Manghalungunhon Hatuaon

MANGHALUNGUNHON HATUAON

“Pola do rambon angka matangku manghalungunhon hatuaonMi dohot bagabaga ni hatigoranMi.” (Ps.119:123)

Nunga salpu muse sada bulan sian taon 2010 na tadalani on. Di jolonta nuaeng hembang dope sampulu nari bulan na so taboto dope agia aha na naeng masa di bagasanna. Songon na nidok di bulan na salpu, tontu godang do disi angka na masa; adong na pahinsa roha, alai sabalikna sai na adong do i na pagondok roha; adong na denggan na hombar tu na hinirim hian, alai sabalikna sai adong do i na so tinagam na mambahen hita tarsonggot jala targogot. Alai manang na boha pe i, tontu do, diparsinta rohanta do naeng horas hita disi, malua jala martua. Tu sangkap i, naeng marsiajar do hita sian Parpsalmen 119 on, na tongon marungkil dirupa angka na jungkat (ay.122), angka siulahon gogo (ay.121), angka na mardalan di lapang pangansion (ay.128). Di jungkat ni rohanasida, pola do ditorbangi patik ni Tuhan i (ay.126). Mangadopi sasudena i, ndang gabe mago roha ni Parpsalmen i, diboto do paboa na holan tu Debata do boi ibana marhahirimon. Hombar tusi mangaranap ma ibana tu Tuhan i manghalungunhon hatuaonNa dohot bagabaga ni hatigoranNa.

Naeng songon i ma hita mangarap tu Debata manghalungunhon hatuaon dohot bagabaga ni hatigoranNa di na mangadopi angka na masa di tingki na ro. Songon na tangkas taboto, marsogot dohot haduan, ari 2-3 Maret 2010 patupaonna ma sidang paripurna DPR-RI laho manjalo dohot manaringoti rekomendasi ni Pansus Bank Century. Ndang taboto dope manang na boha do kesimpulan sipatupaon ni sidang paripurna i. Ndang boi hita mereka-reka, ai sahat tu nuaeng mardalan do torus lobi-lobi di antara ni angka fraksi, laos songon i di antara ni pamarenta dohot angka fraksi na dirajumi berseberangan di pamingkirion. Disura roha, arian on torus tu bodari ingkon lam tu gencarna dope angka lobi i. Tekanan dohot ancaman pe songon i, disura roha torus ma i mardalan. Ndang rahasia be, adong do tekanan manang ancaman tu angka tokoh ni fraksi manang partei na dirajumi berseberangan di pamingkirion isara ni na naeng membuka borok lama. Manang na aha pe hasunan sibuaton ni DPR marhitehite na mandabu petek, ninna roha ndang boi so manubuhon kerawanan i di ngolu ni bangso dohot negaranta. Molo boi pe rupani dihamonanghon pingkiran ni na sabagian na mangarajumi na so adong na hurang di bail out ni Bank Century, selamat do pamarenta, alai kecewa do torop masyarakat jala ndang porsea be di DPR dohot di pamarenta ai ndang tarpaotooto agia hagogoon dia nasida ala torang do diida be di pamaresoan ni Pansus manang songon dia godang ni na sala di na masa i. Badan-badan manang investor luar negeri pe ra kecewa do jala ndang porsea be tu Indonesia on. Sabalikna, molo boi pe dihamonanghon pingkiran na mandok na adong do na sala di penyelamatan ni Bank Century i, jala hombar tusi ingkon adong do na martanggungjawab taringot tusi, lumobi molo gabe bermuara i tu pemakzulan, ndang boi so manimbulhon panghorhon dohot ongkos na mansai arga i na ingkon gararon ni bangso dohot negaranta on. Antong boha nama?

Ndang adong na boi hirimonta so lobi sian Tuhanta i. Pamarenta ndang boi, DPR ndang boi, angka partei pe ndang boi ai tung saluhut do nasida holan na mamingkirhon jala patujolohon kepentingan dohot na ringkot di horongna be, holan na manghaholongi hundulan dohot hajongjonganna be, alai papudihon molo so dohonon manghalupahon na ringkot di situan natorop. Ala ni i naeng nolnol do simalolongta mangaranap tu Debata, manghalungunhon hatuaonNa. Ibana do na tuk paluahon hita, paluahon bangsonta. Bahen hasasaut ni haluaon i, ingkon tangian do hita di bagabaga manang soara ni hatigoran ni Debata asa di soara ni na asing, manang na soara ni pamarenta i, manang na soara ni partei, manang pe soara ni rohanta sandiri. Nunga tabereng sandiri, manoarahon soara ni na sabagian mansai hatop do i menuai reaksi negatif sian na asing, gabe lam tu tambana ma gaorna. Songon halak Kristen hita laos i ma dohot tangiangta. Naeng martangiang do hita luhut mangidohon asa Debatanta i na patupahon hasunan na dumenggan taringot tu parsoalan na niadopan ni bangsonta on. Tatangianghon ma pamarentanta dohot angka donganta na hundul di badan-badan perwakilan manang pe na di partei asa barani manadinghon soara ni kepentingan ni horongna be laho manangihon soara ni hatigoran na sian Tuhan i, gabe hehe rohana mamingkirhon dohot patujolohon angka na ringkot di bangso dohot masyarakat.

Marhuaso jala olo do Debata paluahon bangsonta, ai dohot do taringot tu bangsonta on Jesus Kristus manaon jala mate bahen tobus ni sandok manisia. Ala ni i, huhut paihutihut Jesus di parningotan di ariari panaonon manang passionNa di bulan Maret on, di angka minggu Okuli, Letare, Judika dohot Palmarum, sai mangaranap ma matanta tu Debata manghalungunhon hatuaon dohot soara ni hatigoranNa. Amen.

jkt.01.02.2010/mvs

Read More..

Okuli

SERMON JAMITA TU MINGGU OKULI, 7 MARET 2010
Joh.2:1-10

Patujolo

Di jolo ni turpuk on (1:35-51) dipillit Tuhan Jesus do siseanNa angka na parjolo, i ma si Johannes, si Andreas, si Simon Petrus, si Pilippus, dohot si Natanael. Dung pamilliton i, pintor dipaihutihut nasida do Jesus i. Marhite na songon i, manang di dia jala sadihari pe boi ma nasida diajari, ditogutogu, jala diparade tu ulaon na naeng pasahatonNa tu nasida. Patoluarihon sian i (ay.1), masa turpuk on. Di pamerengan ni Evangelis Johannes adong do pardomuan ni na dua na masa i, ai dipatupa Jesus pe tanda halongangan na papatarhon hasangaponNa di pesta parbagason i ndada holan na naeng mangurupi na marbagas na hurangan i, alai dohot do laho mangajari jala patoguhon siseanNa i asa porsea nasida di Ibana (pat.ay.11).

Hatorangan

Kana, huta na metmet marhira 22 KM di manabia Tiberias, 10 KM di irisanna ni Nasaret. Di tingki on, tartanda dope huta i jala margoar ma i Kerr Kenna. Marhira 300 halak do pangisina, toropan Katolik. Ditambahon si Johannes do dison goar Galilea, tangkasna ‘Kana na di luat Galilea’ laho paasinghonsa sian Kana na asing, i ma na di luat Ephraim (Jos.16:8) dohot Kana na di luat Siria, marhira 13 KM di dangsina ni Tirus. Sian huta i do haroroan ni si Natanael (Joh.21:2). Dohot do si Maria, ina ni Jesus di pesta i. Rupa, na marsisolhot dope nasida dohot suhut na marulaon i, ai tarrajum tu na parjolo do ibana umboto na hurang di parpesta i jala marusaho mangatasisa.

Dohot do Jesus digonghon tu pesta i raphon siseanNa, jala ro do Ibana. Nunga gabe jolma situtu Ibana, gabe warga ni masyarakat sosial dohot budaya Israel na terlibat di poroses sosialisasi dohot enkulturasi na bangsoNa. Ala ni i ndang dihailahon Ibana mandohoti angka ulaon sosial dohot budaya ni masyarakat. Ndang holan songon parsidohot manang painondur, alai hadir do Ibana di angka kegiatan i songon sipalua na sian Debata.

Hurangan anggur nasida. Siinumon na utama do anggur di Israel. Hasusaan bolon do i molo so adong be persediaan anggur di jabu ni sadasada keluarga, ai ndang adong be sipangkeonnasida manjangkon tamuenasida. Habasaron manjangkon tamue mardongan anggur tarmasuk tugas suci do i di Israel. Siinumon na palashon roha do anggur i (pat.Ps.104:15). Ala ni i, di nasa parpestaan ni Israel ingkon adong do i. Ndang ala na lomo rohanasida mabuk, sabalikna do tahe molo adong sasahalak na mabuk di parpestaan sipinsangon do i jala dirajumi haleaon. Alai ingkon adong do i ai i do na hombar tu isi ni pesta i. Las ni roha do isi ni sadasada pesta, siinumonna pe ingkon na hombar tusi ma, siinumon las ni roha, i ma anggur. “Molo so ada anggur, ndang adong las ni roha,” ninna sahalak rabbi. Rupa, ndang apala paradongan nampuna ulaon i, ai hatop do nasida hurangan anggur. Haurahon bolon do molo masa na songon i. Tangkas do i diboto si Maria. Ala ni i, pintor didapothon ma Jesus, didok: “Ndang adong anggur di nasida.” Boasa pola alualuhononna i tu Jesus? Alualu tu dongan do i manang lobi sian i? Songon Anakna Jesus i jala sisolhot nasida di na marulaon i, di ingananna do nian boaboana i asa dohot Jesus i mamingkiri manang songon dia dalanna malua suhut i sian haurahon i. Alai sian alus ni Jesus dohot hata ni si Maria na tu angka parhobas i tarhilala do na lobi sian na mangalualu tu jolma do si Maria i. Rupa, nunga lam dihilala ibana na dapot ne ma tingki hapataran ni Jesus i, jala porsea do ibana na haurupansa do suhut na hapusohan i.

Alai didok Jesus: “Marhua ho tu ahu, Inang? Ndang dope ro tingkingKu.” Sasintongna, parompuan do na dipangke dison (Gr. gunai/woman), ndang inang (Gr. meeteer/mother). Laos i do tong dipangke di hataNa na tu inaNa i sian silang i (Joh.19:26). Teguran secara tidak langsung do i tu si Maria na naeng ‘mencampuri’ ulaon hamessiasonNa. Jesus i di bagasan pardomuanNa tu Debata AmaNa do na umboto tingki dohot sadiharina papatar hamessiason dohot hamuliaonNa. Na jumpang ne ma tingki i, alai molo jumpang pe i na sian huasoNa do i, ndang ala hagiot ni si Maria. Hombar tusi, ingkon lam pasuruton ni si Maria do dirina sian hajongjonganna songon ina ni Jesus gabe sada sian angka sisean ni Jesus. Nang pe so diantusi si Maria sude na nidok ni Jesus, ndang gabe menek rohana disi. Alai na manghirim do ibana na jumpang ne ma tingki hapataran ni Jesus i, jala adong do na naeng patupaonNa. Hombar tusi didok ma tu angka parhobas: “Manang dia dohononNa tu hamu, bahen hamu ma!”

