Advent-1

SERMON JAMITA TU MINGGU ADVENT-I, 29 NOPEMBER 2009
4 Mus.24:15-17

Patujolo

Marujung ne ma tingki ni uhum na tu Israel, i ma na madoado di parhorsihan leleng ni 40 taon; naeng bongot ma nasida tu Kanaan, tano na pinarbagabaga i.

Tagan so sahat dope tusi, ingkon boluson nasida do jolo luat ni Moab. Halak Moab, i ma pomparan ni si Lot sian boruna sihahaan (pat.1 Mus.19:37). Maringan do nasida di luat na di sabola purba ni laut Mate. Marnida halak Israel i, godoron do roha ni si Balas, raja ni Moab i. Mabiar do ibana so tung dirampas halak Israel i maon tanona. Mangalo ndang tuk gogona. Ala ni i dilului ma dalan manaluhon Israel marhite pangurupion ni si Bileam, sada petenung sian Petor, i ma sada pusat ni ilmu gaib (magi) di topi ni batangaek Euprat. Dihaporseai halak do, manang ise na pinasupasuna tarpasupasu do i, alai sabalikna nasa na binuraanna hona bura do (4 Mus.22:6). Sada sian manang piga halak sileban naung dapotan parbinotoan di Jahowa do ibana, songon si Melkisedek (1 Mus.14:18), si Abimelek (1 Mus.20:2), si Laban dohot si Betuel (1 Mus.24:50), si Jetro (2 Mus.18:10), dohot si Job (Job 1:1) raphon angka alealena, si Elipas, si Bildad, si Sopar dohot si Elihu. Ndang olo ibana manghatahon manang aha asing sian na tinonahon ni Tuhan i, gabe masa ma peristiwa na di jamita on (dohot konteksna), na naeng mamurai do ibana nian dijou, hape gabe mamasumasu. Sampe tu opat hali masa songon i; parjolo 23:7-10, paduahon 23:18-24, patoluhon 24:3-9, paopathon 24:15-24 jala sabagian sian i ma turpukta ari on.

Hatorangan

Di salinan Batak digoar do panurirangon ni si Bileam i tonggo. Hurang sintong do i, ai tonggo lapatanna tangiang (tabas/mantera?), pangidoan, manang joujou (patudos istilah tonggoraja). Sumintong do salinan Alkitab na mandok sanjak [(Hbr. mashaalow/parable/ perumpamaan/ibarat). (Terjemahan Indonesia lama: misal/amsal)]. Ndang na sian dirina i, na sian ginjang do, sian Debata. Hombar tusi di salinan Batak dipangke ma dison hata pangungkapon. Di hata Heber na’um dohot uwn’um do dipangke, i ma istilah khusus tu angka pandohan ni Debata (ucapan ilahi) na marlapatan tutur kata (said). Digoar ibana do dirina baoa naung tonggor matana. Ra, na marpardomuan do i tu pangalamanna na sanga ‘pitung’ gabe so boi marnida suruan ni Debata na mangambat ibana. Hagiotna do na mambahen i. Borhat pe ibana holan ala ni na dipaloas Debata (22:20), jala dipasada rohana manghatahon holan angka na tinonahon ni Tuhan i (22:18), ndang tarpaluasa dope dirina anggo sian hisapna, ai dao di bagasan rohana sai manghirim dope ibana na muba nian tona ni Debata sian pasupasu gabe bura asa boi ibana manjalo upa na godang sian si Balas. Nunga hea antong dialami ibana na suman tusi, ai di 22:12 diorai do ibana borhat, hape di 22:20 dipaloas. Laos i do alana umbahen na sai dipaolooloi ibana si Balas morot sian inganan na sada tu inganan na sada nari, ala dirimpu rohana na tarbahen mimbar do lomo ni roha dohot tona ni Debata di inganan na paasingasing. Alai nuaeng nunga malua ibana sian hapitungonna i, gabe digoar ibana ma dirina baoa naung tonggor matana.

Di ay.16, digoar si Bileam dope dirina jolma naung somal umbege angka hata ni Debata. Nunga nidok, sada sian manang piga halak sileban naung dapotan parbinotoan di Jahowa do ibana. Ndang holan parbinotoan na umum i, isara ruas ni sadasada bangso parbegu na marsaor dohot ruas ni sada bangso parbegu na asing gabe jumpangan parbinotoan di na pinardebata ni bangso na asing i jala huhut dihabiari; ndang apala digoar i nian debatana, alai siangkup ni na pinardebatana, dihormati do nang i jala dipasangap. Lobi sian i do si Bileam, ai digoar do Jahowa i: “Debatangku” (22:18a); ditanda jala dihaporseai do huhut paboa Nasuntimbul do Ibana jala Nasunhinagogo. Tontu do, parbinotoan na langsung do i dijalo sian Tuhan i, ai ndang adong agia aha sipatudu na mandok na hea ibana marsaor tu halak Israel asa gabe jumpangsa panandaon dohot haporseaon sisongon i. Dijalo ibana do i di sada parmataon (Hbr. machazeeh/vision/penglihatan). Tungkap do ibana (falling into trance) hatiha i, alai tarbungka do anggo matana. Laos songon i do nang taringot tu angka hata ni Debata na nidokna naung somal binegena, dijalo do i langsung sian Debata. Ragam do cara ni Debata pasahathon hataNa tu panurirangNa, isara marhite parbinegean (audio), marhite pamangan (dipeakhon hata i tu pamanganna, pat.Jer.1:9), marhite roha (disuanhon hata i tu rohana, pat.Jer.20:8-9), marhite perlambang perbuatan sitafsirhonon, dohot marhite pangungkapon (visual mamang duansa, audio visual).

Di bagasan pangungkapon nunga ditatap si Bileam Israel di masa depan, jala i ma nuaeng na dihatahon tu Raja Balas, didok: “Binsar do sogot sada bintang sian Jakob jala hehe do sada tungkot harajaon sian Israel.” Bintang, simbol ni huaso (power) do i dohot martabat na timbo (splendid dignity), jala tungkot (tungkot harajaon, 1 Mus.49:10) martudutudu tu raja parmonang. Sahali nari, pangungkapon taringot tu Israel do i. Nunga diida si Bileam na jongjong do muse harajaon Israel. Di gomgoman ni angka rajana, gabe sada harajaon na gogo do i jala na marhuaso, na disegani jala na berpengaruh bahkan na manghuasoi angka luat na humaliang. Puncak kejayaan ni harajaon i masa do di tingki ni si David, jala disi ma dipapatu angka luat na humaliang, tarmasuk Moab, jala dipatunduk sandok pinompar ni si Set. Set dison, ra, goar na asing (sinonim) ni Moab do i. Di angka surat na robi ni Misir rupani, digoar do pangisi ni luat Moab i halak Syutu.

