1.31.2010

Mangido Pangantusion

MANGIDO PANGANTUSION

“NaposoM do ahu, sai parrohai ma ahu asa huboto angka panindangionMi.” (Ps.119:125)

Paduabulanhon ma nuaeng dung na bongot hita tu taon 2010. Nunga tasalpuhon 31 ari, alai so padohot ari on hembang dope di jolonta 333 ari nari na golap dope, na so taboto dope agia aha taringot tusi. Tontu mansai godang do disi na masa, alai ingkon dung jolo gabe tingki nuaengta pe na 333 ari i sadasada asa botoonta angka na masa i. Mangadopi saluhutna i, songon angka naposo ni Debata naeng marsiajar do hita sian Parpsalmen 119 on na mangido roha sian Debata. Na dirupa angka na jungkat roha do ibana hatiha i (ay.122), angka siulahon gogo (ay.121) na mardalan di lapang pangansion (ay.128). Di jungkat ni rohana, ditorbangi nasida do patik ni Tuhan i (ay.126). Siala sasudena i, pola do gabe rambon mata ni Parpsalmen i (ay.123). Nang pe songon i ndang mago rohana, diingot do tongtong paboa naposo ni Debata do ibana, jala hombar tusi ingkon angka panindangion ni Debata do siluluan jala sihangoluhononna. Ndang jumpangsa i sian na asing, ingkon sian Debata sandiri do. Ala ni i dipangido ma asa diparrohai Debata ibana mangantusi manang dia do lomo ni roha ni Debata sihangoluhononna.

Laos songon i ma hita di na mangadopi angka na masa di tingki nuaeng dohot na naeng ro. Ingkon sadar diri do hita paboa naposo ni Debata do hita, ndada naposo ni portibi on; parripe ni harajaon ni Debata, ndada holan warga ni Negara Republik Indonesia na tahaholongi on; ruas ni huria manang daging ni Kristus ndada holan warga ni masyarakat manang partei manang ormas na tontu. Ala ni i, hata dohot patik ni Tuhan i do na parjolo ingkon hangoluhononta, ndada undang-undang ni negara manang uhum ni masyarakat manang aturan ni partei. Molo adong tahe ketegangan di antara ni patik ni Debata dohot uhum ni hajolmaon, ingkon oloan do hita di Debata asa di jolma. Sian angka na masa jala na naeng adopanta di taon on, pasti do adong angka naung somal masa dohot na so dung hea masa dope. Di bagasan saluhutna i, ingkon luluanta do manang dia do lomo ni roha dohot panindangion ni Debata. Aha do na naeng pasingothonon ni Tuhanta i tu hita marhitehite angka na masa i; manang sabalikna, aha do na naeng dohonon ni angka na masa i taringot tu Debata, jala angka dia do lomo ni rohaNa na ingkon hangoluhonon jala ulahononta? Ndang ulaon na mura i, na maol do, mansai na maol tahe. Maol, ai nang pe sarupa na masa i tu angka naung hea masa di tingki na salpu ndang sai sarupa anggo panindangionna, ai asing do tingkina, asing situasi, asing kondisina, asing dohot rumang ni harohaon ni na mangadopisa. Di tingki ni si Jesaya rupani, dihubu halak Assur do Jerusalem. Marhite na masa i naeng hatindanghonon ni Debata do tu Juda paboa Ibana do Sipalua nasida, jala ala ni i ingkon martahan ma nasida di bagasan huta. Alai di tingki ni si Jeremia di na hinubu ni halak Babel Jerusalem naeng hatindanghonon ni Debata do paboa na so tarhalomohonsa be bangso i, jala ala ni i, laho pasidinghon korban na so marguna tagonan nama nasida menyerah. Sahali nari, ndang na mura i, alai na mangigil sandok pamingkirion do i dohot parsirangguton. Ala ni i, mansai ringkot ma di hita roha, pangantusion, hapistaran dohot habisuhon. Ndang jumpang hita i sian na asing, ingkon sian Debata do. Si Jakobus mandok: “Ai molo adong di tongatongamuna na hurangan bisuk, dipangido ma tu Debata, na bulus mangalehon di saluhut jala ndang marpangea, dung i lehononna ma tu ibana.” (Jak.1:5). Ala ni i, raphon Parpsalmen 119 on naeng martangiang do hita mangido roha dohot pangantusion sian Tuhan i asa unang tartuktuk hita di sidalananta. Alai unang sala, roha dohot pangantusion i nda tung didekdekhon i songon i sambing, alai dibasabasahon do di bagasan dohot marhitehite haringgason dohot parsitutuonta manangihon dohot mangguruhon hatanNa.

Laos i ma na ringkot ingoton jala hangoluhononta di na mandalani bulan Pebruari, bulan na parjolo sian na sampulu sada nari na tinggal dope di taon on. Naeng ma ringgas hita manjaha dohot pahusorhusorhon hata ni Debata na diturpukhon di hita ganup ari, ringgas marminggu huhut tangi tu jamita asa dapotan roha dohot habisuhon hita laho mangadopi angka na masa dohot laho mangulahon na hombar tu lomo ni roha ni Debata. Amen.

jkt.01.02.2010/mvs

Read More..

1.29.2010

Septuagesima

SERMON JAMITA TU MINGGU SEPTUAGESIMA, 31 JANUARI 2010
Ps.128:1-6


Patujolo

Hombar tu ingananna di Buku Psalmen, na tarrajum do Ps.128 on tu ende hananangkok (Heb.shiyr hamma’alowt/mazmur ziarah). Toropan penafsir mangarajumi angka psalmen hananangkok i (Ps.120-134), diendehon bangso Israel do i di pardalanannasida nangkok (berziarah) tu Jerusalem, manang di upacara habobongot (perarakan/prosesi) ni angka peziarah i tu bagas joro. Deba sian angka psalmen sisongon i dipadomu do tu goar ni si David manang si Salomo. Di Padan na Robi versi Syria, dipadomu do Ps.128 on tu goar ni si Zerubabel, i ma sada sian pomparan ni si David na dohot mulak sian habuangan jala na pajongjong bagas joro na paduahon, alai ndang haru manarik i di torop halak. Adong tahe na mamingkir udut ni psalmen na di jolona do psalmen on, i ma ende hananangkok sian si Salomo (Ps.127:1). Maralasan do i, ai duansa manaringoti tema na dos. Ps.127 dipaujung dohot martua, Ps.128 on dipungka dohot martua. Mangihuthon isina, tarrajum do Ps.128 on tu psalmen habisuhon (mazmur kebijaksanaan/hikmat). Angka psalmen sisongon i na marisi poda do i manang renungan taringot tu tema-tema pokok na jumpang di kesusasteraan hikmat, isara guna ni patik di ngolu ni na porsea, sitaonon ni halak na tigor, dohot angka na asing. Ps.128 on sandiri mamodahon taringot tu hatuaon ni halak na manghabiari Jahowa. Taringot tu tingkina, dipadomu angka na bisuk taringot tu Buku Psalmen do i tu tingki dung hamulahan sian habuangan Babel (post exilic period). Jadi, na songon sada ende apulapul dohot sipodaon na patoguhon panghirimon do i di bangso na baru mulak dope sian habuangan i. Pogos do nasida hatiha i jala ingkon mangadopi paraloan sian dongannasida saompu, halak Samaria. Alai tung apala disi do nasida ingkon lobi marsiajar taringot tu lapatan ni na manghabiari Debata jala mardalan di dalanNa.

Hatorangan

Dipungka do Psalmen on dohot sada panindangion haporseaon taringot tu ngolu ni halak na marhabiaran tu Debata, didok: “Martua ma ganup na manghabiari Jahowa.” Martua, mandok dapotan tua (Heb.ashreey/blessed/berbahagia). Bidang do na tinembak ni tua i, ai na marpardomuan do i tu pasupasu di sude aspek, isara haluaon, hahorason, halalas ni roha, hasonangan, hadumaon dohot angka na asing. Diparbagabaga jala dipasupasuhon Tuhan Debata do i tu halak angka na manghabiari Ibana. Manghabiari Jahowa, lapatanna manghaporseai jala pasangaphon Jahowa songon Tuhan jala paundukhon dirina tu toru ni pamarentaonNa. Taringot tusi, dipatuduhon ma i di parngoluonna ariari na marparange di angka dalan ni Tuhan i, lapatanna mangolu jala marpangalaho marojahan tu hata, patik, uhum dohot lomo ni roha ni Debata di ngoluna ariari, tarmasuk na mangulahon dohot na mangharinggashon ulaon naung diturpukhon tu ibana.

