Jumat Agung

SERMON JAMITA ARI HAMAMATE NI TUHAN JESUS, 29 MARET 2013

Mat.23:33-39

Patujolo

Hombar tu bangkona songon panurat na sistematis, bindu 23 pambuatan ni turpuk jamita tu Ari Parningotan di Hamamate ni Tuhan Jesus 2013 on hibul do dipangke si Mateus pajojorhon pinsangpinsang ni Tuhan Jesus tu angka parise dohot sibotosurat (1-36) dohot lumbalumba uhum tu Jerusalem (37-39). Di bonana (1-12) digombarhon, ndang tullom pinsangpinsang i dihatahon Jesus tu angka parise dohot sibotosurat i, alai di bagasan kerangka sipaingotNa tu natorop dohot tu angka siseanNa do. Disi, dihatahon Jesus do manang piga penilaianNa di angka parise dohot sibotosurat i, jala marhaborhatan sian i ma dipasahat muse podana tu natorop dohot tu angka siseanNa i. Alai di bagian na mangihut (13-36) digombarhon, dihatahon Jesus do pinsangpinsangNa i tullom tu angka parise dohot sibotosurat i. “Marjea ma hamu sibotosurat dohot parise, hamu pangansi,” ninna manang na piga hali; dung i, ihut tusi dipajojor ma angka hahurangannasida angka na patut nian tadinghonon nasida.

Parise (Gr.pharisaioi, sian hata Aram perisha=separatist/na pinapulik), i ma sada horong di tongatonga ni angka partogi ni Jahudi. Sahat tu tingki ni Jesus, tardok nunga ganjang sejarah ni horong on, ai ninna nunga adong i andorang so porang ni si Makabeus. Na tubu do i songon reaksi tu semangat hellenisme naung mamungka rarat hatiha i di tongatonga ni hajahudion. Nunga torop sian halak Jahudi na ringgas rohana mangadopsi budaya Gorik, isara na mamangke goar Gorik. Mansai risik do angka parise i tu patik ni si Musa. Dijaha nasida do i tangkas, disulingkiti, ditafsirhon jala diajarhon. Ala ni parbinotoanna na mansai bagas taringot tu patik i, laos digoar do nasida sibotosurat manang sibotopatik. Taringot tusi, didok JT Nielsen do, “Parise i ma sibotosurat, jala sibotosurat i ma parise.” Di ay.2 didok Jesus do, “Dihunduli angka sibotosurat do habangsa ni si Musa.” Habangsa ni si Musa, i ma sada hundulan manang mimbar di sinagoge. Disi do halak jongjong laho manjaha patik i, jala laos disi muse hundul laho manafsirhon manang mangajarhonsa. (Songon i do aturanna di bangso Israel, jongjong do halak manjaha hata ni Debata, alai hundul do anggo mangajarhon manang manjamitahon. Na niondolhonna disi, di tingki na jongjong i hata ni Debata do na hinatahonna, alai anggo di tingki na hundul i hatana na hinatahonna) Diklaim angka parise dohot sibotosurat i do na holan nasida do na marhak manafsirhon patik i. Na laos marlapatan ma i, holan nasida do na marhak manghunduli habangsa ni si Musa di angka sinagoge. Hombar tusi, gabe adong do na padomuhon goar parise i tu hata Aram parasy, lapatanna penafsir. Sapanjang masa pangulaon ni Jesus Kristus di portibi on, sai dialo angka parise dohot sibotosurat i do Ibana. Sian i, bolas ma antusanta boasa tung songon i paminsang ni Jesus di nasida di bindu 23 on.

