05 Trinitatis

SERMON JAMITA TU MINGGU 05 DUNG TRINITATIS, 4 JULI 2010
1 Musa 9:8-17

Patujolo

Dung ditompa Debata jolma i, jalo do nasida mardosa. Hatop situtu do rarat jala deak dosa i di tano on, holan na jat nama tubutubu ni roha ni jolma ganup ari (1 Mus.6:5). Ala ni i pola do disolsoli Debata rohaNa ala na tinompaNa i jolma di tano on jala lungun rohaNa (1 Mus.6:6). Alai ndang tagamon talu Ibana bahenon ni dosa. Di barita ni aek na sumar, digombarhon do manang songon dia pangalo ni Debata di dosa dohot pardosa. Diuhumi do pardosa i, diripashon. Ala jolma do mandataris ni Debata di atas ni saluhut na tinompa, na mangonai do uhum i dohot tu nasa na mardaging, ai ripas do nang angka i sian tano on. Nang pe songon i, ndang sundat anggo tahi ni Debata na taringot tu haluaon ni jolma i, ai ditebahon do si Noak raphon keluargana, jala dung salpu aek na sumar i dipahot do padanNa tu nasida paboa na otapan jala pasurutonNa rimas dohot uhumNa sian nasida songon na martaringot di turpuk on. Sarupa tu uhum i, padan haluaonNa i pe na marhahonaan do dohot tu sandok na tinompa.

Hatorangan

Padan manang parpadanan di mulana i ma pardomuan ni manang piga pihak na so dos (perikatan antara para pihak yang tidak sama). Pihak na gumogo, mangarahuthon dirina tu pihak na gumale laho paluahon jala mangondingi. Parpadanan sisongon i do na pinahot ni si Josua uju i tu halak Gibeon. Na metmet jala na gale do halak Gibeon, ndang imbang tu bangso Israel na bolon jala na gogo (pinargogoan ni Tuhan) i. Alai marhite angkal na tangkas direncanahon halak Gibeon i, gabe dirahuthon halak Israel do dirina di bagasan sada padan tu bangso i, dipalua nasida, dipangolu jala diondingi (Jos.9:15 duu). Padan ni Israel sandiri do i, ndada parbue ni permukatannasida dohot halak Gibeon. Sadalan tusi, ndang adong manang aha syarat ni parpadanan i sigohan ni halak Gibeon; ndang adong huhut sanksi sihonahonon tu nasida ala ni pangalaosion na tertentu. Molo gabe diuhumi pe nasida gabe parsoban dohot partuaek di langgatan ni Jahowa, ala ni angkalnasida i do i, nda tung ala ni pangalaosion di hatontuan ni padan i. Alai anggo bangso Israel, molo dilaosi nasida padan i, ndang boi so mangonai tu nasida uhum. Di tingki ni Raja David rupani, mangonai do tu nasida sapata ni halak Gibeon na binunu ni Raja Saul (2 Sam.21:1 duu). Songon i ma Debata dison, di bagasan dohot marhite padan na pinahotNa sandiri, dirahuthon Ibana do diriNa tu jolma, tu nasa na mardaging dohot tu sandok portibi on. PadanNa sandiri do i na diojakhon di asi dohot lomo ni rohaNa sambing. Ndang jolo hundul Ibana raphon jolma i laho manaringoti dohot martahihon; ndang jolo disungkun jolma i manang na ringkot rohanasida di haluaon, alai Ibana sandiri do na martahihon, na mamungka dohot na pahothon. Na ripe manjalo do anggo jolma i rap dohot portibi on jala na ripe marsaulihon pasupasu di bagasan parpadanan i.

Isi ni parpadanan i, na so jadi be ro aek na sumar laho mangaripashon nasa na mardaging dohot tano on. Nang pe naung diparo Debata aek na sumar i, ndang mintop anggo dosa i, hot do jala sai mangararati. Lam tu jorbutna tahe. Di 1 Mus.11 rupani, digombarhon do puncak ni pangaloon ni jolma na mardosa i tu Debata, ai dipajongjong do tungkup Babel na disangkapi sahat ro di langit punsuna, asa boi nasida mandungdung bahkan mangonjar Debata sian habangsaNa. Na marlapatan ma i, salpu aek na sumar i pe, di toru ni rimas ni Debata do tongtong jolma dohot pahanpahanan ro di sandok portibi on. Alai dison ma Barita na Uli i, di bagasan dohot marhite parpadanan na pinahotNa i dirahuthon Debata do diriNa tu jolma i. Ala naung gabe donganNa saparpadanan jolma i, ndang dilaluhon be rimasNa tu nasida, alai diotapi nama jala dipasurut; dipalua jolma i sian panginona ni uhumNa, diondingi jala dipangolu, dibagabagahon na so paroonNa be aek na sumar laho mangaripashon nasa na mardaging ro di sandok portibi on. Debata do na manompa langit dohot tano on, di toru ni huasoNa do hukum dohot gejala-gejala alam manang peristiwa-peristiwa kosmis. Na mangula do Ibana marhitehite angka i laho pangoluhon dohot laho manguhumi portibi on. Di bagasan dohot marhitehite parpadananNa i dibagabagahon do na kendalihononNa angka i jala ndang paloasonNa laho manudahon jolma ro di sandok na tinompa i sian tano on.

Pos do roha disi, ai Debata sandiri do na mandok. Haposan do Ibana, molo Ibana mandok ndang tagamon so pasautonNa (pat.4 Mus.23:19). Ibana sandiri do jaminan ni hasisintong dohot hasasaut ni bagabagaNa i. Nang pe songon i, dihalomohon do mangalehon tanda ni padanNa i. Somalna antong, taringot tu pangalaho angka na so tarida jala na so tarjama, diharingkothon halak do tanda. Padan i ma rupani, ndang tarida i jala ndang tarjama, alai adong. Laho paingothon dohot manghilalahon haadongonna, dibahen ma tandana. Tintin rupani, di sada pasangan na naeng marbagas. Ndang tanda i padan i, ai asing do tanda sian na tinandaanna. Alai marhite na marnida tanda i dipaingot do jolma i tu haadongon ni padan i jala jumpangan makna psikologis nasida sian i. Songon i ma dison, dibahen Debata do halibutongan di ombun bahen tanda ni parpadananNa. Halibutongan, hata heberna qesyet. Laos i do hata na dipangke tu sior (busur/bow). Pamanat ma rupani salinan Alkitab na mamangke busur, ndang pelangi. Secara fisik, suman do antong sior tu halibutongan; rap mandenggal (melengkung). Molo dipillit Debata ma i gabe tanda ni parpadananNa, na marlatarbelakang do i di suasana ni pardomuanNa tu jolma. Ala ni dosa i, tardok na ‘masimusuan’ do Debata dohot jolma i, marporang. Di parporangan i mamangke sior do Debata laho manembahi jolma i (pat.Job 6:4). Alai dison, ala naung dirahuthon Debata diriNa tu jolma i di bagasan parpadananNa, ala naung diotapi jala dipasurut rimasNa, jala ala naung dipalua jolma i sian panginona ni uhumNa jala naung diondingi, gabe dipasohot Ibana ma na manembahi jala disangkothon ma siorNa i di ombun. Taringot tusi didok do di ay.14-15a: “Molo Huparo ombun tu tano on, sai tarida ma halibutongan i di ombun, jadi ingotonHu ma padan na Hubahen i tu hamu,” jala di ay.16 diulahi dope i, didok: “Sai bahenonHu do halibutongan i tu ombun, asa Hubereng ibana marningot padan salelenglelengna binahen ni Debata.” Ndang na mandok na boi lupa do Debata di bagabagaNa, ndang! Alai hombar tu anthropomorphisme ni ni Padan na Robi, digombarhon do Debata dison suman tu manisia. Songon na nidok nangkin, marhitehite na marnida tandana, gabe marningot do jolma di padanna, songon i ma ma digombarhon dison, marhitehite na marnida halibutongan i gabe marningot Debata di padanNa tu jolma dohot tu nasa na mardaging di tano on. Anggo ala ni harararat ni dosa na so dung lam surut i nian, dohot marningot sogo ni roha ni Debata maradophon dosa na so dung mimbar i, ndang boi so ingkon paroonNa aek na sumar ganup ari. Alai ala ni padanNa na sai niingotNa, diotapi jala dipasurut do rimasNa i, ndang diparo be aek na sumar i na tarbahen manudahon saluhut. Nang pe parpadanan ni Debata do parpadanan i, jala na laho paingothon Ibana sangkap ni tandana i, jolma pe na boi jumpangan makna do sian i. Manang sadihari pe diida halibutongan, boi ma jolma i marningot naung marpadan do Debata paboa na so paroonNa be aek na sumar, gabe pos rohana di haluaonna.

