3.22.2011

Okuli

SERMON JAMITA TU MINGGU OKULI, 27 MARET 2011
Mrk.12:41-44


Patujolo

Di jolo ni on dipaboa na dibongoti Jesus do huta Jerusalem. Diudurhon jala dijangkon natorop do Ibana songon sahalak raja (11:11 duu). Disi nunga diida Ibana sude harohaon, parugamoon dohot sintasinta ni bangso i. Ndang sintong nasida. Maradophon i dipapatar do sikapNa di bagasan tindakanNa na paiashon joro i (11:15 duu). Di tonga ni bangso na mementingkan parugamoon parduru sisongon i, adong dope na tutu manghangoluhon hadaulaton na sintong, songon parompuan na martaringot di turpuk on.

Hatorangan

Hundul Jesus tondonghon ni poti parasian (peti persembahan) na di lambung ni bilut parpeopan arta (kamar perbendaharaan) di emper ni boruboru (pelataran wanita) ni joro i. Adong do disi sampulu tolu poti parasian. Rumangna, suman tu sarune (terompet) na tarbalik. Ala ni i, laos digoar do poti i sarune. Ganup sarune i diparade do tu sangkap na paasingasing. Na sada on rupani tu hamauliateon, na sada an tu asiasi, na sada nari tu haporluan ni bagasa joro, na sada nari muse tu bagabaga (nazar) dohot angka na asing. Tu dia pe halak mandabuhon silehonlehonna, jala aha pe taho goar ni i didok, sada do anggo goar pangibulan dohot tujuanna, pelean do i tu Debata. Ndang na hundul boti Jesus disi, isara ni na maradian, alai na pamanathon halak angka na mandabuhon peleanna do tu poti i. Ndang tabu hepeng di Ibana, ndang na so ringkot, alai ringkot do jala na patut parrohahononNa. Diida do torop na mora na mandabuhon hepengna tu poti i, jala hombar tu hamoraonna be, godanggodang do didabuhon.

Alai diida ma sada boruboru na mabalu, na pogos; didabuhon ma dua rimis, i ma sasen. Toru do hajongjongan ni boruboru na mabalu di halak Israel. Hira so adong do uhum na mangondingi, gabe so tarbahensa mampartahanhon hakna. Jotjot do nasida gabe korban ni penindasan, gabe toropan do nasida na pogos, na so tarbahen mangalehon na godang. Songon i ma na mabalu na martaringot dison, sian pogosna didabuhon do dua rimis, i ma sasen. (Terjemahan on, dipahombar do tu hepeng na tinanda ni Batak tingki ni Bolanda. Rimis do hepeng na ummetmet, argana ½ sen). Di hata Gorik didok, lepton (sing.), lepta (plr.), i ma hepeng na ummetmet di Israel. Marrumang coin, na dipature sian tombaga. Na dua rimis i dos dohot sada kodrantees (quadrans), i ma hepeng Rom na ummetmet. Salepton, argana 1/16 quadrans. Nunga maol patudoshon nilai ni quadrans i tu hepeng nuaeng. Alai di King James Version, diterjemahkan do i dohot farthing; jala di Today’s English Version, penni. Jadi bolas ma dohonon, salepton hira dos tu 1/16 penni [tar hira ½ benggol/gobang (sabenggol = 2,5 sen)]. Nunga marlapatan situtu na dua lepta i nian di parompuan i. [Dua lepta (+ sabenggol) nunga hira sae i panganon ni sahalak na pogos sadari]. Alai barani do ibana mangalehon i. Manang na aha sangkapna ndang binoto. Alai ra, adong bagabagana (nazarnya) tu Debata na ingkon gararonna.

Nunga nidok, ndang na hundul boti Jesus disi, alai diparrohahon do sude na mandabuhon dohot silehonlehon na nidabuhonna be tu poti i. Dung diida, ditimbangi do sasude. Sian saluhut na mangalehon dohot silehonlehon i, dipasurung Jesus do parompuan na mabalu i dohot silehonlehonna i, ai dijou ma angka siseanNa jala didok ma tu nasida, “Situtu do hatangKon tu hamu, gumodang do na nidabuhon ni na mabalu, na pogos an tu bagasan poti parasian i, asa saluhut angka na mandabuhon i.” Ndang basa-basi i (isara na pabalga roha ni parompuan i tung sura dibege), alai sian sintongna do. Paboa sintong i, pola do hira na manolon Ibana, didok, “Ameen, legoo humin” (Verily I say unto you). Amen, hata tolon do i di Israel. Ndang gumodang sian na nilehon ni sahalak na mora, alai gumodang sian sude. Manang piga pe na mora na mangalehon silehonlehonna di ari i, jala sadia pe punguan ni na nidabuhonnasida sasude, gumodang sian i ma. Tontu, ndang gumodang secara numerical manang nilai nominal. Manang na boha pe, mangihuthon paretongan tung so boi do gumodang sasen sian na nilehon ni sahalak na mora, lumobi sian sasude. Jadi, hagodangonna i dibereng Jesus do i sian panatapan na asing.

Taringot tusi dipatorang Ibana do i di ayat na parpudi, didok, “Ai sian lobilobinasida do didabuhon be; alai ia parompuan an, sian pogosna do didabuhon saluhutna na di ibana, tung sandok hangoluanna i.” Ndang na mandok ebaeba (alai ra, boi do dohot i), na di ruar ni haporluanna be laho mangudut hangoluanna ariari do. Sandok tuk do di nasida, nang dilehon na sai godang, ndang pola ganggu dope nasida laho mulak tu hutana, adong dope sitilihonna. Anggo parompuan i nunga didabuhon sude na aturan hangoluanna sadarina i. Mulak sian i, ingkon jolo mangula manang mansari nama ibana asa mangan. Ala ‘sadari on’ do jolma mangolu (ndang nantoari jala ndang marsogot), niantusan do molo didok Jesus naung didabuhon ibana sandok hangoluanna. Tontu di bagasan haporseaon dohot panghirimon do ibana mandabuhon i. Pos do rohana nang pe dilehon i ndang gabe mate so mangan ibana, alai patuhon ni Debata do nasa na ringkot di ibana asa mangolu ibana. Ala ni i ma asa dirajumi Jesus na gumodang na nilehonna i. Angkup ni i, na laos kritik ni Jesus do on tu parugamoon ni halak Jahudi tingki i. Nunga diida na marugamo di jolo ni jolma do nasida, diulahon do hatigoranna bahen sitotonduran ni na asing asa dipuji nasida (pat.Mat.6:1 duu). Rupani, jonok tu poti i, tar songon na manjalo angka na ro i, jongjong do malim. Somal do angka na mora i paboahon manang na sadia na nilehonna i. Huhut didabuhon tu poti i, digorahon do talhis sadia godang na nilehonna i. Ndang holan malim i umbege i, dohot do angka na asing na tongon di inganan i. Memang, tung apala i do sangkapna, maningtinghon tu sasude angka na tardungdung soarana, asa dipuji nasida.

