Mohon Diri

MOHON DIRI

Tu angka dongan panjaha na manghaseahon Sermon Jamita na hupatomutomu jala na hupublish di dunia maya marhite blog na maralamat http://batumamak.blogspot.com/, marhite on hupabotohon ndang tarbahen iba be manorushon ulaon i. Na marbonsir do i sian parsidohotonniba di Tim Revisi Bibel Batak Toba na pinatupa ni gereja-gereja penutur bahasa Batak Toba bekerjasama dohot Lembaga Alkitab Indonesia (LAI) na mangigil hira sude gogo dohot tingkiniba. Mauliate do dohonon tu Debata na paloashon iba mengelola blog on na sai leleng on. Mauliate do dohonon nang tu angka dongan na manjaha jala na manghaseahonsa di ulaonna manjamitahon hata ni Debata.

Mardomu tusi naeng taringotanhu do muse na gabe sibonsiri ni blog on, i ma giot ni roha manangkasnangkasi hata ni Debata dung godang tingkiniba na lowong ala naung pensiun, lumobi angka turpuk jamita Minggu. Ia sinurathon pe i marrumang sermon ala marguna do i di iba molo dipangido dongan marjamita sahalisahali. Siangkup ni i, hirim do roha na boi gabe pangurupion i di angka dongan na mangharingkothon. Huantusi do kesibukan ni angka dongan na mangula di huria, ndang apala godang tingki na tarpangkesa laho parade sermon. Alai huhut, na songon reaksi do i tu torop parjamita dohot parjamitaon na hupaihutihut di hurianta di angka tingki na parpudi. Sapanjang na sada satonga taon on sai huuji do paradehon jamita na tarihot tu teks, na borhat sian tafsiran jala na hombar tu taon parhuriaon. Angka i ma huida na lam mago sian parjamitaon di hurianta di angka tingki na parpudi on. Hea do hubege sahalak parjamita na so manaringoti agia aha sian turpuk ari i, gabe konteksna do dijamitahon. Na asing, tongon di Minggu Rogate, dijaha do nian turpuk ari i, alai ndang i dijamitahon; gabe partangiangon do dihatai marojahan tu puluhan teks ni Bibel, sian buku na paasingasing. Songon i muse, sahalak parjamita di Pesta Hananaek ni Tuhan Jesus na so manaringoti agia otik Barita na Uli ni hananaek i, alai mansai butong do pinggol mambege hatoranganna taringot tu surusuruan manang angelologi, ala kebetulan adong martaringot di turpuk ari i surusuruan. Di na mangujungi ulaon on, laos i ma na nuaeng na naeng ondolhononhu: Sai tauji ma pasahathon jamita na tarihot tu turpuk, na borhat sian tafsiran na tarpartanggung-jawabhon, jala na hombar tu tingki (taon parhuriaon dohot kontellasi masa kini).

Na parpudi, partahanhononhon do haadongon ni blog on. Sintap ni na boi, pangkeonhu do i pasahathon angka na mardomu tu missina na parjolo i, jala na boi tambaan dohot informasi taringot tu revisi Bibel Batak Toba. SELAMAT TAON BARU 2011, HORAS.

Read More..

Tema Bulan Mei

DILULUI DEBATA DO NAPOSONA

“Na lilu do ahu songon birubiru na mago, sai lului ma naposoM, ai ndang huhalupahon angka tonaMi.” (Ps.119:176)

Di ari on sahat hita tu bona ni bulan na palimahon di taon 2010 on. Pujionta do Debata, jala dohononta mauliate ala horas do hita sahat tu tingki on. Di bulan na salpu i, sai adong angka na pajuthon roha. Lam tamba do rupani arga ni situhoron, gabe lam tu maolna hita mangolu. Di parngoluon ni negaranta pe adong do tong angka siarsakhononhon. Masa do rupani hagaoron di Tanjungpriok, jala marmullopan angka sibahen na so uhum. Apala na pagondok roha, adong do sian i siboto uhum dohot sipajongjong hatigoran. Mardomu tusi, apala di na talangkahon nuaeng patta di bona bulan Mei on, marhite tema ni bulan on naeng paingoton ni Tuhanta i do hita taringot tu na patut sipatupaonta.

Sarupa tu Ps.1 dohot 19, Ps.119 on sada perenungan do taringot tu patik ni Debata. Disi, dipapujipuji do patik i songon asiasi ni Debata na umarga. Didok rupani: “Hasintongan do angka uhum ni Jahowa, tigor do sudena. Umarga do angka i sian mas dohot sian sere palangki na godang situtu, tumonggi do angka i sian situak ni loba dohot tanggule” (Ps.19:10b-11). Ala ni argana, didok parpsalmn 119 on ma di ujung ni ayat on: “Ndang huhalupahon angka tonami.” Na nidokna, sai dipingkirpingkiri do i arian dohot borngin, dihalomohon jala diradoti (pat.Jos.1:8; Ps.1:2). Nang pe songon i, ala ni paraloanna na mansai borat, lilu do ibana, ndang sai marsihohot be di dalan ni Tuhan i. Apala i ma na pinarhatopotna di bona ni ayat on, didok: “Na lilu do ahu songon birubiru na mago.” Didok na mandok, molo lilu sada birubiru, hira so adong do kemungkinanna mulak. Molo manghuling (mengembik) ibana, dialusi angka donganna na tading i do i. Alai asing, singkat ni na humusor jala mardalan mandapothon angka donganna i, lam maringkati do ibana dompak haliluonna i, gabe lam lilu jala lam mago. Holan sada do kemungkinanna mulak jala malua, i ma molo dilului jala jumpang parmahan i ibana. I do na pinarhatopot ni parpsalmen on umbahen didok: “Sai lului ma naposoM.”