Hasintongan ni panindangion i dibuktihon do marhite pasupasu na jinalo ni na porsea i. Di ay.2-3 ditaringoti ma dua mansam pasupasu, i ma parjolo pasupasu di bagasan dohot na marhitehite ulaon. Didok: “Sai panganonmu do na niula ni tanganmu, martua ma ho jala sonang.” Sian mulana dope nunga ditontuhon Debata, ingkon na mangula do jolma asa mangan jala mangolu. Alai mansai jotjot do masa, godang halak na gabe pangulaula so mangan. Mangula do nian, alai ndang diparsaulihon parbue ni na niulana. Na boi masa do i rupani ala ni bencana alam, ala ni porang, ala ni sistem masyarakat dohot ekonomi na so adil, dohot na asing. Luhutna i ndang simbil sian sikap ni manisia na so mabiar be mida Debata. Alai dison, tu angka na manghabiari Debata jala na mardalan di dalanNa, dibagabagahon do na parsaulihonon ni ganup do parbue ni na niulana, gabe martua nasida jala sonang. Martua ndang ala na godang, alai ala boi manghasonanghon na adong. Dohot pandohan na asing, hatuaon ni angka na manghabiari Debata ndang di kwantitas ni parbue ni na niulana (makmur), alai di kualitas ni harohaonna do di na marsaulihon parbue ni na niulana i (sejahtera). Na paduahon, pasupasu di bagasan dohot marhitehite keluarga. Didok: “Tudoshon hau anggur na mararbue do ianggo jolmam di bagasan angka bilut ni jabum, tudoshon tunas ni hau jetun do angka anakmu humaliang mejam.” Somal do halak Israel manuan anggur apala solhot tu jabuna, dung i dirahuthon ma angka rantingna tu dorpi manang tu emper ni jabuna. Sangkapna disi, parjolo, menghemat tano; paduahon, mangondingi sian alogo gabe dumenggan marparbue; patoluhon, mangondingi sian panangko; paopathon, bahen hiasan. Angkup ni i, na gabe simbol ni hangoluan do i. Songon hau anggur i na mangolu, bertumbuh, mardangkai jala marparbue, songon i ma di bagas ni halak na marhabiaran tu Debata Jahowa mian jala berkembang hangoluan marhitehite jolmana na manubuhon angka anak dohot boru na mangingani angka bilut ni jabuna. Luhutna i dipatudos tu tunas ni hau jetun humaliang mejana. Tunas ni hau jetun i ma perlambang ni ngolu na segar, na bertumbuh jala na berkembang. Rap mangan nasida humaliang sada meja, marsada ni roha jala marsaor di bagasan hadameon, masiurupan jala masihaehean di bagasan roha na holong.

Di ay.4 disosoi parpsalmen 128 on ma na umbege manang na manjahasa asa mambuat parsiajaran sian i, didok: “Ida ma!” (pat.Ps.37:37). Marhite i sai hira na naeng dohononna do: “Bereng ma halak na manghabiari Debata, diharinggashon do mangula ulaonna jala dapotsa do parbue na denggan; bereng ma dohot keluargana, sonang, mardame, marsada jala marsaor di bagasan haholongon manginganhon bagasna; marlas jala mauliate rohana marsaulihon parbue ni na niulana humaliang mejana, huhut manghirim di hahohot ni goar na denggan di angka ari pangapudianna. Luhutna i ndang na sian gogona, alai pasupasu ni Jahowa do i di bagasan biar dohot pangoloionna di Ibana.” Mata guru, roha sisean. Sian na marnida hehe rohana marsiajar. Paposhon roha ni halak taringot tusi, didok ma: “Sai songon i do tongon dapotan pasupasu baoa na manghabiari Jahowa.” Pasupasu di bagasan biar dohot pangoloion i ndang hapunjungan ni sasahalak i, alai dibagabagahon Debata do i tu ganup na porsea jala pasangaphon Ibana huhut mardalan di dalanNa.

Taringot tusi diondolhon dope di ay.5 na mandok: “Sai pasupasuon ni Jahowa ma ho sian Sion, asa paidaidaonmu hinadenggan ni Jerusalem ganup ari saleleng ho mangolu.” Sion manang Jerusalem i ma pusat ni panggomgomion dohot parugamaon ni Israel, hatiuron ni hamuliaon ni tano na badia i. Disi do parmianan ni goar ni Tuhan i, jala disi do diparbaga pasupasu dohot hangoluan (pat.Ps.133:3), jala disagihon do i tu bangsoNa baik di tingki marpungu jala maribadah nasida disi manang pe di tingki na marserak jala mian di huta dohot di jabuna be. Ala ni i, malungun do halak Israel tu huta Jerusalem laho marsomba jala mian disi, lumobi di bagas joro i, saleleng mangolu (pat.Ps.27:4). I pe, pasupasu do i, hatuaon. Dison diondolhon ma, na gohan ni Debata do nang i di angka na manghabiari Ibana jala mardalan di dalanNa. LehononNa tongtong kesempatan nangkok tu Jerusalem laho maribadah dohot menikmati hadengganon ni huta i.

Angkup ni i dibagabagahon dope umur na ganjang, gabe sanga idaonna angka pahompu, tubu ni anakna. Na marlapatan ma i, ndang matos, alai marudutudut jala marsundutsundut do asi ni roha ni Debata di angka na manghabiari Ibana (pat.Luk.1:50). Luhutna i ndang tarsirang sian hajongjongan ni Israel songon bangso ni Debata. Hombar tusi, dipaujung ma Psalmen on dohot panindangion na mandok: “Hasonangan ma songgop tu Israel.” Ganup Israel ingkon do mengimani haporseaon ni bangso i gabe haporseaonna pribadi, jala hombar tusi laos boi manghirim mandai pasupasu ni Debata na tu bangso i gabe pasupasu tu ibana pribadi. Dohot hata na asing, molo dipasupasu Debata bangso i, ndang boi so marhinorhon i tu hadirion ni sasahalak ruas ni Israel; sabalikna, molo dipasupasu Debata sasahalak ala ruas ni Israel ibana, ndang boi so marhinorhon i tu parngoluon ni bangso i secara keseluruhan, gabe hasonangan ma tutu songgop tu Israel.

Sipahusorhusoron

Septuagesima do goar ni minggunta on, na mandok Pitupulu Ari di Jolo ni Ari Haheheon. Hombar tu parsagi ni tingki di Taon Parhuriaon tarrajum do Minggu Septuagesima on tu Parningotan di Arriari Panaonon (Passion) ni Kristus Jesus bagian na parjolo, i ma na marpardomuan tu paraloan ni Tuhanta Jesus Kristus tu halak Jahudi satingkiNa angka na so mangantusi jala na so mananda di Ibana. Di paraloanNa i unduk do Kristus i tu Ama i. Ibana do dihaposi, hataNa dioloi, lomo ni rohaNa dilului. Ndang tarhirim Ibana disi, ai dipatimbo Debata do Ibana, jala dibasabasahon tu Ibana goar na sumurung asa nasa goar (Plp.2:9). Songon sisean ni Kristus hita, ingkon parsidohot do hita di sitaononNa. Naeng tiruonta do Ibana disi, marhabiaran hita tu Debata, jala mardalan di dalanNa, dung i martua ma hita, tarpasupasu. Pasupasu dia ma i?

Na parjolo, pasupasu di bagasan ulaon. Di barita panompaon i tarjaha do, dung ditompa Debata jolma i, dipaojak do ibana tu Eden asa diula porlak i jala diramoti. Sian i torang, sian mulana i dope nunga ditontuhon Debata Panompa i paboa na ingkon mangula do jolma i. Pasupasu ni Debata ulaon i, ai marhitehite i do Ibana manumpakhon hangoluan tu jolma i. Manang ise halak na mangulahon ulaonna di bagasan biar mida Debata huhut mardalan di dalanNa, pos ma rohana, sai na jumpangsa jala tarhangoluhonsa do parbue na denggan; martua ibana, marhasonangan jala sejahtera. Na gabe sipaingot ma i tu hita asa taharinggashon be ulaonta di bagasan biar mida Debata, hombar tu lomo ni rohaNa. Sisarihononta do huhut asa ganup halak mangan jala mangolu sian na niulana. Sian tingki tu tingki, mansai torop do halak na gabe pangulaula so mangan, paragatagat so minum. Mangula do nian, alai ndang sejahtera sian na niulana. Na boi masa do i rupani ala ni sistem na so adil na dirancang so mamparetonghon jolma, nda holan na mamparetonghon parlabaan sambing; sistem na pamorahon na sabagian, alai na papogoshon tu na sabagian nari, ai lam tu godangna paruntungan na jumpang na sabagian, lam tu otikna do anggo di na sabagian nari, di angka na so tolap mangadopi persaingan. Songon huria ni Kristus hita, na tajou do hita mangurupi bangso dohot masyarakatta laho merancang sistem na lebih adil asa ganup halak boi mangolu jala sejahtera sian na niulana.

Na paduahon, pasupasu di bagasan keluarga. Laos di barita panompaon i tarjaha do na dipasupasu Debata do jolma i asa marpinompari jala asa manggohi sandok tano on. Tu sangkap i dipatop do si Adam dohot si Hawa gabe sada keluarga. Na suksuk do pasupasu di bagasan dohot marhite keluarga i ai gabe adong ma kelangsungan ni hajolmaon. Dohot hata na asing, di bagasan dohot marhite keluarga i ditorushon jala dipahembang Debata do hangoluan, ai marhite hatutubu ni anak dohot boru, molo salpu pe sada sundut ro do sundut na imbaru, jala gabe adong hasadaon angka na umbidang, isara ompu, marga, bangso, dohot na asing. Tontu do, ndang dihalomohon Debata keluarga na asal adong; ama i rupani na so tarpinsang, ina i na so tarpareso, dakdanakna pe angka na so siat hata, alai ingkon keluarga na badia do; i ma ama na marsahala, soripada na marhuaso, dohot dakdanak angka na daulat marroha. Keluarga sisongon i jumpang do di angka halak na manghabiari Jahowa huhut mardalan di dalanNa. Rap mangan nasida humaliang sada meja, marsada ni roha jala marsaor di bagasan hadameon, masiurupan jala masihaehean di bagasan roha na holong. Di bagasan biar mida Debata dioloi parompuan hamulianna, dihaholongi baoa pardihutana, dioloi dakdanak natorasna, jala natoras ndang manggintali anakhonna (pat.Turpuk Sijahaon: Kol.3:18-4:1). Keluarga sisongon i do na boi dinikmati songon pasupasu marsundutsundut; leleng nasida mangolu, tau tiruan jala marhinorhon tu hasonangan ni dongan jolma di lingkungan na jonok dohot na dao, isara pangisi ni bagas, huta, hombar balok, huria, masyarakat dohot bangso.

