9 Trinitatis

SERMON JAMITA TU MINGGU 9 TRINITATIS, 28 JULI 2013

Luk.10:25-37

Patujolo

Di jolo ni turpuk on, dipuji Jesus do Debata ala ditamondinghon Barita Nauli i sian angka na pistar dohot na marroha, alai dipapatar do i tu angka siondihononhon (ay.21 pat.Mat. 11:25). Na marbonsir do i sian pengalaman di pangulaonNa. Di na mamaritahon Barita Nauli i tangkas do diida na mansai maol do i dijalo angka na pistar (isara angka parise manang sibotosurat). Sabalikna do anggo halak na metmet, angka parbulusbulus dohot na pinaduru (songon pardosa/awam, sijalobeo dohot halak Samaria) andul ummura do i dihaporseai. Marhite i, nunga dijoloani pardosa angka sibotosurat bongot tu Harajaon ni Debata, jala sadalan tusi, laos dijoloani ma nasida di parange na denggan, di haholongon dohot di asi ni roha. Turpuk on ma sada na patuduhon i.

            Hatorangan

Didok sibotosurat i tu Jesus, “Guru, dia do sibahenonhu asa hutean muse hangoluan na saleleng ni lelengna?” Mansai tangkas do dipaboa si Lukas, na mangunjuni do halak i, ndang na manungkun manang mangido hatorangan. Porsea do angka parise na adong do hangoluan na saleleng ni lelengna (pat.Ul.23:8). Ndang apala torang di hita manang na boha do pangantusionnasida taringot tusi. Alai ra, ndang apala dao i sian gombaran ni angka rabbi na taringot tu Harajaon ni Debata na marsaor podapoda eskhatologi Jahudi. Molo i do tutu, boi ma antusan titik berat ni pangunjunan i. Mangihuthon hajahudion, na tardungdung do harajaon i marhitehite ulaon patik. Jadi naeng unjunan ni parise i do  Jesus manang na hombar do alusNa tu patik i. Ninna rohana ra, songon ruas na somal Jesus (dalam artian na so hea marsikola tinggi patik), ndang godang na binoto dohot na niantusanNa taringot tu isi Torah manang Buku Patik i. Hape na dua i, parbinotoan dohot pangantusion mansai ringkot do i di ganup na naeng mangajarhon dohot mangulahon patik i. Molo ndang diboto halak patik i, tung songon dia ma tandaon dohot podahonon ni i angka ulaon na hombar tusi? Songon i ma di roha ni sibotopatik on, ndang tagamon tarbahen Jesus pajojorhon angka ulaon sipatupaon ni jolma laho mandungdung Harajaon ni Debata, ai patik i sandiri ‘ndang diboto’ Ibana.

Alai sala do ibana disi. Ndang sungkunsungkun na maol i di Jesus i, na mura do. Ibana do tahe na boi mangalusi i, ai Ibana do satu-satunya na umboto dohot na paboahon dalan hangoluan i. Ndang holan paboahon, na mangungkap pe tahe Ibana do, ai Ibana sandiri do dalan tusi. So marhite Ibana ndang adong na sahat tu hangoluan i (Joh.14:6) Laos Ibana do hagogok ni patik i, na umboto jala na patoranghonsa. Di bagasan habisuhonNa, ndang olo Ibana dijebak. Dipaulak do tahe sungkunsungkun i tu parise i, didok, “Aha do tarsurat di patik i? Beha do dijaha ho?” Marhite i naeng sadarhononNa do ibana taringot tu sipalensem ni rohana, sai hira na manungkun hape na mangujuni.

Hape ndang sadar ibana. Naeng patuduhononna gariada parbinotoanna taringot tu patik i, ai didok ibana ma, “Ingkon dihaholongi ho do Tuhan Debatami sian nasa ateatem, sian nasa tondim, sian nasa gogom dohot sian nasa roham, jala donganmi songon dirim.” Na marrumang hadomuan ni 5 Mus.6:5 (holong tu Debata) dohot 3 Mus.19:18 (holong tu jolma) do i. Nunga tibu ditanda halak Israel i. Alai diida jala diantusi nasida do i songon dua patik na jongjong sandiri, jala na marsisurungi. Tangkasna, holong ni roha tu Debata dirajumi do i asing jala andul sumurung sian holong tu jolma. Jesus do na pasadahon jala na mendudukkan na dua i di sada level jala digoari ma i patik raya (pat.Mat.22:26-40) Ia boi pe sibotosurat i pajojorhon na dua i singkop jala sada, godangan do kemungkinanna na binegena sian Jesus sandiri do i di inganan dohot di tingki na marasing, gabe dialushon dison tu Jesus. Manghaholongi Debata, ingkon sian nasa ateate do, sian nasa tondi, gogo dohot sian nasa roha, lapatanna sian sandok hangoluan manang hadirion; sian sandok eksistensi ni kepribadian manang keseluruhan hidup. Diri manang ngolu i do hapeahan ni holong ni roha i, i do hataridaanna jala laos i do ukuranna; ngolu na sintong, na terarah, jala na berpadanan tu Debata. Laos songon i ma holong tu dongan jolma i, diri manang ngolu i do hapeahanna, hataridaan dohot ukuranna. “Songon dirim,” ninna; lapatanna, songon panghaholongionmu di dirim sandiri. Di Joh.13:34 didok, “Songon holong ni rohangKu di hamu, naeng ma songon i hamu masihaholongan.” Dihaholongi Jesus i do jolma marhite holong na polin, na mamillit (pat.Joh.15:10 duu) jala na manghophop. Sian i torang, holong tu diri sandiri (na gabe ukuran ni holong tu dongan) i, ndang egoisme, alai pangargahonon di diri do, panghaholongion di sada pribadi na niargahon ni Kristus, na pinillit jala na hinophopNa. Songon i do nang dongan i, angka pribadi na niargaan jala na tinobusNa do i. Ala ni i, ingkon argahonon do nasida jala haholongan.