Hatorangan

Di ayat parjolo ni turpuk on, digoar Jesus do parise dohot sibotosurat i ulok (Gr.ofis= serpent/snake). Patuduhon hinajorbutna, ditambahon dope muse goar anak ni ulok dari (Gr.echidna=viper/ular beludak), i ma samansam ulok na marbisa situtu; na mempunyai naluri pembunuh, na hohomhohom manang terang-terangan menyerang manang na aha pe na dihilala mamboan mara tu dirina. Molo dipargut halak, jorbut do panghorhonna, ai magurbak ma dagingna, mansai mohop panghilalaanna songon na tinutungan jala ndang jarang sahat ro di na mate. Dipangke do jotjot ulok i songon gombaran ni kelicikan dohot kepalsuan. Songon i ma pangalahona di na dipangke i laho manggoari angka parise dohot sibotosurat, naeng patuduhononna do kelicikan dohot kepalsuannasida. Marsipalensem manang marsipaulaula, idaon burju hape jahat. I do na binereng ni si Johannes Pandidi umbahen didok tu nasida, “Hamu anak ni ulok, ise do mangajari hamu pasidinghon rimas na ro sogot?” (Mat.3:7). Di sada sisi, na mangula do si Johannes Pandidi songon sada pengkhotbah hari kiamat. Ari ni Kristus i dibereng ibana do i songon ari uhum. Molo ro Ibana, tabaonNa ma angka hau na so marparbue jala dabuhononNa tu api, purpuronNa ia gandumNa jala paiasonNa pardegeanNa, papunguonNa ma angka na porngis tu sopoNa, alai anggo lapung dohot hurangkam tutungonNa do tu api na so ra mintop. Umbege i marroan do angka parise padidihon dirina. Didok rohanasida, malua do nasida sian rimas na ro sogot i ala ni pandidion naung jinalona i. I ma kelicikan dohot kepalsuannasida, naeng malua marhite sian tipu daya, ai anggo tutuntutan ni pandidion i, i ma hamubaon ni roha i ndang diamborishon. Sahat tu tingkat na tertentu, Jesus pe sada pengkhotbah hari kiamat do. Dibaritahon Ibana taringot tu hasosonggop ni harajaon ni Debata di tano on di bagasan kesementaraanna, na marudut tu kesempurnaanna di ari sogot. Mardomu tu hasosonggop ni harajaon i, adong do tingki paruhuman. Hombar tusi, dijouhon do hamubaon ni roha (pat.Mrk.1:15). Nang pe marasing konsepna, tarjalo angka parise do taringot tu harajaon ni Debata na binaritahon ni Jesus i. Dihasiholi do i, alai anggo joujou tu hamubaon ni roha i ndang dianturehon. Ala ni i ma asa digoar Jesus nasida ulok dohot anak ni ulok dari. Songon ulok dohot anak ni ulok dari na licik jala na palsu, tung beha ma bahenon nasida pasidinghon uhum naroko?

Hatangkangon ni angka parise dohot sibotosurat khususna, halak Jahudi umumna, nunga mamungka i sian ompunasida na manulak angka panurirang dohot na sinuru manopot nasida. Dibunu nasida do tahe na deba. Mangondolhon i ditaringoti do dison si Abel na durus mudarna di tangan ni hahana sandiri (1 Mus.4:8, 10). Dung i si Sakaria anak ni si Berekia. Ndang torang ise do na nidokna dison. Di 2 Kron.24:20-22 martaringot do tutu sahalak na margoar si Sakaria na mate tarbunu, alai anak ni si Joyada do, ndang anak ni si Berekia. Sian Sak.1:1 tarboto, anak ni si Berekia do tutu Panurirang Sakaria, alai ndang hea binoto, ai ndang adong tarjaha na mate tarbunu ibana di tangan ni bangsona. Alai manang na ise pe i, anggo na naeng ondolhononna dison i ma hajahaton ni Israel na so alang be rohana mamunu panurirang na sinuru ni Debata. Na paling mengejutkan tahe, dipatupa do i di emper manang di pelataran ni bagas joro i sandiri, di holangholang ni langgatan dohot bilut na songkal i, di inganan na badia na patut parbadiaan nasida nian.

 Songon pinompar ni sibunu panurirang (31), tean do bangko pamunuon i tu angka parise dohot siboto surat ro di sandok halak Jahudi angka na satingki dohot Jesus. Bahkan tu tingki na mangihut pe, tu zaman ni hakristenon torus do i ulahonon nasida. Hombar tusi ma didok Jesus di ay.34, bunuon nasida do deba sian angka panuriang, (Gr.profeetas= prophets/nabi), sian angka parroha (Gr.sofous=wise men/orang-orang bijaksana) dohot sian angka sibotosurat (Gr.grammateis=scribes/ahli-ahli taurat) sisuruonNa tu nasida, parsilanghononna deba, linsinganna deba di angka parguruannasida jala leleanna sian huta tu huta. (Panurirang dison, parroha dohot sibotosurat angka istilah hakristenon nama i. Bolas jadi, di tonga ni hakristenon perdana, lumobi di lingkungan ni si Mateus, adong do angka partohonan sisongon i). Taringot tu angka i, nunga disuriranghon Jesus hian i di jamita parsuruonNa na di Mat.10:17 duu. Siala saluhutna i ndang tagamon lias nasida sian uhum. Hombar tusi ma dilumbahon Jesus, “Asa mandatang tu hamu mudar ni na so marpipot …” (35a) dohot “Sasudena i mandatang sogot tu bangso on.” Ndang gaitgait lumbalumba ni Debata. Di angka na so olo muba, alai na sai marsihohot di dosa dohot hajahaton na niula ni ompuna, sai na luluhononNa do pangalaosion i marsundutsundut (pat.2 Mus.20:5) Taringot tusi, angka partogi ni bangso i do na paling bertanggungjawab, ai songon guru jala pangajari, ajar na sala do diajarhon jala tiruan na lipe ditiruanhon tu bangso i, gabe sai hot ma nasida di hatangkangon ni rohana be, ndang sahat tu hamubaon ni roha.