Adong disi onom gunsi siatsiat dua ro di tolu poting. Sada poting marisi hirahira 30 liter; jadi sagunsi, marhira 60 tu 90 liter. Na marguna do i tu panggohion ni adat parburion ni Jahudi. Hombar tu adat parburion i, nasa na ro tu pesta i ingkon jolo burionna do patna, dung i pe asa bongot tu inganan parpestaan. Di na laho mangan, ingkon burionna dope tanganna duansa mamungka sian dugul sahat tu jarijarina. Songon i ganup laho mambuat sipanganon sian partambuan, dohot dung simpul mangan. Jadi di nasa parpestaan ni Jahudi mansai ringkot do godang aek. Didapothon Jesus ma angka parhobas i laos didok: “Gohi hamu ma angka gunsi on aek!” Dung i, pintor digohi ma. Angka parhobas i do manggohi, gabe ndang adong hasiatan ni tihatiha na mandok angka sisean ni Jesus do na manggohi gunsi i dohot anggur, dung i disarsarhon ma naung masa tanda halongangan. Mansai gok do dibahen, sirnip, gabe ndang adong hasiatan ni pingkiran na mandok dung hira gok gunsi i disaorhon ma tusi manang na sadia godang anggur na polin gabe mardai anggur sude aek i. Sandok di bagasan saluhut na masa i ndang adong kesan na patuduhon na adong kollusi manang kongkalikong di antara ni Jesus dohot manang ise pe na di parpestaan i, alai murni do i halongangan.

Disuru Jesus ma angka parhobas i manahui sian gunsi i jala mamboan tu induknasida. Nunga masa halongangan, nunga muba aek i gabe anggur. Ndang adong pola ritual na khusus na dipatupa manang pandohan na khusus na dihatahon Jesus taringot tusi, alai sae do marhite giot ni rohaNa sambing. He willed it, and it was done. Sadihari parmubana, saleleng na manggohi i do manang dung sirnip ndang adong na umbotosa, holan Tuhan i do. Na sahat do angka parhobas i tu pamotoan i dung na disuru nasida manahui sian i jala mamboansa tu induknasida, mandok sintua ni parhobas, na mangatur parhundul ni tamue, pardalan ni pesta, pardalan ni sipanganon, siinumon dohot angka na asing. Di tingki na manahui i mamoto ma nasida, anggur do na tinahuanna i, ndang aek. Aut aek, tontu do ndang olo nasida mamboan i tu induknasida. Bahen aha i? Di mata ni sintua ni parhobas i pe, anggur do na binoan ni angka parhobas i, ai pintor didai do jala diboto paboa anggur na dumenggan do i, dumenggan sian angka naung disagihon andorang so i. Pintor laho ma rohana na angkalangkal ni pangoli i do i, managihon parjolo anggur na humurang jala mameop na dumenggan. Ala ni i dijou ma pangoli i, didok: “Saluhut jolma mangalehon parjolo anggur na dumenggan; dung pe butong halak, asa dilehon na humurang. Ia ho, dipeop ho do anggur na dumenggan ro di nuaeng.” Songon i do tutu somalna di nasida, sai jumolo do disagihon halak anggur na dumenggan; dung i pe asa na humurang, ai di ombas na songon i nunga mamungka majal cita rasa ni angka na ro.

Rancangan Homiletis

Didok sada pandohan: “Panghirimon manghorhon hangoluan.” Sintong do i, ai saleleng adong dope panghirimon adong do hagiot manang semangat laho mangolu. Alai molo so adong be panghirimon manang putus asa mansai mura nama na songon i maningkot. Aha do panghirimon i? Panghirimon, i ma kondisi rohani na patauhon halak mangolu dohot mangula hombar tu na so niidana dope. Apala i do na binahen ni si Maria di jamita ari on. Raphon pangoli dohot oroan, hasuhuton ro di angka sisolhot ni na marulaon i, na targogot jala hapusohan do rohanasida ala ni na hurangan anggur nasida. Di pamerengan ni halak Israel tung haurahon bolon do na songon i. Di hagogotanna i mangaranap jala manghirim do si Maria i tu Jesus. Nunga dihilala ibana na jumpang ne ma tingki hapataran ni Jesus i jala porsea do ibana na haurupansa do nasida. Ala ni i didapothon ma Jesus i jala didok: “Ndang adong anggur di nasida.”

Naeng songon i do hita, di bagasan panghirimon i, songon na jinouhon ni Okuli, goar ni Minggu on naeng mangaranap hita tongtong tu Debatanta di bagasan dohot marhite Jesus Kristus Tuhanta i. Ibana do panghirimanta (1 Tim.1:1), hapataran ni Debata Amanta sihaposan i, pangurupi jala lombulombu i (pat.Turpuk Sijahaon: Ps.115:9-15). Unang so taboto, gok hasusaan do ngolu on. Di inganan las ni roha pe mangonggop do hasusaan. Parbagason ma rupani, songon na martaringot di jamita ari on, apala i do peristiwa na umpenting di lingkaran hidup ni manisia. Hombar tusi, pesta parbagason pe mansai penting do i jala arga; gok las ni roha, gok olopolop dohot pariaiaon. Alai sahali nari, disi pe na boi mangonggop do jut ni roha, arsak dohot hoihoi. Na mangonggop do hasusaan nang di parngoluanta ariari. Lam tu maolna do rupani na mangolu di tingki on, lam tu argana situhoron gabe lam torop na so tolap be manggohi parguna ni ngoluna ariari, na tarpaksa ingkon mangallang gadong hau manang nasi aking, sementara pamarenta asik mencitrakan diri selaku yang berhasil. Na mangonggop do tong hasusaan i nang di ngolu parugamaon. Didok sada sian uluan ni hurianta: “Kondisi kebebasan beribadah semakin terancam di Indonesia. Jika dulu, massa atas nama organisasi yang merusak gereja. Kini, pejabat negara seperti walikota yang proaktif menutup gereja dengan dalih SK 2 Menteri atau desakan agama.” Sadalan ma i tu tajuk ni Harian Suara Pembaruan, 11 Pebruari 2010 na mandok: “Sulit mebayangkan kapan situasi seperti ini angka berakhir mengingat tak ada solusi konkrit dari negara untuk mengatasinya. Jangankan jalan keluar, negara melalui aparat di berbagai level justru menjadi pelaku pelanggaran kebebasan beragama. Laporan sebuah lembaga swadaya masyarakat setara institut menyebut, tahun 2009 terdapat 291 tindak pelanggaran terhadap kebebasan beragama atau berkeyakinan. Dari jumlah itu 139 tindak pelanggaran melibatkan negara, baik secara aktif yakni sebagai aktor pelanggaran maupun karena tindak pembiaran sehingga terjadi pelanggaran.” Holan Debata do panghiriman dohot haporusanta, sihaposan dohot lombulombunta. Ala ni i, mangaranap tu Ibana ma hita, ai sian Ibana do ro sihirimonta.

Nang pe so pintor dioloi Jesus pangidoanna i, ndang menek roha ni si Maria. Di bagasan panghirimon mangula do ibana tahe, didapothon do angka parhobas jala didok: “Manang dia dohononNa tu hamu, bahen hamu ma!” Tutu do, ndang tarhirim ibana disi, ai disuru Jesus do angka parhobas i manggohi onom gunsi na rade disi. Masa ma halongangan, ai muba ma aek i gabe anggur. Marhite i malua do pangoli dohot oroan i, hasuhuton ro di angka sisolhot sian haurahon bolon; angka na ginonghon pe marlas ni roha, marolopolop jala mariaia marsaulihon anggur halonganan na dumenggan na pinatupa ni Tuhan i.

Panghirimon ndang paluahon hita sian ulaon, manang paloashon hita hundulhundul huhut manatapi dompak langit jala paimaimahon manang sadihari ro pangurupion sian i, ndang. Sabalikna do tahe, panghirimon na gabe patamba gogo dohot semangat mangula do i di hita laho pasauthon angka na hombar tu parenta ni Debata, paburjuhon marubat ia di tingki na marsahit, mangalehon habengeton di haporsuhon, dohot na asing, dung i Ibana sandiri ma na bertindak hombar lomo ni rohaNa. Taringot tusi ingkon unduk do hita tu Ibana. Di tingki marsikola, rap opname do ahu sahali dohot sahalak amaama di Rumah Sakit Umum Pematangsiantar. Parumauma do ibana na mian di sada huta na dao sian kota i. Manambai pansamotan dohot pangabahanna ariari, diulahon ma paragaton. Tongon di na patuathon tuak ibana sahali, madabu do ibana sian paragatanna i. Timbo do bagot hadabuanna i, pola do maponggol patna, gabe ditaruhon sisolhotna ma ibana tu ruma sakit i. Sahat disi, digips ma patna na maponggol i. Diparsinta rohana nian, naeng tumibu do ibana malum jala mulak tu huta, ai dung na marubat i sorang do anakhonna. Alai boha ma bahenon, songon i do na maponggol, tar laon do i asa domu jala malum. Ndang apala diantusi ibana i sude, gabe sai tongtong ma ibana marungutungut. Di parungutungutonna i didok ibana do sahali: “E tahe, sambor nipiniba na marsahit on, ditaruhon iba nian tu ruma sakit on na naeng marubat do asa tibu malum. Hape dipasombusombu dokter dohot angka perawat do iba dison, ndang sintong diubati. Di dia ma malum sahit anggo so sintong diubati?” Umbege i disungkun halak na peak jumonok tu lambungna ma ibana, ninna ma: “Ai boasa sai holan na marungutungut ho, jala boasa sai dohononmu na dipasombusombu ho, ndang sintong ho diubati? Hape huida hami do tangkas, sarupa tu hami, tolu hali sadari dilehon do ubat panganonmu.” Dialusi ibana ma i, didok: “ Toho do tutu, songon na niidamuna tolu hali sadari dilehon nasida do ubat panganonhu. Alai diboto hamu do tangkas, na maponggol do pathu. Ndang sian bagasan ubatan na maponggol, sian duru do; sidampolon do i, sidaison. I ma na so binahen ni dokter dohot angka perawat na dison tu ahu, ai boha antong bahenonna ai nunga halang dibahen simin (na nidokna gips) na bontar on.” Songon i sai adong do halak na manguji manontuhon manang mereka-reka sandiri manang songon dia nian Debata mangurupi ibana di angka hagogotanna. Di na so apala hombar pambahen ni Tuhan i tu na sinurasura ni rohana i, marungutungut ma ibana, manang murukmuruk. Ndang siajaranta Debata, ndang sitontuhononta manang songon dia Ibana mangurupi hita, alai tapaima ma Ibana bertindak hombar tu kedaulatan dohot lomo ni rohaNa.

jkt.13.02.2010/mvs

,

Read More..

