14 Trinitatis

SERMON JAMITA TU MINGGU 14 DUNG TRINITATIS, 5 SEPTEMBER 2010
Ul.10:28-34

Patujolo

Di na laho manaek Tuhan Jesus tu banua ginjang, ditonai do tu siseanNa i, didok: “Gabe sitindangingKu ma hamu di Jerusalem dohot di sandok Judea dohot di Samaria, sahat ro di ujung ni tano on!” (Ul.1:8). Dung ro Tondi Porbadia i, pintor dipatulus sisean i do i di Jerusalem, gabe rarat ma Barita na Uli jala jongjong huria ni Kristus di huta i. Alai tar leleng dope asa sahat i tu Judea jala taripar tu Samaria dohot tu ujung ni tano on. Nang pe mansai torang parenta i, adong dope na ambat di roha ni sisean i manorushon Barita na Uli i tu lingkungan na umbidang lumobi tu ruar ni hajahudion. Ingkon marhite onjar sian ginjang do asa malua nasida sian i. Taringot tusi, halongangan do dalan ni Tuhan i ai dipatupa do i parjolo sahali marhite sitaonon. Dung mate si Stepanus (Ul.6:6-7:60) masa do pangaleleon di Jerusalem, gabe marserak ma na porsea i tu Judea dohot tu Samaria (Ul.8:1). Di parserahanna i, dijamitahon nasida do hata i (Ul.8:4), gabe rarat ma Barita na Uli i di Judea dohot Samaria. Dung i adong ma usaho na sporadis mamaritahon Barita na Uli i tu sipelebegu. Parjolo tu sipelebegu na manghabiari Debata (i ma sipelebegu na menaruh minat tu ugamo Jahudi, alai ndang dope tarrajum tu proselit) na pinatupa ni si Pilippus tu parpangkat na sian Etiopia (Ul.8:26-38) dohot si Simon Petrus tu si Kornelius, sahalak letnan (Gr. hekatontarchees/centurion), komandan ni saratus soldadu na masuk tu horong Italia (10:1) na maringan di Kesarea. Sabagian sian barita ni si Kornelius i ma turpuk ari on.

Hatorangan

Didok si Petrus: “Subang bolon do i di halak Jahudi mandongani manang manopot halak na sian bangso na asing.” Sasintongna nian, ndang adong patik na mangorai halak Jahudi marsaor tu halak na asing. Mangorai mangulahon ruhutruhut ni hasipelebeguon, adong (pat.3 Mus.18:24-30); songon i na martondong, mangalehon boruna tu anak ni sipelebegu manang sabalikna mangalap boru ni parbegu di anakna (pat.5 Mus.7:3-12; Esr.9:11-12). Alai na mangorai marsaor di parngoluon ariari, ndang adong. Jadi, na nidok ni si Petrus dison pingkiran ni halak Israel do i di na memaknai dohot menyikapi hajongjongannasida songon bangso na pinillit ni Debata. Ala naung dipillit Debata nasida gabe bangsoNa, didok rohanasida ndang patut be nasida mandongani (Gr. kollasthai, sian kollaoo/I keep company/menemani) manang manopot (Gr. proserchesthai, sian proserchomai/I come up to/mendatangi) na so Jahudi, lapatanna ndang boi saor tu parbegu. Na badia do nasida, na ramun ia parbegu i di rohanasida. Ala ni i, manang na di rumang dia pe i, di paralealeon rupani manang di partigatigaon, tung na so jadi do ramunan nasida dirinasida marhitehite na marsaor dohot sipelebegu i. Ndang boi Jahudi mangido nasa sipangidoon sian parbegu (pat.Joh.4:9), ndang boi manamuei manang manjangkon tu jabuna, jala ndang boi bongot tu bagas ni na leban jala rap mangan dohot nasida (pat.Ul.11:3). Niantusan do i, ai di Israel adong do patik taringot tu na jadi dohot na so jadi panganon (3 Mus.11:1-15:33) na marasing sian aturan ni sipelebegu. Na so jadi panganon di Jahudi, sai adong do i na boi panganon di parbegu. Jadi molo mangan nasida di jabu ni parbegu, na boi tarramun do nasida ala tarpangan sipanganon na so ganjing panganon. Songon anak ni jaman dohot produk ni budayana, sisean i pe, tarmasuk si Petrus ndang malua dope sian i, gabe ndang olo nasida marsaor dohot halak na sian bangso sipelebegu. Lobi sian i tahe, gabe adong ma di nasida keengganan mamaritahon Barita na Uli i tu angka sipelebegu. I ma alana umbahen na so pintor taripar sisean i mamaritahon Barita na Uli i tu Samaria dohot tu ujung ni tano on. Alai ndang boi torus songon i. Ala ni i, marhitehite alatan (ay.11-16), diajari Debata do si Petrus asa malua sian sikap berpikir dohot sikap bertindak na songon i. Sampe tolu hali i masa, laho mangondolhon hinasintong ni parsiajaran na sian Tuhan i jala asa tung pos situtu roha ni si Simon Petrus mambuat haputusan taringot tu na patut patupaonna. Marsiajar, lapatanna paubahon pangalaho (Belajar, maksudnya mengubah tingkah laku). Songon i do si Petrus, dung marsiajar sian na niidana, muba do sikap berpikirna, ai didok ma: “Na so jadi goaron jolma dia pe ramun manang so ias.” Di bagasan dohot marhitehite Jesus Kristus na tarsilang i, dorpi parholangan na manirang jala paasinghon Jahudi sian na so Jahudi, nunga ditangtangi jala dilohai. Rap sipaluaon do sude, Jahudi dohot na so Jahudi. Tu sangkap i, ingkon tu duansa do baritahonon Barita na Uli i. Ndang ala Jahudi Jahudi i, gabe talup hasahatan ni Barita na Uli; jala ndang ala na so Jahudi parbegu i gabe so talup hasahatan ni Barita na Uli. Sadalan tu hamumuba ni sikap berpikir i, muba do dohot sikap bertindak ni si Petrus, ai didok: “Ala ni i umbahen na so manjua ahu ro, di na taralap i ahu.” Ndang dirajumi ibana be parbegu i na so patut tamuean, pardonganon jala topoton, ai disi sahat na sinuru ni si Kornelius i jala dipasahat tonana, pintor dijangkon do nasida jala ditamuei; dung i manogotna i, rap borhat ma nasida tu Kesarea jala dibongoti jabuna (ay.17-26).

Andorang so dipasahat dope Barita na Uli i, disungkun si Petrus do si Kornelius, didok: “Ala ni hata dia do umbahen na dialap hamu ahu?” Sasintongna nian, taringot tusi, nunga dibege ibana i sian suruan na manjou ibana (ay.22). Alai naeng begeonna do i langsung sian si Kornelius. Gabe dipatorang ma tu ibana pangalamanna opat ari andorang so i, didok: “Boho songon on, di pungkul tolu (Gr. enateen/ninth/kesembilan), martangiang do ahu di bagashon.” Di halak Jahudi, dipungka do paretongan ni tingki tongon di habibinsar ni mataniari, i ma pungkul 00.00. Jadi pungkul 09.00 Jahudi, dos ma i tu pungkul 03.00 (15.00) GMT. Tongon di na martangiang i diida ibana do di alatanna sahalak parulos na marlinanglinang na marsuru ibana manjou si Simon Petrus tu Joppe. Umbege i, laos di ari i pintor dipaborhat ibana do naposona laho patulushon parenta i (ay.8). I ma ari parjolo. Rupa, lobi do parsadarian sian Kesarea tu Joppe, ai dung pe marsogotna i asa sahat na sinuru i tu inganan ni si Petrus (ay.9). I ma ari paduahon. Ala naung botari, marborngin ma nasida disi, jala dung pe marsogotna i asa borhat nasida (ay.23) raphon onom halak na mandongani ibana sian Joppe (11:12). I ma ari patoluhon. Ra, marborngin do nasida di tongan dalan, ai dung pe marsogotna i di botarina asa tolhas nasida tu Kesarea. I ma ari paopathon. Sahali nari, di na martangiang i diida si Kornelius do di alatanna sahalak parulos na marlinanglinang. Surusuruan ni Debata do i na papatar dirina marrumanghon jolma (pat.ay.3). Dipaboa surusuruan i do naung ditangihon Debata tangiang ni si Kornelius i jala diingot angka asiasina. Di ay.3 didok, angka tangiangna, ai mangihuthon ay.2 sahalak na ondop do ibana martangiang jala godang do asiasina tu bangso i. Sian parenta ni suruan i bolas do dadapon ni roha, siangkup ni na manghabiari Debata mangihuthon ruhut ni hajahudion, nunga laos dibege ibana barita taringot tu Jesus Kristus, gabe ringkot ma rohana umboto i. Laos i ma sada sian sintuhu ni tangiang (pokok doa) na sai tinangianghonna tu Tuhan i, naeng jaloonna nian gumodang hatorangan dohot pangantusion di haluaon i. Taringot tusi ndang dipasahat Debata i tu sasahalak di bagasan hapunjunganna, alai di bagasan pardomuan dohot kebersamaan tu angka na porsea do di huria i. Hombar tusi, disuru Tuhan i do si Kornelius manjou si Petrus tu Joppe asa i na patoranghon tu ibana umbagas taringot tu haluaon na di bagasan dohot na marhitehite Jesus Kristus i. Dalam rangka pangebation di huria na marserak dohot na jongjong ala ni pangaleleon i (pat.9:32), na mian do Apostel Petrus hatiha i di huta Joppe, di bagas ni si Simon sipauli hulinghuling na maringanan di topi laut. Taringot tu si Simon on, dungkon ni goar dohot ulaonna ndang adong be na binoto. Alai ra, sahalak Kristen do ibana na manjangkon si Petrus tu jabuna. Diargai si Kornelius do haroro ni si Petrus i, didok do: “Denggan do antong dibahen ho, ala ro ho.” Nda boi do si Petrus i manjua ro? Sarupa tu angka donganna, nda boi do ibana torus marsitiopan tu pingkiran na ojak di hajahudion gabe so olo marsiajar sian alatan songon na tinaringotan di ginjang i? Sahat tu convent ni angka apostel songon na tarjaha di Ul.15, tumorop dope sian na porsea di huria na parjolo i na sai marsitiopan tu pingkiran i. Ala ni i, molo pintor boi haruar si Petrus sian i, tung na marlapatan situtu do i tu harararat ni Barita na Uli i; na patut argaan do i jala halashonon. Na parpudi didok: “Nuaeng pe, nunga pungu hami saluhutna dison, di jolo ni Debata, tumangihon saluhutna na nidokhon ni Tuhan i tu ho.” Pos situtu do roha ni si Kornelius di haroro ni si Petrus i. Ala ni i tibu do ibana mangarade, dipapungu angka dongan dohot alealena (ay.24) manjangkonsa. Ra, nasida pe tong do naung tarrajum tu na manghabiari Debata jala dohot umbege barita taringot tu Jesus Kristus i. Dihangkung si Kornelius do na sisada kehadiran do nasida sude, i ma na marpungu di jolo ni Debata; sisada sangkap, i ma na naeng manangihon na nidok ni Tuhan i tu si Petrus. Manang di dia dibaritahon hata ni Debata, hadir do Debata disi; jadi, angka halak na manangihon i na marpungu di hadirat ni Debata do i, nda tung di adopan ni jolma manang parjamita i sambing. Ala ni i, ingkon tu Debata do buhaonna rohana, jala hataNa do naeng tangihononna. Sikap i do na hinangoluhon ni si Kornelius dohot angka donganna dison, ai ndang didok nunga pungu hami saluhutna di jolom, jala patorang ma tu hami an dohot on, alai nunga pungu hami di jolo ni Debata laho manangihon manang na dia ma na naeng dohonon ni Tuhan i.

