeng na gabe hahonaan ni ay.1 i, dipaingothon ay.2 on do asa unang nalom roha ni jolma i mameakhon panghirimanna holan tu sada kemungkinan. Ia na martigatiga do, ndang sae holan sahali, alai sai didatdati; rumangna ndang sae holan sada, porlu do diversifikasi; carana pe boi do marmansam, isara barter, tunai, bon dohot na asing; songon i pengirimanna, ndang ingkon marhite sada hopal, atik boha do ingkon dua manang lobi. Mansai ringkot do i ai ndang diboto jolma manang jea dia ro tu tano on. Molo ro jea, isara harugian sahalisahali, unang mandele jala mansohot, ai na boi manjadi do i tu tingki na ro. Ia na na marsilehonlehon do ndang sae holan sahali manang holan tu sahalak, alai tu pitu manang ualu halak, lapatanna tu manang piga halak na so tontu jala na so tarbatas bilanganna, ai molo tung dia pe na masa marbalik ibana gabe pogos, so mangurupi pe na sada, hirimon dope na paduahon dohot na mangihut. Laos songon i do nang taringot tu na patoluhon, na mangulahon angka ulaon na so tangkas direncanahon bahkan na terkesan haotoon jala na asal diulahon, ndang sae holan sada manang holan sahali, ai ndang sai binoto na mamboan lapatan i di hamamasa ni jea na ro tu tano on. Suang songon i ma tong taringot tu na manabur manang na martani, ringkot do variasi isara tumpang sari (pat.ay.6).

“Molo sorat angka ombun i, dipangusehon ma udan tu atas tano on, molo marobo hau dompak dangsina manang dompak utara, ia tusi haroboan ni hau i laos disi do i peak.” Mardomu tu ay.2, nang pe so binoto rumangna, alai pasti do, sai na ro do jea tu tano on. Suman tu udan, molo dung sorat angka ombun, ndang boi be i so ro. Harorobo ni hau pe, ndang haambatan; molo nunga ingkon marumpak, ndang boi be so marumpak. Manang na dompak dia harumpahanna, tu dangsina do manang na tu utara, i pe ndang haambatan; molo tu dangsina do, ba tusi; ia dompak utara do, ba dompak i. Molo dung sanga rumpak laos disi nama i peak, ndang tarpajongjong be asa tu na asing muse harumpahanna. Songon i do jea i, molo nunga ingkon ro, ndang boi so ingkon ro. Ala ni i mansai ringkot ma na patupa angka na marguna na boi hirimon di hamamasa ni jea.

“Manang ise na pajagajaga alogo, ndang tagamon saut manabur, jala manang ise na patangkastangkas ombun, ndang tagamon saut ibana manggotil.” Hajajadi ni suansuanan ndang tarsirang i sian cuaca. Ala ni i angka partani na giot marhasil ndang boi so ingkon mamparetonghon cuaca. Alai unang ala ni biarna mida risiko gabe maetonghu, ai ndang adong na boi meramalkan cuaca secara tepat jala ndang adong cuaca na 100% hombar tu karakteristik ni sadasada ulaon dohot suansuanan. Manang ise na maetonghu di cuaca, isara ni na mangetongi jala paimaimahon pardalan ni alogo dohot rumang ni ombun na paling pas jala na tanpa risiko tu na manabur ndang na laho saut i manabur; jala na so hea manabur ndang tagamon hea manggotil. Sipaingot ma i tu angka na mabiarhu mida risiko gabe so barani mamungka dohot patupahon manang aha. Sabalgabalga ni risiko, tarmasuk hamatean na pasti ro, ndang boi i mangambati halak laho mangharinggashon dohot manghalashon ulaonna. Ala ni i, manang na ise pe, molo naeng mamungka ulaon, dipungka ma; unang dipaimaima ‘tingki na dumenggan’ di rohana, so tung gabe agoan ibana di peluang na tepat.

“Ndang diboto ho manang di dia pardalanan ni alogo dohot panjadijadi ni holiholi di bagasan bortian ni boruboru na marhangoluan, suang songon i ndang diboto ho jadijadian ni Debata na manjadihon saluhutna.” Pingkiran na di ay.4 i ditorushon dope di ay.5 on. Debata do jumadihon saluhut, na jumadihon alogo jala na padalanhonsa; na jumadihon jolma jala na pangoluhonsa. Ibana do na manghuasoi jala na manontuhon saluhut, ndang targantung Ibana tu alam manang tu cuaca. Ala ni i ndang adong dalanna di partani mabiarhu tu alogo dohot tu ombun gabe so barani manaburhon boni tu haumana, manang sabalikna maporseahu tu alogo dohot udan na mangalehon pos ni roha di angka ulaonna.

