Ndang sian Arta Ngolu

NDANG SIAN ARTA NGOLU

Ro do sahali sahalak evangelis tu sada huta. Sahalak na tarbarita do ibana, naung godang dipangke Tuhan i patubegehon hataNa. Martahi ma angka huria na di huta i manjangkon ibana. Diongkos nasida ma sada gedong, asa disi patupaonna kebaktian, jala parbarita na uli na nidohan ondeng ma na marjamita disi. Dipadalan gonghon dohot joujou mangontang halak tu parpunguan i. Umbege i, marroan ma halak tusi mansai torop. Ala ni toropna, pola do ndang hasiatan di inganan i. Alai muningan do roha ni sude, ai diida nasida do di disi angka ulaula na so apala somal tarida di kebaktian.

Di na jumpang tingkina, nangkok ma parjamita i tu pentas. Hirim ma roha ni sude na pintor marjamita ma ibana, jala songon na somal diparade be ma rohana tu tangiang. Hape asing sian na hinirim ni rohanasida, mamangke ulaula angka naung diparade hian disi dipatupa ma ragam ni sulap angka na palongang roha. Lobi do sajom ibana na marsulap i, gabe sanga do lupa deba sian na ro i na laho markebaktian do nasida tu inganan i. Sabalikna do anggo na deba, sungkunsungkun do rohana mandok: “Ai aha do on, jala na marhua do hami tuson?” Alai di na lalap na deba, jala sungkunsungkun ia na deba, tompu ma ibana so, jala hapogan angka donganna pasuhihon sude ulaula sulapna i. Nangkok ma ibana tu parjamitaan laos didok: “Parsibalikmata do ahu na jolo, jala songon na niidamuna nangkin ma hupaulaula ganup ari. Mansai godang do hepeng dapot ahu sian i. Holan di bagasan sajom boi do hupapungu 100 dollar. Gabe mamora do ahu ala ni i, marlobilobi di arta dohot di sinadongan. Alai nang pe songon i ndang adong hasonangan di bagasan rohangku; hasang do ngolungku, humasusa arian dohot borngin. Ala ni i, hutadinghon ma sasudena i laho pararathon harajaon ni Debata songon na niidamuna nuaeng.”

Songon i do tutu, ngolu na sintong ndang ojak i di arta dohot sinadongan, alai di parsaoran tu Debata do. Taringot tusi, Tuhanta Jesus Kristus mandok: “Nang pe marlobilobi halak, ndada sian artana i ngoluna.” (Luk.12:15b)

Read More..

Sijangkit Kalapa

SIJANGKIT KALAPA

Di na sahali, songon i ma didok barita, manjangkit do sada halak di kalapa na timbo. Tongon apala di na mandabui parbue ni kalapana i ibana tompu do mangombus alogo na mansai gogo. Munggalunggal ma hau ni kalapa i ditondong alogo i, hira na naeng marumpak nama. Mansai tarmara ma ibana jala mabiar situtu, gabe dihaol ma hau ni kalapa i jala digomos mansai gogo. Di hagogotanna i, tarsingot ma ibana tu Debata, gabe dipangiar ma soarana manjoujouhon: “Tuhan, tolong ahu!” Dung i, diuji ma mijur nangetnanget. Mansai manat, huhut sai marsigomos tu hau ni kalapa i, dijururhon ma dagingna dompak toru. Lam dao ibana sian punsu ni kalapa i, lam moru do parmunggal ni hauna i. Tong dope mansai gogo nian alogo i, alai ndang apala songon na di ginjang i be pangonaina. Taantusi be do i. Lam hatop ma parmijurna, alai sabalikna lam moru ma angggo jotjotna manjou goar ni Tuhan i. Dung i, marhira dua meter nari sian tano, manimbung ma ibana, jala holan ojak patna di tano pintor marsurak ma ibana mansai gogo mandok: “Mauliate ma Ompung Doli!”

