13 Trinitatis

SERMON JAMITA MINGGU 13 TRINITATIS, 18 SEPTEMBER 2011

Mrk.3:31-35

Patujolo

Di Kapernaum do masa jamita on (pat.Mrk.2:1). Di bona ni pangulaonNa, bungkas do Jesus raphon inaNa, angka anggi dohot ibotoNa tu huta i (Mat.4:13). Hombar tusi, digoar do Kapernaum i hutaNa (Mat.9:1). Mangihuthon si Mateus, na manggohi panurirangon ni si Jesaya do Ibana disi (Jes.9:1 duu). Di huta i do dipungka parjamitaonNa (pat.Mat.4:17) jala di huta i do Ibana gumodang mangula (pat.Mat.11:23). Disi dipungka Jesus ulaonNa, pintor tahop do angka paraloan. Parjolo sahali, ro do i sian partogi ni bangso i, i ma angka malim, parise, dohot saduse. Ndang ditanda jala ndang diantusi nasida Ibana, ai adong sian ulaonNa na dirajumi maralo tu patik dohot hasomalan. Dung i, mabiar do nasida agoan sangap dohot pengaruh di tongatonga ni natorop i. Ala ni pangulaon ni Jesus na gok huaso i antong, dohot parjamitaon ro di pangajarionNa na marsahala (pat.Mat.7:29), torop do na tartarik tu Ibana. Manang tu dia pe Ibana laho, sai torop do mangihuthon, mandapothon dohot manangihon (pat.Mrk.3:7-8). Alai sabalikna, manang na di dia pe, sai marusaho do angka aloNa mangambati dohot manusai Ibana. Songon i ma di jolo ni turpuk on dipaboa, disalahon angka sibotosurat do Ibana na pamalumhon sahalak na sarion (Mrk.2:3-12), disalahon ala dijou si Levi jala mangan Ibana di jabuna (Mrk.2:13-17); dung i disual angka parise do Ibana taringot tu parpuasaon (Mrk.2:18-22) dohot ala na pinaloasNa i siseanNa manggotili dohot mangguguti eme di ari Sabat (Mrk.2:23-28), jala dionggopi marhite sahalak na mate tanganna sambariba (Mrk.3:1-6). Dung i sumurut ma Ibana tu topi tao, jala sian i tu sada dolok laho mamillit angka siseanNa. Salpu i, muli ma Ibana (Mrk.3:20) tu Kapernaum jala dibongoti ma sada jabu (pat.Alkitab, masuk ke sebuah rumah), gabe rongom ma ro natorop, pola sundat nasida mangan. Alai songon na nidok di jolo i, nunga laos disi angka sibotosurat na sangajo tuat sian huta Jerusalem manggugai roha ni halak asa unang porsea di Ibana. Ragam ma dipandok taringot tu Ibana, isara ‘na sibolison’ (Mrk.3:22a) manang ‘partondi na hodar’ (Mrk.3:30).

Hatorangan

“Dung i ro ma inaNa dohot angka angina, jadi di ruar nama nasida jongjong, gabe disuru ma na manjou Ibana. Na hundul do natorop i humaliang Ibana, gabe didok ma, ‘Di alaman an do inangMu dohot angka anggiM ro di angka ibotoM, diusoi do Ho.’” Sude na masa i dipaidaida angka sisolhotNa do, diida do pangharonsothon ni Jesus di ulaonNa, diida do panjangkon ni natorop, jala diida do dohot pangalo ni angka partogi ni bangso i. Diholsohon nasida do paraloan i. Di na so tartaon nasida be i, gabe ro ma nasida naeng ‘mangalap’ Ibana (Mrk.3:21). Angka ise do i? InaNa, si Maria; dung i angka angiNa, si Jakobus, si Joses, si Simon, dohot si Judas (pat.Mat.13:55b) raphon angka ibotoNa (saotihotikna dua halak). Di dia si Josep? Ra, nunga jumolo. Molo tapamanat sandok evangelium i, dunghonsa dipungka Jesus ulaonNa ndang hea be ditaringoti kehadiranna. Di na so tarpaidaida sisolhotna i sude paraloan tu Jesus i, gabe dohot ma nasida so mangantusi, ai [maniru pandok ni angka aloNa (?)] dirajumi nasida ma Jesus i ‘na rintik’ (Mrk.3:21b). Didok rohanasida, harintihon do i molo songon i ma pangharonsothon ni Jesus i di ulaonNa, ndang diboto adian pola sundat Ibana mangan. Ndang boi so parohon parmaraan i molo sai didatdati Jesus ulaon harintihonNa i. Manghuling ma disi holong parmudaronnasida gabe naeng ma ‘ondinganna’ Jesus i. Satu-satunya dalan mangondingi ndang lobi sian na pasohon Ibana, mamboan mulak jala manghurungi di jabu. Sangat mengedepan ma disi roha hainaon ni si Maria. Ra, ndang lupa ibana nian di boaboa sian ginjang taringot tu hadirion ni Anakna i andorang so hatutubuNa dope. Alai ala ni angka paraloan i, gabe ganggu ra rohana. Partogi ni bangso dohot ugamo nda sude nuaeng mangalo Ibana? Olo, angka malim dohot parise ro di saduse sude do curiga tu ulaonNa, tu poda dohot pangajaranNa. Hape, pandangan ni halak i dirajumi bangso i do i songon ukuran ni hasintongan jala na mempunyai pretensi na kuat di pengembangan manang penghempangan ni sadasada poda. Pangajaran naung tinulak ni angka sibotosurat ndang tarharaphon be i marhasil. Dung i, songon na so apala menonjol do di tingki i tanda ni hamesiason ni Jesus i. Tingki posoposo Ibana, ro do angka pardisurgo manghalashon dohot mangendehon, dibaritahon do hasosorangNa tu angka parmahan jala marhitehite bintang tu angka parhapistaran na sian purba gabe ro sude marsomba Ibana. Molo nunga songon i agung di hatutubuNa, nda lobi sian i ma nian dung mangula Ibana papatarhon hamesiasonNa? Hape ndada keagungan, hametmeton do na tarida. Sangat mengejutkan tahe, angka sitiop ukuran ni hasintongan manang angka ahli teologi ni bangso i nunga mengharamkan podaNa. Sude i secara kumulatif paponjot hosa ni si Maria. Boha, nipi do keagungan ni hatutubuNa i? Angka anggi dohot ibotoNa ndang dohot mengalami i. Tung pe dipaboa si Maria i tu nasida, kenyataan sinuaeng nunga lobi sian na cukup i laho manghagangguhonsa. Ala ni i, dibereng nasida ma Jesus i songon haha/iboto sambing, haha/iboto na istimewa (di bagasan keistimewaan ni ‘na rintik’ manang ‘na sibolison’) Holong pardagingon i sambing nama na mangonjar nasida mangantoi Ibana, panghirimon na asing ndang adong be. Alai ala godang ni jolma ndang boi nasida bongot tu jabu. Di bagasan pos ni roha na argahonon ni Jesus i ‘pangondingionnasida’ i, martona ma nasida manjou Ibana.