“Sogot manogotna i saburhon bonim jala unang patait tanganmu nang bodarina i, ai ndang diboto ho manang dia sian na dua i manjadi, manang tung rap duansa manjadi.” Sahali nari, ala so diboto jolma taringot tu tingki na ro, taringot tu panjadihon ni Debata di na saluhut, taringot tu risiko dohot taringot tu hajajadi ni na niula, ingkon ringgas do jolma i jala burju mangula, isara ni na manaburhon boni ia manogotna, ulaon na asing ia bodarina. Manang dia sian i na manjadi, Debata do na umbotosa dohot na manontuhonsa; boi do sada, alai boi duansa. Na ringkot, ulahon; dung i pasombu ma Debata manontuhon jadina!

Rancangan Homiletis

Didok sada pandohan ni halak na leban: “Maol do na meramal, lumobi molo taringot tu tingki na naeng ro.” Geok do i nian begeon, ai molo na meramal, tontu, taringot tu tingki na ro do i, ndang tagamon be taringot tu tingki na salpu. Alai sintong do, mansai na maol do -- molo so dohonon mustahil -- di jolma umboto angka na naeng masa. Rupani, ndang adong hita na umboto manang na hipas dope hita di taon na naeng ro, boi dope mangula manang ndang; aha do na naeng masa tu hita di dua taon na magihut, paruntungan do manang parjeaan; molo parutungan do, parutungan dia; molo parjeaan do, parjeaan dia; ndang adong hita na boi mamastihonsa. Apala i do sada sian na pinarungkilhon ni buku Parjamita pambuatan ni jamita ari on; golap do tingki na naeng ro i. Di ay.2 ni turpuk ari on rupani didok do: “Ndang diboto ho manang jea dia ro tu atas tano on.” Alai golap pe i, ndang boi so bongotan. Nuaeng, boha ma hita mamongoti i? Mabiar? Ganggu? Buku Parjamita ndang pasombuhon hita tinggal di hagangguon, alai diajarhon do tu hita na patut sipatupaonta asa tung pos rohanta mangalangkahon patta tusi. Aha ma i? Alusna: Mangula. Olo, ingkon mangula do hita saonari, ai songon na masa di tingkinta sinuaeng on, songon i do tong di tingki na naeng ro i, ingkon na mangan do jolma i asa mangolu, jala ingkon na mangula do asa mangan. Boha ma bahenonta mangulahon i? Apala i ma na naeng pamanatonta sian turpuk jamita di hita ari on. Taringot tusi, adong do dua na naeng dohonon.

Na parjolo, mangula di bagasan haburjuon. Didok di ayat parjolo ni turpuk on: “Padalan ma sagusagum tu bariba ni laut, ai di laonlalaon ni ari dapot ho do i marbunga.” Ragam do pandok ni halak taringot tu hahonaan ni ayat on. Rupani, adong do na manghonahon i tu na martigatiga bahan makanan antar pulau manang benua, na asing tu ulaon asi ni roha manang na marsilehonlehon, na asing muse tu ulaon na so tangkas direncanahon bahkan na terkesan asal diulahon na ternyata gabe marguna, na deba muse tu partanion. Songon i ma, mansai ragam do ulaon na boi patupaon ni jolma asa adong sihirimon jala sitapuonna di tingki na ro. Alai na ringkot, manang na dia pe i, ingkon na ulahononna do i di bagasan haburjuon dohot haringgason. Unang marnalom ni roha rupani mameakhon panghirimanna holan tu sada kemungkinan alai marusaho di bagasan habisuhon, unang martahan di sada pilihan sambing, alai naeng ma adong manang na piga alternatif, isara na patupahon pengembangan manang diversifikasi. Angka ulaon na denggan isara na marsilehonlehon ndang sae holan sahali manang holan tu sahalak, alai tu pitu manang ualu halak, lapatanna tu manang piga halak na so digondit bilanganna. Mansai ringkot do i ai ndang diboto jolma manang jea dia na naeng ro tu tano on na boi mambahen so manjadi sadasada ulaon, jala ndang diboto dia sian angka i na manjadi dohot na so manjadi. Alai na pasti, molo adong dua tolu, ia so manjadi pe na sada, na boi hirimon dope na asing. Ia tung manjadi sude, ba mauliate.