Digombarhon barita i do rumang ni harohaon ni jolma na ingot jala joujou tu Debata di hamamasa ni hasusaan, alai lupa ia di ari halalas ni roha dohot pariaiaon; radot di ugamona jala ringgas tu parmingguan molo di hamamasa ni hagogotan, alai lalap jala lupa anggo di ariari hasonangan. Tutu, ndang sai sude songon i; adong do na so mansadi martangiang di las manang di arsak ni rohana. Alai ndang tarsoadahon na godang do jolma na ingot jala joujou tu Debata holan di arsak ni rohana, alai lupa anggo di las ni rohana. Adong tahe na suman tu sijangkit kalapa ondeng, na gabe mamereng ojahan ni haluaon dohot hasonanganna i di na asing, isara di sahala ni natuatua, di panumpak ni tondi ni hulahula, manang di sumangot ni ompuna. Gabe tu angka i ma ibana mandok mauliate, jala angka i ma muse na dipapujipuji, dipasubutsubut, manang dipapelepele, atik pe nanggo apala kuburan ni ompung dolina i ndang diboto be manang na di dia. Alai Debata do ojahan ni haluaon dohot hasonanganta. Ala ni i, tu Ibana do hita patut mandok mauliate siala saluhut (1 Tes.5:18a).

Read More..

Sidabu Tulpang

SIDABU TULPANG

Didok turiturian, masa do sahali ari logo siranggapuri di sada luat. Ndang dung ro udan, gabe mahiang matamual dohot angka sunge; sega ma hauma, rahar angka suansuanan, jala masa ma haleon di luat i. Mansai potir do haleon i, nunga torop na so mangan jala adong do manang na piga halak naung mate.

Adong ma di huta i sada ama na mabalu raphon sada anakna na sapsapmardum. Nunga tibu monding inanta i. Ndang ala ni haleon i, na binoan ni sahitna do. Dohot do nasida hurangan jala mangae. Sian ari tu ari, lam suda ma sipanganonnasida. Gabe mansai susa ma roha ni amanta i jala maoto, ndang diboto be sipatupaonna, holan hamatean nama dipatagamtagam rohana.

Di na sadari, ndang gok be satangkar nari borasnasida. Di ponjot ni rohana, dilompahon ma na saotik i. Huhut mangalompa, marpingkir ma ibana mandok: “Molo duansa hami manganhon on, ndang sae. Dung i, nda tung na gabe manggolu be hami bahenon ni on. Rap pe hami mangallang tong nama na laho mate; holan sahalakhu pe mangallang, tong do mate. Marsijoloi tutu, alai tong do rap mate.” Dung i manatmanat huhut martabunitabuni, didabuhon ma tulpangna sian lumbanglubang tu torumbara, jala didok ma tu anakna i na tongon hundul di lambungna mansusudu: “Bah, madabu tulpanghu; ida jolo Amang, siu!”

Tuat ma anakna i jala disuruk ma tu torumbara. Godang do rompakrompak disi. Ala so tangkas di ibana hadabuan ni tulpang i, gabe sude ma i dipabalikbalik mandiori jala tar leleng do antong asa jumpangsa. Di tingki i, diallanghon amanta i ma sude indahan i.

Songon i, adong do halak na so bolas mamereng manang aha di balik ni parungkilon dohot sitaonon so lobi sian hamatean. Nang pe songon i ndang rela ibana mate, alai sai naeng ondinganna dope hangoluanna. Di pangalaho na songon i, mansai mura ma jolma i madabu tu na manarihon dirina sandiri; tu na manghangoluhon prinsip: “Hulislis halas, hulislis pahu; mate pe taho halak, asal unang ahu.” Anggo angka na porsea tarbahensa do mamereng na asing di balik ni parungkilon dohot sitaonon, i ma hangoluan na ojak di huaso dohot pambahenan ni Tuhan i. Apala i do na tarida di si Elia. Tu na mabalu na di huta Sarpat na so mamereng manang aha be di balik ni ari logo i so lobi sian hamateanna raphon anakna na sasada i, alai na marusaho dope manulakhon hamatean i marhite na marsobansoban mangalompahon na sampohul nari itak di bagasan hudon, barani do ibana mandok: “Unang ho mabiar, laho ma ho, bahen ma songon na nidokmu, alai pauli di ahu jumolo sian i sada sagusagu na metmet, jala boan tu ruar di ahu, dung i pe asa pauli di ho dohot di anakmu.” (1 Rj.17:13)

Read More..

