Huria

HURIA AHA DO HKBP?

Di ujung ni dekade pitupuluan di abad na salpu, hombar tu hatontuan na masa di tingki i, nunga marhobas hurianta paimbaruhon Aturan Huria 1972-1982. Mardomu tusi, di sada rapot pandita hatopan dipatupa ma panghataion taringot tusi. Isara ni na manortor, tar hira na manerser ma i. Dipangido Ketua Rapot Pandita ma tu sahalak dongan patujolohon saotik panatapan taringot tu aturan sipaimbaruon i, jala tar boha ma bahenon rumang aturan sipangkeon tu dekade na mangihut. Gabe didok pandita i ma songon on, “Huria aha do HKBP ..... ?” (Hohom ibana sangombas, jala marsilonging sude na di parrapotan i paimahon manang na dia dope na naeng dohononna). Dung i, diuduti ibana ma, didok, “Hombar tu pangidoan ni ketuanta, nunga hujaha muse aturan ni hurianta i. Na mansai manarik di ahu, holan manang na piga hali do tarsurat disi hata ‘ruas,’ alai sabalikna mansai jotjot do anggo ‘pandita.’ Ala ni i, gabe sungkunsungkun ma rohangku mandok, ai huria aha do HKBP; huria ruas do manang huria pandita (domines kerk)? Manang na dia pe alusta taringot tu sungkunsungkun i, na naeng dohononhu, anggo aturan na naeng pahoton jala na naeng pangkeonta tu sampulu taon na naeng ro naeng ma na tangkas manggombarhon na huria ruas do HKBP, ndang huria pandita. Boti ma,” ninna.

Dung hupamanat daftar ni parhobas di Almanak 2011 na sekaligus gabe daftar ni unit-unit panghobasion di Ulaon Hatopan pintor tarsingot do ahu tu na masa i jala hudok di bagasan rohangku, “Ai na huria aha do tutu HKBP, huria ruas do manang huria pandita?” Hudok i, ai hombar tu na hubereng jala na sanga dope hualami alai na sai huhahohomhon na sai leleng on, nunga lam tartading nuaeng urusan huria dibahen urusan personalia. Dung tinanda Kantor Pusat jala gabe bagian ni perhatianniba angka ulaon di bagasanna, dungkon ni Ephorus dohot Sekretaris Jenderal, angka kepala biro nama na mengurusi ulaon di Kantor Pusat. Angkup ni i, adong dope angka ketua na manguluhon seksi (na gabe departemen muse) na mangula mamungka sian Kantor Pusat sahat tu huria marsadasada. Di mulana, holan tolu do biro, i ma Biro-I, na mengurusi huria; Biro-II, na mengurusi personalia dohot Biro-III, na mengurusi parhepengon merangkap Bendahara Pusat HKBP. Di tingki na mangihut dipauba ma goarna: Biro-I hian gabe Biro Umum, Biro-II gabe Biro Personalia, jala Biro-III gabe Biro Keuangan/Bendahara Pusat. (Taon 1975 disirang do Biro Keuangan sian Bendahara Pusat). Hombar tu perkembangan, lam martubuan ma angka biro, isara Biro Informasi, Biro Hukum, Biro Oikumene, dohot na asing. Di taon 1985, dipauba do struktur ni panghobasion di Kantor Pusat marhite na pajongjonghon opat sekretaris di toru ni Sekretaris Jenderal, i ma Sekretaris Urusan Jemaat, Sekretaris Urusan Departemen, Sekretaris Urusan Lembaga dan Jayasan dohot Sekretaris Urusan Penatalayanan. Di toru ni i ma angka Biro. Alai holan satongkin do i, ai di taon 1988, dipasohot ma Sekretaris Urusan Departemen dohot Sekretaris Urusan Lembaga dan Jayasan, di taon 1991 Sekretaris Urusan Jemaat, jala na parpudi di taon 1992 Sekretaris Urusan Penatalayanan. Dungkon ni i, mulak ma muse sude urusan di toru ni Ephorus dohot Sekretaris Jenderal tu angka biro.