Rancangan Homiletis

Na manjalo dohot na mangalehon, pangalaho na so tarsirang do i sian ngolu ni halak Kristen. Na manjalo do jolma i sian Debata. Holan ala ni i do umbahen na mangolu ibana. Di bagasan ni i, diigil Debata do asa barani jolma i mangalehon tu Ibana. Aha do lapatan ni na mangalehon dohot silehonlehon i, jala boha do rumang ni pangalehonna? Apala i ma na naeng pamanatonta sian turpuk jamita on. Taringot tusi, adong ma dua na naeng dohonon.

Na parjolo, pelean do i tu Debata. Di turpuk na tabege nangkin dipaboa do, di tonga ni ariariNa angka na parpudi, disangahon Tuhanta Jesus do hundul donok tu poti parasian na di bagas joro ni Debata na di huta Jerusalem. Ndang na pasudasuda tingki Ibana disi, alai na pamanathon halak angka na mangalehon silehonlehonna tu bagas joro i do. Manang na ise pe na ro i, na mora manang na pogos, saluhutna do dipamanat. Dipamanat do nang silehonlehonna be, na godang manang na otik, ndang adong na so dialathon. Di harajaon ni Debata naung songgop di bagasan Ibana, hepeng ndang mammon na geduk, alai arta partondion do; jala bilut parpeopan ni arta i ndang inganan na haram alai na halal do laho bongotanNa. Ala ni i di turpuk on, di na naeng paujunghon ulaon hamalimon dohot hamesiasonNa Ibana di hasiangan on, dipamanat do silehonlehon ni angka na ro i. Ndang songon hepeng sambing, alai songon pelean do; i ma sada sian ruhut ni parugamoon ni Israel angka na niaturhon ni Debata.

Di hurianta, jumpang do tong ruhut pelean dohot pameleon i. Ragam do goarna, isara pelean minggu, pelean bulanan, pelean pembangunan, hamauliateon, tumpak, janji iman, dohot na angka asing. Aha pe goarna, sada do anggo pangibulanna: Pelean. Ndang na mangalehon tu jolma hita disi, tu Debata do. Alai boasa mamele hita tu Debata? Alusna, ala naung manjalo do hita sian Ibana. Tajalo do sian Ibana hangoluan partondion, isara ni Barita na Uli, hasesaan ni dosa dohot haluaon sian hamagoan; tajalo do nang hangoluan pardagingon, isara ni sipanganon, parabiton, perumahan dohot angka na asing. Taringot tu na parpudi on, ndang dos na jinalo ni hita ganup, marsisurungi do. Adong na manjalo godang, i ma angka na mora; adong na manjalo otik, i ma angka na pogos. Alai manang na boha pe i, naung manjalo do hita luhut, jala ala ni i ingkon pasahatonta do peleanta tu Ibana. Ndang ala na hurangan Ibana, ai Ibana do nampuna saluhut. Aha pe na tapelehon, na sian Ibana do i.

Ala pelean do i, ndang siunsaton. Mardomu tusi, ringkot do antusanta, tolu mansam do pelean parjolo jala na utama di Israel, i ma pelean situtungon, pelean hamauliateon dohot pelean pardengganan. Tolunsa i pelean na marmudar do, na tardiri sian lombu, hambing, birubiru, anduhur manang darapati. Manang na dia pe sian i na dipelehon, ingkon diseat do i jala ditutung. Molo pelean situtungon, ditutung sude; alai anggo pelean hamauliateon dohot pardengganan ditutung sabagian, dipangan na sabagian nari. Ala ni i, molo dung dipelehon ndang boi be unsaton, ai so tarpangolu be naung diseat jala ditutung manang dipangan i asa boi milikan muse jala pangkeon tu na asing. Sian i torang, na mamelehon pelean marlapatan do i pasahathon hak pemilikan tu Debata. Pangantusion i do na naeng tadungdung marhite hata ni Ende No.204:2 na sai taendehon ganup pasahathon pelean na mandok, “Hupasahat i tu Ho, na so unsatonhu do.”

Nuaeng, tapamanat ma boha do tondi pameleonta? Ra, ndang masalpuhu ia nidok, nunga lam moru di toropan hita tondi na girgir mangalehon. HKBP do na umbalga di Indonesia on, alai di parhepengon tardok gale do. Angka ulaon di huria ndang sai tabereng i songon tanggungjawab bersama na mangigil haoloonta pasahathon peleanta tu Debata. Mamereng do hita jotjot tu na mora, tahirim asa gumodang nasida mangalehon, anggo hita ndang pola. Molo macet ulaon huria, isara pembangunan, tasalahon do angka na mora na hurang mangalehon, anggo hita ndang pola sisolsolan. Tanggungjawab pardosdosan, isara pelean bulanan manang pembangunan tarmasuk na ummaol do i hirimon ro di hurianta. Gari na mangalehon sian hamoraonna nunga lam rangkak, lam na sian hapogosonna ma. Boasa? Ndang adong na tardok lobi sian naung lam surut tondi pameleon i disosak dosa hurang mauliate. Taboto ma, diida jala dipamanat Tuhanta do tondi pameleonta. Sai unang ma gabe tarhirim Ibana tabahen taringot tusi.

Na paduahon, sipasahaton do i sian sandok ngolu. Ndang holan diida, alai ditimbangi Tuhanta do ganup na mangalehon i, laos songon i dohot na nilehonna i. PanimbangionNa i ndang ojakhon i tu godang manang tu otikna; ndang olat ni sikap lahiriahna, alai sahat do tu latar belakang ni harohaonna. Mamelehon pelean tu Debata ndang soal menghitung dan menjumlahkan angka-angka, alai soal roha manang ngolu do. Mangalehon di jolo ni jolma asa diida, asa dibege jala asa dipuji ndang sintong. Mangalehon sian na lobi so nionjar ni roha na mauliate, i pe ndang dihalomohon. Holan na mangalehon sian sandok roha dohot hangoluanna do na dipasurung. Hombar tusi diargai Tuhan Jesus do na sasen na nilehon ni na mabalu i lobi sian na nilehon ni sude na mora angka na godang i.

Nuaeng tapamanat ma, boha do hita mangalehon? Adong be do talehon, ai sude do hita hea manang tongtong marminggu manang mandohoti partangiangan. Disi, talehon be do peleanta. Asing ni i, talehon dope hamauliateon, sumbangan, gugu, pelean bulanan, dohot na asing. Naeng do tangkas antusanta, ndang sintong dope hita holan ala ni naung mangalehon. Anggo di huria i, ra, nunga dirajumi be hita sigohi tanggungjawab; alai di adopan ni Debata ndang sada kepastian dope i, ai sitimbangan dope harohaonta. Ndang tarsoadahon, jotjot do huria madabu tu na mangarimpu na soal angka manang nomor do pelean i. Ala ni i diparsoalhon halak do jotjot, sadia godang do silehonon? Nunga sae songon na tinontuhon ni huria? Manang ingkon parpuluan (tithe=1/10) do? Molo i do, 1/10 sian dia; sian arta manang sian pangomoan do, sian devisa pasif manang devisa aktif? Tuhanta dison ndang mamparsoalhon angka manang nilai nominal. Hepeng sasen selaku hepeng sambing, ndang arga di Ibana; alai hepeng sajuta pe selaku matauang sambing, tong do ndang marlapatan. Ukuran rohani do diparsuhathon, jala roha dohot ngolu do panuluhanna. Ala ni i, molo mangalehon hita naeng ma na sian nasa roha manang na sian sandok hangoluanta.