Mabuk

MABUK

“Mata ni ari do an manang bulan?” ninna sada halak tu donganna na jumpangsa di tongan dalan. Na mabuk do ibana. Ganup borngin do ibana songon i. Simpul karejo, tung so hea do i pintor mulak tu jabu, alai sai jolo tuli do tu lapo tuak. Raphon angka donganna parminum, disi ma nasida minumminum, mangallangi, dohot marendei. Ndang diboto mandok sae, alai torus do sai hurang; aha pe na adong, jagal, dengke, korang, palia, manang joring, sude diallangi. Dung pe birnat jala manungkap borngin asa mulak.

“Ndang huboto bah,” ninna donganna i mangalusi, “ai halak baru do ahu di huta on. Holan on,” ninna muse, “molo mohop, mata ni ari do i; molo ndang mohop, bulan.” Donganna i pe, naung mabuk do hape. “Antong, mata ni ari do i, ai mohop do huhilala,” ninna ibana. “I do, mata ni ari do i; ai ahu pe, mohop do huhilala,” ninna donganna i muse mangalusi. Tongon do, mohop do dihilala nasida, alai panghorhon ni na niinum dohot na niallanganna i do i; nda tung ala ni sinondang ni bulan i. Dung i, didatdati be ma pardalananna, rabatrabat sahat tu jabuna.

Songon i do na mabuk, ndang tingkos pamerengan dohot panghataionna, pangalangka dohot pardalanna, panghilalaan dohot pangantusionna. Sasintongna nian, unang be na magodang, angka na metmet pe diboto be do parasingan ni arian sian borngin. Arian do mata ni ari marsinondang, borngin ia bulan. Gari rap tarida tahe na dua i arianna, (ai sipata masa do na songon i) tong do diboto paasinghon. Ala ni i sintong do songon nidok ni na mandok: “Molo masuk tuak, ruar do habisuhon.” Apostel Paulus pasingothon: “Unang ma mabuk hamu bahennon anggur, ai hamagoan do di bagasan ni i; alai gok Tondi ma hamu!” (Eps.5:15)

Alai ndang holan anggur manang tuak na mambahen mabuk, adong dope na asing, isara hamoraon, hamuliaon, hasangapon, dohot angka na asing na suman tusi. Manang dia pe alana, sarupa do anggo pangalahona, ndang diboto marpangalaho songon na patut. Ala ni i, sipasidingon do nasa parmabuhon.

Read More..

Manomunomu Wakil Presiden

MANOMUNOMU WAKIL PRESIDEN

Andorang di sikola metmet dope ahu, ro do sahali Wakil Presiden Republik Indonesia, Bapak Drs.Muhammad Hatta tu luatnami. Naeng dohot do hami mamereng nasida. Ala ni i borhat ma hami manang na piga halak dakdanak mardalan pat sian hutanami, marrhira 12 batu daona tu Siborongborong. Sahat disi, nunga mansai torop halak hudapot hami. Angka parsikola na sian kota i jongjong marbaris di topi ni dalan i. Ganup do nasida maniop mandera Merah Putih na metmet. Di pudina, sahat tu emper ni angka jabu dohot toko marjongjongan manang hundulhundul angka ama, ina, naposobulung, ro di dakdanak.

Taho do lelengna asa ro. Sanga do hami ngolngolan paimaimahon. Dung i adong ma na manggorahon: “Nunga ro be.” Manigor hapogan ma hami sude mamereng. Marbubur na deba tu topi ni dalan i, masisosahan asa boi tumangkas marnida na sangap i. Tongon do, ai tarida ma mobil marudurudur, jala sian Doloksanggul do haroroanna. Dung i mamolus ma rombongan i sian jolonami. Alai ndang nanggo dipalambat pardalan ni angka mobil i, jala ndang adong sian nasida na manghiraphon tanganna tu situan natorop na marsuraksurak manjoujouhon: “Mardeka, Horas,” manang “Selamat Datang,” alai laos songon i do sude marngenges dompak Tarutung. So pola piga dan salpu ma sude. Aha do hinarohonna, tu dia tujuanna, sadihari jala sian dia do nasida mulak, ndang adong na umbotosa.