Nunga nidok, gondok do roha molo sian angka sibahen na so uhum na marmullopan di tingki na parpudi on adong deba siboto uhum dohot sipajongjong hatigoran. Ndang holan hapunjungannasida i, alai mara na ungkap do i di sude halak. Diboto do nian hata dohot patik ni Debata jala ndang dihalupahon dope hatigoran dohot hasintongan, alai ala balga ni parungkilon dohot paraloan, manang ala gogo ni elaela ni portibi gabe lilu jala mago di hamagoanna. Lam leleng, lam peam ma ibana di haliluon dohot di hamagoanna i, ndang diboto jala ndang hehe be rohana mulak. Ndang disadari be dirina naung lilu jala mago. Dipintori gariada dirina, didok ingkon i nama dalanna mangolu, ingkon margabus nama, ingkon manipu, ingkon mangalaosi. Ndang boi be mulak ala naung tarihot mansai togu. Taringot tu angka i ndang porlu hita manguhumuhumi, ai na boi masa do na songon i nang tu hita. Molo lam balga parungkilon, molo lam tu maolna na mangolu, gabe lilu hita jala ndang taboto sitondongon dohot sibahenonta. Angkup ni i, songon ruas ni bangsonta hita, ndang parsindak hita, alai dohot do martanggungjawab taringot tu angka na masa i. Ala ni i, sitopotanta do i tu Tuhanta i; sidohononta do: “Na lilu do hami songon birubiru na mago,” jala hombar tusi, sitangianghononta do tongtong asa dilului Debata hita jala ditogihon tu hamubaon ni roha, dipaulak tu dalan hatigoran dohot hasintongan.

Laos i ma siparrohahononta di na mandalani di bulan Mei on. Di bulan on bolusonta do dua nari Minggu Haheheon, i ma Kantate dohot Rogate; ihut tusi dua pesta na balga, i ma Hananaek dohot Pentakoste na hinolangholangan ni Minggu Exaudia, dung i dipaujung dohot Minggu Trinitatis. Tuhanta naung hehe jala manaek i nunga mangusehon TondiNa tu hita, ala ni i gabe tatanda ma ise jala boha do Debata maradophon hita. Amanta do Ibana na manompa hita, Sipalua hita do Ibana na mandongani hita, Habadiaonta do Ibana na mangingani hita. Holong do rohaNa di hita, ndang holan di tingki burju, dohot do di tingki na lilu. Ala ni i sai boi do hita martangiang mangido asi ni rohaNa (Rogate dohot Exaudia), jala marende ma hita di Ibana (Kantate). Amen.

jkt.01.05.2010/mvs

Read More..

Tema Bulan April

MANGHAHOLONGI HATA NI DEBATA

“Na pinindan situtu do bagabagaMi, jadi holong do roha ni naposoM disi.”(Ps.119:140)

Nunga salpu muse sada bulan sian pardalanan ni ngolunta di taon 2010 on. So tarhilala, di ari on nunga sahat jala bongot hita tu bulan na paopathon. Dung tasalpuhon na tolu bulan i, ndang tagamon so parhatopoton ni rohanta na digohi Debata do di hita bagabaga pandonganionNa, ai hipas do hita sahat tu tingki on. Taalami do nian ngolu na lam tu maolna, ai lam tu argana do situhoron. Nang pe songon i, horas do hita sahat tu ari on. Di parngoluon ni bangsonta pe, taalami do gonjang-ganjing politik, lumobi na marhahonaan tu masalah bail out Bank Century. Mauliate ma, ai atik pe so haru tuntas dope masalah i, ndang anggo mamboan gora bolon i di parngoluon ni bangso dohot negara Indonesia na tahaholongi on. Di ombas on hembang ma di adopanta sia nari bulan sibolusonta. Disi pe, bagabaga pandonganion ni Debata na pinapatarNa di bagasan dohot marhitehite hataNa i do sihaposanta. Boi do pos rohanta disi, ai na pinindan situtu do hata dohot bagabagaNa i.

Mangihuthon Kamus Batak Toba – Indonesia na pinataripar ni P Leo Joosten OFMCap sian Toba Bataks-Nederlands Woordenboek na sinurat ni Pdt.Dr.J Warneck, na pinindan ro do i sian hata pindan, lapatanna genap, lengkap. Di hata heberna didok tsaruwpaah, lapatanna pita, polin, ias (pure, murni, teruji). Pita do hata ni Debata (pat.Ps.18:31). Laos songon i do angka bagabagaNa na pinapatarNa di bagasan dohot marhitehite hataNa i pita do sude, ndang adong gabus disi, ndang adong sipalensem na holan palengenlengen pinggol; molo didok, digohi, dipasaut (digenapi). Ala ni i, manang ise na marhaposan jala mangpanghirimon tusi ndang tagamon tarurak. Alai angka ise do na boi marhaposan jala marhahirimon disi? Na parjolo, i ma angka naung pinapita ni hata i. Hata ni Debata na pita i ndang pita holan di dirina, alai hapitaon na papitahon do i. Na songon api do i jala na songon nanggar na mangarosahi batu mamak (Jer.23:29). Songon nanggar, dirosak do angka roha na koras; jala songon api, dipaias jala dipapita do angka na ramun hian. Hombar tusi, martangiang do Tuhanta Jesus taringot tu siseanNa i, didok: “Parbadiai ma nasida di bagasan hasintongan, hataMi do hasintongan i” (Joh.17:17), jala di inganan na asing muse didok: “Nunga ias hamu binahen ni hata i na Huhatahon tu hamu” (Joh.15:3). Na paduahon, i ma angka na manghaholongi hata i. Angka naung pinapita jala pinaias ni hata i, holong do roha ni i di hata i. Dihaholongi ala pita, ala polin, jala badia. Umarga do angka i di rohana sian mas dohot sian sere palangki, jala tumonggi do i sian situak ni loba dohot tanggule (pat.Ps.19:10-11). Ala ni i didok Panurirang Jeremia do: “Dung jumpang ahu hataMu, gabe husohali do i, jala hataMu do lomo dohot las ni rohangku ala naung targoar ahu tu goarMu, ale Jahowa Debata Zebaot” (Jer.15:16).