Nang pe songon i, ringkot do ondolhonon, adong do pardomuan ni na mangalehon pelean tu haadongon ni ganup halak. Ndang dipangido Debata asa dos sian na mora dohot sian na pogos. Marsisurungi do di na manjalo, laos hombar tusi marsisurungi ma nang di na mangalehon. Mangalehon sian sandok roha dohot ngolu, na boi lapathonon do i huhut: Mangalehon sian sinadonganna be. Manang na boha pe tung na so sintong do i molo sai marguru hita tu partoru manang tu na umotik. Angkup ni i ringkot do ingotonta, ndang disoadahon Tuhanta Jesus dison pelean ni na mora; ndang didok na so marguna na pinelehonnasida i, ndang. On do tahe, gumodang do na nilehon ni ina na mabalu na pogos i. Molo angka na mora mangalehon godang sian hamoraonna, sian na di ruar ni anggaran na diharingkothon laho mangudut hangoluanna ariari, denggan do i asal sian nasa rohana. Na mangalehon songon i naeng porsea jala mangauhon situtu paboa nasida ndang lobi sian na mangulahon jala mangalehon na patut hirimon dohot pangidoon sian nasida. Na mangalehon tanpa rasa dan tanpa emosi ndang marguna. Suang songon i na mangalehon holan laho manggohi aturan ni na marhuria dohot adat ni na marminggu manang na mangalehon sian lobilobi na so marguna be (ai nang dipangke so ro di dia, dilehon pe so gabe mahua) marisuang do. Sude do hita boi madabu tu dosa na songon i. Ringkot do ingotonta, so tung mamurahu hita curiga tu pelean ni na mora, sedang pelean ni na pogos taargai berlebihan. Manang na boha pe dipatuk pelean ni na mora do angka na godang i do sidabuan ni huria.

Sahali nari, boha do hita mangalehon? Tuhanta mandok, ingkon sian nasa ngolu. Ndang dipangido Ibana sian hita na so hea nilehonNa, jala ndang disuru hita mangalehon asa gabe rapar hita jala hurangan. Ala ni i, di na mangalehon i naeng porsea situtu hita paboa: “Marhuaso do Debata mangusehon saluhut asiasi tu hamu, asa sandok tuk situtu di hamu jala marlobilobi hamu, laho patupahon saluhut ulaon na denggan.” (2 Kor.9:8) Disi ma gok na jinouhon ni goar ni minggunta ari on, Okuli na mandok, “Sai dompakhon ma ahu, jala asi rohaM di ahu, ai punjung jala na dangol do ahu. Ho do ale Jahowa dihalungunhon rohangku. Ale Debatangku, marhaposan tu Ho do ahu, unang tung paila ahu.”

jkt.22/03.2011/mvs

Read More..

Invocavit

SERMON JAMITA MINGGU INVOCAVIT, 13 MARET 2011
1 Mus.3:8-19


Patujolo

Bibel, jamita haluaon (sejarah keselamatan) do i. Ringkot haluaon i, ai mardosa do jolma i. Aut so mardosa jolma, ndang ringkot jamita haluaon i; ndang laho adong Bibel, Padan na Robi dohot Padan na Imbaru. Apala sopot di bona ni Bibel i, di 1 Mus.3 dipaboa do manang songon dia hadadabu ni jolma i tu dosa, jala laos disi do dipungka jamita haluaon i. Andorang so i, disurathon do sada patujolo, i ma panindangion taringot tu hajajadi ni langit dohot tano dohot laut dohot nasa isina. Mansai denggan do saluhut na tinompa i dijadihon Debata, mansai denggan do dohot jolma i. Alai dung songgop dosa i pintor songgop ma tu jolma i ragam ni hasonggoton dohot hasusaan. Di ay.7 rupani dipaboa, dung dilaosi si Adam dohot si Hawa patik i, dipangan sian parbue ni hau parbinotoan na denggan dohot na roa i, pintor tonggor do matanasida jala diboto paboa na marsaemara do nasida. Alai parbinotoan na paponjot hosa do i, ai gabe maila do nasida sama nasida. Na marlapatan ma i, dosa i sandiri nunga gabe uhum tu nasida. Tuani ma ndang laos dipasombu Debata nasida, alai didapothon do jala diantoi. Diuhumi do nasida tutu, alai nda tung laos diagohon; diparjanjii gariada songon na martaringot di turpuk jamita on.

Hatorangan

Digombarhon Bibel i do jotjot, angka pangalaho na marhahonaan tu jolma marhahonaan do dohot tu Debata. Molo jolma rupani ringkot makan angin di angka ombas na tontu, Debata pe ringkot do songon i. Pingkiran i, digoar ma i anthropomorpisme. Songon i ma digombarhon dison, na medangedang do Debata di porlak Eden i di haroro ni alogo mareak botari. Songon parhuaso na paojakhon jolma i gabe pangarajai di tano on, patut do Ibana nian jangkonon ni si Adam dohot si Hawa. Manang na resmi Ibana ro manang na so resmi, patut do Ibana sambuton ni jolma. Alai ala naung mardosa jolma i, ndang barani be nasida pajumpang dohot Tuhan i, mabiar do nasida tahe. Ila (ay.7) dohot biar, na tubu do i songon akibat langsung ni dosa i sandiri. Ndang dope manguhum Debata, anggo jolma i nunga ‘hona uhum’ di bagasan dohot ala ni dosa i sandiri, ai gabe maila jala mabiar do nasida. Ila, i ma tanda ni hasesega ni pardomuan ni jolma tu donganna jolma; jala biar tanda ni hasesega ni parsaoranna tu Debata. Haroro ni Tuhan i tingki na uli ma i nian di manisia i laho pajumpang jala mardenggan dohot Ibana. Alai ndang jumpang be parbinotoan sisongon i di jolma i. Ala ni biarna, martabuni nama nasida. Songon i ma jolma na mardosa i sai mangalului partabunian.

Diboto Debata do naung mardosa jolma i, diboto do na mabiar jala di dia nasida na dua martabuni. Nang pe songon i, joujou do Ibana mandok, “Di dia do ho?” Sungkunsungkun na mangungkap kesempatan do i di jolma i laho pajumpang dohot Ibana dohot laho marhatopothon dosana. Alai i pe ndang jumpang be di jolma i, ai didok do, “Hubege nian soaraM di porlak i, gabe mabiar ahu, ai marsaemara do ahu umbahen na martabuni ahu.” Pamintorion di diri do i, sai hira na mandok, “Ndang na so olo ahu ro, alai na so adong do paheanhu na patut laho manjangkon Ho.” So disadari, marhite i nunga disalahon jolma i Debata na so paradehon di nasida abit na patut laho pajumpang dohot Ibana. Nda Tuhan i do mambahen nasida marsaemara? Hira na naeng dohononna do, “SalaM do on Tuhan, ndang marabit ahu dibahen Ho, gabe so barani ro mandapothon Ho.” Songon i ma jolma na mardosa i, maoto, ndang diboto dalan malua jala ndang rade marhatopothon dosana.