Na patoluhon, pasupasu di bagasan parsaoran tu Debata. Laos tong di barita panompaon i tarjaha do hata ni Debata na mandok na so jadi do punjung jolma i. Na marlapatan ma i parsaoran do ngolu i. Ndang holan parsaoran tu dongan jolma, alai lumobi do tu Debata. Parsaoran tu Debata di bagasan parsombaon manang peribadahan di inganan na tontu na pinapulik jala na pinarbadiaanNa, na diulahon di bagasan biar mida Ibana jala hombar tu angka dalanNa, mantat pasupasu godang do i na margogoihon halak di ulaonna dohot na mewarnai parsaoranna. Ala ni i, unang ma tatadinghon parpunguanta hian (Heb.10:25), alai lam tahasiholi jala taharinggashon ma na mamongoti joroNa.

jkt.19.01.2010/mvs

Read More..

1.19.2010

3 dung Epiphanias

SERMON JAMITA TU MINGGU 3 DUNG EIHANIAS, 24 JANUARI 2010
5 Mus.6:4-9

Patujolo

Mangihuthon torop penafsir, buku 5 Musa on penulisan kembali ni patik ni si Musa do. Di Alkitab digoar do i Ulangan. Na marharoroan do i sian hata Gorik deutronomion, istilah na pinangke ni Septuaginta [(LXX), i ma salinan ni Padan na Robi di hata Gorik] laho manggoari buku i, lapatanna patik na pinaduahali manang na niulahan. (Di salinan Batak didok, pangarataion di patik). Disurathon do i marrumangkon jamita ni si Musa na dipasahat di halongonan, di ipar ni aek Jordan. Naeng bongot ma nasida tu Kanaan, tano na pinarbagabaga i. Disi, mimbar ma parngoluonnasida sian na madoado gabe partani na menetap; mimbar dohot pengorganisasian ni masyarakatna sian na bersahaja tu theokrasi na kompleks. Na boi marhinorhon do saluhutna i tu haporseaon. Gabe tarela nasida rupani mangulahon ruhutruhut hasipelebeguon ni partanion dohot pamarentaon ni penduduk asli ni tano i. Mangadopi i ringkot situtu ma di nasida haporseaon na mansai togu tu Jahowa, Debata na sasada i. Tu sangkap i ingkon radotan nasida ma tongtong padan dohot patik ni Debata. Pangaradotion i ingkon dipaimbaru do i ganup ari, jala diajarhon sian sundut tu sundut. Tusi ma nasida diarahon si Musa di jamitana i.

Hatorangan

Hombar tu hata pamungkaanna na mandok shema Yisraa’eel (tangihon ma ale Israel), digoari do turpuk on Shema, i ma hata haporseaon (creedo) ni Israel. Ganup Jahudi na daulat sai dihatindanghon do i ganup ari, sahali di manogot, sahali nari di botarina. Disi, dihatindanghon nasida do haporseaonnasida di Debata Jahowa, didok: “Anggo Jahowa Debatanta i, Jahowa sasadasa do.” Na luar biasa do i, ai di tonga masyarakat regional na sangat politeistis, boi bangso i sahat tu haporseaon na monotheistis. Mansai godang do dewa-dewi na hinabiaran halak uju i humaliang Israel. Holan di Mesopotamia, adong do manang na piga ribu. Di roha ni parbegu i, di tonga ni debata na mansai godang i adong do pembagian daerah kultus manang kekuasaan. Asing do rupani na manghuasoi api, asing sirajai aek; na sada on debata ni parumauma, na sada an debata ni partigatiga, dohot na asing. Pangantusion sisongon i digoari ma i henotheisme. Hombar tusi gabe adong ma na ginoar monolatreia, lapatanna sada sisombaon. Di ganup inganan na tontu, holan sada do debata sisombaon. Diokui do nian haadongon ni debata angka na asing i, alai ndang boi anggo oloan jala sombaon di inganan i. Atik pe hea do halak Israel mangolu di paham i, mansai andul do i marasing sian haporseaon na dihatindanghon di Shema i. Debata na absolut (absolutely God) do Jahowa i, dungkon ni Ibana ndang adong be na asing; na so marmula do Ibana, na so marpansohotan. Arga situtu do i di roha ni halak Jahudi. Ala ni i, disi dijaha i di parpunguan Synagoge, pintor rim do na sahuria i mangulahulahi hatana na parpudi i (Heb. ‘echaad/esa/sasadasa do), gogogogo sahat tu manang na pigangombas. Na marlapatan ma i, disoadahon do disi haadongon ni angka debata sileban, ai angka debata na so tutu do i; personifikasi ni daya-daya alam, rekayasa ni pingkiran ni jolma.

Ia sahat pe bangso i tu haporseaon sisongon i, ndang na sian dirinasida i, alai na sian tahi dohot ulaon ni Debata do. Dipapatar diriNa tu nasida, dipillit nasida, dijou jala dijangkon tu parpadananNa, dijadihon gabe bangsoNa. Holong ni rohaNa do na mangonjar i. Ala ni i, nasida pe patut ma manghaholongi Debata. Hombar tusi ma dipaingothon di Shema i: “Jala ingkon haholonganmu Jahowa, Debatam sian nasa roham dohot sian nasa ateatem dohot sian nasa gogom.” Roha (Heb. labaabkaa/heart), i ma hapeahan ni pangantusion; ateate (Heb. naphsakaa/soul/tondi), i ma pusat ni ngolu dohot hadirion; jala gogo (Heb. maodekaa/might), i ma enerji manang daya hidup. Na nidokna disi, ingkon haholongan ni Israel do Debata Jahowa i sian sandok hadirionna, i ma hajolmaonna parbagasan dohot parduru. Maribadah nasida tu Ibana di bagasan haholongon. Tu Ibana sambing, ndang tu na asing, ai holan Ibana do na patut manjalo somba dohot pangoloionnasida.

Asa jumpang i, didok si Musa, ingkon parateatehonon ni bangso i do luhut hata angka na tinonahonna tu nasida. Marateatehon mandok, mameakhon hata i di ateatena, di pusat ni ngolu dohot hadirionna. Angka hata dia ma i? I ma angka patik dohot uhum na niaturhon ni Debata marhite si Musa mamungka sian Misir sahat tu halongonan na diikhtisarkan di jamitana i, na di ipar ni aek Jordan i. Molo dung hata i na manggohi ateatenasida, laos i do muse na puas sian pamangannasida jala tarida di parulannasida ariari (pat.Mat.12:34). Hombar tusi ma didok: “Jala ingkon gogoonmu mangajarhon angka i tu angka anakmu.” Padan ni Debata na tu nasida ingkon dialih-turunkan do i sian sundut tu sundut marhite na mangajarhon patik dohot uhum i tu angka anak dohot borunasida. Tu sangkap i ingkon pangkeon nasida do sude tingki dohot kesempatanna, isara ni na hundulhundul di jabuna manang na mardalani di pardalanan, di na laho modom dohot di na hehe muse.

Marojahan tu ay.8, di parholangan ni Padan na Robi dohot Padan na Imbaru berkembang do sada unsur budaya religi di bangso Israel na margoar filakteri, i ma dua kotak kulit (perkamen) na metmet, na togu jala marset na birong. Di ganup kotak adong opat harotas (perkamen) na sinuratan dohot hata ni patik i. Di na parjolo 2 Mus.13:1-10, na paduahon 2 Mus.13:11-16; na patoluhon 5 Mus.6:4-9; jala na paopathon 5 Mus.11:13-21. Dibahen ma i martali. Jumpa martangiang, dirahuthon ma i sada tu uluna, jala kotak i di bohina, di atas ni parholangan ni matana, lapatanna jonok tu utokutok manang pusat ni pingkiranna; na paduahon dirahuthon di lompitlompit ni tangan dohot botohonna hambirang, lapatanna di pusat ni pambahenanna, torhon ni ateate manang pusat ni ngolu dohot hadirionna. (Ditaringoti Tuhanta Jesus do i di Mat.23:5; digoar ma i disi tali partangiangan).

Dung i, hombar tu ay.9 (dohot 11:20) tubu ma muse na ginoar mezuzah, i ma sambulung harotas (perkamen) siopat suhi na sinuratan dohot hata ni 5 Mus.6:4-9 dohot 11:13-21 dung i dibalun jala dipamasuk tu sada tabung na pinature sian hau manang bosi (logam) jala disangkothon di tohang siamun ni ganup pintu dohot harbangan ni jabuna. Manang na ise jala sadihari pe halak mamolus sian pintu manang harbangan i ingkon tondongonna do i dohot jarijarina, ummaonna jarijarina i, laos dohononna: “Sai jagaon ni Jahowa do ho laho ruar dohot laho bongot, olat ni on ro di salelenglelengna” (Ps.121:8). Na mangabing manang manogu posoposo, ingkon paummahononna do posoposo i tu mezuzah i.

Toropan penafsir mandok, anggo di mulana na marlapatan tudosan sambing do i, ndang na marlapatan na sasintongna (pat.Poda 3:3, 21-22). Marhite i naeng ondolhononna do, ingkon ingoton ni Israel do sian sundut tu sundut paboa ulaon haluaon ni Debata do na gabe ojahan ni haadongonnasida songon sada bangso na bolon jala na mardeka. Ibana do, sian tahiNa na bebas dohot holongNa na so halompoan na papatarhon diriNa tu nasida, na manjangkon tu parpadananNa, jala manjadihon nasida gabe bangsoNa. Ingkon tangkas do i suan di roha jala tarida di parngoluonnasida. Dohot hata na asing, patik ni Tuhan i ingkon na peopon nasida do i di bagasan rohana, ingkon pingkirpingkiranna arian dohot borngin (pat.Jos.1:8), ingkon hatindanghononna marhitehite hata dohot pambahenanna, jala ulahononna marhitehite tangan ro di sandok panggulmitonna. Dohot hata na asing, ingkon gabe tanda ni hadirionnasida do i, identitas ni hajolmaon dohot budayana. Umumna, bohi do tanda ni hadirion; marhite bohina, tartanda sasahalak. Songon i ma di ganup hadirion dohot jabu ni halak Israel ingkon tarjaha jala tartanda patik ni Debata.

