Jamita Minggu 1 Trinitatis 2012

JAMITA MINGGU 1 TRINITATIS, 10 JUNI 2012

2 Kor.4:16-18

“Dibahen i, ndang marnaloja hami; ai lam tu burukna pe hajolmaonnami parduru i, anggo parbagasan i ariari do dipaimbaru.

Ai haporsuhonnami na martingki jala na neang porsanon, i do patupahon di hami hasangapon na sumurung, na lumobi hamuliaonna na salelenglelengna, ala hutailihon hami na so tarida i, nda tung na tarida i; ai parsatongkinan do na tarida i, alai na manongtong ro di salelenglelengna do na so tarida i.”

--oOo--

Hamu angka dongan di bagasan goar ni Tuhanta Jesus Kristus, Sipalua jala Sitobus hita!

Uju ro natorop manungkun Tuhanta Jesus mandok, “Dia ma bahenonnami asa huula hami angka ulaon lomo ni roha ni Debata?” didok Ibana do, “Haporseai hamu ma na sinuru ni Debata, i ma ulaon lomo ni rohaNa.” Sian i torang, haporseaon i do apala na parjolo na niigil ni Debata sian jolma. Di bagasan jala mangihut tusi do angka na asing, isara panghirimon, haholongon, pangoloion, dohot na asing. Jesus Kristus naung mate jala hehe dung i manaek tu surgo i do pamusatan ni haporseaon i. Na sahat do jolma tu haporseaon i ala ni pangulaon ni Tondi Porbadia na marhite Barita na Uli i. Manang ise na tangi jala ungkap tu Barita na Uli na niulahon ni Tondi Porbadia i, sahat do i tu haporseaon i. Na mangula jala na marhinorhon do haporseaon i. Si Jakobus mandok, “Haporseaon i pe songon i do, molo so adong pangulaonna naung mate do hadirionna.” Laos i do na niondolhon ni si Paulus di ay.13 na di jolo ni turpuk on – na sasintongna ndang tarsirang sian turpuk on – didok, “Alai tong do tondi haporseaon i di bagasan hami, hombar tu na tarsurat i, ‘Na porsea do ahu umbahen na huhatahon,’ hami pe na porsea do umbahen na dohot hami manghatahon.” Angka dia ma pangulaon ni haporseaon i jala aha ma panghorhon dohot guna ni i di hangoluaonta sinuaeng on? Deba sian i ma na naeng pamanatonta di jamita di hita ari on.

Hamu angka dongan!

Dipillit Tuhanta Jesus do si Paulus gabe apostelNa. Ndang lomo ni rohana i, ai silelei na porsea hian do ibana. Alai sian asi ni rohaNa na bebas, ditangkup Jesus i do ibana jala dipabangkit gabe parbarita na uli. Tohonan na balga jala marmulia do i. Alai kontrast tu hamuliaon i, di na mangulahon i, manaon do ibana, sangat menderita. Taringot tusi, didok ibana do, “Sumurung manaon renge ni ulaon nang hurungan, lumobi tu ahu linsinglinsing, jotjot do di bagasan parmaraan hamatean. Lima hali ma ahu dilinsingi halak Jahudi, opatopatpulu hurang sada. Tolu hali ahu dilasahi, sahali ahu didangguri dohot batu, tolu hali harom, saborngin sadari ahu mumbangumbang di laut ni lautan. Jotjot do ahu di pardalanan, marmara di batang aek, marmara dibahen panamun, marmara sian angka dongan sabutuha, marmara sian angka parbegu, marmara di huta, marmara di halongonan, marmara di laut, marmara di tongatonga ni dongan na so haru dongan. Di bagasan ulaon dohot hasusaan, jotjot do mangkar matangku, jotjot do mauas male dohot marpuasa, di ngali ni ari dohot na hurangan ulos.” Boasa ingkon songon i?

