Tema Bulan Mei

DILULUI DEBATA DO NAPOSONA

“Na lilu do ahu songon birubiru na mago, sai lului ma naposoM, ai ndang huhalupahon angka tonaMi.” (Ps.119:176)

Di ari on sahat hita tu bona ni bulan na palimahon di taon 2010 on. Pujionta do Debata, jala dohononta mauliate ala horas do hita sahat tu tingki on. Di bulan na salpu i, sai adong angka na pajuthon roha. Lam tamba do rupani arga ni situhoron, gabe lam tu maolna hita mangolu. Di parngoluon ni negaranta pe adong do tong angka siarsakhononhon. Masa do rupani hagaoron di Tanjungpriok, jala marmullopan angka sibahen na so uhum. Apala na pagondok roha, adong do sian i siboto uhum dohot sipajongjong hatigoran. Mardomu tusi, apala di na talangkahon nuaeng patta di bona bulan Mei on, marhite tema ni bulan on naeng paingoton ni Tuhanta i do hita taringot tu na patut sipatupaonta.

Sarupa tu Ps.1 dohot 19, Ps.119 on sada perenungan do taringot tu patik ni Debata. Disi, dipapujipuji do patik i songon asiasi ni Debata na umarga. Didok rupani: “Hasintongan do angka uhum ni Jahowa, tigor do sudena. Umarga do angka i sian mas dohot sian sere palangki na godang situtu, tumonggi do angka i sian situak ni loba dohot tanggule” (Ps.19:10b-11). Ala ni argana, didok parpsalmn 119 on ma di ujung ni ayat on: “Ndang huhalupahon angka tonami.” Na nidokna, sai dipingkirpingkiri do i arian dohot borngin, dihalomohon jala diradoti (pat.Jos.1:8; Ps.1:2). Nang pe songon i, ala ni paraloanna na mansai borat, lilu do ibana, ndang sai marsihohot be di dalan ni Tuhan i. Apala i ma na pinarhatopotna di bona ni ayat on, didok: “Na lilu do ahu songon birubiru na mago.” Didok na mandok, molo lilu sada birubiru, hira so adong do kemungkinanna mulak. Molo manghuling (mengembik) ibana, dialusi angka donganna na tading i do i. Alai asing, singkat ni na humusor jala mardalan mandapothon angka donganna i, lam maringkati do ibana dompak haliluonna i, gabe lam lilu jala lam mago. Holan sada do kemungkinanna mulak jala malua, i ma molo dilului jala jumpang parmahan i ibana. I do na pinarhatopot ni parpsalmen on umbahen didok: “Sai lului ma naposoM.”

Nunga nidok, gondok do roha molo sian angka sibahen na so uhum na marmullopan di tingki na parpudi on adong deba siboto uhum dohot sipajongjong hatigoran. Ndang holan hapunjungannasida i, alai mara na ungkap do i di sude halak. Diboto do nian hata dohot patik ni Debata jala ndang dihalupahon dope hatigoran dohot hasintongan, alai ala balga ni parungkilon dohot paraloan, manang ala gogo ni elaela ni portibi gabe lilu jala mago di hamagoanna. Lam leleng, lam peam ma ibana di haliluon dohot di hamagoanna i, ndang diboto jala ndang hehe be rohana mulak. Ndang disadari be dirina naung lilu jala mago. Dipintori gariada dirina, didok ingkon i nama dalanna mangolu, ingkon margabus nama, ingkon manipu, ingkon mangalaosi. Ndang boi be mulak ala naung tarihot mansai togu. Taringot tu angka i ndang porlu hita manguhumuhumi, ai na boi masa do na songon i nang tu hita. Molo lam balga parungkilon, molo lam tu maolna na mangolu, gabe lilu hita jala ndang taboto sitondongon dohot sibahenonta. Angkup ni i, songon ruas ni bangsonta hita, ndang parsindak hita, alai dohot do martanggungjawab taringot tu angka na masa i. Ala ni i, sitopotanta do i tu Tuhanta i; sidohononta do: “Na lilu do hami songon birubiru na mago,” jala hombar tusi, sitangianghononta do tongtong asa dilului Debata hita jala ditogihon tu hamubaon ni roha, dipaulak tu dalan hatigoran dohot hasintongan.

Laos i ma siparrohahononta di na mandalani di bulan Mei on. Di bulan on bolusonta do dua nari Minggu Haheheon, i ma Kantate dohot Rogate; ihut tusi dua pesta na balga, i ma Hananaek dohot Pentakoste na hinolangholangan ni Minggu Exaudia, dung i dipaujung dohot Minggu Trinitatis. Tuhanta naung hehe jala manaek i nunga mangusehon TondiNa tu hita, ala ni i gabe tatanda ma ise jala boha do Debata maradophon hita. Amanta do Ibana na manompa hita, Sipalua hita do Ibana na mandongani hita, Habadiaonta do Ibana na mangingani hita. Holong do rohaNa di hita, ndang holan di tingki burju, dohot do di tingki na lilu. Ala ni i sai boi do hita martangiang mangido asi ni rohaNa (Rogate dohot Exaudia), jala marende ma hita di Ibana (Kantate). Amen.

jkt.01.05.2010/mvs

Read More..

Kantate

SERMON JAMITA TU MINGGU KANTATE, 2 MEI 2010
2 Kor.4:13-18

Patujolo

Andorang so surat 2 Korint on, sega do pardomuan ni si Paulus tu huria Korint. Bonsirna, i ma haroro ni angka ‘parbarita na uli’ na asing tu huria i. Mantat surat panindangion (rekomendasi) do nasida sian angka huria na tertentu (pat.2 Kor.3:1), jala digoari be do dirina apostel (pat.2 Kor.11:5). Disegai nasida do pardomuan ni si Paulus tu huria i, didok do na so apostel na tutu ibana, ai ndang tarida di ulaonna tanda ni apostel na sintong. Angkup ni i, adong hian do tahi ni si Paulus naeng ro manopot huria i, alai gabe ndang tarpatulussa. Dipabalgabalga nasida ma i, didok ma ibana halak na martahi sian neang ni rohana jala marguru tu sibukna (pat.2 Kor.1:12). Ala ni i lam sega ma parsaoran apostel i tu huria i. Gabe ditongos ibana ma sada surat tu nasida, i ma 2 Kor.2:14-7:4. Alai ndang marguna surat i, ai lam gaor do huria i. Ala ni i gabe ro ma ibana mandapothon huria i. I pe ndang marguna. Adong tahe sian huria i na barani mangaleai ibana (pat.2 Kor.2:5; 7:12). Gabe ditadinghon ma huria i, jala laho ibana tu Epesus. Sian i, mardongan iluilu (2 Kor.2:4), ditongos ma muse sada surat tu huria i, i ma 2 Kor.10-13 (na gabe digoari halak ‘surat iluilu/air mata’). Ditongoshon do i marhitehite si Titus, na laos ditugasi paturehon parsaoranna tu huria i. Tu sangkap i, dibahen do sada surat rekomendasi, i ma 2 Kor.8. Marantu do si Titus dohot ‘surat iluilu’ i, ai gabe muba do roha ni huria i jala diokui muse otoritas haapostelon ni si Paulus. Ala ni i gabe ditongoshon ma muse sada surat tu huria i, i ma 2 Kor.1:1-2, 13; 7:5-16 (na gabe digoar muse ‘surat pardamean/pengampunan’).

Dung mate si Paulus, dipasada huria Korint do angka suratna i. Ndang secara harpiah, alai diedit gabe sada hasadaon na utuh jala ditambahon ma tusi sada surat nari, i ma surat umum ni si Paulus tu angka huria na di Akhaya na taringot tu kolekte tu huria Jerusalem, i ma 2 Kor.9. Punguan ni angka surat i ma muse na gabe digoar 2 Korint di kanon Padan na Imbaru. Di suratma on do gumodang si Paulus manaringoti dirina. Ala ni paraloanna na tu huria i, tarpaksa do ibana manaringoti angka pengalamanna, hasurunganna, dohot sitaononna. Songon i pe i, ndang surat pribadi i, surat huria do. Panaringotionna di dirina dijalin do i dohot bahasan teologi angka na arga, songon na tarida nang di turpuk on.

Di jolo, ditaringoti si Paulus do tohonan haapostelonna (1-6). Na mulia do tohonan i, ai marhite i marsinondang Barita na Uli i didokhon Debata. Alai kontrast tusi, sitaon na porsuk do ibana. “Di bagasan inganan na mura matapor do artanami on,” ninna (7a). Barita na Uli i do na nidokna disi. Ndang holan marhite hatana ibana mamaritahon Barita na Uli i, alai marhite sandok ngoluna do. Di bagasan dirina dipausungusung ibana do Barita na Uli i, dihatindanghon marhite hata dohot pambahenan manang ngoluna jala marhasil situtu. Halongangan do i, ai na gale do ibana, parsahitsahit (pat.2 Kor.12:7), jala parhaporsuhon (8-9). Alai boasa ingkon marhite sahalak na gale jala parsitaonon Debata mandokhon marsinondang Barita na Uli i? Alusna: Parjolo, asa patar hagogoonNa. “Asa Debata nampuna hagogoon na sumurung i,” ninna (7b). Aut sura na gogo ibana (parbarita na uli umumna) di pardagingon, na sangap jala na marmulia, dohonon ni halak do na hagogoonna i do na manghorhon marparbue ulaon i. Alai ala na gale ibana, hape marantu situtu di ulaon mamaritahon Barita na Uli i, tontu na sian ruar ni dirina do hagogoon na manghorhon i, i ma na sian Debata. Paduahon, asa patar hamamate dohot hangongolu ni Kristus Jesus i. “Tongtong do hupausungusung hami di dagingnami hamamate ni Jesus, asa patar di dagingnami nang hangongolu ni Jesus,” ninna (10). Na nidokna, tongtong dionggop hamatean ibana. Hapataran ni riwayat ni Kristus i do i di ngoluna. Songon Kristus i na manaon jala mate, songon i do si Paulus mengalami proses pematian. Alai halongangan, di na mandalani proses i, mangolu do ibana. Hangoluan na sian hangongolu ni Kristus i do i. Na marlapatan ma i, hamamate dohot hangongolu ni Kristus i rap patar do di bagasan ibana. Diusung ibana do i sude asa sahat hangoluan i tu halak Korint (12). Aha do na mangonjar i? Taringot tusi dipatorang ma di turpuk on.

Hatorangan

Didok ibana: “Alai tong do tondi haporseaon i di bagasan hami, hombar tu na tarsurat i: ‘Na porsea do ahu, umbahen na huhatahon;’ hami pe, na porsea do, umbahen na dohot hami manghatahon” (13). Adong do di Apostel Paulus tondi haporseaon na sarupa tu na di angka na porsea. Tondi Porbadia i do na manubuhon i. So marhite panjouon dohot pangulaon ni Tondi Porbadia i, ndang na laho sahat agia ise tu haporseaon i. Na mangula do Tondi Porbadia i marhite Barita na Uli i. Nasa na tangi jala ungkap tu Barita na Uli i, i do na boi sahat tu haporseaon i (Rom 10:17). Na mangolu do haporseaon i jala mangula. Ala ni i do asa digoar i dison tondi haporseaon. Molo so adong pangulaonna naung mate do hadirionna (Jak.2:17). Taringot tusi, nunga sian mulana i diantusi halak songon na nidok ni parpsalmn i: “Porsea do ahu umbahen huhatahon” (Ps.116:10). Tondi Porbadia na manubuhon haporseaon i, laos i do na mangonjar na porsea i manghatindanghon na hinaporseaanna i (pat.Rom 10:10). Songon i do si Paulus, dionjar Tondi Porbadia i do ibana manindangi. Ndang marnaloja ibana taringot tusi. Molo pinatudos orang perorang, ndang masalpuhu molo nidok ibana dope na gumodang mangalehon tingki dohot gogona tu ulaon i; gumanjang dalan naung didalani, gumodang luat diadangi, jala umbahat jolma na dihamonanghon tu Kristus i.

