18 Trinitatis

SERMON JAMITA TU MINGGU 18 TRINITATIS, 3 OKTOBER 2010
Eps.5:22-33

Patujolo

Mangihuthon alamatna (1:1), surat on ditongos si Paulus do tu huria Epesus. Sian Ulaon ni Apostel torang, ibana do na umpungka huria i. Denggan do pardomuanna tu huria i, hea ibana maringan disi dua taon. Alai sian surat i, jumpang do kesan na so ditanda ibana dope alamat ni suratna i (pat.1:15). Antong ise do hasahatan ni suratna on? Toropan ahli mangarajumi, sada surat edaran do on tu angka huria na jongjong humaliang Epesus. (Di naskah angka na tumua, ndang tarsurat goar Epesus, jala surat on ndang maralamat). Na tubu do angka huria i sian ulaon sending na pinatupa ni huria Epesus. Dung dibege si Paulus i, ditongos ma surat on tu nasida. (Ra, marhite huria Epesus). Dung dijaha di sude huria, dipaulak jala disimpan ma i di Epesus (songon huria sabungan). I ma ra alana asa gabe margoar i surat Epesus.

Tardok pujipujian di asi ni roha ni Debata do isi ni surat on. Dung pamungkaan pintor songon aek na marbuhalbuhal do pujipujian i di bagasan angka pandohan na ganjang na seolah-olah enggan untuk diakhiri. Di bagasan pujipujian i jumpang do poda angka na fundamental. Turpuk ari on (mamungka ay.21) manaringoti parsaripeon ni halak Kristen di toru ni sondang hatiuron ni pardomuan ni Kristus dohot huria i. Na tarrajum do i tu hasadaon na umbidang, i ma na taringot tu Kristus, huria dohot parsaripeon (5:22-6:4). Di ay.32, dihonahon si Paulus do parsaripeon i tu pardomuan ni Kristus tu huria i. Hombar do i tu panindangion ni Padan na Robi na mansai jotjot manggombarhon pardomuan ni Debata dohot bangsoNa na di parpadanan dolok Sinai i tu parsaripeon; Debata tuandoli, jala Israel tuanboruNa (Jes.54:4-5; 62:4-5; Hes.16:7-8). Suang songon i do di Padan na Imbaru digombarhon do Kristus i songon pangoli, huria i oroanNa. Na maimaima do huria i di haroro ni Kristus asa bongot tu hasampuran rea, i ma parsaoran na hot saleleng ni lelengna na di langit dohot tano na imbaru.

Hatorangan

Sahali nari, marojahan tu panindangion ni Padan na Robi, dihonahon Apostel Paulus do pardomuan ni baoa dohot parompuan di parsaripeon i tu pardomuan ni Kristus tu huria i. Daging ni Kristus do huria i; Ibana do Ulu jala sipangolu daging i. Ulu do mamarenta daging, ndada sabalikna daging mamarenta ulu. Suang songon i ma di pardomuan ni Kristus tu huria i, Ibana do na mamarenta huria i jala hombar tusi ingkon unduk do huria i tu Ibana. Ndang pangoloion na mate, na mangolu do; ndang pangoloion hatoban, na bebas do jala na sian roha na ra, na di bagasan biar, haholongon dohot habadiaon na tama. Martiruan tusi, di bagasan parsaripeon i baoa i do ulu ni pardihutana. Laos baoa i do (umumna) na pangoluhon parsaripeon i dalam artian na manarihon manang na mangalului angka na ringkot bahen hangoluannasida na saripe. Marpardomuan tusi ma dipasingothon dison asa dioloi angka parompuan baoana be songon pangoloina di Tuhan i. Rumang ni pangoloion i do na niondolhonna disi, ndada na mandok na gabe tuhan ma angka baoa di parompuan di parsaripeonna be, ndang. Alai songon pangoloi ni huria i di Kristus Ulu i, Tuhan jala Rajana i, songon i ma angka parompuan mangoloi sinondukna be, di bagasan pangoloion na mangolu, na bebas jala na sian sandok roha na ra, na di bagasan biar (33), haholongon ni roha dohot habadiaon na tama.

Pangoloion ni parompuan i ndang hak istimewa ni baoa i na so mangigil manang aha sian ibana, ndang. Parbue ni holongna do i, balos ni paneahon dohot pangalehonna di dirina tu pardihutana. Hombar tusi ma dipasingothon dison tu angka baoa asa manghaholongi pardihutana be. Tiruan manang model ni panghaholongion i, i ma panghaholongion ni Kristus di huria i. Na luar biasa do holong dohot panghaholongion ni Kristus i, agung, ndang tagombarhon holan marhite sada hata manang pandohan na jempek. Songon i ma dison, dipuji jala dipahebaheba Apostel Paulus do haholongon dohot panghaholongion ni Kristus Jesus i tu manang piga pangalaho. Na parjolo, holong dohot panghaholongion na manghophop. Dilehon Kristus do diriNa manghophop huria i, diseahon do hosaNa di hau pinarsilang laho manobus dohot paluahon angka na di Ibana. Songon i ma angka baoa patut manghaholongi pardihutana be marhitehite holong dohot panghaholongion na manghophop, holong dohot panghaholongion na mangalehon diri tu pardihutana, na rade sumeahon hosana demi dongan saripena. Na paduahon, holong dohot panghaholongion na pabadiahon. Panghophopon ni Kristus i, panobusion dohot haluaonNa i disagihon do i marhitehite Tondi Porbadia na mangula marhitehite Barita na Uli i. Angka na porsea di Barita na Uli jala manjangkon Ibana di bagasan haporseaon diparuar do sian hadosaonna, diparbadiai jala diiasi, dipapungu di bagasan sada huria na badia asa mangolu di bagasan habadiaon. I ma na diulahon jala disahaphon di bagasan dohot marhitehite pandidion na badia na di bagasan dohot na marhitehite aek dohot hata i. Dr.Martin Luther mandok: “Ia pandidion i ndada holan sambing, aek na marsaor hata ni Debata do aek i; ai tona ni Debata do umbahen na binuat aek i.” Hombar do i tu na nidokna di turpuk on: “Diiasi marhitehite na mandidihon aek di bagasan hata i.” Bahen aha i? Padirihon di Ibana sada huria na sangap, na so marlindang, na so marhalingking, na so marhahurangan jala na so hasurahan. Songon naung tinaringotan di jolo i, i ma na gabe oroanNa, sijangkononNa tu hasampuran rea na di tano dohot langit na imbaru na so mansohot saleleng ni lelengna. Di dia i jumpang? Alusna, di huria na so tarida i. Songon i ma angka baoa di parsaripeon i patut manghaholongi pardihutana be marhitehite haholongon dohot panghaholongion na pabadiahon. Na badia do parsaripeon i. Jadi, manghaholongi parompuan songon dongan saripe na marlapatan do i manjangkon ibana asa rap mamongoti habadiaon. Siradotan jala siramotanna do habadiaon i asa unang tarramun bahenon ni agia aha pe. Ndang holong i goaron jala ndang panghaholongion i molo gabe na manarat manang mandabuhon do tu hahodaron dohot tu haleaon. Holong dohot panghaholongion na tutu ingkon na boi do i pabadiahon ngolu secara menyeluruh. Na patoluhon, holong dohot panghaholongion na marmudumuduhon jala na painuinuhon. Sahali nari, adong do pardomuan ni Kristus tu huria i, pardomuan partondion na mansai tangkas. Paboa tangkasna, pola do dipatudos tu pardomuan ni ulu tu daging. Kristus ulu, huria i dagingNa. Songon ulu, dirajai Kristus do huria i jala diparenta songon ruas ni dagingNa; diondingi jala diramoti di bagasan holong ni rohaNa, diparmudumudu jala dipainuinu asa unang mago. Suang songon i ma angka baoa di parsaripeon i patut manghaholongi dongan saripena be songon dagingna sandiri. Di bagasan dohot marhite parsaripeon i naung gabe sada daging do nasida. Taringot tusi naung diaturhon Debata do i sian mulana i, ai didok do, tadinghonon ni baoa do amana dohot inana mandongani jolmana, jadi sada sibuk nasida (1 Mus.2:24; pat.33). Ndang hea dihosomi jolma dagingna sandiri. Suang songon i, ndang patut hosoman ni baoa dongan saripena manang patutoruonna gabe songon siramoti jabuna sambing, silompa indahanna, dohot siparorot anakhonna. Tung apala di holong dohot panghaholongionna di dongan saripena i tahe ibana mangulahon holong dohot panghaholongionna tu dirina sandiri.

Rancangan Homiletis

Songon na boi jahaonta di Almanak ni hurianta, minggunta on, 18 dung Trinitatis tongon do Ari Parningotan di Hatutubu ni HKBP. Sasintongna nian, 7 Oktober do ari hatutubu ni hurianta. Na marpambuatan do i sian rapot ni opat pandita na sinuru ni Kongsi Barmen di ari 7 Oktober 1861 di Sipirok. Mamungka sian i mardalan ma ulaon sending na taratur rapi di tano Batak. Mansai arga do na masa i di roha ni hurianta. Hombar tusi, ditontuhon ma i gabe ari hatutubu ni HKBP. Manjujur sian i, di ari Kamis na ro, boho ma 149 taon umur ni hurianta. Songon i do somalna, molo so tongon i tu ari Minggu, ingoton ma i ari Minggu na jumonok tusi, di jolo manang di pudina. Asing ma molo di angka ombas Jubileum, isara pasaratus manang pasaratuslimapulutaonhon, ingoton jala pestahononhon ma i tongon di arina.