Didok Jesus ma tu sibotopatik i, “Tingkos do alusmi, ulahon ma i, gabe mangolu ma ho.” Ndang na mandok na niomo ni ulaon holong ni roha ni jolma do hangoluan i, ndang. Pasupasu ni Debata do i na dilehon sian asi ni rohaNa. Angka na niasianNa do na boi manghaholongi Ibana marhite kasih balasan na patar di bagasan holong ni roha tu diri dohot tu sesama (pat.1 Joh.4:10, 19 duu)

Umbege i didok ibana ma, “Ai ise do donganhu goaron?”  Taringot tu na manghaholongi Debata tarjalo sibotosurat i do i secara utuh, ndang adong siparsoalhonona disi. Bolas jadi tahe, di bagasan rohana dirajumi do naung digohi ibana i singkop. Aut so i antong, boasa dohonon ni si Lukas ibana na mamintori diri? Alai anggo na paduahon, mansai na maol do i di ibana. Ndang holan di ibana, hira di sandok halak Jahudi do. Bolas dohonon, radot do nasida di holong tu Debata, alai lupa do anggo di holong ni roha tu sesamana (pat.18:18 duu) Bahkan adong do poda ni Jahudi na mandok, na so sala ianakhon nang so  so dipatureture natorasna di ari hatutuana asal ma dialihkan na aturan pangurupionna tu natorasna i gabe pelean tu Debata (Mrk.7:11-12) Hombar tusi ma dipatujolo sibotopatik i sungkunsungkunna ondeng. Dongan (Gr.pleesion, neighbor, tetangga/dekat) sasintongna marlapatan jolma, sesama manusia, halak na jonok manang solhot dalam artian fisik (ndang dalam artian partuturon manang hubungan genealogis). Manang na ise pe i, na pinatongon ni Debata jonok di lambung manang di pardalanan ni ngolu, i ma dongan. Alai mabidanghu do i di roha ni halak Jahudi. Ala ni i dipasompit nasida ma i gabe dongan sabangso dohot halak na asing na mangihuthon patik manang padan ingkon diperlindungi. Halak Gibeon rupani, na diperlindungi marhite sada parpadanan di tingki ni si Josua; dung i proselit, i ma bangso sileban naung teken Jahudi marhite sunat. Angka i do dongan manang sesama manusia, jala angka i ma sihaholongan, na asing i ndang pola. Hosoman tahe gariada (pat. Mat.5:43b)

Mangalusi i, dihatahon Jesus ma sada umpama taringot tu sahalak Samaria na asi roha. Jeriko, dupulupitu batu di sabola purba na secara geografis tumoru saribu duaratus meter sian Jerusalem. Dalan na gogot do padomu na dua huta i. Di siamun dohot di hambirang, angka ronggang do dohot dolok batu, godang liang na marlegotlegot. Inganan na mansai ideal do i di angka panamun.  Jotjot do masa disi perampokan. Ala ni i, pola do digoar i dalan mudar. Songon i ma di umpama on, tardobo do disi sahalak Jahudi (?) Matemate ne do ibana ditadinghon. Dung i, mamolus ma sian i sada malim. Ra, na mulak sian ulaonna do ibana tu Jeriko. (Di Jeriko, adong do parhutaan ni malim). Diida do na tardobo i, alai dipasombu. Boasa? Adong dua kemungkinanna. (1). Manjaga tohonanna. Mabiar ibana so tung mate halak i di tanganna. Mangihuthon patik habadiaon (taurat kesucian) ndang boi dais malim tu bangke. Molo dais, ingkon ramun ibana pitu ari. (2). Manjaga dirina. Biar rohana atik jonok dope panamun i, dung i mulak jala disamun nang ibana. Di pudina, mamolus muse sada halak Levi, pangurupi ni malim. Ibana pe, diida do na tardobo i alai dipasombu. Alasanna pe ra, sarupa do tu na pinarsidalianhon ni malim i. Manang dia pe sian i na sintong, na pasti ndang olo nasida mangurupi. Molo tung na parjolo i do, na boi marlapatan do i holan di dirinasida dohot di bagasan joro i do nasida manghangoluhon haparhaladoonna, ndang dohot di parngoluonna ariari. Dohot hata na asing, dihangoluhon do holong ni roha tu Debata di bagasan rumang na sangat kaku, na so adong dampakna tu dongan jolma. Ia tung na paduahon i do, dipatuduhon i do ngolu na maholonghu tu dirina sandiri. Parpudi, mamolus ma sian i halak Samaria. Aha ma sihirimon ni halak na tardobo i sian i? Nda musuh nasional ni Jahudi do Samaria, hagigian jala biasbias? Sian sogo ni rohana somal do Jahudi manggoari halak Samaria na sibolison manang anak ni setan. Hape, ‘musu’ i do na marasi ni roha tu na tardobo i, na barani menanggung risiko dohot mangurupi ibana. Dibaluti ma bugangna, didurus dohot miak jetun raphon anggur laho mangubati dohot palambokhon, diphundul tu hodana. Hoda (Gr.kteenos) dison, mandok  pinahan boban (a beast of burden, binatang beban); umumna hoda do i manang halode. Diboan ma ibana tu parbornginan jala dipatureture atas biayana sandiri. Sandok asi do rohana di na tardobo i, dilehon gogona, tingki dohot sinadonganna mangurupisa. Nuaeng jumpang ma tingkina manarik kesimpulan. Disungkun Jesus ma sibotopatik i, “Ise sian na tolu i di roham dongan ni na tardobo i?” Ise pe disungkun antong, ndang tagamon so ingkon halak Samaria i dohononna. Sibotopatik i pe songon i do. Alai ndang olo ibana mandok goar i, hata barangsi do i di rohana na so jadi dohonon. Ndang tarpaluasa dirina sian haginjangon ni roha parbangsoonna, gabe digonti ibana ma goar Samaria i dohot  pandohan na gumanjang, “Na marasiroha di ibana,” ninna. Lojana i! Nunga maralus be nuaeng sungkunsungkunna i, nunga diboto manang na ise do donganna. Alai ndang sae holan na mamboto, ingkon dohot do na mangulahonsa, gabe didok Jesus ma tu ibana, “Laho ma ho, bahen ma songon i!”    