Kristus naung hehe sian na mate hombar tu huaso dohot hagogoon ni Debata do ojahan ni haporseaon i. Naung gabe ulu ni huria hatopan ni angka na porsea jala na badia i do Ibana, jala dagingNa do huria i. Molo Ibana ulu i nunga dipahehe Debata, tung tagamon ma so paheheonNa nang dagingNa. Hombar tusi ma didok: “Naung pahehehon Tuhan Jesus i, pahehehon ni i do nang hami raphon Jesus i.” Porsea situtu do si Paulus disi, jala di paraloanna tu Sanhedrin tung i do dihatindanghon songon pamusatan ni haporseaonna, didok: “Ala ni panghirimon ni roha dohot ala ni haheheon sian na mate, umbahen na tu paruhuman on ahu” (Ul.23:6b). Alai ndang holan ibana, halak Korint pe, angka naung porsea di Kristus Jesus i partohap do di haheheon i, jala rap jongjong sogot di adopan ni Debata di hangoluan na salelenglelengna. Masihol do angka na porsea i di parsaoran i, gabe diharinggashon ma panindangion i, asa lam tu toropna halak na gabe parjambar disi.

Pingkiran i ditorushon di ay.15, didok: “Alai saluhutna i ala ni hamu do, asa asi ni roha i na lam tu gandana dibahen na torop, manghorhon hamauliateon na sumurung bahen hasangapon ni Debata.” Molo diharinggashon na porsea i panindangion i, ndang ala ni (demi) dirina i, alai ala ni (demi) na manangihon do asa porsea nasida jala taruli di asi ni roha na paluahon i. Molo lam torop na porsea, lam torop ma na mandok mauliate tu Debata, gabe marsangap Ibana di tonga ni angka na malua i. Na pasangaphon Debata i do sintuhu ni sangkap panompaon ni jolma, jala laos i do sintuhu ni sangkap pemulihan dohot penyelamatan ni pardosa. Molo nunga marsangap Debata ala ni panindangionta, nunga hagohan be sangkapNa na manjou jala pabangkit hita gabe sitindangiNa.

Di angka ayat na parpudi diulahi do muse pingkiran na taringot tu hapataran ni hamamate dohot hangongolu ni Kristus i na pinausungusungna i (ida Patujolo). Ala ni haporseaon di haheheon dohot hangoluan i, ndang marnaloja si Paulus di ulaon i. Nang pe lam buruk hajolmaonna parduru i, anggo parbagasanna i ariari do dipaimbaru. Hajolmaon parduru (manusia lahiriah), i ma keseluruhan ni hajolmaon na tarrajum tu portibi (jaman/aioon) na leleng (pat.Rom 6:6; Kol.3:9; Eps.4:24), na laho salpu (fana), na mengalami proses pematian, na lam leleng lam buruk ala ni sahit dohot sitaonon. Sahali nari, na songon hapataran ni hamamate ni Jesus Kristus do i na pinausungusung ni na porsea i di dirina. Hajolmaon parbagasan (manusia batiniah), i ma totalitas ni hajolmaon na paadopadop dohot Debata, na ojak di haheheon ni Kristus, na marparange marguru tu Tondi (Rom 8:1), jala naung gabe joro ni Tondi Porbadia. Na songon hapataran ni hangongolu ni Kristus do i na tong pinausungusung ni na porsea i di bagasan dirina. Ndang sega anggo i ala ni sahit manang sitaonon, ai ganup ari do i dipaimbaru. Ala ni hangongolu ni Kristus i na gabe patupahon hasangapon do tahe sitaonon i. Halongangan do i, ai anggo na somal tanda ni hagaleon do haporsuhon jala manubuhon hagaleon. Alai ala ditaon na porsea i do i margogohon hangongolu ni Kristus i, na gabe manubuhon hamuliaon do i, ai nasa na tinaon di bagasan holong tu Debata manumpak tu na denggan do i (Rom 8:28). Nang pe ‘leleng’ jala ‘borat’, sisatongkin jala na neang porsanon do i. Doshon na so ada tahe martimbanghon hasangapon sipapataron sogot (Rom 8:18), ai na martingki do sitaonon i, alai manongtong ro di saleleng ni lelengna do anggo hasangapon i. Holan na porsea do na boi marnida halongangan i, angka na manaili tu tingki na so tarida i dope. Di tingki on, portibi parsatongkinan i dope na tarida jala torop do na mamereng jala na tarihot holan tusi. Alai di ari sogot i, patar jala bongotan ni na porsea i ma na manongtong i.

Rancangan Homiletis

Uju ro natorop manungkun Tuhanta Jesus mandok: “Dia ma bahenonnami asa huula hami angka ulaon lomo ni roha ni Debata?” didok Ibana do: “Haporseai hamu ma na sinuru ni Debata, i ma ulaon lomo ni rohaNa” (Joh.6:28-29). Sian i torang, haporseaon i do apala na parjolo na niigil ni Debata sian jolma. Di bagasan jala mangihut tusi do angka na asing i, isara panghirimon, haholongon, pangoloion, dohot na asing. Jesus Kristus naung hehe jala mangolu songon na taingot jala tahalashon di Paskah nambura salpu i do pamusatan ni haporseaon i. Na sahat do jolma tu haporseaon i ala ni pangulaon ni Tondi Porbadia na marhite Barita na Uli i. Manang ise na tangi jala na ungkap tu Barita na Uli i, i do na boi sampang tu haporseaon i. Na mangolu jala mangula do haporseaon i. Si Jakobus mandok: “Haporseaon i pe songon i do, molo so adong pangulaonna naung mate do hadirionna” (Jak.2:17). Angka dia ma pangulaon ni haporseaon i, jala aha ma guna ni i di hangoluanta sinuaeng on? Deba sian i ma na naeng pamanatonta sian turpuk jamita on.

Na parjolo, gabe gogo do i manghatindanghon Barita na Uli. Dipillit Debata do si Paulus gabe apostelNa. Ndada sian lomona, ai silelei na porsea hian do ibana jolo. Alai sian asi rohaNa, ditangkup Debata do ibana jala dipabangkit gabe parbarita na uli. Tohonan na mulia do i. Alai kontrast tu hamuliaon i, di na mangulahon i manaon do ibana. Taringot tu sitaononna i didok ibana do: “Sumurung manaon renge ni ulaon, nang hurungan; lumobi tu ahu linsinglinsing; jotjot do di bagasan parmaraan hamatean. Lima hali ma ahu dilinsingi halak Jahudi, opatopatpulu hurang sada. Tolu hali do ahu dilasahi, sahali ahu didangguri dohot batu, tolu hali harom, saborngin sadari ahu mumbangumbang di laut ni lautan. Jotjot do ahu di pardalanan, marmara di batang aek, marmara dibahen panamun, marmara sian angka dongan sabutuha, marmara sian angka parbegu, marmara di huta, marmara di halongonan, marmara di laut, marmara di tongatonga ni dongan na so haru dongan. Di bagasan ulaon dohot hasusaan, jotjot do mangkar matangku, jotjot do mauas male dohot marpuasa, di ngali ni ari dohot di na hurangan ulos” (11:23-27). Nang pe songon i ndang mandele ibana, alai sai didatdati do manghatindanghon Barita na Uli i jala marhasil. Boasa? Di dia rahasiana? Alusna, di haporseaon i do.

Ndang holan si Paulus, hita pe dohot do dipabangkit Tuhanta gabe sitindangi ni Barita na Uli i, jala dihalomohon rohaNa do asa di bagasan hiras ni roha i ulahononta jala marhasil. Asa jumpang i, ingkon na porsea do hita. Molo nidok porsea, na marlapatan do i: Parjolo, porsea di Barita na Uli i. Paduahon, porsea di parsuruon i. Ndang jolma na marsuru hita tu ulaon i, alai Tuhanta i do na mandok: “Laho ma hamu, podai hamu ma saluhut bangso, didi hamu ma nasida tu bagasan goar ni Ama, Anak dohot Tondi Parbadia! Laos ajari hamu ma nasida mangaradoti nasa hata naung Hupatikhon tu hamu!” (Mat.28:19-20a). Patoluhon, porsea di pandonganion ni na marsuru i, i ma Tuhanta Jesus Kristus i naung mandok: “Ai ida ma, sai na dongananHu do hamu ganup ari, rasirasa ro ajal ni hasiangan on” (Mat.28:20b). Molo porsea hita di Barita na Uli i, na gabe onjar na so haotapan do i di hita laho manghatindanghonsa. Mangenet hata ni parpsalmn i na mandok: “Porsea do ahu umbahen huhatahon” (Ps.116:10), didok si Paulus do: “Hami pe, na porsea do umbahen na dohot hami manghatahon.” Dung diida jala dibege huhut dialami sisean i na mangolu do Kristus Jesus i gabe porsea ma nasida jala didok: “Ndang tarbahen hami so manghatahon naung huida jala hubege hami” (Ul.4:20). Molo porsea hita na Tuhanta do na marsuru hita, ndang tagamon olo hita mauhom nang adong na mangorai, ai “ingkon oloan do hita di Debata asa di jolma” (pat.Ul.5:29). Molo porsea hita na Tuhanta do mandongani hita, ndang mabiar hita nang pe godang paraloan dohot parmaraan. Nuaeng tapamanat ma, molo so margurasa panindangionta, atik na hurang porsea do hita di na tahatindanghon i; molo songon na so marbulalak semangat panindangion dohot harararat ni Barita na Uli i, atik na hurang porsea do hita di parsuruon ni Tuhan i, jala molo tabolati panindangionta ala ni na manjaga reaksi ni na asing dohot ala ni na mangaradoti toleransi antar umat, atik na hurang porsea do hita di pandonganion ni Tuhanta Jesus i? Angkup ni i ringkot do antusanta, na marpardomuan situtu do panindangion i tu parsaoran. Molo taulahon i, ndang ala ni (demi) hita, alai ala ni (demi) na asing do, asa lam tu toropna na porsea jala dapotan haluaon na sian asi ni roha i, na gabe dongan saparsaoran jala na rap mandok mauliate tu Debata bahen hasangapon dohot hamuliaon di goarNa. Antong, margogohon haporseaon i taharinggashon ma ulaon panindangion i.