“Alai ninna ma mangalusi nasida, ‘Ise do goaron dainang, jala ise do dohonon angka angingKu?’ Jala dibereng ma angka na hundul humaliang Ibana, ninna ma, ‘Angka on do dainang dohot angka anggingKu. Ai na mangulahon lomo ni roha ni Debata, i do anggingKu, i do ibotongKu, i do dainang.’” Sikap ni sisolhotNa i, parungkilon do i di Jesus i. Parungkilon, ai sisolhotNa sandiri ndang mangantusi Ibana. Dihilala do tangkas, holong parmudaron na so sian pangantusion ni sisolhotna i gabe ambatambat do di Ibana laho mangulahon missionNa di portibi on. Alai dihamonanghon Ibana do i luhut. Ala ni i ndang dipasohot Ibana na marjamita i laho manghormati dohot mandapothon inaNa, angina dohot ibotoNa i. Ibana sandiri do na parjolo mangulahon jala manghangoluhon podaNa na mandok, “Na manjama ninggala huhut mamereng tu pudi, tung na so tau ma i tu harajaon ni Debata” (pat.Luk.9:57 duu; Mrk.8:34 du; 10:29 du par). Ditorushon do na marjamita i laos didok, “Ise do goaron dainang, jala ise do dohonon angka angingKu?” Huhut mamereng tu angka na hundul disi, Ibana sandiri ma mangalusi mandok, “Angka on do dainang dohot angka anggingKu.” Ndang na disoadahon Ibana parinaonNa tu si Maria, songon i paranggion dohot paribotoonNa, ndang. Sahat tu hau na pinarsilang pe diingot do inaNa i jala disarihon ngolu pangapudianna (pat.Joh.19:26 du). Asa on do niondolhonNa, di bagasan dohot marhite Ibana nunga dipatubu parsisolhoton na imbaru, partuturon na so ojak di parmudaron manang parbangsoon, alai di haporseaon do. Na gabe sipaingot ma i di si Maria asa lam pasurut diri sian hajongjonganna songon inaNa, jala angka anggi dohot ibotoNa pasurut diri sian hajongjonganna be maradophon Ibana, dung i paojakhon diri di haporseaon tu Ibana. Holan marhite na songon i do nasida boi pabongot diri tu parsaoran na imbaru i. Taringot tusi diondolhon ma di pandohanNa na mangihut, “Ai na mangulahon lomo ni roha ni Debata, i do anggingKu, i do ibotongKu, i do dainang.” Lomo ni roha ni Debata nunga dipapatar i di bagasan hata dohot patikNa. Tumangkas, di bagasan Jesus Kristus i sandiri. Ibana do naung hea mangulahon dohot manggohi patik ni Debata sasingkopsingkopna, naung hea jala na boi manghangoluhon lomo ni roha ni Debata dohot sintong. Ganup na naeng mananda dohot mangulahon lomo ni roha ni Debata, dibereng ma Kristus i, diihuthon ma Ibana jala ditiru. Tarpatupa do i? Tarpatupa do di angka na porsea, di angka naung tartompa gabe na imbaru. Sadalan tusi didok Ibana do sahali, “Haporseai hamu ma na sinuru ni Debata, i ma ulaon lomo ni rohaNa” (Joh.6:29). Nasa ulaon lomo ni roha ni Debata tubu do i sian haporseaon. Angka na so tubu sian haporseaon, dosa do i (Rom 14:23).