            Rancangan Homiletis

Sude na marugamo porsea do di haadongonn ni ngolu di balik ni hamatean. Ndang dos pangantusionna, paasingasing do. Di hita, hangoluan na saleleng ni lelengna do goarna, lapatanna parsaoran dohot Debata. Sian asi ni roha ni Debata, nunga disagihon i tu hita. Alai sagihononNa dope i muse di inganan las ni roha dohot hasonangan na so mansohot saleleng ni lelengna. Taringot tusi, ndang sae i holan hirimon jala paimaimaonta, alai huhut do ingkon hangoluhononta. Songon dia ma i hangoluhononta?

Na parjolo, manghangoluhon holong ni roha tu Debata. Holong, i do sada sian angka na pinangido ni Debata na umbalga di Bibel. I do sintuhu ni patik i, situan ni na denggan na niluluan ni roha ni Tuhan i sian jolma. Taringot tusi, nunga diondolhon i di Padan Narobi, jala dipatangkas Tuhanta Jesus ma i muse di Padan Naimbaru. Aha do haholongon i? Ndang adong defenisina. Alai nang pe so adong, boi do dohonon, ia haholongon ni roha i ndang holan kondisi ni harohaon, perasaan luhur manang gerak hati, alai hatauon do i na mangonjar jolma mangulahon na denggan jala na marguna tu diri dohot tu na asing. Sian i torang, di ngolu i do hapeahan ni holong ni roha i. Dohot hata na asing, eksistensi ni jolma i ma eksistensi ni holongna. Songon i do holong ni Debata, dipapatar do i marhite na mangalehon diriNa di bagasan AnakNa, Jesus Kristus i. Sadalan tusi, diigil do asa dihaholongi jolma Ibana di bagasan kasih balasan na sian nasa ateate, sian nasa tondi, sian nasa gogo dohot sian nasa roha. Na nidokna disi, ingkon sian nasa ngolu manang eksistensi hidup. Ndang asal ngolu, ingkon na sintong do, na terarah jala na berpadanan tu Debata. Songon Ibana naung mangalehon diriNa tu jolma, ingkon songon i ma jolma mambaktihon diri tu Ibana. Nuaeng, tapamanat ma boha do hita manghaholongi Debata? Sadia godang do roha dohot ngolunta tabaktihon tu Ibana? Ndang apala masalpuhu ia nidok, jotjot do hita so manghaholongi Debata. Ragam sialana. Rupani, parungkilon. Di na mangadopi parungkilon, sai adong do halak na so pos be rohana tu Debata, alai godangan nama tu datu. Tung dilehon do sandok rohana tu hata ni datu i, dipahimpu pingkiranna mangoloi podana jala dilehon hepengna bahen upana. Manang piga minggu na salpu, adong do sada pandita mandok, 80% sian ruas ni huriana marsitiopan dope tu okkultisme, maniopniop sitampar dasar, partahanan ni daging, bonang manalu dohot na asing. Mura do di deba halak na mandok goar ni Debata sian na so ture dalanna, marende manang martangiang ndang sian nasa rohana, alai holan sian soara do manang saringar sambing, na tanpa rasa jala tanpa emosi. Torop na so marningot be di ari Minggu jala na marbadiaihon, na so ringgas be rohana tumangihon dohot mangguruhon hata ni Debata. Nda angka i hapataran ni holong ni roha tu Debata (Patik I-IV)?

