Jamita 13 Trinitatis

JAMITA MINGGU 13 TRINITATIS, 02 SEPTEMBER 2012

Jak.1:16-27

Surat Jakobus pambuatan ni jamita di hita ari on, sada surat praktis do, na marisi lan poda na jongjong sandiri, angka na so sai adong pola pardomuan ni na sada tu na sada nari, jala bersifat umum. Mangihuthon alamatna, ditongoshon do i tu na sampuludua marga na di parserahan. Disura roha ni torop halak, di mulana, sada surat Jahudi hian do i, na dipangke sahalak panurat jala diisi dohot tondi ni hakristenon. Deba sian angka sipaingotna i, naeng pamanatonta do di jamita on.

1. Asa Marpingkir Hita jala Manghatai Sintong taringot tu Debata.

Tabege nangkin, dipungka do jamita on dohot sada sipaingot na jempek, na mandok, “Unang ma hamu lilu, angka donganhu na hinaholongan!” Na marhahonaan do i tu jolo dohot tu pudi. Di ay.13 ditaringoti na adong do halak na marmingkirhon dohot manghatahon na sala taringot tu Debata, didok, na tarunjun ibana sian Debata. Na tarunjun do ibana gabe madabu tu hajahaton. Alai laho mamintori dirina, gabe didok ma na Debata do mangunjuni ibana. Marhite i hira na naeng dohononna do, pambahenan angka na roa pe, angka na mangunjuni jala na mangonjarhon jolma tu dosa dohot tu hajahaton, ro do tong sian Debata. Pingkiran dohot hata haliluon do i, jala hombar tusi ma dipasingothon si Jakobus tu huria i asa unang ma lilu. Dung i di ay.17 dihatindanghon ma na holan na denggan do ro sian Debata, didok, “Saluhutna silehonlehon na denggan, nasa ulibasa na mauliutus, i ma na ro sian ginjang, sian Ama ni na tiur, na so olo muba, na so umboto agia halilu ni hamimimbar.”

Sada sian silehonlehon na denggan manang ulibasa na mauliutus i, i ma ngolu na imbaru. Di bagasan dosa, madabu do jolma tu haburuhon, tu ngolu na berpadanan tu hamatean jala na manuju tu hamagoan na salelenglelengna. Alai di bagasan Jesus Kristus, dijadihon Debata do jolma i muse gabe na imbaru. Taringot tusi didok si Paulus do di 2 Kor.5:17, “Molo di bagasan Kristus halak, na tinompa na imbaru ma i. Nunga salpu pangalaho na robi gabe na imbaru.” Laos i ma na nidok ni si Jakobus di ayat 18 ni jamita on, “Sian tahi ni rohaNa do ditubuhon Ibana hita marhitehite hata hasintongan i, asa hita gabe hira patumonaan ni na tinompaNa.”

Apala i ma na parjolo naeng auhonon jala hangoluhononta sian jamitanta di Minggu on, asa marpingkir jala manghatai hita sintong taringot tu Debata, unang ma na sabalikna marpingkir jala manghatahon na lipe taringot tu Ibana. Ninna roha, ndang sai malua hita sian na songon i. Manang piga minggu na salpu, hujaha do komentar ni sada halak di facebook, na mandok, “Beda-beda tipis do Jahowa sian sibolis.” Molo beda-beda tipis do tutu, logikana, sarupa alai ndang dos. Sian sibolis ro do na denggan, ro dohot na roa; sian Debata pe songon i, ro do na denggan, ro dohot na roa. Pingkiran na lipe do i, na sala jala na so ojak di hasintongan. Holan angka na denggan do ro sian Debata, i ma angka na marhahonaan tu hasasaut ni sangkap hatuaonNa na taringot tu haluaonta. Molo manguhum pe Ibana sipata, molo bertindak keras marhite angka na masa, ndang adong sangkapNa anggo mandabuhon hita tu dosa manang laho mangonjarhon tu bagasan hajahaton asa mago, alai na paingothon do, asa unang tarotahi be haimbaruonta naung niasiasihonNa i. Dohot hata na asing, halilu ni holong ni rohaNa do rimasNa i laho patongonhon langkanta tu dalan hadameon.

2. Asa Taradoti Hatigoran ni Debata

Ndang dijadihon Debata jolma songon tandiang na hapuloan, na so adong pardomuanna tu na asing, alai di bagasan parsaoran do manang relasi tu Ibana dohot tu sesama. Di konteks Jakobus on, hajongjongan na songon i do na ginoar hatigoran ni Debata. Dohot hata na asing, na tigor jala na mangolu di hatigoran, i ma angka na mian di bagasan parsaoran tu Debata. Hadengganon ni pardomuan ni jolma tu Debata, tartanda jala tarsuhat do i marhitehite hadengganon ni parsaoranna tu donganna jolma.

Alai songon i ma pangalahona, di bagasan dosa, sega do parsaoran i. Mansai godang jala ragam do pangalaho na gabe panegai di parsaoran i. Sian saluhutna i, adong ma tolu na dipatujolo dison, i ma,

a. Halosohon manangihon.

b. Hagirgiron manghatai.

c. Hagirgiron tarrimas.

