Rogate

SERMON JAMITA MINGGU ROGATE, 5 MEI 2013

Rom 12:9-12

Patujolo

Dua bagian bolon do surat si Paulus na tu halak Rom. Na parjolo, bagian teologis-soteriologis (bd.1-11). Disi, dipajojor do angka na pinatupa ni Debata bahen haluaon ni jolma (indikatif yang besar). Paduahon, bagian etis (bd.12-16). Di bagian i dipasingothon do angka sipatupaon ni jolma na hombar tu ulaon haluaon naung pinatupa ni Tuhan i (imperatif yang besar). Songon naung pinalua, ingkon hangoluhonon ni angka na porsea i do ngolu na berpadanan tu haluaon i. Angka sipaingot na taringot tusi diojakhon do di na dua ayat parjolo ni bindu12 on na mandok, “Na huapoi ma hamu ale angka dongan, marhitehite asi ni roha ni Debata: Pasahat hamu ma dagingmuna bahen pelean na mangolu, na badia, na hinalomohon ni Debata; i ma hadaulaton ni na marroha. Jala unang gabe sarombang hamu dohot portibi on, alai gabe imbaru ma hamu dung muba pingkiranmuna, asa tau hamu manimbangi lomo ni roha ni Debata, i ma na uli, na hinalashonNa dohot na sun denggan.” Turpuk di hita ari on, i ma rincian ni sipaingot ojahan i di parngoluon dohot parsaoran ni angka na porsea sesama na porsea.

            Hatorangan

“Unang ma marpangansi holong ni roha i.” Holong ni roha manang haholongon, sada sian angka hata na balga do i di Buku Nabadia i. Mulahulak do i tarjaha, mulahulak dihatindanghon, mulahulak diparentahon. Alai aha do holong ni roha i? Di sandok Bibel i ndang adong jumpang sada defenisi na lengkap. Ndang hurang, alai mansai godang do hatorangan anggo taringot tu beha do haholongon i. Angka na tarsurat di 1 Kor.13 ma rupani na gumodang manaringoti i. Alai – sahali nari – anggo taringot tu aha do holong ni roha manang haholongon i, ndang adong defenisi na lengkap. Tutu, di Kol.3:14 dilehon si Paulus do sada defenisi na jempek, i ma rahutrahut ni nasa harimpason (pengikat yang mempersatukan dan menyempurnakan), alai hira na so pintor boi do i pangkeon songon referensi laho mangantusi aha do haholongon i. Alai boasa so adong? Na deba mandok, ai na balga situtu do haholongonon i. Ala ni balgana, ndang tarsimpulhon i di bagasan sada defenisi na jempek. (Defenisi, somalna sai dirumushon halak do i di bagasan pandohan na jempek, ndang hea ganjang apalagi mansai ganjang). Nang pe songon i, marojahan di 1 Joh.4:8, ninna roha na tarrumushon do sada defenisi na sederhana. Disi didok Apostel Johannes do, “Haholongon do Debata.” Ala haholongon do Debata, manghaholongi ma Ibana. I do bangkoNa, karakterNa. Sian i bolas ma nuaeng dohonon paboa karakter ni Debata do haholongon i. Dibasabasahon Debata Haholongon i do tu hajolmaon kondisi na patauhon jolma i manghangoluhon bangko manang karakter ni Debata, i ma na manghaholongi i. Sian i bolas ma muse dohonon, ia haholongon i, i ma kondisi rohani na patauhon jolma mangolu jala marpangalaho songon Debata. Dung hadadabuna tu dosa, ndang polin be holong ni roha ni jolma i, alai nunga gabe marlaok; ndang songon panghaholongion ni Debata be panghaholongionna, sabalikna do tahe, jotjot nama i diulahon di bagasan haotoon dohot jahat ni rohana. Alai nunga ro Kristus tu portibi on, di bagasan Ibana ditompa Debata do jolma gabe na imbaru (2 Kor.5:17), jala i ma na tinudu ni si Paulus di sipaingot ojahan na tinaringotan di jolo i. Tu angka naung dipaimbaru di bagasan Kristus Jesus i, angka naung dipauba pingkiranna, dipatau do nasida muse marpangalaho songon Debata, i ma na manghaholongi di bagasan holong ni roha na pita. Mardomu tusi ma dipasingothon apostel i dison asa unang marpangansi holong ni roha i. Marpangansi (Gr. anupokritos, dissimulation, pura-pura) lapatanna, marsipaulaula manang marsipalensem. Idaon songon na manghaholongi, hape rohana dao do sian i (bersandiwara, munafik). Di bagasan sondang ni na marholong ni roha na pita i, dipasingothon Apostel Paulus ma muse, “Hagigihon hamu ma na jat.” Manghagigihon (Gr.apostugountes, abhor, jauhi). Ndang sae holan na pasidinghon, padaohon manang so mangulahon, alai ingkon adong sada sikap batin na mandok na jat i na jat, na roa i na roa, ala ni i ndang siulahonon. Laos di bagasan sondang ni holong ni roha i ma dipasingothon muse dison, “Pareak hamu ma na denggan.” Pareak (Gr.kollomenoi, cleave, lakukan), lapatanna marsilohot, marsitiopan manang marsigomos tu na denggan. Sasada Debata sambing do na denggan (pat.Mrk.10:18) Songon satu-satunya na denggan, Ibana do na umboto aha do na denggan i. Taringot tusi nunga dipapatar i tu jolma di bagasan hata dohot patikNa. Jadi, na marsilohot tu na denggan i lapatanna, marsilohot tu hata dohot patik ni Debata, jala marsitutu mangaradoti dohot mangulahonsa.

