12.27.2009

Sylvester

SERMON JAMITA TU PARPUNGUAN UJUNG TAON, 31 DESEMBER 2009
Ps.1038-18

Patujolo

Mangihuthon isina, tarrajum do Ps.103 on tu psalmen pujian (madah), i ma samansam psalmen na patimbulhon Jahowa ala ni habalgaon, hagogoon, hasongkalon, hamuliaon, hasangapon, habadiaon, dohot ala ni asi ni rohaNa na so marnamontok. Angka psalmen sisongon i dipujihon halak Israel do sian sandok roha na las, na mabiar jala na marsomba tu Jahowa na sangap jala na songkal i, naung patupa angka halongangan bahen haluaon ni bangsoNa. Mangihuthon uluna (judul), dipadomu do Ps.103 on tu goar David. Taringot tusi, pamanat ma hatorangan di Sermon Jamita tu Minggu 11 Trinitatis, 23 Agustus 2009. Sarupa tu angka psalmen pujian na asing, dipungka do bindu on dohot joujou tu pamujion di Debata Jahowa (ay.1-2), dung i diuduti ma i dohot alasan ni pamujion i (ay.3-19), jala dipaujung dohot panimpuli na tong marrumang joujou tu pamujion di Debata (ay.20-22).

Hatorangan

Sipujion do Jahowa ai parasiroha jala pardengganbasa do Ibana. Mansai ragam do hata na pinangke ni Bibel manggoari Debata. Deba sian i, Ibana sandiri do na papatarhon; alai na deba, jolma do na mamampesa hombar tu pangalaman haporseaon dohot parsaoranna tu Debata. Dison, digoar do Jahowa i parasiroha jala pardengganbasa. Na marmula do i sian pangungkapon ni Debata sandiri (2 Mus.34:6). Dohot hata na asing, Ibana sandiri do na mengidentifikasikan diriNa songon i jala papatarhonsa tu bangsoNa, dung i gabe ditanda jala dijou bangso i ma Ibana marhite goar i. Paboa parasiroha jala pardengganbasa Ibana: (1) Lambat do Ibana tarrimas, lapatanna ndang mura muruk, sabar jala marpanganju. (2) Parasiroha godang, mandok buas mangalehon angka asiasiNa, ndang holit, jala ndang marpanuhor. (3) Ndang tongtong Ibana manorui, mandok ndang torus manorus mencaci manang bersikap manalahon (pat.Jes.57:16). Dihasogohon do dosa ni bangsoNa jala diuhumi do nasida, alai ndang ro di salelenglelengna. Di toru ni uhumNa pe diramoti do nasida jala dipargogoi, dung i di na jumpang tingkina ditatap do nasida jala dipalua. (4) Ndang gotos (gotap) rohaNa saleleng ni lelengna, ai ndang lomo rohaNa di hamagoan ni agia ise pe (pat.Hes.33:11), jala ala ni i ndang hea Ibana manguhum demi kepentingan manang kepuasan pribadiNya. (5) Ndang dibahen tu jolma na hombar tu angka dosana jala ndang dibaloshon na hombar tu hajahatonna. Aut sura mamalos Debata hombar tu dosa dohot hajahaton ni jolma, nunga tibu mago jala siap jolma i sian tano on, ndang adong be na manahan jongjong di adopanNa. Ala ni i, molo manguhum pe Ibana diantan do uhumNa asa tartaon jolma i. (6) Mansai balga asi ni rohaNa. Songon dao ni langit sian tano, songon i do gogo ni asi ni rohaNa (pat.Ps.57:11). Ndang na hasuhatan agia ise dao ni langit sian tano on. Songon i ma asi ni roha ni Debata ndang na hasuhatan agia ise, jala dipasupasuhon do i tu angka na manghabiari Ibana, i ma angka na porsea jala mardalan di dalanNa. Pardosa do nasida jala pangalaosi. Alai ala umbalga do asi ni roha ni Debata sian rimasNa, dipatujolo do tu nasida pengampunanNa. (7) Dipaholang do angka dosa. Dosa, huaso na na jorbut situtu do i, panegai na radikal. Dihorhon dosa i do panghilalaan marsala di angka na mangulahonsa, panolsolion na paponjot hosa, dohot hatahuton na so mananda jalan keluar. Dohot hata na asing, dosa i sandiri naung gabe uhum do i tu na mangulahonsa, na mangalalai ateate jala mangaropuhi holiholina (pat.Ps.32:3). Alai ala ni asi ni rohaNa dipaholang Debata do dosa i mansai dao, songon dao ni habinsaran sian hasundutan, lapatanna disesa, diampuni gabe ndang tarbahen manginona be tu angka na manghabiari Ibana. (8) Marroha ama. Mansai jotjot do dipatudos Debata di Buku na Badia i tu ama, jala jolma angka anakNa (2 Mus.4:22-23; 1 Kron.17:13; 22:10; Mat.6:9). Songon Ama Ibana, dihaholongi do angka anakNa jala dipatujolo do asi ni roha dohot pengampunanNa (pat.Luk.15:22-24).

Alai boasa songon i Debata mangasii jolma? Ala ditanda do jolma i. Tumangkas do i tahe di Ibana asa di jolma i sandiri, ai Ibana do na manompa dohot na manjadihonsa. Aha do tutu jolma i? (1) Orbuk, ai sian orbuk ibana ditompa (1 Mus.2:7; 3:9); gale, ndang tahan didondoni na dokdok. (2) Duhutduhut (pat.Ps.90:5-6; Jes.40:6-8; 1 Ptr.1:24); mura salpu, rapuh, holan didadang ari malos. (3) Bungabunga. I pe, tong do mangondolhon hagaleon manang kerapuhan ni jolma i. Songon bungabunga i na mangerbang di manogotna, alai botarina malos jala marurus; dung i diombushon alogo gabe so tartanda be ingananna, songon i do jolma i mura salpu, jala dung salpu ndang be haulahan.

Di ginjang ni hagaleon dohot kenisbian ni jolma do anggo asi ni roha ni Debata. Hot do i sian saleleng ni lelengna sahat ro di saleleng ni lelengna; ndang hea mansohot, ndang hea marujung, ndang hea gabe so adong. Laos songon i do nang hatigoranNa, hot do i sian sundut tu sundut. Hatigoran ni Debata, ndada hatigoran na mamaloshon tu ganup halak hombar tu na niulana be (ay.10), hatigoran na mamintori do, na mangarajumi tigor jolma i di adopanNa, hatigoran na mangasii jala na manangkapi hasonangan, haluaon dohot hangoluan (pat.Jer.29:11). Hatigoran na boi haposan do i, jala na boi hirimon. Ala ni i, barani do na porsea i martangiang mangido haluaon na marhitehite hatigoran ni Debata (pat.Ps.31:2). Ndang adong sada ombas di tingki naung salpu na so diasii jala na so dipingkirhon Debata haluaon ni jolma, songon i ndang na laho adong sada ombas pe di tingki na naeng ro na so diasii jala na so disarihon Debata hangoluan ni manisia i. Alai di ise do i patar jala disagihon? I ma di angka na manghabiari Ibana, na mangaradoti padan dohot na mangulahon patikNa. Naung dipaojak Debata do parpadananNa tu Israel. Isi ni parpadanan i mandok: Jahowa gabe Debata ni Israel, jala Israel gabe bangso ni Jahowa (pat.3 Mus.26:12; Jer.7:23; Jer.31:33). Selaku bangsoNa, ingkon radotan ni Israel do parpadananNa i marhite na patupahon tanda ni parpadanan i, i ma patik i. Manang ise na mangaradoti patik ni Debata jala mardalan di dalanNa, na marsomba Ibana di bagasan hapolinon dohot hasintongan, i do na targoar na manghabiari Debata. Di linggom ni asi ni roha na so marnamontok i, hot do na porsea i, ndang tagamon siap sian portibi on.

Sipahusorhusoron

Di borngin on sahat do hita tu ujung ni taon 2009. Pinatudos tu na mardalan, na sahat do hita nuaeng tu sada adian di punsu ni dolok. Sian i boi ma hita manaili tu pudi, tu angka naung tabolus. Tarida ma rupani angka dalan na mura dohot na maol, na hornop dohot na marnangkok tuat, na tigor dohot na marlegotlegot. Na songon tudosan ni pardalanan ni ngolunta ma i, pardalananta marsadasada manang marsasakeluarga, pardalanan ni huria, masyarakat, bangso, dohot negaranta. Na sataon on tabolus do angka tingki na sonang dohot na susa, na tabo dohot na paet, na pahinsahon dohot na pasorathon roha. Ndang sai dos i di sude halak, kualitas dohot kuantitas paasingasing do. Nang pe songon i anggo di sada pangalaho dos do hita sude, i ma rap horas do hita mamolus angka na masa i jala mangolu sahat tu ujung ni taon on. Alai boasa boi masa na songon i? Di dia rahasiana? Molo tauji mangalusi i marojahan tu hajolmaon dohot portibinta, ndang boi so lipe hita disi. Lipe, ai sasintongna orbuk do hita, ndang tahan manaon na dokdok; na gale do hita jala na mura salpu, songon duhutduhut dohot bungabunga di ladang holan didadang ari jala diombus alogo nunga malos jala marurus jala ndang be haulahan. Dung i, mansai godang do hahuranganta, bahat hasalaan, ragam dosa dohot pangalaosionta di na sataon bolon on. Ala ni angka i nian, nunga patut hita mago jala hona uhum; hona uhum di bagasan dohot ala ni panginona ni dosa i sandiri, laos songon i nang ala ni panginona ni rimas ni Debata. Antong, sahali nari, boasa mangolu dope hita sahat tu tingki on?

Marojahan di turpuk di hita borngin on ingkon hatindanghononta do paboa asi ni roha ni Jahowa do na manghorasi jala na pangoluhon hita umbahen na boi hita sahat tu ujung ni taon 2009 on. Parasiroha jala pardengganbasa do Jahowa, lambat tarrimas jala parasiroha godang. Ndang dibahen tu hita hombar tu angka dosanta, jala ndang dibaloshon tu hita hombar tu angka hajahatonta. Disalpui asi ni roha dohot denggan ni basaNa i do hagaleon dohot hadosaonta. Paboa sintong i, disuru do AnakNa na sasada i, Jesus Kristus tu portibi on songon na taingot jala tapestahon di minggu naung salpu. Di bagasan dohot marhite Jesus Kristus i buas do roha ni Debata manesa dosanta ganup ari gabe so manginona be tu hita. Disi do rahasiana umbahen na horas jala mangolu dope hita sahat tu tingki on. Laos asi ni rohaNa i do na manjamin boi hita manalpuhon taon 2009 on laho mamongoti taon na imbaru, 2010 naung talpe di jolonta.

Alai unang sala, asi ni roha ni Debata ndang na muramura, na arga situtu do. Na mangigil tanggungjawab do i sian hita, ai ingkon habiaranta do Ibana sian nasa rohanta jala ingkon radotanta do parpadananNa marhitehite na mangulahon hataNa, tonaNa, patikNa dohot lomo ni rohaNa. Apala i ma na ringkot parrohahononta di tingki on, ai ndang masalpuhu molo nidok naung lam rangkak do jolma na rade patujolohon sikap ni bangso ni Debata di parngoluonna ariari. Lumobi molo lam tu maolna na mangolu, boi do i mangonjarhon halak tu pangalaho na so mabiar be mida Debata, na so paduli di patikNa, di hatigoran dohot di hasintonganNa. Na penting, boha ma asa dapotsa hepeng, jala hagohansa angka na ringkot di hangoluanna siapari. Ndang taboto aha na naeng masa di taon 2010 on. Alai marojahan di na masa di tingki nuaeng, boi do hita memprediksi perkembangan di tingki na ro. Songon na taboto, issu na paling hangat nuaeng di negaranta i ma skandal Bank Century. Taringot tusi adong do na memprediksi, aha pe parbue ni Pansus Century ndang boi so marpanghorhon na negatif i tu perkembangan ni perekonomian ni Indonesia on. Molo talu DPR, ndang adong manang aha parbue ni Pansus, ndang porsea be natorop di DPR. Sabalikna molo talu pamarenta, tardapot nasida na so ias, ndang porsea be angka investor jala gabe sumurut ma nasida sian Indonesia on. Pardalan dohot parbue ni Pansus ndang boi so menghambat pertumbuhan ekonomi di taon 2010 sian na seharusnya 6,5% gabe 5,2–5,5%. Balga do panghorhon ni i tu tingki na ro, ai ninna, gabe kehilangan momentum ma Indonesia on ketika ekonomi dunia kembali pulih. Molo sintong i, ndang boi so marhinorhon i nang tu parngoluonta siapari. Alai tung apala disi do hita tarjou tu ngolu na marhabiaran tu Debata jala na mangaradoti padanNa marhite na mangulahon patikNa jala manghangoluhon hatigoran dohot hasintongan. Di bagasan pangoloion i, pos ma rohanta, ndang adong be na tarbahen manirang hita sian holong ni roha ni Debata na di bagasan dohot na marhite Kristus Jesus Tuhanta i (pat.Turpuk Sijahaon Rom 8:33-39). Dipargogoi Debata ma hita disi.

jk.2.12.2009/mvs
Read More..

12.21.2009

Dung Natal

SERMON JAMITA TU MINGGU DUNG NATAL, 27 DESEMBER 2009
Luk.2:27-35

Patujolo

Tarmasuk tu bagian patujolo ni Evangelium i dope turpuk on mangihuthon Barita na Uli na sinurathon ni si Lukas.
Masa do i di bagas joro tongon di tingki pangiasan ni si Maria dohot panobuson ni Jesus. (Taringot tu pangiasan dohot panobuson, ida Sermon Jamita tu Minggu 10 dung Trinitatis, tanggal 16 Agustus 2009). Di jolo ditaringoti do si Simeon, sahalak na bonar jala na daulat, na maimaima di Mesias na pinarbagabaga i, na niinganan ni Tondi Porbadia. Nunga dipabotohon Tondi Porbadia i tu ibana na so idaonna hamatean so jolo diida Kristus i. Di turpuk on, digohi Debata do na hinirim ni rohana i, pajumpang ibana dohot Kristus i.

Hatorangan

Marhite Tondi Porbadia i dapotan pamotoan na tontu do si Simeon taringot tu tingki dohot sadiharina ro mandapothon Kristus i. Songon sahalak na bonar jala na daulat boi do ganup ari ibana ro tu joro i, alai ndang na laho mangalului manang manjumpangi Kristus na pinarbagabaga i, na laho marsomba do manang beribadah suman tu halak Jahudi na asing angka na bonar jala na daulat roha. Alai anggo na sahali on, tongon di tingki na binoan ni natorasNa Jesus Posoposo i laho mangulahon panobuson hombar tu na nidok ni patik i, hombar tu pandasdas ni Tondi Porbadia i ro do ibana di bagasan sangkap na tontu, i ma na laho marnida Mesias i. Laos Tondi Porbadia i do na patongonhon ibana tu Jesus Posoposo i. Relatif godang do posoposo na binoan ni natorasna be tu joro i ganup ari. Laos songon i do nang di ari i. Ndang so mungkin tahe na adong do sian angka posoposo na asing na rap tarboan tu joro i di na sadari i na tong margoar Jesus. Songon i pe i, ndang ingkon ganup posoposo i pamanatmanaton ni si Simeon, ndang ingkon sude natorasna sungkunsungkunonna, ndang, ai Tondi Porbadia i do manogihon ibana jala patongonhon langkana tu Posoposo na topet, i ma Jesus, Anak ni si Josep dohot si Maria i.

