2.24.2013

Sermon Jamita Minggu Okuli

SERMON JAMITA MINGGU OKULI, 03 MARET 2013

1 Korintus 10:1-13



Patujolo



Di bagasan kerangka parsagi ni surat 1 Korintus, tarrajum do turpuk ari on tu sub-bagian poda taringot tu juhut naung pinelehon tu begu (8:1-11:1). Dipasingothon do i mardomu tu sada upacara ni parbegu na margoar misterion. Disi, dipelehon angka halak parbegu i do pelean na marmudar (pinahan) tu na angka na pinardebatanasida. Mangihuthon haporseoannasida, disi dipelehon pelean i, secara magis dan rahasia pintor saor do angka debata tu juhut i. Dung i, dipangan nasida ma juhut i. Marhite na manganhon i, laos dihaporseai nasida ma na gabe saor do tu nasida angka debata. Deba sian juhut pelean i diboan do tu onan jala digadisi disi. Sangkapna disi, asa angka na so boi mandohoti upacara pamelean i boi ma manuhor dohot manganhonsa gabe dohot jumpangan di parsaoran na tu angka na pinardebatanasida i.



Mardomu tusi, tubu ma sungkunsungkun di roha ni ruas ni huria Korintus na mandok, “Boi do halak Kristen mandohoti upacara misterion i? Dung i, boi do tuhoron jala panganon juhut na dipelehon di upacara i na diboan tu onan jala digadis disi?” Sabagian sian nasida angka na targoar na gogo manang na jongjong di rohana mandok, “Boi.” Alasannasida, na parjolo: Ndang adong begu di tano on (pat.1 Kor.8:4) Hombar tusi, ndang adong agia aha na manjalo dohot na sorop tu juhut i; sandok juhut sambing do i na so sala panganon. Alasan paduahon: Pangantusion na sala taringot tu haluaon. Didok rohanasida, ala naung dipalua Kristus i nasida sian sude huaso dohot hagogoon, nunga bebas be nasida mangulahon saluhut, bebas mandohoti upacara misterion, bebas manuhor dohot manganhon juhut pelean na digadis di onan, bebas pasaorhon diri tu angka ulaon hajahaton dohot haronsamon. Ndang sala i, ai holan daging i do na mangulahon i, ndang dohot anggo tondi naung malua i. Alai na sabagian nari sian ruas ni huria i mandok, “Ndang boi.” Angka nasida on, ndang sahat dope tu pangantusion di hasoadongon ni begu di tano on. Ala ni i dihaporseai do na adong do na manjalo jala na saor tu juhut pelean i. Gabe mabiar ma nasida mandohoti upacara misterion i, jala ndang olo manuhor dohot manganhon juhut pelean na digadis di onan i. Boha do ia pandok ni si Paulus? Manguduti alusna naung dipasahat di ujung ni bindu 8, di turpuk on dohot di pudina, dipatangkas si Paulus do pingkiranna taringot tusi.



