1 Triniatis

SERMON JAMITA TU MINGGU 1 DUNG TRINITATIS, 6 JUNI 2010
5 Mus.6:10-15

Patujolo

Mangihuthon torop penafsir, buku 5 Musa on penulisan kembali ni patik ni si Musa do. Dung sahat jala mian bangso Israel di tano Kanaan, mimbar do parngoluonnasida sian na madoado jala peramu hasil gabe partani na menetap; mimbar dohot pengorganisasian ni masyarakatna sian na bersahaja tu na lebih kompleks. Sahat tu masa penaklukan ni tano i, sisada hasadaon do bangso i di toru ni panggomgomion ni si Josua. Alai dung dibagi tano i marmargamarga jala dung monding si Josua ndang adong be tokoh na pasadahon nasida. Marsada pe nasida, holan ala ni hasadaon ni parsombaon tu Jahowa nama. Molo sumurut parsombaon tu Jahowa i, sega ma dohot hasadaon sosial dohot politis nasional ni bangso i, alai lam menonjol ma anggo dominasi ni marga. Sipata masiboan lehengna do ganup marga, ndang parduli na sada tu na sada nari songon na jotjot masa di tingki ni angka panguhum. Alai lam leleng dihilala nasida ma ringkot ni hasadaon di bidang sosial dohot politik nasional. Mamungka ma i sian tingki ni si Samuel jala lam tu tangkasna dung hajojongjong ni harajaon Israel. Luhutna i na marhinorhon situtu do tu haporseaon ni bangso i, ai gabe tarunjun jala tarela ma nasida paihutihut utiutian hasipelebeguon na mardomu tu partanion dohot pamarentaon ni penduduk asli ni tano i. Mansai ungkap do nasida tusi ai ndang sai adong hatontuan di patik i na pintor boi honahonon tu parsoalan na imbaru na niadopannasida. Taringot tu raja dohot harajaon ma rupani, ndang diatur dope i di patik ni si Musa. I ma na mamaksa nasida menafsirkan dohot menuliskan ulang patik ni si Musa i. Ndang ulaon sisatongkin i, mansai leleng do, berabad-abad. Hasil akhirna, i ma buku 5 Musa. Di Alkitab, digoar do i Ulangan, na marharoroan sian hata Gorik deutronomion, istilah na pinangke ni Septuaginta [(LXX), i ma salinan ni Padan na Robi di hata Gorik] laho manggoari buku i, lapatanna patik na pinaduahali manang na niulahan. (Di salinan Batak: Pangarataion di Patik). Disurathon do i marrumang jamita ni si Musa na dipasahat di halongonan, di ipar ni batangaek Jordan. Digombarhon disi, naeng bongot ma bangso i tu Kanaan. Ia dung sahat tusi, naeng marsihohot do nasida di haporseaon dohot parsombaon tu Jahowa. Asa jumpang i, dipaingot si Musa ma nasida di jamitana i.

Hatorangan

Sahali nari, buku 5 Musa i disurathon do marrumanghon jamita ni si Musa na paingothon bangso i tagan so dibongoti nasida dope tano na pinarbagabaga i. Marhira 500 taon tagan so i, nunga diuarihon Debata tu si Abraham paboa na basabasahononNa do tano Kanaan i tu pinomparna. Diulahi jala diparatarata do i muse tu si Isak dohot tu si Jakob. Ia tano Kanaan i, ndada na kosong i, naung marpangisi do, ai naung maringan hian do disi halak Kanaani, Heti, Amori, Hevi, Jebusi (2 Mus.13:5), Keni, Kenisi, Kadmoni, Repaim, (1 Mus.15:19-20), Perisi dohot Girgasi (Jos.3:10 par.) Songon bangso angka na marbudaya, nunga dikembangkan nasida disi sistem teknologi dohot peralatan hidup isara jabu, huta dohot sumur; sistem mata pencaharian hidup isara partanion, porlak anggur dohot hau jetun. Tano na mardolok do luat i jala na marrura, na manghangoluhon aek udan (pat.5 Mus.11:11). Molo so ro udan, rahar do suansuanan gabe masa haleon. Hira so adong do sunge bahen irigasi. Adong pe Jordan, dao do di toru, ndang tarpanaek aekna. Ala ni i, dibudidayahon nasida ma suansuanan na irit air, isara anggur, hau jetun, hau ara dohot na asing, jala bahen aek inumon di jolma dohot di pinahan, dihali nasida ma angka sumur. Nuaeng, songon i ma digombarhon di buku Deutronomium on, jumpang ma ma tingkina pasauton ni Debata ma uariNa i, togihonon jala pabongotonNa ma halak Israel tusi asa soluhonna. Inganan nasida ma angka huta na so pinungkana, songon i jabu na gok angka na denggan na so niisianna, inumon nasida aek sian sumur na so hinalina, teanon nasida angka porlak anggur dohot hau jetun na so sinuanna, jala mangan nasida pola bosuran.

Sian i torang, ndada ampuna ni bangso i hian tano i manang teanteanan sian ompunasida. Saleleng di ngoluna, panginsua do si Abraham disi; laos songon i do nang si Isak dohot si Jakob. Ndang penduduk asli bangso i disi, pendatang do. Debata do na marbasahon tano i tu nasida marpardomuan tu parpadananNa na tu si Abraham dohot na tu nasida di Sinai. Ingkon mansai tangkas ma i ingoton ni bangso i asa unang madabu nasida tu haginjangon ni roha, i ma na mangarajumi na ampunanasida do tano i. Debata do nampuna tano i, palumeanNa do i tu nasida. Parnampunaonnasida di tano i ndang bolas i sirangon sian parpadanan ni Debata na tu nasida. Saleleng marsihohot nasida di parpadanan i, hot ma parnampuanonnasida di tano i; alai molo dilaosi nasida do parpadanan i, ndang adong alasannasida mandok na tanonasida do i manang parjambaranna. Laos Debata do na marmuduhon nasida disi. Molo diparo udan (pat.5 Mus.11:12), denggan ma suansuanan; sonang nasida jala bosuran. Alai molo so diparo udan, haleonon ma nasida jala rapar. Sisada ihot do tahe na dua i, tano dohot aek (udan). Molo so ro udan jala masa haleon, ndang jarang na gabe bungkas sasahalak (pat.Rut 1:1) manang sapunguan Israel tu luat na asing, gabe so adong lapatan ni pemilikannasida di tano i. Nda haleon sisongon i bonsirna umbahen na bungkas si Jakob sakeluarga tu Misir (pat.1 Mus.45:6, 9), jala gabe hatoban pinomparna disi opat ratus tolu pulu taon? (pat.1 Mus.15:13; Gal.3:17). Hombar tusi ma dipaingothon dison: “Sai marjaga ma ho di dirim, asa unang dihalupahon roham Jahowa, naung manogihon ho ruar sian tano Misir, sian bagas parhatobananmu.” Hatoban do bangso Israel uju i di Misir, bangso na so memiliki harga diri dohot hak atas tanah. Alai diparuar Debata do nasida sian i marhitehite tangan na gogo; ditogihon nasida tu Kanaan, jala dibasabasahon tu nasida tano i bahen parjambarannasida. Gabe bangso na bebas nasida, na memiliki harga diri, na mangan jala bosuran sian tanona sandiri. Di pangalaho na songon i, na boi lupa do halak di Debata (pat.Poda 30:8b-9a). Ala ni i dipasingothon ma, ingkon jagahonon ni Israel do dirina asa tongtong marningot disi.

Ihut tusi, di ay.13 dipasingothon dope tolu parenta, i ma: Parjolo, manghabiari Jahowa, mandok manghaporseai jala manghaposi Jahowa. Sasadasa do Debata (ida ay.4), na asing ndang adong. Ibana do sitompa nasa na adong, na pangoluhon jala na marmudumuduhon; panguhum na mangalehon patik dohot uhum ni parngoluon. Paduahon, mangoloi Jahowa, lapatanna maribadah jala marsomba tu Jahowa; pasadahon sude potensi laho pasauthon lomo ni rohaNa. Sasadasa do sisombaon, hataNa do sitangihonon, patikNa sioloan jala sihangoluhononhon di bagasan holong na sian nasa roha, sian nasa ateate dohot sian nasa gogo (ida ay.5). Ndang holan di tingki dohot di inganan parsombaon, alai ingkon di sude rumang ni parngoluon do, partondion dohot pardagingon. Patoluhon, maruari tu goar ni Jahowa. Maruari, lapatanna mamangke manang mandok goar ni apala na hinaholongan, na hinabiaran, manang na hinaporseaan laho mangondolhon hasisintong ni hata manang panindangion. Jahowa do instansi rohani-ilahi satu-satunya na hinaholongan ni Israel, na hinabiaran jala na hinaporseaannasida. Na maruari tu goar ni Jahowa, sasintongna bagian ni panindangion haporseaon do i. Molo maruari bangso i di parsaoran, di partigatigaon manang di paruhuman dohot lan na asing, na marlapatan do i na dihatindanghon nasida haporseaonna di Debata selaku instansi rohani-illahi satu-satunya di parngoluonna ariari. Di ay.14 dipaihut do sada oraora na mandok: “Ndang jadi ihuthononmuna angka debata sileban, sian debata ni bangso angka na humaliang hamu.” Uju na disoluk Israel tano i, ndang sude pangisina dilengsehon, holan angka na mangalo do. Ala ni i, di torop inganan rap mangolu do nasida dohot penduduk asli ni tano i. Na gabe mara do i tu bangso i, ai tarunjun ma nasida jotjot maniru utiutian ni bangso sileban i. (Taringot tusi, pamanat ma hatorangan di Sermon Jamita tu Minggu Reminiscere, 28 Pebruari 2010 dohot Sermon Jamita tu Minggu Exaudia, 16 Mei 2010 di blog on).

Ndang boi neang roha ni bangso i taringot tu oraora i, ai Debata parrimas do Jahowa i. Parrimas (Hb. qanaa/jealous/cemburu) mandok rara (merah padam) bohina mamompomi panghilalaan dohot murukna. Sada ama rupani, ndang tagamon so mangiburu jala muruk molo diroharohai manang dilangkup baoa na asing tungganeboruna na hinaholonganna (pat.Poda 6:34-35). Pardomuan ni Debata dohot Israel jotjot do dipatudos tu pardomuan ni ama tu tuanboruna; Debata songon tuandoli, Israel songon tuanboru. Ndang tagamon so tarrimas jala manguhum Debata molo gabe dilangkuphon bangso i dirina tu debata sileban marhite na gabe marsomba nasida tusi. Ndang maralangalang Ibana taringot tusi, na boi gabe siaphononNa do nasida sian sisik ni tano on.

Rancangan Homiletis

Na manjaga diri mansai na arga do i di na mangolu. Mansai na arga, ai gok parmaraan do ngolu on. Dilehon Debata Panompa i do hatauon tu na mangolu, lumobi tu jolma laho manjaga diri. Dilehon do rupani pingkiran dohot roha na patauhon jolma i manimbangi dohot mambuat haputusan taringot tu na na patut sipatupaon dohot taringot tu na ingkon sipasidingon asa unang tarmara jala mago, alai asa horas jala malua. Ndang holan di ngolu pardagingon, di ngolu partondion pe mansai ringkot do na manjaga diri i. Apala i do na pinasingothon ni turpuk jamita ari on tu hita di na nidokna di ay.12: “Si marjaga ma ho di dirim!” Taringot tu dia ma hita ingkon manjaga diri? Tapamanat ma i marojahan di turpuk jamita di hita ari on.

Na parjolo, manjaga diri asa tongtong ingot paboa Jahowa do Sipalua hita. Ala ni haleon potir bungkas do si Jakob dohot keluarga besarna tu Misir, jala gabe hatoban pinomparna disi leleng ni opat ratus tolu pulu taon. Mansai dangol do panghilalaannasida disi. Ndang adong harga dirina, ai so marhak nasida di tano. Dung i di pudi, dipaporsukporsuk halak Misir do nasida. Alai sian asi ni rohaNa, dipalua Jahowa do nasida; diparuar nasida sian i, ditogihon jala dipabongot tu tano Kanaan. Tano naung marpangisi do i. Dao andorang so sahat halak Israel tusi, nunga maringan disi halak Kanaan. Songon bangso na marbudaya, nunga dikembangkan halak Kanaan i disi sistem teknologi dohot peralatan hidup, isara perumahan, perkampungan, perkotaan, budidaya air dohot sistem mata pencaharian hidup isara partanion na hombar tu situasi dohot kondisi ni luat i, isara budidaya anggur dohot hau jetun na hemat air. Asa di na sahat halak Israel tusi, ndang ingkon mamungka sian nol be nasida. Na ripe mangingani nama nasida tahe di jabu dohot di huta angka na bolon na so pinungkana, na ripe minum sian sumur na so hinalina, jala na ripe manggotil parbue sian porlak anggur dohot hau jetun na so sinuanna, gabe mangan nasida jala bosuran. Di pangalaho na songon i talpe do nasida tu pangunjunan, i na na gabe lupa nasida tu Jahowa. Nda i na pinasingthon ni parpoda i molo didok: “Hapogoson manang hamoraon unang lehon tu ahu; sai loas ma panganonhu bohal tinurpukhonMi tu ahu, asa unang tung huporso Ho, dung butong ahu, gabe dohononhu maon: Ise do Jahowa?” Ala ni i ma asa dipaingot nasida, didok: “Sai marjaga ma ho di dirim, asa unang dihalupahon roham Jahowa, naung manogihon ho ruar sian tano Misir, sian bagas parhatobananmu.” Na marlapatan ma i, ingkon ingoton jala parhatopoton nasida do tongtong na Jahowa do na paluahon nasida jala na marbasahon tano Kanaan i tu nasida.

