Jamita Minggu 15 Trinitatis 2012

JAMITA MINGGU 15 TRINITATIS, 16.09.2012

Mat.16:13-20

“Ise do Jesus Kristus i?” I do sada sungkunsungkun naung leleng diparungkilhon halak. Jalo dung pemunculanNa di tonga ni natorop, nunga tubu sungkunsungkun i. Boasa? Ai di sada sisi, diboto jala ditanda halak do Ibana songon jolma na somal. Tubu sian sada parompuan, i ma si Maria, secara hukum anak ni sada baoa, i ma si Josep. Tarrajum do Ibana tu sada huta, i ma Nasaret, tu sada luat, i ma Galilea; tarrajum muse tu sada marga, i ma Juda, tu sada ompu, i ma Daud. Sarupa tu sandok anak Israel, terlibat jala parsidohot do Ibana di proses sosialisasi dohot enkulturasi ni bangsoNa, tu proses menjadi warga ni masyarakatNa na sesuai tu budayaNa. Alai di sisi na asing, ndang tarbahen agia ise manutup mata taringot tu halobianNa sian jolma na somal. Di umurNa na pasampuluduahon dope, di na hadir Ibana di bagas joro di sada Pesta Paskah ni Jahudi, nunga mampu Ibana mardiskusi aktif di tongatonga ni angka malim dohot rabbi Jahudi, jala nunga digoar Ibana Debata Jahowa i AmaNa. “Ndang diboto hamu na patut Ahu di bagasan bagas ni Damang?” ninna. Lam tu tangkasna do halobianNa i dung na muncul jala mangula Ibana di tonga ni natorop. So pola mamolus parsiajaran manang pelatihan na khusus, tampil do Ibana gabe pangajari na manalpui angka rabbi di Israel, gabe parjamita, gabe pangubati, sisesa dosa, sipabali sibolis dohot sibahen halongangan. Sudena i mamaksa angka na marnida Ibana sungkunsungkun mandok, “Ise do Halak on ...?”

Songon jolma na marutohutuk jala na mardayabudi, ndang sae jolma i holan na sungkunsungkun, alai diuji do mangalehon alusna. Di jamita on, tabege do nangkin opat alus na nilehon ni halak angka na satingki dohot Jesus, i ma na parjolo: Si Johanes Pandidi, na paduahon: Si Elia, na patoluhon: Si Jeremia, jala na paopathon: Sahalak sian angka panurirang. Songon anak ni zamanna, diboto angka sisean i do i, jala ndang so mungkin na dohot nasida dipengaruhi jala manjalo pingkiran i. Ala ni i, di na disungkun Tuhanta nasida di jamita on, didok, “Ise do Anak ni Jolma i didok halak?” mansai mura do nasida mangalusi i mandok, “Na deba mandok: Si Johannes Pandidi, anggo na deba: Si Elia, na asing muse: Si Jeremia, manang sahalak sian angka panurirang i.”

Sahat tu tingki on mangolu do sungkunsungkun i jala torus do diuji jolma mereka-reka alusna. Di angka dongan na somal mambuka internet, ra, hea do diparrohahon, so pola sadia leleng dope, adong do sada situs berita na torus menawarkan beasiswa tu manang na ise pe na rade laho mangguruhon, meneliti dohot mangalusi sungkunsungkun na mandok: “Betulkah Jesus itu Tuhan?” Di na huuji manjaha proposalna, torang, na marhaborhatan do i sian pingkiran na so porsea di hadebataon ni Jesus, jala hombar tusi, kesimpulan na diharaphon pe naeng ma na mambuktihon i. Songon i do sude alus na piningkiran ni jolma, marhaborhatan do sian hasohaporseaonna. Pada umumna, disimpulhon halak do na jolma sambing do Jesus i. Di bagasan hajongjonganNa na songon jolma i, adong ma na mangarajumi Ibana songon sada panurirang manang nabi na sakalas dohot si Musa manang si Jesaya, na asing mangarajumi songon sipungka ugamo na sarupa dohot Sidarta Gautama manang Konghuchu, na asing muse mandok guru kesusilaan manang moral, na deba mandok reformator sosial, jala na deba nari mandok sahalak superstar. Angka alus haliluon do i na so ojak di hasintongan. Antong, ise do Jesus i tutu?