Na paduahon, gabe gogo do i laho pausungusung hamamate dohot hangongolu ni Kristus. “Sitaon na bernit do Kristus i” (Ul.3:18; 26:23). Mamungka sian hatutubuNa mangonai do tu Ibana proses pematian, jala di ujungna mate di hau pinarsilang. Nang pe songon i, hangoluan do Ibana. Di bagasan dohot marhite Ibana, mangolu portibi on; mangolu angka na porsea. Ngolu ni Kristus i, digombarhon do di ngolu ni si Paulus, ai sitaon na bernit do nang nang ibana. Di sitaononNa i, mangonggop do tongtong hamatean tu ibana. Sipata nunga pola saep rohana taringot tu ngoluna. Na marlapatan ma i, dialami do tongtong proses pematian, manang songon na nidokna di jolo i, tongtong do ibana pausungusung hamamate ni Jesus di dagingna, jala hombar tusi hajolmaonna parduru i lam tu burukna do sian ari tu ari. Alai di na mengalami proses pematian i mangolu do ibana, mangolu ala ni hangongolu ni Jesus i. Na marlapatan ma i, hangongolu ni Jesus i pe dipausungusung do di dagingna, jala hombar tusi hajolmaonna parbagasan i sai dipaimbaru do sian ari tu ari. Haporseaonna i do na tuk mandodo i, jala ala ni i ndang marnaloja ibana di ulaon i.

Songon i do hita, di na taihuthon Tuhanta i tong do mangonai tu hita sitaonon. Ndang hapunjunganta i, alai hatopan ni angka na porsea do i. Sian mulana i dope parsitaonon do na porsea i; dihosomi portibi on do i, dilelei jala dipaburuburu. Tuhanta Jesus mandok: “Haporsuhon do jambarmuna di portibi on” (Joh. 16:33b). Dipatuduhon i do na mangonai do tu hita proses pematian. Manang songon na nidok ni si Paulus, hamamate ni Kristus i tapausungusung do di dirinta. Hajolmaonta parduru i lam buruk, dung i di sada tingki ingkon mate do hita tutu. Alai sabalikna, laos dipatuduhon i do na so unduk be hita tu hamatean i, ai manaon pe hita ndang anggo binasa, alai mangolu do di bagasan Kristus i. Hajolmaonta parbagasan i sai dipaimbaru do ganup ari. Na marlapatan ma i, hangongolu ni Kristus naung hehe jala monang i pe tapausungusung do dirinta gabe hangoluanta; gabe hangoluan ni angka na porsea dohot gabe hangoluan ni huria i. Na gabe apulapul na paposhon roha ma i di hita paboa na so tagamon mintop huria jala na so tagamon siap na porsea i sian portibi on. Di abad 18 rupani, marbungaran do di Eropa sada paham na ginoaran aufklarung. Sada sian tese ni paham i mandok, abad 19 nama abad na parpudi ni huria, dung i mintop ma. Alai salpu do abad 19 manorusi tu abad 20 jala tolhas nuaeng tu abad 21 on, ndang tarida dope (jala ndang na laho tarida) tandatanda ni na laho mintop. Didok na mandok: “Semakin dibabat, semakin merambat.” Boasa? Ai Kristus naung hehe jala mangolu i do di bagasanna.

Na patoluhon, gabe gogo do i manantap dohot manghirim hasangapon sipapataron sogot. Porsea do si Paulus na so olat ni portibi on panghirimanna di Kristus i, alai na marudut do i tu tingki hasangapon na sumurung, na lumobi hamuliaonna sipapataron sogot. Songon Tuhan i naung pinahehe ni Debata sian na mate, naung gabe ulu di huria hatopan ni halak Kristen angka na badia, paheheonNa do nang ibana jala pajongjongonNa raphon sandok na porsea laho marhaladoi di adopanNa saleleng ni lelengna. Porsea jala manghirim disi ndang marnaloja ibana, ndang tawar hati manang patah semangat di na manaon dohot di na manghatindanghon Barita na Uli i.

Laos songon i do hita, marhitehite haporseaon i adong do di hita pos ni roha taringot tu sihirimon sogot. Ndang olat ni portibi na tarida on panghirimanta, alai na marudut do i tu hasiangan sogot sisalelenglelengna. Na gabe gogo ma i di hita di na manaonhon paraloan dohot di na manghatindanghon Barita na Uli i. Taadopi pe angka na maol ndang mabiar be hita, ndang mandele manang sumurut ala tangkas taboto, na sumurung do sijaloonta. Si Paulus mandok: “Ai hurajumi angka sitaonon di hasiangan on, hira na so adong do martimbangkon hasangapon sipapataron tu hita sogot” (Rom 8:18). Hira na so adong, ai na martingki jala na neang porsanon do sitaonon i, alai na manongtong do siteanon sogot i, na sumurung do hasangaponna, jala na lumobi do hamuliaonna. Antong, margogohon haporseaon tatatap ma sihirimonta i. Laos haporseaon i ma gogonta mangendehon ende na imbaru songon na jinouhon ni minggu Kantate on: “Endehon hamu ma di Jahowa ende na imbaru, ai nunga dipambahen Ibana angka halongangan.”

jkt.03/04.2010/mvs

Read More..

Jubilate

SERMON JAMITA TU MINGGU JUBILATE, 25 APRIL 2010
Ul.15:6-18

Patujolo

Di na laho manaek tu banua ginjang, didok Jesus do tu siseanNa i: “Gabe sitindangingKu ma hamu di Jerusalem dohot di sandok Judea dohot di Samaria, sahat ro di ujung ni tano on!” (Ul.1:8). Dung ro Tondi Porbadia i, pintor dipatulus sisean i do i di Jerusalem, gabe jongjong ma huria ni Kristus i disi jala rarat Barita na Uli i di huta i. Alai tar laon dope tingkina asa sahat i tu Judea jala taripar tu Samaria dohot tu ujung ni tano on.

Halongangan do dalan ni Tuhan i, ai na songgop do tingki i marhitehite sitaonon. Dung mate si Stepanus (Ul.6:6-7:60) masa do pangaleleon di Jerusalem, gabe marserak ma na porsea i tu Judea dohot Samaria (Ul.8:1). Di parserahanna i, dijamitahon nasida do hata i (Ul.8:4), gabe rarat ma i di luat Judea dohot Samaria. Laos di tingki i, adong ma usaho na sporadis mamaritahon Barita na Uli i tu halak sipelebegu. Parjolo tu sipelebegu angka na manghabiari Debata (i ma parbegu na menaruh minat tu ugamo Jahudi) na pinatupa ni si Pilippus tu parpangkat na sian Etiopia (Ul.8:26-38) dohot si Simon Petrus tu si Kornelius (Ul.10:1-48). Dung i lam terorganisasi rapi ma i marhite huria Antiokia. Deba sian na marserak i sahat do tu Penisia, Kipros, Antokia, dohot Kirene (Ul.11:19-20a). Disi pe, dibaritahon nasida do Barita na Uli i, alai holan tu halak Jahudi dope dohot tu proselit (parbegu naung marugamo Jahudi). Jongjong ma huria di angka inganan i. Rupa, ummaju do pamingkirion ni huria Kipros dohot Kirene, ai hehe ma rohanasida mamaritahon hata i tu ruar ni hajahudion. Ro ma deba sian nasida tu Antiokia, dipasaor dirina tu huria i, jala dijamitahon hata i tu halak Gorik (Ul.11:20b). Huria Antiokia ma muse na paborhathon si Paulus dohot si Barnabas mamaritahon Barita na Uli i tu luat ni parbegu. I ma pardalanan na parjolo (Ul.13-14). Songon i ma dalanna sahat Barita na Uli i tu ujung ni tano on.

Di mulana, ndang adong pola parsoalan taringot tu penginjilan na tu parbegu i. Adong do nian na sungkunsungkun jala na mamadai si Petrus taringot tusi, alai boi do i dialusi jala dipasidung so pola gabe gora di huria i (Ul.11:1-18) Alai lam leleng, tubu do parsoalan. Angka Kristen Jahudi na sian rongkanan ni Parise do mamungkasa (pat.Ul.15:5). Adong ma deba sian nasida na tuat tu Antiokia manggugai haporseaon ni huria i (Ul.15:1) Na sian roharohanasida do haroronasida i, ndada na niutus ni huria Jerusalem (Ul.15:24). Mangihuthon nasida, ingkon jolo Jahudi do parbegu i asa jangkonon tu hakristenon. Tangkasna, ingkon disunat do jolo jala digohi sude na nidok ni patik i, i pe asa tardidi. Ala ni i dipaborhat huria i ma si Paulus dohot si Barnabas raphon deba dongan tumopot angka apostel dohot pangituai laho patoranghon salisi i (Ul.15:2), gabe dipatupa ma sada rapot di Jerusalem sumulu hata i, jala i ma na masa di bindu 15 on.

Hatorangan

Marpungu ma angka apostel dohot pangituai. Apostel, lapatanna na sinuru manang na niutus. Di mulana, goar umum do i tu nasa na sinuru ni Jesus Kristus naung hehe jala marsangap i laho mamaritahon Barita na Uli i. Hombar tusi ma targoar si Paulus apostel (Rom 11:13). Songon i angka na asing, isara si Andronikus dohot si Junias (Rom 16:7). Si Jakobus anggi ni Tuhan i pe, sian mula ni huria i dope tarrajum do tu horong ni angka apostel (pat.Gal.1:17). Nang angka ‘parbarita na uli’ na ro jala na mangalo si si Paulus di huta Korintus, digoari do dirina apostel (pat.2 Kor.11:5). Alai di pudian ni ari, hombar tu tradisi Mateus (Evangelium Mateus disurat di parholangan ni taon 65 tu 110 M) dohot Lukas (Evangelium Lukas disurat marhira taon 80 M), gabe goar na khusus do i tu na sampuludua sisean ni Jesus Kristus i, na pinillitNa laho mandongani Ibana di ulaonNa (Mat.10:1-2). Manggonti si Judas, dipillit sisean i do si Matias. Syarat tu pamilliton i, i ma angka na rap dohot na sampuludua i mandongani Jesus saleleng Ibana marmeangmuli di tonga ni Israel olat ni pandidion ni si Johannes sahat tu hananaekNa (Ul.1:21-22). Taringot tu pangituai (ay.23 didok sintua; hata gorikna dos, presbuteroi) ndang torang manang na angka ise i jala boha hasasahatnasida tu hajongjongan i. Molo di huria na tubu sian penginjilan ni si Paulus torang do, na pinillit do nasida sian huria i (Ul.14:23). Asing ni na dua horong i (apostel dohot pangituai i), dohot do di rapot i angka na tuat sian Judea tu Antiokia (Ul.15:1). Sian ay.22 tahe, bolas jadi dohot do sude na sahuria i. Dungkon ni i, si Paulus, si Barnabas dohot utusan ni huria Antiokia.