Dung diida, diabing si Simeon ma Posoposo i, jala dipuji ma Debata. Hombar tu hata pamungkaanna digoar do pujipujian ni si Simeon i Nunc dimittas (hata Latin na mandok, paluaonMu ma nuaeng). Mamuji mandok, mangokui dohot manghatindanghon habalgaon ni Debata; marhatopothon hatimbulonNa, hasongkalon, hasangapon dohot hamuliaonNa. Pargogo na so hatudosan do Ibana, parhuaso na sun, na tarpasaut lomo ni rohaNa. Sian mulana dope nunga ditahi Ibana hian patupahon haluaon ni jolma, jala mulakulak do i dibagabagahon tu bangsoNa. Hombar tu huaso dohot hagogoonNa na so halompoan i, tarpasautsa do tahi dohot bagabagaNa i. Di diri ni Jesus, Posoposo na di abinganna i nunga diida si Simeon hasasaut ni tahi dohot bagabaga i, ai Ibana do Kristus i, Mesias na pinarbagabaga i. Nunga didok di jolo, naung dipabotohon Tondi Porbadia i hian do tu si Simeon na so tagamon mate ibana ia so jolo diida Kristus i (ay.26). Nuaeng, ala naung diida Kristus i, ungkap ma kemungkinanna mate setiap saat. Ndang pola dia be rohana taringot tusi, manang sadihari pe ro tingkina, ndang mabiar be ibana, alai nunga rade jala sandok mardame rohana laho mate. Ndang holan ala ni parnidaon i, alai ala na di bagasan dohot marhite Kristus na ro i nunga songgop be tingki haluaon na sian Tuhan i. Tingki haluaon i na manorusi do i tu balik ni hamatean i, tu hangoluan sogot na so marnasuda. Hombar tusi ma didok ibana: “PaluaonMu ma nuaeng ale Raja naposoMon di bagasan dame, songon na nidokMi, ai nunga diida matangku haluaon na sian Ho i.” Pandohan i na dibuat do i sian gombaran ni sahalak naposo naung pasunhon ulaonna, dung i parmisi tu tuanna mandok naung rade ibana mulak laho maradian molo dipaloas. Suman tusi ma si Simeon dison mangido parmisi tu Tuhan i asa dipaloas ibana mate di bagasan dame. (Patudos salinan Indonesia: “Biarkanlah hambaMu ini pergi dalam damai sejahtera.”)

Tingki haluaon i dipatudos do jotjot tu haroan bolon. Disi diparade do sipanganon dohot siinumon na denggan jala na tabo (Jes.25:6). Alai sadenggandengan dohot satabotabo ni sipanganon dohot siinumon, ndang gabe hangoluan i di agia ise pe anggo so dipangan do jala diinum. Dison didok, haluaon na di bagasan dohot na marhite Kristus i diparade do i di jolo ni bangso sudena. Diparade di jolona, mandok ndang otomatis i gabe haluaon di sasude, holan di angka na manjangkonsa do di bagasan haporseaon. Alai di adopan ni bangso dia i diparade? Di hata Gorik didok prosoopon pantoon toon laoon, lapatanna di adopan ni saluhut bangso i (the face of all people). Laoon na marharoroan do i sian hata laos, mandok bangso, rakyat (people). Istilah na khusus do i manggoari bangso na pinillit ni Debata, i ma halak Jahudi. Di adopannasida ma diparade haluaon i (pat.Luk.2:10c). Alai na gabe dihonahon do goar i nang tu halak Kristen, angka na gabe bangso ni Debata ala ni haporseaon di Kristus i. Di nasida pe, dohot ma diparade haluaon i. Taringot tusi tumangkas diondolhon di ay.32, didok: “Bahen panondang sumondangi angka parbegu.” Parbegu (Gr. ethnoon/gentiles) i ma halak na mian di linggom ni haholomon, hadosaon, dohot hamatean. Naung marbagabaga hian do Debata na pabinsaronNa sada panondang di nasida (Jes.9:1-7; Mal.3:20). Nuaeng, di bagasan Kristus i, nunga digohi be bagabaga i. Marhitehite Ibana, gabe patar tu nasida Debata, sahat nasida tu panandaon di hata dohot lomo ni rohaNa, jala parsidohot di sangkap hatuaonNa. Dung jumpang na songon i, gabe hasangapon do i di Israel, ai tutu situtu ma nasida bangso haroroan ni haluaon (Joh.4:22).

Umbege i longang do roha ni si Josep dohot si Maria. Tagan so i, nunga manang na piga hali dibege nasida halongangan taringot tu Anakna i. Na parjolo, di boaboa ni surusuruan taringot tu hatutubuNa (Luk.1:26 duu; Mat.1:18 duu); na paduahon, di hata ni si Elisabet (Luk.1:42 duu), dohot na patoluhon di hata ni parmahan i (Luk.2:15 duu). Tutu situtu, halongangan bolon do na pinatupa dohot na sinangkapan ni Debata di bagasan dohot marhitehite hatutubu ni Anakna i. Ndang haantusan nasida dope saluhutna i. Ala ni i, manang sadihari pe i ditaringoti, tongtong do i gabe halongangan di nasida. Tu tingki na mangihut pe, alamannasida dope ragam ni halongangan taringot tu Anakna i, tarmasuk na songon podang na manorushon roha ni si Maria, inaNa i.

Andorang so disuriranghon i dipasupasu si Simeon do jolo nasida. Dung i didok ma: “Na pinajongjong do on bahen partinggangan dohot parhehean di Israel jala bahen tanda na hona gaga.” Naung dibagabagahon Debata hian do, sian batu na binolonghon ni angka pande bagas jadihonon ni Debata do Kristus i gabe batu parsuhi (Ps.118:22; pat.Ul.4:11; Rom 9:33; 1 Ptr.2:6-7). Batu na binolonghon ni pande bagas i ma batu angka na lobi di pembangunan ni sada jabu. Di na pajongjonghon jabu na asing muse, jotjot batu sisongon i dipangke gabe batu parsuhi. Juruk do batu parsuhi i tu duru, gabe jotjot halak tartuktuk disi laos tinggang. Songon i, torop do halak na tartuktuk manang targasip mida Kristus i. Dibayanghon halak Jahudi do rupani, raja do Mesias i; parhuaso portibi na manaluhon Harajaon Rom jala pajongjonghon Harajaon Jahudi Mesianis na manghamham sandok portibi on. Di na so hombar bayangan i tu diri ni Kristus Jesus i, targasip ma nasida laos dibunu. Alai sabalikna torop do na manjangkon Ibana di bagasan haporseaon. Di angka na porsea i gabe parheheon do Ibana. Gabe tanda na hona gaga (tanda yang menimbulkan perbantahan) Ibana di tonga ni hajolmaon. Di roha ni na deba, sileai Debata do Ibana na mandalani uhumanNa di silang i; alai di na deba sioloi Debata do Ibana na patulushon ulaon panobusionNa di silang i. Humaliang Kristus na pinajongjong di hau pinarsilang i tarbagi dua do hajolmaon: Sabagian na laho malua, na sabagian nari na laho mago. Na marlapatan ma i, maradophon Kristus i ganup halak ingkon do papatarhon pingkiranna be jala mambuat haputusan na manjalo manang na manulak Ibana. Manang aha na jumpang jolma di ujungna ndang simbil i sian haputusan naung binuatna be taringot tu Ibana.

Di na pinajongjong Jesus i di silang i doshon na tinorushon ni podang do roha ni si Maria. Sian Evangelium Johannes tarboto, dohot do ibana hatiha i di Golgata. Ndang tarbahen so mandate panghilalaanna disi paidaida ni Anakna i. Roha hainaonna ndang tagamon so naeng nian paneanghon dohot palambokhon haberniton ni Sinuantunasna i, alai ndang tarbahensa. Ndang haantusansa saluhutna i, ai andul do i marasing sian ‘keagungan’ ni Natal dohot huaso na patar di bagasan dohot marhitehite Ibana saleleng na mangula di tongatonga ni natorop. Di dia nuaeng hamuliaon ni Anakna i na ginoar ni surusuruan i Sipalua, Anak ni Nasuntimbul, Kristus, jala Tuhan? Di dia nuaeng huaso na manggohi Ibana na sai laon? Ingkon songon i do hape ujungna? Halongangan do i, halongangan na padokdokhon jala na maniham rohana.

Sipahusorhusoron

Minggunta on margoar do Minggu dung Ari Hatutubu ni Tuhan Jesus. Ninna roha, torang do di hita sude na sinangkap ni goar i, ai apala na di ari Kamis bodarina i dope tapatupa Parningotan di Hatutubu ni Tuhanta Jesus Kristus manang na somal tagoari Natal, dung i tauduti ma i muse na di ari Jumat dohot Sabtu marhitehite Pesta Parjolo dohot Paduahon. Dung na tasalpuhon na tolu kegiatan i, didok roha, sada tingki na uli do Minggu on di hita laho pahusorhusorhon Evangelium Natal i. Nidok songon i, ai ndang tarparsoada, siangkup ni na pasonanghon, adong do angka na ‘pasorathon’ rohanta di Natal i. ‘Sorat’ do rupani torop sian hita manarihon parabiton, na deba ‘sorat’ manarihon hadiah manang kado Natal, na asing ‘sorat’ paradehon acara manang liturgi Natal, na asing muse ‘sorat’ mamingkirhon perayaan na meriah, na dilengkapi drama, oratorium, sendratari, dohot konsumsi Natal. Ala ni angka i, boi do gabe simbil sian hita sintuhu ni Natal i. Nuaeng, nunga salpu be sudena i. Dungkon ni gabagaba dohot hiasan Natal, ndang adong be pola dohonon na muba sian Minggu na somal. Ala ni i, cukup do alasan mandok naung boi umpungu rohanta mamingkirhon sintuhu ni Natal i, i ma Jesus Kristus na tubu i. Boha do asa pajumpang hita dohot Ibana, jala aha do sidohononta taringot tusi? Marojahan di hata ni Debata na tinurpukhon tu hita di Minggu on, tauji ma jolo pamanathon i.

Na parjolo, taihuthon ma panogihon ni Tondi Porbadia i. Patoranghon hata haporseaonta ponggol patoluhon i didok Reformator Dr.Martin Luther do: “Na diparhatutu rohangku do na so tarbahen ahu porsea di Jesus Kristus Tuhanhu manang mandapothon Ibana ianggo tung sian roharohangku manang sian gogongku sandiri, na dijou Tondi Porbadia i do ahu marhite sian Barita na Uli.” Songon i do na masa tu si Simeon na martaringot di jamita on. Songon sahalak na bonar jala na daulat roha, dijaha jala diguruhon ibana do na tarsurat di Padan na Robi angka na manuriranghon taringot tu Mesias i. Marhite hata i, mangula do Tondi Porbadia i manuanhon panghirimon tu ibana, gabe sandok marsitutu rohana paimaimahon Sipalua i. Dipabotohon Tondi Porbadia i do tu ibana paboa na so idaonna hamatean so jolo pajumpang dohot Kristus i. Laos marhite panogihon ni Tondi Porbadia i ma sahat ibana tu parjumpangan dohot tu panandaon di Kristus i. Disi ndang dibereng ibana be Jesus i songon sada posoposo, alai dijangkon jala dihaporseai do Ibana Raja jala Sipalua. Songon i, holan marhite Tondi Porbadia i do tarbahen sahat hita tu parjumpangan dohot panandaon di Kristus i, tu panghaporseaion dohot panjangkonon di Ibana songon Tuhan jala Rajanta, Sipalua hita (pat.1 Kor.12:3b). Na mangula do Tondi Porbadia i marhite Barita na Uli. Ala ni i, manang ise na naeng porsea di Ibana, ingkon olo do i manangihon Barita na Uli, ai sian na manangihon do ro haporseaon (Rom 10:17). Antong sai ringgas ma rohanta tumangihon dohot mangguruhon Barita na Uli i jala tahalomohon ma nang angka na mamaritahonsa (pat.Turpuk Sijahaon, Jes.52:7-10).

Na paduahon, tapuji ma Debata. Mamuji mandok, mangokui dohot manghatindanghon habalgaon, hatimbulon, hasongkalon, hasangapon dohot hamuliaon ni Debata. Pargogo na so hatudosan do Ibana jala parhuaso na sun. Ala ni i, tarpasautsa do lomo ni rohaNa. Sian mulana dope nunga ditahi Ibana hian paluahon jolma, jala hombar tu hagogoonNa na so hatudosan i tarpasautsa do tahiNa i. Di bagasan Kristus i do dipatulus i. Dohot hata na asing, di haroro ni Kristus tu portibi on nunga songgop be tingki haluaon i jala nunga be rade haluaon di adopan ni saluhut bangso. Tu sangkap i dibahen do Ibana batu parsuhi, gabe partinggangan dohot parheheon; dipajongjong di hau na pinarsilang bahen tanda ni na hona gaga asa patar pingkiran ni ganup jolma. Halongangan do i, alo tu roha, maol antusan dohot jaloon. Ingkon songon i do hape Debata patupahon haluaon ni manisia? Alai taringot tusi pe ingkon pujionta do Debata, ingkon okuhonon jala hatindanghononta do paboa habisuhonNa do i, hapistaranNa. Laos i ma na mangonjar hita laho mambuat haputusan manghaporseai Kristus i, gabe sahat hita tu haluaon. Ro pe hamatean, ndang mabiar be hita, alai mardame ma rohanta ala ni pamotoan na tontu paboa na so mago be hita, alai ingkon sahat do tu hangoluan na salelenglelengna.

jkt.17.12.2009/mvs

Read More..

Natal-2

SERMON JAMITA TU PESTA NATAL – II, 26 DESEMBER 2009
Joh.1:9-14

Patujolo

Di Sermon Jamita tu Borngin Natal, 24 Desember 2009 nunga pinatujolo, na dipungka si Johannes do Evangelium na sinuratna marhite sada patujolo (proloog) na mamungka sian hatongtongon (kekekalan).
Na maralasan do i, ai di na manurathon Evangelium i, nunga rarat hakristenon i tu ruar ni hajahudion, i ma tu masyarakat hellenis na so mangantusi gagasan-gagasan hajahudion. Laho pahombarhon hakristenon i tu alam pikiran ni halak Gorik, diambil alih si Johannes ma konsepsi logos jala diintegrasihon tu hakristenon. Mangihuthon halak Gorik, ia logos (kalam/hata) i ma pingkiran ni Debata. Marhite i do Debata manjadihon dohot mangatur nasa na adong. Sian i torang, hombar do i tu pingkiran ni hajahudion na melatarbelakangi hakristenon na taringot tu hata ni Debata na manjadihon nasa na adong (jaha 1 Mus.1). Marhite i naeng dohonon ni si Johannes ma tu masyarakat hellenis paboa Jesus Kristus i do pingkiran (logos) ni Debata na adong sian mulana, na rap jala na sada dohot Debata naung gabe daging.

Dung dihatindanghon taringot tu Logos i (ay.1-5), tagan so ditorushon, ditaringoti do jolo si Johannes Pandidi (ay.6-8). Sahat tu ombas i, adong do manang piga punguan na metmet humaliang Epesus na manghaporseai na si Johannes Pandidi do Mesias i (pat.Ul.19:3-4). Dihilala si Johannes ma, apala di pamungkaan ni evangeliumna i ringkot do i diluruskan. Sitindangi do si Johannes Pandidi i, patujolo, ndada Kristus manang Logos i.