Sipahusorhusoron

Minggu 3 dung Epiphanias do goar ni minggunta on. Epiphanias na parpudi nama on di hita di taon on, ai di Minggu na ro bongotanta ma buhu na imbaru di Taon Parhuriaon na mardalan on, i ma Parningotan di Ariari Panaonon ni Tuhanta Jesus Kristus bagian na parjolo. Marhitehite turpuk di hita ari on naeng hatindanghononna do tu hita paboa di bagasan dohot marhitehite Jesus Kristus na tubu i, nunga patar be tu hita Debata, i ma Jahowa sasadasa na manghaholongi hita, na manjou jala na mamillit hita; na manjangkon tu parpadananNa jala na manjadihon hita gabe bangsoNa, parjambaranNa. Maradophon hapataranNa i, na tarjou do hita menyikapi sikap panjangkonon na hombar tu lomo ni rohaNa. Boha ma hita mangulahon i?

Na parjolo, manghaholongi Debata. Aha do haholongon, jala boha do na manghaholongi? Haholongon i ma kondisi rohani na patau jolma mangolu songon Debata. “Haholongon do Debata” (1 Joh.4:8). Jadi, manghaholongi mandok, mangolu songon Debata. Sasada Jesus Kristus dope naung hea tutu situtu mangolu songon Debata, sasadasa do naung hea singkop manghaholongi Debata. Ala ni i, manang ise na naeng manghaholongi Debata, ingkon dibereng ma tu Ibana jala marsiajar sian Ibana. Taringot tusi, marojahan tu hata na tarsurat di Padan na Robi, Ibana sandiri mangajarhon tu hita: “Sihaholonganmu do Tuhan Debatam sian nasa ateatem, sian nasa hosam dohot sian nasa roham!” (Mat.22:37). Na marlapatan ma i, na manghaholongi Debata ndang sae i holan marhite gerak hati manang emosi, alai ingkon na marhite sandok hadirion do ro di sandok kemungkinanna. Mardomu tu turpuk on, ingkon marsomba manang maribadah hita tu Ibana sambing, ai sasada Ibana do Debata, ndang adong na asing. Ibana do sihabiaranta, sioloan jala sihaposanta. Angkup ni i, ingkon marsitiopan hita tongtong tu hata dohot patikNa, jala marpangalaho hombar tu lomo ni rohaNa. Sada sian i, i ma na manghaholongi dongan jolma songon dirinta sandiri (3 Mus.19:18; Mat.22:39). Dohot pandohan na asing, ingkon gabe tanda ni hadirionta do patikNa i, gabe identitas budayanta. Mansai ringkot ma i ingotonta di na mamolus hita di taon on. Songon naung hea nidok, ndang adong dope na taboto taringot tu angka ari na tinggal di taon on. Na boi lam tu tiurna do parnidaanta disi, alai boi lam tu golapna; lam tu majuna perekonomianta manang lam surutna; lam tu damena parsaoranta manang lam tu rundutna. Sudena i na boi gabe mara do tu haporseaon. Lam so porsea jolma di Debata, lam so dihaposi Ibana, lam so dihaholongi jala lam so dipardulihon hataNa, alai sabalikna lam dihaposi ma angka na di tano on, jala lam dipahombar dirina tu portibi on. Nda i na pinasingothon ni Parpoda i na mandok: “Hapogoson manang hamoraon unang lehon tu ahu; sai loas ma panganonhu bohal tinurpukhonMi tu ahu. Asa unang tung huporso Ho dung butong ahu, gabe dohononhu maon: Ise do Jahowa? Manang unang tung manangko ahu ala dung pogos, gabe huparoaroa maon goar ni Debatangku” (Poda 30:8b-9). Dao ma i, alai sai jumpang ma di hita songon hata ni endenta nomor 149:3 i na mandok: “Manang aha pe na masa, las ni roha, arsak pe. Tioponhu Ho na basa, na marholong roha pe. Tung saleleng au mangolu, nang dung suda bohalhon. Ingkon Ho o Sipangolu, pujionhu sai tongtong.” Molo dung songon i, nunga jumpang be di hita bangko ni halak na marroha, na paulihon bagasna di atas batu mamak (pat.Turpuk Sijahaon: Mat.7:24-25).

Na paduahon, pateanhon haporseaon di Debata. Na manongtong do Jahowa Debatanta i, parpadananNa pe hot do (pat.Jes.54:10). Ala ni i, ingkon na dipateanhon do i sian sundut tu sundut. I pe, ingkon tangkas ma ingoton jala hangoluhononta di taon on. Di hita dohot di angka anakhonta do parpadanan dohot bagabaga ni Tuhan i (pat.Ul.2:39). Ala ni i, songon sundut naung pinadomu tu Debata na tarjou do hita mangajarhon hata dohot patik ni Debata tu ianakhonta. Taringot tusi, ingkon na dipungka jala diulahon do di keluarga. Tibu, asa gabe somal, jala asa gabe nang dung matua nasida ndang morot be sian i (pat. Poda 22:6). Tu sangkap i, ingkon pangkeon ni ganup keluarga ma hata dohot patik ni Debata gabe pokok ni panghataion ganup ari, manang na di tonga ni jabu i manang na di pardalanan pe. Produk budaya pe, isara televisi, radio, tape recorder, CD, DVD dohot na asing, na boi pangkeon do i gabe sarana pasahathon hata ni Debata. Ninna roha, nunga lam rangkak jumpang na songon i di ngolu ni hita halak Kristen. Sibuk do angka ama, sibuk angka ina, songon i angka dakdanak; ndang sanga be rap mangan, ndang sanga rap martangiang, ndang sanga rap manjaha hata ni Debata, jala ndang sanga rap hundul manghatahatai; angka produk budaya na ginoaran ondeng pe mansai otik do i marpangke tu pangajarion di hata ni Debata, alai godangan do i laho manonton film manang sinetron, mambege ende manang main game. Molo songon i do, so nda tung naung tumagon do hita goaron halak na oto na pajongjonghon bagasna di atas rihit? (pat.Turpuk Sijahaon: Mat.7:26-27).

jkt.13.01.2010/mvs

Read More..

1.11.2010

2 dung Epiphanias

SERMON JAMITA TU MINGGU 2 DUNG EPIPHANIAS, 17 JANUARI 2010
Joh.17:20-23

Patujolo

Sabagian sian tangiang hamalimon ni Tuhanta Jesus do turpuk on. Dihatahon do i dung salpu hata partadinganNa na tu siseanNa i (14:1-16:33) di sada inganan di parholangan ni bilut parginjang (pat.Mrk.14:15) tu porlak Getsemane. Sirang ne ma Ibana sian siseanNa i, ai salpu i, pintor ihut nama na masa di porlak Getsemane, tartangkup Ibana, diuhumi, diparsilanghon, mate jala ditanom; dung i hehe jala manaek tu surgo. Tinggal dope anggo sisean i di portibi on laho patulushon sangkap ni panjouonnasida i. Ndang na sian portibi on nasida. Ala ni i, adopan nasida do hosom ni portibi on (15:18-21). Laos songon i do nang huria i, angka na gabe porsea tinogu ni hatanasida. Dison, songon Sintua ni Malim Bolon Ibana, ditangianghon ma siseanNa i (17:6-19), ditangianghon dohot huriaNa di sepanjang abad (17:20-26), pasahathon nasida tu pangaramotion ni Ama i.

Hatorangan

Na luar biasa do tangiang ni Jesus on, ai ditangianghon do angka na naeng porsea dope di sude tingki dohot inganan. Manangianghon angka na mardomu tu tingki na ro jotjot do i taulahon. Mangido panumpahion ni Debata di angka na taula rupani asa marparbue. Alai na manangianghon parbue angka na so tarida dope, ndang tolap hita mangulahon. Anggo Jesus tarulahonsa do i ai na mangatasi sude tingki dohot inganan do Ibana. Di na martangiang i Ibana, nunga diida angka na gabe porsea di Ibana ala ni panindangion ni siseanNa i. Molo sahat pe nasida tu haporseaon dohot tu pangihuthonon di Ibana, ndang na sian portibi on i, manang sian mudar, manang sian sangkap ni baoa; na sian ginjang do i, sian Debata (pat.1:12-13; 6:37, 44). Hombar tusi, sarupa tu sisean i na gabe targoar do nasida na di portibi on alai ndang sian portibi on (ida ay.14, 16). Ala na so sian portibi on nasida, asing do ihutanna, asing nilai hidupna, asing gaya dohot tujuan ni ngoluna. Gabe dihosomi portibi on do nasida ala ni i, jala ingkon taonon nasida do hosom dohot reherehe ni portibi on. Taringot tusi pe nunga tangkas sude diida Jesus. Diida do huhut na mansai ringkot do di nasida pangaramotion ni Debata AmaNa i. Ala ni i dohot ma nasida ditangianghon.

