Ujung Taon

SERMON JAMITA PARPUNGUAN UJUNG TAON, 31 DESEMBER 2010
5 Mus.8:11-18

Patujolo

Buku 5 Musa, i ma parbue ni penulisan kembali ni patik ni si Musa. Dung sahat jala mian bangso Israel di tano Kanaan, mimbar do parngoluonnasida sian na madoado jala peramu hasil gabe partani na menetap; mimbar dohot pengorganisasian ni masyarakatna sian na bersahaja tu na lebih kompleks. Andorang di parhorsihan di pardalanan sian Misir tu Kanaan mansai maol do nasida mangolu. Rahat situtu do alam disi, maol luluan aek jala ndang sadia sipanganon. Gabe mansai tangkas ma dipanghilalahon bangso i na holan ala ni pangondingion dohot panarihon ni Jahowa do horas nasida jala mangolu. Alai dung di tano Kanaan nunga boi nasida marporlak, marhauma dohot marpinahan, gabe lam mura ma di nasida na mangolu i. Sudena i na boi mamboan mara do tu haporseaonnasida, isara ni na mangarimpu ala ni gogonasida do nasida mangolu dohot na gabe tarela paihutihut utiutian ni penduduk asli ni tano i angka na taringot tu partanion dohot pamarentaon. Mansai ungkap do nasida tu mara i ai ndang adong dope pengalamannasida taringot tusi. Patokan na gabe rujukan pe ndang adong ai so diatur dope i di patik ni si Musa. Ala ni i tarpaksa ma nasida menafsirkan dohot menuliskan ulang patik ni si Musa i. Ndang ulaon sisatongkin i, mansai leleng do, berabad-abad. Hasil akhirna, i ma buku 5 Musa on. Di Alkitab, digoari do i Ulangan, na marharoroan sian hata Gorik deutronomion, istilah na pinangke ni Septuaginta [(LXX), i ma salinan ni Padan na Robi di hata Gorik] laho manggoari buku i, lapatanna patik na pinaduahali manang na niulahan. (Di salinan Batak: Pangarataion di Patik). Disurathon do i marrumang jamita ni si Musa na dipasahat di halongonan, di bariba ni aek Jordan tu sundut na imbaru ni bangso i. Asing ni si Josua dohot si Kaleb, nunga mate sude sundut na matua, sundut siparungutungut jala na so porsea. Tinggal ma nuaeng sundut na umposo na pinaloas mamongoti tano Kanaan i. Molo dung sahat tusi jala bosuran, ingkon radotannasida do dirinasida asa marsihohot di haporseaon dohot parsombaon tu Jahowa. Tusi ma nasida diarahon si Musa di jamitana i.

Hatorangan

Ramoti ma dirim (Hb.hishaamer lakaa, beware, hati-hati), mandok manat manang jaga. Ia dung sahat halak Israel di tano Kanaan i, ingkon manat jala jaga do nasida di dirina asa unang mago. Ndada marhite na pabosihon manang mangondingi diri marhite ragam ni usaho dohot ulaula hajolmaon, alai marhite na marningot Jahowa do. Marhite na songon i marondingonding do nasida tu Pargogo na so Hatudosan i jala margogo di hagogoonNa. Na mangago dirina do manang na ise pe na lupa rohana di Jahowa nang manang boha pe panjaga dohot pangaramotina disi. Na marningot Jahowa i ndang sada kondisi na pasif i, alai na aktif do; na patar di bagasan pangaradotion di tona, uhum dohot aturan ni Debata. Tona (Hb.mitswotaayw, commandment, firman), i ma nasa hata na ro sian Jahowa. Uhum (Hb.uwmishpataayw, judgment, keputusan) i ma haputusan na binuat jala na nidabuhon ni panguhum taringot tu sadasada pangalaho manang parkaro. Ndang na sian roharohana, alai na marharoroan sian poda manang petunjuk na sian Tuhan i do. Jadi, pada hakikina, laos haputusan ni Tuhan i do i. Aturan (Hb.wachuqotaayw, statutes, undang-undang), i ma patik ni Tuhan i, patik na hot jala na so mubauba. Sudena i sahat do tu bangso i marhitehite si Musa, jala angka i ma siradotan ni bangso Israel paboa na marningot jala marsihohot nasida marhaporseaon tu Jahowa. Molo songon i haramotan ma tondinasida jala malua ma nasida sian nasa parmaraan.

Di ay.12-14 dipatujolo do ragam ni pangalaho na boi mangonjar bangso i manghalupahon Debata. Songon na nidok ondeng, di tano bagabaga i lam mura do nasida mangolu. Asing sian na di parhorsihan uju i godang do disi sipanganon, ai bidang do tano bahen panuanan ni gandum, anggur, hau jetun dohot angka na asing. Di angka taon parmulaan, ndang pola nasida manghalojahon, holan na ripe manoluk angka naung pinungka ni penduduk asli ni tano i do nasida, na ripe manggotil jala na ripe manganhon parbuena. Tontu, ditorushon jala dipahembang nasida ma i muse sian gogo dohot sian usahonasida sandiri. Angkup ni i, bidang do huhut adaran bahen panjampalan gabe boi nasida marpinahan, marlombu, marbirubiru, dohot angka na asing. Gabe sandok bosuran do nasida di tano i, mangan roti dohot minum susu. Ala naung gabe petani menetap nasida disi, asing tong sian sinajolo i, ndang mian di lapelape be nasida, di angka jabu nama. Taringot tusi pe, anggo di tingki parmulaan ndang pola nasida pajongjonghon, sae do holan na manoluk jala mangingani angka naung pinajongjong ni parbegu pangisi ni tano i hian. Gabe sandok marhasonangan ma nasida disi mian di toru ni undungundung dohot di linggom ni hau anggurna be. Lam maju ma dohot ekonominasida, gabe boi manggandai mas dohot perakna be, lam mamora sude jala maduma. Di pangalaho na songon i talpe do nasida tu ginjang ni roha, i ma tu na mangarimpu na gogo dohot huaso ni tangannasida sandiri do na mangomo saluhutna i (ida ay.17), gabe lupa rohanasida di Debata naung manogihon nasida ruar sian tano Misir, sian bagas parhatobanan i.

Asa unang sahat nasida tu na songon i, di ay.15-16 ditaringoti do muse panogunoguon ni Debata di nasida sian Misir tu Kanaan. Mamolus halongonan manang parhorsihan na bolon jala na jorbut do nasida. Mansai maol do mangolu disi, ndang adong sipanganon dohot siinumon ai tano hasang do i, na so marisi aek. Maringaringar do mohopna ia arian, alai manangkihik ngalina ia borngin. Godang huhut disi ulok tulung api (Hb.naachaash saaraap, fiery serpent, ular yang bernyala-nyala), i ma ulok na mansai mohop bisana pola songon na tinutung ni api dihilala halak na pinargutna; songon i hala. (Di teks Heber ndang adong tarsurat naga. Songon i do nang di angka salinan na asing. Jadi ndang pola tinaringotan i di hatorangan on). Alai marhitehite panogunoguon dohot pangondingion ni Debata, horas do nasida disi. Ditogutogu do nasida marhite ombun na mangalinggomi ia arian, marhite api na marsijongjong na mangalehon hatiuron dohot halason ia borngin (2 Mus.13:21), dilehon nasida minum aek na diparuar sian batu (2 Mus.17:6;) dohot mangan manna na so tinanda ni ompunasida hian (2 Mus.16:14 duu). Alai boasa antong ditogihon Debata nasida sian parhorsihan na rahat i? Na paserephon rohanasida do (Hb.`anotakaa, might humble, merendahkan hati) asa tangkas manghilala jala marhatutuhon na so adong na tarpatupa nasida laho pangoluhon dohot paluahon nasida. Sandok targantung do nasida 100% tu Debata, tu pandonganion dohot panarihonNa. Alai huhut, na laos mangunjuni do Debata di nasida disi. Mangunjuni (Hb.nacotekaa, might prove, mencobai), lapatanna manguji. Ndang asa mago, alai asa marhasonangan do nasida bahenonNa ro di ujung. Olo do nasida hibul marsigantung tu Debata, rade do nasida mangundukhon jala mangihuthon panogihonNa? Atik pe jotjot nasida talu, marungutungut jala mangalaosi, pada umumna monang do nasida di pangunjunan i, ai tolhas do nasida ro di ujung, tu paradianan tano Kanaan i. Ala ni i do di pudian ni ari gabe dipatudos sipata tingki pengembaraan na di parhorsihan i tu masa pacaran ni Debata dohot Israel manang ombas na paling ideal di pardomuan dohot parsaoran ni Jahowa tu bangsoNa.

Ngolu na targantung tu na asing, ndang tongtong tabo. Sambolus sai songon na mangorui jala patutoruhon harkat ni sasahalak do i antong gabe agoan ibana di harga dirina. Ala ni i, molo dung boi sasahalak jongjong sandiri, sai adong do i na so giot marningot alai gabe lomoan rohana manghalupahon ketergantunganna na salpu i. Pangalaho na songon i na boi masa do tu Israel. Dung sahat tu tano na pinarbagabaga i, dung lam tu murana na mangolu i, dung lam boi martahihon jala mangulahon sandiri angka sipatupaonna, dung jumpangsa parbue na godang jala bosuran nasida mangan huhut mamora, lam naek ma harkat dohot harga dirina, gabe madabu tu ginjang ni roha jala didok di bagasan rohana: “Gogongku sandiri dohot huaso ni tanganhu mangomo di ahu hamoraon on.” Hamoraon (Hb.hachayil, wealth, kekayaan), tarmasuk do tusi hagogoon dalam konteks politis dohot ekonomis, hajongjongan (kedudukan) dohot hatauon (kesanggupan). Andorang so bongot halak Israel tu tano na pinarbagabaga i, dipaingot si Musa nasida asa unang madabu tu ginjang ni roha na songon i.

Di ay.18, sahali nari dipaingot nasida asa marningot tongtong di Jahowa. Molo sahat pe nasida tu tano Kanaan i jala margogo mangomo arta i, nda tung ala ni dirinasida i, ala ni Debata do. Ibana do na mangalehon gogo tu nasida. Sahali nari, ndang ala nasida i, bahen hahohot na padanNa do naung niuarihonNa tu angka ompunasida. Na marbagabaga do Debata tu si Abraham paboa lehononNa tu ibana tano bahen partalianna, bahenonNa ibana gabe bangso na bolon jala dapotan pasupasu marhitehite ibana saluhut bangso na di tano on. Paboa sintong ni bagabagaNa i pola do Ibana maruari, jala mulakulak do i ditaringoti; diparata tu si Abraham, ditorushon tu si Isak, tu si Jakob dohot pomparanna, jala digohi di tingki ni bangso Israel. Ala ni bagabaga dohot uariNa i do diparuar Israel sian Misir, dipahot padanNa tu nasida di Sinai, ditogutogu nasida di parhorsihan, jala dipatolhas tu tano Kanaan. Ndang hatahata i, ai di tingki ni jamita on nunga sahat nasida di parbalohan ni tano i, tinggal manglangkahon patna nama laho mamongotisa. Ala ni i nunga boi si Musa mandok: “Songon na andar sadari on.”

Rancangan Homiletis

Di na manjangkit sada kalapa na timbo sada halak, mangullus do alogo na mansai gogo. Mambalambal ma hau ni kalapa i ditondong, songon na naeng marumpak nama. Mansai mabiar ma ibana jala dihaol ma kalapa i sagomosgomosna. Tarsingot ma ibana tu Tuhan i laos didok: “Tuhan, urupi ahu.” Huhut joujou, mijur ma ibana nangetnanget. Lam dao sian ginjang, lam moru ma parmunggal ni kalapa i. Tong dope nian mansai gogo alogo i, alai ndang apala songon na di ginjang i be panghorhonna di toru; taantusi be do i. Lam hatop ma ibana mijur, alai lam moru ma anggo jotjotna manjou Tuhan i. Dung i, tar hira dua meter nari sian toru manimbung ma ibana, jala disi ojak patna tu tano marsurak ma ibana mansai gogo mandok: “Mauliate ma Ompung Doli!”

Digombarhon barita i do kecenderungan ni jolma na ingot di Debata tingki susa, alai lupa tingki marlas ni roha; benget jala jugul martangiang di ari hasusaan, alai rangkak manang ndang martangiang anggo di ari hahilason. Ndang sude nian songon i, adong do na dungo jala ondop tongtong martangiang manang na sadihari pe. Alai ndang tarparsoada, adong do na martangiang holan di tingki tarsosak, alai ndang martngiang anggo di angka ombas hatuaon. Songon sijangkit harambir ondeng tahe adong do na gabe mamereng bona ni hatuaonna di na asing, isara di ompuna na so ditanda manang na boha rupana jala ndang diboto nanggo apala tanomanna.

Kecenderungan sisongon i do na hinabiaran ni si Musa di jamita on. Nunga salpu tingki na susa, masa pengembaraan ni Israel na opat pulu taon na di parhorsihan i. Mansai maol do nasida mangolu disi, ndang adong sipanganon dohot siinumon ai tano hasang do i, na so ada aek. Maringaringar do mohopna ia arian, alai manangkihik do ngalina ia borngin. Godang huhut disi ulok tulung api dohot hala angka na marbisa situtu. Hira so adong do harapan hidup ni angka na mamolus disi. Alai marhite panogunoguon ni Debata, horas do halak Israel disi, ai ditogihon Tuhan i do nasida marhite ombun na mangalinggomi arianna, marhite api na marsijongjong na mangalehon hatiuron dohot halason bornginna; dilehon nasida minum aek na diparuar sian batu dohot mangan manna, roti na sian banua ginjang na so tinanda ni ompunasida hian. Na marlapatan ma i sandok targantung do nasida 100% tu Debata. So marhite pandonganion dohot panarihonNa ndang tagamon so rasip nasida di halongonan i. Nuaeng nunga salpu be sudena i, ai di jamita on nunga sahat nasida tu parbalohan ni tano Kanaan i, tinggal mangalangkahon patnasida nama laho bongot tu tano bagabaga i. Ia dung sahat tusi, lam mura ma nasida mangolu, ai bidang do tano bahen panuanan ni gandum, anggur, hau jetun dohot angka na asing; bidang dohot adaran bahen jampalan gabe boi nasida marpinahan, marlombu dohot marbirubiru. Dung i, ndang mian di lapelape be nasida, di angka jabu nama. Gabe sandok bosuran ma nasida mangan roti dohot minum susu jala marhasonangan mian di toru ni undungundung dohot di linggom ni hau arana be. Lam maju ma dohot ekonominasida, gabe boi manggandai mas dohot perakna be, lam mamora jala maduma. Di pangalaho na songon i mansai talpe do nasida tu ginjang ni roha, i ma tu na mangarimpu na gogo dohot huaso ni tangannasida sandiri do na mangomo saluhutna i, gabe lupa rohanasida di Debata naung manogihon nasida ruar sian tano Misir, sian bagas parhatobanan i. Ala ni i, dipasingot si Musa ma nasida di jamita on asa unang lupa, alai asa marningot tongtong di Debata.

