Trinitatis 2013

SERMON JAMITA TU MINGGU TRINITATIS, 26 MEI 2013

Joh.16:12-15

Patujolo

Udut ni jamita Minggu na salpu (Pesta Parningotan di Hasasaor ni Tondi Porbadia) do turpukta ari on. Mangihuthon parsagina, na tarmasuk do i tu bagian na paduahon ni Hata Partadingan ni Tuhanta Jesus tu angka siseanNa. Disi diondolhon Jesus Kristus i do paboa ulaon ni Tondi Porbadia i ndang asing jala ndang tarsirang sian ulaonNa sandiri.

            Hatorangan

Nang pe naung tolu taon dipaihutihut sisean i Jesus jala torus do nasida diajari, maol dope diantusi nasida taringot tu Ibana. Tutu, nunga ditanda jala dihaporseai nasida paboa Jesus i do Nabadia ni Debata, jala di Ibana do hangoluan na saleleng ni lelengna (Joh.6:68-69) Nang pe songon i sian angka naung niida jala naung binege dohot naung nialamannasida, gumodang dope na so diantusi nasida. Lobi so mangarti ma nasida di angka na naeng masa dope, i ma udut dohot akibat lebih jauh ni haroro dohot ulaon ni Jesus i. Molo ingkon manaon Ibana muse, ditangkup, diuhumi jala diparsilanghon, dung i mate, aha ma lapatan ni i? Molo didok Ibana na hehe Ibana muse sian na mate, boha do parmungkin ni i? Jala molo masa ma i sude, aha ma panghorhon ni i tu hajolmaon nuaeng dohot muse? Sude i, ndang hadodoan angka sisean dope. Diboto Jesus do i sude. Ala ni i ma asa didok, “Godang dope sidohononHu tu hamu, alai ndang tarboan hamu dope i nuaeng.” Ndang tarboan (Gr.bastazein, to carry, menanggung) lapatanna, ndang tarporsan manang tartahan ai mabalgahu jala madokdokhu; ndang siat tu pingkiran ni hajolmaonnasida, ai mamaolhu do i jala masongkalhu. “Nuaeng” (Gr.arti, now/just now, sekarang) ninna, ai ro do tingkina na gabe tarboan nasida do i muse, gabe haantusan jala tarjalosa.  

Tu sangkap i, di ay.13 dibagabagahon ma haroro ni Tondi Porbadia i. Digoar Jesus do Tondi Porbadia i Hasintongan. “Tondi Hasintongan” (Gr.Pneuma tees aletheias, Spirit of Truth, Roh Kebenaran) ninna. Na marpardomuan do panggoarion i tu ulaon ni Tondi Porbadia i, i ma na manogihon tu bagasan nasa hasintongan. Aha do hasintongan i? Jesus Kristus i sandiri mandok, “Ahu do ... hasintongan.” (Joh.14:6). Jadi, Ibana sandiri do hasintongan i dohot nasa na marhahonaan tu Ibana, i ma hata dohot patikNa, poda dohot pangajaranNa, ulaon dohot panobusionNa, haluaon dohot hangoluan na di bagasan Ibana dohot angka na asing. Na marhinorhon situtu do hasintonganNa i. Ndang holan di sisean i, tung di sandok hajolmaon do. Dung i, ndang holan di hasiangan sinuaeng on, alai na mempengaruhi jala na marakibat lebih jauh do i sahat ro di tingki na ro sogot. Justru angka i do na so haru niantusan ni angka sisean i dope. Alai dung ro Tondi Porbadia i, togihononNa ma nasida tu bagasan nasa hasintongan. Manogihon (Gr.hodeegeesei, lead/ guide, memimpin) mandok manguluhon. AjaranNa angka sisean i mananda hasintongan i, manjalo jala manghaporseai, dung i togutoguon jala pargogoanNa mian jala mangolu di bagasanna. Ndang hasintongan na asing sipaboaon ni Tondi Porbadia i, tung hasintongan na di bagasan Tuhan Jesus Kristus i do. Mangondolhon i didok Ibana ma, “JaloonNa do na di Ahu laho mamaritahonsa tu hamu.” Manang aha na niida ni Jesus di Debata, na binege jala na jinaloNa sian Ama i, dohot saluhut na tinonahonNa, laos i do tong sijaloon ni Tondi Porbadia i asa ajarhonon, hatindanghonon jala aktuilhononNa di sisean i dohot di saluhut na porsea. Hombar tusi ma didok, “Ai ndang adong sihatahononNa sian handirianNa, na binegeNa, i do hatahononNa.” Laos Tondi Porbadia i do muse na mangajarhon tu sisean i angka na naeng masa dope. Aha i? Songon naung nidok di jolo, i ma udut dohot akibat lebih jauh ni haroro dohot ulaon ni Kristus Jesus i, i ma haluaon sijaloon ni na porsea ala ni ulaon panobusionNa i. Angkup ni i, uhum sihabiaran tong ala ni ulaon panobusionNa i. Ala naung ro Ibana jala mangula bahen haluaon ni hajolmaon, molo so dihaporseai jala so dijalo halak i antong, ndang boi so ingkon mangonai uhum Ibana tu angka na songon i. Taringot tusi nunga diondolhon i di ay.8, didok, “Anggo dung ro Ibana, ajaranNa do portibi on taringot ... tu uhum.” Ala hasintongan na di bagasan Kristus i do diajarhon, gabe marsangap do Jesus i di bagasan dohot marhitehite ulaon ni Tondi Porbadia i. Aut so gari antong hasintongan na asing diboan jala diajarhon Tondi Porbadia i, nunga martutup be barita ni Kristus Jesus i. Alai ala ndang songon i, hasintongan ni Kristus i do dibaritahon, marudut jala torus do sejarahNa. I ma umbahen didok, “PasangaponNa do Ahu.” Marsangap do Kristus i di tongatonga ni angka naung tinogihon ni Tondi Porbadia i tu haluaon, jala di bagasan Jesus na marsangap i marsangap ma nang Ama i.