Sahat ro di taon 2004, sai biro na mengurusi huria (Biro-I/Biro Umum/Biro Jemaat) do na tardok ‘biro utama’ di Kantor Pusat. Na maralasan do i, ai huria do ‘asset’ ni HKBP na utama. Biro on do na mengurusi administrasi huria dohot umum, isara statistik, bericht dohot angka surat; na mengurusi pelaksanaan ni rapot dohot notulenna; angka pesta siuluhonon ni Pucuk Pimpinan di angka huria, ressort, dohot distrik; kerumahtanggaan, kebersihan dohot angka na asing. Gari urusan personalia tahe, anggo di mulana tarmasuk do tu urusan ni biro on. Sian taon 1964-1971 rupani, nang pe mangihuthon struktur nunga adong Biro-II/Personalia, ndang hea dipabangkit anggo kepala birona; dung pe di taon 1972 i asa diisi. Kepala ni biro on do na jumonok tu Ompui Ephorus dohot tu Amanta Sekretaris Jenderal, na mangurupi paradehon angka laporan dohot barita jujur taon, na mangurupi di angka ulaon dohot pasidunghon angka parsoalan, na mewakili Pimpinan manguluhon dohot na menanggungjawabi Kantor Pusat jumpa martugas nasida tu ruar ni Pearaja, dohot na asing. Laos kepala ni biro on do na songon primus inter pares ni sude kepala biro na adong di Kantor Pusat. Ala ni i, sai dipillit do na gabe kepala ni biro on sian pandita angka naung berpengalaman di huria jala na adong hatauonna tu ulaon i. (Alai di tingki na madabu hurianta tu bangko na lebih mengondolhon segi organisasi dari pada segi huria, hea do i dipasahat i tu sahalak na so pandita).

Mamungka taon 2005, dung gabe lima uluan sadalan tu Aturan dohot Paraturan HKBP (2002), dipauba do struktur ni Kantor Pusat. Adong ma biro di toru ni Sekretaris Jenderal, di toru ni Departemen Koinonia, Marturia dohot Diakonia. Sahat tu na pensiun ahu jala hutadinghon Pearaja di taon 2008, ndang hea dirumushon pemagaran tugas ni biro i sadasada jala boha pardomuan ni angka biro i tu ganup pimpinan dohot tu sesama biro na di sekretariat jenderal dohot na di departemen na tolu i. Boi do rupani Sekretaris Jenderal mangantoi Biro na di Departemen Koinonia dohot sabalikna; boi do Kepala Departemen Marturia mamarenta kepala biro na di lingkungan ni Departemen Diakonia dohot sabalikna? Di praktekna niida boi do, alai haboion i ndang diojakhon i di penggarisan na tarsurat. Ala so digarishon ulaonna, gabe adong do sian angka biro i na asal dipajongjong, kepala birona dohot pegawaina holan na so, ujungna dihapushon.