Suman tu halak Israel di jamita on, na jongjong do hita nuaeng on di parholangan ni taon na buruk tu taon na imbaru. So pola sadia leleng nari be, salpuhononta ma taon 2010 laho mamongoti taon 2011 naung maimahon di jolonta. Ndang sarupa nian pengalaman dohot pandokta taringot tu taon on. Di na deba, tupa do dohononna tabo do na mangolu di taon on, di na asing boi do sabalikna, paet. Alai ra, sapandapot do hita sude mandok, umumna, ndang apala taon na membahagiakan taon 2010 on, ai godang do angka rundut di bidang politik, sosial, hukum, ekonomi dohot na asing. Lam maol do na mangolu, ai lam arga do situhoron. Di Jakarta ma rupani, binege, di taon on dope hea masa sahat arga ni tomat Rp.25.000 sakilo dohot lasiak Rp.60.000 sakilo. Alai nang pe songon i horas do hita, jala sahat nuaeng tu ujung ni taon 2010 on, dung i satongkin nari taripar tu taon 2011. Ise ma sian hita na boi mandok na ala ni pingkiran, ala pistar, ala ni gogo manang ala ni huasona do umbahen na sahat ibana tu ujung ni taon on? Nda ala ni Debata do i? Nuaeng di na manatap hita tu taon na ro, asing sian halak Israel di jamita on, ndang adong taida tanda na gabe ummura jala tumabo ma hita mangolu disi. Atik boha do hot songonsongon on, manang sabalikna gabe ummaol jala umpaet dope sian na di taon on. Ndang na berpikir negatif hita tu pamarentanta, jala ndang na apriori hita tu angka tahi dohot haputusanna, alai molo taparrohahon do angka kebijakan na pinatupana na cenderung semakin tidak populis, so mansoadahon na boi masa do angka terobosan, bobos jala ganggu do roha na lam tu maolna dope hita mangolu di taon na ro. Alai manang na boha pe i, marsajar sian tingki na salpu, pos do rohanta na togutoguon ni Debata do hita nang di taon na ro on. Parsoalanna, unang lupa, alai ingkon paingotingotonta do na Ibana do hangoluanta, jala targantung do hita 100% tu Ibana. Ringkot do antusanta, hapogoson dohot hamoraon na boi rap marmara do i tu ngolu haporseaon. Ala ni i do asa matangiang parpoda i mandok: “Sai padao ma sian ahu neang ni roha dohot hata gabus; hapogoson manang hamoraon unang lehon tu ahu; sai loas ma panganonhu bohal tinurpukhonMi tu ahu. Asa unang tung huporso Ho, dung butong ahu, gabe dohononhu maon: ‘Ise do Jahowa?’ Manang unang tung manangko ahu ala dung pogos, gabe huparoaroa maon goar ni Debatangku” (Poda 30:8-9). Pada hakikina siginjang roha do jolma, ndang lomo rohana targantung tu na asing, ai hira na mangorui jala patutoruhon harkatna do i, gabe agoan di harga dirina. Ala ni i sai naeng do jolma mangolu sian dirina sandiri. Molo tarpaksa ingkon targantung tu na asing, holan dung malua ibana sian i jala boi padirgak bohi dohot pasindak panaili, adong do na so lomo be rohana marningot i, alai marusaho tahe manghalupahon. Na boi masa do na songon i nang maradophon Debata. Ndang tihas na targantung tu Debata, ai sasadasa do hangoluanta. Ala ni i ingkon tongtong do Ibana paingotigoton. Alai boha do hita patupahon i?

Na marningot Debata ndang sae holan na menghadirkan di ambang sadar, alai marhite na magaradoti tonaNa do, mangaradoti uhum dohot angka aturanNa. Tona, i ma nasa hata na ro sian Jahowa. Uhum, i ma haputusan na binuat jala na nidabuhon ni panguhum taringot tu sadasada pangalaho manang parkaro. Ndang na sian roharohana, alai na marharoroan sian poda manang petunjuk na sian Tuhan i do. Ala ni i, sasintongna laos haputusan ni Tuhan i do i. Aturan, i ma patik ni Tuhan i, patik na hot jala na so mubauba. Luhutna i sahat do tu hita marhite hata ni Debata na tarsurat di Buku na Badia i. Na mangula do Tondi Porbadia i pangoluhon hata i asa tutu situtu i mangolu jala marhinorhon songon hata ni Debata di roha ni angka na manjaha dohot na manangihonsa. Hata i ma siradotan jala sihangoluhononta. Apala i ma na mansai ringkot parrohahononta tu taon 2011 on, di taon jobel patoluhon ni hurianta manang Jubileum 150 taon HKBP, naeng lam ingot hita di Debata jala radot di angka hataNa. Ibana do naung manjou hita gabe bangsoNa, gabe partohap di parpadananNa na tu si Abraham, si Isak dohot si Jakob. Ala ni i, marparange ma hita hombar tu parange ni bangso parjanjianNa.

jkt.23.12.2010/mvs

Read More..

Epiphanias

EPIPHANIAS

Dung sahat tu iba Almanak 2011 jala jinaha sambolus, pintor dapot roha do adong na marasing di Epiphanias. Ndang apala binoto manang na hasilapon i manang na hasalaan manang naung gabe songon i nuaeng paretongan dohot pangantusionna. Ala ni i, tubu ma roha mandiskusihon i tu angka dongan marhite blog on. Aha ma i? Andorang so nialusan, songon na mangaratai denggan do jolo pinatangkas taringot tu Epiphanias i.

Epiphanias na mandok hapapatar, ndang tarsirang i sian Natal manang Pesta Parningotan di Hatutubu ni Jesus Kristus. Di mulana, ndang lomo roha ni halak Kristen mamestahon Natal, holan Paskah do, i ma Pesta Parningotan di Haheheon ni Jesus Kristus. Taringot tusi, ndang holan sahali sataon, alai ganup ari Minggu do i dipestahon. Alai di laonlaon ni ari, tarhilala ma di huria i: Ia naeng tangkas panghilalahonon jala hangoluhononhon Pesta Paskah i, ringkot do sada pesta laho marningot dohot manghalashon haroro ni Kristus tu portibi on marhite hatutubuNa. I ma partubu ni Natal. Angka huria na timur do parjolo manghilalahon dohot mangulahon i. Marojahan tu partimbangan na tontu, dipillit nasida ma ari 6 Januari laho mamestahon i. Mangihut ma muse angka huria na di barat, jala tong marojahan tu partimbangan na tontu, dipestahon nasida ma i di 25 Desember. Lam leleng, lam manarik jala lam monang do 25 Desember, jala di tingki na parpudi on, nunga hira sude huria di sandok portibi on mamestahon Natal i di ari i. Holan apala otik nama huria na hot maniop 6 Januari, isara huria Armenia.

Dung gabe pesta hot Natal i, tarhilala muse ma di huria i na majempekhu do molo holan sadari do i ingoton dohot pestahonon. Ala ni i, dipaganjang ma i marhira tolu minggu tu jolo, i ma partubu ni Advent. Di Advent i, diondolhon do pangaradeon dohot parhobason marhite partangiangon dohot parpuasaon. Ndang holan i, dipaganjang dope dohot tu pudi, tu Taon na Imbaru songon parningotan di ari parsunaton ni Jesus, dohot manang na piga minggu nari tu jolo, tu Epiphanias na dipungka di ari 6 Januari. Siangkup ni na naeng paganjanghon mansai ringkot do i asa unang laos mago sejarah ni 6 Januari songon Natal na parjolo. Di Epiphanias i diondolhon ma hapapatar ni Jesus Kristus na tubu i. Lobi sian na tarida i do Ibana, lobi sian posoposo, lobi sian jolma, i ma Anak ni Debata.

Sian i torang ma, 6 Januari do Epiphanias. Suang songon ari ni Natal na so hea dipaorot sian 25 Desember, ari ni Epiphanias i pe ndang sipaoroton i sian 6 Januari. Di godangan Almanak ni HKBP di angka taon na salpu, di ganup 6 Januari manang na ari Minggu i manang na ari holang disurathon do tangkas Epiphanias manang Hapapatar. Molo pe so disurathon, anggo di paretonganna hot do di ari 6 Januari i Epiphanias, ai molo di ari holang do ari i, minggu na mangihut tusi nunga maningor 1 dung Epiphanias. Alai di Almanak HKBP 2010 (jala disi ma mamungka haasingon i), dipaorot do Hapapatar i tu ari Minggu 10 Januari jala laos i do Minggu 1 dung Epiphanias. (Taringot tusi, hubahen do surat tu Ompui Ephorus mandok na so topet molo laos di sada ari Minggu Epiphanias dohot 1 dung Epiphanias). Dung i di Almanak 2011 on (jala i ma haasingon na nidok di ginjang i) dipaorot do muse Epiphanias i tu ari Minggu 9 Januari jala Minggu 1 dung Epiphanias dipaorot tu ari Minggu 16 Januari dohot satorusna.

Sasintongna nian, molo tatiop do na 6 Januari 2011 do Epiphanias, ari Minggu 9 Januari 2011 nunga ingkon 1 dung Epiphanias, jala ari Minggu 16 Januari 2011 nunga 2 dung Epiphanias. Hombar tusi, niuji do patangkashon i tu Almanak angka na salpu. Di taon 1966 rupani, taon 2000 dohot taon 2005, sarupa tu taon 2011 on, tongon di ari Sabtu do 1 Januari; ari Kamis 6 Januari Epiphanias, jala ari Minggu 9 Januari 1 dung Epiphanias. Laos songon i do di Almanak ni huria na asing, isara Daily Watchwords (The Moravian Text Book) 2004: Thursday 1, New Year’s Day; Sunday 4, Second Sunday After Christmas; Tuesday 6, Epiphany of our Lord; Sunday 11, First Sunday After Epiphany.

Sahali nari, ndang huboto manang na silap i manang na sala manang naung gabe songon i nuaeng paretongan dohot pangantusionna. Alai ala naung hubahen surat manaringoti i tu Ompui Ephorus di bona ni taon 2010 i, hape tong muncul na songon i di 2011 gabe hehe rohangku mandiskusihon i tu angka dongan marhite blog on. Molo naung songon i do antong, denggan do i patorangon ni Ephorus asa sude umbotosa. Boha do pandapot ni angka dongn taringot tusi?

Read More..

Natal-2

SERMON JAMITA TU PESTA NATAL-2, 26 DESEMBER 2010
Mat.2:13-18

Patujolo

Mansai otik do barita taringot tu tingki hadakdanahon dohot habajaron ni Jesus di Padan na Imbaru. Sada sian angka i ma turpuk di hita ari on. Di bagasan angka barita i, tong do dihatindanghon panurat haasingon manang hasurungan ni Jesus songon Mesias na sinuru ni Debata. Pangalaho i, tarida do di turpuk on.

Di jolo dipaboa, dung tubu Jesus di huta Betlehem, ro do parhapistaran sian purba laho sumomba Ibana. Dung tarboto i tu si Herodes Agung, dirajumi ibana do i gabe ancaman tu harajaonna. Halak Edom do si Herodes i, pinompar ni si Esau. Marningot jasana na mangurupi halak Rom mengamankan Palestina, di taon 47 SM dipabangkit ma ibana gabe gubernur, jala di taon 40 SM muse gabe raja. Na mamarenta do ibana sahat ro di taon 4 M. Na marmusu tihus do halak Jahudi tu halak Edom. Mansai mabiar do Raja Herodes, molo toho Raja na manggohi panghirimon nasional ni halak Jahudi do na tubu i, ndang tagamon so mansai mura bangso i marbalik sian ibana. Ala ni i pintor ditahi rohana ma mamunu Jesus Posoposo i. Alai diramoti Debata do AnakNa i, disuru ma si Josep dohot si Maria maporus tu tano Misir songon na martaringot di turpuk on.

Hatorangan

Dung laho parhapistaran sian purba i, marhitehite nipi dipapatar surusuruan ni Debata do dirina tu si Josep laho pabotohon manang dia sipatupaonna mangadopi tahi hajahaton ni si Herodes i. Pangalaho na somal do i, sian Padan na Robi torus tu Padan na Imbaru, mansai jotjot do dipangke Debata nipi papatarhon lomo ni rohaNa tu jolma, papatarhon bagabaga haluaon manang lumbalumba uhumNa. Songon i ma dison, disuru ma si Josep mamboan Jesus Posoposo i raphon si Maria, inaNa i maporus tu Misir. Di sejarah ni bangso Israel, jotjot do Misir gabe haporusan sian keadaan na so aman di tano Kanaan. Ala ni haleon potir na masa di tano Kanaan i rupani, mangungsi do si Abraham tusi (1 Mus.12:10 duu), suang songon i si Jakob dohot sandok pinomparna (1 Mus.46:1 duu), si Jorobeam (1 Raj.11:40) dohot pasipasi ni bangso Israel na tarbuang i ala ni biarnasida mida pamaloson ni Babel (2 Raj.25:26 duu). Di sekitar hatutubu ni Jesus pe tong do gabe haporusan i di angka na tertindas manang na tarlele sian Israel. Hira di sude kota ni Misir adong do koloni ni halak Israel. Ala ni i angka halak na maporus tusi mansai mura do disi dapot tumpangan. Dipabotohon surusuruan i do tu si Josep tahi ni Raja Herodes na mangalului Jesus Posoposo i asa bunuonna.