Di ay.15a dihatindanghon Jesus Kristus i do pardomuanNa tu Ama i. Na ro do Ibana tu portibi on di bagasan huaso manang otoritas ni Debata. Ibana do haririmpas ni hapataran ni Ama i, sillam ni hasangaponNa (Heb.1:3) jala suman ni hadirionNa (Kol.1:15) na patar di bagasan daging hajolmaon. Na marnida jala na manjangkon Ibana, na marnida jala na manjangkon Ama i do i (Joh.14:9-11). Di bagasan pardomuan tusi do didok Jesus dison, “Saluhut na di Ama i, di Ahu do i.” Sandok milik ni Debata Ama i, milik ni Anak i do i. Parsidohot Ibana di hadebataon, di hasangapon, hamuliaon dohot di huaso ni AmaNa i. Hombar tusi, na niulaNa di portibi on, na niula ni Ama i do i. Ndang dung Ibana mangula sian roharohaNa manang sian handirianNa, alai di bagasan haserepon haanahonNa, angka na niidaNa di Ama i, na binegeNa, na jinaloNa dohot na tinonahon ni Ama i (Joh.3:32; 5:19, 30; 6:38; 8:28), i do diulahon. Ala ni saluhutNa i, patimboon ni Ama i do Ibana jala basabasahononNa tu Ibana goar na sumurung asa nasa goar, asa somba tu GoarNa nasa ulu ni tot na di banua ginjang dohot na di tano on, nang na di toru ni tano (Pil.2:9-10)

            Rancangan Homiletis

Ari on sahat do hita tu Minggu manang Pesta Trinitatis. On ma na parpudi di rangkaian ni pesta ni huria di sada taon parhuriaon. Di taon on rupani, nunga tasalpuhon Advent, Natal dohot Epiphanias; mangihut ma tusi Passion dohot Pesta Parningotan di Hamamate ni Tuhan Jesus, dung i Pesta Paskah, Pesta Hananaek dohot Pesta Pentakoste; nuaeng Trinitatis. Digombarhon parjojor na songon i do haporseaonta songon huria, paboa: Marhitehite haroro ni Jesus Kristus dohot Tondi Porbadia, nunga singkop be hapataran ni Debata di hita. Ala ni i gabe tangkas ma tatanda Debata, tangkas taboto manang na ise jala beha do Ibana maradophon hita. Debata Sasadasa (Allah Yang Esa) do Ibana, alai na papatarhon diriNa di bagasan tolu cara berada, i ma Debata Ama, Anak dohot Tondi Porbadia. Na tolu panggoarion i ndada na manudu tu haadongon ni tolu debata, alai na marhahonaan tu lapatan ni Debata Sasadasa i do, tu pardomuan (hubungan) dohot tu ulaonNa di hita. Amanta do Ibana, na manompa jala na pangoluhon hita; partobusta do Ibana, na mamintori jala na paluahon hita; habadiaonta do Ibana, na manjou jala na mangondihon hita. Dohot hata na asing, Debata na manompa jala na manghuasoi hita (di atas kita) do Debata Nasasada i, na mandongani hita (bersama kita, Immanuel)  jala na mangingani hita (di dalam kita). Hombar tusi do antusanta lapatan ni hasitolusadaon (trinitas) ni Debata Nasasada i di hita, ndang secara numerikal manang ilmu hitung. Taringot tu pangalaho ni hapataranNa i, tarpamanat hita do i deba di turpuk on.