Mulak tu masalah na gabe sibonsiri ni siguriton on, di struktur na imbaru i gabe dipasahat ma urusan huria, personalia, hukum, kerumahtanggaan dohot kebersihan tu sada biro di toru ni Sekretaris Jenderal na margoar Biro Umum. Hombar tusi, gabe biro on ma na gabe ‘biro utama’ jala Kepala Biro Umum na gabe primus inter pares ni sude kepala biro di Kantor Pusat. Ndang pola sadia leleng tarhilala ma naung mabalgahu biro i, jala hira holan masalah kepersonaliaan nama na diurusi, ndang sadia perhatian dohot tingkina tu urusan huria dohot urusan hukum. Niantusan do i, ai so na iran godang ni siulaon dohot parsoalan taringot tu personalia. Ala ni i, dipajongjong ma sada nari biro di lingkungan ni Sekretaris Jenderal na ginoar Biro Administrasi Jemaat. Biro i ma na gabe hasahatan ni urusan huria, alai songon goarna i holan urusan administrasi do. Ndang tarpatudos i tu Biro Jemaat sinajolo, ai dipajongjong pe i ndada ala ni giot ni roha patujolohon urusan huria alai asa lam lancar do urusan personalia naung cenderung gabe urusan utama. Adong do tahe kesan, ia dipajongjong pe i holan asa adong do inganan ni sada parhobas naung matua na dihilala ndang tartempathon be tu huria. Biro Umum na tinggal mengurusi personalia, hukum, kerumahtanggaan dohot kebersihan tong do i na gabe ‘biro utama,’ jala Kepala Biro Umum hot gabe primus inter pares ni sude kepala biro. Nang pe songon i, ndang lam mura ulaon di Biro Umum, lam tu maolna do gariada. Ndang hinata, ai lam maol do aturon angka parhobas, lam godang masalahna, lam godang kepentingan dohot na berkepentingan taringot tu mutasi, godang jasa na ingkon dibalos jala godang 'na so dongan' na ingkon 'dibolonghon', gabe masa ketegangan antara ni pimpinan dohot Kepala Biro Umum na tarpaksa ingkon dimutasikan tu huria. Di pelaksanaan ni mutasi i, laos dipatupa ma reorganisasi ai dipapinda ma urusan hukum, kerumahtanggaan dohot kebersihan tu Biro Administrasi Jemaat jala digonti goar ni biro i gabe Biro Umum, jala Biro Umum hian gabe Biro Personalia. Biro Personalia on ma muse na gabe ‘biro utama,’ jala kepala birona gabe primus inter pares ni sude kepala biro.

Nang pe naung gabe songon i balga ni Biro Umum, dung pensiun na manguluhon jala ditadinghon Kantor Pusat, ndang pintor dipabangkit panggontina, dipasombu do songon i manang na sadia leleng, jala mangihuthon Almanak 2009, dipaulak do muse Biro Umum i gabe Biro Administrasi Jemaat, jala dipabangkit kepala birona. Diorui ma sian i urusan hukum gabe jongjong sandiri songon Biro Hukum. Ndang pola sadia leleng, tarik diri do Kepala Biro Administrasi Jemaat i, jala laho tu ulaon na asing. Tong songon na parjolo i, ndang pintor dipabangkit panggontina, alai mangihuthon Almanak 2010, dipabangkit ma sahalak Wakil Kepala Biro Bidang Administrasi Jemaat. (Catatan: Ndang apala binoto manang na dia sintongna, di Almanak 2009 Biro Administrasi Jemaat do tarsurat, alai di Almanak 2010 mangolu do muse goar Biro Umum). Sahat tu bona ni taon 2011 on, torus do biro i kosong, ndang dipabangkit kepala birona.