“Ingot hamu ma holong ni roha sama dongan Kristen.” Hurang hona do terjemahan on. Hombar tu hata gorikna, niuji do patariparhon i songon on, “Masihaholongan ma hamu na sada maradophon na asing di bagasan holong parhahamaranggion.” Di jolo nunga niondolhon, rincian ni sipaingot ojahan i do turpuk on di ngolu ni angka na porsea. Hombar tusi, secara khusus ma diondolhon holong parhahamaranggion (Gr. philadelphia, brotherly love) di tonga ni huria. Ndang na mandok na sibolatan ni angka na porsea i holong ni rohana holan di sesama na porsea, ndang! Umbidang sian i do tahe, siulahononna do i maradophon halak saluhutna. Alai manang na beha pe, lumobi di situasi ni angka huria di abad parjolo, na tarulahon angka na porsea i do i parjolo sahali di lingkunganna na jumonok, i ma huria i. Di na mangulahon holong ni roha tu dongan (na porsea) i, siingoton ni huria do tongtong tanggungjawab panghaholongionna tu na saluhut. Taringot tusi didok si Petrus do di suratna, “Dung i holong ni roha di dongan ma di bagasan hadaulaton i, dung i holong ni roha di na saluhutna ma di bagasan holong ni roha di dongan i.” (2 Ptr.1:7) Laos di bagasan sondang ni na masihaholongan i, naeng ma huria i masipasangapan. “Masijolojoloanan ma hamu masipasangapan,” ninna. Mansai na arga do sangap di roha ni manisia. Ala ni argana, di hita Batak rupani, ‘barani do halak manginjam sangap tu babiat.’ Lomo hian do roha ni halak dipasangap,   jala tumagon do i sian na pasangaphon. Alai dison diondolhon si Paulus do, asa lomoan roha ni ganup pasangaphon sian na dipasangap antara ni na sada maradophon na asing; lebih memilih untuk menghormati satu sama lain.

“Unang sumurut ringgas ni rohamuna.” Sumurut (Gr.okneeroi, slothful/timid, lamban/ malu-malu); ringgas ni roha (Gr.spoudee, haste/eagerness/diligence, kegopohan/hasrat/ kerajinan). Na mangolu do huria di ujung ni angka ari, jempek nama tingkina paima sahat tu ujung. Diigil tingki i do parsitutuon laho mangharinggashon angka ulaon, hasrat na menggebu-gebu laho manghamonanghon saluhut tu Tuhan i. Taringot tusi ndang tama gabe marro ni losok na porsea i manang margira so tu dia. Singkat ni na sumurut, ingkon gabe partondi na girgir do huria i. Girgir (Gr.zeontes/zeoo, boil/burn, mendidih/bernyala-nyala/berkobar-kobar, marsigorgor). Sian asi ni rohaNa dibasabasahon Debata do Tondi Porbadia tu angka na porsea. Huaso do Tondi Porbadia i, huaso ni Debata na manjadihon gabe na imbaru; na so dung so, alai suman tu api na galak na torus marjillamjillam (pat.Ul.2:3). Sadalan hadirionNa i, dipasupasuhon Tondi Porbadia i do tu angka naung sinonggopanNa tondi hagogoon (pat.2 Tim.1:7) na gigir. Ndang holan sijaloon i apalagi sitengahononhon, alai sipartanggungjawabhononhon do, siulahononhon. Hombar tusi ma dipasingothon, “Partondi na girgir ma hamu;” harfiah, “Marsigorgor ma di bagasan tondi.” Marsigorgor beha? Alusna, marsigorgor laho mangoloi Tuhan i. Mangoloi (Gr. douleuontes/douleuoo, serving, menghambakan diri kepada). Ditobus  Kristus do angka na porsea i sian haholomon jala dipaunsat tu harajaonNa. Disi, na tarjou do na porsea i marrajahon Ibana, mangoloi jala manghobasi Ibana sian sandok roha na ra.