Umbege i didok si Petrus ma: “Nunga tangkas dapot rohangku, na so siida bohi Debata.” Luhut na masa i dibereng ibana do songon partanda na tangkas paboa na so mardingkan (pilih kasih/memihak) Debata tu manang na ise pe. Songon naung niarbis di jolo i, ala ni pamilliton ni Debata, dirajumi Israel do na holan Debatanasida do Debata, ndang dohot Debata ni halak na asing. Sadalan tusi, didok rohanasida, holan nasida do na hinombaran ni Debata, na niasian dohot na pinasupasuNa, jala holan nasida do parjambar di haluaon i, ndang dohot anggo na leban. Alai – sahali nari – di na masa i diida si Petrus do na so sintong i. Dos do sude jolma, Jahudi dohot na so Jahudi, rap pardosa jala ndang dapot pujion ni Debata agia ise pe sian na dua i, ai ndang lumomo roha ni Debata mida Jahudi pardosa sian parbegu pardosa (pat.Rom 3:10, 23). Alai di duansa do dipadiri Debata asi ni roha na paluahon i. Peluang tusi sarupa do di ganup halak, ai na marpangguruan do i tu sikapna be taringot tu Barita na Uli i.

Rancangan Homiletis

Mangihuthon angka na bisuk di ilmu-ilmu sosial, di ganup bangso angka na tartanda di hasiangan on sai jumpang do na ginoar etnocentrisme, i ma pingkiran na mangarajumi na nasida do pusat ni nasa na adong. Sumurung do nasida dirajumi, tumimbo jala umbeteng; anggo angka na asing i dietong do i na tumoru. Hombar tusi, adat dohot hasomalannasida do na dirajumi dumenggan jala na umuli, ugarinasida do na dietong na humona tu nasa na margoar jolma. Tudos tusi, di na memaknai dohot menyikapi hajongjongannasida songon bangso na pinillit ni Debata, dirajumi halak Israel do angka parbegu na ramun jala na so ias. Ala ni i, subang bolon do di nasida mandongani manang manopot halak parbegu jala ndang jadi nasida mamparsaorhon bangso sileban di paralealeon manang di partigatigaon, ndang jadi mangido agia aha pe sian nasida, ndang jadi manamuei, ndang jadi mamongoti bagasna jala ndang jadi rap mangan dohot nasida. Motif na umbagas ni bangko i, i ma pingkiran na mandok na holan Debatanasida do Jahowa i, ndang dohot Debata ni bangso na asing; holan nasida do na hinombaran ni Debata, na niasian dohot na pinasupasuNa, jala holan nasida do parjambar di haluaon na pinatupaNa, ndang dohot bangso sileban.

Pingkiran sisongon i sai jumpang do di ganup tingki. Di tonga ni halak Kristen manang huria rupani, sai adong do halak na mangarajumi na dirina do na umburju, punguannasida do na dumenggan, hurianasida do na umporsea jala na umbadia sian na asing. Ndang olo i mardomu tu saluhut halak, alai dibolati do parsaoranna holan tu angka na dirajumi dos dengganna dohot badiana dohot ibana. Angka halak na songon i, marsasahalak manang marsasapunguan cenderung do i manutup diri jala mansai ringgas pahatahatahon dohot manguhumuhumi na asing. Di tonga ni masyarakat dohot bangso pe sai jumpang do tong na songon i. Di na deba, dibereng do peak ni hasurunganna i di status sosialna, di na deba di hamoraonna, di na deba nari di hapistaranna, jala di na deba nari muse di hatoroponna dohot angka na asing. Taringot tu na nidok parpudi i, nda i na taadopi jala taparungkilhon nuaeng di Indonesia on? Adong sian donganta sabangso angka na mangasahon toropna mangarajumi na nasida do na marhak manontuhon na denggan dohot na roa di Indonesia on. Sai hira nasida sambing do nampuna Indonesia on, ndang dohot angka na asing; sai hira nasida sambing do na mamparjuanghon dohot nampuna kemerdekaan i, ndang dohot hita. Hape sasintongna rap bona ni pinasa manang sambulonta do Indonesia on. Ndang adong hita panginsua dison, na torop manang na otik, rap do hita marnampunahonsa. Rap negaranta do negara on, ai dohot do hita pajongjonghon, dohot mampartahanhon, dohot mangisi marhitehite pembangunan. Sejarah nunga mambuktihon hasatiaonta tu bangso on, ai ndang hea hita ala ni haporseaon manang hakristenonta martahihon na roa taringot tu bangso manang memberontak tu negara on.

Mulak tu turpukta ari on, di bona ni sejarah ni huria i, sisean ni Tuhanta Jesus pe ndang pintor malua sian etnocentrisme ni hajahudion. Ala ni i, atik pe mansai torang do patik ni Tuhanta i mandok asa gabe sitindangiNa nasida di Jerusalem, di Judea, di Samaria sahat ro di ujung ni tano on, ndang pintor barani nasida mamaritahon Barita na Uli i tu ruar ni hajahudion. Alai ndang boi torus songon i. Marhite alatan diajari Debata do si Petrus asa malua sian sikap berpikir dohot sikap bertindak na ojak di etnocentrisme ni hajahudion i. Tutu, dung marsiajar ibana sian Tuhan i, muba do cara berpikir dohot cara bertindakna, ai ndang dirajumi be sipelebegu i na ramun manang na so ias. Ala ni i, di na ro suruan ni si Kornelius, sahalak parbegu na manghabiari Debata manjou ibana, dijangkon do nasida jala ditamuei; dung i, ditopot ibana tu jabuna, diparsaorhon songon dongan na dos. Sian parsaorannasida i lam diantusi si Petrus do paboa na so siida bohi Debata. Dos do sude jolma di adopanNa, Jahudi dohot na so Jahudi, rap pardosa do i jala ndang dapot pujion ni Debata sada pe sian nasida. Alai di duansa do dipadiri Debata asi ni roha na paluahon i. Peluang tusi sarupa do di ganup halak, ai na marpangguruan do i tu sikapna be taringot tu Barita na Uli i. Ala ni i, ndang adong alasan so mamaritahon Barita na Uli i tu ruar ni hajahudion. Tutu do, marhinorhon situtu do hamubaon ni si Petrus i tu sikap ni huria i, ai ihut tusi mardalan ma ulaon sending na lam taratur tu angka sipelebegu jala ditotophon di konvent ni angka apostel di huta Jerusalem.

Pingkiran i ma na mansai ringkot suan di roha dohot di pangalahonta. Debata ni saluhut do Jahowa i jala ndang siida bohi Ibana. Ndang dihombari jala dijangkon Ibana manang ise holan ala ni punguanna, jala ndang dipasiding manang ditulak agia ise pe holan ala ni aliranna. Ditangihon do tangiang ni ruas ni huria dia pe asal dihaburjuhon jala diingot do asiasi ni na sian denominasi dia pe asal dipasahat sian denggan ni rohana. Ndang dibolati asi ni roha dohot pasupasuNa tu angka na manghabiari Ibana jala mangulahon hatigoran. Tau sipaingot ma i di hita asa unang mangarajumi diri lobi sian na asing, isara na mandok na holan di hurianasida do adong silehonlehon ni Tondi Porbadia jala holan nasida do na manjalo pangantusion taringot tu hasimoon ni haluaon. Jala songon sitindangi ni Barita na Uli i dipaingot do hita asa unang mamolati panindangion dohot panghobasionta holan tu sapunguan halak, isara dongan sahuria manang dongan sabangso. Konsumsi ni sandok hajolmaon do Barita na Uli i, na dipadiri Debata bahen haluaon ni angka pardosa sudena. Dung i, sian sisinta songon panangihon, dipaingot jamita on do hita asa unang manutup diri, ai Barita na Uli dohot pangantusion taringot tu haluaon ndang dipasahat Debata i tu jolma di bagasan kesendirianna, alai di bagasan pardomuan ni ganup tu huria i do. Dohot hata na asing, ndang adong hakristenon pribadi, hakristenon hatopan do. Na boi sahat do jolma tu haporseaon dohot haluaon di bagasan dohot marhitehite huria i, marhitehite panindangion dohot pangajaran, marhitehite parjamitaon dohot panghobasion sakramen na hinobashon ni huria marhite angka parhalado na jinou jala na pinabangkit ni Debata di bagasan dohot marhitehite huria i. Si Kornelius on ma rupani, hombar tu hatontuan dohot parsuru ni Debata ingkon jouon jala tangihononna do hataNa marhite si Petrus asa sahat tu pangantusion dohot tu haluaon i sandiri. Laos sisorminhononta ma i luhut di parsaoran dohot parngoluonta songon warga ni masyarakat, bangso dohot negaranta. Mardomu tu na nidok di jolo ondeng, asiasi ni Debata do kemerdekaan ni bangsonta on, pasupasuNa do negaranta on. Sitangianghonon jala siparjuanghononta do asa sude warga ni bangso mandai pasupasu di bagasan kemerdekaan i, unang holan deba isara na tumorop manang angka na maruntung gabe halak na maradong, gabe pemimpin, gabe pejabat manang gabe koruptor.

jkt.21.08.2010/mvs

Read More..

12 Trinitatis

SERMON JAMITA TU MINGGU 12 DUNG TRINITATIS, 22 AGUSTUS 2010
1 Kor.3:1-11

Patujolo

Surat 1 Korint i ma bagian ni korespondensi ni si Paulus dohot huria Korint. Ditongoshon sian Epesus (pat.16:8) taon c 54-55 M. Disurathon do i laho mangalusi sungkunsungkun ni huria i (7:1). Na masa do uju i di huria i paraloan ni pamingkirion taringot tu hubungan seks. Sahat tu ombas i jumpang dope di huria i pasipasi ni poda hellenistis na taringot tu dikotomi ni jolma, i ma daging dohot tondi. Di roha ni na deba, haluaon na binaritahon ni si Paulus i na marhahonaan tu tondi sambing do i. Angka naung pinalua tondina, boi do i mangulahon lomolomo ni dagingna, isara parmainanon (5:1-13). Holan dagingna i do na mangulahon i, jala ndang laho mahua tondina ala ni i. Alai di roha ni na deba, ingkon patunduhon ni angka naung malua i do dagingna asa unang gabe tarramun tondina. Ala ni i, gabe sungkunsungkun ma rohana taringot tu hubungan seks, taringot tu na mangoli dohot na marhamulian. Luhutna i disungkunhon huria i do tu si Paulus marhite surat (7:1) na disura roha dipasahat marhite si Stepanas, si Fortunatus, dohot si Akaikus (pat.16:17-18). Alai alasanna na rumonsot, i ma parsalisian na masa di huria i. Sian pangisi ni bagas ni si Kloe, dibege si Paulus na masa do di huria i parbolatbolaton (1:11). Ndang torang manang na dia bonsirna, alai sian horong na adong (ida 1:12), disura roha na marbonsir do i sian parasingasingan ni parbarita na uli na ro tu huta i. Si Paulus do na umpungka huria i, alai di pudi gabe marsada do tusi angka na porsea ala ni ulaon sending pinatupa ni si Apollos dohot si Petrus. Ndang na marasing nian Barita na Uli na binaritahonnasida, sada do. Alai songon i ma pangalahona, gabe masa do parbolatbolaton di huria i ala ni i. Turpuk on disuraton do di bagasan pardomuan tu hasadaon na umbidang, i ma taringot tu parbolatbolaton i (1:10-4:21). Marpardomuan tu parasingasingan ni parbarita na uli na nidok di ginjang i, pingkiran taringot tu habisuhon (hikmat) ma sada na dohot mewarnai parbolatbolaton i. Di roha ni na deba, sahalak na hurang berhikmat do si Paulus i, ai mapejethu do poda haluaon na jinamitahonna, ndang imbang tu filsafat angka na bagas songon na di hellenis. Mangalusi i, mamungka 1:18 dipatorang do paboa habisuhon do hata na taringot tu silang ni Kristus i, habisuhon ni Debata. Penerapan ni i ma nuaeng na tinaringotanna di turpuk on (sahat ro di ay.17).

