Jamita Minggu Advent-1

JAMITA MINGGU ADVENT – I, 1 DESEMBER 2013

Jes.2:1-5

1 On do hata na niida ni si Jesaya, anak ni si Amos taringot tu Juda dohot Jerusalem. 2 “Masa do sogot, di ujung ni angka ari: Hot disi dipaojak dolok ni bagas ni Jahowa di punsu ni angka dolok, jala huminsat sian angka robean, jadi marrongoman ma tusi sude angka parbegu. 3 Jala torop angka bangso mandapothon tusi angka na mandok, ‘Beta hita tanangkohi ma dolok ni Jahowa, tu bagas ni Debata ni si Jakob, asa diajarhon tu hita angka dalanNa, jala mardalani hita di angka lapangNa.’ Ai marharoroan sian Sion do sogot patik i, jala sian Jerusalem hata ni Jahowa. 4 Jadi manguhum ma Ibana di tongatonga ni angka parbegu, jala toruanNa torop angka bangso. Jadi patopahonon nasida ma podangnasida bahen gigi, jala hujurnasida bahen angka sasabi; ndang be sintahon ni bangso dompak bangso podang i jala ndang be guruhononnasida parmusuon. 5 Beta hamu, ale pinompar ni si Jakob! Mardalani ma hita di hatiuron ni Jahowa!”

 

--o0o--

 

Sian asi ni roha ni Debata, di ari on sahat hita tu Taon Parhuriaon Naimbaru. Na laos bertepatan do i tu Advent manang Adventus, na marlapatan haroro (=kedatangan/ coming) Di khasanah perbahasaan ni huria, khusus do pamangkeon ni hata i tu haroro ni Debata manopot bangsoNa. Lebih khusus dope, tu haroro dohot panopotonNa di bagasan AnakNa, Jesus Kristus. Na marhahonaan do Advent i tu na dua haroro ni Kristus i, i ma haroroNa na parjolo dohot na paduahon. Laos sadalan tusi ma relevansina tu parngoluon ni huria, na marhahonaan do i parningotan di Kristus naung ro mahitehite hatutubuNa na secara khusus diingot jala dipestahon di Natal; dung i tu panghirimon dohot panagamon di Ibana na naeng ro dope di ari na parpudi. Alai marhua do Kristus i ro? Taringot tusi, ndang tarjabarhon i di bagasan sada manang dua pandohan sambing. Buku Nabadia i sandiri, ragam do pandokna taringot tusi. Deba sian i jumpang do di turpuk di hita ari on jala i ma na naeng pamanatonta sian jamita on.

Na mangula do si Jesaya di tano Juda di sada partingkian na mansai maol. Lam tu timbulna do Asur di purba, jala sai manosak tu pastima. Mareak ujung ni abad 8 SM, dirampas do godangan tano Juda, disegai na deba, jala dihubu ia huta Jerusalem. Sega ma parngoluon ni huta i, ai ndang boi be jolma mansari gabe macet sude pranata perekono-mian. Marhinorhon ma i tu ngolu partondion dohot tu hajongjongan ni joro i, ai hurang ma gogo ni jolma mangalehon pelean jala tarsabat angka na ro laho marsomba tu joro i. Gabe hira na tarulang ma joro i, surut  dohot hamuliaonna. Alai di sada borngin di taon 701 SM, dibunu suruan ni Jahowa do 185.000 halak sian parangan ni Asur i. Marhite i malua ma Jerusalem jala manggulmit muse perekonomiannasida; mulak ma hasahalaon ni joro i, ai nunga tuk sidabuan ni halak pasahathon pelean, jala boi ro sian sude inganan laho marsomba tusi. Mansai balga do na masa i. Ala ni balgana, pola do dipatudos si Jesaya i tu pembangunan kembali ni joro i. Di na hurang marfungsi i joro i, hira naung marokso do i dihilala; alai dung marfungsi muse, hira na dipajongjong do i mangulahi di bagasan rumanga na umbalga jala na sumangap. I ma na niondolhonna di ayat 2 ni turpuk on na mandok, “Masa do sogot, di ujung ni angka ari: Hot disi dipaojak dolok ni bagas ni Jahowa di punsu ni angka dolok, jala huminsat sian angka robean.”           

Haadongon ni bagas joro i, ndang tarsirang i sian hajongjongan ni Israel songon bangso ni Debata. Bangso i do na pajongjonghon joro i, jala holan di bagasan pardo-muanna tu bangso i do adong lapatanna. Dohot hata na asing, hinaarga ni joro i, i ma di fungsina songon inganan parsombaon tu Jahowa. Tumangkas tahe, na mararga jala marlapatan do joro i ala ni parsombaon na pinatupa ni bangso ni Debata disi. Hombar tusi ma didok di ujung ni ay.2 i, dung dipaimbaru muse bagas joro i, “Marrongoman ma tusi sude angka parbegu.”