Hatorangan



1. Tudosan sian Sejarah ni Israel (1-5). Songon ondolan ni sipaingotna, ditaringoti si Paulus do dison deba peristiwa sejarah ni Israel. Di na mardalan nasida sian Misir tu tano Kanaan, ditogihon Debata do nasida marhite ombun (2 Mus.13:21). Tanda kehadiran ni Debata do ombun i di tongatonganasida. Molo diida nasida i mardalan di jolonasida manang mangalinggomi sian ginjangnasida, ia so i sumorop manghuhupi dolok Sinai manang undungundung parluhutan i, porsea jala pos situtu ma rohanasida paboa na di tongatonganasida do Debata. Di bagasan kehadiranNa i dipalua Debata do nasida di Laut Rara (2 Mus.14:15 du). Duansa i ditafsirhon si Paulus do dison secara Baru, ai dibereng do i songon sakramen pandidion ni bangso i. Mangihuthon si Paulus sandiri (ida Rom 6:3 du), ia pandidion i tudosan ni hamatean ni Kristus do i. Nasa na tardidi tu bagasan goar ni Kristus, naung mate jala tartanom do i tu bagasan hamatean ni Kristus, dung i laos tong di bagasan pandidion i, dipahehe do muse jolma i raphon Kristus asa mangolu di bagasan hangoluan na imbaru. Songon i ma ombun dohot aek ni Laut Rara i dirajumi si Paulus gabe unsur ni pandidion ni bangso i. Di samping ni tanda kehadiran ni Debata, laos pertanda maut na mengejutkan do ombun i di Israel (pat.2 Mus,14:19 du). Aek i pe songon i, ai marmatean do halak Misir dilingkuphon disi. Di bagasan ombun dohot aek i songon na dipabongot do Israel tu hamatean, dung i ditogu muse sian i mangolu. Holan di bagasan dohot marhite ombun i do malua nasida. Si Musa do na gabe perantara ni haluaon i. Hombar tusi ma didok dison, “Luhut do nasida tardidi tu bagasan si Musa.” Angkup ni i dilehon dope tu nasida manna (2 Mus.18:14 du), dipasingkop dohot aek inumon sian dolok batu (2 Mus.17:1 du; 4 Mus.20:2 du; 21:16 du). Batu hapuasan ni aek i digoar si Paulus do dolok batu na mangihut. Diihuthon su Paulus do dison tafsiran ni angka rabbi Jahudi. Dihaporseai angka rabbi i do na mardalan do dolok batu i paihutihut halak Israel di pengembaraannasida di parhorsihan i. Marhite i tarjamin ma tongtong aek inumon di nasida. Pangalaho on pe ditafsirhon si Paulus do secara baru, ai dirajumi ibana do i songon sipanganon dohot siinumon partondion (sakramen) na disagihon tu halak Israel jala na martudutudu tu sakramen parpadanan na badia na tinotophon ni Kristus i. Mansai torang do i sian pandohanna na mangihut, “Kristus do dolok batu i.” Pernyataan on sekaligus do mangondolhon paboa: Na sian saleleng ni lelengna (prae existence) do Kristus i, naung hadir jala mangula di Padan na Robi di bagasan cara berada na marasing sian na di Padan na Imbaru.



Nuaeng, sahat ma si Paulus tu ondolan ni sipaingotna, didok ma: “Toropan do nasida ndang dihalomohon Debata, ai rage do nasida di halongonan i.” Sude do nasida tardidi, sude do manganhon dohot manginum sipanganon dohot siinumon partondion i, alai ndang sude sahat malua. Ndang sude nasida sahat tu tano Kanaan, alai mate do di halongonan i nasa na marumur duapulu taon tu ginjang di haruruarnasida sian Misir (asing ni si Josua dohot si Kaleb). Boasa? Ala dihahisaphon na roa, dipahombar tu dosa, dioloi debata sileban (2 Mus.32), marmainan tu boru Moab (4 Mus.25:1), mangunjuni (4 Mus.21:5 du) jala marungutungut tu Debata di bagasan hasohaporseaon ni rohana be (4 Mus.10:14).



2. Lumbalumba tu Halak Kristen (6-13). Na masa tu halak Israel i tudosan panjoraan do i tu halak Kristen; tudutudu dohot lumbalumba asa unang manghahisaphon na roa, unang pajonokjonok diri tu na jahat isara tu hasipelebeguon, parmainanon, pangunjunan, parungutunguton dohot na asing. Haluaon di bagasan Kristus, keterhisaban tu hamatean dohot tu hangoluanNa di bagasan dohot marhite pandidion dohot parpadanan na badia i, ndang gabe paloashon jolma bebas mangulahon dosa. Pandidion naung diulahon dohot parpadanan na badia naung disagihon tu ruas ni huria selaku sahap manang meterai ni haluaon i, ndang gabe jaminan mutlak ni keselamatan i molo halak naung tardidi jala manganhon parpadanan na badia i tongtong mangolu di bagasan dosa dohot hajahatonna.