 Di ay.37-39, dilumbahon Jesus do uhum tu huta Jerusalem. Jerusalem do hutasabungan manang ibukota ni Israel. Manang di dia pe di portibi on, ibukota do sada na gumodang mempengaruhi pembentukan perilaku di sandok harajaon manang negara. Disi do raja dohot partogi angka na gumodang ditangihon halak, angka tokoh na pinatujolo jala na diharaphon halak, angka na pistar dohot pesohor na gumodang ditiru di sandok harajaon. Songon i do Jerusalem gabe penentu di sandok Israel baik selaku kesatuan politis manang pe parugamoon. Sian na jolo, nang di tingki ni Jesus. Disi do angka raja dohot parhuaso ni bangso i, angka sintua ni malim, Sanhedrin dohot partogi ni parugamoon. Manang songon dia sikap ni halak Israel pada umumna maradophon panurirang dohot angka na sinuru ni Debata manopot nasida, ndang terlepas i sian sikap ni Jerusalem selaku ibukota; sikap ni angka raja dohot parhuaso ni bangso i, sikap ni sintua ni malim, Sanhedrin dohot angka partogi ni parugamoon. Ternyata, sian na jolo sahat tu tingki ni Jesus bahkan tu pudiNa, sibunu panurirang do huta Jerusalem i jala sidangguri na sinuru manopot nasida; sibunu panurirang do angka raja dohot parhuaso, songon i sintua ni malim, Sanhedrin dohot angka partogi ni parugamoon, jala i do na tiniru ni halak di sandok Israel. Apala i ma na hinolsohon jala na sinolsolan ni Jesus di jamita on. Mangula do nian Ibana bahen haluaon ni huta i. Taringot tusi, pola do dipatudos Ibana tu pidong (Gr.ornis=hen/ayam) na papunguhon anakna tu toru ni habonghabongna laho mangondingi sian parmaraan dohot mangalehon halason asa mangolu. Ditopot do huta i manang na piga hali jala mangula Ibana di tongatonganasida; dijamitai nasida, diajari, dipaingot, diapoi marhite tanda halongangan, alai marisuang sai marsihohot do nasida di bangkona i, ndang olo nasida muba.

 Dung i dilumbahon Jesus ma uhum tu huta i, didok ma, “Ingkon tarulang do sogot angka bagasmuna.” Tarulang lapatanna, rumar, ndang marpangisi. Torop do halak mangantusi, na digohi do lumbalumba on di hasesega ni huta Jerusalem di taon 70 M na binahen ni si Titus, jenderal ni halak Rom.

Di ayat parpudi didok Jesus, “Ai Hudok ma tu hamu: Na so idaonmuna be Ahu olat ni on.” Na marhahonaan tu hamamateNa do i. Suang songon angka panurirang sinajolo i, Ibana pe bunuon nasida do, parsilanghononna so pola sadia leleng nari, dung i ditanom. Alai parsilangon dohot hamamateNa i ndada holan na laho pasombuhon bangko dohot hagiot pamunuon ni halak Jahudi i, lobi sian i do ai na laho patulushon sangkap hatuaon ni Debata na taringot tu jolma do i. Ala ni i, hehe do Ibana muse jala manaek tu surgo. Ndang idaon ni halak Jahudi be Ibana tutu. Alai tung apala disi do diungkap di nasida kesempatan tu panjangkonon di Ibana selaku Mesias, Sipalua na pinarbagabaga i, gabe dohonon nasida ma, “Pinasupasu ma na ro marhitehite Goar ni Tuhan i.”