Luhutna i, ndang marujung di tingki i sambing, alai huhut na marhahonaan do tu haroro ni Kristus songon na tinudu ni Advent on. Di bagasan Ibana, ala ni panobusion naung pinatupaNa, dipalua jala dipapungu Debata do angka na porsea sian sude bangso laho manghobashon parsombaon tu Ibana. Apala i ma na parjolo na naeng antusan jala hangoluhononta sian jamita Minggu Advent na parjolo on. Di bagasan Kristus na ro i, dipillit jala dijadihon Debata do hita gabe bangsoNa na badia, gabe Israel na Imbaru, i ma huriaNa na jinou jala pinapunguNa sian saluhut bangso laho manghobashon parsombaon di Ibana. Taringot tusi, di 1 Ptr.2:9 didok, “Alai marga na pinillit do hamu, hamalimon na raja, bangso na badia, houm na ginomgomanNa, asa tung dibaritahon hamu denggan ni harohaon ni Ibana, naung manjou hamu sian na holom tu hatiuronNa, halongangan i.” Tu sangkap i ringkot do di hita bagas joro manang gareja. Ndang na mandok na holan di bagas gareja ma hita boi patupa parsombaon tu Debata, ndang; di sude inganan do. Alai manang na boha pe, dihalomohon do inganan na khusus, na pinapulik jala pinarbadiaan bahen parsombaon tu Ibana. Ndang ingkon na balga jala na uli, ai arga ni sada joro ndang di hinauli manang hinabalgana, di fungsina do. Sabalgabalga dohot sauliuli ni gareja molo so difungsihon do i tu parsombaon songon na sapatutna, ndang adong lapatan ni i. Godang do gareja na balga jala na uli nuaeng di Eropa na so marfungsi be, gabe digadis dung i dialihfungsikan gabe museum manang objek wisata. Tong dope nian digoari i gareja, alai sian segi makna dohot fungsina na sasintongna ndang adong be lapatanna. Mardomu tusi ma sada na naeng jouhonon ni Advent on tu hita, sapala naung dipilllit Debata hita gabe bangsoNa jala dipaloas hita pajongjong gareja, tajamothon jala tapangke ma i songon na patut. Naeng lam patureonta do parsombaon na tapatupa di gareja di ganup tingki dohot di angka pestanta. Ninna roha, mansai ringkot do i parateatehononta di Advent on lumobi di Natal na ro. Ndang sai hapintoran hita dirinta, di angka tingki na parpudi on godang do sian pesta natalta na agoan ciri na sasintongna, ndang tohom be jala ndang badia, alai nunga madabu tu hariburon na menawarkan hiburan na profan. Sitangianghonon jala siurupanta do angka donganta na tarsabat dope pajongjonghon garejana, anggiat tumibu malua sian parungkilonna jala boi patupahon parsombaon dohot pesta Natal di inganan na tangkas pinapulik jala pinarbadiaan di Tuhan i.

Mulak tu turpukta ari on, songon naung tinaringotan nangkin, dung marfungsi muse joro i, digombarhon do na marrongoman tusi angka halak na leban. Masibetabetaan nasida mandok, “Beta hita, tanangkohi ma dolok ni Jahowa, tu bagas ni Debata ni si Jakob, asa diajarhon tu hita angka dalanNa, jala mardalani hita di angka lapangNa.” Ndang adong sian nasida na holan mangihutihut, alai jumpang do di sude giot ni roha laho borhat. Dung i ndang na asal borhat jala mardalan di dalan na so niantusanna, alai diboto do sidapothononna, i ma dolok ni Jahowa manang bagas ni Debata ni si Jakob. Ndang dolok dohot bagas i an sich, alai tu Jahowa i sandiri do, tu Debata ni si Jakob na mian disi. Motifna pe jelas, laho manjalo pangajaran taringot dalan ni Jahowa, i ma aturan ni ngolu na hombar tu lomo ni rohaNa, asa ulahononna. Debata do na umboto aturan ni ngolu i, ai Ibana do na manompa jala na marmuduhonsa. Sian asi dohot holong ni rohaNa, dihalomohon do papatarhon i tu jolma asa mangolu. Israel na pinillitNa i do ulaulaNa patulushon i. Hombar tusi dipapatar do tu nasida hata dohot tonaNa, patik dohot aturanNa, lomo dohot sogo ni rohaNa, bagabaga dohot lumbalumbaNa. Ndang holan asa botoon, alai asa hangoluhononna do, dung i baritahonon jala ajarhononna tu saluhut bangso. Hombar tusi ma diondolhon di ujung ni ayat 3 ni jamita on, “Ai marharoroan sian Sion do patik i, jala sian Jerusalem hata ni Jahowa.”    

I ma muse  na ringkot antusan jala hangoluhononta sian jamita Minggu Advent na parjolo on. Nunga nidok nangkin, ro do Kristus laho pabangkithon hita gabe bangso ni Debata, gabe Israel na Imbaru. Sarupa songon na tu Israel na jolo, tu hita pe, marhitehite Barita na Uli na niulahon ni Tondi Porbadia i, dipapatar do hata dohot tona ni Debata, angka patik dohot angka aturanNa. Ndang holan asa botoon jala parsaulihononta bahen hangoluan dohot hasonanganta, alai asa baritahonon jala podahononta do tu saluhut bangso. Apala i do na tinonahon ni Tuhanta Jesus tu hita di na nidokNa i, “Laho ma hamu, podai hamu ma saluhut bangso, didi hamu ma nasida tu bagasan goar ni Ama, Anak dohot Tondi Parbadia! Laos ajari hamu ma nasida mangaradoti nasa hata naung Hupatikhon tu hamu! Ai ida ma, sai na dongananHu do hamu ganup ari, rasirasa ro ajal ni hasiangan on.” (Mat.28:19-20) Laos songon i ma hita huria ni Tuhanta Jesus Kristus di Indonesia on, hita do ulaula ni Debata pasahathon patik dohot hataNa di tingki on dohot di inganan on. Sihatindanghononta do tu masyarakatta, tu bangso dohot tu negaranta hatigoran dohot hasintongan na marmual sian hata ni Debata. Tugas na sangat mendesak do i, ai sada sian saotik negara na terkorup do Indonesia on di sandok portibi on di tingki on. Hira so adong do ulaon, kegiatan manang proyek nuaeng di Indonesia on na so gabe ajang laho korupsi. Kegiatan keagamaan pe ndang adong imbarna. Siparungkilhonon jala sijamothononta do so nda tung dohot do angka pesta natalta gabe ajang laho korupsi sisongon i?