I ma na ringkot parrohahononta di na mandalani bulan April dohot angka na mangihut tusi di taon 2010 on. Songon halak na malungun di hahorason dohot haluaon na sian Tuhan i, naeng rade hita dipaias jala dipapita hata ni Debata. Asa jumpang i, ingkon na ringgas jala ungkap do hita tumangihon dohot mangguruhon hata ni Tuhan i; ringgas tu parpunguan dohot tu parmingguan. Dung i, ingkon haholonganta do hata i; pos rohanta jala manghirim hita di bagabagaNa. Sopot di bona ni bulan on bongotanta do dua pesta na balga, i ma Jumat Agung dohot Paskah; dung i, ihut tusi tolu sian lima minggu di Tingki Haheheon, i ma Quasimodogeniti, Misericordias Domini, dohot Jubilate. Sai unang ma holan na mamolus sambing nian angka i sian hita, alai naeng parsaulihononta do parbue ni hamamate dohot haheheon ni Tuhanta Jesus Kristus i. Tu sangkap i, tatangihon jala tahangoluhon ma hata ni Debata na hinatindanghon ni pesta dohot angka minggu i, asa sahat hita tu hangongolu na imbaru (Quasimodogeniti), mian di asi ni roha (Misericordias Domini) dohot tu parolopolopon di adopan ni Debatanta (Jubilate) na pinarbuehon ni hamamate dohot haheheon ni Kristus i. Di bagasan dohot marhitehite na songon i ma hita boi manghirim bagabaga pandonganion ni Debata di hita di bulan on dohot di angka bulan na mangihut tusi. Amen.

jkt.01.04.2010/mvs

Read More..

Manghalungunhon Hatuaon

MANGHALUNGUNHON HATUAON

“Pola do rambon angka matangku manghalungunhon hatuaonMi dohot bagabaga ni hatigoranMi.” (Ps.119:123)

Nunga salpu muse sada bulan sian taon 2010 na tadalani on. Di jolonta nuaeng hembang dope sampulu nari bulan na so taboto dope agia aha na naeng masa di bagasanna. Songon na nidok di bulan na salpu, tontu godang do disi angka na masa; adong na pahinsa roha, alai sabalikna sai na adong do i na pagondok roha; adong na denggan na hombar tu na hinirim hian, alai sabalikna sai adong do i na so tinagam na mambahen hita tarsonggot jala targogot. Alai manang na boha pe i, tontu do, diparsinta rohanta do naeng horas hita disi, malua jala martua. Tu sangkap i, naeng marsiajar do hita sian Parpsalmen 119 on, na tongon marungkil dirupa angka na jungkat (ay.122), angka siulahon gogo (ay.121), angka na mardalan di lapang pangansion (ay.128). Di jungkat ni rohanasida, pola do ditorbangi patik ni Tuhan i (ay.126). Mangadopi sasudena i, ndang gabe mago roha ni Parpsalmen i, diboto do paboa na holan tu Debata do boi ibana marhahirimon. Hombar tusi mangaranap ma ibana tu Tuhan i manghalungunhon hatuaonNa dohot bagabaga ni hatigoranNa.

Naeng songon i ma hita mangarap tu Debata manghalungunhon hatuaon dohot bagabaga ni hatigoranNa di na mangadopi angka na masa di tingki na ro. Songon na tangkas taboto, marsogot dohot haduan, ari 2-3 Maret 2010 patupaonna ma sidang paripurna DPR-RI laho manjalo dohot manaringoti rekomendasi ni Pansus Bank Century. Ndang taboto dope manang na boha do kesimpulan sipatupaon ni sidang paripurna i. Ndang boi hita mereka-reka, ai sahat tu nuaeng mardalan do torus lobi-lobi di antara ni angka fraksi, laos songon i di antara ni pamarenta dohot angka fraksi na dirajumi berseberangan di pamingkirion. Disura roha, arian on torus tu bodari ingkon lam tu gencarna dope angka lobi i. Tekanan dohot ancaman pe songon i, disura roha torus ma i mardalan. Ndang rahasia be, adong do tekanan manang ancaman tu angka tokoh ni fraksi manang partei na dirajumi berseberangan di pamingkirion isara ni na naeng membuka borok lama. Manang na aha pe hasunan sibuaton ni DPR marhitehite na mandabu petek, ninna roha ndang boi so manubuhon kerawanan i di ngolu ni bangso dohot negaranta. Molo boi pe rupani dihamonanghon pingkiran ni na sabagian na mangarajumi na so adong na hurang di bail out ni Bank Century, selamat do pamarenta, alai kecewa do torop masyarakat jala ndang porsea be di DPR dohot di pamarenta ai ndang tarpaotooto agia hagogoon dia nasida ala torang do diida be di pamaresoan ni Pansus manang songon dia godang ni na sala di na masa i. Badan-badan manang investor luar negeri pe ra kecewa do jala ndang porsea be tu Indonesia on. Sabalikna, molo boi pe dihamonanghon pingkiran na mandok na adong do na sala di penyelamatan ni Bank Century i, jala hombar tusi ingkon adong do na martanggungjawab taringot tusi, lumobi molo gabe bermuara i tu pemakzulan, ndang boi so manimbulhon panghorhon dohot ongkos na mansai arga i na ingkon gararon ni bangso dohot negaranta on. Antong boha nama?