Sipaingot na mangihut mandok, “Marlas ni roha ma hamu manghirim.” Tumingkos, “Marlas ni roha ma di bagasan (ala ni) panghirimon.” Haluaon na pinatupa ni Debata di jolma (bd. 1-11) ndang marujung i di huria i manang di tano on sambing, alai siudutanNa dope i di ari sogot, di langit dohot tano na imbaru na so masohot be saleleng ni lelengna. Na manubuhon las ni roha do panghirimon i, ai sintong jala tontu do sihirimon i. Ndang tarida dope i nian, jala ndang adong tanda na boi idaon na mambuktihon hasintonganna. Alai di bagasan haporseaon i dapotan do angka na porsea i di pos ni roha dohot pamotoan na tontu taringot tu panghirimonna na so tarida i (pat.Heb.11:1), gabe marlas ni roha paimaimahonsa. Angkup ni na marlas ni roha di bagasan panghirimon i, diharingkothon na porsea i do habengeton ni roha. Ari hasusaan do tingki parujungan i (pat.Eps.5:16); ai marrimas situtu do disi Sibolis i ala diboto otik  nama tingkina (pat.Pgk.12:12) Parmaraan na mansai balga do i di angka na porsea (pat.Mat.24:21), na mangigil habengeton ni roha. Hombar tusi ma dipasingothon muse, “Marbenget ni roha ma di haporsuhon.” Benget ni roha manang habengeton (Gr.hupomenontes/hupomenoo, show endurance, bertahan); haporsuhon (Gr.thlipsei/thlipsis, persecution/affliction, hambatan/kesengsaraan). Ndang tarsirang haporsuhon sian ngolu ni na porsea, konsekuensi ni hadodomuna tu Kristus i do i. Jesus sandiri mandok, “Haporsuhon do jambarmuna di portibi on.” (Joh.16:33) Sadalan tusi si Paulus mandok, “Ingkon bolusonta do lan haporsuhon, laho bongot tu harajaon ni Debata.”) Ul.14:22); jala, “Ndang tarbahen so hona lele nasa na naeng marparange na daulat marhitehite Kristus Jesus.” (2 Tim.3:12) Maradophon i, ndang sae holan sabar (konotasina pasif), alai ingkon martahan (konotasina aktif) do. Na parpudi, “Jugulhon hamu ma tangiang.” Jugulhon (Gr.proskarterountes/proskartereo, continue all the time, bertekun) lapatanna, manongtong (pat.Kol.4:2) martangiang. Manongtong martangiang, ndang na mandok martangiang torus (non stop), alai mangolu torus di bagasan tangiang.

            Renungan

Jamita on diturpukhon do tu Minggu Rogate. Na marharoroan do goar ni Minggu i sian hata Latin rogatio, rogare manang rogarum na mandok, mangido manang mangelekelek. Di huria khususna, songon na boi idaonta di almanak, dilapathon do i dohot martangiang. Hombar tu parsagi ni sada taon parhuriaon, Minggu Rogate (Rogation Sunday) manang Minggu Tangiang do na manjoloani Pesta Parningotan di Hananaek ni Tuhan Jesus. (Pamanat ma huhut: Laos minggu taringot tu tangiang do na mangihut tu Pesta Hananaek i, i ma Exaudi) Na disangajo do i, asa unang adong kesan na gabe dao jala sirang na porsea i sian Kristus Tuhan i dohot sian Ama i (naung patar di bagasan Anak i) ala ni hananaekNa i. Manaek pe Jesus i jala hundul di siamun ni Debata, sai domu do hita tu Ibana dohot tu Ama i jala bolas martangiang laho pasahathon sandok pangidoan dohot elekelekta tu Ibana. Mansai ringkot partangiangon i, ai dipatuduhon i do hajongjonganta songon na porsea. Na porsea do martangiang, na so porsea ndang, ai tu aha jala tu ise ibana martangiang anggo so adong do na dihaporseai? Angkup ni i, mansai ringkot partangiangon i, ai dung hananaek ni Tuhanta Jesus tu surgo, nunga songgop be tingki parujungan, masa penantian di haroro ni Kristus paduahalihon. Ari hasusaan do i, ai marrimas situtu do disi Sibolis i ala diboto otik nama tingkina. Ala ni i dipasingothon do tu hita asa manangkas rohanta (1 Ptr.4:7) jala manongtong (Kol.4:2) hita martangiang. Aha ma sitangianghononta? Marojahan tu turpuk di hita ari on, adong manang piga na naeng dohonon.