Hatorangan

Di na ro si Paulus tu Korint jala jongjong huria i, ndang tarbahensa dope manghatai tu nasida songon na tu angka partondi. Partondi (manusia rohani), i ma angka naung rimpas (pat.2:6), naung matoras di bagasan Kristus manang haporseaon (dewasa dalam Kristus). Angka pardaging dope nasida, nambura taripar sian hasipelebeguon tu hakristenon. Isara di ruhut ni hajolmaon, posoposo dope nasida. Tu posoposo, susu dope na tarpainumhon, ndang tarlehon dope sipanganon hian (makanan keras). Songon i ma ruas ni huria Korint di mulana i, posoposo dope nasida di bagasan Kristus; angka na so rimpas jala na so matoras dope di haporseaon, ndang diboto dope manirang na denggan sian na roa. Ala ni i, ndang tarpatorang si Paulus dope tu nasida mansai bagas taringot tu habisuhon manang hahomion ni haluaon (rahasia keselamatan) na di bagasan dohot marhite Kristus Jesus na tarsilang i. Haotoon do i di roha ni portibi on. Hape sasintongna habisuhon ni Debata do i, hahomion na so hadodoan hinabagasna, na so hadongdongan hinatimbona; na so dung niida ni mata do i, na so dung binege ni pinggol jala na so dung hehe di bagasan roha ni jolma (2:9). Ndang tarjalo huria i dope i, ndang haantusan jala ndang tarhangoluhonsa. Gari nuaeng, ninna si Paulus, ndang dope. Boasa?

Ai tong dope nasida pardaging, angka na mamarangehon ruhut hajolmaon. Buktina, parbolatbolaton i. Ndang diantusi nasida dope na ingkon tu Kristus i do nasida satia jala tarihot, ai gabe dirahuthon na deba do dirina tu si Paulus, na deba tu si Apollos, na deba nari tu si Kepas (Petrus). Ra, angka ruas na parjolo ma na gumodang mangihothon diri dohot hasatiaonna tu si Paulus, angka na manjalo Barita na Uli i sian ibana. Lam ringkot do rohanasida manjaga ketokohan ni si Paulus dung ro angka guru palsu na meragukan wibawa haapostelonna angka na mandok hurang kharismatis ibana, hurang rohani, hurang hikmat jala hurang pataridahon huaso ni Tondi Porbadia. Na deba mangarahuthon diri dohot hasatiaonna tu si Apollos sahalak na pistar manghatai (pat.Ul.18:24). Na deba nari muse, mangihothon diri dohot hasatiaonna tu si Kepas. Sian 9:5 torang, ditanda huria i do si Petrus. Siangkup ni na hea ibana ro mamaritahon Barita na Uli tu huta i, ra, godang ruas na satia jala tarihot tu ibana ala diboto na ibana do sada apostel na jumonok tu Tuhan i. Masa ma parbolatbolaton, ai jongjong ma di huria i horong Paulus, horong Apollos, dohot horong Kepas jala songon reaksi tusi, jongjong ma muse horong Kristus (1:12). Ndang na mandok naung tumoras horong na parpudi on di haporseaon jala sumintong di hasatiaon dohot di keterikatanna, alai boi do i songon na masa di angka tingki parpudi on, adong huria na manggoari dirina oikoumene na ternyata tidak lebih oikoumenis, alai sarupa tu na asing tong tarihot tu tradisina jala cenderung manutup dirina. Songon i ma na opat horong i saling manutup diri, di bagasan nuansa parsalisian dohot pangiburuon ni na sada maradophon na asing.

Laos dipatuduhon parbolatbolaton i do muse na so diantusi halak Korint dope na sada do dalan haluaon na pinarade ni Debata di jolma, i ma na di bagasan dohot na marhite Jesus Kristus na tarsilang songon naung dibaritahon tu nasida (pat.Ul.4:12). Ala ni i, sada do saluhut na pinalua i, sada di bagasan Barita na Uli na sasada i, sada huhut di huria na badia jala na sasada i. Debata do na pabangkithon jala paborhathon angka naposoNa laho mamaritahon Barita na Uli na sasada i. Songon i do si Paulus, si Apollos dohot si Petrus, rap parhalado do nasida, parhitean ni huria i gabe porsea di Kristus Tuhan i. Paasingasing do tingkina, paasingasing ulaonna, paasingasing talenta manang silehonlehon ni Tondi Porbadia jinalona, paasingasing hatauonna, paasingasing gayana, dohot na asing. Nang pe songon i ndang marhasurungan na sada sian na sada, ai ganup do nasida mangula bahen harararat ni Barita na Uli na sasada i dohot tu hajojongjong ni huria na na sasada i. Hauma ni Debata do huria i, inganan pangulaanNa. Alai sian asi dohot lomo ni rohaNa, dijangkon jala dipabangkit do jolma gabe donganNa mangula disi. Ibana do na umboto jala na manontuhon ragamragamanna. Hombar tusi ma digoar si Paulus ibana na manuan, si Apollos na pabornokhon, alai Debata do na patubuhon. Na masirainrainan do na dua i, magopo do na manuan molo so adong do na pabornokhon; songon i sabalikna, halojaon sambing do na pabornokhon anggo so jolo adong do na manuan. Ndang sumurung na manuan sian na pabornokhon manang sabalikna, na pabornokhon sian na manuan, dos do i tahe, ai rap na niaturhon ni Debata do i, rap na niargaan jala rap na niupaanNa. Ndang sipujion na manuan songon i dohot na pabornokhon, alai Debata na patubuhon i do. Ala ni i, parasingasingan ni parbarita na uli ndang boi non i gabe alasan ni polarisasi manang parbolatbolaton di tongatonga ni huria.

Di ay.9c, tu tudosan ni huria songon hauma (ay.9b), pintor dipaihut do muse tudosan ni huria songon bagas ni Debata. Na songon peralihan ma i tu ojahan ni huria na naeng taringotanna di bagian na mangihut (ay.10-11). Pingkiran na manggombarhon huria (na porsea) songon bagas (joro) ni Debata jumpang do manang na piga hali di Buku na Badia i. Ragam do na niondolhonna ni i, isara ni hasadaonna, bagianbagianna, pembangunanna, habadiaonna dohot na asing. Dison, pemeran ni pembagunan dohot ojahan ni huria i do na niondolhonna. Songon naung niondolhon taringot tu angka na gabe dongan pangula ni Debata di haumaNa, manang ise pe na pinadohot ni Debata di pembangunan ni huria i, na sian asi ni rohaNa do i, ndang boi sian lomolomo ni rohana be. Songon i ma si Paulus, hombar tu asi ni rohaNa dipillit jala dipabangkit do gabe siboan Barita na Uli tu angka sipelebegu (pat.Ul.26:17). Marhite i jongjong ma huria ni Kristus di ruar ni lingkungan hajahudion. Disi, marfungsi do ibana songon sipauli ojahan (peletak dasar). Jesus Kristus do ojahan i (pat.Jes.28:16; Mat.21:42; Ul.4:11; Eps.2:20; 1 Ptr.2:6) Jadi paulihon ojahan (Alkitab:meletakkan dasar), mandok mameakhon dasor ni hakristenon i, i ma haporseaon di Jesus Kristus. Manang di dia jala sadihari jolma gabe porsea di Jesus Kristus ala ni panangihonna di Barita na Uli i (Rom 10:17), disi nunga marojahan ibana di ojahan na togu jala na sintong i; tarpauliuli songon batu na mangolu di sada bagas partondion di atas ni batu parsuhi na marpili jala na arga i, i ma Jesus Kristus i (pat.1 Ptr.2:4-10; Jud.1:20). Apala i do na ditontuhon Debata di si Paulus. Ro do ibana tu sada huta jala dijamitahon Barita na Uli i disi, dung i adong ma na porsea jala gabe ojak huria ni Jesus Kristus di inganan i. Ndang dihasomalhon ibana patureture huria i sahat tu na matoras. Holan di Epesus do ibana hea maringan tolu taon (Ul.20:31), di Korint sada satonga taon (Ul.18:11); dungkon ni i sai pintor dipantadinghon do huria na pinungkana i jala laho tu inganan na asing laho mamungka na imbaru. Marhite metode na songon i, holan 10-11 taon sambing, nunga rarat jala ojak huria ni Jesus Kristus di Asia na Metmet sahat tu Eropa. Di pardalananna na parjolo (46-48 M), diliati ibana do luat Ciprus, Lysia, Psidia, Pampilia dohot Cicilia di Asia na Metmet (Ul.13-14); dung i di na paduahon (49-52 M) ditorushon tu luat Prygia di Asia na Metmet, dung i taripar tu luat Trace, tu Makedonia, dohot Akaya di Eropa (Ul.15:39-18:22); jala di na patoluhon (53-57 M) diulahi muse tu angka inganan i (Ul.18:23-21:16) jala ra, ditorushon tu luat Ilirikum (pat.Rom 5:19).

Sahali nari, isara ni na pajongjonghon bagas, di sejarah ni huria i na marfungsi do ibana songon sahalak sipauli ojahan. Halak na asing do anggo na pajongjonghon, lapatanna na manorushon panogunoguon tu huria i asa lam magodang. Huria Epesus rupani dipasahat do tu si Timoteus (pat.1 Tim.1:3), huria Kreta tu si Titus (pat.Tit.1:5), huria Kolosse tu si Epapras (pat.Kol.1:7); na deba tu angka sintua na pinabangkitna tu ulaon i (pat.Ul.14:23; 20:28); ia so i, gabe sahat do i tu apostel manang parbarita na uli na asing. Huria Epesus rupani, di pudian ni ari gabe sahat do tu pangaradotion ni Apostel Johannes. Tutu, nda tung laos dipasombu angka huria i songon i, sintap ni na tarpatupasa diebati do nasida sipata; ia so i ditongos suratna laho marmahani nasida. Taringot tu angka na manorushon ulaon i didok: “Alai ganup ma mamatahon manang beha pangulahonna disi.” Na nidokna, manang ise pe na sian asi ni roha ni Debata dipaloas manorushon ulaon di hajojongjong ni huria i, ingkon ingotonna do paboa na so tarpaulisa ojahan na asing dungkon ni naung ojak i, i ma Jesus Kristus i. Na marlapatan ma i, ingkon di haporseaon di Kristus i do paojahonna ulaonna, i ma Kristus ni Debata naung gabe jolma jala ro tu tano on, naung mate jala mulak mangolu jala manaek tu surgo. Aha pe na pinatupa ni sasahalak ingkon parungkilhononna do manang na hombar i tu haporseaon di Kristus i. Na gabe paraluson ma i tu angka na naeng manambahon habisuhon ni portibi tu haotoon ni silang i.