Ndang adong na boi hirimonta so lobi sian Tuhanta i. Pamarenta ndang boi, DPR ndang boi, angka partei pe ndang boi ai tung saluhut do nasida holan na mamingkirhon jala patujolohon kepentingan dohot na ringkot di horongna be, holan na manghaholongi hundulan dohot hajongjonganna be, alai papudihon molo so dohonon manghalupahon na ringkot di situan natorop. Ala ni i naeng nolnol do simalolongta mangaranap tu Debata, manghalungunhon hatuaonNa. Ibana do na tuk paluahon hita, paluahon bangsonta. Bahen hasasaut ni haluaon i, ingkon tangian do hita di bagabaga manang soara ni hatigoran ni Debata asa di soara ni na asing, manang na soara ni pamarenta i, manang na soara ni partei, manang pe soara ni rohanta sandiri. Nunga tabereng sandiri, manoarahon soara ni na sabagian mansai hatop do i menuai reaksi negatif sian na asing, gabe lam tu tambana ma gaorna. Songon halak Kristen hita laos i ma dohot tangiangta. Naeng martangiang do hita luhut mangidohon asa Debatanta i na patupahon hasunan na dumenggan taringot tu parsoalan na niadopan ni bangsonta on. Tatangianghon ma pamarentanta dohot angka donganta na hundul di badan-badan perwakilan manang pe na di partei asa barani manadinghon soara ni kepentingan ni horongna be laho manangihon soara ni hatigoran na sian Tuhan i, gabe hehe rohana mamingkirhon dohot patujolohon angka na ringkot di bangso dohot masyarakat.

Marhuaso jala olo do Debata paluahon bangsonta, ai dohot do taringot tu bangsonta on Jesus Kristus manaon jala mate bahen tobus ni sandok manisia. Ala ni i, huhut paihutihut Jesus di parningotan di ariari panaonon manang passionNa di bulan Maret on, di angka minggu Okuli, Letare, Judika dohot Palmarum, sai mangaranap ma matanta tu Debata manghalungunhon hatuaon dohot soara ni hatigoranNa. Amen.

jkt.01.02.2010/mvs

Read More..

Mangido Pangantusion

MANGIDO PANGANTUSION

“NaposoM do ahu, sai parrohai ma ahu asa huboto angka panindangionMi.” (Ps.119:125)

Paduabulanhon ma nuaeng dung na bongot hita tu taon 2010. Nunga tasalpuhon 31 ari, alai so padohot ari on hembang dope di jolonta 333 ari nari na golap dope, na so taboto dope agia aha taringot tusi. Tontu mansai godang do disi na masa, alai ingkon dung jolo gabe tingki nuaengta pe na 333 ari i sadasada asa botoonta angka na masa i. Mangadopi saluhutna i, songon angka naposo ni Debata naeng marsiajar do hita sian Parpsalmen 119 on na mangido roha sian Debata. Na dirupa angka na jungkat roha do ibana hatiha i (ay.122), angka siulahon gogo (ay.121) na mardalan di lapang pangansion (ay.128). Di jungkat ni rohana, ditorbangi nasida do patik ni Tuhan i (ay.126). Siala sasudena i, pola do gabe rambon mata ni Parpsalmen i (ay.123). Nang pe songon i ndang mago rohana, diingot do tongtong paboa naposo ni Debata do ibana, jala hombar tusi ingkon angka panindangion ni Debata do siluluan jala sihangoluhononna. Ndang jumpangsa i sian na asing, ingkon sian Debata sandiri do. Ala ni i dipangido ma asa diparrohai Debata ibana mangantusi manang dia do lomo ni roha ni Debata sihangoluhononna.