Na parjolo, dipatupa do i di bagasan dohot marhite Tuhan Jesus Kristus Hasintongan na paluahon i. Di na ro Kristus jala mangula di portibi on, longang jala sungkunsungkun  do halak taringot tu Ibana, mandok, “Ise do halak on?” Di sada sisi, ditanda halak do Ibana songon jolma na somal. Diboto do huta dohot haroroanNa, ditanda do ama dohot inaNa, anggi dohot ibotoNa, songon i ompu dohot margaNa. Sandok sada sian nasida do Ibana, sahalak Israel na somal, warga ni Jahudi na biasa. Alai di sisi na asing, lobi sian i do Ibana. Sian parbinotoanNa, sian ulaonNa, hagogoon dohot huasoNa, tartanda do paboa na lobi sian jolma do Ibana. Ise do Ibana tutu? Kristus do Ibana, Anak ni Debata Nasasada i. Ro do Ibana tu portibi on di bagasan huaso manang otoritas ni Debata. Di bagasan Ibana do Ama i, jala Ibana di bagasan Ama i. Nasa na marnida jala na manjangkon Ibana, na marnida jala na manjangkon Ama i do i. Taringot tu saluhutna i, didok Jesus do di jamita on, “Saluhut na di Ama i na di Ahu do i.” Parsidohot do Ibana di hadebataon ni Debata Ama i, di huaso, hasangapon, hamuliaon dohot di harajaonNa. Hombar tusi, na niulaNa di tano on, na niula ni Debata Ama i do i. Aha diula Ibana? Ibana sandiri patoranghon: Manghatindanghon hasintongan. I ma hasintongan na gok asi ni roha, na pasintong jala paluahon pardosa. Marhite Ibana, ala ni hasintonganNa, gabe patar ma tartanda ise jala boha do Debata maradophon manisia.

Luhutna i ndang sae i jaloonta holan songon kebenaran teoretis-dogmatis na so mandapot penghayatan di hangoluanta siapari.  Molo tadok, Jesus Kristus do hapataran ni Debata, ingkon haporseaanta situtu do paboa holan di bagasan dohot marhitehite Ibana do tartanda hita Debata. Sai adong do halak Kristen na manguji ‘memahami’ Debata marhitehite filsafat, marhite poda ni ugamo na asing manang marhite na padoshon tu Mulajadinabolon. Alai ndang tartanda hita Debata marhite angka i. Songon i, molo tadok, Jesus Kristus do hasintongan na paluahon dohot dalanta sahat tu Debata Ama i, ingkon haporseaanta situtu do paboa sasada Ibana do Sipalua. Dungkon ni Ibana ndang adong be sipalua, nang nuaeng nang di ari sogot. Ala ni i, Ibana ma tahaporseai, tahaposi jala tajangkon.

Na paduahon, dipatupa do i di bagasan dohot marhite Tondi Porbadia Hasintongan i. Hasintongan ni Kristus i mansai maol do siat tu roha ni jolma. Di sisean i sandiri gari maol. Di na tartangkup Jesus i, diuhumi, manaon, diparsilangkon jala ditanom marseto do rohanasida, maoto, mabiar jala mandele. Sahat tu na sirang nasida tahe dohot Tuhan i di hananaekNa, godang dope sian fakta Kristus i na so tarboan nasida. Unang laos huphup jala buni i sian roha ni sisean i khususna, roha ni hajolmaon umumna, nunga tibu ditahi Debata hian marsuru TondiNa Tondi Porbadia i tu tano on laho manonggopi hajolmaon. Ia dung ro Tondi Porbadia i togihononNa ma nasida tu bagasan nasa hasintongan. Ndang hasintongan na asing, alai naung niula jala pinapatar ni Kristus Jesus i do siudutan jala sitorushononNa. Manang aha na jinalo jala tinonahon ni Ama i tu Anak i laos i do jaloon boi mangantusi, manjalo, manghaporseai jala manghangoluhonsa. Angkup ni i, ajaranNa do hajolmaon manghirim dohot manghabiari akibat lebih jauh ni ulaon panobusion ni Kristus i. Ala ulaon ni Kristus i do ditorushon, gabe marsangap do Kristus i di bagasan ulaon ni Tondi Porbadia i, marsangap di tongatonga ni angka sisean dohot angka na malua jala mangolu di bagasan hasintongan i; dung i, di bagasan Anak i marsangap ma nang Ama i.  