Sasintongna nian, ingkon gumirgir do roha ni jolma manangihon sian na manghatai. Taringot tusi, didok sada halak do, “Dilehon Debata do di hita dua pinggol, sada pamangan asa gumodang hita manangihon sian na manghatai.” Alai ternyata, torop do jolma na girgiran manghatai. So diboto dope tangkas ni parsoalan, nunga pintor dikomentari; so diboto dope ise na sala nunga pintor hebo naeng manguhumuhumi. Hagirgiron manghatai i, mansai jonok do i huhut tu rimas jala panegai situtu do i tu parsaoran.

I pe ringkot do parrohahononta, ai ndang masalpuhu ia nidok, tar na ringgas do halak hita manghatai. Memang disintasintahon angka ompunta do angka anakna asa na pistar manghatai, asa gabe raja hata, panjahajaha di bibir parpustaha di tolonan. Hombar tusi dipasingothon do tu na umposo, “Unang gulut jambar juhut, jambar hata ma.” Mansai na arga do jambar hata i di hita. Panghataion di ulaon adat, torus do hata tambaan, jala ndang hurang halak na olo manambai. Nang pe so adong na imbaru, nang pe holan sambirbir hubakhubak, sai i do mulahulak, sai dibahen be do taruna. Ra ala ni i do deba asa godang halak hita na marhasil gabe pengacara. Alai ringkot do ingotonta, margunaan do na manangihon sian na manghatai. Marhite na manangihon tamba do na binoto, ai sian na tinangihon i sai adong do informasi na imbaru. Lumobi molo angka na umpistar na tinangihon i, ndang boi so lam mamora iba di pangantusion. Sabalikna do anggo sian na manghatai, ndang tamba be sian i na binoto, ndang adong disi informasi na imbaru, ai sintap ni naung binoto i do boi hatahonon. Boha ma bahenon manghatai planet Saturnus rupani, molo so hea do ginuruhon astronomi; boha ma bahenon manaringoti tenses, molo so binoto do hata Inggris? Ala ni i, demi perkembangan ni pribadinta dohot demi hahohot ni parsaoranta, patut parrohahononta do sipaingot ni turpuk on, asa girgiran hita manangihon sian na manghatai.

Angkup ni i, siotapanta do dohot rimas. Ndang na sala nian rimas i, ai hatauon na sian Debata do i sipangkeon ni jolma laho papatarhon sogo ni rohana tu dosa dohot laho mangulahon paraloanna tu parjahat dohot hajahaton. Didok sada halak, “Kemarahan diperlukan agar dunia tidak menjadi tempat yang sangat jelek.” Alai songon i ma tong pangalahona, di bagasan dosa gabe tarramun jala tarmara do rimas i, ai gabe dipangke jolma do i tu pementingan diri sendiri, papuashon dohot palaluhon hosom, dohot papuashon ngoluna na cenderung tu na roa. Singkat ni ulaula mangalo dosa, gabe ulaula patupahon dosa nama rimas i jotjot, sisegai pardomuan dohot parsaoran. I pe tung mansai ringkot do parrohahononta, ai ndang tarhailahon, tartanda do halak hita na mura bingkas, mura tarrimas, mura piripirion, mura muruk, jala sapala muruk ndang dibereng ninna pinggolna. Molo tardege donganna pat ni sahalak hita pintor mura do gurasing mandok, “Pat ni bayo on, na so marmata do huroha pat ni on.” Ndang songon halak Jawa na lambok mandok, “Maaf Pak, kakinya di atas kaki saya.” Ninna roha, ndang holan hatahata i, alai godang do fakta na membenarkan i. Mangarimasi anakna pe sipata, ndang diboto samban; angka hata na kasar ro di hata barangsi na so sidohonon pe olo do dipambuburahon. “Sai disintakhon porhas i ma ho,” ninna rupani. Jamita on manjouhon tu hita, “Ndang diulahon rimas ni jolma hatigoran ni Debata.”

3. Asa Gabe Siulahon Hata i ma Hita

Disuanhon Debata do hataNa tu jolma bahen haluaon dohot hangoluanna. Mardomu tusi, adong ma tolu sikap na ringkot hangoluhonon ni jolma, i ma:

a. Marlambok ni roha. Ingkon paradeon ni jolma do rohana manjalo hata i. Isara tano panaburan ni boni, ingkon dipaias do i jolo, digemburkan, dibornohi. Songon i do jolma, ia naeng gabe hasonggopan dohot hatubuan ni hata i, ingkon paradeonna do roha dohot tondina ro di sandok hangoluanna.

b. Manangihon. Lapatanna, diungkap pinggolna jala dipatedek roha dohot sandok hangoluanna manjalo hata i.

c. Mangulahon hata i. Ndang sae di jolma holan na manangihon, na manohoi manang marhatopothon hata i, alai ingkon dohot do na mangulahon.