Unduk tu parsuruon ni Debata, hehe do si Josep; diboan ma Jesus Posoposo i raphon si Maria inaNa i maporus tu Misir. Porsea do ibana di panogunoguon dohot pangondingion ni Debata. Ala ni i do asa so pola marpaima nasida tu tiur ni ari, alai laos di borngin i do borhat. Songon i do jotjot, ulaon haluaon ni Debata diulahon di bagasan panghuduson. Di bagasan panghuduson do surusuruan i paluahon si Lot sian Sodom (1 Mus.19:16 duu), di bagasan panghuduson paruarhon bangso Israel sian tano Misir, ai ingkon marparpanilu do nasida manganhon Paskah i, ingkon marhohos, marsipatu jala martungkot asa manang sadihari pe ro parenta pintor rade sudena borhat (1 Mus.12:11). I ma panghuduson na badia. Molo Debata sandiri panghuduson, tung patut ma jolma marnalemba?

Ingkon disi ma nasida mian paima ro hata ni Debata marsuru nasida mulak muse. Gondit ni tingki na ditontuhon, i ma hamamate ni Raja Herodes Agung (na masa di taon 4 M). Debata do na manontuhon rancangan hidup ni Jesus i di tano on: Ibana do na marsuru laho jala ingkon Ibana do muse na marsuru mulak. Ala halak Kristen Jahudi do alamat ni Evangelium on, angka na masa di ngolu ni Jesus Kristus i jalojalo do dihonahon ibana tu bagabaga na di Padan na Robi. Songon i ma na masa on, dihonahon do i tu Hos.11:1 na mandok: “Sian Misir do Hujou AnakHi.” Di mulana, na marhahonaan tu halak Israel do hata i. Dijou Debata do nasida sian Misir. Di dolok Sinai dipaojak padanNa tu nasida na marisihon: Jahowa gabe Debata ni Israel, jala Israel gabe bangsoNa. Panjouon dohot parpadanan na tu Israel i ndang disangkapi i songon pambahenan na marujung di bangso i sandiri, alai pangaradeon do i tu haroro ni Messias na pinarbagabaga i. Na marlapatan do i, Israel, i ma bangso na mengandung Messias. Di deba peristiwa sejarahnasida nunga dibayanghon hian ngolu ni Kristus i. Songon i ma hapoporus dohot haruruar ni halak Israel sian Misir na gabe gombaran patujolo do i tu na masa on, tu hapoporus dohot hamumulak ni Kristus sian Misir.

Nunga niarbis nangkin, na dirajumi si Herodes do hatutubu ni Jesus i songon ancaman tu harajaonna gabe pintor ditahi ma mamunu Ibana. Alai ndang pintor dipapatar i, dipaula do tahe na naeng dohot ibana marsomba Raja na imbaru tubu i, gabe didok: “Laho ma hamu, tangkas ma diori hamu Dakdanak i. Ia dung jumpang, paboa hamu ma tu ahu, asa dohot ahu ro marsomba tu Ibana.” Hata sipalensem do i, tipu muslihat na sangat licik. Na jahat do ibana jala na kejam. Laho mangaramoti hahohot ni huaso dohot harajaonna tung so alang do rohana mangulahon manang aha pe taho. Dibunu ibana do rupani 300 partogi ni halak Jahudi. Songon i tuan boruna sandiri, si Mariamne, inana si Alexandra, dohot tolu anakna, si Antipater, si Alexander dohot si Aristobulus. Mandapothon hamamatena disuru do manangkup jala manghurunghon angka halak na tarpillit jala na pinarsangapan sian Jerusalem jala diparentahon tongon di hamamatena ingkon bunuon ma halak i sude. Dapot rohana do, ala ni jahatna ndang tagamon adong na mananangisi hamamatena. Alai dasar na jahat, asa adong na tangis di hamamatena, ingkon bunuon ma sude na nidohan ondeng. Disi mamoto rohana naung dipaotooto parhapistaran sian purba i ibana, ditahi ma mamunu dakdanak na di huta Betlehem dohot na humaliangna angka na marumur dua taon tu toru. Patokan i diojakhon tu leleng ni habibinsar ni bintang na paboa hasosorang ni Raja i. Nunga disihirsihiri ibana hian tu parhapistaran i lelengna dung tarida bintang i (ay.7). Huroha, sahat tu ombas i marhira dua taon ma lelengna dung tarida bintang i. Saut ma i diulahon, dibunu ma sude dakdanak baoa ni huta Betlehem dohot na humaliangna angka na marumur dua taon tu toru. Didok rohana, marhite na songon i ndang tarbahen so dohot be Raja na imbaru tubu i tarbunu.

Songon na nidok di ginjang i, na masa on pe dihonahon si Mateus do tu na tarsurat di Padan na Robi. Dirajumi ma i songon peristiwa ulangan ni na masa di Rama, sada huta di parholangan ni Betlehem tu Betel. Disi do mate si Rahel jala tartanom. Di na laho tu habuangan Babel, mamolus do halak Israel sian huta i. Tarrante do nasida jala marsiak bagi. Digombarhon si Jeremia do uju i na mangandungi do si Rahel di tanoman i ala habubuang ni angka anakna i (Jer.31:15). Nuaeng, tong di luat i mangandungi angka ina ni ‘anak Israel’ ala kekejaman ni si Herodes. Na songon gombaran ma i di sitaonon ni Kristus na ‘terkandung’ di bagasan jala na naeng patar sian nasida.

Rancangan Homiletis

Padua ari on ma hita na marpesta marningot dohot manghalashon hatutubu ni Tuhanta Jesus Kristus. Di pestanta nantoari, diarahon do roha dohot tondinta tu Betlehem marnida sada Posoposo na sorang di bara, na binorhos jala na pineakhon di panggagatan, na pogos jala na lea. Di rumang ni hajolmaon, tung so adong do tudosna tu Agustus, kesar ni halak Rom na marhite parentana boi manghusor sandok oikoumene, i ma portibi na niinganan ni jolma jala na beradab naung tartanda di tingki i. Alai sasintongna lobi sian na tarida i do Ibana. Nang pe metmet, pogos jala lea, Ibana do Sipalua portibi on, Kristus na sian Debata. Ndang torus Ibana metmet, pogos jala lea, alai ro do tingkina patar di bagasan hasangapon ni Anak Sasada na sian Debata, gok asi ni roha dohot hasintongan. Manang ise na porsea jala manjangkon Ibana di hametmetonNa, i do na tarbahen marnida Ibana di hasangaponNa. Hombar tusi, dijou jala disosoi jamita pesta paduahon sadari on do hita mananda jala manghaporseai paboa Jesus Posoposo na imbaru tubu i do Kristus, Sipalua na sian Debata. Sian dia ma i tandaonta? Marojahan di turpuk jamita ari on, adong ma tolu na naeng dohonon.

Na parjolo, di bagasan Ibana do hagogok ni panjouon ni Debata na tu Israel. Sian tahi ni rohaNa na bebas, dipillit jala dijou Debata do Israel gabe bangsoNa. Dipungka do i sian si Abraham, ditorushon tu si Isak, si Jakob dohot angka anakna. Di bona ni pembentukan ni bangso i ingkon mengungsi do si Abraham tu tano Misir. Pangalaho i diulahi do muse di ngolu ni si Jakob dohot pomparanna. Dung maringan nasida disi opat ratus tolu pulu taon lelengna (2 Mus.12:40), dijou Debata ma nasida sian i jala dipaojak parpadananNa tu nasida di dolok Sinai. Panjouon dohot parpadanan na tu Israel i ndang hea dibereng i songon sada rancangan na marujung olat ni nasida sambing, alai na marhahonaan do i tu sangkap hatuaon ni Debata na taringot tu haluaon ni hajolmaon sipatulusonNa di bagasan dohot marhitehite Mesias na naeng paroonNa sian tongatonga ni bangso i. Dohot hata na asing, bangso Israel i na ditontuhon Debata do i gabe bangso na ‘mengandung Mesias’ i, di ngolu dohot di bagabaga na tu nasida nunga dibayanghon hian ngolu ni Kristus i. Marhitehite i haurupan do hita laho mananda Kristus i, manang ise na hombar tu ngolu ni Israel dohot na manggohi bagabaga ni Debta na tu nasida i, i do Mesias i. Jesus na sian huta Nasaret jala na sorang di huta Betlehem i, sian hametmetonNa dope cocok do tu pengalaman hidup dohot bagabaga na tu Israel i. Songon bangso Israel na mengungsi tu Misir jala dijou Debata muse sian i, songon i do Jesus i, ala ni sangkap hajahaton ni si Herodes Agung, ingkon maporus do jolo tu tano Misir paima dijou Debata muse sian i. Marhite i digohi do sangkap panjouon dohot bagabaga na tu Israel na mandok: “Sian Misir do hujou AnakHi” (Hos.11:1). Apala i ma na parjolo naeng auhononta sian Barita na Uli ni Pesta Natal na paduahon on, Jesus Posoposo na tubu di Betlehem i do Kristus, ai di bagasan Ibana do digohi sangkap panjouon dohot bagabaga ni Debata na tu bangso Israel. Ala ni i ndang lojaanta be dirinta mangalului ‘Kristus’ jala Sipalua na asing. Di angka tingki na parpudi on rupani torop do halak na merekayasa jala menawarkan Jesus na asing, i ma na ginoar Jesus Seminar manang pe Jesus Sejarah na hona tu roha dohot pingkiran ni hajolmaon alai na mansai asing sian na hinatindanghon ni Barita na Uli i. Ndang i Kristus Sipalua i, na sian Nasaret i do jala na tubu di Betlehem i, Ibana do sihaporseaan jala sijangkononta.

Na paduahon, ai Debata do mangaturhon sandok pardalanan ni ngoluna. Nunga niarbis di jolo ala ni sangkap hajahaton ni si Herodes Agung ingkon maporus do si Josep mamboan Jesus Posoposo i raphon si Maria, inaNa i tu Misir. Ndang rancangan dohot haputusanna sandiri i, rancangan dohot haputusan ni Debata do na pinapatarNa tu ibana marhitehite nipi. Jotjot do masa na songon i, dipangke Debata nipi bahen dalan ni pangungkaponNa laho papatarhon lomo ni rohaNa tu jolma, isara ni lumbalumba uhum manang bagabaga haluaonNa. Ala rancangan dohot haputusan ni Debata do i, ndang adong na tarpatupa si Josep lobi sian na manghaporseai jala mangulahonsa. Ala ni i pintor hehe do ibana, ndang dipaima pola sahat tu tiur ni ari, alai di bagasan panghuduson na badia laos di borngin i do ibana borhat, diboan ma Jesus Posoposo i raphon si Maria, inaNa i maporus tu Misir. Ingkon disi ma nasida maringan paima ro muse parenta ni Debata marsuru nasida mulak. Tar leleng do i dipaima nasida, ai dung pe mate si Herodes Agung asa ro muse hata ni Debata marsuru nasida mulak. Masa do i di taon 4 M. Jadi dijujur sian hapoporusnasida i, i ma marhira dua taon (pat.Mat.2:7, 16) dung hatutubu ni Jesus na diperkirakan di taon 6 SM (andorang so tarich na tapangke nuaeng), jadi taon 4 SM, adong do marhira ualu taon nasida na mangungsi i. Songon i do antong, Debata do manontuhon rancangan ni ngolu ni Kristus i. Ndang ro Ibana tu tano on jala ndang dihatahon manang diulahon Ibana agia aha sian diri manang sian roharohaNa sandiri, alai hombar tu pangaturhon ni Ama i do (Joh.6:38 par). Mamungka sian hatutubu sahat tu pangulaonNa tolhas ro di hamamateNa, dibimbing Debata do Ibana di dalan na tinontuhonNa. I ma muse siauhononta sian Jamita Natal na paduahon on, Jesus Posoposo na tubu di Betlehem i do Kristus i, ai Debata do na manontuhon dohot na mangaturhon sandok rancangan ni ngoluNa. Unduk do Ibana tu rancangan ni Ama i, dioloi do i, ndang hea Ibana manjua. Ibana do satu-satunya naung hea unduk tu tahi dohot panogihon ni Debata sian nasa roha dohot tondiNa. Na laos gabe Barita na Uli do i di hita, ai holan di haunduhon dohot pangoloionNa i do adong di hita haluaon. Di bagasan Ibana dihapogani Debata paluahon hita. Ala ni i, hita pe tahapogani ma haluaonta, tahaporseai ma paboa Ibana do Kristus i, tajangkon ma Ibana gabe Tuhan jala Sipalua hita.

Na patoluhon, ai sian hametmetonNa dope Ibana manaon. Kristus na pinarbagabaga di Padan na Robi i, Kristus na marsitaonon do. Taringot tusi pe, nunga dibayanghon hian i di sitaonon ni Israel, bangso na ‘mengandung Mesias’ i. Apala i do na tarida di diri ni Jesus Kristus na tubu di Betlehem i. Di hametmetonNa dope nunga sala mangarti Raja Herodes Agung di Ibana, dirimpu do raja na manggohi panghirimon nasional ni halak Jahudi Ibana, gabe dilului asa bunuonNa. Na jahat do raja i, bahen hahohot ni huaso dohot harajaonna ndang alang rohana mandurushon mudar. Tungganeboruna sandiri na margoar si Mariamne dibunu ibana do, songon inangna si Alexandra dohot tolu anakna, si Antipater, si Alexander dohot si Aristobulus. Di na so jumpangsa Jesus Posoposo i, dibunu ma sandok posoposo baoa na marumur dua taon tu toru di huta Betlehem dohot na humaliangna. Didok rohana, marhite na songon i ndang tarbahen so dohot be Raja na imbaru tubu i tarbunu. Di pamerengan ni si Mateus, na gabe peristiwa ulangan do i di sitaonon ni bangso Israel di Padan na Robi, di huta Rama khususna. Rama, i ma sada huta di parholangan ni Betlehem tu Betel. Disi do mate si Rahel jala tartanom. Di na tarboan halak Juda tu habuangan Babel, sian huta i do nasida mamolus. Tarrante do nasida jala marsiak bagi situtu. Digombarhon si Jeremia ma uju i, na mangandungi do si Rahel di tanoman i marnida hasisiap ni pinomparna na tarboan tu habuangan i. Songon i ma dison, di sekitar hatutubu ni Jesus i, mangandungi do muse angka ina ni ‘anak Israel’ di huta Betlehem dohot na humaliangna ala kekejaman ni si Herodes. I pe, na gabe bayangan do i di sitaonon ni Kristus di bagasan ngolu ni Israel, bangso na ‘mengandung Mesias’ i. I ma muse siauhononta sian Jamita Natal na paduahon on, Jesus Posoposo na sorang di Betlehem i do Kristus i, ai sian hametmetonNa do Ibana manaon. Hombar tu bagabaga i, gok sitaonon do ngoluNa mamungka sian panggagatan di Betlehem sahat ro di targantung jala tartullang di hau na pinarsilang di dolok Golgota, jala marhite bugangNa i do malum itahilala (Jes.53:5; 1 Ptr.2:24). Ala ni i tahaporseai jala tajangkon ma Ibana gabe Tuhan jala Sipalua hita.

jkt.20.12.2010/mvs

Read More..