Ninna roha, sipaingot na relevan do on di hita, ai ndang tardok naung angka na burju jala na ringgas hita mulaulaon. Tutu, di sistem nilai budaya Batak, dipujipuji do haringgason manang hagogoon mangula. Disejajarhon do i tu hinaarga ni hapistaran songon nidok ni umpasa: “Pidong haraha, pidong haruhu, sitapitapi pidong ni Toba. Na gogo mangula do butong mangan, na ringgas marguru do dapotan poda.” Sabalikna disalahon do silosok manang sigurbak ulu. Molo na losok parumaenna, disolsoli natuatua do anakna, didok: “Soban nasa soban, dibuat ho soban hadudu. Jolma pajolmajolma, dibuat ho sigurbak ulu.” Nang pe songon i ndang tardok naung angka na ringgas halak hita mulaulaon, atik boha do sabalikna, angka na losok. Di sada ende na pinatomutomuna, didok Gr.Siddik Sitompul do: “Ndada piga songon paruma, parumauma ni tano Toba; sabulan do mangula dainang, sataon bolon butong mangan dainang.” Ra sintong do i na jolo, ai bidang do hauma alai otik dope jolma. Ala ni i cenderung ma nasida marlanggelangge. Dung simpul mangula (hirahira sabulan lelengna), holan angka ina nama na tu balian, anggo angka ama, sahat tu na jumpang gotilon, godangan nama tu lapo. Nuaeng on, ndang tardok sae be gogo ni hauma i manutupi partaonan ni keluarga, ai hot do bidang ni hauma alai tamba do anggo jolma. Nang pe songon i, torop do na tong marlanggelangge. Ndang adong usahona tu pengembangan, ndang adong kreasi manang variasi. Bangko i, otik godang tarboanboan do tu parserahan. Ndang parsoadaon, dung na taripar halak hita tu panombangan manang parserahan, godang do na muba gabe na ringgas. Alai adong do na sai tong losok, angka na naeng mangula mansai otik, alai jumpangan nian mansai godang. Hombar tusi diulai ma na so siulaon, i ma pansarian dohot pansamotan angka na so turut. Adong huhut angka na poso na so lomo rohana mulaulaon, na so maila gabe boban ni natoras manang keluargana. Molo songon i torus, lam golap do ari pangapudianta, lam suram jala lam tartading hita sian angka na asing, semakin terpuruk di persaingan na lam ketat. Ala ni i, ingkon muba do hita sian halosohon tu haburjuon dohot haringgason, jala hamubaon i ingkon na mamungka do sian dirinta ganup marsadasada.

Na paduahon, mangula di bagasan haporseaon. Mulak tu turpukta ari on, di ay.3 didok: “Molo sorat angka ombun i, dipangusehon ma udan tu atas tano on, molo marobo hau dompak dangsina manang dompak utara, ia tusi haroboan ni hau i laos disi do i peak.” Na nidokna disi, nang pe so binoto rumangna, pasti do, sai na ro do jea tu tano on. Na boi masa do i marhite udan, marhite alogo manang habahaba; diparrumpakhon angka hau, disegai angka ulaon dohot na niula. Na marlapatan ma i, adong do risiko ni angka ulaon i. Manang na ulaon aha pe i, ndang adong i na simbil sian ancaman ni kegagalan, jala pasti do, ingkon adong do i na gagal. Nang pe songon i, unang ala ni risiko manang na mabiar gagal gabe so barani halak mamungka dohot mangulahon angka ulaonna, ai di ginjang ni saluhutna do Debata. Ibana do Tuhan na manghuasoi jala na manggomgomi sasude, na mandalanhon alogo, na manjadihon jala na pangoluhon jolma, na tarbahen manumpak manjadi angka ulaon.

Apala i ma na mansai ringkot ingoton jala hangoluhononta, asa tung pos rohanta di angka ulaonta. Songon na nidok nangkin, ndang adong na taboto taringot tu tingki na ro; sandok golap do i di hita. Laos songon i do taringot tu ulaonta, anggo di pamungkaanna tung so adong do na binoto manang na laho manjadi i manang na so manjadi. Ala ni i, ingkon di bagasan haporseaon do hita mamungka dohot mangulahon ulaonta. Alai haporseaon i ndang dalan na mura i laho manggiling sude parsoalan tu Debata, dung i Ibana sandiri ma na paturehon, ndang! Hita do tahe dalan ni Debata manumpak saut ulaonta i. Hombar tusi sipangkeonta do hatauon na nilehonNa tu hita, isara hatauon patupahon perencanaan na denggan. Mansai na denggan do na marrencana dohot na mamparetonghon sadasada siulaon. Tuhanta Jesus pe dipodahon do i (Luk.14:28-30) jala patut do i parrohahonon. Hamanaton pe, tung na so jadi do parsineangon ni roha. Laos songon i do nang taringot tu risiko, ringkot do paretonghononhon. Alai sai unang ma ala ni hamanaton na masalpuhu manang ala ni na mabiar mida risiko gabe tallus rohanta sian haporseaon, gabe so barani mamungka dohot mangulahon angka siulaon. Ringkot do antusanta, sadenggandenggan ni perencanaan dohot samanatmanat ni na mangulahon, ndang adong jaminan ni i tu hajajadi ni sadasada ulaon. Laos songon i, sabalgabalga ni risiko, ndang tuk i mamastihon na ingkon gagal ma sadasada ulaon. Rimpun di Debata do ulaonta. Ala ni i, mangula ma hita di bagasan haporseaon; dung i, tapasombu ma Ibana mambahen jadina.