Dung i, bubar ma natorop i jala mulak tu hutana be. Hami pe, mulak ma mardalan pat tu hutanami dung jolo mangallang goreng pisang sada be na mararga sasatali (Rp.0,25). Ndang anggo minum, ai holan satali be do hepengnami. Dungkon ni halojaon, ndang adong na dapot ahu sian pardalanan i. Ndang boi ahu rupani marhatuahon diri tu angka donganhu mandok: “Nunga huida Wakil Presiden Republik Indonesia,” ai tutu do ndang huida. Holan on do, huida do anggo mobil na paduahon i, ai ninna na mandok, i do na mangusung na sangap i. Manang na sintong i ndang huboto. Dung magodang ahu jala gabe pandita, lumobi di tingki Advent dohot Natal, jotjot do i huingot. Jala ganup huingot i, sai hudok do di bagasan rohangku: “Lojana i, jala otona i hami tahe.”

Songon i, torop do halak Kristen na so hurang hebona di Advent dohot di Natal. Hebo do angka keluarga paradehon abit, kue, dohot gabagaba di jabuna be. Hebo do angka huta, angka punguan, angka parsikolaan, angka kantor, dohot angka na asing manghobasi pestapesta Natal. Tu sangkap i, dipatupa do angka parguru endeon manang latihan drama, jala ditahi na deba do patupa binda manang makan bersama. Hebo do angka huria marsadasada dohot angka punguan di bagasanna. Songon na marsiadu sude patupa pestana be. Asing pesta ni dakdanak, asing pesta ni bajarbajar, asing pesta ni naposobulung, asing pesta ni ina, asing pesta ni ama, asing pesta hadomuan manang Natal Umum. Adong dope tahe na patupa pesta ni ganup lunggu. Ndang hatadingan nang angka huria manang denominasi, masyarakat dohot pamarenta, hebo do patupa Natal Oikoumene. Alai lalap marhobas dohot marpesta, jotjot do masa, Jesus na gabe sintuhu ni Natal i simbil do sian pamerenganna. Ise jala boha do Ibana, dia do hinarohonNa, ndang diboto; aha do binoanNa jala dia do na pinangido ni rohaNa sian ganup jolma, ndang dirohahon. Ala ni i lam simbil ma Jesus i sian nasida, ai ndang tagamon olo Ibana sorang tu angka na gulutan rohana di hariburon, tu angka na marhatuahon diri holan ala ni pesta dohot parsaulianna, alai na so mangarohahon Ibana sandiri. Tu angka sisongon i dohononNa do tahe songon nidok ni si Amos: “Huhagigihon, biasan Ahu mida angka ari rayamuna, jala ndang dihalomohon rohangKu angka luhutanmuna. Paholang ma sian Ahu hagunturon ni angka endemuna, jala ndang lomo roha ni pinggolHu umbege soara ni sordammu.” (Am.5:21,23)

Read More..

Tu dia ho dung mate ho?

TU DIA HO DUNG MATE HO?

Nunga mansai matua sada ina na mian di tano parserahan.

Lam tu galena do pamatangna, jala ndang apala dirohahon be na manganhon sipanganon. Marnida i disura roha ni angka ianakhonna ma na laho marujung nama ngolu ni inanasida i. Gabe dipados nasida ma roha dohot tahinasida laho mambahen sipanganonna. Dititi ma ari, jala diparade saluhut na hombar tusi.

Jumpang ma ari na tinontuhon, marroan ma sude angka na ginonghon tu ulaon i. Songon i ma antong dos ni rohanasida, parjolo ma dipatupa partangiangan dohot parpadanan na badia. Dipaihutihut inanta i do sude acara ni partangiangan dohot ulaon na badia i, isara tangiang, pujipujian, hamauliateon, panopotion di dosa, manang pe panindangion. Agia pe nanget, dohot do nasida mangendehon angka ende na dipatubegehon di parpunguan i. Torang do pangalusina di sungkunsungkun ni pandita i di na marulaon na badia i, tangkas do boi dijalo jala dipangan roti i, jala diinum dohot anggur i. Marnida i sandok tarhilas do roha ni saluhut na di parpunguan i, lumobi ma roha ni angka anakhonna. Pola do adong tahe na mandok: “Pasti do, tu surgo do Inang on.”