Renungan

Raphon donganta sahaporseaon di sandok portibi on, di ari on tapatupa do parningotan di hamamate ni Jesus Kristus. Marragam do sikap ni halak angka na patupahon sadasada parningotan. Boi do rupani halak angka na patupa parningotan i manghatai taringot tu na masa i; manghatai mangalapati, mangisi manang menilai peristiwa na niingot i. Ia so i, boi do angka na patupa parningotan i hohom mamingkiri manang merenungkan lapatan dohot na nidok ni na masa i. Ninna roha, ndang apala ingkon pertentanghonon na dua i. Holan on, molo niulahon na parjolo i naeng ma manat, ai na boi do halak madabu disi tu pemalsuan manang pemutarbalikan fakta ala ni giot ni rohana menilai na masa i dohot mangisi parningotan i hombar tu lomo ni rohana. Alai molo tapatupa parningotan di hamamate ni Tuhanta Jesus Kristus, ndang asa gumodang hita manghatai, sabalikna do tahe, naeng gumodang do hita hohom mamangihon na nidok ni parsilangon dohot hamamateNa i, hohom mamingkiri na na sinoarahonna tu hita, jala hohom mangauhon lapatan dohot panghorhonna di hita. Mardomu tusi, marhaborhatan sian turpuk di hita ari on, adong do dua na naeng pamanatonta.

 Na parjolo, disoarahon parsilangon dohot hamamate ni Tuhanta Jesus Kristus i do tu hita hadosaon dohot hajahatonta. Songon parise dohot sibotosurat khususna, Jerusalem dohot Jahudi umumna na martaringot di turpuk ari on, pardosa do sude jolma. Suman tu ulok jala anak ni ulok dari angka na licik do saluhut jala na palsu, parroha sipalensem jala na marsipaulaula. Songon anak ni ulok dari, jumpang do di jolma i naluri pembunuh.Torang do i dapot idaon, ai di sundut paduahon dope nunga dibunu si Kain si Abel, anggina i. Songon i ma torus mangararati tondi pamunuon i. Ndang marimbar be ingananna dohot sialana, ai na boi masa do i dohot di angka inganan na badia jala na diulahon atas nama ugamo dohot tu angka na sinuru ni Debata bahen hasonangan ni hajolmaon nian. Angka i do na tarida di Golgata, di parsilangon dohot hamamate ni Jesus Kristus i. Hadir do disi sian sude rumang ni manisia. Parhuaso dohot parripe, parugamo dohot na so marpaho, parhalado dohot ruas, halak Jahudi dohot halak sileban, sude adong disi. Marasingasing haroroanna, marasingasing hajongjongan, status dohot perananna, alai di sada pangalaho, dos do nasida sude, pardosa jala parjahat; angka serigala terhadap sesama (homo homini lupus) na sedang memuaskan naluri membunuhnya. Ndang parsindak hita di parsilangon i, alai sude do hita terwakili jala terlibat disi. Dohot hata na asing, disi do hita di tingki na tarpajal Tuhan i. Ala ni i, dohot do dosa nang hajahatonta na disoarahon parsilangon dohot hamamate ni Tuhanta Jesus Kristus i.

Na paduahon, disoarahon parsilangon dohot hamamate ni Tuhanta Jesus Kristus i do tu hita uhum dohot haluaonta. Tu angka parise dohot sibotosurat khususna na martaringot di turpuk on, dilumbahon Jesus do uhum, didok, “Asa mandatang tu hamu mudar ni saluhut angka partigor na so marpipot,” jala tu huta Jerusalem didok, “Ingkon tarulang do sogot bagasmuna.” Songon i, ingkon mangonai do uhum ni Debata tu saluhut pardosa, ai na tigor do Ibana jala parrimas, na mangaluluhon hajahaton ni amaama tu angka anakna ro di sundut patoluhon dohot paopathon angka na sogo roha di Ibana. Alai dison ma Barita Nauli ni parsilangon dohot hamamate ni Jesus Kristus i, ai uhum na ingkon dabuhononNa hian tu jolma pardosa i dihonahon ma i tu Jesus na tarsilang i. Dohot hata na asing, di bagasan Jesus Kristus na tarsilang i, nunga diuhum Debata saluhut pardosa. Ala naung diuhum, sae ma sude utangna, sesa saluhut dosana jala malua. Laos i ma sinoarahon ni parsilangon dohot hamamate ni Jesus Kristus i di hita. Dohot do hita diuhum Debata di uhuman na nidabuhonNa tu Jesus Kristus i, jala ala naung diuhum, nunga sesa utangta jala malua hita. Alai songon dia do asa sahat i tu hita? Tahaporseai ma Ibana, tajangkon gabe Tuhan jala rajanta, tadok ma, “Pinasupasu ma na ro marhitehite Goar ni Tuhan i.”   

Jkt.25.03.13/mvs