Angkup ni i dipangido do hasadaon, didok: “Asa sada nasida saluhutna.” Mansai na arga do hasadaon i, ai marhitehite i lam margogo do na porsea i jala gabe porsea portibi on di Jesus Kristus na sinuru ni Debata. Pada hakikina parroha diri do manisia, na cenderung manulak halak na asing di lambungna, gabe maol sada. Nunga mamungka i sian tingki ni ompunta na parjolo i. Lam tu maolna do na sada i ala ni inganan dohot latar belakang na paasingasing. Alai molo sada na porsea i gabe sada panindangion do i tu portibi on paboa adong sada hagogoon na so sian tano on na marhuaso pasadahon, i ma Kristus Jesus i. Ala ni i gabe porsea ma portibi on paboa na sian Debata do Kristus i. Taringot tu model ni hasadaon i didok do: “Songon Ho, ale Amang di bagasan Ahu jala Ahu di bagasan Ho.” Sada do Ama i tu Anak i; sada di bagasan hasadaon na masihaholongan, ai holong do roha ni Ama i di Anak i, Anak i pe holong do rohaNa di Ama i. Songon i ma na porsea i naeng marsada jala mardomu huhut masijangkonan jala masihaehean di bagasan roha na holong. Di bagasan dohot marhite hasadaon na di bagasan holong i do saor jala mardomu na porsea i tu Kristus i, jala marhite Kristus i saor jala mardomu nasida dohot Debata.

Demi hasadaon i, dilehon Jesus do hasangaponNa na sian Ama i tu na porsea i. Aha do i? HasadaonNa tu Ama i sandiri do i ro di saluhut na mangihut tusi. Hasangapon do i di Kristus i molo dijangkon Debata Ibana tu hasadaon dohot Ibana; hasangapon do i molo boi Ibana mian di bagasan Debata jala Debata di bagasan Ibana; hasangapon do i molo sai boi Ibana jumonok tu Ama i jala boi manangihon dohot umboto saluhut na tinahiNa; hasangapon do i molo dipillit Debata Ibana gabe Sipalua portibi on; hasangapon do i molo dilehon Debata tu Ibana hamonangan maralohon dosa, hamatean, dohot banua toru; jala hasangapon do i molo gabe dipatimbo Debata Ibana jala dibasabasahon tu Ibana goar na sumurung asa nasa goar (Pil.2:9). Songon i ma tong Kristus i marbasahon hasangapon tu na porsea. Hasangapon do i di na porsea i molo dijangkon Kristus i nasida tu parsaoran tu Ibana; hasangapon do i molo dipaian na porsea i di bagasan Ibana jala Ibana di bagasan nasida; hasangapon do i molo dipaloas na porsea i umbege jala umboto hata dohot tahi ni Debata naung patar di bagasan dohot marhitehite Ibana; hasangapon do i molo dipadohot Ibana angka na porsea i di ulaon haluaon ni portibi on marhite ulaon panindangion i; hasangapon do i molo dipatau jala dipamonang na porsea i maralohon dosa, sibolis, dohot hamatean; jala hasangapon do i molo gabe donganNa panean nasa na porsea i di Debata AmaNa i. Taringot tusi didok do: “Nunga Hulehon.” Maksudna, ndang holan sihirimon sogot be hasangapon i di angka na porsea, alai parsaulian naung dijalo do i di ngoluna sinuaeng on jala dinikmati.

Sipahusorhusoron

Minggu 2 dung Epiphanias do goar ni Minggu on. Nunga niondolhon, na marhahonaan do Epiphanias i tu hapataran ni Jesus na tubu i. Lobi sian na tarida i do Ibana, ai Tuhan do Ibana jala Kristus, Anak ni Debata. Sadalan tusi, turpuk jamita di Minggu on naeng papatarhon tu hita paboa marhitehite Ibana do adong huria di portibi on. Di haroroNa tu portibi on, marhite na manjou jala mamillit siseanNa, dipaojak huria i (pat.Mat.16:18a), jala ditorushon do i marhite hauuse dohot pangulaon ni Tondi Porbadia (pat.Ul.2:41 du). Hombar tusi, mamangke bahasa populer boi ma dohonon, Jesus Kristus do na mambahen rancang bangun ni huria i, na mameakhon ojahanna, jala na pajongjonghonsa. Selaku perancang, peletak dasar, dohot pelaksana bangunan, Ibana do na umboto aha jala boha do huria i sasintongna. Ala ni i, manang ise pe na naeng umboto aha jala boha do huria i, ingkon marsiajar ma ibana sian Kristus i. Aha jala boha do tutu huria i? Marojahan di turpuk ari on saotikotikna adong dua na boi dohonon.

Na parjolo, huria i ma punguan na dipasada dibagasan haholongon. Didok Tuhanta Jesus Kristus di tangiangNa i: “Asa sada nasida saluhutna.” Hasadaon ni huria ndang na borhat i sian hasosadaon tu hasadaon, jala ndang parbue ni usaho ni jolma na saling pasadahon diri, alai na borhat do i sian hasadaon tu hasadaon, ai na marmula do i di hasadaon ni Debata Ama i dohot Anak i. Ala ni i ingkon hasadaon ni Ama i tu Anak i do na gabe modelna, i ma hasadaon dohot parsaoran na di bagasan holong. Mansai ringkot ma i ingoton jala hangoluhonon ni sandok na porsea. Songon na taboto, na marharoroan do ruas ni huria na di sandok portibi on sian inganan dohot latar belakang na paasingasing. Na marhinorhon do i tu parasingasingan ni pemahaman taringot tu pengorganisasian ni huria, taringot tu parsombaon, manang taringot tu sadasada pokok ni haporseaon. Ndang pola sihailahonon i jala sisolsolan, ai pangungkapon ni Debata na marhite Barita na Uli ingkon na membumi do i jala membudaya asa tarhangoluhon. Ndang apala siparsintaonta asa gabe sisada organisasi huria di sandok portibi on, gabe sisada bentuk peribadahan, manang gabe sisada konfessi. Alai on do tahe, ganup na porsea naeng ma boi mamereng dohot manjangkon sesama na porsea sian sude inganan dohot denominasi di bagasan holong ni roha. Sada do Debata na manjou hita, sada do Tuhan na manobus, sada do Tondi Porbadia na pabadiahon, sada do surgo situjuon, sada do hasangapon naung tinean jala na naeng teanon. Molo songon i do antong ndang adong alasan ni manang ise pe mangarajumi huriana asing gabe so boi mamereng sesama na porsea sian huria na asing songon dongan na sada hasadaon dohot nasida na sahuria, ndang adong alasan ni manang ise pe memupuk kesombongan rohani na mangarajumi huriana do satu-satunya huria na sintong gabe so olo marsaor dohot sesama na porsea na sian huria na asing, jala ndang adong alasan ni agia ise pe pajongjong sada huria na eksklusif na so boi manjangkon jala manghaholongi na porsea sian huria na asing. Huria na marsada di bagasan haholongan i ndang holan sasaran ni Epiphanias ni Kristus be i, alai dohot do gabe ulaula ni Epiphanias ni Kristus i maradophon portibi on .

Na paduahon, huria i ma punguan ni angka sitean hasangapon ni Debata. Didok Tuhanta Jesus Kristus muse di tangiangNa i: “Nunga Hulehon tu nasida hasangapon na nilehonMi tu Ahu.” Di ruhut hajolmaon, gale do huria ni Kristus di portibi on. Ndang adong huaso dohot hagogoonna, ndang adong hamuliaon dohot hasangaponna. Ala ni i jotjot do i gabe sasaran ni rimas ni portibi on. Digugai, dilelei, diorai marpungu, disegai garejana, dohot na asing. Nang pe songon i ndang mintop huria i jala ndang tarida dope tanda ni na laho mintop. Boasa? Ala di bagasan haporseaon di Kristus i nunga domu jala saor huria i tu Debata gabe margogo di hagogoonNa. Laos i ma tandana naung gabe panean na porsea i di hasangapon ni Debata. Hasangapon do i molo dijangkon Kristus i nasida tu parsaoran tu Ibana; hasangapon do i molo dipaian na porsea i di bagasan Ibana jala Ibana di bagasan nasida; hasangapon do i molo dipaloas na porsea i umbege jala umboto hata dohot tahi ni Debata naung patar di bagasan dohot marhitehite Ibana; hasangapon do i molo dipadohot Ibana angka na porsea i di ulaon haluaon ni portibi on marhite ulaon panindangion i; hasangapon do i molo dipatau jala dipamonang na porsea i maralohon dosa, sibolis, dohot hamatean; jala hasangapon do i molo gabe donganNa panean nasa na porsea i di Debata AmaNa i. Na marlapatan ma i ndang holan sihirimon sogot be hasangapon i di na porsea, parsaulian naung dijalo do i di tano on jala dinikmati, alai sipasingkoponna ma i muse di ari sogot. Sahali nari, angka naung gabe sitean hasangapon ala ni haporseaon i ndang holan sasaran ni Epiphanias ni Kristus be i, alai nunga dohot gabe ulaula ni Epiphanias ni Kristus tu portibi on.

jkt.09.01.2010/mvs

Read More..

1.06.2010

1 Dung Epipanias

SERMON JAMITA TU MINGGU 1 DUNG EPIHANIAS, 10 JANUARI 2010
Mat.12:46-50

Patujolo

Dung dibege Jesus naung tartangkup si Johannes Pandidi, pintor dipungka do ulaonNa (4:12 duu). Na songon partanda sian ginjang do na masa i di Ibana laho papatarhon diri di tongatonga ni natorop. Patujolo do si Johannes Pandidi i, na paturehon dalan di Tuhan i. Di hatatangkupna i marujung ma pangulaonna, jala Tuhan i ma na tampil tu permukaan. Apala na parjolo diulahon i ma na manjamitahon hasosonggop ni harajaon banua ginjang manang harajaon ni Debata (4:17). Taringot tusi, dipatorang dope i tumangkas di Jamita Dolok (5:1-7:29). Ala naung songgop harajaon i, dipatupa ma angka tanda halongangan (8:1-9:34). Na gabe partanda ma i naung talu harajaon ni sibolis (pat.1 Joh.3:8). UlaonNa na manurasihon hasosonggop ni harajaon i naeng torushononNa ma i marhite na mamillit dohot na paborhathon siseanNa (9:35-11:1). Maradophon saluhutna i, marragam do sikap ni halak. Adong do na sungkunsungkun, isara si Johannes Pandidi; adong na so parduli, songon pangisi ni Betsaida dohot Korasin, adong na mangalo, isara angka parise dohot sibotosurat, adong na so mangantusi, alai torop do na porsea. Turpuk di hita ari on i ma taringot tu ina dohot angka anggiNa na so mangantusi di Ibana. Masa do i di Kapernaum, di ombas na parjolo ni pangulaonNa di Galilea.