Sipahusorhusoron

Sian asi ni roha ni Debata, di ari on nunga sahat hita tu Taon Parhuriaon na imbaru. Na laos bertepatan ma i tu Advent. Advent manang Adventus mandok haroro (coming). Di sejarah ni angka ugamo, na marhahonaan do i tu haroro ni sada dewa tu daerah kultusna. Diambil alih huria do istilah i jala diintegrasihon tu parngoluonna laho manggombarhon haroro ni Debata tumopot bangsoNa. Lebih khusus, haroroNa di bagasan Jesus Kristus. Manorusi tingki na imbaru, ro do Kristus manopot hajolmaon; ro laho padamehon dohot paluahon. Parjolo sahali di hatutubuNa, jala paduahon di haroroNa paduahalihon di ari na parpudi. Hombar tusi ma hahonaanna di parngoluon ni huria. Na marhahonaan do Advent i parjolo, tu parningotan dohot panjangkonon ni huria di Kristus naung ro tu portibi on marhite hatutubuNa na secara khusus diingot jala dipestahon di Natal; dohot paduahon, tu panghirimon dohot panagamon di Ibana na naeng ro dope di ari parpudi. Tu haroroNa na dua i, manang na boha pe ringkot do pangaradeon manang parhobason sian na porsea i. Ala ni ringkotna, pola do gabe hira na gabe morot lapatan dohot ondolan ni Advent i sian haroro tu parhobason. Godang do tutu sihobasan. Ala ni godangna, sampe do adong halak na mirdong dibahen. Alai asa unang sala jala lalap hita di pangaradeon i, na parjolo sahali ingkon adong do di hita pamotoan na tontu taringot tu Ibana naung ro jala na naeng ro i. Ise jala boha do Ibana umbahen ingkon maradvent hita marningot dohot mamestahon hatutubuNa; ise jala boha do Ibana umbahen na ingkon maradvent hita manghirim dohot managam di haroroNa na paduahon di ari parpudi? Aha do pandok ni jamita on taringot tusi?

Sejarah ni Israel ndang tarsirang i sian sejarah ni sangkap hatuaon ni Debata na taringot tu sandok hajolmaon. Molo dijou jala dipajongjong Debata pe Israel gabe sada harajaon, ndang holan asa jongjong jala marhuaso boti, alai na gabe pangaradeon do i tu harajaon ni Debata sipajongjongon jala sipapataronNa di angka tingki parpudi. Di bagasan Kristus do i masa. Hombar tusi, angka na masa di sejarah ni bangso i, na martudutudu tu Kristus manang Mesias i do i, siparoon ni Debata sian tongatonga ni bangso i sandiri. Di pelean pardamean na niulahon ni Israel rupani, nunga targombar ulaon panobusion ni Kristus i, di sitaononnasida nunga targombar sitaonon ni Mesias i, jala di hamonangannasida nunga laos targombar hamonangan ni Kristus i. Songon i ma dison, panurirangon ni si Bileam na taringot tu harajaon Israel na naeng binsar dohot taringot tu rajana na naeng hehe i, na marhahonaan do i dohot tu Kristus manang Mesias dohot tu harajaonNa.

Di bagasan Jesus Kristus naung ro tu portibi on nunga digohi be bagabaga on. Ibana do Siparmonang (Sak.9:9b), Raja ni Hadameon (Jes.9:5b), Raja ni angka raja jala Tuhan ni angka tuan (1 Tim.6:15; Pgk.17:14), Bintang Sipaias na marsinodang i (Pgk.22:16b). Di bagasan dohot marhite Ibana do songgop harajaon ni Debata na meliputi sandok tano on. Nunga songgop harajaon i (Mrk.1:15a), alai buni dope i nuaeng, sogot pe asa patar. Sian asi ni rohaNa nunga dijangkon angka jolma gabe parripe ni harajaonNa i, i ma angka na manjangkon Ibana, angka na porsea di goarNa. Manang ise naung porsea di Ibana, naung manjalo do i di hangoluan na salelenglelengna, ndang pola be ibana tu paruhuman, nunga taripar tahe sian hamatean tu hangoluan (Joh.5:24). Sabalikna do angka na so porsea, suman tu halak Moab na pinatunduk ni si David, uhumanNa do i tu hamatean na saleleng ni lelengna.

I jala songon i ma Jesus Kristus naung ro i, siingoton jala sipestahononna di Natal na ro. Nang pe pogos jala metmet Ibana di haroroNa i, Ibana do na sumangap jala na tumimbul sian saluhutna. I jala songon i ma Ibana na naeng ro dope, na mandok tu hita nuaeng: “Na ro ma Ahu tibu” (Pgk.22:20a). Ala ni i, patut do di bagasan halalas ni roha hita marningot Ibana, jala di bagasan panghirimon na gok maimaimahon dohot managam di haroroNa na paduahalihon i, huhut manjouhon: “Amen! Ro ma Ho, ale Tuhan Jesus” (Pgk.22:20b).

jkt.23.10.2009/mvs

Read More..

24 Trinitatis

SERMON JAMITA TU MINGGU 24 DUNG TRINITATIS, 22 NOPEMBER 2009
Joh.11:25-26

Patujolo

Barita haheheon ni si Lasarus tarjaha do holan si Evangelium Johanes.

I ma patoluhalihon Jesus pahehehon na mate. Di na tolu peristiwa i, tarida do sada klimaks (garis naik) sian na baru mate (boru ni si Jairus, Mrk.5:35 duu par.) tu naung tar leleng mate (dolidoli na di huta Nain, Luk.7:11duu) torus tu naung tartanom opat ari (si Lasarus). Disi, dipapatar do hamonangan ni Jesus maralohon hamatean andorang so hamamate dohot haheheonNa sandiri (peristiwa paskah andorang so Paskah).

Turpuk on, alus ni Jesus do tu si Marta. Disolsoli si Marta do Jesus, didok: “Aut na dison Ho ale Tuhan, ndang tagamon mate ibotongki.” Nang pe songon i, dihirim rohana do na adong dope guna ni haroro ni Jesus i di nasida, gabe didok ma: “Alai nuaeng pe, tong do huboto, lehonon ni Debata do tu Ho nasa sipangidoonMu sian Ibana.” Alai manang na aha i, ndang diantusi ibana. Dohot hata na asing, manang na dia konkritisasi ni na hinirim ni rohana sian haroro ni Jesus i, ndang diboto mandok. Anggo taringot tu haheheon ni si Lasarus, mansai dao do i sian rohana, ai di na diarbis Jesus taringot tusi (ay.23), gabe tu haheheon sogot do laho rohana (ay.24) jala di na sinuru ni Jesus mangungkap tanoman ni ibotona i, haboratan do ibana (ay.39). Songon i ma huaso ni hamatean i boi manghuphupi mata ni jolma gabe so boi mamereng angka sihirimon di bagasan Jesus. Marhite turpuk on, naeng paluaon ni Jesus do si Marta sian i.

