17 Trinitatis

SERMON JAMITA TU MINGGU 17 TRINITATIS, 22 SEPTEMBER 2013

Ul.4:23-31

            Patujolo

Masa do jamita on di angka ombas na parjolo ni huria perdana. Taringot tu huria i tarjaha do paboa na sai marsihohot do nasida di poda ni angka apostel, sai domu do nasida marparsaoran jala martangiang; ganup ari do nasida saroha di bagas joro, jojor jabu nasida marulaon na badia, marlas jala marbulus ni roha marsipanganon, jala doshon hatopan do dirajumi nasida artanasida; dipatupa angka apostel i do lan ulaon hagogoon, jala ganup ari do ditambai Debata bilangan ni angka na jumpangan haluaon. Marnida saluhutna i, songgop do biar tu roha ni natorop. Di na masa i dihilala nasida do na adong intervensi sian ginjang, gabe mansai segan ma nasida tu huria i. Angkup ni i, lomo do rohanasida marnida huria i. Alai asing do reaksi na angka partogi ni bangso i, sintua ni malim dohot angka donganna, angka saduse, angka parise manang sibotosurat. Mabiar do nasida marnida na porsea na sai martambatamba i. Molo torus songon i, na boi do gabe gohan ni huria i sandok huta Jerusalem dohot poda na taringot tu Kristus Tuhan i, dung i baloshononna ma mudar ni Jesus i tu nasida (pat.5:28) Ala ni i, marusaho ma nasida mangambati. Songon i ma di jolo ni jamita on, dipahisar si Petrus dohot si Johannes do sahalak na pangpang. Dung marjamita si Petrus taringot tu na masa i gabe manamba do muse torop ni na porsea lima ribu halak nari (4:4) Lam mabiar ma angka partogi i, gabe ditangkup nasida na dua i jala dihurunghon; dung i, diboan tu paruhuman ni Sanhedrin. Ala so adong manang aha pelanggaran tu uhum na formal na niulahon ni angka apostel i, ndang hauhuman Rapot Godang i nasida. Holan on, dirarang ma, na so tupa be nasida marjamita manang mangajari mangasahon goar ni Jesus i (4:18), dung i dipalua ma. Ihut tusi ma masa jamita on.

            Hatorangan

Dung malua nasida, didapothon ma angka dongannasida. Tu dia didapothon? Nunga lobi ualu ribu ruas ni huria i (pat.2:41, 47; 4:4) Tontu do, nda tung pungu be i sude di sada inganan, alai marserak do di sandok Jerusalem. Antong – sahali nari – tu dia didapothon?  

Disura roha, tu bilut parginjang (1:13) Disi do sisean i marpungu jala martangiang sian sada ni rohanasida huhut paimaimahon Tondi Porbadia na pinarbagabaga i. Ra, laos i do nidokna inganannasida marpungu di na jumpang Pentakoste i (pat.2:1) Sian na masa na mangihut, na diida natorop na marpungu di bagas joro i do na masa tu sisean i jala dibege do dohot soara i nang angka hata na hinatahon ni sisean i (2:4-13), ndang masalpuhu ia nidok na jonok tu bagas joro i do inganan i. Tumangkas tahe, di sada sian rumah turutan ni bagas joro i. Sahat disi, dipaboa ma sude na nidok ni Sanhedrin i tu nasida. Sanhedrin, i ma badan pemerintahan ni halak Jahudi na mangaradoti hasonangan ni bangso marhite kekuasaan polisi. Pitupulusada halak do ruas ni badan i na tardiri sian Sintua ni Malim (Gr.archiereis) i ma sintua ni malim na sedang menjabat songon ketua huhut ruas, sintua ni malim emeritus, dohot angka sintua ni malim (imam-imam kepala); dung i Pangituai (Gr.presbuteroi) na tarjadi sian dua horong, i ma Pangituai (bangsawan bukan imam) dohot Siboto Patik (Siboto Surat manang Parise) Dibaritahon si Petrus dohot si Johanes ma na nidok ni Rapot Godang i tu nasida, i ma rarangan marjamita dohot mangajari mangasahon goar Jesus (4:18) Nian, jalo do dialo nasida i di rapot i jala diondolhon do na so tagamon oloan nasida i (4:19-20) Nang pe songon i, ndang gabe dipalua i nasida sian parmaraan. Balga do huaso ni Sanhedirin i, boi mandabuhon uhum mate. Ala ni i, ndang hurang na tarbahen nasida molo dilaosi angka apostel i rarangan i.