Natal-1

SERMON JAMITA TU PESTA NATAL-1, 25 DESEMBER 2010
Luk.2:1-7

Patujolo

Evanggelium on disurat jala ditujuhon si Lukas do tu halak Kristen na marharoroan sian bangso parbegu umumna, tu si Teopilus (1:3) khususna. Andorang so i, nunga binsar Barita na Uli na sinurat ni si Markus na godangan ditujuhon tu halak Kristen Yahudi. Dipabidang si Lukas do barita ni si Markus i di bagasan gaya bahasa na ummura antusan ni panjaha. Di turpuk ari on, dibaritahon do hatutubu ni Jesus Kristus Sipalua i. Sipalua sandok bangso do Ibana. Hombar tusi, hatutubuNa i ndang simbil sian pardalan ni sejarah ni portibi on, sejarah ni angka bangso na niwakilan ni bangso ni Debata (Jahudi) dohot na so bangso ni Debata (Rom).

Hatorangan

Na mamarenta do Kesar Agustus di taon 30 SM sahat tu 14 M. Si Gaius Julius Caesar Octavianus hian do jolo goarna, alai di pudian ni ari ditambahon ma tusi goar Agustus, na mandok na marmulia. Na maralasan do i, ai sian sandok kesar ni halak Rom, ibana do na sumangap, na umbonggal jala na umbaritaan. Di tingki hinarajahonna, sahat do tu halak Rom huaso dohot pangarajaion di atas ni sandok oikoumene, i ma portibi na tartanda jala na niinganan ni jolma. Di harajaon na mansai bidang i, mampu do kekaisaran manjamin keamanan dohot ketertiban. Hasonangan ni tingki i digoar ma i pax-romana (hadameon rom). Dipatupa do pembangunan lumobi di bidang prasarana jalan, gabe mansai hatop ma hubungan antar daerah. Saluhutna i dipasingkop dope marhite haadongon ni bahasa persatuan, Junani Koine na marhinorhon situtu tu hadengganon ni komunikasi. Ala ni i digoar halak do ibana ‘sipalua portibi’ on jala tingki ni pamarentaonna digoar ‘zaman na imbaru.’ Di sada tingki, diharuarhon ibana do sada parenta (Gr.dogma, decree, perintah) patupahon pamilangon [Gr.apografesthai (sian hata apografe), enrolment, census-taking, pendaftaran] di sandok gomgomanna (Gr.oikoumeneen, world, dunia), i ma portibi na niinganan ni jolma jala na tartanda olat ni hatiha i. Mangihuthon uhum Rom, sai masa do pamilangon sisongon i sahali sampulu opat taon. Sian i boi pastihonon, di pamarentaon ni si Agustus na opat pulu opat taon i ndang holan sahali masa pamilangion, lobi do. Tontu do, ndang sude i na tinaringotan ni si Lukas di turpuk on, holan sada do, i ma pamilangon parjolo uju digomgomi si Kirenius tano Siria. Dung madabu halak Jahudi tu gomgoman ni Rom (64 SM), dipamasuk do Palestina tu provinsi Siria. Na marlapatan ma i, kebijakan ni harajaon Rom angka na dipatupa di Siria, marlaku do i nang di Palestina. Mangihuthon sejarah, ndang hea nian si Publius Sulpicius Quirinius gabe panggomgomi (wali negeri/ gubernur) di Siria, alai di parholangan ni taon 12 SM tu 16 M gabe komandan ni soldadu do ibana di manang piga inganan di bagian purba ni harajaon Rom. Ndang so mungkin na hea ibana ditempathon di Siria, khususna songon pelaksana ni pamilangon i. Pamilangon na parjolo na tangkas terdokumentasi di sejarah i ma na masa di 20 M. Diurut sampulu opat taon sian i, pamilangon andorang so i tontu masa ma di taon 6 M. Ndang tagamon i na nidokna dison, ai di 4 M nunga mate Herodes Agung na mamarenta di hatutubu ni Jesus. Ala ni i ingkon uruton dope sampulu opat taon nari, i ma taon 8 SM. Cocok do i tu tingki ni si Kirenius dohot tu sada insikripsi di Ankara na manaringoti pamilangon na dipasidung di 7 SM. Ringkot do antusan, ndang tarpasidung sada pamilangon di ombas na jempek, alai na boi do i marbulan manang martaon. Angkup ni i ndang sai dos tingki ni i di sude provinsi, paasingasing do. Di Misir rupani, dipatupa do i di taon 10-9 SM.

Di ay.3 didok: “Jadi borhat ma sasude, asa disurati ganup tu bona ni pinasana.” Boasa ingkon mulak tu bona ni pinasana? Na marpardomuan do i tu sangkap ni pamilangon i. Adong do dua sangkap ni sada pamilangon. Na parjolo, mangalului calon wajib militer. Marlaku do i holan tu warga negara Rom. Na paduahon, manontuhon pajak na ditarik dohot sian arta teanteanan na marhapeahan di bona ni pinasana be. Hombar tusi, borhat ma si Josep na sian Nasaret na di luat Galilea tu Betlehem na di luat Judea. Digoar do Betlehem i huta ni si Daud, ala disi do hatubuan ni si raja i (1 Sam.16:1). Tusi ma mulak si Josep, ai i do bona ni pinasana, jala pinompar ni si Daud do ibana, marga Juda. Ndang binoto alana umbahen marhuta ibana di Nasaret. Tano napu do Betlehem (=bagas roti). Somalna nian, tar maol do ‘mangaranto’ halak sian tano napu. Alai songon i ma dalanna asa saut na nidok ni panurirang i: “Bangso na mardalani di bagasan haholomon marnida sada panondang na bolon” (Jes.9:1; pat.Mat.4:14-16).

Diboan do dohot si Maria, oroanna i naung gabegabean. Di Mat.1:24 dipaboa, jalo dung ro poda ni suruan ni Debata di nipina, dialap si Josep do si Maria bahen donganna saripe. Hombar tusi, nunga digoar disi si Maria i niolina. Alai dison, dipangke dope goar oroan. Na marpardomuan do i tu Mat.1:25 na mandok na laos so ditanda dope (si Maria i) paima tubu buhabajuna. Secara hukum nunga sah si Maria i bagian ni keluargana, parsidohot di suksesi marga dohot di teanteanan. Ala ni i, hombar tu parenta i ingkon dipasurathon do dirina raphon si Josep. Boru aha do si Maria i? Ndang adong hatorangan na pasti taringot tusi. Mangihuthon Luk.1:36, na marsisolhot dope ibana dohot si Elisabet. Manang na sian dia parsisolhotonnasida, i pe ndang torang; boi do i sian si Sakarias marga Levi, boi sian si Elisabet boru Aron/Levi (Luk.1:5), boi huhut sian inanasida isara ni na marpariban ina ni si Maria tu ina ni si Sakarias manang tu ina ni si Elisabet. Mamereng sian i, ndang so mungkin na boru Levi do si Maria i.

Songon i ma dalanna saut bagabaga ni Panurirang Mika na mandok na sian Betlehem do haroroan ni Mesias i (Mik.5:1), ai didok: “Di na disini nasida, gok ma ari ni hangoluanna, ditubuhon ma anak buhabajuna, diborhos ma, dipeakhon ma tu bagasan panggagatan, ala so adong inganan na asing di parmianannasida.” Digoar do na tinubuhonna i buhabaju, ai adong dope anak ni si Josep dohot si Maria, angka anggi dohot iboto ni Jesus na tubu di pudiNa (pat.Mat.13:55-56). Alai huhut, ia ditaringoti pe i dison na marpardomuan do i tu patik na taringot tu anak buhabaju na ginoaran hadohoan ni Tuhan i (pat.Luk.2:23 duu). Di dia ditubuhon? Tradisi mandok, di bara. Na marbonsir do i sian hata panggagatan (Gr. fatnee, manger/feeding-trough, palung/malaf) manang palangka na martaringot di ayat 7. Taringot tusi adong do manang na piga kemungkinan. Na parjolo, di bara. Di na so adong be inganan di parbornginan, gabe marborngin ma si Josep dohot si Maria di sada bara. Tongon di adaran do angka pinahan hatiha i, gabe boi pangkeon nasida sada bara na di huta i bahen pangulonannasida. Na paduahon, di emper ni jabu parbornginan na diparade bahen inganan ni hoda manang halode ni angka parborngin. Na patoluhon, di jabu. Jabu ni na pogos di Palestina gellenggelleng do. Holan sada do bilutna jala i do inganannasida na saripe, inganan ni ugasan dohot pinahanna na so sadia bilanganna (pat.2 Sam.12:3). Tontu, laos adong ma disi panggagatan. Boi do di jabu sisongon i si Josep dohot si Maria marborngin jala laos disi ma sorang Jesus. Manang dia pe sian i na toho, anggo na naeng dohonon ni si Lukas, i ma sian mulana dope nunga ditulak portibi on Kristus i. Nang pe songon i, ndang Agustus, alai Ibana do Sipalua portibi on. Sangat menakjubkan tahe, dipangke Debata do Agustus gabe ulaulaNa bahen hasasaut ni haluaon na di bagasan dohot marhite Kristus na ro i.

Rancangan Homiletis

Nunga sahat be hita tu mata ni Pesta Natal di taon on. Di jolo ni on nunga tabolus opat minggu Advent na di sada sisi parade hita tu pesta on. Angkup ni i, nunga adong manang na piga pesta na tapatupa manang tadohoti andorang so on. Rajumanta do i sude songon patujolo ni pesta na balga on. Ndang parsoadaon, sai adong do na denggan na tinubuhon dohot na tininggalhon ni i di hita. Nang pe songon i porlu do hita merenungkan ulang atik boha ala ni pangaradeon dohot rumang ni pesta gabe holan sabagian ni perhatianta na tapasahat laho mamingkirhon lapatan dohot na niigil ni Natal i. Tutu pangaradeon na so tardok otik, haporluan Natal na lam godang, kesibukan ni na marpesta na pasti marasing sian kesibukan na somal, godang do i menyita perhatianta. Alai nuaeng, nunga salpu be kegiatan i. Ala ni i nunga boi umpungu jala sumonang rohanta laho manangihon dohot marateatehon Evangelium Natal na taringot tu hatutubu ni Tuhanta Jesus Kristus songon na hinatindanghon ni turpuk jamita di hita ari on.

Tubu do Sipalua i di hagogok ni tingkina (Gal.4:4). Tingki ni Kesar Agustus do hagogok ni tingki i. Na mamarenta do ibana di taon 30 SM–14 M. Gaius Julius Caesar Octavianus do jolo goarna, alai dipampe do muse tu ibana goar Agustus, lapatanna na marmulia. Na maralasan do i, ai sian sude kesar Rom ibana do na umbonggal jala na umbaritaan. Bolas dohonon, adong do dua pangalaho na bertolakbelakang na mewarnai pamarentaonna. Na parjolo, hamajuon. Di tingki i sahat do harajaon Rom tu puncak ni kejayaanna. Hira sude oikoumene i ma portibi na beradab jala na tartanda di tingki i, nunga tunduk tu Rom. Di luat na mansai bidang i, mampu do kekaisaran mangaramoti keamanan dohot ketertiban. Hasonangan ni tingki i digoar ma i pax-romana, na mandok hadameon rom. Dipatupa do pembangunan lumobi di bidang prasarana jalan, gabe mansai hatop hubungan ni luat tu luat. Sudena i dipasingkop marhite haadongon ni bahasa persatuan na margoar Junani Koine na manghorhon hadengganon ni komunikasi. Ala ni saluhutna i digoar halak do Kesar Agustus i ‘sipalua portibi on’ jala masa pamarentaonna digoari ‘tingki na imbaru.’ Na paduahon, kemerosotan. Molo maju pembangunan fisik dohot politik, ndang songon i anggo agama dohot moral. Lam merosot do pengaruh ni dewa-dewa dohot ugamo kafir, lam lesu parngoluon parugamoon. Masa ma keresahan dohot hagangguon. Torop halak na jalakjalak di hasonangan ni roha manang kesejahteraan jiwa. Manatap ma nasida tu Asia, jala dihirim ro hadameon sian angka ugamo orient.

