Liturgi

L I T U R G I

Liturgi, i ma parture manang aturan ni parpunguan manang peribadahan ni halak Kristen manang huria. Di HKBP, somal didok agenda. Ragam do kebaktian i, isara parmingguon, partangiangan, parbagason, pangapulion, natal, dohot na asing. Na naeng hataan dison, parmingguon do, i ma parpunguan di gareja di ganup ari Minggu.

Di parmingguon manang kebaktian i, pajumpang do Debata dohot jolma. Ibana sandiri do na patupahon parjumpangan i. Dohot hata na asing, Debata do suhut ni parpunguan i. Jolma, sian gogo dohot usahona sandiri ndang tau mandapothon laho pajumpang dohot Debata. Taringot tu parjumpangan i, adong dua aspek panghilalaan, i ma:
a. Debata tuat pajumpanghon jala pasaorhon diriNa tu jolma.
b. Jolma dihindat sian portibina tu hadirat ni Debata.
Ala ni i, na badia situtu do parmingguon i jala na songkal, ai "pajumpang" disi alam sorgawi dohot alam duniawi, dunia ilahi dohot dunia insani. Mansai ringkot do i antusan ni sude asa sandok diparbadiai be rohana di na marminggu i, unang gait manang gere.

Na marmula do kebaktian i di ulaon ni Debata Sitolusada naung papatarhon diriNa tu jolma. Dipapatar do diriNa selaku Debata Ama, Panompa; selaku Debata Anak, Sipalua jala Partobus; dohot selaku Debata Tondi Porbadia, na mangingani jala na pabadiahon. Manghatai Ibana tu jolma, mangula jala bertindak, gabe malua saluhut sian dosa dohot sian sandok pangonaina, sian huaso ni sibolis dohot hamatean. Maradophon hapataran dohot ulaonNa na paluahon i, patut do jolma mangalehon alus manang reaksi. Na parjolo, i ma na mananda, manghaporseai, jala mamillit Ibana gabe Debatana; dung i, na mamuji jala na mandok mauliate, na marningot jala na manghatindangkon angka pambahenanNa. I ma na dipolakan, dibakukan manang dilembagakan di bagasan liturgi i, na diulahon na porsea i secara bersama, di sada parpunguan na di berlangsung di bagasan goarNa, i ma kebaktian i. Dipajumpanghon jala dipasaor Debata diriNa tu jolma, dipatubegehon hata dohot tonaNa, patik dohot aturanNa, bagabaga dohot lumbalumbaNa; ditangihon ende dohot pujipujian ni jolma i, tangiang dohot elehelekna, panindangion dohot olopolopna, jala dijalo hamauliateon dohot peleanna. Dohot hata na asing, di parpunguan i masa do interaksi timbal-balik antara ni jolma dohot Debata: Jolma manjou, Debata hadir; Debata manghatai, jolma manangihon dohot mangalusi; jolma manghatai, Debata manangihon dohot mangalusi.

Sahali nari, di parmingguon i pajumpang do Debata dohot jolma. Ibana sandiri, sian asi dohot lomo ni rohaNa do na mangulahon i. So sian asi dohot lomo ni rohaNa ndang adong parjumpangan dohot parsaoran, ndang adong panghataion dohot pananangihonon. Tangkasna, Debata sandiri do patupahon kebaktian i. Nang pe songon i, jolma do anggo na mangulahon. Hombar tusi, sidua hajongjongan do na manguluhon kebaktian i, i ma:
a. Wakil ni Debata maradophon jolma manang huria i
b. Wakil ni jolma manang huria i maradophon Debata
Songon wakil ni Debata, ditariashon do hata ni Debata tu huria i, dipatubegehon patik, aturan, uhum, tona, bagabaga, pasupasu, dohot lumbalumbaNa; jala selaku wakil ni jolma, dipasahat do tangiang ni huria i tu Debata, pujian, hamauliateon, dohot angka peleanna. Laos angka i ma na gabe unsur ni kebaktian i. Adong do disi rupani unsur panindangion manang pemberitaan taringot tu Debata Sitolusada na papatarhon diri tu jolma, na mangula jala pasaorhon diri, na marsoara jala patubegehon hataNa; adong unsur jawaban sian jolma, i ma pujian, ende, tangiang, panindangion haporseaon, hamauliateon, pelean, dohot na asing. Angka unsur i, ndang boi asal dipangompaphon songon i, alai ingkon disusun do di bagasan aturan manang pola na tontu.

Di HKBP, nunga adong Agenda, i ma aturan manang liturgi ni kebaktian. Na dipahombar do i tu parsagi ni tingki di sada taon parhuriaon. Marhite i, dipamura do ulaon ni angka parhobas, ai ndang pola be ingkon manusun sandiri liturgi siganup minggu, alai sae ma mamillit dohot padomuhon angka unsur liturgi naung diparade disi. Tutu, sai adong do tingkina ingkon patomutomuon ni sadasada parhalado liturgina, isara di pesta na sangat khusus di huria i. Siangkup ni Agenda, adong dope di Almanak, i ma aturan ni turpuk sijahaon dohot sijamitahonon siganup minggu. Ala ni i, ndang pola be angka parjamita mangalului turpuk tu ganup minggu. Sistim i digoar stelsel perikope. Ndang sude huria mamangke sistim i, adong do na mangalehon kebebasan tu angka parjamita. Rap adong do denggan dohot hurang ni na dua i. Sistim na parjolo, ala naung tarihot tu taon parhuriaon, sai adong do sian turpuk i na so hona tu situasi na sangat khusus jala na insidentil, jala ndang sude turpuk ni Bibel i dijamitahon. Sistim na paduahon, boi mangonjar parjamita mamillit dohot manjamitahon turpuk angka na mura sambing, angka na maol dipasiding. Dungkon ni Agenda dohot Almanak, adong dope Buku Ende naung disagi hombar tu rumang dohot pamangkeon ni angka ende na tarsurat disi. Na parpudi on do na gumodang mangigil pangaradeon ni angka parhobas, ai ingkon pillitonna do angka ende na hona tu unsur-unsur liturgi dohot parsagi ni tingki di taon parhuriaon. Tutu, di angka taon na parpudi on, nunga disurathon nomor ni ende tu ganup minggu di Impola. Nang pe songon i, ndang gabe dipalua i angka parhobas so paradehon ende, ai ndang sai sarupa panatapan ni na parade liturgi na di Impola i tu panatapan ni na mangulahonsa. Taringot tu ende na mardomu tu jamita ma rupani. Nang pe dos turpuk sijamitahonon, bolas do marasing tekananna; marasing, ala marasing na manjamitahon, marasing situasi dohot kondisina. Tontu, diigil parasingan i do nang parasingan ni ende.

Andorang so tinorushon manghatai liturgi i, ringkot ondolhonon: Ndang tarpatomutomu huria sada liturgi na singkop jala na marlaku sepanjang jaman. Na di pardalanan dope huria i, liturgina pe di pardalanan dope, na ringkot tongtong dipaimbaru. Di taon 1904 rupani, dipaimbaru hurianta do liturgina sian na marpangke di abad 19. Dung i, di taon 1936 adong do muse usaho paimbaruhon liturgi i, alai ndang tuntas. Liturginta sinuaeng on, ojak dope i di liturgi 1904, alai nunga godang perubahanna sian tingki tu tingki. Deba sian perubahan i na diaturhon do i sian Pusat, deba jolo dihatai jala diputushon di Rapot Pandita, alai deba na pinatubu ni huria marsadasada do i, dungi i ditiru huria na asing jala di ujungna gabe ditotophon.

Tarbagi dua bagian bolon do liturgi ni hurianta, i ma:
a. Parsombaon, sian pamungkaan tu na papungu pelean parjolo.
b. Parjamitaon (pemberitaan), sian jamita tu panimpuli.Di bagian na parjolo na gumodang berperan i ma paragenda. Disi, marfungsi do ibana songon malim na jongjong di dua hajongjongan: wakil ni Debata maradophon huria i, dohot sabalikna, wakil ni huria i maradophon Debata. Di bagian paduahon, gumodang berperan parjamita. Disi pe jongjong do ibana di dua hajongjongan, i ma panurirang na patubegehon hata dohot lomo ni roha ni Debata, dohot selaku malim na manangianghon huria i, manangianghon pelean, dohot pasahathon pasupasu manang ramalan imam. Tumangkas, tapamanat ma skema na mangihut on:

I. PARSOMBAON

A. Pamungkaan

01. Marende Huria

Dipungka do parmingguon marhite Ende Huria. Disi, marfungsi do ende i songon pangaradeon manang ajakan/panggilan parsombaan na naeng berlangsung. Ala ni i, ende na hombar tu fungsi i ma pilliton sian Buku Ende i. Rupani, Ende Pujipujian, Ende di Ari Minggu, manang ende na hombar tu goar ni Minggu/Pesta di taon parhuriaon. Di mulana, diendehon do dison sude ayat ni sada nomor sian Buku Ende i. Di tingki on, rata-rata tolu ayat nama (adong na holan dua). Boha parmuba ni i, ndang apala binoto. Alai ra, godangan do i na menghemat tingki. Na tolu ayat i diholangholangi musik saayat. Parmubana, hatontuan sian Pusat. Maksudna, pahothon ton ni ende i (ai sipata, moru do ton ni ende i dung di ayat paduahon). Di tingki na parpudi on, di ayat na patoluhon, jongjong huria i. Parmubana, sian sadasada huria na gabe diadaptasi di na asing. (Alai ndang sude dope huria mangulahon i).

B. Penahbisan

02. Votum-Introitus-Tangiang

a) Votum.

Votum, "manguba" rumang ni punguan i sian parpunguan na somal, na "profan" gabe parsaoran na di bagasan goar ni Debata Ama, Anak, dohot Tondi Porbadia, na badia manang na sakral. Alai adong do na memahami i songon joujou manang elehelek tu Debata asa ro tu parpunguan i, jala hombar tu interaksi timbal-balik na nidok ondeng, dihaporseai huria i do na hadir Ibana di tingki i.

b) Introitus

Introitus, patuduhon warna ni parmingguon i. Sipilliton do introitus i sian angka ayat introitus naung diparade di Bagian Paduahon ni Agenda i, di sub bagian A. Naung disagi do angka ayat i hombar tu parsagi ni tingki di sada taon parhuriaon.

c) Haleluya

Ala naung "diuba" rumang ni punguan i gabe parsaoran di bagasan goar ni Tuhan i marhite Votum jala dihaporseai huria i naung hadir Debata di kebaktian i, gabe dijangkon/disambut ma Ibana marhite pujian Haleluya.

d) Tangiang

Sambutan Haleluya diuduti dohot tangiang na hombar tu Introitus. Tangiang on, sipilliton do sian tangiang naung diparade di Bagian Paduahon ni Agenda i, di sub bagian D, naung disagi do i hombar tu parsagi ni tingki di sada taon parhuriaon. (Di Agenda 1904, di ujung ni tangiang i rap do na sahuria i mandok “Amen”. Dung i, udut tu tangiang i ndang adong be ende, langsung nama tu Patik. Ndang binoto be, boha jala sadihari parmuba ni i tu sinuaeng on).