Rancangan Homiletis

Dung bongot dosa i tu tano on, di toru ni rimas dohot uhum ni Debata do jolma manisia ro di sandok portibi on. Diuhumi Debata do jolma i marhitehite uhumNa, laos diuhumi marhitehite ni panghorhon ni dosa i sandiri. Ingkon bali nama jolma i sian porlak Eden, jala ingkon hir hodokna mangalului sipanganonna paima mulak muse gabe tano; ndang selaras be ngoluna tu Debata, tu diri, tu dongan dohot tu lingkunganna. Sai di bagasan biar nama jolma i, ai na mangonggop do hamagoan di na saluhut jala manosak hamatean marhitehite angka gejala alam manang peristiwa-peristiwa kosmis. Boha, tongtong nama songon i ingkon mangolu jolma i di bagasan biar maradophon lingkunganna? Torus nama ngoluna gabe paraloan tu alam na hatop manang lambat marujung di halelengsena? Torus nama jolma i gabe meammeam ni gejala-gejala alam manang peristiwa-peristiwa kosmis na marobur andorang so simpul dope ombas ni parmeamon i? Jamita on mandok, ndang; alai adong do masa depan na ojak di padan ni Debata.

Di jolo ni turpuk on, diuhumi Debata do jolma marhitehite aek na sumar. Ala jolma i do mandataris ni Debata di atas ni sandok na tinompa, na mangonai do uhum i tu saluhut na mardaging, ai ripas do nang angka i sian tano on. Siangkup ni uhum, bentuk ni pangaloon ni Debata do aek na sumar i tu dosa. Boha pe deak ni dosa i, ndang talu Ibana bahenonna, alai sai na otapanNa do dosa i, jala uhumanNa pardosa i. Nang pe songon i, anggo sangkap hatuaonNa na taringot tu jolma ndang sundat, ai ditebahon do si Noak raphon dongan saripena, angka anak dohot parumaenna. Dung i di jamita ari on, marpadan do Ibana paboa na so paroonNa be aek na sumar na tarbahen manudahon saluhut.

Di pangantusionta nuaeng on, ia padan i ma pardomuan ni manang piga pihak na dos (perikatan antara para pihak yang sama). Pajongjonghon sada padan, ingkon rap do para pihak martahihon, rap manaringoti rumang dohot hatontuanna, rap pahothon jala dos do hajongjongannasida di parpadanan i. Ndang songon i anggo di mulana, parpadanan i ma pardomuan ni manang piga pihak na so dos (perikatan antara para pihak yang tidak sama). Pihak na gumogo do na pahothon padan i, na mangarahuthon dirina tu pihak na gumale laho paluahon dohot mangondingi. Songon i do padan ni Debata na martaringot di jamita on. PadanNa sandiri do i, sahalakNa do na martahihon, na manontuhon isina jala na pahothon. Holan na manjalo do jolma jala marsaulihon pasupasuna raphon portibi on. Ra dohononta do, parpadanan sepihak do i. I do tutu, sepihak do; alai nang pe songon i ndang disangkapi jala dipahot Debata i laho mangarugii jolma, laho paluahon do jala pangoluhon. Di bagasan dohot marhitehite parpadananNa i dirahuthon jala dipasaor Ibana diriNa tu jolma i, diotapi jala dipasurut rimasNa sian nasida. Pos do roha disi, ai Debata sandiri do na manghatahon. Ibana do jaminan ni hasisintong ni padanNa i. Alai nang pe songon i, dihalomohon rohaNa do mambahen tandana, i ma halibutongan. Siangkup ni na paingothon Ibana tu padanNa i, na marguna do tanda i nang di jolma; manang na sadihari pe diida halibutongan i, diboto ma naung marpadan do Debata paboa na so paroonNa be aek na sumar na tarbahen manudahon saluhut.

Padan ni Debata na tu si Noak i na marlaku do i tu sandok manisia sian sude tingki dohot inganan, tarmasuk hita angka na mangolu di tingki on dohot di inganan on. Ibana sandiri sian asi dohot lomo ni rohaNa do na mangulahon i, mala ni rohaNa do i ndada parbue ni musyawarah dohot mufakatta tu Ibana. Diboto Ibana do tompanta, diboto do orbuk hita, gabe dijoloani ma mambahen na dumenggan di hita. Ibana do na manompa langit dohot tano on, ibana nampunasa dohot na mangaramoti. Ndang dung dipasombu Ibana portibi on mardalan di toru ni hukum-hukumna sandiri. Aut tung sura songon i ndang boi so gabe meammeam hita jala mago bahenon ni gejala-gejala alam manang peristiwa-peristiwa kosmis. Portibi on sandiri pe, ndang boi so mansai tibu gabe marokso. Alai di bagasan dohot marhite parpadanan na pinahotNa i, dikendalihon Ibana do sasudena i asa unang merajalela jala gabe manudahon saluhut. Holan ala ni i do gabe adong masa depan ni hajolmaon jala terjamin kelestarian ni alam ciptaan.

Didok na mandok, silehonlehon tanggungjawab do i. Songon i ma dison, tu hasasaut ni padan ni Tuhan i, adong do tanggungjawabta. Mardomu tusi, na parjolo naeng ingotonta, i ma na so dipaian Debata hita jolma di portibi on songon makhluk na tersendiri, alai na di bagasan pardomuan dohot keserasian tu na asing do, tu pahanpahanan, suansuanan dohot tu alam. Bahen hangoluan dohot hasonanganta ringkot do di hita pahanpahanan, suansuanan, tano, aek, udara dohot na asing. Ala ni i sisarihonon jala siulahononta do asa jumpang Hatigoran, Pardamean dohot Keutuhan ni Natinompa [Keadilan, Perdamaian dan Keutuhan Ciptaan (KPKC)/Justice, Peace and Integrity of Creation (JPIC)]. Sialoon jala sipasidingonta do perburuan dohot pembunuhan tak terbatas tu pinahan, pembalakan dohot penggundulan hutan na so diimbangi dohot reboisasi, pencemaran ni tano, aek dohot udara, eksploitasi ni sumber-sumber daya alam na so martanggungjawab dohot perusakan ni lingkungan. Unang so taboto, nang pe so diparo Debata be aek na sumar, ndang hurang parmaraan dohot hasesega na mangonai tu na tinompa ala ni hasalaan ni jolma. Ndang na na haetongan hita godang ni na mate dohot na sega ala ni banjir na sai masa di torop inganan sian tingki tu tingki. Godang harugian ala ni pencemaran ni tano, aek, dohot udara. Ragam parmaraan ala ni kerusakan ni lingkungan. Lam tarhilala do nuaeng pangarontan ni perubahan iklim dohot pemanasan global. Luhutna i ndang simbil sian hasalaan ni jolma, isara na mangarabasi tombak. Paboa na tajalo jala taundukhon padan ni Debata, sipatureonta do angka i.

Unang hita sala, padan ni Debata na tu si Noak na tatean sahat tu tingki on ndang holan na marhahonaan tu haluaon tano on i, alai dohot do tu haluaon na saleleng ni lelengna na di bagasan dohot na marhitehite Tuhanta Jesus Kristus i. Ia diotapi jala dipasurut Debata pe rimasNa, dipalua jolma i sian panginona ni uhumNa, jala dipasiding portibi on sian kehancuran asa sahat do tu ari ni Kristus Jesus. Disi, pahimpuon ni Debata ma sandok hagogoonNa maralohon dosa i, jala usehononNa sandok rimasNa manguhumi pardosa i. Tu Kristus i do i diulahon, ai na gabe dosa do Ibana (pat.2 Kor.5:21) jala na gabe singkat ni saluhut pardosa dijadihon Debata. Nasa na porsea di Ibana malua do i jala mangolu saleleng ni lelengna.

jkt.23.06.2010/mvs

Read More..

04 Trinitatis

SERMON JAMITA MINGGU 04 DUNG TRINITATIS, 27 JUNI 2010
1 Ptr.3:13-17

Patujolo

Surat 1 Petrus on ditongoshon panurat do tu angka huria na marserak di luat Pontus, Galatia, Kappadosia, Asia dohot Bitinia. Luat na mansai bidang do i na marhapeahan di utara ni pegunungan Taurus. Digoar do nasida angka na marserak (tersebar), paisolat (pendatang) jala na tarpillit (yang dipilih). Angka panggoarion ni Jahudi do i. Nasida do bangso na pinillit ni Debata bahen parjambaranNa. Dung habuangan Babel marserak do bangso i jala maisolat di na so luatnasida. Luat perserahannasida i digoar ma i diaspora, lapatanna parserahan (ro sian hata Gorik diaspeirein/to scatter/manerakhon/manaburhon, isara boni). Lam tu serakna ma nasida muse dung hasesega ni huta Jerusalem. Ndang na mandok na Kristen asal Jahudi do angka huria i, ndang. Sian panindangion ni 1 Petrus on sandiri torang do na Kristen na sian parbegu do nasida (1:14; 2:10; 4:3). Jadi, na gabe dihonahon do panggoarion ni Jahudi i tu nasida. Dihonahon, ai naung gabe Israel na imbaru do huria i, panggohion ni sangkap pamilliton dohot panjouon ni Debata na tu Israel (pat.2:9). Ndang binoto manang na ise na mamaritahon Barita na Uli di angka luat i. Na torang, ndang si Paulus, ai ndang dipaloas Tondi ni Jesus i ibana laho tusi (pat. Ul.16:6). Adong do na mamingkir si Petrus do na mamungka angka huria i. Alai holan surasura ni roha do i, na so didukung bukti historis. Mangihuthon Ul.2:9, adong do halak Kappadosia, Pontus dohot Asia na dohot marnida jala umbege na masa di Jerusalem di Pentakoste i. Atik boha nasida do na parjolo mamaritahon Barita na Uli i di luat i.