Ala ni i, ra, ndang masalpuhu molo nidok na so prioritas utama be urusan huria di Kantor Pusat. Urusan huria holan urusan administrasi nama i, biro na marhahonaan tusi, ndang be ‘biro utama’, kepala birona pe ndang pola be ingkon adong; molo porlu (isara ni na mangalehon inganan di halak na so tartempathon be tu huria manang laho membalas budi ni sasahalak na dianggap marjasa tu rejim) ba diisi, molo ndang dipasombu songon i, cukup ma i diuluhon wakil kepala biro. Sabalikna do anggo urusan personalia nunga gabe prioritas utama, biro na mengurusi i nunga gabe ‘biro utama’ jala Kepala Biro Personalia gabe primus inter pares ni sude kepala biro, na jumonok tu Ephorus dohot Sekretaris Jenderal. Di Almanak 2011 rupani tarida do, sementara Biro Umum cukup diurus dua halak wakil kepala biro, anggo Biro Personalia tangkas do diuluhon kepala biro, di toruna sahalak wakil kepala biro niurupan ni tolu halak pandita diperbatukan dohot dua halak diakones tamba sahalak calon pandita. Sanga dope nialaman, Kepala Biro Personalia do na tongtong hadir di Rapat Pimpinan, Kepala Biro Administrasi Jemaat/Umum ndang hea nanggo sahali. Angkup ni kepersonaliaan, godang dope ulaon na dipasahat tu Kepala Biro Personalia, tarmasuk urusan huria, isara ni na mamareso kesiapan ni sadasada persiapan ressort manang naung boi resmihonon gabe ressort na gok. Ra, torus dope songon i sahat tu tingki on. Manang naung gabe lancar nuaeng urusan personalia ndang apala binoto. Alai daftar ni parhobas di Ulaon Hatopan na di Almanak 2011 i ndang mencerminkan ulaon ni sada biro na tangkas menguasai bidangna. Parjojor ni angka biro ma rupani masisenjangan, ndang unur sian biro na di toru ni Sekretaris Jenderal tu Departemen Koinonia, Departemen Marturia, dohot Departemen Diakonia. Manang na di dia inganan ni angka biro i sadasada, ndang pintor boi non i idaon ni angka na so tangkas mananda Kantor Pusat. Di dia do rupani hajongjongan ni Biro Perencanaan, di toru ni Sekretaris Jenderal do i manang na di Departemen Diakonia? Di No.13 adong Biro Kategorial Ama/Sosial, di No.14 adong Biro Kategorial Ina; alai di No.42 adong muse dope Biro Kategorial Ina/Ama, Lansia. Na adong do dua biro na mengurusi ama dohot ina? Di No.22 adong Biro Ibadah/Musik, alai di No.47 hira na adong do tong Biro Ibadah/Liturgi. Dos do i manang asing jala tar dia ma ulaning asing ni ibadah sian liturgi umbahen ingkon padomuon i gabe sada goar? Mansai jut do roha ni Pdt.Paulina Sirait, STh. ai sai disurathon ibana songon penerima beasiswa, hape na tugas belajar atas biaya sendiri do, sementara – ninna ibana – adong penerima beasiswa alai disurathon atas biaya sendiri. Adong pandita naung mate, alai di daftar ni na pensiun sai mangolu.

Boha do ia Pimpinan HKBP? Molo tapamanat Aturan Huria (2002) Bd.24.4.3.a, sian 14 ulaon ni Rapot Uluan, pitu (50%) sian i taringot tu personalia do. Di na pitu nari pe tahe, sai adong do solot taringot tu personalia. Ala ni i tiha do roha, Uluan pe godangan do mangurusi personalia jala Rapot Pimpinan godangan do molo so dohonon holan na mamingkiri dohot mamutushon mutasi. Na uli do i molo mutasi i diojakhon tu kepentingan ni huria, alai boha ma molo tu kepentingan ni rejim manang personalia i sandiri? Kepentingan ni huria do rupani molo dimutasihon sada manang dua halak pandita ala ni sahalak bupati na sogo roha? Kepentingan ni huria do i molo ingkon mutasihonon Direktur Sikola Bibelvrouw na so gok dope sataon menjabat jala ingkon terganggu molo so dohonon sega proses belajar mengajar di sikola i? Kepentingan ni huria do i molo ingkon dimutasihon deba praeses di ak ni periodena? Taboto do, holan opat taon do periode ni sahalak praeses; hape holan dua taon dope nunga pinda. Pintor aha ma naung diula i na dua taon i di distrik na tinadinghonna i, jala pintor aha ma na tarbahen i di dua taon na mangihut di distrikna na imbaru? Sadia godang biaya na suda tusi? Alai songon i ma huroha pangalahona, mansai tabo do na papindahon i. Jala di deba halak antong, tabo do na dipapinda i.

Sian saluhutna i nda di ingananna do molo sinungkunhon muse di tingki on: Huria aha do HKBP, huria ruas do manang huria personalia? Sian saluhut personalia i, pandita do na gumodang. I do na gumodang parsoalanna, na gumodang kepentinganna, na gumodang mandukung jala manontuhon kepentingan ni rejim, na gumodang dipingkiri jala diurusi institusi. Hombar tusi, na tarpatajom do nuaeng sungkunsungkun na di jolo i: Huria aha do tutu HKBP, huria ruas do manang huria pandita???

jkt.02.02.2011/mvs

Read More..

Taon Parhuriaon

TAON PARHURIAON, TAANTUSI DOPE LAPATANNA?