Alai ra, songon na so apala hombar do tu panghilalaanta, ai tongon di ari ulang tahun ni hurianta on, taringot tu parsaripeon do na diturpukhon gabe jamita di parmingguanta. Aha do hahonaan ni jamita parsaripeon tu hatutubu ni huria? Sambolus, hira na so adong do. Alai sasintongna adong do, jala pardomuan na mansai tangkas do i. Manang di dia pe di portibi on, parsaripeon manang keluarga songon lanjutanna do na dirajumi songon basis ni masyarakat. Di tonga ni keluarga do ganup warga ni masyarakat i ditubuhon; disi do ganup dipatureture, diparmudumudu jala dipagodanggodang; ditogutogu jala diajarajari dalam rangka proses sosialisasi dohot enkulturasi tu masyarakat dohot budayana. Huria pe, songon i do pangantusionna. Parsaripeon manang keluarga do na dirajumi basis ni huria, unit terkecil manang huria na ummetmet na manjadihon huria marsadasada dohot hatopan. Songon na nidok mangonai masyarakat, di tonga ni keluarga do ganup ruas ni huria i ditubuhon; disi do ganup dipatureture, diparmudumudu jala dipagodanggodang asa gabe jolma na tang; disi do ibana ditogutogu jala diajarajari asa gabe halak na hasea, na bisuk jala na marroha. Keluarga do huria na parjolo di ganup halak; disi do ama dohot inana na songon parhalado apala na parjolo mangajarhon Barita na Uli dohot manuanhon haporseaon asa tartopa ganup gabe halak na porsea jala na marmoral, gabe ruas ni huria na burju jala na satia. Molo togu jala gogo sude keluarga, togu jala gogo do dohot huria i.

Apala disi ma nuaeng idaonta pardomuan ni jamita on tu ari ulang tahun ni hurianta. Gok ma 149 taon umur ni HKBP. Di umurna na songon i, dihirim rohanta do naeng lam togu huria i, lam margogo mangulahon panjouonna, i ma na marsaor, na manindangi dohot na marhobasi. Ia naeng jumpang i, ingkon na parjolo do angka keluarga togu jala gogo di parsaoranna, di panindangion dohot di parhobasonna be. Ala ni i, di na naeng mamongoti umur ni hurianta na pasaratuslimapulutaonhon, mansai ringkot pamanatonta manang na boha do sasintongna hakiki dohot ruhut ni pardongansaripeon ni halak kristen. Na songon pangarataion ma i di angka naung marsaripe, pangaradeon di angka na naeng marsaripe.

Dihonahon Apostel Paulus do pardomuan ni baoa dohot parompuan di parsaripeon i tu pardomuan ni Kristus tu huria i. Na marlapatan ma i, pardomuan ni Kristus tu huria i do na gabe model ni pardomuan ni baoa dohot boruboru di parsaripeon. Mansai tangkas do pardomuan ni Kristus tu huria i. Paboa tangkasna, pola do dipatudos tu pardomuan ni ulu dohot daging. Kristus do ulu ni huria i, dagingNa do huria i. Songon i ma di parsaripeon i, mansai tangkas do pardomuan ni baoa i tu pardihutana; sisada sibuk do nasida duansa. Songon sada hasadaon, adong do sada pangarahut na homi na pasadahon nasida, i ma haholongon ni roha i. Hombar tusi, mulakulak do dipasingothon si Paulus di jamita on tu angka baoa asa manghaholongi pardihutana be, didok: “Hamu angka baoa, haholongi hamu ma pardihutamuna be songon Kristus, na mangkaholongi huria i.” Boha do huroha holong dohot panghaholongion ni Kristus di huria i? Na parjolo, dihaholongi do huria i mahite holong dohot panghaholongion na manghophop. Dilehon do diriNa jala diseahon hosaNa di hau pinarsilang laho manobus jala paluahon angka na di Ibana. Na paduahon, holong dohot panghaholongion na pabadiahon. Panghophopon ni Kristus i, panobusion dohot haluaonNa i disagihon do i marhitehite Tondi Porbadia na mangula marhitehite Barita na Uli i. Angka na porsea di Barita na Uli jala manjangkon Ibana di bagasan haporseaon diparuar do sian hadosaonna, diparbadiai jala diiasi, dipapungu di bagasan sada huria na badia asa mangolu di bagasan habadiaon; dipadiri gabe oroanNa na sangap, na so marlindang, na so marhalingking, na so marhahurangan jala na so hasurahan. Na patoluhon, holong dohot panghaholongion na marmudumuduhon jala na painuinuhon. Nunga nidok, Kristus do ulu ni huria i. Songon ulu Ibana, dirajai do huria i jala diparenta, diondingi, diramoti, diparmudumudu jala dipainuinu songon ruas ni dagingNa di bagasan holong ni roha.

Songon i ma angka baoa di bagasan parsaripeon i patut do manghaholongi pardihutana be marhite holong dohot panghaholongion na parjolo: Na manghophop, na rade mangalehon diri jala sumeahon hosana demi pardihutana; na so patujolohon dirina sandiri, alai na rade manaon ala ni dongan saripena. Na paduahon, na pabadiahon. Na badia do parsaripeon i. Jadi, manghaholongi parompuan songon dongan saripe na marlapatan do i manjangkon ibana asa rap mamongoti habadiaon. Siradotan jala siramotanna do habadiaon i asa unang tarramun bahenon ni agia aha pe. Ndang holong i goaron jala ndang panghaholongion i molo gabe na manarat manang mandabuhon do tu hahodaron dohot tu haleaon. Holong dohot panghaholongion na tutu ingkon na boi do i pabadiahon ngolu secara menyeluruh. Na patoluhon, na mamudumuduhon jala painuinuhon. Di bagasan parsaripeon i naung gabe sada daging do baoa dohot boruboru i. I do hatontuan ni Debata sian mulana i, ai didok do, tadinghonon ni baoa do amana dohot inana mandongani jolmana, jadi sada sibuk nasida. Ndang hea dihosomi jolma dagingna sandiri. Suang songon i, ndang patut hosoman ni baoa dongan saripena manang parsineangonna gabe songon siramoti jabuna sambing, silompa indahanna, siparorot ianakhonna dohot angka na asing. Tung apala di holong dohot panghaholongionna di dongan saripena i tahe ibana patut manghaholongi dirina sandiri.

Songon dia do ia parompuan? Sahali nari, dihonahon Apostel Paulus do pardomuan ni baoa dohot parompuan di parsaripeon i tu pardomuan ni Kristus tu huria i. Daging ni Kristus do huria i; Ibana do Ulu jala sipangolu daging i. Ulu do mamarenta daging, ndada sabalikna daging mamarenta ulu. Suang songon i ma di pardomuan ni Kristus tu huria i, Ibana do na mamarenta huria i jala hombar tusi ingkon unduk do huria i tu Ibana. Ndang pangoloion na mate, na mangolu do; ndang pangoloion hatoban, na bebas do jala na sian roha na ra, na di bagasan biar, haholongon dohot habadiaon na tama. Martiruan tusi, di bagasan parsaripeon i baoa i do ulu ni pardihutana. Laos baoa i do (pada umumna) na pangoluhon parsaripeon i dalam artian na manarihon manang na mangalului angka na ringkot bahen hangoluannasida na saripe. Marpardomuan tusi ma dipasingothon apostel dison asa dioloi angka parompuan baoana be songon pangoloina di Tuhan i. Rumang ni pangoloion i do na niondolhonna disi, ndada na mandok na gabe tuhan ma angka baoa di parompuan di parsaripeonna be, ndang. Alai songon pangoloi ni huria i di Kristus Ulu i, Tuhan jala Rajana i, songon i ma angka parompuan mangoloi sinondukna be, di bagasan pangoloion na mangolu, na bebas jala na sian sandok roha na ra, na di bagasan biar dohot habadiaon na tama. Dohot hata na asing, boruboru i pe ingkon haholonganna do dongan saripena di bagasan rumang ni kasih balasan na suman tu holong ni huria tu Kristus i.

Nuaeng tu hita angka naung marsaripe, tapatangkas be ma, mangolu dope pemahaman taringot tu hakiki ni parisaripeon na songon i di dirinta? Tahangoluhon dope ruhut ni na masihaholongan dohot na masioloan martiruan tu holong ni roha ni Tuhanta Jesus Kristus di huria dohot pangoloion ni huria Ibana? Jala tu angka naposo na so mardongansaripe dope, boha do pemahaman dohot bayanganna taringot tu parsaripeon sibongotanna di tingki na ro? Boha do haradeonna manghangoluhon ruhut na masihaholongon dohot na masioloan martiruan tu holong ni Kristus tu huria dohot pangoloion ni huria tu Tuhan i? Ndang paula so botoonta, di tingki on lam manosak do tu tongatonganta pemahaman dohot ruhut ni parsaripeon na so kristen. Parsaripeon ndang be dirajumi songon lembaga kerohanian na pinahot ni Debata, alai songon kontrak sosial di mana tidak seorangpun berhak memiliki dan menguasai serta menentukan yang lain, na bebas jala na moderen, na so mangharingkothon sentuhan-sentuhan parugamaon dohot partondion. Sai adong do baoa na memperlakukan dongan saripena sumurung otik sian pembantu. Sabalikna, adong do parompuan na mambahen dongan saripena tu toru ni manderana. Ikatan kekeluargaan semakin longgar. Mura sirang. Ianakhon dohot masa depanna, ndang gabe ambatambat be tu parsirangan jala ndang pola be sai gabe pertimbangan utama. Alai – sahali nari – parsaripeon gombaran ni pardomuan ni Kristus do i tu huriaNa. Ndang hea gabe hambar holong ni rohaNa tu huria i jala ndang hea i disiranghon. Naeng songon i ma hita torus masihaholongan asa lam leleng lam togu, dung i gabe togu ma dohot huria i.

jkt.18.09.2010/mvs

Read More..