Laos songon i do hita, ingkon jagaonta do dirinta asa ingot tongtong paboa Jahowa do Sipalua hita. Nunga dipalua Ibana hita marhite na pinabinsarNa i Barita na UliNa i di tongatonganta. Dipalua do hita sian hamagoan partondionta, dipataripar tu hangoluan, gabe sahat hita tu hajongjonganta nuaeng, i ma ruas ni huriaNa na domu jala na saor tu Ibana, angka na gabe panean di harajaonNa. Dipalua do hita nang sian hamagoan ni pardagingonta, sian ketertutupan dohot keterbelakangan ni bagsonta, dipasahat hita tu hapistaran dohot tu hamajuon angka na mangihut tu Barita na Uli i. Laos di bagasan sondang ni haluaonta na marhite Barita na Uli i do hita manjalo dohot mangantusi haluaonta na di bagasan dohot na marhite kemerdekaan ni bangsonta, Negara Republik Indonesia na tahaholongi on. So mansoadahon perjuangan dohot pengorbanan ni angka pahlawan, tahaporseai do paboa pasupasu ni Debata do kemerdekaanta i. Mansai godang do basabasa ni Debata na sahat tu hita di bagasan dohot marhite kemerdekaanta i. Jumpangan hita di harga dirinta, gabe tuan di negeri sendiri; lam pistar hita, lam maju, lam mangeahi tu tujuan ni kemerdekaan i, i ma masyarakat na adil jala na makmur. Di pangalaho na songon i ingkon ingotonta do tongtong na Debata na marbasahon saluhutna i tu hita. Na ‘marningot’ ndada na mandok holan na menghadirkan di ambang sadar (recalling of information), alai lobi sian i na marlapatan do i manjalo dohot mangulahon kemerdekaan i hombar tu lomo ni roha ni Debata Sipalua i. Na manghalupahon Jahowa jala na mangago dirina do manang ise pe na manjalo jala mamangke kemerdekaan i hombar tu lomolomona, na mangarajumi i songon kesempatan merampok arta ni negara, manang kebebasan menguras sumber daya alam so parduli di angka na sega dohot na gabe korban bencana ala ni ulloullona i.

Na paduahon, manjaga diri asa marsihohot manghabiari Jahowa. Paboa na sintong halak Israel ingot di Jahowa Sipalua nasida, ingkon marsihohot do nasida manghabiari Ibana. Na manghabiari Jahowa, mandok manghaporseai jala manghaposi Ibana; maribadah tu Ibana, pahimpuhon sude potensi laho pasauthon hataNa, patik dohot lomo ni rohaNa; manghaholongi Ibana sian nasa roha, sian nasa ateate dohot sian nasa gogo. Konsekuensi logis ni i, tung na so jadi do bangso i marsomba tu debata ni bangso sileban angka na humaliang nasida. Molo sampe masa na songon i, ndang alang roha ni Debata maniaphon nasida sian sisik ni hasiangan on, ai Debata parrimas do Ibana jala parlulu.

Laos songon i ma hita, songon angka naung pinalua jala pinasupasu ni Debata, ingkon porsea jala marpos ni hita tu Debata, mangoloi jala maribadah tu Ibana di bagasan tondi dohot habadiaon na tama. Na maribadah tu Debata ndang sae i ulahonon holan di tingki dohot inganan na tontu, isara partangiangan manang parmingguon, alai ingkon dohot do di parngoluon ariari. Ingkon disalpui jala ditorusi ibadah manang kebaktian i do na opat dorpi ni inganan parsombaon i, dung i mabaor tu hangoluan siapari laho manorangi dohot manirai, mamornohi dohot palambokhon. Dohot pandohan na asing, ende na niendehon, tangiang na tinangianghon, hata ni Debata na tinangihon jala na niamenhon ruas ni huria di tingki dohot di inganan parmingguon, ingkon boanonna be do i tu hangoluanna ariari asa amenhononna disi, ulahononna jala hangoluhononna. Tasorminhon ma i nuaeng tu ngolunta. Umumna, ndang tardok na losok dope hurianta marmingu; rata-rata torop dope na ro tu parpunguan. Di angka pesta, asing ni Hananaek ndang hasiatan angka gareja. Siangkup ni na mandohoti na di hurianta, torop dope na ‘jajan’ tu na asing. Alai patut do sungkunhonon, boha do panghorhon ni punguan angka na nidohotanna i tu hangoluanna ariari? Ise do na nioloanna di angka sangkap dohot di ulaonna? Lomo ni roha ni ise do na sinungkun dohot na pinatulusna di kantor, di partigatigaan manang di perusahaanna? Dalam konteks kehidupan bangsa, bangga do hita songon bangso na religius, negara na berpancasila di mana Ketuhanan Yang Mahaesa merupakan silanya yang pertama; arga do di hita hari-hari raya keagamaan, ndang holan institusi keagamaan, institusi sosial dohot negara dipatupa be do perayaan ni i, jala angka rapot dohot upacara sai dipungka dohot formula keagamaan, alai tung apala di bangsonta on do na gumodang koruptor, markus, mafia, pengemplang pajak, dohot na asing. Ndang tarsoadahon agia ise, adong do disi halak Kristen. Antong, ise do na tahaporseai jala na tahaposi, na tahabiari jala na taoloi? Debata do manang Mammon?

jkt.09.05.2010/mvs

Read More..

Trinitatis

SERMON JAMITA TU MINGGU TRINITATIS, 30 MEI 2010
Luk.12:1-12

Patujolo

Di Bibel Batak, sisada hasadaon do turpuk on dohot angka ayat na mangihut, na marjudul Sijagaon do Pangansion, Hatahuton dohot Haholiton (12:1-22), alai di Alkitab jongjong sandiri do turpuk on i ma na taringot tu Pengajaran Khusus bagi Murid-murid. Deba sian angka pandohanna tarjaha do di evangelium na asing, alai konteksna asing. Dihatahon do i di sada inganan di pardalanan tu Jerusalem mandapothon sitaononNa (9:51). Andorang so i, dipajojor do poda dohot pinsangpinsangNa tu Parise dohot Sibotosurat (11:29-54). Ra, ala ni i gabe tartarik ma natorop i tu Ibana. Na luar biasa do i antong, barani Ibana maminsang angka partogi na hinabiaran jala na pinarsangapan ni natorop. Ala ni i ma asa marrongoman natorop i naeng marnida Ibana. Marnida i ndang apala terkesan Tuhan i. Diboto do natorop i na mura mimbar sian na manohoi tu na mangalo Ibana. SiseanNa i do na tumangkas jolo naeng ramotanNa, ai nasida do muse na laho manorushon ulaonNa. Binonsir ni na masa i, dipaingot ma angka siseanNa i taringot tu ragam ni pangalaho na ringkot botoon jala ramothonon nasida.

Hatorangan

Didok tu siseanNa i: “Jaga ma hamu pasiding na niasoman ni Parise, i ma pangansion i.” Na niasoman (Gr. zumees/leaven/ragi) i ma samansam zat pengawet (permentasi) dohot pengembang manang pelembut na dipangke antara lain tu roti. Alai holan di tingki na normal do i; anggo di ombas na darurat ndang sanga (pat.1 Mus.19:3). Di haruruar ni halak Israel sian Misir rupani, ndang sanga nasida mangaragi roti. Gabe sada aturan ma i muse di bangso i, di ariari ni Paskah i, mamungka sian 14 Nisan sahat tu ari papituhon sian i, ndang boi nasida manganhon sipanganon na niigaran. Manimpan ragi manang sipanganon na niasoman pe tahe, saleleng na pitu ari i, ndang jadi (pat.2 Mus.12:15, 19). Na gabe parningotan ma i di haruruarnasida na humalaput i dohot di partinaonannasida na ingkon manganhon sagusagu pardangolan na hambar i (5 Mus.16:3). Sada sian na so boi pelehonon do ragi tu Debata (3 Mus.2:11; 7:12). Di pudian ni ari na gabe perlambang ni haroaon (evil habit) do i manang hajungkaton (evil coming out in word and deed) na maralo dohot halidangon manang hasintongan, na ingkon sipabalion (pat.1 Kor.5:6-7). Angkup ni i na gabe simbol ni poda (doctrine/ajaran) na sala do i (pat.Mat.16:6), dohot sikap hidup na tinubuhonna. Tontu do, poda na sala manghorhon sikap hidup na sala do i. Angka parise ma rupani, poda dohot pemahamannasida na taringot tu patik na legalistis manubuhon sikap hidup na legalistis, na mangaradoti ruhutruhut parduru sambing isara parpuasaon na tarida manang tali partangiangan (pat.Mat.23:5), alai tading do anggo na umargana i, isara hatigoran dohot parasinirohaon (pat.Mat.23:23). Ala ni i digoar Jesus do nasida pangansi. Hombar tusi ma dison, dipaingot Jesus do siseanNa i asa pasidinghon na niasoman manang sikap hidup ni Parise, i ma pangansion i.

Sipaingot na di ay.2-3 tarjaha do tong di Mat.10:26-27, alai (songon na nidok di jolo i) konteksna asing. Dison, ingkon na antusan do i di bagasan pardomuanna tu sipaingot na di jolo ondeng. Huphup do harohaon manang ngolu parbagasan ni Parise na roa i binahen ni parugamaonnasida na tarida, isara parpuasaon dohot parasinirohaon na diulahon di jolo ni halak sitotondurannasida (pat.Mat.6:1 duu), dipapujipuji natorop do nasida disi jala diparhatua, dirajumi angka na denggan jala na tigor. Alai unang ma gabe tarpaoto sisean i maniru nasida, ai ro do tingkina, patar do muse hadirionnasida na sasintongna, ai ndang adong agia ise na tarbahen marsibuni manang marmihimmihim maradophon Debata. Gari angka hata na hinatahon di na holom manang na hinusiphon tu pinggol ni halak di bilut diboto jala papataronNa di ari sogot i, lam boha ma ngolu na marpangansi na diulahon di hapataran?

Mangihuthon konteks Mateus, hata sipaingot na di ay.4-9, 11-12 (pat.10:19-20, 28-33) na marpardomuan do i tu parsuruon mamaritahon Barita na Uli i. Boha pe paraloan, ndang pola mabiar nasida, ai Debata do mandongani jala mangaramoti nasida. Dison pe, tong do songon i, alai godangan marhahonaan tu paraloan tu Parise. Balga do huaso ni Parise i. Sada fraksi na balga do nasida di Sanhedrin, Rapot Godang ni halak Jahudi na marhuaso mandabuhon uhuman mate. Nang pe songon i, unang pola mabiar nasida, ai na marbatas do huasonasida. Sintap ni na mamunu daging do boi nasida, lobi sian i ndang adong be sipatupaonna. Debata do sihabiarannasida, sasadasa do sioloan dohot sisombaonnasida. Na marhuaso do Debata taringot tu ngolu nuaeng dohot ngolu sogot, marhuaso paluahon tu hangoluan na saleleng ni lelengna manang mandabuhon tu api naroko, tu hamatean na saleleng ni lelengna. Angkup ni i, ingkon marhaposan situtu na porsea i di pangaramotion ni Debata. Ingkon ingoton jala parhatopotonna do gari amporik disarihon Debata. Hira na so mararga do amporik i nian, dua sauang (Mat.10:29), lima dua benggol. Alai nang pe songon i ndang adong sian i na madabu tu tano gabe boi tangkupon jala gadison ni halak so sian parbinotoan ni Debata. Lam boha ma na porsea i, angka na sinuruNa mamaritahon Barita na Uli na taringot tu harajaonNa i tung so sarihononNa ma? Olo, sarihononNa do, ai umarga do nasida sian amporik. Taringot tusi didok: “Gari obuk na di ulumuna, sude do dibilangi.” Ndang na mandok na so adopan ni na porsea i be paraloan, adopanna do. Gari hamatean tahe, na boi masa do. Alai molo masa pe i, ndang adong i na tarjadi di ruar ni parbinotoan dohot sangkap ni Debata. Ndang na mago na mate i, ai “arga do di roha ni Jahowa hamamate ni angka na niasianNa i” (Ps.116:15).

Laho patomoshon roha ni sisean i di ulaon panindangion i didok Tuhan Jesus do: “Ganup na manghatindanghon Ahu di jolo ni jolma, hatindanghonon ni Anak ni Jolma i do sogot di adopan ni angka surusuruan ni Debata. Alai na mansoadahon Ahu di jolo ni jolma, soadahononhon do sogot di adopan ni angka surusuruan ni Debata.” Jesus Kristus i do pamusatan ni Barita na Uli i. Na manghatindanghon Barita na Uli, na manghatindanghon Jesus Kristus do i. Na manghatindanghon Jesus Kristus i tahe pangkalna. Ndang tarbahen agia ise manghatindanghon Barita na Uli so jolo dihaporseai jala dihatindanghon Kristus i. Manghatindanghon (Gr. homologeesee, ro sian hata bonabona homologeoo) lapatanna manolopi panindangion ni na asing (I agree with the statement of another), marpadanhon/ manjanjihon (I promise), manghatindanghon/marhatopothon (I confess), maningtinghon/ patubegehon (I publicly declare). Panindangion taringot tu Jesus i ndada tubutubu ni roha ni jolma i, alai na sian Debata do i sahat tu sisean i. Panindangion ni sisean i do muse na pinangolu jala na pinataripar Tondi Porbadia marhitehite Barita na Uli i tu na asing, dung i ditolopi jala dijangkon na mambege i ma i gabe panindangionna sandiri, marpadan ibana na haporseaan jala jangkononna Jesus Kristus i, parhatopoton jala patubegehonna di jolo ni jolma, tarmasuk di jolo Parise paboa Jesus Kristus i do Tuhan jala Sipalua ibana. Angka sisongoni i hatindanghonon ni Jesus do sogot di ari paruhuman i. Sabalikna do angka na mansoadahon, soadahononNa do.

Sahali nari, laho patoguhon roha ni sisean i di ulaon panindangion i, di ay.11-12 didok Jesus do: “Alai molo togihononnasida hamu tu angka parguruan, tu jolo ni angka induk dohot panggomgomi, unang ma holsoan hamu, manang beha pangalusionmuna ro di sidohononmuna. Ai ajarhonon ni Tondi Parbadia i do tu hamu di na sangombas i na patut dohononmuna.” Nunga nidok, godang do tantangan ni panindangion i. Di huta Jerusalem dohot di luat Judea do parjolo dibaritahon Barita na Uli i, di yurisdiksi ni hajahudion. Hombar tusi, tantangan na parjolo ro do sian institusi keagamaan ni Jahudi na niwakilan ni parguruan (Gr. sunagoogas/sinagoge) dohot angka induk (Gr. archas/magistrates). Siangkup ni parpunguan (peribadahan) na marfungsi dope sinagoge i songon paruhuman laho paujunghon angka pangalaosion manang parsoalan na metmet na niulahon ni angka induk. Angka pangalaosion manang parsoalan na umbalga dipaujung di Rapot Godang (pat.Mat.5:22). Dison dipasingothon Jesus, rajuman ni halak Jahudi do muse sisean i pangalaosi, jala ala ni i togihononna do nasida tu parguruan asa uhumanna. Dung i, ro do muse paraloan i sian panggomgomi. Taringot tusi dipaingothon Jesus do asa unang pola dirancang nasida pembelaan, alai dihaposi ma ajar ni Tondi Porbadia i. Sintong do songon i, dung manaek Jesus tu surgo jala ro Tondi Porbadia i, disi dipungka nasida ulaon panindangion i, pintor diadopi nasida do paraloan songon na boi jahaon di Ulaon ni Apostel. Ditangkup do angka apostel i, dihurunghon, ditogihon jala diuhumi di jolo ni Rapot Godang. Diadopi nasida do nang paraloan sian panggomgomi, sian si Herodes dohot sian panggomgomi Rom. Alai digohi do nang bagabaga na taringot tu panuturion ni Tondi Porbadia i. Molo tapamanat rupani paraluson ni si Petrus dohot si Paulus, gok huaso, gok habisuhon ala ni Tondi Porbadia i.