Hatorangan

Di si Marta khususna, di halak Jahudi umumna, sada doktrin do haheheon i, sada ajaran manang sada poda haporseaon. Ndang adong dope pamotoannasida na tontu taringot tusi. Mangihuthon haporseaon ni Jahudi na ortodox, nasa na mate, manang na burju i manang na jahat, laho do i sude tu Sheol (pat.1 Mus.37:35). Disi ma nasida maringan (mangolu?) marrumanghon halilu (tondi); ndang marholiholi, ndang marsibuk (pat.Luk.24:39); ndang adong gogona, ndang adong panghilalan manang emosina; ndang adong parningotanna di Debata, ndang adong hamauliateon manang pamujionna; sandok sirang do nasida sian Debata dohot sian halak na mangolu. (Ida ma rupani Ps.6:6; 30:10; 88:6, 12-13; 115:17; Pjm.9:10; Jes.38:18). Boha, adong dope sihirimon? Mangihuthon haporseaon na ortodox i, ndang adong be, songon i nama torus. Alai di tongatonga ni pesimisme haporseaon na songon i, adong do saotik na boi patupa loncatan iman jala manghatindanghon na adong dope sihirimon di balik ni hamatean i. (Ida ma rupani Ps.16:9-11; Job.19:25-27). Hombar tusi gabe mardua ma halak Israel taringot tusi; sabagian porsea, na sabagian nari ndang. Saduse rupani, disoadahon do haheheon i, (surusuruan dohot tondi); alai anggo Parise, dihaporseai do i (Mat.22:23 par.; Ul.23:8). Jesus dison mandok: “Ahu do haheheon.” Na nidokNa disi, Ibana do bona ni haheheon i (the author or the cause of the resurrection). Targantung tu Ibana do hamamasana, hombar tu huaso dohot lomo ni rohaNa. Di bagasan dohot marhite Ibana, ndang doktrin be haheheon i, alai naung gabe realitas do manang kenyataan masa kini (present realities). Songon Ibana naung ro jala patar di portibi on jala boi ditanggapi secara inderawi, songon i ma haheheon i nunga songgop jala patar di portibi on, jala nunga boi dijalo jala dinikmati angka na porsea. Dia ma hahonaan ni i? Parjolo sahali, na marhahonaan do i tu haheheon partondion. Di bagasan dohot ala ni dosa i, mate do jolma (pat.1 Mus.2:17), sirang jala dao sian Debata. Alai di bagasan Kristus dipahehe do jolma i, ditompa gabe na imbaru (2 Kor.5:17). Angka naung dipahehe i do na mangolu. Ala ni i do umbahen na dipadomu Jesus na dua i di pandohanNa on, didok: “Ahu do haheheon dohot hangoluan.” Ndang tarsirang antong na dua i, ai so marhite haheheon ndang adong hangoluan, jala ndang adong haheheon na so diihuthon hangoluan. Jumolo do haheheon, ai i do na mangholangholangi parhusoran ni jolma i sian hamatean tu hangoluan. Sahali nari, haheheon dohot hangoluan i nunga disagihon i di tano on. Nunga boi be na porsea i mardomu dohot Debata, menikmati parsaoran na sorgawi, na suman tu parsaoran ni ama tu angka anakna. I ma haheheon dohot hangoluan masa kini. Paduahon, na marhahonaan do i tu haheheon dohot hangoluan sogot. Di angka naung manjalo jala memiliki haheheon dohot hangoluan i dison, ndang hamatean be ujung ni saluhut. Ndang boi so ro hamatean i, jala ingkon boluson ni saluhut jolma do i, na porsea manang pe na so porsea. Alai parsatongkinan (sementara) nama i. Ro do tingkina, paheheon ni Tuhan i do sasude, dung i pabongotonNa ma na porsea i asa tu hangoluan na salelenglelengna, alai na so porsea tu hamatean paduahon na salalenglelengna. Dohot hata na asing, ndang tarhahua hamatean parjolo i pemilikan ni na porsea i di hangoluan na saleleng ni lelengna i. Hombar tusi ma didok: “Na mangolu do na porsea di Ahu, nang pe mate ibana.” Hurang hona do salinan on, ai molo songon i do, konotasina boi do, di na mate pe na porsea i mangolu do torus (sambil mati, hidup). Dohot hata na asing, sai hira na mansoadahon realitas ni hamatean i do i. Alai ndang hea disoadahon Jesus realitas ni hamatean i, diokui do. Ala ni i, niuji do patariparhon i songon on: “Na porsea di Ahu, nang pe naung mate ibana, laho mangolu do ibana.” Na nidokNa, nang pe naung mate (Gr. kan apothanee/though he were dead) na porsea i marsogot, haduan, manang na sadihari pe tahe, laho mangolu (Gr. zeesetai/shall he live/akan hidup) do ibana muse di ari sogot i. Ndang sangombas, saleleng ni lelengna do. I ma na diondolhon di ay.26 na mandok: “Jala ganup na mangolu jala porsea di Ahu, na so tupa mate ibana salelenglelengna.” Ndang adong na tuk manirang angka na porsea i sian Jesus bona ni haheheon dohot hangoluan i (pat.Rom 8:38) jala ndang na tarhahua hamaten paduahon i be nasida (Pgk.2:11b).

Sudena i dihatahon Jesus laho manghehei jala patoguhon haporseaon ni si Marta. Sai hira na naeng dohononNa do: “Porsea do ho na hehe do ibotom di ari parpudi, sintong do i, ai hehe do ibana tutu. Alai ingkon botomu do huhut, Ahu do sibahen i. Jadi molo marhuaso Ahu pahehehon ibana di ari parpudi, ndang porsea ho na na marhuaso Ahu pahehehon ibana saonari?” Marhite i, disuanhon do tu ibana panandaon paboa na lobi sian jolma do Ibana, parhuaso di atas ni saluhut baik di tingki on manang pe di hatongtongon. Taringot tusi, ingkon buaton ni si Marta do sada haputusan. Hombar tusi ma didok Jesus tu ibana: “Porsea do ho disi?”

Sipahusorhusoron

Di ari on, songon na boi jahaonta di Almanak, sahat do hita tu Minggu Ujung ni Taon Parhuriaon. Nunga tapasidung sada taon, jala marujung ma i di minggu on. Di Minggu na ro, di Advent-I, datdatanta ma muse pardalananta di Taon Parhuriaon na imbaru. Songon taon i na sai marujung, sude do ingkon marujung. Ndang adong na hot, portibi on ro di isina, sude do ingkon marujung. Hombar tusi, Minggu Ujung ni Taon Parhuriaon songon on, laos ditontuhon angka ama ni huria do gabe Parningotan di Angka na Monding.

Ia dipatupa huria pe i ndada na laho mangarungkai sidangolon ni angka ruasna. Dung i, ndada gabe sada rumang ni panolopion i tu pingkiran na mangarajumi na adong dope pardomuan ni na mangolu dohot angka na mate. Tutu, ndang tarsoadahon na adong dope ruas na mangarrajumi na adong dope pardomuan ni na mangolu dohot na mate, jala di sadasada tingki sipatupaon do parsaoran tu nasida. Parningotan na niulahon ni huria i dirajumi ma i songon sada sian angka rumang ni parsaoran i. Sasintongna, mansai dao do i sian tondi ni parningotan i. Antong aha do lapatan ni i? Di Konfessi HKBP taon 1996 tahatindanghon do songon on: “Dipatupa huria i do parningotan di angka na monding laho padungohon haporseaonta marningot ajalta sandiri huhut pahothon panghirimon di hamonangan ni Kristus na manaluhon hamatean, songon i nang panghirimon di banua ginjang sambulo ni tondinta dohot di hadodomu ni na porsea i dohot Tuhan Debata sahat tu na ro Jesus Kristus paduahalihon.”

Sian i torang, godangan marhahonaan tu hita do parningotan i. Marhite na marningot angka dongan naung jumolo monding i, marhite na merenungkan langka dohot ujung ni ngolunasida, dohot marhite na manghamauliatehon angka na dengan na niula jala na tinadinghonnasida, naeng tarsunggul rohanta marningot hamamatenta be. Songon nasida, mate do hita muse. Alai molo mate hita, tu dia do hita? Aha do sitadinghononta siingoton ni angka na mangolu dope jala aha do sian angka i na mangihut tu hita? (pat.Pgk.14:13) Hombar tusi, Parningotan di Angka na Monding ndang mangarahon hita holan mamereng tu jolo, tu ari hamamatenta be, alai dohot do tu hangoluanta sinuaeng on. Boha do hita manghangoluhon ngolunta sinuaeng on paboa na tutu hita managam di ari hamamatenta?