Ditongos do surat on laho mangapoi dohot manghatindanghon paboa naung di asi ni roha ni Debata na sintong i do huria i jongjong (5:12). Di bagasan Kristus naung hehe i, naung ditubuhon Debata do nasida paduahalihon asa tu panghirimon na mangolu (1:3-4). Apala i do na parjolo na ingkon halashonon nasida. Molo dapot i di huria i, ndang gabe mandele be nasida nang pe ingkon manaon ragam ni parungkilon ala ni haporseaon i. Di tingki i, nunga masa pangaleleon tu halak Kristen, jala lam leleng lam manosak do i nang tu huria angka na gabe alamat ni surat 1 Petrus on. Hombar tusi dipasingothon ma tu nasida paboa parungkilon na tinaon martiruan tu Kristus i (2:21), na patogu haporseaon do i, ndada na mangagohon. Di bagasan sitaonon i na gabe sangkambona do angka na porsea tu Kristus i (pat.Rom 6:5), asa gabe donganNa sogot di hasangapon (4:13; pat.Rom 8:17). Ala ni i ingkon las do roha ni huria i di sitaonon i (4:13). Ndang na mandok pasrah, alai ingkon hangoluhononnasida do tongtong parange na denggan maradophon angka parbegu (2:12), huhut hobas mangalusi angka na manungkun taringot tu na hinirim ni rohanasida (3:15).

Hatorangan

Dipungka do turpuk on marhite sungkunsungkun na mandok: “Jala ise do na manjahati hamu molo diringkoti hamu na denggan?” Tu sungkunsungkun on sasintongna holan sada do alus, i ma: “Ndang adong.” Manang na di dia pe di portibi on, di masyarakat etnis-budaya manang sosio-kultural dohot reliji dia pe adong do hukum moral na mandok na so sijahatan siulahon na denggan. Alai realitana ndang sai songon i, ai sai adong do halak na manjahati siringkoti na denggan. Na marbonsir do i sian parasingasingan ni pangantusion taringot tu na denggan i. Relatif do pangantusion taringot tu na denggan i, tarihot tu tingki dohot tu inganan. Na denggan di halak na jolo, ndang sai denggan be i di halak nuaeng; dosa bolon sibursikhonon do pangalangkupon di halak Batak, alai tanda ni keperkasaan jala sipapujipujion do i anggo di halak Dobu. Songon i ma paasingasing pangantusion taringot tu na denggan i di ganup masyarakat etnis budaya manang sosio kultural dohot reliji na paasingasing i. Tutu, siangkup ni angka na marasing, adong do tong angka na dos. Angka ulaon na pangoluhon rupani, manang di dia pe dirajumi halak do i na denggan. Alai nang pe songon i ndang sai malua siula na denggan i sian panjahati. Parsoalanna, ndang holan hukum moral suhatsuhat ni sasahalak laho menyikapi sadasada ulaon, adong dope na asing, isara selera, kepentingan manang sentimen. Unang be di pardomuan antar masyarakat, gari di tongatonga ni sada masyarakat na maniop sistem nilai na dos gari boi dijahati halak angka siula na denggan holan ala ni sentimen pribadi manang kelompokna. Songon i do pengalaman ni halak Kristen di torop inganan na melatarbelakangi 1 Petrus on. Maniru Jesus Kristus i, dihangoluhon nasida do parange hatigoran, isara halambohon, haserepon, haburjuon, dohot angka na asing; alai dijahati halak do nasida, dimusui, dilelei jala dipaburuburu.

Disadari panurat on do realita i, gabe dipaingot ma huria i taringot tu lapatan positif ni sitaonon i, didok: “Alai molo tung tumaon na porsuk hamu ala ni hatigoran, na martua do hamu disi.” “Molo,” ninna. Sian i jumpang do kesan na so masa dope sitaonon i tu angka huria hasahatan ni surat 1 Petrus on (pat.1:6). Alai rupa, tandatanda tusi nunga lam tarida, jala godangan kemungkinan sai na mangonai do i tu nasida. Molo masa i, manaon nasida tutu ala ni hatigoran i, na martua do nasida. Dia hatuaonna? Marhite na manaon sitaonon i gabe paniru na porsea i di Kristus i (pat.2:21), manang songon na nidok nangkin (ida Patujolo), gabe sangkambona dohot Kristus i, jala ala ni i gabe donganNa nasida sogot nang di hasangapon; saor manang ambil bagian nasida di sitaonon ni Kristus Jesus i, jala ala ni i gabe dohot marlas ni roha di ari sogot (4:13). Pangantusion di lapatan dohot panghirimon di parbue ni sitaonon na songon i gabe gogo do i di angka na porsea di na manaonhon parungkilon i gabe malua sian biar dohot gaor ni roha. Gabe las tahe rohana, ala tau nasida di roha ni Debata manaon lealea ala hatigoran i (pat.Ul.5:41). Hombar tusi ma dipasingothon dison: “Unang ma gaor rohamuna bahenon ni biar ni roha mida nasida.”

Ihut tusi didok: “Alai parbadiai hamu ma Kristus, Tuhan i, di bagasan rohamuna.” Na badia do Kristus i, Anak ni Debata (Luk.1:35). Na sian diriNa sandiri do habadiaonNa i, ndada ala ni na pinarbadiaan ni jolma. So diparbadiai jolma pe Ibana, tong do Ibana na badia. Nang pe songon i diigil jala dihalomohon rohaNa do asa parbadiaan ni na porsea i Ibana di bagasan rohana, lapatanna okuanna habadiaonNa. Roha do pusat ni ngolu. Jadi, na marbadiahon Kristus di bagasan roha, mandok marbadiahon Ibana sian sandok ngolu. Diparhatopot jala dihatindanghon Ibana Tuhan sian sandok hadirion manang eksistensi ni hajolmaonna. Mardomu tusi dipasingothon do muse asa tongtong nasida hobas mangalusi nasa na manungkun nasida taringot tu na hinirim ni rohanasida. Na hadir do hakristenon i di Harajaon Rom na manjangkon hasipelebeguon songon ugamo resmi. Porsea do nasida di dewa-dewi kafir, jala sada sian angka i do Kesar Rom. Di tingkina, dihaporseai halak do rupani Kesar Agustus sipalua portibi on, na pasonggophon tingki na imbaru. Di tonga ni masyarakat kafir i ma nuaeng hadir halak Kristen na mangojakhon haporseaon dohot panghirimonna di Jesus Kristus na tarsilang. Gabe torop ma na sungkunsungkun taringot tusi. Na deba sian situtu ni rohana, ai naeng botoonna do gumodang taringot tusi, na deba sian sogo ni roha dohot panginsahionna, jala deba nari ala ni hajongjongan dohot ulaonna songon petugas umum dohot angka na asing. Manang na dia pe i, ingkon alusan ni na porsea i do i. Ingkon lehononnasida do alus (Gr. apologian/apologi) na patoranghon tu angka na manungkun, panindangion tu angka na manginsahi, pembelaan tu angka na mangasungi dohot na manguhumuhumi. Ndang asal alus, ingkon na torang do, na berakal budi, na siat tu roha, na marhapistaran jala marhabisuhon. Luhutna i ingkon dipasahat do mardongan lambok ni roha dohot biar. Somalna antong, molo masialusan dua pihak na masialoan, na sada mangasungi dohot manguhumuhumi, na sada mamintori manang membela diri, talpe do ganup madabu tu rimas, marsoara na gogo jala marhata na koras. Ingkon padaoon ni na porsea i do dirina sian i, ingkon ingotonna do, alus na lambok do paombun rimas, alai hata na koras mambahen marsijongjong ateate (Poda 15:1); jala ndang diulahon rimas ni jolma hatigoran ni Debata (Jak.1:20). Ala ni i ingkon pantun do paraluson ni na porsea i, marhadaulaton jala marhahormaton. Patulushon i ingkon adong do di ganup halak parbinotoan na tangkas jala na mendasar taringot tu haporseaon dohot panghirimonna, adong huhut hatauonna patoranghon i di bagasan pandohan angka na bulus jala na haantusan. Asa jumpang i, ingkon ringgas do na porsea i marsiajar laho memperlengkapi dirina.

Angkup ni na mardongan lambok ni roha dohot hahormaton, taringot tu na mangalusi i didok dope: “Unang ma pola marlobok taroktokmuna.” Marlobok (marlobuk/mallobuk), lapatanna bukbak/mabukbak (berdebar-debar); taroktok, lapatanna denyut jantung. Jadi, marlobok taroktok, lapatanna jantung berdebar-debar karena ketakutan. Alai na laos marlapatan do taroktok i panggora ni roha (suara hati/kata hati/hati nurani/kesadaran). Dison, na parpudi i do nidokna. Di na mangalusi sungkunsungkun manang mangadopi tuhastuhas dohot panginsahion ingkon radotan ni halak Kristen i do dirina asa tongtong di bagasan panggora ni roha na denggan (Gr. suneideesin echontes agatheen/having a good conscience/hati nurani yang murni). Siangkup ni na manungkun naung tinaringotan di jolo i, torop do halak na manuhasnuhasi jala na manginsahi halak Kristen uju i. Didok do rupani, angka parjahat do halak Kristen i; sibunu jolma do nasida, dung i diallang nasida ma dagingna jala diinum mudarna di angka parpunguannasida. Disalahartikan nasida do hata na binegena taringot tu formula ni Parpadanan na Badia i na mandok: “Pangan ma, dagingHu do on; inum ma, mudarHu do on.” Mangadopi i – sahali nari – ingkon radotan ni na porsea i do dirina asa tongtong di bagasan panggora ni roha na denggan. Ditubuhon panggora ni roha na denggan i do panghuling dohot sikap na denggan. Molo jumpang na songon i, na boi tarila do na manuhasnuhasi jala na manginsahi nasida. Alai molo tung so diboto pe na maila, tong sai didatdati, unang ma gabe ditadinghon na porsea i panggora ni rohana na denggan i gabe madabu tu tondi pamaloson na manubuhon angka pambahenan na so hinalomohon ni Debata.