Di ay.10, dipasingothon Jesus do taringot tu dosa na mangaleai Tondi Porbadia, didok: “Jala ganup na mandok hatana mangalo Anak ni Jolma i, tarsesa do i; alai na mangaleai Tondi Parbadia, ndang dapotan hasesaan.” Taringot tusi pe tarjaha do di evangelium na asing (Mrk.3:28-29; Mat.12:31-32). Disi, dipasingothon Jesus do i tu halak Jahudi na mandok na mangasahon induk ni angka sibolis do Ibana pabalihon angka tondi na hodar. Di bagasan rohanasida ndang tagamon so diparhatopot na sian huaso ni Debata do ulaon ni Jesus i, alai ala hosom dohot sogo ni rohana gabe didok do i na sian sibolis. Sian i boi simpulhononhon, pangaleaion tu Tondi Porbadia i ma sikap na mempersetan Debata sian kesadaran na sesadar-sadarna. Alai di turpuk on, dihatahon Jesus do i marpardomuan tu panghatindanghonon di Ibana dohot pamaritahonon di Barita na Uli i. Marhitehite Barita na Uli na niulahon ni Tondi Porbadia i, gabe porsea do jolma di Jesus i, dijangkon Ibana jala dihatindanghon gabe Tuhan jala Sipalua ibana. Sian i boi ma simpulhononhon muse, pangaleaion tu Tondi Porbadia i ma na so manjangkon manang na manulak Barita na Uli, na so manghaporseai jala na so manghatindanghon Kristus. Di Heb.6:5 duu ditaringoti do halak na so tarpaimbaru be, i ma angka na gabe marbalik (murtad). Dung i, di 1 Joh.5:16 ditaringoti dope na mardosa na marhapatean tu hamatean, na so pola be sitangianghonon. Ndang dilehon anggo definisina, alai sian konteksna torang do na marhahonaan do i tong tu hasohaporseaon. Sian saluhutna i boi dohonon, pangaleaion dompak Tondi Porbadia manang dosa na so tarsesa na marahapatean tu hamatean i ndang dosa moral manang etis, dosa teologis do, dosa haporseaon. Boasa ndang tarsesa? Ai Tondi Porbadia i na mangula marhite Barita na Uli i nama cara berada ni Debata na parpudi laho paluahon jolma. Nunga mangula Ibana di bagasan cara berada Debata Ama, Panompa; dung i di bagasan cara berada Debata Anak, Sipalua; jala na parpudi di bagasan cara berada Debata Tondi Porbadia, Pangondian. Salpu i, ndang adong be cara berada na asing; molo so dijangkon jolma be i, ndang porsea ibana di Kristus i, ndang adong be dalanna laho porsea jala malua. Torus nama i ndang porsea, dung i mago; ai ndang adong haluaon di na so porsea.

Rancangan Homiletis

Di ari on sahat hita Minggu manang Pesta Trinitatis. On do pesta na parpudi di rangkaian ni pesta ni huria di sada taon parhuriaon. Nunga salpu Advent, Natal, Epiphanias, Passion Hamamate; Paskah, Hananaek dohot Pentakoste; dung i nuaeng, sahat ma tu Trinitatis. Digombarhon i do haporseaonta paboa: Marhite haroro ni Kristus dohot Tondi Porbadia, nunga singkop be hapataran ni Debata jala gabe torang tartanda ise jala boha do Ibana. Debata Sasadasa (Yang Esa) do Ibana, alai huhut Sitolusada (Trinitatis) na papatarhon diri di bagasan tolu cara berada, i ma Debata Ama, Anak dohot Tondi Porbadia. Ndang na mandok na tolu do Debatanta, alai na mangondolhon lapatan dohot pardomuan ni Debata na Sasada i do i tu hita. Ama do Ibana, na manompa hita; Sipalua do Ibana, na manobus hita; Pangondian do Ibana, na pabadiahon hita. Dohot hata na asing, Debata di ginjangta do Ibana, Debata raphon hita (Immanuel), jala Debata di bagasan hita. Laos marhite i diondolhon do hasisingkop haluaonta. Ala ulaon ni Debata Sitolusada i, angka naung malua do hita, sedang malua, jala laho malua. Ia dibasabasahon pe haluaon i tu hita ndang holan asa jaloon, alai asa ulahononta do i huhut (pat.Plp.2:12). Boha ma hita mangulahon i? Tapamanat ma i marojahan di turpuk jamita on.

Na parjolo, tahabiari ma Debata. Di jamita on dipaingot Jesus do siseanNa asa pasiding poda dohot sikap hidup ni Parise. Parise, i ma sada horong parugamaon di tongatonga ni halak Jahudi. Balga do huasonasida di roha ni natorop, dihabiari do nasida, dipapujipuji jala dirajumi angka na burju. Alai di pamerengan ni Jesus pangansi do nasida, suman tu tanoman na hinapur, ias di duru alai di bagasan gok angka na busuk. Nang pe boi nasida padenggandengganhon diri di jolo ni natorop, di ari sogot i patar do habusuhonnasida. Ala ni i, tung na so sitiruon do nasida. Angkup ni i, nang pe balga huasonasida jala boi mandabuhon uhum mate, ndang pola sihabiaran nasida. Sintap ni hasiangan tano on do huasonasida, jala lobi sian i ndang adong be na tarpatupa nasida. Debata do sihabiaran, ai marhuaso Ibana taringot tu ngolu nuaeng dohot ngolu sogot; marhuaso manontuhon na tu haluaon dohot na tu hamagoan, marhuaso pabongothon tu hangoluan dohot tu naroko.

Apala i sipaingot ni Evangelium Trinitatis on tu hita; songon angka naung pinalua ni Debatanta Sitolusada i, na tongon dipalua jala sipaluaonNa, sihabiaranta do Ibana sian nasa rohanta. Na manghabiari Debata ndang dos i dohot na manghabiari angka na di tano on. Biar tu angka i ojak do di ketidakserasian manang ketidakharmonisan ni jolma tu na hinabiaranna, alai biar tu Debata ojak do i di pardomuan dohot parsaoran holong ni Debata na paluahon i tu jolma na pinaluaNa. Na manghabiari Debata na marlapatan do i maribadah tu Ibana, magoloi jala marsomba Ibana. Gok di Ibana do nasa huaso na di banua ginjang dohot na di tano on, guru di Ibana do ngolu dohot haluaonta, hangoluan dohot haluaonta nuaeng dohot na ro sogot. Ala ni i ingkon porsea jala marhaposan hita tu Ibana sian nasa rohanta, ingkon tangihononta hataNa jala hangoluhononta, ingkon mardalani hita di angka dalanNa jala marparange hombar tu patik dohot lomo ni rohaNa. Sipasidingonta do angka poda haliluon dohot nasa rumang ni pangansion. Mansai ringkot do i sorminhononta i tu ngolunta di angka tingki on. Ra, ndang masalpuhu molo nidok, pangansion i do sada na mansai godang mewarnai parngoluon ni bangsonta di tingki on. Manghatai do sude taringot tu penegakan hukum, alai tardapot do torop siboto uhum dohot sipajongjong hatigoran na mandegedegei uhum. Manghatai do sude taringot tu pemberantasan korupsi, alai angka na patut di jolo nian di ulaon i tung apala i do na paling korup. Mangihuthon Transparency International Indonesia, DPR do sada sian lembaga na terkorup di Indonesia, siangkup ni kepolisian, kejaksaan, kehakiman dohot partai politik. Dipajongjong Presiden do Satuan Tugas Pemberantasan Mafia Hukum, alai songon na memoleskan kosmetik sambing do i di wajah buruk ni bangso on, ai holan na mamilangmilangi mafia i do boi Satgas i, ndang adong anggo huasona memberantas. Molo songon i torus, songon dia ma masa depan ni bangsonta on? Ala ni i, songon halak Kristen hita ingkon lam gogo do hita mangondihon bangso on, lam gogo huhut mangalo pangansion dohot sipalensem di diri dohot di komunitasta, ai angka pangalaho na balga ingkon dipungka do i sian na metmet, dipungka sian diri sandiri.

Paduahon, tahatindanghon ma Jesus Kristus i. Didok Jesus muse di jamita on: “Ganup na manghatindanghon Ahu di jolo ni jolma, hatindanghonon ni Anak ni Jolma i do sogot di adopan ni angka surusuruan ni Debata. Alai na mansoadahon Ahu di jolo ni jolma, soadahononhon do sogot di adopan ni angka surusuruan ni Debata.” Manghatindanghon Tuhan Jesus Kristus mandok, manangihon jala manjangkon panindangion ni Barita na Uli na taringot tu Kristus Jesus i gabe panindangionna sandiri, dung i marpadanhon paboa na haporseaan jala jangkononna Ibana di ngoluna, jala parhatopotonna paboa Ibana Tuhan jala Sipalua ibana. Aha pe na masa, jala di dia dohot sadihari pe, ingkon jongjong ibana di pihak ni Kristus maradophon portibi on. Nasa na songon i hatindanghonon ni Jesus i do i di jolo ni paruhuman sogot i. Hot ma haluaonna i, jala jaloonna ma hangoluan na saleleng ni lelengna. Sabalikna do di angka na mansoadahon, soadahononNa do nasida. Agoan ma nasida di haluaonNa, gabe mago tu hamatean na saleleng ni lelengna.

I ma muse sipaingot ni Evangelium Trinitatis on tu hita; songon angka naung pinalua ni Debata Sitolusada i, na tongon dipalua jala sipaluaonNa, sihatindanghononta do Tuhanta Jesus Kristus i di ngolunta. Ndang ulaon na mura manang na neang i, na maol do jala na dokdok. Mansai maol jala dokdok tahe, godang tantanganna, godang risikona, godang siharugihononhon, talpe tu sitaonon. Ala ni i adong do na mabiar, na maila, na so tahan gabe mansoadahon. Gabe malua ma ibana sian parungkilon, sian harugian dohot sitaonon ala ni haporseaon i. Jumpangsa gariada paruntungan, pangkat rupani, jabatan, hamoraon, siboru na uli, sidoli na jogi. Lobi sian i tahe, boi liat portibi on diomo, alai mago ma anggo tondina, ai soadahonon ni Kristus Jesus i do ibana di paruhuman sogot i. Alai halak na olo manaon ala ni haporseaon dohot panindangion i, na mungkin agoan di na saluhut tarmasuk hosana sandiri martua do, ai hatindanghonon ni Anak ni Jolma i do ibana sogot ari paruhuman i. Ingkon lam tangkas ma i suanhonon jala paingothononta di tingki on di tongatonganta. Sian tingki tu tingki sai tarbege do di tongatonganta halak na manadinghon hakristenon ala ni pangkat, ala ni jabatan, ala ni cinta, dohot ala ni na asing. Parsitutuon ni rohanta patanakhon panandaon di Kristus i marhite na mangajarhon dohot manuanhon Barita na Uli i do dalanta mangotapi i.

Na patoluhon, tabaritahon ma Barita na Uli i. Nasa naung porsea jala manjangkon Kristus i gabe Tuhan jala Sipalua, tarjou do i laho mamaritahon Barita na Uli i. Jesus Kristus i do pamusatan ni Barita na Uli i. Na mamaritahon Barita na Uli i, dos do i dohot na mamaritahon Jesus Kristus; jala na manghatindanghon Jesus Kristus, dos do i dohot na manghatindanghon Barita na Uli i. Sasintongna, ulaon ni Tondi Porbadia i do i. Taringot tusi didok Jesus do: “Asa ro ma Pangondian i sisuruonHu sian Ama i tu hamu, i ma Tondi Hasintongan i, na borhat sian Damang; I do na manghatindanghon taringot tu Ahu” (Joh. 15:26). Alai angka na porsea i do ulaula ni Tondi Porbadia i patulushon i, ai didok Jesus do muse: “Alai dohot ma hamu manghatindanghon, ai donganHu do hamu sian mulana i” (Joh.15:27). Porsea jala margogohon Tondi Porbadia i, ndang pola mabiar na porsea i. Ia ditogihon pe nasida tu paruhuman, ndang pola holsoan nasida taringot tu sidohononna, ai tuturan ni Tondi i do nasida disi.

I ma muse sipaingot ni Evangelium Trinitatis on tu hita; songon angka naung pinalua ni Debata Sitolusada i, na tongon dipalua jala sipaluaonNa, dipatindang Tondi Porbadia i do hita gabe ulaulaNa laho mamaritahon Barita na Uli i. I pe, ndang ulaon na mura i, na maol do; godang paraloan dohot tantanganna. Ndang dihalomohon portibi on Barita na Uli i ai asing do nilai dohot norma-normana. Ala ni i diambati do harararatna, disusai jala dipaburuburu do angka na mamaritahonsa. I do na nialaman ni sisean i sian mulana dope, jala i do nang na nialaman ni angka na porsea di sepanjang abad. Di angka tingki na parpudi on, di manang piga inganan di Indonesia on tabege do rupani mansai maol angka donganta pajongjonghon gareja, na deba ndang dipaloas maminggu di gareja naung tipak, dohot angka hambatan na asing dope. Taringot tusi unang pola tarsonggot hita manang mandele, ai naung dilumbahon Tuhanta i hian do i. Ndang na mandok na pasrah sambing ma hita huhut pataontaonhon songon i ketidakadilan i, ndang. Marpangguruan tu Tondi Porbadia i siparjuanghononta do torus asa jumpang kebebasan beribadah di tongatonga ni bangsonta on. Alai molo so pintor dapot pe i, unang hita sumurut. Ndang pasombuon ni Debata hita disi, alai dongananNa do jala pargogoanNa. “Gari obuk na di ulumuna sude do dibilang,” ninna. Jala molo ingkon adong pe na agoan hosa ala ni Barita na Uli i, pos ma rohanta, ndang simbil i sian parbinotoan dohot sian tahi ni Tuhan i, jala arga do rohaNa hamamate ni na niasianNa.

jkt.05.05.2010/mvs

Read More..

