Minggu Advent-3

SERMON JAMITA TU MINGGU ADVENT-3, 15 DESEMBER 2013

Jes.35:1-10

 

 

            Turpuk (Revisi)

 

1 Marlas ni roha ma halongonan dohot tano bangkalbangkal,

marolopolop ma halongonan

jala marbunga songon bunga mawar.

2 Marbunga situtu ma i jala marolopolop,

marolopolop mardongan suraksurak dohot parendeon.

   Hamuliaon ni Libanon dibasabasahon tusi,

            hinauli ni Karmel dohot Saron.

   Idaonnasida ma hamuliaon ni Jahowa,

            hatongamon ni Debatanta.

3 Pargogoi hamu ma angka tangan na daukdauk,

            jala patogu angka dugul ni pat na telluktelluk.

4 Dok ma tu angka parroha na tahuton,

            “Pir ma tondimuna, unang hamu mabiar!

   Ida ma, naeng ro do Debatamuna mardongan partubolon,

            naeng ro mardongan pamaloson,

naeng ro do Ibana paluahon hamu.”

5 BuhaonNa ma disi mata ni na mapitung,

            jala ungkaponNa pinggol ni angka na nengel.

6 Marhajingjang ma disi halak na mengkatengkat songon ursa,

            jala marendei dila ni halak na ngungu,

   ai marbuhalbuhal ma aek di parhorsihan,

            dohot angka sunge di halongonan. 

7 Jala tano hasang gabe ambar,

            tano bangkalbangkal gabe mata mual.

   Di inganan hapeahan ni naga

            tubu arung dohot pandan.

8 Adong disi dalan balobung dohot sada dalan,

            na targoar Dalan Nabadia do i.

   Ndang jadi mamolus sian i na ramun,

            ai ampuna ni bangso ni Debata do i.

   Halak na madangadang pe manang na oto, 

ndang tagamon lilu disi.

9 Ndang adong disi singa, binatang panoro pe

   ndang mardalan manang jumpang disi;

             angka na tinobus do na mardalan disi.

10 Jadi mulak ma angka na tinobus ni Jahowa,

            jala mardongan endeende ro tu Sion

   Olopolop salelenglelengna di atas ulunasida,

            dapotan halalas ni roha nasida,

alai maporus ma arsak dohot hoihoi.

 

            Patujolo

 

            Hombar tu bilangan ni na manuriranghon, tarbagi tolu do buku Jesaya, i ma Proto Jesaya (1-39) na sian si Jesaya anak ni si Amos (1:1) na manurirangi di harajaon Juda di parholangan ni taon 747-701 SM. Na paduahon, Deutro Jesaya (40-55) na sian sada panurirang na mangula di Babel di sekitar 538 SM. Na parpudi, Trito Jesaya (56-66) na sian sada panurirang na mangula di Juda dung hamulahan sian Babel, di sekitar 520 SM. Atik pe di bagian parjolo do turpuk on, mangihuthon angka parhapistaran, sada bagian na so autentik do i di Proto Jesaya. Adong dua turpuk na songon i, i ma bindu 24-27 dohot bindu 34-35. Duansa i marrumanghon apokalipse (pangungkapon na marhahonaan tu tingki na dao dope jala na meliputi sandok portibi on) do. Na parjolo marharoroan sian sahalak panurirang na mangula di abad 5 SM, jala na paduahon sian sada panurirang na mangula di angka tingki na parjolo ni habuangan Babel (ndang Deutro Jesaya) Di pudian ni ari pe, marhitehite angka redaktur asa dipasada i tu Proto Jesaya. Di turpuk ari on, digombarhon do prospek na umbidang ni haluaon sipatupaon ni Debata di bangsoNa. Menyejajarkan sada peristiwa haluaon na jonok (sai hira na berhimpitan) tu peristiwa haluaon na asing, na dao jala na menyeluruh, gejala na somal do i di panurirangon.