Taon parhuriaon, i ma parture ni parngoluon parhuriaon manang hakristenon naung terlembagakan di bagasan sada taon. Parjolo sahali na marhahonaan do i tu parpunguan manang parmingguon (peribadahan) siganup minggu. Hombar tusi laos digoar do i taon liturgi. Songon na taboto, parmingguon ni halak Kristen ndada na marujung i di inganan dohot di tingki parmingguon i sambing, alai na manalpui do i tu na opat dorpi ni gareja i jala manorusi tu inganan dohot tingki na umbidang. Dohot hata na asing, angka ende na niendehon ni huria di parmingguan i, tangiang na tinangianghonna, bagabaga na jinalona, jamita na binegena dohot angka na asing siboanonnasida do i mulak, sihangoluhonon jala siamenhononna be di hangoluanna ariari. Ala ni i do asa nidok na parture ni parngoluon parhuriaon manang hakristenon naung terlembagakan do taon parhuriaon i.

Mamungka do taon parhuriaon i di Minggu Advent jala marujung di Minggu Ujung ni Taon Parhuriaon. Na tarbagi do i tu manang piga buhu ni tingki, i ma:

1. Advent, sian Advent-1 sahat ro di Advent-4.
2. Natal manang Parningotan di hatutubu ni Tuhan Jesus, sian 25 Desember sahat ro di 5 Januari. (Di 24 Desember bodarina, marpungu do halak Kristen mamestahon Natal. Na marbonsir do i sian pangantusion ni bangso Israel taringot tu pargontian ni ari. Mangihuthon bangso i, jala i do nang anutan ni Bibel, pukul 6 botari do pargontian ni ari. Jadi, hombar tu pingkiran i, pukul 6 botari ni ari 24 Desember nunga masuk i tu 25 Desember. Gabe marpungu ma halak Kristen disi mamestahon Natal i. Tar songon patujolona ma i. Laos songon i do nang taringot tu parpunguan 31 Desember; pukul 6 botari ni 31 Desember, mangihuthon pingkiran i nunga masuk 1 Januari. Taringot tu 1 Januari manang Taon Baru i ndang sada ombas na manontuhon i di buhu ni tingki di taon parhuriaon i. Dohot hata na asing, ndang adong tingki Taon Baru di Taon Parhuriaon, alai bagian ni Natal i do Taon Baru i, i ma parningotan di ari parsunaton manang habobongot ni Jesus Kristus tu gomgoman ni patik asa ditobus hita angka na ginomgoman ni patik i asa tajalo ruhut paramaon (Gal.4:4-5). Ala ni i, sasintongna ndang adong Minggu dung Taon Baru; molo tung adong minggu di parholangan ni Taon Baru tu Epiphanias, Minggu Paduahon dung Natal do goar ni i).
3. Epiphanias, sian 6 Januari sahat tu manang na piga minggu na mangihut tusi.
4. Passion Parjolo, sian Septuagesima sahat ro di Estomihi.
5. Passion, sian Invocavit sahat ro di Jumat Agung.
6. Paskah dohot tingki Haheheon, sian Pesta Paskah sahat ro di Rogate.
7. Hananaek dohot tingki Hananaek, sian Pesta Hananaek sahat ro di Exaudi.
8. Pentakoste.
9. Trinitatis, sian Minggu Trinitatis sahat ro di Minggu Ujung ni Taon Parhuriaon. (Di deba huria, digoar do i tingki Pentakoste, ndang Trinitatis).

Ndang dos, alai paasingasing do warna ni parmingguon di angka buhu ni tingki i. Asing do rupani introitus dohot tangiang di Minggu Septuagesima sian di Minggu Palmarum, asing ende di tingki Advent sian di Epiphanias; asing turpuk dohot ondolan ni jamita di Passion sian di Trinitatis. Dung i, songon na nidok nangkin, ala na di parmingguon i do siboanon ni ruas ni huria i jala sihangoluhononna di hangoluanna ariari, laos warna ni parmingguon i ma na gabe warna ni parngoluon dohot panggulmiton hakristenonna ariari. Luhutna i diatur ma i di Agenda, di Buku Ende dohot di Almanak. Taringot tu sasudena i, ndang apala adong ganggu ni roha, sude dope hita umbotosa. Alai boha do taringot tu pangulahonna?