Mangalusi sungkunsungkun ni Jesus taringot tusi, di jamita on didok si Simon Petrus do, “Kristus (Mesias), Raja na pinarbagabaga i do Ho, Anak ni Debata na mangolu.” Mansai manarik, taringot tu alusna i diparhatua Jesus do si Petrus, didok, “Martua do ho, Simon, anak ni si Jona, ai ndada daging dohot mudar papatarhon i tu ho. Damang na di banua ginjang i do.” Di Mat.11:27 didok Tuhanta Jesus do, “Ndang adong na tumanda Anak i, dungkon ni Ama i.” Na nidokNa disi, holan Debata do na umboto manang na ise jala boha do Jesus Kristus i sasintongna. Ala holan Ibana umbotosa, laos holan Ibana do na bolas patandahon AnakNa i tu jolma. Hombar tusi, di Joh.6:44 didok Jesus do, “Ndang adong na tarbahen ro tu Ahu, ia na so tinogu ni Ama i na marsuru Ahu.” Laos i ma na niondolhon ni Tuhanta tu si Petrus dison. Pingkiran dohot panghirimon ni halak Jahudi taringot tu hamesiason nunga manimbil sian na sasintongna, ai dibayanghon nasida do Kristus i songon mesias politik, songon raja portibi na ro laho manggohi cita-cita nasional Jahudi, na manaluhon harajaon Rom jala pajongjong harajaon Jahudi Messianis na meliputi sandok portibi on. Pasurungonna ma disi halak Jahudi songon warga utama, jala sandok bangso na asing gabe pangoloi di nasida. Mansai dao do i sian tondi ni hamesiason na sasintongna, jala pangantusion i ma na pinaulak ni Debata marhite si Petrus di jamita on. Gabe tokoh na parjolo sadar ibana di lapatan ni hadirion dohot hamesiason ni Jesus i.

Laos i ma na ringkot auhononta sian jamita on. Debata marhite Tondi Porbadia do na patandahon tu hita manang na ise jala boha do Jesus Kristus i. Apala i do na tahatindanghon di lapatan ni Haporseaon Ponggol Patoluhon i na mandok, “Na diparhatutu rohangku do na so tarbahen ahu porsea di Jesus Kristus Tuhanhu manang mandapothon Ibana ianggo tung sian roharohangku manang sian gogongku sandiri, alai na dijou Tondi Porbadia i do ahu marhitehite sian Barita na Uli.” Marhite Barita na Uli na hinatindanghon ni Tondi Porbadia i tatanda jala tahaporseai do paboa Kristus do Jesus i, Mesias na miniahan ni Debata, Raja na pinarbagabaga jala Anak ni Debata na mangolu i. Ndang na mura sahat tu panandaon sisongon i, alai na mangigil haoloon dohot haringgason do i manangihon dohot mangguruhon Barita na Uli i di bagasan haunduhon tu Tondi Porbadia i. Unang so taboto, godang do sitiop Bibel na so sahat tu panandaon na sintong di Jesus Kristus ala ni hasohaunduhonna tu Tondi Porbadia i. Dijahai jala dipatorang do Barita na Uli i hombar tu roha dohot hagiotna sambing, gabe adong ma rupani na mananda jala manghaporseai Jesus Kristus i songon sigohi kebutuhan ni hajolmaonna, jaminan ni kemakmuran dohot kesejahteraanna songon na binayanghon ni parteologi sukses; manang songon tokoh sejarah sambing na so boi antusan jala patorangon di ruar ni hukum-hukum ni sejarah songon na niondolhon ni penganut ni Yesus Sejarah. Barita na Uli na niajarhon ni Tondi Porbadia i manghatindanghon tu hita: Kristus do Jesus i, Mesias, Raja na pinarbagabaga, Anak ni Debata na mangolu, hasahatan ni nasa huaso na di banuaginjang dohot na di tano on, nuaeng dohot sogot.