Reminiscere

SERMON JAMITA TU MINGGU REMINISCERE, 28 PEBRUARI 2010
Neh.9:26-31

Patujolo

Mangihuthon deba parhapistaran taringot tu Padan na Robi, sada hasadaon hian do buku 1 Kronika, 2 Kronika, Esra dohot Nehemia, i ma barita ni Israel mamungka sian si Adam sahat tu abad palimahon SM. Pamurahon hataan, digoari ma i buku Kronika Raya. Nunga adong nian buku na asing na manaringoti i, lumobi taringot tu sejarah ni harajaon Israel, i ma 1 dohot 2 Samuel, 1 dohot 2 Rajaraja. Alai dihilala na deba ma na ringkot do i ulahan dibereng sian sudut parsihohoton tu dinasti ni si David dohot parsombaon tu Jahowa na marpusat di Jerusalem. Halak Juda do na satia tu habangsa ni si David jala na marsihohot di pangoloion tu Jahowa. Laos songon i do pinomparna angka na mulak sian habuangan Babel. Hombar tusi, ndang ditaringoti disi Harajaon Israel Utara ro di pasipasina angka na tading di na tarbuang nasida tu Assur dohot na mulak sian i, ai ndang diokui nasida i songon pewaris ni bangso ni Debata. Di pudian ni ari, disirang ma buku Kronika Raya i tu opat buku, jala dipatontu ma ingananna di Kanon Jahudi, jala lam tu tontuna ma i di Kanon Septuaginta, i ma salinan ni Padan na Robi di hata Gorik, songon na taihuthon di Bibel Batak. (Hatorangan na asing dope taringot tusi, ida ma Sermon Jamita tu Minggu 16 dung Trinitatis, 27 September 2009 di blog on).

Si Nehemia, i ma sahalak Jahudi na tubu di habuangan Babel. Molo sintong panjujuron ni angka penafsir na Raja Artahsasta-I (465-424 SM) do nidokna di Neh.2:1 i, bolas do pastihonon ndang tubu dope ibana di na mulak halak Juda sian Babel di taon 538 SM hombar tu parenta ni Raja Kores (559-530 SM). Sitahu anggur do ibana di istana ni Raja Artahsasta-I (Neh.1:11). Sahat do tu ibana barita pardangolan ni halak Juda di Jerusalem. Marhaurahon do nasida, ai nunga marbungbungan angka parik ni huta i; harbanganna pe nunga matutung (Neh.1:4). Gabe dipangido ma tu raja i asa dipaloas ibana tu Jerusalem laho paulihonsa (Neh.2:5). I ma dalanna mulak tu Jerusalem. Na gabe pangarajai (bupati) do ibana muse di luat i (pat.Neh.8:9), jala pangurupi situtu di pembangunan partondion naung pinungka jala hinasuhuthon ni Malim Esra. Nasida ma na manggogo mangaramoti hapolinon ni bangso ni Debata ai dirarang do halak Israel marbagas dohot halak parbegu.

Na masa do jamita on di sada parluhutan di Jerusalem. Dipungka do parluhutan i marhite na manjaha patik ni Debata Jahowa leleng ni tolu jom, dung i dipaujung marhite tangiang panopotion di dosa tong tolu jom (Neh.9:3). Panimpuli, martangiang ma halak Levi. Di tangiangna i diparhatopot nasida do parjolo hamuliaon ni Debata Jahowa (Neh.9:6), ihut tusi dipajojor ma pokok-pokok na penting di sejarah ni bangso i, i ma panjouon ni si Abraham (Neh.9:7-8), haruruar sian Misir dohot pangalehonon di patik, panogunoguon ni Debata di parhorsihan dohot pangalehonNa di tano Kanaan (Neh.9:9-25).

Hatorangan

Di turpuk on, diparhatopot nasida do paboa na jungkat do Israel jala panggunturi. Nunga mamungka i di parhorsihan, ai sai dipajogal nasida do tangkuhukna jala ndang ditangihon angka tona ni Debata (Neh.9:16). Tung holan ala ni asi ni roha ni Debata do umbahen na sahat nasida tu Kanaan. Alai dung sahat tusi pe, ndang gabe mauliate rohanasida, ai tong do nasida jungkat. Lam tu jungkatna dope tahe. Adong dua pangalaho na mempengaruhi bangso i disi gabe lam jungkat. Na parjolo, hamimimbar ni cara hidupnasida gabe partani na mariganan na hot. Taringot tusi, ndang adong dope na binotonasida. Ala ni i ingkon na marsiajar do nasida tu halak Kanaan naung jumolo mangolu di partanion. Kesempatan i dipangke angka parbegu i do mangela nasida mardosa. Hombar tu paham henotheisme na tiniopnasida, hira songon on ma pandoknasida: “Ia naeng marhasil hamu di partanion, somba hamu ma debatanami, Baal, ai i do debata ni luat on jala silehon gogo ni na niula; anggo Jahowa i, na sinombamuna di parhorsihan, debata porang do i; ndang adong huaso ni i dison jala ndang adong na binoto ni i taringot tu partanion.” Masihol di parbue na na niulana, gabe dilaosi nasida ma patik i, dibolonghon Debata tu pudi ni tanggurungna (pat.1 Raj.14:9; Hes.23:35) dung i laho ma nasida marsomba jala mangoloi tu Baal. Na paduahon, hamimimbar ni pengorganisasian ni masyarakatnasida sian na bersahaja tu na lam kompleks. Di mulana sabam do rohanasida marrajahon Debata sambing. Alai di pudi, maniru bangso parbegu angka na humaliang nasida (pat.1 Sam.8:5), dihasiholi nasida ma pabangkithon sada raja sian tongatonganasida. Dung i jongjong ma harajaon Israel, na otik godang manjangkon unsur-unsur na jumpang di harajaon parbegu. Di pamerengan ni Debata, Ibana sandiri do na binolonghonnasida disi (1 Sam.8:7). Kenyataan patuduhon, singkat ni na mangaramoti Israel di hasatiaon tu Debata, jotjot do masa, justru angka raja i do na gabe pintu masuk ni hasipelebeguon tu Israel.

Sasintongna nian, na gabe hangoluannasida do patik i. Molo diulahon nasida i sintong, jala marsihohot nasida tu Jahowa, sai na mangolu do nasida. PasupasuonNa sagusagu dohot tapiannasida, jala pasalpuonNa sahitsahit sian tongatonganasida (pat.2 Mus.23:25), jadi marsipinjot ma angka soponasida jala sirnip tuak anggur angka pangilangannasida (pat.Poda 3:10). Ibana do Tuhan ni saluhut, parhuaso sasadasa na mamasumasuhon nasa rumang ni parngoluon. Alai ndang porsea nasida disi, gabe dihalomohon do na mangihut tu angka dalan ni halak sipelebegu. Hombar tu saluhutna i digoari ma nasida panggunturi, mandok pemberontak.

Nang pe songon i, ala ni asi ni roha ni Debata ndang pintor diambolonghon nasida, alai disuru do panurirangNa manjamitai nasida. Angka na ginohan jala tinogihon ni TondiNa do nasida asa margogo manogihon nasida mulak tu Debata. Sipata, ditangihon bangso i do panurirang i, dijangkon do panindangionna jala mulak nasida tu Jahowa. Alai umumna dialo do nasida, ditulak; na deba dibunu (2 Kron.24:31; pat. Mat.23:35). Ndang manganto rohanasida, na patubu gasip godang (Hb. ne’atsowt gadowlot/great provocation) tu dirina sandiri do nasida disi, ai mansai jonok do dosa tu uhum. Marhite na mangalaosi patik ni Debata, nunga dipancing nasida uhum ni Debata. Sai hira na ‘diprovokasi’ Debata, hira na ‘dihasut’ laho manguhumi nasida. Lobi sian i tahe nunga disurduhon nasida tanganna laho mangaithon uhum ni Debata.

Tutu do, diuhumi Debata do nasida disi, dipasahat do nasida tu tangan ni angka musuna, angka na pasipalsipalhon nasida. Dung so tahan nasida, joujou ma nasida tu Debata, jala hombar tu asi ni rohaNa ditangihon do joujounasida; disuru do tu nasida halak silehon tua angka na paluahon nasida. Alai dasar na jungkat jala panggunturi, dung marhasonangan nasida diulahi do muse mangulahon na maralo tu lomo ni roha ni Debata, gabe dipasahat nasida muse tu panggomgomaion ni musunasida paima mulak rohanasida tu Jahowa. Mamungka sian tingki ni angka panguhum sahat ro di habubuang ni bangso i tu tano Babel mulahulak do tarjaha taringot tu pangalaosion ni bangso i, taringot tu uhum ni Debata na pasahathon nasida tu pengaruh manang tu huaso ni musu angka na humaliang nasida, isara halak Midian, Palistim, Aram, Misir, Assur, dohot na asing. Sipata do nasida disusai, dipasombu jolo mangula, alai martahi manggotil ro ma musuna manglaum jala mangalengsehon na tinggal, sipata diparhatoban, jala sipata ingkon manggarar jomba bahal tu musu i, dohot na asing. Alai taringot tu asi ni roha ni Debata na manalpuhon angka pangalaosionnasida pe, taringot tu parsuruNa di angka panurirang, dohot taringot tu tindakanNa na paluahon bangsoNa i mulahulak do tong tarjaha di tingki na nidohan di ginjang i (pat.Pangh.2:14-23).

Alai marbatas do asi ni roha ni Debata. Molo dung sahat tu batas i, ndang alang rohaNa parohon uhum na so dung dope nidabuhonNa. Taon 597 SM, tarbuang do Raja Joyakin raphon angka na sangap ni bangso i tu Babel. Manggonti ibana manggomgomi halak Juda angka na tading dope, bangkit raja ma si Sedekia. Songon harajaon taklukan ni Babel, jongjong dope Juda sampulu taon nari. Alai di taon 587 SM, dibuanghon ma nasida apala luhut, dipanserakhon tu angka luat naung pinapatu ni halak Babel. Songon i do kebijakan ni Harajaon Babel uju i, menghindari pemberontakan marusaho do nasida mangagohon identitas kebangsaan ni bangso angka na pinapatunasida marhite na maneraknerakhon nasida marluatluat. Alai taon 539 SM tunduk ma Babel tu si Kores, raja ni Media dohot Persia. Marasing sian Babel, diargai si Kores do identitas ni ganup bangso. Laos di taon i diparuar ibana do maklumat kerajaan na paloashon sude bangso na binuanghon ni Assur dohot Babel mulak tu tanona be. Hombar tusi, taon 538 SM mulak ma halak Juda angka na sinunggul ni Jahowa tondina tu Jerusalem, niuluhon ni si Serubabel dohot si Josua. Di pamerengan ni Bibel, sudena i ndang simbil sian sangkap hatuaon ni Debata na taringot tu bangsoNa. Parasiroha do Ibana jala pardengganbasa. Ndang tongtong Ibana manorui, jala ndang gotos rohaNa saleleng ni lelengna (pat.Ps.103:9). Ndang ro di salelenglelengna Ibana mamadai, jala ndang tongtong Ibana mangarimasi (pat.Jes.57:16). Ia dung jumpang tingki na binuhulna dipalua do nasida. Haluaon i dipatupa do marhite si Kores, sada raja parbegu. Ibana do Debata ni saluhut, Tuhan na manghuasoi angka bangso, Ulu ni sejarah na manguluhon angka na masa.

Sipahusorhusoron

Reminiscere do goar ni minggunta ari on. Na marpambuatan do i sian hata ni Ps.25:6 na mandok: “Sai ingot ma ale Jahowa, angka denggan ni basaM dohot asi ni rohaM, ai sian na robi do angka i.” Na marungkil do parpsalmen i maradophon dirina na gok dosa dohot maradophon angka parjahat. Di parungkilonna i diboto do tangkas na so adong haporusan so dungkon ni Debata parasiroha jala pardenggabasa i, gabe dipangido ma pangurupion dohot haluaon.