Na paotooto dirina do halak na holan manangihon alai ndang diulahon; sipalensem do i, kemunafikan. Dipatudos si Jakobus do na songon i tu halak na paberengbereng rupana di sorminan. Sorminan na pinangke ni halak di tingki i, sian tombaga do. Asing situtu do i sian sorminan kaca na tatanda nuaeng, na bontar riongriong. Ndang apala mansai tangkas i pataridahon bohi ni halak, samar-samar do. Ala ni i, jumpa di jolo ni sorminan i, boi do dibayanghon halak rupana, alai dung salpu, ndang be. Songon i ma ninna na manangihon hata i, sintap ni di tingki na manangi-hon i do marsorminan ibana tu hata i, alai dung salpu i, ndang be. Sahali nari, na paotooto dirina do na songon i. Ingkon hangoluhonon jala ulahonon ni jolma do hata ni Debata na binegena.

Contoh konkrit ni na mangulahon hata ni Tuhan i, i ma na mangulahon hadaulaton. Hadaulaton, lapatanna ibadah dalam arti yang seluas-luasnya, i ma parsombaon di gareja manang di angka inganan parpunguan dohot panghonahonna di hangoluan siapari. Ibadah na sintong ndang tarbatas i jala ndang marujung holan di inganan parsombaon i, alai ngkon na manorusi do i tu balian ni na opat dorpi ni gareja jala sahat tu hangoluan siapari. Jamita na tarbege di parmingguan, siamenhonon do i di praktek ni ngolu ariari, patik na dipatubegehon di parpunguan ingkon olohonon do i di parkarejoan manang di partigatigaan, ende manang pujipujian na dipasahat di inganan parsombaon, ingkon udutan do i di huta dohot di jabu. Dohot hata na asing, hadaulaton na sintong sipapataron do i di bagasan rumang na tarida, isara na mandulo angka na so marama so marina dohot angka na mabalu di haporsuhonnasida, dohot di parsitutuon mangaramoti diriniba maradophon portibi on unang marlindang.

I pe mansai ringkot do parohahononta, ai ndang apala pangalaho na dao i sian ngolunta. Anggo taringot tu na manangihon do, ninna roha ndang pola talu dope hita. Relatif torop dope parminggu di hurianta, angkup ni parmingguan adong angka partangiangan wjik dohot parpunguan kategorial. Angka na so puas disi, laho dope ‘jajan’ tu ibadah na asing, tole dope muse tu KKR. Alai ndang apala tardok naung tasak hita anggo di na mangulahon. George Barna Research, sada lembaga penelitian di Amerika, hea do merilis hasil penelitian taringot tu pangantusion ni parugamoon di halak Amerika. 80% halak mandok, na marugamo i ma na mandohoti kegiatan-kegiatan seremonial, 17,5% mandok, marugamo i ma na mangalului dohot mendalami lapatan ni ngolu, holan 2,5% do na mandok, marugamo i ma na manghangoluhon ngolu na marparbue jala na marlapatan tu angka na asing. Boha do ia hita? Ninna roha, ndang apala sumurung hita sian nasida. Hata ni Debata jotjot do holan konsumsi di tempat-tempat peribadahan, ndang dope anggo gabe kebutuhan siapari. Ala ni i, ndang sai tarhangoluhon hita dope hadaulaton ni na marroha manang ibadah sejati songon na pinasingothon ni si Paulus, “Pasahat hamu ma dagingmuna bahen pelean na mangolu, na badia, na hinalomohon ni Debata; i ma hadaulaton ni na marroha” (Rom 12:1) Laos ala ni i ma ndang sai haramotan hita dirinta jotjot maradophon portibi on unang marlindang. Gabe sarombang tahe jotjot dohot portibi on. Ari Minggu, Kristen yang saleh, alai sian ari Sinen tu ari Sabtu, gabe Kristen yang salah. Jamita ari on manjouhon tu hita, “Gabe siulahon hata i ma hamu, unang holan pananginangi, angka na paotootohon dirina.” Amen.

Read More..

Jamita 12 Trinitatis

JAMITA 12 TRINITATIS, 26.08.2012

Ps.34:15-22

Mangihuthon isina, tarrajum do Ps.34 pambuatan ni turpuk jamita di hita ari Minggu on tu Psalmen Habisuhon (Mazmur Hikmat manang Kebijaksanaan). Angka psalmen sisongon i, na marisi pangajaran manang perenungan do taringot sadasada tema ni kesusasteraan hikmat, isara taringot tu hinauli dohot guna ni patik, taringot tu guna ni biar mida Jahowa, taringot tu hinadenggan dohot hinasonang ni parhahamaranggion, dohot angka na asing. Di Ps.34 on, di turpukta ari on khususna, dipodahon do taringot tu parasingan ni hatigoran sian hajahaton, parasingan ni partigor sian parjahat. Taringot tu na dua i, dirimpun ma di bagasan sada poda sipaingot na mandok, “Sumurut ma ho sian hajahaton jala ulahon na denggan.” Aha do hajahaton, jala aha ia hatigoran; ise jala boha do parjahat, ise jala boha muse ia partigor, jala songon dia do ngolu dohot ujungnasida sadasada? Tauji ma nuaeng pamanathon i marojahan di turpuk jamita di hita ari on.