Hatorangan

“Alai nunga mandok ro uju i tu portibi on panondang na sintong i.” Na manudu tu tingki ni si Johannes Pandidi do i. Di tingki na marjamita jala mandidihon ibana, nunga mandok ro Kristus i. Na nidokna nunga naeng patar, ai sasintongna naung rap hadir do Kristus (na marrupahon daging i) di portibi on dohot si Johannes Pandidi, ai marholang onom bulan do hatutubunasida be. Alai hombar tu hajongjonganna songon patujolo (bentara), parjolo do si Johannes i papatarhon diri. Di Jesus i sandiri, pangulaon ni si Johannes i partanda sian ginjang do i na paboahon na jonok nama tingkiNa papatarhon diri di tongatonga ni natorop. Digoar do Logos i dison panondang (pat.ay.4b-5). Sondang simbol ni hangoluan do i (pat.ay.4a); sabalikna, haholomon perlambang ni hamatean. Di mula ni mulana, di na tartompa langit dohot tano on, holom do sude (1 Mus.1:2a), ndang adong na mangolu. Dung pe dijadihon Debata na tiur i asa boi portibi on menampung na mangolu. Songon i, di gomgoman ni dosa i, di bagasan haholomon do jolma i, di linggoman ni hamatean na marhapatean tu hamatean. Alai di bagasan Kristus i adong do hatiuron na sintong, i ma hatiuron na pangoluhon jala na patongonhon nasa jolma tu dalan hangoluan, Jahudi dohot na so Jahudi.

Taringot tu panondang i didok: “Di portibi on hian do Ibana.” Pinatudos tu hata gorikna na mandok en too kosmoo een, hurang hona do salinan Batak i. Ala ni i, dumenggan do patariparon i songon on: Nunga di portibi on Ibana (He was in the world/Ia telah ada di dalam dunia). Na nidokna disi ndada mamungka sian hatutubu manang kehadiranNa na marrupahon daging i kehadiranNa di portibi on. Tagan so i pe, raphon Debata AmaNa i dohot Tondi Porbadia, nunga hadir Ibana di portibi on, jala suang songon na marhitehite Ibana tartompa langit dohot tano on, laos marhitehite Ibana do haramotan jala taratur pardalan ni nasa na adong. (Hombar tusi, niantusan do molo gabe ditambahon hata ‘hian’ di salinan Batak). Ala ni i nian, nunga patut boi tandaon ni portibi on Ibana. Alai nang pe songon i, ndang jumpang i di portibi on, ai ndang ditanda Ibana.

Di haroroNa na marrumanghon daging i, parjolo do ditopot angka na di Ibana hian, i ma halak Israel. Naung dipillit Debata do nasida gabe bangsoNa, hapunjunganNa (5 Mus.7:6; 14:2) jala parjambaranNa (5 Mus.32:9). Songon bangsoNa, nasida patut parjolo mandai hatiuron dohot hangoluan i, jala sian nasida ma i nian taripar tu saluhut bangso. Alai pada umumna, ndang dijangkon halak Jahudi Ibana. Ndang ditanda jala ndang dihaporseai na Ibana do Kristus i, gabe ditulak do Ibana jala dibunu.

Alai adong do manang piga na manjangkon Ibana di bagasan haporseaon. Na deba tagan di ngoluNa dope, na deba nari dung hamamateNa, lumobi dung haroro ni Tondi Porbadia. Taringot tu na nidok parpudi on ndang holan sian halak Jahudi be, alai nunga dohot sian angka bangso na asing. Tu na porsea i, manang na piga pe i, dilehon do huaso asa gabe angka anak ni Debata nasida. Huaso, lapatanna hak (right, priviledge). Songon anak angka na niainNa, gabe panean do na porsea i di Debata, panean di hasangapon dohot di hamuliaonNa, i ma hangoluan na saleleng ni lelengna.

Taringot tu na gabe porsea dohot na gabe anak i tumangkas dipatorang di ay.13, didok: “I ma angka na so tubu sian mudar, manang sian sangkap ni daging, manang sian sangkap ni baoa, tung sian Debata do.” Di huta Epesus do disurathon Evangelium on marhira taon 100 M. Sian Buku Ulaon ni Apostel tarboto, si Paulus do na umpungka huria Epesus di pardalananna patoluhalihon laho mamaritahon Barita na Uli i (Ul.18:23-21:16). Boi do jujuron, na masa do i marhira taon 53-57 M. Sian i torang, di na disurathon Evangelium on, nunga godang sian ruas ni huria Epesus dohot angka huria donganna satorbang na rap tubu sian penginjilan ni si Paulus na tarrajum tu sundut paduahon ni hakristenon i. Angka sundut na parjolo i marungkil do laho bongot tu hakristenon; ditaon nasida do insakinsak, paraloan, dohot pangaleleon sian parbegu haroroanna hian (pat.Ul.19:23-41), sian Jahudi manang pe sian panggomgomi Rom. Nang pe songon i ndang gabe sumurut nasida ala mansai tangkas do dihilala panjouon ni Debata na tu nasida. Ndang songon i be anggo sundut na paduahon i, ai gabe Kristen pe nasida ala ni partubuna nama. Alai si Johanes mandok dison, angka na manjalo huaso gabe anak ni Debata ndang na tubu sian mudar, lapatanna ndang ala ni partubuna; ndang na sian sangkap ni daging, lapatanna ndang sian ruhut pardagingon; jala ndang na sian sangkap ni baoa, lapatanna ndang ala ni ruhut pangainon na tu sasahalak, alai ala ni pambahen ni Debata na manubuhon paduahalihon do (1 Ptr.1:3); manubuhon sian ginjang (Joh.3:3, 7), sian aek dohot sian Tondi (Joh.3:5), na nananom tu bagasan hamatean ni Jesus Kristus jala pahehehon di bagasan haheheonNa marhitehite pandidion na badia i (Rom 6:3-4), dohot na manjadihonsa gabe na imbaru (2 Kor.5:17). Na marlapatan ma i, haluaon ni jolma i ojak do i di ulaon ni Debata na paubahon jala na paimbaruhon. Ndang adong agia ise na boi ro mandapothon dohot manghaporseai Kristus sian roha dohot sian gogona sandiri, ingkon na tinogu ni Ama i do (pat.Joh.6:44a). Alai panoguon dohot haporseoan i ndang diulahon jala dipatubu Debata i di ruar ni kemauan ni sasahalak. Ndang dipaksa Ibana agia ise pe asa porsea. Ala ni i, molo gabe so sahat pe sasahalak tu haporseaon dohot tu haluaon i tanggungjawabna sandiri do i.

Taringot tu haroro ni Logos i tu portibi on didok: “Gabe daging ma Hata i.” Gabe daging, mandok berinkarnasi (ro sian hata Latin carnis, lapatanna daging), gabe jolma. Ndang di bagasan halilu (tubuh maya), alai tutu situtu do di bagasan daging (Gr. sarx/flesh/sibuk), i ma hadirion alamiah ni jolma (human nature) na boi idaon dohot jamaon. Di bagasan kehadiranNa na gabe daging i, maringan do Logos i di tongatonga ni hajolmaon. Gabe sada sian jolma Ibana, i ma jolma Jesus na sian Nasaret; na rap mangan dohot minum raphon angka siseanNa, na mardomu jala marsaor raphon angka dongan satingkiNa (pat.1 Joh.1:1). Nang pe songon i, ndang gabe mago hasangaponNa songon Anak sasada ni Debata, ndang, alai hot do. Na marlapatan ma i, di bagasan Ibana mardomu jala marsada do hadebataon dohot hajolmaon, ai Debata situtu do Ibana, alai huhut jolma situtu. Hombar tusi ma didok Evangelis Johannes dison: “Huida hami ma hasangaponNa, i ma hasangapon ni Anak sasada na sian Ama i.” Somalna, mansai mabiar do jolma marnida hasangapon ni Debata (pat.Luk.2:9), ai na masongkalhu do i tu hadirionna na gok dosa i. Alai hasangapon ni Anak sasada i na gok asi ni roha dohot hasintongan do i, na paluahon jala pangoluhon. Ala ni i na tarjangkon jolma do i di bagasan las dohot sonang ni roha.

Sipahusorhusoron

Padua ari on ma hita na marpesta marningot dohot manghalashon hatutubu ni Tuhanta Jesus Kristus Sipalua i. Di pestanta nantoari, ditogihon do hita tu Betlehem marnida sada Posoposo na sorang di bara, na binorhos jala na pineakhon di panggagatan, na pogos jala na lea. Alai lobi sian na tarida i do Ibana, ai Sipalua do Ibana, Kristus, jala Tuhan i. Laos songon i do nang di pestanta ari on, disosoi do hita manaili dao tu pudi, tu hatongtongon. Na sian hatongtongon do Kristus i, na saor tu Debata, jala Debata, na so marmula jala na so marujung. Marhitehite Ibana do Debata manompa langit dohot tano dohot nasa isina, marhitehite Ibana do diramoti jala diatur nasa na adong, jala laos marhitehite Ibana do dipatupa haluaon ni hajolmaon. Hombar tusi, di ujung ni angka ari, gabe daging do Ibana, gabe jolma jala maringan di tongatonga ni hita on. Na suksuk do asi ni roha di haroroNa i, ai marhite haporseaon di Ibana dipatiur do hajolmaon jala dibasabasahon huaso asa gabe angka anak ni Debata nasida. Apala i ma na dihatindanghon tu hita di Natal on. Di bagasan Kristus naung gabe jolma i gabe tiur do hita jala gabe angka anak ni Debata hita. Alai boha ma hita manghangoluhon i?

Na parjolo, mardalani ma hita di bagasan sondang hatiuronNa i. Di partongaan parjolo ni abad paduapuluhon, masa do resesi ekonomi di sandok portibi on na ginoar malaise. Mansai dokdok do panghorhon ni na masa i. Ndang adong nanggo sada bangso pe na so dohot mangae pangontakna. Di tingki i, adong ma sada surat kabar na mambahen karikatur na manggombarhon sada halak na mardalan di haholomon ni borngin. Ditiop do sada lentera na galak. Alai asing, ndang tu jolo dibahen sinondangna, tu lambung do. Ala ni i, sai tongtong do ibana di hagolapon; dadapdadap jala rabatrat songon sahalak na mapitung. Di toruna disurathon do sada sungkunsungkun na mandok: “So nda tung na mardalan do hita on di toru ni sinondang na sala?” Sungkunsungkun na mansai ringkot do i parungkilhononta di tingki on dohot di inganan on, so nda tung na mardalan do hita tutu di toru ni sinondang na sala, isara di sinondang ni materialisme dohot konsumerisme, sinondang ni hariburon dohot halilian ni portibi on, manang sinondang ni hasangapon dohot hamuliaon tano on? Tuhanta Jesus Kristus naung gabe jolma i do panondang na sintong, panondang na patiurhon jala na pangoluhon hita. Molo taihuthon Ibana, tung na so tupa do hita mardalan di na holom, alai sai na di hita do tahe panondang hangoluan i (pat.Joh.8:12). Ala ni i, sahali nari, mardalani ma hita di bagasan sondang hatiuronNa i (pat.Turpuk Sijahaon 1 Joh.2:7-10).

Na paduahon, marpangalaho ma hita hombar tu pangalaho ni angka anak ni Debata. Di sada tingki, rarat do sada aliran ni hakristenon na lobi pangondolhonna di haanahon ni Debata di jolma di sada huta. Ganup ma pangisi ni huta i mengidentifikasikan diri selaku anak dohot boru ni Debata. Tung na tarlobi do tahe pambahennasida taringot tusi, ai dipansurathon be do goarna di pintu manang dorpi jolojolo ni jabuna jala dipaihut ma tusi pandohan anak manang boru ni Debata. Rupani: “Ompu Dogom Doli, Anak ni Debata,” jala di toruna “Ompu Dogom Boru, Boru ni Debata.” Sandok marsiadu do nasida papatarhon i, aha pe taho, set, hapur, baja, manang agong dipangke ma manurathon i. Alai boha do harohaon dohot pangalahonasida ariari? Ndang adong na muba. Toropan na losok hian do ama di huta i, angka na lomoan rohana hundulhundul di angka lapo tuak, minumminum manang marjuji. Angka ina pe songon i, lomoan do rohana hundulhundul di alaman, masihutuhutuan huhut pahatahata dongan. Nuaeng pe tong do songonsongon i. Tamba tahe roana, ai gabe madabu do nasida tu ginjang ni roha partondion. Molo adong na manihai nasida taringot tu bangkona i, isara na mandok: “Na boha do hamu, hatamu sai mandok na anak dohot boru ni Debata hamu, hape pangalahomuna tung so adong do idaon hadomuanna tu goarmuna,” mansai mura do nasida bingkas sahat tu na martinju manang masijanggolaan. Haanahon ni Debata ndada sitengahonon i, sihangoluhonon do. Antong, songon angka naung manjalo huaso gabe angka anak ni Debata, tahangoluhon ma pangalaho ni angka anak ni Debata, masihaholongan ma hita sama hita (pat.Turpuk Sijahaon 1 Joh.2:7-10).

jkt.09.12.09/mvs

Read More..

Natal-1

SERMON JAM ITA TU PESTA NATAL - I, 25 DESEMBER 2009
Luk.2:15-20

Patujolo

Tarmasuk tu bagian patujolo ni Evangelium i tong turpuk on (Ida Sermon Jamita Borngin Natal, 24.12.2009).

Di jolo (2:1-7) dipaboa na tubu do Kristus i di tingki dohot di inganan na tontu di sejarah ni portibi on, i ma di tingki ni Kesar Agustus dohot di huta ni si Daud. Ihut tusi (2:8-14), di boaboa ni surusuruan na tu angka parmahan i, dipatorang ma lapatan ni na masa i. Ise do na tubu i, jala aha ma lapatan ni hatutubuNa i di hajolmaon. Sipalua do Ibana, Kristus, Tuhan na ro tu tano on asa mardame jolma tu Debata jala marsangap Ibana di tongatonga ni hajolmaon. Samar-samar, disosoi surusuruan i do angka parmahan i asa laho mandapothon Sipalua i, jala dilehon ma partinandaan ni sidapothononnasida (2:12). Dioloi angka parmahan i do i, jala i ma na masa di turpuk on.

Hatorangan

Disi salpu angka surusuruan i sian parmahan i, masipandohan ma nasida: “Beta ma hita tu Betlehem.” Di jolo (2:11) didok surusuruan i, naung tubu do Kristus Tuhan i di huta ni si Daud. Ndang apala torang manang na sadia dao jala sadia bidang do panggoarion ni Betlehem songon huta ni si Daud diantusi natorop, ai anggo na somal Jerusalem do na targoar huta ni si Daud, ai ibana do na pajongjonghon i bahen sabungan ni Israel. Alai na pasti, diantusi angka parmahan i do paboa Betlehem do na nidok ni sururuan i, jala tusi ma nasida naeng laho. Porsea situtu do nasida di boaboa ni surusuruan i jala dijalo nasida do i songon boaboa na sian Tuhan i. Ndang ganggu rohanasida agia otik taringot tusi, ai ndang martahi borhat nasida tusi laho mamastihon manang na sintong do barita i manang ndang. Ndang dirajumi nasida be i tahe songon sada barita sambing, alai sada peristiwa na nalnal tarjadi do, na boi ditanggapi secara inderawi. Hombar tusi ma didok: “Taida ma na masa on, na pinabotohon ni Tuhan i tu hita.”

