Judika

 JAMITA MINGGU JUDIKA, 17 MARET 2013

Ps.126:1-6

 

TURPUK (Edisi Revisi)

 

Tangiang Mangido Haluaon sian Habuangan

 

1 Ende hananangkok. Di na pinaulak ni Jahowa na tarbuang sian Sion,

songon halak na marnipi do hita.

2 Gok do pamanganta dohot engkel,

jala dilanta dohot olopolop;

   didok nasida do di tongatonga ni angka bangso,

“Angka na balga do dibahen Jahowa tu nasida.”      

3 Angka na balga do dibahen Jahowa tu hita,

jadi marlas ni roha ma hita.

4 Sai paulak ma, ale Jahowa, na tarbuang sian hami,

songon angka sunge di Negeb.

5 Angka na manabur di bagasan iluilu,

manggotil do sogot di bagasan olopolop.

6 Na mardalan jala tangis mangusung boni sisaburhononhon,

sai na ro do sogot mardongan olopolop mangusung angka borhos ni biur ni

gandumna.

 

SERMON

 

Patujolo

 

Tarrajum do Ps.126 on tu psalmen huria (mazmur jemaat), i ma samansam psalmen na niendehon ni huria manang punguan ni Israel. Di angka ombas dohot inganan na tontu, marpungu do bangso i, jala disi ma ditangianghon nasida angka psalmen sisongon on. Hombar tu sibonsiri dohot tujuan ni parpunguan i sadasada, gabe adong ma manang piga ragam ni psalmen huria i, isara psalmen andung, psalmen hamauliateon, psalmen pujian dohot na asing. Ps.126 on, tarrajum do tu na parjolo, psalmen andung manang ratapan. Dipatomutomu do angka psalmen sisongon i hombar tu kebutuhan ni parpunguan di na mangadopi ragam ni hasusaan. Di hamamasa ni logo ni ari rupani, sahit rarat, hataluan maradophon musu dohot angka na asing, marpungu do bangso i; marhohondo nasida, marpuasa jala martangiang sian nasa rohanasida mangido asa diingot Debata asi ni roha dohot hasatiaonNa tu nasida. Somalna, di parpunguan sisongon i ma dipatubegehon psalmen andung i.

 

Di Bibel hata Heber, rap dohot 14 nari psalmen na asing dibahen do ulu ni Ps.126 on syir hamm`alot. Manang na aha lapatan ni i, ndang torang be dapot botoon. Torop do na mamingkir na ende di pardalanan tu Jerusalem do i manang ende habobongot tu bagas joro laho mandohoti sadasada pesta parugamoon. Hombar tu patik i, tolu hali sataon, i ma di Pesta Paskah, Pesta Parlapelapean dohot Pesta Pentakoste, marpungu do halak Israel di Jerusalem. Marroan do nasida sian ganup luat, nangkok marodorodor tu Jerusalem. Disi ma ninna, lumobi na laho mamongoti bagas joro i diendehon nasida angka psalmen syir hamm`alot i. Hombar tusi, dipataripar do syir hamma`alot i tu hata Batak dohot ende hananangkok, hata Indonesia nyanyian ziarah. (Alai molo pinatangkas isina, di na 15 syir hamm`alot i, holan di Ps.121, 122 dohot 132 do tarhilala nuansa pardalanan tu huta Jerusalem dohot tu bagas joro).

 

Hatorangan

 

Di taon 538 asK diharuarhon Raja Kores do sada dekrit kerajaan na paloashon halak Juda angka na tarbuang di Babel mulak jala paulihon musengani Juda dohot Jerusalem naung leleng tarulang i. Di halak na asing na di ruar ni Israel, ra dirajumi do na masa i songon romantika ni sejarah sambing. Alai di pamerengan ni halak Juda, Debata Jahowa do na mangula laho paluahon bangso i hombar tu naung binagabagahonNa uju i marhitehite panurirangNa, si Jeremia (Jer.25:11-12; 29:10). Apala i do na hinatindanghon ni bangso i di pandohan na parjolo ni turpuk on. Ndang Raja Kores, alai Jahowa do na paulakhon  nasida sian habuangan i jala paianhon muse di Jerusalem, huta na badia i dohot di Juda, tano na pinarbagabaga i. Na luar biasa do i, na so dung hehe di bagasan rohanasida hian. Ingkon marhite raja ni bangso sileban i hape Ibana paluahon bangsoNa? Marningot i, gabe songon na marnipi do nasida.