Ndang umpistar hita (jolma nuaeng) sian sisean i. Molo di nasida maol, di hita pe maol do i. Alai di bagasan dohot marhite panogihon dohot pangajarion ni Tondi Porbadia i, haantusan hita do i, tarhaporseaan jala tarjalo hita; dung i, mangolu jala malua ma hita di bagasan i. Nunga ro be Tondi Porbadia i, nunga mian jala mangula di tongatonganta, di bagasan hita. Marhite Barita Nauli i, mangula do Ibana papatarhon Kristus i tu hita, dung i di bagasan Kristus i gabe patar ma tu hita dohot Ama i. So marhite Barita Nauli na niulahon ni Tondi Porbadia i, ndang tartanda hita Kristus, jala ndang tartanda hita dohot Ama i; ndang tarboto jala ndang haantusan hita lomo dohot sogo ni rohaNa. Ala ni i, manang ise na naeng mananda Debata, ingkon ringgas do marsaor dohot Barita Nauli i, ringgas manangihon dohot mangguruhon hata ni Debata. Alai ingkon jahaon jala antusan do i di bagasan sondang dohot hatiuron na sian Tondi Porbadia i. Manang ise na naeng manjaha, na naeng patoranghon jala na naeng mangantusi hata ni Debata sian hapistaran manang sian roharohana sandiri, ndang tagamon sahat i tu hasintongan. Nda godang do parugamo na asing na ringgas manjahai jala mansai malo taringot tu isi ni Bibel? Atik ummalo gariada sian rata-rata halak Kristen? Na baru dope hujaha sahalak Silom na pistar manjaha dohot mangantusi Padan Naimbaru di bagasan hata asli, hata Gorik. Alai dijaha pe i, diboto jala dipatorang, ndang dapotsa anggo hasintongan na patar di bagasan dohot marhitehon i, ala so marguru ibana tu Tondi Porbadia i. Mardomu tusi, patut maila do hita molo torop sian hita halak Kristen na losok manjaha dohot manangihon hata ni Debata; maol mananda dohot mangungkap Bibel, ndang diboto dia do Padan Narobi jala dia Padan Naimbaru. Ala ni i gabe hurang ma panandaon dohot parsaoranna tu Debata, hurang pangantusion dohot panghangoluhonna di hasintongan i. Anggo di panghataionna, ndang hurang halak hita na ringgas mengutip manang menyetir hata ni Debata, alai dilapathon do i hombar tu roharohana. Na rumoana dope, dilapathon sian sudut pandang ni poda manang ugamo na asing. Antong, aha do patokan di hita laho mangantusi dohot patoranghon hata ni Debata? Apostel Paulus mandok, “Hombar tu na niajarhon tu hamu.” (Kol.2:7; pat.1 Tes.5:1). Angka apostel i do na parjolo manjalo pangantusion sian Tuhan i marhite Tondi Porbadia i. Na jinalonasida i, ditorushon ma i tu huria i. Sian i dohonon ma, poda (konfessi) ni huria na hombar tu poda ni angka apostel do patokan di hita laho manjalo dohot mangantusi hata ni Debata, hasintongan i.  

jkt.21.05.2013/mvs

Read More..

Minggu Exaudi

SERMON JAMITA TU MINGGU EXAUDI, 12 MEI 2013

Joh.17:20-26

Patujolo

Sabagian sian tangiang hamalimon ni Tuhanta Jesus do turpuk on. Dihatahon do i dung salpu hata partadinganNa na tu siseanNa i (14:1-16:33) di sada inganan di parholangan ni bilut parginjang (pat.Mrk.14:15) tu porlak Getsemane. Sirang ne ma Ibana sian siseanNa i, ai salpu i, pintor ihut nama partangiangonNa di porlak Getsemane; dung i, tartangkup Ibana, diuhumi, diparsilanghon, mate jala ditanom; hehe jala manaek tu surgo. Tinggal dope anggo sisean i di portibi on laho patulushon sangkap ni panjouonnasida i. Ndang na sian portibi on nasida. Ala ni i, adopan nasida do hosom ni portibi on (15:18-21). Laos songon i do nang huria i, angka na gabe porsea tinogu ni hatanasida. Songon Sintua ni Malim Bolon Ibana, ditangianghon ma parjolo angka siseanNa i (17:6-19); dung i, di turpuk jamita on, ditangianghon ma nang angka na porsea di sepanjang abad (17:20-26), laho pasahathon nasida tu pangaramotion ni Ama i.