 

            Hatorangan

 

            Uhum ala ni dosa i, ndang mangonai holan tu jolma, alai dohot do tu na tinompa  angka na asing i. Taringot tusi, didok Debata do tu si Adam uju i, “Hona torungKu ma tano on ala ho.” (1 Mus.3:17) Sintong do i, di na hona uhum halak Juda, tarbuang nasida tu Babel, hona toru do nang tano i. Ndang adong be na mangula jala mangaramoti, gabe tarulang ma i, martubuan angka duriduri dohot duhutduhut na marsuga; angka hau na so hasea, na so marguna dohot na parohon mara. Marroan ma dohot angka binatang panoro, antuasu, singa dohot naga (ay.7) laho maringanan dohot margulasai disi. Sibolis pe, dohot ma ro tusi martalingkasi. Alai sabalikna, molo mulak muse roha ni Debata tu bangsoNa jala dipalua nasida, marhinorhon do i dohot tu tano i. Songon i ma dibagabagahon dison,  molo dipalua Debata muse bangso i, diboan nasida mulak tu tano na pinarbagabaga i, paulahonNa do nang haulion dohot hamuliaon ni tano i. Taringot tusi didok, “Hamuliaon ni Libanon dibasabasahon tusi, hinauli Karmel dohot Saron.” Tarbarita do Libanon ala ni hau ares na godang tubu disi, hau angka na timbo, na tigor, na togu jala na uli. Karmel, i ma sada tano na hornop di Israel, inganan partanian na mansai denggan, jala Saron i ma sada rura na tarbarita ala ni bunga mawar na godang tubu disi. Na nidokna disi, ulaon jala ramotan ni angka na mulak i ma muse tano i, suananna angka hau na denggan, tanaman pangan dohot bunga angka na uli. Luhutna i, di sada sisi gombaran ni hamuliaon dohot haulion ni tano i do i, jala di sisi na asing gombaran ni las ni roha dohot parolopoloponna laho mamuji dohot pasangaphon Debata; dung i, di bagasan saluhutna i gabe idaon ni angka na malua i ma muse hamuliaon dohot hatongamon ni Debata Jahowa.

             

 Na gabe apoapo dohot apulapul sipargogo ma i tu halak Juda na tarbuang di tano Babel i. Gale jala mabiar do nasida di habuangan i. Nian, anggo di pamerengan parduru, ‘sonang’ do nasida disi, ai bebas do nasida mangula dohot mansari, pajongjonghon dohot mangingani jabu, pangolihon anak dohot pamulihon boru, songon i dohot na marugamo. Holan sasangombas do masa hambatan, isara di peresmian ni ganaganaan na pinauli ni si Nebukadnesar (Dan.3) Songon i pe i, gale do panghilalaan ni bangso i, marsak do roha jala marosak tondinasida. Nunga hea nasida timbul, bangso na berpengaruh jala disegani di Asia Barat Daya. Alai nuaeng ndang adong be perannasida di panggung peristiwa sejarah dohot di percaturan politik antar bangsa. Ala ni i, daukdauk ma tangannasida jala telluktelluk dugul ni patna, mabiar jala tahutan taringot tu ari pangapudianannasida. Lobi sian i tahe, songon naung mate nama nasida dihilala, hira holiholi na mahiang jala na marserahan (Hes.37) Mardomu tusi, disosohon panurirang i ma dison asa masiapulan nasida jala masipatoguan, mandok, “Pir ma tondimuna, unang hamu mabiar!” Aha alasan so mabiar dohot papir tondi? I ma haroro ni Tuhan Jahowa. Hombar tu panurirangon ni si Jeremia, ebatan ni Debata do nasida tu habuangan i (Jer.29:10) SangkapNa, parjolo laho martubol tu Babel. Di sada sisi, ulaula ni Debata do Babel laho manguhumi bangsoNa, Israel na tangkang i. Alai di sisi na asing, musu ni Tuhan i do nasida, alo na mangambati sangkap hatuaonNa na taringot tu bangsoNa. Di na patulushon ulaonna na songon ulaula di tangan ni Tuhan i pe godang do pambahennasida na sala manang na masalpuhu. Siala saluhutna i ndang lias nasida sian uhum. Hombar tusi, ro ma Debata laho martubol dohot mamalos (Jer.25:12 duu) Na paduahon, paluahon bangsoNa, Israel. Partubolon tu Babel, gabe haluaon do tu Israel. Hombar tusi, dipaihut do tu lumbalumba partbolon i bagabaga taringot tu haluaon na mandok, “… ro do Ibana tongon paluahon hamu.” Porsea disi, boi do pir tondinasida, malua sian biar dohot hatahuton. Laos marhite i ma nasida masiapulan jala masitungkolan sama nasida. Marpardomuan tusi ma dijouhon, “Pargogoi hamu ma angka tangan na daukdauk, jala patogu angka dugul ni pat na telluktelluk!”