“Jadi hatop ma nasida laho tusi.” Ndang dipagele nasida be langkana, ndang marpaima nanggo apala tu torang ni ari, alai laos di tingki i. Ndang diparsoalhon nasida be dorbiana. Adong do nian marana molo ditadinghon nasida i songon i di borngin i, isara panangko na mangalai manang antuasu na manoroi. Mangihuthon uhum ni parmahanion, molo moru bilangan ni na dorbia i, ingkon gararon ni parmahan i do i. Alai molo boi ibana mangalehon bukti na disoro binatang do i manang na ditangko panangko, ndang pola. Ndang pargaji na balga angka parmahan. Ala ni i, nunga borat di nasida manggarar na mago. Alai dison, ndang diparsoalhon nasida be i, bulus do nasida laho, jala hombar tu partinandaan naung nilehon ni surusuruan i, jumpang nasida ma si Maria dohot si Josep dohot Posoposo i na peak di panggagatan. Ra, songon parroha sian purba na tinogutogu ni Debata marhitehite bintang (pat.Mat.2:2, 9-10), adong do tong panogunogu na homi tu angka parmahan i, gabe ndang pola ingkon ganup bara na adong di Betlehem dadapan nasida borngin i paima sahat tu panggagatan hapeahan ni Posoposo i.

Dung diida, gabe evangelis manang parbarita na uli do angka parmahan i, parjamita na parjolo taringot tu Kristus na tubu i. Sintuhu ni jamitanasida ndada na niidanasida, alai na binegenasida do. Posoposo do anggo na niidanasida, anak ni si Josep dohot si Maria, ripe na pogos na sian Nasaret; na sorang di bara, na binorhos jala na peak di panggagatan. Ndang adong haulion manang hasurunganNa, ndang marsinondang manang marmulia. Molo holan i do dibaritahon, ndang pola gabe barita i na boi mambahen halak paelenghon pinggolna laho manangihonsa. Alai na gabe sada barita na luar biasa do i ala ni hata na binegenasida naung hinatahon ni surusuruan i tu nasida taringot tu Dakdanak i; barita na mamaksa ganup halak mambuat haputusan manghaporseai manang na so manghaporseai. Dohot hata na asing, hata na binegenasida i do na mangalehon makna tu na niidanasida. Hombar tu na binegenasida i, Sipalua do Posoposo i, Kristus (Mesias), jala Tuhan (2:11). Laos i ma nuaeng dijamitahon nasida. Maol do i nian jaloon ni na umbegesa, ai boha ma boi goaron Posoposo na metmet i Sipalua, Kristus, jala Tuhan? Alai ndang diparsoalhon nasida be i, ai porsea situtu do nasida disi, gabe dihatindanghon. Angkup ni i, parmahan sasintongna ndada parhata siat i di masyarakat. Tarihot do ngolu dohot tingkinasida tu dorbiana, gabe ndang boi manggohi na niaturhon ni patik i. Di ari Sabbat pe rupani, tong do nasida di parmahanan. Di pelapisan ni masyarakat, tarrajum tu horong na tumoru do nasida, horong ni angka na pogos jala pardosa. Ala ni i, ndang boi nasida gabe sitindangi di paruhuman. I pe, ndang diparsoalhon nasida be i. Boha pe pandok ni natorop taringot tu nasida, sitangihonon manang na so sitangihonon, anggo na binegenasida i ingkon do dihatindanghon.

Sude na umbegesa longang be do. Ise i? Parjolo, si Josep dohot si Maria, dung i pangisi ni Betlehem (tarmasuk angka na mulak sian pangarantoan ala ni pamilangion i) angka na pajumpang dohot nasida. Angka na nidok parpudi i sintap ni na longang do. Ndang gabe porsea nasida jala ndang gabe dohot laho marnida na masa i. Na marlapatan ma i, ndang dohot nasida manjalo uli sian na masa i. Ditulak nasida do tahe Sipalua na tubu i. Alai si Maria, angkup ni na longang, dipeop do hata i sudena jala dipahusorhusor di bagasan rohana. Di na ro Suruan Gabariel pabotohon hatutubu ni Jesus i didok do paboa Anak ni Nasuntimbul do situbuhonona i, Anak ni Debata (Ida Sermon Jamita tu Borngin Natal, 24.12.2009). Dung i, di parjumpanganna dohot si Elisabet, digoar si Elisabet i do ibana ina ni Tuhan i (Luk.1:43). Alai di hatutubuNa i, ndang adong na luar biasa. Ndang adong keadaan na berkelimpahan, ndang adong hamuliaon dohot hasangapon; alai biasa-biasa do, di bagasan hapogoson, sorang di bara, jala peak di panggagatan. So nda tung gabe patubu sungkunsungkun do i di bagasan rohana taringot tu hasintongan ni boaboa ni surusuruan dohot hata ni si Elisabet i? Alai marhite na umbege na nidok ni angka parmahan i, marhite na umpeop, dohot na pahusorhusorhon jala padomuhonsa tu hata ni si Gabariel dohot si Elisabet i, manang na boha pe ndang boi so gabe togu rohana paboa na sintong do saluhutna i.

Dung i mulak ma angka parmahan i tu ladang Eprata. Ndang boi nasida tinggal torus di Betlehem, ingkon mulak do tu ulaonna hian. Ndang gabe diuba na masa i status manang hajongjongannasida, hot do nasida parmahan, na pogos jala na tarrajum tu kalas partoru ni masyarakat. Nang pe songon i nunga adong na muba di hajolmaon parbagasannasida. Nunga digohi pengaruh ni na masa i rohanasida, pengaruh ni haluaon na sian ginjang, sian Debata. Hombar tusi, nunga laos muba cara pandangnasida taringot tu ngolu, muba dohot carana manghangoluhonsa. Ndang di bagasan hapaeton be, alai nunga di bagasan halalas ni roha na mamuji jala na pasangaphon Debata. Di bagasan halalas ni roha nasida mangulahon ulaonna siapari, di bagasan pamujion di Debata mangadopi indukna na burju manang na jungking, di bagasan na pasangap Debata nang di na ingkon manggarar dando ala ni dorbiana na mago. Sandok na binegenasida taringot tu Jesus na tubu i, i nama na manggohi jala na mewarnai ngolunasida ariari.

Sipahusorhusoron

Di ari on sahat do hita tu mata ni Pesta Parningotan di Hatutubu ni Tuhanta Jesus Kristus manang Pesta Natal di taon on. Di pestanta na bodari, dibaritahon do tu hita manang na aha do sasintongna lapatan ni Natal i, na gabe alasanta marningot dohot mamestahonsa. Sahali nari, na parjolo, Natal mandok, Jesus Kristus tubu; sipalua do Ibana, sipalua sian dosa dohot sian sandok pangonaina; na paduahon, Natal mandok, Anak ni Nasuntimbul ro jala mian di tongatonga ni hita on, gabe Immanuel, lapatanna donganta ma Debata; jala na patoluhon, Natal mandok, Raja na salelenglelengna mamungka panggomgomionNa di tongatonga ni hajolmaon laho patongonhon langkanta tu dalan hadameon. Na suksuk do asiasi dohot pasupasu na diparade di hita disi. Ala ni i, patut do i pestahononta. Alai pesta na songon dia do sipatupaonta marningot jala manghalashon i? Angka pangalaho dia ma na patut jumpang di Pesta Natal na tapatupa? Marojahan di turpuk jamita ari on, tauji ma jolo pamanathon i.

Natal ingkon gabe sarana parjumpangan do dohot Jesus Kristus i. Porsea di boaboa na pinabotohon ni Tuhan i marhitehite surusuruan i, borhat do angka parmahan i sian Eprata tu Betlehem. Ndang dipagele nasida langkana, ndang marpaima nanggo sahat tu torang ni ari, alai laos di tingki i; ndang disorati rohana marhite panarihon di pinahan dohot angka na boi masa borngin i, alai bulus do nasida borhat, gabe jumpangsa ma si Maria dohot si Josep dohot Posoposo i na peak di panggagatan. Songon i, di bagasan dohot marhitehite Pesta Natal angka na tapatupa manang na tadohoti naeng pajumpang do hita dohot Jesus Kristus i. Tu sangkap i ingkon olo do hita borhat sian hangoluan manang hajongjonganta be. Ndada pinaborhat ni giot ni roha marnida hariburon manang halilian, hiburan manang entertainmen na somal masa di angka pesta; ndada pinaborhat ni giot ni roha tu angka parsaulian tano on, isara konsumsi manang hadiah natal, bingkisan natal manang lucky draw, alai ingkon na pinaborhat ni hata ni Debata do; pinaborhat ni haporseaon dohot parsitutuon ni roha. Tatadinghon ma sude na pasorathon, tadapothon Ibana di bagasan habuluson dohot haungkapon, asa saor Ibana tu hita jala saor hita tu Ibana. Tapamanat ma dirinta, dung na tapestahon Natal nunga pajumpang hita dohot Jesus Kristus Tuhanta i?

Natal ingkon gabe sarana panindangion do di Jesus Kristus i. Dung pajumpang dohot Jesus, gabe parbarita na uli do angka parmahan i, ai dibaritahon nasida ma boaboa naung dihatahon tu nasida taringot tu Dakdanak i. Songon i, Pesta Natal na tapatupa manang na tadohoti ingkon gabe panindangion do i Tuhanta Jesus Kristus naung ro i. Tu sangkap i ingkon na parjolo do hita hohom manangihon boaboa na sian ginjang angka na taringot tu Ibana, mameop jala pahusorhusorhon. So jolo manangihon jala manjalo hata ni Debata, ndang adong sihatindanghononta. Boaboa na sian surgo i mandok, Sipalua do Ibana na tubu i, Kristus jala Tuhan; Panurirang na pinatindang ni Jahowa (5 Mus.18:15). Laos i ma sihatindanghononta. Nang pe metmet jala pogos, nang pe sorang di bara jala peak di panggagatan, Ibana do Sipalua portibi on, Kristus jala Tuhan, sigomgom nasa na adong; hata ni Debata naung gabe daging jala maringan di tongatonga ni hita on (Joh.1:14) na tama tangihonon. Marhite panindangionta i, manang ise pe na ro jala na dohot di pesta i naeng ma tangkas manghilala paboa na sintong do naung ro Kristus i tu portibi on, jala tangkas ditantang laho mambuat haputusan taringot tu Ibana, manghaporseai manang so manghaporseai. Tapamanat ma nuaeng, sadia dao do pestanta ari on gabe panindangion di Tuhanta Jesus Kristus naung tubu i?

Natal ingkon gabe sarana pemberdayaan do laho mangolu di bagasan Kristus. Ndang boi parmahan i tinggal torus di Betlehem, ingkon mulak do nasida tu ulaonna siapari. Ndang dipauba na masa i hajongjongannasida, hot do nasida parmahan. Alai dipauba na masa i do hajolmaonnasida gabe na imbaru, gabe lam margogo manghangoluhon ngolunasida; di bagasan pamujion dohot na pasangaphon Debata ala ni saluhut asi ni rohaNa. Songon i, ndang tarbahen hita torus marpesta Natal, torus marlas ni roha humaliang gabagaba, torus manutung lilin manang pagalak lampu Natal, alai ingkon mulak do hita tu hangoluanta be, tu ulaon manang tu panghobasionta be. Alai disi, ingkon muba do hajolmaonta gabe na imbaru, i ma hangoluan na di bagasan semangat natal; na lam margogo, lam ringgas, jala na lam marsitutu patupahon angka na denggan bahen pujipujian dohot hasangapon ni Debata. Tapamanat ma nuaeng, sadia godang do hita dapotan gogo sian pestanta ari on? Manang tagamon adong dope sian hita na sai tong didondoni hoihoi dohot orongorong marningot utangna rupani, arga ni pahean na imbaru jala na uli na pinangkena di ari on na ingkon gararonna dope? Tapeakhon ma saluhutna i tu toru ni pat ni Kristus i asa tarbahen hita mulak sian pesta on di bagasan las ni roha dohot dirgak ni bohi.

jkt.24.11.2009/mvs

Read More..

Borngin Natal

SERMON JAMITA PARNINGOTAN BORNGIN NATAL, 24 DESEMBER 2009
Luk.1:26-33

Patujolo

Paasingasing do cara ni evangelis na opat i mamungka Evangelium i.
Si Markus, jalo do masuk tu barita pangulaon ni si Johanes dohot Tuhan Jesus; si Mateus, dipungka do jolo marhitehite sada patujolo, i ma tarombo ni Tuhan Jesus (mamungka sian si Daud) dohot hatutubuNa; si Lukas pe dipungka do Barita na Uli i marhite sada patujolo na ganjang, i ma barita hatutubu ni si Johanes, hatutubu ni Jesus dohot taromboNa (mamungka sian si Adam); jala si Johanes dipungka do i mansai dao sian hatongtongon (kekekalan). Turpuk on, sabagian sian patujolo i do, i ma boaboa taringot tu hatutubu ni Jesus. Taringot tusi, marasing do sumber na pinangke ni si Lukas sian si Mateus. Mangihuthon si Lukas, naung marhuta hian do si Josep dohot si Maria di Nasaret andorang so tubu dope Jesus; alai mangihuthon si Mateus, dung mulak sian Misir pe asa laho nasida tusi (Mat.2:22).

Hatorangan

Onom bulan dung boaboa na taringot tu hatutubu ni si Johanes, disuru Debata ma muse si Gabariel tu huta Nasaret. Mangihuthon hajahudion, Gabariel i ma sada suruan na jonok tu habangsa ni Debata, na disuru mangulahon angka ulaon na khusus (pat.Dan.8:16; 9:21). Nasaret, sada huta na metmet do i di Galilea, di pastima ni Kapernaum, donok tu Kana. Marhapeahan do i sabagian di rura na hornop, sabagian di dolokdolok (pat.Luk.4:29). Ditopot suruan i do sada anak boru na margoar Maria. Ndang torang boru aha si Maria i. Mangihuthon Luk.1:36 na marsisolhot dope ibana tu si Elisabet. Alai manang na sian dia parsisolhotonnasida i ndang apala torang. Boi do i sian si Sakarias (marga Levi), boi do i sian si Elisabet (tong marga/boru Levi/Aron, Luk.1:5), jala boi sian inanasida. (Rupani, marpariban ina ni si Maria tu ina ni si Sakarias, manang tu ina ni si Elisabet). Adong do kemungkinan na boru Levi do ibana. Torang do didok, anak boru (Gr. parthenon/virgin/perawan) dope si Maria i (pat.ay.34). Naung maroroan do ibana tu si Josep marga Juda, na sian pomparan ni si Daud. Paroroanon dipatupa do i sampulu ro di sampuludua bulan andorang so ari parsaripeon. Naung maroroan songon i, secara hukum nunga tarrajum i suami isteri, alai ndang dope sajabu jala masipadonohan. Di Mat.1:19 rupani digoar do si Josep i ho aneer autees (her husband/suaminya).

Didok surusuruan i: “Tabi di ho!” Tabi (Gr. Chaire/Hail/Bersukacitalah). Tabe ni halak Gorik do i, na so apala somal di halak Jahudi. Dos do nian anggo sangkapna tu syalom, ai na boi patariparon do i dohot dame ma di ho (salam manang sejahtera bagimu/peace be with you). Digoari surusuruan i do si Maria i na niasian (Gr. kecharitoomenee/highly favored/yang dikaruniai) mandok, na niasian marhite halalas ni roha, hadameon, dohot haluaon (yang dikaruniai sukacita, damai sejahtera dan keselamatan). Taringot asiasi na tu ibana i, tangkasna dipaboa di ay.31. Ihut tusi, ditutup surusuruan i ma tabena i, didok “Didongani Tuhan i ma ho!” (pat.Pangh.6:12).