Sahat tu angka ombas parmulaan ni hapanditaonniba, di angka huria manang ressort na binolus disubanghon halak dope marpesta di angka tingki passion. Manang na pesta aha pe i, pesta adat manang pesta huria, ndang adong na mangulahon. Sian i ma tarida na marlapatan jala marhataridaan do peribadahan na hombar tu taon parhuriaon i di ngolu ni huria i. Nuaeng, ndang adong be na marningot i. Unang be ruas, gari huria adong do na marpesta di angka tingki Passion. Marpesta pembangunan rupani di Minggu Invocavit, mameakhon batu ojahan (MBO) di Minggu Okuli, mangompoi gareja di Minggu Letare, manang marjubileum di Minggu Palmarum. Dioloi pandita do i, ditolopi praeses jala diuluhon Ephorus. Hupaihutihut di angka tingki na parpudi on, ndang sai apala ende na topet tu sada buhu ni tingki di taon parhuriaon be na dipillit jala na diendehon di angka parmingguanta. Di sada minggu Epiphanias rupani, hea do huida ndang adong nanggo sada ende Epiphanias. Di ari 26 Desember 2010, marminggu do ahu di sada huria. Pesta Natal-II dope i na tongon di ari Minggu. Sian na pitu ende di Minggu i, holan dua nama Ende Natal; asing ni i dibuat dua sian Ende Ari Minggu, sada sian Ende Hasesaan ni Dosa, sada sian Ende Parungkilon dohot sada sian Ende Ulaon Sending. Mansai tarhirim do ahu na marminggu i, ndang sejahtera ai naeng marende Natal dope ahu hatiha i. Ala ni hatarhirimonhu, holan tingki na mangendehon Ende Natal i do ahu dohot marende; di na lima nari ndang dohot, alai hohom. Tamba tarhirim dope ahu, ai parjamita di ari i pe ndang be mangondolhon Natal; hira na marjamita di parmingguon na somal nama. Taringot tu na parpudi on, ndang holan pengalaman na sahali i non i, alai nunga tung rangkak hubege parjamita di hurianta na olo manaringoti dohot pahombarhon jamitana tu goar ni sadasada minggu. Boasa boi masa na songon i?

Ninna roha, ragam do sibonsirina. Alai apala na huholsohon, adong do i na tinumpahan ni angka na sasintongna nian sipahot ruhut na denggan di tongatonga ni huria. Na parjolo, i ma Impola. Di Impola nunga diparade angka ende dohot agenda sipangkeon di ganup minggu. Di roha ni na deba, nunga gabe patik i di sandok HKBP, ingkon i do pangkeon di ganup huria, ndang boi na asing. Uju di Pearaja dope ahu, di sada LPP-III didok sada halak calon pandita do na mansai muruk do ninna parhalado molo digonti sada pe sian ende na di Impola i. Ndang huboto manang na ise na manontuhon angka ende i. Alai na hupaihutihut, ndang apala sahalak na tarihot tu Taon Parhuriaon nasida. Na hudok di ginjang i ma hataridaanna, di Minggu Epiphanias ndang adong dipillit Ende Epiphanias; di Natal-II holan dua nama Ende Natal. Mardomu tusi hea do hudok tu na menangani Impola i asa unang be dibahen disi parture ni paragendaon siganup minggu, ai gabe losok jala gabe so diboto angka pandita be mamillit ende na hombar tu warna ni liturgi manang Taon Parhuriaon, alai ndang dioloi. Na paduahon, Almanak. Di angka tingki na parpudi on, nunga dibahen tema/topik ni ganup minggu di almanak ni hurianta. Sahat tu taon 2008, mamungka Epiphanias sahat tu Trinitatis, dohot Advent laos goar ni minggu i do tema/topik ni ganup minggu. Topik ni Minggu Rogate rupani, laos Rogate do; topik ni Pentakoste, laos Pentakoste; topik ni Minggu Advent-1, laos Advent-1. Dung pe Minggu 1 dung Trinitatis sahat ro di Minggu Ujung ni Taon Parhuriaon asa dipangke angka topik na tertentu isara pemuridan, kekerasan, mentalitas warga, reformasi dohot na asing. Alai mamungka 2009 torus tu nuaeng, angka minggu na margoar hombar tu Taon Parhuriaon pe nunga dibahen martopik. Susana, ndang sai hombar goar ni minggu i tu topik i. Rupani, 17 Mei 2009, Minggu Rogate, topik: Marpangulahi Roha ni Debata; 14 Pebruari 2010, Minggu Estomihi, topik: Marparange na Denggan; 27 Maret 2011, Minggu Okuli, topik: Pelehon ma Ngolum tu Debata. Ninna rohangku, nunga tung na maol padomuhon topik i tu goar ni minggu i sadasada. Ndang huboto manang na ala ni maolna padomuhon gabe torop parjamita na so pola manaringoti sada pe sian na dua i; goar ni minggu i dilupahon, topik na di Almanak i pe ndang ditaringoti. Adong do otik na manaringoti, alai holan sada; ia so goar ni minggu i, ba topik i. Di deba huria, dijaha do di Tingting goar ni minggu dohot topik i. Manang na dia sangkapna disi ndang binoto, ai so adong pola hatorangan taringot tu pardomuan ni na dua i.