           

Taringot tu haluaon i, digombarhon do mamungka sian ay.5. Paradeon ni Debata do i marhitehite na patupahon restorasi kemanusiaan, pardagingon dohot partondion. Di rumang pardagingon didok, “BuhaonNa ma disi mata ni na mapitung, jala ungkaponNa pinggol ni angka na nengel. Marhajingjang ma disi halak na mengkatengkat songon ursa,

jala marendei dila ni halak na ngungu.” Sahit dohot tihas jotjot do i mambahen jolma agoan lapatan dohot harga diri. Marhite tindakan penyembuhanNa, paulahon ni Debata do lapatan dohot harga diri ni angka na marsahit dohot na martihas di tongatonga ni bangsoNa na tarbuang i, paulahonNa tu eksistensi ni kemanusianna na utuh asa sandok diri tu haluaon sipatupaonNa. Taringot tu restorasi di rumang ni partondion, tersimpul do i di pandohan, “Ndang jadi mamolus sian i na ramun.” Ala ni dosana do tarbuang bangso i. Saleleng hot nasida di hadosaonna, ndang tarhalomohon Debata dope paluahon nasida, alai ingkon adong do jolo hamubaon (pat.Jes.40:3-4) Tu sangkap i, mangula do Ibana paimbaruhon rohanasida. Tutu, jumpang do na songon i. Rupani, ndang sai mamintori diri be nasida, alai ditanda do dosana. Sadalan tusi, diokui do na tigor do Debata jala na sintong do panguhumonNa. (Buku Ende Andung ni Panurirang Jeremia ma sada parbue ni panandaon i) Marusaho do nasida muse mangalului Debata. Dipajongjong do angka bagas parpunguan inganannasida patupahon parsombaon dohot panangihonon di hata ni Debata. (I ma parmulaan ni ruhut sinagoge) Marhite restorasi i, nunga rade be bangso i tu haluaon. Debata sandiri do na patupahon i. Sian kemungkinan ni hajolmaon, nunga tung na maol di bangso i haruar sian Babel. Metmet do nasida jala gale, balga do ia Babel jala gogo. Sian segi geografis pe, tong do maol. Mansai dao do tano Kanaan i, disirang sian Babel marhite parhorsihan dohot halongonan inganan ni singa dohot binatang panoro. Sandok, inganan na so tarbolus do i. Songon i pe, ndang gabe ambatambat i di Debata laho paluahon nasida. Di pangondingionNa, horas do nasida mamolus i. Taringot tusi didok, “Ai marbuhalbuhal ma aek di parhorsihan, dohot angka sunge di halongonan. Jala tano hasang gabe ambar, tano bangkalbangkal gabe mata mual.” Na nidokna disi, atasan ni Debata do masalah alam, paradeonNa aek inumon songon na binahenNa di pardalanan sian Misir uju i. Dung i, “Di inganan hapeahan ni naga (deba teks mandok, antuasu) tubu arung dohot pandan. Arung dohot pandan i (suansuanan umumna), panumpak situtu do i tu keteduhan. Na marlapatan ma i, ondingan ni Debata do nasida, lehononNa halambohon asa malua nasida sian hamohopon ni ari. Sudena i dipasingkop dope marhite na padirihon dalan tu haluaon. Taringot tusi, didok, “Adong disi dalan balobung dohot sada dalan, na targoar Dalan Nabadia do i.” [Dua dalan i, sada margoar dalan balobung (Hb.macluwl, highway), na sada nari dalan (Johansen mandok, dalan na bolon; Hb.derek, way). Maol do paasinghon na dua i. Alai adong do na mamingkir, dalan balobung i ma na dipangke tu angka mobilitas khusus, isara gerakan tentara, sedang dalan lebih bersifat umum] Nang pe parhorsihan, ala Debata manontuhon, gabe songon dalan balobung do inganan i di bangso na malua i. Lobi tahe, digoar do i dalan na badia, na dipapulik manang na dikhusushon tu haluaon, ai angka na pinarbadiaan ni Debata na badia i do na mardalan disi. Ndang adong sihabiaran disi manang pangambat, ai so adong singa manang binatang panoro jumpang disi. Angka halak na ramun manang parjahat na mangaliluhon pe ndang dipaloas mamolus sian i. Ala ni i, angka halak na madangadang (pengembara) dohot angka na oto pe ndang tagamon lilu disi. Dung i, mulak ma bangso na pinalua i tu Sion. Di mulana, goar ni sada sian angka dolok haojahan ni Jerusalem do i. Alai na gabe dipangke do i muse manggoari sandok huta i dalam konteks hajongjonganna songon pusat ni parugamoon. Marendeende nasida di dalan i. Sahat disi, ndang mansohot be las ni roha i, alai torus do nasida marolopolop jala mariaia, alai maporus ma anggo arsak dohot hoihoi. Marhite hasasahat dohot parmianonnasida di Sion, singkop ma restorasi ni bangso i. Mulak nasida tu hajongjonganna songon bangso ni Debata. Huta Jerusalem pe songon i, dipasuang gabe huta na badia, inganan parminanan ni Goar ni Debata.