Pentakoste-2

SERMON JAMITA TU PESTA PENTAKOSTE-II, 24 MEI 2010
Ul.2:1-13

Patujolo

Andorang so hananaekNa, ditonai Jesus do sisean i asa unang meret sian Jerusalem so jolo dijalo Tondi Porbadia i (1:4, 8). Marningot jala manghirim disi, marpungu do nasida di Bilut Parginjang (The Upper Room; 1:13) jala mandatdati martangiang sian sada ni rohanasida (1:14). Ro do muse angka na porsea na asing pasaorhon dirina tu punguan i (1:15), laos rap maimaima di haroro ni Tondi Porbadia i. Di turpuk on, dipaboa si Lukas do panggohion ni bagabaga i.

Hatorangan

Di ari palimapuluhon dung haheheon ni Jesus, tongon di Pentakoste ni Jahudi, marpungu do muse sisean i songon na somal. Siangkup ni na maimaima di haroro ni Tondi Porbadia i, ra na naeng dohot do nasida manghalashon Pentakoste i. Tarida do i sian inganannasida marpungu i, ndang di Bilut Parginjang be; di inganan na asing nama. Ndang tangkas nian manang na dingkan dia inganan i, alai sian na masa di pudi, i ma sian na pintor torop i halak marnida na masa i, disura roha di sada emper (pat.5:12) manang rumah turutan ni Bagas Joro i do i. Di mulana antong, hot do na porsea i di bagasan organisasi keagamaan ni Jahudi. Ndang angka pemberontak nasida na pintor laho mamungka organisasi sandiri, ndang. Diargai jala dihormati nasida do sude lembaga hajahudion na adong (isara bagas joro, hamalimon, pesta parugamaon, dohot na asing). Songon i ma dison, dohot do nasida manghalashon Pentakoste i. Pentakoste, dihalashon halak Israel do i di ari palimapuluhon dung 14 Abib/Nisan (ari ni Paskah; pat.2 Mus.12:6). Laos i ma na songon parmulaan ni goarna (ro sian hata pentekonta = limapulu; pentekoste hemera = ari palimapuluhon). Di mulana (aslinya), pesta gotilon hian do i. Disi, dihalashon jala dihamauliatehon bangso i do keberhasilan ni tanaman gandum. Songon hataridaan ni hamauliateon dohot halalas ni rohanasida tu Debata, dipelehon nasida do roti na pinature sian patumonaan ni na niulana be. Hombar tusi laos digoar do i Pesta Gotilon Patumonaan. Laho mangalehon lapatan dohot isi na lebih teologis tu pestanasida, di pudian ni ari dipahombar do Pentakoste i tu panjaloon ni ompunasida di patik ni Debata di dolok Sinai uju i. Nian, ndang apala topet limapulu ari dung Paskah na parjolo i (ari haruruar sia Misir) tingki panjaloon ni patik i, lobi do. Ndang pola haboratan nasida disi, ai holan parningotan do na pinatupanasida.

Di bagasan lapatan na tontu, di Pentakoste 33 AD, disi ma dipatulus Debata bagabagana i; diusehon ma Tondi Porbadia i sumonggopi sisean i. Tompu jala sian huaso ni Debata do haroroNa. Ndang sian usaho ni jolma/sisean i non i, sian pangalehon ni Ama i sambing do. HaroroNa i ditandai do marhite tolu hagogoon. Parjolo, tarbege soara sian ginjang songon parngngos ni alogo na gogo mamolus. Di Padan na Robi hata Heber, digoari do Tondi i ruach; di Padan na Imbaru hata Gorik pneuma. Duansa marlapatan hosa (breath) manang alogo (wind). Ndang na mandok hosa manang alogo do Tondi i, ndang. Digoari pe i songon i, na marhahonaan do i tu huaso manang tu hagogoon na terkandung jala na mangula di bagasan dohot marhitehite Tondi i. Huaso do Tondi i, hagogoon ni Debata na manompa jala pangoluhon (creator spiritus; pat.1 Mus.1:2b; 2:7; Hes.37:1 duu). Songon i ma dison, soara na marngongos i ‘tanda’ do i, tanda ni kehadiran ni Tondi Porbadia i. Ndang soara i Tondi i, ai asing do tanda sian na tinandaaanna. Alai suman tu alogo na mangombus di bagasan hagogoon, songon i do Tondi Porbadia i, mangula do i di bagasan hagogoon na mangombushon hangoluan na imbaru, pahehe dohot menggerakkan roha ni sisean i tu haporseon di Jesus naung hehe jala manaek tu surgo i. Paduahon, tarida di nasida na suman tu dila ni api na marjillamjillam jala disonggopi nasida. Songon na parjolo i, ‘tanda’ do nang na songon api i; tanda na patuduhon ulaon ni Tondi Porbadia i na mamboan halason, pangurasion dohot uhum. Digohi Tondi Porbadia i do nasida luhut. Ndang mardebadeba, luhut do. Dung i, dionjar Tondi i ma nasida mangulahon tanda na mangihut, i ma: Patoluhon, marpanghuling na asing ma nasida saguru tu pangalehon ni Tondi Porbadia i. Marpanghuling na asing, mandok manghatai di bagasan hata (bahasa) na asing. Halak Galilea do sisean i sude jala halak na somal (ndang na terpelajar). Hata Aram dialek Galilea do dipangke nasida ariari. Alai marhite hagogoon na manghorhon di bagasan dohot marhitehite Tondi Porbadia i, dipatau do nasida manghatai di bagasan hata na so dung ginuruhonnasida.

Haroro dohot pangulaon ni Tondi Porbadia i ndang na marguna holan di sisean i, dohot do di natorop i. Ala ni i, na marpanghuling na asing i ndang ditujuhon i tu bagasan dirina, tu ruar do, tu natorop i. Sian i torang, marasing do i sian hata sileban na tinaringotan ni si Paulus di surat tu huria Korint. Parasinganna: Parjolo, di Pentakoste i sude do sisean i marpanghuling na asing; di Korint, deba do. Paduahon, dison diantusi na asing do na hinatahon ni sisean i, di Korint, ndang. Patoluhon, dison jolma do na pinanghulingan ni sisean i, di Korint Debata do (1 Kor.14:2). Paopathon, ala tu jolma dihatahon jala diantusi na umbegesa do na hinatahonna i, na pauliulihon natorop i do parhataon na leban i, di Korint, na pauliulihon dirina sandiri do i (1 Kor.14:4). Ala na ringkot jala na pauliulihon na umbegesa do parhataon na leban i, ndang gabe taronjar sisean i mamangke i tu na manaringoti diri (isara na marsaksi taringot tu hamubaon dohot haimbaruon ni ngoluna), alai manghatindanghon ulaon habalgaon ni Debata do (11). Dia do ulaon habalgaon ni Debata? Ragam do i. Rupani, panompaon, panogunoguon dohot pelangsungan ni nasa na adong. Ditompa Ibana do sasude sian na so adong gabe adong (creatio ex nihilo), ditompa torus (dilangsungkan/dilestarikan) marhite pamomparon (pro creatio) dohot marhite panogunoguon dohot pangiringiringonNa (creatio continua). Nda habalgaon do i? Alai na umbalga dope sian i i ma ulaon panobusionNa na di bagasan dohot marhitehite Jesus Kristus, AnakNa i. Tu pelaksanaan ni karya penyelamatanNa i, tu penaklukan ni sitolusada na jahat (sibolis, dosa doho hamatean) i, dihimpun Debata do sude gogoNa, huaso dohot habalgaonNa. I do na hinatindanghon ni sisean i di na marhata na asing i.

Ala tongon Pentakoste ari i, pungu do di Jerusalem torop Jahudi sian saluhut bangso. Mamungka sian habuangan Babel, marserak do halak Jahudi tu sandok oikoumene jala maringan di angka luat na ginoar diaspora (parserahan; ro sian hata Gorik dispeirein= manerakhon). Hombar tu patik ni Pentakoste i marroan do nasida tu Jerusalem. (Sarupa tu patik ni Paskah dohot Parlapelapean, patik ni Pentakoste i mewajibkan sude baoa na magodang na maringan di radius 30 mil sian Jerusalem ro mandohoti pesta i ganup taon, jala na di diaspora saotikotikna sahali saleleng di ngoluna be). Angkup ni angka Jahudi i, ro do nang angka parguru (proselyth, i ma halak sileban naung gabe manjangkon ugamo Jahudi). Molo jinujur sude (tarmasuk Jahudi dohot halak Rom na maringan di Palestina), tuk do 16 bangso haroroan ni na pungu (ida 9-11). Nunga leleng (turun temurun) nasida di parserahan i; toropan nunga gabe warga negara di luat parmiananna. Parateatehon ma, nunga digoar habangsoonnasida hombar tu luat haroroanna be, i ma: Partia, sada luat na masuk tu gomgoman ni Parsi. Media, tong bagian ni Parsi na marhapeahan di pastima ni laut Kaspia. Elam, tong bagian ni Parsi. Mesopotamia, i ma luat di parholangan ni Eufrat dohot Tigris. Kappadosia, sada luat di Asia Minor di dangsina ni dolok Taurus. Pontus, tong di Asia Minor, di utara ni Kappadosia. Asia, i ma angka provinsi na asing di Asia Minor, isara Mysia, Aeolis, Caria manang Lidia. Prigia dohot Pampilia, tong provinsi di Asia Minor. Misir, di Afrika Utara. Libia, tong di Afrika Utara. Kirene, tong di Afrika Utara; nuaeng masuk tu Negara Libia. Kreta (Kaptor) sada pulo di Laut Tonga, nuaeng digoar Candia. Arab, i ma semenanjung Arab. Hombar tu inganan dohot habangsoonna be, paasingasing do parhataannasida, jala pasti ndang diantusi nasida hata Aram dialek Galilea. Alai disi ma balga ni halongangan i, marhite huaso dohot hagogoon ni Tondi Porbadia i, ganup do nasida umbege panindangion ni sisean i di hatanasida be. Ala ni i marpungu ma nasida humaliang sisean i, longang, tarhalomong jala tarmali. Jut roha ni na deba jala sungkunsungkun mandok: “Na marhua do i ulaning?” Alai manginsahi do na deba, dipandok be: “Gok anggur na tonggi do nasida, ” lapatanna mabuk. Pangaleaion do i, ai pukul sia dope hatiha i (15), jala ndang mabuk halak dibahen anggur na tonggi. Jadi hira na mandok do nasida paboa angka na rintik do sisean i.

Rancangan Homiletis

Padua ari on ma hita na marpesta manghalashon parningotan di haroro ni Tondi Porbadia. Nantoari, di pestanta na parjolo dipatubegehon do tu hita bagabaga na taringot tu haroro ni Tondi Porbadia i, jala di jamita ari on ma panggohionna. Hombar tusi, di ombas on naeng patangkasonta do manang na angka dia dope lapatan dohot pangulaon ni Tondi Porbadia naung ro i.

Na parjolo, diusehon Debata do Tondi Porbadia i laho patulushon gotilonNa di portibi on. Andorang so hananaekNa dipatihi Jesus do sisean i paboa na so jadi meret nasida sian Jerusalem so jolo dijalo Tondi Porbadia i. Marningot i, marpungu do nasida maimaima di hasasautna jala martangiang sian sada ni rohanasida. Songon i ma tong di na jumpang ari Pentakoste, marpungu do nasida di sada inganan na jonok tu joro i. Dihalashon Israel do i Pentakoste i limapulu ari dung Paskah. Di mulana pesta gotilon patumonaan ni gandum do i. Alai di pudian ni ari gabe dirajumi do i songon ulang tahun ni hasasahat ni patik ni Debata tu ompunasida. Di bagasan ni i tersirat do panghirimonnasida di hasasahat ni soara ni Debata tu angka bangso. Di Pentakoste na sahali i, apala disi ma dipatulus Debata bagabaga i, diusehon ma Tondi Porbadia i tu sisean i. Tompu do haroroNa. Ndang na sian usaho ni sisean i non i, sian pangalehon ni Debata sambing do.

Ndang na kebetulan molo apala di Pentakoste i diusehon Debata TondiNa i, ai songon Pentakoste i na diaturhon bahen pesta gotilon patumonaan, songon i do marhite Tondi Porbadia naung ro i dipungka Debata papunguhon angka na gabe panean di harajaonNa. Angka ise ma i? I ma angka na marhitehite pangulaon ni Tondi Porbadia i sahat tu haporseaon di Kristus Jesus i. Di angka na porsea i nunga tulus be gotilon ni Debata, ndang pola be nasida tu paruhuman, nunga taripar nasida sian hamatean tu hangoluan (pat.Joh.5:24b). I do naung pinatupa ni Debata nang di hita. Nunga diusehon jala dipaian Tondi Porbadia i di bagasan hita, ditubuhon hita tu haporseaon jala dipabongot tu bagasan huria songon patumonaan ni gotilonNa, na gabe panean di harajaonNa dohot di hangoluan na saleleng ni lelengna. Di bagasan ni i dipaingot do hita asa unang taarsahi manang tainsahi Tondi Porbadia i songon na binahen ni deba sian Jahudi na mandok na gok anggur na tonggi do sisean i, alai taargahon ma parmianon dohot pangulaonNa di bagasan hita. Taargahon ma dohot silehonlehonNa, talenta manang hatauon angka na binasabasahonNa tu hita; taulahon ma i laho pauliulihon daging ni Kristus i, masiurupan jala masitungkolan di bagasan roha na holong (pat.Turpuk Sijahaon, 2 Mus.31:1-6).

Na paduahon, diusehon Debata do Tondi Porbadia i laho manompa jala paimbaruhon hita gabe sitindangi ni habalgaonNa. Haroro ni Tondi Porbadia i ditandai do marhitehite tolu hagogoon, i ma: Tarbege soara sian ginjang songon parngongos ni alogo na gogo, dung i tarida di nasida na suman tu dila ni api na marjillamjillam sumonggopi nasida, dohot na gabe marpanghuling na asing angka sisean i. Na tolu i ‘tanda’ do, tanda na pataridahon haroro dohot pangulaon ni Tondi Porbadia i. Suman tu alogo na mangombus mangula do Tondi Porbadia i mangombushon hangoluan na imbaru, pahehe jala mangonjar roha tu haporseaon di Kristus Jesus. Songon api na palashon jala papitahon, mangula do Ibana palashon roha, patiurhon dohot papitahon; diuhumi do bangko hadosaon, alai ditogihon do jolma tu hapintoron dohot haimbaruon ni ngolu. Dungkon ni i, dionjar jala dipatau do na porsea i tu panindangion di ulaon habalgaon ni Debata na di bagasan Kristus Jesus i.