17 Trinitatis

SERMON JAMITA TU MINGGU 17 DUNG TRINITATIS, 26 SEPTEMBER 2010
Joh.8:1-11

Patujolo

Masa do jamita on di Pesta Parlapelapean (Pondok Daun/Tabernacle), i ma parningotan di pardalanan ni ompu ni halak Israel sian Misir tu Kanaan. Sapanjang pardalanan i, mian di undungundung (kemah) do nasida. Marningot i, saleleng na marpesta i (pitu ari) mian di lapelape do natorop i. Dipature be do i di tarup (atap datar) ni angka bagas, di alaman, di porlak, di ladang manang di robean ni dolok. Sada sian pesta angka na umbalga do i di halak Jahudi na dihalashon di Jerusalem di bulan Tishri/Ethanim (sekitar Oktober) ganup taon. Nasa baoa na mian di areal radius tolu pulu mil humaliang Jerusalem ingkon do ro tu pesta i. Na di ruar ni i dohot angka parompuan ndang pola. Alai ala ni argana, na sian ruar ni i pe marroan do tong. Laos songon i angka parompuan dohot Jahudi nang angka proselit na sian diaspora (parserahan/luar negeri).

Dung dipapatar Jesus diriNa di pesta i, tardok torus do Ibana marsual dohot angka sintua ni Jahudi. Songon i ma dison, dipangke angka sibotosurat dohot parise do sada boruboru na targombang laho manggasipi Ibana. Situasi dohot kondisi ni na marpesta i antong, na semrawut, na hurang penerangan dohot lapelape na hurang terlindung mansai mura do mangonjarhon halak tu dosa, isara na manisipi tu lapelape ni na asing laho manangko manang mangulahon na so tama.

Hatorangan

Dung martuptup angka parise mandiori dalan laho mangago Jesus, songgop ma borngin; gabe muli ma nasida masitopot ingananna be (7:53). Jesus pe, laho ma tu balian, tu dolok Jetun marhira sada satonga batu daona dingkan purba ni Jerusalem, laos marborngin disi. Torang ni arina i, diulahi Jesus ma laho tu joro i, gabe marroan ma natorop laho manopot Ibana. Marasing sian angka parise dohot sibotosurat, dihaporseai nasida do Jesus i na ro sian Debata. Ala ni i, masihol do nasida mambege hataNa, jala ndang haambatan angka parise dohot sibotosurat i non i. Laos i ma bonsirna umbahen na gabe sogo rohanasida tu Jesus i jala dilului dalan mangago Ibana. Marnida natorop i, hundul ma Jesus mangajari nasida. Songon i do parturena di halak Jahudi, hundul do na mangajari (alai jongjong do anggo na marjamita). Mangajari, mandok manuanhon sipatupaon ni jolma manjangkon na binahen ni Debata (marjamita, lapatanna manghatindanghon na pinatupa ni Debata bahen haluaon ni jolma).

Nunga nidok, situasi dohot kondisi ni na marpesta i mansai mura do mangonjarhon halak tu dosa. Diantusi angka sintua ni Jahudi do i, gabe mansai manat ma nasida mamatamatai halak, asa ia adong na barani mangulahon na so tama pintor boi tangkupon jala uhuman nasida. Songon i ma dison, ditangkup nasida do sahalak parompuan na marlangka pilit. Na manarik dison, ndang ditangkup nasida anggo baoa i, holan boruboru i do. Boasa? Ala na mamporus do ulaning gabe so dohot tartangkup? Manang ala na adong do diskriminasi jender na mangarajumi paboa di kasus na songon i holan parompuan i do na sala jala siuhuman? Taringot tusi, ndang adong na binoto. Ra, di na laho mamboan prompuan i tu Sanhedrin mamolus do nasida sian bagas joro i jala diida ma Jesus disi. Gabe dipangke nasida ma na masa i laho manggasipi Tuhan Jesus. Mansai jahat do nasida, ai puluk do rohanasida memperalat halak di bagasan dosa dohot sitaononna laho papuashon na di rohana, jala asal ma tarlaluhonsa hosomna, ndang pola haboratan nasida papudihon panggohion ni patik i. Mangihuthon patik i, sidangguran do sisongon i dohot batu sahat tu na mate. Duansa do, baoa dohot boruboru i (3 Mus.20:12; 5 Mus.22:22). Intina, diuhum mate, paasingasing do anggo pangulahonna. Na deba didangguri, dung i ditampul dohot podang (pat.Hes.16:38-40). Na deba disongkik. Angka rabbi do na mangaturhon i songon hataridaan ni hamatean na tarramun. Pinahan na mate so sineat manang na hona songkik ramun do i, ndang jadi i panganon. Songon i ma hamatean ni halak na hona uhum ala ni pangalangkupon i, dirajumi hamatean na tarramun do i. Molo boru ni malim ditutung do (3 Mus.21:9). Di tingki ni Tuhan Jesus, didabuhon, dung i didombas dohot batu na bolon. Dung i, didok nasida ma tu Jesus: “Ia Ho, dia ma pandokMu?”

Di ay.6 tangkas didok na na mangunjuni Ibana do nasida, asa adong dalan mangaluhon Ibana. Didok rohanasida, nunga mansai maol i alusan ni Jesus. Aha pe didok, ndang boi non i so gabe tali tu rungkungNa. Molo didok: “Palua hamu ma ibana,” boi ma aluhonon nasida Ibana tu Sanhedrin songon silaosi patik i; alai molo didok: “Dangguri hamu ma ibana,” boi ma aluhonon nasida Ibana tu pamarenta Rom, ai holan pamarenta Rom do na marhuaso mandabuhon uhum mate. Dung i, gabe agoan ma Ibana di goarNa na denggan di tongatonga ni sijalobeo dohot pardosa. Alai diboto Jesus do hinajahat ni rohanasida i, gabe dipaunduk ma Ibana manurati dohot jarijariNa tu tano i. “Tu tano i,” mandok tu orbuk na lohot di pantar ni joro i. Di emper ni joro i do na masa i, ndang di alamanna; ndang adong tano disi, orbuk na binoan ni pat ni jolma do. Alai boasa so pintor dialusi Jesus nasida? Ra, naeng dohononNa do na so panguhum Ibana (pat.Luk.12:13-14), ala ni i ndang pola ringkot lehononna pandapot taringot tusi. Aha do disurathon? Taringot tusi, ndang adong agia aha na taboto.

Alai sai didatdati nasida do manungkun, gabe jongjong ma Jesus mandok: “Manang ise sian hamu na so mardosa, i ma jumolo maningganghon batu tu ibana.” Mangihuthon 5 Mus.17:7, na marnida na masa i do na parjolo maningganghon batu tu na niuhuman i. Di pudian ni ari, dirinci angka rabbi ma i songon on. Ditanggali ma jolo pahean ni na hona uhum i sahat tu na satonga marsaemara, ditali tanganna duansa tu pudi ni tanggurungna (dibalikbalik) jala dipajongjong raphon sitindangi ni na masa i di ginjang ni pansapansa marhira tolu tu opat meter timbona. Dung i dionjarhon sitindangi i ma ibana mansai gogo asa madabu. Molo pintor mate do ibana na madabu i, sae ma uhum i. Alai molo so pintor mate do, ro ma muse sitindangi na asing (ingot, ndang boi holan sada sintindangi, ingkon lobi do), dibuat ma batu apala na balga jala didombashon mansai gogo tu andorana asa maropuk. Na marlapatan ma i, laos sitindangi i do eksekutor ni paruhuman i. Alai Jesus mandok, na so mardosa ma. Marhite i disosoi do nasida ganup asa maruhum tu panggora ni rohana be. Manang songon na niondolhonNa di Jamita Dolok i, asa manguhumhon paruhumon siuhumhononna parjolo sahali tu dirina sandiri, dung i pe asa tu na asing; manang manuhathon parsuhaton sisuhathononna parjolo tu dirina sandiri, dung i pe asa tu na asing (pat.Mat.7:1 duu). Dung didok i, dipaunduk Jesus muse Ibana manurati tu tano.

Umbege i, sumurut ma nasida sadasada. Sumurut, ai marhite na maruhum tu panggora ni rohana be tardapot ma na dos do nasida dohot boruboru i, rap parjahat jala pangalangkup (pat.Mat.16:4). Nasida be do sitindangi ni hajahaton dohot pangalangkuponna be; ala ni i, hombar tu patik i, laos nasida be do nian na parjolo mandanggurhon batu tu dirina be. Ala ni i, na mabaranihu do nasida ganup manguhumi parompuan i marhitehite panguhumion na mansai posi, na so ada holong jala na so mananda asi ni roha. Parjolo ma angka sintua sumurut, ai gumogo do soara ni panggora ni rohana be manguhumi nasida, ai pangansi do nasida; tanoman na hinapur; denggan idaon sian duru, alai gok na busuk do di bagasanna (pat.Mat.23:37). Dung sumurut nasida, tading ma sasada Jesus dohot boruboru i jongjong disi. Ndang na mandok na holan nasida na dua, ai songon na nidok ondeng di bagas joro do na masa i, jala torop do halak hatiha i disi, alai ndang sude terlibat tu na masa i. Sian angka na terlibat, holan nasida na dua nama tutu na tading, di adopan ni natorop na hadir songon painondur.

Dipanghulingi Jesus ma parompuan i, didok: “Di dia do nasida, Inang? Ndang adong na mandok uhumna tu ho?” Diboto Jesus do nian saluhutna taringot tusi, alai didok do i laho paradehon ibana tu na naeng dohononNa di pudi. Dung didok boruboru i: “Ndang adong, Tuhan,” didok ma: “Ahu pe, ndang uhumanHu ho.” Aha do na nidokNa disi? Ndada holan na mangondolhon – songon na nidok nangkin – na so panguhum Ibana, alai lobi do sian i, na papatarhon pengampunanNa do. Ndang dihalomohon Ibana pangalangkuon, dihasogohon do, hajahaton do i jala siuhumon. Alai hombar tu sangkap ni haroroNa tu portibi on dipatujolo do pengampunan, jala dipalua ibana sian uhum na so ada holong dohot na so manada asi ni roha. Ndang pengampunan na muramura i na marujung di tingki i sambing, na paubahon do jala na mangigil mansai godang, ai ihut tusi didok do tu ibana: “Laho ma ho, unang be ho mardosa tu joloan on.” Na marlapatan do i, ingkon hangoluhononna do pengampunan i marhite na paubahon roha. Sandok ngoluna ingkon nama gabe hamubaon.