Jamita ari on mangajarhon tu hita: Tahaporseai ma Jesus do haheheon dohot hangoluan. Ala ni dosa mate do jolma sude; mate di hamatean partondion, i ma hamatean di tingki mangolu dope, hamatean ni harohaon dohot panghilalaan, hamatean ni haporseaon dohot panghirimon. Ndang adong na tarbahen jolma laho mangalo dohot manaluhon hamatean i. Sabalikna do tahe, dipangke hamatean i do jolma i gabe ulaulana laho patupahon ragam ni ulaon hamatean, isara na paulihon sinjata pemusnah massal na tuk mangarasiphon nasa na mangolu jala mangalengsehon nasa na adong. Dung i di ujungna, ingkon pamateonna ma jolma i sude tu hamatean na saleleng ni lelengna. Adong dope sihirimon?

Tuhanta Jesus Kristus mandok: “Ahu do hahehehon dohot hangoluan.” Na disuru Ama i do Ibana laho pangoluhon portibi on. Sian huaso ni hadebataonNa i, dipahehe do jolma i jala dipangolu asa tu hangoluan na saleleng ni lelengna, i ma panandaon dohot parsaoran tu Debata (pat.Joh.17:3). Nunga disagihon i dison gabe mangolu jolma i di hangoluan partondion, hangoluan ni harohaon dohot panghilalaan, hangoluan ni haporseaon dohot panghirimon. Nasa naung jumpangan hangoluan i dison, angka i do na boi manjalo udut ni i di ari sogot, i ma hangoluan na so ra suda, na so olo sundut jala na so ra mansohot. Ndang gaitgait i, alai bagabaga na tutu do i. Paposhon rohanta taringot tusi, taparrohaon ma naung niungkaphon ni Tuhanta Jesus na di turpuk sijahaon sadari on (Pgk.7:9-17). Disi, nunga diida Apostel Johanes punguan ni angka na monang na marharoroan sian nasa bangso, marga dohot houm dohot hata, angka na mamujimuji pasangaphon Debata dohot AnakNa Tuhanta Jesus Kristus i. Marhasonangan do nasida disi, ndang be male, ndang be mauas, ndang be ditinggang las ni ari nasida, manang dia na mohop pe.

I ma apulapul ni Parningotan di Angka na Monding on di hita. Jesus Kristus do haheheon dohot hangoluan; haheheon dohot hangoluanta nuaeng dohot muse. Marhahirimon disi, molo tahilala pe nuaeng na ingkon mate do hita muse di sada tingki na so tangkas taboto dung i tartanom (molo tung ditanom) manang tartutung (molo tung ditutung), tarapul ma rohanta marningot na Jesus Kristus do haheheon dohot hangoluanta. Ala Ibana, hehe do hita muse jala mangolu tu hangoluan na hot, na saleleng ni lelengna. Haporseaon disi na manontuhon situtu do i di pangantusionta taringot tu hangoluan on, taringot tu gaya dohot warna hidupta. Ndang mangolu di dosa be hita, di diri manang di portibinta, di Tuhanta i nama. I ma mangonjar hita laho padirihon ngolunta bahen habadiaon dohot hasangapon ni Debata.

Laos i ma apulapul di hita di na taingot nuaeng angka donganta naung jumolo i. Molo naung hehe jala mangolu nasida di bagasan Kristus Jesus andorang di ngoluna be, ndang mago parjambarannasida disi, alai hot do sahat ro di saleleng ni lelengna; ndang na mago dohot nasida, alai mian do di pangaramotion ni Debata sahat tu haheheon di ari parpudi i.

jkt.19.10.2009/mvs

Read More..

23 Trinitatis

SERMON JAMITA TU MINGGU 23 DUNG TRINITATIS, 15 NOPEMBER 2009
2 Tim.1:6-12

Patujolo

Ditongos si Paulus do surat on sian hurungan di huta Rom (pat.2 Tim.1:8).

Dung tarboan ibana tu huta i, paimahon angka alona sian Jerusalem, gabe tahanan rumah ma ibana jolo. Mian di jabu na sineona sandiri do ibana jala bebas mamaritahon harajaon ni Debata (Ul.28:30-31). Mangihuthon uhum Rom, olat ni dua taon do boi masa na songon i. Molo laos so adong na ro manorushon pangaluan i, salpu dua taon, ingkon malua do na songon i demi hukum. Disura roha ni toropan halak, i do na masa tu si Paulus, malua do ibana muse. Dung malua, ditopot ma angka huria na pinungkana na jolo. Raphon si Timoteus, borhat nasida sian Rom. Dung i ditadinghon ma si Timoteus di Epesus (1 Tim.1:3), gabe holan sahalakna ma muse manorushon padalanan i. Salpu i, mulak dope ibana tu Rom naeng pasauthon sangkapna, mamaritahon Barita na Uli tu Spanyol (pat.Rom 15:23, 28). Alai sahat di Rom, tartangkup ma ibana laos dihurunghon. Dirante do ibana (2 Tim.1:16), dirajumi parjahat (2 Tim.2:9). I ma na masa di taon 65, jala tingki i ma disurathon surat on laos ditongos marhite si Tikikus (2 Tim.4:12). Sangkapna, papatarhon sihol ni rohana tu si Timoteus jala mamodai ibana asa marsihohot di haporseaon dohot panghobasion i.

Hatorangan

Di ay.5, ditaringoti si Paulus do haporseaon ni si Timoteus na so marlaok. Haporseaon na memiliki tradisi na terhormat do i naung mamungka sian ompungna boru, si Lois dohot inangna, si Eunike. Marhahonaan tusi do sipaingotna na di ay.6 on. Dohot hata na asing, sipaingot i, ndang tarpasahat i tu na so porsea, holan tu naung porsea do. Padomuhon tusi, dipungka do ay.6 on dohot ala ni i. “Hupaingot ho, asa diparatarata ho silehonlehon ni Debata na tu ho i,” ninna. Parataratahon lapatanna pagalakhon, patubahon, pajemburhon; jala silehonlehon mandok huaso ni Tondi Porbadia (pat.Ul.1:8a) na binasabasahon ni Debata tu angka partohonan. Hasasahat ni huaso i do na digombarhon di pangampehonon ni tangan di na pasahat tohonan i. Na marmula do i sian upacara hababangkit ni si Josua (4 Mus.27:18; 5 Mus.34:9), jala marhite hajahudion taripar tu huria na parjolo i (Ul.6:6; 13:3). Songon tangan ni na mamasumasu i na ampe tu pinasupasu i, na boi ditanggapi secara inderawi, songon i ma huaso ni Tondi i manonggopi na pinasupasu i, manggohi jala margogoihon. Sian i torang, Debata do pasahathon; parhiteanNa do na mangampehon tangan i. Di 1 Tim.4:14 didok, angka sintua do na mangampehon tangan tu si Timoteus, alai dison si Paulus do. Maksudna ra, rap do si Paulus dohot angka sintua i, alai si Paulus do na manguluhon. (Patudos tu na pasahat tohonan hapanditaon di hurianta, Ephorus do na mangampehon tangan alai dohot do angka pandita paherbanghon tangan). Na mangula do huaso i di bagasan dohot marhite na porsea i. Alai pangulaonna i ndang terlepas sian giot ni roha ni na porsea i. Na boi so marhinorhon do i di na so mangulahonsa. Ala ni i ma asa dipasingothon, ingkon paratarataon ni si Timoteus do silehonlehon na tu ibana i.