03. Marende Huria

Dison na marfungsi do ende i songon sambutan ni huria tu tangiang na di jolo (d). Hombar tusi, sipilliton ma dison ende na marhata tangiang na gumodang jumpang di Ende di Ari Minggu dohot Ende taringot tu Haporseaon. [Adong do na memahami sude ende na di Agenda i songon pangaradeon tu unsur na mangihut. (Ende on rupani, dirajumi songon pangaradeon tu na manjaha Patik). Jala hombar tusi ma ende na dipillit. Ndang sintong i. Di Agenda 1904 torang do, ganup ende na mangihut tu unsur na di jolona do i. (Pamanat ma skema na di ginjang i). Ephorus Pdt.Dr.Justin Sihombing mandok, na marfungsi do angka ende i manggonamhon unsur na di jolona. “Songon na mamantikhon labang,” ninna Ompui, “nang pe naung masuk sude, diantuk dope manang na piga hali nari asa haru gonam.”] Rata-rata ende on saayat, molo ayat na jempek dua.

C. Pendamaian

04. Patik

a) Patik

Di hurianta, dijaha do patik i di jolo ni panopotion/bagabaga hasesaan ni dosa. Sian i torang, na marfungsi do patik i paingothon taringot tu dosa, jala manognogu hita tu Kristus (usus elenchticus manang usus paedagogicus). [(Ndang sude huria mamereng songon i, adong do na mangarajumi i songon petunjuk hidup baru (usus normativus manang usus didacticus). Hombar tusi, dijaha do patik i di pudi ni bagabaga hasesaan ni dosa. Pamanat ma rupani Tata Kebaktian ni GPIB, GKI, dohot na asing].

Molo ‘digonti’ patik na tarsurat di Agenda i dohot sada manang lobi ayat ni Bibel, ingkon pilliton do ayat na marhata patik/berbahasa hukum. Unang digoar i singkat ni patik, alai patik, ai di bagasan kerangka tata kebaktian i na marfungsi do i songon patik. Molo lobi sian sada ayat dipillit, hombar tu interaksi timbal-balik na nidok di jolo i, unang ma dijaha i marrumang na masialusalusan. Debata do na manghatai disi, jolma manangihon. Molo dohot do huria i manjaha, ise be na manangihon?

Ndang jadi gantion patik i dohot na asing, isara Aturan Paraturan ni Huria manang Ruhut Parmahanion Paminsangon, ai ndang patik ni Debata i. Laos songon i, ndang sigontion patik i dohot Credo, hatorangan ni Sakramen manang Konfessi, ai ndang usus elenchiticus dohot usus paedagogicus fungsi utama ni angka i di huria.

b) Tangiang

Panjahaon ni patik i disambut huria i do i marhite tangiang songon na tarsurat di Agenda. Taringot tuson pe, molo ‘digonti’ patik i dohot ayat ni Bibel, unang gabe digonti hata ni tangiang i songon on : "... mangulahon na hombar tu hataMi", alai hot do dohonon "... mangulahon na hombar tu patikMi".

05. Marende Huria

Dison, marfungsi do ende i songon sambutan tu patik i. Ala ni i sipilliton ma dison ayat ni ende na marhahonaan tu patik manang tu ayat na dijaha di kebaktian i. Nuaeng on, rata-rata ende on dua ayat, jala di ayat paduahon jongjong huria i laho manopoti dosa. [Songon na nidok di jolo (ida 01) ndang sude dope huria mangulahon i].

06. Panopotion-Bagabaga

a) Manopoti Dosa

Dung disadarhon marhite patik i, sahat ma huria i tu panandaon dohot panopotion nang sihol ni roha di hasesaan ni dosa. Pilliton ma dison tangiang naung diparade di Agenda di Bagian Paduahon, sub bagian B. Di na mamillit i, parrohahonon do hata ni tangiang i laho pahombarhon tu parsagi ni tingki di taon parhuriaon manang tu warna ni kebaktian i.

b) Tingki na Hohom (Saat Teduh)

Unsur na imbaru dope on di agenda ni hurianta, jala ndang sude dope huria naung mangulahonsa. Na binoto, dipungka do unsur on di HKBP Menteng, gabe diadaptasi di torop huria, jala ndang adong pola oraora sian Pusat. Di deba huria angka naung mangulahon, diisi do i dohot musik na angonangon; di na asing, song leader/musik. Maksudna, laho mangauhon tangiang panopotion i dohot paradehon roha tu bagabaga hasesaan ni dosa na mangihut.

c) Bagabaga Hasesaan ni Dosa

Di angka na manopoti dosana sian nasa rohana rade do asi ni roha ni Debata na mengampuni. Hombar tusi, di bagasan hajongjonganna songon malim na mewakili Debata maradophon huria i dipatubegehon paragenda i do samansam ramalan imam, i ma bagabaga hasesaan ni dosa. Pilliton ma i sian angka ayat naung diparade di Agenda di Bagian Paduahon, sub bagian C. Taringot tusi pe, ingkon parrohahonon do dia na hombar tu taon parhuriaon.

d) Pujian/Gloria Besar

Bagabaga hasesaan ni dosa i disambut huria i marhite paragenda na jongjong di tingki i songon malim na mewakili jolma maradophon Debata, didok: "Hasangapon ma di Debata na di ginjang." Dung i, diuduti huria i ma i dohot "Amen". Ndang dohot pola paragenda mandok i. Na mandok Amen on, na imbaru dope di hurianta jala hatontuan sian Pusat do i. Marhite na mandok i, diparhatopot huria i do hinasintong ni bagabaga dohot hasesaan i. Ndang gaitgait i, alai na tutu situtu do.

07. Marende Huria

Ende on, udut ni sambutan pujian ni huria na di jolo i do (06.d) Hombar tusi, pilliton do dison ende na marhata pujian, las ni roha, manang olopolop ni huria manghalashon hasesaan ni dosana. Rata-rata ende on saayat, molo apala jempek dua.

D. Pemberitaan/Petunjuk Hidup Baru

08. Hata ni Debata turpuk ni ari Minggu

a) Hata ni Debata

Aha do sasintongna goar ni unsur on?

Epistel: Ndang binoto manang na boha jala sadihari partubu ni goar on. Tutu, hea do di hurianta holan sian Evangelium na opat i do dibuat turpuk jamita (jala mulak do i dung opat taon; rupani, dos do sude turpuk sijamitahonon di 1936 dohot 1940, di 1937 dohot 1941 dohot satorusna). Di angka tingki i, unsur on dibuat ma sian Epistel manang suratsurat tongosan. Alai molo pinamanat ndang songon i sian mulana, ai dibuat do i tong sian Padan na Robi, sian Evangelium na opat i, dohot sian Epistel. Di tingki on, nunga dohot muse sian Pangungkapon. Antong boasa goaron i Epistel?

Patujolo ni Jamita: Na jolo, di deba huria dijamitahon do unsur on di parmingguan, jala digoar do i jamita metmet. (Jamita, digoar jamita godang). Angka sintua do parjambar disi. Alai ndang songon i anggo di angka huria na balga, isara di Pearaja dohot di Sipoholon, di parmingguon paduahon na dipatupa di bodari ni ari Minggu i do i dijamitahon (Ida Dr.J Sihombing, Homiletik, al.15-17) Di na deba nari muse, di evangelisasi na dipatupa di gareja di sada ari holang di na saminggu i. Alasanna, ai i do na mangajarhon manang na songon dia huria i manghangoluhon Evangelium i. (Evangelium, indicatif; epistel, iperatif). Hombar tusi, di periode ni Ephorus Ds.GHM Siahaan, hea do laos ayatayat ni turpuk i do na ditontuhon gabe ayat ariari di na saminggu i. Molo i do, boasa goaron i Patujolo ni Jamita?

Hata ni Debata Turpuk ni Ari Minggu on: Dumenggan ma tapangke goar on, ai i do tarsurat di Agenda i. (Tung taparrohahon ma, ndang adong tarsurat di Agenda i hata Epistel. Ndang sintong i, sai songon na paotootoonta dirinta mandok epistel hape turpuk na sian Padan na Robi do na tajaha, manang sian Evanggelium, manang sian Pangungkapon ai taboto be do lapatan ni Epistel, surat tongosan).

Sahali nari, nunga niondolhon, na tarbagi dua bagian bolon do parmingguonta i, i ma Parsombaon (I) dohot Parjamitaon/Pemberitaan (II). Molo mamereng hita sian segi Parsombaon (I) sambing, manang na dijamitahon i manang na so dijamitahon, na harajuman do Hata ni Debata turpuk ni ari Minggu i songon Pemberitaan Firman, alai sian segi keutuhan ni na dua i (Parsombaon dohot Parjamitaon), gabe harajuman do i songon Petunjuk Hidup Baru di angka naung pinaimbaru ni Tuhan i marhite hasesaan ni angka dosana.

Hatiha on, dijaha do unsur on masialusalusan manang responsori antara paragenda dohot ruas. Hasomalan i dipungka do di angka huria, dung i di periode 1992-1998 dilegalisasi ma i sian Pusat. Alasanna, asa diboan be bibelna tu gareja. Alai sian hajongjongan ni unsur on di bagasan kerangka kebaktian i, jala hombar tu interaksi timbal-balik na nidohan ondeng, ndang sintong i. Debata do na manghatai disi, na manangihon do jolma. Ala ni i, holan paragenda do manjaha i.

b) Pernyataan Bahagia

Panjahaon ni unsur on ditutup dohot sada Pernyataan Bahagia na mandok: "Martua ma angka na umbege hata ni Debata jala na umpeopsa." (Di Agenda i tarsurat do ‘na tumangihon’ alai di Bibel ‘na umbege’ do). Sarupa tu bagabaga hasesan ni dosa, Pernyataan Bahagia on pe na harajuman do songon samansam ramalan imam na dihatahon paragenda i di bagasan hajongjonganna selaku malim na mewakili Debata maradophon huria i. Sai adong do paragenda na ringgas roha manambanambai hata partuaon i, didok rupani: “Martua ma … jala na umpeopsa dohot na mangulahonsa.” Tung na so ringkot do i, ai nang pe ditambatambai ndang hea i sun singkop.

09. Marende Huria

Ende on, sambutan ni huria do tu Hata ni Debata turpuk ni ari Minggu i. Ala ni i, pilliton ma disi ende na marhahonaan tu turpuk i. Di tingki on, rata-rata ende on dua ayat, jala di ayat paduahon jongjong huria i. (Taringot tusi, ida 01 dohot 05).