Marningot i saroha jala sasoara ma huria i martangiang tu Debata. Di tangiangnasida i, parjolo sahali dihatindanghon nasida do haporseaonnasida di Debata, paboa Ibana do na manjadihon langit dohot tano dohot laut dohot nasa isina. Ala Ibana manompa, Ibana do nampuna nasa na adong, na mangatur dohot na mangiringiring. Pargogo na so hatudosan do Ibana, ndang tagamon pasahatonNa na tinompaNa i tu na asing manang tung gabe paluaonNa i sian tanganNa. Suang songon i ma nang ulaon haluaon naung pinungkaNa i  di tongatonga ni huria i, ndang tagamon sega manang gabe mansohot i bahenon ni huaso ni portibi on.    

Mangondolhon i dikutip nasida do di tangiangna i hata ni Ps.2 na mandok, “Boasa ogaoga halak parbegu jala na so marniula dipingkiri angka bangso?” Ps.2 tarrajum do tu psalmen raja. Angka psalmen sisongon i, diendehon bangso Israel do i di pamiahion (pelantikan)  manang di perayaan na marhahonaan tu raja. Pamiahion ni raja, tardok ombas na rawan do i, ai sai adong do reaksi sian bagasan, sian kalangan istana dohot harajaon. Ndang sai pintor saroha sandok harajaon manjangkon raja na imbaru i, ndang sai pintor diantusi jala dijalo halak angka aturan manang kebijakanna, gabe masa kerawanan. Na boi pangkeon ni angka raja na asing do kesempatan i laho mangalo raja na imbaru i. Raja-raja taklukna rupani manang angka na di toru ni pengaruhna, gabe marsatahi memberontak, paluahon diri sian ibana. Songon i ma digombarhon di Ps.2 i, hehe martahi do angka raja ni tano on mangalo Jahowa dohot MessiasNa i. Alai ulaon na so marniula do i, ai ndang adong agia ise na tuk mangalo Debata. Tibu situtu do dilapathon halak Ps.2 i songon panurirangon tu haroro dohot harajaon ni Kristus. Songon i ma dison, dihaporseai huria na parjolo i do na Tondi Porbadia do na manahaphon hata i (pat.2 Ptr.1:20-21; 2 Tim.3:16) tu roha ni halak na patomutomuhon Ps.2 i gabe sada panurirangon tu Jesus Kristus dohot harajaonNa. Ala ni pangoloion dohot ulaon panobusionNa di hau pinarsilang i, dipatimbo Debata do Ibana jala dibasabasahon tu Ibana goar na sumurung asa nasa goar, asa somba tu goar ni Jesus nasa ulu ni tot, na di banua ginjang i dohot na di tano, nang na ditoru ni tano, jala asa nasa na marsoara marhatopothon: Jesus Kristus do Tuhan, bahen hasangapon ni Debata Ama (Plp.2:9-11) Dipasahat tu Ibana nasa huaso na di banua ginjang dohot na di tano on (Mat.28:18) Proses perajaan ni Kristus i nunga mamungka i sian ombas ni haroroNa i tu portibi on. Alai ndang dihalomohon portibi on i, gabe hehe do angka raja ni tano on jala marpungu angka panggomgomi, ogaoga laho mangalo Ibana.