Rancangan Homiletis

Parsisolhoton manang partuturon mansai arga do i di jolma. Di bagasan pardomuanna tu na ginoaran sistem kemasyarakatan, partuturan i dirajumi angka na pistar di parbinotoan antropologi do i songon sada sian manang piga unsur ni kebudayaan na universal, i ma unsur na jumpang di sude masyarakat dohot kebudayaan. Manang di masyarakat dia jala na markebudayaan songon dia pe, na bersahaja manang pe na kompleks, sai jumpang do i. Parbinotoan dohot pangantusion di partuturon i, na manontuhon situtu do i di sikap dohot tindakan maradophon sasahalak, marhinorhon sipata dohot tu parsaulian. Ala ni i, relatif martua do halak na marsisolhot tu angka na sangap manang angka raja.

Pangalaho na arga i dipangke Bibel do laho manggombarhon rumang ni parsaoran dohot parsaulian ni angka na porsea di Kristus. Rupani, digoar do Debata Jahowa i, “Ama,” jala na porsea i, “Anak;” songon i digoar Jesus do sisean i, “Anggi,” jala angka apostel manggoari huria i, “Hahaanggi.” Nda gombaran ni partuturon i? Tutu, ndada partuturon na somal be i, na imbaru nama. Alai aha ma ojahan ni parsisolhoton i? Songon dia ma sikap hidup manang status simbol ala ni partuturon i? Angka i ma na naeng pamanatonta sian jamita on.

Dung dipunka Jesus ulaonNa pintor tubu do paraloan. Parjolo sahali ro do i sian angka partogi jala sitiop ukuran ni hasintongan manang ahli teologi ni Jahudi, i ma angka malim, parise dohot saduse. Ndang ditanda jala ndang diantusi nasida Jesus, ai adong sian ulaonNa na dirajumi maralo tu patik dohot hasomalan ni bangso i. Sobu do paraloan i, ai pola do digoar nasida Jesus ‘na sibolison’ manang ‘partondi na hodar.’ Ala ni i, tung na tarmara do ngoluNa. Ndang tahan mangadopi parungkilon i, dohot ma angka sisolhotNa, inaNa, angina ro di angka ibotoNa so mananda jala so mangantusi di Ibana. Marbonsir sian pandohan ni angka aloNa, dirajumi nasida ma Jesus i, “Na rintik.” Nang pe songon i, ala ni pardagingon i, holong do rohanasida di Ibana. Ala ni i dilului nasida ma dalan mangondingi, ro ma nasida naeng mangalap Ibana. Alai songon na so diargahon Jesus i do haroronasida i, ai didok Ibana do, “Ise do goaron dainang, jala ise do dohonon angka anggingKu?” Hira na mandok, “Ndang inangHu i, ndang anggingKu, ndang ibotongKu.” Alai ndang apala i, ai di hajolmaon, hot do si Maria i inaNa; songon i do nang angka tinodohonNa i, hot do nasida angiNa dohot ibotoNa, ndang tarsengsang i jala ndang tarsoadahon. Antong dia do na sinangkap pandohanNa i?

Di bagasan Kristus nunga tubu parsisolhoton na imbaru, partuturan na so marojahan di parmudaron, di pardagingon manang di parbangsoon; di haporseaonn do, di panandaon dohot di pangantusion di Ibana. Manang di dia jala manang sadihari Jesus ndang diantusi jala ndang dihaporseai halak, ndang tarbahen tubu disi parsaoran na sintong. Kecurigaan do na masa disi, hosom, late, biar dohot parsirangan. Alai di bagasan Kristus adong do parsaoran na imbaru, ai na gabe angka anak ni Debata do na porsea i. Konsekuensi ni haanahon i, dipadomu jala dipasada do sude di bagasan sada parsisolhoton na imbaru; i ma pardomuan ni angka na marhahamaranggi jala na mangolu di bagasan parsaoran tu Debata dohot tu Kristus i.

Suang songon i do nang di hita, di bagasan haporseaon di Kristus Jesus i sambing do hita dijangkon tu parsisolhoton na imbaru i. Alai tapamanat ma nuaeng, boha do haporseaonta di Jesus i? Songon dia do panandaon dohot pangantusionta di Ibana? Di ruhut hajolmaon, ndang adong pardomuanta tu Ibana. Ndang tulangta i manang amangborunta, ai halak Jahudi do Ibana, halak Batak ia hita. Ala ni i ndang adong sian hita on na boi jala na olo mangasahon pardomuan pardagingonta tu Ibana. Molo songon i, adong dope ringkot ni sipaingot ni jamita on tu hita? Adong do. Pardomuan ala haruason di sada organisasi huria sambing, parhuriaon na tinean sian ompu manang natoras ndang hurang i patudoson tu parsaoran na marojahan di parmudaron songon na pinatujolo ni sisolhot ni Jesus di jamita on. Ndang sai lias hurianta sian na songon i. Molo di parugamo na asing adong na ginoar ‘abangan,’ di huria pe adong do ‘ruas statistik’ (ruas iuran, ruas sakramen, ruas ari pesta, ruas kapal selam manang parminggu sahali sataon). Ndang dijamin na songon i parsidohotonta di parsisolhoton na imbaru i.

Sahali nari, parsisolhoton na imbaru i ndang marhaojahan i di parmudaron manang di pardagingon, ndang tarihot i tu tradisi manang hasomalan jala ndang tunduk tu aturan manang organisasi ni hajolmaon. Haporseaon di Jesus songon satu-satunya Sipalua jala Sipangolu, i sambing do ojahanna. Ala ni i sai tatanda ma Ibana, taantusi, tahaporseai jala tajangkon.