E. Panindangion

10. Manghatindanghon Haporseaon

Songon na nidok di jolo (4), hapataran dohot tindakan ni Debata na paluahon i, hata, patik, bagabaga, dohot pernyataan bahagiaNa, na mangigil reaksi manang alus do sian jolma na pungu i. Di liturginta i, dibakuhon do alus i di bagasan sada Panindangion Haporseaon.

Di dekade onompuluan, di sada rapot pandita dipasingkop do joujou ni paragenda tu na manghatindanghon haporseaon i songon on: “Tahatindanghon ma haporseaonta i, songon na hinatindanghon ni donganta sahaporseaon di sandok portibi on, rap ma hita mandok.” Na marpardomuan do i tu semangat ekumenis na lam tu timbona.

11. Tingting

Di Agenda 1904, simpul manghatindanghon haporseaon pintor marende nama, dung i marjamita. Tingting dohot na papungu pelean, dung salpu jamita pe. Ndang torang be di hita, boha jala sadihari parmunsat ni tingting dohot na papungu pelean tu jolo ni jamita songon na taulahon di tingki on.

Na marfungsi do tingting i songon jamita (barita) huria. Bagian ni panindangion ni huria i do i, ai disi dihatindanghon huria i do haporseaonna paboa, ala ni hapataran ni Debata dohot ala ni hataNa, tubu do huria i naung gabe haojahaannasida nuaeng. Boha do hajongjongan ni huria i, boha parngoluon parhobasonna, parungkilon dohot sitaononna, sieahan dohot sidungdungonna, dihatindanghon huria i ma i marhitehite tingting i.

Alai huhut, na marfungsi do tingting i songon pengutusan, na paborhathon huria i tu angka na patut patupaonna songon alusna tu na binege dohot na jinalona di kebaktian i. Nian, nunga dialusi nasida i marhite na manghatindanghon haporseaon. Alai ndang sae dope i; siudutanna dope i di kebaktian i sandiri lumobi di hangoluanna siapari. Manang na boha jala di dia huria i ingkon mangalehon alusna, diinformasihon ma i di tingting i. [Ingot, naeng marujung ma bagian parjolo ni parmingguon i (Parsombaon). Ala ni i, di ingananna do molo adong dison pengutusan].

Hombar tu fungsina na dua i, ndang siagohonon tingting sian parmingguon i. Nang pe naung dirongkom i jala disagihon tu parminggu, anggo bagian na tertentu, isara na tubu, na marbagas, na monding, dohot na asing, ingkon tong do jahahononhon.

Di tingki on, tubu do muse unsur na imbaru di bagian on di torop huria, i ma tangiang pangondianon. Di na deba, laos sijaha tingting i do manguluhon i, alai di na asing, na pinillit sian tongatonga ni horong na adong di huria i manang sian lunggu/wjik. Nang pe songon i, tong dope adong syafaat ni parjamita. Ninna roha, denggan ma dipasada i sude di tangiang pangondianon ni parjamita, ai gabe ‘panegai’ do i tu keutuhan ni unsur i (panindangion dohot pengutusan ro di pelaksanaanna/pengucapan syukur).

F. Pengucapan syukur

12. Pelean/Marende Huria

Di Agenda 1904 holan sahali do papungu pelean jala ingananna dung salpu tingting (ida 11). Boha jala sadihari i gabe dua (bahkan tolu ro di opat) hali papungu pelean ndang torang be.

Angkup ni na mangalusi nasa na binahen ni Debata marhite na manghatindanghon haporseaon, laos songon i manggohi na sinosohon ni pengutusan na marhite tingting, dison dilehon huria i ma pelean manang hamauliateonna. Marhite i, dipatuk do na ringkot tu panghobasion ni huria i, baik di bagasan laos songon i dohot tu ruarna. Ringkot ondolhonon di bagasan kerangka ni tata kebaktian i, sintuhu ni unsur on na papungu pelean do na dipatupa di tingki marende. (Jadi na papungu pelean huhut marende do, ndada sabalikna na marende huhut papungu pelean). Ala ni i, sipilliton ma dison ende na marhahonaan tu pelean. (Sayang, mansai otik do ende sisongon i di Buku Ende HKBP). Alai, ala na harajuman do tong bagian on songon peralihan tu bagian paduahon (Pemberitaan), bolas do pilliton ende na manggombarhon sihol ni roha tu hata ni Debata, manang joujou dohot sosososo tu na manangihon jamita.

Catatan

Koor. Unsur na penting do koor di parmingguanta, alai unang ma nian magodanghu. Laho mangaradoti hasadaon dohot hahohot ni warna ni kebaktian, sipasingothonon do tu angka punguan koor asa dipahombar be endena tu unsur-unsur dohot tu warna ni kebaktian i. Rupani, molo salpu patik do anggap ni sada punguan marende, ndang hombar be i molo diendehon Tangiang Ale Amanami. Ra, denggan do pingkirhonon asa unang menetap anggap ni sadasada punguan koor marende di parmingguon, alai ganup minggu ma diatur manang na sadihari anggapna hombar tu hata ni endena be. Di deba huria, molo adong do koor na mangihut tu sada unsur, ndang marende be disi huria. Ninna, laho menghemat tingki. Ndang denggan i, ai molo marende sadasada koor ndang sude huria i na marende. Tutu sude do boi manangihon dohot mangauhon i songon ende ni tondina, alai manang na boha pe dihalomohon Debata do huria i rap marende sude. Dr.J Sihombing mandok: “Rapna i do na arga.” Papungu sude koor marende marjojor di sada tingki, isara dung salpu tingting, i pe ndang denggan, ai ndang mandukung i tu unsur-unsur ni parmingguon i. Bahkan gabe adong kesan na ambaamba do koor i di agenda parmingguon i. Dung i, holan di bagian parjolo ni parmingguon i do patupaon koor. Ndang sipatupaon be koor dung salpu jamita.


II. PEMBERITAAN


G. Pewartaan/Pengajaran

13. Jamita

a) Salam

Di godangan tata kebaktian, penyampaian salam dipatupa do di bona ni kebaktian. Ndang pola bertentangan i tu na taulahon di hurianta, ai songon na nidok ondeng, na tarbagi dua do kebaktianta i. Jadi molo dison pe ingananna tong do i di pamungkaan. Di hurianta holan partohonan pandita do na pasahathon tabe, anggo na so partohonan pandita sae do martangiang sian roha.

Sai adong do pandita na so setia tu formula ni tabe i, dipaasingasing hatana i otikotik. Ia so i, dipungka jolo dohot tangiang sian roha na tar ganjang, dung i pe asa dipasahat tabe i. Ndang denggan i, ai na manegai konsentrasi ni ruas do i. Didok sada halak: “Sada na tumabo huhilala di parmingguan ni HKBP on do, na parjolo sahali binege sian pandita i i ma hata ni Debata na polin, ndang tangiang na ganjang, ai anggo i do na boi terkontaminasi do i binahen ni hagiot dohot pingkiran ni hajolmaonna.”

b) Jamita

Di na manjaha turpuk, sai adong do tong pandita na padohothon ruas marhite panjahaon na masialusalusan. Sahali nari, hombar tu prinsip interaksi timbal-balik ndang sintong i, ai Debata do na manghatai disi, na manangihon do huria.

Songon sada sian huria protestan hita, tahaporseai do na unsur on do pamusatan ni peribadahanta. Na marfungsi do jamita i songon pewartaan dohot pengajaran. Ndang tarsirang na dua i; di bagasan pewartaan ingkon adong do pangajaran, jala di bagasan pangajaran, ingkon adong pewartaan.

c) Tangiang

Di hurianta sai ditutup do jamita marhite tangiang pangondianon ni parjamita. Mangihuthon agenda i nian, andorang so Tangiang "Ale Amanami" do inganan ni i. Alai ala ndang sai dijaha be tangiang na di agenda i disi, asing ni di angka ari pesta, di bagian on nama kesempatan ni parjamita pasahathon tangiang pangondianon. Ala ni i, unang ma holan na mardomu tu jamita i ditangiangkon parjamita i disi, dohot ma na mardomu tu tingting masa, na marsahit, na marlas ni roha, dohot na asing (Ida 11).

d) Saat Teduh

Di deba huria, salpu jamita adong do saat teduh, na diiringi musik na angonangon. Ndang na imbaru i, masa do i sian na jolo. Na so mangulahon i do na so umboto jala na so marningot be disi.

H. Pengucapan Syukur

14. Pelean/Marende Huria

Duansa i, na papungu pelean dohot na marende, sambutan ni huria i do i tu jamita i. Sipilliton ma dison ende na hombar tu jamita i, manang na taringot tu na pasahathon pelean. (Ida huhut hatorangan 12)

15. Tangiang-Ende Pelean

Di dekade onompulan pe partubu ni unsur on di liturgi ni hurianta. Partubuna, marhite hatontuan sian Pusat. Disi, dihatindanghon huria i do na sian Debata do saluhutna ro, jala sipaulahon do i tu Ibana marhite pelean. Di mulana, adong do manang piga ayat ni ende na ditontuhon tusi na boi dipillit tu sadasada tingki. Alai lam leleng gabe holan No.204:2 nama na dipangke di sandok huria manang sadihari pe.

I. Panutup

16. Tangiang-Pasupasu

Di bagian on, sai adong do na manambahon unsur ajakan na mandok: “Tapaujung ma nuaeng parmingguonta, martangiang ma hita.” Ndang adong tarsurat na songon i di agenda i, ala ni i ndang pola sidohonon i.

a) Tangiang/syafaat

Tangiang pangondianon na marhahonaan tu angka pesta na tarsurat di Agenda i denggan ma i dijaha di tingkina be, ai syafaat na khusus do i. (Ida hatorangan 13.c)

b) Tangiang Ale Amanami

Di Agenda 1904, rap mandok do na sahuria i di tangiang Ale Amanami i sian bonana sahat tu ujungna. Ndang binoto be boha jala sadihari partubuna gabe holan paragenda manjahahon i.

c) Pujian/Doxologi

Di hurianta, diendehon do bagian doxologi ni tangiang Ale Amanami i. Di Agenda 1904 ndang songon i. Ndang binoto manang boha jala sadihari gabe diendehon huria i non i. Ala doxologi do i, hatop do pangendehonna, unang diendatendat.

d) Pasupasu

Dison pe, adong do na manambahon formula pengutusan na mandok: “Mulak ma hamu di bagasan dame, jalo hamu ma pasupasu ni Debata Amanta i!” Na diompaphon do i ala adong pandohan na songon i di terjemahan Indonesia, na so hea dope dihatai jala ditotophon.