Suman tusi do halak Israel di tingki ni si Nehemia. Di sada parluhutan na pinatupanasida di Jerusalem, diparhatopot jala dihatindanghon nasida do asi ni roha dohot denggan basa ni Debata. Hinabalga ni asi ni roha i lam tu tangkasna do i di nasida di na disorminhon tu hadosaonnasida. Na jungkat roha do Israel, sijogal tangkuhuk jala panggunturi, ai dilaosi do patik ni Debata jala diambolonghon tu pudi ni tanggurungna. Sasintongna nian, na tau hangoluannasida do patik i, nda tung na pasorathon. Molo diulahon i, sai na mangolu do nasida, sonang jala martua, ai pasupasuon ni Debata ma sagusagu dohot tapiannasida, jala pasalpuonNa sahitsahit sian tongatonganasida, jadi marsipinjot ma angka soponasida jala sirnip tuak anggur angka pangilangannasida. Alai ndang porsea nasida disi, lomoan do rohanasida paihuthon dalan ni parbegu. Ndang tarhalomohon Debata angka pangalaosi. Ala ni i disuru do panurirangNa angka na paingothon nasida asa mulak tu Ibana. Asi ni rohaNa do i, ai ndang dihalomohon Ibana hamatean ni pardosa, hamubaon ni rohana do lomo ni rohaNa asa mangolu. Alai di na so tinangihon nasida i diuhumi do nasida. I pe, halilu ni asi ni rohaNa do, ai molo muba rohanasida disuru do tu nasida halak silehon tua paluahon nasida. Sian tingki ni angka panguhum sahat tu habuangan Babel mulahulak do tarjaha pangalaosion ni Israel dohot uhum ni Debata tu nasida. Alai luhutna i diatasi asi ni rohaNa do, ai laos mulahulak do tong tarjaha nang taringot tu parsuruNa di panurirang dohot halak silehon tua angka na paluahon nasida. Gari sian habuangan tahe dipalua do nasida. Ala ni i, ndang tarbahen nasida so marhatopothon jala manghatindanghon asi ni roha dohot denggan basa ni Debata, jala manang sadihari pe sai boi nasida manghirim disi.

Na gabe Barita na Uli ma i di sandok manisia, na patubuhon panghirimon jala pahinsahon roha nang di hita angka na mangolu di tingki on dohot di inganan on. Ndang umburju hita sian bangso Israel. Nidok songon i, ai nunga dipaian Debata Tondi Porbadia i di bagasan hita, na paingothon hita tu patik dohot lomo ni rohaNa, na mangajari jala manogihon hita tu bagasan nasa hasintongan. Alai mansai jotjot do I taarsahi marhitehite pingkiran, hata dohot pambahenan angka na so hombar tu patik dohot lomo ni roha ni Debata. Singkat ni na mangoloi, talaosi do patik ni Tuhan i. Suman tu halak Israel, na boi masa do i ala ni pangharonsothon ni rohanta di angka na di tano on. Ndang hapintoran hita dirinta, demi parbue ni na niula manang keberhasilan ni perusahaan adong do halak Kristen na so pola ingot be di patik dohot aturan ni Debata, na so pola parduli be di norma-norma manang nilai-nilai ni hakristenon. Na marsungkun tu datu pe tahe gari adong, na mangido gogo tu begu, tu sumangot, tu sombaon manang tu alam gaib. Songon i muse, na boi masa do i ala ni giot ni roha naeng dos dohot portibi on. Di portibi on do halak Kristen, alai ndang sian portibi on. Songon angka na so sian portibi on, asing do pangantusionna taringot tu huaso dohot panggomgomion. Alai ndang sai marhasil halak Kristen mampartahanhon haasingonna, dipasobok do tahe dirina dohot portibi on. Tapamanat ma rupani donganta sahaporseaon na hundul di partei manang di lembaga-lembaga perwakilan, ndang sai dumenggan pamingkirionna taringot tu huaso, jala ndang sai tumingkos perjuanganna di na mampartahanhon hatigoran dohot hasintongan; dos do tahe, molo so dohonon rumoa sian na asing. Ala ni saluhutna i nunga patut hita hona uhum, jala sasintongna nunga hona uhum. Ringkot do antusanta, uhum ni Debata ndang sai didabuhon i di bagasan rumangna na luar biasa isara ni aek na sumar manang udan barerang, alai jotjotan do di bagasan rumangna na biasa. Hahijangon ni naposo rupani, hangalion ni holong ni roha, biar ni roha manoarahon soara panurirangon di tongatonga ni masyarakat na so bersahabat jala na hurang parduli di kebebasan na mambahen hita tongtong gabe sasaran ni sogo ni roha di torop inganan, ndang hurang i boi berengon songon hapataran ni uhum ni Debata, jala ndang hurang be i mambahen hita mago. Alai parasiroha jala pardengganbasa do Debata. Di toru ni uhumNa pe, ditiop do hita jala diramoti. Olo, ditiop do, ai sasintongna ia tung diuhumi pe hita ndada na laho mangagohon, alai na manogihon hita do tu hamubaon. Dohot hata na asing, uhum ni Debata halilu ni holong ni rohaNa do i. Holan ala ni i do umbahen na so mago hita. Ala ni i, manang sadihari pe hita manghilala na hona uhum hita sian Debata, sai boi do hita manghirim di asi ni rohaNa jala martangiang mandok: “Sai ingot ma ale Jahowa angka denggan ni basaM dohot asi ni rohaM, ai sian na robi do angka i.”

Alai unang sala, asi ni roha dohot denggan basa ni Debata ndang paloashon hita mangolu tongtong di bagasan dosa dohot pangalaosion na dos, ndang. Ingkon tangihononta do soaraNa marhite angka na sinuruNa laho manogihon hita tu hamubaon ni roha, ingkon lam pahombaronta ngolunta tu patik dohot lomo ni rohaNa, lam oloanta Ibana jala lam haholonganta Ibana sian nasa rohanta (pat.Turpuk Sijahaon: Luk.7:36-50).

jkt.09.02.2010/mvs

Read More..

Invocavit

SERMON JAMITA TU MINGGU INVOCAVIT, 21 PEBRUARI 2010
1 Tim.6:11-16

Patujolo

Surat 1 Timoteus ditongos si Paulus do sian Makedonia di pardalananna parpudi dung malua ibana sian hurungan di Rom. (Tumangkas ida Sermon Jamita tu Minggu Estomihi, 14 Pebruari 2010). Di Bibel Batak, dibahen do judul ni turpuk on (sahat tu ay.21) Hata Parujungan tu si Timoteus. Di jolo ni on (ay.6-8) ditaringoti do uli ni hadaulaton (ibadah dalam arti yang luas) dohot sabam ni roha. Ihut tusi (ay.9-10) jea ni angka na naeng mamora jala na holongan di hepeng. Pangalaho na so patut jumpang do i di angka parhalado ni huria (pat.1 Tim.3:3). Marhaborhatan sian na dua i ma dipasahat Hata Parujungan na tu si Timoteus on.

Hatorangan

Digoar Apostel Paulus do si Timoteus dison halak ni Debata (Gr. anthroope Theou/man of God/manusia Allah). Na marharoroan do i sian Padan na Robi. Di 5 Mus.33:1 rupani, digoar do si Musa halak ni Debata (Hb. ‘iysh-haa-‘Elohiym/man of God). Laos songon i do di Ps.90:1, alai di Bibel na marhata Batak dipataripar do i disi dohot naposo ni Debata. Di 1 Sam.2:27; 9:6; 1 Raj.12:22 dipangke do tong goar i tu panurirang dohot tu na sinuru ni Debata, jala di 2 Tim.3:17 tu sandok na porsea. Songon halak ni Debata si Timoteus, songon i ma sosososo ni si Paulus dison, ingkon maporus do ibana sian giot ni roha tu hamoraon na ojak di roha na holongan di hepeng. Alai sabalikna, ingkon na eahanna do ragam ni halidangon (kebajikan) i ma: (1). Hatigoran, sikap na mangalehon tu ganup na patut jambarna be; tu Debata na patut tu Debata, tu jolma na patut tu jolma. Dohot hata na asing, manggohi kewajiban tu Debata dohot tu jolma. Manang na angka dia i nunga dipatorang i di hata dohot patik ni Debata. Ala ni i na laos marlapatan do hatigoran i manghangoluhon hata, patik dohot lomo ni roha ni Debata. (2). Hadaulaton, i ma na pahombarhon ngolu tu rupa ni Debata (image of God) dohot tu pingkiran ni Kristus (mind of Christ). Dipungka do i di parsombaon (ibadah) na dipatupa di hadirat ni Debata di inganan na tontu, dung i ditorushon marhite panghangoluhonna di hangoluan siganup ari. Dohot hata na asing, hadaulaton, i ma ibadah dalam arti yang seluas-luasnya, manang kesadaran paboa na ingkon torus manorus do jolma i mangolu di hadirat ni Debata. (3). Haporseaon, i ma panjangkonon tu Kristus songon Tuhan jala Sipalua ro di sude aspek dinamisna, isara hasatiaon, haburjuon dohot parsihohoton; sihaporseaan jala sihaposan. Halak ni Debata ingkon satia do i jala haposan; satia tu hatana, satia tu padanna, haposan di angka na pinasahat tu Ibana, sihaporseaan di saluhut pambahenanna. (4). Holong ni roha, i ma kondisi rohani na patauhon jolma mangolu songon Debata. “Haholongon do Debata” (1 Joh.4:8); manghaholongi mandok, mangolu songon Debata. (5). Habengeton, i ma hatauon manaon sitaonon ala ni haporseaon. Ndang na mandok na gabe talu manang menyerah tu sitaonon i, ndang; alai marusaho do manghamonanghonsa. (6). Lambok ni roha, i ma tondi na tenang, jiwa na so olo meledak di bagasan muruk dohot rimas. Ndang tondi na mangirput i manang na mangingking maradophon sitaonon dohot paraloan, alai tondi na boi memperlakukan diri sandiri do dohot sesamana songon na sapatutna. Songon i do Jesus uju na dipastap sada opas di adopan ni paruhuman ni Sintua ni Malim, ndang mauhom Ibana; dipinsang do tahe opas i alai ndang di bagasan rimasNa, didok: “Ia na hurang na Hudok, hajongjonghon hurangna; alai anggo na hona do, boasa pastaponmu Ahu?” (Joh.18:23). I ma halambohon.

Angkup ni saluhutna i, di ay.12 dipaingothon Apostel Paulus dope tu si Timoteus asa manghaburjuhon paraloan haporseaon. Na marpambuatan do sipaingot on sian dunia olah raga. Nasa halak na marsiadu (bertanding), ingkon dihaburjuhon do parlojongonna; dipukpuhi dagingna, mandok dilatih, jala dipatunduk, lapatanna diorom nasa sioromonna (pat.1 Kor.9:24-26). Paraloan do nang haporseaon i, paraloan na denggan; parsiaduon do i manang parlojongon (pat.Plp.2:16). Nasa na dohot di parlojongon i ingkon ramotanna do dirina, aloonna hisap dohot dosa na gigir manghaliangi (pat.Heb.12:1), dieahi tu jolo, dipuspus dompak pandang i, dompak upa hamonangan (pat.Pil.3:12-14), i ma hangoluan na salelenglelengna. Angka na monang di parsiaduon ni halak Gorik hatiha i, dijalo do upana karangan daun pohon zaitun, na laho malos. Alai angka na monang di paraloan haporseaon i jaloonna do upana hangoluan na salelenglengna, na so ra mansohot jala na so ra malos (pat.1 Ptr.1:3-4) Tu haporseaon i do si Timoteus dohot sandok halak Kristen tarjou, tu na maralohon dohot tu na manghirim di upa hamonangan i. Taringot tusi, ndang na imbaru be i di nasida. Songon angka na marsiadu di parsiaduon tano on naung diboto be do rumang ni parsiaduon i jala naung rade do nasida tusi. Taringot tusi dipapatar do i di jolo ni torop sitindangi, i ma angka na marnida (penonton ni) parsiaduon i. Suman tusi ma angka na porsea i, naung diboto be do na hinaporseaanna, diboto be konsekuensina, diboto be dohot upana. Nunga diparhatopot i jala dihatindanghon be di na gabe porsea nasida. Rupani, di tingki na tardidi nasida dihatindanghon be do haporseaonna taringot tu Debata, taringot tu Jesus Kristus, taringot tu Tondi Porbadia dohot ulaonNa. Marhite na manghatindanghon i, dipapatar do di jolo ni torop sitindangi, i ma huria i paboa na rade nasida maralohon paraloan haporseaon i di bagasan panghirimon di upa hamonangan i.