Sahali nari, mulak tu turpukta ari on, siangkup ni pangajari, panguhum do Debata Jahowa i di angka bangso. Di ay.4 didok, “Jadi manguhum ma Ibana di tongatonga ni angka parbegu, jala toruanNa torop angka bangso.” Deba sian ulaon ni panguhum, i ma na mambuat haputusan taringot tu parsalisian, paujunghon parkaro dohot pajongjonghon hadameon. Songon i ma didok dison, pajongjongon ni Debata Jahowa do hadameon di tongatonga ni angka bangso. Ndang masa be porang, jala ndang guruhonon ni jolma pe parporangon. Sadalan tusi, ndang adong be hasea ni podang dohot hujur songon ulaula tu hamusuon. Gabe dipatopahon be ma podang dohot hujurnasida bahen ulaula partanion, gabe mata ni hudali manang ninggala dohot sasabi. Na marlapatan ma i, dihapusuhon be ulaon partanion, ulaon na panaekhon pangabahan ni hajolmaon, gabe lam marhasonangan angka bangso, lam maduma jala sejahtera.

I ma muse na ringkot antusan jala hangoluhononta sian jamita Advent on. Debata Jahowa do panguhum di angka bangso. Sarupa tu hapangajarionNa, hapanguhumionNa pe dipercayahon do i tu bangsoNa na jolo; tu Israel Naimbaru ia nuaeng, i ma huria sian sude tingki dohot inganan, tarmasuk hita angka na mangolu di tingki on dohot di inganan on. Ndada panguhum portibi na marojahan tu aturan ni hajolmaon, na mantat podang dohot sinjata; panguhum so mantat podang do, na pahothon hatigoran dohot hasintongan. Ala ni i, songon huria hita, sihatindanghononta do tu hasiangan on hinaringkot ni na pasidinghon parsalisian dohot parbadaan, na mangintopi hamusuon dohot porang. Mansai balga do ongkos na ingkon gararon ni bangso na marporang. Gari holan ala ni na mabiar mida porang dope, nunga mansai balga ongkos na ingkon haruarhonon ni angka bangso laho paradehon ulaula tu hamusuon. Lam boha ma molo dung porang. Ndang masa disi marpaima, ai molo songon i ndang boi so talu. Aut so gari dipangke hepeng na ringkot tu angka sinjata i tu ulaula partanion, ndang tagamon so mimbar be rupa ni portibi on jala huminsat pangabahan ni manisia. Siradotanta do nang hadameon dohot hasonangan ni hajolmaon. Laos i do joujou ni Tuhanta tu hita di Indonesia on di Advent on dohot di Natal na ro on. Sude do hita boi manghilala kegagalan ni negara dohot pamarentanta laho menyejahterakan bangso dohot masyarakat. Di pangalaho i ndang boi hurianta holan na so jala hohom, alai ingkon na barani do mengambil peran laho menyejahterakan diri, masyarakat, dohot bangsonta. Nian, nunga sian mulana hurianta mangulahon parhobason sisongon i. Torop do hurianta na di bona pasogit dohot na di panombangan naung tibu manghobashon pengembangan masyarakat, jala di tingki na parpudi on torop do naung pajongjonghon Credit Union Modifikasi (CUM), i ma sada sistem pemupukan modal na pinatomutomu ni sahalak ahli keuangan dohot perbankan, ruas ni HKBP, Amanta Dr.AM Ambarita. Marhite i boi do hita manghirim na lam tau hurianta masipasarisarian jala masiurupurupan, lam margogo huhut mengembangkan diri dohot ekonomina; dung i pada gilirannya lam sejahtera ma ngoluna, jala ala laos ruas ni masyarakat dohot bangso do nasida, lam sejahtera ma nang masyarakat dohot bangsona. Angka dongan na di parserahan pe, isara na di Jakarta dohot sekitarna ingkon lobi marsiajar ma taringot tusi, ai sasintongna torop do disi Batak jala Kristen na umpaet dope ngoluna sian na pogos ni bona pasogit. Na pogos ni bona pasogit marjabu be dope; na pogos ni Jakarta molo ndang di toru ni jambatan, ba di gerobak manang di kardus; na pogos ni bona pasogit dipasiding dope na bau, na pogos di Jakarta ndang diboto be lapatan ni na bau, ai torus do mian di na bau, ganup ari manghaishais na bau, jala mangolu sian na bau. Naeng ma nian dohonon ni angka i sogot, “Ala ni HKBP, nunga malua hami sian keterpurukan.”