Mangondolhon i, di ayat na parpudi didok: “Ai tagonan do hamu manaon haporsuhon ala ni ulaon na denggan, molo tung i lomo ni roha ni Debata; unang ma ala ni ulaon na roa.” Pingkiran on, khususna tu angka hatoban nunga ditaringoti di 2:20. Sai adong do angka hatoban na hona uhum ni indukna ala ni pambahenanna angka na roa, isara na manangko, margabus, manusai donganna hatoban dohot na asing. Ala ni jotjotna hona uhum, pola do hira naung kebal. Gabe dipapujipuji dirina na tahan banting, angka donganna pe songon i, dipapujipuji do ibana ala ni i. Sabalikna, adong do angka hatoban na dipaporsukporsuk indukna holan ala ni na hatoban nasida, ndang ala ni ulaonna na roa. Na boi masa do na songon i tu angka na porsea, manaon na porsuk ndang ala ni ulaonna na roa, tung holan ala ni na Kristen i do nasida. Songon Kristen nian, diulahon do angka na denggan, alai sai diinsahi, dituhastuhasi, dimusui. Molo masa na songon i, ndang simbil i sian lomo ni roha ni Debata; na sian perkenanna do i, jala pasti do adong tahiNa disi. Tumagon do i sian na manaon ala ni ulaon na sala isara ni pambahenan na masalpuhu di na mampartahanhon diri manang di na membela haporseon i. Ndang adong sipujion di angka na hona uhum ala ni hasalaanna, alai na manaon na porsuk ala ni haporseaonna i do asiasi ni Debata.

Rancangan Homiletis

Sitaonon ndang tarsirang i sian ngolu ni jolma. Sasonangsonang ni manisia, sai adong do sitaononna. Molo tung masalpuhu i di roha ni na deba, ra, ndang apala songon i anggo na mangihut on, ganup jolma hea do manaon sitaonon. Marragam do sibonsiri ni sitaonon i. Adong do i na marhahonaan tu hagaleon ni jolma, isara haotoon manang hapogosonna; adong na marhahonaan pambahenanna, isara hajungkaton manang hajahatonna; adong na marpardomuan tu angka na di ruar ni hagogoonna, isara bencana alam manang peristiwa kosmis dohot angka na asing. Manang na ala ni aha pe i, sarupa do anggo panghorhonna, porsuk do i jala dangol. Di turpuk ari on, martaringot do sitaonon ni angka na porsea ala ni ulaon na denggan. Sarupa tu angka na parjolo i, hansit do tong panghorhonna, dangol jala ngotngot. Boha ma halak Kristen mangadopi dohot menyikapi i?

Na parjolo, mangantusi jala manjalo sitaonon i songon asiasi ni Debata. Ditongoshon do surat on tu angka huria na marserak di Pontus, Galatia, Kappadosia, Asia dohot Bitinia. Angka ruas na marharoroan sian bangso parbegu do i. Nunga ditinggalhon nasida angka taon haotoon dohot sangkapsangkap ni roha na roa, taripar nasida tu tingki hatiuron jala marparange di bagasan hatigoran. Alai na gabe talpe do nasida tu sitaonon ala ni i. Di tingki i, nunga masa pangaleleon tu halak Kristen di Harajaon Rom, jala nunga lam tarida tandatandana na laho sahat do i tu huria angka na gabe alamat ni surat on. Jaluk do i nian, ai somalna, manang di dia pe di portibi on dihalomohon halak do siula na denggan. Alai songon i ma pangalahona, na boi manaon do na porsea i ala ni ulaonna angka na denggan i. Molo masa i ndang ringkot gabe gaor roha ni huria i. Ingkon las do tahe rohanasida, ai asiasi ni Debata do i molo tau nasida manaon lealea ala hatigoran i. Na martua do nasida disi, ai marhite i gabe sangkambona nasida tu Kristus i di bagasan sitaonon asa gabe donganNa nasida sogot nang di hasangapon.

I ma na ringkot parrohahonon jala auhononta sian jamita on. Sian tingki tu tingki, di torop inganan di portibi on sai masa do na songon i, manaon na porsea i ala ni ulaonna angka na denggan. Na masa do i ala ni sistem nilai ni portibi na marasing sian sistem nilai ni hakristenon, manang ala ni selera, kepentingan manang sentimen. Ulaon na denggan do rupani na pajongjonghon gareja, ai marhite i boi huria i manghobasi angka ruasna asa mangolu songon sira dohot panondang ni portibi on; ulaon na denggan do na pajongjong dohot manghobashon parsikolaan, ai marhite i boi na porsea i paluahon angka jolma sian haotoon; ulaon na denggan do na pajongjonghon dohot manghobashon pangubation, ai marhite i boi halak Kristen i paluahon jolma sian sahit dohot angka na asing; alai ala ni sistem nilai na marasing, ala ni selera, ala ni kepentingan dohot ala ni sentimen ni portibi on, dihasogohon do i, diambati, dicurigai songon upaya kristenisasi. Nda i na nialaman ni angka donganta di deba inganan di Indonesia on? Molo masa na songon i, turpuk jamita on paingothon hita mandok: “Unang ma gaor rohamuna bahenon ni biar ni roha mida nasida!” Ndang tarbahen portibi on mangintopi Barita na Uli i. Molo gabe mintop huria di sadasada inganan godangan do i ala ni hagaleon di bagasan, ndang apala ala ni hagogoon na sian duru. Saleleng togu huria i marhaporseaon, boha pe hagogoon na naeng mangintopi ndang marnangon i. Marhite sitaonon i, saor jala ambil bagian do hita di sitaonon ni Kristus i; na martua do hita disi, ai gabe dohot hita marlas ni roha di ari sogot. Pangantusion di lapatan dohot panghirimon di parbue ni sitaonon na songon i na gabe gogo do i di hita di na manaonhon parungkilon i gabe malua sian biar dohot gaor ni roha, jala gabe so mansohot patupahon angka ulaon na denggan i.

Na paduahon, marbadiahon Kristus sian sandok roha. Ihut tusi, dipaingot panurat ni surat 1 Petrus on dope huria i, ia manaon pe nasida ingkon na parbadiaan nasida do Kristus, Tuhan i. Na badia do Kristus i. Na sian diriNa sandiri do habadiaonNa i, ndada na sian jolma. So diparbadiai jolma pe Ibana, tong do Ibana na badia. Nang pe songon i diigil do asa parbadiaan ni na porsea i Ibana di bagasan rohana, lapatanna diokui habadiaonNa i, dihaporseai jala dihatindanghon Ibana Tuhan sian sandok hadirion manang eksistensina. Mardomu tusi, ingkon hobas do na porsea i mangalusi na manungkun nasida taringot tu na hinirim ni rohanasida mardongan lambok ni roha dohot biar, jala di bagasan panggora ni roha na denggan.

I ma muse na ringkot parrohahonon jala auhononta sian jamita on. Molo manaon pe hita ala ni haporseaon i, ingkon tongtong do parbadiaanta Kristus, Tuhan i di bagasan rohanta. Ingkon parhatopotonta do habadiaonNa i, ingkon haporseaan jala hatindanghononta Ibana Tuhan jala Debatanta maradophon angka na sungkunsungkun, na manuhasnuhasi manang na manginsahi. Ringkot antusanta, paraloan ni portibi on na tu hita ala ni haporseaon i laos paraloanna tu Kristus i do i, paraloanna tu Tuhan na tahaporseai i. Uju na nilelean ni Saulus (Paulus) na porsea i, nda didok Tuhanta i do tu ibana: “Saulus, Saulus! Boasa leleanmu Ahu?” (Ul.9:4). Taringot tusi ndang boi hita pasrah boti, alai ingkon alusanta do angka sungkunsungkun jala tulahonta angka tuhastuhas dohot panginsahion na tu hita dohot tu Tuhan na tahaporseai i. Ndang na mandok na ringkot ma di Tuhanta i pembelaan manang pembenaran sian hita, ndang. Di sejarah ni teologi rupani, tartanda do na ginoar teodice, i ma upaya ni jolma mangondingi (membela) dohot mamintori (membenarkan) Debata. Alai taboto ma, hita do na mangharingkothon pangondingion dohot pamintorion ni Debata, alai anggo Debata ndang ringkot ondingan jala pintoranta. Nang pe songon i, dihalomohon Tuhanta i do parsitutuonta mangalo dohot mamorangi hajahaton. Ndang marhite polemik mantat rimasrimas, marhite paraluson dohot panindangion na torang do, na berakal budi, na siat tu roha, na marhapistaran jala na marhabisuhon. Luhutna i ingkon pasahatonta do mardongan lambok ni roha, di bagasan biar dohot panggora ni roha na denggan, ai alus na lambok do paombun rimas, alai sabalikna do anggo hata na koras mambahen marsijongjong ateate. Marhite na songon i, na boi tarila do na manuhasnuhasi jala na manginsahi hita. Alai molo tung so diboto pe na maila, tong sai didatdati, ndang gabe tadinghononta lambok ni roha dohot panggora ni roha na denggan i gabe madabu tu tondi pamaloson na manubuhon angka pambahenan na so hombar tu lomo ni roha ni Debata. Ingkon datdataanta do tahe mangulahon na denggan i, ai tagonan do na manaon ala ni ulaon na denggan sian na manaon ala ni ulaon na roa. Asa tarpatupa hita i, ingkon adong do di hita parbinotoan na tangkas jala na mendasar taringot tu na tahaporseai jala tahirim. Na jumpang hita do i marhite hiras dohot ringgas ni rohanta memperlengkapi dirinta marhite na mangguruhon hata ni Debata.

jkt.16.06.2010/mvs

Read More..