Rancangan Homiletis

Nunga sange hita umbotosa, na digoari hurianta do taon 2010 on Tahun Penatalayanan. Temana: “Menuju Gereja yang Rapi Tersusun.” Diojakhon di Eps.4:16 na mandok: “Sian Ibana do sandok daging i dipadomu jala martomu, tiniop ni sude uraturat pangurupi, gabe lam magodang daging i mangihuthon pangulaon ni ganup ruas di bagianna be, pinauliuli di bagasan haholongon i.” Taringot tu lapatan dohot na sinangkap ni tema i, digombarhon do di subtema na mandok: “Menyambut Jubileum 150 tahun dengan menata diri menjadi gereja yang sungguh-sungguh bersih, teratur, transparan, partisipatif dan akountabel.” Mardomu tusi, nunga dipatupa ragam ni panghobasion, isara ni penataan ni administrasi haruason, haparhaladoon, perkantoran, parartaon, panghobasion dohot angka na asing. Dipatupa do i di pusat, di distrik, di ressort dohot di huria marsadasada. Angka na ringkot do i tutu, na so boi parsineangon ni roha ni huria. Nang pe songon i ingkon ondolhonon do, huria na mardomu jala martomu manang na rapi tersusun i ndang tardungdung i holan marhite penataan ni administrasi, alai ingkon parjolo do marhitehite parheheon partondion. Ragam do aspek ni parheheon i, jala deba sian i ma na naeng pamanatonta sian turpuk di hita ari on. Taringot tusi, adong ma tolu na naeng dohonon.

Na parjolo, lam magodang ma hita di bagasan Jesus Kristus. Di na ro Apostel Paulus jala marjamita di Korint, dung i adong ma na porsea jala jongjong huria ni Kristus disi, ndang tarbahensa dope manghatai tu nasida songon na tu angka partondi. Nambura taripar dope nasida sian hasipelebeguon tu hakristenon. Isara di ruhut ni hajolmaon, posoposo dope nasida; jala di ruhut ni partondion, pardaging, na so matoras dope di haporseaon jala na so umboto manirang na denggan sian na roa. I do aturanna, tu posoposo, susu dope na tarpainumhon; ndang tarlehon dope sipanganon hian. Songon i ma di mulana i, ndang tarpatorang si Paulus dope tu halak Korint habisuhon ni Debata na taringot tu haluaon ni jolma na di bagasan dohot marhite Jesus Kristus na tarsilang i, sintap ni na bulusbulus i dope, angka dasor ni hakristenon i. Alai ingkon na lam tambaan do i, lam pabagason, jala sadalan tusi lam magodang ma nasida di bagasan Kristus. Taringot tusi, ndang sae nasida holan na paimahon, ingkon dohot do aktif pagodanggodanghon diri dohot haporseaonna.

Ndang holan di Korint, di sude do songon i tarmasuk di hita angka na mangolu di tingki on dohot di inganan on. Ndang adong halak na pintor magodang, jolo metmet do; songon i, ndang adong Kristen na pintor rimpas jala matoras di haporseaon i, alai jolo pardaging do, jolo posoposo di bagasan Kristus. Saleleng pardaging hita, ndang tarhataan dope tu hita hasimoon ni haluaon na pinatupa ni Debata di bagasan Jesus Kristus na tarsilang i, jala ndang tarpatuhukhon dope tu hita ragam ni tanggungjawab ni hakristenon i. Alai ndang boi torus songon i, ingkon lam magodang do jala lam tang di bagasan haporseaon. Tu sangkap i, ringkot do di hita sipanganon partondion, i ma hata ni Debata. Ingkon sai datdatanta do na marsiajar, na manangihon dohot na mangguruhon hata ni Tuhan i; na manjahai, na mamingkirmingkiri dohot na mangaradoti (Jos.1:8). Marhite i, tau ma hita manimbangi manang dia do lomo ni roha ni Debata (Rom 12:2) jala botoonta manirang na denggan sian na roa (1 Raj.3:9), botoonta huhut manghangoluhon dohot mangulahon. Mansai ringkot ma i ingotonta di na mangeahi ruhut ni huria na mardomu jala martomu manang na tersusun rapi dohot di na manomunomu Jubileum 150 taon HKBP. Nunga lam tamba umur ni hurianta, alai ndang sai tardok naung lam matoras haporseaon ni angka ruasna. Adong tahe mandok, torop so piga do ruas ni hurianta na so tamba be na binotona sian na jinalona di sikola minggu. Manghatindanghon haporseaon pe ibana, ‘na hinipu’ do, ala naeng muli manang mangoli, dung i sahat tu na matua bilangan nama ibana marminggu jala ndang hea manjaha dohot mangguruhon hata ni Debata, gabe sai torus ma ‘kristen susu’ ndang hea sahat tu ‘kristen sipanganon hian.’ Ndang hinata molo adong na mansai mura termakan issu begu ganjang, na so sanga marpingkir dua hali taringot tu na manurbu jabu dohot na manutung jolma mangolu. Unang ma songon i, alai lam mangodang ma hita di bagasan Jesus Kristus i.

Na paduahon, lam marsada jala mardame di bagasan Jesus Kristus. Disolsoli si Paulus do halak Korint, ai nang pe naung leleng tong dope nasida pardaging. Ndang tu Kristus i nasida mangarahuthon diri dohot hasatiaonna, tu parbarita na uli do, ai gabe jongjong ma ragam ni horong di huria i, i ma horong Paulus, Apollos, Kepas (Petrus) dohot horong Kristus. Masa ma parbolatbolaton, ai na masiadopan do angka horong i di bagasan tondi ni parsalisian dohot pangiburuon. Ndang diantusi nasida huhut na sada do dalan haluaon na pinarade ni Debata di jolma, i ma na di bagasan dohot na marhite Kristus na tarsilang i. Ala ni i, sada do saluhut na pinalua i di bagasan huria na sasada i. Hauma ni Debata do huria i, inganan pangulaanNa. Alai sian asi ni rohaNa, dijangkon do angka jolma gabe donganNa mangula disi. Ibana do na umboto jala manontuhon ragamragamanna. Adong rupani na manuan, adong na pabornokhon, dohot na asing. Rap ringkot jala arga do i sude. Ala ni i, parasingasingan ni parbarita na uli dohot hatauonna ndang boi non i gabe alasan ni polarisasi manang parbolatbolaton di tongatonga ni huria.

Di tingki on pe na boi masa do na songon i, sai adong halak na mangarahuthon diri dohot hasatiaonna tu sadasada parhalado na hea marhobas di tongatonganasida. Parhalado na sasada i do dirajumi na dumenggan sian saluhut, na so targonti jala na so haimbangan na asing. Na boi masa do i ala adong pengalamanna na khusus dohot parhalado i, ala adong hasurunganna manang ala ni gayana na khas di na mangulahon haparhaladoonna i dohot angka na asing. Ndang tarsoadahon hita na jumpang do na songon i di hurianta, ai jotjot do masa angka huria maniopi panditana asa unang pinda, jala manulak panggontina asa unang bongot. Nunga jotjot taalami, pangalaho i ndang hurang i manubuhon parsalisian sahat tu bada bolak di tonga ni huria dohot parhalado. Sasintongna ingkon tu Kristus i do hita satia, ingkon tu Ibana do hita pajonokhon dohot mangarahuthon diri. Molo sude hita satia jala tarrahut tu Kristus i, lam jonok do hita sama hita. Lam antusan jala botoonta ma disi na sada do hita di bagasan Ibana. Lam antusan jala botoonta ma huhut na dongan pangula ni Debata do angka parhalado i, parhiteanta gabe porsea. Ibana do na manjou jala na marsuru nasida sadasada, na pabangkithon tu hajongjonganna be jala na managihon silehonlehonNa tu nasida ganup. Na sada on manuan, na sada an pabornokhon dohot na asing. Ndang marsisurungi angka ulaon i, rap arga do i jala marguna tu hajongjongan ni huria i. Mansai ringkot ma i hangoluhononta di na mangeahi ruhut ni huria na mardomu jala martomu dohot di na manomunomu Jubileum 150 taon HKBP. Songon huria naung lam matoras, sai unang be masa parasingasingan dohot mutasi ni parhalado gabe bonsir ni parbadaan. Unang be adong na maniopi panditana jala manulak panggontina. Alai angka uluan ni hurianta pe antong, ingkon lam marbisuk jala lam arif ma patupahon parpindaan ni parhalado asa lam timbul hasadaon dohot hadameon di tongatonga ni hurianta.

Na patoluhon, pauliulihon diri di ojahan na sasada i, Jesus Kristus. Dipillit Debata do si Paulus gabe apostel tu angka sipelebegu. Marhite ibana, jongjong huria ni Kristus di ruar ni hajahudion. Disi, ditontuhon Debata do ibana songon sipauli ojahan. Jesus Kristus do ojahan i. Jadi pauli ojahan, mandok mameakhon dasor ni hakristenon i, i ma haporseaon di Jesus Kristus i. Manang di dia jala manang sadihari pe jolma gabe porsea di Kristus ala ni panangihonna di Barita na Uli i, disi nunga marojahan ibana di ojahan na togu jala na sintong i; tarpauliuli songon batu na mangolu di bagas partondion di atas ni batu parsuhi na marpili jala na arga, i ma Jesus Kristus i.

Gok ne ma 150 taon dung na dipabinsar Debata Barita na Uli i di tongatonganta. Na laos marlapatan ma i, nunga manjonok tu 150 taon dung na dipauli ojahan i di tongatonganta. Marhite i nunga marhaojahan be ngolunta di ojahan na sasada i, tarpauliuli songon batu na mangolu di bagas partondion di atas ni batu parsuhi na marpili jala na arga, i ma Jesus Kristus i. Taringot tusi, ndang passif hita. Ndang batu na mate hita na ojak di ojahan i holan ala na diojakhon tungkang; batu na mangolu do na aktif paojakhon diri di ojahan i, lapatanna mambuat haputusan sandiri laho manghaporseai jala manjangkon Jesus Kristus i. Gabe ruas na mangolu hita di huria i, na mangunduk jala mangihut tu Tuhanta i, na girgir mangoloi hataNa jala maniru angka pambahenanNa. Ndang pambahenan na sahali masa i, alai na torus manorus do saleleng mangolu. Na marlapatan ma i ingkon ganup ari do hita pauliulihon diri di ojahan na sasada i, ganup ari mambuat haputusan taringot tu na manghaporseai jala mangihuthon Tuhanta Jesus Kristus i, jala ganup ari manghangoluhon parange ni angka batu na mangolu di huria na badia i. Apala i ma na ringkot ingoton jala parangehononta di na mangeahi ruhut ni huria na tersusun rapi dohot di na manomunomu Jubileum 150 taon HKBP, naeng lam tangkas hita marparange songon ruas ni huria na porsea jala na badia.

jkt.03.08.2010/mvs

Read More..