Angkup ni i, songon naung niarbis di Minggu na salpu, di tingki on nunga sahat hita tu angka ari na parpudi ni taon parhuriaon na tadalani on. Di Minggu na ro, paujungonta ma taon parhuriaon on marhite parningotan di angka na monding. Naeng taitan ni tingki on do hita manatap tu ujung ni saluhut dohot tu ujung ni ngolunta ganup marsadasada. Molo jumpang tingkina, marujung ngolunta sian tano on, didok hata i, angka na taula i do muse na mangihut tu hita (Pgk.14:13). Antong molo i do hape, mangula ma hita di bagasan haburjuon dohot haporseaon.

jkt.22.10.2010/mvs

Read More..

23 Trinitatis

SERMON JAMITA TU MINGGU 23 TRINITATIS, 7 NOPEMBER 2010
5 Mus.4:1-10

Patujolo

Buku 5 Musa on, i ma parbue ni penulisan kembali ni patik ni si Musa. Dung sahat jala mian bangso Israel di tano Kanaan, mimbar do parngoluonnasida sian na madoado jala peramu hasil gabe partani na menetap; mimbar dohot pengorganisasian ni masyarakatna sian na bersahaja tu na lebih kompleks. Luhutna i marhinorhon situtu do tu haporseaon ni bangso i, ai gabe tarunjun jala tarela ma nasida paihutihut utiutian ni sipelebegu angka na mardomu tu partanion dohot pamarentaon ni penduduk asli ni tano i. Mansai ungkap do nasida tusi ai ndang adong dope pengalamannasida taringot pangalaho na imbaru i. Aturan na gabe rujukan pe ndang adong ai so diatur dope i di patik ni si Musa. I ma na mamaksa nasida menafsirkan dohot menuliskan ulang patik ni si Musa i. Ndang ulaon sisatongkin i, mansai leleng do, berabad-abad. Hasil akhirna, i ma buku 5 Musa. Di Alkitab, digoari do i Ulangan, na marharoroan sian hata Gorik deutronomion, istilah na pinangke ni Septuaginta [(LXX), i ma salinan ni Padan na Robi di hata Gorik] laho manggoari buku i, lapatanna patik na pinaduahali manang na niulahan. (Di salinan Batak: Pangarataion di Patik). Disurathon do i marrumang jamita ni si Musa na dipasahat di halongonan, di ipar ni aek Jordan tu sundut na imbaru ni bangso i. Asing ni si Josua dohot si Kaleb, nunga mate sude sundut na matua, sundut siparungutungut jala na so porsea. Tinggal ma nuaeng sundut na umposo na pinaloas mamongoti tano Kanaan i. Digombarhon ma disi, naeng bongot ma bangso i tu tano bagabaga i. Molo dung sahat tusi, ingkon marsihohot do nasida di haporseaon dohot parsombaon tu Jahowa. Tusi ma nasida diarahon si Musa di jamitana i.