Dung i ninna Debata ma, “Ise na paboahon tu ho na marsaemara i ho? Nda tung dipangan ho sian hau na Hupatikhon i mangorai panganonmu?” Diboto Panompa i do nian naung dipangan nasida do tutu sian parbue ni hau parbinotoan na denggan dohot na roa i. Ia disungkun pe i dison, suman tu na di jolo i, na mangungkap kesempatan do di nasida laho manopoti dosana. Di sada sisi, diokui si Adam do naung dipangan do tutu sian parbue ni hau i, alai sandok dao do i sian tondi ni panopotion, ai pintor dipabali do hasalaan i tu si Hawa, didok, “Boruboru na nilehonMu bahen donganhu, i do mangalehon tu ahu sian hau i gabe hupangan.” Di na dijadihon Debata si Hawa jala ditogu ibana tu si Adam didok ibana do, “On do sahali holiholi sian angka holiholingku, jala sibuk sian sibukhu; goaron ma ibana: Jolma ni baoa, ala sian baoa ibana binuat.” (1 Mus.2:23). Sada pangokuan na mengesankan do i paboa na sada do ibana dohot pardihutana i. Alai dison, ala naung disegai dosa i hasadaonnasida, ndang olo be si Adam marpangalaho hombar tu hasadaon i, ndang olo ibana memikul tanggungjawab taringot tu hasalaan ni pardihutana naung gabe hasalaanna, alai dipatuhukhon do saluhutna i tu si boruboru i. So mamoto rohana, sasintongna nunga dipabali ibana hasalaan i tu Debata. “Boruboru na nilehonMi,” ninna. Marhite i sai hira na naeng dohononna do, “Boasa lehononMu boruboru na songon i gale bahen donganhu?”

Sahali nari diungkap Debata kesempatan di nasida laho mananda dohot marhatopothon dosana, ai didok ma tu si Hawa, “Boasa songon i bahenonmu?” Alai songon si Adam i, si Hawa pe ndang be umboto dalan malua, ai dipabali do luhut hasalaan i tu ulok i, didok, “Ulok i do paotooto ahu, gabe hupangan.” So dianto rohana, dison pe dipabali ibana do hasalaan i tu Debata, ai marhite i sai hira na naeng dohononna do, “Boasa paloasonMu ulok i di lambunghu?”

Nunga marujung be pamaresoan i, nunga tardapot jolma i na so satia, na memberontak tu Debata jala na so umboto dalan mulak. Jumpang ma tingkina mandabu uhum, parjolo ma tu ulok i. Ndang pola adong pamaresoan anggo ulok i, ai sibunu jolma do ibana sian mulana i, ndang tindang ibana di hasintongan, ai ndang adong hasintongan di bagasan rohana; jumpa dihatahon gabus, na di dirina hian ma dihatahon disi, ai pargapgap do ibana jala ama ni gapgap (Joh.8:44). Gumodang ma torutoru tu ulok i sian tu nasa na manggulmit di ladang, butuhana nama jururhononna jala orbuk nama panganonna. Di pangantusion ni panurat ni Bibel i marpat hian do ulok. Ndang pandapot na ‘maotohu’ i, ai mangihuthon ilmu hayat moderen, ulok (Ophidia) tarrajum do i tu kelas Reptilia. Na berevolusi do suku Ophidia i gabe so marpat. Dung i, orbuk nama panganonna. Dirajumi halak Israel do na sipangan orbuk do ulok, ai sai hure do dilana songon na mandilatdilat. Harsang do tano di Palestina, godang orbukna marhabangan. Ala sai hure dilana gabe dirajumi halak ma na mandilati orbuk na marhabangan i do ulok i disi (pat.5 Mus.32:24; Jes.65:25; Mik.7:17). Dung i, adong ma muse parbadaan ni ulok i dohot boruboru i, ro pinomparna tu pinompar ni boruboru i; rosakhonon ni pinompar ni boruboru i ma ulu ni ulok i, jala parguton ni ulok i ma tambihulna. Dirajumi angka ama ni huria isara Martin Luther do on songon bagabaga tu haroro ni Kristus. Rosakhonon ni Kristus i ma ulu ni ulok i, alai di na mangarosakhon i hona pargut do Ibana jala mate. Hombar tusi, digoari na deba do ayat on proto evangelium.

Uhum tu si Hawa, didok, “Ganda situtu bahenonHu parniahapanmu saleleng gabegabean ho; bernit taononmu laho manubuhon anakhonmu, sinondukmu nama ihutanmu, jala ibana mangarajai ho.” Na gabegabean dohot na manubuhon, apala i do sada sian harkat manang hamuliaon ni boruboru. Alai apala disi ingkon aeon ni boruboru i do parniahapan dohot haberniton, mansai talpe ibana tu hamatean. Angkup ni i, ingkon tunduk boruboru i tu sinondukna. Na dijadihon Debata do parompuan i pangurupi bahen dongan ni baoa. Penolong yang sepadan. Alai ala ni dosa i, ingkon gabe sirajaan nama ibana.

Songon Hawa i, si Adam pe hona uhum do di pusat ni hangoluanna. Na mangula ulaon, apala i do harkat ni baoa (pat.1 Mus.2:15). Alai tung apala disi ma ibana mangae uhum ala dosa i, ai hona toru ma tano i ala ibana. Ndang jolma i na hona toru, tano i do. Alai hatotoru ni tano i ndang hurang i mamboan uhum dohot haberniton tu jolma i, ai porsuk ma ahaponna manganhon gogona saleleng mangolu. Pantubuhonon ni tano na hona toru i ma duriduri dohot duhutduhut na marsuga, na mambahen lam tu maolna na mangula tano i. Ingkon hir nama hodokna mangalului sipanganonna, jala ingkon mate ibana, ingkon mulak muse gabe tano pambuatanna hian.

Rancangan Homiletis

Didok barita, di na mardalani tu sada kota, masuk do sada halak tu toko berlian. Manang na boha ma i, diida ibana ma peak sada golang na uli jala na arga di ginjang ni etalase na di toko i. Tongon laho do nampuna toko i tu pudi, gabe ndang adong na manjaga boniagana i. Pintor dijomputhon ibana ma berlian i laos disangkuhon. Ruar ma ibana sian toko i laos mardalan mandao sian i. Alai di na mardalan i, sai bukbak do taroktokna jala bohabohaon so nda tung adong do na marnida gabe ditangkup ibana maon. Dung i, diida ibana ma sahalak polisi na marjaga di ujung ni dalan i, gabe ninna rohana ma, “Bah, nunga tarboto huroha na manangko i ahu, na mangambat ahu do i ra.” Pintor humusor ma ibana, masuk tu sada sirpang, jala mardalan humarojor huhut sai berengbereng. Ditatap ibana ma muse sada polisi na marjaga di ujung ni dalan i, gabe ninna rohana ma, “Tutu do, nunga tarboto na manangko i ahu, nunga sude sirpang dijaga polisi.” Humusor ma ibana muse, jala masuk tu sirpang na asing. Lam mabiar ma ibana jala lam so taratur pangalangkana. Ditatap ibana ma muse sada polisi na asing na marjaga di ujung ni dalan i. Marnida i, ndang tartaonsa be biarna, humusor ma ibana jala maringkati; ndang diboto be samban, ditombomi ibana ma angka pardalan, dialjahi nasa na ambat isara tigatiga ni halak dohot angka parit na di topi ni dalan i. Marhida i, muningan ma roha ni polisi i, “Na boha do ulaning bayo an?” ninna rohana. Dilelei ma ibana jala ditangkup. Dung dipareso, tarpaksa ma ibana mangoku, gabe diboan ibana tu paruhuman, diuhumi, dung i dihurunghon. Sasintongna nian, ndang adong na umboto na masa i, panangkoonna i do na manginona jala manginsombut tu ibana.