Taringot tu angka na mangalo i, dibereng huria i do i parjolo sahali di diri ni si Herodes. Na nidokna disi, i ma si Herodes Antipas. Dung mate si Herodes Nabolon di taon 4 SM, dibagi opat do harajaonna. Luat Judea, Idumea dohot Samaria dipasahat tu si Archilaus na bergelar ethnarch (raja, penghulu rakyat); Galilea dohot Prea tu si Herodes Antipas na bergelar tetradarch manang tetrarch (raja saparopat), Gaulanitis, Trachonitis, Batanea, Paneas dohot Iturea tu si Pilipus na bergelar tetrarch, jala Abilene tu si Lysanias na tong bergelar tetrarch (pat.Luk.1:3) Taon 6 M, diparadianhon Kesar Tiberius do si Archilaus laos dibuanghon tu huta Vienne di topi ni sunge Rhone, Perancis nuaeng, jala mamungka sian i, langsung ma luat Judea, Idumea dohot Samaria diparenta Kesar Rom marhitehite wakilna na di tano Syria. Sian na opat ethnarch/tetrarch i, holan si Herodes Antipas do na ditaringoti dison, ai masuk tu gomgomanna antong Nasaret, huta haroroan ni Jesus i. Angkup ni i, hadir do ibana di Jerusalem di panguhumion dohot parsilangon ni Jesus i jala dipasangap Pontius Pilatus ibana asa ibana manimbang dohot manguhumi parkaro ni Jesus i nian. Di kesempatan i, disangahon ibana do papuas na di rohana mangaleai Jesus i (Luk.23:11) Na paduahon, di diri ni Pontius Pilatus, na bergelar procurator, i ma wali ni Kesar Rom mamarenta sadasada daerah khusus. Di daerah-daerah jajahan dipajongjong harajaon Rom do angka propinsi. Dua ragam do propinsi i. Na parjolo, propinsi senat, i ma na hinuasoan ni senat. Luat naung relatif aman do i, na pinarenta ni harajaon Rom marhite proconcul, i ma sahalak pegawai pemerintah dengan kekuasaan polisi. Na paduahon, propinsi kaisar, i ma na hinuasoan ni kesar. Luat na so apala aman dope i, jala na mungkin dope memberontak. Ditempathon kesar do disi sahalak duta na pinillitna sandiri, na bergelar Legaat van Agustus dengan kekuasaan militer. Sada sian angka duta sisongon i ma si Quirinius, na mamarenta di tano Syria di ombas hatutubu ni Jesus (pat.Luk.2:2) Di provinsi kesar i, sai adong do muse luat na khusus na maol parentaon. Boi do i ala ni keadaan alamna na mardolokdolok rupani; boi ala ni keadaan sosial politikna na mansai rawan. Di luat na songon i, ditempathon kesar do sahalak wali na bergelar procurator dengan kekuasaan militer. Jongjong sandiri do procurator i, bebas bertindak. Nang pe songon i, marhak do duta di propinsi na bersangkutan campur tangan di luat na ginomgomanna. Tarmasuk tu daerah khusus sisongon i do luat Judea, Idumea dohot Samaria di provinsi Syria. Dirajumi harajaon Rom do i luat na maol rajaan, cenderung revolusioner, rawan pemberontakan. Ala ni i, di taon 26 M, gabe dipaojak Kesar Tiberius ma disi Procurator Pontius Pilatus. Di tangiangnasida i, dihatindanghon huria i do paboa Procurator Pontius Pilatus i do sada sian angka na begu na hehe laho mangalo Jesus i. Tutu do i, ai ibana do na manguluhon paruhuman jala na mandabuhon uhum silang tu Kristus i. Di diri ni na dua i, si Herodes Antipas dohot si Pontius Pilatus, terwakili do sude bangso sileban di paraloanna tu Jesus Kristus i. Alai halak Israel pe parsidohot do paraloan i, ai disi do angka sintua ni malim, angka pangituai dohot situan natorop ni bangso i. Marsatahi nasida sude laho mangalo dohot laho mamarsilanghon Jesus Kristus, Naposo (ni Debata) na Badia i. “Maralohon Jesus, NaposoM na Badia i,” ninna. [Harfiah, DakdanakMu/AnakMu na Badia i (Gr. ton hagion paida sou, thy holy child)] Marhite i dihatindanghon huria i do haporseaonnasida di Kristus Jesus Tuhan i. Anak ni Debata do Ibana. Songon Anak, parsidohot do Ibana di hadebataon ni Debata, AmaNa i. Na diparbadiai Debata AmaNa i do Ibana, dimiahi jala dipabangkit tu sada tugas khusus, i ma na “Laho pasauthon hasosonggop ni na tiningki ni tanganMu dohot rohaM hian.” (Gr. Poieesai hosa hee cheir sou kai hee boulee sou prooorisen genesthai; to do whatsoever hand thy and counsel thy determined before to be done; untuk melaksanakan segala sesuatu yang tanganMu dan maksudMu dari semula menentukan akan terjadi; laho pasauthon saluhut na ingkon masa naung tinontuhon ni tanganMu dohot sangkapMu hian.) Na nidokna disi, i ma sangkap hatuaon ni Debata na taringot tu haluaon ni jolma. Sian mulana i dope, nunga disangkapi Debata hian patupa haluaon di jolma. Aha pe na masa, ingkon na pasautonNa do i, ndang jadi sundat. Tu hasasaut ni sangkapNa i, dipillit jala dimiahi ma Jesus Kristus, AnakNa i; dipabangkit gabe Sipalua. I ma na so hinalomohon ni portibi on, gabe dialo Ibana jala diparsilanghon. Ndang mamoto nasida na i do gabe haluaon di angka na mago, gabe tobus Ibana di angka pardosa. Paboa sintong i, hehe do Ibana jala mangolu, dung i mananek tu surgo songon naung andap di sisean i. Nang pe songon i ndang marujung dope paraloan i, sai didatdati portibi on do mangalo Kristus i marhite na mangalo huria i. Torus do dinasti ni si Herodes gabe alo di huria na parjolo i (pat.12:1 duu) Anggo paraloan sian awali negeri, sian Procurator Pontius Pilatus (na diparadianhon di taon 36 M) dohot sian panggontina (Felix dohot Festus), ndang adong na langsung. Alai tarrajum paraloan do i di na so parduli nasida di angka na so uhum na binahen ni lembaga hajahudion tu huria i. Mambuat roha ni Jahudi, dipaula so diboto nasida do rupani pamunuon ni si Stepanus, atik pe mangihuthon uhum Rom ndang jadi masa na songon i so marhite paruhuman Rom. Dipasombusombu si Felix dohot si Festus do nang parkaro ni si Paulus marganjangganjang atik pe na boi do i nian paujungon nasida marojahan tu uhum Rom.