I ma muse naung pinatupa ni Debata di hita, marhitehite Tondi Porbadia i ditompa jala dijadihon Debata do hita gabe na imbaru di bagasan Jesus Kristus Tuhanta i, jala dipatau gabe sitindangiNa. Di bagasan hadosaonta angka naung mate do hita, mate haporseaon dohot panghirimonta, mate panghilalaan dohot haholongonta. Dangol do hita jala pogos, ramun jala hodar, ndang tarbahen gabe sitindangiNa. Alai nunga ro Tondi Porbadia i, nunga mangula Ibana di tongatonganta, di huria dohot di rohanta. Marhitehite Barita na Uli i dipatubu hita paduahalihon, dipatubu tu haimbaruon, tu haporseaon, tu panghirimon dohot tu haholongon. Luhutna i ndang dipasahat holan laho nikmatanta sandiri, alai asa baritahononta do huhut, hatindanghonon, sagihonon jala bagihonon tu na asing. Mansai ringkot do i antusan jala ingotonta asa unang tarunjun hita jala madabu tu na mamangke angka silehonlehon ni Tondi Porbadia i tu na manghatindanghon dirina sandiri, isara na marsaksi paboaboahon hamubaon dohot haimbaruonna pribadi asa dipuji jala diparhatua halak.

Na patoluhon, diusehon Debata do Tondi Porbadia i laho pasada pangantusionta taringot tu haluaon. Ala tongon Pentakoste ari i, mansai torop do halak marpungu di Jerusalem hatiha i. Hombar tu patik ni pesta i antong, nasa Jahudi baoa na maringan di radius + 45 km humaliang Jerusalem wajib do ro tu pesta i; angka na di parserahan wajib ro sahali saleleng di ngoluna be. Molo jinujur dohot halak Jahudi nang halak Rom (pegawai dohot tentera penjajahan) na maringan di Palestina, tuk do 16 bangso haroroan ni na pungu i. Asa tung ribur do huta i hatiha i. Masiboan bangsona be nasida, budaya dohot bahasana. Alai halongangan, di na masa soara i, ganup do nasida mambege panindangion ni sisean i di hatanasida be. Manang na boha pandok ni sisean i taringot tu haluaon, sude do nasida mabege jala mangantusi. Nunga ditangtangi Tondi i bolatbolat ni parbangsoon dohot parhataan angka na paasinghon pangantusion ni jolma. Ala ni i gabe sisada pangantusion ma sude di lapatan ni haluaon i.

I ma muse naung pinatupa ni Debata di hita raphon sude na porsea di sandok portibi on, gabe sisada pangantusion hita taringot tu haluaon. Taboto, dung na masa di Babel, ndang masiantusan be jolma ala ni hatana angka na paasingasing. Ndang holan di parngoluon dohot parsaoran siapari, alai dohot do taringot tu lapatan ni ngolu dohot parbinotoan di Debata, taringot tu hadosaon, taringot tu hamagoan dohot haluaon. Asing be hatana, asing dohot pemahamanna, khaos. Alai marhite Tondi Porbadia i gabe sada do pangantusionta taringot tu Debata, taringot tu lapatan ni ngolu, taringot tu lapatan ni hadosaon, hamagoan dohot haluaon. Manang di dia pe adong na porsea, sian bangso dohot kebudayaan dia pe haroroanna, jala hata dia pe bahasa ibunya, sude do mangantusi paboa Jesus do haluaon. Halonganan bolon do i, na so tardungdung manang marhitehite dalan dia pe, tarmasuk penerjemahan ni Bibel tu ragam ni hata angka na paasingasing, alai holan Tondi Porbadia i do na tuk patupahon i.

jkt.30.04.2010/mvs

Read More..

Pentakoste-1

SERMON JAMITA TU PESTA PENTAKOSTE-I, 23 MEI 2010
Joel 3:1-5

Patujolo

Joel (Yoel) mandok, Jahowa do Debata (Yahweh adalah Allah). Dungkon ni goarna dohot goar ni amangna (1:1), ndang adong be na binoto taringot tu ibana. Mangihuthon angka parhapistaran taringot tu Padan na Robi, sada sian panurirang dung habuangan do ibana, na mangula di parholangan ni 444 tu 345 sM. Di tingkina, masa do bala bolon di Israel, i ma haroro ni antatadu (gulokgulok na gabe lampulampu/ulat kupu-kupu), sihapor (belalang), tamponok (borongborong na ratarata/kumbang hijau), dohot gulomit (kutu-kutu kecil). Mansai rahat, ai na tinebahon ni antatadu digagat sihapor, na tinebahon ni sihapor digagat tamponok, jala na tinebahon ni tamponok digagat gulomit (1:4), gabe ranggason angka suansuanan. Luhutna i dibereng si Joel do songon panginona ni uhum ni Debata. Ala ni i disosohon ma asa dipatupa bangso i parpuasaon (1:13-14) jala joujou nasida tu Jahowa jala dipauba rohana (2:12-14). Ditangihon Jahowa do joujounasida i (2:18-20), dipasonggop do tingki haluaon dohot hasonangan, gabe mandok mauliate nasida tu Ibana (2:21-27). Tingki haluaon na bersifat eskatologis do i, bagian ni haluaon na naeng masa di tingki na mansai dao dope. Hombar tusi, di sisi na asing, ditafsirhon si Joel do huhut na masa i songon partujolo ni haroro ni ari ni Tuhan i. Konsepsi ari ni Tuhan i mulakulak do tarjaha di Padan na Robi. Ari hasiapon sian Jahowa do i (Jes.13:6; Joel 1:15), ari na sogir ala ni parpiarpiar ni rimas ni Tuhan i (Jes.13:9), ari hamusuon (Hes.13:5), ari partubolan tu angka bangso parbegu (Hes.30:5), ari na bolon jala na songkal (Joel 2:11; Sep.1:14), jala ari haholomon (Am.5:18, 20). Alai sabalikna, ari haluaon do i di angka na porsea. Andorang so i, usehonon jala pasonggopon ni Debata do jolo TondiNa tu nasa sibuk, jala patupaonNa angka tanda kosmis di parlangitan dohot di tano on, songon na nidokna di turpuk on.

Hatorangan

“Jadi dung songon i,” ninna; na nidokna, dung salpu uhum i manang dung dipasonggop Debata Jahowa tingki haluaon i jala dung marolopolop bangso Israel mamujimuji Ibana, pangusehononNa ma TondiNa tu nasa sibuk. Di Padan na Robi, holan tu halak na khusus na pinabangkit jala na sinuru tu angka ulaon na khusus do dipasonggop Debata TondiNa, isara tu panurirang, malim manang raja. Tondi i ma na margogoihon, na mangajari jala na mandongani nasida di ulaon i. Panonggopion ni Tondi i do na disimbolhon di pamiahion di na pabangkithon sasahalak tu ulaon i (pat.Jes.61:1). Alai dison, diparbagabaga do na usehonon ni Debata TondiNa i tu nasa sibuk, lapatanna tu nasa jolma manang warga ni bangso ni Debata. Songon na nidok nangkin, naung di bagian ni jaman na eskatologis i do bangso i hatiha i. Hombar tusi, mansai ringkot do di nasida dasor dohot hagogoon na imbaru. Tu sangkap i ma diusehon Debata TondiNa i tu nasida. Na marlapatan ma i, Debata sandiri hadir jala mian di tongatonganasida, mangajari jala manogunogu nasida. Sude do nasida disonggopi Tondi i, na poso dohot na matua, baoa dohot boruboru, hatoban dohot anak mata. Alai parjolo do ditaringoti na poso, dung i pe asa na matua. Na marlapatan do i, na berlangsung torus do parmianon ni Tondi i. Molo marsalpuan pe angka na matua, ndang salpu parmianon ni Tondi i, ai nunga mian hian Ibana di angka na poso. Panghorhon ni naung sinonggopan ni Tondi i, i ma na manurirangi, na marnipi, dohot na maralatan. Na manurirangi, i ma na pasahathon hata dohot lomo ni roha ni Debata tu jolma di tingki dohot inganan na tontu. Ditaringoti do disi angka na masa di tingki na salpu, di tingki nuaeng, dohot di tingki na naeng ro, dung i dipatorang ma muse manang na dia do lapatan dohot na nidok ni i tu na manangihon. Na marnipi, i ma na manjalo hata dohot lomo ni roha ni Debata marhitehite nipi. Jotjot do masa na songon i, dipabotohon Debata hata dohot lomo ni rohaNa marhitehite nipi tu sasahalak asa pasahatonna i tu jolma manang tu dongan satingkina. Na maralatan, i ma na manjalo hata dohot lomo ni roha ni Debata marhitehite alatan manang pangungkapon (vision) asa pasahatonna tu dongan satingkina. Adong do sian alatan i na marrumanghon parnidaon (visual), adong na marrumanghon parnidaon dohot parbinegean (audio-visual). Duansa na nidohan parpudi on, i ma na marnipi dohot na maralatan, sasintongna ndang tarsirang sian na manuriangi, ai holan cara ni hasasahat ni hata i do i tu sasahalak. Ragam do cara ni Debata pasahathon hataNa i tu panurirangNa. Adong do i na marhitehite parbinegean (audio) i ma soara na tarbege manang na hinusiphon tu pinggolna, adong na marhitehite gagasan na disuanhon tu rohana, adong na marhitehite nipi, jala adong na marhitehite alatan (na visual manang na audio visual). Ala naung diusehon Debata TondiNa i tu nasa sibuk, ndang mardia imbar be disi na gabe panurirang; baoa manang boruboru, na matua manang na poso, hatoban manang anak mata, luhut nama i gabe panurirang.

Angkup ni i, patupaon ni Tuhan i dope angka tanda kosmis. Taringot tusi didok do: “Jala pamasaonHu do angka partinandaan di langit dohot di tano on: Mudar dohot api dohot timus na marsijongjong.” Pandohan i paingothon hita tu haruruar ni halak Israel sian Misir. Dipatupa Debata do uju i tanda angka na balga, isara aek gabe mudar, api dohot ombun na marsijongjong. Tanda sidua lapatan do i, i ma haluaon dohot hatiuron di halak Israel, alai hamagoan dohot haholomon di halak Misir (pat.4 Mus.14:19-20). Di turpuk on, mudar, api dohot timus na marsijongjong i manggombarhon hinajorbut ni porang. Mardurusan mudar, masurbu angka huta jala manaek timusna tu langit, gabe mangholom mata ni ari, jala bulan marrara songon mudar. Alai na boi masa do i huhut ala ni bencana, isara dolok na mapultak; manang ala ni gejala alam, isara gerhana na dilapathon halak jotjot songon partanda ni bencana. Nang pe angka romantika ni portibi do i, ndang simbil i sian tahi ni Debata. Manang sadihari pe masa na songon i, tongtong do i sidua lapatan, i ma singotsingot ni uhum tu portibi alai singotsingot ni haluaon di angka na porsea. Tangkasna, marhitehite angka na masa i naeng pasingothononna do paboa na ingkon ro do ari ni Tuhan i mantat uhum tu portibi on, haluaon tu na porsea. Ala ni i molo masa pe angka na songon i, unang ma gabe tarsonggot na porsea i, alai dipadirgak ma uluna jala dipasindak panailina, ai nunga jonok haluaonna (pat.Mrk.13:24; Luk.21:25, 28).

Taringot tu haluaon i, di ay.5 didok: “Alai nasa na manjou goar ni Jahowa, malua do.” Manjou, ndang na marlapatan holan na mandok goar ni Debata (menyebut nama Tuhan) isara di na martangiang manang di tingki targogot (pat.Ps.50:15), alai na marhatopothon paboa holan Jahowa do Tuhan jala Debatana; sasadasa do sihaporseaan, sihaposan dohot sihabiaranna, sioloan dohot sisombaonna. Dohot hata na asing, na manjou goar ni Jahowa mandok beribadah holan tu Debata. Na beribadah ndang na holan na marhahonaan tu pardomuan ni sasahalak i tu Debata, alai dohot do tu donganna jolma. Mangolu ibana di bagasan pardomuan dohot parsaoran tu bangso manang huria ni Debata na pinaojakNa marhitehite TondiNa naung niusehonNa i. Sian i nunga laos torang, goar dison ndada holan sebutan manang nama diri, alai na manudu tu hadirion ni Debata do i. Jadi bulus dohonon, malua do na manjou goar ni Jahowa, lapatanna malua do na mardebatahon Jahowa, na porsea jala maribadah tu Ibana. Ndang parbinotoan na imbaru be i di Israel, ai sian na jolo dope, naung marbagabaga do Debata paluahon nasida, jala sai diparatarata do i marhite angka panurirang. Taringot tu haluaon i didok: “Di atas dolok Sion dohot di Jerusalem masa haluaon.” Sion manang Jerusalem, di mulana kota benteng do i. Halak na mian di kota benteng, relatif aman do i jala selamat. Songon i ma Jerusalem gabe simbol ni keselamatan, ai i do parmianan ni Jahowa Zebaot, Debata ni luhutan manang pangulima porang ni Israel. Angka na jinou jala na pinaianNa di linggom ni pangondingionNa malua do.

Rancangan Homiletis

Di ari on, raphon angka donganta sahaporseaon di sandok portibi on sahat do hita tu sada sian na tolu pesta huria na umbalga, i ma Pesta Parningotan di Haroro ni Tondi Porbadia manang Pentakoste. Tongon di Pentakoste ni Jahudi taon 33 AD, ro do Tondi Porbadia i, disonggopi jala digohi ma luhut sisean i. Alai ndang holan sisean i, mamungka sian i dipasonggop jala dipaian Debata do Tondi Porbadia i di saluhut na porsea di sude huria di sude tingki dohot inganan, tarmasuk hita angka na mangolu di tingki on dohot di inganan on. Bahen aha i? Tapamanat ma i nuaeng marojahan tu turpuk jamita di ari on.

Na parjolo, dipasonggop Debata do Tondi Porbadia i patauhon hita gabe panurirangNa. Di mulana, pesta gotilon hian do Pentakoste di Israel. Disi, diboan nasida do patumonaan ni na niulana bahen pelean tatingan tu Jahowa. Na gabe gombaran patujolo do i di gotilon ni Debata. Hauma ni Debata do sandok portibi on, jala suansuananNa do hajolmaon. Di ujung ni angka ari, sai na ro do Ibana laho manggotil parbue ni haumaNa i. Tu sangkap i, disuriranghon si Joel do di jamita on na usehonon ni Debata do jolo TondiNa tu nasa sibuk, asa pajongjongonNa sada bangso na imbaru na di bagasanna Ibana mian, angka na gabe panurirangNa laho patulushon gotilonNa i tu sandok portibi dohot hajolmaon.