Mulak tu turpuk jamita di hita ari on, huhut mamereng tu angka na hundul manangihon podaNa didok Jesus ma, “Angka on do dainang dohot angka anggingKu.” Taringot tusi, dipatorang do tumangkas di pandohanNa na mangihut, “Ai na mangulahon lomo ni roha ni Debata, i do anggingKu, i do ibotongKu, i do dainang.” Ndang na mandok na di jolma manang di ulaonna do ojahan ni parsisolhoton i, ndang. Nunga niondolhon i nangkin di jolo. Antong, dia do na sinangkapNa disi? Na marhahonaan tu hataridaan ni parsisolhoton i do i. Nasa naung gabe sisolhot ingkon do mangulahon lomo ni roha ni Debata. Alai dia do lomo ni roha ni Debata? Taringot tusi, nunga dipapatar i di bagasan angka hataNa, angka patik dohot tonaNa. Tumangkas, di bagasan Jesus Kristus i sandiri. Ibana do satu-satuNya naung mangulahon dohot naung manggohi patik i sasingkopsingkopna, naung manghangoluhon lomo ni roha ni Debata di bagasan lapatan na sasintongsintongna. Ala ni i, manang ise na naeng mangulahon lomo ni roha ni Debata, dibereng ma Kristus Jesus i; diihuthon ma Ibana jala ditiru. Tarulahon do i? Tarulahon, ai angka naung porsea jala gabe na imbaru, dipatau do i tu nasa ulaon lomo ni roha ni Debata. Na porsea sambing, na asing ndang boi. Jadi bulus ma dohonon, haporseaon i do ulaon lomo ni roha ni Debata apala na parjolo, parbuena do angka na asing. Jesus i sandiri mandok, “Haporseai hamu ma na sinuru ni Debata, i ma ulaon lomo ni rohaNa.”

Suang songon i ma nang di hita; haanahon manang parsisolhotonta na dibagasan Kristus Jesus i manang na boha pe na mangigil hita do i asa mangulahon angka ulaon lomo ni roha ni Debata. Nunga nidok nangkin, haporseaon i do ulaon lomo ni roha ni Debata apala na parjolo. Alai songon dia do asa sahat hita tu haporseaon i? Si Paulus mandok, “Sian na manangihon do ro haporseaon” (Rom 10:187a) Hata ni Debata na tinangihon i do ulaula ni Tondi Porbadia manubuhon jolma tu haporseaon. Martin Luther mandok, “Diparhatutu rohangku do na so tarbahen ahu porsea di Jesus Kristus Tuhanhu, manang mandapothon Ibana ianggo tung sian roharohangku manang sian gogongku sandiri, alai na dijou Tondi Porbadia i do ahu marhitehite sian Barita na Uli.” Alai siulahononhon do haporseaon i, ai molo so adong pangulaonna naung mate do hadirionna (Jak.2:17). Ninna roha, mansai ringkot ma i parungkilhononta. Anggo taringot tu na manangihon do, ndang apala dohonon talu dope halak hita. Relatif torop dope halak na ro tu gareja dohot tu partangiangan, di na deba ndang sae holan i, dihaporluhon dope ‘jajan’ tu punguan angka na asing. Alai ndang sai tardok songon i anggo taringot tu na manghangoluhon dohot na mangulahon.

Jesus manjou hita asa olo manangihon hataNa. Di haoloonta manangihon, manjaha dohot mangguruhon, disi nunga dipasahat hita tu tangga na parjolo ni haporseaon i. Na lam tu toguna ma i muse di panangihonta na mangihut. Dung i margogohon haporseaon i, tau ma hita mangulahon ulaon angka na denggan na hombar tu lomo ni roha ni Ama i. Amen.

jkt.11.09.2011/mvs

Read More..

Duabelas Trinitatis

SERMON JAMITA MINGGU 12 TRINITATIS, 11 SEPTEMBER 2011

Jes.29:17-24

Patujolo

Mangula do si Jesaya di Juda di tingki hinarajahon ni si Jotam (747-743 SM), si Ahas (743-726 SM) dohot si Hiskia (726-697 SM). Ndang torus manorus, marujuuju do hombar tu parro ni pangungkapon sian Debata. Tarbagi tolu do tingki ni pangulaonna, i ma periode-I, sian panjouonna torus tu porang Siria-Ephraim (747-734 SM), periode-II sian porang Siria-Ephraim sahat tu habubuang ni Israel Utara (734-721 SM), dohot periode-III sian habubuang ni Israel Utara sahat tu hatutungkum ni huta Jerusalem (721-701 SM). Turpuk on tarrajum tu hasadaon na umbidang, i ma 28:1-35:10. Masuk tu periode-III. Di ombas i, hot dope Harajaon Juda, alai tarsosak situtu jala ingkon manggarar jomba bahal tu Asur. Ala so tahan dohot ala ni jujujuju ni Misir, memberontak do nasida dua hali, alai jalojalo do diintopi Asur. Mareak ujung ni periode i, disola jala disegai do godangan tano Juda; ditungkum ia Jerusalem, alai ndang anggo dibongoti jala dipatunduk (701 SM). Sude i dibereng si Jesaya do songon uhum ni Debata ala ni angka dosanasida. Tingki i, mansai roa do pangalaho ni halak Juda. Ndang porsea jala ndang marhaposan nasida tu Debata, tu Misir nama. Mangulahon angkal dohot sipaotooto sude, ndang olo unduk tu hata ni Debata (28:7 duu); jonok Debata di pamanganna, alai dao sian rohana (29:17). Ala ni i gabe dipasahat Debata nasida tu tangan ni parbegu (29:1 duu), tu haotoon dohot tu hapitungon (29:9 duu). Ndang adong na tau paluahon nasida sian i. Misir manang Asur pe ndang boi. Debata sandiri do na boi paluahon nasida sian i. Di turpuk on, ditaringoti do sada persfektif eskhatologis na mangalehon panghirimon na imbaru, ai paimbaruon ni Debata ma portibi (alam) dohot roha ni manisia, gabe patar hatigoran ni Debata na paluahon halak na bonar.