Laho patogu roha ni si Timoteus, didok: “Ai dilehon Debata do tu hita tondi hagogoon, tondi haholongon, tondi pangarajaion diri, ndada tondi hatahuton.” Hurang topet do salinan on. Ala ni i, niuji do patariparhon i gabe songon on: “Ai ndang dilehon Debata tu hita tondi hatahuton, alai hagogoon dohot haholongon dohot pangarajaion diri do.” Tondi hatahuton, i ma tondi na mabiar jala na mangirput (perasaan rendah diri dan malu-malu). Hagogoon, i ma huaso (Gr. dunameoos/power) laho mangadopi musu dohot pamaraan, laho manghabengethon dohot manghamonanghon angka pangunjunan dohot pangaleleon. Haholongon, i ma kondisi ni harohaon na patauhon jolma manghaholongi Debata dohot donganna jolma; na patauhon mangolu marpananginangian (bersikap dengar-dengaran), marhaporseaon, dohot marhahirimon tu Debata; na padaohon biar (pat.1 Joh.4:18) jala na patoguhon roha. Pangarajaion diri (Gr. soophronismou/of a sound mind), i ma pingkiran na toras (budi yang matang/sehat) na patauhon sasahalak patundukhon dohot mangarajai (mengendalikan dan menertibkan) dirina; marhamanaton jala marhabisuhon (berhati-hati dan bijaksana). Ala ni sasudena i tarbahen malua do si Timoteus sian hatahuton. Poso dope ibana hatiha i. Ala ni i dapot roha do molo adong di ibana hagangguon, ai ingkon uluhononna sada huria na balga na tongon marungkil maradophon parpoda haliluon. Alai sahali nari, ala ni angka silehonlehon i, ndang adong alasanna mabiar.

Barita na Uli i pargasipan do i di halak Jahudi jala haotoon di sipelebegu (1 Kor.1:23). Di roha ni na deba muse, poda ni Kristus i mapejethu do; ndang imbang tu poda gnostik na bagas jala na timbo. (Urat ni gnostik i do na manosak tu huria Epesus di tingki ni si Timoteus). Ala ni i, boi do gabe maila halak manghatindanghon Barita na Uli i. I do na dituhashon halak tu si Paulus umbahen na so tibu ibana laho tu Rom, ai ninna, maila do ibana manghatindanghon Barita na Uli na sederhana i di pusat peradaban dunia na menggandrungi ilmu angka na timbo. Alai didok si Paulus: “Ndang na huhailahon Barita na Uli i” (Rom 1:16). Laos i ma na dipodahon tu si Timoteus, didok: “Unang ho maila manghatindanghon Tuhanta i.” Suman tusi, boi do maila halak patuduhon pardomuanna tu sahalak na tarhurung ala ni Barita na Uli i. Nunga nidok, na tarhurung do si Paulus ala ni Barita na Uli i, dirante jala dirajumi parjahat. Gabe ditadinghon donganna do ibana ala ni i (pat.2 Tim.1:15-16; 4:10a). Ala ni i ma didok tu si Timoteus: “Unang hailahon ahu na tarhurung humophop Ibana.” Sabalikna, naeng ma dohot ibana manghophop Barita na Uli i. Manghophop, lapatanna ambil bagian di sitaonon ala ni Barita na Uli i. Di ulaon panindangion di Barita na Uli i (Gr. martureoo/martir/bersaksi/marturia), tersimpul do sitaonon. Mangadopi i, dijanjihon do dison hagogoon na sian Debata (pat.Mat.28:20).

Boi do pos roha disi, ai naung dipalua do hita jala dijou. Haluaon dohot panjouon dison, sisada lapatan do i (pat.Rom 8:28, 30). Diulahon Debata do i marhite panjouon na badia, i ma panjouon na so marguru tu ulaon ni jolma, alai na sian tahiNa na sian mula ni mulana do, dohot sian asi ni rohaNa. Marisuang jala magopo sambing do haluaon na diojakhon di ulaon ni jolma; na marujung di kekecewaan do i ai ndang hea boi sahat agia ise pe tu kepastian ni haluaonna, ala ndang adong jaminan na mandok naung tuk jala sun denggan sude na niulana. Alai haluaon na sian tahi dohot asi ni roha ni Debata pasti do i, ai haposan do Ibana na marbagahonsa (1 Tes.5:24). Dung i, jambar naung tontu do i di na porsea i. Ndang holan sihirimon sogot be i, alai nunga dijalo jala dimiliki i dison. Ala ni i, sahali nari, boi do pos roha na so pasombuon ni Debata na porsea i marjuang sandiri di sitaonon ala ni Barita na Uli i, alai sai na pargogoanNa do jala pamonangonNa.

Tahi haluaon ni Debata na sian mulana i, dipapatar do di bagasan Kristus. Na marlapatan ma i, di haroro ni Kristus tu portibi on nunga songgop be tingki haluaon i. Marhite ulaon panobusion naung pinatupaNa, i ma sitaonon, parsilangon, hamamate dohot haheheonNa, dipasohot do hamatean i, lapatanna dilehon kepastian paboa na so marhuaso be hamatean i ro di saleleng ni lelengna. Sabalikna, dipaullop do hangoluan dohot hatongtongon. Na ro do tingkina, bondutonna do hamatean i, jala solukhononna hangongolu na manongtong (pat.1 Kor.15:54), i ma parsaoran dohot Debata na hot ro di saleleng ni lelengna. Luhutna i disagihon do tu jolma marhitehite Barita na Uli. So marhite pamaritahonon di Barita na Uli i, ndang na laho patar haluaon i jala ndang na laho sahat tu agia ise pe.

Tusi do si Paulus dipabangkit. Na parjolo, gabe parjamita (Gr. keeruks/herald/bentara). Na marharoroan do i sian hata Kaldea kaarawazaa, mandok partingting. Di halak Kaldea, na jongjong do partingting i di inganan na timbo pangiarhon soarana manjou halak tu sada parsombaon (peribadahan), patoranghon isi dohot lapatan ni parsombaon i, dohot manariashon uhum tu angka na so olo mandohoti (pat.Dan.3:4-6). Songon i ma parjamita i pangiarhon soarana mamaritahon barita haluaon na sian Tuhan i (pat.Jes.40:9-11; Mat.3:2 par) dohot uhum pamalosonNa (pat.Jes.62:11; Mat.3:10 par). Na paduahon, gabe apostel, lapatanna na sinuru sian Debata laho patubegehon hata dohot lomo ni rohaNa tu hajolmaon. Parpudi, gabe pangajari, i ma parorot manang panogunogu na patureturehon na porsea i asa lam magodang jala matoras di bagasan haporseaon jala marpangalaho di bagasan hasintongan.

Ala ni hajongjongan dohot ulaon i do si Paulus marsitaonon, tarrante jala tarhurung. Alai ndang maila ibana disi. Boasa? Alusna: “Ai hutanda do Ibana na huhaporseai.” Hutanda, mandok huboto. Ndang parbinotoan na ojak di pamingkirion i manang di panulingkition, alai di parsaoranna pribadi do tu Debata. Diungkaphon Debata diriNa tu ibana, dijangkon ibana tu parsaoranNa. Ala ni i gabe ditanda jala diboto ibana ma ise jala boha do Debata. Pargogo na so hatudosan do Ibana, na boi haporseaan (layak dipercaya). Hatuaon do na manghaporseai Ibana, jala hasangapon do na mangoloi dohot mangulahon parsuruonNa, nang pe ingkon marsitaonon. Angkup ni i pos situtu do rohana na margogo do Tuhan i mangaramoti na pinalumehonNa i tu ibana sahat tu ari sogot i. Na pinalumehonNa i, i ma Barita na Uli i dohot pamaritahonna. Hahohot dohot harararat ni Barita na Uli i ndang ojak i di diri ni jolma, di hagogoon manang di parsitutuonna. Na gale do jolma i, na mura salpu. Si Paulus sandiri rupani, nunga tongon managam di hamamatena (pat.2 Tim.4:6), jala tutu do i masa di taon 66 manang 67. Nang pe songon i ndang mabiar ibana na gabe mintop ma Barita na Uli i jala gabe mansohot ulaon pamaritahonna, ndang, ai Debata do mangaramoti. Padirion jala pabangkiton ni Debata do muse palumean ni i, angka na hiras roha mamaritahonsa. Songon i ma torus ramotanNa Barita na Uli i sahat ro di ari sogot i. Parbinotoan na tangkas di hahohot dohot di hamonangan ni Barita na Uli i gabe gogo do i di manang na ise pe laho manghophop, manghatindanghon dohot mangajarhonsa.