Di ay.29-30, sahat ma huria i tu bagian pangidoan, didok, “On pe, ale Tuhan, bereng ma asupasupnasida.” Di jolo nunga tinaringotan, di paruhuman ni Sanhedrin i, dirarang do apostel i marjamita dohot mangajari mangasahon goar Jesus. Di rarangan i, tersimpul do asupasup (ancaman) Molo dilaosi apostel i oraora i, marhuaso do Sanhedrin mandabuhon sanksi tu nasida (pat.5:17 duu) Ndang pola mabiar nasida nian taringot tusi, ai di jolo ni rapot i dope, nunga pintor diondolhon si Petrus dohot si Johannes na so haoloan nasida i. Ala ni i, hiras ni roha nama dipangido huria i, didok, “jala lehon tu angka naposoMon hiras ni roha laho manghatahon hataM!” [(Gr. kai dos tois doulois sou meta parreesias passes lalein ton logon sou; and grant unto thy servants, that with all boldness they speak thy word; dan berikanlah kepada hamba-hambaMu supaya dengan segenap keberanian (keterus-terangan yang besar) menyampaikan firmanMu; jala lehon tu angka naposoM asa mardongan sandok habaranion manghatahon hataM.)] Marhite habaranion na sian Tuhan i, ndang gabe mansohot nasida mamaritahon Barita Nauli i, ndang adong na diorui manang na dibunihon, alai dihatahon sude tangkastangkas. Mardomu tusi, laos dipangido nasida ma penyungguhan ni jamita ni sisean i, didok, “Huhut surdukhon ma tanganMu, laho patupahon hahisaron ro di angka tanda dohot halongangan marhitehite goar ni Jesus, Naposom na Badia i.” (Gr. en too teen cheira sou ekteinein se eis iasin kai seemeia kai terata ginesthai dia tou onomatos tou hagiou paidos sou Ieesou; by stretching forth thine hand to heal, and that signs and wonders may be done by the name holy child of thy Jesus; dengan itu ulurkanlah tanganMu untuk menyembuhkan dan terjadilah tanda-tanda dan mukjizat-mukjizat dengan nama Yesus, AnakMu  yang kudus; ala ni i, surdukhon ma tanganMu laho pamalumhon, jala asa masa angka tanda dohot halongangan marhitehite goar ni Jesus, AnakMu na Badia i.) Di jolo nunga tinaringotan, ihut tu hasasaor ni Tondi Porbadia dohot hatutubu ni huria i, masa ma lan halongangan dohot tanda di Jerusalem, dipatupa angka apostel i (2:43b), jala dipahisar do na martihas (4:7) Hagogoon na sian Debata do i laho menyungguhkan jamitanasida. Laos i ma nang na pinangido ni huria i dison, laho patuduhon parsitutuonnasida manorushon hasasaut ni sangkap hatuaon ni Debata na taringot tu haluaon ni portibi on.