Mangihuthon kamus, ia hajahaton i ma bangko, pangalaho dohot pambahenan na ojak di dosa, na maralo tu nilai, tu norma dohot tu uhum na sah. Sadalan tusi, ia parjahat i ma jolma na marbangko, na marpangalaho jala na mangulahon angka ulaon hajahaton na ojak di dosa, na maralo tu nilai, tu norma dohot tu uhum na sah. Sada sian rumang ni ulaon hajahaton i na martaringot di ay.22 ni turpukta ari on, na manghosom partigor, membenci orang benar. Manang na boha pe, sai na hasogohon ni parjahat do partigor, ai i do bangko dohot ngoluna. Molo taripar hita tu Padan na Imbaru, tung apala i do na dipangke Tuhanta Jesus Kristus laho manggombarhon ketegangan antara ni na porsea dohot na so porsea. Di Joh.17:14 rupani didok do, “Dihosomi portibi on do nasida, ai ndang sian portibi on nasida.” Ndang sian portibi on na porsea i, sian ginjang do, sidan Debata, ai songon on do pandok ni Evangelium Johanes taringot tusi, “Alai manang piga na manjangkon Ibana, tusi do dilehon huaso asa gabe anak ni Debata nasida, angka na porsea di goarNa. I ma angka na so tubu sian mudar, manang sian sangkap ni daging, manang sian sangkap ni baoa, tung sian Debata do.” (Joh.1:12-13). Ala asing haroroanna, asing do nilai dohot norma hidupna, asing bangko dohot pangalaho ro di pambahenanna, gabe dihosomi portibi on do nasida.

Ala na manghosomi i do ngoluna, sonang do roha ni parjahat i mangulahon hosom i. Las rohana jala marolop tondina molo boi disusai partigor i. Tutu, jotjot do marhasil nasida taringot tusi. Alai ndang torus songon i, ai adong do Debata. Na tigor do Debata, ndang adong hageduhon di bagasan Ibana. Ala ni i, ingkon aloonNa do parjahat dohot hajahaton i. “Matua alo ni angka sibahen na jat do bohi ni Jahowa,” ninna di ay.17, jala di ay.22 didok, “Sai na hamatehonon ni parjahat do hajahatonna,” lapatanna, hajahatonna i mangonai jala manginsombut tu dirina, gabe bonsir ni hamateanna. Debata sandiri pe tahe, ndang tagamon so bertindak manguhumi halak na songon i, siaphononNa baritana sian tano on. Dung i, di paruhuman sogot i, tontuhononna ma nasida songon parutang manang parsala jala siuhumon.

Mansai ringkot ma i parrohahononta asa unang mangapian hita mida parjahat. Sipata tutu, tonggi hian do idaon dosa i jala mansai tabo do na mardosa i; sipata mansai manarik do hajahaton i jala sangat menjanjikan. Sanga tombus rupani na manangko i, boi martimus dapur sataon, sahali tombus na menyelundup i, boi pintor pajongjong jabu na bolon; sanga tombus na korupsi i, boi terhimpun harta tujuh turunan. Di Padan na Robi pe, adong do i dicatat. Hombar tu pangantusion di tingki i, hamokmokon do tanda ni kesejahteraan, sipata mangiburu do roha ni partigor mamereng parjahat, ai mokmokmokmok do nasida. “Pola songon na bosol matanasida dibahen mokmokna,” ninna (Ps.73:7), sementara partigor i marniangniang sai hira na hurang gizi. Alai ndang tongtong songon i, ai adong do Debata na manguhumi. Uhum ni Debata, ndang sai didabuhon di bagasan rumangna na umbalga jala na jumorbut, isara aek na sumar di tingki ni si Noak manang udan barerang di tingki ni si Lot, alai jotjotan do di bagasan rumangna na somal isara ni akibat-akibat logis ni sadasada pambahenan. Ginisanna sisobur tuak na gabe marsahit butuha, pecandu narkotik na gabe agoan kesadaranna, manang na so paduli di habadiaon na gabe hona HIV/AIDS. Logis do i nian, alai ndang terlepas i sian uhum ni Debata. Ia so i, rohana sandiri gabe alona, ai sai busisaon patagamtagam biar so tung sadihari ro KPK manangkup jala manguhumi ibana, laos disita sude na niangkalanna. I pe, ndang terlepas i sian uhum ni Debata. Ndang sada manang dua, alai mansai torop do parjahat na so habotoan be baritana di tano on. Jala di ari sogot, tung so adong do sihirimon di angka parjahat. Ala ni i, dijouhon jamita sadari on ma tu hita, “Sumurut ma ho sian hajahaton!”