Sipahusorhusoron

“On pe, unang ho maila manghatindanghon Tuhanta i, dohot ma ho tahe manghophop Barita na Uli i!” ninna si Paulus tu si Timoteus di jamita on. Ndang holan tu si Timoteus, alai joujou tu sandok na porsea do i na di huria di sude tingki dohot inganan. Ndang ulaon na neang i, na dokdok situtu do; gok parmaraan, parungkilon, dohot sitaononna. Taringot tusi nunga tersimpul i di goar ni ulaon i sandiri, i ma na manghatindanghon dohot na manghophop. Sian na jolo torus tu nuaeng nunga mansai godang na manangihon joujou i. Ditaon nasida do ragam ni parungkilon dohot sitanonon, torop tahe na ingkon agoan hosa manang na mate martir. Nuaeng, dipasahat do joujou i dohot tu hita. Boha do asa unang maila, alai asa las jala hiras rohanta mangulahon i?

Na parjolo, ingkon torang do di hita taringot tu gogo di panindangion i. “Dohot ma ho tahe manghophop Barita na Uli i sian hagogoon ni Debata!” ninna si Paulus. Hagogoon ni Debata do gogo di panindangion i. Hombar tusi, dibasabasahon Debata do tu angka sitidangi i silehonlehon na marguna tu ulaon i, i ma huaso ni Tondi Porbadia. Dilehon huhut hagogoon, haholongon, dohot pangarajaion diri. Marhite angka i malua do angka sitindangi i sian hatahuton. Holan on, ingkon na paratarataonna do silehonlehon i. Isara ni api, ingkon pagalahonna do i, patubaon, jala pajemburonna asa torus marsigorgor di bagasan dohot marhite nasida. Ise na so las jala hiras rohana mangula margogohon hagogoon ni Debata? Molo hita umboto i, las jala hiras ma rohanta manghatindanghon dohot manghophop Barita na Uli i.

Na paduahon, ingkon torang do di hita taringot tu sihatindanghonon i. “Unang ho maila manghatindanghon Tuhanta i, dohot ma ho tahe manghophop Barita na Uli i!” ninna si Paulus. Sian i torang, Tuhanta Jesus Kristus manang Barita na Uli do sihatindanghonon i. Jesus Kristus do sintuhu ni Barita na Uli i. Na manghatindanghon Jesus Kristus dos do i tu na manghatindanghon Barita na Uli, jala na manghatindanghon Barita na Uli dos do i tu na manghatindanghon Jesus Kristus. Na disuru Ama i do Jesus Kristus i bahen Sipalua portibi on (1 Joh.4:14; Joh.4:42b); paluahon sian dosa (Mat.1:21bc), sian gomgoman ni sibolis (pat.Ul.26:18) dohot hamatean (2 Tim.1:10). Ndang tahi na tubu di pudi i manang di partongaan ni tingki, alai naung disangkapi Debata hian do i sian mula ni mulana dope. Sian i torang ma muse paboa barita haluaon do Barita na Uli i, evangelium do i manang barita halalas ni roha. Haluaon na sian asi ni roha do i, na so marguru tu ulaon ni jolma. Ala ni i pasti do i, ai haposan do Ibana na marbagabagahonsa. Ise na so las jala hiras rohana mamaritahon barita halalas ni roha? Molo hita umboto i, las jala hiras ma rohanta manghatindanghon dohot manghophop Barita na Uli i.

Na patoluhon, ingkon torang do di hita taringot tu hamonangan ni na tahatindanghon i. Haluaon na sian tahi ni Debata na sian mulana naung dipapatar di bagasan Kristus Jesus i ndang na laho sahat i tu agia ise pe ia so marhite panindangion. Tu sangkap i dipabangkit Debata do angka apostel, parjamita, dohot pangajari. Tu nasida ma dipalumehon Barita na Uli i asa radotan jala hatindanghononna. Alai ndang na mandok na gabe ojak di nasida ma hahohot dohot harararat ni Barita na Uli i, di giot ni roha manang di parsitutuonna, ndang, di Debata do i. Pargogo na so hatudosan do Ibana, na boi haposan jala haporseaan. Ibana sandiri do jaminan ni hahohot dohot hamonangan ni Barita na Uli i. Porsea disi, ndang adong alasan ni angka sitindangi manghagangguhon masa depan ni Barita na Uli na hinatindanghonna i, ai ramotan ni Debata do i sahat ro di ari sogot i. Ise na so las jala hiras rohana mangula molo diboto na memiliki prospek masa depan na cerah do angka na niulana? Molo hita umboto hahohot dohot hamonangan ni Barita na Uli i, las jala hiras ma rohanta manghatindanghon, manghopohop, manjamitahon, dohot mangajarhonsa.

jkt.13.10.2009/mvs

Read More..

22 Trinitatis

SERMON JAMITA TU MINGGU 22 DUNG TRINITATIS, 8 NOPEMBER 2009
Jes.58:4-12

Patujolo

Masuk tu Trito Jesaya do turpuk on. Dihatahon i hira di taon 520 SM (taon pembangunan kembali ni bagas joro).

Dison diulahi si Jesaya do sipaingot ni angka panurirang tagan so habuangan taringot tu ibadah umumna, parpuasaon khususna. Di mulana, diantusi jala diulahon halak Israel do ruhut parpuasaon i laho manambai gogo ni tangiang (pat.2 Sam.12:16), manang pataridahon panolsolion dohot panopotion sekaligus mangido hasesaan ni dosa dohot pasupasu. Di habuangan, lam ringkot do rohanasida mangulahon i. Diparhatopot nasida do na uhum ala ni dosanasida do habuangan i, gabe ditopoti ma i marhite na marpuasa. Lobi ringkot tahe rohanasida mangulahon i ala na so boi i be nasida mamelehon pelean (sintuhu ni peribadahan tagan so habuangan) ala na so adong i be disi bagas joro. Sabalikna anggo na marpuasa, sai boi do nasida, jala ala ni i gabe muba ma sintuhu ni ibadahnasida sian pelean tu parpuasaon.

Dung salpu habuangan jala dung dipajongjong muse joro i gabe boi nasida mamelehon pelean tongtong nama sai diargahon nasida parpuasaon i. Alai lam leleng lam lipe do pangulahonnasida disi, ai gabe dirajumi do i songon dalan laho mangomo asi ni roha dohot pasupasu ni Debata. Didok rohanasida, molo diulahon i, patut do nasida antoan ni Debata (pat.ay.3ab). Di pudian ni ari tahe, hira i nama makna utama ni parpuasaon i, ai dipodahon Parise do rupani paboa ulaon na marpahala do puasa i, dalan na badia laho paluahon diri dohot laho manesa dosa. Jadi marhite parpuasaon i, sai hira na membuka rekening do nasida di bank sorgawi (pat.Mat.6:16-18). Egocentris do parpuasaonnasida i, ndang adong aspek persekutuan dohot sosialna (pat.ay.3c); hira holan na mangalului hasisidung ni parsoalan ni jolma tu Debata sambing. Di rohanasida, asal ma sae parsoalan pribadi ni jolma i tu Debata, ndang pola adong be siluluan taringot tu lomo ni roha ni Debata jala ndang pola adong be siradotan di bagasan pardomuan tu sesama. Dohot hata na asing holan tu na ringkot di dirina sandiri do nasida maribadah. Angkup ni i, holan na mangaradoti ruhutruhut parduru nama parpuasaonnasida i, ndang be sian nasa rohana. Angka i ma na nialo ni si Jesaya di turpuk on.