Na parjolo, asa masihaholongan angka na porsea i di bagasan holong ni roha na pita. Holong ni roha do nilai utama di angka na porsea. Kondisi rohani na binasabasahon ni Debata do haholongon i, na patauhon jolma mangolu jala marpangalaho songon Ibana. Alai ndang masalpuhu ia nidok, ndang sai diantusi halak be lapatan ni holong dohot na manghaholongi di tingki on. Ndang holan di masyarakat, tarmasuk do di tonga ni huria.  Ndang sai pita be holong ni roha ni jolma i, nunga gabe marlaok; adong na marpangansi, marsipaulaula, marsipalensem manang marpambuat; idaon songon na manghaholongi, hape rohana dao do sian i. Sitangianghononta do asa lam tu pitana huria di bagasan holong ni roha dohot panghaholongionna. Molo lam pita huria i di holong ni roha dohot panghaholongionna, lam sisi do angka na jat, lam timbul angka na denggan, jala jumpang na masipasangapan sian toruk ni rohana be.

Na paduahon, asa lam gigir angka na porsea i mangoloi Tuhan i. Di jolo nunga nidok, dung hananaek ni Tuhanta Jesus Kristus, nunga songgop be tingki parujungan. Jempek nama tingkina paima sahat tu ujung i. Songon angka halak na porsea na tarjou do hita mangharinggashon nasa ulaon na denggan di tongatonga ni huria, masyarakat dohot bangso bahen barita dohot hasangapon di Tuhanta Jesus Kristus naung monang jala mangarajai i. Taringot tusi, ndang tama hita halak Kriten marro ni losok manang margira so tu dia. Sitangianghononta do asa gabe partondi na gigir jala na marsigorgor sandok na porsea, di bagasan semangat na berkobar-kobar laho mangoloi Tuhan i.

Na patoluhon, asa marlas jala marbenget ni roha ma di bagasan panghirimon.” Sahali nari, marhite hananaek ni Tuhanta Jesus Kristus nunga songgop be tingki parujungan, masa penantian di haroroNa paduahalihon laho mangalap jala pabongothon angka na porsea tu hangoluan dohot halalas ni roha na manongtong, na so mansohot saleleng ni lelengna. Na manghirim do hita disi, jala naeng i ma na mewarnai ngolunta di tingki on. Dohot hata na asing, sihangoluhononta do halalas ni roha sogot i di ngolunta sinuaeng on.  Ndang na mura i, ai songon na nidok ondeng, di sisi na asing, ari hasusaan do tingki parujungan i, ai marrimas situtu do disi Sibolis i ala diboto otik nama tingkina. Parmaraan na balga do i di angka na porsea, na mangigil habengeton ni roha. Habengeton na aktif, na martahan, ndang holan sabar manang pasrah. Sitangianghononta do asa jumpang las ni roha dohot habengeton na songon i di hita di na mangadopi angka masalah dohot hambatan na taadopi di manang piga inganan nuaeng di Indonesia on. Ndang sae hita holan sabar, alai ingkon barani do martahan, barani mangalusi ganup na manungkun hita taringot tu na tahirim dohot na tahaporseai.  

jkt.01.05.2013/mvs

Read More..

Jubilate

SERMON JAMITA MINGGU JUBILATE, 21 APRIL 2013

Ps.66:1-7

Turpuk (Edisi Revisi)

            Pujipujian tu Debata ala Surung ni PangarajaionNa

66 Tu uluan ni Parende. Ende Psalmen. Ende sian si David

1 Marolopolop ma tu Debata, ale hamu sandok tano!

2 Endehon ma hasangapon ni GoarNa,

bahen ma marsangap pujipujianNa!

3 Dok ma tu Debata, “Songkalna i Ho di angka pambahenanMu!

Ala ni hinatimbul ni gogoM ingkon tunduk tu Ho angka musuM.

4 Ingkon sandok tano on marsomba tu Ho,

jala marende di Ho, marende nasida di goarMu.” Sela

5 Ro jala ida ma angka pambahenan ni Debata,

songkal do Ibana di pambahenanNa maradophon manisia.

6 Dipauba Ibana do laut i gabe na mahiang,

mardalan pat do nasida manaripari aek magodang.

   Antong marlas ni roha ma hita di bagasan Ibana.