 

            Panggohionna

 

            Manang na sadia leleng andorang so taon 538 SM, lam surut do huaso ni Babel. Dung i, topet di taon i, ditaluhon si Kores (Cirus), raja sian Parsi ma nasida. Sian sudut sejarah, ndang adong na imbaru disi. Pangalaho na somal do i marmullop lonong angka harajaon, pasingki pasorin na manghuasoi dohot na hinuasoan. Alai di pamerengan ni Bibel, uhum partubolon ni Debata do i na masa tu Babel. Laos di taon i, diparuar si Kores do sada dekrit harajaon na paloashon sude bangso na binuanghon ni si Nebukadnesar mulak tu tanona be. Nang on, sian sudut pandang ni sejarah pangalaho na somal do. Paasingasing do politik ni angka bangso. Molo Babel di toru ni si Nebukadnesar naeng ‘mambabelhon’ sude bangso naung tinaluhonna, anggo Parsi di toru ni si Kores dipaloas do nasida berkembang di bagasan identitas parbangsoonna be. Alai di panatapan ni Buku Nabadia i, ulaon haluaon ni Debata do i. Ibana do na mamillit si Kores gabe ulaula di tnganNa laho paluahon bangsoNa. Hombar tu dekrit i, mulak ma tutu Juda jala dibangun nasida ma muse Jerusalem dohot joro i, dipasuang gabe pusat ni parugamoon. Diringkoti bangso na pinalua i do haimbaruon ni parugamoon dohot kemurnian ni patik. Mardomu tusi ndang dijangkon nasida be halak Samaria (naung godang binongotan unsur-unsur sileban) tu komunitas parugamoonnasida. Nang pe songon i, anggo hasonangan i ndang jumpang dope. Tong dope nasida marungkil jala marhoihoi. Antong, sadihari do hagogok ni bagabaga on? Songon na nidok di patujolo, apokalipse do panurirangon on. Hombar tusi, panggohionna ingkon na berengon do i tu tingki na dumao, tu tingki parpudi. Nunga ro tingki i, ro di bagasan Jesus Kristus naung tuat tu portibi on. Di na ro jala mangula Ibana di portibi on, dipamalum do angka sahit dohot tihas; dibuha do mata ni halak na mapitung, marbinege dibahen angka na nengel, dipamalum na pangpang jala dibuha pamangan ni na ngungu. Marhite i diondolhon do paboa, nunga songgop tingki haluaon i. Alai patujolona dope i, muse pe anggo hasisingkopna, di haroroNa na parpudi, na niihuthon ni tingki na so ra mansohot be. Disi ma masa hasonangan dohot parolopolopon sisaleleng ni lelengna.              