Di ay.13-14 dipatik Apostel Paulus dope si Timoteus. Dipatik, mandok dipaingot, diatur, diparenta. Diulahon do i di jolo ni Debata, mual ni ngolu jala na pangoluhon saluhut, tarmasuk si Timoteus. Ala ni i, marhuaso do Ibana manjou ibana mangula di harajaonNa. Dipatik ibana di jolo ni Debata asa sai diingot, ndada jolma na niadopanna disi, Debata do. Dung i, dipatik do ibana nang di jolo ni Kristus na manghatindanghon na denggan i di jolo ni si Latus. Di jolo ni si Latus dihatindanghon Jesus do, na laho manghatindanghon hasintongan do umbahen na tubu Ibana tu hasiangan on (Joh.18:37). Na gabe tiruan ma i dohot dorongan di si Timoteus di na mangulahon na pinarentahonna i. Hata ni patikna i: “Radoti patik i so marlindang, so hasurahan!” Patik dia i? Parjolo, i ma angka sipaingot naung dipajojor di jolo i; paduahon, sude parenta na dipasahat tu ibana songon parmahan ni huria Epesus; patoluhon, sude pangajaran manang doktrin ni Kristus Jesus. Ingkon pahombaron ni si Timoteus do sude ngoluna tusi. Torus manorus, sahat ro di haroro ni Kristus paduahalihon. Di mulana, porsea do si Paulus na tibu do Kristus i ro, tagan di ngoluna dope raphon donganna satingki (pat.1 Tes.4:15-17). Hombar tusi ma dipaingot si Timoteus dison asa mangaradoti patik i so hasurahan sahat tu hapapatar ni Kristus i. Alai di pudian ni ari, muba do pangantusionna taringot tusi, gabe diparade ma dirina laho mate (pat.2 Tim.4:6).

Ndang gaitgait haroro ni Kristus i. Alai taringot tu ari dohot sadiharina ndang adong na umbotosa. Agia Anak i, agia surusuruan, holan Ama i do (pat.Mat.24:36; Ul.1:7). Alai di hajujumpang ni tingkina, hombar tu na binuhul ni Ama i, sai na ro do Ibana paujunghon ulaon haluaonNa. Digoar do dison Ama i Namartua (Gr. makarios/blessed/berbahagia), mandok nampuna tua, bona jala mual ni haluaon. Di bagasan dohot marhite Jesus Kristus naung ro tu tano on nunga dipatulus i, jala sipaujungonNa ma i haroroNa na paduahon i. Laos digoar dope Ama i Pargogo (Gr. dunastees/potentate/penguasa), mandok parhuaso. Sasadasa do parhuaso, ai Ibana do na manompa dohot nampuna nasa na adong. Alai sian tahiNa dipasahat do huaso i tu Kristus i, jala i ma na naeng papataronNa di haroroNa na paduahalihon i. Hombar tusi ma didok dison: “Patar ma Ibana bahenon ni Namartua i, Pargogo sasadasa, Raja ni angka raja, Tuhan ni angka tuan.” Raja, mandok pamarenta, panggomgomi; tuan, lapatanna parhuaso (penguasa), nampuna (pemilik).

Di ay.16, dipaujung do tupukta on marhite sada panindangion na marrumang doxologi manang pamujion di Debata. Ndang na sidung dope nian sipaingotna na tu si Timoteus i, siudutanna dope i di ay.16-21. Alai somal do si Paulus mambahen na songon i; di tingki manaringoti sadasada parsoalan, molo adong arbis otik taringot tu habalgaon ni Debata, dipasohot do jolo panghataionna i jala digonti dohot pamujion di Debata, dung i pe asa ditorushon muse panghataionna i. Didok ibana: “Sasadasa do na so olo mate.” Na sian saleleng ni lelengna do Debata jala sahat tu saleleng ni lelengna, na so marmula jala na so marujung. Dung i: “Siingani hatiuron na so tartopot.” Marhabangsa do Debata di surgo, di hatiuron na so targombarhon. Mansai tiur; ala ni tiurna, ndang ringkot disi mata ni ari, bulan dohot angka bintang, jala ndang tartahan mata ni hajolmaon. Dung i muse: “Na so dung diida jolma Ibana, jala ndang tarbereng.” Ndang adong halak naung dung marnida Debata, ai tutu ndang tarbereng agia ise Ibana. Hea do dipangido si Musa marnida Ibana, alai di na dipabolushon Debata hamuliaonNa sian jolona, ndang anggo bohiNa, ndang manahan si Musa, pintor manungkap do ibana tu tano (2 Mus.33:18 duu; 34:6 duu). Dung pe di ari sogot i, habongotan jolma ma surgo i jala idaonna rupa ni Debata (1 Joh.3:2). Na so martudosan do Debata, andul sian ajiaajian ni angka bangso, angka na so tutu Debata (pat.Turpuk Sijahaon: Jer.10:6-10). Marningot hasongkalon dohot hamuliaon ni Debata, ndang adong be na tardok jolma so lobi sian na mamuji jala pasangaphon Ibana mandok: “Hasangapon dohot hagogoon ma di Ibana ro di salelenglelengna.” Amen.

Sipahusorhusoron

Invocavit do goar ni minggunta ari on. Minggu na parjolo ma on di hita di ariari parningotan di panaonon manang passion ni Tuhanta Jesus Kristus. Na marpambuatan do goar ni Minggu on sian hata ni Ps.91:15 na mandok: “Jouonna ma Ahu, jadi alusanHu ma ibana, sai dongananHu do ibana jumpa hagogotan, paluaonHu do ibana, jala marmulia ibana bahenonHu.” Padan ni Debata do i na marbagahon alus dohot pandonganionNa di angka halak na joujou tu Ibana di bagasan parungkilonna. Padan na hot do i na sai boi hirimon di angka na porsea, tarmasuk di hita angka na mangolu di tingki on dohot di inganan on. Alai songon dia ma hita manghirim disi?

Na parjolo, tahangoluhon ma parange ni halak ni Debata. Digoar si Paulus do si Timoteus dison halak ni Debata. Goar na balga do i na dibasabasahon parjolo tu si Musa, dung i tu panurirang songon si Samuel, dohot tu na sinuru ni Debata songon si Semaya. Di pudian ni ari dihonahon do i dohot tu sude na porsea. Goar na balga i ndang sae holan dijujung, alai ingkon na dipataridahon do di hangoluan dohot pangalaho ariari, i ma na pasidinghon giot ni roha tu hamoraon na ojak di roha na holongan di hepeng, alai sabalikna dipareahi halidangon manang kebajikan isara hatigoran, hadaulaton, haporseaon, holong ni roha, habengeton dohot lambok ni roha. Mansai ringkot ma i ingoton jala parungkilhononta, ai ndang masalpuhu molo nidok nunga hira sange jolma di tingki on digomgomi tondi materialisme dohot konsumerisme. Lam tu argana do hepeng, lam tu ringkotna. Di na deba tahe, sai hira i nama na umarga jala na rumingkot. Sadalan tusi, lam tu ringkotna do roha ni halak memiliki nasa na boi tuhoron marhite hepeng; belanja tu angka mal manang tu pusat-pusat perbelanjaan angka na so hurang menawarkan ragam ni situhoron na mangaliliani jala mambahen pia mata. Ndang sai ala adong ni hepengna, alai tung ala na so olo do hatadingan di parsiaduon tu hamoraon na so manahan i. Ndang holan di situan natorop, di angka parhalado ni huria pe jumpang do i. Di sada buku na binsar di taon 2008, didok sada halak do: “Sebagian orientasi kehidupan para pendeta HKBP sekarang ini umumnya hanyalah mengejar materi (materialistis) atau uang, seolah-olah uang ‘maha kuasa’ baginya.” Alai sabalikna, hombar tu pergeseran ni sistem nilai lam moru pangargaion ni jolma di angka na targoar halidangon manang kebajikan. Songon na nidok di Minggu na salpu, molo adong halak nuaeng on na mansai denggan parkarejoanna, alai ndang pintor mamora ala ni tigorna, unang be na asing, natorasna pe digoari nama i na loahon. Laos di buku na nidok ondeng, didok halak i dope: “Menurut pengamatan saya selama 30 tahun belakangan ini, ada sebagian pendeta HKBP yang telah merosot kadar pengabdiannya. Pada umumnya mereka tidak memiliki dedikasi, tidak ada idealisme, tidak memiliki integritas dan kasih sayang kepada anggota jemaat, terkecuali bagi mereka yang memberi hamauliateon.” Ndang sala na mamora, ndang dosa na mangalului hamoraon, alai ingkon na ulahononhon do i di bagasan halidangon ni halak ni Debata, i ma hatigoran, hadaulaton, haporseaon, haholongon, habengeton, dohot halambohon.

Na paduahon, tahaburjuhon ma paraloan haporseaon i. Marhaborhatan sian dunia olah raga, dipaingot si Paulus do si Timoteus dison asa manghaburjuhon paraloan haporseaon na denggan i. Nasa marsiadu di parsiaduon tano on, ingkon sadar do di hajongjonganna, jala hombar tusi ma ibana memperlakukan dirina. Diparade dirina, dipukpuhi, mandok dilatih; dipatunduk, lapatanna diorom nasa sioromonna. Dung i di parlojongon i, ingkon burju ibana mangeahi tu jolo. Ingkon parhatopotonna do huhut, mansai na arga do upa hamonangan i jala na patut paralohonon sian nasa gogo. Hombar tusi, ingkon puspusonna do tu pandang i asa dapotan ibana. Songon i, ingkon ingoton ni sude na porsea do paboa paraloan do ngolu on, parsiaduon. Nasa na dohot di parsiaduon i ingkon paradeonna do dirina; diorom nasa sioromon, jala dipeakhon nasa na tau pasorathon dohot dosa na girgir manghaliangi; dihalupahon na di pudina, dieahi na di jolo, dipupus dompak pandang i, dompak upa hamonangan ni angka na burju marroha. I pe mansai ringkot do ingoton jala parungkilhononta. Ndang masalpuhu ia nidok, di tingki na parpudi on nunga lam rangkak halak na sadar paboa atlit ni harajaon ni Debata do ibana na tongon marsiadu tu surgo, alai sabalikna lam tu toropna do idaon na sai hira marsiadu dompak pusat ni hamagoan i. Ndang ditadinghon dope nian hakristenon, alai panghirimon di hangoluan na saleleng ni lelengna i ndang apala godang be mangalehon motivasi dohot gogo di parlojongonna, jala manontuhon tujuan ni pardalananna. Atik boha tahe adong naung ganggu taringot tusi. Sai hira na mandok, molo tung adong do surgo i ba niula na marugamo on, alai molo tung pe so adong ndang pola dia i, ai so holan iba na songon i. Ndang tarbahen manang ise marspekulasi taringot tu ngoluna, ai diida Debata do i, diida Kristus, dohot surusuruan jala dihatindanghon jolma. Si Paulus mandok: “Tangkup ma hangoluan na saleleng na salelenglelengna, ai tusi do ho dijou.” Na marlapatan do i, pemilikan di hangoluan sogot i ingkon dipastihon do i di tingki on. Na so manangkup i di tano on ndang adong sihirimon ni i manjalo i di ari sogot. Ala ni i, tahaburjuhon ma paraloan haporseaon na denggan i.