11 Trinitatis

SERMON JAMITA TU MINGGU 11 DUNG TRINITATIS, 15 AGUSTUS 2010
1 Mus.31:36-44

Patujolo

Saleleng di jolona, dirajumi jala diperlakukan si Laban do si Jakob songon anak gajianna, ndang songon hela manang anggota ni keluargana. Diparhatopot ibana do na tarpasupasu do ibana ala ni si Jakob i, tamba do sinamotna jala lam mamora ibana. Alai ndang gabe mauliate rohana ala ni i, ala simata hepeng ibana sai naeng do angkalanna helana i, sai naeng doboonna upana. Ndang lomo rohana morot helana i sian lambungna asa gabe sada ruma tangga na mandiri, alai sai hot ma nian di jolona jala torus di toru ni kendalina asa sai martambatamba dope hamoraonna. Alai ndang hombar i tu lomo ni roha ni Debata. Panean di bagabaga ni Debata na tu si Abraham do si Jakob i (1 Mus.12:1-3). Aut sura pe lomo rohana maringan torus di Padan Aram, bahen hasasaut ni bagabaga i ndang na laho loason ni Debata. Songon i ma di jolo ni turpuk on, disuru do ibana mulak tu Kanaan, tano na pinarbagabaga i (1 Mus.31:3). Di na so tarulahonsa i sian na patar, tarpaksa ma ibana lintun (1 Mus.31:21). Alai dung tarbortik i tu si Laban, dieahi do ibana. Anggo tahina hian nian, na roa do (pat.1 Mus.31:29a). Alai ala dipaingot Debata ibana di nipina (1 Mus.31:24, 29b), gabe dilului ma hata dame. Nang pe songon i, ndang tarbolushonsa anggo hamamago ni terafim manang debata idupna na disura rohana ditangko si Jakob (1 Mus.31:30), gabe disungkapi ibana dohot sude na di ibana. Dung so dapotsa tongon, tarrimas ma si Jakob tu ibana songon na martaringot di turpuk on.

Hatorangan

Tarrimas si Jakob, ndang holan ala na dituhas si Laban ibana manangko terapimna, alai dohot do ala ni sude na binahen ni simatuana i tu ibana na sai lelengna i. Parjolo sahali, didok: “Aha ma pangalaosingku, aha ma dosangku umbahen piripirion hamu mangeahi ahu?” Di jolo nunga nidok, na diperlakukan si Laban do si Jakob songon anak gajianna. Ala ni i, di mata ni uhum dohot natorop, di toru ni huasona do ibana, songon i jolmana, angka anakna ro di sude artana. Molo lintun ibana, marhuaso do si Laban mangeahi jala mamboan ibana mulak manang mamunusa, mambahen jolmana dohot angka anakna gabe hatobanna jala mangarampas nasa ugasanna. Sian sisi i, di ingananna do molo piripirion si Laban mangeahi si Jakob. Alai ala adong do parjanjian antara nasida na dua taringot tu si Lea dohot si Rahel laos songon i taringot tu upa lojana, ndang adong sala ni si Jakob disi jala ndang adong dalan ni si Laban mambahen songon i.

Paduahon, muruk si Jakob ala dituhas ibana manangko terapim jala disungkapi. Terapim manang debata idup i ma ganaganan ni debata rumah tangga (image of household god). Rumangna metmet, mura boanon jala boi solothonon isara di toru ni palano (pat.ay.34). So diboto si Jakob, ditangko si Rahel do debata idup ni si Laban i. Sangkapna ra, bahen legalitas ni hak pewarisan ni si Jakob do di arta ni si Laban. Mangihuthon adat di luat i, anak siahaan do na manean terapim ni amana. Alai na boi masa do na gabe mimbar hak i tu tinodohonna. Manang ise pe na manean i, dapotan godang paruntungan do i taringot tu parbagi ni teanteanan. Sian 1 Mus.31:1-2 torang, hak pewarisan i do na gabe sibonsiri ni ketidakserasian di antara ni si Jakob dohot angka anak ni si Laban. Didok rohanasida, ndang parsidohot si Jakob di hak i, hape diahuti ibana do mansai godang sian ugasan ni amanasida. Si Laban pe, ditolopi do pingkiran i, ai ndang songon na sai laonna i be bohina tu si Jakob. Di roha ni si Rahel, marhitehite na memiliki terapim i, itenang pe na ditangko, ndang tarsoadahon agia ise be na marhak do si Jakob manean arta ni si Laban, simatuana i jala ndang targugat agia ise be angka naung gabe jambarnasida ali ni gogo dohot pangulaon ni tungganedolina i. Nang di roha ni si Laban, bahen legalitas ni arta naung niahutna sian ibana, mansai berkepentingan do si Jakob memiliki debata idup i. I do alana asa dituhas ibana si Jakob i manangko terapimna i. Alai songon na nidok di jolo i, dung disungkapi sude, ndang jumpangsa ai nunga ditabunihon si Rahel, gabe adong ma dalan ni si Jakob tarrimas jala muruk.

Na patoluhon, ditaringoti do sude pambahenan ni simatuana i saleleng na dua pulu taon ibana rap dohot nasida. Ro do si Jakob tu Padan Aram songon pelarian. Pogos, ndang adong hepeng manang artana. Ala ni i ingkon gajian do ibana tu si Laban pitu taon laho mangomo si Rahel. Ndang dijalo ibana agia aha, sude gajina dibuat si Laban do jala diparetonghon bahen sinamot ni boruna i. Saleleng na pitu taon i dihilala si Laban do na mamboan pasupasu si Jakob i di ibana, ai martambatamba do ugasanna. Dasar simata hepeng, naeng ma di rohana lumeleng si Jakob i di jolona. I do alana asa di hajujumpang ni tingkina digontihon si Lea laho mangalehonsa tu si Jakob. Dianto rohana do na so laho tolopan ni si Jakob i. Toho, haboratan do muse si Jakob ai ndang i padannasida hian. Alai ala naung sanga diparjolma si Lea i, ndang tarpaulaksa be. Pintor ditawarhon si Laban ma parpadanan na imbaru, gajian muse si Jakob i pitu taon nari laho mangomo si Rahel. Dioloi si Jakob do i, mangula ma ibana di si Laban pitu taon nari. Marhite i hagohan do giot ni roha ni si Laban di arta, hagohan dohot sihol ni roha ni si Jakob marjolmahon si Rahel. Nang pe songon i ndang sombu dope roha ni si Laban, sai na hurang leleng dope si Jakob i di jolona di rohana. Ala ni i, dung salpu na pitu taon paduahon i jala mangido mulak helana i tu Kanaan (1 Mus.30:25) ditawarhon ma muse parpadanan na imbaru, mangula ibana manang na piga taon laho mangomo na di ibana. Ditohoi si Jakob do i jala dioloi. I ma dalanna, sahat tu halilintunna i tuk do dua pulu taon ibana raphon simatuana i. Saleleng na dua pulu taon i diulahon si Jakob do haparmahanion na denggan. Diradoti do dorbia ni simatuana i sian nasa rohana, jala dipasupasu Debata do niula ni tanganna, ai ndang adong sian dorbia i na tarposo. Ndang dung diseat ibana hambing manang birubiru tunggal bahen panganonna, atik pe na boi masa do i nian. Sabalikna, songon na nidok di ginjang i, diperlakukan si Laban do ibana songon anak gajian, ai ndang diulahon tu ibana uhum ni haparmahanion taringot tu na sinoro ni binatang. Molo disoro babiat sada dorbia, ingkon soroon ni parmahan i do sabagian isara pat manang pinggolna bahen partanda tu nampunasa paboa na tutu do na disoro babiat do pinahan i. Molo ndang songon i, ingkon gararonna do i; potongon ni indukna sian gajina. Molo na ditangko panangko do alai ndang adong na asing na marnida bahen sitindangina, ingkon mangmanghonon manang sumpahonon ni parmahan i do i di jolo ni nampunasa (pat.2 Mus.22:10, 13; Am.3:12). Rupa, ndang dijalo si Laban bukti na songon i. Ala ni i, molo adong na disoro binatang sai digarar si Jakob do i. Na tinangko pe songon i, dialii do jalo, digonti; ai sai dipangido simatuana i do i. Ndang ulaon na neang parmahanion i, na maol do. Arian diallang las ni ari, borngin ngali ni ari. Di luat i, adong do parasingan na mansai radikal antara ni mohop ni arian tu ngali ni borngin jala sangat menyiksa do i tu angka parmahan. Luhutna i ditaon si Jakob do. Siangkup ni na ingkon tongtong jamot manjaga dorbiana, dohot ma cuaca na songon i mambahen so tarnono matana. Alai sude i ndang diargahon si Laban. Hatatamba ni artana do na ringkot di ibana. Ala ni i hum do rohana mangose padanna, sampulu hali ma dipauba upana. Di mulana, dipangido si Jakob do angka siganding dohot na marrintik sian hambing dohot birubiru ni simatuana i ma di ibana bahen upana, angka sibirong hot ma i di simatuana i. Pintor ditolopi si Laban do i, ndang ala burju ni rohana, tung ala ni na rangkak do hambing dohot birubiru na songon i di luat i. Alai ditumpahi Debata do si Jakob i, ai dung songon i padannasida gabe gumodang do tubu anak ni hambing dohot birubiru i sibolang dohot na marrintik jala hombar tusi gabe gumodang ma bagian ni si Jakob asa bagian ni simatuana i. Marnida i, dipauba si Laban ma upana; na birong nama di si Jakob, di ibana nama angka sibolang dohot na marrintik. Dioloi si Jakob do i. Hape, gabe gumodang ma muse tubu na birong sian sibolang dohot na marrintik, jala ala ni i sai tong ma gumodang jambar ni si Jakob. Dipauba si Laban muse, di ibana ma angka na birong; angka sibolang dohot na marrintik di si Jakob. Songon i ma sahat tu sampulu hali sai dipauba si Laban upa ni si Jakob i, alai laos songon i ma tong jotjotna tarhirim ibana, ai sai dihombari Debata do si Jakob jala dipasupasu (1 Mus.30:27 duu).

Parpudi didok si Jakob: “Aut unang didongani Debata ni damang i ahu, Debata ni si Abraham, jala na hinabiaran ni si Isak, ra tung palahoonmu boti ahu; alai ditatap Debata do pardangolanhi dohot halojaon ni tanganhu, gabe dipinsang hamu na borngin nantuari.” Marhite panjouon dohot parpadananNa, nunga dipapatar Debata diriNa tu si Abraham. Diondingi ibana, ditogutogu jala dipasupasu. Alai ndang dipaboa Debata dope goarNa. (Dung pe di dolok Sinai, di parpadanan na tu halak Israel asa dipaboa Debata goarNa, Jahowa. Molo tarjaha pe goar Jahowa di angka barita tagan so parpadanan Sinai, ala na di pudi ni parpadanan i dope asa disurathon angka barita i). Ala ni i, taringot tu Debata i sintap ni ‘Debatangku’ dope na tardok si Abraham, jala angka halak na asing dohot na ro di pudina mandok ‘Debata ni si Abraham.’ Debata ni si Abraham i do muse na papatar diri tu si Isak. Ra, sarupa tu si Jakob di bagian parjolo ni ay.42 on, digoari si Isak do Debata i ‘Debata ni Damang.’ Alai di bagian partonga ni ay.42 on, ditambahon si Jakob do sada goar, i ma ‘na hinabiaran ni si Isak.’ Ndang torang manang na sian si Isak do parmulaan ni goar i manang na sian si Jakob, ai molo tajahai sude barita ni si Isak, ndang hea dipangke ibana panggoarion i tu Debata. Laos Debata ni si Abraham i ma muse na papatarhon diriNa tu si Jakob, jala – songon naung nidok di ginjang i – digoari ibana ma i ‘Debata ni Damang si Isak’ manang ‘Debata ni Daompung si Abraham’ (pat.1 Mus.32:9) Diparhatopot si Jakob do na didongani Debata do ibana, ditatap do pardangolan dohot halojaon ni tanganna. I do umbahen na mararta ibana. Ndang ala ni haporseaonna, tung asi ni roha ni Debata do. Sahat tu tingki i, ndang hea dope ibana manghaposi Debata sian nasa rohana. Ia marpadan pe ibana di Betel paboa na oloan jala sombaonna Debata, mamangke syarat do, ai didok: “Molo didongani jala diramoti Debata ahu di dalan na hudalani on, jala dilehon di ahu sagusagu sipanganon dohot ulos siporuloshononhon, jala marsonangsonang ahu mulak ditogihon tu bagas ni damang, sai Jahowa ma Debatangku” (1 Mus.28:20-21). Dirina do na gumodang dihaposi, angkalna. Marhitehite angkalna do ibana manggulut sahala sihahaan sian si Esau (1 Mus.25:29 duu), mahitehite angkalna manggulut arta ni simatuana (1 Mus.30:37 duu), marhitehite angkalna naeng paluahon dirina sian pamaloson ni si Esau (1 Mus.32:3 duu). Alai ala ni parpadanan ni Debata na taringot tu haluaon ni manisia, dianju do ibana, diondingi jala dipasupasu, itenang pe di pudi ingkon uhumanNa do ibana ala ni sasudena i, ingkon ponggolhononNa gogo na sai hinaposanNa i (1 Mus.32:25). Ala ni i asi ni roha dohot panganjuon ni Debata do asa mararta ibana, nda tung ala ni angkalna i. Laos ala ni i do asa malua ibana sian tahi ni simatuana ro di angka anakhonna. Nang pe so lintun si Jakob, ala hamongkusonnasida, ndang so mungkin na rampason nasida hian do saluhut na di ibana jala usironna ibana songon i sambing. Laos ala ni i ma asa diambati Debata nasida mambahen na roa tu si Jakob marhite na paipihon singotsingot tu si Laban (1 Mus.31:24, 29b).