Ditangihon jala dialusi Debata do tangiangnasida i marhite tanda na tarida, ai humuntal ma inganan parpunguannasida. Manang na boha Debata patulushon na pinangidonasida i ndang torang dope i di ombas i, di pudi pe i asa boi idaon jala botoon nasida. Anggo nuaeng, sae ma molo diboto nasida na ditangihon do tangiangnasida, jala nunga lobi sian na cukup i mangalehon habaranion tu nasida laho manghatindanghon hata ni Debata. Hombar tusi, digohi Debata do nasida sude marhitehite Tondi Porbadia. Di panggohion dohot panogunoguon ni Tondi Porbadia i, boi ma nasida porsea paboa na engkelengkelan ni Debata do angka na ogaoga mangalo Kristus dohot huriaNa.  

            Rancangan Homiletis

“Haporsuhon do jambarmuna di portibi on,” songon i do didok Tuhanta Jesus Kristus di hata partadinganNa na tu angka siseanNa (Joh.13:33) Apostel Paulus pe, diondolhon do i tu angka ruas ni huria nambura porsea di huta Listra, didok, “Ingkon bolusonta do lan haporsuhon, laho bongot tu harajaon ni Debata.” (Ul.14:22) Sintong do i, ai jalo dung hatutubuna pintor songgop do ragam ni sitaonon tu huria i. Ditangkup angka partogi ni halak Jahudi do angka apostel i jala dihurungkon, dipambibiari do nasida jala dirarang marjamita mangasahon goar ni Jesus Kristus, dibunu do si Stepanus dohot si Jakobus jala dipaburuburu do angka na porsea i. Boasa ingkon songon i? Penampakan ni Kristus i do i di bagasan dohot na marhitehite huria na badia i. Sitaon na bernit do Kristus i (Ul.3:18) Mamungka sian hatutubuNa dope nunga mangonai tu Ibana sitaonon, jala di ujungna, mate Ibana di hau pinarsilang. Taringot tusi, ndang sae i dihatindanghon, alai huhut do ingkon dipapatar. Ngolu ni huria i do hapataranna. Keberadaan ni Kristus sitaon na bernit i, ingkon dipataridahon do i di bagasan dohot marhitehite keberadaan ni huria i sandiri, na tong sitaon na bernit. Apala i do na masa di jamita ari on, diauhon huria na parjolo i do paboa di bagasan sitaononnasida na mangadopi paraloan sian angka partogi ni bangso Jahudi ambil bagian do nasida di sitaonon ni Kristus Jesus na mangadopi ogaoga dohot paraloan sian angka raja dohot angka na begu ni portibi on, sian si Herodes Antipas dohot Procurator Pontius Pilatus, nang sian angka bangso parbegu dohot halak Israel. Ndang hapunjungannasida i, alai riperipe ni sandok na porsea do i. Sejarah nunga mambuktihon na dialo portibi on do huria i. Sipata, ro do i sian parhuaso, sian pamarenta, sian negara, sian ugama resmi, dohot na asing. Nda i na nialaman ni deba sian donganta di manang piga inganan nuaeng di Indonesia on? Diorai nasida marminggu, digugai pajongjonghon garejana, naung jongjong pe ndang dipaloas pangkeon bahkan dirumpakhon. Alai ndang ingkon berengonta i holan di bagasan rumangna angka na balga jala na dokdok, dohot jala jumotjot do di bagasan rumangna angka na metmet jala na somal. Molo setia halak Kristen tu panjouonna, sai na alamanna do paraloan dohot sitaonon. Songon dia ma hita mangadopi i? Marojahan tu turpuk ari on, adong ma dua na naeng parrohahononta.

