MARDALAN DI BAGASAN HATIURON
Jes.60:1-6
Di hita saluhutna, angka dongan na hinaholongan di Punguan Ama Natuatua HKBP Menteng dohot angka inanta soripada ro di saluhut na taontang tu inganan on. Sian asi ni roha ni Debata, di ari on taingot jala tapestahon do muse Natal. Natal mandok, Kristus tubu; Kristus ro tu portibi on. Ragam do pandok ni hata ni Debata na tarsurat di Bibel i taringot tu sintuhu ni haroroNa i. Sada sian i, i ma na manondangi. Di Joh.8:12 rupani, Tuhanta Jesus sandiri mandok, “Ahu do Panondang ni portibi on, na so tupa mardalan di na holom na mangihuthon Ahu. Di ibana do tahe Panondang hangoluan.”
Sian Padan na Robi tu Padan na Imbaru, mulakulak do dipangke hatiuron songon simbol ni hangoluan, sabalikna haholomon songon gombaran ni hamatean. Na marbonsir do i sian pangantusion ni jolma taringot tu hatiuron dohot haholomon i sandiri, baik pemahaman empiris manang pe pemahaman saientis. Molo dihurung sada halak di inganan na holom di sada ombas na relatif leleng, nang pe sai dipatuk sipanganon dohot siinumonna, ndang tagamon sempurna perkembangan ni ngoluna, sega do. Di na lam maju parbinotoan, diboto jolma ma na mataniari do mual ni hatiuron dohot enerji na utama. Ala ni sondang ni mataniari gabe tarjadi do proses fotosyntesa di suansuanan, i ma penyerapan ni carbon monoxida, gas na marrasun na marmara dohot pelepasan ni oxigen, gas na mansai ringkot di jolma dohot di pinahan. Enerji na adong di sinondang ni mataniari i do na manghorhon hajajadi ni proses-proses kimiawi di bagasan aek gabe mangolu angka limut dohot plankton, suang songon i suansuanan dohot nasa na manggulmit di bagasan aek. Sian i bolas do dohonon: Aut sura so adong mataniari ndang adong ngolu; manang molo so adong hatiuron, mate do saluhut.
Dipangke hata ni Debata do na dua konsepsi i laho manggombarhon dua ragam ni ngolu. Sada na marpardomuan tu Debata, na marhapatean tu hangoluan; na sada nari na masialoan tu Debata, na marhapatean tu hamagoan. Ama ni na tiur do Debata, ndang adong haholomon di bagasan Ibana. Hombar tusi ma digombarhon, ngolu na marpardomuan tu Debata, i do ngolu na tiur, na mardalan di bagasan hatiuron jala marhapatean tu hangoluan na saleleng ni lelengna; sabalikna, ngolu na sirang jala masialoan dohot Debata, i do ngolu na holom, na mardalan di bagasan haholomon jala marujung di hamatean na saleleng ni lelengna.
Di tingki ni jamita on, dihilala bangso Israel do na mangolu nasida di linggoman ni haholomon. Nunga salpu nian habuangan, toropan sian nasida nunga mulak tu tano bagabaga i, tu Juda dohot tu Jerusalem. Di pangantusion ni halak Israel, Jerusalem do pusat ni parugamoonnasida, inganan parmianan dohot parjumpangan ni Debata dohot nasida. Marhite naung mulak nasida tusi, dihaporseai nasida do naung marsinondang muse Debata di tongatonganasida. Alai nang pe songon i, ndang boi nasida papitpit mata tu ragam ni halilu ni haholomon na mangalinggomi nasida. Rupani, halilu ni haholomon di konteks ekonomi. Pogos do nasida, ai na baru mulak dope sian habuangan, baru mambangun muse tano naung tarulang i. Dung i, halilu ni haholomon di konteks politik. Ndang mardeka situtu dope nasida, alai di toru ni pengaruh ni Parsi dope. Na mangihut, halilu ni haholomon di konteks keumatan. Ndang pungu dope nasida sude, marserak dope deba di angka luat ni sipelebegu. Ndang ala na so boi, alai godangan do ala ni biarna. Di habuangan i, torop do sian nasida na marhasil di ekonomi, denggan do usahona, boi pajongjong jabu dohot manginganisa, gabe ndang lomo be rohanasida mulak, ai molo songon i ingkon mangulahi muse nasida sian nol. Na parpudi, halilu ni haholomon dalam konteks kerohanian. Ndang tarpajongjong nasida dope bagas joro, gabe ndang boi dope nasida pasahathon pelean na marmudar justru na songon pranata terpenting di parugamoon ni Israel. Ala ni saluhutna i, gabe mabiar ma nasida, magopu rohana, resah, kalut.