Ra, dohononta, “Konsekuensi ni ulaon i do i.” Toho do i, ai Tuhanta Jesus sandiri mandok, “Hosoman ni saluhut halak do hamu ala ni goarHu.” Alai, umbagas sian i do na naeng dohonon ni si Paulus dison, ai penampakan ni Kristus do i di bagasan dohot marhite ibana. Sitaon na bernit do Kristus i. Mamungka sian hatutubuNa mangonai do tu Ibana proses pematian, jala di ujungna mate do Ibana di hau pinarsilang. Taringot tusi, ndang sae i dihatindanghon, huhut do ingkon dipapatar. Ngoluna sandiri do hapataran ni i. Dohot hata na asing, keberadaan ni Kristus Jesus sitaon na bernit i, dipataridahon do i di bagasan dohot marhite keberadaan ni Apostel Paulus na tong sitaon na bernit i.  

Alai ndang holan i, keberadaan ni Kristus hangoluan i pe dipapatar do di bagasan ngolu ni apostel i. Ndang holan sitaon na bernit Kristus i, huhut do parhasangapon godang, ai hangoluan do Ibana, hangoluan ni portibi on. Na so tasirang do na dua i, hamamate dohot hangongoluNa i. Ala ni sitaonon dohot hamamateNa i do tahe umbahen na gabe hangoluan Ibana. Sahali nari, taringot tusi pe dipapatar do i di bagasan dohot marhite ngolu ni si Paulus. Gok sitaonon pe ngoluna, margogo jala marparbue situtu do ulaonna. Molo pinatudos orang perorang, ndang masalpuhu ia nidok, ibana do na gumodang mangalehon tingki dohot gogona tu ulaon panindangion i, gumanjang dalan didalani, umbidang luat diadangi mardalan pat, jala gumodang jolma dihamonangkon tu Kristus i. Di dia rahasiana? Alusna, ala di bagasan haporseaon i, papatar diri jala mangula do Kristus na mangolu i di bagasan dohot marhite Ibana. Apala i ma na nidokna di ay.10 na jolo ni turpuk on, “Tongtong do hupausungusung hami di dagingnami hamamate ni Jesus, asa patar di dagingnami nang hangongolu ni Jesus.” Laos i ma na niondolhonna di ayat na parjolo ni turpukta ari on na mandok, “Dibahen i, ndang marnaloja hami; ai lam tu burukna pe hajolmaonnami parduru i, anggo parbagasan i ariari do dipaimbaru.” Lam buruk do hajolmaonna parduru, lam gale ala ni na lam matua dohot ala ni sitaonon na so hea dipasadi. Alai sabalikna do anggo hajolmaonna parbagasan, ganup ari do dipaimbaru. Gale pe ibana, ndang gabe surut panindangion i, ndang gabe moru gogona, alai sai martambatamba do jala torus manghamonanghon halak tu Kristus i.

Hamu angka dongan!