Hatorangan

“Nda otik nari situtu nama, jadi muba ma Libanon gabe hauma na lunak jala hauma na lunak i gabe tombak dietong.” Sahali nari, di jolo ni turpuk on (9-16), dipaboa do manang songon dia keadaan ni halak Juda. Maoto do nasida, pitung, nengel, ndang lomo rohana mambege hata ni Debata, dipasambar do hasintongan jala disoadahon Debata. Ala ni i, sursar do saluhut jala lumlam. Alai dison, digombarhon ma na paubaon ni Debata do na lumlam i jala paimbaruonNa saluhut. Di bahasa na puitis mansai uli panggombarhonna di haimbaruon i. Libanon na di utara ni Galilea, hatubuan ni hau ares angka na timbo jala na jagar. I ma na songon simbol ni haginjangon ni roha. Alai satongkin nari, songon i ma digombarhon dison, paubaon ni Debata ma i gabe hauma na lunak (sumintong, porlak hau na marparbue, kebun buah-buahan). Pinatudos tu hau ares, hau na marparbue andul do i i umpondok jala ndang apala jagar. Gombaran ni hatoruhon ma i. Jadi, paimbaruon ni Debata ma jolma i, na ginjang marroha hian gabe angka na toruk marroha.

“Dung i di na sadari i begeon ni angka na nengel ma hata ni Buku na Badia i jala marnida ma mata ni halak na mapitung sian haholomon dohot hagolapon.” Dison, digombarhon do muse aspek na asing ni haimbaruon ni jolma i, i ma hamalumon ni sahit dohot tihas ni partondion, ai marbinege ma disi angka na nengel jala marnida angka na mapitung gabe boi muse manjaha dohot mambege hata ni Debata. Nunga nidok, di hamamasa ni uhum i, pitung jala nengel do bangso i tu hata ni Debata, ai dijaha do nian Buku na Badia i alai ndang diantusi, ditangihon do nian alai ndang dibege. Songon na tarsahap Buku na Badia i di nasida jala tartutup (29:11-12). Ala ni i, holom jala golap ma nasida, redem (29:10), lilu tondina jala mangolu di ungutungut (29:24). Alai molo dung dipatulus Debata ulaon haluaonNa i, ungkap ma muse pinggolnasida tu parbinegean dohot pangoloion, ungkap matanasida tu parnidaon dohot pangantusion, gabe ditanda angka ulaon halongangan na binahen ni Debata, mangolu nasida di hatiuron jala mardalani di bagasan hatigoran.

“Jadi mardapotdapot ma las ni roha ni halak na dangol mida Jahowa jala marolopolop ma angka jolma na pogos mida Ibana na sun badia ni Israel.” Di tonga ni bangso na nengel jala na mapitung i, adong dope saotik nari halak angka na marsihohot di hadaulaton dohot haunduhon tu Jahowa, angka na mabiar mida Debata. Tarsosak do nasida, diparsineang, dirupa jala direhei halak. Ndang ala ni jahatna, tung ala ni hasatiaon dohot pangoloionna tu Debata do. Dison dibagabagahon, molo dung dipatupa Debata haluaon i, dipauba roha ni angka na jungkat, malua ma nasida sian pangarupaon gabe marlas ni roha nasida di bagasan las ni roha na mardapotdapot. Halalas ni rohanasida i dipusathon do tu Jahowa na sun badia ni Israel, haroroan ni haluaon i. Habadiaon ni Debata, apala i do teologi ni buku Jesaya (6:3b-7). Badia, parjolo sahali ndang istilah etis/moral i, alai istilah teologi do, na mangondolhon haasingon ni Debata sian nasa na adong. Na songkal jala na marmulia do Debata, na marhabangsa di hatongtongon na so hadonohan. Alai laos diondolhon i do usahoNa na paasinghon manang papulikhon sapunguan jolma (marhite ulaon haluaonNa) asa gabe bangso hapunjunganNa, siparsaorhononNa. Di bagasan ni i, na gabe marlapatan etis do habadiaon i, ai angka na pinillitNa i tarjou do asa gabe badia. Asa, pamangkeon ni ‘na sun badia ni Israel’ dison sekaligus do i mangondolhon taringot tu pambahenan haluaon ni Debata dohot taringot tu tanggungjawab moral siulahonon ni halak Israel. Asing sian sinajolo, naeng mangolu nasida di bagasan parange ni angka naung malua, na badia, na asing sian na asing.