Tu nasida ma Debata marhite si Jesaya mandok, “Hehe ma ho! Marsinondang ma ho! Ai na ro ma panondangmu jala hamuliaon ni Jahowa binsar di atasmu.” Domu tusi, dibagabagahon do na patupaonNa pembaharuan politik, ai papunguonna ma muse Israel na marserak i, didok, “Luhut ma nasida marrongoman ro mandapothon ho. Angka anakmu ro sian na dao, dohot angka borum abingabingonna.” PatupaonNa dohot pembaharuan ekonomi, ai ninna do, “Turun ma tu ho hamoraon ni laut dohot hinagok ni angka parbegu ro tu ho. Tutupon ni angka parduaan ni unto ma tanom, angka hoda parhuli sian Midian dohot Epah, saluhut nasida ro sian Seba, mangusung sere dohot daupa.” Sadihari do panggohion ni bagabaga on?
Bangso Israel na satingki dohot si Jesaya dohot angka sundut na mangihut tusi sai boi do marnida panggohion ni bagabaga on di bagasan manang piga peristiwa sejarah. Di tingki ni si Esra dohot Nehemia rupani, hehe do muse roha ni torop na tarbuang mulak tu Jerusalem. Sadalan tusi masa do haimbaruon partondion ai gabe hehe do rohanasida mambangun Jerusalem dohot bagas joro, mardalan ma muse pameleon, gabe lam marsinondang hamuliaon ni Jahowa di tongatonganasida, jala tarpasupasu nasida, lam sejahtera. Nang pe songon i, anggo panggohion sasintongna di haroro ni Tuhanta Jesus Kristus do songon na taingot jala tapestahon di ombas on. Taringot tusi, didok si Johanes do, “Di bagasan Hata i do hangoluan; laos hangoluan i do Panondang ni hajolmaon,” (Joh.1:4) jala songon naung nidok nangkin, di na laho mencirikan lapatan ni haroroNa tu portibi on, Tuhanta Jesus Kristus sandiri mandok, “Ahu do Panondang ni portibi on, na so tupa mardalan di na holom na mangihuthon Ahu. Di ibana do tahe Panondang hangoluan.” (Joh.8:12) Nuaeng, aha ma lapatan ni i di hita na mangolu jala na mamestahon Natal i di tingki on dohot di inganan on?
Di Oktober na salpu, di sada parpunguanta, tataringoti do jamita ni si Amos taringot tu na masa di Israel uju i. Di tingki ni panurirang i, aman tenteram do Israel, maju perdagangan gabe lam torop na mamora. Marhinorhon situtu do i tu pembangunan agama, ai tarbahen jolma ma pasahathon pelean angka na godang tu bagas joro gabe sulean angka malim jala boi bangso i patupahon ibadah dohot angka pesta na meriah. Alai sude i songon panas mengandung hujan do, ai sasintongna torop do na pogos di nasida, na menderita di lambung ni angka na mora. Tabereng do hatiha i hahonaan ni i tu bangsonta. Ninna, Indonesia do sada sian segelintir bangso na adong di sandok portibi on na mengalami pertumbuhan ekonomi di taon on. Alai di tonga ni pertumbuhan i, man-sai torop do na pogos na semakin terpuruk di lambung ni torop halak na semakin sejahtera bahkan lobian. Boasa boi masa na songon i?
Di partongaan parjolo ni abad na salpu, masa do resesi ekonomi di sandok portibi on. Di tingki i, adong ma sada surat kabar mambahen karikatur taringot tu sahalak na mardalan di borngin na golap. Ditiop do sada lentera na galak, alai asing, ndang tu jolo diarahkan, tu lambung do. Ala ni i sai tong ma ibana golap jala dadapdadap. Di toru ni karikatur i disurathon do sada komentar na mandok, “So nda tung na mardalan do hita di toru ni sondang na sala?”
Ra, nunga torop tutu sian bangsonta on, sian tonga ni angka partogi dohot sian angka uluanta na mardalan di toru ni sondang na sala, na mamereng ojahan dohot mual ni ngolu di angka na so tau pasonanghon, isara di hepeng, di hamoraon, di huaso, di habolonon dohot angka na asing. Asal ma denggan goar manang citrana, ndang pola dipardulihon angka korban ni ketidakadilan, asal ma gok sangkuna ndang pola dipingkirhon kesejahteraan umum. Hita halak Kristen pe selaku umat manang huria songon institusi, ndang sai mampu mardalan dohot mengarahkan halak mardalan di toru ni sondang na sintong i.
Nuaeng, tu hita ma didok, “Nunga tubu Kristus i.” Ibana do Panondang ni portibi on, Panondang ni bangso dohot negaranta, Panondang ni hangoluanta. Di bagasan Ibana do hita boi manghirim dohot manjalo ngolu na gok, na utuh, jasmani dan rohani. Ala ni i tajangkon ma Ibana jala mardalani hita di bagasan sondang ni hatiuronNa i. Molo dung songon i, boi ma hita mangarahon halak asa mardalan di sondang na sintong i. Lobi sian i tahe, boi mangalehon lapatan tu angka perkembangan di tonga ni huria, masyarakat dohot bangsonta, ai ndang sae di hita holan na mengalami perkembangan, alai ingkon dohot jala ingkon mampu do hita manontuhon manang na dompak dia perkebangan i diarahkan. Amen.