Ala Raja do Jesus Kristus i, adong do na nirajaanNa. Mardomu tusi, ditaringoti do dison hajojongjong ni huria, didok, “Ahu pe, Hudok ma tu ho: Si Petrus (batu mamak) do ho, jala di atas batu mamak ondeng do paojahonHu huriangKu.” Di Padan na Imbaru, jotjot do digombarhon huria i songon bangunan. Ndang bangunan na mate, na mangolu do, ai angka jolma na mangolu do bahanna. “Angka batu na mangolu,” ninna di 1 Ptr.2:4. Si Petrus songon jolma na parjolo sadar jala manghatindanghon Jesus do Kristus, na harajuman do songon batu parjolo ni huria i. Mangihut tu ibana, tambahonon ni Tuhan i ma muse angka batu na asing, gabe jongjong sada huria hatopan na manghamham saluhut na porsea di sandok portibi on, tarmasuk hita angka na porsea di tingki on dohot di inganan on.

Taringot tu huria i, marbagabaga do Kristus i paboa na so tupa talu do i bahenon ni angka harbangan ni banuatoru. Na gabe sipapos roha ma i di hita songon ruas ni huria, paboa ndang di hita, alai di Jesus Kristus do jaminan ni masa depan ni huria i. Di abad 18, marbungaran do di Eropa sada faham na margoar Aufklarung manang Pencerahan. Sada sian these ni faham i mandok, abad 19 nama abad parpudi ni huria, dung i mintop ma. Ternyata, salpu do abad 19, ndang mintop huria i; manorusi tahe sahat tu abad 20 jala nuaeng nunga di abad 21 tong ndang mintop. Boasa? Ai ndang di jolma, alai di Kristus na songon i nantoari, songon i sadari on, laos songon i ro di saleleng ni lelengna, di Ibana do jaminan dohot masa depan ni huria i.

Laos i ma ra na ingkon dohonon taringot tu hurianta HKBP. Nunga marujung Sinode Godang nantoari, jala di Minggu sadari on ma pelantikan ni Ephorus, Sekjen, angka kepala departemen dohot praeses. Andorang so Sinode Godang, ribur do tarjaha manang tarbege angka tanggapan dohot komentar taringot tu HKBP. Godang na membayangkan, mamereng sian manang piga panatapan, isara pangulaon ni parhalado dohot parngoluon partondion ni huria, sai hira na laho mintop nama HKBP. Na deba menawarkan jalan keluar, didok rupani: “Muba manang mago.” Na nidokna, molo ndang muba – muba tu hamubaon songon na nirancangna sandiri – ingkon mago nama HKBP. Di pihak na asing, godang ma na manghirim tu Sinode Godang. Mampu nian Sinode i mamillit uluan na boi mamboan hurianta tu haimbaruon dohot tu hamajuon, mampu merumuskan rencana-rencana strategis demi masa depan ni HKBP. So mansoadahon usaho dohot peran ni manisia, unang hita sala, ndang di jolma manang di parsitutuonna, ndang di fungsionaris dohot di ruas jaminan dohot masa depan ni HKBP, di Kristus nampuna huria i do. Toho do, marhasil do Sinode mamillit fungsionaris na huhaporseai angka halak na tepat, alai ndang haru yakin ahu na marhasil nasida merumuskan rencana-rencana strategis demi masa depan ni HKBP. Hudok i, ai hombar tu informasi na dibuktikan dengan foto-foto, patulangaon do ruang sidang di tingki ceramah tema; hampir kosong do di na pasahat dohot membahas Barita Jujur Taon ni Ephorus, songon i di tingki na pasahat dohot membahas Laporan Departemen, lumobi di tingki na manaringoti Rencana Strategis HKBP. Hape nian, justru di angka i do boi idaon ni angka peserta fakta taringot tu HKBP; di dia do rupani hagogoonna, di dia hahuranganna, jala tu dia do i tujuhononhon. Rumusan adong, alai ndang na pinarungkilhon ni sude di bagasan parsitutuon dohot kesungguhan. Ala ni i ingkon gumodang do hita manatap dohot manghirim tu Tuhanta naung marbagabaga mandok, “Di atas batu mamak on do paojahonHu huriangKu, na so tupa talu i bahenon ni angka harbangan ni banuatoru.” Martangiang ma hita asa Ibana na mangula marhite fungsionaris angka naung tarpillit i dohot marhite rencana strategis na marhahurangan i.