Na patoluhon, marhahirimon ma hita di hapataran ni Kristus Jesus dohot Debata. Ndang gaitgait haroro ni Kristus i. Alai anggo ari dohot sadiharina, ndang adong na umbotosa. Agia surusuruan, agia Anak i, nda holan Ama i. Alai di hajujumpang ni tingkina, hombar tu na binuhul ni Ama i, sai na ro do Ibana di bagasan hasangapon laho paujunghon ulaon haluaon naung pinungkaNa i di tano on. Papataron ni Ama i ma Ibana disi Raja ni angka raja, jala Tuhan ni angka tuan. Boanon jala pabongotonNa ma na porsea i tu surgo laho pajumpang dohot Debata bohi tu bohi jala marsaor dohot Ibana saleleng ni lelengna. I pe mansai ringkot do ingoton jala parungkilhononta, sadia dao do panghirimon di haroro ni Tuhanta Jesus Kristus na paduahalihon i mangalehon gogo dohot mewarnai ngolunta? Unang so taboto: “Na songon panangko borngin do haroro ni ari ni Tuhan i. Ai molo didok halak, dame do jala mara so adong, disi ma tompu tahop tu nasida hamagoan i, songon pambebeon tu na gabegabean, jala ndang adong haporusannasida” (2 Tes.5:2-3). Ala ni i tagam ma hita. Tagam, alai huhut mangula. Didok sahalak sian reformator i: “Ingkon rajumanta do na marsogot do Kristus i ro, alai nang pe songon i ingkon suanonta dope nuaeng hau apel.”

Nasa na marparange songon halak ni Debata, na manghaburjuhon paraloan haporseaon na denggan i, jala na marhahirimon di hapataran ni Kristus dohot Debata, sai na gohan ni Debata do di ibana padan na binagabagahon ni goar ni Minggu on: “Invocavit: Jouonna ma Ahu jala alusanHu ma ibana, sai dongananHu do ibana jumpa hagogotan, paluaonHu do ibana, jala marmulia ibana bahenonHu.”

Read More..

Mabuk

MABUK

“Mata ni ari do an manang bulan?” ninna sada halak tu donganna na jumpangsa di tongan dalan. Na mabuk do ibana. Ganup borngin do ibana songon i. Simpul karejo, tung so hea do i pintor mulak tu jabu, alai sai jolo tuli do tu lapo tuak. Raphon angka donganna parminum, disi ma nasida minumminum, mangallangi, dohot marendei. Ndang diboto mandok sae, alai torus do sai hurang; aha pe na adong, jagal, dengke, korang, palia, manang joring, sude diallangi. Dung pe birnat jala manungkap borngin asa mulak.

“Ndang huboto bah,” ninna donganna i mangalusi, “ai halak baru do ahu di huta on. Holan on,” ninna muse, “molo mohop, mata ni ari do i; molo ndang mohop, bulan.” Donganna i pe, naung mabuk do hape. “Antong, mata ni ari do i, ai mohop do huhilala,” ninna ibana. “I do, mata ni ari do i; ai ahu pe, mohop do huhilala,” ninna donganna i muse mangalusi. Tongon do, mohop do dihilala nasida, alai panghorhon ni na niinum dohot na niallanganna i do i; nda tung ala ni sinondang ni bulan i. Dung i, didatdati be ma pardalananna, rabatrabat sahat tu jabuna.

Songon i do na mabuk, ndang tingkos pamerengan dohot panghataionna, pangalangka dohot pardalanna, panghilalaan dohot pangantusionna. Sasintongna nian, unang be na magodang, angka na metmet pe diboto be do parasingan ni arian sian borngin. Arian do mata ni ari marsinondang, borngin ia bulan. Gari rap tarida tahe na dua i arianna, (ai sipata masa do na songon i) tong do diboto paasinghon. Ala ni i sintong do songon nidok ni na mandok: “Molo masuk tuak, ruar do habisuhon.” Apostel Paulus pasingothon: “Unang ma mabuk hamu bahennon anggur, ai hamagoan do di bagasan ni i; alai gok Tondi ma hamu!” (Eps.5:15)

Alai ndang holan anggur manang tuak na mambahen mabuk, adong dope na asing, isara hamoraon, hamuliaon, hasangapon, dohot angka na asing na suman tusi. Manang dia pe alana, sarupa do anggo pangalahona, ndang diboto marpangalaho songon na patut. Ala ni i, sipasidingon do nasa parmabuhon.

Read More..

Estomihi

SERMON JAMITA TU MINGGU ESTOMIHI, 14 PEBRUARI 2010
1 Tim.3:1-7

Patujolo

Dung tarboan si Paulus tu Rom, paimahon angka alona sian Jerusalem, gabe tahanan rumah do ibana jolo. Mian di jabu na sineona sandiri do ibana jala bebas mamaritahon harajaon ni Debata (Ul.28:30-31). Mangihuthon uhum Rom, olat ni dua taon do boi masa na songon i. Molo laos so adong na ro manorushon pangaluan i, salpu dua taon, ingkon malua do na songon i demi hukum. Disura roha ni toropan halak, i do na masa tu si Paulus, malua do ibana muse. Dung malua, ditopot ma angka huria na pinungkana na jolo. Raphon si Timoteus, borhat nasida sian Rom. Dung i ditadinghon ma si Timoteus di Epesus (1 Tim.1:3) laho manghobasi huria i, lumobi maralohon angka parpoda haliluon. Ibana sandiri, ditorushon ma pardalananna manopot angka huria na di Makedonia jala sian i ma ditongoshon surat 1 Timoteus on. Sangkapna, mangurupi si Timoteus taringot tu ruhutruhut ni na manghobasi huria dohot na mangadopi parpoda haliluon. Hombar tusi, di turpuk on dipajojor do taringot tu ruhutruhut ni hasintuaon.

Hatorangan

Jalo dung jongjong huria ni Jesus Kristus di portibi on, pintor ihut do ulaon hasintuaon. Na parjolo tarjaha taringot tusi i ma di Ul.11:30 jala na paduahon di Ul.14:23. Ndang torang di na parjolo i boha do hasasahatnasida tu ulaon i, alai di na paduahon i tangkas do, na dipillit do nasida sian tonga ni ruas ni huria i. Adong dua hata na dipangke tu ulaon i. Na parjolo, presbuteros (elder/penatua), dung i episkopos (bishop/penilik). Di mulana, sada hian do na tinembak ni na dua i. Na parjolo i marhahonaan tu hajongjongan manang statusna, na paduahon i tu ulaon manang perananna. Di Ul.20:17 rupani, digoar do sude sintua ni huria Epesus presbuterous, alai di ay.28 episkopous. Jadi tangkasna, tohonanna sintua, ulaonna simatamatai. (Alai di pudian ni ari gabe dua hajongjongan na marasing nama i; presbuteros i ma sintua, ulaonna mamatamatai; episkopos i ma penilik, ulaonna manguluhon). Di turpuk on episkopees do dipangke, na mandok hasintuaon. Taringot tu sintua dohot hasintuaon i, rupa, adong do na mandok: “Ulaon na denggan do pinangido ni na mangalului hasintuaon.” Ra, reaksi ni huria do i tu kecenderungan ni halak na lam materialistis, na mandok ulaon na parohon hepeng do na denggan. Sintua ndang margaji. Tutu, di 1 Tim.5:17-18 diigil si Paulus do silompit hasangapon tu angka sintua na adong talentana marjamita dohot mangajari, i ma panghormation dohot pansamotan. Alai secara umum, ndang sijalo gaji angka sintua, gabe ra, dirajumi halak ma ulaon i na hurang arga. Dison, dialo si Paulus do i, didok: “Hata haposan do on,” lapatanna na patut jaloon do pingkiran na mandok: “Ulaon na denggan do pinangido ni na mangalului hasintuaon.” Na denggan do tutu, ai marhite i gabe dongan pangula jolma i di Debata (pat.1 Kor.3:9).