Laos songon i ma hita di na mangadopi angka na masa di tingki nuaeng dohot na naeng ro. Ingkon sadar diri do hita paboa naposo ni Debata do hita, ndada naposo ni portibi on; parripe ni harajaon ni Debata, ndada holan warga ni Negara Republik Indonesia na tahaholongi on; ruas ni huria manang daging ni Kristus ndada holan warga ni masyarakat manang partei manang ormas na tontu. Ala ni i, hata dohot patik ni Tuhan i do na parjolo ingkon hangoluhononta, ndada undang-undang ni negara manang uhum ni masyarakat manang aturan ni partei. Molo adong tahe ketegangan di antara ni patik ni Debata dohot uhum ni hajolmaon, ingkon oloan do hita di Debata asa di jolma. Sian angka na masa jala na naeng adopanta di taon on, pasti do adong angka naung somal masa dohot na so dung hea masa dope. Di bagasan saluhutna i, ingkon luluanta do manang dia do lomo ni roha dohot panindangion ni Debata. Aha do na naeng pasingothonon ni Tuhanta i tu hita marhitehite angka na masa i; manang sabalikna, aha do na naeng dohonon ni angka na masa i taringot tu Debata, jala angka dia do lomo ni rohaNa na ingkon hangoluhonon jala ulahononta? Ndang ulaon na mura i, na maol do, mansai na maol tahe. Maol, ai nang pe sarupa na masa i tu angka naung hea masa di tingki na salpu ndang sai sarupa anggo panindangionna, ai asing do tingkina, asing situasi, asing kondisina, asing dohot rumang ni harohaon ni na mangadopisa. Di tingki ni si Jesaya rupani, dihubu halak Assur do Jerusalem. Marhite na masa i naeng hatindanghonon ni Debata do tu Juda paboa Ibana do Sipalua nasida, jala ala ni i ingkon martahan ma nasida di bagasan huta. Alai di tingki ni si Jeremia di na hinubu ni halak Babel Jerusalem naeng hatindanghonon ni Debata do paboa na so tarhalomohonsa be bangso i, jala ala ni i, laho pasidinghon korban na so marguna tagonan nama nasida menyerah. Sahali nari, ndang na mura i, alai na mangigil sandok pamingkirion do i dohot parsirangguton. Ala ni i, mansai ringkot ma di hita roha, pangantusion, hapistaran dohot habisuhon. Ndang jumpang hita i sian na asing, ingkon sian Debata do. Si Jakobus mandok: “Ai molo adong di tongatongamuna na hurangan bisuk, dipangido ma tu Debata, na bulus mangalehon di saluhut jala ndang marpangea, dung i lehononna ma tu ibana.” (Jak.1:5). Ala ni i, raphon Parpsalmen 119 on naeng martangiang do hita mangido roha dohot pangantusion sian Tuhan i asa unang tartuktuk hita di sidalananta. Alai unang sala, roha dohot pangantusion i nda tung didekdekhon i songon i sambing, alai dibasabasahon do di bagasan dohot marhitehite haringgason dohot parsitutuonta manangihon dohot mangguruhon hatanNa.

Laos i ma na ringkot ingoton jala hangoluhononta di na mandalani bulan Pebruari, bulan na parjolo sian na sampulu sada nari na tinggal dope di taon on. Naeng ma ringgas hita manjaha dohot pahusorhusorhon hata ni Debata na diturpukhon di hita ganup ari, ringgas marminggu huhut tangi tu jamita asa dapotan roha dohot habisuhon hita laho mangadopi angka na masa dohot laho mangulahon na hombar tu lomo ni roha ni Debata. Amen.

jkt.01.02.2010/mvs

Read More..

Tapuji ma Debata

TAPUJI MA DEBATA

“Ai Ho do nampuna harajaon dohot hagogoon dohot hasangapon ro di saleleng ni lelengna. Amen.” (Mat.6:13b)

So tarhilala, nunga sahat hita nuaeng tu bulan Desember, bulan na parpudi di taon 2009 na tadalani on. So pola piga ari nari, salpuhononta ma taon on laho mamongoti taon na imbaru, taon 2010. Molo manaili hita nuaeng tu angka bulan naung tabolus i, idaonta do disi godang ni na masa. Ala ni godangna, ndang na tarpajojor hita i sadasada. Alai ra, na boi rimpunonta tu angka na masa i tu manang piga pangarimpunan, isara peristiwa alam, politik, ekonomi, dohot na asing.

Songon Kristen hita naeng berengonta do angka na masa i sian panatapan ni haporseaon. Hombar tusi dohononta ma, luhutna i ndang simbil i sian huaso ni Debata na mangatasi jala na manggomgomi nasa na adong. Di na mandalanhon panggomgomionNa i, adong do sada na diparrohahon Debata, i ma tangiang ni na porsea. Hombar tusi dohononta ma, angka na tabolus di taon on ndang simbil i sian alus ni Debata tu angka tangiangta. Ragam situtu do na tatangianghon. Alai hombar tu tema na na manogunogu hita laho mandalani bulan Desember on, tapahimpu ma sudena i di tangiang na pinondahon ni Tuhan Jesus Kristus tu hita. Na parjolo, tapangido do angka na marhahonaan tu Debata dohot tu harajaonNa, i ma habadiaon ni goarNa, hasosonggop ni harajaonNa, dohot hasasaut ni lomo ni rohaNa di banua tonga on songon na di banua ginjang; dung i, paduahon angka na ringkot di hita, i ma hangoluanta siapari, haseaan ni angka dosanta, hasisidingta sian pangunjunan, dohot haluaonta sian na jahat. Luhutna i digohi Debata do di hita di na sataon on. Holan ala ni i do umbahen na mangolu jala horas hita sahat tu tingki on. Ia masa pe saluhutna i ndang ala ni diri manang ala ni haburjuonta, ala Ibana sandiri do, ala ni asi ni rohaNa. Ala ni i, di na manjalo saluhutna i ingkon tu Ibana do pasahatonta pujipujian, harajaon, hasangapon, dohot hamuliaon.