Rancangan Homiletis

Didok Jesus di ujung ni turpuk ari on: “Laho ma ho, unang be ho mardosa tu joloan on.” Ndang holan parompuan i, alai sude jolma do hahonaan ni hata. Sude do jolma pardosa, jala sude do ingkon muba, tarmasuk hita angka na mangolu di tingki on dohot di inganan on. Sian dia hita ingkon muba, jala angka dia ma na so jadi be ulahononta? Sandok ragam do i jala hita be do na boi tumangkas mangalusi i angka na hombar tu parngoluon dohot pangalahonta be. Alai marojahan di turpuk jamita di hita ari on, saotihotikna adong tolu na boi dohonon, i ma:

Na parjolo, panggasipion. Di jamita on dipaboa, ditangkup angka parise dohot sibotosurat do sahalak parompuan na marlangka pilit. Songon sitiop uhum dohot aturan ni bangso i nian, tung mansai tangkas do di nasida taringot tusi; boha do pandok ni patik i, jala dia do sipatupaon tu sisongon i. Alai marningot hosom dohot sogo ni rohanasida tu Jesus, gabe diboan nasida ma parompuan i tu Tuhan i jala dipangke manggasipi Ibana. Dipajongjong ma parompuan i tu joloNa laos ninna ma: “Didok patik ni si Musa, pantingganghononhon batu tu angka sisongon i. Ia Ho, dia ma pandokMu?” Didok rohanasida, nunga mansai maol i alusan ni Jesus. Aha pe didok, ndang boi so gabe tali tu rungkungNa. Molo didok: “Palua hamu ma ibana,” boi ma aluhonon nasida Ibana tu Sanhedrin songon halak silaosi patik; alai molo didok: “Dangguri hamu ma ibana tusi,” boi ma aluhonon nasida Ibana tu pamarenta Rom, ai holan pamarenta Rom do na marhuaso mandabuhon uhuman mate. Dung i, ndang boi so gabe agoan ma Ibana di goarNa na denggan di tongatonga ni angka sijalobeo dohot pardosa. Mansai jahat do nasida, ai hum do rohanasida memperalat halak di bagasan dosa dohot sitaononna laho manggasipi na asing dohot laho papuashon na di rohana, jala asal ma tarlaluhonsa hosomna, ndang pola adong borat ni rohanasida laho papudihon panggohion ni patik i.

Mansai ringkot ma i ingotonta asa tapadao dirinta sian panggasipion jala tapasiding ma na manggasipi. Manggasipi, mandok mangunjuni, mangela manang mangusahohon halak asa madabu tu dosa manang parmaraan. Sian tingki tu tingki, sai masa do na songon i. Digasipi na metmet do angka na balga, songon si sabalikna, digasipi na balga do angka na metmet. Masigasipan do partigatiga manang pelaku bisnis sama nasida, masigasipan parpolitik tu parpolitik. Ragam do alana. Adong ala ni hosom dohot sogo ni roha, adong ala ni na naeng mambuat paruntungan sian hadadabu ni donganna, dohot angka na asing. Tu sangkap i ndang alang roha ni na deba mamangke halak di hametmeton, di haotoon manang di sitaononna be. Jolma na tinompa suman tu rupa dohot tu pangalaho ni Debata diparsineang jala dipatutoru gabe ulaula laho manggasipi jala mandabuhon angka alona; jala dung marhasil, dibolonghon. Alai manang na ala ni aha pe i, jala manang na boha pe carana, ulaon hajahaton do i jala siuhumon. Taringot tusi, Tuhanta Jesus Kristus mandok: “Alai na manggasipi sada sian na metmet on, angka na porsea di Ahu, dengganan ma ginantunghon losung batu tu rungkungna, laho mangalononghon ibana tu laut na umbagas i. Oe, jea ni portibi on, nialap ni gasip. Ndang tarbahen so ro nian gasip; alai marjea ma jolma na parohonsa” (Mat.18:6-7). Ala ni i, tapaholang ma panggasipion jala tapassiding ma na manggasipi.

Na paduahon, panguhumion. Nunga nidok nangkin, songon sitiop uhum dohot aturan ni bangso i, mansai tangkas do di parise dohot sibotosurat i uhum ni pangalangkupon. Di jolo Tuhanta Jesus Kristsus pe dipajojor nasida do i, ninna do: “Didok patik ni si Musa, pantingganghononhon batu tu angka sisongon i.” Sangga tardapot na songon i, merasa bekepentingan do nasida mangulahon i. Ndada ala ni holongna tu Tuhan Debata dohot tu patikNa, alai ala ni holongna tu diri dohot tu otoritasna do songon sitiop uhum dohot patik ni bangso i. Merasa nikmat jala puas nasida, ai marhite i nalnal tarida wewenang dohot wibawanasida songon panguhum. Alai didok Jesus ma tu nasida: “Manang ise sian hamu na so mardosa, i ma jumolo maningganghon batu tu ibana.” Mangihuthon patik i nian, na marnida na masa i do na parjolo mandanggur. Alai Jesus mandok, na so mardosa ma. Marhite i disosoi do nasida maruhum tu panggora ni rohana be, gabe tardapot ma na dos do hape nasida dohot parompuan i, rap parjahat jala pangalangkup. Nasida be do sitindangi ni hajahaton dohot pangalangkuponna be, jala ala ni i, laos nasida be do nian na parjolo mandanggurhon batu tu dirina. Tarhilala ma di nasida na mabaranihu do nasida manguhumi parompuan i. Ala ni i gabe sumurut ma nasida sadasada. Parjolo ma angka sintua i, ai dumokdok antong uhum ni panggora ni rohana be tu nasida, ai pangansi do nasida; tanoman na hinapur; denggan idaon sian duru, alai gok na busuk do di bagasanna.

I pe mansai ringkot ma ingotonta asa unang maneanghu rohanta di panguhumion. Ndang sala nian na manguhumi, ai sada cara do i laho mamolati na denggan sian na roa, manang laho mangalo dohot mangotapi dosa. Ala ni i na boi do natoras manguhumi ianakhonna, jala ndang sala masyarakat, bangso dohot negara manguhumi parripena marhite lembaga na pinabangkitna. Alai nang pe songon i, ndang ulaon na mura na manguhumi i, na maol do; ndang na neang, na dokdok do. Mansai maol jala dokdok, ai utang ni keluarga do i, utang ni masyarakat, bangso, dohot negara; tanda ni ketidakberhasilan ni keluarga do i, ketidakberhasilan ni masyarakat, bangso dohot negara i di pendidikan di sude aspek ni parngoluon dohot di pembangunan ni manusia na seutuhna. Ala ni i ndang sintong molo mamurahu jala maneanghu roha ni manang na ise pe manguhumi, ai nasa panguhumion sasintongna panguhumion ni kegagalan sandiri do i. Lumobi tung na so jadi do marlas ni roha manang merasa nikmat jala merasa puas halak di na mandabuhon uhum, ai tanda ni kekejaman do i, tanda ni na so ada holong dohot asi ni roha. Didok hata i: “Ndang adong na tigor nanggo sada. Tung saluhut do nasida mardosa jala ndang dapot pujion ni Debata nasida.” Ala ni i, sai parjolo ma hita maruhum tu panggora ni rohanta be. Uhum na naeng paruhumhononta, tauhumhon parjolo tu dirinta, dung i pe asa tu na asing; parsuhaton na naeng parsuhathononta, tasuhathon parjolo tu dirinta, dung i pe asa tu dongan. Marhite na songon i ndang tagamon so botoonta na so cukup denggan dope hita hape gabe panguhum di na asing, gabe sumurut hita sian giot ni roha manghumi dohot sian tondi panguhumion.

Na patoluhon, harorangon. Dung sumurut angka sintua i, tading ma Jesus dohot boruboru i jongjong disi. Ndang na mandok na holan nasida na dua nama disi, ai di bagas joro do na na masa i, jala torop do halak hatiha i disi, alai ndang dohot terlibat tu na parsualon i. Dung i, dipatubegehon Jesus ma pengampunanNa tu parompuan i, didok: “Ahu pe, ndang uhumanHu ho.” Ndang dihalomohon Ibana pangalangkuon, dihasogohon do; ai hajahaton do i jala siuhumon. Alai hombar tu sangkap na hinarohonNa tu portibi on dipatujolo do pengampunan, dipalua ibana sian uhum ni hadosaonna. Ndang pengampunan na mura i na marujung di tingki i sambing, pengampunan na paubahon do jala na mangigil mansai godang, ai ihut tusi didok do tu ibana: “Laho ma ho, unang be ho mardosa tu joloan on.” Na marlapatan do i, ingkon tadinghononna do pangalangkuponna jala sandok ngoluna ingkon nama gabe hamubaon.

I ma muse na ringkot parrohahononta, sipasidingon jala sipadaoonta do pangalangkupon, harorangon umumna. Tarmasuk dosa na umbalga do pangalangkupon di Padan na Robi. Mansai jotjot do i dipangke songon sinonim ni pardebataon na leban. Sandok marbiasbias do roha ni Debata mida pangalangkupon, jala diancam do i dohot uhuman mate. Di Padan na Imbaru pe, dirajumi dosa na balga do i. Taringot tusi didok si Paulus do: “Nasa dosa na niula ni jolma, dibalian ni dagingna do; alai na marmainan, mardosa di dagingna sandiri do” (1 Kor.6:18). I do alana asa di praktek ni torop huria, hira i do dirajumi dosa na umbalga. Alai ndang masalpuhu molo nidok, ango di tingki on nunga lam majal be panghilalaan ni jolma taringot tu pangalangkupon manang harorangon. Ndang apala subang be roha ni na deba manaringoti i, ndang sogo be roha ni matana manganotnoti, jala ndang adong be alang ni rohana mangulahon. Alai pengampunan na tajalo di bagasan dohot marhitehite Tuhanta Jesus Kristus i, ndang paloashon hita mangolu di harorangon. Sabalikna do tahe, sihagigihononta do i. Si Paulus mandok: “On do pinangido ni roha ni Debata: Naeng badia hamu; harorangon i naeng pasidingonmuna” (1 Tes.4:3).

jkt.11.09.2010/mvs

Read More..