Umbege i tarsonggot do si Maria. Tarsonggot situtu, ai na so ditagam rohana do i. Mansai tompu, mansai timbo, mansai songkal, ndang hadodoan. Gabe sandok longang ma rohana jala sungkunsungkun mandok: “Parsantabian dia do i ulaning?” Ndang dapot rohana dope lapatan ni tabe i, ndang haantusansa molo digoari ibana na niasian. Angkup ni i mabiar do ibana, ai pajumpang ibana dohot pardisurgo. Suang songon saluhut jolma, pardosa do ibana. Manang di dia jala sadihari pe pajumpang jolma pardosa dohot pardisurgo, sai gok biar dohot hatahutan do jolma i (pat.ay.12; 2:9), ai sai songon na adong hadokdohon na mandondoni, i ma ‘hadokdohon’ ni habadiaon dohot hasongkalon ni Debata na patut nian pasudahon pardosa. Ndang denggan pardomuan ni halak na mabiar. Ala ni i, biar i do na parjolo diambolonghon suruan i (pat.ay.13; 2:10), didok: “Unang ho mabiar, ale Maria, ai dapotan asi ni roha do ho di Debata.” Na marhahonaan do i tu tabe na di ay.28 i. Haroro ni suruan i ndang na laho manudahon, na pabotohon asi ni roha ni Debata na tu ibana do.

Di ay.31 dipaboa ma sintuhu ni asi ni roha na tu si Maria i, didok: “Gabegabean ma ho, tubuan anak ma ho, Jesus ma bahenonmu goarNa.” Asi ni roha na sumurung ma i tutu, ai di ruhut ni hajolmaon ndang adong hasurungan ni si Maria i. Jolma na somal do ibana, anak boru parhutahuta (gadis desa) na pogos sian Nasaret. Alai sian asi ni roha ni Debata gabe na sumurung do ibana di tongatonga ni angka ina (pat.ay.42), ai gabe ina ni Messias na pinarbagabaga i ibana. Marhite ibana saut jala gok bagabaga na di Padan na Robi na taringot tu Immanuel i (Jes.7:14; pat.Mat.1:23). Ditonai surusuruan i do ibana mambahen Jesus gabe goar ni Anak situbuhononna i. [Tu si Josep pe ditonahon do i marhite nipi (Mat.1:21)]. Jesus, bentuk Gorik ni goar Josua (Jesua, Jehosyua manang Jehosyuang) do i, sada goar Jahudi na marlapatan, Jahowa do haluaon. Goar na somal do i di Israel na manggombarhon sintasinta ni na manggoari manang na manjujung goar i sandiri asa anggiat Debata na paluahon. Alai dison, ndang sintasinta be i, ai tutu situtu do Jesus i haluaon. Ndang jolma na pajujunghon goar i tu Ibana, ndang si Josep manang si Maria, Debata do. Na marlapatan ma i, Ibana do Sipalua na tinontuhon ni Debata.

Taringot tu Jesus i didok suruan i dope: “Balga ma Ibana muse, goaron do Ibana Anak ni Nasuntimbul i.” Na nidokna disi, patar ma Ibana muse Anak ni Nasuntimbul i, Anak ni Debata (pat.ay.35). Di hatutubu dohot di hametmetonNa ndang tarida i, alai di na dapot tingkina patar ma paboa Ibana do na sumangap jala na umpistar, na manghuasoi nasa na di tano dohot banua ginjang. Didok muse “Lehonon ni Debata do tu Ibana habangsa ni si Daud, amaNa i.” Di ruhut hajolmaon, pinompar ni si Daud do Jesus i. Na marlapatan do i panean do Ibana di marga dohot di habangsa manang harajaon ni si Daud. Di bagasan Ibana gohan ni Debata ma bagabaga angka na so digohi dope di tingki dohot di dinasti ni Raja Daud (pat.1 Raj.2:4; 8:25; 9:5; 2 Kron.6:16), jala marhite i laos hagohan ma nang tahiNa na sian mulana di na pinillit jala jinouNa Israel jala dijadihon gabe bangsoNa, asa marhite nasida dapotan pasupasu jala gabe sada saluhut bangso na di tano on, i ma Israel na imbaru. Hombar tusi ma didok: “RajaanNa do pomparan ni si Jakob salelenglelengna, jala ndang marhaujungan harajaonNa i.”

Sipahusorhusoron

Raphon donganta sahaporseaon di liat portibi on, di borngin on taingot jala tapestahon do Natal. Natal mandok, Jesus Kristus tubu. Alai aha ma lapatan ni i di hita na mamestahon Natal i di borngin on? Natal mandok, Anak ni Nasuntimbul i ro tu portibi on. Alai aha ma lapatan ni i di hita angka na mangolu di tingki on dohot di inganan on? Natal mandok, Raja na salelenglelengna mamungka pangarajaionNa di tongatonga ni hajolmaon. Alai aha ma lapatan ni i di hita angka na marungkil dope di tano on?

Tapestahon do Natal, ai sipalua do Kristus na tubu i; sipalua sian dosa (Mat.1:21b) dohot sian sandok pangonaina. Sasadasa do sipalua, na pinillit jala na tinontuhon ni Debata, na tinongosNa tu portibi on. Sipalua na asing ndang adong (Ul.4:12). Manang ise na naeng malua, malua ma di bagasan dohot marhite Ibana. Sipalua ganup tingki do Ibana; sipalua naung paluahon, sedang paluahon, jala na laho paluahon tu haluaon na salelenglelengna. Molo i tatiop ndang boi so marlas ni roha jala marolopolop hita di borngin on marningot haroroNa tu hasiangan on. Nunga salpu be tingki ni rimas, nunga songgop tingki ni asi ni roha dohot apulapul (Jes.6:1). Laos i ma sihangoluhononta di borngin on, marsogot dohot haduan, naeng marpesta hita di bagasan pangalaho ni angka naung malua. Pesta haluaon do na tapestahon. Ala ni i unang ma gabe sorat hita binahen ni sipanganon, siinumon, parabiton dohot angka na asing na suman tusi. Taingot ma, ndada sipanganon manang siinumon harajaon ni Debata; hatigoran do dohot hadameon dohot las ni roha di bagasan Tondi Parbadia (Rom 14:17).

Tapestahon do Natal, ai Anak ni Nasuntimbul i do Kristus na tubu i, Anak ni Debata. Di bagasan Ibana, Debata sandiri ro jala maringan di tongatonga ni hita on (Joh.1:14), gabe Immanuel, na mandok: Donganta ma Debata (Jes.7:14; Mat.1:23). Na gabe sipapos jala sipahinsa roha ma i di hita di na mandalani ngolunta di tingki on dohot di inganan on ala taboto ndang sendirian hita disi. Pinarhatopot do, lam maol do na mangolu di hita di Indonesia on di tingki on, jala disura roha ndang na gabe numeang i di ombas na jonok on. Sabalikna do tahe, na boi lam tu dokdokna dope i hombar tu parhusoran na masa di sandok portibi on. Rupani, hombar tu arga ni miak di pasar global na cenderung manaek, adong do na memprediksikan, di taon 2010 on ndang boi so manaek arga ni BBM. Molo toho i ndang boi so marhinorhon tu hananaek ni arga ni situhoron, gabe lam tu maolna ma na mangolu i. Alai mardonganhon Debata tarhamonanghon hita do saluhutna i, ai molo Debata donganta, ise ma alonta? (Rom 8:31b). I pe naeng ma tarida di ngolunta di Natal on dohot tu joloan on. Ala ni Natal on, naeng lam pos ma rohanta mangolu, naeng lam hinsa jala lam ringgas rohanta laho mangulahon angka ulaonta, jala lam margogo di bagasan Tuhan i.

Tapestahon do Natal, ai Raja na salelenglelengna do na tubu i, Sipartahi Halongangan, Siulubalang ni Debata, Ama saleleng ni lelengna, Raja ni Hadameon (Jes.9:5b). Na mamarenta do Ibana di bagasan Tondi ni Jahowa, tondi ni habisuhon dohot hapistaran, tondi ni panuturion dohot hagogoon, tondi ni parbinotoan dohot biar maradophon Jahowa (Jes.11:2), pahothon hatigoran dohot hasintongan. Di haroroNa i tu hasiangan on, nunga dipungka panggomgomionNa i di tongagatonga ni hajolmaon, jala sipasingkoponNa ma i muse di ari sogot di tingki na so marnasuda. Dipasahat jala dipaian hita di ngolu na marpanghirimon, dipatongon langkanta tu dalan hadameon. I pe naeng hangoluhononta do di Natal on dohot di angka tingki na mangihut. Ala ni Natal on naeng lam hehe ma rohanta pahothon hatigoran dohot hasintongan di tonga ni jabu, di tonga ni huria, di tonga ni masyarakat, bangso dohot negaranta, tarmasuk na mangusahohon hajongjong ni sada pamarenta na ias jala na marsahala, na manghaholongi uhum dohot hasintongan, asa patar hatigoran dohot hasintongan ni Kristus nang di hangoluanta siapari. Parsitutuonta disi, sada partanda do i paboa na manghirim hita jala maimaima di harajaon ni Kristus na hot ro di saleleng ni lelengna i.

jkt.18.11.2009/mvs

Read More..

12.14.2009

Advent-4

SERMON JAMITA TU MINGGU ADVENT-IV, 20 DESEMBER 2009
Jes.30:18-26

Patujolo

Mangula do Panurirang Jesaya di Juda di tingki hinarajahon ni si Usia (785-747 sM), si Jotam (747-735 sM), si Ahas (743-726 sM), dohot si Hiskia (726-697 sM; ida Jes.1:1).
Ndang torus manorus, alai marujuuju do hombar tu haroro ni pangungkapon sian Debata. Tarbagi tolu do tingki ni pangulaonna. Periode-I, sian panjouonna sahat tu hamamasa ni Porang Siria-Efraimistis (747-734 sM); Periode-II, sian Porang Siria-Efraimitis sahat tu habubuang ni Israel Utara (734-721 sM); jala Periode-III sian habubuang ni Israel Utara sahat tu hatutungkum ni Jerusalem (721-700 sM).

Turpuk on tarrajum do tu hasadaon na umbidang, i ma 28:1-35:10. Masuk tu Periode-III. Tingki i, hot (berdaulat) dope Harajaon Juda, alai tarsosak situtu jala ingkon manggarar jombabahal tu Asur. Ala so tahan, dohot ala ni jujujuju ni Misir, memberontak do nasida dua hali, alai jalojalo do i diintopi Asur. Mareak ujung ni periode i, disegai do sandok Juda; jala di taon 701 sM ditungkum do Jerusalem. Sudena i dibereng Panurirang Jesaya do songon panginona ni uhum ni Debata tu bangso i. Mansai balga do antong dosanasida, ai ndang dihaporseai nasida be Debata Jahowa, Misir nama. Angkup ni i, sude do nasida mangulahon angkal dohot sipaototo, ndang olo manangihon hataNa (28:7 duu); jonok Debata di pamanganna, alai dao do sian rohana (29:17). Ndang adong na tuk paluahon nasida sian uhum i. Mangalului pangurupion pe nasida tu Misir, ndang marguna. Paganda hinadokdok ni uhum i do i tahe, ai aeon nasida ma hataluan na so tarhatahon (30:17).

Hatorangan

Alai parasi jala parholong ni roha do Debata Jahowa, pardengganbasa salelenglelengna. Rimas dohot uhumNa, halilu ni holong ni rohaNa do i. Ia diuhum pe Israel, ndada na laho mangambolonghon, alai na laho manogihon tu hamubaon do. Ala ni i, huhut manguhumi, dipaimaima do hamubaon ni bangso i, asa asianNa mangulahi. Boha ma Ibana patupahon i? Didok dison: “Borhat Ibana asa asianNa hamu.” Borhat (Indo. bangkit; Hbr. yaaruwm/ exalted/agung/mulia), mandok bersikap hombar tu hamuliaonNa (keangunganNya) na gok asi ni roha, hasintongan dohot hasatiaon. Hombar tu hamuliaonNa i, diantan Ibana do uhumNa; ndang tongtong Ibana manorui, jala ndang gotos rohaNa saleleng ni lelengna (pat.Ps.103:9); ndang ro di salelenglelengna Ibana mamadai, jala ndang tongtong Ibana mangarimasi (pat.Jes.57:16). Molo muba roha ni bangso i, marpangulahi do rohaNa jala asianNa nasida, singkatanNa ma uhum i gabe pasupasu. Marhuaso do Ibana patupahon i, ai Debata ni uhum do Ibana. Anggo panguhum portibi, na di toru ni uhum do i. Ala ni i, ndang marhuaso i manguba uhum na nidabuhonna, panguhum na di ginjangna do na boi patupahon i. Alai anggo Debata di ginjang ni uhum do, gabe marhuaso manguba uhum na nidabuhonNa sandiri. Paposhon roha ni bangso i di hasintongan ni sasudena i, didok ma: “Martua ma sude na manghaposi Ibana.”

Di panginona ni uhum i, suman tu na tarbuang do panghilalaan ni bangso i. Mian di tano dohot di hutana dope nasida nian, alai ingkon manggarar jombabahal tu na leban jala hona tungkum. Hombar tusi, sai hira na mamanghulingi halak na mian di na so tanona do si Jesaya dison, songon na manjamitai na naeng mulak maringan muse (Hbr. yeesheeb /shall dwell) di Sion dohot di Jerusalem. Taringot tu nasida didok, di tingki haluaon i na so tupa be nasida tangis (pat.25:8), ai asian jala pasupasuonNa do nasida disi, begeonNa soara ni angguknasida jala alusanNa nasida. Apala i ma na so jumpang be di nasida na sai laonna i, joujou pe nasida jala mangangguhi alai ndang ditangihon Debata.

Di ay.20 sahali nari digombarhon, di panginona ni uhum i hira na mangan roti hagogotan dohot minum aek pangarupaon do bangso i. Aha do i? I ma sipanganon dohot siinumon di angka ari hasusaan. Na mangan dohot minum tarrajum tu angka na tumabo do i di na mangolu. Alai di angka ari hasusaan boi do i gabe so tabo. Ndang ala ni na moru dai ni sipanganon dohot siinumon i, atik pe boi do tong songon i, alai godangan do ala ni naung gabe songon bagian ni sitaonon i na mangan dohot na minum i, gabe so sonang be roha ni na manganhon dohot na manginum i di tingki i, tumatangis gariada gabe rap dibonduti ma sipanganon dohot siinumonna i dohot iluna (pat.Ps.42:4). Sahali nari, songon i ma panghilalaan ni Israel di panginona ni uhum i. Mandate nasida di pardagingon, songon i di partondion, ai gabe songon na martabuni angka gurunasida, lapatanna diotapi Debata marsuru naposoNa angka na mangajari nasida. Masihol pe nasida naeng mambege hata ni Debata, ndang boi ai ndang adong na mangajarhon (pat.Am.8:11-12) Alai di ari haluaon i, ulahan ni Debata ma marsuru angka naposoNa, gabe sai dapotan poda dohot pangjaran nasida sian Tuhan i. [Di salinan Indonesia dipangke do hata Pengajarmu (bentuk tunggal) jala dihonahon do i tu Debata. Lapatanna, Debata do Guru na martabuni i. Alai di hata Batak didok angka gurum (bentuk jamak). Jadi, ndang mungkin honahonon i tu Debata, ai sada do Debata. Di hata Heberna didok mowreykaa na marlapatan thy teachers (bentuk plural). Ala ni i pinartahanhon do dison na di salinan Batak i].