Panimpulina, ditutup si Jesaya do turpuk on dohot pandohan, “Beta hamu, ale pinompar ni si Jakob! Mardalani ma hita di hatiuron ni Jahow!.” Nasida do haroroan ni haluaon i, sian nasida taripar hatiuron tu saluhut bangso. Alai na boi masa do, malua bangso na asing, mago ia nasida; marrongoman halak sileban tu hatiuron ni Jahowa, tinggal di haholomon ia nasida. Sai unang ma masa di hita na songon i. Asa unang masa i, tajangkon ma Kristus na ro i jala tahangoluhon ma hata dohot patik ni Debata naung dipasahat tu hita. Amen.

 

Jkt.25.11.2013/mvs

 

 

 

 

 

 

 

 

 

 



Read More..

24 Trinitatis

SERMON JAMITA TU MINGGU 24 TRINITATIS, 10 NOPEMBER 2013

Rom 12:17-21

            Turpuk

17 Unang baloshon hamu na jat alo ni na jat; ringkoti hamu ma na denggan di jolo ni halak saluhutna! 18 Molo tarbahen, intap na tarpatupa hamu, tiop hamu ma dame maradophon halak saluhutna! 19 Hamu, angka na hinaholongan, unang hamu marlulu; pasahat hamu ma rimas i (tu Debata), ai tarsurat do, “Di Ahu do pamaloson, Ahu pe mamaloshon,” ninna Tuhan i. 20 Onpe, jumpa male musum, lehon ibana mangan; jumpa mauas ibana, painum! Ai songon na pagukgukhon gara do ho tu atas uluna, anggo dibahen ho songon i. 21 Unang ma talu ho dibahen hajahaton; alai taluhon ma hajahaton i marhitehite na denggan!

            Patujolo

Nunga marujung sada bagian na balga di surat ni si Paulus na tu halak Rom, i ma bagian teologis-soteriologis (bd.1-11). Di bagian i, dipajojor do angka na pinatupa ni Debata bahen haluaon ni jolma (indikatif yang besar). Dung i, mamungka ma na imbaru, bagian etis (bd.12-16), i ma na taringot tu sipatupaon ni jolma na hombar tu ulaon haluaon naung pinatupa ni Tuhan i (imperatif yang besar). Songon naung pinalua, ingkon hangoluhonon ni angka na porsea i do ngolu hombar tu lomo ni roha ni Debata, parange na badia, na so marlindang jala na so hasurahan. Turpuk on sandiri tarmasuk tu hasadaon na umbidang do (12:14-21), i ma na taringot tu pangalaho ni angka na porsea maradophon angka na di balian (pat.Kol.4:5) Di tingki i ndang denggan dope pardomuan ni halak Kristen tu angka na di balian; tu halak Jahudi dohot tu na leban, laos songon i tu pamarenta. Dihasogohon halak do na porsea i, dirajumi songon musu ni masyarakat dohot bangso. Gabe dihosomi ma nasida, dilelei, dipaburuburu jala dipaporsukporsuk. Menyikapi saluhutna i, ingkon buaton ni na porsea i do keputusan etis na hombar tu hata ni Debata. Taringot tusi ma na pinasingothon ni si Paulus di turpuk on.