Hatorangan

Di jolo, di bd.1-3 ditaringoti do mansai jempek barita ni haboborhat ni halak Israel sian dolok Horeb, angka panghahap dohot masa pengembaraan opat pulu taon sahat ro di na tolhas nasida tu ipar ni Jordan na digombarhon songon inganan ni si Musa pasahathon jamitana i, jala bangkit si Josua gabe partogi laho manguluhon bangso i mamongoti dohot marbagi tano i. Di bd.4 on naeng masuk ma ibana tu badan ni jamitana i. Songon dalanna masuk tusi, didok ma di ay.1 on: “Nuaeng pe.” Angkup ni dalanna masuk, pengarahanna do i huhut tu bangso i taringot tu sipatupaonnasida asa malua sian pangalaho songon na tinaringotanna di jolo i. Tangkasna, ia naeng malua nasida sian uhum songon na songgop tu ompunasida uju i, ingkon adong do sipatupaonnasida di tingki nuaengnasida. Aha ma i? I ma na manangihon aturan dohot uhum na pinodahon ni si Musa tu nasida. Aturan (Hb.hachuqiym, statutes, undang-undang), i ma patik ni Tuhan i, patik na hot jala na so mubauba; uhum (Hb.hamishpaatiym, judgments, keputusan hukum), i ma haputusan na binuat jala na nidabuhon ni panguhum taringot tu sadasada pangalaho manang parkaro. Ndang na sian roharohana, na hombar tu poda (petunjuk) na sian Tuhan i do. Duansa i, na sahat do tu Israel marhitehite si Musa. Hombar tusi ma i digoar na pinodahon ni si Musa. Ndang na mandok ibana bonana, Debata do; holan perantara do ibana manang mediator. Manangihon ndang na marlapatan holan mambege, alai ingkon dohot do na mameop, na mamingkirmingkiri, na mangaradoti dohot na mangulahon (pat.Jos.1:8). “Sibahenonmu,” ninna. Molo dung songon i, mangolu ma bangso i. Mangolu ndang na mandok holan manggulmit jala marhosa, alai mangolu di bagasan hangoluan na sonang jala na martua, na niatur hombar tu lomo ni roha ni Debata jala na di bagasan parsaoran tu Ibana, na bergairah jala na bersemangat, jala na berpadanan tu panghirimon di bagabaga ni Tuhan i. Angkup ni i, masuhan nasida ma tano Kanaan na pinarbagabaga i. Debata do nampuna tano i, alai sian asi dohot mala ni rohaNa dibasabasahon do i tu nasida, dipateanhon bahen partaliannasida.

Taringot tu patik i didok: “Ndang jadi ambaanmuna tu hata naung hutonahon i tu hamu, jala ndang jadi oruanmuna sian i.” Na nidokna disi, ingkon jaloon jala argahonon nasida do sude patik i. Ndang adong sian i na boi rajuman sala manang na so ringkot gabe boi bolonghonon, jala ndang adong na hurang na ingkon ambaan manang patorangon hombar tu roharoha ni jolma. Di pudian ni ari gabe masa do na songon i di halak Jahudi, ai gabe adong ma na mandok rupani: “Holong ma roham di donganmi; hosom ma ia di musum!” (pat.Mat.5:43).

Baal-Peor, i ma debata ni halak Moab. Di 4 Mus.25:1-5 dipaboa, di na sahat halak Israel tu Sitim, tarela do bangso i mangoloi jala marsomba tu Baal-Peor. Deba sian rumang ni parsombaon tu dewa i, i ma parmainanon (persundalan suci) dohot na manganhon juhut tibaltibal (juhut naung pinelehon). Digonghon parbegu i nasida tu parsombaon sisongon i, gabe dohot nasida marmainan jala manganhon tibaltibal i. Mansai tarrimas do Debata marnida i, gabe diparentahon tu si Musa manangkup jala manggantunghon angka induk bahen pardengganan tu Jahowa. Didokhon si Musa huhut angka panguhum mamunu nasa na dohot marsigantung tu Baal-Peor i. Ia ditaringoti pe i dison, asa gabe singotsingot do i di bangso i asa unang mangulahi hasalaan na sarupa. Manang na boha pe, ndang tagamon marsombusombu Tuhan i marnida na mangalaosi patikNa, sai na rendephononNa do na songon i, alai pangoluonNa do anggo na marsihohot tu Ibana songon na andar di bangso na teba i. “Alai anggo hamu, angka na marsihohot tu Jahowa, Debatamuna i, mangolu do saluhutna sadari on,” ninna. Marsihohot, mandok marsilohot, mardomu jala marsaor tu Debata di bagasan holong ni roha dohot pangoloion.

Sahali nari, di ay.5-6 ditaringoti si Musa do aturan dohot uhum na tinonahon ni Debata tu ibana jala naung pinodahonna tu bangso i. Ingkon i ma sibahenon ni bangso i, siradotan jala siulahononnasida ia dung sahat nasida tu Kanaan, tano na pinarbagabaga simasuhan jala siteanonnasida bahen partaliannasida. Molo diulahon nasida i, angkup ni na mangolu (ida di jolo), gabe hapistaran dohot hapantasonnasida do i di adopan ni angka bangso. Na marguna do patik i antara lain songon panogunogu dohot pangajari. Marhite na marsiajar dohot marsorminan tusi, gabe pistar bangso i jala pantas, lapatanna diboto manirang na denggan sian na roa jala tarhangoluhonsa ngolu na tigor jala na badia di jolo ni Debata dohot di jolo ni jolma. Ala ni panghangoluhon di patik i, gabe asing nasida sian angka bangso, sumurung, umpolin manang lebih luhur di ulaon dohot di pangalaho. Berengon ni angka bangso ma i jala dohononna: “Bangso na pistar sahali jala na pantas marroha do bangso na bolon on.”