I do naung pinatupa ni Tuhanta i dohot di hita. Di haroro ni Tondi Porbadia i, dipungka Ibana do sada bangso na imbaru na Ibana nampunasa, i ma huria i. Marhitehite Tondi Porbadia i na mangula marhitehite Barita na Uli i nunga dohot hita dijou jala dipabongot tu huria i. Gabe bangsoNa hita jala parjambaranNa, sipaluaon jala sipabongotonNa tu hangoluan na saleleng ni lelengna. Hajongjongan na imbaru i ndada holan laho nikmatan, alai asa ulahonon do huhut. Gabe panurirang ni Debata hita na patubegehon hata dohot lomo ni rohaNa di tingki on. Sipatubegehononta do hata dohot lomo ni roha ni Tuhan i taringot tu parngoluan ni sasahalak, taringot tu parngoluon ni keluarga manang taringot tu parngoluon ni hajolmaon dalam konteks-konteks ni parngoluon angka na marragam i; sipatubegehononta do soara panurirangon taringot tu parngoluon ni masyarakat, bangso dohot negaranta dalam konteks ekonomi, sosial, budaya, politik, agama dohot na asing. Ndang ulaon na mura i, ai holan na tajalo sian Tuhan i do na boi patubegehononta, ndang boi siroharoha; ndang boi non i ambaan manang oruan, ndang boi patajomon manang patantamon. Taringot tusi nunga dipapatar i sude di Bibel i. Alai isara ni sipanganon, ndang dipasahat i tu hita di bagasan rumang na ripe panganon, ingkon na lompaonta do jolo. Songon i do hata na tarsurat di Bibel i, ingkon timbanganta do i jolo asa botoonta manang dia do lomo ni roha ni Debata na uli, na hinalomohonNa jala na sun denggan (pat.Rom 12:2) na patut pasahatonta. Tondi i do gurunta disi; so marhite pangajarionNa, lipe do panurirangon i gabe gapgap. Marhitehite panurirangon i, mardalan do gotilon ni Debata di tano on. Na manangihon panurirangon i jala na porsea panindangion i, gabe tarrajum ma i tu huriaNa, sipaluaon jala sipabongotonNa tu hangoluan na saleleng ni lelengna. Tondi Porbadia i do hagogoonta mangulahon i; so marhite pandonganionNa, talu do hita; alai marhite pangiringiringonNa margogo do hita jala marhamonangan.

Na paduahon, dipasonggop Debata do Tondi Porbadia i patauhon hita mangantusi angka tanda ni zaman. Di tingki ni si Joel masa do bala bolon di Israel, i ma haroro ni antatadu, sihapor, tamponok dohot gulomit na manudahon suansuanan. Angkup ni i, bolas jadi, na masa do nang gerhana ni mata ni ari na dirajumi torop halak songon partanda ni bencana. Sian tondi hapanurirangon i diantusi si Joel do paboa patujolo ni ari ni Tuhan i do i, i ma ari partubolan ni Jahowa tu angka parjahat, alai ari haluaon tu angka partigor. Ala ni i disosoi do bangso i marpuasa jala paubahon roha asa malua sian uhum na naeng ro i.

Marhite haroro ni Tuhanta Jesus Kristus na diihuthon hauuse ni Tondi Porbadia i nunga mamungka be ari ni Tuhan i. Songon na nidok nangkin, di haroro ni Tondi Porbadia i nunga dipungka Debata papunguhon jolma sian portibi on, sipaluaon jala sijangkononNa tu hangoluan na saleleng ni lelengna. Dohot hata na asing, hita angka na mangolu di Padan na Imbaru, naung di tingki haluaon i do hita, di parmulaan ni ari ni Tuhan manang di bagian ni zaman na eskatologis. Di pangondingion dohot pangiringiringon ni Debata marhite Tondi Porbadia, na mardalan do hita nuaeng manuju ari parpudi, ari hagogok ni haluaon i. Di pardalanan i sai dipaingot Debata do hita marhite angka tanda ni zaman, i ma angka parhusoran dohot na masa di portibi on isara ni porang dohot hagagaor ni na so uhum, laos songon i marhite angka bencana dohot tanda-tanda kosmis. Naeng ma malo hita mangantusi angka tanda i, ai angka na marsoara do i mandok na lam matua do portibi on jala lam manjonok tu ujung ni saluhut. Ala ni i ndang patut ojakhononta ngolunta jala gantunghononta panghirimanta tu portibi on. Tondi Porbadia i do gurunta mangantusi i, na mangajari hita manang songon dia hita patut mangolu dohot menyikapi angka i, asa molo masa pe i ndang gabe tarsonggot be hita jala mabiar alai gabe dirgak nama ulunta jala sihar panailinta ala taboto na jonok nama haluaonta.

Na patoluhon, dipasonggop Debata do Tondi Porbadia i patauhon hita manghangoluhon haluaon asa tu haluaon. Dijangkon Debata do parpuasaon ni Israel na maheu ala ni bala bolon i, ditangihon do joujounasida, dipalua nasida jala mian Ibana di tongatonganasida; diigani nasida, diramoti jala dipaian di linggoman ni pangondingionNa. Songon bangso naung pinaluaNa, ingkon hangoluhonon nasida do haluaon i. Ingkon jouon nasida goar ni Jahowa, lapatanna maribadah nasida tu Ibana; sasadasa sisombaon jala sioloannasida. Dung i pahoton ni Tuhan i ma haluaonnasida i, togihonon jala togutoguonNa nasida sahat tu hangoluan sogot.

Suman tusi, angka naung malua do hita; ai marhite Tondi Porbadia na mangula marhite Barita na Uli i naung dijou jala dijangkon Debata do hita tu huriaNa na songon partanda ni harajaonNa naung songgop tu portibi on. Marhite TondiNa i, diulahon Ibana do torus haluaonta i, ai dipatiur do rohanta, diparbadiai jala dipatongtong di bagasan haporseaon na ture. Dung i, paluaonNa dope hita di ari parpudi, di haroro ni Tuhanta Jesus Kristus na paduahalihon i. Dohot hata na asing, angka naung malua do hita, sedang malua, jala na laho malua. Naeng hot do haluaonta i. Ndang sae di hita holan naung malua, alai ndang malua di tingki on; songon i, ndang sae hita holan malua di tingki on, ingkon malua do tu hangoluan sogot. Asa jumpang i, ingkon hangoluhononta do haluaonta i, joujou hita tu Debata jala maribadah hita tu Ibana sian nasa roha dohot tondinta. Molo songon i, hot ma haluaonta i, jala di na ro arina jangkononNa ma hita tu hangoluan na hot, na saleleng ni lelengna.

jkt.27.04.2010/mvs

Read More..

Exaudia

SERMON JAMITA TU MINGGU EXAUDIA, 16 MEI 2010
Pangh.10:10-16

Patujolo

Panguhum, buku na paduahon di bagian Nebim ni Bibel ni halak Yahudi i ma sejarah ni Israel di angka tingki na parjolo dung habobongotnasida tu tano Kanaan. Nunga salpu si Josua na manogihon jala na manguluhon nasida mamongoti dohot patundukhon tano na pinarbagabaga i, na marbagi tano i marmargamarga jala na pasadahon nasida di bagasan sada parsombaon tu Jahowa (pat.Jos.24). Hasadaon ni parsombaon i do na mangarahut Israel gabe sada hasadaon sosial dohot politis. Alai ndang satia bangso i tu parpadanan i, ai tibu do nasida marbalik gabe marsomba tu angka debata sileban, ajiajian ni halak Kanaan. Ala ni i, gabe sega ma dohot hasadaonnasida di bidang sosial dohot politis. Masibahen bahenna angka marga jala masiboan lehengna be (pat.bd.17-21). Gabe dipasahat Debata nasida tu tangan ni angka panamun dohot musunasida (2:14). Ndang sahali sude, marsasapunguan do, marsasamarga hombar tu hajahatonna be. Ndang sai parduli marga na asing disi, ai nunga sumurut panghilalaan hasadaon i sian bangso i. Alai molo mangangguhi nasida tu Debata Jahowa, disuru do angka panguhum paluahon dohot mamarenta nasida (2:16). Alai songon na nidok ondeng, ndang sasahali sude nasida hona samun, marsasamarga do, panguhum i pe ndang dipabangkit paluahon dohot mamarenta sasude, marsasabagian do. Si Ehud rupani, holan di Benyamin do, si Otniel di Juda, si Jepta di Gilead, dohot na asing. Alai dung monding angka panguhum i sadasada, mulak do muse bangso i tu panundalionna na manghorhon madabu muse uhum ni Debata tu nasida. Songonsongon i do nasida torus, gabe pola naeng so tangihonon ni Debata nasida songon na martaringot di turpuk on.

Di jolo ni turpuk on dipaboa, ditadinghon halak Israel do muse Debata, gabe laho nasida marsomba tu Baal dohot Astarot; tu debata ni halak Aram, Sidon, Moab, Amon, dohot Palistim (10:6). Ala ni i marsigorgor ma rimas ni Debata tu nasida jala dipasahat nasida tu tangan ni halak Palistim dohot halak Moab na pasipalsipal nasida leleng ni sampulu ualu taon (10:7-8). Ro ma muse halak Amon, disola ma sahat tu Juda dohot Benyamin ro di Epraim, gabe targogot situtu ma Israel (10:9). I ma na gabe sibonsiri ni turpuk on.

Hatorangan

Manghilala panginona ni rimas dohot uhum ni Debata, mangangguhi ma halak Israel; mananda ma nasida di dosa dohot hajahatonna, didok ma: “Nunga mardosa hami dompak Ho, ala naung hutadinghon hami Debatanami, jala ala naung marsomba hami tu angka Baal.” Panandaon dohot panolsolion di dosa, i do patujolo ni hamubaon. Diarsakhon dosa i, ditangishon. Ndang holan ala ni hansit ni uhum i, alai lumobi do ala ni pangokuon ni rohana paboa di bagasan hadosaonna i nunga diarsahi Debata. Songon i ma Israel dison, diokui nasida do naung diarsahi nasida Debata marhite panadinghonnasida di Ibana laho marsomba tu angka Baal. Baal (=tuan dalam artian pemilik/owner), i ma dewa na paling dihormati di tano Kanaan, raphon tuanboruna na margoar Astarot. Na dihaporseai do na dua i songon dewa-dewi pertanian manang kesuburan, silehon miak ni tano dohot gabe ni na niula. Na disimbolhon do debata Baal i marhite tiang panombanombaan (2 Raj.17:10; 2 Kron.34:7) na dipajongjong di atas ni tambak (sipata digoar langgatan manang robean; 1 Raj.22:44; 2 Kron.33:3; 34:4; 2 Raj.17:10), i ma tano na pinatimbo songon perlambang ni dewi Astarot. Duansa i na songon perlambang ni perkawinan ni langit do dohot tano, gabe tubu ma suansuanan na marparbuehon na godang. Mardomu tu hamumuba ni cara hidup ni Israel sian peramu hasil gabe petani menetap, mansai manarik do parsombaon tu Baal dohot Astarot i di nasida, gabe ditadinghon ma Jahowa jala laho nasida marsomba tusi. (Taringot tusi, ida ma Sermon tu Minggu Reminiscere, 28 Pebruari 2010 di blog on). Alai nuaeng, mananda ma nasida na dosa do i hape, sisolsolan jala sitadinghononhon.

Ndang pintor ditangihon Debata anggukangguknasida i, alai ditaringoti do jolo angka naung binahenNa tu nasida mamungka sian Misir. Naung dipalua Jahowa do nasida sian pangarupaon ni halak Misir uju i marhitehite tangan na gogo. Ihut tusi, di pardalanan tu tano Kanaan, dipalua do nasida sian tangan ni halak Amori na niuluhon ni rajana si Sihon dohot si Og (4 Mus.21:21 duu). Songon i muse, dung sahat nasida di Kanaan, dipalua do nasida sian lima raja ni halak Amori na marsatahi mandopang nasida [(Jos.10:5). (Amori, goar hatopan do i tu angka bangso parbegu na di tano Kanaan dohot na humaliangna)]. Dung i muse, sian tangan ni halak Amon, i ma pinompar ni si Lot sian boruna siampudan (1 Mus.19:38) na manginganhon tano na di sabola purba ni laut Mate mardompakhon irisanna. Di bagasan pardomuanna tu Israel, jotjot do rap muncul Amon dohot Moab, i ma pinompar ni si Lot sian boruna sihahaan (1 Mus.19:37) na manginganhon tano na di sabola purba ni laut Mate pardangsina. Songon i ma nang di ombas ni angka panguhum, marsatahi do Amon dohot Moab manosak Israel, alai dipalua Debata do nasida marhite si Ehud (3:12 duu). Dung i, sian halak Palistim, i ma sada kelompok na marimigrasi tu Palestina jumolo sian Israel. Bajak laut hian do nasida na mangalului parmianan. Parjolo sahali diuji nasida do mangalului inganan di Misir, alai ndang boi. Gabe tu Kanaan ma nasida ro laos maringanan disi. Angka parmusu na todos di ari do nasida, na mansai jotjot mamorangi Israel sahat ro di tingki ni si David. Nasida do parmulaan ni goar Palestina. Haluaon na martaringot dison, ra, na marhahonaan do i tu tingki ni Samgar (3:31). Ihut tusi, ditaringoti muse haluaon sian halak Sidon. Ra na marhahonaan do i tu hamonangan ni halak Israel maradophon si Jabin raja ni Hazor raphon opat dongana raja na marsatahi mandopang si Josua (Jos.3:1 duu). Ditaringoti dope muse haluaon sian tangan ni halak Amalek, i ma bangso pengembara na manghuasoi parhorsihan Sinai na di parholangan ni Palestina dohot Misir (4 Mus.13:29). Di pardalanan sian Misir tu Kanaan, diporangi nasida do halak Israel (2 Mus.17:8 duu), alai dipalua Jahowa do nasida marhite tangan ni si Josua. Ala ni i gabe marbiasbias do roha ni Debata mida halak Amalek. Di tingki ni Panguhum Ehud, marsatahi do nasida dohot halak Moab raphon Amon mamorangi Israel (3:13 duu); songon i di tingki ni si Gideon marsatahi dohot halak Midian (6:33 duu), i ma pinompar ni si Abraham sian si Ketura (1 Mus.25:2) na maringanan di parhorsihan Arab mardonokhon teluk Akkaba. Na parpudi, halak Maon. Di Septuaginta (LXX, i ma salinan ni Padan na Robi di hata Gorik) singkat ni Maon tarsurat do Midian. Alai ndang adong manuskrip Heber na mandukung i. Sian 2 Kron.26:7 torang do, adong do halak Maon. Ra sada etnis na metmet do i na jonok tu halak Midian dohot Amalek, jala na rap ro laho manggosagosa Israel leleng ni pitu taon paima so dipalua Panguhum Gideon (6:1 duu).