Na paduahon, manghangoluhon holong ni roha tu diri dohot dongan jolma. Teologi dohot antropologi, parugamoon dohot parngoluon siapari, parhuriaon dohot kemasyarakatan, ndang tarsirang angka i di pengamalan ni hakristenon. Pangantusion taringot tu Debata mandapot hataridaanna do i di pangantusion di diri dohot dongan jolma, parugamoon dohot parhuriaon mandapot relevansina di tonga parngoluon dohot parsaoran siapari. Songon i do panghaholongion tu Debata dohot panghaholongion tu dongan jolma i ndang tarsirang i nang pe ingkon dibedahon. Na sada ndang mangonti na sada nari. Tangkasna, panghaholongion tu tu Tuhan i mandapot hataridaanna do di pangghaholongion tu diri dohot tu dongan, jala panghaholongion tu diri dohot tu dongan i mandapot ojahan dohot lapatanna do i di bagasan panghaholongion tu Debata. Ingkon argaanta do dirinta, ai sada  pribadi na niargaan ni Debata do i jala na tinobus ni Kristus. Donganta i pe songon i do, pribadi na niargaan ni Debata do i jala na tinobus ni Tuhanta Jesus Kristus. Ala ni i, songon pangargahon dohot panghaholongionta di dirinta, naeng songon i ma hita ganup mangargahon jala manghaholongi donganta. Alai ise do donganta? Sungkunsungkun na prinsipil do i na ingkon alusan. Manang songon dia halak mangalusi i, hombar tusi ma panghaholongionna. Anggo halak Jahudi dialusi do i dohot dongan sabangso. Tangkasna, sesama Jahudi. Holan i do dirajumi nasida donganna, jala olat ni i ma sihaholonganna. Na di ruar ni i, ndang pola; sihosoman tahe gariada. Sasintongna, dongan i ma jolma. Ala ni i, sude do jolma dongan, sude do sihaholongan. Mardomu tu rumang ni panghaholongion i pe, ingkon do i dohonon. Luhut jolma do diargahon Debata jala ditobus Kristus. Ndang tarbatas panobusionNa i olat ni angka na tatanda, olat ni marga, bangso dohot hurianta, ndang. Na targoar ‘musunta’ pe dohot do. Ala ni i, manang na ise pe na pinatongon ni Debata di pardalanan ni ngolunta, i do donganta, jala i ma sihaholonganta. Tapamanat ma i di ngolunta, ise do tutu donganta jala boha do panghaholongionta? Dison pe, ndang masalpuhu ia nidok, ndang sai sintong dope pangantusion dohot panandaonta di dongan hombar tu na nidok ni hata ni Debata. Tarbatas do panjaloonta di donganta; na deba, holan donganna samarga do dohot donganna sahuta, jala holan i ma na dihaholongi. Molo pola hinataan dope sahat tu ‘musu’, lam tu maolna nama jumpang na masihaholongan i. Tuhanta mangajari hita nuaeng asa mamereng tu keseluruhan ni hajolmaon. Manang na ise pe i, molo Debata patongonhon, tusi ma hita manghangoluhon holongNa angka na niaturhonNa di patikNa (Patik V-X) i. Nda patut i parrohahononta di tingki na susa on, di ngolu na lam tu maolna hinorhon ni parnaek ni arga ni BBM on asa unang madabu hita tu sikap na holan manghaholongi dohot manarihon diri sandiri?

Jkt.22.07.2013/mvs         

         

Read More..

7 Trinitatis

SERMON JAMITA TU MINGGU 7 TRINITATIS, 14 JULI 2013

1 Raj.3:4-14

Patujolo

Mangihuthon agahan ni na pistar, isara ni Prof.van Gelderen, bangkit raja do si Salomo di taon 972 sM, jala opatpulu taon lelengna mangarajai (pat.1 Raj.11:42; 2 Kron.9:30). Poso dope ibana di hababangkitna i, marumur 18 tu 20 taon dope. Ndang apala mura hasasahat ni harajaon i tu ibana, alai mamolus sada pertarungan do di kalangan keluarga dohot istana. Dung dipaujung ibana saluhutna i, jumpang ma tingkina mangulahon ulaonna songon raja jala panguhum di tongatonga ni bangsona Israel. Ndang na mura i, na maol do bahkan na maol situtu. Laho patulushon i ndang sae di ibana holan na mempedomani angka turgas manang instruksi naung jinalona sian amana, Raja David songon naung pinatupana di na paujunghon masalah di kalangan keluarga dohot istana na tinaringotan ondeng, alai lobi sian i ingkon adong do di ibana habisuhon na sian Debata. Mardomu tusi, apala di bona ni laporan ni panurat ni Buku Rajaraja taringot tu pamarentaon ni si Salomo i, ditaringoti do usaho ni raja i mangalului habisuhon sian Debata songon na tarjaha di turpuk on.

           