Di na saluhutna i hira na dimatangkan do situasi tu haroro ni Kristus dohot haluaonNa, jala tutu do apala di tingki i do tubu Ibana. So sian pamotoanna, marhite pamilangon na pinatupana berperan do Kesar Agustus di hatutubuNa i. Marhite i dialo do pingkiran na taringot tu hasipaluaonna. Ndang ibana, alai Kristus na tubu i do Sipalua portibi on. Nang pe so songon sangap ni kesar i hataridaanna, di Ibana do hagogok ni haluaon ni portibi on. Toho do, sian Asia do haroroanNa, alai nda tung sada sian dewa-dewa orient Ibana, Tuhan do, Anak ni Debata. Mangihuthon hajolmaonNa, Anak ni si Josep dohot si Maria do Ibana, jala sian Nasaret na di luat Galiea do haroroanNa. Di luat i, marsaor do Jahudi dohot sipelebegu. Inganan na gaor do i, na rusuh, parmianan ni angka na maol aturon jala partabunian ni angka panamun dohot pemberontak. Didok na mandok, molo ditempathon sada komandan ni soldadu tu Palestina, holan mambege goar Galilea i dope nunga pintor angka dotdot. Alai luat i ma haroroan ni Kristus i. Mangihuthon pandok ni si Mateus, hombar do i tu hata panurirangon ni si Jesaya na mandok: “Bangso na na mardalani di bagasan haholomon marnida sada panondang na bolon. Binsar do sada panondang di angka na mangingani tano linggoman ni hamatean” (Jes.9:1; Mat.4:14-16). Alai laos hombar tu bagabaga i, Betlehem do huta hatubuanNa. Halongangan do dalan ni Debata patulushon i, ai marhite pamilangon na pinatupa ni Agustus, ingkon borhat si Josep dohot si Maria tu Betlehem, jala di na disini nasida, gok ma ari ni hangoluanna, ditubuhon ma anak buhabajuna, i ma Kristus i. Luhutna i mangondolhon na Ibana do anak ni si Daud, Sipalua na pinarbagabaga i; Sipalua na sian Debata, na pinillit jala na tinontuhonNa. Ala ni i singkop do haluaon na di bagasan dohot na marhite Ibana i. Dung i tutu do, nunga matang situasi tu kehadiran ni Kristus i, ai disi dibaritahon Barita na Uli i di Eropa, mansai hatop do i marhasiatan di roha ni natorop jala di tingki na relatif jempek nunga boi mangahamonanghon sandok harajaon Rom.

Pinatudos tu tingki ni Kesar Agustus, tingkinta sinuaeng on pe bolas do dohonon suasana na sangat matang do tu kehadiran ni Kristus dohot haluaonNa. Ndang jujur hita molo so taparhatutu na zaman hamajuon do nuaeng on. Tajangkon do ragam ni unsur ni hamajuon sian barat. Dungkon ni senjata nuklir dohot kenderaan angkasa, aha be na adong di barat na so adong nuaeng di Indonesia on? Komputer na tardok ciri ni zaman na maju, alat-alat kmunikasi na canggih-canggih nunga adong bahkan rarak nuaeng di tanonta on. Angkup ni i ragam do unsur ni hamajuon na takembangkan sandiri di Indonesia on, hamajuon di bidang fisik manang pe di bidang pamingkirion. Alai di sisi na asing tong do ndang jujur hita molo talehon punten 100 tu hamajuon i, ai mansai godang do efek negatifna tu parngoluon. Lam moru do nuaeng respek ni jolma tu alam dohot tu Tuhan. Ditorbani angka dolok, dipungkori toru ni tano, dirabasi tombak laho manggohi hinaringkot ni hamajuon i. Ndang holan alam materi be na diutak-atik, nunga dohot ngolu ni jolma i. Rohana dohot jiwana nunga sude dijamai jala dipantunggalinghon. Gari batas ni hak ni jolma tu huaso ni Debata tahe taringot tu ngolu dohot na mangolu nunga dilangkai. Pencucian otak, manusia tabung, cloning, i ma deba ginisanna.

So mansoadahon guna dohot pasupasuna ingkon do dohonon, hamajuon ndang manggohi sejuta harapan ni hajolmaon. Sabalikna do tahe, mansai godang do i manubuhon biar dohot keresahan. Torop do halak na dilupahon, na tarduru, na tercecer manang na gabe korban ni hamajuon i. Gabe godang do halak na so tahan, na naeng mamporus sian alam nyata. Taingot ma rupani, boasa sai langku obat bius atik pe songon i arga jala marmara situtu? Na so diboto halak do mara ni i? Sasintongna diboto do, alai di sada sisi i nama na dirajumi cara laho maporus sian portibi na mansai rundut laho fly tu alam khayalan dohot tu hasonangan sisangombas. Unang lupa hita, narkotik paling laku di negara maju. Laos disi do gumodang halak na maningkot. Di sada poster na hea jinaha didok, di Amerika Serikat setiap lima menit ada seorang mencoba bunuh diri. Songon i ma, lam tu majuna hita on, mansai talpe do hita tu efek negatif angka na songon i. Olo, hamajuon ndang i sigohi panghirimon ni hajolmaon, jala angka jolma siboan hamajuon i ndang i sipalua jala sipangolu portibi on? Antong ise do?

Evangelium Natal sadari on manghatindanghon tu hita, Jesus Kristus na tubu i, Ibana do Sipalua portibi on, Sipalua hajolmaon, Sipalua angka bangso, Sipalua na mago, na mabiar jala na resah, Sipalua hita. Sasadasa do Sipalua, manang ise na naeng malua, malua ma di bagasan dohot marhite Ibana; malua sian dosa, sian gomgoman ni sibolis dohot hamatean; sian keberadaanta nuaeng asa tu haluaon dohot hangoluan na hot saleleng ni lelengna. Ala ni i, sadari on di na tabege baritaNa, tahaporseai ma Ibana, tajangkon gabe Tuhanta, Sipalua jala Sipangolu hita. Selamat Natal!

jkt.16.12.2010/mvs

Read More..

Borngin Natal

SERMON JAMITA TU PARNINGOTAN HATUTUBU NI TUHAN YESUS
24 DESEMBER 2010
1 Joh.4:13-16

Patujolo

Di 3:24b didok si Johannes do: “Jala sian on do taboto naung mian Ibana di bagasan hita: Sian Tondi i na nilehonNa i tu hita.” Panindangion i ditorushon jala dipahembang dope di turpuk on. Alai andorang so sahat tusi, dilehon do jolo hatorangan taringot tu partanda ni Tondi na sintong. Taringot tusi didok: “Sian on ma tanda hamu Tondi ni Debata: Ganup tondi ma marhatopothon Jesus Kristus naung ro di bagasan daging, i ma sian Debata.” Mansai ringkot do i, ai di tingki i nunga mamungka rarat sada poda haliluon di Epesus na so marhatopothon Kristus ro di bagasan daging. Di pudian ni ari gabe margoar do poda i docetisme (ro sian hata Gorik dokein, na marlapatan seolah-olah/nampaknya). Dipodahon parpoda i do na so tutu gabe jolma Kristus i, alai holan idaon (nampaknya) do songon i, sai hira na (seolah-olah) jolma (hape ndang!). Urat ni poda i, i ma pingkiran na mandok na jahat do daging (hajolmaon) i, alai na badia do Kristus i (Debata). Ala ni i, tung na so tagamon do olo Kristus i saor tu daging (hajolmaon) na jahat i. Tangkasna, mangihuthon docetisme i, jolma na somal do Jesus i, anak ni si Josep dohot si Maria. Alai di na tardidi Ibana, songgop ma tu Ibana Kristus (logos) i. Holan na songgop do, ndang anggo marsaor manang marsada. Saleleng na mangula Kristus i di portibi on, dipangke do jolma Jesus i songon kendaraanna. Alai di na tartangkup Jesus di Getsemane, sumurut do Kristus i sian Ibana. Jadi holan jolma Jesus i do na mananon, na tarsilang jala na mate i. Docetisme i do na gabe urat ni gnosticisme na marbungaran di abad na paduahon. Alai Tondi na sintong i nunga manghatindanghon tu hita paboa Kristus na ro di bagasan jolma Jesus i do Tuhan (pat.1 Kor.12:3). Parbue ni i, gabe adong ma parmianon ni Debata di bagasan hita jala hita di bagasan Debata songon na niondolhon ni turpuk on.

Hatorangan

Sian Padan na Robi dope nunga marbagabaga Debata pasonggophon TondiNa tu jolma (Joel 3:1-2). Dipatangkas Jesus Kristus ma i muse di Padan na Imbaru (Joh.14:16-17, 26; 15:26; 16:7 duu) jala dipatulus tongon di Pentakoste ni Jahudi taon 33 (Ul.2:1 duu). Mamungka sian i sai diusehon Debata do Tondi Porbadia i laho patulushon gotilonNa di portibi on. Sada sian ulaon ni Tondi Porbadia i, i ma na manubuhon jolma tu bagasan haporseaon. Manang di dia jala sadihari pe porsea halak di Kristus i, sada partanda na do i paboa naung gabe pangulaan, hasonggopan dohot parmianan ni Tondi Porbadia i do ibana. Marojahan tu Bibel i tahaporseai do paboa sada sian hadirion ni Debata Sitolusada i do Tondi Porbadia i. Jadi di bagasan dohot marhitehite parmianon ni Tondi Porbadia i, mian do Debata di bagasan hita jala hita mian di bagasan Ibana. Di bagasan pardomuan tusi ma antusanta angka pandohan na di Padan na Imbaru na taringot tu parmianon ni Debata di bagasan Kristus, jala Kristus di bagasan Debata (Joh.17:21); Kristus di bagasan na porsea i (Joh.17:23, 26), jala na porsea i di bagasan Kristus (2 Kor.5:17; 1 Joh.2:28).

Di ay.14 mulak do panurat tu proloog ni surat on. Disi diondolhon do na saksi mata do nasida taringot tu hata hangoluan i, i ma Jesus Kristus i. Ndang na sian roharohanasida i manang sian na jinou ni tuanasida, molo pajumpang nasida dohot Kristus i jala porsea huhut gabe siseanNa nasida jala gabe angka sitindangiNa, na sian Debata do i. Taringot tusi, Tuhanta Jesus Kristus i sandiri mandok: “Ndang adong na tarbahen ro tu Ahu ia so na tinogu ni Ama i na marsuru Ahu.” (Joh.6:44a, 65). Tu si Petrus na manghatindanghon tingkos taringot tu Ibana didok do: “Ndada daging dohot mudar papatarhon i tu ho, Damang na di banua ginjang i do.” (Mat.16:17b). Sadalan tu na nidok di ginjang i, Tondi Porbadia i do hadirion ni Debata na manogihon jala na manogu jolma tu Kristus i, na patandahon jala manubuhon tu haporsean di Ibana, na patauhon jala margogoihon gabe sitindangiNa. Sian ajar ni Tondi Porbadia i, ditanda jala dihaporseai sisean i do paboa Anak ni Debata do Kristus i. Anak ni Debata, mandok Debata do Ibana, na saor (Joh.1:1-2) jala na sada (Joh.10:30) dohot Debata sian mulana i. Sian holong ni rohaNa (Joh.3:16), disuru Debata do AnakNa i tu portibi on laho paluahonsa. Hombar tusi gabe targoar do Ibana Sipalua portibi on (Juruselamat dunia; pat.Joh.4:42). Portibi [Gr.kosmou (sian hata kosmos), world, dunia], aha do i? Di pangantusion ni Bibel i, marragam do lapatanna. Rupani, di lapatan na netral, i ma langit dohot tano dohot laut dohot nasa isina songon na tinompa ni Debata; na negatif, i ma totalitas ni sandok na tinompa naung madabu, naung sega jala naung hinuasoan ni dosa; jala na positif, i ma portibi naung dipalua sian huaso ni dosa. Dison, pangantusion na negatif i do nidokna, jala sipalua portibi na songon i ma Kristus Jesus i. Hombar tu ajar dohot hagogoon na sian Tondi Porbadia i ma sisean i manghatindanghon Kristus i, asa malua portibi on sian hamagoanna.

Nang pe songon i ndang sude partohap di haluaon i, holan angka halak na porsea do jala na marhatopothon: Jesus do Anak ni Debata. Marhatopothon (Gr.homologeesee, confess/ declare, mengaku), lapatanna manolopi panindangion ni na asing. Nunga nidok, marhite Tondi Porbadia i ditanda, dihaporseai jala dihatindanghon sisean i do paboa: Jesus do Anak ni Debata, Sipalua portibi on. Ndang songon na pinodahon ni docetisme i, jolma Jesus na sian Nasaret na pinangke ni Kristus i bahen kendaraanna sambing, alai Kristus na ro di bagasan daging i do, i ma jolma Jesus na sian Nasaret. Dipangolu Tondi Porbadia i ma i di roha ni angka na tumangihonsa, gabe porsea ma dohot nasida disi jala dijangkon panindangion (ni sisean) i gabe panindangionna sandiri. Di angka sisongon i do mian Tondi Porbadia i, jala di bagasan dohot marhitehite parmianon ni Tondi Porbadia i mian ma Debata di bagasan ibana jala ibana di bagasan Debata. Dohot hata na asing, i ma na saor tu Debata dohot tu AnakNa, Jesus Kristus (1:3) jala na malua.

Laos marhite Tondi Porbadia i do tartanda jala tarhaporseaan holong ni roha ni Debata. Holong ni Debata ndang holan kondisi ni harohaonNa i na gabe ondolan manang motif ni sikapNa tu jolma alai sandok hadirionNa do. Hombar tusi ma didok dison: “Debata do haholongon i.” Pinatudos tu hata gorikna, hurang tingkos do salinan on, ai sarupa tu na di ay.8 songon on do tarsurat disi: Ho theos agapee estin (God is love, Allah adalah kasih). Di ay.8 dipataripar do i dohot ‘haholongon do Debata,’ hape di ay.16 on gabe ‘Debata do haholongon i.’ (Anggo di salinan Inggris dohot Indonesia, sarupa do di na dua ayat i). Marasing do na sinangkap ni na dua i, ai di na parjolo i hatorangan taringot tu Debata do haholongon i, alai di na paduahon i hatorangan taringot tu haholongon i do Debata. Ala haholongon do Debata laos diriNa sandiri do hapataran ni holongNa i. Jesus Kristus do hapataranNa i, jala laos Kristus i ma hapataran ni holong ni rohaNa (Joh.3:16). Jadi na mananda jala manghaporseai holong ni roha ni Debata dos do i dohot na mananda jala manghaporseai Debata. Hombar tusi ma didok dison, na mian di bagasan haholongon i, i do na mian di bagasan Debata jala Debata di bagasan ibana.