Bodarina i, dung simpul sude ulaon dohot panghataion na marpardomuan tu na pasahathon sipanganon dohot sulangsulang ni natuatuanasida i, disangahon angka ianakhonna i ma manghatahatai dohot inanta i. “Pasingotsingothon tahe asa sai ingot di sambulo ni tondina; manang sadihari pe marujung ngoluna unang gabe manimbil ibana sian i,” ninna nasida be. Gabe didok sahalak sian nasida ma: “Inong, dung na marulaon na badia i ho nangkin, nunga boha nuaeng roham, sonang do?” “Sonang do, Amang,” ninna inanta i nanget mangalusi. Didok anakna i muse: “Ai porsea do ho di Tuhan Jesus Kristus naung ro tu tano on, naung mate jala mangolu asa malua ho sian dosa, sian sibolis, dohot sian hamatean?” “Olo Amang, porsea do ahu,” ninna inanta i mansai nanget magalusi. “I ma da Inong, nunga mansai las rohanami mambege i. Molo tung marujung pe ngolum, tarapul ma rohanami marningot i,” ninna anakna i mangalusi. “Alai tahe Inong,” ninna anakna i muse, “nunga tangkas be nuaeng di ho, molo mate ho, tu dia do ho?” “Tu Toba do ahu Amang,” ninna inanta i mansai hatop jala hirtap.

Mansai tarsonggot do nasida sude umbege i, ai ndang dihirim nasida alus sisongon i, alus na mardomu tu haporseaon do. Alai ndang taralushon agia ise alus sisongon i molo sintap ni angka na di tano on do panatapan ni haporseaonna. Taringot tusi didok si Paulus do: “Anggo holan di tano on do hita manghirim di Kristus i, jolma na dumangol do hita sian saluhutna.” (1 Kor.15:19)

Read More..

Jea ni na so mananda

JEA NI NA SO MANANDA

Nunga gok be panompang ni sada bus na naeng borhat sian sada huta.

Holan sada nama hundulan na so marisi, i ma na di hambirang ni supir. Nang pe songon i, laos so marnaborhat dope bus i. Mamungka ma ngolngolan angka panompang. Dung i, didok sada halak ma: “Amang Supir, ai nunga gok be, borhat ma hita.” Alai didok supir i ma: “Satongkin nari Amang, Inang, adong dope na tapaima.”

Dung manang sadia leleng, ro ma sahalak parabit na uli. Mansai gaga pardalanna idaon, martungkot na marulu bosi. Nangkok ma ibana jala dipahundul tu hambirang ni supir i, dung i pintor mardalan ma bus i. Muningan ma roha ni angka panompang mandok: “Ise do on? Holan paimaima on, ingkon harsean iba jala borngaon.”

Sahat di Pematangsiantar, mijur ma angka panompang. Amanta parabit na uli i pe mijur ma laos mardalan mandao sian bus i. Pintor marlojong ma kenek ni bus i mandapothon ibana mangido ongkosna. Umbege i mansai muruk ma Amanta i, didok: “Aha nimmu, ongkos? Ndi on,” ninna huhut dijullakhon tungkotna na marulu bosi i mansai gogo tu butuha ni kenek i. Mansai muruk ma kenek i, ai ndang diboto manang aha salana jala ndang na iran hansitna dihilala. Ala ni i pintor dipuhung ma tanganna naeng maninju. Marnida i, pintor hapogan ma supir i mangambat ibana. Ditangkup ibana, jala ditogu mandao sian Amanta i, laos didok: “Nunga sae i, laho ma ho, marjea hita annon.” Dung i, sumurut ma kenek i tu pudi ni bus i, mardalan mamungkukmungkuk; songon na ngal nama hosana mangae hansitna. Ise do Amanta i umbahen songon i murukna holan ala na dipangido kenek i ongkosna? Oh, ibana do hape nampuna bus i.

Sian barita i boi ma enetonta parsiajaran, marjea do hape na so mananda angka na patut tandaonna. Nunga songon i antong uhumna, patut do parkarejo mananda indukna, patut do anak sikola mananda guruna, patut na niuluhon mananda uluanna, jala patut do soldadu mananda pangulimana, dohot angka na asing. Molo ndang songon i, boi do halak sala marpangalaho di adopanna, gabe tarila manang marjea.