“Ai pidom ma disi halak pangarupa, jala siap pangarehe jala pesan sude jolma angka na marsangkap hajahaton. Angka na mambahen mardosa jolma i marhitehite hata dohot manaon jorgong tu halak na mandok hata sintong di bahal, jala dipadapot halak na tigor i marhitehite sipaoto.” Konsekuensi ni pambahenan haluaon ni Debata ingkon mangonai uhum do Ibana tu angka parjahat. PapidomonNa ma jolo angka na mangarupa dohot na mangarehei angka na pogos dohot na dangol. Angka ise do i? I ma angka na ginjang marroha, na mangasahon hajongjongan dohot hamoraonna, jala na mamangke nasa na di ibana tu angka ulaon hajahaton, so mabiar mida Debata (pat.13:11; 25:3; 29:5); angka na mangalangkai uhum jala manginsahi panurirang ni Tuhan i (pat.28:14 duu; Ps.42:11; Poda 21:24); angka panipu na marsintahon harugian dohot hamagoan tu donganna jala na so dung mansadi marsangkapi dohot mangulahon hajahaton. Tarmasuk ma tuson angka partogi ni bangso i, isara angka panguhum, malim dohot panurirang (pat.29:10b), angka na so marmahani bagso i songon na patut. Dirupa nasida tahe bangso i, dililuhon, diela tu dosa. Sada sian angka ulaon pangarupaon na pinatupanasida, i ma na papeol uhum dohot hasintongan di paruhuman. Suman tu na masa di halak Batak na dipatupa paruhuman di partungkoan, songon i do di halak Israel, paruhuman di tingkat partoru na marhahonaan tu kasus-kasus perdata dohot moral dipatupa do i di bahal ni huta na niuluhon ni angka sintua ni huta, angka malim dohot angka panguhum (pat.5 Mus.21:19; 22:15; Jos.20:4). Hombar tu patik i nian, ingkon dalanhonon nasida do paruhuman i di bagasan hatigoran dohot hasintongan. Alai tung apala alo ni i do diulahon nasida, ai mansai mura do nasida mambahen mardosa jolma, lapatanna mansai mura mamutushon marsala halak so jolo manat ditimbangi hombar tu uhum dohot bukti-bukti na sah, alai sae do holan marhitehite hata. Ditaoni nasida do jorgong manang gasip (jerat) isara ancaman manang intimidasi tu halak sihatindanghon na sintong di paruhuman i. Angkup ni i, marhite sipaotooto isara panindangion gapgap dipadapot do halak na tigor. Molo angka sitiop hatigoran dohot hasintongan ndang jongjong be di hatigoran dohot hasintongan, ndang longang roha molo lobi so parduli situan natorop disi. Gabe godang ma na mabiar manghatahon na sintong, na deba nengelnengel gompul manang masabodoh, na asing muse apatis tu nasa na margoar hasintongan. Bahen hasasaut ni tahi haluaon ni Debata na taringot tu bangsoNa, angka pangarupa dohot pangarehei na sumangkapi hajahaton sisongon i ndang boi so diuhumi. Ndang holan sahali, alai sapanjang tingki haluaon i mardalan do panguhumion i.

“Dibahen i songon on do hata ni Jahowa na palua si Abraham tu pinompar ni si Jakob, ‘Jala ndang be jadi tarurak si Jakob, ndang be langan bohina. Ai molo diida angka anakna jadijadian ni tanganHu di tongatonganasida, parbadiaan nasida ma goarHu, parbadiaan nasida ma dohot na badia ni si Jakob, jala habiaran nasida ma Debata ni Israel.’” Haluaon sipatupaon ni Tuhan i na marhahonaan do i tu sandok bangso ni Debata. Dao andorang so jamita on, nunga bola dua harajaon Israel, i ma Israel Utara manang Epraim dohot Israel Selatan manang Juda, jala di 721 SM nunga tarbuang Epraim tu Asur. Nang pe songon i, ndang gabe so parsidohot nasida di bagabaga haluaon na martaringot di jamita on. Paboa luhut nasida parjambar disi, digombarhon ma dison na dibagabagahon Debata do haluaon i tu pinompar ni si Jakob. Di bagasan si Jakob, sada dope nasida sude; ndang adong dope utara manang dangsina, ndang adong Epraim manang Juda. Laos songon i do muse di ujungna, di tingki haluaon i, tong do nasida sada. Dison, digoar do Jahowa i ‘na palua si Abraham.’ Palua sian dia? Ndang torang i dison. Alai ra, ndang dao na sinangkap ni i sian panjouonna na sian Ur na di luat Kasdim i. Marhite panjouon i, dipalua do Ibana sian hasipelebeguon (pat.Jos.24:14-15) tu pangoloion di Debata. Jahowa na palua si Abraham i ma na marbagahon tu bangso Israel dison paboa na so tarurak be nasida jala ndang be langan bohina, lapatanna ndang maila be ala ni biar ni roha dohot parhansitan. Singkat ni na maila jala marlangan, dung dialami nasida pambahenan haluaon ni Debata, parbadiaan jala habiaran nasida ma goar ni Tuhan i. Marbadiaihon mandok, marhatopothon paboa Ibana do Debata; sasada Ibana, na asing jala na tandi sian na asing, sian nasa na adong. Na marbadiaihon i ndang tarsirang i sian na manghabiari, ai manang sadihari Debata papatar habadiaonNa sai songon na adong do pandokdohi na mandondoni na mambahen mabiar jolma i jala tahutan, penuh rasa gentar (pat.Jes.6:5).