Ndang holan si Paulus, hita pe dohot do dipabangkit Kristus gabe apostel manang sitindangi ni Barita na UliNa di tingki on. Songon sitindangiNa, hita pe, sitaon na bernit do. Ndang hapunjunganta i, alai hatopan ni angka na porsea do. Sian mulana dope, dihosomi portibi on do na porsea i, dilelei jala dipaburuburu. Dipatuduhon i do na mangonai do tu hita proses pematian. Manang songon na nidok ni si Paulus, tapausungusung do di dirinta hamamate ni Kristus. Hajolmaonta parduru i lam buruk, dung i, di sada tingki ingkon mate do hita tutu. Alai sabalikna, laos dipatuduhon do disi na so dirajai hamatean i be hita, ai manaon pe hita ndang anggo binasa, alai mangolu do di bagasan Kristus jala boi patupahon angka ulaon hagogoon, i ma na manghamonanghon jolma tu Kristus i. Na marlapatan ma i, tapausungusung do tong di bagasan dirinta haheheon dohot hangongolu ni Kristus i gabe haheheon dohot hangoluanta, gabe masa ma: Hajolmaonta parbagasan i, dipaimbaru do ganup ari. Na gabe apulapul na paposhon jala na patoguhon roha ma i di hita paboa na so tagamon siap na porsea jala mintop huria sian portibi on. Di abad 18 rupani, marbungaran do di Eropa sada poda na margoar aufklarung. Sada sian tese ni aufklarung i mandok, abad 19 nama abad na parpudi di huria, dung i mintop ma. Ternyata, salpu do abad 19 ndang mintop, marujung abad 20 tong ndang mintop, jala nuaeng nunga taripar jala mamolus di abad 21 on, ndang tarida dope (jala ndang na laho tarida) tandatanda ni huria i na laho mintop. Ndang tarsoadahon, lam rarat do nuaeng golongan na intoleran di Indosia on, martubuan barisan radikal na so manghalomohon haadongon ni huria. Marragam usaho dibahen nasida laho mangotapi missi ni huria, sementara negara atau pemerintah tidak berbuat apa-apa, cenderung melakukan pembiaran bahkan ada yang turut terlibat. Di Sumatera Utara, di mana komposisi penduduk Kristen 45%, adong do dua tolu gareja na disurbu di angka tingki parpudi on. Nambura dope tarbege, na disegel do 17 gareja di Aceh. Jala na jumonok ra tu hita, i ma na masa tu donganta na di HKBP Piladelpia Bekasi. Mamungka bona ni April na salpu, lam sobu do paraloan tu nasida. Ganup minggu do nasida digugai, disurahi, diolati, didangguri, dilelei, diteror; saotik do nasida marimbanghon na mangalo, marribu halak. Ala ni i ndang hea be nasida tulus marminggu. Marningot sobu ni paraloan i, sai longang do rohangku di na so gabe mabiar nasida jala mansohot, alai ganup minggu sai diuji nasida do ro tu pargarejaan i, sai diuji do marpungu, sai diuji marminggu, nang pe sai gagal. Nda halongangan i? Alai boasa ndang ‘jora’ nasida? Aha rahasiana? Ai Kristus Jesus Tuhan naung hehe jala mangolu i, mangolu do di bagasan nasida, mangula jala papatarhon diri di bagasan dohot marhite nasida. Ala ni i, pos do rohanta, sai na masa do torus songon na nidok ni na mandok, “Semakin dibabat, semakin merambat.” I, jala songon i ma pangulaon dohot panghorhon ni haporsean i.  

          Hamu angka dongan!

Mulak tu turpukta ari on, porsea do si Paulus na so olat ni portibi on panghirimanna di Kristus i, alai marudut do tu hatongtongon, tu tingki hasangapon na sumurung, na lumobi hamuliaonna, sipapataron sogot. Songon Tuhan Jesus Kristus naung pinahehe ni Debata sian na mate, naung manaek tu surgo jala naung gabe ulu ni huria hatopan ni halak Kristen angka na badia, paheheonNa do nang ibana sogot, boanonNa tu surgo jala pajongjongonNa raphon saluhut na porsea laho marhaladoi di adopanNa saleleng ni lelengna. Porsea jala manghirim disi, nang pe ‘leleng’ jala ‘borat’ sitaonon i, tarrajum sisatongkin do i jala na neang porsanon. Holan na porsea do na boi manghirim disi, na boi manaili tu tingki na so tarida dope jala dapotan apulapul dohot gogo sian i.

Hamu angka dongan!

Laos songon i do nang di hita, marhitehite haporseaon i adong do pos ni roha di hita taringot tu sihirimon sogot. Ndang olat ni portibi na tarida on panghirimanta, alai na marudut do tu paradianan sogot na saleleng ni lelengna. Na gabe gogo ma i di hita di na manaonhon paraloan doot di na manghatindanghon Barita na Uli i. Taadopi pe angka na maol, ndang mabiar be hita, ndang mandele manang sumurut ala tangkas taboto, na sumurung do sijaloonta. Di inganan na asing didok si Paulus do, “Ai hurajumi angka sitaonon di hasiangan on hira na so adong do martimbanghon hasangapon sipapataron tu hita sogot.” Hira na so adong, ai na martingki jala na neang porsanon do sitanonon i, alai na manongtong do siteanon sogot i, na sumurung do hasangaponnna, jala lumobi hamuliaonna.

Antong, margogohon haporseaon i, tatatap ma sihirimon sogot i, jala i ma na mewarnai ngolu dohot na menyemangati hita di paraloanta.  Molo manaon pe hita nuaeng, sabam ma rohanta ai marhasonangan do hita sogot. Ndang candu i na pasonangsonang modom, alai pamotoan na tontu do na ojak di haporseaon i. Amen.