03 Trinitatis

SERMON JAMITA TU MINGGU 03 DUNG TRINITATIS, 20 JUNI 2010
Joh.14:1-3

Patujolo

Sabagian sian bagian parjolo ni Hata Partadingan ni Jesus (13:31-14:31) do turpuk on. Dihatahon do i tu sisean i di Bilut Parginjang inganannasida marulaon Paskah. Tongkin nari sirang ma nasida, ai marhitehite sitaonon, parsilangon dohot hamatean na diihuthon haheheon dohot hananaekNa, mulak ma Jesus tu hasangaponNa hian (pat.13:31-33). Alai ndang dapot roha ni angka sisean i non i. Hasopangantusionnasida i tarhilala do di opat sungkunsungkun (pangidoan dohot pernyataan) na nidoknasida menyela panghataion ni Tuhan i (13:36-37; 14:5, 8, 22). Sudena i terjalin do di bagasan jala dohot mewarnai Hata Partadingan i.

Hatorangan

Bonsa do roha ni sisean i. Bonsa, lapatanna marsak (sedih, terharu) manang busisaon (gelisah). Mangihuthon konteksna, adong manang na piga sibonsirina. Parjolo, panjeheon ni si Judas. Di jolo (13:21-30), nunga dipaboa panjeheon ni si Judas i. Umbege i marsak do nasida, ai sada sian nasida do hape na manjehehon Tuhan i. Paduahon, panghorhon ni panjeheon i. Dung dipabotohon Jesus panjeheon i pintor borhat do si Judas mandapothon donganna sapartahian, ruas ni Sanhedrin, gabe busisaon sisean i managam panghorhon ni halalahona i. Patoluhon, pamorsoon ni si Petrus. Taringot tu pansoadahonon ni si Petrus pe nunga dipaboa (13:38). Boasa ingkon mansoadahon si Petrus? Nda ibana do ‘parjolo’ (primus inter pares) ni sisean i? So nda tung ala ni sobu ni paraloan i do i? Molo si Petrus mansoadahon, boha ia nasida sude? (pat.Mat.26:31). Paopathon, hasopangantusionnasida. Ndang haantusan nasida na tenang i Jesus mangadopi na masa i. Singkat ni na busisaon, manghatai Ibana tahe taringot tu halalaho dohot hasangaponNa. Tu dia Ibana naeng laho? Mate? Mamereng dohot manimbangi situasi hatiha i, dipadomu muse tu panjeheon ni si si Judas i, ra, nunga tarjalo sisean i na laho mate do Jesus i tutu songon naung pinaboaNa hian. Molo sintong songon i, mate do Ibana i tutu, boha ma nasida? Dung i, aha ma lapatan ni hamamateNa i jala dia ma pardomuan ni i tu hasangaponNa? Sude i ndang diantusi nasida, gabe bonsa ma rohanasida, marsak nasida jala busisaon. Diboto Jesus do saluhutna i, gabe diapuli ma nasida, didok: “Unang ma bonsa rohamuna!” Boasa so bonsa? Tagan so dipatorang i, jumolo do nasida dijou tu haporseaon, didok: “Porsea ma hamu di Debata, jala porsea ma hamu di Ahu!” So marhite haporseaon, ndang haantusan nasida hata ni Jesus dohot lapatan ni na naeng masa tu Ibana; parbuena pe ndang laho parsaulihonon nasida.

Ihut tusi, didok ma Jesus tu nasida: “Torop do inganan di bagas ni Damang.” Bagas dohot inganan dison dipangke do dalam artian tempat tinggal, inganan mangolu (hangoluan) jala marsaor (parsaoran). Hangoluan dohot parsaoran i masa di bagas ni Debata, di banua ginjang. Ala ni i ndang terbatas i holan di parsaoran ni jolma tu sesama jolma, alai dohot do tu Debata. Parsaoran na mansai rosu do i, suman tu parsaoran ni ama raphon angka anakna. Pasti do i, Ibana naung mate, naung hehe jala manaek i do jaminan ni hasasautna. Mangondolhon i didok Jesus muse: “Aut so i, dohononHu ma tu hamu: Na laho do Ahu mangarade inganan di hamu?” Maol do mangantusi ayat on di salinan Batak, ala hurang hona terjemahanna. Di hata gorikna, ndang sada kalimat tanya (interogatif) on, alai dua kalimat berita (indikatif) do. Tangkasna songon on: “Aut so i, dohononhu do tu hamu. Na laho ma Ahu mangarade inganan di hamu.” (Patudos terjemahan Indonesia: “Jika tidak demikian, tentu Aku akan mengatakannya kepada kamu. Sebab Aku pergi ke situ untuk meyediakan tempat bagimu.” Laos songon i terjemahan Simalungun: “Ambit lang sonai, tontu Huhatahon hinan do bennima. Na laho misir do Ahu pasirsirhon ianan bennima.”) Sian angka terjemahan i torang ma antusan sangkapna, songon on: Nunga adong inganan ni sisean i di bagas ni Ama i. Aut so adong dope, paboaonNa do i na so adong; ndang gabusanNa nasida. Jadi lapatan ni na ‘mangarade inganan’ dison ndada na pajongjonghon manang na pulihon sian na so adong hian dope asa adong, alai na mamastihon pemilikan/ pewarisannasida di naung adong i do; mangungkap pintuna jala mempersilakan nasida mamongotisa selaku pewaris na sah.

Tu hasasaut ni i, mulak do Ibana muse tu tano on laho mangalap sisean i. Sadihari? Suang songon halalahoNa na so marhahonaan holan tu sada peristiwa, laos songon i do nang taringot tu hamumulakNa na marhahonaan do i tu manang piga pangalaho. Na parjolo, haheheonNa. Haheheon ni Jesus i na mangula do i pahehehon haporseaon ni sisean i. Marhite haporseaon i gabe parjambar sisean i di bagas ni Ama i. Paduahon, Pentakoste. Dung manaek Jesus, songgopan ni Tondi Porbadia ma sisean i. Tondi Porbadia i ma na mangajari nasida, na margogoihon, mangondihon dohot manogihon di nasa ulaon dohot pardalanan tu surgo i. Patoluhon, haroroNa di ganup tingki. Marhite hata dohot TondiNa sai ro do Ibana manopot angka na porsea, paingothon, mandongani jala manogihonsa di pardalanan tu sambulo i. Paopathon, haroroNa di ajal ni na porsea i. Di ajal ni ganup jolma, marujung do pardabudabuanna. Dia na dapotsa, haluaon do manang hamagoan, nunga tontu i di Tuhan i; paruhuman na parpudi i nama sipaimaonna. Ala ni i, hamamate ni na porsea i na harajuman do i songon patujolo ni pangalap ni Tuhan i. Na parpudi, haroroNa paduahalihon. Disi, gohan jala pasingkoponNa ma paneanon ni na porsea i di inganan na pinaradeNa i; pabongotonNa sude tu banua ginjang asa mangolu jala saor dohot Debata saleleng ni lelengna.

Rancangan Homiletis

Uju ro natorop manungkun Tuhanta Jesus mandok: “Dia ma bahenonnami asa huula hami angka ulaon lomo ni roha ni Debata?” didok Ibana do: “Haporseai hamu ma na sinuru ni Debata, i ma ulaon lomo ni rohaNa” (Joh.6:28-29). Sian i torang, haporseaon i do apala na parjolo na pinangido ni roha ni Debata sian jolma. Di bagasan jala mangihut tusi do angka ulaon na asing i, isara panghirimon, haholongon, pangoloion dohot angka na asing. Na margogo jala marhinorhon situtu do haporseaon i di hita jolma laho manghangoluhon ngolunta di portibi on. Boha ma pangalaho ni i? Tapamanat ma i nuaeng marhaojahan di turpuk jamita di hita ari on.