7 Mangarajai do Ibana marhitehite hagogoonNa i salelenglelengna,

mangaranapi mataNa tu angka bangso,

   asa unang dipaginjang angka panggunturi dirina. Sela

Sermon

            Patujolo

Mangihuthon rumang dohot pamangkena, tarrajum do Ps.66 pambuatan ni turpuk di hita ari on tu psalmen huria (mazmur jemaaat), i ma samansam psalmen na niendehon manang na tinangianghon ni halak Israel di angka parpunguan peribadahannasida. Alai mangihuthon isina, tarrajum do psalmen on tu psalmen pujian (mazmur pujian), i ma psalmen na niendehon manang na tinangianghon ni bangso i laho patimbulhon Jahowa, Debata ni Israel ala ni habalgaon, hasangapon dohot hamuliaonNa naung pinapatarNa di angka pambahenanna.

Di Padan Narobi hata Heber, dibahen do ulu ni Ps.66 on lamanatseeach siyr mizmowr. (Di na 150 psalmen i, adong 55 na marjudul lamanatseeach). Ndang tarboto be lapatan asli ni goar i. Di Alkitab, diterjemahkan do i dohot: Untuk Pimpinan Biduan. (Niuji do patariparhon i tu hata Batak marhite: Tu Uluan ni Parende, songon na tarjaha di ginjang i) Na deba, menerjemahkan i dohot: Supaya Dibawakan dengan Musik. Sian i bolas ma dohonon, sada petunjuk pemakaian do i. Songon na taboto, dipangke do angka psalmen i di parpunguan manang kebaktian ni halak Israel. Taringot tu pamangkena, diaturhon ma i di ulu ni ganup psalmen i. Adong do rupani na holan diendehon, adong na mardongan musik, mardongan sipiltikon dohot angka na asing. Na gabe sipaingot ma i tu uluan ni parendeon manang parmusikon di ganup kebaktian asa diboto dia sian angka i na holan diendehon, dia na mardongan musik, dia na mardongan sipiltikon, dohot angka na asing. Hombar tusi, di deba terjemahan dipadomu do na dua i. Taringot tu Ps.66 on rupani, di New Revised Standard Version (NRSV) dibahen do songon on: To the Leader. A Song. A Psalm. Ps.61, di The New King James Version (TNKJV): To the Chief Musician. On a stringed instrument.

Di Bibel Batak, dibahen do ulu ni Ps.66 on: Ende sian si David. (Ndang apala torang boha partubu ni i, ai di angka terjemahan na asing ndang adong i. Bahkan di bukuna, Kitab Mazmur, Pembimbing dan Tafsirannya didok MC Barth – BA Pareira do, “Penerbit Kitab Mazmur menyadari bahwa puji-pujian ini berasal dari Bait Suci yang telah didirikan sesudah pembuangan dan itulah sebabnya nama Daud tidak tercantum dalam judul mazmur ini.”) Manjonok do satonga sian na 150 psalmen i na disurathon atas goar ni si David songon i. Mardomu tusi, torop do na mangalapathon na si David do patomutomuhon angka psalmen na disurathon atas goarna songon i. Ndang sintong i, alai adong do opat kemungkinan taringot tusi. Na parjolo, na pinatomutomu ni si David. Ndang tarsoadahon, adong do tutu bahkan mungkin godang do sian angka psalmen i na pinatomutomu ni si David. Sahalak na malo marhasapi do ibana, jala di pamerengan ni halak Jahudi, ibana do na songon perlambang ni Buku Psalmen. Na paduahon, na pinapungu ni si David. Godang do sian psalmen i na so tarboto be manang na ise do na patomutomuhon. Alai ala ni isina na mansai arga, mangolu do psalmen i di tongatonga ni halak Israel songon bangso ni Debata. Di angka tingki na mangihut, dipapungupungu ma angka psalmen i, jala si David ma sada na godang berperan mangulahon i, gabe dijalo halak ma na pinapunguna i atas goarna. Na patoluhon, disurathon atas goar ni si David. Halak na asing do na patomutomuhon alai sangajo dibahen atas goar ni si David. Pangalaho na songon i somal do di tingki na galia. Na paopathon, adong hadosan ni pengalaman hidup ni halak na patomutomuhon psalmen i tu pengalaman hidup ni si David. Tangkasna, halak na asing do na patomutomuhon psalmen i, alai ala adong hadosan ni pengalaman hidupna na gabe latar belakang ni psalmenna i tu pengalaman hidup ni si David gabe dijalo halak ma i songon psalmen ni si David. Rupani, Ps.51; mansai suman do isina tu pengalaman ni si David di na mangalangkup si Batseba. Alai di ay.20 nunga ditaringoti parpsalmen i naung sega parik ni Jerusalem jala membutuhkan perbaikan. Tontu do, ndang masa dope i di tingki ni si David. Sian i torang, ndang si David na patomutomuhon Ps.51 i.