Alai molo sumurung pe nasida songon i, ingkon parhatopoton nasida do, ndang na sian dirinasida i, manang ala ni hajolmaon dohot habangsoonnasida, alai na sian Debata do; ala ni hajojonok dohot ala ni pangalehonNa di patikNa. Taringot tusi, diondolhon si Musa do di ay.7-8. Ganup bangso na humaliang Israel adong be do debatana. Angka debata na na so tutu do i, personifikasi ni daya-daya alam, rekayasa ni hajolmaon na diwujudkan marhitehite ganaganaan na mate, angka na ‘jonok’ nian, alai ‘dao’; na marpinggol nian, alai ndang marbinege. Andul sian i do Jahowa i, dao pe Ibana di banua ginjang, alai hadir jala jonok Ibana tongtong tu bangsoNa; manang sadihari pe Ibana dijou, jonok do Ibana laho manangihon dohot mangalusi. Disarihon do hasonangan ni bangso i, dilehon do tu nasida aturan dohot uhum na tigor asa tarhangoluhon nasida ngolu na denggan jala na badia, na tigor jala na sintong.

Di ay.9-10 dipaingot do bangso i asa unang manghalupahon sejarah, i ma taringot tu na pinatupa ni Debata bahen haluaonnasida songon naung patar diida dohot dibege nasida. Ulaon ni Debata ndang tarsirang i sian hataNa. Na mangula do hataNa jala marhata do ulaonNa. Marhite hata dohot pambahenanNa, na mangula do Debata paluahon Israel sian Misir; marhite hata dohot pambahenanNa, mangula do Ibana pahothon parpadananNa tu bangso i di Horeb; marhite hata dohot pambahenanNa, mangula do Ibana manogunogu nasida di parhorsihan, manogihon jala pabongothonsa tu tano Kanaan. Di parpadananNa na di dolok Horeb i, dipatubegehon do tu nasida hataNa, siparateatehononnasida. Ala ni haluaon na pinatupaNa i, ala ni parpadanan naung pinahotNa dohot ala ni hataNa naung pinatubegehonNa i, ingkon Tuhan Jahowa nama Debatanasida, sasadasa nama sihabiaran, sisombaon jala sioloannasida. Taringot tu saluhutna i, ingkon jagaon jala ramotan nasida do dirinasida asa unang lupa i sian rohanasida saleleng mangolu. Na mangago dirinasida do nasida molo gabe ditallushon i sian rohanasida. Angkup ni i, ingkon pabotohonon jala ajarhonon nasida do saluhutna i tu angka anak dohot pahompunasida marsundutsundut.

Rancangan Homiletis

Didok pandohan ni hita halak Batak: “Agia lapalapa, di toru ni sobuon; agia malapalap, asal ma di hangoluan.” Hinaarga ni ngolu do i na ginombarhon ni i. Di roha ni bangsonta, mansai na arga do tutu ngolu i. Ala ni argana, diparjuanghon. Taringot tusi, didok dope: “Mutu siborok mangalului guluan, mutu do hita jolma mangalului hangoluan.” Ndang holan diparjuanghon, naeng partahanhononna tahe torus. Sahat tu na malapalap pe taho, asal ma disi hosana i. Hombar tusi, sada sian sintasinta na umum do di halak hita, ganjang nian umurna; nangnang sarimatua pairingiring pahompu sahat tu na marnini marnono; marhusip matana, limutlimuton tanggurungna.

Di hata ni Debata pe, mansai na arga do ngolu i. Alai hinaargana ndada holan di adongna dohot ganjangna, lumobi do di kualitasna. Ngolu na sintong i ma ngolu na sonang jala na martua, na niatur hombar tu lomo ni roha ni Debata jala na di bagasan parsaoran tu Ibana, na bergairah jala na bersemangat, na berpadanan tu panghirimon na jonok dohot na naeng ro sogot. Boha do asa jumpang ngolu na songon i? Marojahan di turpuk jamita di hita ari on, adong ma tolu na naeng dohonon.