Rancangan Homiletis

Sian asi ni roha ni Debata, di bodari on nunga sahat be hita tu Natal. Natal, mandok tubu Jesus Kristus. Alai aha ma lapatan ni i di angka na marningot jala mamestahon Natal i di tingki on? Natal, mandok disuru Debata AnakNa tu portibi on. Alai aha ma lapatan ni i di portibi naung madabu jala naung ginomgoman ni dosa? Natal, mandok diungkaphon jala dipapatar Debata diriNa tu jolma. Alai aha ma lapatan ni i di manisia na tarpunjung di hamagoanna? Mamestahon Natal ndada na marlapatan i holan na marningot sada na masa marhira 2000 taon naung salpu na so adong be pola lapatan dohot panghorhonna tu tingki on; mamestahon Natal ndang na mandok mangalului pardomuan manang mangarahuthon diri tu pasipasi ni habonggalon ni tingki na salpu laho paholanghon diri sian hagolapon ni tingki na ro; mamestahon Natal ndada na marlapatan i holan na marpungupungu laho mangalului saotik apulapul dohot hasonangan di tonga ni portibi dohot tingki nuaeng na rundut jala na susa, alai mamestahon Natal na marlapatan do i menghadirkan kembali lapatan ni hatutubu ni Kristus tu portibi dohot tingkinta sinuaeng on. Aha ma i? Tauji ma pamanathon i marojahan tu turpuk di hita di bodari on.

Didok si Johannes di ayat na parpudi ni turpukta on: “Nunga tatanda jala tahaporseai holong ni roha ni Debata na tu hita.” Sasintongna, apala i do sintuhu ni Natal i, dipapatar Debata holong ni rohaNa tu portibi on. Holong ni roha ni Debata ndada holan gerak hati manang kondisi ni harohaonNa i, ndada holan emosi manang panghilalaanNa, alai tung sandok hadirionNa do. Hombar tusi do didok si Johannes di suratna on: “Haholongon do Debata.” Ala ni i, molo didok na dipapatar Debata holong ni rohaNa tu portibi on, na marlapatan do i diungkaphon jala dipapatar diriNa parholong jala haholongon. Lobi sian i tahe dilehon jala dipasaor diriNa tu manisia. Apala i do na hinatindanghon ni ‘Bibel na Metmet’ i, Joh.3:16 na mandok: “Ai songon on do holong ni roha ni Debata di portibi on, pola do AnakNa na sasada i dilehon, asa unang mago ganup na porsea di Ibana, asa hangoluan na salelenglelengna di ibana.” Na luar biasa do i jala na so dung hehe di roha ni jolma, ai dihaholongi Debata portibi on. Aha do portibi?

Ragam do pangantusion ni hata ni Debata taringot tu portibi, dunia manang kosmos. Di pangantusion na netral, portibi i ma langit dohot tano dohot laut dohot nasa isina songon na tinompa ni Debata; na negatif, i ma totalitas ni sandok na tinompa naung madabu, naung sega jala hinuasoan ni dosa; jala na postitif, i ma langit dohot tano naung pinalua sian gomgoman ni dosa. Dison, na paduahon i do nidokna, na negatif. Jadi tangkasna, portibi, i ma hajolmaon na mardosa jala memberontak tu Debata; portibi, i ma hajolmaon na marserak jala na tarbagibagi; portibi, i ma angka bangso na sai masihosoman jala na masimusuan; portibi, i ma Timur Tengah na so ra dame alai na torus sai masigariangan; portibi, i ma Indonesia dohot prestasina songon sada sian onom negara na terkorup di sandok portibi on, jala na terkorup sian sampuluonom negara Asia Pasifik; portibi, i ma halak Kristen dohot huria na so maila mamestahon Natal di bagasan rumang hura-hura, na konsumtif jala na profan. Alai Natal i mandok: “Debata manghaholongi portibi on,” manghaholongi manisia na mardosa jala na memberontak tu Ibana, manghaholongi jolma na marserak jala na tarbagibagi, manghaholongi angka bangso na masihosoman jala na masimusuan, manghaholongi Israel dohot Palestina na sai masigariangan, manghaholongi Indonesia na korup, jala manghaholongi halak Kristen dohot huria na so maila marnatal marhura-hura. Boha do parjadina haholongan ni Debata portibi na songon i? Nda maralo do angka i tu lomo ni rohaNa? Nda tumagon do dohonon na dihasogohon Debata portibi on? Toho do nian, dihasogohon Debata do dosa dohot pardosa, dihasogohon do korupsi dohot koruptor; alai sandok loja hita mangalului ndang adong nanggo sada pe di Bibel i pandohan na mandok: “Ai songon on do sogo ni roha ni Debata di portibi on,” sabalikna do tahe: “Ai songon on do holong ni roha ni Debata di portibi on.” Nda halongangan i?

Paboa sintong i disuru Debata do AnakNa na sasada i, Jesus Kristus tuat tu hasiangan on, bahen Sipalua portibi on. Sipalua hajolmaon na mardosa jala na memberontak tu Debata sitompa ibana, Sipalua manisia na marserak jala na tarbagibagi, sipalua angka bangso na masihosoman jala na masimusuan, Sipalua Israel dohot Palestina na so ra dame alai na torus sai masigariangan, Sipalua Indonesia na korup, jala Sipalua halak Kristen dohot huria na so sai radot di haasingon manang di habadiaonna. Nang pe songon i unang sala, ndang sude parjambar disi, holan angka na porsea do. Si Johannes mandok: “Asa unang mago ganup na porsea di Ibana, asa hangoluan na salelenglelengna di ibana.” Porsea, konsep na mansai bidang jala bagas do i. Ndang holan na marhahonaan tu pamingkirion sambing i, isara na marhatutuhon na adong Debata, ai anggo i do sibolis i pe porsea do disi jala angka dotdot (Jak.2:19), alai tu sandok hadirion do. Taringot tusi, di turpuk on dipangke do dua gombaran. Na parjolo, i ma na marhatopothon, lapatanna na manolopi panindangion taringot tu Kristus i jala manjangkonsa gabe panindangion sandiri. Hombar tu ajar dohot onjar ni Tondi Porbadia i dihaporseai jala dihatindanghon angka apostel i do paboa Anak ni Debata do Kristus i, jala Sipalua portibi on. Dipangolu Tondi Porbadia i ma i di roha ni angka na umbegesa, gabe dohot ma nasida porsea jala manolopi huhut manjalo panindangion i gabe panindangionnasida sandiri. Ndang holan na pajojorhon, alai na tubu sian haporseaonna do, ai roha i do porsea asa tu hatigoran, pamangan i do manghatindanghon asa tu haluaon (Rom 10:10). Na paduahon, mian di bagasan Debata jala Debata di bagasan ibana. Taringot tusi, sampe do tolu hali diondolhon di turpuk on, i ma di ay.13, 15 dohot 16. Na nidokna disi, saor na porsea i tu Debata, jala Debata saor tu nasida. Di bagasan Jesus Kristus do i masa, niulahon ni Tondi Porbadia i. Nasa na porsea jala na marhatopothon Kristus i, na saor jala mian di bagasan Debata jala Debata mian di bagasan ibana, i do na malua jala jumpangan hangoluan na saleleng ni lelengna.

I ma Natal i, dihaholongi Debata portibi on gabe disuru AnakNa i, Jesus Kristus tuat tu portibi on, bahen Sipalua portibi on. I ma na masa di Borngin na Badia marhira 2000 taon naung salpu, di huta ni si Daud na margoar Betlehem songon na taingot jala tapestahon borngin on. Na mangula do Tondi Porbadia i menghadirkan kembali lapatan ni haroro dohot hatutubu ni Kristus i tu portibi dohot tu tingkinta sinuaeng on. Dihatindanghon do tu tondinta na dihaholongi Debata do hita. Ala ni ulaon, tarpaksa do sahali maringanan sada halak mansai dao sian keluargana. Di hapunjunganna i sai marsak do ibana, pola naeng mandele. Alai dijalo ma sada surat sian boruna na mandok: “Apapun pergumulanmu, ingatlah ada seorang isteri dan empat orang anakmu yang sangat mencintai dan mengasihimu.” Mansai tarapul do ibana manjaha i, gabe margogo di hapunjunganna. Nda lobi tarapul jala margogo hita molo taboto na adong do Debata na manghaholongi hita? Na mangula jala marhuaso do Tondi Porbadia i pangoluhon manang mengaktualkan gogo ni haluaon na di bagasan dohot marhite Jesus Kristus na ro i asa gabe haluaonta i di tingki on dohot di inganan on. Sasadasa do Sipalua, na pinillit jala na tinontuhon ni Debata. Sipalua na asing ndang adong (Ul.4:12). Manang ise na naeng malua, malua ma di bagasan dohot marhite Ibana. Sipalua ganup tingki do Ibana; sipalua naung paluahon, sedang paluahon, jala na laho paluahon tu haluaon na salelenglelengna. Molo i tatiop ndang boi so marlas ni roha jala marolopolop hita di borngin on marningot haroroNa tu hasiangan on. Laos i ma sihangoluhononta di borngin on, marsogot dohot haduan, naeng marpesta hita di bagasan pangalaho ni angka halak naung malua. Pesta haluaon do na tapestahon. Ala ni i unang gabe tasorati rohanta binahen ni sipanganon, siinumon, parabiton dohot angka na asing. Taingot ma, ndada sipanganon manang siinumon harajaon ni Debata; alai hatigoran do dohot hadameon dohot las ni roha di bagasan Tondi Parbadia (Rom 14:17). Na mangula do muse Tondi Porbadia i padomuhon jala pasaorhon hita tu Debata asa mian Ibana di bagasan hita jala hita di bagasan Ibana. Gabe donganta Ibana, gabe Immanuel (Jes.7:14; Mat.1:23); gabe margogo hita di bagasan hagogoonNa. Na gabe sipahinsa roha ma i di hita di na mandalani parngoluonta di tingki on dohot di inganan on ala taboto ndang sendirian hita disi. Pinarhatopot do, lam tu maolna do na mangolu di hita di Indonesia on di tingki on, jala disura roha ndang na gabe numeang i di ombas na jonok on. Sabalikna do tahe, na boi lam tu dokdokna dope i. Na boi masa do i ala kebijakan ni pamarentanta na cenderung semakin tidak populis, isara ni na so paloashon roda empat berplat hitam be mamangke BBM bersubsidi. Ninna roha, ndang dia imbar ni i sian na panaekhon arga ni BBM, ai marhite na pasahathon pertamax dohot pertamax plus tu mekanisme pasar, na marlapatan do i nunga boi pamarenta panaekhon arga ni na dua mansam miak i ganup tongkin sahat tu na dos dohot arga na di Singapur naung makmur jala maju i. Molo saut i, manang na boha pe lam tu maolna do na mangolu i. Nang pe songon i, margogohon Debata tarhamonanghon hita do saluhutna i, ai molo Debata donganta, ise ma alonta? (Rom 8:31b). I pe naeng ma tarida di ngolunta di Natal on dohot tu tingki na ro. Ala ni Natal on, naeng lam pos ma rohanta mangolu, lam hinsa jala lam ringgas rohanta laho mangulahon angka ulaonta, jala lam margogo di bagasan Tuhan i.

jkt.10.12.2010/mvs

Read More..

Advent-4

SERMON JAMITA TU MINGGU ADVENT-4, 19 DESEMBER 2010
Sep.3:9-15

Patujolo

Na mangula do Panurirang Sepania di tano Juda di tingki hinarajahon ni si Josia (1:1) na mamarenta di taon 639-609 SM. Mansai danak dope ibana di na bangkit raja i, marumur ualu taon dope (2 Raj.22:1). Ala ni i, ndang pintor sahat dope tu ibana sandok huaso, alai – songon na somal – adong ma sada badan perwalian na mewakili ibana mandalanhon pamarentaon di tongatonga ni bangso i. Ra, i do na nidokna angka induk, angka anak ni raja dohot angka panguhum na martaringot di 1:8 dohot 3:3 i. Dipaihutihut halak on do dalan ni raja na jumolo sian Raja Josia. Dung monding Raja Hiskia (ida Sermon Minggu Advent-1, 28.11.2010) bangkit raja do si Manase anakna i bahen singkatna. Na jahat do raja i, ai dipaulak do muse parsombaon tu debata sileban angka naung nirotonghon ni amana. Laos songon i do dohot anakna si Amon na bangkit raja singkatna, ndang adong rohana paulakhon parsombaon tu Jahowa. Di ombas i dipahehe Debata ma si Sepania maningtinghon uhum tu Juda dohot tu angka bangso na humaliang. Alai ia masa pe i ndada na laho manudahon apala luhut, na papitahon do, ai tebahononNa do sada pasipasi na gabe parhobasNa tu sandok portibi on. Ia dung songon i, gabe adong ma haluaon di angka bangso songon na martaringot di turpuk on.

Hatorangan

“Ai disi do patongononHu tu angka bangso dila na pita, asa saluhut nasida manjou goar ni Jahowa, asa dioloi nasida Ibana marroha sisangunjur.” “Ai disi,” ninna. Sadihari? Di tingki na binuhul ni Debata hombar tu asi ni rohaNa. Di na jumpang tingki i, patongonon (Hb.‘ehpoh, turn/change/restore) ni Debata ma tu angka bangso (Hb.`amiym, the people) dila (Hb.saapaah, language, bahasa, hata) na pita. Alat komunikasi na mansai arga do hata di jolma. Alai ala ni dosa, mamungka sian Babel (1 Mus.11:9) sega do hata i, ai gabe so masiantusan be jolma tu jolma. Ndang holan i, ndang haantusan jolma be dohot lomo ni roha ni Debata, jala ndang tarpatubegehonsa be manang aha na hombar tusi di bagasan hata angka na torang, na taratur jala na boi antusan. Alai dison, dibagabagahon Debata do na paulahonNa muse hata i tu hajongjonganna hian, gabe boi jolma i markomunikasi jala masiantusan sama nasida, boi markomunikasi jala dapotan pangantusion taringot tu lomo ni roha ni Debata, jala ala ni i gabe boi ma nasida mangoloi manang beribadah tu Debata marroha sisangunjur, marsada ni roha, masitumpahan jala masiurupan.