Nang pe naung songon i jotjot ni Debata paluahon Israel, tong do nasida tangkang. Ndang olo nasida muba, alai sai didatdati do maninggalhon Jahowa jala laho marsomba tu angka debata sileban. Ala ni i pola do didok Tuhan i na so olo be Ibana paluahon nasida, alai disuru nasida gariada mangangguhi tu angka debata sileban i, didok do: “Laho ma hamu antong mangangguhi tu debata, angka na pinillitmuna i di hamu, nasida ma nian paluahon hamu di tingki hagogotanmuna i.” Tontu do, ndada situtu ni rohaNa i, alai na paingothon nasida do i taringot tu kepalsuan ni debata sileban i (pat.1 Raj.18:27). Aut na tutu Debata angka i, boasa so tibu paluaon nasida Israel?

Umbege i ndang gabe mandele bangso i. Diparhatopot rohanasida do na patut do nasida rimasan jala uhuman ni Tuhan i. Alai marningot balga ni asi ni roha dohot denggan ni basaNa, barani dope nasida manombahon panopotion dohot pangidoanna, didok: “Nunga mardosa hami, Ho ma mambahen tu hami, hombar tu sandok lomo ni rohaM, asal dipalua Ho hami sadari on.” Manang dia pe na denggan di roha ni Debata na naeng bahenonNa tu nasida, asal malua nasida, rade do nasida manjalo. Tarmasuk pinsangpinsang, ai tumagon do na madabu tu tangan ni Debata asa tu tangan ni jolma. Debata na marpanimbangion do Jahowa, molo manguhum pe Ibana ndang gabe dihalupahon asi rohaNa.

Di ay.16 dipatorang, ndang holan na martangiang Israel jala manghirim di asi ni roha ni Debata na paluahon, alai dipataridahon do parange hamubaon, i ma na paholang angka debata sileban sian tongatonganasida, jala marsomba (maribadah) nasida holan tu Debata hombar tu patik dohot aturanNa. Pangalaho na ingkon do i di angka na masihol di asi ni roha dohot di haluaon na sian Debata. Ndang sintong i, pangidoon jala hirimon asi ni roha dohot haluaon alai sai marsihohot huhut manghaholongi dohot mangulahon dosa. Dison didok, dung muba roha ni bangso i jala mulak nasida tu Jahowa, gabe ditostos ma rohaNa (Hb. watiqtsar napshow/was grieved his soul/sedih jiwaNya) mida pardangolan ni bangso i. Ndang olat ni i, sian bindu na mangihut torang na dipalua Debata do bangso i marhite tangan ni si Jepta (11:1 duu).

Rancangan Homiletis

Exaudi do goar ni minggunta ari on na mandok Tangihon – Alusi. Na marpambuatan do i sian hata ni Ps.27 na mandok: “Sai tangihon ma soarangku, ale Jahowa, molo joujou ahu, asi ma rohaM di ahu, jala alusi ahu.” Mansai hona do i tu turpuk jamita ari on, i ma na taringot tu joujou manang anggukangguk ni halak Israel tu Debata jala ditangihon do nasida. Laos i ma nuaeng na sinosohon ni minggu dohot jamita on, asa joujou hita tu Debata. Boasa ingkon tu Ibana hita joujou, jala aha do siradotanta manghirim alusNa?

Na parjolo, joujou ma hita tu Jahowa ai na mangolu do Ibana jala margogo paluahon hita. Sejarah ni bangso Israel songon na tarsurat di Padan na Robi, sahat tu tingkat na tertentu bolas do cirihonon songon pertarungan ni Jahwisme dohot Baalisme. Sasintongna nian, pertarungan na so di ingananna do i, ai Jahwisme ojak do i di haporseaon di Debata na mangolu, pargogo na so hatudosan na manompa jala na manggomgomi nasa na adong, alai Baalisme ojak di haporseaon di Baal dohot tuanboruna Astarot, debata na mate jala na so margogo. Taringot tusi, mansai tangkas do dipapatar di paraloan ni si Elia tu na 450 malim ni Baal di dolok Karmel. Sian manogot tu hos ni ari, joujou do angka malim i, dirarihi dagingna marhitehite podang dohot hujur huhut joujou mandok: “O Baal, alusi hami!” hape ndang adong na mangalusi. Alai dung martangiang si Elia tu Jahowa pintor tuat do api sian ginjang manganhon pelean na pinarade disi, pola disoksohi soban, batu ro di tano hapeahan ni pelean i, jala didilati aek na humaliang pamelean i (1 Raj.18:21 duu). Nang pe songon i, hira di sude sundut sai masa do pemurtadan sian pangoloion tu Jahowa tu parsombaon tu Baal na manghorhon ingkon marro ni rimas Debata tu bangso i, gabe digadishon nasida tu angka panamun dohot musu na manggosagosa nasida, gabe mansai susa nasida jala targogot situtu. Di hagogotannasida i, joujou pe nasida tu Baal, ndang tarpaluasa nasida. Ndang hinata i antong, ai debata na mate do i. Alai molo joujou nasida tu Jahowa, ditangihon do nasida jala dipalua, ai na mangolu do Ibana jala na satia tu parpadananNa tu bangsoNa.

Apala i ma na parjolo na naeng auhononta sian jamita on, na mangolu do Debatanta i. Ala na mangolu Ibana, dilului do pardomuan dohot parsaoran tu jolma; disarihon do haluaon dohot hasonanganna, ditangihon joujou jala dioloi pangidoanna. Tarpatupasa do sasudena i ala pargogo na so hatudosan Ibana. Alai huhut, ala na mangolu do Debatanta i, ndang lomo rohaNa mida dosa jala ndang marsombusombu Ibana mida angka pangalaosion. Dihagigihon do tahe dosa i, jala sai na uhumanNa do angka na mangulahonsa. Sada sian dosa apala na hinasogohon ni Tuhan i i ma na na mambahen marangkup Ibana songon na niondolhonNa di Patik Parjolo i. Tasorminhon ma i nuaeng tu parngoluonta, boha do pangoloionta di Debatanta i. Di bagasan AnakNa Jesus Kristus naung tuat tu portibi on, nunga dipalua Ibana dohot hita; dijangkon hita tu parpadananNa na dipaloas marhaposan jala marhahirimon tu goarNa, na sai boi joujou jala martangiang tu Ibana. Alai so nda tung gabe marhaposan jala marhahirimon do hita tu na asing, tu angka debata sileban jala na mate? Ndang tarparsoada, sian tingki tu tingki sai masa do gerakan pemurtadan sian pangoloion tu Debata na mangolu i tu parsombaon tu debata sileban angka na kuno isara ni begu, sumangot dohot sombaon, manang tu debata sileban angka na moderen isara ni mammonisme, materialisme, konsumerisme dohot na asing angka na suman tusi. Molo masa na songon i, ndang boi so mandabu uhum Debata, ai ndang gaitgait lumbalumbaNa taringot tu pamalosonNa. Unang sala, uhum ni Debata ndang sai dilaluhon i di bagasan rumangna na humebat jala na luar biasa, isara aek na sumar manang udan barerang, alai jotjotan di bagasan rumangna na biasa, isara jut ni roha ala kegagalan ni panghaposion i. Dihirim na paluaon ni begu i ibana sian sahit, hape ndang; dihirim na gabe sonang ibana bahenonon ni mammon dohot materi i, hape lam susa. Ujungna murak jala mandele. Di pangalaho na songon i naung madabu do uhum ni Debata. Satu-satunya dalan malua ndang lobi sian na joujou tu Debata, ai na mangolu do Ibana, na marpanghilalaan jala na margogo paluahon.

Na paduahon, taradoti ma hamubaon ni roha. Sahali nari, manghilala panginona ni rimas dohot uhum ni Debata mansai targogot do Israel. Lam tu hansitna do panghilalaannasida, ai joujou pe nasida tu angka debata sileban na hinaposanna i, ndang tarpaluasa nasida. Ala ni i, mangangguhi ma nasida tu Debata jala dipaholang nasida angka debata sileban sian tongatonganasida jala marsomba nasida tu Jahowa sambing. Gabe ditostos ma roha ni Debata mida nasida jala dipalua nasida.

I ma muse na mansai ringkot auhononta sian jamita on. Na pauba roha, i ma na humusor jala mulak sian ngolu na manundalhon jala manadinghon Debata tu na mandompakhon jala mandapothon Ibana pangalaho na ingkon do i di angka na manghirim di panangihon dohot alus ni Debata di joujouna. Ndang sintong i, pangidoon jala hirimon asi ni roha dohot haluaon sian Debata alai huhut sai haholongan dosa jala ulahonon hajahaton, alai ingkon adong do hamubaon, i ma na manadinghon dosa dung i humusor tu pangoloion di Debata. Ninna roha, apala i ma sada na mansai ringkot parrohahononta songon warga ni negara bangsa Indonesia. Mardapotdapot bencana mangonai tu bangsonta on, lalo bolon, tsunami, banjir bandang, tanah longsor, lumpur, tao mapulha dohot na asing. Lam maol do nuaeng on na mangolu, ai lam arga do situhoron jala lam torop na pogos. Mangadopi i martangiang do hita, tapangido haluaon sian Debata; diparbisuhi pamarenta patupahon na dumenggan laho mangurupi korban, mengentaskan kemiskinan dohot menyejahterakan rakyat. Na denggan ma i. Alai lobi sian i ingkon muba do hita. Ndang tarsoadahon agia ise na mansai godang do dosa ni bangsonta on, baik institusi manang pe marsadasada. Targoar do hita bangso na marugamo, alai di parngoluon siapari mansai torop do na talpe tu na mardebatahon mammon manang materi. Ala ni i gabe godang ma na margabus, na mangangkali, na menyeleweng, manang na korupsi. Godang do tutu na so korupsi, alai ra, ala na so adong do kesempatanna. Holan adong kesempatanna, tong do gabe mongkus. Hamubaon i ndang sae holan dohonon manang bahenon gabe slogan. Di angka taon na salpu rupani, mangadopi angka bencana na mardapotdapot i tar godang do pamarentanta manaringoti tobat nasional. Alai holan pencitraan diri do i, ndang adong gaung manang hataridaanna di parngoluon ni bangsonta, ai lam rarat do penyelewengan, lam godang markus dohot mafia songon na marmullopan di angka tingki na parpudi on. Ia naeng alusan jala tangihonon ni Debata joujou dohot tangiangta ingkon radotan jala ulahononta do hamubaon ni roha i.

jkt.19.04.2010/mvs

Read More..

Pesta Hananaek

SERMON JAMITA TU PESTA HANANAEK, 13 MEI 2010
Luk.24:44-53

Patujolo

Sian na opat panurat ni evangelium i, holan si Markus dohot si Lukas do na manurathon barita taringot tu hananaek ni Tuhan Jesus tu banua ginjang. Mansai jempek. Di Markus holan saayat (16:19), di Lukas dua ayat (24:50-51). Sian na dua evangelium i, dapot hita do kesan paboa na donok tu ari haheheon i (marsogotna?) do hananaek i. Alai di Ulaon ni Apostel dipatangkas si Lukas do muse na adong dope opat pulu ari nari Tuhan i mian raphon siseanNa, dung i pe asa tarhinsat Ibana tu surgo (Ul.1:3). Tingki parholangan i dipangke Tuhan i do patandaphon diriNa mangolu tu siseanNa i marhite hapapatar dohot pangajarionNa songon na masa di bagian parjolo ni ari turpuk on. Na masa do i di bagas parpunguan ni sisean i, dung hamumulak ni na dua sisean na sian Emmaus i.

Hatorangan

Tagan so hamamasana, nunga jotjot dipaboa Jesus na ingkon manaon do ibana jala mate, dung i mulak mangolu di ari patoluhon. Dipatorang do huhut, na hombar do i tu tahi ni Debata, songon naung binagabagahonNa hian. Alai ndang tarjalo sisean i non i, ndang dihaporseai. Dung pe masa asa dihaporseai. Dihaporseai, mandok diparhatutu selaku peristiwa alamiah, ndang songon karya ilahi manang bagian ni sangkap hatuaon ni Debata na taringot tu haluaon ni jolma. Ala ni i, ndang porsea nasida na hehe do Ibana muse. Dung hehe Ibana jala papatar diri mangolu, nang pe so haantusan nasida peristiwa haheheon i, ndang anggo tarsoadahon nasida, gabe dihaporseai nasida ma i songon sada peristiwa na supra natural, alai ndang haantusansa anggo pardomuan ni i tu bagabaga i (pat.Joh.20:9) dohot tu pelaksanaan ni sangkap hatuaon ni Debata. Ala ni i, ringkot dope tingki na relatif ganjang sipangkeon ni Jesus naung hehe jala mangolu i laho patoranghon i tu nasida. Di turpuk on, ditaiti Tuhan i ma rohanasida tu naung hinatahonNa tagan so hamamateNa dope, didok: “On ma hatangKu na Huhatahon tu hamu uju rap dope Ahu dohot hamu.” Marhite i hira na naeng dohononNa do tu siseanNa i: “Hamamate dohot haheheonHu naung niidamuna, hasasaut ni boaboangKu na tu hamu i do i tagan so mate dope Ahu.” Ia dihatai Jesus pe hamamate dohot haheheonNa andorang di ngoluna, ndada na sian roharohaNa i, alai na sian tahi ni Debata do i songon na naung binagabagahonNa hian di Surat i. Ala ni i, tu Buku na Badia i do rohanasida ditaiti (pat.24:25-27). Mardomu tusi, ditaringoti Jesus do dison na tolu pambagian ni Buku na Badia ni Jahudi (na tagoari nuaeng on Padan na Robi), i ma Patik manang Torah (1 Musa-5 Musa), Panurirangon manang Nebim (Josua-Rajaraja minus Rut), dung i Surat manang Ketubim (Rut dohot angka na asing i). Sian bagian na parpudi on Psalmen ma sada na umarga. Ala ni i, sipata, dipangke do i songon na ‘mewakili’ sandok Ketubim. Di na tolu bagian i jumpang do panindangion taringot tu haroro, taringot tu sitaonon, hamamate dohot haheheon ni Kristus i. Dibuhai Jesus ma roha ni siseanNa i mangantusi na tarsurat i, didok: “Songon i do tarsurat hian, manaon na porsuk do Kristus i jala hehe sian na mate di ari patoluhon.”