 

            Rancangan Homiletis

 

            Patolu minggu on ma dung na bongot hita tu Advent. Marhite jamita on, dipaulak do muse rohanta tu lapatan asali ni Advent i, i ma haroro manang kedatangan (coming) Haroro ni Debata do na nidokna disi. Taringot tu haroroNa i, di ay.4 ni turpuk na tabege nangkin, sampe tolu hali i diulahi. Bagabaga sidua hali saut do i. Nunga digohi i na jolo, di na ro Ibana paluahon halak Israel sian habuangan Babel; dung i, digohi dope i muse di na ro Debata di bagasan AnakNa, Jesus Kristus laho palua hajolmaon songon na tatagam di Advent on jala naeng pestahononta di Natal na naeng ro. Ragam do aspek ni haluaon i. Deba sian i ma na naeng pamanatonta sian jamita di hita ari on.

           

Na marsaringar do jamita on sian sahalak panurirang na mangula di tongatonga ni halak Juda di angka taon na parjolo ni habuangan Babel. Uhum ni Debata do habuangan i, jala jorbut do pangonaina; ndang holan tu jolma, dohot do tu na tinompa angka na asing i. Ala naung tarbuang antong bangso i, ndang adong be na mangula dohot na manjaga tanonasida. Gabe tarulang ma i, martubuan angka duriduri dohot duhutduhut na marsuga; angka hau na so hasea jala na so marguna. Marroan ma huhut tusi angka binatang panoro, laho maringanan dohot margulasai. Sibolis pe, dohot ma ro tusi martalingkasi. Alai molo mulak muse roha ni Debata tu bangsoNa i jala dipalua nasida, manghorhon na uli do i dohot tu tano i. Songon i ma digombarhon dison, molo dipalua Debata bangso i, diboan nasida mulak tu tano na bagabaga i, ramotan jala ulaon nasida ma muse tano i, suanonna hau ares, tanaman pangan dohot bungabunga, gabe mulak ma muse hamuliaon dohot haulionna. Marhitehite suansuanan dohot hinaulina i, gabe songon na marolopolop tano i, marlas ni roha jala mariaia mamujimuji Debata. Gabe jamita do i tu bangso i, gabe lam patar diida nasida hamuliaon ni Debata naung paluahon nasida i.

           

Songon i, haluaon na di bagasan Kristus na ro i, na marhahonaan do i dohot tu na tinompa angka na asing. Ninna roha, aspek na rada terlupakan do i di Advent dohot di Natal ni hita halak Kristen. Ndang holan di Advent dohot Natal tahe, hira di sude konteks dohot tingki do. Di deba inganan rupani godang do maremare, tusam, sampinur manang anturmangan na ditabai bahen gabagaba di tingki Natal, alai ndang sai dibarengi dohot upaya pelestarian. Ndang masalpuhu ia nidok, godang do sian hurianta angka na di kota na tarrajum tu konsumen na sangat rakus melahap kertas. Ganup minggu do i mencetak Acara Minggu dohot Warta Jemaat. Tamba dope amplop persembahan. Molo di Natal, ingkon na lux. Jala sude i, hanya untuk sekali pakai. Ndang sai tasadari, laho manggohi saluhutna i ingkon dirabas do angka tombak. Di buku ni G Schwab na marjudul Dance with the Devil didok, holan laho menerbithon sada edisi Minggu Koran New York Times, ingkon dirabas do tombak 150 are bidangna. Sada koran dope i. Sadia bidang nari ma muse na ingkon dirabas laho manggohi kebutuhan ni marriburibu koran di sandok portibi on? So sundat dope majalah, buku, tissu, kertas toilet dohot angka na asing? Nunga dipalua Kristus i hita, alai ndang ditait dope tu ginjang; buat sementara dipaian dope di portibi on. Dihalomohon rohaNa do hita mangingani portibi na denggan, alam na teduh dohot lingkungan na dame, ai maol do bayanghononta na boi hita marsonangsonang menikmati haluaonnta i molo lam sega do portibi on; molo lam habis rupani tombak, lam tercemar tano, aek dohot udara jala masa pemanasan global. Songon Sipalua portibi on, mangula do Kristus i nang taringot tusi jala dihalomohon rohaNa do padohothon hita disi. Ala ni i, songon halak angka naung pinalua, na tarjou do hita laho mangaradoti hatigoran, hadameon dohot keutuhan ni sandok na tinompa (justice, peace and integrity of creation) Tarbahen panumpak do i tu haluaonta, ai marhitehite angka i boi do lam patar di hita hasangapon dohot hatimbulon ni Debatanta.