Taringot tu hata ni pasupasu, di mulana bebas do pandita mamangke pasupasu ni si Aron na tarsurat di 4 Mus.6:24-26 manang formula ni si Paulus di 2 Kor.13:13. Nuaeng, ingkon pasupasu ni si Aron i nama. Manghatahon i, sahat tu dekade 60-an, molo pandita dipangke hata ‘hamu’, na so pandita, ‘hita’. Alai marhite rapot pandita dipatontu ma asa dihatahon i songon na tarsurat di Agenda i, molo pandita ‘ho’, na so pandita, ‘hita’. Dung sidung dihatahon pasupasu i, ndang pola dohonon ni paragenda i be ‘Amen’, langsung nama huria i mangalusi marhite na mangendehon ‘Amen, Amen, Amen.’

e) Amen-Amen-Amen

Na mangendehon Amen pe, ndang binoto be boha jala sadihari partubuna. Di Agenda 1904, ndang adong i. Amen, mandok tutu, sintong. Marhite na mangendohon i ditohoi huria i do angka na jinalo dohot na binegena di kebaktian i, jala sitorushononna ma i di hangoluanna ariari.
jkt.05.09.2009/mvs

Read More..

16 Trinitatis

SERMON JAMITA TU MINGGU 16 TRINITATIS, 27 SEPTEMBER 2009
Rut 2:8-16

Manger Square and the Church of Nativity in Bethlehem

Patujolo

Di bibelta (Bibel dohot Alkitab) tarrajum do buku Rut tu bagian Sejarah (1 Musa-Ester).

Alai di Padan na Robi na marhata Heber, tarrajum do i tu bagian Surat manang Ketubim, i ma bagian na patoluhon, na parpudi dijalo tu kanon Padan na Robi. (Na masuk tusi, i ma Psalmen, Job, Poda, Angka Ende, Rut, Andung, Parjamita, Ester, Daniel, Esra, Nehemia, 1 Kronika, dohot 2 Kronika). Di na manalin Padan na Robi sian hata Heber tu hata Gorik, i ma Septuaginta (LXX) torus tu hata Latin, i ma Vulgata dipaunsat do buku Rut i tu bagian Sejarah, tu parholangan ni buku Panguhum dohot 1 Samuel. (Laos songon i do dohot buku Ester, Esra, Nehemia, 1 Kronika, dohot 2 Kronika; jala buku Daniel tu bagian paduahon, Nebim manang Panurirangon). I ma muse na taihuthon sahat tu tingki on.

Di mulana, dijaha halak Jahudi do buku Rut on di parpunguan Synagoge di angka ari raya Pentakoste. Sada panindangion do i taringot tu panarihon ni Debata di angka na mabalu, sada horong na tangkas diparrohahon di Padan na Robi (pat.2 Mus.22:22; 5 Mus.10:18; 14:29) alai huhut na jotjot gabe sasaran ni ketidakadilan dohot penindasan (pat.Jer.7:6; 22:23). Dungkon ni i, laos dihatindanghon buku Rut on do nang universalisme ni sangkap hatuaon ni Debata. Ndang holan Israel hasahatan ni asi ni roha ni Debata, dohot do angka parbegu. Si Rut on ma sada sian angka parbegu na pinasurung ni Debata gabe na parjolo bongot tu parsaoran na badia i. Lobi sian i tahe, gabe tarrajum do ibana tu tarombo na badia i, ai ompung ni Raja David do ibana, jala ompu ni Jesus Kristus (mangihuthon hajolmaonNa). Barita naung leleng mangolu hian (tradisi lisan) do barita ni si Rut on di Israel (mamungka sian tingki ni angka panguhum; pat.1:1). Di pudian ni ari, disurathon ma i songon reaksi tu partikularisme dohot eksklusifisme ni si Esra dohot si Nehemia na mangorai halak Jahudi marbagas dohot boru sileban.

Di bagasan hapogoson do mulak si Naomi sian tano Moab tu Betlehem (1:21). Tongon gotilon hatiha i di Betlehem (pat.2:2). Jadi laho ma si Rut manjomputi biur na marpisihan di golat ni si Boas, sahalak na mora jong dongan samarga jala sihasolhotan ni si Elimelek (2:1, 3). Hombar tu patik i, bolas do angka na hurangan manjomputi angka na marpisihan manang na tinggal di panggotilan ni agia ise pe. Ndang jadi oraan i. Gariada tahe, diorai patik i do halak Israel manggotil apala ias parbue ni hauma manang porlakna, ingkon tadinghonon nasida do deba di angka na pogos (3 Mus.19:9; 23:22; 5 Mus.24:19). Ala so halak Israel si Rut, ndang bolas ibana nian manjomputi di ladang ni si Boas. Ala ni i, ingkon jolo parmisi do ibana tu naposo na manguluhon angka panggotil i (2:7).

Hatorangan

Sahalak Israel na burju (saleh) do si Boas i, na so mamereng halak na ro manjomputi tu ladangna songon na pogos sambing, dung i dipasombu (dipaloas) manjomputi songon i, ndang! Didonohi do nasida di bagasan pandonohion pribadi, diantoi, dipanghulingi, jala diperlakukan songon dongan jolma. Didok ma tu si Rut: “Unang ho laho manjomputi tu ladang na asing, ... sai marsilohot dison ma ho rap dohot naposongku boruboru.” Bidang do ladang ni si Boas i, tuk do i bahen panjomputan ni si Rut saleleng gotilon. Siangkup ni naposo boruboru, adong do disi angka naposo baoa. Taringot tu na dua horong i adong dua hatorangan. Na parjolo, angka naposo baoa manggotil mamangke sasabi; angka naposo parompuan ma muse na papunguhon jala mambobohi sasamborhos. Hona do hatorangan i tu panghilalaan, ai molo songon i do tutu boi ma gombarhononta na sai dingkan pudi ni angka naposo baoa i do angka naposo parompuan i mamorhosi, jala disi ma dohot si Rut manjomputi. Ingkon disi do, ai disi do adong na marpisihan dohot na hatadingan, i ma angka na lolos sian tangan ni pangarahuti. Marhite na songon i boi ma masa songon na nidok ni si Boas i, sai marsilohot si Rut rap dohot angka naposona boruboru i. Na paduahon, angka naposo parompuan do manggotil; angka naposo baoa ma na papunguhon dohot na mangarahuti. Pembagian kerja sisongon i tartanda dope sahat tu tingki on di Syria. (Jamieson, Fausset, and Brown Commentary, Electronic Database. Copyright © 1997 by Biblesoft) Humona do hatorangan on, ai di ay.9a didok si Boas do: “Sai matahon ma ladang tinopotnasida laho manggotil, jala paihutihut nasida.” Ise do nasida i? Naposo boruboru na di ay.8 i do i. Songon na nidok di jolo i, molo songon i do tutu boi ma bayanghononta na sai dingkan pudi ni angka naposo parompuan i do angka naposo baoa i, jala disi ma dohot si Rut manjomputi. Ala ni i ma gabe mansai ringkot martona si Boas tu angka naposo baoa i asa unang dihaori nasida ibana. Molo songon na parjolo i do antong, sai di lambung ni angka naposo parompuan si Rut, aha ringkotna martona si Boas songon i? [Di salinan Batak tutu, ndang tarida na naposo baoa do na martaringot di ay.9b i; alai di Alkitab, tangkas do i jala toho, ai di hata heberna didok hanaariym (naposo baoa/the young men)]. Laos songon i di ay.14, tingki mangan nasida hundul do si Rut tu lambung ni angka panggotil (penyabit-penyabit). Di lambung ni ise? Tontu, di lambung ni angka naposo boruboru do, ai maol do siat tu roha molo tu lambung ni angka baoa si Rut hundul hatiha i. Lam tu tangkasna do i di ay.15-16, ai disi martona do si Boas tu angka naposona baoa asa dipaloas si Rut manjomputi di holangholang ni angka tibalan jala asa dipampisikhon deba sian angka tibalan i. [(Dison pe, baik di Bibel manang pe di Alkitab ndang dipataridahon na naposo baoa do na nidokna. Di hata Heber dipangke disi naaraayw (naposona baoa/his young men)].

Mansai basar do si Boas tu si Rut, ai dipaloas do ibana minum sian inganan ni aek (kirbat kulit) na diparade disi. Atik pe sai adong do mora na olo mangalehon aek inumon tu na pogos na tongon manjomputi di ladangna, ndang patik i na ingkon ulahonon ni ganup. Holan angka na basar do na olo mangulahon i. Arga do aek disi, ai ingkon na ditarui do i sian sumur di parhutaan. Ra, tar holang do ingananna, jala ala ni i do asa ingkon gabe naposo baoa (hanaariym) manahui (dohot manarui?). Ndang somal i nian, ai hombar tu adat, ulaon ni parompuan do na manahui aek. Luhut habasaron i mabalgahu do i di roha ni si Rut. Molo pe adong na mora na olo mambahen songon i tu sesama Israel na pogos na manjomputi di ladangna, anggo tu ibana tung na mabalgahu do i, ai halak dagang na sian bangso sileban do ibana. Ala ni i gabe manungkap ma ibana tu tano marsomba si Boas. Alai didok si Boas, uhum na denggan do na binahen ni si Rut i, ai ala ni holong ni rohana tu si Naomi, ditadinghon do sude, natorasna, tanona dohot bangsona asa gabe sakeluarga, saluat jala sabangso ibana dohot simatuana i. Songon sisolhot ni si Naomi dohot ruas ni bangso ni Debata na burju (saleh), dihilala si Boas do, na patut do ibana mambahen na denggan tu si Rut. Angkup ni i, porsea do si Boas na so dihalupahon Debata uhum ni si Rut na denggan i, alai lomo do rohaNa mangalehon upa. Ala ni i ma asa didok: “Ingkon marupa na gok ma ho sian Jahowa.” Marhite na mamongoti bangso Israel, sasintongna didapothon si Rut do dohot Jahowa, Debata ni Israel. Taringot tusi, ibana sandiri mandok tu si Naomi: “Bangsom nama bangsongku, Debatam nama Debatangku” (1:16). Suman tu anak ni pidong rajawali na mangalului parondingondingan tu toru ni habong ni inana di hamamasa ni parmaraan, isara di haroro ni udan, alogo, manang binatang panoro, songon i ma si Rut mangalului parondingondingan tu Debata Jahowa. Songon pidong i na so hea manulakhon anakna, songon i ma Jahowa ndang dung manulakhon nasa na ro tu Ibana. Di toru ni pangondingionNa, sonang do nasida (pat.5 Mus.32:11; Ps.36:8; 57:2; 91:4).

Di ay.13 diauhon si Rut do hata ni si Boas i. Nunga jumpangan asi ni roha ibana sian si Boas, i ma siinumon na so jambarna hian nian, jambar ni angka naposona do. Jumpangan apulapul dohot hata sipir ni tondi ibana huhut na paposhon rohana manatap tu tingki na naeng ro. Porsea do ibana na jumpangan asi ni roha dope ibana sian si Boas i.