Di ay.4 dohot 7 ni turpuk on martaringot do hata ‘sela’ (71 hali di sandok Buku Psalmen) Hira satolop do sude halak mandok, tanda musik manang liturgi (a musical or liturgical sign) do i, alai manang na dia lapatanna ndang tartontuhon be nuaeng. Ala ni i ndang pola ingkon taringotan i di hatorangan ni turpuk dohot di jamita.

            Hatorangan ni Turpuk

Sada sian ciri ni psalmen pujian (madah) i ma sosososo manang ajakan tu pamujion. Pamujion tu Debata, ndang sae i diulahon holan sahalak dohot di lingkungan na metmet, alai ingkon na diperluas do i tu angka dongan, tu angka na tinompa bahkan tu sandok tano on, tu angka parlangitan dohot tu banua ginjang. Songon i ma di turpuk on, diajak parpsalmen on do sandok tano on marolopolop tu Debata. Marolopolop (Hb.haariy`uw,  make a joyful noise, bertempik sorak) mandok, marsoara na gogo manang aklamasi mangarajahon manang martuhanhon Jahowa. Nunga intervensi Ibana tu sejarah, dipatupa pambahenan angka na balga bahen haluaon ni portibi on. Menyikapi i, ndang adong be na dumenggan sian na manjangkon jala mangolophon Ibana gabe Tuhan jala Raja.

Ajakan tu pamujian i diuduti dope, didok, “Endehon ma hasangapon ni GoarNa, bahen ma marsangap pujipujianNa.” Hasangapon (Hb.kabowd-, honour, kemuliaan), ndang  tarsirang i sian hadirion ni Debata. Jotjot do Debata papatar diri marhite sangapNa, i ma hatiuron na songkal, na badia jala na mandokdohi. Molo tarida hatiuron na songon i, tanda na pasti do i naung hadir Debata di inganan i. Laos songon i do dohot goar ni Debata, na mewakili diriNa do i. Jadi molo disosohon dison, mangendehon sangap ni goar ni Debata, na niondolhonna disi, i ma na mangendehon Debata sandiri sandiri; mangendehon marhitehite soara na marlogu mardongan musik. Luhutna i ndang boi ulahonon gait, alai ingkon di bagasan habadiaon na tama do, hormat, sangap jala mulia.     

Di ay.3, ditaringoti do isi ni ende i na jala na gabe alasan ni pamujion manang olopolop i, didok, “Dok ma tu Debata, ‘Songkalna i Ho di angka pambahenanMu! Ala ni hinatimbul ni gogoM ingkon tunduk tu Ho angka musuM.’” Na songkal (Hb.nowraa`, terrible, dahsyat) do Debata. HasongkalonNa i dipapatar do i di bagasan dohot marhitehite pambahenanNa angka na balga. Ditompa Ibana do langit dohot tano dohot laut dohot sandok isina jala diparmudumudu do i rasirasa nuaeng; dipalua do bangsoNa jala tu sangkap i ingkon dipatunduk do jolo angka musuNa marhitehite hatimbulon dohot hagogoonNa. Ala naung dipatunduk, ndang boi nasida so ingkon paunduk diri tu Ibana. Pandohan on dibuat do sian hasomalan na masa di Timur Tengah. Musu naung talu, ingkon papataronna do di tongatonga ni umum hatutunduk dohot partuanonna tu na monang. Songon i ma digombarhon dison, na paunduk diri do angka musu ni Debata jala mangoku martuhanhon Ibana. Marnida dohot menyadari i, lam taronjar do roha ni angka na porsea mamuji dohot mangolophon Ibana, ai lam tangkas ma di rohana paboa tutu do, na songkal do Jahowa, na timbul jala na gogo, na manarihon haluaon di angka na hinaholonganNa.

Ihut tusi, manguduti sosososo di ay.1, di ay.4 didok, “Ingkon sandok tano on marsomba tu Ho, jala marende di Ho, marende nasida di goarMu.” Digombarhon parpsalmen i do disi panghirimon di bagasan sosososo tu pamujion i, paboa na ro do muse sada tingki na sandok tano on marsomba tu Jahowa jala marende di goarNa. Ndang sian na tarpaksa, songon musu na talu, alai sian rohana na ra do ala panandaonna paboa Ibana do Tuhan sasadasa, na timbul jala na songkal na patut sombaon jala pujion ni sandok tano on. Keyakinan na pasti taringot tu haroro ni tingki i, gabe motivasi na balga do i manosoi halak laho mamuji dohot mangolophon Debata. 