Na parjolo, marsihohot di haporseaon tu Debata. Umbege barita ni si Simon Petrus dohot si Johannes na taringot tu rarangan ni Rapot Godang i, dihilala huria i do na mansai balga parmaraan na sonson di jolonasida. Balga situtu do huaso ni Sanhedrin, boi mandabuhon uhuman mate. Nang pe songon i, ndada laos mago nasida di biar dohot hatahutonna, alai diboto do tangkas haporusanna, i ma Debata na manjadihon langit dohot tano dohot laut dohot nasa isina. Ala Ibana do tumompasa, Ibana do nampunasa, na mangatur dohot na mangiringiringsa. Pargogo na so hatudosan do Ibana, ndang tagamon pasahatonNa na tinompaNa i tu na asing manang tung gabe paluaonNa i sian tanganNa. Suang songon i ma nang ulaon haluaon naung pinungkaNa i di tongatonga ni huria i, ndang tagamon sega manang gabe mansohot i bahenon ni hagogoon ni portibi on. Borhat sian haporseaon i, sahata sasoara ma huria i martangiang tu Debata. Laos i ma na ringkot parrohahonon jala hangoluhononta di na mangadopi angka hamaolon dohot sitaonon ala ni Kristus i, ingkon marsihohot do hita marhaporseaon jala marhaposan tu Debata. Pargogo na so hatudosan do Ibana jala parhuaso na sun. Ndang adong na tuk mangalo Ibana, engkelengkelanNa do i jala taluhononNa. Ala ni i ingkon gomosanta do tongtong Tuhanta Debata, di bagasan tangiangta. Ndang sala na marusaho, na mangalului haluaon marhite pamingkirion dohot gogo, na marondingonding tu uhum manang tu panggomgomi. Alai luhutna i, ingkon na borhat ma sian haporseaon. Di pangaramotion dohot pandonganion ni Debata, manahan do hita jala sahat tu ujung na tinontuhonNa.

Na paduahon, marsihohot mamaritahon Barita Nauli i. Di adopan ni paruhuman i dope, nunga diondolhon si Petrus dohot Johannes na so haolooan nasida rarangan ni Sanhedrin i. Huria i pe, diantusi do na paboa na so adong cara na dumenggan mangadopi rarangan i sian na manjua. Alai ndang na mura i, ai mansai balga do tantanganna. Ala ni i, saroha ma nasida manangianghon asa dilehon Debata hiras ni roha tu angka apostel i laho manghatahon hata ni Debata, i ma Barita Nauli na taringot tu haluaon ni hajolmaon. Naung disangkapi Debata hian do patupahon haluaon i andorang so ojak dope hasiangan on, jala nunga dipatulus di bagasan AnakNa Jesus Kristus naung ro tu portibi on, na manaon, na mate jala na mulak mangolu, dung i na manaek tu surgo laho hundul jala mangarajai di siamun ni Debata Amana i. Taringot tusi, dihalomohon rohaNa do asa baritahonon ni apostel i non i tu sandok hajolmaon. Angkup ni i, dipangido huria i do asa disungguhkan Debata jamita ni angka apostel i marhitehite hahisaron dohot halongangan na marhitehite goar ni Jesus i. I pe, mansai ringkot ma parrohahonon, asa marsihohot hita manghatindanghon Barita Nauli i. Marhitehite hahohomon, tarbahen malua do hita sian paraloan dohot sian sitaonon ala ni hata i, alai ndang malua anggo sian uhum ni Debata nampuna hata i. Na mangalo Debata do hita disi molo gabe hohom hita so mamaritahon Barita Nauli i, jala taboto ma: Ndang taralo hita Debata, engkelengkelanNa do hita jala taluhononNa. Ala ni i, sian na gabe hohom, tagonan do hita na tongtong marhiras ni roha manghatindanghon Barita Nauli i di bagasan rumang na tarulahon hita. Ndang sala na mangido penyungguhan ni hata i marhite angka tanda dohot halongangan. Molo lomo roha ni Debata, sai na patulusonNa do i. Alai nang so songon i ndang gabe ingkon hagangguhononhon na magopo do panindangion i, ai sasintongna di hata i sandiri do pengyungguhanna. Huaso do hata i, huaso ni Debata na mangolu jala na mangula. So pola mardongan tanda dohot halongangan songon na hinasiholan ni na deba, tarpatubu hata i do hamubaon di na manangihonsa asa tu haporseaon dohot haluaon.

Jkt.17.09.2013/mvs