Singkat ni hajahaton, sihangoluhononta do hatigoran. Hatigoran manang hasintongan, di ay.15 digoar do huhut na denggan, i ma lomo ni roha ni Debata. Lomo ni roha ni Debata, dipapatar do i tu jolma di bagasan angka hata dohot angka tonaNa, di bagasan angka patik dohot angka uhumNa, dohot di bagasan angka bagabaga dohot angka lumbalumbaNa. Jadi bulus ma dohohon, hatigoran manang hasintongan manang na denggan i, i ma hata ni Debata; jala na mangolu di hatigoran i ma na mangulahon hata ni Debata. Ditangihon hata i, dijahai, diparsiajari, dipingkirpingkiri arian dohot borngin jala diulahon, dihonahon tu sude rumang manang konteks ni hangoluanna ariari.

Sada sian contoh konkrit ni angka ulaon hatigoran i na martaringot di turpuk on, i ma na mangalului hasonangan. Taringot tusi, didok di ay.15, “Lului hasonangan jala pareak ma i!” Hasonangan, hata heberna shaalowm lapatanna, dame manang hadameon. Angka halak na tigor sai na mangalului hadameon do i, mangalului hadengganon manang hasonangan tu donganna jolma. Ndang lomo rohana marbada manang pagulut, alai songon na nidok ni si Paulus di surat tongosanna tu halak Rom di bd.12:18, sintap ni na tarbahensa, ditiop do dame maradophon halak saluhutna. Tung apala i do tahe pokok ni kerinduan dohot giot ni rohana. Manang na sadihari pe, diupayahon do asa mangolu ibana di bagasan dame maradophon halak saluhutna. I ma na tigor, jala i ma partigor.

Alai nang pe sai hadameon i dilului jala dipareahi, ndang sai dihalomohon portibi on na porsea i. Sabalikna do tahe, songon naung tinaringotan di bagian parjolo ondeng, dihosomi do partigor i. Ala ni i, ndang sai tabo ngolu ni partigor i. Di ruhut ni hajolmaon tahe, sipata do tung mansai paet. Godang situtu sitaonon dohot parniahapanna. Ala ni godangna, pola do targoar partigor i na bojok marroha (patah hati) dohot na pogos tondi (remuk jiwanya). Nang pe songon i ndang mago partigor i, ndang ripas di tangan ni angka parjahat i, ai adong do Debata na mangondingi nasida. Jonok do Debata tu nasida, ditatap do nasida jala ditangihon joujou dohot anggukanggukna, diramoti do nasida jala dipalua sian parmaraan. Di bagasan pangondingionNa, ndang maponggol holiholina nanggo sada. Di pamingkirion ni halak Israel, tarmasuk inti ni hadirion ni jolma do holiholina. Jadi molo didok, ndang maponggol holiholina nanggo sada, na nidokna disi, ndang mahua daging dohot tondina, ndang mahua dirina.

Mardomu tusi, dijouhon jamita on ma nuaeng tu hita, tahangoluhon ma hatigoran i. Hombar tu satu-satunya contoh konkrit ni hatigoran na nilehon ni turpukta on, laos dohonon ma, taeahi jala tahangoluhon ma hadameon i. Mansai ringkot do i parrohahononta, ai ndang masalpuhu molo nidok, apala dison ma sada na jotjot tardapot hita songon parhahurangan. Baik songon warga negara bangsa, warga Batak manang pe songon warga Kristen. Sian angka bangso na asing na ro tu luatta on, sai adong do na terkesan jala manghatindanghon paboa na basar do bangsonta, na ramah, cinta dame. Las do rohanta mambege i jala tahalomohon do i. Alai molo jujur hita tu dirinta, anggo di kenyataanna ndang sai songon i, alai sipata mansai mura do hita bingkas, mura galak, mura togihonon marbada. Gari institusi na sasintongna nian patut patujolohon dame dohot hasonangan, isara lembaga-lembaga keagamaan, ndang jarang na patujolohon rimas bahkan kekerasan. Ditanda jala digoari halak do jotjot hurianta parbadabada. Tarmasuk parhalado, angka sintua, diakones, bibelvrouw, guru huria dohot angka panditana. Boasa? Sada na boi dohonon, ala kondisi na di ruar ni dirinta dope hatigoran manang hadameon i, ndang dope gabe hadirionta; gabe songon alat sambing do i jotjot na tapangke laho pasiatsiathon diri di tonga ni hajolmaon, manang songon strategi laho mangaradoti keseimbangan dohot ketenteraman antar sesama sambing, alai holan adong saotik na gitik ndang alang rohana marbada. Ala ni i, sandok sipareahanta do asa tung gabe parhadirion hatigoran hita, parhadirion hasintongan jala parhadirion hadameon anggiat haradotan jala tartiop hita dame maradophon halak saluhutna. Asa jumpang i, ingkon na ringgas do hita manangihon dohot mangguruhon hata ni Debata, ringgas manjaha, mamingkiri dohot manghangoluhonsa, manghonahonsa tu praktek ni ngolu ariari. Holan marhite na songon i do boi hita gabe parhatigoran, parhasintongan jala pardame.