Naeng rumingkot ma roha ni huria mangantusi i mardomu tu zamanna mangolu. Nunga manjonok huria i tu ujung ni angka ari. Dohot hata na asing, na mangolu do huria i di ujung ni angka ari, di zaman akhir. Disi, tahop do ragam ni pangunjunan tu haporseaon. Mandatang do i sian hagiot tu hahisapon, hagangguon, hapogoson, parungkilon dohot angka na asing. Di zaman i sandok manggogo do Sibolis i mangunjuni, mangela dohot mangaliluhon halak ala diboto tangkas otik nama tingkina. Hombar tusi dipaingot si Paulus ma ruas ni huria i, didok, “Ganup na jongjong di rohana, dimatahon ma unang tinggang.” Sipaingot on parjolo sahali ditujuhon tu halak angka na manghilala dirina na gogo gabe barani pasaorhon dirina tu angka ulaon hasipelebeguon. Naeng sadar nasida, na gogo do sibolis i, bisuk mangelaela, marhuaso mangaliluhon sahat tu na manarat (1 Kor.12:2) jolma tu hamagoan. Porlu do habiaran Sibolis i, aloon ansiasina, pasidingon jala padaoon diri sian pusat-pusat ni kekuasaanna (isara inganan dohot parpunguan parsombaon tu begu). Nang pe songon i ndang porlu anggo na mabiarhu tu Sibolis, ai ndang na mahakuasa ibana. Parhuaso naung talu do tahe, naung binatas ni Debata huaso dohot tingkina. Dung i, satia do Debata tu angka na di Ibana; di bagasan hasatiaonNa sai jagaonNa do na porsea i asa unang mandate jala mago. Ala ni i ndang loasonNa i unjunan lobi sian gogo manang daya tahanna be. Bahkan sangat menakjubkan tahe, dipangke do pangunjunan i laho papitahon dohot patoguhon haporseaon. Domu tusi ma didok, “Ibana na parohon pangunjunan i, laos Ibana do na mambahen hapateanna asa tartaon hamu.” Di pangantusion ni Bibel, dua ragam do pangunjunan, i ma pangunjunan na tu hajahaton dohot pangunjunan na papitahon. Ragam na parjolo, pada umumna dipahami do i na marharoroan sian Sibolis; sabalikna, sian Debata do anggo na paduahon. Laho paasinghon na sada sian na sada nari, somalna, digoari ma na sian Tuhan i pangujian. Alai di kenyataanna, ndang sai tangkas tarsirang pangunjunan sian pangujian. Tiruan na mansai torang i ma na masa tu si Job. Di sada sisi, pangunjunan sian Sibolis do i asa madabu nian si Job tu dosa, alai na gabe berlaku do i songon pangujian na papitahon dohot patoguhon haporseaon ni si Job. Songon i ma dison, disejajarhon si Paulus do pangunjunan dohot pangujian.



Rancangan Homiletis



Didok pandohan ni bangsonta, “Seang do pauseang molo matombuk tungkusan.” Na nidokna disi, seang do pasupasu, arta manang sinadongan na jinalo manang na tinean ni sasahalak molo so diboto ibana do mangaramoti, mangulahon dohot mamangke i songon na patut; mago do i, mambur so tarbotoboto.



Di bagasan Kristus, tajalo do teanteanan sian Debata, i ma pasupasu haluaon sian dosa, sian Sibolis dohot sian hamatean. Alai ndang dipasahat i tu hita tanpa tanggungjawab. Taringot tusi didok si Paulus do, “Mardongan biar dohot lomos ni roha, ulahon hamu ma haluaonmuna” (Plp.2:12b). Na nidokna disi, siramotan do haluaon i, siulahonon jala sihangoluhononhon. Manang ise na mangaramoti i di bagasan na patut, hot do haluaonna i sahat tu ari sogot, alai na marhamudahonsa sai na agoan do di haluaonna. Marhite jamita Minggu on, naeng parataonta do manang songon dia hita patut mangaramoti dohot mangulahon haluaonta i asa dapot hita kesinambungan dohot hagogokna di ari sogot i. Taringot tusi, naeng marsiajar do hita sian sejarah ni halak Israel.



Marojahan di ari ni roha do tahiNa na so hadodoan, dipalua Debata do halak Israel sian tano Misir jala ditogihon tu tano Kanaan. Di pardalanan i, torus do Debata papatarhon angka pambahenan haluaonNa tu nasida. Ditogihon jala diondingi do nasida marhite ombun, dipalua di Laut Rara, dipasingkop sipanganonnasida marhite manna, songon i siinumonnasida marhite aek na ruar sian dolok batu. Sudena i dilapathon si Paulus do secara baru, i ma na songon pandidion dohot parpadanan na badia, songon sahap manang meterai ni haluaonnasida na sian Debata. Nang pe songon i ndang mananda bangso i di Debata, ai mansai mura do nasida marbalik jala mangoloi na so debata. Ala ni i diuhum Debata do nasida, ndang sude nasida sahat tu tano na pinarbagabaga i.