Di ay.14 tongon do, dapotsa do na hinaporseaanna i, ai dipaloas si Boas do ibana dohot tu parmanganon raphon angka naposona. Sipanganonnasida sagusagu (roti) do. Dipangan dung jolo ditullukhon tu ingkau na asom, i ma samansam saus na pinature sian anggur saor miak jetun. Daina asom, gabe digoar do i cuka (vinegar). Ngali huhut, gabe mansai marguna di angka pangula naung loja jala maheu laho palamohon dohot palambokhon panghilalaanna (mendinginkan dan menyegarkan). Angkup ni i, biur na binolgang, i ma biji gandum na so apala mahiang jala na so apala koras dope, dung i disaok (digoreng) jala dipangan raphon manang pangganti ni roti.

Sipahusorhusoron

Bangso Israel na teokratis songon sada sistem masyarakat disarihon do angka na pogos di tongatonganasida. Diaturhon do di patik i na so boi gotilon nasida parbue ni hauma dohot porlaknasida apala ias, ingkon tadinghononna do deba di angka na pogos. Hombar tusi, sapanjang dohot dung salpu gotilon marroan do angka na pogos tu ladang panggotilan ni manang ise pe taho laho manjomputi manang mambuati parbue angka na mapisihan, na hatadingan manang na sangajo tinadinghon ni nampunasa. Songon i ma di turpuk on, ro do si Rut manjomputi gandum tu panggotilan ni si Boas. Songon sahalak Israel na burju, ndang holan dipasombu si Boas si Rut i manjomputi, alai diantoi do ibana di bagasan pangantoion pribadi, diapuli, dipapir tondina, jala disuanhon panghiriman taringot tu pangondingion ni Debata ni Israel; ndang dirajumi ibana songon na pogos na gabe boban, alai songon donganna jolma disarihon do hahorasonna, hasonanganna, sipanganon dohot siinumonna. Marhite saluhutna i, nunga mangula Debata manggohi sintasintana sandiri na taringot tu si Rut i na mandok: “Sai dibalos Jahowa ma tu ho uhummu na denggan i, jala ingkon marupa na gok do ho sian Jahowa Debata ni Israel na nidapothonmu laho marondingonding tu toru ni habonghabongNa.” Olo, marhitehite si Boas nunga mangula Debata mangalehon upa dohot pangondingion tu si Rut, ai manang di dia holong dohot denggan basa dipapatar di bagasan parsaoran pribadi, Debata pe mangula do disi.

Hurianta pe songon sada subsistem di bagasan sistem masyarakat dohot bangsonta, disarihon do angka na pogos. Sian na jolo dope, baik di huria marsadasada manang pe di hatopan, nunga tartanda jala mangolu ulaon diakoni na manarihon angka na mabalu, na so marama so marina, dohot na pogos. Alai ra, ndang masalpuhu molo nidok, godangan dope i marrumang ulaon parasinirohaon. Angka na pogos i jotjotan do tabereng songon jolma siasian sambing, na mangharingkothon asiasinta. Tontu do, ndang sai tarulahon i torus. Ala ni i, lumobi di angka huria marsadasada, gabe ulaon na marsahalisahali ma parasinirohaon i, isara di Natal. Gabe songon na mangalehon dengke ma i, dung diallang, mulak ma nasida muse male. Nunga tingkina morot hita sian i. Siberengonta do angka na pogos i songon jolma na utuh, angka na memiliki potensi na boi dipahinsat isara marhite pelatihan dohot penyediaan modal. Taringot tusi, nunga torop hurianta na di bona pasogit dohot di panombangan naung manghobashon pengembangan masyarakat, jala di tingki na parpudi on torop do naung pajongjonghon Credit Union Modifikasi, i ma sada sistem pemupukan modal na pinatomutomu ni sahalak ahli keuangan dohot perbankan, ruas ni HKBP, Amanta Dr.AM Ambarita. Marhite i gabe songon na mangalehon hail do huria i tu na hurangan, na boi pangkeonna mangalului dengke ganup ari, gabe lam tarpahinsatsa ngolu dohot parngoluonna.

Huria angka na di parserahan, isara na di Jakarta, ra, ingkon lobi marsiajar do taringot tusi, ai sasintongna torop do disi Batak jala Kristen na umpaet dope ngoluna sian na pogos na di bona pasogit. Na pogos ni bona pasogit marjabu be dope; na pogos ni Jakarta molo ndang di toru ni jambatan, ba di garobak manang di kardus; na pogos ni bona pasogit dipasiding dope na bau, na pogos ni Jakarta ndang diboto be lapatan ni na bau, ai torus do nasida mian di na bau, ganup ari manghaishais na bau, jala mangolu sian na bau. Aha do naung dibahen hurianta tu angka i? Ro do sahali sahalak pemulung tu bagasnami. Dung manghatai binoto ma na Batak do ibana jala Kristen. Husungkun hami do manang na di dia nasida marhuria, gabe digoar ma sada huria sian aliran pentakosta. “Boasa?” nina hami. “Ala huria i do na paradehon di hami sada bagas na sangat sederhana bahen panisioannami dohot panimpanan ni ropukropuk na hupapungupungu hami on andorang so ginadis,” ninna. Laos songon i, sitarui sampah di RT na huingani hami sahalak Batak do jala Kristen. Di na husungkun hami di dia nasida marminggu, tong ma digoar sada huria sian aliran pentakoste. “Boasa?” ninna hami. Alusna: “Ai huria i do na mangalehon beasiswa tu anaknami.” “Adong do ulaning pemulung na asing na mandok naung dapotan pangurupion ibana sian HKBP na manghorhon ibana boi pahinsathon ngoluna gabe so pola gabe boban ibana di keluarga dohot masyarakat, jala adong do ulaning anak ni sihais sampah na asing na marhatua dirina ala manjalo beasiswa sian HKBP?” ninna rohangku. Ndang parsoadaon adong do huria naung manghobashon beasiwa di Jakarta, jala dilehon do i tu parsiajar na berprestasi. Alai so mansoadahon adong na kecuali, sian dia do na gumodang boi hirimon ro parsiajar na berprestasi, sian anakhon ni sihais sampah do manang sian anakhon ni paradongan? Molo sian anakhon ni paradongan do jala angka i ma na manjalo beasiswa i, nda gabe songon sitogu na jongjong do huria i disi?

I ma siparrohahononta di taon 2009 na tagoari Taon Diakonia HKBP na martemahon Sejahtera Masyarakat Sejahtera Gereja. Marhite hurianta naeng patar do ulaon ni Debata na menyejahterakan masyarakat, dung i di bagasan kesejahteraan ni masyarakat i gabe sejahtera ma dohot hurianta.

jkt.30.08.2009/mvs

Read More..

Parpindaon na sian Debata

PARPINDAON NA SIAN DEBATA

Di sada tingki, songon i ma didok na mamaritahon, diparuar uluan ni sada huria do surat haputusan pinda ni sada pandita sian sada inganan tu inganan na asing.

Nunga tardok leleng ibana mangula di inganan i, nunga lobi lima taon. Hombar tu somalna, nunga patut ibana tutu pinda, jala ibana pe nunga dipaimaima i jala dihalomohon. Dung sahat surat haputusan i tu tanganna jala dijaha diboto ma na tu sada inganan na hira dos tu inganan na niingananna i do ibana dipapinda. Mansai marungkil ma rohana taringot tusi, didok ma: “Ai na boha do pimpinan on, na sian desa dipapinda tong tu desa? Nda nunga lam marpengalaman iba na pandita on? Hombar tusi, molo pinda nda ingkon tu inganan na lam huminsat ma nian? Aha ma lapatan ni i molo tong do tu inganan na dos?” Gabe sai masirapusan ma rohana taringot tu na mangoloi dohot na so mangoloi surat haputusan i. Di na so tabuatsa haputusan taringot tusi, laho ma ibana tu sahalak donganna pandita na tumua sian ibana. Dipaboa ma tu pandita i parungkilon ni rohana i, jala didok: “Boha do di roham, oloanhu do on manang ndang?”

Marnida parungkilon dohot jut ni rohana, tar maol do di pandita i mangalusi ibana. Molo didok: “Oloi,” diboto do na mansai maol i siat tu rohana, alai molo didok: “Ndang,” maralo do i tu poda tohonan na niantusan jala na hinangoluhonna sandiri. Ala ni i, dung marpingkir sangombas didok ma: “Songon on do Anggia, ndang denggan i molo ajaranhu ho mandok olo manang ndang, atik di sada tingki muse ndang hombar panghorhon ni i tu roham gabe dohot ahu solsolanmu. Ala ni i, ho sandiri ma na mamutushon manang na oloanmu i manang na ndang. Alai laho mamutushon i ho pingkiri ma on: Molo na sian Debata do i di roham, oloi; alai molo na so sian Debata do i, ba unang oloi.” Ia didok pe songon i, ala na dipingkir rohana do na ingkon mangkuling do panggora ni roha dohot tondi hapanditaon ni pandita i gabe hehe rohana mangoloi. Hape sabalikna do na masa, ai ndang borhat pandita i. Ndang pola dia roha ni huria na hinobasanna i disi, jala manang ala ni aha ma i, uluan ni huria hatopan pe ndang pola mamaksa, dipasombu do songon i, gabe hot ma pandita i di inganan i.

Dung manang na sadia leleng, ruar ma muse surat haputusan pinda ni pandita i. Ndang tu desa be, tu kota nama. Manjaha i mansai las ma rohana. Dung i martelepon ma ibana tu donganna pandita ondeng, didok: “Angkang, nunga hujalo muse surat haputusan ni uluan ni hurianta taringot tu parpindaonhu. Anggo on tangkas do huhilala, na sian Debata do on. Ala ni i, oloanhu do on, borhat do ahu. Mauliate ma di uluan ni hurianta. Maaf, ndang sanga be hami ro manjalang hamu, ai ingkon tibu do hami borhat.”

Alai ndang pingkiran ukuran ni angka pangalaho na sian Debata, ndang hagiot manang lomo ni roha ni jolma. Jotjot do masa, angka na hombar tu hagiot dohot lomo ni roha ni jolma, ndang na sian Debata; sabalikna, angka na maralo tu hagiot dohot lomo ni roha ni sasahalak tung apala i do na ro sian Debata. Ala ni i, unang ma adong na mamangke i laho mangondingi panjuaonna. Debata mandok: “Ai ndada pingkiranHu pingkiranmuna i, jala ndada dalanmuna angka dalanHu,” ninna Jahowa. “Ai songon timbo ni angka langit sian tano on, songon i do tumimbo angka dalanHu sian dalanmuna i, jala angka pingkiranHu sian pingkiranmuna i” (Jes.55:8-9)

Read More..

15 Trinitatis

SERMON JAMITA TU MINGGU 15 TRINITATIS, 20 SEPTEMBER 2009
2 Kor.11:7-16

Corinthian Columns at Corinth

Patujolo

Si Paulus do umpungka huria Korint di pardalananna paduahalihon mamaritahon Barita na Uli i (Ul.18:1).