Hatorangan

Na luar biasa do tangiang ni Jesus on, ai ditangianghon do angka na naeng porsea dope di sude tingki dohot inganan. Manangianghon angka na mardomu tu tingki na ro jotjot do i taulahon. Mangido panumpahion ni Debata di angka na taula rupani asa marparbue. Alai na manangianghon parbue angka na so tarida dope, ndang tolap hita mangulahon. Anggo Jesus tarulahonsa do i ai na mangatasi sude tingki dohot inganan do Ibana. Di na martangiang i Ibana, nunga diida angka na gabe porsea di Ibana ala ni panindangion ni siseanNa i. Molo sahat pe nasida tu haporseaon dohot tu pangihuthonon di Ibana, ndang na sian portibi on i, manang sian mudar, manang sian sangkap ni baoa; na sian ginjang do i, sian Debata (pat.1:12-13; 6:37, 44). Hombar tusi, sarupa tu sisean i na gabe targoar do nasida na di portibi on alai ndang sian portibi on (ida ay.14, 16). Ala na so sian portibi on nasida, asing do ihutanna, asing nilai, asing gaya dohot tujuan hidupna. Gabe hosoman ni portibi on do nasida ala ni i, jala ingkon mangonai ma tu nasida hosom, insakinsak dohot reherehe. Taringot tusi pe nunga tangkas diida Jesus sude. Ala ni i mansai ringkot ma di nasida pangaramotion ni Debata, jala hombar tusi ma nasida ditangianghon.

Angkup ni i dipangido dope hasadaon, didok: “Asa sada nasida saluhutna.” Mansai na arga do hasadaon i, ai marhitehite i lam margogo do na porsea i. Pada hakikina parroha diri do manisia, na cenderung manulak halak na asing di lambungna, gabe maol ma sada. Nunga mamungka i sian ompunta na parjolo i. Dipabali si Adam do tanggungjawabna taringot tu pangalaosion i tu si Hawa, jala dibunu si Kain do si Abel anggina i. Lam tu maolna do na sada i ala ni inganan dohot latar belakang na paasingasing. Jadi molo gabe sada angka na porsea i, gabe panindangion do i tu portibi on paboa adong sada hagogoon na so sian tano on na marhuaso pasadahon, i ma Kristus Jesus i, jala gabe porsea ma nasida ala ni i paboa Debata do na marsuru Jesus Kristus i. Taringot tu model ni hasadaon i didok do: “Songon Ho, ale Amang di bagasan Ahu jala Ahu di bagasan Ho.” Sada do Ama i tu Anak i; sada di bagasan hasadaon na masihaholongan, ai holong do roha ni Ama i di Anak i, Anak i pe holong do rohaNa di Ama i. Songon i ma na porsea i naeng marsada jala mardomu huhut masijangkonan jala masihaehean di bagasan roha na holong. Di bagasan dohot marhite hasadaon na di bagasan holong i do saor jala mardomu na porsea i tu Kristus i, jala marhite Kristus i saor jala mardomu nasida dohot Debata.

Demi hasadaon i, dilehon Jesus do hasangaponNa na sian Ama i tu na porsea i.  Aha do i? HasadaonNa tu Ama i sandiri do i ro di saluhut na mangihut tusi. Hasangapon do i di Kristus i molo dijangkon Debata Ibana tu hasadaon dohot Ibana; hasangapon do i molo boi Ibana mian di bagasan Debata jala Debata di bagasan Ibana; hasangapon do i molo sai boi Ibana jumonok tu Ama i jala boi manangihon dohot umboto saluhut na tinahiNa; hasangapon do i molo dipillit Debata Ibana gabe Sipalua portibi on; hasangapon do i molo dilehon Debata tu Ibana hamonangan maralohon dosa, hamatean, dohot banua toru; jala hasangapon do i molo gabe dipatimbo Debata Ibana jala dibasabasahon tu Ibana goar na sumurung asa nasa goar (Pil.2:9). Songon i ma tong Kristus i marbasahon hasangapon tu na porsea. Hasangapon do i di na porsea i molo dijangkon Kristus i nasida tu parsaoran tu Ibana; hasangapon do i molo dipaian na porsea i di bagasan Ibana jala Ibana di bagasan nasida; hasangapon do i molo dipaloas na porsea i umbege jala umboto hata dohot tahi ni Debata naung patar di bagasan dohot marhitehite Ibana; hasangapon do i molo dipadohot Ibana angka na porsea i di ulaon haluaon ni portibi on marhite ulaon panindangion i; hasangapon do i molo dipatau jala dipamonang na porsea i maralohon dosa, sibolis, dohot hamatean; jala hasangapon do i molo gabe donganNa panean nasa na porsea i di Debata AmaNa i. Taringot tusi didok do: “Nunga Hulehon.” Maksudna, ndang holan sihirimon sogot be hasangapon i di angka na porsea, alai parsaulian naung dijalo do i di ngoluna sinuaeng on jala dinikmati. Hasadaon i ma sada konkritisasina. Di na gabe marsada angka na porsea i di bagasan Kristus dohot Debata, tarhilala do disi hasangapon sogot siteanon ni angka na porsea i.