            Hatorangan

Na mamalos (Gr.apodidontes/apodidomi, recompense) na jat (Gr.kakon, evil, kejahatan) alo ni na jat, tardok bangko do i di hajolmaon. Hira sude na mengalami tindakan tidak menyenangkan sian na asing, cenderung do i mamalos dohot tindakan na dos bahkan molo boi lobi sian i. Molo diulahon i toropan do halak na memahami. Dirajumi do i tahe na wajar, bahkan na seharusnya. Sabalikna, angka na manghahohomhon pambahenan na songon i, na so olo mamalos dirajumi do i na gale bahkan na oto. Hombar tusi, hira di sandok hasiangan on dijangkon halak do uhum pamaloson (ius taliones) i gabe sada prinsip na berlaku umum di sistem hukum. Di halak Israel rupani tartanda do uhum partubolan “hosa abul ni hosa, mata abul ni mata, ipon abul ni ipon.” Hukum pidana ni masyarakat angka na modern pe, diojakhon do i di uhum pamaloson i. Molo diuhumi angka parjahat, ndang holan na laho mangondingi masyarakat i, ndang holan na laho mangotapi hajahaton i asa unang lam rarat, jala ndang holan na laho mangajari manang mendidik parjahat i non i asa muba, ndang; alai dohot do na laho mamalos, ai hajahaton i ingkon do i dibalos. Holan on tutu, ndang dos be rumang ni pamaloson i tu hajahaton na binalos i, isara na mamunu dibunu, alai digonti nama i dohot sanksi hukum naung diatur di bagasan undang-undang, na dirajumi setimpal tu hajahaton i sandiri. Tu halak Kristen na di huta Rom na manaonhon paraloan sian portibi on dipasingothon Apostel Paulus do asa unang mamaloshon na jahat balos ni na jahat manang tu ise pe (Gr.meedeni, to no man, kepada tidak seorang pun). Na marurat do sipaingotna i di Padan Narobi. Di Poda 20:22a rupani didok, “Unang dok: Ingkon marbalos bahenonhu na jat i,” jala di Poda 24:29a, “Unang dok: Suang songon na binahenna tu ahu, bahenonhu tu ibana.” Tuhanta Jesus Kristus pe dipodahon do i jala dihangoluhon, ai, “Ndang manginsahi Ibana di na hona insak, ndang mangasupi di na manaon na porsuk.” (1 Ptr.2:23) Molo dihangoluhon halak Kristen na songon i naung gabe paniru do i di Tuhan i (pat.1 Ptr.2:21) Singkat ni na mamaloshon na jahat alo ni na jahat, dipasingothon ma muse asa diringkoti na porsea i na denggan di jolo ni halak saluhutna. Mangaringkoti (Gr.pronooumenoi/pronoeoo, I take thought for beforehand/I provide for, memikirkan sebelumnya/mempertimbangkan) na denggan (Gr.kala/kalos, things honest/beautiful/noble, yang baik) lapatanna, martahihon manang merencanakan patupahon na denggan di jolo (Gr.enoopion, before the face of/in the sight of, di depan/terhadap) ni saluhut halak. Ingkon gabe program ni ngolu do na mambahen na denggan i, gabe parbue manang praktek ni ngolu ariari, na boi dibereng jala ditanggapi sude halak. Na denggan dia? I ma na denggan songon na nidok dohot na hombar tu hata ni Debata, ndada na nidok dohot na hombar tu hata ni portibi on. Boi do i ndang tarjalo portibi on, ai tutu ndang sai dos tanggapan ni halak taringot tu pambahenan na denggan i. Boi do tahe masa, di angka na manghosomi dohot na manghasogohon, pambahenan na denggan ni halak Kristen i boi do i ditanggapi songon provokasi. Holan on, ndang sai hagabusan halak torus panggora ni rohana be, ai di ganup jolma jumpang do pangantusion taringot tu na denggan i. Ditihai manang diparoaroa pe pambahenan na denggan i, dao di bagasan rohana diparhatopot do i na denggan.

Na mangihut, dipasingothon do taringot tu na maniop dame. Di bagasan Jesus Kristus dipadame Debata do jolma tu diriNa. Angka na porsea jala manjangkon dame i mangolu ma di bagasan hadameon i. Hombar tusi ma dipasingothon dison asa, “Molo tarbahen, intap ni na tarpatupa hamu, tiop hamu ma dame maradophon halak saluhutna!” Dame (Gr.eirene, peace/undisturbedness) bidang do hinamhamna. Hombar tu pangantusion ni syalom di hata Heber, na marhahonaan do i tu keutuhan manang keselarasan (harmoni); tu hasonangan, hadameon, hadumaon, haluaon, hatuaon dohot pasupasu di pardagingon dohot partondion. Di ayat on, dipangke do hata i di bagasan rumangna na imperatif, i ma dame na hinangoluhon manang na niulahon maradophon halak saluhutna. Hombar tusi dipangke ma hata eireeneuontes (sian eireeneuoo), lapatanna live peaceably, hidup dalam damai/memelihara damai. Siulahonon ni na porsea i do dame naung gabe hangoluanna i tu na asing. Selaras ibana tu na humaliang, songon bagian na utuh ni lingkunganna. Alai manang na gabe efektif dame i manirai parsaoran, ndang boi patuhukhonon i holan tu halak Kristen. Boha pe panghangoluhon dohot pangulahon ni na porsea i di dame i, molo angka na ritoritoon do lingkunganna, ndang tarpajongjong disi dame. Molo masa pe na songon i ndang gabe ingkon tihaan na porsea i na so pardame. Hombar tusi, dibatas si Paulus do sipasingotna i dohot pandohan ‘molo tarbahen’ (Gr.ei dunaton/dunatos, if it be possible/able/powerful, jika mungkin/sedapat-dapatnya) dohot ‘intap ni na tarpatupa’ (Gr.to ex humoon, as much as in lieth you, sejauh hal itu terletak/tergantung padamu) Ndang ingkon mardame angka na porsea dohot jolma na sibolison, ndang ingkon selaras tu lingkunganna angka parjahat manang ingkon gabe sahundulan dohot angka pangarehei (pat.Ps.1:1)