Leleng do ibana mangula disi, pola do sampulualu bulan (Ul.18:11). Na gabe marsada do muse tu huria i angka na porsea ala ni ulaon sending na pinatupa ni si Apollos nang si Kepas (Petrus) pe, jala i ma muse na gabe bonsir ni parbolatbolaton di huria i (pat.1 Kor.1:12). Di pudi, dung borhat si Paulus sian Korint (Ul.18:18), sega do pardomuanna tu huria i. Ragam do sialana. Sada sian i, i ma haroro ni pangajari na sian horong Kristen-Jahudi. Dipodahon horong i do na so sae di na porsea i mangolu hombar tu ruhutruhut ni hakristenon, ingkon dohot do hombar tu ruhutruhut ni hajahudion, isara parsunaton. Khusus di Korint, ndang apala gogo nasida mamodahon i, alai mansai gogo do nasida anggo mangalo si Paulus, paoruhon sangapna di tonga ni huria i, didok ndang apostel na tutu ibana. Gabe lea ma roha ni ruas ni huria i di apostel i. Adong tahe na so olo be mangokui jala unduk tu haapostelonna. Digoari angka pangajari i do dirinasida apostel jala dijalo do balanjo sian na niajaranna.

Hatorangan

Sada sian alasan ni alona mandok na so apostel si Paulus, i ma na so manjalo balanjo i ibana sian huria. Pandapot umum hatiha i, molo adong ahli pidato na profesional na so manjalo upa, patut do i curigaan. Pingkiran i gabe dihonahon ma i dohot tu parjamita. Si Paulus pe sasintongna diparhatopot do na marhuaso do angka parhalado manjalo balanjo sian huria i (1 Kor.9:1 duu). Ia so dipangke ibana pe huasona taringot tusi, alasanna: Parjolo, asa unang gabe boban ibana di manang ise pe (ay.9) jala asa unang tarambat Barita na Uli i [1 Kor.9:12. Sian ayat on, boi do suraon ni roha, ia so manjalo balanjo pe si Paulus sian Korint, ala na enggan do huria i patupahonsa. Ndang tarsalahon nasida disi, ai sian mamungka sahat dope si Paulus tusi, nunga pintor dilului sandiri bohalna marhite partonunonna (Ul.18:3). Apostel i pe ndang tarsalahon, ai di parsahatna tu huta i pintor songon dia ma ibana manjalo balanjo ai gari huria i so jongjong dope?. Ala ni i tarpaksa do ibana mangalului sandiri balanjona. Alai di ujungna, gabe peam ma huria i disi, losok ma rohanasida mamalanjoi parhaladona]. Paduahon, sada sian dalanna do i mampukpuhi (melatih) dagingna asa unang angka na asing dijamitai hape ibana sandiri gabe bolong (1 Kor.9:27). Patoluhon, hombar do i tu latar belakangna, ai di hajahudion ndang apala dihasomalhon angka rabbi manjalo garar sian pangajarion. Di si Paulus sandiri, dirajumi do i hasurungan (1 Kor.9:15) manang pujipujianna (2 Kor.11:10). Alai di alona, tung apala i ma tandana na so apostel na sintong ibana, jala hatoruhonna do i molo ingkon martonun ibana mangalului balanjona. Ruas ni huria i pe gabe adong ma na manjalo pingkiran i. Tu angka i ma nuaeng didok (di bagasan pandohan sandiri): “Aha dosangku molo martonun ahu mansari balanjongku laho pasahathon hamu tu hasangapon ni angka anak ni Debata marhite na mamaritahon tu hamu Barita na Uli i so pola martuhor?”

Di ay.8-9 dipaboa, dijalo si Paulus do pangurupion sian angka dongan na di Makedonia. Ra, huria Pilippi do nidokna disi (pat.Pil.4:15-18) Ala ni i do boi tulus panghobasionna di Korint, ndang sae holan sian partonunonna i. Taringot tusi didok ma: “Na mangarampas do ahu sian huria na asing bahen balanjongku laho marulaon di hamu.” Boasa? Ai prinsip umum na marlaku hatiha i, ndang boi sasahalak manjalo pangurupion (sokongan dana) sian na so hinobasanna. Hombar tu prinsip i, pangurupion na sian huria Pilippi ingkon manghobasi huria Pilippi do i nian pangkeonna, ai haknasida do i. Marhite na mamangke i tu na ringkot di huria Korint, gabe hira na tarrampas do hak ni huria Pilippi. Prinsip ni si Paulus di Korint, unang manusai, lapatanna unang gabe boban di manang ise pe (Ida Patujolo). Taringot tusi dipatihi do dirina paboa na so jadi masa i nang tu angka tingki na mangihut.

Nunga nidok, na so manjalo balanjo i ibana sian huria, dirajumi ai Paulus do i hasurungan manang pujipujianna (kemegahan). Di ay.10 diondolhon do na so olo (rela) ibana agoan hasurungana i. Taringot tusi, pola do ibana marsumpa mandok: “Namun hasintongan ni Kristus di bagasan ahu, ndang jadi montok pujipujian on di ahu di angka luat Akaya.” Na nidokna disi, hatana na mandok na so tagamon gabe boban ibana di agia ise pe, manang na so tagamon laho manjalo balanjo ibana sian huria Korint, dihatahon do i di bagasan hasintongan ni Kristus, jala siparalushononna do i tu Kristus i. (Suman tu hata tolon di Padan na Robi, hira on do na nidok ni si Paulus disi: “Songon sintongna mangolu Kristus, ndang jadi susaanhu agia ise marhite na manjalo balanjo sian huria.”) Molo morot ibana sian i, na mangontok hasurunganna sandiri do ibana disi. Akaya i ma provinsi Rom na manghamham sandok luat Gorik (Junani), na marhuta sabungan di Korint.

Ra, adong do sian halak Korint na mandok, ia so dijalo si Paulus pe balanjona sian huria i ala ni na so holong do rohana di nasida. Boasa antong sian na asing olo ibana manjalo pangurupion? Boasa ia sian Korint ndang olo? Alai molo tung so boi pe halak Korint mamereng na holong do roha ni si Paulus di nasida, anggo Debata diboto i jala dibereng.

Di ay.12, ditaringoti si Paulus dope sada nari sialana so manjalo balanjo ibana sian huria i, i ma na naeng manggotaphon usaho ni angka alona asa gabe dos nasida di pamujion i. Di jolo nunga tinaringotan, hombar tu prinsip umum hatiha i, ingkon na manjalo upa do ganup sian na niulana be. Ndang tihas i, hasurungan (kebanggaan) gariada. Songon i ma angka alo ni si Paulus i, angka na manggoari dirina apostel na tutu, dipapujipuji do dirina ala na manjalo balanjo i nasida sian huria i. Alai di bagasan rohana be, diokui do na sumurung do si Paulus sian nasida, ai nang pe nidok na hombar do tu prinsip umum na manjalo upa sian na niulana be, ndang na mandok na so diargai halak hatiha i na mangula so marnida upa, diargai do, dipuji gariada. Di Korint sandiri, tagan so ro dope angka na sian horong Kristen-Jahudi i, ndang adong na manuhasnuhasi si Paulus taringot tusi. Marusaho do angka alona i asa gabe dos si Paulus tu nasida. Rap manjalo balanjo nasida nian sian huria i, dung i gabe dos ma nasida di hasurungan i, i ma hasurungan ni angka sijalo upa, hasurungan ala ni upa. Alai ndang olo si Paulus. Marhite na torus ibana ndang manjalo balanjo sian huria i di tingki i dohot di angka tingki na mangihut, digotaphon si Paulus do usaho ni angka alona i, gabe sai tongtong ma ibana sumurung sian nasida.

Di ay.13-15 dipapatar si Paulus do manang na ise do sasintongna angka alona i. Angka apostel pargapgap do nasida, pangula pangansi; dipasumansuman songon apostel, alai ndang hea manjalo parsuruon sian Kristus i; mangajari do nasida jala marjamita, alai upa do niluluanna. Na martiruan tu sibolis do nasida, ai sibolis i pe dipasumansuman do ibana songon surusuruan hatiuron, hape partogi tu hagolapon do. Laos songon i do nang halak naung gabe naposo ni sibolis i, dipasumansuman do ibana songon naposo hatigoran asa boi mangotootoi na asing. Alai ndang tarbahen agia ise marsibuni torus manorus taringot tu dirina. Di sada tingki sai na patar do hadirionna, jala angka ulaonna i do papatarhonsa. Dung i di ujungna, jaloona ma na hombar tu na niulana be.

Sambolus idaon haotoon do na binahen ni si Paulus i (ida ay.17). Gari na mamujimuji diri hombar tu fakta, ndang marguna (pat.1 Kor.12:1), lam boha ma na mamujimuji diri hape so adong di ibana? So na ummalo si Paulus sian angka alona i di hata (ida ay.6a), so na sumangap ibana di pamerengan ni huria i, so na sumonang ibana di ulaon i, umpaet tahe gariada jala lumoja ai ingkon mangalului sandiri ibana di balanjona, hape sai mamujimuji diri. Di pamerengan ni natorop haotoon do na songon i, haloahon. Alai taringot tu ibana, dialo si Paulus do pingkiran i didok do: “Unang ma dirimpu na deba na loahon ahu.” Boasa? Ai diulahon ibana pe i na pinaksa ni keadaan do, laho mampartahanhon goarna na denggan sian rongrongan ni angka alona. Naeng ma antusan ni halak Korint i. Alai molo tung sai dohonon nasida ma i haloahon, ba dijangkon nasida ma ibana songon na loahon, asa tarpapujipuji ibana dirina saotik. Na nidokna, molo tung ‘haloahon’ i ma jolo na dirajumi si Paulus sipujihononna, diantusi halak Korint ma i jala dirajumi na wajar.

Sipahusorhusoron

Di ganup halak ingkon adong do sipujihonon manang sibanggahononna be, hasurungan na dirajumi mangalehon lapatan jala na mambahen dirina mararga. Ndang sai sarupa i di saluhut halak, alai paasingasing do. Na sada on rupani mangarajumi na hagogoonna do hasurungan sipujihononna, na sada an hapistaranna, na sada nari muse habonggalonna, dohot angka na asing.

Di jamita on martaringot do dua horong na mamujimuji hasurungan na paasingasing. Rap na mangula di huria do nasida, alai asing do hasurungan na binanggahonna. Na parjolo, si Paulus. Hasurunganna do dirajumi na so manjalo balanjo ibana sian huria Korint, ai marhite i ndang gabe boban ibana di manang ise pe jala ndang gabe tarambat Barita na Uli i. Harararat ni Barita na Uli i do na umarga di ibana, ndada upa manang parsaulian tano on. Na paduahon, angka pangajari na sian horong Kristen-Jahudi. Digoari nasida do dirina apostel, jala dijalo do balanjo sian huria i. Hasurunganna do i dietong, jala bangga do nasida taringot tusi. Manang na gabe boha pardalan ni Barita na Uli i ala ni i ndang pola diparungkilhon.