Na parjolo, taradoti ma hata ni Tuhan i. Di jamita on nunga sahat halak Israel di bariba ni Jordan. Satongkin nari, taripar jala bongot ma nasida tu tano na pinarbagabaga i. Tagan so tolhas tusi, asa unang sala langka nasida, dipaingot si Musa do bangso i taringot tu na ingkon patupaon nasida ia dung bongot nasida tu tano i, i ma na manangihon aturan dohot uhum angka naung pinodahonna tu nasida. Na manangihon ndada na marlapatan i holan na mambege, alai dohot do na mameop, na mamingkirmingkiri, na mangguruhon dohot na mangulahon. Ndang jadi ambaan manang oruan nasida i, lapatanna ndang adong sian i na boi rajuman sala manang na so ringkot gabe boi bolonghonon, manang sabalikna na boi rajuman hurang na ringkot ambaan manang patorangon hombar tu giot ni roha ni hajolmaon. Sandok ingkon jaloon jala argahonon nasida do sude patik i, ai na sian Debata do i. Molo ndang songon i, sai na songgop do tu nasida uhum songon naung mangonai tu ompunasida, na marragean i nasida di parhorsihan di masa pengembaraan na opat pulu taon i.

Suman tu halak Israel di jamita on, di tingki on nunga sahat hita tu angka ari na parpudi ni taon parhuriaon. Dua minggu nari, di ari 21 Nopember 2010 sahat ma hita tu Minggu Ujung Taon Parhuriaon na tadalani on. Diaturhon angka ama ni hurianta do paboa angka tingki parpudi ni taon parhuriaon songon on, sipangkeon ni huria do i paingothon ruasna manatap tu ujung, tu haroro ni Kristus paduahalihon dohot tu hagogok ni panghirimon i, i ma hangoluan na saleleng ni lelengna. Marhite paragendaon rupani, marhite ende dohot jamita naeng tartogihon do sude manatap tusi. Na manatap tu ujung jala na manghirim di haroro ni Jesus Kristus ndada na marlapatan i holan na maimaimahon huhut manatapi dompak langit, alai songon na nidok ni jamita on, marhite na mangaradoti hata ni Debata do. Olo, tanda na masihol hita di haroro ni Tuhanta Jesus Kristus paduahalihon dohot di hangoluan sogot ingkon radotanta do hata ni Debata sian nasa rohanta. Ingkon ringgas rohanta manangihon, manjahai, mamingkirmingkiri, pahusorhusorhon, mangguruhon, mangulahon dohot manghangoluhon. Dohot hata na asing, ngolunta ingkon gabe surat ni Debata; sian ulaon dohot pangalahonta tarjaha halak hata ni Debata. Mansai ringkot ma i parrohahononta, ai di parngoluon siapari jotjot do masa ndang sai tarpaasing pola halak Kristen sian angka na asing. Rap panggaori do rupani, rap pargabus, rap panipu, rap pargadombus, rap parbadabada, dohot angka na asing. Atik boha tahe nunga gabe lumobi halak Kristen taringot tu angka i. Sikap hidup na gabe cerminan ni hata ni Debata ndang sai dietong be i hapistaran dohot hasurungan, alai nunga gabe haotoon dohot habileon. Alai taboto ma, hata ni Debata do na gabe hapistaran dohot hapantason di hita. Marsiajar dohot margogohon hata i do tarhangoluhon hita ngolu na dumenggan, na umpolin jala na badia na berpadanan tu hagoluan sogot.

Na paduahon, taingot ma na binahen ni Tuhan i. Dipaingot si Musa dope halak Israel asa unang lupa nasida di na pinatupa ni Debata bahen haluaonnasida songon naung patar diida dohot dibege nasida. Ulaon ni Debata ndang tarsirang i sian hataNa. Na mangula do hataNa jala marhata do ulaonNa. Marhitehite hata dohot pambahenanNa, na mangula do Debata paluahon Israel sian Misir; marhite hata dohot pambahenanNa, mangula do Ibana pahothon parpadananNa tu bangso i di dolok Horeb; marhite hata dohot pambahenanNa, mangula do Ibana manogunogu nasida di parhorsihan, manogihon jala pabongothonsa tu tano Kanaan. Dipapatar diriNa parngolu, pargogo jala parhuaso; dipabangkit nasida gabe bangsoNa jala dipatubegehon tu nasida hataNa, siparateatehononnasida. Songon bangso naung jinangkonNa, sai boi do nasida manjou Ibana, ai nang pe dao, Debata na jonok do Ibana. Ala ni i, ingkon Jahowa nama Debatanasida, sasadasa nama sihabiaran, sisombaon jala sioloannasida. Taringot tu saluhutna i, ingkon ramotan nasida do dirinasida asa unang lupa i sian rohanasida saleleng mangolu. Na mangago dirinasida do nasida molo gabe ditallushon i sian rohanasida. Nunga dung masa na songon i, lupa nasida di Debata, di hata dohot di na binahenNa; laho nasida marsomba tu Baal-Peor, debata ni halak Moab, gabe mago jala rendep torop sian nasida.