Ndang dipaboa dison boha pardalan ni rapot i. Holan on, sanga do nasida marsual leleng. Marsual, mandok masisungkunan, masipatangkasan jala masibahen panimbangionna be. Dung i manghatai ma si Petrus. Dung hananek ni Jesus dohot haroro ni Tondi Porbadia i, ibana do na gabe uluan di sisean dohot huria na parjolo i (pat.Ul.1:15; 2:14; 3:6, 12). Alai muse, gumodang nama ibana mangaradoti pamaritahonon di Barita na Uli i. Parjolo sahali ditaringoti do naung tibu dipillit Debata ibana laho patubegehon Barita na Uli i tu angka sipelebegu, i ma na tu si Kornelius ro di sandok pangisi ni bagasna. Ndang na sian roharohana i, alai na sian onjar ni pangungkapon ni Debata do. Ibana pe, anggo di mulana dirajumi na ramun do halak parbegu, na so tama gabe hasahatan ni Barita na Uli i. Dung pe dijalo pangungkapon na sian Debata na mandok: “Unang ramun dok naung niiasan ni Debata,” asa borhat ibana; dung i, di jabu ni si Kornelius i, tongon di na marjamita ibana, dialami ibana ma na diusehon Debata do Tondi Porbadia i tu saluhut na umbege hata i, gabe marpanghuling na asing ma nasida (Ul.10:44, 46; 11:15).

Mangihuthon si Petrus, hasosonggop ni Tondi Porbadia i panindangion sian Debata do i paboa na so adong be parasingan ni Jahudi dohot na so Jahudi. Sitanda roha do Debata. Hombar tu panandaonNa i, naung dirajumi tau do si Kornelius dohot pangisi ni bagasna angka na so tarsunat i dope gabe hasonggopan ni Tondi PorbadiaNa dohot hasahatan ni Barita na UliNa asa porsea, ias jala malua. Sada do Tondi Porbadia, sada do Barita na Uli, sada do haporseaon, sada do haiason ni roha, jala sada do nang haluaon. Tondi na sasada i do dipadidihon tu Jahudi na marsunat dohot tu parbegu na so marsunat. Tondi Porbadia na sasada i na mangula marhite Barita na Uli na sasada i manogihon Jahudi dohot na so Jahudi tu haporseaon, tu haiason ni roha dohot tu haluaon na dos. Ala ni i, di adopan ni Debata ndang adong be imbar ni Jahudi sian na so Jahudi, jala ndang adong alasan so manjalo na so masunat tu pandidion na badia i.

Di ay.10, dipinsang si Petrus do Kristen Jahudi na sian horong Parise i, didok: “Boasa ma unjunanmuna Debata ...?” Molo Debata sandiri nunga mangusehon TondiNa tu parbegu na so tarsunat i asa sahat tu haporseaon dohot tu haluaon, boasa ingkon tambahonon ni jolma dope persyaratan marhite na mangampehon auga tu rungkung ni angka sisean, i ma panggohion di patik antara lain parsunaton i? Mangihuthon si Petrus, na mangunjuni Debata do i. Ringkot botoon nasida, gari halak Israel ndang tarusungsa patik i, mandok ndang hagohansa; lam na sian parbegu i ma? Angkup ni i, dalan haluaon na marhite patik i, i ma angka upacara dohot pelean na dipatupa bahen hasesaan ni angka dosa, tudutudu tu pelean pardengganan dohot haluaon na pinatupa ni Kristus i do i. Dung ro na tinudu i, mansohot ma na manudu i. Manang ise na naeng malua, Jahudi manang Gorik, malua ma di bagasan dohot marhite Kristus i. Haluaon na sian asi ni roha do i, dalan haporseaon; nda tung sian parulan (ulaon patik) i, asa unang adong na mamintori diri (Eps.2:8-9). Hombar tusi, di ay.11 disimpulhon ma, didok: “Marhite sian asi ni roha ni Tuhan Jesus do tahe umbahen na malua hita dihaporseai rohanta, nasida pe songon i do.”

Dung i mandok hata ma si Paulus dohot si Barnabas. Dipajojor nasida do godang ni tanda halongangan na pinatupa ni Debata marhitehite nasida di tongatonga ni angka parbegu saleleng di Antiokia dohot di pardalanannasida na parjolo mamaritahon Barita na Uli i. Godang do paraloan, alai di bagasan gogo na sian Tuhan i tarhamonanghon nasida do saluhutna i, ai gabe torop do na porsea di Barita na Uli i. Hohom do saluhut na pungu i umbege panindangionnasida i. (Ndang marsual songon na di bona ni rapot i!). Sian i boi do hilalaon ni roha, na ditohoi nasida do paboa na hombar tu tahi dohot lomo ni roha ni Debata do ulaon zending na tu parbegu i. Aut so i tung tagamon ma olo Tuhan i pahothon (menyungguhkan) jamitanasida marhite halongangan na mangihut i? (pat.Mrk.16:20).

Parpudi, manghatai ma si Jakobus. Si Jakobus dia do i? Adong tolu na margoar Jakobus na jonok tu Jesus. Parjolo, Apostel Jakobus dongan saama ni si Johannes (Mat.10:2 par). Tibu do ibana mate, dibunu si Herodes (Ul.12:2). Jadi, tontu do ndang ibana na nidokna di turpuk on. Paduahon, Apostel Jakobus anak ni si Alpeus (Mat.10:3 par). Dungkon ni goarna i, ndang adong be na binoto taringot tu ibana. Saleleng rap dohot Tuhan i, ndang adong peranna na menonjol. Molo ibana do na nidokna dison, mansai maol do siat tu roha pintor boi ibana dapotan status jala memainkan peran na senteral. Patoluhon, si Jakobus anggi ni Tuhan i (Mat.13:55 par). Di mulana, ndang sahalak na porsea ibana di Jesus (pat.Joh.7:5). Alai dung hehe Jesus i sian na mate, dipatuduhon do diriNa tu ibana (1 Kor.15:7), gabe porsea ma ibana. Di ari hananaek ni Jesus tu surgo, nunga dohot ibana raphon angka anggina di punguan ni sisean i (Ul.1:14). Sian na tolu i, dihaporseai jala dijalo toropan halak do paboa si Jakobus na patoluhon on do na nidokna di turpuk on. Dung gumodang si Petrus mangharonsothon ulaon pamaritahonon di Barita na Uli i (ida di ginjang!), sahat tu si Jakobus on nama uluan ni huria Jerusalem (pat.Ul.12:17; 21:18; Gal.2:9). Ala ni i, dison, di rapot ni angka apostel dohot pangituai i, ibana do na mambuat kesimpulan dohot haputusan (ida ay.19-20).

Di ay.14, ditohoi ibana do hata ni si Simon Petrus paboa naung ditatap Debata do angka sipelebegu jala dijangkon tu goarNa sian nasida gabe bangsoNa. Dung i, diondolhon ma paboa na masa do i songon panggohion ni panurirangon di Padan na Robi. Hombar tusi, dikutip ma sian panurirangon ni si Amos bd.9:11-12. [Pinatudos tu Padan na Robi na marhata Heber, marasing do na tarsurat dison. Marasing ala, kutipan sian Septuaginta (LXX) do i, i ma terjemahan ni Padan na Robi di hata Gorik, jala kutipan ni si Jakobus on pe tardok bebas do bahkan nunga mengandung interpretasi]. Na mangula do si Amos di Israel Utara (Samaria manang Efraim). Disuriranghon ibana do halelengse ni harajaon i. Saut do i masa di taon 722 SM, di habubuang ni harajaon i tu Assur. Mangingani tano naung hampir kosong i diparo halak Assur do tusi halak parbegu na gabe marsaor dohot halak Israel angka na tading i. Pomparan ni na dua horong i ma muse na gabe margoar Samaria na so niokuan ni halak Yahudi be songon pewaris ni Israel, bangso ni Debata, alai nunga gabe sahorong dohot parbegu. Alai halongangan, tu nasida disuriranghon si Amos do bagabaga haluaon na taringot tu restorasi ni harajaon dohot dinasti ni si Daud. Na marlapatan ma i, na ro do sada tingki na pajongjongon ni Debata do muse bangsoNa na imbaru na marharoroan sian sude bangso, i ma na sian halak Jahudi dohot parbegu. Panggohion ni bagabaga i masa do di ari ni Kristus Jesus. Di bagasan Kristus Jesus na sian Nasaret i, digohi Debata do angka bagabaga na taringot tu harajaon dohot dinasti ni si Daud (pat.Luk.1:32-33) dohot na taringot tu panjangkonon ni angka sipelebegu gabe bangso ni Debata. Mangihuthon si Jakobus -- sahali nari -- i do na masa di bagas ni si Kornelius di Kesarea songon na pinajojor ni si Petrus, songon i dohot di Antiokia nang di angka huta naung nidalanan ni si Paulus dohot si Barnabas. Ala ni i, ndang adong sitihaan molo dibaritahon Barita na Uli i tu angka sipelebegu, jala ndang siambatan agia ise sian angka naung muba rohana bongot tu huria ni Kristus i, ai na sian tahi ni Debata do i jala hombar tu bagabagaNa.

Rancangan Homiletis

Jubilate do goar ni minggunta ari on. Jubilate, mandok marolopolop, marsuraksurak di bagasan las ni roha. Ndang asal olopolop dohot las ni roha, alai ingkon na marpusathon Debata do, na mamuji jala marmuliaihon goarNa ala ni hatimbulon dohot hasongkalonNa naung pinapartarNa di bagasan angka pambahenanNa, songon na nidok ni Ps.66:1-3: “Marolopolop tu Debata ma ho, ale sandok tano on! Endehon hamu ma hamuliaon ni goarNa, marmulia bahen hamu pujipujianNa! Dok hamu ma mandok Debata: Tung na songkal do angka pambahenanMu! Binahen ni hinatimbul ni gogoM ingkon marsomba tu Ho angka musuM.” Angka dia ma naung binahen ni Debata di hita na mangonjar hita marolopolop mamujimuji jala marmuliaihon Ibana?

Na parjolo, dipabinsar do di hita barita na uliNa. Di na laho manaek tu banua ginjang, ditonai Jesus do siseanNa asa gabe sitindangiNa nasida di Jerusalem, di sandok Judea, di Samaria, sahat ro di ujung ni tano on. Dung ro Tondi Porbadia i, pintor diulahon sisean i do i. Parjolo di Jerusalem, dung i tu sandok Judea, tu Samaria, jala lambat laun tu ruar ni hajahudion manang tu ujung ni tano on. Si Pilippus dohot si Petrus do na parjolo manghatindanghon Barita na Uli i tu angka sipelebegu, dung i lam intensif ma i marhite huria Antiokia na paborhathon si Paulus dohot si Barnabas laho mamaritahon Barita na Uli i tu Pulo Kipros dohot tu Psidia dohot Pampilia na di Asia Kecil. Ulaon na maol jala na gok paraloan do i. Alai sian asi ni roha ni Debata, manorusi angka tingki dohot taon, mardalan do panindangion i jala 149 taon naung salpu, sahat ma i dohot tu hita, tu halak Batak na di tano Batak.