Hombar tusi, di ay.5 dijou jala disosoi ma sude asa ro jala marnida pambahenan ni Debata, didok, “Ro jala ida ma angka pambahenan ni Debata, songkal do Ibana di pambahenanNa maradophon manisia.” Marhite na marnida dohot na manimbangi angka pambahenan ni Debata tartanda do manang na ise jala boha do Ibana. Na songkal do Ibana, na timbul, na peduli jala berbuat bagi manusia, na tama pujion jala olophonon.

Songon referensi, di ay.6 ditaringoti do pambahenan ni Debata na paluahon halak Israel sian Misir, khususna di Laut Rara dohot di aek Jordan. “Dipauba Ibana do laut i gabe na mahiang,” ninna. Marhite i dipapatar Debata do huasoNa na margogo mampartahanhon dohot paluahon bangsoNa. Na gabe singotsingot na pasonggothon roha do i huhut tu angka musuNa paboa na marhuaso do Ibana mandanggurhon dohot mangalengsehon angka na hum mangalo Ibana marhite cara na so tarbayanghon jolma hian. Taringot tu na masa di batangaek Jordan didok, “Mardalan pat do nasida manaripari aek magodang.” Mangihuthon Jos.3:14-17, di na taripar halak Israel di Jordan laho mamongoti Tano Kanaan, tongon di ombas ni gotilon do, jala ari parudan do di tano i. Ala ni i, magodang do aek Jordan i jala binsat aekna sahat ro di pasirna. Aek Jordan i sandiri (bagian na marisi aek sepanjang masa) marhira 30 meter do bidangna sian na sambariba tu na sambariba nari, tolu tu opat meter ia bagasna. Alai di siamun dohot hambirangna, adong do pasir (palung) marhira tolu kilo meter bidangna sian na sambariba tu na sambariba nari. Di ari parudan, binsat do aek i jala digohi sandok pasirna. Hombar tusi, so marhite alat-alat penyeberangan, hira so hatariparan do i di ari udan. Alai marhite pambahenan habalgaon ni Debata Jahowa, tolak do aek i, gabe boi halak Israel taripar mardalan pat. Pambahenan haluaon ni Debata tu Israel na di Misir i, na di Laut Rara dohot Aek Jordan khususna, ndang marujung i olat ni tingki i sambing, alai na mamboan lapatan do i tu haluaon ni sandok portibi on jala na diuduti ganup tingki. Ala ni i, ndang sae i halashonon jala pujihonon ni halak Israel satingki i, alai ingkon ganup do sundut ambil bagian disi. Hombar tusi di ujung ni ay.6 on, disosoi parpsalmen i do angka dongan satingkina dohot manghalashon pambahenan haluaon ni Debata tu angka ompu na robi i, didok, “Antong marlas ni roha ma hita di bagasan Ibana.”

Di ayat parpudi, sahali nari diondolhon do panghirimon di bagasan sosososo pamujian i, didok, “Mangarajai do Ibana marhitehite hagogoonNa i salelenglelengna.” Molo didok salelenglelengna, ndang holan na manudu tu zaman na dao i manang tu eschaton, alai na marhahonaan do i tu ganup tingki dohot sundut. Torus do Debata mangarajai di bagasan hagogoon. Sadar di hagogoonNa i, marpos ni roha ma angka naung tinobus, alai mabiar do anggo angka parjahat. Marpardomuan tu pangarajaionNa i, didok dope, “Mangaranapi mataNa tu angka bangso.” Angka bangso lapatanna, sandok bangso, sandok jolma. Diida do sude pangalaho dohot pambahenan ni ganup, ndang adong na bolas martabuni sian adopanNa, jala marhuaso do Ibana manguhumi. Hombar tusi, dipasingothon ma “Asa unang dipaginjang angka panggunturi dirina.” Panggunturi manang pemberontak i ma halak na so rade mangolu di toru ni ‘kekangan’ ni patik ni Debata, na naeng bebas jala marpangalaho hombar tu rohana sandiri. Boi do i bangso, boi punguan, boi marsasahalak. Alai uang ma dirimpu agia ise na tartaluhonsa Debata manang tung boi ibana maporus sian huasoNa. Na paginjang diri do halak na mangarajumi aman ibana mangolu di ruar ni patik ni Debata, jala sai na rendep do i di toru ni huaso ni Tuhan i.