Hatorangan

Di jolo ni on dipamalum Jesus do sahalak na sinonggopan ni tondi na hodar sibahen na mapitung dohot na ngungu. Marnida i manginsahi do angka parise, didok: “Si Beelsebul, induk ni angka sibolis do dipangasahon Ibana pabalihon angka tondi na hodar.” Ala ni i, masa ma parsualon antara ni Jesus dohot angka parise i. Ganjang do parsualon i. Alai ndang melulu Jesus defensif, di bagasan angka paralusonNa huhut do Ibana mangajari tu natorop i. Apala di tingki i ma masa jamita on, ro ina dohot angka anggiNa mandapothon Ibana, naeng manghatai dohot Ibana. “AnggiNa,” ninna. Angka ise do i? Mangihuthon Mat.13:55, si Jakobus do i, si Joses (Josep), si Simon dohot si Judas. Ndang torang nian dison manang na parhuaonNa do nasida tutu di partubu, ai di hata gorikna adelphoi do didok, lapatanna hahaanggi manang ampara (saudara). Jadi boi do i angkang manang hahaNa, alai laos boi anggiNa. Mardomu tusi adong ma muse sungkunsungkun: “Boha do paramparaonasida?” Adong do na mandok, angka anak ni si Josep do i sian dongan saripena na parjolo. Ninna, naung mabalu hian do si Josep i andorang so maroroan dope tu si Maria. (Taparrohahon ma rupani, gombaran angka na pinatupa ni seniman kristen taringot tu Keluarga Kudus i, sai digombarhon do si Josep i songon sahalak baoa naung matua, alai si Maria songon sada anak boru na mansai poso dope. Sai hira na dapotan ojahan do antong pingkiran i di Barita na Uli i, ai disi jumpang do kesan na tibu do mate si Josep; dung dipungka Jesus ulaonNa, ndang hea tarbege be baritana). Dung i, adong do muse na mandok, angka anak ni si Maria jolma ni si Kleopas do i (pat.Joh.19:25). Ninna, na marpariban do si Maria ina ni Jesus tu si Maria jolma ni si Kleopas i, jala hombar tu adat ni Jahudi na boi goaron do angka anak ni si Maria jolma ni si Kleopas i adelphoi manang hahaanggi ni Jesus. Alai luhut pingkiran i na marbonsir do i sian panghormation na matorbanghu tu si Maria. Dipodahon na deba do rupani na torus do ibana anak boru na so habubuhan (perawan) nang pe naung ditubuhon Jesus. Ndang hea ibana sampur tu si Josep, ai dosa do na sampur jala maralo do i tu habadiaonna. Ala ni i ndang hea be ibana gabegabean jala tubutubuan. Di hita, tahormati do si Maria, alai ndang songon sada dewi. Ndang dipasurung na masa i ibana gabe lobi sian jolma, hot do ibana ina na somal, tuan boru ni si Josep. Ala ni i tajalo jala taantusi do turpuk on songon na tarsurat i, anak ni si Josep dohot si Maria do nasida. Nang pe so apala songon i di hata gorikna, ndang na masalpuhu salinan Batak na pataripar adelphoi i dohot anggi. Angkup ni i, mangihuthon Mat.13:56 adong dope didok ibotoNa. “Angka ibotoNa,” ninna. Na marlapatan ma i, saotikotikna adong dua halak ibotoNa.

Di sada jabu do na masa i jala mansai torop do halak disi. Ala ni i ndang boi be ina dohot angka anggiNa i bongot, gabe di duru nama nasida jongjong. Sian i martona ma nasida tu Jesus paboahon na naeng manghatai nasida dohot Ibana. Alai apala dia ma huroha na hinarohonnasida tusi? Aha na naeng dohononnasida tu Jesus i? Ndang dipaboa i di turpuk on. Alai sian konteksna, pinadomu tu paralelna (Mrk.3) dapot dadapon ni roha do paboa na so mangantusi do nasida di Jesus. Mangihuthon parpaboa ni pardisurgo Gabariel tu si Maria, jala ra, dipaboa do i tu ianakhon dohot tu sude sisolhotna, Anak ni Nasuntimbul do Jesus i, Anak ni Debata (Luk.1:32, 35); jala di boaboa ni Tuhan i na marhite angka parmahan i dipatangkas do na Sipalua do Ibana, Kristus jala Tuhan (Luk.2:11). Dung dipungka Jesus ulaonNa, diida si Maria do lan tanda na mendukung hasintongan ni i, ai mangula do Jesus i di bagasan huaso godang, dipatupa do angka tanda jala marsahala do parjamitaon dohot pangajarionNa. Alai na gabe so mangantusi do rohana, ai ndang sude manjangkon Jesus i. Lobi so mangantusi tahe, ai na targoar sitiop hasintongan ni bangso i, i ma angka parise dohot sibotosurat justru sude do mangalo Ibana. Adong do tahe na mandok na partondi na hodar Ibana (Mrk.3:30). Laos songon i do nang parhuaso di parugamaon, i ma angka malim dohot angka pangituai, sude do mangalo Ibana. Gabe sungkunsungkun ma rohana, molo Anak ni Nasuntimbul do Ibana, Anak ni Debata, Sipalua, Kristus jala Tuhan nda ingkon sude ma nian manjalo? Anggo angka anggiNa, ndang porsea di Ibana (Joh.7:5). Laos songon i do nang angka sisolhotNa. Adong tahe na mangarajumi naung rintik do Ibana (Mrk.3:21). Sude nasida, si Maria, inaNa i, angka anggiNa dohot sisolhotNa rap manghilala do na boi tarmara do Jesus i ala ni i. Molo sai didatdati Ibana ulaonNa i, lam muruk ma angka Jahudi i, tangkuponna ma Ibana jala bununonna. Holong do rohanasida di Ibana, ai Anakna do Ibana, angkangna, manang sisolhotna. Tung ‘na rintik’ pe i, ba ‘na rintiknasida’ do. Ala ni i naeng paluaon nasida ma Ibana sian parmaraan dohot hamatean; gabe ro ma nasida naeng mangotapi Ibana sian ulaonNa jala mamboansa mulak.

Pangunjunan do i di Tuhan i. Ala ni i, ndang ruar Ibana mandapothon nasida. Ditorushon do mangajari natorop i jala dipangke do na masa i gabe sada sian hata ni pangajarionNa, didok: “Ai na mangulahon lomo ni roha ni Damang na di banua ginjang i do anggingKu, i do ibotongKu, i do dainang.” Di bagasan Kristus i, ala ni haroro dohot ulaon panobusion sipasingkoponNa di silang i jongjong do sada kekeluargaan manang parhahamaranggion na imbaru na so ojak di parmudaron manang di hubungan genealogis, alai di pardomuan dohot di parsaoran partondion do, i ma haporseaon dohot pangoloion di Debata. Angka sisean i naung jumpangan do di pardomuan i. Nunga pajumpang nasida dohot Jesus i, nunga dihaporseai nasida Ibana jala diihuthon. Ala ni haporseaon i, nunga saor jala domu nasida tu Debata, jala di bagasan parsaorannasida be tu Debata domu jala saor ma nasida sama nasida jala tarihot di bagasan sada parhahamaranggion na imbaru na manjalo jala manghangoluhon hata ni Debata selaku nilai dohot aturan ni ngolu. Taringot tu nasida ma didok Jesus: “Angka on do dainang dohot anggingKu.” Tau singotsingot ma i tu si Maria, tu anggi, tu iboto, dohot tu angka sisolhotNa asa sumurut sian pardomuan pardagingonna Jesus i, alai dibongoti ma parhahamaranggion na imbaru na ojak di haporseaon dohot na mangulahon lomo ni roha ni Debata; sumurut sian sikapna na proteksinos tu Jesus, alai dijangkon ma proteksi manang pangondingionNa.

Sipahusorhusoron

Minggunta on margoar do 1 dung Epiphanias. Epiphanias ndang tarsirang i sian Natal. Di mulana, sada do pesta na ditanda halak Kristen, i ma Paskah. Alai lam leleng dihilala huria i ma: Ia naeng tangkas antusan lapatan ni haheheon ni Kristus i, ringkot do jolo panghilalahononhon lapatan ni haroroNa tu portibi on na marhite hatutubuNa. Manggohi i, ringkot ma sada pesta Natal manang Parningotan di Hatutubu ni Jesus Kristus. Hombar tu manang piga partimbangan, dipillit angka huria na di timur ma tingki mamestahon i di ari 6 Januari. Huria na di barat, tong marojahan di manang piga partimbangan, dipestahon ma i di 25 Desember. Lam leleng, lam monang do 25 Desember; jala di ombas na parpudi on, nunga hira sude huria di sandok portibi on mamestahon Natal i di ari i. Unang laos mago 6 Januari, dipatupa ma penyesuaian. Tutu, porlu do penyesuaian i, ai dihilala huria i do na majempekhu do molo holan sadari do Natal i pestahonon. Gabe dipaganjang ma i tolu minggu tu jolo, i ma Advent; manang na piga minggu muse tu pudi, i ma Epiphanias na dipungka di ari 6 Januari. Di Epiphanias i diondolhon do paboa Jesus na tubu i lobi sian na tarida i do Ibana, ai Tuhan jala Kristus do Ibana, Anak ni Debata.