Apala i ma na patut olophonon jala pujihononta tu Debata. Mansai holom jala dangol do bangsonta uju i, tertutup jala terisolasi. Tutu, ndang apala ketat, ai masuk jala dijangkon do tong pengaruh sian ruar, songon na tarida dope di budayanta sahat tu tingki on. Di ketertutupanna i, mampu do nian bangsonta mengembangkan unsur-unsur kebudayaan na bernilai tinggi, isara sistem kekerabatan dalihan na tolu na so adong duana di sandok portibi on, jabu dohot gorga Batak, dohot surat Batak. Alai ndang hurang tong hinaroana, isara ni ulaula, rasun, gadam, pangulubalang, dohot angka na asing. Ala ni roana, pola do adong na manambanambai isara na mandok siallang jolma, jala tahaporseai do i bahkan secara licik adong do na mamangke i mambiarbiari jala pasiatsiathon dirina di pergaulan antar masyarakat. Hape sasintongna, ndang siallang jolma Batak. Ndang adong agia aha fakta na mambuktihon i. Pogos do angka ompunta uju i jala tartading, dorsun, ndang diboto mutmut ni haiason dohot hahipason. Alai apala tusi ma ro Barita na Uli na binoan ni missionar, isara Gerrit van Asselt, IL Nommensen, Otto Marcs dohot na asing. Ndang tarsoadahon agia ise, parbarita na uli do na parjolo patandahon hapistaran tu bangsonta, na mangungkap persinggungan tu budaya barat na maju na secara lambat laun dijalo jala diintegrasihon tu parngoluon ni bangsota, gabe lam tu pistarna jala lam tu majuna. Siala saluhutna i, patut ma hita tutu marjubilate, marolopolop jala marlas ni roha mamujimuji Debata.

Na paduahon, dipasonggop tu hita Tondi PorbadiaNa. Nunga nidok di jolo, ulaon na maol jala na gok paraloan do pamaritahonon di Barita na Uli i, ulaon na gok tantangan dohot pergumulan. Tantangan na parjolo ro do sian huria i, sian Kristen Jahudi na sian horong Parise. Mangihuthon nasida, holan Jahudi do na patut hasahatan ni Barita na Uli i, ndang dohot na so Jahudi. Ala ni i, angka na sian bangso sipelebegu na naeng gabe parjambar di parsaulian na marhite Barita na Uli i ingkon jolo dijahudihon do nasida, jolo disunat jala digohi sude na nidok ni patik i, dung i pe asa tardidi jala dijangkon tu huria. Alai ndang songon i fakta sian Debata songon na nialaman ni si Petrus, ai tongon marjamita ibana di jabu ni si Kornelius, songgop do Tondi Porbadia tu sude na manangihon hata i gabe marpanghuling na asing nasida tudos tu na nialaman ni angka apostel di Jerusalem di ari Pentakoste i. Na sian parbegu do si Kornelius i, jala na so marsunat dope ibana dohot sude pangisi ni bagasna. Alai ndang gabe ambatambat i di nasida laho manjalo Tondi Porbadia; Tondi na dos tu na jinalo ni apostel i. Mangihuthon si Petrus, panindangion na sian Debata do i paboahon na so adong be parasingan ni Jahudi dohot na so Jahudi, na marsunat dohot na so marsunat, alai naung gabe rap parjambar do sasude di silua na sian Debata.

I ma muse na patut olophonon, endehonon jala pujihononta tu Debata, dipasonggop jala dipaian TondiNa di bagasan hita. Alai boha tutu, toho do naung dipasonggop jala dipaian Debata Tondi Porbadia i di bagasan hita? Sai adong do halak na mandok na so mian jala na so mangula Tondi Porbadia di HKBP. Na marbonsir do i sian pingkiran na mandok, satu-satunya tanda ni na sinonggopan ni Tondi Porbadia i ma parhataon na leban, hape di HKBP ndang apala masa na songon i. Alai molo naeng botoonta tanda ni na sinonggopan ni Tondi Porbadia, ingkon parsiajaranta do i parjolo sahali sian hatorangan ni Tuhanta Jesus Kristus na di Joh.14-16. Disi dipatorang Ibana do ulaon ni Tondi Porbadia, i ma: Na mangondihon na porsea i(14:16a), mandongani (14:16b), mangingani (14:23), mangajari dohot paingothon tu nasa hata ni Jesus (Joh.14:26), manghatindanghon taringot tu Jesus (Joh.15:26); mangajari portibi on taringot tu dosa, taringot tu hapintoron, dohot taringot tu uhum (Joh.16:8-11), manogihon halak tu bagasan nasa hasintongan (Joh.16:13), dohot na pasangaphon Jesus (Joh.16:14). Mansai torang, ndang adong ditaringoti disi taringot tu na mangajarhon hata sileban. Sian i boi ma dohonon: Molo porsea jolma di pandonganion ni Debata, molo gabe porsea di Tuhan Jesus dohot di hataNa, molo gabe ditanda dosa jala diparhatopot i na roa jala siuhumon, na ingkon solsolan jala topotan, molo gabe ditanda hapintoron, hasintongan jala dipasangap Jesus Kristus, pos ma rohana naung songgop jala mian do Tondi Porbadia i di bagasan ibana. Ninna rohangku, ndang tarsoadahon agia ise na jumpang do na songon i di HKBP. Olo, jumpang do tutu. Molo tung adong na barani mansoadahon i, na mansoadahon ulaon ni Tondi Porbadia i do i. Alai ni i, patut do hita tutu marjubilate, marolopolop jala marlas ni roha mamujimuji Debata.

Na patoluhon, dibasabasahon tu hita haiason ni roha dohot haluaon na sian asi ni rohaNa. Marhitehite Tondi Porbadia na mangula mahitehite Barita na Uli i, tangkas do dialami si Pilippus, si Petrus, si Paulus dohot si Andreas na gabe muba do roha ni angka sipelebegu jala mulak nasida tu Debata. Songon na nidok nangkin taringot tu bangsonta, na ramun hian do nasida, na holang jala dao sian Debata. Alai marhite Barita na Uli na niulahon ni Tondi Porbadia i, nunga diurasi nasida, dipaias gabe sahat tu hamubaon ni roha dohot tu haporseaon asa tu haluaon. Haluaon na sian asi ni roha do i, na hombar tu tahi ni Debata na sian mulana i.

I ma muse na patut olophonon, endehonon jala pujihononta tu Debata, I ma muse na patut olophonon, endehonon jala pujihononta tu Debata. Marhitehite Barita na Uli na niulahon ni Tondi Porbadia i, nunga diurasi Debata hita; ditogihon hita tu hamubaon ni roha jala dipasahat tu haporseaon asa tu haluaon. Asi ni rohaNa sambing do na patupahon i, nda tung ala na taparsinta i manang ala ni na tapangido. Boha ma antong parsintaon, ai so na taboto hian manang aha taringot tusi. Di hasasahat ni barita haluaon dohot hangoluan i tu tanonta uju i rupani, di na marjamita sahalak pandita taringot tu hangoluan na saleleng ni lelengna, didokhon sada sian angka ompunta do mangalusi: “Aha nimmu, hangoluan na saleleng ni lelengna? Ah, anggo di ahu, gadong do hangoluan na saleleng ni lelengna, ai molo dung hinali parbuena boi dope suanon andorna.” Alai nuaeng, nunga sandok martua rohanta ala ni haporseaon naung jumpangan do hita di haluaon dohot hangoluan i. Nda patut marjubilate hita ala ni i, marolopolop huhut mamujimuji Debata?

jkt.25.03.2010/mvs

Read More..

Sijangkit Kalapa

SIJANGKIT KALAPA

Di na sahali, songon i ma didok barita, manjangkit do sada halak di kalapa na timbo. Tongon apala di na mandabui parbue ni kalapana i ibana tompu do mangombus alogo na mansai gogo. Munggalunggal ma hau ni kalapa i ditondong alogo i, hira na naeng marumpak nama. Mansai tarmara ma ibana jala mabiar situtu, gabe dihaol ma hau ni kalapa i jala digomos mansai gogo. Di hagogotanna i, tarsingot ma ibana tu Debata, gabe dipangiar ma soarana manjoujouhon: “Tuhan, tolong ahu!” Dung i, diuji ma mijur nangetnanget. Mansai manat, huhut sai marsigomos tu hau ni kalapa i, dijururhon ma dagingna dompak toru. Lam dao ibana sian punsu ni kalapa i, lam moru do parmunggal ni hauna i. Tong dope mansai gogo nian alogo i, alai ndang apala songon na di ginjang i be pangonaina. Taantusi be do i. Lam hatop ma parmijurna, alai sabalikna lam moru ma angggo jotjotna manjou goar ni Tuhan i. Dung i, marhira dua meter nari sian tano, manimbung ma ibana, jala holan ojak patna di tano pintor marsurak ma ibana mansai gogo mandok: “Mauliate ma Ompung Doli!”

Digombarhon barita i do rumang ni harohaon ni jolma na ingot jala joujou tu Debata di hamamasa ni hasusaan, alai lupa ia di ari halalas ni roha dohot pariaiaon; radot di ugamona jala ringgas tu parmingguan molo di hamamasa ni hagogotan, alai lalap jala lupa anggo di ariari hasonangan. Tutu, ndang sai sude songon i; adong do na so mansadi martangiang di las manang di arsak ni rohana. Alai ndang tarsoadahon na godang do jolma na ingot jala joujou tu Debata holan di arsak ni rohana, alai lupa anggo di las ni rohana. Adong tahe na suman tu sijangkit kalapa ondeng, na gabe mamereng ojahan ni haluaon dohot hasonanganna i di na asing, isara di sahala ni natuatua, di panumpak ni tondi ni hulahula, manang di sumangot ni ompuna. Gabe tu angka i ma ibana mandok mauliate, jala angka i ma muse na dipapujipuji, dipasubutsubut, manang dipapelepele, atik pe nanggo apala kuburan ni ompung dolina i ndang diboto be manang na di dia. Alai Debata do ojahan ni haluaon dohot hasonanganta. Ala ni i, tu Ibana do hita patut mandok mauliate siala saluhut (1 Tes.5:18a).

Read More..

Misericordias Domini

SERMON JAMITA TU MINGGU MISERICORDIAS DOMINI, 18 APRIL 2010
Luk.17:11-19

Patujolo

Disurathon si Lukas do evangelium on tu si Teopilus khususna (1:1-14), tu halak Kristen na sian bangso parbegu umumna. Hombar tusi, adong do disi manang na piga barita na mangondolhon hasurungan ni na so Jahudi sian Jahudi. Rupani, taringot tu sada letnan na ummura porsea di Tuhan Jesus sian Jahudi (7:1-9), taringot tu halak Samaria na andul umbagas panghilalaanna hajolmaona jala umpolin holong ni rohana tu donganna jolma (10:25-37), jala di turpuk on taringot tu sahalak Samaria na umbotoan mandok mauliate tu Tuhan Jesus sian sia halak Jahudi. Marhite i naeng ondolhononna do, di adopan ni Debata ndang adong hasurungan ni Jahudi sian na so Jahudi, alai sabalikna ndang adong hasurungan ni na so Jahudi sian Jahudi, ai halak Samaria pe tong do adong na manulak Jesus (9:52-53). Rap parhahurangan do saluhut jala rap mangharingkothon asi ni roha ni Debata na paluahon i.