“Sian bariba ni angka batang aek Kus, togihonon ni halak na marsomba Ahu, huriangKu angka na marserak i bahen pelean sipanganon tu Ahu.” Maol do antusan ayat on di hata Batak, ai gabe hira huria i do na gabe pelean sipanganon di Jahowa. Ala ni i, niuji do patariparhon i songon on: Sian bariba ni angka batang aek Kus marroan angka sisomba Ahu, angka boru ni na Hupanserakhon i mamboan peleanHu. Kus, i ma Etiopia manang Abessinia; na marhapeahan di Afrika, di bariba ni batang aek Nil. Di bayangan ni halak Jahudi di tingki ni si Sepania, i nama luat na dumao manang ujung ni portibi di dangsina ni tano Kanaan. Jadi, sian angka ujung ni sandok tano on marroan halak sisomba Jahowa. Ise i? I ma boru ni angka na marserak (Hb.bat-puwtsay, the daughter of my dispersed). Di Bibel i mansai jotjot do digombarhon jolma manang bangso songon parompuan. Rupani boru Sion, na nidokna pangisi ni Sion; boru Israel, halak Israel; boru Babel, bangso Babel dohot angka na asing. Di peristiwa Babel dipaserak Debata do jolma tu sandok portibi on. Dung i marjongjongan ma bangso angka na so masiantusan na sada maradophon na sada. Alai di na dapot tingkina, songon i ma didok dison, marroan do angka boru manang halak sian ganup bangso na marragam i tu adopan ni Jahowa laho marsomba huhut mamboan pelean tu Ibana.

“Di ari na sasada i ndang be tarurak ho ala ni sude pambahenanmu, angka na binahenmi mangalo Ahu; ai unsatonHu do disi sian tongatongami angka na teal mangasahon haginjangonmu, gabe ndang be datdatanmu patimbotimbo dirim di dolok habadiaonHu.” Teal dohot ginjang ni roha do sibonsiri ni haseserak ni jolma uju i, ai na naeng paulion nasida do tungkup sahat ro di langit punsuna, asa nangkok nasida tu surgo laho paijurhon Debata sian habangsaNa jala pahundulhon dirina tusi manggontihonsa. Alai gabe tarurak do nasida, ai ndada barita na denggan parbuena, hagagaor do. Mangihut tusi pe, di sejarah ni angka bangso torus do masa pangalaho na patimbotimbohon diri laho mangalo Debata. Alai di tonga ni halak angka na marroan i ndang jumpang be na songon i, ai paholangon ni Debata do sian nasida jolma angka na teal dohot na ginjang marroha. Marpungu nasida marsomba (ay.2) di dolok habadiaon ni Jahowa, mandok di Jerusalem na imbaru.

“Jala tebahononHu do di tongatongami sada bangso na dangol jala na parir, angka na marhaposan tu goar ni Jahowa.” Pingkiran taringot tu pasipasi (sisa, remnant) mulakulak do tarjaha di Bibel. Di angka ari mulamula, diripashon Debata do jolma marhite aek na sumar, alai ditebahon do si Noak dohot keluargana; di tingki ni si Elia, di tonga ni sandok Israel naung marroha mago i ditebahon do pitu ribu halak nari na so olo marsomba dohot mangumma baal (1 Raj.19:18); jala sian Israel na sampulu dua marga i, ditebahon do dua marga, i ma Juda dohot Benjamin na mulak sian habuangan. Na marlapatan ma i, haluaon manang sadihari pe pambahenan ni Debata do i, ndada hatauon ni jolma. Songon i ma didok dison, sian tonga ni Israel tebahonon ni Debata do sada punguan (Hb.`am, people, umat) na malua sian uhumNa. Angka na marhaposan tu goar ni Jahowa do nasida. Nang pe songon i, songon bagian ni bangso na terkorporasi, dohot do nasida manaon uhum na tu bangso i, jala ala ni i do asa gabe angka na dangol jala na parir (Hb.`aaniy waadaal, afflicted and poor, menderita dan miskin) nasida. Di sitaonon dohot hapogosonna i, torus do nasida marhaposan tu goar ni Jahowa, jala ala ni i do boi nasida gabe ulaula haluaon ni Debata tu angka bangso.

Taringot tu pasipasi na malua i, di ay.13 didok: “Ia ebaeba ni Israel, ndang be ulahononna hageduhon, jala ndang be hatahononna gabus; jala ndang be jumpang di bagasan pamangannasida dila sipaotooto, ai torang do nasida marparmahan jala marpangulonan, jala ndang adong na manonggoti.” Basabasahonon ni Debata do tu nasida hangoluan na imbaru. Hageduhon (Hb.`awlaah, iniquity, ketidakadilan/kelaliman), gabus (Hb.kaazaab, lies, dusta/kebohongan) dohot dila sipaotooto (Hb.lashown tarmiyt, deceitful tongue, lidah penipu, panghuling sipaotooto), dosa na somal do i angka na niulahon ni Israel sian ari tu ari. Masisarihon dirina be, ndang parduli di dongan dohot di hasintongan. Alai di tonga ni bangso na malua i ndang jumpang be na songon i. Angkup ni i, asiasihononNa dope tu nasida hasonangan, ai torang do nasida marparmahan (Hb.kiy heemaah yir`uw, for they shall feed, mereka akan diberi makan) jala marpangulonan (Hb.waraabatsuw, lie down, berbaring), ndang adong na manonggoti manang na mambibiari nasida. Gombaran on dibuat sian dunia parmahanion. Ala ni i do ra asa dipangke dison hata ‘marparmahan’ di salinan Batak dohot ‘makan rumput’ di Alkitab atik pe so jumpang i di naskah Heber.

Panggohionna

Di Sermon Jamita Minggu Advent-1 nidok: “Godang do sian panurirangon di Padan na Robi na bertingkat-tingkat panggohionna (Dr.Mr.D.C.Mulder). Adong do panggohion na jonok na masa di tingki ni panurirang i raphon halak angka na manangihonsa, alai adong do panggohion na dao bahkan na mansai dao na so dung hehe di roha ni panurirang i sandiri.” Suman tusi ma nang taringot tu turpuk on, angka halak na satingki dohot si Sepania boi do marnida panggohionna di sada peristiwa sejarah na adong hahonaanna tu nasida. Nunga niarbis di ginjang (ida Patujolo), mamungka sian tingki ni si Manase torus tu si Amon sahat tu taontaon parmulaan ni pamarentaon ni si Josia, marbungaran situtu do hasipelebeguon di tano Juda. Alai di tonga ni bangso naung marroha mago i, adong do angka na satia tu Debata. Tarsosak do nasida, dangol jala parir, metmet songon pasipasi. Nang pe songon i ndang mandele nasida, alai sai marsihohot do marhaposan tu Jahowa. Dung marumur Raja Josia sampulu ualu taon, sahat ma tu ibana sandok parhuasoon dohot panggomgomion di bangso i. Pintor dipatupa ibana ma haimbaruon manang reformasi, jala ndang masalpuhu ia nidok, pasipasi ondeng do sada sian unsur utama na mendukung keberhasilan ni reformasi i. I ma na masa di taon 621 SM jala jamita ni Sepania do sada na gabe landasan dohot sibonsirina. Baik si Sepania, songon i Israel satingkina, boi do mamereng i songon panggohion ni bagabaga on. Alai panggohion sasingkopna masa do di Padan na Imbaru. Marhite haroro ni Kristus dohot Tondi Porbadia songgop haluaon dohot haimbaruon tu jolma, dapotan roha dohot pangantusion muse jolma di lomo ni roha ni Debata dohot di donganna jolma, asa tu haluaon dohot hangoluan.

Rancangan Homiletis

Di ari on, sahat hita tu Advent-4, Advent na parpudi di hita di Taon Parhuriaon on. Dung tabolus tolu minggu Advent, didok roha, ndang so lam tanak be di hita taringot tu Advent i. Nang pe songon i, denggan do tong ulahan paboa na marhahonaan do Advent i tu na dua haroro ni Tuhanta Jesus Kristus, i ma haroroNa na parjolo na marhite hatutubuNa dohot haroroNa na paduahon di ari parpudi. Lam jonok do hita nuaeng tusi; lam jonok tu Natal siingoton jala sipestahononta di ari Sabtu dohot Minggu na ro on, tanggal 25-26 Desember 2010 dung jolo Borngin na Badia di bodari ni ari Jumat, tanggal 24 Desember 2009 on, lam jonok huhut tu haroro ni Tuhanta Jesus Kristus na paduahalihon i, na so taboto dope tingki dohot sadiharina. Ise jala boha do Kristus na ro i? Aha do hinarohonNa tu tano on? Tauji ma nuaeng pamanathon i marhaborhatan sian turpuk jamita Advent na paopathon on.

Na mangula do si Sepania di Juda di tingki hinarajahon ni si Josia. Mansai danak dope ibana di na bangkit raja i, marumur ualu taon dope. Ala ni i – songon na somal – adong ma sada badan perwalian na mewakili ibana mandalanhon pamarentaon. Dipaihutihut badan perwalian i do dalan ni raja na jumolo sian si Josia, i ma si Manase dohot si Amon na pabongothon pardebataon sileban tu Juda, gabe marbungaran situtu hasipelebeguon i hatiha i. Alai sian asi ni roha ni Debata, ditebahon do saotik pasipasi na marsihohot di parsombaon tu Jahowa. Tarsosak do nasida, dangol jala parir. Nang pe songon i, ndang gabe mandele nasida alai sai marhaposan do tu Debata. Di tingki i, mansai aktif do si Sepania mangalumbahon uhum sian Debata. Dung marumur si Josia sampulu ualu taon, sahat ma tu ibana sandok parhuasoon di harajaon i. Binonsir ni jamita ni si Sepania i, dipatupa ibana ma haimbaruon manang reformasi jala pasipasi na tinggal ondeng ma sada unsur pendukung ni keberhasilan ni reformasi i. Dilohai raja i ma angka inganan manang pusat ni pardebataon sileban i jala dipaulak muse parsombaon tu Jahowa. Mansai arga do haimbaruon na pinatupana i, gabe malua halak Juda sian uhum naung mansai talpe hian nian tu nasida. Di pangalaho i, gabe gombaran patujolo do si Josia di Messias i, manang gabe protipe ni Kristus Sipalua na pinarbagabaga i.

Apala i ma barita na uli ni jamita Minggu Advent-4 on tu hita, Kristus na ro i, na tatagam di Advent, na taingot jala tapestahon di Natal; na sai ro marhitehite hata dohot TondiNa di parngoluonta ariari jala na naeng ro dope di ari parpudi, siboan haimbaruon do Ibana bahen haluaon dohot hangoluan ni jolma. Di bagasan dosa songgop jala mangomgomi do haburuhon tu jolma. Ndang olo be jolma i paserephon rohana hot songon na tinompa, alai naeng do dos dohot Debata, jala marujung ma i di pangalaosion di patik i. Pangalaho i diulahi do muse di na martahi jolma i pajongjong sada tungkup di Babel na disangkapi sahat ro di langit punsuna, asa nangkok nasida tu banua ginjang laho patuathon Debata sian habangsaNa, jala pahundulhon dirina tusi manggontihonsa. Alai ndang taralo jolma Debata, ai digaor do hata dohot panghulingnasida gabe ndang masiantusan be jolma i sama nasida, agoan huhut di pangantusion taringot tu Debata dohot taringot tu lomo ni rohaNa; marserak ma nasida tu sandok portibi on, mangolu di parbolatbolaton dohot na masimusuan. Alai di bagasan Kristus na ro i, na niihuthon ni hasasaor ni Tondi Porbadia i, ditompa jala dijadihon Debata do jolma i gabe na imbaru, dipaulak muse tu panandaon di Ibana, dipapungu jala dipasaor di bagasan huria na sasada jala na badia i, gabe sisada pangantusion di lapatan ni haluaon jala sisada roha di parsombaon dohot pangoloion di Debata. Marhite Barita na Uli na niulahon ni TonndiNa, nunga dibasabasahon i dohot tu hita jala i ma na mansai arga sihalashononta di Natal on. Marpesta hita jala marolopolop ala ni haimbaruon i, ala ni haluaon dohot hangoluan na binoan ni Kristus i. Haimbaruon i, siudutan jala sipasingkoponNa dope i di ari sogot, di inganan na manongtong, na so mansohot jala na so marnasuda, sihirimon jala sipaimaonta dope. Boha ma i ulahononta?

Mulak tu turpuk jamita ari on, taringot tu haimbaruon i, marhite si Sepania marbagabaga do Debata marbasahon tu jolma i dila manang hata na pita. Marhite i gabe boi ma muse jolma i markomunikasi jala masiantusan sama nasida. Laos songon i dapotan ma muse jolma i di panandaon di Debata dohot di pangantusion taringot tu lomo ni rohaNa gabe boi rap manjou goar ni Jahowa dohot mangoloi Ibana marroha sisangunjur, masiurupan jala masitungkolan. Ndang adong be parasingan dohot parbolatbolaton, ai marroan do sian sude bangso na marserak i tu adopan ni Jahowa mamboan pelean tu Ibana; ndang adong huhut angka na teal dohot na ginjang roha angka na patimbotimbohon diri di dolok habadiaon ni Jahowa, alai dipaserep be do rohana songon na tinompa na mangunduk tu Debata sitompa saluhutna, gabe ndang tarurak be nasida ala ni angka pambahenanna. Suang songon i ndang adong be disi angka pargeduk, pargabus dohot pardila sipaotooto, alai mahaposan jala marhaporusan tu Jahowa do nasida tongtong, gabe marhasonangan nasida, dapotan sipanganon dohot siinumon, mardame, ndang adong sihabiaran dohot na manonggoti.

Laos i ma nuaeng joujou ni jamita Advent-4 on tu hita. Natal mandok, adong haimbaruon sian Debata, adong muse pardomuan dohot pardamean tu Debata dohot tu dongan jolma. Luhutna i ndang sae holan jaloon, ingkon na hangoluhononhon do huhut. Ala ni i molo tapestahon Natal, naeng ma di bagasan haimbaruon dohot habadiaon na tama, di bagasan hapolinon dohot hasintongan, unang ma marhitehite pangasomi hajahaton jala haroaon naung bari. Sipasidingonta do rupani Natal na marhaborhatan sian tondi na marbada jala na diulahon laho patuduhon hasurungan ni sasahalak manang habonggalon ni sadasada punguan. Ndang jolma, ndang hita, alai Debata do na ingkon tarpuji jala marsangap di Natal angka na tapatupa. Laos songon i do nang Natal na disangkapi jala na diulahon laho manggohi hisap ni roha pardagingon, patut sipasidingonta do i. Angkup ni i, marhite na marnatal naeng lam tangkas ma tarida hadameon dohot hadomuan di tongatonganta, lam masiantusan hita sama hita jala lam marsada di pangoloion dohot parsombaon tu Debata. Marhite na songon i tarbahen diri hita tu panghirimon dohot panjangkonon di Tuhanta Jesus Kristus na naeng ro i dope, dung i bongotanta ma haimbaruon dohot hasonangan na so mansohot be saleleng ni lelengna.

jkt.03.12.2010/mvs

Read More..