Laos i ma sipaingot ni jamita on nuaeng tu hita, asa unang lupa hita di Debata, di hata dohot di naung binahenNa tu hita. Songon na tu Israel, naung mangula do Debata nang di tongatonganta; dipapatar diriNa tu hita, dipatubegehon tu hita Barita na Uli parhiteanta tu haluaon jala dipajongjong huriaNa di tongatonganta na gabe haojahanta. Nunga 149 taon i dung masa. Hombar tusi, mamungka 7 Oktober 2010 i naung mardalan do hurianta di umurna na pasaratuslimapuluhon manang di taon jobel na patoluhon. Di tingki on, tongon marhobas do hurianta marningot jala mangolophon i di Pesta Jubileum 150 Taon HKBP sipatupaonta di taon 2011 na ro on. Alai ndang sae di hita marningot i holan di sada pesta jubileum, ingkon saleleng mangolu do. Songon na nidok ni turpuk jamita ari on, ingkon marhabiaran hita tu Debata sian nasa rohanta, marsihohot mangoloi jala marsomba Ibana saleleng hita mangolu. Manang aha pe na masa, di las manang di arsak ni roha, di tingki na sonang manang di tingki na susa, tung na so jadi halupahononta Ibana jala tung na so jadi tallus sian rohanta hata dohot pambahenanNa. Unang so taboto, na mangago dirina do manang na ise pe na manghalupahon Debata, na manallushon sian rohana hata dohot angka pambahenanNa. Ndang tagamon marsombusombu Debata di angka na songon i, sai na uhumanNa do i gabe agoan di hagogok ni panghirimon i, i ma hangoluan sogot na saleleng ni lelengna.

Na patoluhon, taajarhon ma i tu angka anakhonta. Padan dohot ulaon haluaon ni Debata ndada ditahihon i holan tu sada sundut, alai marsundutsundut do salelenglelengna. Ala ni i, marulak loni do Ibana manonahon asa ajarhonon ni halak Israel i tu angka anakhonna marsundutsundut. Ingkon gogoonnasida do mangajarhon angka i tu angka anakna, jala ingkon taringotannasida angka i molo hundulhundul nasida di bagasan jabu manang di na mardalani di pardalanan, di na laho modom manang di na hehe muse; ingkon rahuthonon nasida huhut angka i bahen partinandaan di atas tanganna, jala bahen parningotan di holangholang ni matana; jala ingkon surathononna angka i tu tohang ni jabuna dohot tu panggumbanganna (5 Mus.6:7-9).

I ma muse sipaingot ni turpuk jamita ari on tu hita, ingkon pateanhononta do Barita na Uli i tu angka anakhonta. Molo hot dope panandaon dohot haporseaon di Debata di tonga ni hurianta, molo mian dope Barita na Uli di tongatonganta jala dihaposi dope haluaon na sian Tuhan i, ndang lobi ndang hurang parbue ni pangajarion do i. Molo naeng so tos i di tingkinta, alai marudut tu angka pomparanta marsundutsundut, hita pe, ingkon gogoonta do mangajarhon i tu angka anakhonta jala nasida ma muse na mangajarhon i tu angka pinomparna. Tanggungjawab na parjolo taringot tusi dipasahat do tu angka ama dohot ina manang keluarga. Huria marhite singkola minggu dohot parguruon manghatindanghon haporseaon, parsingkolaan dohot na asing ndang boi jala ndang tuk i manggonti peran ni ama dohot ina manang keluarga di pangajarion i. Ala ni i ingkon pangkeon ni keluarga do tingki dohot gogona mangulahon i. Ingkon gabe acara rutin ma i, gabe budaya hidup na diulahon di tingki dohot di inganan na so mardia imbar. Na boi pangkeonna do tusi ragam ni produk kebudayaan, isara majallah, film, compact disk dohot na asing. Mansai ringkot ma i parrohahononta; ronsot pe ulaon jala mansai ringkot na manarihon parguna ni hangoluon, sarihonon jala ulahonon do tong pangajarion tu angka ianakhon, asa di na dapot tingkina boi hita mangalusi Tuhanta i mandok: “Dison do ahu rap dohot dakdanak na pinasahatMi tu ahu.”

jkt.18.10.2010/mvs

Read More..