Songon i do pengalaman ni si Adam dohot si Hawa, ompunta na parjolo i. Di jolo ni turpuk ari on dipaboa do naung mardosa nasida, ai dipangan nasida do sian parbue ni hau parbinotoan ni na denggan dohot na roa na tubu di parsitongaan ni porlak Eden i, na nioraan ni Tuhan i panganon nasida. Jalo dung madabu nasida tu dosa i, pintor hapusohan do nasida jala humasusa. Ndang dope manguhum nian Debata, alai nasida nunga pintor manaon jala ngalutan, ai, “Tonggor ma matanasida na dua, diboto ma na marsaemara nasida.” Di sada sisi, na marlapatan do i, tamba do na binotonasida, tamba malona, tamba dohot pistarna. Alai ndang gabe marlas ni roha nasida ala ni i, ndang gabe sonang manang gabe merasa puas. Sabalikna do tahe, gabe hapusohan do nasida, ai gabe maila do nasida sama nasida. Ila, i ma tanda ni hasesega ni pardomuan dohot parsaoran ni jolma maradophon donganna jolma. Songon i ma pardomuan dohot parsaoran ni si Adam dohot si Hawa i sega ala ni dosa i. Di na tartompa si Hawa jala ditogu Debata ibana tu si Adam, didok ibana do, “On do sahali holiholi sian angka holiholingku, jala sibuk sian sibukhu; goaron ma ibana Jolma ni baoa, ai sian baoa ibana binuat.” Pengakuan na sangat mengesankan do i taringot tu hasadaonnasida. Alai dung songgop dosa i, ndang olo be si Adam bersikap hombar tu hasadaonnasida i, ai dipabali do sude hasalaan i tu si Hawa. Angkup ni i, sega do pardomuan dohot parsaorannasida tu Debata, ai gabe mabiar jala martabuni do nasida maradophon Tuhan i. Denggan hian do pardomuan dohot parsaorannasida tu Debata. Kehadiran ni Debata gabe las ni roha dohot hasonangan do i di nasida. Alai dung songgop dosa i, gabe hasonggoton nama i dohot hatahuton.

Songon i ma jolma na mardosa i marhinamago ala ni panginona ni dosa i sandiri. Na tean do hamagoan i tu hita ala dohot hita mardosa. Anggo idaon sambolus mansai tabo do na mardosa jala tonggi do dosa i. Alai sasintongna mansai paet do na mardosa jala jorbut situtu do dosa i. Olo, mansai na jorbut do, ai na marhuaso do i manegai ngolu ni jolma, marhuaso mangagohon hasonangan dohot hatuaonna. Naung gabe uhum do i tahe di angka na ma-ngulahonsa, na mambahen so sonang jala mabiar. Na songon kanker do i na menggerogoti jolma, gabe masa songon nidok ni Parpsalmen 32 i, reung holiholina di bagasan. Disegai dosa i do kesadaran ni jolma taringot tu na denggan dohot na roa, gabe so diboto dalan muba dohot mulak tu Debata. Songon i do hita sega jala hona uhum di bagasan dosa i, ndang adong sihirimon dohot dalan laho malua. Antong boha nama?

Mulak tu barita ni si Adam dohot si Hawa, ompunta na parjolo i, tuani ma ndang laos dipasombu Debata nasida songon i, alai ditopot do, dijou, jala dipanghulingi. Diuhumi do nasida tutu, alai nda tung laos diagohon. Songon na tabege nangkin, diuhumi do parompuan i di pusat ni hangoluanna. Na gabegabean dohot na mangintubu, apala i do harkat ni manang hamuliaon ni parompuan. (Apala on do nuaeng na godang dilupahon halak di Barat, ai ndang apala ringkot be roha ni torop parompuan gabegabean dohot mangintubu. Kawin ya kawin, hamil dan beranak, jangan. Pengingkaran tu hakekat dohot harkat ni hadirionna do i). Alai apala di hakekat dohot harkat ni hadiriona i do ingkon aeon ni boruboru do parniahapan dohot haporsuhon, mansai talpe ibana tu hamatean. Dung i, ingkon tun-duk ibana tu sinondukna. Di mulana, dijadihon Debata do boruboru i gabe pangurupi bahen dongan ni baoa, gabe penolong yang sepadan. Alai ala ni dosa i, gabe sirajaan nama parompuan i na ingkon tunduk tu sinondukna. Si Adam pe, hona uhum do di pusat ni hangoluanna. Na ma-ngula ulaon, apala i do harkat dohot hamuliaon ni baoa. Di na tartompa si Adam, dipaian Debata do Ibana di porlak Eden, ndang asa modommodom, alai asa dijaga do jala dipaulaula porlak i. (On do na godang dilupahon halak hita lumobi di bona pasogit na lomoan rohana hundulhundul di lapo sian na mangula ulaon di huta manang di balian. Kodrat ni baoa do na mangula. Na lupa disi na mengingkari hakekat dohot harkat ni hadirionna do i). Alai tung apala disi ma jolma i ingkon mangae uhum ala dosa i, ai hona toru ma tano i ala ibana. Ndang jolma i na hona toru, tano i do. Alai hatotoru ni tano i ndang hurang i mamboan uhum dohot haberniton tu jolma i, ai porsuk ma ahaponna manganhon gogona saleleng mangolu. Pantubuhonon ni tano na hona toru i ma duriduri dohot duhutduhut na marsuga, na mambahen lam tu maolna na mangula tano i. Ingkon loja jala hir nama hodok ni jolma i mangalului sipanganonna; dung i di ujungna, ingkon mate, mulak muse gabe tano pambuatanna hian.

Sahali nari, uhum ni Debata nda tung na laho mangagohon jolma i ro di saleleng ni lelengna. Halilu ni holong ni rohaNa do i tahe. Taringot tusi didok buku Poda ni Raja Salomo do, “Ai matua dipinsang Jahowa do na hinaholonganNa, songon amaama mida anakna hasudungan ni rohana.” (Poda 3:12). I do muse na niondolhon ni surat Heber na mandok, “Ai diajar Tuhan i do na hinaholongan ni rohaNa, jala dilinsingi do ganup anak na jinangkonNa.” (Heb.12:6). Ia dung jumpang tingkina, paluaonNa do nasida. Taringot tusi nunga tersimpul i di hata ni uhum na tu ulok i na mandok, “Jala bahenonHu ma parbadaanmu dohot boruboru i, ro di pinomparmu tu Pinomparna. Ibana mangalisathon ulum, gabe pargutonmu tambihulNa.” Tudutudu do i tu haroro ni Tuhanta Jesus Kristus i. Na dipillit jala ditontuhon Debata do Kristus i gabe Sipalua jolma maniisia. Tu sangkap i, ingkon taluhononNa do jolo sibolis ulok na robi i, ingkon rosakhononNa uluna. Alai di na mangarosakhon i hona pargut do tambihulNa, jala mate Ibana. Marhite Jesus Kristus i, gabe adong ma panghirimon dohot masa depan di jolma na mardosa i.