Di bona ni bindu on, dipanghulingi si Paulus do huria i songon sesama dongan. “Angka dongan,” ninna. Di ay.19 on lam tu rosuna do pamanghulingionna i, ai digoar do nasida angka na hinaholongan (Gr.agapeetoi, beloved) di bagasan holong ni roha na sian Debata (Gr.agapee, love) Ringkot do i, ai lam tu ‘maolna’ do sipasingotna i. Songon i pe i, naeng ma hilalaon ni huria i paboa sipaingot sian na manghaholongi do i tu na hinaholonganna.    Manguduti naung nidokna di ay.17, dison dipasingothon do tu angka na hinaholonganna i asa ‘unang marlulu’ (Gr.ekdikountes/ekdikeoo+eauton, I give justice over/avenge/defend, membalas). Na nidokna disi, unang mamalos sandiri. Jahowa do panguhum, jala hakNa do pamaloson i (pat.5 Mus.32:35) Manang ise na mamalos manang main hakim sendiri, na marlapatan do i mangonjar Debata sian habangsa paruhumanNa jala manggontihon dirina hundul tusi; mangarampas huaso paguhumion i sian Tuhan i jala mangampehonsa tu dirina sandiri. Hajahaton do i. Ala ni i, singkat ni na mamalos dipasingothon ma asa dipasahat rimas i (tu Debata) Di hata aslina didok, dote topon tee orgee, lapatanna lehon ma inganan tu rimas i (give place unto wrath, berilah tempat/kesempatan kepada murka) Rimas ni ise? Rimas ni Debata. Parrimas do Debata (pat.2 Mus.20:5; 5 Mus.5:9) ai sogo do rohaNa mida dosa. Ala ni sogo ni rohaNa ingkon rimasanNa do pardosa i, uhumanNa, baloshonon jala luluhononNa dosana i. Molo mamaloshon manang mangaluluhon sandiri halak, na marlapatan do i nunga dibuat inganan ni rimas ni Debata, dibahen gabe inganan ni rimasna sandiri, gabe ‘so adong be inganan’ ni rimas ni Debata. (Nian, ndang ingkon sundat Debata manguhum dohot mamaloshon hajahaton ni sasahalak nang pe naung hona uhum manang manjalo pamaloson ibana sian jolma) Ala ni i ma asa didok “Lehon ma inganan tu rimas i.” Na nidokna disi, hormati ma hak ni Debata, pasombu ma Ibana mangulahon pamalosonNa. Umpistar do Ibana taringot tusi, ummalo di sipatupaonNa asa unang madokdokhu manang tung maneanghu. Pos do roha disi, ai ndang hea jala ndang tagamon laho hea meut roha ni Debata taringot tu dosa, alai sai na hasogohononNa do i jala hombar tu huaso dohot kebebasanNa sai na uhumanNa do na mangulahonsa.

Singkat ni na marlulu, dipodahon ma dison na mardenggan basa tu ‘musu.’ Taringot tusi, godang jala ragam do na tarbahen na porsea i. Rupani, na mangalehon mangan musuna na male, manang mangalehon minum na mauas (pat.Poda 25:21-22) Ndang harugian i manang hataluan, baliksa didok, “Ai marhite na songon i dipagukguk ho do gara ni api tu atas uluna” (Gr. Touto gar poioon anthrakas puros sooreuseis epi teen kefaleen autou, for in so doing thou shalt heap coals of fire on his head) Aha do lapatan ni i? Uju i, laho patuduhon solsol ni rohana, somal do halak Misir kuno mameakhon inganan ni gara na galak di atas uluna. Jadi na mardenggan basa i tarmasuk upaya ni na porsea i do i laho manosoi musuna asa manolsoli jala pauba roha. Tutu, ndang sai tongtong songon i, ai – sahali nari – ulaon na denggan i boi do i ditanggapi halak songon provokasi. Alai ndang tarparsoada agia ise, jotjot do masa, ala ni pambahenan na denggan ni na porsea gabe maila do na manuhasnuhasi nasida; disolsoli rohana jala dipauba gabe malua.

Rimpunna, di ay.21 didok si Paulus, “Unang ma talu ho dibahen hajahaton; alai taluhon ma hajahaton i marhitehite na denggan!” Molo dibaloshon halak Kristen na jahat alo ni na jahat, manang molo diluluhon sandiri angka parbadaanna, naung talu do ibana disi, monang ia hajahaton i, ai bongot muse hajahaton i, marhuaso jala mangarajai di bagasan dirina. Molo dung songon i, ndang adong be panosoion tu panolsolion dohot hamubaon ni roha ni parjahat i asa tu haluaon dohot tu hangoluan, gabe rap mago duansa gariada. Ndang tartaluhon hajahaton marhitehite hajahaton. Lam pabalgahon do i tahe, songon na maniramhon miak tu api gabe lam magor. Hadengganon do na boi pasohothon hajahaton. Saotikotikna di diri ni na porsea i, di na so gabe bongot muse hajahaton i manggomgomi ngoluna.

            Rancangan Homiletis

Di tangiang hamalimon ni Jesus Kristus songon na tarsurat di Joh.17, disifathon Tuhanta i do hadirion ni angka na porsea sian sude tingki dohot inganan selaku na di portibi on (ay.11) alai ndang sian portibi on (ay.16) Atik pe songon na maralo i nian tu kenyataan, alai tung i do sintongna, ai molo sahat pe manang na ise tu haporseaon di Kristus, ndang na sian toru i manang sian tano on, ndang na tubu sian mudar manang sian sangkap ni baoa; alai na tubu sian ginjang do i, sian Debata (pat.Joh.1:12-13; 6:37, 44), sian Tondi Porbadia (pat.Joh.3:5) Ala na sian ginjang do hatutubuna, halak dagang do na porsea i di tano on, paisolat manang panginsua. Somalna sisogo do halak dagang di portibi on, jotjot diperlakukan tidak adil, gabe paet panghilalaanna. Taringot tusi didok halak do rupani, “Resah itu milik orang asing,” jala di sada umpasa ni hita halak Batak didok do, “Tanda do sanggar padang, potang ari marsipusipu; tanda do halak dagang, potang ari mangapusi iluilu.” Dihasogohon ndang ala ni tangkangna, tung ala ni haasingonna i do. Manang na dumenggan pe ibana haasingonna i ndang parsoalan; sandok asal asing, ditihai. Songon i do pangalaman ni huria di harajaon Rom uju i. Dihasogohon halak do nasida, dijahati, dipatubutubu tihas na roa taringot tu nasida. Boha ma halak Kristen i menyikapi i? Apala i ma na pinasingothon ni Apostel Paulus di turpuk jamita  ari on. Ndang holan tu huria angka na parjolo i, alai tung tu sandok na porsea sian sude tingki dohot sude inganan do, tarmasuk hita angka na mangolu di tingki nuaeng on dohot di inganan on. Taringot tusi, adong ma dua na naeng pamanatonta.