16 Trinitatis

SERMON JAMITA TU MINGGU 16 DUNG TRINITATIS 19 SEPTEMBER 2010
Poda 23:22-26

Patujolo

Di Padan na Robi na marhata Heber, buku Poda on tarrajum do tu bagian patoluhon, i ma surat (Ketubim). Punguan ni poda do i manang bahan pendidikan tradisional na mangolu di tongatonga ni halak Israel songon bangso ni Debata. Ala ni i tarhilala do di angka poda i pangungkapon dohot patik ni Debata na marpamusatan di biar mida Jahowa. Dibentuk do poda i sadasada marrumanghon umpama (amsal, misal, pepatah) na mura tangkupon dohot ingoton. Marningot guna dohot hinaargana, adong ma na papungupunguhon angka poda i gabe punguan na metmet (pat.30:1; 31:1). Dung i muse sian tingki tu tingki, angka punguan na metmet i dipapungupungu na asing muse gabe punguan angka na umbalga. Songon i ma torus paima tolhas tu rumang ni buku Poda songon na tatanda di tingki on. Di 1:1 dipadomu do buku i tu goar Salomo, anak ni si David, raja ni Israel. Hombar tusi gabe margoar ma buku i Poda ni Raja Salomo. Alai sian na pinajojor di ginjang i torang, ndang na mandok na Raja Salomo do na patomutomuhon sandok poda na tarsurat di bagasan buku i, ndang. Paboa adong na sian ibana, ndang pola ganggu roha taringot tusi, alai godang do sian i naung mangolu di tongatonga ni halak Israel dao tagan so si Salomo jala godang huhut na tubu di pudina sahat tu ombas habuangan. Antong boasa dipadomu i tu goarna? Parjolo, ala songon na nidok nangkin, adong sian poda i na marasal sian ibana. Paduahon, ra, ibana ma sada na dohot papungupunguhon. Patoluhon, panghormation ni halak Israel do i tu ibana na dihaporseai songon na umbisuk sian sandok raja angka naung ro dohot na naeng ro dope, ‘ompu’ ni umpama dohot ende (pat.1 Raj.5:12).

Tarjadi sian dua perikope do turpuk on, i ma 23:12(22-25), poda (amsal) taringot tu aha do siluluan; dung i 23:26-(24:2), poda (amsal) taringot tu angka tali rambang. Duansa i masuk tu hasadaon na umbidang, i ma poda (amsal) ni angka na pistar (22:17-24:34) na godang hadosanna tu poda (amsal) ni Amenemope sian Misir. Ndang pola longang roha disi, ai na bolas saling mempengaruhi jala masuk memasuki do angka poda habisuhon ni bangso na padonokdonok parhundulna. Na boi do rupani halak Misir mambuat poda sian kekusasteraan hikmat ni bangso Israel jala diintegrasihon tu kebudayaan ni halak Misir, manang na sabalikna halak Israel mambuat sian poda ni halak Misir jala diintegrasihon tu kebudayaan ni halak israel. Alai tontu, molo masa na songon i di halak Israel ingkon na diisi do i dohot konsep keagamaan manang haporseaon tu Jahowa.

Hatorangan

Aha do siuluan? (22-25). Mansai godang do na ringkot di ngolu on, angka siluluan jala sijalahan. Alai sian na godang i, adong do angka na rumingkot. Ndang na mura mamillit jala manontuhon i. Alai manang na boha pe, ingkon pilliton jala tontuhonon ni jolma do manang dia na rumingkot luluanna. Tu sangkap i, mansai ringkot ma di jolma i poda, jala natoras ma sada na gabe haroroan jala pangalapan poda di jolma i. Hombar tusi, didok parpoda i ma di turpuk on: “Sai tangihon ma hata ni amangmu na tumubuhon ho, jala unang toishon inangmu ia dung matua!” Manang di dia pe di portibi on diokui do otoritas ni natoras (natuatua umumna) maradophon ianakhonna (na umposo umumna). Dohot hata na asing, sada pangalaho na universal do i na jumpang di sude masyarakat entis budaya angka na tartanda di sisik ni hasiangan on. Tumimbo do hajongjongan (status) ni natoras sian ianakhonna, sumangap do natuatua sian na angka umposo. Sadalan tusi, laos ruhut na universal do tong na berkewajiban do ianakhon pasangapohon natorasna. Manang di dia pe, disuanhon do i, dipodahon jala diajarhon; diaturhon di hukum moral manang pe di hukum formal. Luhutna i na marmual do di kebudayaan ni masyarakat i. Songon i ma di Israel, otoritas ni natoras dohot kewajiban ni ianakhon na marmual do i di kebudayaan rohaninasida na marhaojahan di pangungkapon ni Debata Jahowa. Sian asi ni rohaNa, dipapatar Debata Jhaowa do diriNa tu Israel, dipahot parpadananNa tu nasida, dipillit jala dipabangkit nasida gabe bangsoNa, na marpangalaho hombar tu patik dohot tu lomo ni rohaNa. Sada sian patikNa i mandok: “Ingkon pasangaponmu natorasmu, asa leleng ho mangolu di tano na nilehon ni Jahowa Debatam tu ho” (2 Mus.20:12; pat.5 Mus.5:16). Marojahan tu patik i dipatomutomu bangso i do angka poda pangajaran na tradisional taringot tu lapatan dohot rumang ni na pasangaphon natoras. (Ia so i, songon na nidok ondeng, dijangkon nasida do angka poda pangajaran na tradisional sian bangso angka na humaliang, jala diintegrasihon tu kebudayaan ni Israel, alai diisi dohot haporseaon tu Jahowa). Sada sian i ma ayat on na mandok – sahali nari – “Sai tangihon ma hata ni amangmu na tumubuhon ho, jala unang toishon inangmu, ia dung matua ibana.” Dohot hata na asing, di ayat on tarhilala do halilu ni pangungkapon ni Debata jala tarbege saringar ni patikNa na palimahon i. Sada sian aspek ni na pasangaphon natoras i, i ma na manangihon hatana di bagasan hahormaton. Manangihon, ndang sai mandok mangoloi, ai natoras i pe jolma do na boi borhat sian motivasi na sala gabe ndang sai sintong di angka hatana. Ala ni i pangoloion di natoras i ingkon diojakhon do di pangoloion di Debata nampuna patik i. Saleleng hombar hata ni natoras i tu patik ni Debata, patut do i oloan; alai molo dung do maralo, ndang adong kewajiban mangoloi i. Taringot tusi, marlaku do hata i na mandok: “Ingkon oloan do iba di Debata asa di jolma” (Ul.5:29). Dung i, ndang jadi toishonon ni halak inangna ia dung matua. Tois, mandok hurang ajar, mangaloalo, jungkat, ndang olo manangihon poda, ndang parduli. Kemungkinan ni na manoisi na boi masa do i nian uju poso, alai lumobi ma ia dung matua. Di haposoonna, relatif gogo dope natoras i antong, tiur pingkiranna, tuk sibahenonna; alai dung matua, mansai godang nama margantung tu ianakhonna. Di pangalaho na songon i ndang hurang paetna molo ditoishon anakhonna ibana. Manang na ala ni aha pe i, tarmasuk ala ni pangantusion na sala taringot tu aturan ni parugamaon (pat.Mrk.:11-13).

Di ay.23, dipodahon ma manang na angka dia do na patut luluan ni jolma di ngoluna, didok: “Tuhori ma hasintongan, jala unang hadishon nang hapistaran, pangajaran dohot roha hapantason.” Apala on ma na rumingkot podahonon ni natoras tu ianakhonna, jala na laos rumingkot tangihonon jala oloan ni angka ianakhon. Pinatudos tu aslina dohot tu salinan angka na asing, gabe hurang hona do pangantusion ni salinan Batak ala hurang tanda baca. Ala ni i dumenggan do molo sinurathon i songon on: “Tuhori hasintongan, jala unang gadishon; nang hapistaran, pangajaran dohot roha hapantason.” Konotasi ni salinan na parjolo i, ia situhoran i, i ma hasintongan; jala na so sigadishonon i, i ma hapistaran, pangajaran dohot roha hapantason. Alai konotasi ni na paduahon i, situhoran i opatsa do, hasintongan, hapistaran, pangajaran dohot hapantason, jala na so sigadishonon i pe laos tong do na opat i, i ma hasintongan, hapistaran, pangajaran dohot hapantason. “Tuhori,” ninna; na nidokna disi, i ma pangke gogo dohot sinadonganmu laho mangalului dohot memiliki. “Unang gadishon,” ninna muse, mandok dung dimiliki unang ditungkar dohot angka na asing. Hasintongan (Hb. emet, truth/right/faithful), i ma kondisi rohani na patauhon halak mangolu di bagasan haporseaon dohot sikap hidup na hombar tu hata dohot lomo ni roha ni Tuhan Debata. Hapistaran (Hb. chaakamaah/chokmah, wisdom/ shrewdness, kebijaksanaan/kepintaran, habisuhon), i ma kondisi rohani na patauhon halak laho mangantusi dohot manghonahon hata ni Debata tu parsoalan ni ngolu ariari, manang hatauon laho manirang na denggan sian na roa. Na tubu do hapistaran i sian biar mida Jahowa (Poda 9:10 par), sian pengalaman parsaoran tu Debata Jahowa marhitehite hataNa. Pangajaran (Hb. uwmuwcaar/mucar, instruction/warning, pengajaran/didikan, sipaingot), i ma disiplin hidup na mangajarhon manang songon dia do halak mangolu di bagasan biar mida Debata Jahowa. Hapantason (Hb. uwbiynaah/biynaah, understanding, pengertian), i ma hapataran manang pangulaon ni habisuhon i. Ndang tarida habisuhon i, alai na gabe patar do haadongonna sian hatauonna mangantusi dohot memecahkan angka parsoalan ni ngolu ariari. Si Daniel raphon angka donganna rupani, ala naung dapotan habisuhon sian Debata gabe sampulu hali umpistar nasida di pangantusion sian sude partondung dohot sijujur parhalaan di Babel (Dan.1:20).