Laos i ma na ringkot parrohahonon jala hangoluhononta di na mandalani bulan Desember 2009 on. Adong tolu buhu ni tingki na mansai arga sibolusonta di bulan on. Na parjolo, Advent; na paduahon, Natal; jala na patoluhon, Ujung Taon. Ingkon auhononta do, angka i pe alus ni Debata do i tu tangiangta. Molo dipaloas Debata hita mamongoti Advent dohot mamestahon Natal di taon on, na marlapatan do i na ditangihon Debata do joujou ni dangolta, disuru AnakNa Jesus Kristus i manopot jala paluahon hita; songon i, molo dipaloas hita sahat tu Ujung Taon laho mamongoti Taon na Imbaru na marlapatan do i na ditangihon do tangiangta taringot tu panogunoguon dohot pangiringiringonNa di hita, jala dialusi hita paboa na so marujung do angka asi ni rohaNa, mulak rata do i tahe ganup manogot. Ala ni i, manang di na maradvent, manang di na marnatal, manang pe di na laho manalpuhon taon on naeng hatindanghononta do songon na nidok ni tema ni bulan Desember on: “Ai Ho do nampuna harajaon dohot hagogoon dohot hasangapon ro di saleleng ni lelengna. Amen.”

Read More..

Maruhumhon hasintongan

MARUHUMHON HASINTONGAN

“Boti hata ni Jahowa Zebaot: Uhum hasintongan ma paruhumhon hamu, jala denggan basa dohot asi ni roha ulahon hamu ganup tu donganna” (Sak.7:9)

Di jolo ni si Latus didok Jesus do: “Umbahen na tubu Ahu jala umbahen na ro Ahu tu portibi on, asa huhatindanghon hasintongan i.” Mansai eles do alus ni si Latus tusi, didok: “Aha ma i, hasintongan i?” So pola paima alusna, pintor ditadinghon ibana do Jesus i laos laho manopot angka Jahudi. I ma tandana na so apala masalah hasintongan i di ibana. Songon si Latus i, torop do na so pola pusing taringot tu hasintongan i. Pardihana i, ninna rohana, ai na relatif do hasintongan i jala tarihot tu tingki dohot tu inganan. Sude do boi sintong, alai sude do boi ndang sintong; hombar tu halakna do i, tu faham manang pola pikirna. Hombar tusi ndang sai diparungkilhon halak be hasintongan i di pambahenanna maradophon donganna jolma. Di paruhuman rupani, songon partahanan parpudi ni angka silului hasintongan jotjot do masa haputusan na so ojak di hasintongan. Hasintongan naung dipahot di bagasan uhum manang aturan diparmeammeam, dipaboanboan manang dipatongotongon tu lomo ni rohana. Pangalaho i ndang lias sian Israel. Diharinggashon nasida do papuasaon, alai ndang dipardulihon anggo hasintongan. Apala i do na jotjot dipasingothon angka panurirang, isara si Jesaya, si Jeremia, si Hesekiel, si Hosea, dohot na asing. Alai boasa boi masa na songon i? Ala na so adong do di nasida denggan basa dohot asi ni roha. Apala i do na pinasingothon Panurirang Sakarias dison, didok: “Uhum hasintongan ma paruhumhon hamu, jala denggan basa dohot asi ni roha ulahon hamu ganup tu donganna.”

I ma siingotonta di na mardalan hita di bulan Nopember, bulan na parpudi di hita di Taon Parhuriaon on. Alai huhut, di ujung ni bulan on, laos bongotanta do Taon Parhuriaon na imbaru. Songon taon parhuriaon na sai marujung jala digonti dohot na imbaru, songon i laho marujung do saluhut na adong, dung i udutanna ma i muse dohot langit dohot tano na imbaru na so mansohot be salelenglelengna. Ndang adong na tarboan hita tu langit dohot tano na imbaru i so lobi sian ulaon na denggan angka na tapatupa di ngolunta on. Ala ni i, apala di na manatap hita di tingki on tu ujung ni pardalananta dohot tu ujung ni saluhut, naeng paruhumhononta ma hasintongan jala ulahononta denggan basa dohot asi ni roha di na mangulahon hadaulaton ni na marroha (jamita Minggu 01.11.2009); naeng paruhumhononta do hasintongan jala radotanta denggan basa dohot asi ni roha di na mangulahon dohot manghangoluhon aspek teologis dohot aspek antropologis-sosiologis-ekologis ni parugamaon manang peribadahanta (jamita Minggu 08.11.2009); naeng paruhumhononta do hasintongan jala radotanta denggan basa dohot asi ni roha di na mangulahon ulaon panindangion dohot panghophopon di Barita na Uli na pinalumehon ni Tuhan i tu hita (jamita Minggu 15.11.2009); naeng paruhumhononta do hasintongan jala radotanta denggan basa dohot asi ni roha songon pengamalan ni haporseaon dohot panghirimanta di Jesus Kristus haheheon dohot hangoluan i (jamita Minggu 22.11.2009); jala naeng paruhumhononta do hasintongan jala radotanta denggan ni basa dohot asi ni roha di na marhobas hita tu pesta parningotan di hatutubu ni Tuhanta Jesus Kristus dohot di panagamonta di haroroNa na paduahalihon (jamita Minggu 29.11.2009). Tuhanta ma mamasumasu hita.

jkt.01.11.2009/mvs

Read More..