           

Di habuangan i, gale do roha ni bangso i, magopu roha dohot tondina. Mabiar do nasida jala tahutan. Lobi sian i tahe, songon na mate nama nasida di rohana, suman tu holiholi naung mahiang jala na marserahan, ndang adong be sihirimon. Alai na lupa do nasida, andorang so habuangan nunga marbagabaga hian Debata mandok na topotonNa do nasida tusi. Tubolhonon jala baloshononNa ma hajahaton ni Babel, jala paluaonNa nasida. I do na niulahan ni panuriang i dison, didok, “Ida ma, naeng ro do Debatamuna mardongan partubolon, naeng ro mardongan pamaloson, naeng ro do Ibana paluahon hamu.” Porsea jala marhahirimon disi, tarbahen pir ma tondinasida, margogo tanganna,  togu dugul ni patna jala dao ma biar dohot hatahutonna.

           

            Suman tusi, biar do na mewarnai ngolunta di tano on. Godang do tutu sihabiaran, jala sai martambatamba do i sian tingki tu tingki. Mabiar do hita marnida angka na jahat dohot hajahaton na lam martimburak, mabiar marnida pangalaho dohot angka na masa na so marhatontuan, mabiar mangadopi perkembangan ni ekonomi na hurang menjanjikan dohot masa depan na so pasti, mabiar marnida akibat ni korupsi na lam so terkendali. Boasa mabiar? Parjolo sahali, ala mardosa do hita. Di hadosaonta i ndang porsea be hita di Debata dohot di panarihonNa. Sai hira na saguru di hita sambing do ngolu dohot haluaonta. Di na so tardungdung jala ndang tarpatuk hita saluhutna i, lam mabiar ma hita, gale huhut rohanta, daukdauk tanganta jala telluktelluk dugul ni patta. Nuaeng, jamita on manjouhon tu hita, “Ida ma, naeng ro do Debatamuna mardongan partubolon, naeng ro mardongan pamaloson, naeng ro do Ibana paluahon hamu.” Di bagasan Jesus Kristus naung ro songon na tatagam di Advent on jala na naeng ingoton huhut pestahononta di Natal na ro on, nunga ro Ibana tutu manopot hita. Maringanan Ibana di tongatonganta (Joh.1:14a) gabe Immanuel (Mat.1:23) Di toru ni uhum dohot pamalosonNa do angka parjahat. Ala ni i, Advent dohot Natal, ndang boi sepi sian joujou tu hamubaon ni roha dohot lumbalumba uhum. Porsea di Ibana naung ro i, malua do hita sian saluhut na pabiarhon roha dohot na pagalehon hita, tarmasuk sian angka holso di na managam dohot mangadopi Natal.