Ndang na mura i, na maol do, ai songon na nidok di jolo ondeng, hombar tu bangko dohot haadongonna, sai dihosomi portibi on do na porsea i. Di bagasan hadameon pe parrona, dame dohot hasonangan pe diboan, tong do sai dicurigai. Songon i do pengalamanta jotjot di negara on. Ndang hea hita halak Kristen ala ni hakristenonta mamingkirhon na roa taringot tu bangso on, ndang hea hita ala ni hakristenonta patupa paraloan manang pemberontakan tu negara on, alai jotjot do hita dicurigai, diperlakukan songon warga negara kelas dua molo so ingkon dohonon kelas kambing. Ndang hea nian hurianta mamboan hagaoron tu sadasada luat, alai di torop inganan diambati do kehadiran dohot panghobasion ni huria i. Nang pe songon i, ndang boi so parhatopoton ni rohanta na halonganan do na masa, ai ndang gabe mansohot perkembangan ni huria i. Boasa? Ai Debata do mandongani, mangondingi, manatap, manangihon joujouna jala paluahon. Ala ni i, ndang adong alasanta mabiar manang mandele, alai ingkon sai datdatanta do na mangolu di hatigoran jala mangalului dame dohot hasonangan ni sandok hajolmaon. Dipargogoi Debata ma hita disi. Amen.

Read More..

Jamita Minggu 11 Trinitatis

JAMITA TU MINGGU 11 DUNG TRINITATIS, 19 AGUSTUS 2012

Poda 9:1-6

Na di ari Jumat i, ari 17 Agustus 2012 boho ma 67 taon dung na diproklamasihon kemerdekaan ni bangsonta, Negara Republik Indonesia na tahaholongi on. Manang di dia pe di Indonesia on, di pusat manang di daerah, dipatupa do upacara dohot perayaan marningot dohot manghalashon peristiwa na bersejarah i. Torop sian ruas ni bangsonta hadir do di pusat-pusat upacara dohot perayaan i. Na deba paihutihuthon sian radio manang televisi. Molo pe so diihuthon sada sian angka i, saotikotikna di bagasan rohana sai adong do pamingkirion taringot tusi, taringot tu proklamasi, kemerdekaan dohot ulang tahun.

Di ari on, nang pe naung dua ari, sai songon na di mata dope proses ni perayaan i. Saringar ni proklamasi, songon na so salpu dope sian parbinegean, jala kesan-kesan pemikiran taringot tu kemerdekaan ndang longkang dope sian roha. Godang do na paingothon hita taringot tusi. Angka tanda manang prasarana perayaan, isara ni gapura, hiasan dohot spanduk, hira so adong dope naung dibungka; manang tu dia pe hita laho, sai godang dope i dapot idaon.

Di ganup upacara peringatan i, sai dijahahon do Pembukaan Undang-undang Dasar 1945. Mansai ringkot do i antong, ai disi do digombarhon sangkap ni Negara Indonesia na merdeka jala na marpamarenta sandiri i. Taringot tusi, didok, “Kemudian dari pada itu, untuk membentuk suatu pemerintah negara Indonesia yang melindungi segenap bangsa dan seluruh tumpah darah Indonesia dan untuk memajukan kesejahteraan umum, mencerdaskan kehidupan bangsa, dan ikut melaksanakan ketertiban dunia berdasarkan kemerdekaan, perdamaian abadi dan keadilan sosial, maka disusunlah kemerdekaan kebangsaan Indonesia itu dalam suatu Undang-undang Dasar Negara Indonesia.”

Mardomu tu turpuk jamita di hita ari on, naeng pamanatonta do sangombas sada sian tujuan ni negaranta na martaringot di Pembukaan ni UUD-45 i, i ma na mandok, “Mencerdaskan kehidupan bangsa.” Cerdas mandok, sempurna perkembangan akal budinya untuk dapat berpikir dan mengerti. Jadi, na martugas do bangso dohot negaranta mangusahohon perkembangan ni akal budi ni masyarakat marhithite pendidikan, pengajaran dan pelatihan. Tontu, na disadari partoginta angka na parjolo i do hiraringkot ni kecerdasan i. Molo boi halak Bolanda na songon i otik menjajah Indonesia na songon i balga pola 350 taon, manang na boha pe adong do pardomuan ni i tu haotoon, ai manang di dia pe di portibi on sai allangallang ni na bisuk do na oto. “Na bisuk nampuna hata, na oto tu pargadisan,” ninna halak hita. Asa tung sintong do molo tung apala kecerdasan i na disurathon di Pembukaan ni UUD-45 i na ingkon ulaon ni bangso dohot negaranta na merdeka i. Taringot tusi, ndang parsoadaon nunga godang naung niula ni bangsonta jala nunga tadai parbuena. Nunga torop ruas ni bangsonta na targoar na pistar, angka sarjana, doktor dohot profesor. Alai kecerdasan dia do i, jala habisuhon na boha? Godangan do i na bersifat tano on, hapistaran dohot habisuhon portibi. Alai nuaeng, naeng taringotanta do samansam habisuhon na asing, na sian ginjang, na sian Debata. Aha ma lapatan ni habisuhon i, boha ma hita menyikapi i, jala aha ma guna ni i di hita? Tauji ma nuaeng pamanathon i marojahan tu turpuk di hita ari on.