Di ay.24-25 diondolhon na mariaia do natoras ni halak partigor jala na pistar, marlas ni roha jala marolopolop. Ise do partigor jala na pistar i? I ma angka na manangihon poda ni natorasna, naung manuhori jala memiliki hasintongan, hapistaran, pangajaran dohot roha hapantason jala na so manggadishon manang manungkarhon tu na asing. Ndang tagamon so marlas ni roha tutu natoras mida anak sioloi ajar jala naung marhasil diparsiajaranna i, gabe mangolu di bagasan hasintongan, habisuhon, pangajaran dohot roha hapantason. Angka anak sisongon i do na umboto pasangaphon natorasna, na so manoishon nang di angka ari hatutuana.

Angka tali rambang (26). Di bagian na mangihut, ditaringoti do ragam ni tali rambang na boi mambahen torop situtu jolma tarjail, i ma sibabijalang, tuak anggur dohot hajahaton. (Ndang sahat nian tusi turpukta, olat ni ay.26 do; alai laho mangantusi ayat i, ringkot do i parrohahonon). Ingkon ramotan ni jolma i do dirina jala pasidingonna angka i. Boha ma bahenonna patupahon i? Parjolo, ingkon lehononna do rohana tu Debata. Roha do pusat ni ngolu. Jadi, mangalehon roha lapatanna mangalehon ngolu ro di sandok panggulmiton dohot hatauonnna tu Debata, manghaholongi Ibana sian nasa roha, tondi, pingkiran dohot sian nasa gogona. Paduahon, ingkon halomohonon ni matana do angka dalan ni Debata, lapatanna mangoloi Ibana di na saluhut jala patupahon na hombar tu patik dohot lomo ni rohaNa. Angka jolma sisongon i, ndang halomohonon ni i be angka na maralo tu lomo ni roha ni Debata, gabe malua sian nasa rumang ni tali rambang angka na manggongop di pardalanan ni ngolu i.

Rancangan Homiletis

Taringot tu Tuhanta Jesus Kristus uju di hametmetonNa, di Luk.2:52 tarjaha do: “Jadi lam ganda ma torus ni roha ni Jesus nang dagingNa, lam dihalomohon Debata nang jolma Ibana.” Songon halak Kristen hita, naeng jumpang do di hita na songon i; lam magodang hita di na saluhut (pat.Eps.4:15), lam suman tu Kristus jala halomoan di Debata dohot di jolma. Ndang dohot sandirina i masa, ingkon na ulahonon do i jala parungkilhononhon; ndang sae i huhut holan dohonon, ingkon na pataridahonon do di parngoluon dohot di pangalaho ariari. Boha ma i ulahonon jala pataridahononta? I ma na naeng pamanatonta sian turpuk di hita ari on.

Na parjolo, tapasangap ma natorasta. Manang di dia pe di portibi on, diokui do otoritas ni natoras (na matua umumna) maradophon ianakhonna (na umposo umumna). Pangalaho na universal do i, na jumpang di sandok masyarakat etnis budaya angka na tartanda di sisik ni hasiangan on. Tumimbo do hajongjongan ni natoras sian ianakhon jala sumangap do na matua sian na umposo. Sadalan tusi, laos ruhut na universal do tong na berkewajiban do ianakhon pasangaphon natorasna. Manang di dia pe disuanhon do i, dipodahon jala diajarhon; diaturhon di hukum moral manang pe di hukum formal. Songon i ma di halak Israel, diaturhon do i di patik i, didok: “Ingkon pasangaponmu natorasmu, asa leleng ho mangolu di tano na nilehon ni Jahowa Debatam tu ho.” Marojahan tusi dipatomutomu bangso i do angka poda pangajaran na tradisional taringot tu lapatan dohot rumang ni na pasangaphon natoras. Sada sian i ma ayat na parjolo ni turpukta ari on na mandok: “Sai tangihon ma hata ni amangmu na manubuhon ho, jala unang toishon inangmu ia dung matua ibana.”

Poda i sahat nuaeng tu hita. Ndang na imbaru be i nian di hita, ai di bangsonta pe adong hian do ruhut ni na pasangaphon natoras. Mamungka sian na metmet, disuanhon do i, dipodahon jala diajarhon. Dung ro Barita na Uli jala taripar bangsonta tu hakristenon, lam dipargogoi do ruhut naung adong i. Alai sayang, dipangke angka natuatua do i jotjot tu paruntunganna sambing. Torop do natoras ni halak hita na manghilala maruntung ala dipataripar Pdt.Johansen patik palimahon mamangke hata ‘ingkon,” gabe ndang jarang begeon natoras na pasingothon ianakhonna mandok: “Ingot Amang, Inang; sampulu patik ni Debata, alai holan sada do na marhata ingkon, i ma patik palimahon. I ma tandana,” ninna muse, “na i do patik na umarga.” Hombar tusi, adong do natoras na manghilala na ingkon oloan ni ianakhonna do nasa hatana. Mansai hansit rohana, manarita tondina molo so dioloi. Angka ianakhon pe, gabe adong do na manghilala na marutang bolon molo so dipatulus na tinonahon ni natorasna. Nang pe na sala, isara na marbadahon bada manang mamaloshon hansit ni rohana tu alona, tarmasuk hahaanggina. Na manangihon hata ni natoras ndang sai marlapatan mangoloi, alai ingkon na antusan do i marpardomuan tu na pasangaphon marojahan tu patik ni Debata. Saleleng hombar hata ni natoras i tu patik ni Debata, patut do i oloan; alai molo maralo do, ndang sala i juaon. Alai tung na so jadi do anggo na manoishon natoras, isara na marpangalaho hurang ajar, na mangaloalo manang mangalualusi hatana di bagasan hajungkaton. Lumobi dung matua, di na ingkon godang nasida targantung tu ianakhonna. Mara na ungkap do i di tingki on, ai ndang tarparsoada na adong do halak na manghilala na so ringkot be manarihon natorasna. Adong ma i ala ni individualisme, ala ni kebebasan dohot ikatan kekeluargaan na semakin longgar, ala ni kesibukan dohot na mangeahi angka na di tano on, dohot ala ni pangantusion na sala di ruhut ni parugamaon. Alai manang na ise pe na naeng gabe halomoan di Debata dohot di jolma, ingkon diulahon do patik ni Debata taringot tu na pasangaphon natoras.

Na paduahon, tatuhori ma angka na rumingkot. Mansai godang do na ringkot di ngolu on, angka siluluan jala sijalahan. Alai sian na godang i, adong do angka na rumingkot. Ndang na mura na mamillit jala na manontuhon i. Alai manang na boha pe, ingkon pilliton jala tontuhonon ni jolma do manang dia na rumingkot luluanna. Tu sangkap i, mansai ringkot ma di jolma i poda, jala natoras ma sada na gabe haroroan jala pangalapan poda taringot tusi. Mangihuthon turpukta ari on, sada sian poda na rumingkot podahonon ni natoras jala na laos rumingkot huhut tangihonon jala oloan ni ianakhonna, i ma na mandok: “Tuhori hasintongan, jala unang gadishon; nang hapistaran, pangajaran dohot roha hapantason.” Manuhori, mandok mamangke gogo dohot sinadongan laho mangalului dohot memiliki, jala dung jumpang unang digadishon, lapatanna unang ditungkarhon tu na asing.

Poda i ma muse na sahat nuaeng tu hita. Tarbarita do halak hita na gulut di poda. Suda pe taho tano maraek dohot tano mahiang, barani do angka natras asal singkola ianakhona jala dapotan parbinotoan dohot hapistaran. Sada sian parbue na binoan ni Barita na Uli i do i, ai songon na taboto parbarita na uli do na parjolo patandahon sistem persekolahan tu bangsonta. Mansai balga do panghorhon ni i tu hambubaon ni bangsona, ai marbohalhon parbinotoan dohot hapistaran i hehe ma rohanta jala margogo laho mangeahi hamoraon dohot hamajuon, jala torop do halak naung jumpangan i. Na uli do i jala sihalashonon. Parsoalanna nuaeng, boha do pardomuan ni i tu hasintongan, tu habisuhon, tu pangajaran dohot hapantason? Ndang tarsoadahon, di na mangeahi dohot mamangke hamajuon dohot hamoraon i adong do halak na so apala parduli be di hasintongan dohot habisuhon, di pangajaran dohot hapantason. Molo adong halak naung timbo parsingkolaanna rupani, denggan dohot jabatanna, alai ala ni tigor dohot sintongna ndang pintor manimbukbuk hamoraonna, unang be na asing, natorasna pe didok do i na loahon; alai sabalikna, molo adong na so pola timbo nian singkolana, jabatanna pe songon i, alai ala ni baranina mangulahon na bengkuk gabe pintor boi mamora jong, diparhatua na deba do i; natoras pe digoar halak do na martua. Alai taboto ma, hasintongan dohot habisuhon do na hot, pangajaran dohot hapantason. Ndang adong sihabiaran dohot sigangguhonon disi, jala i do na boi manubuhon halalas ni roha dohot pariaiaon na polin di angka natoras. Ala ni i dijouhon turpuk on do tu hita, manang ise na naeng gabe halomoan di Debata dohot di jolma, dituhori ma hasintongan, habisuhon, pangajaran dohot hapantason.