            Hatorangan

Gibeon, i ma sada inganan di ruar ni Jerusalem. Mangihuthon Flavius Josephus, marhira 4,5 – 6 mil ma i sian huta i. (Tartanda dope huta i di tingki on, jala margoar ma i nuaeng El-Jib). Sada inganan parsombaon (tempat suci) naung leleng do i. I do ra alana asa gabe tusi dipaojak undungundung parluhutan dohot langgatan tombaga na pinauli ni si Musa di halongonan uju i. Sahat tu tingki ni Panguhum Eli, di Silo do haojahan ni undungundung parluhutan dohot poti parpadanan ni Debata Jahowa. Dung dirampas halak Palistim poti i alai dipaulak muse, disimpan ma i di Kiryat-Jearim (1 Sam.7:1) Salpu i, rupa dipaunsat do undungundung parluhutan i tu Nob (pat.1 Sam.21:6), jala sian i dipaunsat muse tu Gibeon. Ra, di tingki ni si David ma hamamasa ni i. Ala ni i lam naek ma pamor ni Gibeon, gabe sada tempat suci na penting ma i di Israel. Laos di tingki ni Raja David, dialap do poti parpadanan i sian bagas ni si Obed-Edom jala diboan tu Jerusalem (2 Sam.6:12 duu). Ra, laos di tingki i dipaunsat do muse undungundung parluhutan i sian Gibeon tu Jerusalem jala tusi ma dipaojak poti parpadanan i. (Pamanat ma rupani, di 2 Sam.7:2 ditaringoti do naung maringan di rimberimbe poti ni Debata) Nang pe songon i ndang pintor mago pamor ni Gibeon, alai torus dope diargai halak, pola dohot si Salomo sandiri manghilala ringkotna laho marsomba dohot mamele tusi. Songon i ma dipaboa dison, dung dipaujung raja i sude masalah di kalangan keluarga dohot istana, jala dung dibuat boru ni Parao bahen tuanlaenna, laho do ibana tu Gibeon asa mamele disi. Inganan pamelean manang parsombaon di Israel digoari do sipata robean [(Hb.habaamaah, high place, bukit pengorbanan) (pat.1 Sam.9:12)] Na marpambuatan do goar i sian hasomalan ni bangso sileban na humaliang nasida na sai mambahen tempat sucinasida di atas ni dolok. Alai molo dipangke pe i di Israel, ndang sai na mandok na di atas dolok manang  robean inganan parsombaon i, ndang. Boi do tutu songon i, alai boi do huhut di na hornop manang di na toru. Di Bibel hata Batak sipata, songon na di ay.4 on, diterjemahkan do habaamaah i dohot tambak. Ndang apala torang alasan ni i. Alai ninna roha, adong do tong pardomuan ni i tu pangantusion ni dolok manang robean, i ma inganan na timbo manang na tingka, ai tano na pinatimbo manang na pinatimbul do tutu tambak. (Pamanat  ma rupani, somal do halak Batak manambahon ungkapan ‘na timbo’ tu tambak lumobi di panghataion adat) Alai huhut, boi do ra adong pardomuan ni i tu pangantusion ni Batak taringot tu tambak, i ma tanoman ni na matua (na lam leleng boi gabe ‘tempat keramat’). Sahat disi, dipelehon si Salomo ma pelean situtungon di langgatan i. Pelean situtungon (Hb.`olowt, burnt offering, korban bakaran), i ma pelean na ditutung apala luhut, ndang adong na ditebahon bahen jambar ni malim. “Saribu pelean situtungon,” ninna. Taringot tusi adong do mandok, ndang pola ingkon lapathonon na di pangebationna na sahali i do dipelehon na saribu pelean i, alai boi do i manudu tu torop ni pelean na dipelehon ibana disi di manang piga pangebationna saleleng ibana mangarajai. Saribu pelean ndang na tingki be godang ni i. Ndang boi be i diulahon di bagasan ombas na jempek, alai nunga ingkon adong manang na piga ari.

Di Gibeon, patar Jahowa tu si Salomo di bagasan nipina. Dipangke Debata do sipata nipi laho papatarhon diri dohot lomo ni rohaNa tu hajolmaon. Alai ndang sude nipi songon i, godangan do na so adong hahonaanna tu tingki na ro, alai holan hapuasan ni pengalaman di tingki na salpu do i di bagasan do rumangna na so taratur. I ma nidokna nipi gaor. Sian angka nipi na marrumang pangungkapon songon i, adong do na pintor boi antusan, alai adong do na ingkon jolo jujuron ni halak na manjalo hatauon tusi. Nipi ni Parao di Misir rupani, ingkon jolo dijujur si Josep do asa haantusan. Songon i do nang nipi ni Raja Nebukadnesar, ingkon jolo dijujur si Daniel do. Dison, rumang na parjolo i do na masa, ai ndang pola ingkon jolo marsungkun si Salomo tu manang ise pe taringot tu na nidok ni nipina i. Didok Debata tu ibana, “Pangido ma manang aha silehononHu tu ho.”

Umbege i ndang mabuk si Salomo patujolohon pangidoanna na hombar tu giot ni rohana, alai diparhatopot do parjolo haporseaon dohot panandaonna di Debata. Sian pengalaman hidup ni amana si David tangkas do diboto jala dihaporseai paboa na asi roha do Debata Jahowa i. “Nunga dibahen Ho asi ni roha godang tu naposoM, damang si David,” ninna. Asi ni roha dison (Hb.checed, mercy, kasih-setia), i ma denggan basa manang hasatiaon ni Debata. Ala ni asi ni roha dohot denggan ni basaNa, satia do Debata tu pamilliton dohot padanNa tu Raja David. Hasatiaon ni Tuhan i, na mangigil hasatiaon do sian raja i; ingkon satia ibana tu Debata marhite na marparange di bagasan hasintongan, hatigoran dohot habonaron maradophon Jahowa. Ndang sai marhasil ibana mangaradoti i, jotjot do ibana madabu. Alai ndang laos modom jala mago ibana di bagasan dosana i, diboto do manolsoli jala mulak laos mardalan muse di dalan hasatiaon i gabe dapotsa hasesaan ni dosa dohot pengampunan. Boasa? Alusna, ala ditiop Debata ibana. Alai – sahali nari – boasa ditiop Debata ibana? Alusna, ala ni denggan ni basa, asi ni roha dohot hasatiaon ni Debata. Di bagasan asi ni roha dohot pengampunan ni Tuhan i, dirajumi do ibana na satia, na sintong, na tigor dohot na bonar, jala ala ni i dipahot ma harajaonna sahat ro di hamamatena. Ndang olat ni i, alai diuduti dope, ai dilehon do di ibana sada anak na juguk di habangsana. Nunga diida si Salomo i sude, jala diokuhon nuaeng di adopan ni Debata.