Ndang holan i, ramotan ni Debata do nasida marhite pemandu na so tarida na paingothon nasida taringot tu dalan sidalananna. Na marharoroan do i sian gombaran ni sada guru na manogunogu jala pasingotsingothon siseanna asa unang sala; manang pangalaho ni sada parmahan na mangiringiring jala mangondingi dorbiana asa unang lilu. Hombar tusi ma digombarhon dison, sai adong soara sian pudi na pasingothon bangso i taringot tu dalan sidalananna; manulus do, mangiamun do, manang na mangambirang. Na marhahonaan tu parsoalan ni ngolu do nidokna disi, tu haporseaon dohot pangalaho. Soara i pasingothon manang songon dia halak manirang na denggan sian na roa (pat.1 Raj.3:9b); mamillit na hinalomohon ni Debata (pat.Rom 12:2c), jala pasidinghon na hinasogohonNa. Alai soara aha do i? Na parjolo, boi do i soara na langsung sian Debata. Sipata, marsoara do Debata papatarhon tahiNa tu jolma. Soara sisongon i digoar halak Israel do bath kol, lapatanna boru ni soara ni Debata (the daughter of the voice of God). Na paduahon, boi do i soara ni Tondi ni Debata. Na patoluhon, boi soara ni patik ni Debata naung sinuanhonNa tu roha ni jolma i (pat.Jer.31:33). Jala na patoluhon, boi do i soara ni panggora ni roha.

Hombar tu soara i pasidingon nasida ma disi ganaganaan na nilampis dohot perak dohot gombaran na nilampis dohot mas. Angka ulaula hasipelebeguon do i na hinaposan jala na sinombanasida na sai laon. Diramuni do jolo (pat.2 Raj.23:8, 10, 16), dung i dibolonghon. Songon abit naung ramun ndang adong be na mangargahon manang mangolani, alai sude nama manghagigihon. Na deba ditutung, dung i sirabunna i disirsirhon songon napa.

Ihut tusi, ro ma tingki hadameon dohot hadumaon (jaman kedamaian dan kemakmuran), na ditandai marhite ragam ni pasupasu. Ndang hariboriboan alai marhasonangan nasida maninggala dohot manaburhon boni tu hauma dohot tu porlakna; paudanhonon ni Debata ma tu nasida udan paremean na mambahen gabe na niulanasida jala suha (berlimpah-limpah) gogona, sinur dohot na pinahannasida na manjampali di adaran angka na bidang; parsaulihonon jala panganon nasida ma gogo ni haumana, i ma roti na togong (na maol dicerna gabe na leleng tahan di butuha) jala na marmiak; di angka pinahan pe tuk do sipanganon na siniraan jala na sinege. Dung i bornohan ni Debata ma muse sandok tano i (pat.Jes.44:3). Gari di atas ni dolok angka na timbo tahe dohot rahisrahis na hinsat (bukit) adong sunge dohot halian aek (aliran air). Angkup ni i, tambaan ni Debata ma silompit pitu hali hatiuron ni bulan dohot mata ni ari. Hatiuron simbol ni haiason (kemurnian/ kesucian) do i, hapistaran, halalas ni roha, dohot hadumaon (kemakmuran). Luhutna i, pasupasu angka na mangihut tu haluaon i do i. Laos lilitan ni Jahowa ma disi bugang ala ni dosa ni bangso i, jala pamalumonNa holiholinasida naung magas (marigat/mabola/ maponggol) binahen ni paminsangNa. Luhutna i gombaran puetis ni tingki hadameon dohot haluaon i do i (pat.Jes.11:6-7). Alai sadihari do hamamasa ni i? Di ay.25b didok: “Di ari tongtangan godang, molo marumpak angka palaspalas.” Ari tongtangan godang (Hbr. bayowm hereg raab/the day of the great slaughter/pembunuhan besar-besaran), i ma ari hatatalu ni parangan ni musu ni bangso ni Debata. Palaspalas mandok, hagogoon manang huaso. Jadi harurumpak ni palaspalas mandok, hapipidom ni hagogoon manang huaso ni musu ni bangso ni Debata. Alai sahali nari, sadihari ma i? Angka halak na satingki dohot si Jesaya ro di angka sundut na mangihut tusi boi do marnida panggohion ni bagabaga on di sadasada peristiwa sejarah na adong pardomuanna tu nasida. Rupani, di taon 701 sM di na tartungkum huta Jerusalem (ida Patujolo) jala mansai targogot Raja Hiskia dibahen, di sada borngin, dibunu suruan ni Jahowa do 185.000 halak parangan ni Assur. Ndang tarbahen si Sanherib raphon paranganna angka na tinggal i be manorushon panungkumon i, gabe mulak ma nasida tu tanona, jala sahat disi mate tarbunu ma ibana (Jes.37:36-38). Dung i, marhasonangan ma halak Juda. Halak Israel satingki i, na boi do mamereng i songon panggohion ni bagabaga on. Alai anggo panggohion na sasingkopna masa do i di Padan na Imbaru (Jer.31:31-34), di ari ni Kristus Jesus dohot di ari sogot.

Sipahusorhusoron

Di ari on, sahat hita tu Advent na paopathon. Advent na parpudi nama on di hita di Taon Parhuriaon on, ai di ari Jumat dohot Sabtu na ro on, tanggal 25-26 Desember 2009 sahat ma hita tu Natal manang Parningotan di Hatutubu ni Tuhanta Jesus Kristus dung jolo tapatupa Parningotan di Borngin na Badia di bodari ni ari Kamis, tanggal 24 Desember 2009 on. Dung tabolus tolu minggu Advent, ndang parsoadaon, otik godang nunga adong di hita pangantusion na lam tanak taringot tu Advent i. Alai songon na mangarataratai, denggan do ulahan, na marhahonaan do Advent i tu na dua haroro ni Tuhanta Jesus Kristus, i ma haroroNa na parjolo na marhite hatutubuNa dohot haroroNa na paduahon di ari parpudi. Hombar tusi, dua minggu na salpu, di Advent-2 diparade do rohanta tu panagamon dohot parningotan di haroroNa na parjolo i, jala di minggu na salpu, di Advent-3 gumodang do rohanta ditaiti tu panomunomuon dohot panagamon di haroroNa na parpudi. Laos songon i ma di ari on, di Advent-4 on, diulahi do muse mangarahon hita manatap tu tingki na ro sogot na salelenglengna. Songon dia ma i patupaonta?

Na parjolo, tapauba ma rohanta. Pardenggan basa do Jahowa jala parholong roha, lambat tarrimas jala parasi roha godang. Ndang tongtong Ibana manorui, ndang gotos rohaNa ro di salelenglelengna. Molo manguhum pe Ibana ndang na laho mangambolonghon, ala ni i diantan do uhumNa jala dipaimaima do hamumulak ni pardosa i, asa asianNa musengani. I do naung pinatupa ni Debata di bangsoNa Israel uju i, dung muba rohanasida, dipalua do nasida sian uhumNa jala diasii. Apala i ma Barita na Uli ni jamita Advent-4 on tu hita. Mardosa do hita di adopan ni Debata. Alai ala ni asi dohot holong ni rohaNa disuru do AnakNa Jesus Kristus i ro tu tano on laho paluahon hita. Uju Kristus i papatarhon diriNa di tongatonga ni natorop, tung apala hamubaon ni roha i do na parjolo dijouhon, didok: “Nunga dapot tingkina; nunga songgop harajaon ni Debata. Pauba hamu ma rohamuna, jala haporseai hamu ma Barita na Uli i!” (Mrk.1:15). Laos i ma nuaeng na dijouhon tu hita di Advent-4 on dohot di Pesta Natal na ro, naeng tapauba be rohanta, asa diri hita bahen hasangapon dohot hamuliaon di goarNa.

Na paduahon, tangi ma hita di soara ni hata ni Debata. Tu bangso Israel naung muba jala na malua i, disuru Debata do angka guru na patubegehon hata dohot lomo ni rohaNa. Angkup ni i, sai dipaihutihut do nasida jala dipatongontongon tu dalan lomo ni rohaNa marhite soaraNa, soara ni TondiNa, soara ni patikNa naung sinuanhonNa tu rohanasida, dohot marhite panggora ni rohana be. Ala ni i gabe boi ma nasida mamolati na denggan sian na roa. Tu hita pe, dilehon Debata do angka parhalado na mangajarhon tu hita lomo ni roha ni Debata. Dilehon do tu hita hataNa, dipaihutihut jala dipodai do hita marhite soara ni Tondi Porbadia, soara ni patikNa naung sinuanhonNa tu ateatenta, dohot marhite panggora ni rohanta be laho patongonhon langkanta tu dalan hasintongan. Songon halak naung muba jala malua, naeng ma tangi hita di soaraNa i. Marhite na songon i, boi ma hita mamolati na denggan sian na roa, boi mananda, pasidinghon manang mangalo angka sipanginnsahi na mangulahon hahisapon, hajahaton ni rohana be; angka pamolamola na mangolu nian alai na so martondi. Tarpauliuli hita ma nang dirinta di atas ni haporseaonta na badia, martangiang di bagasan Tondi Porbadia, jala mian di bagasan holong ni roha ni Debata (Ida Turpuk Sijahaon, Jud.1:18-26). Sabalikna, tapasiding hita ma nasa ragam ni hasipelebeguon angka na kuno manang pe na moderen, isara mammonisme, materialisme, konsumerisme dohot na asing.

Na patoluhon, maimaima ma hita di hapataran ni Tuhanta Jesus Kristus dohot hangoluan na salelenglelengna. Tu bangso Israel naung muba jala malua i dibagabagahon Debata do hasosonggop ni tingki hadameon dohot hadumaon. Ndang adong be disi na tumatangis, ai lilitan ni Debata ma bugangnasida jala pamalumonNa holiholinasida na magas binahen ni paminsangNa; ndang adong na hurangan, ai pasingkopon ni Debata do sipanganon dohot siinumon. Sandok sonang do sude disi, mariaia jala marlas ni roha. Di hita, bagabaga na marhahonaan tu hangoluan sogot do i na mangihut tu haroro ni Tuhanta Jesus Kristus paduahalihon. Na manghirim jala na maimaima do hita disi. Panghirimon dohot suasana ni surgo i naeng ma tercermin i di Advent dohot si Natal na tapatupa. Na tardungdung hita do i marhite Advent dohot Natal na di bagasan hadameon, hasonangan, dohot las ni roha. Hajujumpang ni i ndang dijamin i marhite dana na cukup, materi na gukguk, manang pesta na meriah, marhite haporseaon do, hamubaon dohot roha na ungkap tu Tuhan i.

jkt.12.11.2009/mvs

Read More..

12.07.2009

Advent-3

SERMON JAMITA TU MINGGU ADVENT-III, 13 DESEMBER 2009
Luk.13:23-30

Patujolo

Masa do jamita on di Prea, di pardalanan parpudi ni Jesus tu huta Jerusalem.
Di bd.9:51, dipungka barita ni pardalanan i jala marujung ma i di huta Jerusalem, di sitaonon dohot hamamateNa. Deba sian ayat ni turpuk on tarjaha do di inganan na asing, di bagasan konteks na marasing. Na boi masa do i ala godang do sian pandohan ni Jesus na diulahi di tingki dohot di inganan na asing jala di bagasan konteks na marasing. Alai laos boi do i ala na ganup panurat ni Evangelium i do na manusun angka pandohan i hombar tu cara dohot sangkapna be di na manurathon Barita na Uli i.

Hatorangan

Ndang torang manang na ise do na manungkun Jesus i dison. Ra, ndang sada sian angka naung tagoar sisean ibana, na sian ruarna do. Disura roha, nunga hea ibana pajumpang dohot Jesus jala mambege hataNa. Di sada parjamitaonNa rupani, di pangajarion manang di parsualonNa maradophon angka parise dohot sibotosurat. Disungkun ibana do Jesus i, didok do: “Tuhan, otik do ulaning na saut malua?” Haluaon dia do nidokna? Sian angka ayat na mangihut torang, haluaon sogot do. Sadalan tu na tinaringotan di Sermon Jamita tu Minggu 24 dung Trinitatis, 22.11.2009, na so torang dope di Padan na Robi taringot tu haheheon dohot hangoluan sogot, jala na gabe mardua halak Jahudi taringot tusi, na deba porsea na deba nari ndang, laos mardua do nasida nang taringot tu haluaon i. Di angka na so porsea di haadongon ni haheheon dohot hangoluan sogot i, pangantusion ni haluaon i dihonahon do tu habobongot tu Harajaon Jahudi Messianis. Di ujung ni angka ari, songon i ma haporseaonnasida, ro do Messias na pinarbagabaga i; pajongjongonna ma Harajaon Jahudi Messianis na meliputi sandok portibi on. Asing ni angka pardosa na sumalin, sude do halak Jahudi bongot tusi jala gabe warga utama. Na marlapatan ma i, sude do halak Jahudi malua; malua ala Jahudi. Di angka na manghaporseai, pangantusion ni haluaon i dihonahon do tu haheheon dohot hangoluan sogot. Jesus sandiri dipodahon do taringot tu haheheon dohot hangoluan sogot i. Hombar tusi, gabe dibereng halak ondeng ma na boi do Ibana bahen panungkunanna laho manggohi rasa ingin tahuna na taringot tu pandapot umum na mandok na otik do na saut bongot sogot tu surgo i. Marpangguruan tu barita haluaon sian tano Misir, na holan dua do sian angka na tangkas marnida jala mangantusi haluaon i na saut bongot tu tano Kanaan, i ma si Josua dohot si Kaleb, gabe adong ma pandapot umum na mandok na otik do na bongot tusi, jala hombar tusi ma disungkunhon: “Tuhan, otik do ulaning na saut malua?”

Alai ndang olo Jesus manaringoti haluaon i songon objek ni panghataion na teoretis demi memuaskan rasa ingin tahu ni manisia. Di Ibana, rumingkot do di jolma i na mamastihon parsidohotonna di haluaon i sian na marsualsual manang berspekulasi taringot tu angka na naeng ro. Hombar tusi, ndang dialusi sungkunsungkun i, alai disosoi do na umbegesa asa mangaringkoti haluaonna be. Hombar tusi ma didok: “Marungkil ma hamu asa masuk sian pintu na gogot i.” Marungkil (Gr. agoonizesthe) mandok marusaho sian nasa gogo (strive/berusaha manang berjuang keras) bahkan manaon (agonize/menderita sekali). Na marharoroan do hata i sian dunia olah raga ni halak Gorik. Marusaho do ganup atlit sian nasa gogona laho pabosihon dagingna; dipukpuhi dagingna, ditaon na hansit, diporsan na dokdok, jala diorom nasa sioromonna anggiat tung tardungdungsa hamonangan i. Tudos tusi, demi haluaonna be, ingkon marungkil do ganup halak. Ndang sae tusi holan sangkap manang keinginan, alai ingkon adong do usaho na marsitutu. Taringot tu na mamongoti haluaon i, dipatudos do i tu na mamongoti pintu na gogot. Di huta angka na marparik (bertembok) di Palestina adong do pintu na gogot. Na diparade do i tu angka pamolus na naeng marborngin. Ndang sai boi nasida sahat tu huta di na ungkap dope pintu godang, ingkon sian pintu na gogot i nama nasida boi masuk. Alai i pe, molo dung bagas borngin tong do dihinsu. Molo dung songon i, manang na ise pe ibana ndang na boi be i bongot. Ala ni i, ingkon marungkil do nasa pamolus laho bongot sian pintu i; ingkon dihudus ma rupani pardalanna, ndang boi marlanggelangge asa sahat tusi topet di tingkina. Songon i do na mamongoti haluaon dohot hangoluan sogot i, ingkon dipastihon do i saleleng arian, lapatanna tingki mangolu. Ndang adong na umboto tingki dohot sadihari ni hamamatena be. Ala ni i ingkon tibu do buaton ni ganup haputusan taringot tu na manjalo haluaon dohot hangoluan i, ai sanga songgop borngin, lapatanna ro hamatean i, nunga salpu be tingki parasian i.