 

            Bahen hasasaut ni haluaon i, dibagabagahon do di jamita on na pamalumon ni Debata do angka sahit dohot tihas ni bangso i, jala paimbaruonNa roha dohot tondinasida. Dung i, padirionNa sada dalan di halongonan, sada dalan haluaon na targoar na badia. PadaoonNa do sian i binatang panoro dohot halak na ramun; atasanNa angka mara sian alam, pasingkoponNa kenyamanan dohot keteduhan, jala sarihononNa aek songon unsur mutlak ni hangoluan. Di toru ni panogunoguon dohot pangondingionNa selamat do bangso i mamolus halongonan i, horas sahat tu tano Kanaan. Sintong do i, di taon 538 SM dipatulus Debata do bagabaga i. Marhite tangan ni Raja Kores dipalua do nasida, diboan mulak jala dipatolhas tu Sion, tu tujuan dohot inganan haluaon i. Marhite i, mulak ma hajongjongannasida songon bangso ni Debata, jala huta Jerusalem mulak songon pusat ni parugamoon, huta na badia, inganan parsaoran tu Debata. Nang pe songon i, anggo hasonangan i ndang singkop dope didai nasida. Tong dope nasida marungkil, terjajah di toru ni Parsi; marsak dope nasida jala marhoi. Olo, ndang dinikmati nasida dope i sasingkopsingkopna, ai bagabaga na marhahonaan tu tingki na dao dope i, tu tingki ni Kristus Sipalua jolma saluhutna.

 

            Nunga ro be Kristus i. Tongon do, di haroroNa i, dipamalum do angka sahit dohot tihas (pat.turpuk sijahaon, Mat.11:2-6) jala disesa do angka dosa. Partanda na tangkas do i paboa di bagasan Ibana nunga songgop tingki haluaon i. Di bagasan Ibana masa do restorasi ni kemanusiaan di bagasan lapatan na sasintongna, i ma pemulihan ni eksistensi ni hajolmaonna na hombar tu sangkap panompaonna. Laos songon i nang tu tujuan ni ngoluna, i ma parsaoran dohot Debata. Luhutna i dipatupa marhite ulaon panobusionNa di silang i. Di bagasan ni i, adong do tanggungjawabta. Songon angka na pinalua jala na pinaimbaru, taradoti ma tongtong haimbaruonta i; taantusi jala tahayati lapatan dohot tujuan ni ngolunta. Laos tanggungjawabta do na mamaritahon haluaon i tu halak angka na agoan harga diri ala ni sahitna, ala ni tihas manang ala ni hagaleonna, angka na so umboto lapatan dohot tujuan ni ngoluna, dohot angka na so mangantusi di lapatan ni haluaon, isara na mamangke Natal holan laho manggohi hinaringkot ni pardagingonna. Di postinganna di facebook diholsohon sada halak do pengamatanna tu hasomalannasida na samarga di sada kota. Ganup taon do nasida ninna marnatal. Sekotamadya jolo, dung i sasasektor. Ndang holan i, adong dope natal khusus ni arisan, lansia dohot naposobulung. “Gabe gait do,” ninna ibana, “ndang be marningot ‘tubu Tuhanta Jesus,’ alai holan na mangan do sude pesta i, jadi umpas do molo didok … ‘tu butuhanta Jesus.’” Nda godang do tutu na songon i? Marroan tu pesta Natal ndang na mangalului Jesus, asa mangan do. Songon i torop do na martihas na ro tu pesta Natal ndang na laho marpesta manjangkon dohot manghalashon hatutubu ni Jesus, alai holan na naeng mangidoido do. Diendehon ende Natal huhut ditarehon tungkusanna. Sipata, tubu do roha mandok, “Ai Kristen do halak on ulaning, manang na parugamo na asing do na memanfaatkan ende Kristen demi hepeng?” Molo tung Kristen pe, dia ma uba ni i sian tukang parkir manang angka penjual minuman na jelas-jelas parugamo na asing na ro tu parpestaan i demi uang? Tu angka na songon i, marlaku do hata ni Apostel Paulus, “Anggo holan di tano on hita mangkirim di Kristus i, jolma na dumangol do hita sian saluhutna.” (1 Kor.15:19) Advent dohot Natal ndang marujung i di tano on, alai na marudut do tu ari sogot, tu haroro ni Tuhanta Jesus Kristus paduahalihon na niihuthon ni hangoluan dohot halalas ni roha na so mansohot be saleleng ni lelengna. I do na gumodang sihirimon jala sihangoluhononta di Natal dohot di Advent on.

 

jkt.09.12.2013/mvs