Di ay.7 diokuhon jala dihatindanghon do na Debata do pabangkithon ibana gabe raja singkat ni amana, si David i. I pe, tong do ala ni asi ni roha ni Debata, ala ni denggan ni basa dohot hasatiaonNa. Ai ise ma ibana pola di adopan ni Tuhan i, nda sahalak na bajar   dope? Di jolo nunga nidok, marhira 18 tu 20 taon dope umurna di na bangkit raja i. Tu ukuran ni halak Israel na mambahen 30 taon songon batas ni kedewasaan tarrajum tu na di bawah umur dope ibana hatiha i. Taringot tusi pola do didok ibana, “Na`ar qaaTon Lo` `eeda` tseet waabo`: Sahalak dakdanak na metmet dope ahu, ndang huboto dope boha ruar dohot bongot.”  Ruar dohot bongot, hata poda (amsal, proverb) do i na mandok, aktif manang manguluhon sadasada urusan.

Di ay.8 diokuhon jala dihatindanghon ibana do na Debata do nang na mamillit Israel gabe bangsoNa. Nunga gabe sada bangso na bolon Israel i hatiha i, na so taretong jala na so habilangan be  dibahen deakna. I pe, tong do ala ni asi ni roha ni Debata, ala ni denggan ni basa dohot hasatiaonNa. So manang na balga hian nasida manang  na burju, sabalikna do tahe, bangso na metmet do jala na tangkang marroha. Di tonga ni bangso i ma nuaeng si Salomo, sahalak na di rumang ni hajolmaon ndang dope umboto ruar dohot bongot dipabangkit Debata gabe raja. Boha ma ibana mangulahon i?

Nuaeng, jumpang ma tingkina mangalusi asi ni roha ni Debata naung mangungkap pintu tu pangidoanna (ida 5b), didok ma, “Lehon ma tu naposoMon roha na pantas.”  Roha na pantas, apala i ma na diharingkothon ibana asa tarbahensa manguhum bangso na bolon i. Roha na pantas, aha do i? Pantas, di hata Heber shomea. Sada do urat ni hata i dohot shema` na di panindangion haporseaon ni Israel i, na mandok tangihon/bege (5 Mus.6:4-5). Di hata Inggris (ida AV/TNKJV/NRSV), diterjemahkan do i dohot understanding jala di Alkitab, faham. Jadi roha na pantas (Hb.leeb shomea`) i ma understanding heart (AV/TNKJV), understanding mind (NRSV), hati yang faham manang roha na mangantusi laho manirang na denggan sian na roa. Mansai ringkot do i mardomu tu fungsi ni raja songon panguhum. Di halak Israel, suang le songon na masa hira di sandok dunia timur, terkait erat do harajaon tu paruhuman. Angka na targoar panguhum rupani na di tingki ni angka panguhum, isara si Eli, si Samuel dohot na asing ndada holan di bidang judikatif nasida marhuaso, alai dohot do di bidang eksekutif. Laos songon i do nang angka raja di zaman ni harajaon, ndada holan na mangarajai, alai dohot do na manguhumi parkaro. Asa, molo dipangke si Salomo di ayat on hata manguhum (dua hali) na marhahonaan do i tu duansa, i ma tu na mamarenta dohot tu na manguhumi. Patulushon i mansai ringkot ma di ibana roha na mangantusi asa diboto manirang na denggan sian na roa, diboto mamillit dohot mangulahon na denggan jala pasiding dohot mangalo na roa, diboto mamutushon dohot mamintori siula na denggan jala manontuhon dohot manguhumi siula na roa. Holan marhite na songon i do boi ibana manguhum bangso ni Debata na marmulia i.

Lomo do roha ni Debata di pangidoanna i. Ndang egocentris antong tangiangna i, ai so dipangido ibana angka na marhahonaan tu dirina, isara ginjang ni umur, hamoraon dohot hamonangan maralohon musuna, alai teocentris do ai dipangido do na ringkot di bangso ni Tuhan i. “Roha tahe pinangidom,” ninna. Roha (Hb.haabiym), hira dos do i dohot pantas na di ay.9 i. Hombar tusi, di hata Inggris (AV/TNKJV/NRSV) diterjemahkan do i tong dohot understanding; di Alkitab pengertian, i ma pangantusion laho tumimbang uhum. Songon sada raja na pinabangkit ni Debata, ingkon mamarenta do ibana jala manguhum hombar tu uhum. Marojahan tu uhum (Hb.mishpaaT) na adong, isara patik naung tarsurat ingkon buatonna do angka kebijakan taringot tu sipatupaonna di tongatonga ni bangso i, jala ingkon putushononna do uhum hatigoran di tongatonga ni angka na marparkaro. Alai ndang holan marojahan tu uhum naung adong, dohot do nang taringot tu haputusan na marojahan di pangantusion na jumpangsa sian pardomuan dohot parsaoranna na torus manorus tu Debata. Sai adong do parkaro manang masalah ni parngoluon na so taralusan dope marojahan tu uhum naung adong. Songon raja ibana, ingkon buatonna do haputusan nang taringot tu angka sisongon i. Alai aha ojahanna? I ma na nidohan ondeng, pangantusion na dapotsa sian pardomuan dohot parsaoran na torus manorus tu Debata. Haputusan angka na songon i, gabe uhum do i muse di Israel, gabe juris prudensi di angka pangalaho na dos jala na lam pamorahon khasanah perbendaharaan hukum ni bangso i.