Di ay.25, mamangke gombaran na asing diulahi dope muse pingkiran i. Di halak Jahudi, songon i do pangalahona, molo dung disordak nampunasa pintu ni bagasna bornginna i, na marlapatan do i, sahat ro di manogotna ndang rade be ibana manjalo jala pabongothon na ro. Boha pe dibahen manuktuhi, ndang laho ungkaponna. Songon i ma digombarhon dison, di ari uhum sogot i godang do na so dipaloas bongot ala tarlambat mangaringkoti hangoluan ni tondina. Lomo do nian rohana malua, alai saleleng arian jala ungkap dope pintu i, lapatanna saleleng di ngoluna ndang dipangke kesempatan i, gabe ditulak.

Parjumpangan dohot Jesus na so dipaujung marhite na mambuat haputusan taringot tu na manjangkon Ibana di bagasan haporseaon ndang marguna. Torop do sian Jahudi angka na satingki dohot Jesus na hea mangan jala minum dohot Ibana (tumingkos, di adopanNa) isara ni na 5000 dohot na 4000 halak na tinamueanNa i (Mat.14:15-21 pat; 15:32-38); torop do na paihutihut Ibana laho umbege hata dohot podaNa, jamita dohot pangajaranNa di angka dalan manang di alaman ni hutana be, jala torop do na dohot marnida tanda na pinatupaNa. Dohot hata na asing, di hajolmaon jonok do nasida tu Ibana, ai sabangso do nasida, saparsaoran; dihaholongi do nasida jala disarihon hasonangannasida, dipamalum na marsahitnasida, diajari nasida, dipodai jala dijamitai. Idaon sian i sai hira naung sisean do nasida, jala sihol rohana di haluaon. Alai nang pe songon i, ndang sude nasida sahat tu na mambuat haputusan laho manjangkon Ibana di bagasan haporseaon. Ala ni i, di ari uhum sogot i tulahon ni Jesus do nasida. Dipangasahon nasida pe saluhutna i, dohononNa do: “Ndang Huboto hamu manang sian dia. Sumurut ma hamu sian Ahu, hamu sudena siula hageduhon.” Sumurut mandok, borhat, manirpang manang sirang. Tu dia?

Di ay.28 didok, tu balian; lapatanna tu ruar ni surgo manang banua ginjang sibongotan ni angka na monang i; tu na holom marimpotimpot, tu inganan ni anggukangguk dohot na patungoripon (pat.Mat.8:12 par), i ma naroko manang banua toru i. Hombar tu bayangan ni halak di tingki i, digombarhon do dison na pajonokjonok do surgo dohot naroko i, boi masitatapan sian na sada tu na sada nari. Di Luk.16:22-31 digombarhon, masigoraan pe boi do, alai ndang boi masitariparan ai adong do sada lung na bagas mangholangholangi (pat.Luk.16:22-31). Sian banua toru i ditatap nasida ma si Abaraham, si Isak, si Jakob ro di angka panurirang di surgo i, gabe mansai paet ma panghilalaannasida. Lam tu paetna do i dung diida nasida halak sileban angka na so bangso ni Debata jala na so parjambar di parpadananNa hian hundul marsipanganon di harajaon ni Debata. Harajaon ni Debata, i ma panghuasoion ni Debata di jolma na di bagasan parsaoran holong na mansai rosu na suman parsaoran ni ama tu angka anakna. Di bagasan Jesus Kristus naung ro tu tano on nunga songgop harajaon i, alai buni dope. Alai sogot patar ma i di bagasan hamuliaonna. Disi pajumpang ma jolma tu Debata, saor tu Ibana adop bohi tu bohi. Dipatudos do jotjot harajaon i tu parmanganon (pat.Luk.14:15; 22:30; Mat.26:29). Isi ni harajaon i do na niondolhonna disi. Las ni roha do isi ni sada parmanganon, hatuaon (kebahagiaan) dohot hasangapon (honor/kehormatan). Songon i, las ni roha do isi ni hangoluan sogot i, gok hatuaon, hasonangan, hadameon, hasangapon dohot hamuliaonna. I ma siteanon ni angka na monang, angka na porsea sian sude bangso na di sandok portibi on.

Panimpuli ni turpuk on didok: “Angka naung parpudi hian tupa gabe parjolo, jala angka naung parjolo hian tupa gabe parpudi.” Hombar tu sangkap hatuaon ni Debata na taringot tu jolma, dipajolo hian do halak Israel, ai tu nasida do parjolo dipapatar diri dohot lomo ni rohaNa. Alai di hasasautna, secara umum gabe dijoloani bangso na leban do nasida. Gabe parpudi nasida, ndang ala ni haisraelonna, ala ni hasohaporseaonna do; songon i angka na leban, gabe parjolo nasida ndang ala ni hasilebanonna, ala ni haporseaonna do. Hatontuan na torus do i. Secara pribadi, na sian Jahudi pe boi do gabe na parjolo, jala na sian sipelebegu hot na gabe na parpudi saguru tu haporseaon manang hasohaporseaonna be.

Sipahusorhusoron

Patolumingguhon ma nuaeng dung na bongot hita tu Advent. Dua minggu na salpu, di na mamongoti Taon Parhuriaon na imbaru on nunga niondolhon paboa na marhahonaan do Advent i tu na dua haroro ni Tuhanta Jesus Kristus, i ma haroroNa na parjolo na marhite hatutubuNa, dohot haroroNa na paduahalihon sogot di ari parpudi. Di jamita di Minggu Advent-2 na salpu i, gumodang do hita diparade tu panomunomuon dohot parningotan di haroroNa na parjolo i sipatupaonta di Natal na naeng ro. Di jamita Minggu Advent-3 on, gumodang ma hita diarahon tu panagamon di haroroNa na paduahalihon. Songon dia ma hita managam disi? Marojahan di turpuk on tauji ma jolo pamanathon i.

Na parjolo, tapasiding ma sualsual na taringot tu angka na masa sogot. Di tongatonga ni halak Jahudi na porsea di haheheon dohot hangoluan sogot tubu do sungkunsungkun na mandok otik manang godang do ulaning na saut malua? Marpangguruan tu haluaon sian Misir, na holan dua do sian angka na tangkas marnida jala mangantusi ulaon habalgaon na pinatupa ni Debata marhitehite sian tanganNa na gogo na saut bongot tu tano Kanaan, i ma si Josua dohot si Kaleb, adong ma pandapot umum na mangarajumi na otik do na saut bongot sogot tu surgo i. Suman tusi, di tongatonga ni hita halak Kristen pe, angka na naeng masa di ari sogot i mansai manarik do i hataan. Molo adong pandohan ni Bibel i na mangungkaphon otik taringot tusi, angka na sian buku Pangungkapon rupani, cenderung do i dipatorang marhite hatorangan na ‘satorangtorangna’. Ala ni torangna, gabe sai hira naung hea do na patoranghon i sian i, hira naung hea diida jala dialami. Mansai manarik do i di torop halak, ai marhite i terpenuhi do rasa ingin tahu ni hajolmaonna. Di na asing muse, dipangke do i gabe objek ni sualsual. Rupani, adong do halak na sungkunsungkun mandok: “Ai marisap do halak sogot di surgo i?” Gabe adong ma na mangalusi i mandok: “Ndang,” alai na asing mandok: “Porsea do ahu, paradeonna do sigaret disi.” Alai sude i fantasi kosong do jala na so marlapatan. Di na disungkun halak Tuhanta Jesus di jamita on taringot tu na songon i, ndang olo Ibana mangalusi. Marhite i naeng podahononNa do tu hita, manang na boha rumang dohot pangalaho ni hangoluan sogot i ndang porlu dope i botoonta saonari (pat.1 Joh.3:2), jala ala ni i do umbahen na so dipatorang i di Bibel tangkastangkas. Na ringkot di hita nuaeng i ma, naeng porsea hita na adong do hangoluan sogot i jala na diparade do i laho bongotanta.

Na paduahon, taparhaseang ma tingki parasian ni Debata. Tu halak Jahudi satingkiNa dipodahon Jesus do asa marungkil jala mamastihon parsidohotonna di hangoluan sogot i saleleng arian, lapatanna saleleng di ngoluna be. Sanga ro borngin, mandok ro hamatean ndang adong be kesempatan, ai nunga salpu tingki parasian i. Pardomuan tu Jesus na so dipaujung marhite na manjangkon Ibana di bagasan haporseaon ndang adong gunana. Joloanan ni halak do sisongon i gabe masa ma na parjolo hian gabe parpudi, jala na parpudi hian gabe parjolo. Laos singotsingot ma i tu hita na mangolu di angka ari na parpudi on. Ndang mura dalan tu surgo i, rahis do jala maol. Ala ni i, ingkon marungkil do hita mardalan disi. Di ngolu on do kesempatan laho memiliki hangoluan i; disi do boi begeon Barita na Uli i jala disi buaton haputusan taringot tusi. Persinggungan tu Barita na Uli dohot na mandai angka parsaulian marhite sian i, isara na marsiajar di parsikolaan ni Kristen manang na mangula di huria manang di angka lembaga kristiani alai ndang hea sahat tu haporseaon, ndang marguna. Laos songon i do nang angka naung targoar Kristen jala naung gabe ruas manang parhalado ni huria; diula pe angka ulaon parhuriaon, jala deba sahat do tu manurirangi, pabali sibolis, dohot na patupa angka tanda halongangan (pat.Mat.7:22), hebo marhobasi di Advent, parsidohot jala mansai aktif di angka pesta Natal, alai ndang hea dipastihon haluaon dohot pemilikanna di hangoluan sogot marhite na manjangkon Jesus Kristus di bagasan haporseaon, tong do ndang marguna. Ala ni i, binsan mangolu dope, tapastihon be ma parsidohotonta di haluaon dohot hangoluan sogot i; tajangkon ma Tuhanta Jesus Kristus naung ro i di bagasan haporseaon jala marsitiopan ma hita di poda na sintong naung dijarhon tu hita, jala marsihohot di hata nang di ulaon na denggan (2 Tes.2:13-17).

jkt.04.11.2009/mvs

Read More..

12.01.2009

Tapuji ma Debata

TAPUJI MA DEBATA

“Ai Ho do nampuna harajaon dohot hagogoon dohot hasangapon ro di saleleng ni lelengna. Amen.” (Mat.6:13b)

So tarhilala, nunga sahat hita nuaeng tu bulan Desember, bulan na parpudi di taon 2009 na tadalani on. So pola piga ari nari, salpuhononta ma taon on laho mamongoti taon na imbaru, taon 2010. Molo manaili hita nuaeng tu angka bulan naung tabolus i, idaonta do disi godang ni na masa. Ala ni godangna, ndang na tarpajojor hita i sadasada. Alai ra, na boi rimpunonta tu angka na masa i tu manang piga pangarimpunan, isara peristiwa alam, politik, ekonomi, dohot na asing.

Songon Kristen hita naeng berengonta do angka na masa i sian panatapan ni haporseaon. Hombar tusi dohononta ma, luhutna i ndang simbil i sian huaso ni Debata na mangatasi jala na manggomgomi nasa na adong. Di na mandalanhon panggomgomionNa i, adong do sada na diparrohahon Debata, i ma tangiang ni na porsea. Hombar tusi dohononta ma, angka na tabolus di taon on ndang simbil i sian alus ni Debata tu angka tangiangta. Ragam situtu do na tatangianghon. Alai hombar tu tema na na manogunogu hita laho mandalani bulan Desember on, tapahimpu ma sudena i di tangiang na pinondahon ni Tuhan Jesus Kristus tu hita. Na parjolo, tapangido do angka na marhahonaan tu Debata dohot tu harajaonNa, i ma habadiaon ni goarNa, hasosonggop ni harajaonNa, dohot hasasaut ni lomo ni rohaNa di banua tonga on songon na di banua ginjang; dung i, paduahon angka na ringkot di hita, i ma hangoluanta siapari, haseaan ni angka dosanta, hasisidingta sian pangunjunan, dohot haluaonta sian na jahat. Luhutna i digohi Debata do di hita di na sataon on. Holan ala ni i do umbahen na mangolu jala horas hita sahat tu tingki on. Ia masa pe saluhutna i ndang ala ni diri manang ala ni haburjuonta, ala Ibana sandiri do, ala ni asi ni rohaNa. Ala ni i, di na manjalo saluhutna i ingkon tu Ibana do pasahatonta pujipujian, harajaon, hasangapon, dohot hamuliaon.

Laos i ma na ringkot parrohahonon jala hangoluhononta di na mandalani bulan Desember 2009 on. Adong tolu buhu ni tingki na mansai arga sibolusonta di bulan on. Na parjolo, Advent; na paduahon, Natal; jala na patoluhon, Ujung Taon. Ingkon auhononta do, angka i pe alus ni Debata do i tu tangiangta. Molo dipaloas Debata hita mamongoti Advent dohot mamestahon Natal di taon on, na marlapatan do i na ditangihon Debata do joujou ni dangolta, disuru AnakNa Jesus Kristus i manopot jala paluahon hita; songon i, molo dipaloas hita sahat tu Ujung Taon laho mamongoti Taon na Imbaru na marlapatan do i na ditangihon do tangiangta taringot tu panogunoguon dohot pangiringiringonNa di hita, jala dialusi hita paboa na so marujung do angka asi ni rohaNa, mulak rata do i tahe ganup manogot. Ala ni i, manang di na maradvent, manang di na marnatal, manang pe di na laho manalpuhon taon on naeng hatindanghononta do songon na nidok ni tema ni bulan Desember on: “Ai Ho do nampuna harajaon dohot hagogoon dohot hasangapon ro di saleleng ni lelengna. Amen.”

Read More..

Manomunomu Wakil Presiden

MANOMUNOMU WAKIL PRESIDEN

Andorang di sikola metmet dope ahu, ro do sahali Wakil Presiden Republik Indonesia, Bapak Drs.Muhammad Hatta tu luatnami. Naeng dohot do hami mamereng nasida. Ala ni i borhat ma hami manang na piga halak dakdanak mardalan pat sian hutanami, marrhira 12 batu daona tu Siborongborong. Sahat disi, nunga mansai torop halak hudapot hami. Angka parsikola na sian kota i jongjong marbaris di topi ni dalan i. Ganup do nasida maniop mandera Merah Putih na metmet. Di pudina, sahat tu emper ni angka jabu dohot toko marjongjongan manang hundulhundul angka ama, ina, naposobulung, ro di dakdanak.

Taho do lelengna asa ro. Sanga do hami ngolngolan paimaimahon. Dung i adong ma na manggorahon: “Nunga ro be.” Manigor hapogan ma hami sude mamereng. Marbubur na deba tu topi ni dalan i, masisosahan asa boi tumangkas marnida na sangap i. Tongon do, ai tarida ma mobil marudurudur, jala sian Doloksanggul do haroroanna. Dung i mamolus ma rombongan i sian jolonami. Alai ndang nanggo dipalambat pardalan ni angka mobil i, jala ndang adong sian nasida na manghiraphon tanganna tu situan natorop na marsuraksurak manjoujouhon: “Mardeka, Horas,” manang “Selamat Datang,” alai laos songon i do sude marngenges dompak Tarutung. So pola piga dan salpu ma sude. Aha do hinarohonna, tu dia tujuanna, sadihari jala sian dia do nasida mulak, ndang adong na umbotosa.