Na parjolo, di bagasan dohot marhite haporseaon i tarapul jala malua do hita sian bonsa ni rohanta. Sabagian sian hata partadingan ni Tuhanta Jesus tu angka siseanNa do turpuk on. Dihatahon do i di Bilut Parginjang inganannasida marulaon Paskah. Naeng marsirang ma nasida dohot sisean i, ai marhite sitaonon dohot parsilangon na diihuthon haheheon dohot hananaekNa, mulak ma Ibana tu hasangaponNa, na di lambung ni Ama i. Taringot tusi dipapatar do i di hataNa. Alai ndang tardodo sisean i non i. Holan on, tarhilala do di nasida na adong do na naeng masa tu gurunasida i. Lam tangkas do pangontak ni i dung dipapatar Tuhan i panjeheon ni si Judas jala disuriranghon pansoadahonon ni si Petrus. Gabe bonsa ma rohanasida, marsak jala busisaon. Diboto Jesus do i, gabe diapuli nasida, disosoi asa porsea di Debata dohot di Ibana. Marhite haporseaon i botoon nasida do na so sisolsolan nasa na naeng masa tu Jesus i; sitaononNa i, parsilangon, hamamate, haheheon dohot hananaekNa i, alai las ni roha do i, parsaulian. Di bagasan haporseaon i ma nasida tarapul jala malua sian habonsaon ni roha.

Songon sisean i na so mangantusi di angka na naeng masa tu Tuhan Jesus, hita pe mansai jotjot do ndang mangarti di angka na masa tu hita ala ni pardomuanta tu Kristus i. Bonsa do rohanta molo ingkon tarjehe, marsak jala busisaon molo ingkon marungkil ala ni hasintongan. “Aha do lapatan dohot tujuan ni sitaonon dohot parungkilon i; boasa ingkon songon panginsua deba sian angka donganta di nengaranta sandiri maol jumpangan tano bahen hajongjongan ni garejana manang ingkon misir sian gareja naung hinalojahonna?” ninta sungkunsungkun. “Naung ditadinghon Tuhan i do hami ulaning?” ninna rohanta lulululu. Marhite jamita on Tuhanta Jesus Kristus mangapuli hita mandok: “Unang ma bonsa rohamuna! Porsea ma hamu di Debata, jala porsea ma hamu di Ahu!” Haporseaon i do na padomuhon jala mangarahuthon hita tu Debata Amanta i dohot tu Jesus Kristus Tuhanta i gabe margogo di hagogoonNa, jala gabe songon si Paulus boi hita mandok: “Saluhutna do tarpatupa ahu marhitehite Ibana na margogoihon ahu” (Plp.4:13). Laos marhite haporseaon i botoonta do paboa ndang na so martujuan parungkilonta, jala nda tung songon na manampul alogo paraloanta (pat.1 Kor.9:26), gabe ndang manolsoli be hita ala ni i; tarapul tahe, tarapul ala ni Tuhanta, bona dohot ojahan ni haporseaonta i.

Na paduahon, di bagasan dohot marhite haporseaon i margogo do hita manghirim dohot manghaposi parmianon dohot parsaoran sogot di bagas ni Debata Amata i. Patangkashon apulapulNa didok Jesus do tu sisean i, na laho ma Ibana paradehon inganan di nasida. Naung adong hian do inganan i, nda tung sipajongjongon be. Jesus paradehon, mandok memastikan pemilikan ni sisean i disi, mangungkap pintuna asa bongotan nasida i songon pewaris na sah. Hombar tusi, mulak do Ibana muse mangalap nasida; mulak di bagasan haheheonNa (Paskah), di bagasan Pentakoste, di bagasan hata dohot TondiNa, di ajal ni sisean i, dohot di parousia. Disi gok jala singkop ma paneanon ni sisean i di inganan na pinaradeNa i, ai pabongotonNa ma nasida tu surgo, mangolu jala marsaor dohot Debata salelenglelengna.

Songon i, parulianta do halalaho ni Jesus i. Ibana gabe jaminan ni pemilikanta di bagas ni Debata. Pasti do i, ndang gabus. Ala ni i martua do hita manghirim disi. Bahen hagogok ni pemilikanta di bagas ni Ama i, sai mulak do Ibana mangalap hita. Dipapatar diriNa tu hita mangolu, disonggopi hita marhite Tondi Porbadia, ditogutogu marhitehite hata dohot TondiNa, ditiop tondinta jala dipapos rohanta laho mate, dung i di ari parpudi boanon jala pabongotonNa ma hita tu inganan naung pinaradeNa i gabe mangolu jala marsaor raphon Ama i adop bohi saleleng ni lelengna. Haporseaon disi gabe hagogoon do i di hita laho manghangoluhon ngolunta sinuaeng on. Songon na nidok ni turpuk sijahaon di Minggu on, gabe motivasi na togu do i di hita laho manangihon tona ni Debata, manghaholongi jala mangoloi Ibana sian nasa roha dohot ateatenta. Aha pe na masa, ndang gabe marbalik hita sian Ibana, alai sai marsihohot hita maniop hataNa, mangajarhon jala pateanhonsa tu sundut angka na mangihut. Mansai ringkot ma i parrohahononta asa unang gabe tarela pasaorhon dirinta tu portibi on. Songon angka na masihol tu surgo, siradotanta do dirinta asa tongtong di bagasan habadiaon, asa di na ro Ibana muse paduahalihon didapot Ibana hita so marlindang, so hasurahan, di bagasan dame.

jkt.25.05.2010/mvs

Read More..

02 Trinitatis

SERMON JAMITA MINGGU 02 DUNG TRINITATIS, 13 JUNI 2010
Joel 1:8-20

Patujolo

Taringot tu si Joel, tingki dohot latar belakang ni panurirangonna, ida ma Sermon tu Pesta Pentakoste, ari 23 Mei 2010 di blog on.

Di Alkitab, sisada hasadaon do turpuk ari on, i ma 1:(2)8-20 taringot tu: Tulah belalang sebagai hukuman Tuhan; alai di Bibel salinan Batak dua bagian, i ma 1:(1)8-12 taringot tu: Hasisiap binahen ni sihapor, dohot 1:13-20 taringot tu: Apoapo mandokhon paubahon roha. Bala sihapor, tung parmaraan bolon do i na hinabiaran ni halak di daerah-daerah pertanian di Afrika, Timur Tengah dohot Asia. Na boi habang do rongkanan ni sihapor i mamolus gurun Sahara dohot Laut Rara tu tuktuk Arab torus tu India bahkan Rusia. Na deba mamolus Laut Tonga tu Spanyol. Adong tahe laporan na hea momolus Samudera Atlantik tu Karibia. Sarongkanan sihapor boi do manghuphupi awangawang sabidang ni 1200 km persegi; 40 - 80 juta sihapor ma i sakilometer persegi. Soarana mardoromdorom songon soara ni ratusan kapal terbang na sahali habang. Uapna mansai bau. Molo sanga songgop i tu sada inganan tung apala luhut do na tubu di tano i dipasuda; duhutduhut, rambaramba, dohot hau mamungka sian bulungna, bungana, parbuena, sisikna sahat ro di hauna ndang adong na so digagat. Molo masuk pe tu jabu dipasuda do dohot angka ugasan, isara abit, hulinghuling, amak, permadani, persediaan pangan dohot na asing. Mara na songon i ma na masa di tingki ni si Joel. Ra, ndang apala songon i hebatna, alai ndang hurang be i mambahen ranggason angka hau anggur jala matultul antajau (1:7), gabe haleonon jolma, rapar angka pinahan jala sega dohot parugamoon.

Hatorangan

Taringot tu bala i didok si Joel ma: “Mangandung ma ho, songon boru muli na martujung hori ala ni bangunan ni haposoonna.” Dipanghulingi ibana do halak Israel dison songon orang kedua tunggal (ho) jala parompuan. Pangalaho na somal do i di panurirangon. Molo didok rupani boru Sion, Sion keseluruhan do nidokna; boru Jerusalem, Jerusalem keseluruhan; boru Israel, Israel keseluruhan (Sak.9:9; Am.5:2). Mangandung, reaksi na logis do i tu sitaonon, jala i do na tinaringotan ni panurirang i dison. Mansai ngotngot do pangandungnasida, suman tu pangandung ni anak boru na agoan oroanna. Mansai togu do adat ni paroroanon di Israel. Secara hukum, baoa dohot boruboru naung maroroan nunga dirajumi i naung saripe. Molo monding sada sian na dua i, targoar do na tading i na mabalu. (Patudos: Di halak Batak digoar do na songon i na mabalu jongjong). Susa do na mabalu di Israel, ai mansai toru do kedudukan hukumna. Songon i ma digombarhon si Joel dison, mansai marsak do boru oroan i, martujung hori, ai nunga agoan ibana di na hinaholongan ni rohana dohot di masa depanna. Gombaran ni halak Israel ma i na agoan saluhut ala ni bala i.