Didok roha nian, molo ingkon martopik, naeng ma hombar topik i tu goar ni minggu i. Molo hupamanat do topik ni angka minggu Epiphanias di Almanak 2011, terkesan do ahu na so adong nanggo sada sian i na diojakhon tu tafsiran ni ganup turpuk, alai sae do holan tu panjahaon sisambolus, jala ndang adong agia otik kesungguhan mangalului pardomuan ni topik i tu Taon Parhuriaon manang Epiphanias. Godangan do topik i na marrumanghon didache, na mangondolhon ulaon sipatupaon ni jolma, holan sada do na marrumanghon kerugma na mangondolhon ulaon naung pinatupa Debata. Hape Epiphanias i kerugma do i, ndang didache; ulaon ni Debata do i, ndang ulaon ni jolma. Aut borhat na mambahen topik i sian tafsiran ni ganup turpuk, porsea do ahu godangan do sian i na marrumanghon kerugma jala i do na hombar tu Epiphanias. Jadi, sahat tu tingkat na tertentu, almanakta i ndang be manuanhon pangantusion taringot tu Taon Parhuriaon.[Mardommu tusi laos naeng dohonon do dison, di susunan ni perikope mingguminggu Epiphanias 2011 i, songon na marputorputor do pardalan ni hapapatar ni Jesus na tubu na taingot jala tahalashon di Natal na salpu i. Tapamanat ma rupani, di Minggu 9 Januari (Mat.4:12-17) nunga dipungka Jesus papatarhon hamessiasonNa marhite na mamillit Kapernaum gabe pusat ni pangulaonNa; di Minggu 16 Januari (Joh.1:43-51) diuduti ma muse papatarhon hamessiasonNa i marhite na mamillit siseanNa na parjolo. Alai di 23 Januari (Mat.2:1-12) mulak muse tu haroro ni parroha sian Purba. Dung i, di 30 Januari (Joh.2:1-12) dipapatar hamessiasonNa marhite na patupa aek gabe anggur di huta Kana. Dung i di ari 6 Pebruari (Mat.8:5-13) pintor mangangkat ma tu periode pertengahan ni masa hapapatar dohot pangulaon ni Jesus, i ma na pamalumhon sahit ni naposo ni induk ni soldadu, jala di 13 Pebruari (Mrk.1:9-15) marputor muse tu bona ni hapapatar ni Jesus. Sala? Ndang nian, ai sude perikope i angka turpuk na hona tu Epiphanias do i. Alai manang na boha pe didok, ndang unur be hilalaon pardalan ni Epiphanias i, alai marputorputor, margellokgellok. Ndang dumenggan molo dipungka nian sian Mat.2:1-12 dung i Mat.4:12-17; diuduti muse tu Mrk.1:9-15 dung i Joh.1:43-51 jala dipaujung marhite Joh.2:1-12 dohot Mat.8:5-13?. Marhite na songon i nda gabe unur ma hilalaon pardalan ni hapapatar ni Jesus i sian hametmeton/haposoposoonNa tu periode pamungkaan torus tu periode pertengahan?]