Dung i, bubar ma natorop i jala mulak tu hutana be. Hami pe, mulak ma mardalan pat tu hutanami dung jolo mangallang goreng pisang sada be na mararga sasatali (Rp.0,25). Ndang anggo minum, ai holan satali be do hepengnami. Dungkon ni halojaon, ndang adong na dapot ahu sian pardalanan i. Ndang boi ahu rupani marhatuahon diri tu angka donganhu mandok: “Nunga huida Wakil Presiden Republik Indonesia,” ai tutu do ndang huida. Holan on do, huida do anggo mobil na paduahon i, ai ninna na mandok, i do na mangusung na sangap i. Manang na sintong i ndang huboto. Dung magodang ahu jala gabe pandita, lumobi di tingki Advent dohot Natal, jotjot do i huingot. Jala ganup huingot i, sai hudok do di bagasan rohangku: “Lojana i, jala otona i hami tahe.”

Songon i, torop do halak Kristen na so hurang hebona di Advent dohot di Natal. Hebo do angka keluarga paradehon abit, kue, dohot gabagaba di jabuna be. Hebo do angka huta, angka punguan, angka parsikolaan, angka kantor, dohot angka na asing manghobasi pestapesta Natal. Tu sangkap i, dipatupa do angka parguru endeon manang latihan drama, jala ditahi na deba do patupa binda manang makan bersama. Hebo do angka huria marsadasada dohot angka punguan di bagasanna. Songon na marsiadu sude patupa pestana be. Asing pesta ni dakdanak, asing pesta ni bajarbajar, asing pesta ni naposobulung, asing pesta ni ina, asing pesta ni ama, asing pesta hadomuan manang Natal Umum. Adong dope tahe na patupa pesta ni ganup lunggu. Ndang hatadingan nang angka huria manang denominasi, masyarakat dohot pamarenta, hebo do patupa Natal Oikoumene. Alai lalap marhobas dohot marpesta, jotjot do masa, Jesus na gabe sintuhu ni Natal i simbil do sian pamerenganna. Ise jala boha do Ibana, dia do hinarohonNa, ndang diboto; aha do binoanNa jala dia do na pinangido ni rohaNa sian ganup jolma, ndang dirohahon. Ala ni i lam simbil ma Jesus i sian nasida, ai ndang tagamon olo Ibana sorang tu angka na gulutan rohana di hariburon, tu angka na marhatuahon diri holan ala ni pesta dohot parsaulianna, alai na so mangarohahon Ibana sandiri. Tu angka sisongon i dohononNa do tahe songon nidok ni si Amos: “Huhagigihon, biasan Ahu mida angka ari rayamuna, jala ndang dihalomohon rohangKu angka luhutanmuna. Paholang ma sian Ahu hagunturon ni angka endemuna, jala ndang lomo roha ni pinggolHu umbege soara ni sordammu.” (Am.5:21,23)

Read More..

Advent-2

SERMON JAMITA TU MINGGU ADVENT-II, 6 DESEMBER 2009
Mal.3:1-4

Patujolo

Panurirang Maleaki mangula do di tano Juda dung salpu habuangan Babel.
Nunga adong bagas joro (pat.3:1, 10). Dipungka halak na mulak sian habuangan i do muse pajongjong joro i di taon 520 sM jala sidung ma i di taon 516 sM. Mamungka sian i, berlangsung ma muse pameleon di langgatan di joro i na niulahon ni angka malim (pat.1:7; 2:1). Tardok sega do moral ni bangso i hatiha i, ala na so hombar panghirimonnasida tu kenyataan. Di hamumulaknasida tu tano i, mansai timbo do semangat dohot panghirimonnasida. Alai dung manang na sadia leleng ndang jumpang hadumaon songon na hinirimnasida, ganggu ma na deba di asi ni roha ni Debata (pat.1:2). Ndang parduli be nasida di patik ni Debata, ai gabe adong ma na maniranghon na niolina laho mambuat boru sipelebegu. Pangalaho i mansai tangkas do i dialo si Esra dohot si Nehemia na mangula di Juda di sekitar taon 450 sM. Dipaksa tahe angka baoa sisongon i maniranghon tungganeboruna boru sileban i. Sian i boi ma simpulhonon, na mangula do si Maleaki on di parholangan ni taon 516 sM tu taon 450 sM. Tangkasna, marhira di parmulaan ni abad-5 sM.

Hatorangan

Dipungka do turpuk on dohot hata: Ida ma. Na marlapatan do i, adong pardomuanna tu ayat na di jolona, i ma bd.2:17. Disi ditaringoti do hasohaporseaon ni halak Juda, ai didok nasida do, na denggan jala lomo do roha ni Debata di siula hajahaton, jala ala ni i ndang tagamon be Ibana mandabu uhum. Di turpuk on, dialusi do i, didok, naeng ro ma Debata manopot bangso i. Hombar tu sangkap i suruonNa ma jolo suruanNa (Hbr. mal’aakiy/my messenger/utusanKu) laho padirihon dalan di joloNa. Molo naeng ro sada raja tu sada luat, somalna, sai jolo disuru do patujolona paturehon nasa na mardomu tu harorona i. Songon i ma Debata marsuru suruanNa laho padirihon bangsoNa asa rade manjangkon Ibana. Sipatureonna do harohaon ni bangso i asa mangantusi di lapatan ni hasesaan ni dosa dohot haluaon. Ise do suruan i? Di bd.3:23 didok Panurirang Elia. Tontu do, ndang Panurirang Elia na martaringot di buku Rajaraja i non i mulak mangolu, alai halak na asing do. Angka jolma na satingki dohot si Maleaki ro di sundut angka na ro di pudina, sai boi do marnida panggohion ni panurirangon i di diri ni sasahalak suruan na mangula di bagasan tondi dohot hagogoon ni si Elia.

Ro do Tuhan i ‘raphon’ suruan ni parpadananNa (Hbr. uwmal’ak habariyt/the messenger of the covenant/malaekat perjanjian). Ise do i? Adong do na mangarajumi na suruan na nidok ondeng do i. Alai toropan do mangantusi i songon panggoarion na asing ni Tuhan i. Sipata dipapatar Debata do diriNa marrumang surusuruan. Marasing do i sian na papatar diri marhite surusuruan. Molo di na parpudi on, manghatai do surusuruan i atas goar ni Debata na marsuru ibana (pat.1 Mus.21:17 du), alai di na parjolo i atas goarNa sandiri (pat.1 Mus.16:7 duu; 22:11 duu). Ro do Tuhan i laho mamongoti joroNa. Nunga nidok di jolo, di tingki i, nunga dipajongjong bangso i muse joro i. Ndang apala songon uli dohot tongam ni na pinajongjong ni si Salomo uju i. Ndang adong be disi poti parpadanan na songon tanda kehadiran ni Debata di tongatonga ni bangso i. Ala ni i gabe menek do roha ni bangso i, lumobi angka na sanga dope marnida joro na parjolo i. Toho do ulaning hadir jala mian dope Debata di joro i? Si Maleaki mandok dison, tompu ma ro Tuhan i tumopot joroNa. Na nidokna disi, nang pe so songon na parjolo i uli dohot tongam ni joro i, nang pe so disi be poti parpadanan i, jala nang pe so disonggopi ombun hamuliaon (shekinah) ni Jahowa (pat.1 Raj.8:10-11), unang ma pola gabe menek roha ni bangso i ala ni i, ai na ro ma Tuhan i jala maringan disi. Taringot tu haroroNa i sampe do dua hali i dihatahon dison. Na mangondolhon sintongna do i; ndang gaitgait i, alai tibu nama i masa. Na gabe apulapul ma i tu angka na malungun dope di hajojonokNa, angka na so mangapian dope di parjahat dohot di hajahatonna.

Haroro ni Tuhan i dipahami si Maleaki do i songon ari ni Jahowa. Konsepsi ari ni Jahowa (ari ni Tuhan i) mulakulak do i tarjaha di Padan na Robi. Ari hasiapon na sian Jahowa do i (Jes.13:6; Joel 1:15), ari na sogir ala ni parpiarpiar ni rimas ni Jahowa (Jes.13:9), ari hamusuon (Hes.13:5), ari partubolan tu angka parbegu (Hes.30:5), ari na bolon jala na songkal (Joel 2:11; Sep.1:14), jala ari haholomon (Am.5:18, 20). Maradophon Ibana di haroroNa i, ndang adong na manahan jongjong. Ndang adong na tigor nanggo sada, sude do pardosa jala parhahurangan (pat.Ps.143:2). Ala ni i, sasintongna nian, sude do ingkon mago. Alai tuani ma, ndang ro Ibana laho mangalengsehon saluhut, na papitahon do. Di na papitahon i tutu, adong do na ingkon dilengsehon manang diambolonghon. Suman tu api ni panopa (refiner/pemurni logam) na mangarotonghon deba sian bosi (logam) na pinapitana i, dohot songon sabun ni panunsi na melarutkan angka na rotak na lohot di pahean na sinunsina, songon i ma Debata mangalengsehon jala mangambolonghon angka parjahat asa diri di Ibana sada bangso na ias jala na ture, na bonar jala na badia.

UlaonNa na papitahon i pungkaonNa do sian bagas joro, sian tongatonga ni angka malim manang halak Lepi. Di bd.1:7-8 ditaringoti do na diboan angka malim do tu langgatan ni Debata sagusagu na ramun, jala dipelehon nasida do pinahan na mapitung, na pangpang, dohot na marsahit. Sian i tarida naung sandok mago do parbinotoan di na denggan sian na sabangso i. Nunga mago i sian ruas, ai diboan nasida do pelean na so hombar tu patik i; nunga mago i dohot sian malim, ai ndang ditulak nasida i, dijalo do jala dipelehon. Alai boi do jumpang dope parbinotoan i di ruas, ai diboan nasida do angka na hombar tu patik ni Debata, alai digonti malim i ma i dohot na roa, gabe di nasida ma angka na denggan i. Ia naeng pita bangso i ingkon barani do angka malim maminsang dohot manulak halak angka na naeng mamelehon na maralo tu patik i, ingkon olo do nasida mamodahon dohot manjalo jala mamelehon holan angka na denggan, jala ingkon na marpangalaho do nasida di bagasan habadiaon, hatigoran dohot hasintongan. Molo dung songon i tarhalomohon Debata ma hajongjongan dohot ulaonnasida songon siboan pelean sipanganon di Jahowa di bagasan hatigoran. Hapitaon ni angka malim manang na boha pe marhinorhon do i tu hapitaon ni bangso i, dung i tarhalomohon Debata ma muse angka pelean ni bangso i.

Sipahusorhusoron

Padua minggu on ma dung na bongot hita tu Advent di Taon Parhuriaon na tadalani on. Di Advent-1 na di ari Minggu na salpu i, diondolhon do tu hita hadirion ni Jesus Kristus na ro i. Siparmonang do Ibana, Raja ni Hadameon, Raja ni angka raja jala Tuhan ni angka tuan, Bintang Sipaias na marsinondang i. Nuaeng, di Advent-2 on gumodang ma rohanta ditaiti tu sangkap ni haroroNa i. Hombar tu turpuk on, na ro do Ibana laho mamongoti joroNa dohot laho papitahon bangsoNa. Andorang so haroroNa i, didok, jolo ro do si Elia laho paturehon dalan di joloNa. Di diri ni si Johanes Pandidi, nunga digohi be bagabaga i (Mat.17:10-13). Ibana do na targoar patujolo ni bohi ni Tuhan i (Luk.1:76); soara ni na manjoujou di halongonan na mandok: “Pature hamu ma dalan di Tuhan i; pahornop hamu ma sidalananNa i” (Mat.3:3). Rohanta do na nidokna disi, i do sipaulion jala sipatureonta hombar tu na nidokna i: “Pauba hamu ma rohamuna, ai nunga songgop harajaon banua ginjang i” (Mat.3:2 par). Roha do pusat ni ngolu. Jadi, paubahon roha mandok, paubahon ngolu. Ndang hamubaon na pasumansumanhon manang na paulaulahon, ingkon na sian nasa roha do, sian nasa gogo dohot sian nasa tondi. Apala i ma na disoarahon tu hita di Minggu on, naeng hita gabe jolma angka na muba roha. Dia ma konkritisasi ni hamubaon i? Marojahan di turpuk on, saotikotikna adong dua na boi dohonon, i ma:

Na parjolo, padirihon ngolunta asa gabe joro parmianan ni Tuhanta na ro i. Hombar tu na Didok si Maleaki di jamita ari on, naeng ro do Tuhanta i laho mamongoti joroNa. Hita do joroNa i, bagas habadiaonNa; marsasahalak (pat.1 Kor.3:16; 6:9; 2 Kor.6:16) manang pe marsasapunguan (pat.Eps.2:21). Sadalan tu na nidok ni si Johanes di barita ni inkarnasi i na mandok: “Gabe daging ma hata i jala maringan di tongatonga ni hita on” (Joh.1:14a), naeng bongotanNa do hita jala ingananNa; naeng saor Ibana tu hita, gabe Immanuel, na mandok: Donganta ma Debata (Jes.7:14b; Mat.1:23b). Tontu do, ndang olo Ibana bongot jala masaor tu halak na so badia, manang sorang jala maringanan di tonga ni punguan na sorat binahen ni parminumon dohot parmabuhon jala na pasahat diri tu pargadombuson. Apala i ma siparrohahononta di Advent on asa unang madabu hita tu panarihon ni roha di angka na marhanonaan tu ruhutruhut ni pardagingon sambing, isara na parade pahean na arga jala na uli asa boi tampil percaya diri molo so ingkon dohonon manenganenga di parpestaan, manang na parade sipanganon dohot siinumon angka na tabo asa boi merasa bangga molo so ingkon dohonon marginjang ni roha ala naung boi memuaskan halak di angka pesta na pinatupana. Ala ni i, tapasiding ma na songon i, alai taparade ma di Ibana roha dohot ngolunta na marhabadiaon, na marhatigoran jala na marhasintongan.

Na paduahon, mangaradoti hapitaon ni parsombaon. Di tingki ni si Maleaki diboan angka malim do sagusagu na ramun tu langgatan ni Jahowa, jala dipelehon do angka pinahan na mapitung, na pangpang, dohot na marsahit. Mardomu tusi dilumbahon si Maleaki do na papitaon ni Debata do parjolo angka malim, dung i marhinorhon ma i muse tu hapitaon ni na sabangso i. Di haroro ni Tuhanta Jesus Kristus, i pe nunga dipatulus, ai mangihuthon parpaboa ni Evangelis Johanes, di angka ari na parjolo ni hapapatarNa di tongatonga ni natorop dope, dipaias Ibana do bagas joro i (Joh.2:13 duu). Siparrohahononta ma dohot i di Advent on dohot di Natal na naeng ro. Ndang diholomohon Tuhanta parsombaon na asal berlangsung, na so ojak jala na so diulahon di bagasan habadiaon, hatigoran dohot hasintongan. Taringot tu angka kebaktian manang perayaan Natal ma rupani, na godang patujolohon hariburon, hiburan manang entertainment dohot parsaulian tano on, isara hadiah dohot konsumsi Natal, atik boha do ingkon dohonon ni Tuhanta i songon naung nidokNa tu halak Israel uju i: “Dihagigihon rohangKu do angka poltak ni bulan dohot angka tingki pararirayaonmuna” (Jes.1:14a), jala di na asing muse: “Paholang ma sian Ahu hagunturon ni angka endemu, jala ndang lomo roha ni pinggolHu umbege soara ni sordammu” (Am.5:23). Ala ni i, tapasiding ma na sogon i, taorom ma angka hisaphisap ni roha sibuk, na maralo dompak partondion (1 Ptr.2:11), alai marpesta ma hita di bagasan hapolinon dohot hasintongan (1 Kor.5:8). Parpestaon sisongon i do na gabe panindangion tu angka na di balian, gabe dohot nasida pasangaphon Tuhan i (1 Ptr.2:12).

jkt.28.10.2009/mvs
Read More..