Na parjolo, unang talu dibahen hajahaton. Nunga nidok nangkin, di portibi on do halak Kristen, alai ndang sian portibi on. Ia portibi on, i ma portibi naung madabu tu tangan ni Sibolis, parhuaso di hagolapon i. Ala ni i gabe gok hajahaton ma portibi on. Di portibi na songon i, sandok tarmara do ngolu ni na porsea i. Nidok tarmara, ai boi nasida gabe talu dibahen hajahaton i, manang songon na pinasingothonna di jolo ni turpuk jamita on, gabe sarombang dohot portibi on (Rom 12:2a) Deba sian rumang ni hataluan i, i ma na mamaloshon na jahat alo ni na jahat, na marlulu dohot na manguji manaluhon hajahaton marhitehite hajahaton. Tolunsa i, bolas dohonon bangko nama i di hajolmaon. Hira sude halak na mengalami tindakan tidak menyenangkan sian donganna jolma, cenderung do i mamalos dohot tindakan na dos bahkan molo boi lobi sian i, jala molo diulahon i toropan do halak na memahami. Dirajumi do i tahe na wajar, bahkan na seharusnya. Sabalikna, angka na so olo mamalos, dirajumi do i na oto. Na marlulu pe, i ma na mamalos manang na main hakim sendiri, tung rarak do i jumpang di tonga ni hajolmaon. Laos songon i na manguji manaluhon hajahaton marhitehite hajahaton, ndang apala na maol i dapot idaon di tonga ni masyarakat. Sai hira na so haondingan do hak-hak ni jolma anggo marhitehite hadengganon, sai hira na ingkon marhitehite hajahaton nama. Sahali nari, molo diulahon halak Kristen angka na songon i, tanda ni naung talu ma i maradophon hajahaton, tanda ni naung gabe sarombang dohot portibi on. Ala ni i ma asa dipasingothon Apostel Paulus marhitehite turpuk jamita ari on, asa unang mamaloshon na jahat alo ni na jahat, unang marlulu jala unang manguji manaluhon hajahaton marhitehite hajahaton. Angkup ni na gabe talu, ndang adong guna ni i, ai hajahaton i do na tamba jala monang. Na jumorbut, khusus taringot tu na mamalos manang na marlulu, pemberontakan do i tu Debata. Huaso manang hak ni Debata pamaloson i (pat.5 Mus.32:35) Manang ise na mamalos manang main hakim sendiri, na marlapatan do i mangonjar Debata sian habangsa paruhumanNa jala manggontihon dirina hundul tusi; na mangarampas huaso manang hak ni Tuhan i do i jala mangampehonsa tu dirina sandiri. Hajahaton bolon do i jala siuhumon.

Ninna roha, mansai ringkot ma i parrohahononta, ai ndang sai lias hita sian na songon i. Ndang masalpuhu ia nidok, di budayanta songon halak Batak kental do tondi pamaloson i. Haotoon do di roha ni halak hita molo adong sian tongatongana na manghahohomhon na jahat na binahen ni na asing tu ibana. Diinsahi do i, digoar parmudar manuk. “Ndang na ugasan i, ai parmudar manuk do i,” ninna rupani. Marningot i mangolu do di torop halak tondi pamaloson, didok, “Ndang tartinju, nanggo pala pinastap; ndang tarpastap, nanggo pala ginotil, asal marbalos.” Taringot tu parluluon dohot na marlulu pe, prinsip na mansai kental do i di bagasan partuturon manang sistem kekerabatan. Hasadaon ni na marhahaanggi dohot na samarga ndang sae i dipataridahon holan di pemilikan, di arsak dohot las ni roha bersama, alai ingkon dohot do di parluluon, ai songon on do pandohan ni ompunta taringot tusi, “Sisada anak, sisada boru; sisada arsak, sisada las ni roha, sisada lulu.” Di pandohan na asing muse didok, “Sisada lulu anak, sisada lulu boru.” Na nidokna disi, angka na saripe dohot na samarga berkewajiban do dohot mangaluluhon parbadaan ni donganna samarga. Di na mangulahon i jotjot ma masa hasadaon na marbulu na suhar, molo suhar ditait dongan, suhar do taiton. Ndang sai hapintoran hita dirinta, na tean do di hita angka pangalaho na songon i. Ala ni i, sandok relevan sipaingot ni turpuk jamita on tu hita. Di nasa parsoalan manang parsalisianta, ingkon lam marsiajar do hita mangalehon inganan tu rimas ni Debata. Ibana do parlulu jala hakNa do pamaloson i. Tapasombu ma Ibana mangulahon na patut siulahononNa. Umpistar do Ibana taringot tusi, ummalo di sipatupaonNa asa unang madokdokhu manang tung maneanghu. Pos do roha disi, ai ndang hea jala ndang tagamon laho hea meut roha ni Debata taringot tu dosa, alai sai na hasogohononNa do i jala hombar tu huaso dohot kebebasanNa sai na uhumanNa do na mangulahonsa.          