Sian saluhut na patut tandaon, sada do na lumobi, i ma Debata naung ro manopot hita di bagasan AnakNa Jesus Kristus. Ro do Ibana paluahon hita. Molo tatanda jala tajangkon Ibana di bagasan haporseaon, basabasahononNa ma tu hita hadameon, jala boanonNa hita tu hasonangan. Alai sabalikna, tu angka na so mananda ndang boi so marsak Ibana jala manolsoli, marro ni rimas jala mandabu uhum. Apala i do naung masa tu halak Jahudi, di na nidokNa: “Aut di arim on ma nian ditanda ho na tau padamehon ho. Alai naung gabe buni do i nuaeng sian matami. Ai na ro ma muse angka ari manahopi ho; hubuon ni musum ma ho disi, halianganna jala sosahonna ma ho humaliang. Jala panepneponna ma ho rap dohot anakkonmu di tongatongami, jala ndang pasombuonna nanggo dua batu martinditindi, ala na so ditanda ho tingki panopoton na tu ho.” (Luk.19:42-44)

Read More..

Parpindaon na sian Debata

PARPINDAON NA SIAN DEBATA

Di sada tingki, songon i ma didok na mamaritahon, diparuar uluan ni sada huria do surat haputusan pinda ni sada pandita sian sada inganan tu inganan na asing.

Nunga tardok leleng ibana mangula di inganan i, nunga lobi lima taon. Hombar tu somalna, nunga patut ibana tutu pinda, jala ibana pe nunga dipaimaima i jala dihalomohon. Dung sahat surat haputusan i tu tanganna jala dijaha diboto ma na tu sada inganan na hira dos tu inganan na niingananna i do ibana dipapinda. Mansai marungkil ma rohana taringot tusi, didok ma: “Ai na boha do pimpinan on, na sian desa dipapinda tong tu desa? Nda nunga lam marpengalaman iba na pandita on? Hombar tusi, molo pinda nda ingkon tu inganan na lam huminsat ma nian? Aha ma lapatan ni i molo tong do tu inganan na dos?” Gabe sai masirapusan ma rohana taringot tu na mangoloi dohot na so mangoloi surat haputusan i. Di na so tabuatsa haputusan taringot tusi, laho ma ibana tu sahalak donganna pandita na tumua sian ibana. Dipaboa ma tu pandita i parungkilon ni rohana i, jala didok: “Boha do di roham, oloanhu do on manang ndang?”

Marnida parungkilon dohot jut ni rohana, tar maol do di pandita i mangalusi ibana. Molo didok: “Oloi,” diboto do na mansai maol i siat tu rohana, alai molo didok: “Ndang,” maralo do i tu poda tohonan na niantusan jala na hinangoluhonna sandiri. Ala ni i, dung marpingkir sangombas didok ma: “Songon on do Anggia, ndang denggan i molo ajaranhu ho mandok olo manang ndang, atik di sada tingki muse ndang hombar panghorhon ni i tu roham gabe dohot ahu solsolanmu. Ala ni i, ho sandiri ma na mamutushon manang na oloanmu i manang na ndang. Alai laho mamutushon i ho pingkiri ma on: Molo na sian Debata do i di roham, oloi; alai molo na so sian Debata do i, ba unang oloi.” Ia didok pe songon i, ala na dipingkir rohana do na ingkon mangkuling do panggora ni roha dohot tondi hapanditaon ni pandita i gabe hehe rohana mangoloi. Hape sabalikna do na masa, ai ndang borhat pandita i. Ndang pola dia roha ni huria na hinobasanna i disi, jala manang ala ni aha ma i, uluan ni huria hatopan pe ndang pola mamaksa, dipasombu do songon i, gabe hot ma pandita i di inganan i.

Dung manang na sadia leleng, ruar ma muse surat haputusan pinda ni pandita i. Ndang tu desa be, tu kota nama. Manjaha i mansai las ma rohana. Dung i martelepon ma ibana tu donganna pandita ondeng, didok: “Angkang, nunga hujalo muse surat haputusan ni uluan ni hurianta taringot tu parpindaonhu. Anggo on tangkas do huhilala, na sian Debata do on. Ala ni i, oloanhu do on, borhat do ahu. Mauliate ma di uluan ni hurianta. Maaf, ndang sanga be hami ro manjalang hamu, ai ingkon tibu do hami borhat.”