Apala i do na hinatindanghon ni goar ni minggunta ari on, Invocavit, na mandok, “Jouonna ma Ahu, jadi alusanHu ma ibana.” Na marpambuatan do goar i sian hata ni Ps.91:15, na mandok, “Jouonna ma Ahu, jala alusanHu ma ibana; sai dongananHu do ibana jumpa hagogotan, paluaonHu do ibana, jala marmulia ibana bahenonHu.” Padan ni Debata do i na marbagahon alus dohot pandonganionNa di angka halak angka na joujou tu Ibana di bagasan parungkilonna. Padan na hot do i na sai boi hirimon di angka na porsea, tarmasuk di hita angka na mangolu di tingki on dohot di inganan on. Mangihuthon parsagi ni tingki di sada taon parhuriaon, na tarrajum do Minggu Invocavit tu Parningotan di Ariari Panaonon ni Tuhanta Jesus Kristus. Tangkasna, marhite Minggu Invocavit, nunga bongot hita tu mingguminggu Passion di taon on. Marhite Jesus Kristus naung ro i, na manaon jala na mate dung i hehe jala mulak mangolu i, gabe adong di hita panghirimon na mangolu. Di bagasan Kristus i, manang sadihari pe sai boi hita joujou tu Debata jala pos ma rohanta, sai na tangihonon jala alusanNa do hita. Dohot hata na asing, ala ni ulaon panobusion ni Kristus i, ndang uhum be hata parpudi ni Debata taringot tu hita, alai haluaon do asa tu hangoluan na saleleng ni lelengna. Molo songon i do, boha ma hita patut mangolu?

Jamita ari on manjouhon tu hita ganup, unang be tadatdati mangulahon dosa, alai tahangoluhon ma hamubaon ni roha dohot haimbaruon ni ngolu. Sipatureonta do pardo-muan dohot parsaoranta tu donganta jolma so binolatan ni angka parasingan na pinajongjong ni hajolmaon, tarmasuk na niaturhon ni ugamo. Ndang masalpuhu molo nidok, di tingki na parpudi on uju sandok portibi on marusaho mangatasi parasingan jala mardalan tu hasadaon, kelihatannya ugamo torus do mampartahanhon parasingan. Hira di ganup ugamo, sai adong do kelompok fundamentalis na ekstrim na mandalanhon kekerasan atas nama agama. Taboto ma, “Ndang diulahon rimas ni jolma hatigoran ni Debata.” (Jak.1:20) Angkup ni i, sai tahaburjuhon be ma manghangoluhon hakekat dohot harkat ni hadirionta songon na tinompa, jala unang martabuni hita maradophon Debata.

Payakumbuh, 10.3.2010/mvs

Read More..

Estomihi

SERMON JAMITA MINGGU ESTOMIHI, 6 MARET 2011
Luk.10:38-42


Patujolo

Sabagian sian barita pardalanan ni Tuhanta Jesus do turpuk on. Di pardalananNa i, ingot do Jesus tongtong na ingkon sahat do Ibana tu Jerusalem jala manaon disi, tarsilang jala mate. Nang i pe songon i, ndang gabe lumindak Ibana, dipatohom tahe bohiNa mardalan tusi (9:51). Diboto do tangkas, i do na hombar tu tahi ni Debata AmaNa na taringgot tu haluaon ni hajolmaon. Hombar tusi, ndada hamatean i ujung ni saluhutna, alai hehe do Ibana muse jala manaek tu surgo laho mulak tu hasangaponNa. Songon halak na patohom bohiNa mandapothon sitaononNa diadopi Ibana do ragam ni reaksi. Adong do rupani na so manjangkon (9:53), adong na so mangantusi, isara si Marta, alai adong do na porsea songon si Maria na martaringot di jamita on.

Hatorangan

“Jala di na mardalani nasida, dibongoti ma sada huta. Adong ma disi parompuan sahalak, na margoar si Marta, na manjangkon Ibana tu jabuna.” “Nasida,” ninna; na nidokna disi, i ma Jesus raphon angka siseanNa (pat.9:54). Mangihuthon Joh.11:1, di Betania do huta ni si Marta i. Beethanias (sian hata Aram Beth’a-ni), na mandok bagas ni na pogos manang bagas hapogoson, i ma sada huta di lambung ni dolok Jetun (pat.Mrk.11:1; Luk.19:29) marhira dua mil dingkan irisanna ni Jerusalem (pat.Joh.11:18), di dalan tu huta Jeriko. Jotjot do Jesus laho tu huta i jala marborngin disi (pat.Mat.21:17; 26:6; Mrk.11:1, 11-12). Dison didok, dijangkon si Marta do Ibana tu jabuna. Martha (sian hata Aram Mar’tha), na mandok parompuan (lady, mistress). Ndang godang na binoto taringot tu si Marta on. Alai na pasti, adong do sada paribanna na margoar si Maria (ay.2). Sian Evangelium na asing torang, adong muse do sada ibotona na margoar si Lasarus (Joh.11:21). Tagamon na so marama so marina do nasida. Ra si Marta do na tumua. Ala ni i gabe targoar ibana nampuna jabu. “Tu jabuna,” ninna.

“Ianggo anggina na margoar si Maria, hundulhundul do di jolo ni Tuhan i tumangihon hataNa.” “Anggina,” ninna. Hata gorikna, adelfee (sister, saudara, pariban). Jadi ndang ingkon anggina, boi do angkangna. Alai songon na nidok di jolo ondeng, godangan do kemungkinanna si Marta do sihahaan, si Maria sianggian. Diantusi si Maria do lapatan ni pardalanan ni Jesus i. Na laho mandapothon sitaononNa do Ibana, laho manghobashon haluaon ni hajolmaon. Taringot tusi, nunga ingkon disorminhon i di pardananan i. Gabe dipahombar ma sikap panjangkonna tusi, hundul ma ibana di jolo ni Tuhan i tumangihon hataNa. Hata gorikna, pros tous podas tou Kuriou mandok, di pat ni Tuhan i (at Jesus’ feet). Suman tusi do hata ni si Paulus taringot tu dirina, ai didok na magodang do ibana di Jerusalem para tous podas Gamalileel (at the feet of Gamaliel) mandok, di pangajarion ni si Gamaliel (Ul.22:3). Ruhut na somal do i di dunia kuno, hundul do sisean i di inganan na tumoru maradophon guruna. Molo guru i rupani hundul di bangku, siseanna ingkon di lante. Na laos gabe gombaran ma i taringot tu sikap hasiseanon. Ingkon unduk do sisean tu guruna, dipatutoru dirina jala dipaserep rohana maradophon ibana, ditangihon podana jala dioloi na nidokna, diihuthon ibana huhut mardalan di pudina. Songon i ma si Maria dison, dipasobok dirina tu sisean ni Tuhan i, tangi tu soaraNa, unduk jala marpangalaho hombar tu hataNa, huhut mardalan di dalanNa. Songon sisean ni Kristus Jesus na tongon mardalan mandapothon sitaononNa laho manghobashon haluaon ni hajolmaon, ndang parjolo ibana naeng mangobasi Tuhan i, alai ibana do parjolo naeng hobasan ni Tuhan i.