Di angka ayat na mangihut dipajojor do ruhutruhut ni na gabe sintua i, i ma: (1). Ndang adong sisurahan di ibana. Ndang na mandok na singkop (sempurna) di na saluhut, alai saotikotikna ndang gabe pargasipan ibana na boi mangonjarhon halak tu dosa manang tu poda haliluon, alai ingkon na boi do gabe tiruan ni ruas di panghataion, di parange, di holong ni roha, di haporseaon, dohot di hatomanon (pat.1 Tim.4:12). (2). Harajaan ni sada boruboru. Di tingki i, di hajahudion manang pe di hasipelebeguon torop do halak na mangulahon poligini (sahalak baoa na maripehon lobi sian sada parompuan di ombas na dos). Di bona ni hakristenon, angka na mangulahon na songon i tingki di hajahudion manang di hasipelebeguonna dope, dijangkon do tong tu huria i. Angka sisongon i ma na nidokna dison na so boi gabe sintua. (Di angka tingki na mangihut, dihonahon na deba do i tu angka naung hea mabalu na marbagas muse. Songon i tu angka na so marnioli dope. Alai ndang adong ojahan ni pangantusion na songon i di turpuk on). (3). Marpangontik (Gr.neephalion/vigilant). Mansai ragam do pangantusion ni hata i, isara na marpangontik/ hemat/sederhana/hidup seadanya (pat.1 Tim.3:11), boi mangorom diri manang mangalo hagiotna/dapat menahan diri (pat.salinan Alkitab) lumobi taringot tu anggur, marbisuk/ bijaksana/waspada/sangat hati-hati, berkepala dingin, toman/pantas, dohot na asing. Sandok ingkon na boi do ibana mangaramoti diri dohot pangalahona maradophon nasa rumang ni hadosaon. (4) Marroha, mandok torang rohana/waras/bijaksana (pat.salinan Alkitab), ndang dihuasoi parungkilon manang sitaononna. (5). Marhapantunon, mandok pantun/sopan manghatai dohot marpangalaho, memiliki sikap lahiriah yang anggun, ndang humarojor, ndang kasar jala ndang koras. (6). Na las roha martamue/suka memberi tumpangan. Pangalaho na diargai situtu do na songon i di tingki i, ai ndang haru ragat dope bisnis dohot fasilitas penginapan. Di halak Kristen, lumobi di sintua, ingkon lobi sian kebajikan umum do halalas ni roha martamue i, ai ingkon gabe bagian ni etikana do i songon halak kristen, parbue ni haporseaonna (pat.Rom 12:13; Heb.13:2). (7). Na malo mangajari, lapatanna boi manogunogu halak tu haporseaon dohot pangalaho. Tutu, ndang sai sude sintua na martalenta mangajari, deba do. Nang pe songon i ingkon adong do di ganup sintua parbinotoan na mendasar taringot tu haporseaon dohot pangalaho jala adong hatauonna mentransfer i tu na asing. (8). Unang sisobur tuak, mandok unang parminum manang parmabuk. Anggo na minum anggur boi do (pat.1 Tim.5:23), alai unang sahat tu na mabuk. Parmabuk ndang manghatai manang bersikap i sian dirina, sian onjar ni tuak anggur do manang siinumon na koras. Alai ndang holan na mabuk ala ni siinumon na koras, na mabuk ala ni angka na asing pe, angka na so tarjolma rupani, na manghatai, marendei, manang na bersikap so sian dirina, ndang tama i gabe sintua. (9). Unang pangalinsingi, mandok unang parmuruk (pat.salinan Alkitab) manang parbada, tidak suka cekcok/bertengkar. (10). Na lambok, mandok serep rohana, toruk, lemah lembut/rendah hati. (11). Pardame (Gr.amachon/not a brawler), mandok ndang lomo rohana marbada manang guntur (tak suka ribut) alai basar (pat.2 Tim.2:24). (12). Na so impolan di perak. Siimpolan di perak lapatanna, simata hepeng, sihaholongi hepeng, simongkus (rakus/tamak), materialistis. (11). Na malo mangarajai donganna sabagas, paranakhon sioloi ajar mardongan sandok hahormaton. Nang pe nidok nangkin na so adong alasan so manjalo na so marsaripe gabe sintua, na dumengganna nian naeng ma na marsaripe, ai naeng gabe tiruan do sintua i nang di parsaripeon. Keluarga do huria na parjolo sihobasan ni sintua i. Molo ture keluargana, mansai godang do panumpak ni i tu huria i. Hombar tusi ingkon malo ma ibana mangarajai pardihutana, malo huhut mangajari ianakhonna asa gabe sioloi ajar jala na hormat marnatuatua. Molo so ture keluargana, maol do hirimon na boi ibana patureturehon huria i. (12). Unang na imbaru masuk, lapatanna unang na imbaru taripar dope tu haporseaon kristen (baru bertobat). Isara ni suansuanan na baru tubu, ndang togu dope uratna dohot hauna, ndang tahan dope mangadopi habahaba. Songon i ma halak na imbaru masuk i mansai mura dope i tarmara. Sambalik, boi do mansai timbo semangatna; menggebu-gebu naeng manindangi so pola godang panimbangion; alai sambalik nari, boi mura tartuktuk marnida ruas angka na parjolo sian ibana na so dumenggan pangalahona, gabe ringgas ibana manguhumuhumi. Lumobi molo pintor dijangkon ibana gabe sintua, boi do gabe ginjang rohana gabe madabu tu bagasan uhum ni sibolis i. Dialo Debata do na ginjang marroha, gabe mura agoon ni sibolis i. (13). Denggan baritana di halak na di balian. Halak na di balian, i ma na so Kristen; Jahudi dohot sipelebegu. Ingkon dohot do angka i marhatutuhon denggan ni barita ni sintua i. Ummura ma i parhatutuon nasida dung diida sikap ni sintua i angka na hombar tu nilai-nilai sosial, budaya, ekonomi, dohot na asing na rap tiniopnasida. Rupani, boha do parsaoran ni sintua i tu donganna jolma, boha do ibana mamangke sinadonganna, boha do ibana mandalanhon usahona, dohot na asing. Molo sahalak na so parduli do sintua tu hombar jabuna manang holan na mangangkali di partigatigaonna, tung so dohonon ni angka na di balian do i sidenggan barita nang pe dibege na malo ibana mangajari di huria. Sandok unang ma adong dalan ni manang ise pe manginsahi sintua i. Molo songon i, sibolis i pe ndang tarbahensa be manambili ibana.

Siahusorhusoron

Estomihi do goar ni minggunta on. Na marharoroan do i sian hata ni Ps.31:3b na mandok: “Sai Ho ma gabe dolok batu partanobatoan di ahu.” Tangiang ni sahalak na porsea do i tu Debata. Siangkup ni pangidoan, laos panindangion do i. Porsea do ibana paboa haporusan do Jahowa i, parondingondingan, dohot parlinggoman. Marhaporusan tu Jahowa i, ndang tagamon tarila ibana. Ndang holan di parpsalmen on, alai tung di sandok hajolmaon do Jahowa i partanobatoan. Paboa sintong i, disuru do AnakNa na sasada i, Jesus Kristus tu portibi on, manaon jala mate bahen haluaon ni saluhut. Nasa na porsea jala maporus tu Ibana malua do i jala mangolu. Laho manorushon dohot managihon ulaon haluaonNa i, dipajongjong Kristus do huriaNa di portibi on, jala ihut tusi marhitehite Tondi Porbadia dipatindang do angka parhobas sisuruoNa tu ulaon i. Sada sian horong ni angka parhobas i, i ma sintua songon na martaringot di jamita on.

Na dipillit do sintua i (Ul.14:23) jala dipabangkit gabe simatamatai laho marmahani huria i (Ul.20:28). Ndang torang di hita boha do antusiasme ni halak uju i taringot tu na gabe sintua i; mura do na mamillit sintua manang songon sinuaeng on do, relatif maol, ndang binoto. Alai na torang, di tingki i pe nunga manggomgomi tondi ni materialisme tu jolma. Ulaon na parohon hepeng, i do na dirajumi denggan; sabalikna, na so parohon hepeng, ndang denggan. Hombar tusi, adong do pandapot umum na mandok, molo adong halak na so manjalo upa sian ulaon naung pinatupana, patut do i curigaan. Sintua umumna ndang margaji. Ala ni i, ra, gabe adong ma na mandok ulaon na hurang denggan do hasintuaon i. Alai si Paulus mandok dison: “Hata haposan do on: Ulaon na denggan do pinangido ni na mangalului hasintuaon.” Ulaon na denggan ma tutu, ai songon induk ni halak Israel na pinabangkit ni si Musa na uju i jala na jinangkon ni Debata laho manggomgomi dohot manguhumi bangso i marsasaribu, marsasaratus, marlimalimapulu dohot marsasampulu (pat.Turpuk Sijahaon 2 Mus.18:21), na gabe dongan pangula ni Debata do angka sintua laho mamatamatai dohot marmahani huria i. Hatontuan i marlaku do tu sude parhalado ni huria; manang na pandita i, guru huria, evangelis, bibelvrouw manang na diakones. Tutu, paasingasing do proses ni pamilliton dohot panjouon na tu nasida; angka na nidok parpudi i marhihitehite parsikolaan dohot surat haputusan ni uluan ni huria, na parjolo i ndang pola; pasingasing dohot dalan ni ngolunasida, ai na deba manjalo balanjo do sian huria, na deba ndang pola. Balanjo do, ndang gaji; ai aut gaji, etongan ma nian jam kerjana, lemburna, dohot na asing. Alai dongan pangula ni Debata do nasida saluhut. Ala ni i, mansai na denggan jala na arga do ulaon i, jala patut do i argahonon, pujihonon jala hamauliatehonon nasida ganup; patut argaan, pujihonon jala hamauliatehonnon ni sandok huria i.

Na badia do Debata, ndang olo saor tu angka na so badia. Ala na gabe dongan pangula ni Debata na badia i do pangula ni huria i, adong do ruhutruhut partondion manang syarat-syarat rohani ni halak angka na boi pilliton tu ulaon i. Ruhutruhut i parjolo sahali ndang luluan i di angka naung gabe parhalado, alai di angka na so parhalado do, di ruas ni huria haroroan ni angka parhobas i. Tutu, dung tarpillit nasida ingkon na partahanhononna do i, pahinsatonna gariada. Mansai ringkot ma i parrohahonon jala parungkilhonon ni sandok hurianta. Di angka tingki na parpudi on mansai godang do tihatiha tu angka pahalado ni huria. “Hurang badia,” ninna rupani, “hurang rohani, hurang porman; parisap, parminum, materialistis; ndang toman, ndang daulat, ndang malo marjamita, dohot na asing.” Ndang parsoadaon, adong do tutu na songon i. Alai ringkot do ingotonta, luhut halak anak ni jamanna do i, produk ni masyarakatna. Maol do hirimon tubu angka pemimpin na so korrup sian masyarakat naung korrup, partogi na manghagigihon sisip sian masyarakat na manghalomohon sisip. Sogo do nian roha ni masyarakat di partogi na hundul di lembaga-lembaga perwakilan na manjalo sisip, alai asa sahat halak tu hundulan na songon i ndang jarang i na mangalampeti jala dijalo masyarakat do i jala dihasonanghon. Nda sipalensem do sogo ni roha sisongon i? Sogo do ninna roha ni natorop di koruptor, alai molo adong anak ni halak na denggan inganan parkarejoanna alai ndang pintor mamora ala so olo mangulahon na putor, natorasna pe didok do i na loahon; alai molo adong na pintor boi mamora jong nang pe so sarombang parkarejoanna tu pandapotanna ala so alang rohana mangulahon na pulos, dipuji do i songon sahalak na marhasil. Molo songon i do nda tumagon ma na korupsi asa dipuji halak, dari pada sai dohononna na loahon? Suman tusi, nda ringkot parungkilhononta so nda tung parbue ni hurianta do angka pangula na hurang rohani i? Molo songon i do, ingkon sude do hita muba gabe na rohani, dung i tartubuhon hita ma angka parhalado na na so sisurahan, na marpangontik, na marroha, na pantun, na las roha martamue, na umboto mangarajai diri, na so pangalinsingi, na lambok, pardame, na so impolan di perak, na umboto mangarajai donganna sabagas, paranakhon sioloi ajar, dohot sidenggan barita.

jkt.26.01.2010/mvs

Read More..

Sexagesima

SERMON JAMITA TU MINGGU SEXAGESIMA, 7 PEBRUARI 2010
Mrk.10:35-45

Patujolo

Andorang so on, nunga tolu hali dipaboa Jesus sitaononNa (8:31; 9:31; 10:33-34) jala di ombas on tongon mardalan ma Ibana raphon siseanNa i tusi. Alai ndang diantusi sisean i non i, ai ndang olo nasida mangantusi. Suman tu halak Jahudi satingkina, sai manghirim do nasida di hapapatar ni tingki na imbaru, i ma Harajaon Jahudi Messianis na bercorak theokratis na mangungkap pintu di nasida (halak Israel umumna) laho manggohi ambisi-ambisi politik dohot kekuasaan. Panghirimon i do na melatarbelakangi pangidoan ni angka anak ni si Sebedeus dohot sogo ni sisean angka na asing i tu nasida.