“Jadi dapotan roha ma jolma partondi na lilu hian, jala gumuruhon poda ma halak parmungutmungut.” Na marbadiaihon goar ni Tuhan i na mangigil sandok hamubaon do i, hamubaon ni harohaon dohot pamingkirion. Hombar tusi, dibagabagahon do dison transformasi ni jolma, ai dapotan roha (sumintong, dapotan pangantusion) ma partondi na lilu hian. Ndada pangantusion na marhahonaan tu utohutok, tu haporseaon do, gabe hehe jala masihol rohana tu parsaoran dohot Tuhan i. Jala angka parmungutmungut (ala ni haliluon ni tondina) gabe mangguruhon poda manang pangajaran (doktrin), ungkap rohana tu tahi ni Debata jala gok las ni rohana mamujimuji Tuhan i.

Panggohionna

Sadihari do digohi bagabaga on? Ndang sahali, alai na sai digohi do i di angka tingki na mangihut. Rupani, di tingki ni si Hiskia dipamasa do haimbaruon parugamoon. Dung bangkit raja ibana, dipasintong do parsombaon tu Debata, dilohai angka tambak dohot ganaganaan angka na pinauli jala na sinomba ni amana si Ahas (2 Raj.13:3 duu). Laos di tingki i sumurut do huaso ni halak Asur, gabe malua harajaon Juda sian hasosahan (2 Raj.19:35 du). Na boi berengon ni halak na satingki dohot Panurirang Jesaya do i songon panggohion ni bagabaga on. Songon i ma di angka tingki na mangihut tusi, angka sundut ni halak Israel sai boi do marnida dohot mengalami panggohion ni bagabaga i di sada manang lobi peristiwa sejarah. Nang pe songon i, panggohion na sasintongna masa do i di haroro ni Kristus. Di bagasan dohot marhite Ibana songgop haluaon dohot haimbaruon na sempurna, haluaon na gok jala na utuh, pardagingon dohot partondion. Dipatubegehon Ibana do Barita na Uli tu angka na pogos, dipamalum na marsahit, dipahisar angka na martihas, dipabosur na male, diapuli angka na marsak, dijangkon angka pardosa, jala marhite ulaon panobusionNa di silang i dipatupa haluaon situtu, i ma haluaon sian dosa, sian sibolis dohot sian hamatean. Di hamamateNa i, nunga laos diuhum sibolis i raphon angka anak harajaonna. Ditorushon do haluaon i setiap saat, dung i pasingkoponNa ma i muse di ari parpudi. Disi ma masa haimbaruon di atas ni saluhut (Pgk.21:1 duu), gabe masa ma hahisaron dohot hahilason na so ra mansohot.

Rancangan Homiletis

“Holong do rohangku di Jahowa,” i do pandohan na parjolo tajaha nangkin di Hata ni Debata Turpuk ni Ari Minggu on, Ps.116:1-19. Panindangion ni sahalak na porsea do i naung mengalami pambahenan haluaon ni Debata. Na dimusui angka pargabus do ibana, gabe tarjepol jala dangol situtu panghilalaanna, hira naung dihaliangi rante ni hamatean ibana jala talpe tu hagogotan ni banua toru. Alai di na joujou ibana tu Debata, sian holong ni rohaNa ditangihon do parhurajaionna i jala dipalua ibana. I ma na mangonjar ibana manghaholongi Debata di bagasan sada kasih balasan na sian sandok hangoluanna. Hita pe, na tarjou do manghangoluhon holong na songon i. Didok apostel i, “Marroha holong ma hita, ala Ibana jumolo manghaholongi hita.” Aha huroha naung binahen ni Debata tu hita. Tapamanat ma i marhaborhatan sian turpuk jamita di hita ari on.

Dihatahon si Jesaya do jamita on di Juda di sada tingki na maol jala na susa. Suman tu tandiang na hapuloan do Juda hatiha i, jala hasosahan situtu ai ingkon manggarar jomba bahal do nasida tu Asur. Dibereng si Jesaya do saluhutna i songon hapataran ni uhum ni Debata tu hadosaonnasida. Ndang porsea be nasida tu Debata, nengel jala pitung nasida tu hataNa. Ala ni i dipasahat Debata nasida tu huaso ni parbegu na manosaknosak nasida. Saluhutna i, secara kumulatif gabe songon lingkaran setan na so marujung, ai lam nengel ma nasida jala mapitung, lam pogos jala dangol. Alai dison, dibagabagahon Debata do haluaon di nasida. PatupaonNa ma haimbaruon, jadi muba ma angka parroha na ginjang hian gabe parroha na toruk, buhaanNa muse pinggol dohot matanasida gabe ungkap tu hata ni Debata, dapotan roha muse jolma partondi na lilu hian jala gumuruhon poda halak parungutungut; malua ma nasida sian hasosahan, sian haurahon dohot sian langan ni bohi, gabe marlas ni roha nasida jala marolopolop marbadiahon dohot manghabiari Debata, na badia ni Israel.