 

Dung tarjolma sian na ‘marnipi’ i, gabe mansai las ma rohanasida. Taringot tusi didok do, “Gok do pamanganta dohot engkel, jala dilanta dohot olopolop.” Tontu do, ndang holan na mengkelengkel manang na margakargak nasida, ndang holan na marolopolop manang na marsuraksurak songon i so marlapatan, alai di bagasan angka pandohan na torang, dipatubegehon nasida do panindangion taringot tu na masa i angka na haantusan halak na umbegesa. Dohot hata na asing, dihatahon nasida do angka panindangion laho memaknai peristiwa i. Sian panindangionnasida i gabe diboto angka bangso ma na Jahowa do hape na mangula di bagasan saluhutna i, gabe didok nasida ma, “Angka na balga do dibahen Jahowa tu nasida.” So marhite panindangion ni Israel na memaknai na masa i, ndang sian dia dalan ni angka bangso sahat tu pangantusion dohot pengakuan sisongon i, ai ndang hombar i tu haporseaonnasida. Di na tarbuang halak Juda uju i, manginsahi do angka bangso mandok, “Di dia do nuaeng Debatanasida i?” (Ps.79:10; 115:2). Mangihuthon pamingkirion ni angka bangso sileban, parporangan ni sada bangso maralohon bangso na asing ndang holan parporangan ni na dua bangso inon i, alai dohot do parporangon ni debatanasida be. Sadalan tusi, molo talu sada sian bangso na dua i, ndang holan bangso i na talu, alai dohot do debatanasida. Songon i ma uju i, di na talu halak Juda dibahen Raja Nebukadnezar jala dibuanghon nasida tu Babel, di roha ni angka bangso i dohot do Jahowa i na talu, gabe ndang sanggup mampartahanhon bangso i. Konsekuensina ndang holan tu bangso i, dohot do tu Ibana, ai gabe Debata na luntang lantung ma Ibana, ndang adong be daerah kultusna, ndang adong be bangso na mamuji dohot mamele Ibana, jala ndang adong be inganan dohot joro habadiaonNa, gabe so botoon be manang na di dia Ibana; ndang haluluan, ndang tarjou, ndang tarpuji jala ndang tarsomba. Ala na saling bergantung do angka debata dohot jolma di bagasan hubungan resprositas, memberi dan menerima, mangihuthon angka bangso sileban i marhaso pe angka debata, pinarhuasoan ni jolma do. Molo so adong be umatna, nunga mago be huaso ni debata na songon i, jala ndang na tagamon mulak be i, ai so adong be jolma na mambahen marhuaso ibana. Hombar tusi ma asa dipandok nasida, “Di dia do nuaeng Debatanasida i?” Alai – sahali nari – dung dibege nasida panindangion ni halak Juda na memaknai na masa i, gabe dipandok nasida ma, “Angka na balga do dibahen Jahowa tu nasida.” Angka na balga, lapatanna, ndang holan sada manang dua, alai serangkaian tindakan penyelamatan angka na balga. Ulaon na balga do na binahen ni Debata na martahihon haluaon ni Israel, ulaon na balga do na binahenNa na mamangke Raja Kores laho paluahon nasida, ulaon na balga do i na sinunggulanNa i roha ni bangso i mulak tu Jerusalem dohot tano Juda, ulaon na balga do i na niiringiringNa i bangso na pinaulakNa i di pardalanan sian tano Babel tu tano Kanaan, ulaon na balga do i na pinatolhasNa i nasida tu Sion dung mamolus pardalanan na maol jala na ganjang dohot angka na asing dope.

 

Di ay.3, diulahi halak Juda do muse panindangionnasida i, didok, “Angka na balga do dibahen Jahowa tu hita.” Ndang na maniru pandohan ni angka bangso na asing i nasida disi, ai songon na nidok nangkin, nasida do gariada na memaknai na masa i umbahen na sahat angka bangso na asing i tu panandaon dohot pangokuon di habalgaon ni ulaon na pinatupa ni Debata Jahowa i. Jadi na mangulahi panindangionnasida i do halak Juda i dison, mangulahi mangokuhon di tongatonganasida sama nasida paboa angka na balga do tutu naung binahen ni Debata di nasida, jala maradophon i, patut do nasida marlas ni roha. Ndang marlas ni roha boti, ingkon marlas ni roha di adopan ni Debata Jahowa do, i ma na marlas ni roha na mamuji jala mangolophon GoarNa. Las ni roha i do na songon motivasi na umbagas jala na umpolin ni engkel dohot olopolopnasida na martaringot di jolo i.