Buku Poda (Amsal), i ma bahan parsiajaran manang pendidikan tradisional ni halak Israel. Molo tajaha jala tapamanat buku i sian bonana sahat tu ujungna, ndang tagamon so dapot rohanta na marpamusatan do i di sada hata, i ma habisuhon. Sipata didok hapistaran, sipata hapantason, sipata muse parbinotoan. (Di hata Indonesia didok hikmat, sipata kebijaksanaan, sipata muse pengetahuan). Aha do habisuhon i? Habisuhon, i ma kondisi kerohanian na patauhon jolma mangatusi dohot manghangolu-hon hasintongan ni hata ni Debata jala manghonahonsa tu praktek ni ngolu ariari. Dohot pandohan na asing, marojahan tu tangiang ni Raja Salomo di 1 Raj.3:9, habisuhon, i ma hatauon manirang na denggan sian na roa. Ndang sai nalnal parasingan ni na denggan sian na roa. Angka na uli mangihuthon adat dohot hasomalan ni hajolmaon rupani, molo diadophon tu hasintongan ni hata ni Debata, boi do i gabe na roa; songon i sabalikna, angka na sinubanghon ni jolma mangihuthon adat dohot uhum ni hajolmaon, tung apala i do pinangido ni Debata. Marhite habisuhon, gabe tandaon ni jolma ma na denggan i, tandaonna dohot na roa; dung i laos sian tondi ni habisuhon i botoonna ma mangulahon na denggan i, botoonna dohot pasiding na roa. Asa, tung mansai na arga jala na marguna situtu do habisuhon i.

Marningot arga dohot ringkotna, di sandok Buku Poda on, dipersonifikasikan do habisuhon i, lapatanna digombarhon hira sada pribadi na mangolu, na manggulmit jala na marpambahenan. I do na tarida di turpuk on, ai digombarhon do hapistaran i songon sada pribadi na pajongjong jabu. “Nunga dipanjongjong hapistaran i jabuna, jala nunga didakdak tiangna batu sipitupitu i,” ninna. Taboto do, jabu manang bagas sada sian kebutuhan utama ni hajolmaon do i. Di bangsonta rupani, sai disejajarhon do ni i tu sipanganon dohot parabiton. Sada ungkapan naung baku do di hita sandang, pangan dan papan. Di torop inganan, isara di kota-kota, justru jabu do na paling mendesak. Anggo holan laho mangan do, torop do jolma na marhais martuduk, lapatanna, na niomona na sadari i do panganonna sadari i. Sian pansarianna na mansai minim, boi do tuhoronna sakilo dua kilo boras kualitas rendah, tahu dohot tempe manang na pigangiris; anggo holan laho marabit do, adong do burjer angka na so hurang dengganna jala na mansai mura. Alai anggo jabu ingkon modal besar do asa tarpajongjong. Tung na mengontrak pe, tong do ingkon biaya tinggi. Alai manang na boha pe argana, ndang boi so ingkon adong, ai ndang tarbahen ise mangolu molo torus do di alam terbuka, torus dipadadangdadang ari jala dipaombusombus alogo, torus ditinggang udan jala disorop ombun. Di jabu do jolma i mian, disi do marsaor dohot dongan sajabu, disi mangan asa mangolu, disi martangiang jala marsaor dohot Debata, disi do angka dakdanak dipagodanggodang jala diajari asa gabe jolma na pistar jala na marroha, dipersiapkan gabe jolma na sesuai tu huria, tu masyarakat dohot bangso. Songon i ma ringkot ni jabu i. Songon ringkot ni bagas i, songon i ma digombarhon dison hinaringkot ni habisuhon, hapistaran, hapantason dohot parbinotoan di jolma. Molo bisuk jolma, molo pistar jala pantas, tarbahen i do manghangoluhon ngolu na sesuai di jolo ni Debata dohot jolma.

Dipatudos dope muse hapistaran i tu sada pribadi na patupa pesta manang partamueon. Tu sangkap i dipotong do pinahan pamuean, diparade roti dohot anggur, jala dipadiri dohot mejana. Juhut, roti dohot anggur, i do menu utama ni halak Israel, di jabu manang pe di parpestaan. Ingkon mangan do jolma asa mangolu, ndang boi so ingkon. Ndang asal sipanganon, ingkon na bergizi do. I ma na sinimbolhon ni juhut dohot roti i. Siangkup ni na mangan, mansai ringkot do huhut jolma i na marlas ni roha. Ndang na tarbayanghon hita perkembangan dohot kelangsungan ni ngolu na so hea mandai las ni roha, na torus manorus dirembe arsak dohot sitaonon, alai ingkon adong do las ni roha, agia pe mansai otik. I ma na sinimbolhon ni anggur, ai siinumon halalas ni roha do i. Molo diinum halak anggur, las ma dagingna; terangsang ma dohot syarafna gabe hinsa jala las rohana. Duansa i, sipanganon na bergizi dohot las ni roha na songon simbol ma i di pendidikan dohot pangajaran moral. Songon ringkot ni sipanganon na bergizi dohot halalas ni roha di jolma asa mangolu, asa hipas jala magodang secara sempurna, songon i ma ringkot ni pendidikan dohot pengajaran moral di sundut na umposo bahkan di sandok warga ni huria dohot masyarakat asa jumpang habisuhon manang hapantason gabe diboto manirang na denggan sian na roa jala mangolu di bagasan hatigoran dohot hasintongan. Molo songon i do, boha ma bahenonta menyikapi i?