“Diharonsothon si Marta do ragam ni parhobason. Laos dipajonok ma mandok: ‘Tuhan, ndang diantoi rohaM na pinasombu ni anggingki ahu marhobasi sahalakhu? Dokhon ibana antong mandongani ahu!’” Asing sian si Maria, ndang dapot roha ni si Marta paboa na tongon mardalan do Jesus i mandapothon sitaononna laho manghobashon haluaon ni hajolmaon, alai songon halak na sangap na berkenan tuli tu jabuna. Marhite haroroNa i, gabe songon na dohot do nasida na saripe ‘ambil bagian’ di hasangapon ni Jesus, Guru i. Peristiwa na balga do i, na sangat membanggakan jala na patut halashonon marhite panjangkonon na meriah. Songon kepala keluarga jala nyonya rumah diharonsothon ibana ma paradehon sipanganon dohot siinumon di Jesus dohot siseanNa. Ndang ulaon na neang be i, na dokdok do, na so tartea sahalaksa. Ala ni i gabe jut ma rohana mamereng si Maria na hundul patangitangi hata ni Jesus. Didok rohana, na so patut do na binahen ni anggina i, dipasombu ibana sahalakna manghobasi na ringkot di Tuhan i dohot siseanNa. Nda ulaon na denggan do na marhobas di Tuhan i? Nda tumagon i harotsothonon ni si Maria sian na hundul di pat ni Jesus? Di jut ni rohana ndang diboto be mangantan sidohononna, ai gabe dohot ma Tuhan i hona hata dibahen.

“Gabe ninna Tuhan i mangalusi ibana: ‘O Marta, Marta! Lan do disarihon jala dihasusahon ho. Sada do na ringkot. Dipillit si Maria do tohap na uli i; ndang sibuaton i sian ibana.’” Ndang ditolopi Jesus pingkiran dohot sikap ni si Marta i. Molo tuli pe Ibana tu Betania ndang asa jangkonon ni si Marta marhite partamueon bolon, alai asa dohot do disi adong tingkiNa na sonang laho manghilalahon sintuhu ni haroroNa, i ma haluaon na naeng gabe partohapan ni hajolmaon. Sasada i do na ringkot. Dipillit si Maria do tohap na uli i jala ala ni i do asa hundul ibana mananginangi. Ndang sisundatan ibana disi marhite na marsuru manghobasi na ringkot di Jesus dohot siseanNa.

Rancangan Homiletis

Estomihi do goar ni minggunta on, na mandok, “Sai Ho ma gabe partanobatoan di ahu!” (Ps.31:3b). Hombar tu parsagi ni tingki di sada taon parhuriaon, na tarrajum do Minggu Estomihi on tu Parningotan di Panaonon manang Passion ni Tuhanta Jesus Kristus bagian parjolo. Sambolus idaon songon na alo do i nian, ai Estomihi i manaiti jala mangarahon hita marhaporusan jala marpartanobatoan tu Debata pargogo na so hatudosan i, alai Passion i manaiti jala mangarahon hita manatap tu Tuhanta Jesus Kristus na marhagaleon jala marsitaonon. Sasintongna, ndang na masialoan, na masijaloan do tahe na dua i, ai hapartanobatoan ni Debata pargogo na so hatudosan i justru dipapatar jala diulahon do i di hita di bagasan dohot marhitehite Tuhanta Jesus Kristus na mrsitaonon i. Dohot hata na asing, kemahakuasaan ni Debata, justru patar hagaleon ni Kristus; omnipotensia ni Debata patar di bagasan impotensia ni Kristus. Di bagasan dohot marhitehite Tuhanta Jesus Kristus na manaon jala na mate dung i hehe jala mulak mangolu i do gabe marsaor jala mardomu hita tu Debata, marondingonding jala malua di bagasan Ibana. Songon dia ma asa tulus i di hita? Tauji ma pamanathon i marhitehite jamita di hita ari on.
Na masa do jamita on di pardalanan ni Tuhan Jesus Kristus na parpudi tu huta Jerusalem laho mandapothon sitaononNa. Didok nangkin, di pardalananNa i, raphon angka sisean dohot na porsea di Ibana bongot do nasida tu sada huta, gabe dijangkon sada parompuan ma Ibana tu jabuna. Si Marta do goar ni parompuan i. Sian Joh.11:1 torang, Betania do goar ni huta i, ai i do huta ni si Marta i. Betania marlapatan, huta ni angka na pogos manang bagas hapogoson, na marhapeahan di lambung ni dolok Jetun marhira tolu kilometer dingkan timur laut ni Jerusalem di dalan tu Jeriko. Jotjot do Jesus laho tu huta i jala marborngin disi.

Ndang godang na taboto taringot tu si Marta on. Alai na pasti, adong do sada angina na margoar si Maria dohot sada ibotonasida na margoar si Lasarus. Tagamon, na so marama so marina nama nasida, jala si Marta ma na tumua sian nasida jala na gabe uluan ni keluarganasida. Diantusi si Maria do lapatan ni pardalanan ni Jesus i. Na laho mandapothon sitaononNa do Ibana, na laho manghobashon haluaon ni hajolmaon. Gabe dipahombar ma sikap panjangkononna tusi, ai hundul ma ibana di pat ni Tuhan i laho tumangihon hataNa. Na marlapatan ma i, marpangalaho ibana songon sisean.