Hatorangan

Di Mat.19:25 na jumolo sian turpuk on, diparbaga Jesus do tu siseanNa i, di haimbaruon sogot i rap marhabangsa do nasida laho manguhumi halak Israel na sampuludua marga i. Songon na nidok ondeng (ida Patujolo), dibayanghon sisean i do i songon hasangapon portibi. Masihol di hasurungan, ro ma si Jakobus dohot si Johannes mangido inganan na sumangap disi. Mangihuthon si Mateus, inanasida si Salome do na pasahathon pangidoan i (Mat.20:20). Ra, na marpariban do si Salome tu si Maria (pat.Mrk.15;40; Mat.27:55-56; Joh.19:25). Di portibi on somal do angka raja pabangkithon sisolhotna tu hundulan angka na sumangap di harajaonna. Di roha ni si Salome dohot anakna i, patut Jesus mambahen songon i tu nasida, ai dungkon ni si Maria, nasida nama sian sisolhot ni Jesus na parjolo porsea jala mangihuthon Ibana. Na sai laon pe, tardok naung dipasurung Jesus do nasida, ai raphon si Petrus nasida do na tarrajum tu lingkaran dalam (the inner circle choosen three) ni sisean i. Sudena i, secara kumulatif mangonjar nasida pasahathon pangidoanna i tu Jesus.

Alai di pamerengan ni Jesus na mangido na so binotona do nasida disi. Dihirim nasida do na boi sahat Jesus tu hasangaponNa so marhite sitaonon. Nasida pe songon i, na boi sahat do tu hasangapon i marhite dalan na mura. Alai didok Jesus tu nasida: “Tung tarinum hamu ma siinumonHi?” Siinumon (Gr. poterion/cawan/piala), mandok bagian, turpuk, manang hatontuan ni Debata tu sasahalak. (Ndang nasib, takdir, sibaran, manang pangidoan ni tondi na kaku). Na marharoroan do i sian adat ni Israel. Di angka upacara keluarga adong do pembagian anggur. Kepala keluarga do na mangisi jala managihon panginuman tu pangisi ni jabuna. Taringot tusi marhuaso do ibana managihon saguru tu rohana, tu na sada on rupani godang, tu na sada an otik. Songon i, hombar tu huaso dohot kebebasanNa ditontuhon Debata do bagian ni ganup jolma. Di Jesus i, ditontuhon do na paet. Gok sitaonon do ngoluNa sian Betlehem sahat tu Golgota. Ndang dilehon tano on inganan di Ibana lobi sian hau pinarsilang di Golgota. Dijalo Ibana do i sude, diinum do na paet i sian sandok roha na ra (Mrk.14:36 par).

Didok muse: “Tung tarparidi hamu ma paridion siparidionHi?” Paridion (Gr. baptisma/ baptisan), mandok hamatean (pat.Rm.6:3 duu). Taringot tusi nunga dibayangkon hian i di pandidionNa i. Di tingki i didok Debata do: “Ho do Anak haholongan ni rohangKu; lomo do rohangKu di Ho” (Mrk.1:11). Di soara i marsaringar do hata ni Jes.42:1 (sada sian ende ni naposo ni Debata na marsitaonon). Marhite i diondolhon do paboa pandidionNa i na martudutudu tu hamateanNa do i. Tardidi pe Ibana nda tung ala na ringkot i di Ibana, alai na laho pajongjonghon hatigoran ni Debata do. Na jongjong do hatigoran i marhite sitaonon dohot hamamateNa. HamonanghononNa ma jolma i tu diriNa dohot tu Debata, AmaNa i; dung i, marsangap ma Ibana di bagasan hasangapon ni Debata dohot di tonga ni angka naung tigor i. Songon i do sandok na porsea, marsangap do i di bagasan dohot marhite parsidohotonna di sitaonon dohot hamatean ni Kristus i.

Alusnasida: “Tarbahen hami do.” Sarupa tu pangidoannasida, alusnasida on pe tong do na so sian pangantusion. Sihol ni roha di sangap i dope na mangonjar nasida menyanggupi i. Nang pe songon i ditohoi Jesus do i. Toho do, ingkon marsitaonon do nasida muse ala ni Jesus. Si Jakobus do martir na parjolo sian na sampuludua i (Ul.12:1-2). Si Johannes pe tarbuang do tu pulo Patmos (Pgk.1:9), jala mangihuthon tradisi Papias mate tarbunu do ibana di ari hatutuana. Songon i pe i ndang dioloi Jesus pangidoannasida i. Hundulan di harajaon ni Debata ndang taromo agia ise. Pambahenan dohot sitaonon ro di hamatean ndang boi mangomo surgo. Asi ni roha ni Debata sambing do i na disagihon tu angka na porsea. Didok tu nasida: “Alai na mambahen hundul tu siamun dohot tu hambirangHu, ndang guru di Ahu i.” Dison manghatai do Jesus i sian segi hajolmaonNa. Uju Ibana di bagasan daging, adong do huaso na so dipasahat tu Ibana jala diundukhon do i.

Gabe sogo do roha ni sisean i di si Jakobus dohot si Johannes ala ni pangidoannasida i. Ndang ala naung tumandaan nasida di hadirion dohot di hamessiason ni Jesus i, ndang. Rap na so mananda do nasida, rap na gulut di hasurungan (pat.9:34). Na mabiar do nasida tahe so tung naung dioloi Jesus pangidoanna i gabe sumangap na dua i sian nasida. Asa elat ni roha dohot ketidakmampuan marnida hasurungan ni dongan do motif ni sogo ni rohanasida i. Borhat sian i diajari Jesus ma nasida taringot tu parasingan ni harajaon portibi dohot harajaon ni Debata. Di portibi on huaso manang hatauon mangarajai jala patunduk halak do suhatsuhat ni hasangapon. Demi huaso, barani do halak mangulahon gogo dohot mangasahon gostong ni botohon. (Pat. Alkitab: “Pemerintah bangsa-bangsa memerintah rakyatnya dengan tangan besi, dan pembesar-pembesarnya menjalankan kuasanya dengan keras atas mereka”). Di harajaon ni Debata holong do ojahanna jala haoloon manghobasi do suhatsuhatna. Taringot tusi, Jesus sandiri do tiruanna. Ro Ibana tu portibi on ndang asa dioloi halak, Ibana do tahe mangoloi jala mangalehon hosaNa bahen tobus ni torop halak. Ala ni i do dipatimbo Debata Ibana jala dibasabasahon tu Ibana goar na sumurung asa nasa goar (Plp.5:5 duu). Songon i ma sisean i, manang ise na naeng balga, ingkon i ma na gabe pangoloi di donganna.

Sipahusorhusoron

Sangap manang hasangapon, mansai na ringkot do i di hajolmaon. Di habatahon rupani, siangkup ni hagabeon dohot hamoraon, hasangapon do sintasinta na tumimbo. Di angka pesta adat dihatahon do i di hata pasupasuan jala diolophon situan natorop do i, didok: “I ma tutu.” Dua do pangalaho na manghorhon hasangapon i. Na parjolo, kondisi diri isara bisuk, pistar, manang gogo dohot lan na asing; jala na paduahon, kondisi luar isara torop pendukungna, mamora, adong kesempatanna dohot angka na asing. Jonok do hasangapon i tu huaso, i ma hatauon dohot kesempatan ni sasahalak manang sapunguan jolma laho mempengaruhi dohot menyadarkan halak tu hagiotna sandiri sahat ro di na mamaksahon tu angka na so mangoloi sian rohana na ra. Hombar tusi dilapathon Jesus do hasangapon tano on tu hatauon mangarajai jala patundukhon dongan. Di angka na porsea pe ringkot jala arga do hasangapon i. Alai andul marasing do i sian hasangapon tano on. Antong aha jala boha do hasangapon ni siihuthon Kristus i?

Na parjolo, hasangapon ni siihuthon Kristus i ma hatauon manaon ala ni goarNa. Apostel Paulus mandok: “Ingkon bolusonta do lan haporsuhon laho bongot tu harajaon ni Debata” (Ul.14:22), jala di na asing muse: “Molo tung donganNa hita di sitaonon, gabe donganNa hita sogot nang di hasangapon” (Rom 8:17). Di hasatiaonta mangihuthon Jesus sai na ro do sitaonon. Na boi masa do i sian sisolhot, sian dongan saulaon, sian dongan sabangso, sian parhuaso manang sian negara. Sian huria pe tahe, na boi masa do i. Molo masa i unang hita tarsonggot, unang mandele manang manarita. Benget ma hita jala manahan. Tuhanta do patau hita asa marhamonangan jala marhasangapon. Alai nang pe songon i, ndang na mandok na niomo ni sitaononta do hasangapon i, ndang. Asi ni roha ni Debata i. Ibana do na patauhon hita disi, jala ingkon tu Ibana do pujipujian. Ndang ringkot tiruon pangalaho ni halak na cenderung mangalului sitaonon. Na jolo, sai adong do halak na mangarajumi na sumurung do na mate martir sian na mate wajar. Gabe marusaho ma na deba mangalului hamartiron. Di huria na parjolo i dijunjung tinggi do askese manang na pasiaksiakhon diri, jala di ombas on pe, lumobi di tingki passion adong do na pasilanghon dirina secara fisik. Ndang siluluan sitaonon. “Molo Debata manghuntam baba ni singa i, unang tatariktarik be ihurna,” ninna Karl Barth. Alai molo songon i roha ni Debata, ingkon ro sitaonon i, ba unang sinolsolan. Ninna roha, dison do parungkilonta. Ala ni hagaleonta sai naeng do hita maniding sian sitaonon. Tahasiholi do angka dalan na mura jala na jempek. Unang nian marungkil, unang moru nian hasonangan, alai tong sahat hita tu surgo. Tuhanta Jesus manontuhon, ingkon inumonta do siinumonNa i jala paridionta siparidionNa i, ai i do hakiki ni hasangapon ni sisean na sintong.

Na paduahon, hasangapon ni siihuthon Kristus i ma hatauon mangoloi jala manghobasi dongan. Na ro do Kristus tu portibi on ndada asa dioloi halak, Ibana do balik pangoloi jala mangalehon hosaNa bahen tobus ni torop halak. Ala ni i dipatimbo Debata do Ibana jala dibasabasahon tu Ibana goar na sumurung asa nasa goar. Songon i ma hita, ia naeng hita sangap ingkon na olo do hita manghobashon haluaon ni hajolmaon. Molo tataringoti haluaon, na marhahonaan do i tu hajolmaon na utuh (totus homo). Sihobasanta do i di ruhut partondion marhite na manjamitahon Barita na Uli i, na mangapoi angka na marsak, na manosoi jala manogihon angka pardosa mulak sian hajahatonna (molo ringkot marhite na patupa paminsangon dohot uhum), na manarihon dana dohot sarana panghobasion, dohot na asing. Sihobasanta do i di ruhut pardagingon, isara ni na manarihon sipanganon, parabiton, perumahan, lapangan kerja dohot angka na asing asa anggiat malua jolma sian pardangolan di bagasan hapogoson; di bidang pendidikan marhite pangajarion, pelatihan, pembinaan, dohot angka na asing anggiat malua jolma sian keterbelakangan; di bidang hahipason marhite pangubation dohot penyuluhan asa malua jolma sian pardangolan di bagasan sahit. Ragam dope tahe ruhut ni parngoluon na mangharingkothon panghobasion ni na porsea. Panghobasion i do hakiki ni hasangapon ni sisean na sintong. Ala ni i, unang ma tahasiholi asa gumodang hita dioloi jala dihobasi halak, alai naeng ma gumodang hita mangoloi jala manghobasi haluaon ni angka dongan di ragamragaman ni ruhutruhut ni parngoluon i. Tapatangkas ma rohanta, aha do naung tabahen mangoloi jala manghobasi dongan?

jkt.20.01.2010/mvs

Read More..