Nunga leleng dung salpu tingki ni si Jesaya. Nang pe songon i, sai masa dope songon na tinaringotanna di panurirangonna on. Laos songon i do nang di tingkinta on, na boi masa do tong hanengelon dohot hapitungon tu hata ni Debata. Godang do nian parmingguan na balga na dilengkapi marhite koor dohot ende na manarik roha, alai atik boha do songon na masa di Israel, holan di pamangan. Godang bibel dohot angka buku kristen na dicetak di bagasan hata angka na haantusan, ragam alat komunikasi massa isara koran, majalah, radio dohot televisi na patubegehon hata ni Debata, marmansam alat audio visual isara casette, cd, dvd, manang film angka na tarpangke patubegehon jamita, godang parjamita na malo dohot halak na punya kharisma manurat, marsoara manang mengorganisasikan kebaktian kebangunan rohani massal, alai atik boha do impola ni Barita na Uli i laos buni di bagasan angka i, jala Bibel i gabe songon buku na tarsahap na so boi jahaon jala na so boi manghatai. Godang haholomon dohot hagolapon di tongatonga ni masyarakat, ragam penyelewengan di tongatonga ni bangso dohot negara; torop na nengel jala pitung, buha nian pinggol dohot matana alai ndang marbinege jala ndang marnida; ndang tarhatahon godang ni gabus dohot sipaotooto, na papeol uhum dohot hasintongan gabe torop ma na redem, na so pola parduli be tu nasa na margoar hasintongan. Ise do na boi paturehon jala na paluahon hita sian angka i? Jolma ndang boi, alai ingkon Debata sandiri do na turun tangan. Nunga dipatupa Ibana i di bagasan Jesus Kristus naung ro tu tano on. Di bagasan Ibana dipatupa Debata haimbaruon dohot haluaon ni hajolmaon. Ibana do alus haluaon tu ganup sundut ni manisia, tarmasuk hita angka na mangolu di tingki on dohot di inganan on. Ala ni i, patut haholonganta do Ibana. Ndang sae holan di bagasan dohot marhitehite hata, alai ingkon dohot do di bagasan dohot marhitehite ringgas ni rohanta manorushon ulaon haimbaruon dohot haluaon i tu sandok hajolmaon. Angkup ni i, ingkon parbadiaan jala habiaranta do Debata sian sandok ngolunta jala marlas ni roha hita mangoloi Ibana. Siradotanta do haimbaruon dohot haluaon i marhite na manghangoluhon ngolu na badia, na hombar tu lomo ni rohaNa.

Mulak tu turpuk ari on, ia mardosa jala jahat pe halak Juda di tingki ni Panurirang Jesaya, godangan do i ala ni partoginasida, i ma angka raja, malim, panurirang, panguhum dohot pangituai. Ndang diparmahani nasida bangso i songon na patut, sabalikna do tahe, diela do nasida mangulahon dosa; ndang dipinsangi angka siula hajahaton, dohot tahe nasida mangulahonsa. Ditindas nasida do situan natorop, ndang jongjong nasida di hasintongan dohot hatigoran. Ala ni i ndang longang roha molo lobi jumahat dope bangso i, umpitung jala umpojam. Bahen hasasaut dohot hatongtongon ni haimbaruon dohot haluaon i, ndang boi so uhuman ni Debata siulahon na songon i. Didok nangkin, “Ai pidom ma disi halak pangarupa, jala siap pangarehe jala pesan sude jolma angka na marsangkap hajahaton. Angka na mambahen mardosa jolma i marhitehite hata dohot manaon jorgong tu halak na mandok hata sintong di bahal, jala dipadapot halak na tigor i marhitehite sipaoto.”

Suang songon i do nang di tingki on, na bertindak do Debata manguhumi halak angka na mangulahon na so jadi. Manang ise pe halakna, parhalado manang ruas, partogi manang parripe, ndang tagamon malua i sian uhum ni Debata. Na boi masa do i di bagasan dohot marhitehite ragam cara. Ndang sai ingkon di bagasan dohot marhitehite cara na hebat manang na luar biasa, alai boi jala jumotjot do di bagasan dohot marhitehite pangalaho angka na somal isara ni sahit, harugian, hasonggoton, haurahon, haleaon, dohot angka na asing. Ndang sai holan tangkang ni rakyat i molo so diparsangapi torop halak be nuaeng alai diinsahi jala dileai nama angka na pinatujolo di tongatonga ni masyarakat, bangso dohot negara isara ruas ni DPR manang Presiden, alai na boi do i uhum sian Debata ala ni hamongkuson dohot pir ni rohanasida na hurang parduli di sitaonon dohot pardangolan ni bangso. Boi do ndang dibereng jala ditanda be i songon uhum, alai songon na nidok di ginjang holan tangkang ni rakyat. Taringot tusi dohonon do, hasopanandaonna i pe, uhum do i. Olo, uhum na jorbut do i molo so diboto halak be naung mardalan ibana di dalan hamagoan. Sandok ndang hohom Debata taringot tu hajahaton ni angka na jahat. Na gabe apulapul ma i di hita, molo taida pe angka na jahat na mardohar di hajahatonna, ndang gabe mandele hita ai taboto do ndang ro di saleleng ni lelengna hadoharonna. Na laos tanggungjawab ma i di hita songon huria asa barani maminsang angka na sala. Ndang na manguhum nian ulaon ni huria, alai konsekuensi logis ni ulaon pamaritahonon di haluaon, ndang boi so tingtinghonon jala lumbahononna uhum. Ala ni i, tanda na holong rohanta di Debata na paimbaruhon jala na paluahon i, sipatubegehononta do soara panurirangon taringot tu angka na masa di tonga ni bangso dohot portibinta. Laos sada usahonta do i laho mangambati hajahaton, unang lam torop halak na tarpedem jala na lilu. Amen.

jkt.04.09.2011/mvs

Read More..