Jolma na imbaru

JOLMA NA IMBARU

“Alai gabe imbaru ma hamu, dung muba pingkiranmuna, asa tau hamu manimbangi lomo ni roha ni Debata, i ma na uli, na hinalashonNa dohot na sun denggan.” (Rom 12:2b)

Taringot tu jolma na imbaru, sada pingkiran na na godang do i dihatai halak di tingki na parpudi on. Ragam do panggoarina, isara na tinompa na imbaru, naung marngolu na imbaru, naung tubu paduahalihon, dohot angka na asing. Sude i adong be do ojahanna di Bibel i. Umumna, dihonahon do i tu hatauon dohot usaho ni jolma laho paubahon roha dohot paturehon parangena. Alai sasintongna, hajolmaon na imbaru i, parjolo sahali na marhahonaan do i tu ulaon ni Debata, ndada tu ulaon ni jolma. Fakta do na so tartompa agia ise dirina sandiri, ndang tapangolu manang tartubuhonsa; alai na tinompa do jolma i, na pinangolu jala na tinubuhon ni na asing. Laos songon i ma nang taringot tu haimbaruon i, ndang tartompa agia ise dirina asa gabe na imbaru, alai Debata do na tuk patupahon i. Di bagasan Kristus, nunga dipatupa i. Hajolmaonta na buruk i dipamate jala ditanom raphon Kristus i, dung i dipangolu muse raphon Ibana di bagasan ngolu na imbaru (Rom 6:3-4). Tu nasa naung pinaimbaru songon i disosohon ma asa imbaru. Hira na mandok: “Nunga hupaimbaru ho (indikatif), antong imbaru ma ho (imperatif)!”

Songon i ma dison, disosohon do tu na porsea i asa paubahon (mentransformasi) sandok hadirionna marhite na paimbaruhon pingkiranna. Pingkiran (budi) lapatanna, hajolmaon parbagasan ni sasahalak. Jadi, hamubaon dohot haimbaruon i ingkon na marhahonaan do tu hadirion ni jolma na umbagas, ndada holan tu ngolu parduruna isara ni na marisap hian gabe so marisap. Marhite haimbaruon sisongon i dipatau do jolma i manimbangi manang dia do lomo ni roha ni Debata di hangoluanna ariari, dipatau mamolati na denggan sian na roa (Heb.5:14), dohot manghangoluhon hasintongan i di angka ari hasusaan (hari-hari jahat, Eps.5:16). Ndang ulaon na mura i, na maol do; na mangigil sandok haoloon do i laho mamarungkilhon manang dia do na uli na hinalashon ni roha ni Debata jala na sun denggan.

I ma siingoton jala siparrohahononta di na mandalani bulan Oktober on. Sitimbangan jala siparungkilhononta do manang dia do lomo ni roha ni Debata di parngoluon ni hurianta, di peribadahan dohot di panidangionna di umurna na pa-148 taonhon on (jamita Minggu 04.10.2009); sitimbangan jala siparugkilhononta do manang dia do na uli sipatupaonta laho maniru Tuhanta Jesus Kristus di hangoluanta ariari asa tutu hita angka na serep roha, na rade patutoruhon diri laho manghobasi angka dongan (jamita Minggu 11.10.2009); sitimbangan jala siparungkilhononta do manang dia do na hinalashon ni roha ni Debata sipatupaonta jala songon dia do hita mangulahon i maradophon angka na ginosagosa dohot na hona gaga di tonga ni masyarakat dohot bangso nang huria pe (jamita Minggu 18.10.2009); sitimbangan jala siparungkilhononta do manang dia do na sun denggan sipatupaonta di paraloanta di na mamolus hita di portibi on manuju tu paradianan na hot, i ma tano Kanaan na imbaru i (jamita Minggu 25.10.2009). Di bagasan parsitutuon ni roha, pos ma rohanta, sai na dapot hita do alus na topet, gabe ndang adong sisolsolan di angka pambahenanta. Dipargogoi Tuhanta ma hita disi. Amen.

jkt.01.10.2009/mvs

Read More..

Pasupasu di bagasan pangoloion

PASUPASU DI BAGASAN PANGOLOION

“Alai ingkon oloanmuna do Jahowa Debatamuna i, jadi pasupasuonna ma sagusagum dohot tapianmu, jala pasalpuonHu sahitsahit sian tongatongamuna.” (2 Mus.23:25)

Diarahon sada halak do sahali sahalak pandita laho marsipanganon bodari tu bagasna.

Na masitandaan do nasida mamungka sian haposoonnasida dope. Nunga leleng nasida ndang pajumpang, ai asing be do ingananna. Ala ni i, mansai tabo do parjumpangannasida i jala mansai rosu dohot panghataionnasida. Dung jumpang tingki mangan bodari, hundul ma nasida humaliang meja makan naung pinarade ni inanta i, jala pintor naeng dipungka amanta i ma mangan. Marnida i didok pandita i ma: “Ai ndang jolo martangiang hita tahe?” “Oh, i do ate, ai lupa do ahu na pandita do ho hape,” ninna amanta i mangalusi. “Alai anggo nuaeng,” ninna muse, “rasional do pangantusionhu taringot tu ngolu on. Molo sai sipanganon na bergizi jala na seimbang do pinangan, nang pe so tinangianghon, ndang boi so gabe ngolu i dohot hahipason. Angka sipanganon na di bagas on, tarmasuk na di jolonta on, naung lolos uji do. On pe, molo naeng martangiang ho, ba martangiang; anggo hami ndang pola, ai ndang adong be huhilala guna ni na martangiang.” Umbege i, martangiang ma pandita i sahalakna, dung i diihuthon ma amanta dohot inanta i mangan.