Molo songon i torus, unang pola longang rohanta molo lam so diantusi halak be lapatan ni Taon Parhuriaon, jala unang pola tarsonggot hita molo lam rarat songon naung gabe polemik di torop face booker di taon na salpu i na marpesta Natal so di tingkina, i ma di Advent bahkan songon na hea niida di sada huria, marpesta Natal di ujung ni Taon Pahuriaon, i ma di bodari ni ari Sabtu andorang so Minggu Advent-1. Di gareja ni HKBP do i masa jala diuluhon sahalak pandita ni HKBP. Ala ni i, ra, ndang na masalpuhu molo husungkunhon: Taon Parhuriaon, taantusi dope lapatanna?

jkt.09.01.2011/mvs

Read More..

Mohon Diri

MOHON DIRI

Tu angka dongan panjaha na manghaseahon Sermon Jamita na hupatomutomu jala na hupublish di dunia maya marhite blog na maralamat http://batumamak.blogspot.com/, marhite on hupabotohon ndang tarbahen iba be manorushon ulaon i. Na marbonsir do i sian parsidohotonniba di Tim Revisi Bibel Batak Toba na pinatupa ni gereja-gereja penutur bahasa Batak Toba bekerjasama dohot Lembaga Alkitab Indonesia (LAI) na mangigil hira sude gogo dohot tingkiniba. Mauliate do dohonon tu Debata na paloashon iba mengelola blog on na sai leleng on. Mauliate do dohonon nang tu angka dongan na manjaha jala na manghaseahonsa di ulaonna manjamitahon hata ni Debata.

Mardomu tusi naeng taringotanhu do muse na gabe sibonsiri ni blog on, i ma giot ni roha manangkasnangkasi hata ni Debata dung godang tingkiniba na lowong ala naung pensiun, lumobi angka turpuk jamita Minggu. Ia sinurathon pe i marrumang sermon ala marguna do i di iba molo dipangido dongan marjamita sahalisahali. Siangkup ni i, hirim do roha na boi gabe pangurupion i di angka dongan na mangharingkothon. Huantusi do kesibukan ni angka dongan na mangula di huria, ndang apala godang tingki na tarpangkesa laho parade sermon. Alai huhut, na songon reaksi do i tu torop parjamita dohot parjamitaon na hupaihutihut di hurianta di angka tingki na parpudi. Sapanjang na sada satonga taon on sai huuji do paradehon jamita na tarihot tu teks, na borhat sian tafsiran jala na hombar tu taon parhuriaon. Angka i ma huida na lam mago sian parjamitaon di hurianta di angka tingki na parpudi on. Hea do hubege sahalak parjamita na so manaringoti agia aha sian turpuk ari i, gabe konteksna do dijamitahon. Na asing, tongon di Minggu Rogate, dijaha do nian turpuk ari i, alai ndang i dijamitahon; gabe partangiangon do dihatai marojahan tu puluhan teks ni Bibel, sian buku na paasingasing. Songon i muse, sahalak parjamita di Pesta Hananaek ni Tuhan Jesus na so manaringoti agia otik Barita na Uli ni hananaek i, alai mansai butong do pinggol mambege hatoranganna taringot tu surusuruan manang angelologi, ala kebetulan adong martaringot di turpuk ari i surusuruan. Di na mangujungi ulaon on, laos i ma na nuaeng na naeng ondolhononhu: Sai tauji ma pasahathon jamita na tarihot tu turpuk, na borhat sian tafsiran na tarpartanggung-jawabhon, jala na hombar tu tingki (taon parhuriaon dohot kontellasi masa kini).

Na parpudi, partahanhononhon do haadongon ni blog on. Sintap ni na boi, pangkeonhu do i pasahathon angka na mardomu tu missina na parjolo i, jala na boi tambaan dohot informasi taringot tu revisi Bibel Batak Toba. SELAMAT TAON BARU 2011, HORAS.

Read More..