Laos i ma sangkap ni hurianta mameakhon Epiphanias i gabe sada bagian na so tarsirang di taon parhuriaon. Di Natal, marhite ragam ni dohot liturgi dohot drama, sendratari dohot oratorium, barita dohot jamita natal na didramatisasi, relatif godang do rohanta dipusathon tu Jesus posoposo na peak di panggagatan; metmet, gale, pogos, jala lea. Sai hira na dirangsang do hita mandok tu Posoposo i: “Ue tahe, asi ni roha i.” Ia so i, gabe gumodang rohanta ditaiti tu tokoh-tokoh bingkai ni Evangelium Natal i, ai adong do parjamita na gabe gumodang manjamitahon si Sakarias dohot si Elisabet, si Josep dohot si Maria, si Simeon dohot si Hanna, parmahan dohot parroha sian purba, bara dohot panggagatan, halode dohot lombu. Disadari manang so disadari, gabe sai hira na naeng huphupanna do Jesus i. Alai di Epiphanias naeng paorotonna do hita tu panandaon paboa na lobi sian sian jolma do Posoposo i; naeng papataronna sian panghuphupi gabe tartanda paboa Ibana do na umbalga jala na sumangap, Tuhan na mangarajai saluhut.

Hombar tusi ma turpuk di hita di ari on naeng paorothon hita sian pamingkirion na sala na mangarimpu na ringkot hita mangondingi Kristus i. Di sejarah ni hakristenon adong do rupani na ginoar theodice, i ma upaya membela dohot membenarkan Debata. Molo dialo manang dileai sasahalak Debata sai hira na tarjou do jolma i mangondingi jala mamintori Ibana, jala somalna diulahon ma i di bagasan cara-cara duniawi, isara na manghosomi, mamusui, mamorangi sahat tu na mangalengsehon. Unang so taboto, ndang ringkot di Debata pangondingion dohot pamintorion sian hita, alai hita do na ringkot ondingan jala pintoran ni Debata. Laos i ma siingotonta di na mangadopi pambahen ni halak tu huria i. Sian tingki tu tingki sai adong do na hosom roha na so manghalomohon hajojongjong ni huria i. Di ari 18 Desember 2009 i rupani, disegai na manegai do Gereja Santo Albertus di Kompleks Harapan Indah Bekasi, jala di ari 25 Desember 2009 i digugai jala dipasohot do kebaktian natal di HKBP Philadelpia Ressort Duren Jaya Bekasi. Boha do hita halak Kristen mangadopi i? Aloonta do nasida di bagasan hosom? Unang so taboto, na binahen ni halak tu huria i na binahenna tu Kristus i do i (pat.Mat.25:40, 45). Hombar tusi - sahali nari - ingkon ingotonta do, ndang ringkot di Kristus i pangondingion dohot pamintorion sian hita, alai hita do na ringkot ondingan jala pintoranNa. Evangelium Ephipanias ari on manghatindanghon tu hita, marhuaso do Kristus na ro i mangondingi jala mamintori hita, mangondingi jala mamintori huriaNa.

Na mangihut, Evangelium Ephipanias ari on naeng paorothon hita sian pardomuan dohot parsaoranta na leleng jala paunsathon tu kekeluargaan manang parhahamaranggion na imbaru na di bagasan dohot marhite Kristus i. Somal do tabege pandohan Kristen KTP. Dipangke do i tu halak na goarna Kristen, alai anggo ngoluna mansai dao do sian ngolu ni Kristen. Ndang hea martangiang, ndang hea manjaha hata ni Debata, ndang hea marminggu. Sian goarna adong do pardomuanna tu Kristus, alai holan di goar do i. Hata dohot lomo ni roha ni Debata ndang hea diulahon, portibi on do dihasiholi. Pardomuan na sintong tu Kristus i ingkon na ojak do di haporseaon, dung i di bagasan dohot marhitehite Ibana jumpang ma pardomuan dohot parsaoran tu Debata. Angka naung porsea songon i jala naung dipadomu tu Kristus dohot Debata, angka i do na targoar keluarga ni Debata, na dipasada di bagasan haholongon jala manjalo hata ni Debata songon nilai dohot aturan ni ngolu. Evangelium Ephipanias ari on manghatindanghon tu hita, marhuaso do Kristus naung ro i pabongothon hita tu keluarga ni Debata.

jkt.07.01.2010/mvs

Read More..

1.01.2010

Dung Taon Baru

SERMON JAMITA TU MINGGU DUNG TAON BARU, 3 JANUARI 2010
1 Kor.3:10-17

Patujolo

Ditongos si Paulus do Surat 1 Korint on sian huta Epesus (pat.6:8) marhira taon 54-55 M. Disurathon do i laho mangalusi sungkunsungkun ni huria i. Hatiha i, na masa do di huria i paraloan ni pamingkirion na ekstrim taringot tu hubungan seks. Di na deba, dirajumi dosa do i, gabe adong ma na ganggu roha jala sungkunsungkun taringot tu na marnioli manang na marhamulian; alai di na deba dirajumi do i na wajar, gabe ndang adong pola alang ni rohana mangulahon i tarmasuk na mangulahon haronsamon dohot parmainanon (5:1-13). Luhutna i dibaritahon jala disungkunhon huria i do tu si Paulus marhite surat (pat.7:1) na disura roha dipasahat marhite si Stepanas, si Fortunatus, dohot si Akaikus (pat.16:17-18). Alai sibonsiri na rumonsot, i ma parsalisian na masa di huria i. Sian pangisi ni bagas ni si Kloe, tarbortik do tu si Paulus na masa do di huria i parbolatbolaton (1:11). Ndang apala torang manang na dia do bonsir ni parsalisian i. Alai sian pengelompokan na adong (ida 1:12), disura roha na marbonsir do i sian parasingasingan ni parbarita na uli na ro tu nasida. Songon naung hea sinurathon (Ida Sermon Jamita tu Minggu 15 dung Trinitatis, tanggal 20 September 2009), si Paulus do na umpungka huria Korint. Alai di pudi gabe marsada do tu huria i angka na porsea ala ni ulaon sending na pinatupa ni si Apollos dohot si Kepas (Petrus). Ndada na marasing nian Barita na Uli na binaritahonnasida be, sada do. Antong boasa gabe boi non i patubuhon parbolatbolaton? Adong mandok, na marpardomuan do i tu parasingasingan ni gaya merasul ni na tolu parbarita na uli i. Taringot tu si Paulus rupani didok, hurang kharismatis do ibana, hurang rohani, hurang pataridahon huaso ni Tondi Porbadia; hape si Apollos, na pistar do ibana manghatai (pat. Ul.18:24). Turpuk on disuraton do di bagasan pardomuan tu hasadaon na umbidang, i ma panaringotion di parbolatbolaton na masa di huria Korint (1:10-4:21).

Hatorangan

Di Buku na Badia i adong do manang na piga hali dipatudos huria manang na porsea i tu bagas (pat.1 Ptr.2:4-8). Ragam do na niondolhonna, isara ni hasadaonna, bagianbagianna, pembangunanna, dohot angka na asing. Di turpuk on, pemeran ni pembagunan ni huria i do na diondolhon, ojahanna, rumang ni na pinauli ni sasahalak di atas ni ojahan i, dohot makna rohani ni huria i. Manang ise pe na pinadohot di pembangunan ni huria i, na sian asi ni roha ni Debata do i, ndang boi sian lomolomo ni rohana be. Hombar tu asi ni roha ni Debata na tu si Paulus, dipillit jala dipabangkit do ibana gabe siboan Barita na Uli tu sipelebegu (pat.Ul.26:17). Marhite i jongjong ma huria ni Kristus di ruar ni lingkungan hajahudion. Disi, marfungsi do ibana songon sipauli ojahan. Jesus Kristus do ojahan i (pat.Jes.28:16; Mat.21:42; Ul.4:11; Eps.2:20; 1 Ptr.2:6) Jadi paulihon ojahan (Alkitab.: meletakkan dasar), mandok pasahathon unsur utama ni hakristenon i, i ma haporseaon di Jesus Kristus i. Manang di dia jala sadihari pe jolma gabe porsea di Jesus Kristus ala ni panangihonna di Barita na Uli i (Rom 10:17), disi nunga marojahan ibana di ojahan na togu jala na sintong i; tarpauliuli songon batu na mangolu di sada bagas partondion na di atas ni batu parsuhi na marpili jala na arga i, i ma Jesus Kristus i (pat.1 Ptr.2:4-10; Jud.1:20). Apala i do na ditontuhon Debata di si Paulus. Ro do ibana tu sada huta jala dijamitahon Barita na Uli i disi, dung i adong ma na porsea jala gabe ojak huria ni Jesus Kristus di inganan i. Ndang dihasomalhon ibana patureture huria i sahat tu na matoras. Holan di Epesus do ibana hea maringan tolu taon (Ul.20:31), di Korint sada satonga taon (Ul.18:11); dungkon ni i sai pintor dipantadinghon do huria na pinungkana i jala laho tu inganan na asing mamungka huria na imbaru. Marhite metode sisongon i, holan sampulu tu sampulusada taon sambing, nunga rarat jala ojak huria ni Kristus i di Asia na Metmet sahat tu Eropa. Di pardalananna na parjolo (46-48 M), diliati ibana do luat Ciprus, Lysia, Psidia, Pampilia dohot Cicilia di Asia na Metmet (Ul.13-14); di na paduahon (49-52 M) ditorushon tu luat Prygia di Asia na Metmet, dung i taripar tu Eropa, tu luat Trace, tu Makedonia, dohot Akaya (Ul.15:39-18:22); jala di na patoluhon (53-57 M) diulahi muse tu angka inganan i (Ul.18:23-21:16) jala ra, ditorushon tu luat Ilirikum (pat.Rm.15:19).