Di ay.23, diungkaphon Tuhanta Jesus do rahasia ni kesempurnaan ni hasadaon ni na porsea i, didok, “Ahu ma di bagasan nasida jala Ho di bagasan Ahu, asa sundenggan hasadaonnasida.” Sundenggan (Gr.teteealeioomeno, made perfect/bring to completion, menyempurnakan/mencapai kesempurnaan). Denggan jala sempurna do hasadaon i molo mian Kristus i di bagasan na porsea i. “Ahu ma di bagasan nasida,” ninna, lapatanna Kristus mangolu di bagasan nasida, gabe ngoluna na mangarajai roha, pingkiran dohot pambahenannasida. Di bagasan parmianon ni Kristus i, mian ma nang Debata Ama i di bagasan na porsea i, ai Debata do di bagasan Ibana. “Ho di bagasan Ahu,” ninna. Molo dung songon i, dao ma pangiburuon, parsalisian dohot parbadaan sian na porsea i jala gabe singkop ma hasadaonnasida i. Sahali nari diondolhon, hasadaon na sundenggan i na gabe panindangion do i tu portibi on, paboa Debata do na marsuru Kristus i (pat.ay.21) Laos dihatindanghon i do holong ni roha ni Debata di na porsea i, ai olo jala rade Ibana mian di bagasan nasida.

Di ay.24 sahat ma Jesus tu bagian panutup ni tangiang hamalimonNa i. Sian hasangapon do Ibana ro, jala tu hasangapon i do Ibana ingkon mulak. Taringot tusi, nunga nidok nangkin di Patujolo, ndang pola sadia leleng nari be, tangkupon ni halak Jahudi ma Ibana, uhumanna jala parsilanghononna, dung i mate jala ditanom; alai hehe muse jala mulak mangolu, dung i manaek tu surgo laho hundul tu hasangaponNa na di lambung ni AmaNa  i. Dison diondolhon ma parsidohoton ni angka na porsea di inganan sitopotonNa i, didok “Naeng ma di rohangKu, Ia disi Ahu, disi ma dohot angka na nilehonMi tu Ahu.” Naeng ma di rohangku (Gr.theloo, I wil, saya mau). Sada hata pangidoan na mansai gomos do i. Ala ni gomosna, nunga gabe hira sada hatontuan na so boi juaon. Hata i do   dipangke si Salome di pangidoanna tu si Herodes taringot tu ulu ni si Johannes Pandidi (Mrk.6:25) Lobi sian pangidoan tahe, adong do ekspressi parenta manang pernyataan kekuasaan di hata i. Tu sahalak na huliton na ro sumombahon pangidoanna taringot tu hamalumonna didok Jesus do, “Na olo do Ahu (thelo=I will), ias ma ho” (Mat.8:3) Ia dipangke pe i dison na laho mangondolhon hatontuan tu angka na porsea i do, paboa na parsidohot do nasida di hasangapon sogot i. Digoar Jesus do angka na porsea na nilehon ni Ama i tu Ibana, ai ndang adong na tarbahen ro tu Ibana ia so na tinogu ni Ama i. (Joh.6:44) Dohot hata na asing, ndang adong agia ise na tarbahen porsea di Jesus jala manjangkon Ibana gabe Tuhan jala Sipalua ia so ala pangulaon ni Debata marhitehite TondiNa, na badia i. Ia dung sahat tusi, idaon ni angka na monang i ma hasangapon na nilehon ni Ama i tu Anak i. Saleleng di portibi on, ndang tarida jala ndang hadodoan jolma dope sude rahasia ni hasangapon manang hadirion ni Anak i. Boha do pardomuan holongNa tu Ama i naung jumolo sian haoojak ni portibi on, boha do hasadaonNa tu Ama i, jala boha do ia ‘haasingonNa,’ sude i semo dope. Alai di ari sogot i, torang ma i dapot idaon jala antusanna.  