Na gabe lumbalumba ma i di hita halak Kristen. Angka naung malua do hita, malua sian parhatobanon di bagasan dosa, sian huaso ni Sibolis dohot hamatean. Ndang holan dison, alai marbagabaga do Debata na torushononNa do haluaonta i sahat ro di ari sogot. Songon sahap ni haluaon i, tajalo do pandidion dohot parpadanan na badia. Duansa i, na mangigil hita do asa tongtong paimbaruhon roha jala mangaup angka dosanta ganup ari. Manang ise na sai tongtong mian di bagasan dosana, ndang tarbahen manjalo hagogok ni bagabaga haluaon i, alai ubaon ni Debata do i ai marhuaso do Ibana maningkati bagabaga gabe uhum. Pandidion dohot parpadanan na badia ndang jaminan multak ni keselamatan i di angka na sai hot manghaholongi dohot hahisapon tano on. Mansai tangkas do i dipasingothon si Paulus tu ruas ni huria Korintus angka na sala mangarti di haluaon na di bagasan Kristus, na manghilala diri bebas mangulahon saluhut, mangula hahisapon, hahodaron, hasipelebeguon dohot na asing.



Ninna roha, ndang apala pangalaho na madaohu i sian parhuriaonta di tingki on. Pada umumna, diargahon jolma do pandidion. Ala ni argana, pola do gabe dipestahon jala diadathon. Relatif torop do halak na marulaon na badia. Alai anggo tuntutan haimbaruon ni pandidion dohot ulaon na badia i ndang sai diparrohahon. Ndang sai ringgas natuatua marsuru anakhonna tu Sikola Minggu dohot tu parguruon manghatindanghon haporseaon. Angka na matoras pe, atik na so hea do taringot dohot dapot gogo sian kenyataanna naung tardidi dohot na mandohoti parpadanan na badia. Molo songon i do, nda talpe do nang tu hita singotsingot ni jamita ari on na gabe agoan di hahohot dohot hagogok ni haluaon i? Ala ni i, dijouhon jamita ari on do tu hita: Asa hot jala gok haluaonta i, taramoti ma haluaon dohot haimbaruonta i, unang be tadatdati mangulahon dosa.



Mulak tu turpukta jamita ari on, di pardalanan i ditogihon Debata do halak Israel di dalan na gok parungkilon dohot pangunjunan. Ndang tahan nasida disi, ai marungutungut do nasida. Talu na deba, gabe madabu tu pardebataon sileban dohot parmainanon. Ndang pos rohanasida di panogunoguon ni Debata, ndang dihaporseai pangondingionNa. Mansai jorbut do panghorhonna, pola manindang imbulu jala sandok manonditnondit roha dohot panghilalaan mambege uhum na mangonai tu nasida ala ni i, ai mate satongkin do didok 23.000 halak, diparguti ulok na deba gabe marragean di halongonan i.



Nang hita pe ditogihon Debata do di dalan haluaon na maol, dalan na gogot, na gok parungkilon dohot pangujunan. Ndang tarbahen so masa angka i, ai na mangolu do hita di ujung ni angka ari. Disi, sandok manggogo do Sibolis i mangela jolma, mangaliluhon dohot mangagosa ala diboto tangkas otik nama tingkina. Mangula do ibana marhite hapogoson, marhite kesulitan ekonomi, hagiothagiot pardagingon, tondi ni materialisme dohot konsumerisme, tondi parhuasoon dohot persekongkolan politik, manang marhite survivalisme dohot revivalisme ni hasipelebeguon dohot angka na asing. Dipangke Sibolis i do i sude mangaithon halak asa torop donganna tu hamagoan. Naeng manahan do hita disi. Unang marungutungut mandok, boasa ingkon masa na songon i. Unang marbalik gabe pahombar diri tu bangko ni pangunjuni i, manang pasaor diri tu ulaon dohot tu pusat-pusat kekuasaan ni Sibolis i. Di bagasan saluhutna i ingkon marhaposan do hita tu Debata. Unang tarajumi dirinta naung sun gogo, naung mampu sian hagogoon sandiri laho manaon dohot manaluhon saluhutna i. Pangondingion ni Debata sambing do na tuk patauhon dohot margogoihon hita. Mangula do Ibana di bagasan dohot marhite pangujunan i laho manguji dohot papitahon haporseaonta. Ala ni i, olat ni na tartaon do patuhukhononNa tu hita. Dung i, dung tau hita, Ibana sandiri ma parohon hapateanna.



Apala dison ma idaonta pardomuan ni jamita on tu goar ni minggunta sadari on: Okuli, sai tong do mangaranapi matangku tu Jahowa. Di pardalanan dohot parungkilon ni haporseaon i, Debata sandiri do hagogoonta, haroroan ni sihirimonta. Ala ni i, ingkon tu Ibana do hita marhahirimon, dung i, Ibana sandiri ma na pahothon haluaonta i jala na pagokhonsa di ari sogot i, na saleleng ni lelengna. Amen.







Read More..