Hatorangan

Di pardalananNa tu huta Jerusalem mandapothon sitaononNa (pat.9:51), dibolus Jesus do tongatonga ni luat Samaria dohot Galilea. Halak Samaria i ma campuran ni pasipasi ni Israel sisampulu marga dohot bangso parbegu na pinaro ni halak Assur laho mangingani tanonasida naung hampir kosong i. Haporseaonnasida pe nunga marlaok, ai dijangkon do deba unsur ni hasipelebeguon jala diintegrasihon tu ugamo Israel. Ala ni i, ndang diokui halak Jahudi nasida songon pewaris ni bangso ni Debata. Na marhapeahan do luatnasida di holangholang ni luat ni halak Jahudi, i ma Galilea di utara dohot Judea di dangsina. Marningot na marmusu tihus do na dua bangso i, angka Jahudi na sian Galilea na naeng laho tu Judea ndang apala dihalomohon mamolus sian Samaria, alai mamedu do tu purba, tu ipar ni aek Jordan, dung i mangireire topi habinsaran ni aek Jordan ditulus ma tu Judea. Laos songon i do nang na sian Judea tu Galilea. Jesus sandiri, ndang tarihot tu parsalisian ni na dua horong i. Dohot do tu halak Samaria Ibana ro, jala dohot do nasida naeng paluaonNa. Ala ni i, ndang dihasogohon Ibana mamolus sian Samaria (pat.Joh.4:3 duu). Nang pe songon i ndang sai tarbahensa tongtong songon i, ai sai dibereng jala dirajumi halak Samaria do Ibana songon sada sian musu tihusna, Jahudi na manghasogohon jala sihasogohononhon. (I do na melatarbelakangi panulahonnasida di Jesus na tinaringotan di ginjang i). Ala ni i ma ra asa didok dison, dibolus ma sian tongatonga ni luat Samaria dohot Galilea, lapatanna sian parholangan (parbalohan/perbatasan) ni luat Samaria dohot Galilea.

Laho bongot tu sada huta pajumpang do Ibana dohot sampulu halak na huliton. Hulit na nidokna dison ndang dos i tu hulit (kusta/lepra) na tartanda dope sahat tu tingki on di hita on, ai na marrumanghon rangkuman ni manang piga mansam sahit ni hulinghuling do i. Adong mandok psoriasis do i, i ma sahit hulinghuling na marrumangkon bercak-bercak mengerisik berwarna merah muda. Di hata Heber digoar do i zara’at, lapatanna hona pungkul (terpukul). Digoari i songon i ai di pangantusion ni Israel na dipungkul Debata do halak na marsahit songon i ala ni dosana na tertentu manang ala ni dosa na tineanna. Ala ni i, manjaga unang rarat huhut, dipabali do angka na songon i sian parsaoran. Ndang boi nasida saor tu na hipas di huta manang di balian; ndang boi saor dohot tu parpunguan (peribadahan). Gabe tinggal di ladang ma nasida manang di angka liang na so apala somal dibolus halak na hipas. Molo ingkon mamolus nasida sian dalan balobung, ingkon sai jouhonon nasida do: “Na ramun do hami, na ramun do hami,” asa botoon ni halak pasidinghon. Dipasada sahit i do na sampulu halak i, gabe ndang pola diparsoalhon nasida be Jahudi dohot Samaria. Mangihuthon patik ni Jahudi nian na ramun do halak Samaria, na so siparsaorhononhon. Alai ala ni sahit i, Jahudi i pe, laos tong mangihuthon patik i nunga gabe halak na ramun, na so siparsaorhononhon.

Nunga sahat tu nasida barita ni Jesus i. Ala ni i, disi diida nasida Ibana, pintor hehe ma di nasida giot ni roha mangido hamalumon. Ndang boi nasida jumonok, gabe mandaodao ma nasida jongjong jala sian i ma dipagogo nasida soarana mandok: “Jesus, Guru! Asi rohaM di hami!” Asi do tutu roha ni Jesus i mida nasida, ditangihon do pangidoannasida i jala dioloi, ai didok do: “Laho ma hamu patuduhon dirimuna tu angka malim!” Hombar tu patik i, hulit, parjolo sahali ndang masalah hahipason i di Israel, masalah haporseaon do manang ugamo. Malim do na mamareso dohot na manontuhon sasahalak na marsahit hulit, ndang dokter. Molo sintong do tutu na huliton, pintor dipabali ma i. Laos malim do muse na mamareso jala manontuhon naung malum manang ndang. Molo naung malum do tutu, pintor diuras ma ibana asa boi mulak muse tu parsaoran (Jaha 3 Mus.13-14). Ala ni i ma asa disuru Jesus nasida tu malim. Umbege i, pintor laho do nasida. Halongangan do i, ai uju na sinuru ni Jesus i nasida laho ndang adong dope tanda na tarida na mandok naung malum nasida. Ndang adong ganggu ni rohanasida, ndang adong sungkunsungkun na mandok boha do molo so malum; so nda tung gabe dangguran ni halak do nasida jala dohonon ni malim i pargabus? Sandok bulus do nasida laho. Boasa? Parjolo sahali, nunga dihuasoi parenta ni Jesus i nasida; jala paduahon, porsea situtu do nasida di huasoNa na pamalumhon i. Sintong do, huhut mardalan nasida mangoloi parsuru ni Jesus i, ias ma nasida. ‘Ias’ (tahir) do didok, ndang ‘malum’; ai -- sahali nari – hulit konsep religi do i, ndang hahipason. Molo huliton sasahalak, reaksi ni halak tusi, parjolo sahali ndang didok i na ‘marsahit’, alai na ‘ramun’. (Songon na nidok di ginjang i, molo ingkon mamolus nasida sian dalan balobung, ndang didok: “Na huliton do hami,” alai “na ramun do hami”). Laos songon i ma sabalikna, molo malua ibana sian sahit i, parjolo sahali ndang didok i naung ‘malum’, alai naung ‘ias’ do.

Menyadari naung malum nasida ndang tagamon so mansai las rohanasida. Lam tomos ma roha ni na sia halak (Jahudi?) mardalan tu malim asa pintor dipareso nasida jala diuras, dung i boi ma nasida mulak tu hutana, marsaor tu donganna jolma dohot tu Debata di bagasan peribadahan. Alai mulak do anggo na sahalak tu Jesus, jala halak Samaria do i; dipagogo ma soarana mamuji Debata, dipatungkap ma ibana tu jolo ni Tuhan i mandok mauliate. Debata marhite Jesus i do na paulakhon ibana tu ngolu na marlapatan, ala ni i gabe umarga do di ibana na mangaradoti pardomuanna tu Tuhan i sian na tu sisolhotna.

Disolsoli Jesus do na sia halak (Jahudi?) i, didok: “Di dia do na sia nari? Ndang adong jumpang hape, na olo mulak pasangaphon Debata, dungkon ni halak dagang on?” Na uli do na binahen ni na sia halak na laho tu malim i, ai hombar do i tu patik i, alai umuli dope na binahen ni halak Samaria na mulak mamuji jala mandok mauliate tu Tuhan i, ai molo na sia i, godangan na marhahonaan tu dirina (egocentris) do halalahonasida i, ai asa gira dipareso do nasida jala diuras asa boi mulak huta jala saor tu donganna, alai halak anggo Samaria i, na marhahonaan tu pardomuanna tu Debata (teocentris) do na dipatujolo, i ma pamujion dohot hamauliateon ni rohana tu Debata. Taringot tusi marlangku ma hatontuan na mandok, panggohion di patik i ndang boi manggonti pamujion dohot hamauliateon tu Debata. Dison, digoari Jesus do halak Samaria i ‘halak dagang’ (stranger/foreigner/orang asing), lapatanna na so bangso. Tangkasna, na so bangso ni Debata. Sabalikna do anggo Jahudi, targoar do nasida bangso ni Debata. Taringot tusi, mansai martua do rohanasida. Alai dison, dijoloani halak dagang i do nasida di panghangoluhonon di pangalaho ni bangso ni Debata, di pamujion dohot hamauliateon di Debata.

Didok Jesus do tu halak Samaria i: “Hehe ma ho, laho ma!” Laho tu dia? Disura roha, na mangulahi parusuonNa na di jolo i do i, i ma na patuduhon dirina tu malim. Di halak Samaria pe, adong dope parbinotoan taringot tu patik ni si Musa. [Adong do Pentateuch (Lima Gulungan, i ma 1-5 Musa) versi Samaria]. Ala ni i godangan do kemungkinan, na huliton ni Samaria pe, molo dung malum, ingkon jolo dipareso jala diuras malim do asa boi mulak tu komunitasna. Parpudi didok: “Haporseaonmi do paluahon ho.” Rumusan on tarjaha do di Luk.7:50, di pandohan ni Jesus tu parompuan pardosa godang i. Sian i torang do, na marhahonaan tu hasesaan ni dosa do i. Songon i ma dison, molo dihatahon i tu halak Samaria i na marlapatan do i naung dipalua ibana sian sahitna dohot sian dosana. I ma haluaon na utuh, haluaon di pardagingon dohot partondion. Haluaon na songon i jumpang do i holan di angka na porsea. Anggo taringot tu na sia halak nari ndang adong ditaringoti pardomuan ni hamalumonna tu haporseaon. Ala ni i, boi do nasida malum manang malua holan di pardagingon, ndang anggo di partondion.

Rancangan Homiletis

Miserikordias Domini do goar ni minggunta ari on. Na marharoroan do i sian Ps.33:5b na mandok: “Gok asi ni roha ni Jahowa do tano on.” Parasiroha jala pardengganbasa do Jahowa. Sian asi ni rohaNa do hita tartompa, manggulmit jala humosa; laos sian asi ni rohaNa i do hita manjalo nasa na tau hangoluanta. Ala parasiroha Ibana, manang sadihari pe sai na boi do hita manghirim, mangido jala manjalo sian Ibana angka na tau haluonta songon na hinatindanghon ni turpuk jamita di hita ari on.

Laho tu Jerusalem mandapothon sitaononNa, mamolus do Jesus sian parholangan ni luat Samaria dohot Galilea. Disi, pajumpang do Ibana dohot sampulu halak na huliton. Hulit, dirajumi halak Israel do i uhum ni Debata tu sasahalak ala ni dosana na tertentu, manang ala ni dosa na tineanna. Dirajumi na ramun do halak na songon i, jala dipabali do i sian parsaoran ni bangso dohot huria ni Debata. Nunga sahat barita ni Jesus tu nasida, gabe joujou ma nasida mandok: “Jesus, Guru! Asi rohaM di hami!” Asi do tutu roha ni Jesus di nasida, ai disuru do nasida patuduhon dirina tu angka malim. Porsea di Jesus i, pintor mangoloi do nasida, jala di bagasan pangoloionna i malum ma nasida.