Di ay.25 digoar Jesus do Debata Amang Nabonar (Gr.pater dikaie, righteous father, bapa yang adil). Na tigor do Debata, ala ni hatigoranNa, ingkon uhumonNa do portibi on; alai huhut, na asi roha do Ibana, jala ala ni asi ni rohaNa, disuru do AnakNa, Jesus Kristus i tu tano on asa paluaonNa. Ndang magopo sambing haroroNa i, di tonga ni portibi na torus di hasopanandaonna di Debata, adong do angka na porsea, i ma angka naung sahat tu panandaon di Debata jala na marhatopothon paboa Debata do na marsuru Kristus i. HapataranNa do Ibana, na di bagasanNa boi nasida marnida jala mananda Debata. Laos i do na niondolhonNa di ayat na parpudi na mandok, “Nunga Hupabotohon tu nasida GoarMi.” Goar ni Debata ndang tarsirang i sian hadirionNa. Na mewakili diriNa do i. Marhite Kristus Jesus i, ala ni ulaon dohot panobusionNa gabe diboto jala ditanda sisean i Debata. SiudutanNa dope i tu joloan on, sitorushononNa marhitehite TondiNa, na badia i. Na boi lupa do antong sisean i disi, boi sala marningot manang sala mangarti. Alai marhitehite pangaramotion ni Jesus Kristus i, tarjamin do hahohot ni haporseaon dohot panandaonnasida di Debata. Laos siudutanNa dope i nang tu angka na naeng porsea dope tinogu ni hata dohot ulaon ni sisean i. Tujuan ni saluhutna i, didok, “Asa di bagasan nasida holong ni rohaMi na di Ahu, jala asa Ahu di bagasan nasida.” Na nidokna disi, Debata na di bagasan Kristus i mian di bagasan na porsea, nuaeng ro di saleleng ni lelengna.

   

Renungan

Jamita on diturpukhon tu Minggu Exaudi. Na marpambuatan do i sian hata ni Ps.27 na mandok, “Sai tangihon ma soarangku, ale Jahowa, molo joujou ahu, asi ma rohaM di ahu, jala alusi ahu.” Sian i torang do, na mangondolhon tangiang do tong goar ni Minggu on. Di sermon na salpu nunga tinaringotan, di parsagi ni sada Taon Parhuriaon, Minggu Tangiang (Rogate) do na manjoloani Pesta Parningotan di Hananaek ni Tuhanta Jesus, jala laos na mangondolhon tangiang do Minggu na mangihut tusi, i ma Exaudi. Na disangajo do i asa unang adong kesan na gabe sirang jala dao Kristus dohot Ama naung patar di bagasan Ibana i sian hita, alai sai na boi do hita marsaor jala martangiang tu Ibana, jala sai na alusanNa do hita. Mansai ringkot do partangiangon i. Paboa ringkotna, Tuhanta Jesus Kristus i do na gabe tiruan, manongtong do Ibana martangiang. Songon i ma di bagasan turpuk di hita ari on, ditangianghon Jesus do huria sepangjang abad angka na naeng tubu dope tinogu ni panindangion dohot panghobasion ni siseanNa, huriaNa na parjolo (jemaat perdana) i, naung dipaojak uju di tano on dope Ibana. Dohot do hita angka na porsea jala na mangolu di tingki on dohot di inganan on, huria manang pe marsasahalak na ditangianghon disi. Patut martua jala maria do rohanta disi, ai Tuhanta i sandiri rade jala nunga manangiangghon hita. Alai ndang sae di hita holan na martua jala maria, lobi sian i ingkon mangolu do hita di tangiang ni Tuhanta i. Hombar tusi, aha ma nuaeng sihangoluhononta?     