Di ay.12 diungkaphon Debata do pangoloionNa tu pangidoan ni Raja Salomo i, didok, “Ida ma, lehononHu ma tu ho roha na bisuk jala na pantas.” Roha na bisuk (Hb.leeb chaakaam, wise heart, hati yang penuh hikmat) dison hira dos do tong tu roha na pantas (Hb.leeb shomea`) na di ay.9, laos songon i tu roha (Hb.haabiym) na di ay.11 na diulahi muse di ay.12 on. [(Sada do urat ni hata na dipangke tu ‘roha’ di ay.11 (haabiym) dohot ‘pantas’ di ay.12 (haabown, understanding, pengertian)] Marhite i, dipasurung Debata ibana sian sandok hajolmaon angka naung salpu nang na naeng ro dope.

Angkup ni i, marpadan do Debata manambahon hamoraon dohot hamuliaon angka na so pinagidona, gabe ndang adong tudoshon ibana sian tongatonga ni angka raja saleleng di ngoluna.

Songon sahalak naung pinasurung ni Debata, ingkon marparange do si Salomo di angka dalan ni Debata, i ma na mangaradoti angka patik (Hb.chukay, statutes, aturan/ketetapan) dohot tona (Hb.mitswotay, commandments, perintah, parenta) ni Debata. Taringot tusi, ingkon amana si David do na gabe tiruanna. Di jolo nunga nidok, ndang sai marhasil nian Raja David mardalan di dalan ni Jahowa, jotjot do manimbil. Alai hasurunganna, sai boi ibana mulak gabe jumpangsa hasesaan dohot pangampunan jala mardalan muse di dalan hasintongan i. Di bagasan ni i do ibana boi gabe tiruan manang tudosan di si Salomo dohot di sandok raja ni Israel na ro sian pudina. Molo jumpang na songon i di Salomo, tumpahon ni Debata ma ibana sarimatua.

            Rancangan Homiletis

Habisuhon, mansai na arga do i di Bibel. Sian Padan Narobi tu Padan Naimbaru, jotjot do i ditaringoti, jala dipapujipuji di angka buku na tarrajum tu kesusasteraan hikmat. Margogohon habisuhon i tarbahen jolma do manirang manang mamolati na denggan sian na roa, jala marantu di ngolu dohot di parngoluonna. Alai ndang na mura i dungdungon. Ndang tarparsiajaran i songon na mangguruhon hapistaran manang parbinotoan tano on, silehonlehon ni Debata do i na dibasabasahon sian asi ni roha dohot denggan ni basaNa. Ala ni i, sipangidoon do i sian Ibana. Panurat ni Epistel Jakobus mandok, “Ai molo adong di tongatongamuna na hurangan bisuk, dipangido ma tu Debata, na bulus mangalehon di saluhut jala ndang marpangea, dung i lehononNa ma tu ibana.” (Jak.1:5). Alai didok pe songon i, ndada dilehon manang didekdekhon i songon i sambing tu angka na mangido jala manghasiholisa. Adong do tahe na ingkon radotanna, jala di bagasan manang seiring tu pangaradotionna i ma jumpangsa habisuhon i. Marhaborhatan sian turpuk jamita di ari on, naeng parsiajaranta do deba sian na patut jala na ingkon radotanta ia na masihol hita jala naeng manjalo di habisuhon na sian ginjang i.

Na parjolo, mangaradoti parsombaon tu Debata. Sian asi ni roha dohot dengan ni basa ni Debata tu bangsoNa Israel dohot tu si David naung pinillitNa, dipabangkit Debata do si Salomo gabe raja gumomgom bangsoNa. Poso dope ibana hatiha i, ndang diboto dope ruar dohot bongot, hape ingkon uhumonna ma sada bangso na bolon na so habilangan be dibahen deakna. Mangulahon i mansai ringkot ma di ibana habisuhon, asa marhitehon i  boi ibana tumimbang uhum. Di sihol ni rohana di habisuhon i, laho do ibana tu Gibeon, sada inganan parsombaon di ruar ni Jerusalem jala marsomba huhut mamele Jahowa disi. Ndang tarhirim ibana, ai apala disi do dipapatar Debata diriNa tu ibana, jala diungkap pintu tu pangidoanna. Songon i do hita, ia naeng jumpangan hita di habisuhon, ingkon radotanta do parsombaon dohot pameleon tu Debata. Ndada holan parsombaon dohot pameleon di angka inganan parsombaon isara di gareja, alai ngolunta sadiri do na ingkon gabe parsombaon dohot pelean tu Debata. Mardomu tusi dipasingothon Apostel Paulus do, “Na huapoi ma hamu, ale angka dongan, marhitehite asi ni roha ni Debata: Pasahat hamu ma dagingmuna bahen pelean na mangolu, na badia, na hinalomohon ni Debata; i ma hadaulaton ni na marroha.” (Rm.12:1) Di ringgas ni rohanta manombahon sandok hangoluanta tu Debata, disi do dibasabasahon tu hita habisuhon i gabe botoonta manirang na denggan sian na roa, songon na nidok ni apostel i dope “Jala unang gabe sarombang hamu dohot portibi on; alai gabe imbaru ma hamu, dung muba pingkiranmuna, asa tau hamu manimbangi lomo ni roha ni Debata, i ma na uli, na hinalashonna dohot na sun denggan.” (Rm.12:2)