Suman tusi, sian na jolo torus tu nuaeng adong dua horong parhobas di hurianta, i ma na so manjalo balanjo dohot na manjalo balanjo sian huria. Di horong na parjolo ma angka sintua dohot deba evangelis (na so sijalo balanjo), di na paduahon ma anggo angka pandita, guru huria, bibelvrouw, diakones, dohot deba evangelis (sijalo balanjo). Taringot tu hinaringkot dohot panumpakna, ndang adong sian na dua horong i na boi pasurungon manang sabalikna pametmeton. Ndang boi dohonon rupani na sumurung do panumpak ni ulaon ni pandita, guru huria, bibelvrouw, diakones, dohot deba evangelis (sijalo balanjo) sian ulaon ni sintua dohot deba evangelis (na so sijalo balanjo); manang sabalikna sumurung do panumpak ni ulaon ni sintua dohot deba evangelis (na so sijalo balanjo) sian ulaon ni pandita, guru huria, bibelvrouw, diakones, dohot deba evangelis (sijalo balanjo), ndang boi! On do tahe, naung gabe panumpak do ulaon ni sasude tu hajojongjong ni huria dohot harararat ni Barita na Uli di HKBP. Ndang na hasuhatan godang ni pasupasu na mabaor tu huria dohot masyarakatta marhite angka pangula na so sijalo balanjo i na burju mangulahon tohonanna. Suang songon i, ndang na hasuhatan godang ni na denggan na jinalo ni huria dohot bangsonta marhite angka parhobas sijalo balanjo angka na burju mangulahon panjouonna.

Alai ringkot do parungkilhononta, aha do hasurungan na nirajuman jala na pinujihon ni angka partohonan na so sijalo balanjo di bagasan ulaon tohonan i? Tohonanna i sandiri do dohot pamarar ni Debata mamangke ibana mangula di tonga ni huria ro di panumpakna tu harararat ni Barita na Uli manang adong na asing? Sian bonana diparsangapi halak do sintua di tongatonga ni huria, di huta, dohot di masyarakatta; dapotan jambar do i di parmuli ni boru, jala malua sian rodi. Di tingki na parpudi on, lumobi di deba huria angka na di kota nunga adong kecenderungan asa manjalo ‘bayaran’ angka sintua sian na niulana di tongatonga huria i. Molo maragenda rupani, ingkon jaloonna ma sekian. Ndang digoar gaji i tutu manang upa, uang cuci ni baju parhobas do. Asing ni i, adong dope sipalas roha ujung taon. Suang le songon i, siparungkilhononta do tong, aha do hasurungan na nirajuman jala na pinujihon ni angka parhalado sijalo balanjo di ulaon tohonan di huria i? Tohonanna i sandiri do dohot pamarar ni Debata mamangke ibana mangula di harajaonNa ro di panumpakna tu harararat ni Barita na Uli manang na asing, isara jabatan dohot angka parsaulian na mangihut tusi? Sian na jolo, dipasiding hurianta do mamangke hata gaji, balanjo do. Alai manang na aha pe goar ni i, ringkot do parungkilhonon ni ganup, so nda tung naung morot do nuaeng kebanggaan ni angka partohonan sijalo balanjo sian tohonanna i tu balanjo i sandiri? So nda tung naung adong do nuaeng angka parhalado na mangarajumi na godang ni balanjo (besarnya gaji) do ukuran ni hasurungan dohot sipujihononna? Na marpandapotan marpulu juta rupia sabulan rupani, manang na boi patioptiop dua ro di tolu handphone angka na bermerek i nama na manghilala dirina martua jala na diparhatua halak? Ra, ndang na masalpuhu be molo nidok, kecenderungan tusi nunga adong. Ai boasa sai songon na marsiadu sude nuaeng on idaon tu kota? Ala na dirajumi rohana do ulaning na lobi marpanumpak do kehadiran dohot ulaonna disi tu ngolu ni huria dohot tu harararat ni Barita na Uli manang ala ni na asing? Boasa mansai bangkol pinda ia sian Jakarta tu Sumatera, lumobi molo tu desa? Na ringkot di huria i do i dohot di Barita na Uli molo so olo sasahalak pinda sian kota tu desa manang na ringkot di dirina?

Sude i ndang tarsirang sian parngoluon ni hurianta, ai parhalado i anak ni jamanna do i, produk ni huria satingkina. Molo gabe morot nilai-nilai ni haparhaladoon, ala ni naung morot do nilai-nilai ni kemasyarakatan dohot parhuriaon. Molo boi sahalak partohonan ndang mangoloi pinda jala martahan torus di huria na di kota ingananna hian rupani, tontu, ala na ditolopi ingananna i do i jala ditumpahi. Ala ni i, siparungkilhononta do tong manang na aha do na hurang di hurianta umbahen na masa kecenderungan angka na di ginjang i, jala aha do sibahenonta mangotapi angka i.

jkt.25.08.2009/mvs

Read More..

14 Trinitatis

SERMON JAMITA TU MINGGU 14 DUNG TRINITATIS, 13 SEPTEMBER 2009
Ulaon 28:1-10

Patujolo

Tibu hian do disangkap roha ni si Paulus laho tu huta Rom (Ul.19:21; pat.Rom 1:8-15; 15:23).

Tuhan i pe antong dihalomohon do i (pat.Ul.23:11; 27:24). Alai songon i ma pangalahona, ingkon marhite dalan sitaonon do ibana laho tusi. Dung so tarhirim ibana be hatigoran di paruhuman ni si Festus di huta Kesarea, mangalului pangondian (banding) ma si Paulus tu Kesar (Ul.25:11). Mangihuthon Lex Julia (aturan taringot tu banding di halak Rom), ndang boi so tolopan ni panguhum pangidoan banding ni sahalak Rom molo so tangkas do ibana marsala. Si Paulus warga negara Rom do (Ul.16:37-38; 22:25 du) jala ndang adong dapot si Festus salana. Ala ni i, ditolopi ma pangidoanna i, dipaborhat ma ibana raphon sitarapan angka na asing tu huta Rom (Ul.27:1). Ala ni alogo dohot umbak na mansai gogo, mamungka sian pulo Kreta maupaup do nasida di laut i. Dung pe pasampuluopatarihon asa tarharang nasida di pulo Malta, jala disi ma masa jamita on.

Hatorangan

Malta (Melite) sada pulo na metmet do di laut Tonga, di dangsina ni pulo Sisilia. Na jolo, godang disi situak (madu), jala i ma alana digoar i Melite. Ro sian hata Gorik meli (honey, situak). Alai adong do na padomuhon goar i tu sejarah ni pulo i. Halak Faeasia hian do penduduk asli ni pulo i. Alai ro ma tusi halak Funisia pajongjong kolonina disi jala dibahen ma i gabe parondingondingan jumpa tarmara nasida tingki na marlayar di tongatonga ni laut Tonga na bidang i. Hombar tusi digoar ma i MeliyTeh, lapatanna parondingondingan, haporusan, pangungsian. [(Patudos tu hata maalaT di hata Heber, lapatanna to escape). (Ingot, serumpun do hata Funisia dohot hata Heber)].

“Na basar situtu do pangisi ni pulo i maradophon hami.” Ise do ‘hami’ i? Parjolo sahali, si Paulus do i, si Lukas, dohot si Aristarkus (27:2), dung i sandok na di parau i, 276 halak toropna (27:37). Ndang ditaringoti nian goar Lukas disi, alai ala ibana do na manurathon barita i (Ulaon ni Apostel umumna) jala marhata hami, na marlapatan do i ndang boi so dohot ibana di pardalanan i. Mansai ngali ari hatiha i, ai nunga jonok tu partaonan ngali. Angkup ni i, ro do udan. Gabe dipagalak pangisi ni pulo i ma api pansusuduannasida. Dohot ma si Paulus papungu rambaramba tu api i. Hape di bagasan rambaramba i adong ulok. Ra, naung kaku do ulok i ala ni ngali ni ari i. Ala ni i, di tingki na hinandit ni si Paulus rambaramba i ndang pola humusor ulok i, alai dung di atas ni api i las ma dihilala laos manginsir jala dililiti ma tangan ni si Paulus. [Ndang didok dison na dipargut ulok i tanganna i, ai hata katheepsen do dipangke dison, lapatanna dililiti (fastened on). Alai sian surasura ni roha ni na marnida na di ay.4-6 i, ra, dipargut do ibana tutu songon na nidok ni salinan Batak dohot Indonesia i].

Dung dipargut dililiti ulok i ma tangan ni si Paulus (manang sabalikna, jolo dililiti do asa dipargut) gabe gaunggaung ulok i di tanganna. Dung i, dipirpirhon ibana ma ulok i tu api i. Marnida na masa i sapandapot ma pangisi ni pulo i mandok na pamunu do si Paulus i. Manang dia alana pintor laho rohanasida tu pamunuon, ndang tu dosa angka na asing, ndang torang i di turpuk on. Alai ra, ala na dirajumi nasida do paboa pamunuon do dosa na umbalga. Di dia pe di portibi on mangolu do pingkiran na mandok na adong do uhum pamaloson (hukum karma?) tu nasa hajahaton. Ndang taralo jala ndang tarpasiding jolma uhum i. Manang na boha jala marhite aha pe, sai na jaloonna do i. Ndang sian laut, sian ulok; ndang sian baba ni babiat, sian baba ni buea. Dihirim rohanasida ma na magurbak tangan ni si Paulus i manang runggang ibana laos mate satongkin. Na marbisa situtu do ulok i. Bisana i boi mambahen halak magurbak, mohop situtu panghilalaanna songon na tinutungan, jala boi sahat ro di na mate. Alai dung leleng dipaima ndang nanggo mahua, muba ma pingkirannasida, didok ma: “Debata do ibana.” Ndang torang manang na debata dia na hinabiaran ni halak Malta. Alai hombar tu pardomuannasida tu Funisia haroroanna i, adong do mamingkir na dihaporseai nasida do tong Herkules, sada sian angka debata ni halak Funisia na ginoaran (nama julukan) Alexikakos, mandok silele hajahaton. Songon na di Listra (ida Ul.14:11), ra, di Malta pe dihaporseai halak do na olo do angka debata papatar diri marrumang jolma, jala hombar tusi dirajumi nasida ma si Paulus hapataran ni Herkules, debata na gogo na so tartaluhon.