Na gabe Barita na Uli do sitaonon dohot hamamate ro di haheheon ni Kristus i, ai hombar tu tahi ni Debata na gabe haluaon do i di hajolmaon. Ndang holan tu sapunguan jolma (partikular), tu sandok hajolmaon do (universal). Na dua garis i rap tarida do di Padan na Robi. Sian mulana i dope, na marhahonaan tu haluaon ni sandok hajolmaon do bagabaga na tu si Abraham (1 Mus.12:3c), alai andorang so sahat dope tusi, holan tu si Isak do jolo, ndang dohot tu si Ismael; dung i, holan tu si Jakob muse, ndang dohot tu si Esau; holan tu Israel muse, ndang dohot tu Edom, dohot satorusna. Alai di na jumpang tingkina, ingkon baritahononhon do i tu sude bangso. Haroro dohot pangulaon ni Jesus Kristus do hagogok ni tingki i. Hombar tusi, dison, dipabangkit Jesus ma sisean i gabe sitindangiNa, didok: “Hamu do manghatindanghonsa.” Jesus Kristus do pamusatan ni Barita na Uli i. Ibana do sihatindanghononhon. Manang ise na porsea di Ibana na marhataridaan di hamubaon ni rohana, jumpangan ma i di hasesaan ni dosa dohot haluaon. Ulaon panindangion i ingkon pungkaon nasida ma i sian Jerusalem, dung i tu Judea, tu Samaria dohot tu ujung ni tano on (pat.Ul.1:8b).

Bahen hasasaut ni sangkap parsuruon i didok Jesus tu sisean i: “SuruonHu ma songgop tu hamu na pinarbagabaga ni Damang.” Tondi Porbadia i do na nidokNa disi. Taringot tu haroro ni Tondi Porbadia i pe naung diparbagabaga Debata hian do i di Padan na Robi. “SuruonHu,” ninna. Marhite pandohan i dipungka Jesus paradehon sisean i tu parsirangan na naeng masa satongkin nari. Manaek ma Ibana tu banua ginjang, tu inganan ni Debata, jala sian i ma Ibana marsuru Tondi Porbadia, hagogoon na sian ginjang i. Na gabe gogo do Tondi Porbadia i di sisean i laho manghatindanghon Barita na Uli i. Marhite Tondi Porbadi i, lam togu ma nasida marhaporseaon, lam tomos rohana gabe ndang mabiar manghatindanghon Barita na Uli i. So marhite Tondi Porbadia i ndang margogo nasida. Jamitanasida pe songon i, so marhite Tondi Porbadia i ndang tagamon margogo. Ala ni i ingkon mian nasida di Jerusalem, ndang jadi morot sian huta i, lapatanna ndang jadi pungkaonna manindangi so jolo dijalo hagogoon na sian ginjang i.

Sian i, ditogihon Tuhan i nasida ruar jala mardalan dompak Betania. Dalan na manuat do i jolo tu rura Kidron, dung i manaek mangireire dolok Jetun dompak Betania. Dung i, di sada inganan di dalan i, dipaherbang ma tanganNa mamasumasu sisean i. Jala di tingki na mamasumasu i sirang ma Ibana sian nasida jala tarhindat tu ginjang. Diantusi sisean i do na so tu dia Tuhan i, ndang na mago, alai na manaek tu banua ginjang do, tu ingananNa marhabangsa, marhasangapon dohot Debata AmaNa. Ala ni i, disomba nasida ma Ibana. Dung i mulak ma nasida tu Jerusalem. Ndang marsak nasida ala ni parsirangan i, ndang marhohondo songon halak na agoan. Parjumpangannasida dohot Jesus naung hehe jala mangolu i, dohot pangajarionNa saleleng na opat pulu ari i nunga singkop mangalehon pangantusion tu nasida taringot tu sangkap hatuaon ni Debata Ama i na di bagasan dohot marhite AnakNa, Jesus Kristus i, gabe marlas ni roha situtu ma nasida. Dung i tongtong ma nasida di joro i mamujimuji Debata. Ra, di sada rumah turutan ni joro i do nidokna. Diulahon nasida do i huhut dalam rangka penantian di haroro ni Tondi Porbadia i.

Rancangan Homiletis

Di ari on, taingot jala tahalashon do hananaek ni Tuhanta Jesus Kristus tu banua ginjang. Sian sude pesta ni huria, Pesta Hananaek ma apala na ‘ummetmet.’ Tapamanat be ma jolo, Ari Hamamate, siangkup ni na marminggu adong dope punguan na hohom dohot ulaon na badia. Paskah dipestahon dua ari. Pentakoste pe dua ari. Lumobi Natal, mansai ribur jala marariari. Sabalikna do anggo Hananaek, ‘metmet.’ Di roha ni na deba tahe, hira na so adong do lapatan dohot gunana asing ni na marlibur. Alai sasintongna, tung so boi do leas rohanta di Pesta Hananaek i. Sapala naung tajalo haadongonna di taon parhuriaon, ingkon dos do i rajumanta tu angka pesta huria na asing i. Asa boi sahat hita tu na songon i, ingkon mansai tangkas do di hita lapatan ni hananaek i jala dia ma na nidok ni i tu hita. Apala i ma na naeng pamanatonta marojahan tu turpuk di hita ari on.

Andorang so mate dope Jesus nunga jotjot ditaringoti paboa na ingkon manaon do Ibana jala mate dung i hehe. Alai ndang haantusan sisean i dope i. Dung saut Ibana mate jala hehe muse, tong do ndang haantusan nasida i. Dung pe dipapatar diriNa tu nasida huhut diajari nasida leleng ni opat pulu ari asa mangantusi nasida paboa na patulushon na nidok ni surat i do hape haroro dohot sitaononNa i, hamamate dohot haheheonNa i; na patulushon sangkap hatuaon ni Debata na taringot tu haluaon ni hajolmaon. Dung i dison, di hananaekNa i dihatindanghon ma tu hita, na laos Ibana naung ro jala manaon i, na mate jala na hehe i do na manaek i.

Apala disi ma berengonta lapatan dohot Barita na Uli ni hananaekNa i di hita. Sahali nari, Ibana na nidok Patik dohot Panurirangon ro di Psalmen i, i ma Kristus naung ro tu tano on, na gabe jolma jala manaon, na mate jala na hehe i do na manaek i; Jesus Kristus na marhitehite goarNa hamubaon ni roha mangalap hasesaan ni dosa dibaritahon tu saluhut bangso. Manaek do Ibana sian adopan ni sisean i, manaek tu surgo, tu inganan ni Debata. Na marlapatan ma i, ulaon haluaon na pinatupaNa i di tano on ndang marujung di portibi on. Aut holan ro Ibana, manaon jala mate dung i hehe alai ndang manaek tu surgo, gantung do haluaonta i, ndang sahat tu hasahatanna. Disi, marlaku ma hata ni si Paulus na mandok: “Anggo holan di tano on hita manghirim di Kristus i, jolma na dumangol do hita sian saluhutna” (1 Kor.15:19). Alai mauliate ma di Debata, ai manaek do Ibana tu surgo. Na marlapatan ma i, marudut do haluaonta i jala mandapot panggohionna di surgo, di inganan ni Debata. Na laos marlapatan ma i, surgo ndang inganan na tartutup be i di hita, inganan naung ungkap do, naung boi bongotan jala ingananta. Molo jolma Jesus i nunga manaek jala bongot tusi, hita pe nunga boi bongot jala mian disi. Patujolonta do Ibana manaek, laho mangungkap pintu ni surgo jala paradehon ingananta disi. Di na jumpang tingkina, sai na ro do Ibana muse mangalap jala pabongothon hita tusi. Na manghirim jala na maimaima do hita nuaeng disi.

Songon halak angka na manghirim jala na maimaima disi, ndang boi hita holan na so huhut manatapi dompak langit, adong do na ingkon patupaonta. Marojahan di turpuk di pestanta ari on, adong do manang na piga tona ni hananaek i na ingkon parateatehonon jala ulahononta, i ma:

Parjolo, marsomba Jesus naung manaek i. Di ombas na tarhinsat Tuhan i, disomba sisean i do Ibana. Parsombaon sisongon i ingkon gabe sikap ni ngolunta do i. Ingkon, ai di hananaekNa i dipatandaphon Debata do Jesus Kristus i Raja; Raja na marhabangsa jala na marhuaso raphon Ibana; Raja ni angka raja jala Tuhan ni angka tuan; Rajanta jala Tuhanta, na manghuasoi jala na manggomgomi ngoluna di tano on. Hombar tusi na tarjou do hita asa unang mangunduk jala mangoloi tu manang ise na asing. Tutu ndang diorai hita mangunduk tu pamarenta. Sabalikna do tahe, ingkon unduk do hita tu pamarenta na marsahala (Rom 13). Alai pangoloionta tu pamarenta ingkon peakhononta do i di toru ni sondang ni pangoloionta tu Kristus i. Taingot jala tahangoluhon ma na nidok ni apostel i: “Ingkon oloan do hita di Debata asa di jolma” (Ul.4:29). Tapamanat ma nuaeng dirinta, boha do pangoloionta di Kristus, Tuhan jala Rajanta i? Boha do hita manomba Ibana di bagasan dohot di ruar ni parmingguonta?

Paduahon, marlas ni roha ala ni Jesus na manaek i. Mulak do angka sisean i tu Jerusalem marlas ni roha situtu. Ndang songon na agoan nasida di Tuhan na manaek i, ndang marsak nasida manang marhohondo, marlas ni roha situtu do. Hita pe, ingkon las do rohanta marningot Jesus, Rajanta jala Tuhanta naung manaek i. Ciri khas ni harajaon ni Debata do halalas ni roha i. Si Paulus mandok: “Ai ndada sipanganon manang siinumon harajaon ni Debata; hatigoran do dohot hadameon dohot las ni roha di bagasan Tondi Parbadia” (Rom 14:17). Hombar tusi, ingkon gabe ciri khas ni na porsea do halalas ni roha i. Hombar tusi dipasingothon si Paulus do hita: “Marlas ni roha ma hamu tongtong di bagasan Tuhan i! Huulahi ma mandok: Marlas ni roha ma hamu! Pabotohon hamu ma habasaronmuna tu saluhut halak! Donok do Tuhan i” (Pil.4:45). Tongtong do jonok Jesus naung manaek i tu hita. Nang pe so tarida, marhitehite hata dohot TondiNa, hadir jala mian do Ibana tongtong di tongatonganta dohot mamasumasu hita. Tabege nangkin, manaek do Tuhanta i tongon di na mamasumasu siseanNa i. Ndang didok, di tingki na manek i gabe dipalenduk ma tanganNa i, ndang; torus do herbang. Na marlapatan ma i, torus do Ibana mamasumasu siseanNa i. Songon i ma nang nuaeng, torus do Ibana mamasumasu hita. Di hajojonokNa i, di kehadiran, parmianon dohot pasupasuNa i sai boi ma hita tongtong marlas ni roha. Tapamanat ma dohot i di ngolunta, aha do halalas ni rohanta na umbalga? Jesus na manaek i do manang sipanganon dohot siinumon; hepeng do manang sinadongan? Agustinus mandok: “Ho do Tuhan, ndang pasupasuMi!” Na nidokna disi, Tuhan i sandiri do sintuhu ni halalas ni roha na kristen, ndada pasupasuNa i, isara sipanganon, siinumon, hepeng, arta, dohot angka na asing.

Patoluhon, pasangaphon Debata. Sahat di Jerusalem, tongtong do sisean i mian di joro i pasangaphon Debata. Diulahon nasida do i laho maimaimahon panggohion ni bagabaga ni Tuhan i na mandok: “Jala suruonHu ma songgop tu hamu na pinarbagabaga ni Damang. Alai mian ma hamu di huta on, paima disolukhon hamu hagogoon na sian ginjang.” Hita pe, ingkon ulahononta do pamujion sisongon i. Alai taingot huhut, pamujion i ndang hatauon ni jolma i, alai haboion na pinasupasuhon ni Debata do i di bagasan parsaoranta tu Ibana marhite hata dohot TondiNa. Ala ni i mansai tangkas do pardomuan ni pamujion dohot bagas joro manang gareja dohot parmingguon na dipatupa di bagasanna. Taboto do, parmingguon sarana na mansai penting do i laho patubegehon dohot manuanhon hata ni Debata. Na mangula do Tondi Porbadia i pangoluhon jamita na dipatubegehon di bagasan hata ni jolma asa gabe tutu situtu i tarbege jala mangula songon hata ni Debata di hita angka na umbegesa. Hata i ma siboanonta mulak, na mangonjar jala patauhon hita manggohi ngolunta dohot pujipujian di Debata. So marhite onjar ni hata i, simbil do pamujion i tu na asing, tu na tinompa rupani, tu haholongon manang diri ni sasahalak. Rupani, di sada ende di hata Batak didok do:

“Molo hutatap ho sian na dao, o Tao Toba na tio,
boi do sonang rohangkon, malambok pusupusungki.
Tu ho do ahu paboahon na hansit na di rohangki,
di lambungmi ahu maruari rap dohot donganhi ...”

Disi dipuji do Tao Toba songon sipasonang roha, sipalambok pusupusu, pangalualuan di na hansit, dohot hasahatan ni uari. Tangkasna, dipuji do Tao Toba i songon tuhan. Songon i ma pujian i simbil molo so sian onjar ni hata ni Debata. Ala ni i dipaingot turpuk on do hita asa lam taargahon parpunguan manang parmingguon i. Manang ise na losok rohana marminggu dohot manangihon hata ni Debata unang ma gabe dipaotooto dirina mandok naung gabe pujipujian dohot hamuliaon ngoluna di goar ni Debata.

Paopathon, manghatindanghon goarNa. Mandapothon hananaekNa i didok Jesus do tu siseanNa i: “Hamu do manghatindanghonsa.” Manghatindanghon Barita na Uli i do na nidokNa disi. Ibana sandiri do sintuhu ni Barita na Uli i. Ala ni i, na manghatindanghon Barita na Uli i dos do i dohot na manghatindanghon goar Jesus, ojahan ni haporseaon asa tu hamubaon jala jumpangan di hasesaan ni dosa dohot haluaon. Tu sangkap i dohot do hita dipadiri jala disuru. Ingkon hiras ma rohanta mangulahon i, ringgas jala burju. Tondi Parbadia do gogonta mangulahon i. Molo ndang songon i, molo holan na nionjar ni semangat manang fanatisme hajolmaon do, unang longang jala tarsonggot hita molo gabe songon na mangalehon arta na badia i hita tu angka jurangga, manang na mandanggurhon mutiha tu jolo ni angka babi, gabe dilotloti i dohot patna, laos humusor manaroso hita (pat.Mat.7:6). Antong, unduk ma hita tu onjar dohot panogihon ni Tondi i, asa botoonta na patut sipatupaonta di na manghatindanghon goar ni Tuhanta Jesus naung manaek i.

jkt.12.04.2010/mvs

Read More..