Alai ndang pingkiran ukuran ni angka pangalaho na sian Debata, ndang hagiot manang lomo ni roha ni jolma. Jotjot do masa, angka na hombar tu hagiot dohot lomo ni roha ni jolma, ndang na sian Debata; sabalikna, angka na maralo tu hagiot dohot lomo ni roha ni sasahalak tung apala i do na ro sian Debata. Ala ni i, unang ma adong na mamangke i laho mangondingi panjuaonna. Debata mandok: “Ai ndada pingkiranHu pingkiranmuna i, jala ndada dalanmuna angka dalanHu,” ninna Jahowa. “Ai songon timbo ni angka langit sian tano on, songon i do tumimbo angka dalanHu sian dalanmuna i, jala angka pingkiranHu sian pingkiranmuna i” (Jes.55:8-9)

Read More..

Marbulung alai ndang marparbue

Gambar : Pohon Ara

Ro do sahali sahalak pandita manjamita tu sada huria.

I dope ibana martingki tu huria i. Tar sogot do ibana ro. Ndang adong dope halak didapot ibana disi. Gabe disangahon ma mandalani gareja i sahat tu alamanna. Dung i, marroan ma parminggu, jala dung dapot tingkina dipungka ma parmingguan. Jumpang ma ombasna marjamita. Di jamitana i didok pandita i ma songon on: “Hamu angka dongan na sahuria on, padenggan hamu garejamuna on, ai nunga burburon jala rambangrambangon!”
Mansai tarsonggot do huria i mambege i, ai na imbaru dope gareja i jala ndang pola piga minggu dope dung diompoi. Ias dope sude sian lantena sahat tu langitlangitna ro di tarupna, imbaru angka parhohasna jala marhillong dope setna. Alamanna pe ias, pinajagar ni handang bosi na marset na saksak dohot bunga angka na uli. Ala ni i, ndang sonang be roha ni na deba na marminggu i, alai torus nama sai manginongi jala sungkunsungkun.
Simpul parmingguon, ditangkasi angka parhalado ma hata i tu pandita i di bilut parhobasan, gabe didok ma: “I ma da, huantusi do molo sungkunsungkun rohamuna taringot tusi. Sogot do ahu ro na sogot tu gareja on, gabe husangahon ma mardalandalan tu bagasan. Huida do sude, bangkuna, langgatanna, lampuna, sude imbaru. Huida do dohot poti na di jolo ni gareja on. Tarsurat do disi: ‘Sending,’ dohot ‘Diakoni.’ Holan na sasada i do huida ugasan na buruk di gareja on, alai na imbaru dope anggo setna. Ndang adong enselna. Gabe huungkap ma tutupna jala hupamanat tu bagasan. Lam tangkas ma huida naung mansai buruk poti i, nunga pola burburon. Ndang adong manang aha disi dungkon ni burbur dohot rambangrambang. Sian i tarida, ndang adong agia ise na hea mandekdekhon manang aha tusi. Ndang hea i dipareso parhalado. Pardihana i antong, ai diboto be do i na so marisi. Ndang adong pola usaho asa diisi halak i hombar tu sangkapna na sasintongna. Dung i lam mate ma tondi sending dohot diakoni i. Tarida do i sian tingting nangkin. Angka na pasahathon hamauliateon, ganup do mangalehon tu huria dohot tu parhalado. Alai ndang adong nanggo sada na mangalehon tu sending manang tu diakoni. Nang pe songon i, ndang dibolonghon dope poti i, ai ringkot do i antong disi bahen jagarjagar. Gabe songon hau na marbulung ma hamu sude, rugun, alai ndang marparbue.” Umbege i hohom ma angka parhalado i.
Ndang ringkot di Debata jagarjagar, parbue i do. Nda i na pinapatar ni Tuhan Jesus songon na pinaboa ni si Mateus na mandok: “Alai torang arina i, laho mulak tu huta i, male ma dihilala. Dung i diida ma di dalan i hau ara sangkambona, jadi didapot-hon ma i, hape holan bulung sambing do jumpangsa disi, gabe didok ma tu hau i: ‘Na so jadi be ho marparbue olat ni on!’ Jadi pintor rahar ma hau ara i.” (Mat.21:18-19) Ndang barita na jongjong sandiri i, alai na marhahonaan do i tu ngolu ni halak Jahudi satingkiNa, angka na so marparbuehon manang aha. Mansai balga do rohanasida siala haadongon ni bagas joro i, ai mansai uli antong jala jagar (pat.Mat.25:1). Alai olat ni i do, ai ndang dipangke nasida i hombar tu sangkapna na sasintongna; gabe liang ni pandobo do tahe.

Read More..