Sahali nari, isara ni na pajongjonghon bagas, di sejarah ni huria i na marfungsi do ibana songon sahalak sipauli ojahan. Halak na asing do anggo na pajongjonghon, lapatanna na manorushon panogunoguon tu huria i asa lam magodang. Huria Epesus rupani dipasahat do tu si Timoteus (pat.1 Tim.1:3), huria Kreta tu si Titus (pat.Tit.1:5), huria Kolosse tu si Epapras (pat.Kol.1:7); na deba tu angka sintua na pinabangkitna tu ulaon i (pat.Ul.14:23; 20:28); ia so i, gabe sahat do i tu apostel manang parbarita na uli na asing. Huria Epesus rupani, di pudian ni ari gabe sahat do tu pangaradotion ni Apostel Johannes. Tutu, nda tung laos dipasombu angka huria i songon i, sintap ni na tarpatupasa diebati do nasida sahalisahali; ia so i ditongos suratna laho marmahani nasida. Taringot tu angka i didok: “Alai ganup ma mamatahon manang beha pangulahonna disi.” Na nidokna disi, manang ise pe na sian asi ni roha ni Debata dipaloas manorushon ulaon di hajojongjong ni huria ingkon ingotonna do paboa na so tarpaulisa ojahan na asing dungkon ni naung ojak i, i ma Jesus Kristus i. Na marlapatan ma i, ingkon di haporseaon di Kristus i do paojahonna ulaonna, i ma Kristus Debata naung gabe jolma jala ro tu tano on, naung mate jala mulak mangolu jala manaek tu surgo. Aha pe na pinatupa ni sasahalak ingkon parungkilhononna do manang na hombar i tu haporseaon di Kristus i. Angkup ni i ingkon matahononna do manang na aha na pinatupana tu hajongjongan ni huria i. Isara ni na pajongjonghon jabu, na boi paulion ni sasahalak do rupani disi pintu mas, janjela perak, dorpi batu, tiang hau, tarup lamlam manang durame. Suman tusi na boi paulion ni sasahalak do di hajojongjong ni huria i pangalaho angka na togu manang na hurang togu, na manahan manang na holan parsatongkinan. Taringot tu saluhutna i ingkon botoon ni ganup pangula do paboa adong do pangujian tu na niulana be. Masa do i di ari sogot, di haroro ni Kristus paduahalihon. Dipatudos do ari i tu api. Songon api na papatarhon bahan na togu dohot na hurang togu, songon i ma paruhuman sogot i papatarhon na niula ni ganup, na manahan dohot na so manahan. Tau singotsingot ma i tu nasa na mangula di huria asa unang mangarimpu molo dung dipatupa jala dipasidung sada ulaon nunga gok jala nunga sae be tanggungjawabna, alai ingkon adopanna dope pangujian.

Di ay.16-17 di bagasan kerangka tudosan bagas i diondolhon do makna rohani ni huria i. Huria i, ndada holan hasadaon na pinajongjong di portibi on bahen parpunguan ni jolma, alai dohot do bahen parmianan manang joro ni Debata. Na maha hadir (omnipresent) do Debata. Songon na omnipresent, na hadir jala mian do Ibana di sandok inganan. Nang pe songon i adong do tempat kehadiran dohot parmiananNa na khusus, i ma huria i; jala na lebih khusus di huria na marpungu di bagasan goarNa di bagas joro manang di inganan na tontu. Marhitehite TondiNa na badia i, mian do Debata di bagasan huria i; marsasahalak manang na marsasapunguan pe. Na badia do joro manang huriaNa i. Ndang ala ni dirina, ala ni halidangon manang haburjuonna, alai ala ni pambahenan ni Debata na pabadiahon do. Marhitehite Barita na Uli na niulahon ni TondiNa na badia i dijou nasida, dipapungu, dipaasing jala dipapulik bahen bangsoNa, parjambaranNa jala hapunjunganNa; dipatiur rohanasida, dipatongtong di bagasan haporseaon, jala disesa dosana ganup ari. Songon na pinarbadiaanNa, di bagasan huria i na tarjou do nasida tu na manghangoluhon parange na badia, i ma pangalaho na hombar tu hataNa, tu patik dohot lomo ni rohaNa. Sapala naung diparbadiai, ndang pasombuon ni Debata agia ise pe manegai jala mangagohon huriaNa i; sai na uhumanNa do i jala agohononNa. Singotsingot ma i tu halak Korint na mangolu di bagasan haronsamon dohot parbolatbolaton, ai ndang hurang i gabe sibonsiri ni hasesega dohot hamamago ni huria i.

Sipahusorhusoron

Minggunta ari on margoar do Minggu dung Taon Baru. Didok roha, ndang so tangkas di hita sude na sinangkap ni goar i, ai patolu ari on dope dung na tabongoti Taon na Imbaru, taon 2010. Di jolonta nuaeng, hembang dope 362 nari ari sidalananta. Manang ise pe sian hita on, ndang hadalanansa i sasadasa, ingkon na di bagasan pardomuan tu na asing do. Konteks keluarga rupani, huta manang luat; konteks masyarakat, bangso, dohot negara; konteks sosial, budaya, ekonomi, politik dohot na asing. Songon parripe ni harajaon ni Debata na di portibi on dope alai na so sian portibi on, ndang sae di hita na mardalan di bagasan konteks angka na ginoaran ondeng, alai ingkon na lumobi do di bagasan konteks parhuriaon. Songon dia ma hita manghangoluhon i?

Na parjolo, tapauliuli ma dirinta di atas ni ojahan na sasada i. Jesus Kristus do ojahan i, batu parsuhi na marpili jala na arga. Pauliulihon diri di atas ni ojahan i, mandok mangolu di bagasan haporseaon, i ma pardomuan dohot parsaoran tu Jesus Kristus i. Gabe ruas na mangolu hita di huria i, na unduk jala mangihut tu Ibana, na mangoloi hataNa jala maniru angka pambahenanNa. Apala i ma na ringkot jumpang di hita di na mandalani taon na imbaru, 2010 on. Naeng porsea hita paboa Ibana do ojahan ni ngolunta, ojahan ni haluaon dohot panghirimanta. Ndang tagamon tarurak manang tarila hita taringot tusi, ai songon na mulakulak tabege di Pesta Natal na salpu i dohot di Minggu na mangihut tusi, Debata do Kristus i naung gabe jolma jala naung ro tu tano on; Anak ni Nasuntimbul na gabe Immanuel; Raja jala Sipalua na pinajongjong di hau na pinarsilang bahen partinggangan dohot parheheon di hajolmaon. Ala ni i, boi jala patut do Ibana haporseaan jala haposan. Porsea jala marojahan tu Ibana, pos ma rohanta horas do hita mamolus taon on.

Na paduahon, taradoti ma angka ulaon na pauliulihon huria i. Siangkup ni na gabe ruas, na tarjou do hita tu ulaon na pauliulihon huria i. Isara ni na pajongjong bagas, na boi do ganup halak na adong pardomuanna tu hajojongjong ni bagas i paulihon manang aha di ginjang ni ojahan naung pineakhon ni pande ojahan. Paulihon pantarna rupani, tiangna, dorpina, raitna, manang tarupna. Na tarpauli sasahalak do i mamangke bahan na adong, isara na togu manang na hurang togu, na manahan diuji api manang na mura gor. Songon i ma di hajojongjong ni huria i, na tarjou do hita ganup laho paulihon manang aha na tau pahothon dohot patoguhon huria i. Taringot tusi ingkon ingotonta do, manang aha pe na tapatupa ingkon na adong do pardomuanna tu ojahan i, i ma haporseaon di Kristus Jesus i. Angkup ni i siparungkilhononta do tongtong manang aha do na tapauli di atas ni ojahan i. Unang so taboto, adong do pangujian tu ulaon i. Pangujian i do na papatarhon na niula ni ganup, na manahan manang na so manahan. Tau singotsingot ma i tu hita sude asa unang mangarimpu molo dung tapasidung sadasada ulaon nunga sae be tanggungjawabta, jala asa unang sonang rohanta holan na mangaradoti angka na mardomu tu pernak-pernik ni ngolu parhuriaon i, alai siluluanta do na paulihon angka pangalaho na togu jala manahan.

Na patoluhon, tapadao ma nasa pangalaho na tau manegai huria i. Di tingki ni si Paulus, jala i do na gabe sibonsiri ni surat 1 Korint on, na masa do dua pangalaho na roa di huria Korint, i ma parmainanon dohot parbolatbolaton. Na dua pangalaho i ndang hurang be i gabe panegai na tuk mangagohon huria i. Tau singotsingot ma i nang tu hita asa unang marsombusombu di angka dosa na tuk manegai dohot mamuntari huria i. Ditanda halak do hurianta na mura marbada. Ragam do alana. Ia so ala ni hepeng ma i, ala ni mutasi, ala ni periode, manang ala ni na asing. Na badia do huria i, ai naung dijou jala dipapulik Debata do i bahen jambarNa, joroNa jala parmiananNa. Manang ise pe na manegai huria i parsala do i tu Debata. Sai na uhumanNa do i, agohononNa. Ala ni i taradoti ma asa tarpalua hita sian cap na hurang denggan i. Taeahi ma na tau padamehon jala pauliulihon hita sama hita (Rm.14:19)

jkt.31.12.09/mvs

Read More..