Ndang haalusan si Laban sude hata pintor ni si Jakob i. Manghilala ma rohana na so patut do tutu na binahenna i, ai anakhonna do nasida, jala na di ibana do na di nasida sude. Tung patut ma bahenonna na so uhum tu na di ibana sandiri? Ala ni i, diusulhon ma asa marpadan nasida di bagasan dame, gabe marpadan nasida tutu (1 Mus.31:45 duu).

Rancangan Homiletis

Dua ari nari, Selasa 17 Agustus 2010, rap dohot donganta sabangso di sandok portibi on, halashononta ma Hari Ulang Tahun 65 Proklamasi Kemerdekaan ni bangsonta, Negara Republik Indonesia na tahaholongi on. Patut dohononta do mauliate jala pujionta Debata siala i. Mansai balga do lapatan ni kemerdekaan i di hita. Alai songon halak Kristen hita, ndang sae di hita mangantusi lapatan ni i holan sian panatapan politik, ingkon dohot jala lumobi do sian panatapan haporseaon, jala i ma na naeng dungdungonta marhitehite jamita di hita ari on.

Di bagasan hapogoson do sahat si Jakob tu huta ni tulangna, si Laban di luat Padan Aram. Ndang mararta, jala ndang marhepeng. Dibahen tulangna i ma ibana marmahan dorbiana, jala diulahon ibana do i denggandenggan. Mamboan pasupasu do si Jakob i di tulangna i, lam tamba do sinamotna jala lam mamora ibana. Songon i pe i, ndang gabe dihaholongi si Laban i ibana. Nang pe gabe diparhela ibana muse, ndang hea dirajumi ibana anggota ni keluargana, anak gajianna do. Gogo ni si Jakob i do na na ringkot di ibana, ndang anggo pribadina. Mansam angkal dibahen asa lumeleng nian si Jakob i di jolona jala sai boi eksploitasionna, asa lam tamba nian sinadonganna. Ia so na mangotootoi ma i, na mangose padan manang na paubaubahon upana. Alai sai didongani Debata do si Jakob i gabe ndang mago boti ibana di panggosagosa ni hulahulana i, margogo do ibana jala togu, gabe jala mamora, jala i ma na gabe bohalna tu tingki na mangihut.

Suman tusi do pengalaman ni bangsonta di tingki penjajahan i. Dieksploitasi Bolanda i do ompunta, amanta dohot inanta angka naung jumolo i. Sian hita angka na mangolu nuaeng pe tahe, adong dope na dohot mangalami i. Ingkon gararon ni anak ni bangsonta do rupani pajak manang balasting na timbo tu panjaja i. Angkup ni i, diaturhon do rodi manang kerja paksa, i ma na mangula manang na piga pulu ari sataon di angka proyek ni panggomgomi, isara di parkobunan, manghuli dalan manang paturehon jambatan. Ndang digaji i, ingkon boanonna be gariada balanjona. Molo marmatean pe i sadasada, ndang adong pola tanggungjawab ni Bolanda i disi. Molo so dialap sisolhotna bangkena, ba ditanomhon songon i holan asa unang bauan nasida. Taon 1831-1870, diaturhon do muse cultuurstelsel manang tanaman paksa. Manang ise pe na martano, ingkon dipapulik be saparlimana bahen panuanan ni kopi, tobu, dohot tarum (nila), jala sude hasilna ingkon digadis tu panggomgomi dohot arga na ditontuhon panjaja i sandiri. Angka na so martano ingkon gontionna ma i marhite rodi 75 ari sataon. Na deba tahe, sahat do tu na sataon na bagas. Sandok mamora do Bolanda ala ni i, baik na di Hindia Belanda on manang pe na di Nederland. Di dekade 1860-an rupani, 72% anggaran belanja ni Kerajaan Belanda sian Indonesia on do. Nang pe songon i, ndang mauliate roha ni Bolanda i tu bangsonta on, alai torus do digosagosa jala ditindas. Tutu, di taon 1871 diputushon do patupahon politik etis manang balas budi, i ma na patupa pembangunan ni irigasi, mandalanhon emigrasi dohot pabidanghon pendidikan, alai suman tu na binahen ni si Laban na tu si Jakob i, dimalomaloi jala dipatongontongon Bolanda i do i tu lomona asa tong godangan di nasida parbuena. Anggo sian porsuk ni pambahen ni panjaja i nian, nunga boi mago bangsonta on. Alai songon pandok ni si Jakob i, didongani Debata do bangsonta, dipargogoi gabe ndang mago di na porsuk i. Ndang masalpuhu molo nidok, marhitehite na porsuk i ditopa Debata do hita gabe bangso na tang, jala gabe modal na mansai arga do i di pembentukan dohot penyelenggaraan ni negaranta lumobi di angka taon mulamula. Ala ni i, di na na manghalashon Hari Ulang Tahun ke-65 Proklamasi Kemerdekaan ni bangsonta, Negara Republik Indonesia na tahaholongi on, patut pujionta do Debata jala dohononta mauliate marningot pangaramotionNa di bangsonta di penjajahan i.

Mulak tu turpukta ari on, dung dua pulu taon di Padan Aram, disuru Debata do si Jakob mulak tu Kanaan. Aut sura pe lomo rohana, ndang boi ibana torus maringan Padan Aram. Sitean bagabaga na tu si Abraham do ibana. Bahen hasasaut ni bagabaga i, ingkon mulak do ibana tu Kanaan. Alai ndang boi ulahononna i sian na patar. Tung sura parmisi ibana tu simatuana dohot laena ndang tagamon loasonna. Ia so i, rampasonna sude na di ibana jala palahoonna sasadasa. Ala ni i, tarpaksa ma ibana lintun. Diboan ma jolmana, songon i anak dohot boruna ro di sandok sinamotna. Dung tarbortik i tu si Laban, dipapungu ma sisolhotna laho mangeahi. Sandok na roa do tahina. Songon na nidok nangkin, ra, naeng rampasonna hian do sinamotna, jolmana dohot ianakhonna bahenonna hatobanna, jala si Jakob i bunuon manang palahoonna songon i. Alai ditatap Debata do si Jakob i, marhite nipi dipaingot do si Laban i asa unang mambahen agia aha na roa tu ibana. Songon i ma dalanna malua ibana dohot keluargana sian tahi na jahat ni simatuana i, malua dohot sude niula ni tanganna.

Suman tusi do tong pengalaman ni bangsonta. Nang pe naung leleng dijaja Bolanda i bangsonta jala nunga mamora nasida tabahen, ndang hea tubu rohanasida memerdekakan Molo adong tahe usaho tusi, jalojalo do i diintopi. Songon i ma sahat tu na tunduk Hindia Belanda tu Tentera Dai Nippon, torus do hita bangso na tarjaja. Di toru ni penjajahan ni Jepang, holan dangolna i ma na tarhatahon. Didok na mandok, tolu ratus lima pulu taon hita dijaja Bolanda, tolu satonga taon dijaja Jepang dos do anggo dangolna. Marbagabaga do nian Japang i mangalehon kemerdekaan tu bangsonta, alai sahat tu na tunduk nasida tu Sekutu, ndang sanga i digohi. Jadi mardeka pe hita ndada ala basabasa ni panjaja i, alai suman tu haluaon ni si Jakob sian huaso ni simatuana, ala na taparjuanghon do. Nang pe songon i, so mansoadahon parjuangan dohot pengorbanan ni angka pahlawan, songon na tarsurat di Pembukaan Undang-udang Dasar 1945 i, ingkon parhatopotonta do tongtong paboa basabasa ni Debata do kemerdekaanta i. Ndang sai sude bangso na marjuang sahat tu kemerdekaan. Apala i ma na ringkot ingotonta di na manghalashon Hari Ulang Tahun ke-65 Proklamasi Kemerdekaan ni bangsonta, Negara Republik Indonesia na tahaholongi on, naeng pujionta do Debata jala dohononta mauliate tu Ibana ala ditumpakhon tu hita hamonangan dohot haluaon.

Alai nuaeng, dung 65 taon nunga boha hita na mardeka i? Didok barita, mebat do sahali sahalak bupati tu sada huta jala dipatupa pertemuan tu masyarakat. Dung i, manungkun ma sada natuatua songon on: “Ai sadia leleng nari hita na mardeka on Amang Bupati?” Hurang diantusi bupati i do i, gabe dipatangkas ma, didok: “Maksudmu Amang?” Dialusi amanta i: “Ai songon na so tartaon be Amang hansit ni na mardeka on, tumabo do tingki Bolanda i.” Ndang sintong nian na nidok ni amanta i, alai ndang tarparsoada agia ise na mansai godang dope na hansit na mandondoni torop halak di kemerdekaan on, lumobi di angka tingki na parpudi on. Lam tu maolna do nuaeng mangolu, lam arga situhoron gabe lam torop na so tolap manggohi parguna ni ngoluna ariari, na tarpaksa ingkon mangallang gadong hau manang nasi aking. Mangihuthon Liputan 6 On-Line ari 30 Juni 2010, Bonin, sahalak pembersih rumput di Bekasi, di daerah industri na umbalga Indonesia on, holan Rp.20.000 do gajina sadari. I do sibalanjohononnasida dohot tungganeboruna, dua anakna dohot dua natorasna. Ala ndang sae, tarpaksa do nasida mambahen keong bahen lompan dohot duhutduhut bahen ingkaunasida ganup ari, jala jojot ingkon manggonti boras dohot gadong hau. Sementara i, pamarenta torus do mencitrakan diri mendengung-dengungkan bahwa program ekonomi telah berhasil. Di bahasa ni jamita on, godang dope si Laban na mangulahon penekanan dohot pengekangan gabe mansai torop si Jakob na mangolu di ketidakbebasan. Di ngolu parugamaon rupani. Adong do i na marrumangkon pribadi, na asing organisasi massa bernafaskan agama. Pamarenta sandiri tahe nunga jotjot gabe si Laban na membatasi kebebasan beribadah. Didok sada sian uluan ni hurianta: “Kondisi kebebasan beribadah semakin terancam di Indonesia. Jika dulu, massa atas nama organisasi yang merusak gereja. Kini, pejabat negara seperti walikota yang proaktif menutup gereja dengan dalih SK 2 Menteri atau desakan agama.” Di tajuk ni Suara Pembaruan di ari 11 Pebruari 2010 didok: “Negara melalui aparat di berbagai level justru menjadi pelaku pelanggaran kebebasan beragama.” Mambuktihon i, dipatujolo do laporan ni sada lembaga swadaya masyarakat na mandok: “Tahun 2009 terdapat 291 tindak pelanggaran terhadap kebebasan beragama atau berkeyakinan. Dari jumlah itu 139 tindak pelanggaran melibatkan negara, baik secara aktif yakni sebagai aktor pelanggaran maupun karena tindak pembiaran sehingga terjadi pelanggaran.” Ala ni i, naeng ma lam gogo hita tumangianghon sandok uluan ni bangso dohot pamarentanta. Nian, nunga taulahon i. Alai ra, adong hurangna, ai sai holan gogo dohot habisuhon do tapangido. Sai hira na anak manis do tarajumi angka induk ni bangso dohot negaranta on, orang baik na hurangan gogo dohot bisuk, gabe sai tapanngido ma asa dilehon Debata gogo dohot bisuk. Alai ra, godangan si Laban nama halak i, angka parroha na pir. Ndang na so diboto na adong do efek domino ni kenaikan tarif dasar listrik tu komoditi na asing, alai dipaula do diboto; ndang na so diboto naung mansai timbo jala na so tardungdung toropan halak be arga ni bahan-bahan pokok, alai mansai enteng do panghulingnasida mandok: “Kenaikan harga masih wajar.” Nda pir ni roha do i? Ala ni i, hasesaan ni dosa dohot hamubaon ni roha nama na gumodang naeng pangidoonta. Sai dilehon Debata ma di hita burju ni roha mangulahon i.

jkt.28.07.2010/mvs

Read More..