Songon sistem do ngolu on, gangguan tu sada unsur mangonai do tu keseluruhan sistem. Songon i ma dison, hasesega ni sistem perekonomian marhinorhon do tu sistem religi, ai gabe siap ma pelean sipanganon dohot siinumon di joro ni Jahowa. Ganup ari dipelehon do pelean sipanganon dohot siinumon di joro i. Asa tarpatulus i ingkon na adong do itak, miak dohot anggur. Alai ala naung lengse hauma dohot porlak, ndang tarparade bangso Israel be roti, miak, anggur, dohot angka sipelehonon na marragam i, gabe mansohot ma pameleon di joro i jala gabe margudokpong angka malim, ndang adong be siulaonna. Angkup ni i, rapar ma nasida, ai mangihuthon patik i, adong do bagiannasida sian deba pelean i jala i do na gabe balanjonasida. Ala so tarulahon bangso i be pameleon, ndang dapot bagian be nasida gabe ndang adong be sipanganonnasida. Pangalaho na sangat mengejutkan do i, darurat kerohanian na luar biasa, ai molo pola ndang tarpamasa be pameleon jala ndang mangula angka malim di joro i, na marlapatan do i nunga mansohot be aktifitas parugamoon ni Israel na terutama jala agoan dohot joro i di fungsina.

Di ay.10 diulahi do muse manaringoti hasesega i. Tarulang ladang, ndang tubuan agia aha; duhuton hauma, ndang marfungsi be songon hauma; lusam eme/gandum, mahiang; marsik aek ni anggur, ndang maraek parbuena; malos hau jetun, rahar manang ranggason. Taringot tusi ditorushon dope di ay.11b-12, 16-20 didok: Mago partaonan, lapatanna sega musim, ndang adong be tingki gotilon ala so adong sigotilon; apean hau anggur, mandok mahiang manang rahar; ranggason antajau/hau ara (fig tree), dalimo, harambir/kurma, unte/apel dohot saluhut hau di ladang, lapatanna mahiang manang rahar. Ra, ndang holan ala ni sihapor i, alai dohot do ala ni ari logo, ai somalna di logo ni ari do ro bala sihapor. Ala ni i, siap ma sipanganon sian tano i, gabe haleonon ma sude jala raparan. Diuji nasida pe manuan sisuanon, busuk boti do angka boni di toru ni bongkahan-bongkahan tanah, ai so adong aek. Rumar jala tarulang ma angka bagas parugasanan, marokso angka sopo ai ndang adong be na parosehonsa; pardihana i antong, ai so na adong be eme/gandum sipamasuhon tusi. Ndang holan jolma, pinahan pe maheu do; bodiaron (mabiar/gempar) angka lombu ala na so adong be panjampalan ai mahiang do dohot duhutduhut di adaran. Songon i do nang parduan (rongkanan/kawanan) birubiru, rapar do sude. Angka pinahan di balian pe marhoi do ala so adong be parsoburanna ai nunga marsik angka sunge, jala ndang adong be panjampalanna di halongonan. Tamba dope marana, ai ari logo sisongon i mansai sordit do i tu api gabe masa api rarat na manudahon suansuanan angka naung rahar jala ragason i.

Di ay.11a ditaringoti do muse reaksi logis ni halak Israel tu na masa i. Marlangan angka paruma, tarila ai ndang marparbue na niulana; mangandung parporlak anggur, parhauma saba (parladang gandum) dohot pareme tur (parladang hadio/jelai) ala mago partaonan. Gabe mago ma las ni roha sian bangso i. Somalna, di hamamasa ni gotilon do hagogok ni las ni roha ni angka partani (pat.Ps.126:5-6). Alai ala so adong be gotilon, gabe ndang adong be las ni roha. Ndang holan i, sian bagas joro pe mago do las ni roha i (ay.16b). Di jolo (ay.9) nunga didok, ndang adong be pameleon manang kebaktian di bagas joro i. Sadalan tusi, ndang adong be dohot parendeon disi, ndang adong pamujion, ndang adong pariaiaon dohot parolopolopon.

Luhutna i dibereng si Joel do songon panginona ni uhum ni Debata. Alai huhut, dirajumi do i songon patujolo ni ari ni Tuhan na bolon jala na songkal i. Hombar tusi disosoi ma bangso i asa paubahon roha (pat.2:12-14) na dipungka marhitehite perkabungan dohot parpuasaon. Taringot tusi ingkon angka malim dohot parhobas ni joro i na parjolo. Somalna, na dua i diulahon halak Israel do i mamangke simbol-simbol dohot pambahenan na tarida. Marulos hori rupani, marabit tangki manang na maribak, hundul di sirabun manang mambahen orbuk tu uluna. Songon i ma dison, disosoi do angka malim asa marhohoshon hohos na hombar tu perkabungan jala mangandungi (marhoi/mengeluh), manompuk andora; mangangguhi ma angka parhalado ni langgatan, jala marbulusan abit hori sude parhalado ni Debata. Tanda ni haunduhon ni rohanasida ma i, pangarsakhonon dohot panolsolion di dosa asa tu hamubaon; tanda ni pangokuon paboa ala ni dosa dohot pangalaosion ni bangso i na di bagasanna angka malim i dohot terlibat, ndang patut be nasida marabit hamuliaon, ingkon marabit haleaon nama. Ingkon arsakhonon nasida situtu do hasosohot ni pelean sipanganon dohot siinumon di joro i. Ndang holan ala na gabe menganggur jala na agoan i nasida di jambarna, alai lumobi do ala ni hasesega ni pardomuan dohot parsaoran ni bangso Israel tu Debata. Marhite pranata pameleon i, sasintongna dipauliuli do pardomuan dohot parsaoran ni bangso i tu Debata. Di na so dipatupa be i, na marlapatan do i nunga magotap pardomuan dohot parsaorannasida tu Debata Jahowa.

Alai ndang sae holan malim dohot saluhut parhalado ni joro i na muba, ingkon sandok bangso i do. Di ay.14 disosohon ma asa parbadiaan ni angka malim i sada ari parpuasaon, jala ditingtinghon ma i tu sandok bangso i; dung i, di ari na tinontuhon i ingkon marluhut ma sude sintua dohot pangisi ni luat i marpuasa di joro ni Jahowa. Tontu, parpunguan na balga do i; parpunguan rea. Parpuasaon, di mulana diantusi jala diulahon halak Israel do i laho manambai gogo ni tangiang (pat.2 Sam.12:16), manang pataridahon panolsolion dohot panopotion sekaligus mangido hasesaan ni dosa dohot pasupasu. Di habuangan Babel lam diharingkothon bangso i do mangulahon parpuasaon i. Alasanna parjolo, ala diparhatopot nasida do na uhum ni hadosaonnasida do habuangan i, gabe ditopoti ma i marhite na marpuasa. Paduahon, ala ndang boi be nasida mamelehon pelean (sintuhu ni peribadahan tagan so habuangan) ala ndang adong disi bagas joro, alai sai boi do anggo na marpuasa jala ala ni i gabe mimbar ma sintuhu ni peribadahannasida sian na mamele tu na marpuasa. Dung mulak sian habuangan pe, nang pe naung dipajongjong muse bagas joro i jala boi nasida mangulahi mamelehon pelean, tong nama diargahon nasida situtu parpuasaon i. Somalna, diulahon do i marhite na mangorom sipanganon, siinumon, dohot hubungan seks; tumatangis jala mangangguhi na manggombarhon sikap hamubaon tu Jahowa.

Nunga nidok di jolo, siangkup ni panginona ni uhum ni Debata, luhut na masa i dibereng si Joel do songon patujolo ni ari ni Tuhan i. Konsepsi ari ni Tuhan i na marhahonaan do tu keseluruhan ni panghirimon eskhatologis na memuncak di haroro ni Tuhan i sandiri. Ari na bolon jala na songkal do i (2:11; Sep.1:14), ari haholomon (Am.5:18, 20), ari hasiapon sian Jahowa (Jes.13:6), ari na sogir ala ni parpiarpiar ni rimas ni Tuhan i (Jes.13:9), ari hamusuon (Hes.13:5), jala ari partubolan (Hes.30:5). Makna parjolo ni ari ni Tuhan i, i ma paruhuman tu sandok portibi on. Ingkon uhuman ni Debata do saluhut, angka bangso dohot Israel. UhumanNa angka bangso ala ni hajahaton na niulahonna tu donganna jolma dohot ala ni hamusuon na pinatupana tu bangso ni Debata; Israel pe uhumanNa do laho papitahonsa. Makna paduahon, haluaon tu angka na porsea. Hombar tusi sai dipadomu do i tu parporangon dohot tu peristiwa-peristiwa kosmis. Marhite i diuhum Debata do angka bangso, dipapita ia bangsoNa asa hobas tu haroroNa. Asa molo tarsonggot pe portibi on di hamamasana, ndang tarsonggot anggo na porsea i, ai molo masa angka i partanda do i paboa naung jonok haluaonna, gabe lam marpos ni roha jala marhahirimon ma nasida huhut joujou tu Tuhan i. Songon i ma dison, ala ni pangantusion i, mewakili bangsona didok si Joel do: “Tu Ho do, ale Jahowa, ahu joujou” (ay.19a).

Rancangan Homiletis

Paasingasing do pamingkirion ni jolma taringot tu pardalan ni tingki manang sejarah. Di na deba, digombarhon do i suman tu ulok na manurbing ihurna, mandok marputor. Halak Hindu rupani, songon i do pandokna. Molo mate sasahalak, ia na denggan do parangena saleleng di ngoluna bereinkarnasi ma ibana tu tingkat na tumimbo, isara ni na gabe raja, resi manang maharesi; sabalikna, ia na roa do pangalahona lahir kembali ma ibana tu na tumoru isara ni na gabe bodat manang babiat. Songon i do torus, mordongordong. Na asing, digombarhon do i suman tu hujur na pinantomhon, mardalan tigor manuju tu sada titik. Torus, ndang hea mulak.