Si Publius do halak na sumangap di pulo i. Wakil ni panggomgomi Rom do ibana, ndang raja negeri (songon si Herodes di Palestina). Pangkatna prootoos (chief man). Sian penggalian tarboto, sintong do prootoos do pangkat ni wakil ni panggomgomi Rom di pulo i. Basar do nang si Publius tu nasida, dijangkon do nasida jala ditamuei tolu ari lelengna. Tongon marsahit do ama ni si Publius i, panepaneon (demam) huhut barobunion (disentri). Martangiang ma si Paulus, diampehon tanganna tu ibana, gabe malum dihilala. Marhite i dipatuduhon si Paulus do tu natorop i paboa na sian Debata do hamalumon i, ndang sian parbinotoan manang hatauon ni jolma taringot tu pangubation. AsiasiNa do i na disagihon sian lomo ni rohaNa. Ala ni i, angka na manjalo asiasi pamalumhon songon i ndang boi mamangke i sian roharohana. Si Paulus dison, ingkon jolo dipaima do tolu ari asa diulahon i tu ama ni si Publius. Aut boi sian roharohana, nda tumagon ma jalo nian disi sahat nasida tu inganan i? Marnida i, marroan do angka na marsahit na asing di pulo i, gabe malum ma dohot nasida. Ndang torang dison manang na adong do peran ni si Lukas pangubati (dokter) i di hamalumon ni natorop i, manang sarupa tu hamalumon ni natoras ni si Publius i, holan si Paulus na berperan.

Pasalpuhon partaonan ngali, tinggal dope nasida di pulo i tolu bulan lelengna (pat.28:11). Dipasangap natorop i do nasida. Na nidokna, ra, siangkup ni na dihormati, disarihon na ringkot di nasida, isara ni sipanganon, siinumon, parabiton dohot na asing. Ndang holan di tingki mian nasida di pulo i, dohot do di pardalanannasida na mangihut, ai di na borhat nasida muse, diparade pangisi ni pulo i dope angka na hasea di nasida. Manarik roha do, ndang ditaringoti si Lukas dison na marjamita Apostel Paulus mamaritahon Barita na Uli tu halak Malta i. Alai ndang pola ganggu roha taringot tusi, ai tanda halongangan ndang hea i jongjong sandiri, alai sai na mangihut tu panjamitahonon di Barita na Uli i do i laho mangondolhonsa (menyungguhkan).

Rancangan Homiletis

Tu angka sisean na pinillitNa dohot tu huriaNa sian sude tingki dohot inganan dipasahat Tuhanta Jesus do ulaon manghatindanghon Barita na Uli i, didok: “Borhat ma hamu mamaritahon hata on: Nunga songgop harajaon banua ginjang i” (Mat.10:8) Taringot tu haboborhat dohot panindangion i na boi masa do i sian giot ni roha ni na porsea i sandiri, jala i ma na gumodang masa. Alai huhut na boi masa do i nang sian giot ni roha ni angka alo na manogu na porsea i tu jolo ni paruhuman ni angka panggomgomi dohot tu jolo ni angka raja na pinahusor ni Tuhan i bahen panindangion taringot tu Ibana maradophon angka panguhum i sandiri dohot maradophon angka sipelebegu (Mat.10:18). Songon i, na boi masa do tongtong panindangion di bagasan sitaonon di pardalanan ni huria sian sude tingki dohot inganan. Boha do hamamasa ni i?

Masa do i sian tahi ni Tuhan i. Tibu hian do ditahi si Paulus mamaritahon Barita na Uli i di hita Rom. Tontu, dihirim ibana do asa sian giot ni rohana manang pinaborhat ni huria i ibana laho tusi (pat.Ul.13:2 du), ndada sian na nionjar ni na hansit manang sitaonon. Alai asing do tahi ni Tuhan i, ai ingkon di bagasan sitaonon do ibana borhat jala sahat tusi. Di bagasan sitaonon pardagingon, ai ingkon mumbangumbang jala maupaup nasida di laut sampuluopat ari lelengna; di bagasan sitaonon ni harohaon dohot hailaon huhut, ai ingkon tarrajum ibana tu sitarapan. Alai tung ingkon marhite na songon i do ibana boi jongjong di jolo ni kesar i (pat.Ul.27:24). Kesempatan i ndang na laho dapotsa i di ombas na bebas. Tontu do, ndang diantusi ibana i sude sian mulana, di pudi dohot di hamamasana pe i asa diboto.

Songon i ndang sai haantusan hita tahi ni Debata di bagasan angka sitaononta. Alai sai adong do sian i na hombar tu tahi ni Tuhan i na dipahusor bahen panindangion di Ibana. Ndang maol di Ibana patupahon i. Gari sian hamatean ni angka na hinaholonganNa boi masa panindangion na marparbuehon na godang. Nda didok Tertullianus do: “Mudar ni na mate martir do boni ni huria?” Nang pe songon i, nda tung gabe luluan sitaonon di bagasan panghirimon dohot tangiang ni roha anggiat pahusoron ni Tuhan i non i bahen panindangion di Ibana; songon i, ndang gabe luluan hamatean martir asa gabe boni ni huria dohot laho mangomo surgo. Na ringkot, naeng ma di bagasan sandok habengeton hita manjalo dohot mangundukhon angka sitaononta, ai tung na maol do hirimon parbue panindangion sian sitaonon na jinalo di bagasan ungutungut dohot panaritaon.

Masa do i di bagasan panogunoguon dohot panumpahion ni Tuhan i. Di bagasan panogunoguon ni Tuhan i, dung mumbangumbang jala maupaup di laut sampuluopat ari lelengna, tarharang (terdampar) do parau ni si Paulus dohot angka donganna di pulo Malta. Basar situtu do pangisi dohot na sangap ni pulo i tu nasida. Pambahen ni Tuhan i do i, ai ndang sai songon i pengalaman ni angka na tarharang, jotjotan do tahe dipupusi (dijarah) halak. Digohi Tuhan i do disi bagabagaNa, ai dipalua do si Paulus sian bisa ni ulok, ditangihon do tangiangna, jala dipargogoi do panumpak ni tanganna pamalumhon sahit ni angka na marsahit (pat.Luk.10:19; Mrk.16:18). Ala ni i, gabe sangap ma nasida dibahen pangisi ni pulo i.

Songon i ragam do dalan ni Tuhan i manumpahi na porsea di panindangion na marhite sitaonon i. Apala na umarga i ma hadodonok dohot pandonganionNa na so dung dipatait sian angka na porsea. Mardonganhon Debata di bagasan hurungan pe adong do haluaon, di tonga borngin na marimpotimpot pe adong do hatiuron, jala di bagasan parmaraan bolon pe adong do hasonangan; mardonganhon Ibana tarhamonanghon do halak angka na gabe dongan masihilalaan, masitangiangan, masihaehean, jala masiurupan di bagasan roha na holong; jala mardonganhon Ibana tarpatulus do di bagasan dohot marhite hita bagabagaNa na taringot tu hamonangan maradophon pangago (isara ni ulok) dohot sahit. Luhutna i, ndang na jongjong sandiri, alai na mangondolhon (menyungguhkan) Barita na Uli do, sintuhu ni ulaon panindanggion i. Ala ni i, molo tarpamasa pe i ingkon na gabe hasangapon di Tuhan i do hapateanna. Molo tung gabe dapotan sangap na porsea i ala ni i, dijalo ma i di bagasan serep ni roha, asa tarpasangapsa Tuhan i nang di bagasan dohot marhite sangapna i.



jkt.21.08.2009/mvs

Read More..

Pasupasu di bagasan pangoloion

PASUPASU DI BAGASAN PANGOLOION

“Alai ingkon oloanmuna do Jahowa Debatamuna i, jadi pasupasuonna ma sagusagum dohot tapianmu, jala pasalpuonHu sahitsahit sian tongatongamuna.” (2 Mus.23:25)

Diarahon sada halak do sahali sahalak pandita laho marsipanganon bodari tu bagasna.

Na masitandaan do nasida mamungka sian haposoonnasida dope. Nunga leleng nasida ndang pajumpang, ai asing be do ingananna. Ala ni i, mansai tabo do parjumpangannasida i jala mansai rosu dohot panghataionnasida. Dung jumpang tingki mangan bodari, hundul ma nasida humaliang meja makan naung pinarade ni inanta i, jala pintor naeng dipungka amanta i ma mangan. Marnida i didok pandita i ma: “Ai ndang jolo martangiang hita tahe?” “Oh, i do ate, ai lupa do ahu na pandita do ho hape,” ninna amanta i mangalusi. “Alai anggo nuaeng,” ninna muse, “rasional do pangantusionhu taringot tu ngolu on. Molo sai sipanganon na bergizi jala na seimbang do pinangan, nang pe so tinangianghon, ndang boi so gabe ngolu i dohot hahipason. Angka sipanganon na di bagas on, tarmasuk na di jolonta on, naung lolos uji do. On pe, molo naeng martangiang ho, ba martangiang; anggo hami ndang pola, ai ndang adong be huhilala guna ni na martangiang.” Umbege i, martangiang ma pandita i sahalakna, dung i diihuthon ma amanta dohot inanta i mangan.

Tongon do, siradotan do na manganhon sipanganon na bergizi jala na seimbang dohot na manginum aek na ias jala na sehat. Alai ndang na mandok, molo dung songon i, dohot sandirina ma i gabe ngolu dohot hahipason, ndang. Molo taparrohahon, na jolo i, ndang apala dipingkirhon halak sipanganon na bergizi. Na ringkot, bosur, butong, mahap, i do. Siiunomonna pe songon i, ndang nanggo dilompa. Nuaeng on, nunga hira sange halak manarihon i. Alai ndang boi dohonon na gabe dumao ma jolma nuaeng on sian sahitsahit, ndang. Atik na sabalikna do tahe, ai tung apala di tingki on do marmullopan sahit angka na so haantusan jala na so haubatan.

Debata do mual ni ngolu. Sipanganon dohot siinumon na pinasupasuNa, i do na gabe ngolu dohot hahipason. Diparbaga Debata do i tu angka na mangoloi Ibana, angka na beribadah tu ibana. Ala ni i, pangoloion i do na parjolo na pinangido ni Debata sian hita. Manang aha pe taula, ingkon gabe hasangapon ma i di Ibana. Dung i basabasahononNa ma tu hita sipanganon dohot siinumon, jala pasupasuonNa do i asa gabe ngolu dohot hahipason.

I ma siparrohahononta di na mandalani bulan September on. Ingkon gabe ibadahta ma tu Debata kehadiran dohot parsuruonta tu portibi on ro di parsaoranta di bagasan huria na sasada i na pinaojak ni Tuhanta Jesus Kristus di hita (jamita Minggu 06.09.2009), ingkon pangoloionta ma tu Ibana sitaonon dohot parjumpanganta tu angka na di balian na gabe sasaran ni panindangionta (jamita Minggu 13.09.2009), ingkon gabe parsombaonta ma tu Debata angka ulaon na tapatupa songon partohonan hita di tonga ni huria (jamita Minggu 20.09.2009), jala ingkon gabe pujipujian dohot hasangapon di goar ni Debata ma saluhut ulaonta di na manghobashon parhobason di tongatonga ni angka pogos (jamita Minggu 27.09.2009). Marhite na songon i, boi ma hita manghirim pasupasu hangoluan dohot hahipason. Amen.

jkt.01.09.2009/mvs

Read More..