Tongon do, siradotan do na manganhon sipanganon na bergizi jala na seimbang dohot na manginum aek na ias jala na sehat. Alai ndang na mandok, molo dung songon i, dohot sandirina ma i gabe ngolu dohot hahipason, ndang. Molo taparrohahon, na jolo i, ndang apala dipingkirhon halak sipanganon na bergizi. Na ringkot, bosur, butong, mahap, i do. Siiunomonna pe songon i, ndang nanggo dilompa. Nuaeng on, nunga hira sange halak manarihon i. Alai ndang boi dohonon na gabe dumao ma jolma nuaeng on sian sahitsahit, ndang. Atik na sabalikna do tahe, ai tung apala di tingki on do marmullopan sahit angka na so haantusan jala na so haubatan.

Debata do mual ni ngolu. Sipanganon dohot siinumon na pinasupasuNa, i do na gabe ngolu dohot hahipason. Diparbaga Debata do i tu angka na mangoloi Ibana, angka na beribadah tu ibana. Ala ni i, pangoloion i do na parjolo na pinangido ni Debata sian hita. Manang aha pe taula, ingkon gabe hasangapon ma i di Ibana. Dung i basabasahononNa ma tu hita sipanganon dohot siinumon, jala pasupasuonNa do i asa gabe ngolu dohot hahipason.

I ma siparrohahononta di na mandalani bulan September on. Ingkon gabe ibadahta ma tu Debata kehadiran dohot parsuruonta tu portibi on ro di parsaoranta di bagasan huria na sasada i na pinaojak ni Tuhanta Jesus Kristus di hita (jamita Minggu 06.09.2009), ingkon pangoloionta ma tu Ibana sitaonon dohot parjumpanganta tu angka na di balian na gabe sasaran ni panindangionta (jamita Minggu 13.09.2009), ingkon gabe parsombaonta ma tu Debata angka ulaon na tapatupa songon partohonan hita di tonga ni huria (jamita Minggu 20.09.2009), jala ingkon gabe pujipujian dohot hasangapon di goar ni Debata ma saluhut ulaonta di na manghobashon parhobason di tongatonga ni angka pogos (jamita Minggu 27.09.2009). Marhite na songon i, boi ma hita manghirim pasupasu hangoluan dohot hahipason. Amen.

jkt.01.09.2009/mvs

Read More..

Batu Mamak

BATU MAMAK

Taon 1989, marhite pangurupion ni Amang St.DR Nainggolan, Sintua na gabe Guru Huria HKBP Menteng muse, pinaruar do sada buku na margoar BATU MAMAK. Punguan ni sermon jamita do i, na sinurathon tingki mangula di HKBP Ressort Petojo. Diparsintasinta roha do na gabe sada pangurupi na metmet buku i na manghehei roha ni angka na manjaha laho manghali hata ni Debata umbagas (pat.Mat.7:24) bahen ojahan ni bangunan ni ngoluna (pat.Judas 20). Hombar tusi ma binahen goarna Batu Mamak. Mauliate do dohonon, torop do na manghalashon buku i, ai ndang pola sadia leleng nunga sidung sian peredaran.

Dung pinda iba sian huria jala mangula di ulaon hatopan, parjolo di STM-HKBP Pematangsiantar (1989-1993), dung i di Kantor Pusat HKBP Pearaja Tarutung (1993-2008), ndang adong be kesempatanniba mangurupi angka dongan di panangkasion di hata ni Debata. Hira sude nama tingkiniba sidung tu ulaon pangajarion dohot administrasi, anggo na marsermon ndang hea be. Na marjamita pe tahe, nunga tung mansai rangkak.
Nuaeng, nunga pensiun be iba sian ulaon i. Ala ni i nunga godang tingkiniba na lowong. Hombar tusi, tarrungka ma muse roha laho manangkasnangkasi hata ni Debata lumobi angka turpuk sijamitahonon di ari Minggu dohot Pesta Huria. Sinurathon do angka i marrumang sermon, ai na laos marguna do i di iba molo adong na mangido iba martingki sahalisahali. Sihol do rohaniba na gabe pangurupi nang i di angka dongan na mangharingkothon. Alai hombar tu hajongjonganniba songon sahalak pandita naung pensiun, ndang adong be kesempatanniba managihon i di parsermonan manang di angka parpunguan na asing. Ala ni i, tubu ma roha managihon i marhite dunia maya, gabe binungka ma sada blog na ginoar Batu Mamak.
Hombar tu na nidok di jolo i, panangkasion di hata ni Debata do sintuhu ni blog on. Alai songon sahalak naung matua iba, ia adong na binoto na didok roha ringkot sagihonon jala pateanhonon tu sundut na mangihut, surathonon do nang i di blog on. Laos songon i do nang angka barita, pingkiran, poda, parsiajaran dohot na asing, hombar tu ringkotna, na boi pasahaton do i di blog on.
Na parpudi naeng dohonon, di bagasan panimbangion ni roha na mansai tangkas do binungka blog on di hata Batak. Niantusan do nian naung lam moru bilangan ni halak na tangkas mangantusi hata Batak, gabe gumodang ma nian panghorhonna aut sinurathon i di hata Indonesia. Alai songon na nidok di ginjang i, songon sahalak naung matua iba, hata Batak i do sada na naeng pasahaton jala pateanhononhon. Nang pe songon i, ia adong na didok roha dumenggan pasahaton di hata Indonesia, na boi do i.
Tuhanta ma mamasumasu.

Jkt.Agustus 2009 Pdt.MV Simanjuntak

Read More..