            Renungan

Turpuk on, jamita tu Minggu Jubilate. Jubilate mandok, marolopolop. Olopolop dohot na marolopolop, pangalaho na somal do i di tano on. Ndang sarupa, alai paasingasing do sibonsiri dohot rumang ni olopolop dohot na marolopolop i. Marasing do olopolop ni partigor sian olopolop ni parjahat; songon i muse, marasing do olopolop ni bangso ni Debata sian olopolop ni na so bangso. Molo disosoi mingunta sadari on ma hita asa marolopolop, tontu do, nda tung holan asal marolopolop boi, alai ingkon torang do di hita ganup sintuhuna, torang alasanna, songon i dohot pangalahona. Hombar tusi, marojahan tu turpuk di hita ari on, adong ma manang na piga na ringkot pamanatonta.

Ise do siolophononta? Didok di ayat na parjolo ni turpuk on, “Marolopolop ma tu Debata, ale hamu sandok tano on!” Sian i torang, Debata do alamat ni parolopoloponta i, ndada angka na di hasiangan on. Marolopolop tu Debata lapatanna, marsoara manang aklamasi mangarajahon manang martuhanhon Jahowa, mangokui jala manghatindanghon Ibana do Raja jala Tuhan, sigomgom angka raja, sigomgom angka bangso, sigomgom angka punguan nang angka jolma ganup marsadasada, nuaeng dohot sogot saleleng ni lelengna. Mansai ringkot ma i ingotonta asa unang madabu hita tu na mangolophon, mangarajahon manang martuhanhon angka na di tano on. Holan Jahowa do Debata, Tuhan jala Rajanta, sasadasa do siolophononta. Pangolophonta di Debata na marhinorhon do i nang tu ngolunta. Molo torus manorus ngolu ni sasahalak diengge arsak, ndang tagamon sempurna perkembangan ni ngoluna. Alai di na marsorin sipata arsak i dohot las ni roha, disi do boi dumenggan perkembangan ni ngoluna. Songon i ma olopolop dohot parolopoloponta di Tuhan i, ndang holan demi Ibana, alai dohot do demi hita, ai na mamboan lapatan do i tu perkembangan ni ngolunta.

Boasa ingkon olophononta Debata? Alusna, ai na songkal jala na timbul do Ibana, na sangap jala marmulia. Paboa na songkal Ibana dipapatar do i di bagasan dohot marhite angka pambahenanNa. Ditompa do langit dohot tano dohot laut dohot nasa isina jala diiringiring sahat ro di nuaeng, ditompa do dohot hita jala disarihon hangoluanta ariari. Na umarga sian i, dipatupa do haluaonta sian asi ni roha dohot denggan ni basaNa. Taringot tusi, nunga dipungka i di bagasan dohot marhite haluaon ni bangsoNa Israel. Diparuar do nasida sian Misir marhite tangan na gogo, dipalua di Laut Rara jala dipataripar di aek Jordan. Luhutna i ndang marujung olat ni tingki i sambing, alai songon persiapan do tu haluaon sipatupaonNa di sandok manisia, ai sian tongatonga ni Israel na pinalua jala naung jinadihonNa gabe bangsoNa i do paroonNa Mesias i, Sipalua na pinarbagabaga i. Nunga saut ro Kristus i, manaon jala mate, dung i hehe jala manaek tu banuaginjang. Di bagasan Ibana dipatupa Debata haluaon ni portibi on, ditaluhon dosa, sibolis dohot hamatean. Pambahenan na luar biasa do i, na songkal jala marmulia na boi holan halonganghonon, pujihonon jala olophononta.

Boha do hita mangolophon Debata? Taringot tusi, na parjolo didok, “Endehon ma hasangapon ni GoarNa.” Ende, i ma ekspresi ni jiwa, hapuasan ni tondi dohot roha. Jadi marende mandok, papuashon na di roha dohot tondi. Angka naung mangarajahon dohot  martuhanhon Debata, Debata do di bagasan rohana, jala sangapNa do lomo ni rohana, laos i ma na dipapuas di bagasan dohot marhitehite endena. Adong dua na mansai arga di ende dohot na marende i, i ma hatana dohot loguna tarmasuk musikna. Na marguna do hatana i songon jamita tu roha jala loguna i songon panaiti roha. Ala jamita do ende i, parjamita do parende i, jala na marjamita do na marende i. Hombar tusi, na marlapatan situtu do ende i manosoi halak bahkan manosoi sandok tano on laho mangolophon Debata, manosoi mangarajahon jala martuhanhon Ibana. Alai asa adong jamitahononta, ingkon na jolo manjalo do hita sian Ibana. Na tarpatupa hita do i marhite haoloonta ro marnida angka pambahenan ni Debata. Tangi jala unduk hita tu hata dohot patikNa, alai tapasiding ma anggo tondi panggunturi, na so olo unduk jala na so rade aturon.

Jkt.17.04.2013/mvs

    

  

  

   

     

       

Read More..