Na patoluhon, talehon ma rohanta tu Debata. Mansai jotjot do dipatudos halak ngolu on tu pardalanan. Jumpang do disi dalan angka na mura dohot na maol, na hornop dohot na marnangkok tuat, na tigor dohot na marlegotlegot, ambatambat manang tali rambang. Di pudi ni turpuk on, ditaringoti do ragam ni tali rambang na mambahen torop halak tarjail, i ma haronsamon, parmabuhon dohot hajahaton. Ingkon ramotan ni jolma do dirina jala pasidingonna angka i. Asa tarpatupa i, dipodahon turpuk on do, ingkon lehonon ni jolma i do rohana tu Debata jala ingkon halomohononna angka dalanNa.

Poda i ma muse na sahat nuaeng tu hita. Ndang tarsoadahon agia ise, di jaman na maju on lam tu ragamna do tali rambang di pardalanan ni ngolu on. Uliuli idaon, tabotabo begeon, mansai menarik angka tawaranna. Molo so manat, mansai mura halak dijail laos mago. Debata do na tuk paluahon hita sian i. Asa jumpang i, ingkon na lehononta do rohanta tu Ibana. Roha do pusat ni ngolu. Jadi, mangalehon roha mandok mangalehon ngolu ro di sandok panggulmitonna tu Debata huhut manghaholongi Ibana sian nasa roha, sian nasa tondi, pingkiran dohot gogo. Dung i, ingkon halomohononta do angka dalanNa, lapatanna ingkon oloanta Ibana jala ingkon patupaonta na hombar tu patik dohot lomo ni rohaNa. Sada sian reformator i mandok: “Haholongi ma Debata, dung i bahen ma lomolomom.” Lomolomonta? Olo, lomolomonta; ai nasa na tutu manghaholongi jala mangoloi Debata, ndang halomohonon ni i be mangulahon na maralo tu lomo ni roha ni Debata, holan na hombar tu lomo ni rohaNa nama. Ala ni i, talehon ma rohanta tu Debata jala tahalomohon ma angka dalanNa asa halomoan hita di Ibana dohot di jolma.

jkt.07.09.2010/mvs

Read More..

15 Trinitatis

SERMON JAMITA TU MINGGU 15 DUNG TRINITATIS, 12 SEPTEMBER 2010
1 Kor.12:14-27

Patujolo

Bindu 12 ni surat 1 Korint on hibul do dipangke si Paulus manaringoti silehonlehon ni Tondi Porbadia. Ragam do silehonlehon, alai sada Tondi na mamasumasuhon i. Luhutna i dipasupasuhon ndada na laho mamolati manang paasinghon na sada sian na sada nari, alai asa pangkeon ni ganup do i laho manghobasi daging ni Kristus i, i ma huria i asa lam magodang di bagasan hasadaon. Manggombarhon i, di turpuk on ditaringoti ma torop ni ruas pamatang ni jolma, parasingasingan ni tompana, ragamragaman ni hajongjongan dohot ulaonna, hasadaonna dohot tujuanna.

Hatorangan

“Ai daging i pe, ndang na sada ruasna, tung torop do.” Organisme na mansai kompleks do daging i, ndang sada ruasna, torop do. Adong ulu, badan, tangan dohot pat; adong mata, pinggol, abara dohot jarijari, ro di angka na asing na so hagoaran dison. Nang pe songon i, ndang adong agia sada sian i na boi manngarampinghon jala papulikhon dirina di ruar ni daging i, ai molo songon i ndang tagamon so mate. Alai na mardomu jala martomu do sandok ruas i di pamatang i. Ala ni i, ndang boi pat mandok: “Dibahen na so tangan ahu, ndang masuk daging ahu,” manang na pinggol mandok, “ala so mata ahu, ndang masuk daging ahu.” Ala ni na masuk tu daging i do tahe umbahen na targoar pat pat i, jala di bagasan pardomuan tu daging i do asa targoar pinggol pinggol i. Anggo so i, santanggo manang sampulguk juhut sambing do i, dohot manang na pigamponggol holiholi na so marlapatan jala na laho busuk.

Ndang sarupa sude ruas i, paasingasing do tompana, paasingasing hajongjongan dohot ulaonna. Ingkon songon i do antong asa tuk jala marguna tu sude hinaringkot ni daging i. Godang jala ragam do hinaringkot ni daging i. Ringkot do rupani alamat (indera) parnida, panghatai, panudu, pardalan dohot na asing. Molo moru sada sian i na martihas (cacat) do goar ni i jala gabe abatabat (handicap) ma i, alai lobi pe tong do i gabe abatabat. Molo mata rupani sandok daging i, gabe mansai godang ma na hurang, ai ndang adong be parbinegean dohot angka na asing; mansai godang huhut na lobi, ai anggo holan na laho mamereng do sae do dua. Suang songon i, molo pinggol sandok daging i, mansai godang do tong na hurang, ai so adong be parnianggoan dohot angka na asing; alai mansai godang huhut na lobi, ai anggo holan laho mambege do nunga sae dua. Songon na nidok nangkin, na hurang pe dohot na lobi dos do gondangna, sude do i gabe abatabat.

Ala ni i naung mansai denggan situtu do molo diaturhon Debata inganan ni ganup ruas di daging i. Adong inganan ni ulu, inganan ni badan dohot inganan ni pat; asing inganan ni mata, inganan ni tangan dohot inganan ni butuha. Luhutna i diaturhon hombar tu lomo ni rohaNa. Tung na sumurung do hapistaranNa, ai dijadihon do daging i sian torop ruas na mardomu jala martomu di bagasan sada rumang na simetris jala na harmonis. Sahali nari, torop do ruas i, ndang sada. Aut sada ruas sambing daging i, isara sada tangan sambing, ndang pamatang be goar ni i. Alai ala mardomu jala martomu sude ruas na godang jala na marragam i, gabe sada daging do saluhutna i. Hombar tusi ma didok: “Alai nang pe torop angka ruas i, sada do daging i.

Di ay.21 diondolhon do na saling mangharingkothon do sandok ruas ni daging i. Ringkot jala marguna do tangan di mata. Langsung manang so langsung. Na boi pangkeon do rupani tangan i mangondingi mata. I ma na langsung. Na so langsung, i ma di bagasan guna ni tangan i di pamatang i. Mansai godang do ulaon dohot guna ni tangan di daging, isara na pamasuk sipanganon tu pamangan. Marhite na mangan mangolu sandok daging i, tarmasuk mata. Ringkot jala marguna do pat di ulu, ringkot jala marguna di bagasan guna ni pat i di daging i. Pat i do na manungkol jala manea daging, jala di bagasan na tartea daging i tartea ma dohot ulu i. Ala ni i, ndang bolas dohonon ni mata tu tangan: “Ndang tu dihangku ho,” manang ulu tu pat, “ndang tu dihangku hamu.” Ndang adong sian ruas i na so ringkot di daging i, jala di bagasan hinaringkot ni ganup ruas di daging i, gabe mansai ringkot ma ganup tong di sasude. Gari na humurang idaon (Gr. asthenestera/more feeble/lebih lemah) tahe, muba do hinaringkotna. Ra, na nidokna disi i ma angka ruas ni daging na secara fisik gale, isara utokutok, pusupusu, ateate dohot na asing. Gumale do i sian tangan, alai andul do i rumingkot, ai ingkon adong do i asa mangolu sandok daging i. Jolma na so martangan, boi dope mangolu; alai molo so marutokutok, ndang boi. Paboa ringkot saluhutna i, laos tarida do i sian perlakuan ni jolma tu angka ruas na tardok lumea nian jala na haduk hian. Taringot tusi didok: “Balik sumangap tabahen ruas ni dagingta angka na lumea di rohanta.” Angka ruas na lumea (Gr. atimotera/less honourable/kurang terhormat), i ma angka ruas na so songon uli ni bohi, isara butuha manang tanggurung. Dipapujipuji jala dibahen halak do tudosan angka na uli tu mata manang bibir, alai ndang adong do pujian manang tudosan na uli taringot tu butuha manang tanggurung. Songon i pe i, didok, balik sumangap i tabahen (Gr. timeen perissoteran peritithemen/we bestow more abundant honour/kita berikan penghormatan yang berlebih-lebihan) ai tar tungkan i do dilehon jolma godang tingki dohot sinadonganna laho mambajubajui. Ihut tusi, didok dope: “Tumangkas tasarihon angka na haduk hian.” Na haduk hian (Gr. ascheemona/ uncomely/unpleasant to look at/unseemly/indecent/tidak menyenangkan untuk dilihat/ tidak pantas/tidak senonoh) isara organ seksual. Itenang pe songon i, tumangkas (do i) tasarihon (Gr. euscheemosuneen perissoteran echei/have more abundant comeliness/ mendapat perlakuan menyenangkan yang berlebih-lebihan). Ndang pola ringkot i di ruas na sangap hian. Di bohi rupani. Di tingki i, ndang apala dihasomalhon halak pajagarjagar (menghias) bohi. Diorai do i tahe di angka na badia i (pat.1 Ptr.3:3). Alai songon i ma pangatur ni Debata di daging i, dipadomu jala dipatomutomu do ruas na sangap dohot na lumea ro di na haduk; na sangap ndang pola be diparsangapi secara khusus, ai nunga sangap hian; alai na lumea dohot na haduk diparsangapi secara khusus asa unang moru sian na asing. Dipahot ganup di ingananna be, di hajongjongan dohot di ulaonna be na terintegrasi jala na harmonis laho manambornambori daging i asa lam magodang jala mangolu gabe ndang masa na patupa perbadingan na sala laho pasurunghon na sada manang patutoruhon ia na sada nari. Ndang tarpatudos rupani pat tu tangan, jala ndang tarsungkunhon dia umarga pinggol sian jarijari ai na masiboan argana dohot ulaonna be do i na so tardungdung jala na so tarulahon na asing. Marhite na songon i ndang tagamon marsalisi daging i sama dirina, alai denggan do masipasarisarian ruas sama ruas. Sadalan tusi, sisada parsorion do sude ruas i. Ia mangae sada ruas, rap mangae ma saluhut ruas i; jala ia sangap dibahen sada ruas, rap marlas ni roha ma saluhut ruas i. Taringot tusi, ndang apala na maol i antusan ni sude. Molo hansit ipon ni halak, ndada holan iponna na marsahit, ibana do, ai tarhilala jala marhinorhon do i tu sandok hadirionna. Laos songon i sabalikna, molo diparsangapi sada ruas, isara na mambahen tintin tu jarijarina, ndang holan jarijarina i na martintin, ibana do; ibana do na mardasi, ndang holan rungkungna; ibana do na marsipatu, nda tung holan patna.