Di bagasan dohot ala ni dosa i, na mangonai do uhum ni Debata tu hita jolma. Tean do tu hita uhum ala ni dosa ni ompunta si Adam i, ai ingkon mian hita di tano naung hona toru, ingkon porsuk ahaponta jala ingkon hir hodokta mangalului sipanganonta. Tarlele jala tarbuang do hita sian adopanNa, gabe angka na ramun na so partohap be di parsaoranNa. Na mangonai do tu hita uhum nang ala ni dosanta sandiri. Ragam do pangonaina, boi do i marrumanghon parsahiton, parhansitan, pardangolan, harugian, halojaon, dohot angka na asing. Alai ndang dihalomohon Debata hita mago di bagasan dosa i. Ala ni i, sian mulana i dope nunga pintor ditahi patupa haluaon di hita, jala i ma naung pinatupaNa di bagasan Tuhanta Jesus Kristus naung ro tu tano on. Asi ni rohaNa sambing do na patupahon i. Hombar tusi, didok si Johannes do: “Gabe daging ma Hata i jala maringan di tongatonga ni hita on, jadi huida hami ma hasangaponNa, i ma hasangapon ni Anak sasada na sian Ama i, gok asi ni roha dohot hasintongan,” jala ihut tusi, “hinorhon ni Jesus Kristus do manjadi asi ni roha dohot hasintongan” (Joh.1:14, 17). Manang ise na porsea di Ibana, na manghirim jala joujou tu Ibana sai na jumpangsa do asi ni rohaNa na paluahon i; malua ibana sian dosa dohot sian pangonaina, mulak muse pardomuan dohot parsaoranna tu Debata dohot tu donganna jolma. Apala i ma na mansai ringkot auhononta sian jamita on, molo tahilala pe na mangonai uhum Debata tu hita ala ni angka dosanta, tadapothon ma Jesus i, tapangido ma asi ni rohaNa, tadok ma: “Jesus, Tuhan! Asi rohaM di ahu!” Pos ma rohanta, sai na alusan jala oloanNa do hita.

Disi diboto naung malum nasida, mulak do sada sian na sampulu i tu Jesus; dipagogo ma soarana mamuji Debata, dipatungkap dirina tu jolo ni Jesus mandok mauliate, jala halak Samaria do i. Anggo na sia nari, ditorushon do pardalananna patuduhon dirina tu angka malim asa gira dipareso nasida jala diuras, dung i pintor boi ma mulak tu hutana, saor muse tu dongan dohot tu punguan parugamaonna. Na marlapatan ma i, marpamusatan tu dirina (egocentris) do nasida menyikapi hamalumonnasida i. Ndang songon i anggo halak Samaria i, disikapi ibana do hamalumonna i marpamusatan tu Debata (teocentris). Debata marhite Jesus i do na paluahon ibana sian haramunon, paulakhon tu ngolu na marlapatan. Ala ni i, pamujion dohot hamauliateon tu Debata do na parjolo dihalaputi. Disolsoli Jesus do na sia i, alai dipuji do anggo halak Samaria i, didok: “Haporseaonmi do paluahon ho!”

Laho bongot tu parpestaan, madekdek do saputangan ni sahalak ina. Ala tongon markain panjang ibana jala markabaya, tar susa do ibana unduk laho mambuat saputanganna i. Marnida i pintor ro ma sahalak bajarbajar, dijomput ma saputanganna i jala dilehon tu inanta i. Huhut dijalo, didok inanta i do: “Burjuna i ho Amang, mauliate da!” Mangan do sahali sada keluarga di restoran. Dung i ro ma tusi sahalak pangidoido. Dilehon inanta i ma tu ibana Rp.1.000. Huhut dijalo hepeng i nunga laos dilangkahon patna manadinghon nasida, ndang didok agia aha. Marnida i, didok sada sian nasida ma: “Dasar pangidoido.” Di parngoluon siapari ndang adong hukum formal na mangaturhon ingkon mamuji jala mandok mauliate halak na manjalo. Ala ni i ndang dosa i molo so mamujimuji halak jala so mandok mauliate, ndang adong sanksi ni i jala ndang siuhumon halak na songon i. Alai di hata ni Debata, tangkas do i diaturhon. Didok rupani: “Puji ma Jahowa, hamu ale angka na niasianNa!” (Ps.30:5). “Mandok mauliate ma hamu di Jahowa, ai na basa do Ibana, ai ro di salelenglelengna do asi ni rohaNa i” (Ps.106:1). Ala ni i, ingkon pujionta do Debata jala dohononta mauliate ala asi ni rohaNa. Tasorminhon ma i tu parngoluonta, boha do hita menyikapi asi ni roha ni Debata di ngolunta? Somal do di tongatonganta na mambahen selamatan. Na malum sian sahit rupani, na malua sian parmaraan dohot angka na asing. Alai boha do halak mangulahon i? Marpusathon ise do ibana marlas ni roha? Marpusathon diri do manang Debata? Ise do na dipuji jala tu ise do didok mauliate? So nda tung gabe dirina do disubut jala diparhatua, manang gabe disombahon sude pujian dohot hamauliateon tu tondi ni hulahula manang tu sumangot ni ompuna? Las ni roha na sintong i ma las ni roha na marpusathon Debata, na mamuji jala mandok mauliate tu Ibana. Na mamuji jala na mandok mauliate i do deba sian angka tanda ni haporseaon na marpangulaon, jala angka na porsea sisongon i do na jumpangan haluaon na gok, i ma haluaon ni pardagingon dohot partondion. Ringkot do i ingotonta asa unang masonanghu rohanta di hamalumon sambing, ai boi do sasahalak malum sian sahitna alai ndang malua anggo sian dosana.

jkt.17.03.2010/mvs

Read More..

Quasimodo Geniti

SERMON JAMITA TU MINGGU QUASIMODOGENITI, 11 APRIL 2010
1 Joh.2:1-6

Patujolo

Hira sapandapot do sude halak mandok si Johannes apostel i do na manurathon surat 1 Johannes on. Di angka ari hatutuana, na mangula do apostel i di Epesus. Hombar tusi, disura roha ni torop, ditongoshon ibana do surat on tu angka huria na humaliang Epesus. Na mamungka rarat do uju i sada poda haliluon di Epesus. Di pudian ni ari gabe margoar do poda i docetisme (ro sian hata Gorik dokein, na marlapatan seolah-olah/nampaknya). Dipodahon parpoda i do na so tutu gabe jolma Kristus i, alai holan idaon (nampaknya) do songon i, sai hira na (seolah-olah) jolma (hape ndang!). Urat ni poda i, i ma pingkiran na mandok na jahat do daging (hajolmaon) i, alai na badia do anggo Kristus i (Debata). Ala ni i, tung na so tagamon do Kristus i saor tu daging (hajolmaon) na jahat i. Tangkasna, mangihuthon docetisme i, jolma na somal do Jesus i, anak ni si Josep dohot si Maria. Alai di na tardidi Ibana, songgop ma tu Ibana Kristus (logos) i. Holan na songgop do, ndang anggo marsaor manang marsada. Saleleng na mangula Kristus i di portibi on, dipangke do jolma Jesus i songon kendaraanna. Alai di na tartangkup Jesus di Getsemane, sumurut do Kristus i sian Ibana. Jadi holan jolma Jesus i do na mananon, na tarsilang jala na mate i. Docetisme i do na gabe urat ni gnosticisme na marbungaran di abad na paduahon. Poda na rarat di Epesus na songon pusat ni peradaban di luat i di tingki i, manang na boha pe ndang tagamon so marhinorhon i tu na humaliangna. Ala ni i ma asa ditongoshon Apostel Johannes suratna on paingothon dohot patoguhon angka huria na disi.

Hatorangan

Dipanghulingi si Johannes do ruas ni huria i dohot pandohan angka anaha (Gr. teknia mou/my little children). Panggoarion i somal do dihonahon nang tu angka na magodang laho mangondolhon hasolhoton dohot haholongon. Nunga matua apostel i hatiha i, ala ni i ndang pola alang rohana mamanghulingi ruas ni huria i songon anakna, jala angka ruas i pe ndang gabe menek rohana umbege i. Ihut tusi, dilehon ma alasanna manurat tu nasida. “Umbahen na husurat on tu hamu (Gr. tauta grafoo/these things write I unto you),” ninna. Aha disurathon? I ma angka na tinaringotanna di 1:1-10: Taringot tu Kristus naung gabe daging (1:1-3), taringot tu Debata Panondang (1:5), dohot taringot tu parange ni angka naung di bagasan na tiur i (1:6-10). Ia disurathon pe i tu nasida didok: “Asa unang mardosa hamu.” Mardomu tu na nidok di Patujolo i, taringot tu jolma dipodahon parpoda haliluon i do, na tarhurung do tondi na badia na sian Tuhan i di bagasan daging na jahat i. Alai marhite panobusion ni Kristus i, dipalua ma tondi i sian huaso ni daging i. Angka i ma -- ninna nasida -- naung targoar anak ni Debata, naung mananda Kristus, naung saor dohot Debata, naung mian di bagasan Tuhan i, naung di bagasan na tiur, dohot na asing. Laos angka i ma na gabe slogannasida. Sai diintrodusihon be do dirina anak ni Debata. “Anak ni Debata do ahu,” ninna; ia so i, “hutanda do Ibana,” “naung saor do ahu tu Debata,” “naung mian di bagasan Tuhan i do ahu,” “naung di bagasan na tiur i do ahu,” dohot na asing. Angka na songon i -- ninna muse -- ndang tarhahua dosa be i. Dohot hata na asing, angka naung gabe anak ni Debata, ndang mardosa jala ndang boi be i mardosa. Ala ni i, boi nama i mangula lomolomo ni dagingna. Manangko rupani, mangalangkup manang mamunu. Ndang pola dia be i, ai holan daging i do na mangulahon i, ndang dohot tondi i. Apala i ma na nialo ni apostel i di na nidokna: “Molo tadok, naung saor hita tu Ibana, huhut taulahon na holom, pargabus do hita, ndang siula hasintongan hita. Molo tadok, na so adong dosanta, tapaotooto do dirinta, jala ndang di bagasan hita hasintongan i. Molo tadok, na so mardosa hita, pargabus do Ibana tabahen, jala ndang di bagasan hita anggo hataNa” (1:6, 8, 10; pat.2:4). Sahali nari -- disurathon do i tu huria i asa unang mardosa nasida, lapatanna unang dituntun mardosa ala ni na tarpaihut tu pingkiran ni docetisme i. Ndang na mandok na so mardosa be halak Kristen i, mardosa do. Alai molo mardosa, diokui do i hasalaan na ingkon disolsoli jala ingkon ditopoti. Taringot tu panopotion i ma didok: “Adong do pangondianta tu Ama i, i ma Jesus Kristus, partigor i.” Pangondian, mandok pembela, na mandongani, na mamboanhon, na mangondingi jala na manangianghon (pat.Heb.7:25). Ditangihon Debata do tangiangNa i, ai partigor do Ibana. Taringot tusi, nunga diondolhon i di jolo, didok: “Molo tatopoti angka dosanta, haposan do Ibana jala bonar, manesa dosanta jala paiashon hita sian nasa hageduhon” (1:9).

Paboa adong hasesaan i, sahali nari diondolhon i di ay.2, didok: “Ibana do pardengganan pasaehon angka dosanta; alai ndada holan dosanta, tung dohot do dosa ni sandok portibi on.” Di Padan na Robi, dipatikhon Tuhan Debata do tu bangsoNa Israel patupahon pelean pardengganan sahali sataon. Tu sangkap i ingkon pilliton jala seaton nasida do sada hambing tunggal, dung i boanon ni sintua ni malim ma mudarna tu bilut na songkal sahali jala pistikhononna tu langkop pardengganan ni poti parpadanan i. Marhite i dipatupa hasaean ni dosa di sandok bangso i (3 Mus.16:1 duu). Tudutudu do i tu pardengganan na pinatupa ni Kristus, ai songon Sintua ni Malim Bolon dipelehon do diriNa bahen hasaean ni angka dosa (pat.Heb.9:11 duu). Nunga disagihon hasesaan i tu angka na porsea, jala manang na sadihari pe na porsea i madabu tu dosa, dung i hehe rohana manolsoli jala manopoti, sai boi do nasida manghirim jala jumpangan di hasesaan i. Alai ndang holan di angka naung porsea, tung di sandok portibi on do rade hasesaan i. Na ringkot, naeng sude mananda di hadosaonna, manolsoli jala manopoti, dung i dipauba rohana jala porsea di Kristus i.