Didok nangkin, disuru habisuhon na dipersonifikasi i do suruanna manggonghon halak tu jabu dohot tu pestana i. Hombar tusi, borhat do suruan i tu angka buntulbuntul ni huta mandok tu angka na tobok, “Ro ma hamu tuson,” jala tu angka na hurang roha, “Ro ma hamu, pangan hamu ma sian rotingku jala inum hamu sian anggur naung hupapang i.” Na tobok, di hata Indonesia didok, yang tak berpengalaman lapatanna halak na ungkap dope tu pangajaran, jala na hurang roha, hata Indonesia, yang tak berakal budi, i ma na hurang denggan dope karakter dohot moralna. Sude jolma do na nidokna disi, ai sasintongna ndang adong jolma naung tuk di parsiajaranna, alai sai na mandatdati dope saluhut. Didok na mandok, “Life long, learning task,” na nidokna disi, marsiajar saleleng mangolu. “From womb to thomb,” sian bortian sahat tu tanoman, ingkon torus marsiajar. Songon i, ndang adong jolma naung cukup denggan karakter dohot moralna, alai sai na mangeahi dope tu na sundenggan. Jadi joujou tu sude jolma do i, tu sude hita, asa mangalului habisuhon manang hapistaran. Ringkot situtu do antusanta, ia habisuhon i nda tung na diboan sasahalak i sian hatutubuna, alai silehonlehon ni Debata do i. Taringot tusi si Jakobus mandok, “Molo adong di tongatongamuna na hurangan bisuk, dipangido ma tu Debata.” Nang pe songon i ndang didekdekhon jala disuanhon Debata i songon i sambing tu sasahalak, alai siluluan do i jala siparungkilhonon marhite parsaoran na torus manorus tu Ibana di bagasan hata dohot TondiNa. Alai aha ma guna ni i?

Di jolo nunga nidok, marhite habisuhon i tarbahen jolma ma manirang na denggan sian na roa, gabe mangolu di bagasan hatigoran dohot hasintongan. Dung i, di ay.6 didok ma, “... asa mangolu hamu.” Mangolu, apala i ma guna ni habisuhon i. Molo didok mangolu, ndada holan na mandok manggulmit jala humosa, mangan jala mangula, kawin jala marpinompar, ai anggo i do, na asing i pe manggulmit do jala humosa, mangan do jala mangula, kawin do jala mamompari; alai lobi sian i na marhahonaan do i tu parsaoran tu Debatana dohot tu donganna jolma. Dohot hata na asing, mangolu mandok, taruli di hagogok ni ngolu pardagingon dohot partondion, ngolu nuaeng dohot ngolu sogot.

Apala i ma na ringkot auhonon jala hangoluhononta sian jamita on, talului ma habisuhon, hapantason, hapistaran dohot parbinotoan i asa mangolu hita. Molo mulak rohanta sangombas tu tujuan ni kemerdekaan dohot negaranta naung tinaringotan nangkin, di angka tingki na parpudi on jotjot do martaringot tolu mansam kecerdasan na taharingkothon di ngolu on, i ma kecerdasan intelektual, kecerdasan emosional, dohot kecerdasan spritual. Marhite na tolu kecerdasan i tarbahen sasahalak do mamangke utohutokna, pingkiranna, rohana, panghilaanna ro di sandok hatauonna laho berinteraksi secara fungsional maradophon donganna jolma, maradophon na tinompa na asing, maradophon alam sekitar dohot maradophon Debata. Kecerdasan intelektual gumodang ma i dapot sian pendidikan umum, kecerdasan emosional sian pendidikan moral, jala kecerdasan spritual sian pendidikan agama. Taringot tu na parjolo, ninna roha, ndang siajaran be halak hita. Sian na jolo dope, barani do halak hita pasuda tano maraek dohot tano mahiang laho pasikolahon anakhonna. Ndang apala songon i anggo taringot tu pendidikan moral, lumobi ma taringot tu pendidikan agama. Jamita ari on manjouhon tu hita, taeahi ma perkembangan na seimbang di na tolu kecerdasan i, dung i mangolu ma hita, jumpangan di hagogok ni ngolu pardagingon dohot partondion, ngolu nuaeng dohot ngolu sogot na salelenglelengna. Amen.

Read More..