Luhutna i na gabe gombaran ma i di hakiki ni huria, isara ni hasadaonna, hajongjongan dohot ulaon ni angka ruasna di bagasan hadomuan dohot hasadaonna. Hombar tusi didok ma: “Alai daging ni Kristus do hamu, jala ruas hamu sama hamu.”

Rancangan Homiletis

Angka naung tinobus jala pinalua ni Kristus i, dijou jala dipapungu Tondi Porbadia i do di bagasan sada parsaoran na badia na manghamham nasa na porsea di sandok portibi on, i ma huria i. Di Bibel i, isara di ayat parpudi ni turpuk on, digoari do huria i daging ni Kristus (pat.Eps.1:23a; Kol.1:24). Konsekuensina, Kristus do ulu ni huria i (pat.Eps.1:22; 4:15; Kol.1:18). Na dua frase i mangondolhon, parjolo: Pamarentaon ni Kristus di huria i. Jesus Kristus do Raja ni huria i, na mamarenta jala na manguluhon (Kristokrasi); lomo ni rohaNa do na ingkon saut di bagasan dohot narhite huria i, ndada lomo ni roha ni huria i. Pamarentaon ni Kristus i, diulahon do i marhite Tondi Porbadia (Pneumatokrasi). Paduahon: Pardomuan ni huria i tu Kristus i. Ingkon domu do daging tu ulu, molo sirang mate. Songon i, ingkon domu do huria i tu Kristus i, marsaor di bagasan Tondi Porbadia dohot haporseaon. Molo sirang sian Kristus i, mate do huria i, alai ndang mate anggo Kristus i. Patoluhon: Hasadaon ni huria i. Sada ulu, sada daging; ndang hea masa sada ulu, dua daging manang sabalikna dua ulu, sada daging. Sada do Kristus i, ndang dua; ala ni i, dagingNa pe sada do, i ma huria i; alai torop do anggo ruasna.

Daging ni Kristus na sasada i do na papatar diri di bagasan dohot marhite angka huria na jongjong di ganup inganan. Ala ni i, manang di dia pe huria i jongjong, ingkon ingotonna do tongtong paboa na sisada hasadaon do nasida di huria i, sisada hasadaon dohot tu huria hatopan ni angka na porsea di sandok portibi on. Marhite parsaoran, panindangion dohot panghobasion, ingkon radotanna do hasadaon i. Tu angkap i, disagihon Tondi Porbadia i do tu huria i ragam ni silehonlehon partondion. Ndang sarupa sude, alai paasingasing do. Songon i pe i ndada na laho mamolati manang paasingasinghon na sada sian na sada nari, alai asa pangkeonna ni ganup do i laho manambornambori daging i asa lam magodang di bagasan hasadaonna. Ndang na mura i, na maol do jala godang tantanganna angka ro sian bagasanna. Songon i do na masa di Korint di tingki ni surat on. Adong sian ruas ni huria i, ala ni silehonlehon partondion na jinalona na asing jala na dirajumi umarga sian na jinalo ni na asing na mangarajumi na so ringkot be ibana padomu jala pasaorhon dirina tu huria i. Didok rohana, ndang tarrajum be ibana tu huria i, alai nunga jongjong sandiri di bagasan haporseaon dohot pardomuanna tu Debata. Di na lam torop marpingkir songon i, gabe sega ma parsaorannasida; marbolatbolat nasida jumpa marpungu, di na manganhon parpadanan na badia dohot di na marsipanganon (jamuan kasih).

Mansai ringkot do i parrohahonon jala sorminhononta tu hakristenon dohot parhuriaonta. Ndang tarsoadahon, sian tingki tu tingki sai adong do halak na songon i, na mangarajumi diri sumurung sian na asing. Manang na ala ni pistarna ma i manang ala ni anutanna na dirajumi ummaju sian hakristenon arus utama, gabe so olo be saor tu na asing jala ndang dirajumi be ibana bagian ni huria i, alai na jongjong sandiri di bagasan haporseaon dohot pardomuanna tu Debata. Alai sasintongna, ndang adong hakristenon pribadi, hatopan do. Di bagasan pardomuan tu huria i do ganup halak diajari, dijamitai jala dihobasi marhite panghobasion sakramen; laos huria i do na mangajari, na manjamitai jala na manghobasi marhite panghobasion sakramen asa lam magodang jala sahat tu hagogok ni haporseaon dohot haluaon. Ala ni i, suman tu ruas ni daging na so boi mangarampinghon diri jala mangolu di balian ni daging i, ndang tarbahen agia ise manirang dirina sian huria i, dung i margogohon silehonlehon partondion naung jinalona gabe mangolu di balian ni huria i. Silehonlehon partondion manang na boha pe surungna, ndang marguna i molo so hombar pamangkena tu sangkapna, i ma na patureture jala manambornambori huria i di bagasan hasadaonna. Laos songon i ma angka na manjalo silehonlehon partondion i, ruas na so marguna jala na laho mate do i molo gabe dipasurut do dirina sian huria laho menikmati sandiri silehonlehon na jinalona.

Angkup ni i, na tarmara dope hasadaon ni huria Korint ala adong sian tongatonganasida na memutlakkan silehonlehon partondion na jinalona, sabalikna meremehkan na jinalo ni angka donganna. Didok rohanasida, silehonlehon partondion na jinalonasida i do satu-satunya na ringkot di huria i, na jinalo ni na asing ndang; jala ala ni i, laos nasida ma na ingkon diutamakan, na manontuhon jala siihuthonon. Alai sasintongna, ndang adong sian silehonlehon partondion i na boi dimutlakkan, jala ndang adong sian ruas na manjalo i na patut diutamakan; sabalikna, ndang adong sian silehonlehon i na boi diremehkan, jala ndang adong sian angka na manjalo i na boi diperlakukan songon pangihutihut sambing, alai hombar tu inganan, hajongjongan dohot ulaonna be na masiboan argana do i ganup, na so tarpatudos, na so targonti jala na so tarulahon ruas na asing. Suman tu pamatang, na dipatomu Debata do huria i sian angka na na gogo dohot na gale, na sangap dohot na lea gabe sada organisme na mangolu na masijangkonan jala masiurupan, masitungkolan jala masipasarisarian; sisada parsorion, sisada arsak sisada las ni roha.

I ma muse na ringkot ingoton jala hangoluhononta di hakristenon dohot parhuriaonta. Taringot tu angka ruas di bagasan konteks silehonlehon partondion na jinalona be, ndang parsoadaon adong do parasingan bahkan ‘hasurungan’ ni na sada sian na asing. Adong do sian i na ingkon adong, adong na boi so adong. Di hurianta ma rupani, ingkon adong do pandita, ai hombar tu kofessinta tohonan hapanditaon i do na manghamham sude ulaon haparhaladoon na ojak di na tolu tohonan ni Kristus i, i ma malim, panurirang dohot raja. Anggo parhata sileban, ndang pola ingkon adong. Songon na torang di hita, gok ne ma 150 taon umur ni hurianta; ndang hea adong parhata sileban, alai mangolu jala mardalan do torus huria i. Ndang tarbayanghon hita na boi masa na songon aut so adong angka pandita. Nang pe songon i, ndang gabe simutlakhonon hapanditaon i di hurianta. Tihatiha tusi adong do, lumobi dung gabe targoar uluan angka pandita hombar tu Aturan dohot Paraturan HKBP (2002). Ndang na asal didok i, ai tutu, dung Aturan i adong do angka pandita na cenderung gabe siguru dokhu, na naeng mangantoi jala manontuhon saluhut. Alai ndang huria pandita HKBP, ndang huria partohonan, huria ruas do, ruas partohonan dohot na so partohonan. Ala ni i, luhut do ingkon dapotan inganan dohot hajongjongan di parngoluon dohot panggulmiton ni huria i. Asa jumpang i, ingkon parmahanan ni pandita dohot angka parhalado do angka ruas ni huria asa boi jala sandok hiras rohana mamangke talentana be laho marhobas di bagasan dohot marhitehite huria i. Ndang holan partalenta angka na umbalga, alai dohot do angka na metmet; ndang holan na gogo dohot na sangap, alai dohot do angka na gale dohot na lea; ndang holan na pistar dohot na mora, alai dohot do angka na oto dohot na pogos. Keberhasilan ni angka pandita dohot parhalado ndang bolas i patuduhononhon holan marhite torop ni halak na manangihon jala mangihuthon na nidokna, alai lumobi do sian hatauonna pasadahon dohot mamangke nasa potensi laho patureturehon jala manambornambori huria i asa lam magodang jala hobas tu nasa ulaon na denggan. Holan marhite na songon i boi sude ruas ni huira i merasa memiliki huria i, boi masijangkonan jala masipasarisarian; gabe sisada parsorion, sisada arsak, sisada las ni roha.

jkt.29/08.2010/mvs

Read More..