Na paduahon, manaluhon hajahaton marhitehite na denggan. Balik ni na talu dibahen hajahaton, na tarjou do halak Kristen di portibi on laho manaluhon hajahaton marhitehite na denggan. Mardomu tusi, parjolo sahali dipasingothon Apostel Paulus ma di jamita on asa ganup na porsea mangaringkoti na denggan di jolo ni halak saluhutna. Mangaringkoti lapatanna, martahihon manang merencanakan patupahon na denggan di jolo ni saluhut halak. Ingkon gabe program ni ngolu ni na porsea i do na mambahen na denggan i, gabe parbue manang praktek ni ngoluna ariari, na bolas dibereng jala ditanggapi sude halak. Contoh konkrit ni pambahenan na denggan i, i ma na mardenggan basa tu musu. “Jumpa male musum, lehon ibana mangan; jumpa mauas ibana, painum!” ninna. Na paduahon, dipasingothon do muse taringot tu na maniop dame. Di bagasan Jesus Kristus dipadame Debata do jolma tu diriNa. Angka na porsea jala manjangkon dame i mangolu ma di bagasan hadameon i. Hombar tusi ma dipasingothon dison asa, “Molo tarbahen, intap ni na tarpatupa hamu, tiop hamu ma dame maradophon halak saluhutna!” Dame  bidang do hinamhamna. Hombar tu pangantusion ni syalom di hata Heber, na marhahonaan do dame i tu keutuhan, keselarasan manang harmoni; tu hasonangan, hadameon, hadumaon, haluaon, hatuaon dohot pasupasu di pardagingon dohot partondion. Di ayat on, dipangke do hata i di bagasan rumangna na imperatif, i ma dame na hinangoluhon manang na niulahon maradophon halak saluhutna. Siulahonon ni na porsea i do dame naung gabe hangoluanna i tu na asing. Selaras ibana tu na humaliang, songon bagian na utuh ni lingkunganna.

I ma muse na mansai ringkot parrohahononta di tonga ni masyarakat dohot bangsonta, di Negara Republik Indonesia haojahanta on. Taboto tangkas, di dalam segala konteks, isara budaya, bahasa dohot ugama, sangat pluralis do negaranta on. Di lambang ni negaranta on diokui do i, disurathon do disi ‘Bhinneka Tunggal Ika’ (Berbeda-beda tetapi bersatu padu) Ternyata ndang sai marhasil bangsonta on patuduhon ‘ketunggal-ikaannya,’ lebih menonjol do jotjotan ‘kebhinnekaannya.’ Songon halak Kristen hita, taalami do jotjot tindakan tidak bersahabat sian angka donganta sabangso. Laos songon i do nang negara marhitehite angka penyelenggara, angka kebijakan dohot peraturan-peraturan, jotjot do hita diperlakukan songon warga negara kelas dua molo so dohonon kelas kambing. Di situasi dohot kondisi na songon i, tung apala disi do lam tinggil joujou ni turpuk jamita di hita ari on asa manaluhon hajahaton marhitehite na denggan; barani mangaringkoti na denggan di jolo ni halak saluhutna, barani mardenggan basa tu angka na manghasogohon dohot na manginsahi dohot maniop dame maradophon halak saluhutna. Ndang harugian i manang hataluan, baliksa didok, “Ai marhite na songon i dipagukguk ho do gara ni api tu atas uluna” Aha do lapatan ni i? Uju i, laho patuduhon solsol ni rohana, somal do halak Misir kuno mameakhon inganan ni gara na galak di atas uluna. Jadi na mardenggan basa i tarmasuk tu upaya ni na porsea do i laho manosoi musuna asa manolsoli jala paubahon roha. Tutu, ndang sai tongtong songon i, boi do sabalikna, pambahenan na denggan ni halak Kristen i ditanggapi do i songon provokasi. Holan on, ndang sai hagabusan halak torus panggora ni rohana be, ai di ganup jolma jumpang do pangantusion taringot tu na denggan i. Ditihai manang diparoaroa pe pambahenan na denggan i, alai dao di bagasan rohana diparhatopot do i na denggan. Ala ni i, ndang sipasadion, alai sidatdatan do na mangaringkoti na denggan i. Laos songon i do na maniop dame. Manang na gabe efektif dame i manirai parsaoran, ndang boi patuhukhonon i holan tu hita halak Kristen. Boha pe paniop dohot panghangoluhonta di dame i, molo angka na ritoritoon do lingkunganta, ndang tarpajongjong disi dame. Ndang gabe sitihaan hita disi na so pardame. Si Paulus pe, dibatas do sipasingotna taringot tusi, didok do, “Molo tarbahen,” dohot “intap ni na tarpatupa” Ndang ingkon mardame na porsea dohot na sibolison, ndang ingkon selaras tu lingkunganna angka parjahat manang ingkon gabe sahundulan dohot angka pangarehei (pat.Ps.1:1)

jkt.06.11.2013/mvs

           

Read More..