Na paduahon, jumolo mangalului harajaon ni Debata dohot hatigoranNa. Umbege hata ni Debata na mangungkap pintu tu pangidoanna, ndang mabuk si Samomo. Ndang sahalak na egosentris ibana di pangidoanna, na teosentris do ai na ringkot di harajaon ni Debata do dipangido. Bahen hasonangan ni bangso ni Debata di toru ni pamarentaonna, mansai ringkot ma di ibana roha, i ma roha na pantas manang roha na bisuk asa boi tumimbang uhum, i ma na manontuhon kebijakan-kebijakan di bidang eksekutif, mamutushon uhum dohot hatigoran di bidang judikatif, dohot tumimbang uhum di angka pangalaho na so haalusan dope hombar tu uhum naung adong, na marojahan di pangantusion na dapotsa sian pardomuan dohot parsaoranna na torus manorus tu Debata. Dihalomohon Debata do pangidoanna i, dibagabagahon do na lehononNa di ibana roha na bisuk jala na pantas. Angkup ni i, dibagabagahon dope na basabasahononNa do nang na so pinangidona, i ma hamuliaon dohot hamoraon, gabe sumurung ibana di habisuhon sian sandok na mangolu angka naung salpu dohot na naeng ro, sumurung huhut di hamuliaon dohot hamoraon sian nasa raja saleleng ibana mangolu. Songon i ma hita, ia naeng jumpangan hita di roha, di roha na pantas manang roha na bisuk, ingkon jumolo do luluanta harajaon ni Debata dohot hatigoranna. Ndang gabe tarhirim manang luangan hita disi, alai sian asi ni roha dohot denggan basa ni Debata sai na tambahononNa do di hita angka na taharingkothon asa marhasonangan hita mangolu. Laos i ma siparrohahononta di tingki on, di tonga ni bangsonta na mangadopi hamaolon ni ngolu di gomgoman ni pamarenta dohot di toru ni angka partogi na lebih mementingkan pencitraan sian na manarihon hasonangan ni bangso. Ndang sae di hita holan na manangianghon parguna ni daging, manang mangula patukhon hangoluan siapari, laos songon i na manoarahon asa disarihon angka partogi dohot pamarenta kesejahteraan jasmani, alai ingkon dohot do na manarihon asa sandok bangsonta on, sian parripe sahat ro di angka partogi dohot panggomgomina jumpangan roha jala mangolu di hapantason dohot habisuhon jala boi manirang na denggan sian na roa. Taringot tusi, ingkon hita do na patut di jolo jala na parjolo.  

Na patoluhon, mangolu di hasatiaon. Ala ni asi ni roha dohot denggan ni basaNa, satia do Debata tu padan dohot tu bangsoNa; ditumpahi do nasida, dijadihon gabe sada bangso na bolon; diramoti do dohot si David, na pinabangkitNa gumomgom bangso i. Maradophon Debata na satia i, ingkon satia do nang raja i. Ingkon marparange ibana di hasintongan, hatigoran dohot habonaron ni roha. Laos songon i do si Salomo, martiruan tu amana si David, ingkon satia do tu Debata marhite na mangaradoti angka patik dohot tonaNa. Di bagasan hasatiaonna i do ibana lam marroha, lam pantas jala bisuk; dung i, di bagasan dohot ala ni habisuhonna i lam marantu ma ibana mamarenta dohot manguhum bangso i, gabe marhasonangan nasida maringan ganup di toru ni hau anggurna be dohot di toru ni hau arana be (1 Raj.5:5), jala tumpahan ni ma Debata ibana sarimatua. Songon i ma nang hita, ingkon satia do hita tu Debata marhite pangaradotion di patik dohot angka tonaNa jala marparange di bagasan hasintonganNa, hatigoran dohot habonaronNa. Di bagasan hasatiaon i do hita lam marbisuk, jala di bagasan dohot marhite habisuhon i lam margogo jala marantu di parngoluon, ai – sahali nari – botoonta ma manirang na denggan sian na roa, tau manimbangi lomo ni roha ni Debata. Ninna roha, apala i ma na mansai ringkot parungkilhonon jala hangoluhononta di tingki na maol on. Songon naung ganup hita umbotosa, holan adong wacana panaekhon arga ni BBM nunga pintor manaek arga ni deba kebutuhan pokok. Dung saut dipanaek, manamba do muse arga i sahali nari. Ala ni i, di toropan hita on, lam tu maolna do na mangolu i. Hinamaol ni na mangolu songon i, boi do manghorhon gabe lam so diboto halak be manirang na denggan sian na roa, lam so diatusi lapatan ni na mangolu di bagasan hasatiaon tu Debata; lam nipis pangantusionna taringot tu hasintongan, hatigoran dohot habonaron jala lam so peka be panghilalaanna tu na manghagigihon angka pangalaosion dohot dosa. Huria sandiri gari boi madabu tu na songon i. Di face book, jinaha do sada status songon on. Manangko do sahalak sintua sian  perusahaan parkarejoanna. Dung i dialuhon  perusahaan i ma ibana tu polisi. Alai adong ma na marusaho tarmasuk na menyogok asa unang ditorushon parkaro i. Saut ma songon i, alai diparadianhon ma ibana sian parkarejoanna. Alai anggo huria, ndang adong agia aha tindakanna. “Rohana ma disi, maila hita,” i do ninna didok pandita. Hot do ibana parhalado, jala dohot maragenda. “Ai ndang marpolisi, kan?” ninna do membela diri. Molo so satia hita tu Debata jala marparange di bagasan hasintongan, uang tarsonggot hita molo songgop tu hita songon na tu Raja Salomo, bola dua harajaonna i di pudina.      

  

jkt.11.07.2013/mvs

Read More..