Nunga nidok, sada sian slogan ni angka parpoda haliluon i, i ma na mandok: “Hutanda do Ibana.” Holan nasida do tahe na dirajumi naung mananda Kristus i, na asing ndang. Alai songon na nidok di jolo i, sai diulahon do dosa dohot hajahaton. Panandaon di Kristus ndang sae i holan dohonon, alai ingkon na dipataridahon do i di ulaon dohot pangalaho. Didok apostel i: “Sian on do taboto naung tatanda Ibana: Molo taradoti angka patikNa.” Sabalikna: “Na mandok: ‘Hutanda do Ibana,’ alai ndang diradoti patikNa, pargabus do i, ndang adong hasintongan di bagasan ibana.” Na mananda Kristus ndada marlapatan i umboto goar manang pangalahoNa, poda manang patikNa, manang na pajojorhon angka pernyataan teologis taringot tu Ibana, alai lumobi do na mangolu di bagasan pardomuan dohot parsaoran tu Ibana (pat.1:3). Angka naung mananda Ibana ingkon ulahononna do hata dohot patikNa, isara haholongon ni roha i (pat.Joh.13:34; Gal.6:2). Pangaradotion di hata dohot patikNa, apala i do partanda ni halak naung mananda jala mangolu di bagasan pardomuan dohot parsaoran tu Ibana.

Sadalan tusi, di ay.5 didok: “Alai na mangaradoti hataNa, naung tutu ma gok haholongon ni roha ni Debata di bagasan ibana.” Na nidokna disi, siangkup ni na gabe partanda ni na mananda jala na mangolu di bagasan pardomuan dohot parsaoran tu Debata di bagasan Kristus, pangaradotion di hata dohot patik ni Tuhan i na laos partanda ni hagogok ni haholongon ni roha ni Debata do i di bagasan na porsea i. Di bagasan Kristus Jesus i, dipapatar Debata do holong ni rohaNa na so hatudosan i tu portibi on; holong ni roha na manobus, na manghophop jala na paluahon (pat.Joh.3:16). Nasa na porsea di Kristus i, jaloonna do holong na paluahon i. Gok, ndang hurang, lapatanna tuk paluahon, ai malua do ibana tutu jala jumpangan hangoluan na saleleng ni lelengna. Dung i, haholonganna ma Debata marhite na mangulahon kasih balasan (pat.1 Joh.4:19) na marhataridaan di pangaradotionna di hata dohot patikNa. Pangaradotionna di hata dohot patikNa i – sahali nari – i ma tandana naung gok do holong ni roha ni Debata naung jinalona, laos gok dohot holong ni rohana tu Debata.

Angkup ni i, na laos gabe partanda do i di parmianon di bagasan Kristus. Taringot tusi didok di ujung ni ay.5: “Sian i ma taboto hita di bagasan Ibana.” Di jolo nunga nidok, sada sian slogan ni parpoda haliluon i i ma na mandok naung mian di bagasan Kristus do nasida. Alai tung so tarida do di ngolunasida parange ni Kristus. Hata dohot patikNa ndang diradoti, ngolu dohot pambahenanNa ndang ditiru manang diteladani. Si Johannes mangondolhon dison: “Na mandok: ‘Mian di bagasan Ibana,’ ingkon diparangehon ma songon Ibana.” Komposisi Gorik ni di bagasan Kristus i ma en Christoo. Sarupa do i tu komposisi ni di Epesus i ma en Ephesoo. [Patudos tu komposisi Inggris in Christ (di bagasan Kristus) dos tu komposisi in Jakarta (di Jakarta)]. Angka na mangolu di Jakarta ingkon mangolu do hombar tu cara hidup Jakarta, menghirup udara Jakarta, mangallang idahan Jakarta, naik kendaraan Jakarta, manghatai hombar tu cara bicara Jakarta, dohot na asing. Songon i ma angka na di bagasan Kristus ingkon mangolu do hombar tu ngolu ni Kristus, manghatai hombar tu hata ni Kristus, marpingkir hombar pingkiran ni Kristus, marpangalaho hombar tu pangalaho ni Kristus, dohot na asing.

Rancangan Homiletis

Minggunta on margoar do Quasimodogeniti, lapatanna songon posoposo na imbaru tubu. Sarupa tu ungkapan tubu paduahalihon, di hata ‘tubu’ i do ondolan ni tudosan i. Tubu, mandok ruar sian ngolu na leleng, bongot tu ngolu na imbaru. Di hatutubuna, na ruar do sada posoposo sian fase ni ngoluna na leleng, i ma na di bagasan bortian jala na terbatas, dung i bongot tu fase na imbaru, i ma na di alam na bebas jala na bebas. Suman tusi, di bagasan Kristus Jesus Tuhanta i, marhitehite haheheonNa sian angka na mate, ditubuhon Debata do jolma paduahalihon (1 Ptr.1:3); diparuar sian ngolu na leleng asa tu ngolu na imbaru. Aha jala boha do ngolu na imbaru i? Tauji ma pamanathon i marhaborhatan sian turpuk jamita ari on.

Na parjolo, ngolu na imbaru i, i ma ngolu na pinalua jala pinadenggan dohot Debata. Di Padan na Robi, dipatikhon Debata do tu bangsoNa Israel patupahon pelean pardengganan sahali sataon. Tu sangkap i ingkon pilliton jala seaton nasida ma sada hambing tunggal, dung i boanon ni sintua ni malim ma mudarna tu bilut na songkal sahali ni undungundung parluhutan na badia manang bagas joro i jala pistikhononna tu langkop pardengganan ni poti parpadanan i. Marhitehite i dipatupa hasaean ni dosa di sandok bangso i. Tudutudu do i tu pardengganan na pinatupa ni Jesus Kristus i, ai songon Sintua ni Malim Bolon dipelehon do diriNa bahen hasaean ni dosa dohot haluaon ni sandok portibi on. Ndang ingkon ganup taon, alai sae do sahali ro di saleleng ni lelengna. Nasa na porsea di Ibana, malua do i, mardenggan dohot Debata jala jumpangan hangoluan na saleleng ni lelengna.

Apala i ma Barita na Uli ni turpuk jamita ari on di hita, angka naung pinalua do hita jala pinadenggan dohot Debata. Ndang ala ni diri manang ulaonta sandiri, alai ala ni ulaon panobusion na pinatupaNa sandiri do, na di bagasan dohot na marhitehite Tuhanta Jesus Kristus, AnakNa na sasada i, na tajalo di bagasan haporseaon. Songon halak angka naung pinalua, ndang sidatdatanta be mardosa. Sian na jolo tu nuaeng, sai adong do halak na sala mangantusi di lapatan ni haluaon i. Di tingki ni Apostel Johannes rupani, adong do na mamingkir na holan na marhahonaan tu tondi do haluaon i, ndang dohot tu daging. Hombar tusi didok, angka naung pinalua tondina, nunga boi non i mangulahon hagiot ni dagingna, isara ni na manangko, mangalangkup, mamunu, dohot angka na asing. Ndang pola boha i, ai holan daging i do na mangulahon i, ndang dohot anggo tondi i. Sian tingki tu tingki sai adong do muse na sangat ekstrim mangalapathon haluaon i, didok rupani, naung dipalua Kristus i do jolma sian angka dosa di tingki na salpu, di tingki nuaeng dohot di tingki na ro. Hombar tusi -- ninna -- ndang sala be na mardosa, ai andorang so diulahon jolma dope dosa i nunga disesa. Ndang sintong i, sabalikna do tahe sialoon jala sipasidingonta do dosa i. Si Paulus mandok: “Hita angka naung mate di dosa i, tung tarbahen hita dope mangolu di bagasan i?” (Rom 6:2) Ndang na mandok na so tagamon be hita madabu tu dosa, tagamon do. Didok sada sian reformator i do: “Simul justus et peccator,” lapatanna tigor alai pardosa (sambil benar pendosa); dung i muse, non posse non peccare, lapatanna ndang boi so mardosa. Alai molo so boi pe hita so mardosa ndang na mandok ingkon ulahononta ma sude dosa, ndang. Angkup ni i, molo mardosa pe hita so tung ma tarajumi i kewajaran; unang tapintori dirinta jala taparsidalianhon portibinta isara ni na mandok: “Ndang pola dia i, ai portibi dope on,” alai ingkon okuonta do paboa pangalaosion do i, hajahaton jala pemberontakan na ingkon solsolan jala topotan. Porsea ma hita: “Molo tatopoti angka dosanta, haposan do Ibana jala bonar, manesa dosanta jala paiashon hita sian nasa hageduhon.”

Na paduahon, ngolu na imbaru i, i ma ngolu na mian di bagasan Kristus. Manang na piga taon na salpu gabe pangajari do ahu di sada parsikolaan ni hurianta di Pematangsiantar. Di sada tingki, tongon mangajar di sada kalas jut do rohangku ala so adong penghapus. “Mana penghapus?” ningku manungkun. “Maaf, Pak; saya belum sempat membelinya,” ninna ketua kelas mangalusi. Hudok muse: “Usahakan dong!” Umbege i mengkelengkel jala marsurak ma na sakalas i sahali mandok: “Dooo … oong!” Pintor sadar ma ahu na so di Jakarta be ahu hape, nunga di Pematangsiantar na so somal mamangke istilah ‘dong’, dirajumi i tahe sigeokgeok jala siparengkelan. Angka na mian di Pematangsiantar ingkon hangoluhononna do cara hidup ni Pematangsiantar, ndang boi cara hidup ni Jakarta, ingkon manghatai hombar tu cara bicara ni Pematangsiantar, ndang cara bicara ni Surabaya, ingkon mangallang indahan ni Pematangsiantar, ndang gudeg ni Jogyakarta, ingkon mangonsop udara ni Pematangsiantar, ndang boi udara ni Bandung, ingkon manghunduli beca ni Pematangsiantar, ndang boi sadu ni Sukabumi.

Songon i do halak na mian di bagasan Kristus, ingkon marpingkir do i hombar tu cara berpikir ni Kristus, bersikap hombar tu cara bersikap ni Kristus, bertindak hombar tu cara bertindak ni Kristus. Dohot jempek, ingkon marparange songon Kristus. Alai boha do parange ni Kristus i? Domu jala saor do Ibana tongtong tu Debata AmaNa, diradoti tongtong hata dohot patikNa, jala dihaholongi Debata sian nasa ateateNa, sian nasa rohaNa dohot sian nasa hosaNa. Ingkon songon i ma hita, molo tadok naung mian hita di bagasan Kristus, ingkon domu jala saor do hita tongtong tu Debata, ingkon radotanta do hata dohot patikNa, jala ingkon haholonganta Ibana sian nasa ateatenta, sian nasa rohanta dohot sian nasa gogonta, jala donganta i songon dirinta.

jkt.11.03.2010/mvs

Read More..