Hatorangan

Di haliluonna, dirajumi halak Israel do naung singkop parpuasaon i molo dung diradoti ruhutruhut parduruna, isara na mangonsit roha, patungki ulu, marpeahan di hori dohot di sirabun. Asal ma diulahon i, nunga sesa dosana, tamba dohot pahalana. Ala ni i, laos di ari parpuasaon i, barani do nasida mambahen bada dohot parsalisian huhut mamastapi mangasahon gostong ni botohonna (ay.4a). Diulahon do pangarupaon, na mangampehon auga tu rungkung ni halak; diulahon tudutudu ni jarijari, i ma na manudunudu donganna marhite jarijari situalang (jari tengah) songon tanda ni pangaleaion, panginsahion dohot pelecehan; diulahon dohot panghuling hajahaton, i ma hata na rumar (ay.9b). Ndang pola dia i, ai tamba pe dosa ala ni i, sesa do i laos di ari i, sesa ala ni parpuasaon i. Alai ndang dihalomohon Debata parpuasaon sisongon i. “Unang datdati hamu marpuasa songon nuaeng,” ninna. Ndang adong guna ni i, ai ndang ditailihon Debata nasida, jala ndang dipardulihon (ay.3ab). “Ndang tarbahen sahat soaramuna tu banua ginjang,” ninna. Disoadahon tahe lapatan ni parpuasaon sisongon i. “Tung parpuasaon na tarhalomohon Ahu ma i?” ninna (ay.5a). Lobi sian i tahe, tung so patut do i goaron parpuasaon, didok: “Tung parpuasaon ma i goaron, jala ari lomo ni roha ni Jahowa?” (ay.5c).

Alai ndang holan dipinsang, huhut do nasida dipodai, didok: “Nda on do parpuasaon na Huhalomohon: Harhari angka ihotihot ni hajahaton, palua angka tali ni auga, jala palua halak na nirupa, jala ropuhi nasa auga?” Parpuasaon na sintong ingkon adong do aspek sosialna, ndang boi laos sepi sian sesama. Songon Debata naung paluahon nasida sian parhatobanan ni Misir dohot Babel, ingkon songon i do Israel; di bagasan parsaoranna tu Debata na dilembagakan di bagasan peribadahan umumna, parpuasaon khususna ingkon sarihonon nasida do haluaon dohot hasonangan ni sesamana. Ingkon tangkas do antusan ni ganup, ia peribadahan i, pasupasu na mangihut do i tu ulaon haluaon pinatupa ni Debata. Saleleng so mardame sasahalak dohot Debata, ndang boi dope ibana marsaor dohot Tuhan i. Laos songon i dohot tu donganna. Hajahaton do na mangihoti rohana, gabe diparbuehon i ma pangarahution tu donganna. Alai dung dipalua jolma i, mardame ma ibana tu Debata; boi ma ibana marsaor manang beribadah tu Tuhan i, sihangoluhonon jala sipapataronna (diwujudnyatakan) di hangoluanna siapari. Ala ni i ma disuru nasida mangharhari ihotihot ni hajahaton i, mangaropuhi auga, jala paluahon angka na nirupa. Angkup ni i, ingkon sarihonon nasida do hasonangan ni angka na metmet marhite na rade mamonggoli roti manang mangalehon asi ni roha tu na male (ay.7a, 10a), manogihon tu jabu angka na dangol dohot panangkarnangkar, mangabiti halak na marsaemara, pasabam roha ni angka na mardangol (ay.10b), jala ndang martabuni maradophon sibukna, lapatanna ndang marsombusombu (tidak peduli) maradophon hahaanggina sandiri.

Molo songon i, jaloon nasida ma pasupasu angka na mauliutus. Taringot tusi didok di ay.8a: “Jadi tompu ma binsar hatiuronmu songon buha siang ari,” jala di ay.10c “jadi binsar na hatiuronmu di bagasan haholomon, jala hagolaponmu tudoshon hos ni ari.” Na nidokna disi, pasupasuhonon ni Jahowa ma tu nasida hadumaon na gok (kemakmuran yang berkelimpahan). Sahat tu tingki i, umumna, pogos dope bangso na baru mulak sian habuangan i, jala i ma deba alana asa gabe lumambat nasida pajongjong joro i. Alai dison dibagabagahon ma hadumaon. Tompu do harorona, songon habibinsar ni mata ni ari (pat.Job.11:17). Ihut tusi, dibagabagahon do muse hahisaron. Tudos tu na mabugang do bangso i, mabugang ala ni dosa dohot ala ni sitaononna (pat.Jes.1:6). Alai lilitan ni Debata ma nasida, gabe martumbur ma hahisaronna. Didok muse: “Mardalan di jolom hatigoranmu.” Di pingkiran ni Padan na Robi, patik i do hatigoran. Na mardalan hombar tu patik i, i do na mardalan di dalan hatigoran. Dison digombarhon, uluhonon ni patik i ma nasida di angka dalanna, gabe sai tongtong nasida mangolu di bagasan hatigoran. Dung i: “Hamuliaon ni Jahowa manimpuli sian pudim.” Hamuliaon, mandok kehadiran ni Debata (pat.Jes.6:3). Marhite kehadiran ni Debata dapotan pangondingion do bangso i sian jolo dohot sian pudi (pat.Jes.52:12).

Angkup ni i, tangihonon jala alusan ni Jahowa ma joujou dohot anggukangguknasida. Apala i ma na so jumpang nasida uju di parpuasaonna na sala i; joujou nasida, alai ndang ditangihon Debata; anggukangguk, alai ndang dipardulihon. Ringgas pe jolma marugamo jala radot di ruhutruhut parduru ni peribadahan, alai molo sai lohot do rohana tu dosa jala diulahon pangarupaon, tung so adong do alasan ni i manghirim na tangihonon jala alusan ni Debata joujou dohot anggukanggukna. Alai manang sadihari pe jolma i manadinghon dosana jala marsitutu rohana beribadah, pos ma rohana manghirim na tangihonon ni Debata do angka tangiangna.

Di ay.11 dibagabagahon do pandonganion ni Debata. Manang na songon dia pe hinamaol ni parngoluonnasida na baru mulak sian habuangan i, tung songon na mian di tano na rahar pe panghilalaannasida, tongtong do togutoguon ni Debata nasida jala pasabamonNa rohana. Na mian di tano na rahar mansai maheu do i ala ni hamohopon dohot maol ni aek. Satu-satunya na tuk palambokhon i ma udan. Songon i ma Debata pasabam roha ni bangso i marhitehite asiasi dohot pasupasu na pinaudanhonNa tu nasida. Angkup ni i, papironNa holiholina, lapatanna lehononNa hagogoon na mardapotdapot. Hombar tusi, dipatudos ma nasida tu porlak na siniram dohot mata mual na so dung marsik, i ma gombaran ni parhorsihan na muba gabe porlak (oase) ala tubu disi mata mual na so dung marsik. Na boi masa do di parhorsihan tubu sada mata mual, dung i marroan ma tusi angka pamolus dohot pinahan laho minum. Alai dung manang na sadia leleng, marsik ma aek i. Marningot naung hea adong aek disi, tong ma marroan tusi angka pamolus dohot pinahan laho minum, hape tarhirim do nasida, ai nunga marsik jala ingananna i pe nunga dihuphupi rihit. Aek sisongon i digoar do mual manang sunge sipaotooto (pat.Jer.15:18). Ndang mual sipaotooto, mual na so dung marsik do na dibagabagahon dison, lapatanna pasupasu na so marnamontok.