 

Peristiwa hamulahan di taon 538 asK i ndang pintor pasidunghon sude parsoalan. Ndang sidapot na tipak nasida di na saluhut, alai ingkon na paulion nasida do jolo Jerusalem dohot Juda naung leleng tarulang i. Ndang ulaon na mura i. Marningot i, ndang sude na tarbuang i na hehe rohana mulak, alai torop do na lomoan rohana tading di habuangan i. Lumobi ma i angka na mora, naung marhasil jala mapan ekonomina. (Di habuangan Babel i, bebas do halak Juda mangulahon saluhut, bebas marugamo dohot maradat, bebas marporlak jala manganhon parbuena, bebas martigatiga jala marsaulihon hasilna, gabe torop do sian nasida na gabe mamora. Angka i ma godangan na so lomo be rohana mulak) Niantusan do i, ai molo mulak nasida antong ingkon na mamungka do muse sian nol. Na gabe boban partondion do i di angka na mulak i, naung sahat jala mian di Jerusalem dohot Juda. Songon bangso ni Debata, masihol do rohanasida mangolu di bagasan kebersamaan. Ala ni i, martangiang do angka naung mulak i mandok, “Sai paulak ma, ale Jahowa, angka na tarbuang sian hami.” Sasonangsonang nasida di habuangan i, na tarbuang do goar ni i. Adong tahe na sangat esensial na hurang bahkan na mago sian ngolunasida, ai dao nasida sian pusat ni pardomuan dohot parsaoran tu Jahowa. Manggombarhon i ditaringoti ma dison angka sunge di Negeb (dangsina). Aek do esensi ni sada sunge, molo so maraek be, ndang targoar be i sunge. Songon i do angka sunge di Negeb, mahiang do i di ari logo, ndang marisi aek. Marsik ma dohot angka sumur ro di ambar, gabe mahiang angka tano. Songon na mate sude, ndang tarula, ndang tarsuan jala ndang tubu agia aha. Alai molo ro udan, gok aek ma muse angka sunge i; marisi ma dohot angka sumur ro di ambar, gabe songon na mulak mangolu muse tano i, ai martubuan ma angka suansuanan. Songon i ma dibayanghon dison, suman tu tano Negeb di ari logo do ngolu ni halak Juda di tingki i, ai adong dope sian nasida na tinggal di habuangan. Ndang holan derita ni angka na di habuangan inon i, dohot do derita ni angka naung mulak. Dohot hata na asing, di angka naung mulak i pe tarhilala dope halilu dohot pangarontan ni habuangan i. Hombar tusi ma martangiang nasida mangido asa dipaulak Debata muse angka na tarbuang sian nasida; dipaulak esensi ni ngolu i di nasida sude, di na di bona pasogit dohot na di habuangan, i ma pardomuan dohot parsaoran tu Ibana na berlangsung di bagasan hasadaon dohot di kebersamaan.

 

Sahali nari, ndang sidapot na tipak angka na mulak sian habuangan i. Ndang pintor rade angka na tau hangoluan dohot hasonangannasida, alai ingkon na pungkaon nasida do jolo angka huta asa adong siinganannasida, rimbaonna dohot porlak jala saburhonona angka boni asa adong sihangoluhononnasida. I pe, ndang ulaon na mura, na maol do, ai tano i nunga leleng tarulang. Patuduhon maolna pola do didok, na manabur nasida di bagasan iluilu, jala mardalan tumatangis mangusung boni sisaburhononhon. Siangkup ni maolna, ndang adong tanda na tarida na boi paposhon roha paboa boni angka na sinaburhonnasida i pasti do i tubu, magodang jala marparbue. Holan haporseaon di Debata Jahowa i do na boi paposhon rohasida, Ibana do na manjamin paboa na so magopo sambing sandok na niula dohot na hinalojahonnasida, alai sai na masa do sogot tingki las ni roha ni gotilon gabe ro nasida mardongan olopolop mangusung angka borhos ni gandumna be.