Suman tusi do pandok ni hata ni Debata, na mardalan do tingki dohot sejarah manuju tu ujung. Ndang apala tigor, suman tu ulok na manginsir margellokgellok do; sipata mansai dao mamedu pardalanna tu siamun, dung i tu hambirang; tu siamun muse, dung i mulak tu hambirang, alai sai dipatogutogu Debata do i manuju tu ujung na tinontuhonNa, i ma ari ni Tuhan i. Ari ni Tuhan i, i ma ari haroro ni Jesus Kristus paduahalihon tu portibi on. Laos digoar do i ari parpudi, ai dungkon ni i ndang adong be ari, tingki na manongtong nama saleleng ni lelengna; ndang adong be dohot sejarah, i ma rangkaian peristiwa sebab akibat manang tantangan dohot jawaban (challenge and response).

Andorang so ari i masa do jolo ragam ni na masa songon bala sihapor na martaringot di jamita ari on. Bala sihapor, tung parmaraan bolon do i na hinabiaran ni halak di daerah-daerah pertanian na di Afrika, Timur Tengah dohot Asia. Na boi habang do sihapor i marrongkananrongkanan mansai dao. Sarongkanan bolas do manghuphupi awangawang 1200 km persegi; 40 - 80 juta sihapor ma i sakilometer persegi. Soarana mardoromdorom suman tu soara ni ratusan hopal habang na sahali habang. Uapna mansai bau. Molo songgop tu sada inganan tung apala luhut do dipasuda; duhutduhut, rambaramba, dohot hau mamungka sian bulungna, bungana, parbuena, sisikna ro di hauna ndang adong na so digagat. Molo bongot pe tu jabu dipasuda do dohot abit, hulinghuling, amak, permadani, persediaan pangan dohot na asing. Mara sisongon i ma na masa di tingki ni si Joel. Ra, ndang apala songon i hebatna, alai ndang hurang be i mambahen ranggason hau anggur dohot hau jetun, hau ara dohot dalimo, kurma dohot apel jala gagal panen gandum dohot hadio. So sundat dope logo ni ari na sordit tu api, gabe masa api rarat na manudahon suansuanan naung paturanggason i, jala mahiang dohot angka sunge. Masa ma haleon potir, raparan jolma dohot pinahan; marsak jala tumatangis angka partani, agoan nasida di halalas ni roha dohot pariaiaon. Na marhinorhon do i dohot tu bagas joro, ai gabe mansohot ma pameleon manang ibadah; margudokpong angka malim jala rapar. Luhutna i, dibereng si Joel do songon panginona ni uhum ni Debata dohot patujolo ni ari ni Jahowa na bolon jala na songkal i.

Sian tingki tu tingki, tarmasuk di tingkinta on sai masa do na songon i, diuhumi Debata hajolmaon marhitehite angka na masa. Masa do rupani bencana alam isara lalo bolon, aek magodang dohot tsunami; bencana sosial isara pargutugutuon, tawuran dohot amuk massa; bencana politik isara hamusuon dohot parporangan; dohot peristiwa-peristiwa kosmis. Di angka tingki na parpudi on rupani tarhilala do di torop inganan hamohopon na maringaringar. Adong mandok na marbonsir do i sian ledakan di mata ni ari, na asing mandok ala ni pergeseran ni mata ni ari sandiri. Manang bangso dia pe di tingki on ndang boi be nengelnengel gompul manang masa bodoh taringot tu mara ni pemanasan global dohot perubahan iklim naung mamungka tarhilala panghorhonna di torop inganan. Ninna, molo lam martambatamba hamohopon ni portibi on, malala do salju dohot es na di angka dolok dohot na di kutup jala mabaor sude tu laut, manaek ma permukaan laut jala sirnip angka inganan na toru hian, gabe lam moru ma bidang ni darat. Sabalikna, godang ma inganan na gabe mahiang jala muba gabe tano bangkalbangkal na so tubuan agia aha, gabe masa pengungsian besar-besaran tu luat angka na boi dope inganan. Molo masa angka na songon i, na boi marhinorhon do i tu parngoluon parugamaon. Ndang sanga be halak mamingkirhon pranata na mangaradoti pardomuanna tu Debata, isara parsombaon dohot pameleon. Sudena i gabe singotsingot do tu hita paboa na lam matua do portibi on jala lam manjonok tu ujung, tu ari ni Tuhan i na tinontuhonNa sian tahi ni roha dohot huasoNa. Boha ma hita mangadopi i?

Songon na nidok nangkin, luhutna i parjolo sahali dibereng si Joel do songon panginona ni uhum ni Debata ala ni dosa ni bangso i. Ala ni i, ganup nasida ingkon arsakhononna be do dosana, parhatopoton jala solsolanna. Alai ndang sae holan pribadi, ingkon patupaon nasida do perkabungan dohot parpuasaon nasional. Taringot tusi, dipungka do sian angka malim ro di sandok parhobas ni joro i. Ingkon marhohos jala maruloshon hori nasida, manompuk andora jala mangangguhi. Tanda ni haunduhon ni roha ma i, pangarsakhonon dohot panolsolion di dosa. Ingkon arsakhonon nasida do huhut hasosohot ni pamelean joro i, ai na marlapatan do i naung sega pardomuannasida Debata. Marhitehite pranata pameleon i, sasintongna dipauliuli do pardomuan dohot parsaoran ni bangso i tu Debata. Di na so dipatupa be i, na marlapatan do i nunga gotap pardomuan dohot parsaorannasida tu Jahowa. Ihut tusi, ingkon papunguon nasida ma sandok bangso i patupahon parpuasaon rea di bagas joro laho manambai gogo ni tangiang dohot tanda ni hamubaon tu Jahowa. Ingkon haporseaan nasida do huhut, songon patujolo ni ari ni Tuhan i, uhuman ni Tuhan i ndada na manudahon, na papitahon do. Ala ni i ingkon ditanggapi do i marhite hamubaon ni roha dohot parsihohoton marhaporseaon dohot na joujou tu Jahowa.

Laos songon i ma hita, molo masa angka na tinaringotan di ginjang i, ndang ringkot hita tarsonggot, ai lam jonok pe portibi on tu ujung lam jonok do dohot haluaonta. Ala ni i, ingkon laos dirgak do ulunta jala sihar panailinta. Nang pe songon i, ingkon tanggapanta do i marhite hamubaon ni roha dohot parsihohoton marhaporseaon, panghaposion dohot na joujou tu Debata. Ndang taboto manang na sadihari haroro ni ari ni Tuhan i. Marsogot do, haduan do manang na leleng dope, ndang adong hita na umbotosa. Na marlapatan ma i, buat sementara taharingkothon dope portibi parmiananta on. Siusahohononta do asa lam tu dengganna portibi on ingananta. Manang na satongkin nari pe i manang na leleng dope naeng ma lam denggan, unang ma lam roa. Ala ni i sipadengganonta do angka na sega. Molo tinaringotan ma rupani nangkin perobahan iklim dohot pemanasan global, ingkon na marusaho do hita paturehon i. Unang so taboto, masa pe i ndang tarsirang i sian hasalaan ni jolma. Mangihuthon angka parhapistaran, sada sian sibonsiri ni i i ma hasesega ni angka tombak na nirabasan ni jolma bahen ‘kepentingan’ ni jolma isara tu pembangunan ni jabu dohot kebutuhan kertas. Didok G Schwab di bukuna Dance with the Devil, satu edisi minggu koran New York Times sudah menghabiskan 150 are hutan. Tapahusorhusor ma, sadia bidang ma tombak na hona rabas laho manggohi kebutuhan kertas tu ribuan surat kabar di sandok portibi on, kebutuhan kertas ni buku, kertas toilet, tissu, kertas acara minggu dohot warta jemaat ni angka huria dohot lan na asing na so diimbangi dohot reboisasi na memadai? Mauliate do dohonon ai mamungka taon 2010 on dipatupa hurianta do na papungu pelean tu ulaon Keadilan, Perdamaian dan Keutuhan Ciptaan (Justice, Peace and Integrity of Creation), atik pe ingkon sungkunon do tar tu dia ma hapeahan ni i. Diusulhon sada dongan do: Nunga tabahen Taon Koinonia, Taon Marturia, Taon Diakonia, Taon Penatalayanan, dung i mangihut ma muse Taon Jubileum; boha, ndang denggan bahenonta sada Taon Penanaman Pohon HKBP? Ninna roha, usul na ringkot parrohahonon do i jala sikapan. Dung i, nda ringkot pingkirhononta taringot tu penghematan ni harotas? Di jabunta be rupani, marhite na manggonti tissu dohot lap; di huria marhite na so mancetak acara minggu, alai padiar ma ganup ruas mamboan sandiri buku endena tu gareja. Unang tadok: “Ah, otik hian do harotas hupangke hami,” ai angka ulaon na balga dipungka do sian na metmet.

jkt.17.05.2010/mvs

Read More..