Di ay.12 dibagabagahon do pembangunan kembali ni Jerusalem. Di na tarbuang i nasida, maloha do Jerusalem, jala godangan sian huta dohot tanonasida gabe tarulang. Ala ni i, sapanjang habuangan i sega sandiri ma angka jabu gabe pasipasi. Alai dison, dijanjihon do na paulion ni angka anak ni bangso i do muse angka na sega i, dohot angka ojahan na pineakhon ni ompunasida marsundutsundut, jala di atasna i pajongjongonna na imbaru, i ma bagas joro, bagas inganan, dohot parik (tembok). Totason nasida muse angka dalan di huta dohot sian huta tu huta ai angka i pe dohot do sega. Marhite i gabe hainganan ma angka huta naung tarulang i, jala gabe targoar ma bangso na mulak sian tano habuangan i sipauli angka riga dohot sitotas dalan balobung. Riga (belah), i ma lubang di tembok na sinangajo ni na manegai manang na ala termakan usia.

Sipahusorhusoron

Ibadah manang parsombaon pangalaho na mansai arga do i di parugamaonta. Ragam do rumangna, isara ni parmingguon, partangiangan lingkungan, parendeon, panangkasion di hata ni Debata, dohot na asing. Sude manang deba sian i taulahon do manang taihuthon, jala dihaporseai rohanta do, angka i ma deba dalanta laho manjou goar ni Debatanta jala patureturehon parsaoranta tu Ibana. Marhite na maribadah, laos dihirim rohanta do na tangihonon jala alusan ni Debatanta i do hita, tataponNa, ondinganNa, togutoguonNa, jala pasupasuonNa. Alai ra, ndang pola masalpuhu molo nidok, jotjot do parsombaonta i songon na agoan tondi. Mardalan do parmingguon, alai diihuthon na deba do i songon i sambing, tanpa rasa dan tanpa emosi, hambar. Ende, tangiang, pujipujian songon na so marnangon, ndang sahat tu hasahatanna, ndang maralus, jala parsombaon i songon na so marparbuehon agia aha.
Songon i do pangalaman ni bangso Israel di tingki ni jamita on. Marpuasa nasida alai ndang diida Debata jala ndang dipardulihon, joujou pe nasida ndang ditangihon. Boasa? Ai marpuasa pe nasida holan na naeng pagukguk pahala do, holan na mangaradoti ruhutruhut parduru jala holan na mangalului hasonanganna sandiri. ‘Kepentingan’ ni Debata, i ma pangoloion di hata dohot pangulahonon di ni patikNa ndang pola dirohahon. Lumobi na mangalului hasonangan ni sesamana, sandok dao do i sian parpuasaonnasida. Ala ni i, ndang ditangihon Debata nasida jala ndang dipardulihon.

Tau sipaingot ma i di hita taringot tu parsombaon manang peribadahanta, ai ndang sai simbil hita sian na songon i. Sai adong do nang sian halak Kristen na ringgas mandohoti ulaon parhuriaon di bagasan sangkap mangalului pahala, adong na tarunjun mangulahon hadaulatonna holan di duru, alai rohana dao do sian i. Songon i, ndang tarsoadahon na boi madabu do nang hita tu na manarihon hasonanganta sandiri di bagasan parmingguonta. Tasadari manang pe so tasadari, ‘tapaholang’ do Debata sian i, alai tasubut do rohanta sandiri, ai hita do na naeng idaon jala pujion ni halak; lomo ni roha ni Debata ndang tasungkun, patikNa ndang taulahon. Laos songon i, na boi madabu do hita tu na paholang donganta jolma sian parsombaonta, ai tatangianghon disi pe angka na male, na dangol, panangkarnangkar, dohot na marsaemara, sintap ni dorpi ni gareja i do i, ai ndang sai adong anggo haoloonta manarihon kesejahteraan umum manang keadilan sosial di parngoluonta siapari. Molo songon i do antong, unang ma pola longang rohanta molo laos so maralus angka tangiangta jala parsombaonta ndang marparbuehon agia aha. Songon dia do asa malua hita sian i?

Tu bangso Israel didok Debata, ingkon antusan nasida do paboa pasupasu na mangihut do parpuasaon i tu ulaon haluaon ni Debata; tanda ni hamauliateon nasida do i, ndada dalan mangomo pahala manang na membuka rekening di bank sorgawi. Dihalomohon Debata do bangso i mangulahon i marpusathon Ibana (teosentris), jala sipapataronnasida ma i di parngoluonnasida ariari di bagasan sikap dohot pambahenannasida tu donganna jolma. Molo dung songon i, di bagasan asi ni rohaNa, rajuman ni Debata ma parpuasaon i gabe hatigorannasida, jala boi nasida manghirim ragam ni pasupasu di bagasan dohot marhite parpuasaon i, togutoguonNa nasida jala pargogoanNa laho mangulahon pembangunan kembali ni Jerusalem dohot restorasi ni Israel.

Songon i ma hita, marojahan tu ulaon haluaon ni Debata na di bagasan dohot marhitehite Jesus Kristus i, dipaloas do hita maribadah tu Ibana. Ala ni i ia taulahon pe i, nda tung na laho manuan lagu manang na laho mangomo pasupasu, alai na mandok mauliate do. Siulahononta ma i sian sandok roha. Roha do pusat ni ngolu. Roha na tarihot tu Debata dohot sandirina do i manubuhon angka ulaon na hinalomohon ni Debata. Marlapatan do nian ruhutruhut parduru (kultus) ni peribadahan i, ai Debata pe godang do ditonahon taringot tusi. Diaturhon do rupani taringot tu undungundung parluhutan, poti parpadanan, ulaula parsombaon, dohot sikap-sikap peribadahan. Alai hasisingkop ni kultus ndang manjamin hasintongan ni parsombaon, molo roha ni jolma na marsomba i sandiri dao sian Debata. Arga pe kultus, pinaarga ni roha do. Angkup ni i, parsaoranta tu Debata na paluahon i ingkon do manubuhon hubungan sebab akibat tu dongan joma. Ibadah na sintong ndang tarbatas i olat ni dorpi ni gareja, alai na manorusi do i tu ruar, tu lingkungan na umbidang, tu masyarakat dohot bangso. Dohot hata na asing, ibadah na taihuthon di inganan na tontu, ndang sae i amenhononta holan di inganan i, alai dohot do di hangoluanta ariari. Apala dison ma idaonta lapatan dohot hajongjongan ni Tingting di parmingguanta. Molo ditingtinghon barita las manang arsak ni roha andorang so jamita, na martujuan do i asa na pinaborhat ni jamita i na pungu i tu panghobasion di angka dongan na marlas manang na mararsak ni roha. Molo songon i, boi ma hita manghirim na tangihonon jala alusan ni Debata do joujou dohot tangiangta, paudanhononNa tu hita angka pasupasu na mauliutus; togutoguon jala pargogoanNa hita di ulaon pembangunan ni bangso dohot negaranta, tarmasuk na manarihon hatigoran, hadameon, dohot keutuhan ni na tinompa (justice, peace, and integrity of creation) naung sega ala ni dosa dohot ala ni hamongkuson ni jolma.

jkt.06.10.2009/mvs

Read More..