 

Renungan

 

Suang songon halak Juda na tarbuang di Babel, songon i do hita tarbuang di bagasan huaso ni dosa, huaso ni sibolis dohot hamatean. Mansai bernit jala dangol do na tarbuang i. Alai songon nidok ni endenta No.136:2, na gabe joujou do dangolta i mangido tolong tu Jahowa. Di bagasan Tuhanta Jesus Kristus naung ro tu tano on, nunga dialusi Debata hita, jala songon na sinoarahon ni goar ni minggunta sadari on, Judika, nunga diluluhon hita tu sitolusada na jahat i, jala dipalua hita. Na luar biasa do i, halongangan bolon, jala songon nipi do hajajadina.

 

Maradophon pambahenan ni Debata na paluahon i patut do hita marolopolop jala marlas ni roha. Alai ndada holan na marlas ni roha boti, lumobi na marlas ni roha di bagasan rumang tano on. Halalas ni roha dohot olopolop tano on, jotjotan do i marlaok dosa. Didok na mandok, wein, weib und gesang (anggur, parompuan dohot endeende), angka i do jotjot na mencirikan las ni roha dohot olopolop ni portibi on. Ndang songon i anggo las ni roha ni angka na pinalua ni Debata, las ni roha na polin do, na badia, na mamuji jala na gabe panindangion di Jahowa dohot di pambahenanNa. Marhite i gabe ditanda halak ma Tuhan i, ditanda dohot angka ulaon habalgaonNa jala dipujihon.

 

Ulaon habalgaon ni Debata na paluahon i sai diuduti do i sian tingki tu tingki. Nunga talu nian dosa i, sibolis dohot hamatean i, alai suman tu ulok naung malisat uluna, mangalbasi dope ihurna jala margogo mangago. Mangula do sitolusada na jahat naung talu i marhite lan cara dohot di ragam ni konteks ni parngoluon, isara di parugamoon, politik, ekonomi, masyarakat, budaya dohot na asing. Otik godang, taalami do i di tonga ni bangsonta, di Negara Republik Indonesia on. Songon halak Kristen taalami do rupani perlakuan tidak bersahabat sian angka donganta sabangso na intoleran na diulahon atas nama ugamo, jala songon warga ni masyarakat dohot negara, mansai torop do sian hita on na mengalami perlakuan tidak adil di bidang ekonomi dohot kesejahteraan umum. Adong do tahe na manghilala songon halak na tarbuang di tanona sandiri, manang na tarjaja di tonga ni bangsona, jinaja ni negarana, pamarentana manang angka partogi ni bangsona. Torop na agoan di esensi ni ngolu i, na so umboto agia aha be taringot tu mutmut ni pardomuan dohot parsaoranna tu Tuhan dohot tu donganna jolma. Di bagasan saluhutna i, Tuhanta i do pangondianta. Ala ni i naeng martangiang do hita tu Ibana mandok, “Sai paulak ma, ale Jahowa na tarbuang sian hami.” Angkup ni i sai tajouhon ma nang na sinoarahon ni Minggu Judika sadari on, “Luluhon ahu ale Debata jala parbadahon badangku dompak bangso na so daulat roha, sai palua ma ahu sian baoa siulahon sipaototo dohot hajengkelon. Ai Ho do Debata haroroan ni hagogoonhu. Tongoshon ma hatiuronMu dohot hatigoranMu angka na manogu ahu, pataru ahu tu dolok habadiaonMu dohot tu ingananMu.” (Ps.43:1, 2b-3)

 

Haluaon na di bagasan Kristus i na marhahonaan do tu hajolmaonta na utuh, tu daging dohot tu tondi. Songon angka naung pinalua, na tarjou do hita mangharinggashon angka ulaon na denggan na gabe parguna ni hangoluan. Haporseaon dohot haluaon na di bagasan Jesus Kristus i ndang paloashon hita gabe angka jolma na losok, na mangalompit tangan manatap langit huhut paimaimahon, alai ingkon gabe angka halak na ringgas do mulaulaon. Nang pe songon i ndada boi saguru gogo dohot tu na mamuspus, ingkon saguru tu haporseaon do. Siingoton jala siauhononta do hata ni endenta No.373:1 i na mandok, “Mangula hita jolma manabur boni i, alai anggo jadina di Debata do i.” Ala ni  haporseaon i, pos ma rohanta jala manghirim paboa sian asi dohot mala ni roha ni Debata sai na marparbue do angka na taula, gabe adong sihangoluhonon dohot sipangkeonta laho manghobasi haluaon ni hajolmaon. Haluaon na utuh, pardagingon dohot partondion na disagihon jala diparsaulihon ganup ari.

 

Jkt.01.03.2013/mvs