Tuhanta Jesus mandok di tangiang hamalimonNa i, “Asa sada nasida saluhutna.” Sian i torang, hasadaon i ma sada na mansai ringkot hangoluhononta. Hasadaon ni huria ndang na borhat i sian hasosadaon tu hasadaon, jala ndang parbue ni usaho ni jolma na saling pasadahon diri, alai na borhat do i sian hasadaon tu hasadaon, ai na marmula do i di hasadaon ni Debata Ama i dohot Anak i. Ala ni i ingkon hasadaon ni Ama i tu Anak i do na gabe modelna, i ma hasadaon dohot parsaoran na di bagasan holong. Mansai ringkot ma i ingoton jala hangoluhonon ni sandok na porsea. Songon na taboto, na marharoroan do ruas ni huria na di sandok portibi on sian inganan dohot latar belakang budaya na paasingasing. Na marhinorhon do angka i tu parasingasingan ni pangantusion taringot tu pengorganisasian ni huria, taringot tu parsombaon, manang taringot tu sadasada pokok ni haporseaon dohot angka na asing. Ndang pola sihailahonon i jala ndang sisolsolan, ai pangungkapon ni Debata na marhitehite Barita na Uli ingkon na membumi do i jala membudaya asa tarhangoluhon. Ndang apala siparsintaonta asa gabe sisada organisasi huria di sandok portibi on, gabe sisada bentuk peribadahan, manang gabe sisada konfessi. Dohot hata na asing, hasadaon na ringkot hangoluhononta i ma hasadaon na teologis, ndada hasadaon na numerikal. Hombar tusi, ganup na porsea naeng ma boi mamereng dohot manjangkon sesama na porsea sian sude inganan dohot denominasi di bagasan holong ni roha. Sada do Debata na manjou hita, sada do Tuhan na manobus, sada do Tondi Porbadia na pabadiahon, sada do surgo situjuon, sada do hasangapon naung tinean jala na naeng teanon. Molo songon i do antong ndang adong alasan ni manang ise pe mangarajumi huriana asing gabe so boi mamereng sesama na porsea sian huria na asing songon dongan na sada hasadaon dohot nasida na sahuria, ndang adong alasan ni manang ise pe memupuk kesombongan rohani na mangarajumi huriana do satu-satunya huria na sintong gabe so olo marsaor dohot sesama na porsea na sian huria na asing, jala ndang adong alasan ni agia ise pe pajongjong sada huria na eksklusif na so boi manjangkon jala manghaholongi na porsea sian angka huria na asing. Mardomu tusi, sitambortamboran jala sitangianghononta do hasadaon i. Ninna roha, dison ma idaonta pardomuan ni turpuk on tu sangkap ni huria ni Kristus di Indonesia on patupahon Celebration of Unity marhite sada Seminar di ari 17 Mei 2013 maringanan di ICC Grand Ball Room Mega Kemayoran dohot Celebration di ari 18 Mei 2013 maringanan di Stadion Utama Gelora Bung Karno. Na dipatupa do i dalam rangka menyambut Sidang Raya Dewan Gereja Sedunia (World Council of Chuches/WCC) di Busan Korea Selatan di ari 31 Oktober – 8 Nopember 2013. Tatangianghon ma asa gabe sada wujud ni hasadaon ni huria i di Indonesia on dohot di sandok portibi on laho mangalusi dohot manghangoluhon tangiang ni Tuhanta Jesus Kristus na mandok, “Asa sada nasida saluhutna.”    

Didok Tuhanta Jesus Kristus do muse di tangiang hamalimonNa i, “Nunga Hulehon tu nasida hasangapon na nilehonMi tu Ahu.” Di ruhut hajolmaon gale do huria ni Kristus di portibi on. Ndang adong huaso dohot hagogoonna, ndang adong hamuliaon dohot hasangaponna. Ala ni i jotjot do i gabe sasaran ni rimas ni portibi on. Digugai, dilelei, diorai marpungu, disegai garejana, dohot na asing. Nang pe songon i ndang mintop huria i jala ndang tarida dope tanda ni na laho mintop. Boasa? Ala di bagasan haporseaon di Kristus i nunga domu jala saor huria i tu Debata gabe margogo di hagogoonNa. Laos i ma tandana naung gabe panean na porsea i di hasangapon ni Debata. Hasangapon do i molo dijangkon Kristus i nasida tu parsaoran tu Ibana; hasangapon do i molo dipaian na porsea i di bagasan Ibana jala Ibana di bagasan nasida; hasangapon do i molo dipaloas na porsea i umbege jala umboto hata dohot tahi ni Debata naung patar di bagasan dohot marhitehite Ibana; hasangapon do i molo dipadohot Ibana angka na porsea i di ulaon haluaon ni portibi on marhite ulaon panindangion i; hasangapon do i molo dipatau jala dipamonang na porsea i di paraloan  maradophon dosa, sibolis, dohot hamatean; hasangapon do i molo gabe donganNa panean nasa na porsea i di Debata AmaNa i; jala hasangapon do i molo gabe rap na porsea i dohot Kristus di hasangapon na so mansohot be salelenglelengna, na di lambung ni Ama i. Luhutna i sihangoluhonhonta do di tingki on. Na marlapatan ma i ndang holan sihirimon sogot hasangapon i di na porsea, parsaulian naung dijalo do i di tano on jala dinikmati. Songon angka panean di hasangapon, tasikapi ma hasangapon sogot i di ngolunta sinuaeng on.

Di tangiang hamalimonNa i, mulakulak do ditaringoti Jesus, marhite na manghangoluhon hasadaon dohot hasangapon i gabe porsea manang mamoto do portibi on paboa Debata do marsuru Ibana. Na marlapatan ma i, huria na marsada di bagasan haholongon i dohot naung gabe panean di hasangapon sogot i, huhut do i gabe ulaula panindangion tu portibi on taringot tu Kristus na sinuru ni Debata. Na tardungdung hita do i antara lain marhite na menyikapi visi ni HKBP songon huria na inclusif. Hombar tusi, sipareahanta ma asa sahat hurianta tu hajongjongan na menjadi gereja untuk orang lain.

jkt.06.05.2013/mvs

Read More..