10 Trinitatis

SERMON JAMITA TU MINGGU 10 DUNG TRINITATIS, 8 AGUSTUS 2010
Joh.10:11-18

Patujolo

Di pamungkaan ni Barita na Uli na sinuratna on, didok si Johannes do: “Na ro do Ibana manopot na di Ibana hian, gabe ndang dijangkon angka na di ibana i Ibana. Alai manang piga na manjangkon Ibana, tusi do dilehon huaso asa gabe anak ni Debata nasida, angka na porsea di goarNa” (1:11-12). Di bd.1-4 dihatindanghon do taringot tu haroro dohot parmianon ni Kristus di tongatonga ni angka na di Ibana i hian, dung i di bd.5-12 barita ni hasopanjangkonon ni angka na di Ibana i di Ibana. Maradophon angka na manjangkon dohot na so manjangkon i, di bd.10 on dipapatar Tuhan Jesus do diriNa songon Parmahan na Denggan. Parmahan, sada sian tudosan angka na umuli do i na pinangke ni Bibel laho manggombarhon pardomuan ni Debata dohot jolma, pribadi manang punguan (bangso, huria). Digoari si Jakob do rupani Debata siparmahan ibana (1 Mus.48:15), songon i si David (Ps.23:1), jala si Asap manghatindanghon Jahowa do siparmahan Israel (Ps.80:2). Marhite i diondolhon do haporseaon dohot pos ni rohanasida di pangodingion ni Debata, panogunoguon dohot panarihonNa. HaparmahanionNa i diulahon do i nang marhite halak angka na pinillit jala na sinuruNa, isara partogi, panguhum, malim, panurirang dohot raja. Taringot tu angka i, lomoan do roha ni Israel manggoari angka i parmahan sian partogi manang pemimpin. Hombar tu cara ni angka parmahan i menyikapi haparmahanionna, gabe tubu ma dua horong parmahan, i ma parmahan na denggan dohot na so denggan.

Hatorangan

Didok Tuhan i: “Parmahan na denggan do anggo Ahu.” Pingkiran na patudoshon Messias manang Kristus na pinarbagabaga i tu parmahan, nunga mamungka i di panurirangon di Padan na Robi (Jer.23: Sak.11). Dison, diauhon jala dihonahon Jesus do panurirangon i tu Ibana, ai dipasobok ma diriNa tu parmahan na denggan. Marhite i, parjolo sahali naeng papataronNa do paboa Ibana do Messias i, Kristus na pinarbagabaga ni Debata bahen haluaon dohot hasonangan ni hajolmaon. Taringot tu hadengganonNa i didok: “Diseahon parmahan na denggan i do hosana humophop angka birubiruna.” Na marpambuatan do i sian gombaran ni parmahan na denggan di Israel. Hira sude luat Judea dohot satonga luat Samaria godangan pardolokdolohan do jala marbatubatu. Ndang godang tano na denggan bahen inganan marsuansuanan, alai cukup denggan do bahen parmahanan. Ndang sadia nian duhutduhut, rangkak do adaran na bidang, alai gogotgogot do di holangholang ni batu angka na godang i. Ala ni i ndang boi angka birubiru godanggodang rap manjampal di sadasada inganan, alai marserak do hombar tu haadongon ni duhutduhut. Gabe mansai talpe do angka birbiru i tu parmaraan, mura tardempar, lilu jala mago. So sundat dope parmaraan na boi ro sian binatang panoro, babiat manang antuasu; songon i sian parjahat, angka panangko manang pamangus. Ala ni i, ingkon mansai radot do parmahan i mangaramoti angka dorbiana. Diparrohahon birubiru i sadasada, disarihon hasonangan dohot haluaonna. Arian borngin, hira so adong do adianna. Molo ro panoro manang pamangus, ibana di jolo laho mangalo. Molo naung sanga disoro babiat i sada sian birubiru i jala diparsurage, ingkon soroon ni parmahan i do sabagian isara patna manang pinggolna bahen bukti tu nampunasa paboa na hona soro do birubiru i. Molo ndang songon i, ingkon gararonna do i, potongon ni indukna sian gajina. Ndang pargaji na timbo parmahan di Israel, gabe nunga mansai maol di agia ise pe manggarar arga ni sada birubiru. Di paraloan dohot angka panoro manang panangko i, ndang jarang masa na gabe parmahan i mate humophop angka birubiruna.

Ndang songon i anggo parmahan siida gaji. Taringot tusi, didok Jesus do: “Alai anggo na niupaan, na so parmahan situtu, na so nampuna birubiru i; diida pe ro babiat, ditadinghon do birubiru i laho maporus, gabe disoro babiat i ma birubiru i jala dipanserakhon.” Sian pandohan i boi do antusan, adong do tolu horong ni angka parmahan, i ma na parjolo, na niupaan. Ndang adong tondi haparmahanionna, molo gabe parmahan pe ibana holan ala ni upa do. Ala ndang adong be ulaon na asing rupani, gabe parmahan ibana, anggo tung holong ni rohana tu birubiru i ndang adong. Na paduahon, parmahan situtu. Tong do nian na niupaan, alai tangkas do tondi haparmahanionna, jala dihaholongi do na pinarmahanna i. Na patoluhon, nampuna birubiru i. Ibana nampunasa, laos ibana parmahanna. Taringot tu na patoluhon on, hira boi do pastihonon halak na martondi haparmahanion do i jala na manghaholongi birubiru i. Tung na so haantusan nama i, ibana nampunasa, laos ibana parmahanna hape ndang adong tondi haparmahanionna jala ndang dihaholongi birubiruna i. Sian na tolu i, na dua horong na nidohan parpudi on do na bolas gabe gombaran ni parmahan na denggan. I do na olo sumeahon hosana humophop angka birubiruna. Anggo na parjolo i, holan na manarihon dirina do i, patujolohon hasonangan dohot haluaonna. Ia ro babiat, laho do i maporus, gabe disoro ma birubiru i. Maporus ma angka na tading i masitondong dalanna be, gabe marserak jala mago.

Di ay.14-15, sahali nari diondolhon Tuhan Jesus na Ibana do Parmahan na denggan, jala ditaringoti dope sada nari tanda ni parmahan na denggan, didok: “Hutanda do angka na di Ahu.” I pe, na marpardomuan do tu gombaran ni parmahan na denggan di Israel. Ditanda parmahan i do dorbiana, dibahen do goar ni birubiru i sadasada jala hombar tu goarna be do nasida dijou (ay.3). Birubiru i pe antong, ditanda do parmahanna; dibege do soarana, ditangihon jala dioloi. Na marlapatan ma i, adong do pardomuan manang parsaoran na tangkas antara ni parmahan i tu birubiruna. Songon i, ditanda Jesus do angka birubiruNa. Mansai tangkas, ndang holan tandatanda songon i. Paboa tangkasna, pola do dipatudos tu panandaonNa di Debata, dohot sabalikna panandaon ni Debata di Ibana, didok: “Songon Ama i na tumanda Ahu jala Ahu tumanda Ama i.” Mansai tangkas do panandaon ni Jesus i di Debata AmaNa, songon i sabalikna panandaon ni Debata Ama i tu AnakNa, Jesus i. Mananda mandok marsaor. Jadi, mansai tangkas do pardomuan dohot parsaoran ni Jesus i tu Debata, dohot sabalikna pardomuan dohot parsaoran ni Debata tu Jesus i. Lobi tahe, sada do Ibana dohot Ama i (ay.30). Songon i ma tong, tangkas situtu do panandaon, pardomuan dohot parsaoran ni Jesus Kristus tu birubiruNa. Dihaholongi do nasida jala disarihon hasonangan dohot haluaonna, pola do diseahon hosaNa humophop angka na di Ibana; mate Ibana di hau pinarsilang songon pelean pardamean bahen hasaean ni angka dosa. Na porsea i pe antong, ditanda do Jesus i; dipasolhot dirina, dipadomu jala dipasaor tu Ibana; dibege soaraNa jala diihuthon Ibana.

Di ay.16 didok Jesus muse: “Adong dope angka birubirungKu na asing, na so sian bara on. Ingkon dohot do angka i togihononHu; tangihonon nasida do soarangKu, dung i gabe sada punguan ma i jala sada ma parmahan.” Anggo on, hasurungan ni Kristus i do songon Parmahan na denggan sasadasa. Angka parmahan di tano Israel ndang tarjou i manogihon birubiru sian bara na asing laho papunguhon tu dorbia ni indukna. Alai di Kristus Jesus, Parmahan na denggan sasadasa i tung sada sian sintuhu ni haparmahanionNa do i. Ise do na nidokNa disi? I ma angka na naeng porsea (pat.Joh.17:20) sian na so bangso Israel. Disuru Debata do Kristus i tu tano on ndang holan tu angka na di Ibana hian, alai dohot do tu angka na so di Ibana hian. Dohot do di nasida Ibana sumeahon hosaNa, manaon jala mate di hau pinarsilang bahen tobus dohot hasaean ni angka dosana. Hombar tusi, ingkon mangula do Ibana dohot di tongatonga ni angka bangso parbegu na tartanda di sandok portibi on. SipatulusonNa ma i marhitehite angka siseanNa. Ndang tagamon magopo jala marisuang sambing ulaon ni sisean i, ingkon adong do na manangihon, na muba jala gabe porsea di Ibana. Sian huaso ni hadebataonNa nunga diida angka i tahe. Ala ni i do asa didok Ibana dison: “Adong dope,” lapatanna: Nunga adong (ndang laho adong/akan ada). Songon i do nang jaminanNa tu si Paulus di Korint. I dope sahat ibana tu huta i, i dope dipungka marjamita, jala i dope adong na porsea, alai nunga didok: “Torop do halak di Ahu di huta on,” lapatanna: Nunga torop (ndang laho torop/akan banyak; Ul.18:10b). Luhutna i pasadaonNa do tu angka na porsea sian angka na di Ibana hian, gabe sada punguan di bagasan huria na sasada jala na badia i; sada dohot parmahanna, i ma Kristus i sandiri. Dorpi parholangan na manirang Jahudi sian na so Jahudi ditangtangi, gabe sada saluhut di bagasan haunduhon dohot pangoloion tu Ibana.