Na parpudi, tu si Petrus songon batu na parjolo, dohot tu sandok huria i songon angka batu na mangolu didok Jesus do, “Hulehon pe tu ho anak hinsu ni Harajaon Banua Ginjang i: Nasa na niihotanmi di tano on, na tarihot ma i nang di banua ginjang; jala nasa na pinaluami di tano on, malua ma i nang di banua ginjang.” Na nidokNa disi, na jongjong jala marguna do huria i songon ulaula haluaon manang alat keselamatan di tangan ni Kristus Sipalua i. Dipasahat do Barita na Uli tu huria i, sibaritahonon jala sihatindanghononna, jala i do na songon anak hinsu ni Harajaon Banua Ginjang i. Di angka na manghaporseai jala na manjangkon Barita na Uli i ungkap do pintu ni harajaon i jala girgir bongotanna. Sabalikna do di angka na so manghaporseai jala na manulak, hinsu do torus pintu i.

Ringkot ma i ingotonta asa unang adong sian hita na tidak ambil peduli tu huria. Sai adong do Kristen na songon i, na so olo pasaorhon dirina manang na tu huria dia pe. Deba ala ni biar gabe parsidohot maon manaon reaksi ni portibi tu huria; na asing, ala ni pingkiranna na mangarajumi, haporseaon masalah pribadi do i, na so pola ingkon tarihot tu dongan, tu pandita manang tu upacara-upacara seremonial. Sala do i, ai sasintongna, ndang adong kekristenan pribadi, kekristenan kolektif do. Di huria dohot marhite huria i do sasahalak manjalo pandidion, manjalo pasupasu manang parpadanan na badia. Ndang hea dipodahon Bibel jala ndang dung masa na bolas sasahalak mandidihon dirina sandiri. Didok sada ama ni huria, “Ganup na mangokuhon Debata Amana, ingkon okuhononna do huria i inana.”

Di fihak na asing, songon huria na gabe hasahatan ni anak hinsu ni Harajaon Banua Ginjang, ingkon ringgas do hita manghatindanghon Barita na Uli i. Tu sangkap i, ringkot do jolo paimbaruonta pemahamanta taringot tu hakiki ni hadirionta songon huria. Somalna, dilapathon halak do huria i songon parpunguan ni angka na porsea. ‘Parpunguan,’ konotasina cenderung do pasif ketimbang aktif. Hombar tusi, adong ma na mangarajumi huria i songon club, songon museum manang rumah perawatan orang-orang tua. Sasintongna, huria sada gerakan do i, ai manang di dia ibana hadir, ingkon patar jala mangula do disi gerakan daya keselamatan ilahi. Dung i, sada peristiwa do huria i, ai manang di dia pe ibana jongjong ingkon masa do disi peristiwa, i ma hamubaon manang perubahan tu hatigoran, tu hasintongan dohot tu hadameon. Angkup ni i, stasiun penginjilan do huria i, di mana setiap warga melihat dan memahami dirinya sebagai orang yang diutus, yang turut dalam pekerjaan kesaksian sehingga gerakan daya keselamatan dari Tuhan menjadi nyata dalam mayarakat yang pada gilirannya akan menimbulkan perubahan ke arah keadilan, kebenaran, kedamaian, kesembuhan dan lain sebagainya. Molo ganup hita mananda dirinta songon i, ndang tarbahen so ringgas hita manghatindanghon Barita na Uli i, ringgas paluahon halak sian hatarihotanna di bagasan dosana. Dipargogoi Debata ma hita mangulahon i. Amen.