Apala i ma na parjolo naeng parrohahononta sian jamita on. Di na sahat hita nuaeng tu tingki parningotan di ariari panaonon manang passion ni ni Tuhanta Jesus Kristus bagian na parjolo on naeng lam suan jala tarida di ngolunta pangalaho ni sisean. Taringot tusi, adong do opat na naeng dohonon, i ma: Na parjolo, na paserep roha jala patutoru diri maradophon Tuhanta Jesus. Hombar tu ruhut na masa uju i, ndang boi sahundulan sisean dohot guruna. Sai di inganan na tumingka do guru hundul, di na tumoru ia sisean. Molo hundul di bangku rupani guru, ingkon di tano manang di lante do ia sisean. Na marlapatan ma i, ingkon dipaserep rohana jala dipatutoru dirina maradophon guruna. Songon i, ingkon pasereponta do rohanta jala patutoruonta dirinta maradophon Tuhanta Jesus Kristus i. Unang gabe dirinta manang diri ni na asing tapatimbo, unang gabe rohanta manang roha ni na asing taparguru, alai ingkon diri dohot roha ni Tuhanta i do. Na paduahon, tangi tu hata dohot podaNa. Kesempatan manangihon hata ni Jesus, ndang sai tongtong adong. Songon na nidok nangkin, di jamita on na sedang mardalan do Jesus mandapothon sitaononNa. So pola sadia leleng nari be, mate ma Ibana gabe ndang begeon ni sisean i be soaraNa. Disadari si Maria do i, gabe dipangke ma kesempatan i manangihon pangajaranNa. Na boi masa do na songon i sian tingki tu tingki. Taringot tusi nunga disuriranghon si Amos hian, ai didok do, “Ida ma, ro do angka ari sogot, ninna Tuhan Jahowa, tongosonHu ma haraparon tu tano on, ndada haraparon di sagusagu manang hauason di aek ingkon di angka hata ni Jahowa do, naeng begeonna nian. Jadi madoado ma nasida sian laut na sada tu laut nasada nari, jala sian utara tu habinsaran diliati nasida mangalului hata ni Jahowa nian, hape laos so jumpang nasida do.” (Am.8:11-12). Na boi masa do i ala ni na so adong parjamita manang ala ni na so adong inganan ma-maritahon hata ni Debata. Ala ni i, songon sisean ni Tuhanta Jesus Kristus, ingkon pangkeonta do ganup kesempatan na adong laho tumangihon hata ni Debata. Na patoluhon, mangoloi jala marpangalaho hombar tu hataNa. Ninna roha, apala dison do hita godang tardapot songon parhahurangan. Di parbinotoan taringot tu hata ni Debata, ra, ndang pola talu hita sian na asing. Ndang hurang di hita angka na malo manghatai manang marsipaingot marojahan di hata ni Debata, tolapsa padomuhon Padan na Robi tu Padan na Imbaru; martangiang ganjangganjang, unur jala teologis. Alai ndang songon i anggo na mangulahon dohot na manghangoluhon. Sisean na sintong, mangoloi do i jala marpangalaho hombar tu hata ni Tuhan i. Na paopathon, mangihut tu Ibana jala mardalan di pudiNa. Mesias na marsitaonon do Kristus i. Angka sisean na mangihut tu Ibana pe ingkon manaon do songon Ibana. Ibana sandiri mandok, “Nasa na giot mangihuthon Ahu, disoadahon ma dirina, diporsan ma silang na tu ibana; diihuthon ma Ahu.” (Mat.16:24).

Sahali nari, apala i ma na naeng suan di rohanta di Minggu Estomihi on asa gabe hangoluanta i di tingki na ro, naeng marpangalaho hita songon sisean ni Tuhanta Je-sus Kristus i. Kemungkinan tusi, nunga tangkas diungkap di hita; asal olo hita, tarpatupa hita do i. Marhite i, saor jala domu ma hita tu Debata, marondingonding jala malua di bagasan Ibana.

Asing sian si Maria, ndang dapot roha ni si Marta na tongon mardalan mandapothon sitaononna do Jesus i laho manghobashon haluaon ni hajolmaon, alai songon sahalak na sangap do na berkenan sorang tu jabuna. Di rohana, sada peristiwa na balga do i jala na membanggakan. Ise hita on na so bangga molo singgah presiden tu jabuna? Unang be presiden, gubernur manang bupati pe nunga sangat membanggakan. Marhite kunjungan i, gabe hira na dohot do nampuna jabu i ambil bagian di hasangapon ni na sangap i. Halak na asing pe antong, didok do ibana na martua. “Martua i da, ro presiden tu jabuna,” ninna. So-ngon i ma panghilalaan ni si Marta dison. Ala ni kunjungan ni Jesus i, gabe songon na dohot ibana marsangap di bagasan hasangapon ni Jesus i. Songon sahalak naung gabe sangap, ninna rohana, patut do i patuduhononna marhite na menyikapi sikap ni halak na sangap, antara lain marhite na patupahon partamueon na meriah. Ala ni i, diharonsothon ma paradehon sipanganon dohot siinumon di Jesus dohot siseanNa. Ra, dohot dope tahe di donganna sahuta angka na dohot mengagumi Jesus i. Ndang ulaon na neang be i, na dokdok do, na so tartea sahalaksa. Ala ni i gabe mansai jut ma rohana mamereng si Maria na hundul patangitangi hata ni Jesus. Didok rohana, na so patut do na binahen ni anggina i, dipasombu ibana sahalakna manghobasi na ringkot di Tuhan i dohot siseanNa. Nda ulaon na denggan do na marhobas di Tuhan i? Nda tumagon i harotsothonon ni si Maria sian na hundul di pat ni Jesus? Di jut ni rohana ndang diboto be mangantan sidohononna, ai gabe dohot ma Tuhan i hona hata dibahen. “Gabe ninna Tuhan i mangalusi ibana: ‘O Marta, Marta! Lan do disarihon jala dihasusahon ho. Sada do na ringkot. Dipillit si Maria do tohap na uli i; ndang sibuaton i sian ibana.’” Ndang ditolopi Jesus pingkiran dohot sikap ni si Marta i. Molo sorang pe Ibana tu bagasna ndang asa jangkonon ni si Marta marhite partamueon bolon, alai asa dohot do disi adong tingkiNa na sonang laho manghilalahon sintuhu ni haroroNa, i ma na manghobashon haluaon na gabe partohapan ni hajolmaon. Sasada i do na ringkot. Dipillit si Maria do tohap na uli i jala ala ni i do asa hundul ibana mananginangi. Ndang sisundatan ibana disi marhite na marsuru manghobasi na ringkot di Jesus dohot siseanNa.

I ma muse na ringkot parrohahononta sian jamita on, naeng lam suan di hita hata ni Tuhanta Jesus Kristus i na mandok, “Anak ni jolma i pe, ndada asa dioloi halak Ibana umbahen na ro; Ibana balik pangoloi jala mangalehon hosaNa bahen tobus ni torop jolma.” Ndang na mandok na so ringkot hobasanta Kristus i, ringkot do. Alai panghobasion na sintong ingkon na marmual do i di panghobasion ni Kristus i sandiri. Dohot hata na asing, angka naung parjolo dihobasi Kristus i, angka i do na boi marhobasi di Ibana.

Ninna roha, dison pe mansai godang do hita tardapot songon parhahurangan, sai tarimpu do na umporlu hita manghobasi Ibana asa Ibana manghobasi hita. Di angka pesta ni huria rupani, jotjot ma niida angka panitia manang anggota koor na manghilala na so pola ringkot mambege jamita holan ala ni na mangharonsothon an dohot adui, isara na parade sipanganon dohot siinumon manang remeh temeh dohot tetek bengek ni pesta i. Di manang piga huria, jotjot do niida angka sintua na mangarajumi naung cukup kehadiranna di gareja ganup ari minggu molo dung diulahon angka panghobasion isara na manjangkon parminggu, marbagi acara dohot warta jemaat, na patudu inganan tu na tarlambat dohot na papunguhon pelean minggu. Ndang pola dohot nasida anggo mambege jamita, ai di ombas ni jamita i marlaoan ma sadasada hundulhundul tu konsistori, na deba tu alaman, na asing tu dalan huhut marisapi. Simpul jamita, masuk muse tu gareja laho papungu pelean paduahon. Ndang huboto manang na hea taida na songon i. Unang so taboto, ndang arga di Tuhan i parhobason ni na so hinobasanNa dope. Ala ni i, tapaloas ma Tuhanta i parjolo manghobasi hita, asa tau hita gabe parhobasna. Holan marhite na songon i domu jala saor hita tu Ibana, marondingonding jala malua di bagasan Ibana songon na sinoarahon ni Minggu Estomihi on.

Payakumbuh, 03.03.2011/mvs

Read More..