Di ay.17-18, sahali nari ditaringoti Tuhanta Jesus Kristus taringot tu paneahonNa di hosaNa, didok: “Ala ni on do umbahen dihaholongi Ama i Ahu, ala Hulehon hosangKu, asa jaloonHu i muse. Ndang adong na mambuat i sian Ahu, sian lomongKu do i Hulehon. Na marhuaso do Ahu mangalehon, na marhuaso do Ahu manjalo muse. I ma patik na hujalo sian Damang.” Panaonon dohot hamamate ni Kristus di silang i, ndang peristiwa na insidentil i, manang haputusan na dibuat di pudi laho mangatasi pangalaho na diadopi angka na so diparetonghon hian, alai naung disangkapi Debata hian do i. Tangkasna, sian mulana i dope nunga ditahi Debata hian laho paluahon jolma. Tu hasasaut ni sangkap i, dilehon do patik (Gr. entoleen, sian entolee/ordinance/injunction/command) tu Anak i asa tuat Ibana tu portibi on, manaon jala mate bahen tobus ni saluhut pardosa. Unduk do Anak i tu tahi dohot patik ni Ama i, dioloi do tuat tu portibi on, manaon jala mate di hau pinarsilang asa malua jolma sian dosa dohot sian sandok hamagoanna. Ndang haunduhon dohot pangoloion na tarpaksa i, ndang utang na so tarjua, alai haunduhon na sian sandok kerelaan do, pangoloion na di bagasan holong jala sian sandok roha na ra. Aut sura so olo manang gabe so lomo rohaNa, boi do; tarpangidosa do sampuludua loksa surusuruan laho mangondingi jala paluahon Ibana sian angka na naeng manangkup jala manguhumi Ibana (Mat.26:53). Ndang adong konsekuensi ni i tu Ibana, alai hot ma anggo jolma i di bagasan dosa dohot hamagoanna. Alai – sahali nari – rade do Ibana manaon jala mate. Taringot tusi ndang passif Ibana, alai aktif do; didapothon do sitaonon i jala dijalo hamatean i. Di hamamateNa i, ndang songon na dirampas hosa manang ngoluNa i sian Ibana, alai Ibana sandiri do na mangalehon. “Ndang adong na mambuat i sian Ahu, sian lomongKu do i Hulehon,” ninna. Di barita ni hatotos ni hosaNa na di Joh.19:30 didok, ndang na tungki uluNa i songon parmate ni halak na somal, alai Ibana sandiri do na paundukhon. Taringot tusi didok sada halak do: “Sahat tu ombas i humitir do hamatean i maradophon Ibana. Marhite na paundukhon uluNa i, hira na manghilap hamatean i do Ibana asa dipatupa sibahenonna.” Dilehon ndang untuk selamanya, alai asa jaloonNa do muse. Dung salpu hamamateNa i, hehe do Ibana muse jala mangolu. Ndang ganggu rohaNa taringot tusi. Hombar tusi ma didok: “Na marhuaso do Ahu mangalehon, na marhuaso do Ahu manjalo muse.” Di bagasan dohot ala ni haunduhon dohot pangoloionNa i lam nalnal ma tarida pardomuan holong ni Ama i tu Anak i.

Rancangan Homiletis

Di pangujungi ni Evangelium on, didok Jesus do tu si Simon Petrus: “ Parmahani ma angka birubirungKu!” (21:15-17). Ndang holan tu si Simon Petrus i didok, alai dohot tu hita sude. Dohot, ai parmahan do hita sude di angka na pinasahat ni Debata tu hita ganup marsadasada. Parmahan do rupani ama di keluargana, natoras di ianakhonna, guru di siseanna, uluan di na niuluhonna, partogi tu na tinogihonna, pamarenta di na pinarentana, dohot na asing angka na so tarparjojor hita dison. Boha ma bahenonta mangulahon i? Haparmahanion na songon dia ma na patut hangoluhononta? Martiruan tu Tuhanta Jesus Kristus, Parmahan na denggan i, marojahan di turpuk di hita Minggu on, adong ma dua na naeng dohonon:

Na parjolo, haparmahanion na manghophop. Hira satonga luat Palestina, godangan tano pardolokdolohan do jala na marbatubatu. Ndang godang tano na denggan bahen inganan marsuansuanan, alai godang do anggo na cukup denggan bahen parmahanan. Mardomu tusi, mansai menonjol ma disi figur dohot keteladanan ni parmahan na denggan jala na mardedikasi, angka na marmahani birubiruna di bagasan haburjuon dohot haholongon ni roha; na patongonhon tu jampalan angka na lomak jala manogunogu tu aek hasonangan. Ndang ulaon na mura i, na maol do; godang tantangan dohot marana. Ala ni i, ingkon lehonon ni parmahan i do sandok rohana, pingkiran dohot gogona mangaradoti dorbiana. Ingkon parrohahononna tongtong birubiruna i sadasada, angka na marserak manjampali di holangholang ni batu na godang i. Molo adong na naeng manimbil diambati marhite ambalangna jala dijou mulak, ia ro panoro manang panangko ingkon ibana di jolo laho mangalo. Sandok ingkon papudionna do hasonangana manarihon birubiruna. Gari hosana tahe ingkon seahononna humophop angka na di ibana. Na gabe gombaran ma i di angka na gabe parmahan di tonga ni bangso i, isara angka partogi, panguhum, malim, panuriang dohot angka raja. Gari Tuhanta Jesus tahe, ndang maila mambahen i gabe gombaran ni haparmahanionNa, ai dipasobok do diriNa tu parmahan na denggan na maneahon hosaNa humophop angka na di Ibana.

Haparmahanion sisongon i ma na patut hangoluhononta. Ndang masalpuhu molo nidok, di tingki na parpudi on naung masa do inflasi di haparmahanion. Hira di tonga ni sude do i masa; di tonga ni masyarakat rupani, di tonga ni angka lembaga, organisasi, bangso, dohot negara. Di huria pe tahe nunga masa i. Nunga mansai maol nuaeng luluan angka partogi na olo mangalului dohot patujolohon hadengganon ni natorop, angka pemimpin na barani maneahon diri dohot hasonanganna demi bangso dohot negara. Alai sabalikna, ndang ulaon na maol be nuaeng mangalului angka partogi manang uluan naung madabu tu bangko ni parmahan siida gaji, na so marmahani birubiruna songon na patut, alai holan na naeng manggustingi imbuluna bahen paheanna dohot mamotongi pamueanna angka na ummokmok jala mangallangi tabotabona (pat.Hes.34:3). Angka na marhobas di bidang pendidikan ma rupani, ndang sai parjolo be mangarajumi ulaon i songon panghobasion di hajolmaon asa sahat tu hapistaran dohot tu hamajuon, alai songon inganan pandaramanna nama laho mangeahi hananaek ni pansamotanna. Angka parsiajar dohot natorasna ndang dirajumi be i sihobasan, alai siporoon nama bahen hananaek ni pangabahanna. Nda boi sahat hita tu kesimpulan na songon i molo taida tongon apala di bona ni tahun ajaran na imbaru on sai songon na marsiadu angka lembaga pendidikan manontuhon uang pangkal manang uang pembangunan na tumimbo, uang pahean na umarga manang uang buku na di ginjang ni arga onan? Nda jotjot tarbege dana BOS na so sahat tu hasahatanna? Angka na tarpillit jala pinatujolo di tongatonga ni bangso pe, ndang sai parjolo be mangarajumi situan natorop songon sihobasanna, alai sidalianna sambing nama laho pamorahon dirina. Nda sai adong do tarbege dana bantuan sosial na dibagi-bagi jala dinikmati angka na so hasahatanna hian nian? Nda i alana torop halak curiga tu usul ni Partei Golkar taringot tu dana aspirasi si sampululima milliar rupia di ganup anggota ni DPR-RI? Tuhanta Jesus Kristus mangalehon tiruan tu hita taringot tu haparmahanion na denggan. Ndang dilului hasonanganNa, gok sitaonon do ngoluNa, ndang adong nanggo apala hapeahan ni uluNa; diseahon tahe diriNa, manaon jala mate di hau pinarsilang humophop angka birubiruna asa manjalo di hangoluan na gok pola marlobilobi. I do tahi dohot patik ni Debata Ama i di Ibana, jala unduk do Ibana tusi. Laos songon i do tahi dohot patik ni Debata nang tu hita, na patut oloan jala undukhononta.

Na paduahon, haparmahanion na pasadahon. Didok Tuhanta Jesus Kristus muse di jamita on: “Adong dope angka birubirungKu na asing, na so sian bara on. Ingkon dohot do angka i togihononHu; tangihonon nasida do soarangKu, dung i gabe sada punguan ma i jala sada ma parmahan.” Ise do na nidokNa disi? I ma angka na naeng porsea sian na so bangso Israel. Ndang holan tu halak Israel Kristus i disuru Debata, alai dohot do tu angka na so bangso hian. Dohot do di nasida Ibana sumeahon hosaNa, manaon jala mate di hau pinarsilang bahen tobus dohot hasaean ni angka dosana. Hombar tusi, ingkon mangula do Ibana dohot di tongatonga ni angka bangso parbegu na tartanda di sandok portibi on. SipatulusonNa ma i marhitehite angka siseanNa. Ndang tagamon magopo jala marisuang sambing ulaon ni sisean i, ingkon adong do na manangihon, na muba jala gabe porsea di Ibana. Luhutna i pasadaonNa do tu angka na porsea sian angka na di Ibana hian, gabe sada punguan di bagasan huria na sasada jala na badia i; sada dohot parmahanna, i ma Kristus i sandiri.

Haparmahanion sisongon i ma muse na patut hangoluhononta. Mansai torop dope halak na mago di hasiangan on, angka na lilu di adaran manang na tardempar di halongonan, di portibi hagolapon on. Dohot do tu nasida Kristus i tuat disuru Debata, dohot do di nasida Ibana manaon jala mate bahen tobus dohot hasaean ni angka dosana. Ala ni i disuru Jesus Kristus i do hita mangalului angka i, manjou, manogihon jala pabongothon tu punguan ni angka na pinarmahanNa, i ma huria na sasada i jala na badia i. Gabe sada punguan do saluhut na porsea i. Ndang adong be disi Jahudi dohot na so Jahudi, bangso dohot na so bangso. Dorpi parholangan na manirang hian nunga ditangtangi di bagasan parsilangon dohot hamatean ni Kristus i. Sada do Tuhan na manobus, sada do pelean bahen tobus, jala sada do mudar pangurasion dohot pangiasion. Ala ni i gabe sada do nasida sude. Ndang hasadaon ni struktur manang organisasi huria i, alai hasadaon di bagasan pangoloion di Kristus do. Manang na di dia pe ojak huria i, ingkon boi do sude mambege, mangalusi, mangoloi dohot mangihuthon Parmahan na denggan sasadasa i, Jesus Kristus i. Songon parmahan na martiruan tu Kristus i, siradotanta do hasadaon i. Sipasidingonta do nasa bangko na boi mangambati halak mamongoti hasadaon i. Laos songon i do na mamuntari dohot na paserakhon, ai di toru ni uhum ni Debata do angka na songon i (ida turpuk sijahaon, Jer.23:1-8), alai taradoti ma nasa na tau padengganhon dohot na pauliulihon hita sama hita.

jkt.23.07.2010/mvs

Read More..