Advent-3

SERMON JAMITA TU MINGGU ADVENT-3, 12 DESEMBER 2010Rom 2:1-11

Patujolo

Ditongoshon Apostel Paulus do surat Rom on sian Korint marhira taon 57 M. Tujuanna, patandahon diri dohot pangajaranna, huhut laho mangarahon huria i mendukung tahina na naeng mamaritahon Barita na Uli tu Spanyol (pat.15:23-24, 28). Disurathon do i di tingki na tenang, gabe boi ibana pasahathon pingkiran angka na bagas jala na taratur taringot tu masalah angka na niadopanna, lumobi taringot tu pardomuan ni patik dohot asi ni roha. Di hata Batak, dibahen do ulu ni turpuk on: Di toru ni uhum ni Debata do sidabu uhum. (Alkitab: Hukuman Allah atas semua orang). Na tarrajum tu sada hasadaon na umbidang do i, i ma na taringot tu na so adong na tigor sian ulaonna (1:18-3:20). Agia parbegu, songon i Jahudi, luhut do pardosa jala ndang dapot pintoran ni Debata.

Hatorangan

Boi do bayanghononta, di na manurathon bagian on si Paulus na tongon berhadapan do ibana dohot halak sipelegu raphon halak Jahudi umumna, Jahudi Kristen khususna, angka na so haru malua dope sian panghaposion tu pangoloion dohot panggohion di patik i songon dalanna tu haluaon. Parjolo sahali dipinsang ibana do angka parbegu, ditaringoti do rimas ni Debata na tu nasida (1:18-32). Umbege i, ‘sombu’ do roha ni halak Jahudi. Tar songon i do antong na di tano on, paminsangon manang panguhumion tu na asing tarmasuk dalan na dumenggan do i laho mamintori diri. Ala ni i, saleleng na asing hona pinsang, ndang pola dia roha ni na so hona pinsang. Na boi gabe las jala sonang do tahe rohana mambege i, ai hira pembenaran do i di hadengganonna sandiri. Ia so hona pinsang ibana, songon i ma ninna rohana, ndang lobi ndang hurang, ala ni hadengganonna do i. Alai di na songon i roha ni Jahudi i, di turpuk on, tompu ma dipinsang si Paulus nasida, didok: “Dibahen i ndang dapot ondingan ho, ale jolma, sidabu uhum. Ai dirim do diuhumi ho, di na niuhumanmu donganmi. Ai suman tu na binahenna i do pambahenmi, ho na manguhumi i.” Digoar ibana do halak Jahudi i dison ‘jolma sidabu uhum.’ Na marpardomuan do i tu cara ni bangso i mamereng dohot mananda dirina. Dirajumi nasida do dirina na badia, na tigor jala na sintong. Sabalikna diuhumuhumi nasida do parbegu na ramun, na geduk jala na jahat. Tutu nian, ‘dumenggan’ do Jahudi sian parbegu. Alai ndang ala ni dirinasida i, ala ni Debata do naung papatarhon lomo ni rohana tu nasida. Dilehon patikNa tu nasida, jala i do na gabe hapistaran dohot hapantasonnasida di adopan ni angka bangso (5 Mus. 4:6). Ala ni hadengganonna i do asa torop parbegu tartait gabe proselit. Nang pe songon i, tong do godang pangalaosionnasida. Ala ni i sasintongna ndang adong dalannasida manghumuhumi halak parbegu i. Molo diulahon nasida pe i, na manguhumuhumi dirina sandiri do nasida disi. Tamba ni pangalaosionna ma i dohot tamba ni uhumna. Ala ni i ma asa didok tu nasida: “Ndang dapot ondingan ho ale jolma sidabu uhum.”

Pingkiran paboa na rap di toru ni uhum ni Debata do parbegu dohot Jahudi diuduti dope di ay.2 didok: “Alai taboto do, hombar tu hasintongan do uhum ni Debata mangonai tu angka na mangulahon sisongon i.” Panguhum na sintong do Debata jala na tigor. Ndang siida bohi Ibana, ndang diuhumi parbegu i ala parbegu, jala ndang dipintori Jahudi i ala Jahudi, alai diuhumi do sasude hombar tu na niulana. HasintonganNa do patokanna, i ma lomo ni rohaNa naung pinapatarNa di bagasan hataNa (pat.Joh.17:17). Na marparange hombar tu hasintonganNa i, angka i do na targoar partigor jala sipintoran; alai sabalikna, angka na marpangalaho maralo tu hasintonganNa, pangalaosi do i jala siuhuman.

Di jolo nunga nidok, paminsangon manang panguhumion tu na asing tarmasuk dalan na dumenggan do i laho mamintori diri sandiri. Marhite na manguhumuhumi donganna, sai hira na naeng tujuhononna do mata ni saluhut halak tu na niuhumuhumanna i asa sandok nalnal diida be hahurangan ni donganna i, alai ndang sanga be anggo mamarateatehon hahuranganna sandiri; sai hira na naeng dohononna do na sogo rohana di hageduhon alai lomo ia di hatigoran dohot hasintongan. Alai ndang langku i di adopan ni Debata. Diida jala diboto do saluhut, ndang hagabusan manang haangkalan Ibana. Di toru ni uhumNa do manang na ise pe na mangulahon na so uhum atik pe mansai malo ibana mamintori diri marhite panguhumuhumion dohot na marsipalensem. Songon i ma halak Jahudi, ndang tagamon boi pasidinghon uhum ni Debata ala ni pangalosion na dos tu na niulahon ni parbegu nang pe ringgas nasida mamintori diri marhite na manguhumuhumi parbegu i, ai ndang ‘lumomo’ rohaNa mida dosa ni halak Jahudi sian dosa ni halak parbegu, alai rap dihasogohon do i. Ala ni i, ndang tagamon adong perlakuan khusus tu Jahudi.

Na manguhumuhumi, siangkup ni na naeng mamintori diri, doshon na marsintahon na roa do i tu na niuhumuhuman i; sai hira na mangidohon asa pintor hona uhum nian pardosa i jala mago. Hu ni roha do i di denggan basa ni Debata. Hu ni roha, mandok lea manang leas ni roha, anggap sepi manang anggap enteng. Marbuhalbuhal do denggan ni basa ni Debata tu jolma. Nang pe pardosa jolma i, di bagasan lambas ni roha dohot habasaonNa dianju do nasida, ai naeng togihononNa do sasude tu hamubaon ni roha. Ala ni i, ndang pintor diuhumi jolma i di hadosaonna; dipasurut do tahe uhumNa, ditangguhkan laho mangalehon kesempatan tu jolma i paubahon rohana. I ma na pinarsineang ni roha ni sipanguhumuhumi i, didok rohana, na hurang tibu nian Debata manguhumi pardosa i. Songon i do halak Jahudi, hu do rohanasida di denggan ni basa dohot lambas ni roha ni Debata na tu parbegu i. Ndang mangantusi nasida, songon parbegu i pangalaosi do nang nasida. Ia so pintor hona uhum pe nasida tong do i ala ni denggan ni basa dohot lambas ni roha ni Debata asa sahat nang nasida tu hamubaon ni roha. Jadi molo halak Jahudi sandiri mangolu sian denggan ni basa dohot halambason ni roha ni Debata, aha dalannasida manguhumuhumi halak na asing na tong mangolu sian denggan basa dohot halambason ni Debata? Hamubaon ni roha (Hb.syub, berbalik, mulak; Gr.metanoia, repentance, bertobat/membalikkan pikiran) na marhahonaan do i tu hamubaon ni sandok parngoluon, ndada holan tu harohaon manang cara berpikir.

Di ay.5, diungkaphon si Paulus do harohaon ni halak Jahudi, na jogal roha jala na so olo muba. Debata sandiri manggoari nasida na tangkang roha (tegar tengkuk; 2 Mus.32:9; pat.5 Mus.10:17; 31:7). Ndang olo nasida muba, ai didok rohana bangso ni Debata do nasida naung mardalan di dalanNa jala tuk do hadengganonasida mangodingi nasida sian rimas dohot uhum ni Debata. Alai jogal ni roha do i, hatangkangon. Mansai jonok do hajogalon tu uhum. Marhite na pajogalhon roha, sasintongna naung dipajonokjonok jolma do dirina tu uhum. Lobi sian i tahe, nunga hira na disurduhon tanganna mangaithon uhum na tu ibana. Songon i ma didok dison, ala ni jogal ni rohana nunga dipagukguk halak Jahudi rimas tu dirina. Rimas, i ma sikap ni Debata di bagasan diriNa maradophon dosa dohot pardosa. Aspek dinamis ni rimas i, i ma uhum na nidabuhonNa na mangonai tu pardosa. Di na ro tingkina ndang boi so mangonai uhumNa tu angka na tangkang. Ndang mardia imbar, Jahudi manang Gorik, ai na tigor do Ibana. Sadihari? Boi do i di tingki on, alai na pasti, di ari sogot; jala godangan marhahonaan tusi do turpuk on.

Taringot tu paruhuman sogot i, didok: “Ai baloshononNa do tu ganup marguru tu na niulana be.” Di ari parpudi i, ro do Kristus Jesus i songon panguhum na mangulahon panguhumion ni Debata maradophon sandok hajolmaon. Nunga salpu be tingki parasian, jumpang ma tingkina mamaloshon tu ganup hombar tu na niulana be. Angka siulahon na denggan manjalo ma i di upana, alai angka siula hajahaton hona uhum do. Ulaon dison, ndang bolas i berengon holan sian rumangna, alai ingkon sian haborhatan manang sian motivasina do. Haporseaon, i ma pardomuan dohot parsaoran na sintong tu Debata, na di bagasan hasatiaon dohot haburjuon, ingkon i do haborhatan ni ulaon na niargaan jala na niupaan ni Debata. Sadenggandenggan ni ulaon mangihuthon adat dohot uhum ni portibi manang moral dohot undangundang ni hajolmaon, molo so haporseaon i haborhatanna, siuhuman do i, ai nasa na so tubu sian haporseaon, i do dosa (Rom 14:23).

Di ay.7 dohot ay.10, ditaringoti do tumangkas lapatan ni ulaon na denggan dohot upana, didok: “Hangoluan na salelenglelengna do di angka na marbenget ni roha mangula na denggan, laho mangalului hasangapon, hamuliaon dohot hatongtongon. Alai hasangapon, hamuliaon dohot dame tu ganup na mangulahon na denggan, tu halak Jahudi jumolo, dung i dohot do tu halak Gorik.” Ulaon na denggan, i ma ulaon na pinatupa ni jolma laho mangalului hasangapon, hamuliaon dohot hatongtongon. Hamuliaon (Gr.doxan, glory, kemuliaan) dohot hasangapon (Gr.timeen, honour, kehormatan) ndang tarsirang i sian hadirion ni Debata. Di Padan na Robi, molo dipapatar Debata diriNa tu bangsoNa, sai di bagasan hamuliaon (Hb.qabod) do, i ma hatiuron na mansai songkal jala na mandokdohi. Mansai jotjot do hamuliaon i dipangke songon sinonim ni kehadiran manang hadirion ni Debata. Laos songon i do dohot hatongtongon, ndang tarsirang i sian hadirion ni Debata. Na manongtong do Ibana, na so olo muba jala na so umboto agia halilu ni hamimimbar (Jak.1:17). Jadi, ulaon na denggan manang ulaon na mangalului hamuliaon, hasangapon dohot hatongtongon i, i ma angka ulaon na tinubuhon ni pardomuan ni jolma tu Debata. Di bagasan Kristus do pardomuan i, ala ni haporseaon di Ibana. Angka naung mangolu di bagasan haporseaon i, gabe ture do parsaoran dohot pambahenan ni i tu donganna jolma; di bagasan haholongon, dao sian tondi panguhumuhumion; ture ma dohot pangalahona jala angka i ma na hinalomohon ni Debata. Na mangulahon na denggan sisongon i ingkon na di bagasan habengeton do, ndang marnaloja manang gabe pargale (Gal.6:9). Tu angka na songon i, manang na Jahudi i manang na Gorik, basabasahonon ni Debata do hasangapon, hamuliaon dohot hadameon, i ma hangoluan na saleleng ni lelengna.

Sabalikna, di ay.8 dohot ay.9, ditaringoti do lapatan dohot uhum ni parjahat, didok: “Alai rimas dohot muruk ma di angka na tongkar, ala pangoloi nasida di hageduhon, ndada di hasintongan. Na bernit dohot hatahuton ma tu roha ni nasa jolma na mangulahon hajahaton, tu halak Jahudi jumolo, dung i dohot do tu halak Gorik.” Parjahat, i ma angka na mangulahon hajahaton (Gr.katergazomenou to kakon, that doeth evil, yang berbuat jahat). Taringot tusi, dipatorang do tumangkas di bagasan tolu pangalaho, i ma: Parjolo, na tongkar (Gr.eks eritheias), mandok na girgir marbada (contentious, suka bertengkar). Alai na laos marlapatan do i na manarihon dirina sandiri (mencari kepentingan sendiri), i ma angka halak na bermental upahan na mangalului paruntunganna sambing. Duansa i na marmual do di pardomuan naung sega tu dongan jolma. Paduahon, na so mangoloi di hansintongan (Gr.apeithousi tee aletheia, do not obey the truth, yang tidak taat kepada kebenaran). Di jolo nunga pinatorang, hasintongan, i ma lomo ni roha ni Debata naung pinapatarNa tu jolma di bagasan hataNa (ay.2). Patoluhon, pangoloi di hageduhon (Gr. apeithomenois tee adikia, obey unrighteousness, taat kepada kelaliman). Hageduhon, i ma aloalo ni hasintongan, jadi sasintongna dos dohot hajahaton. Rimas (Gr.orgee, wrath, murka; ida ay.5) dohot muruk (Gr.thumos, indignation, geram/kemarahan/kejengkelan/ kedongkolan) ma jambar ni angka sisongon i. Duansa i, ndang adong pola parasinganna, jala na mahahonaan do i tu ari uhum sogot. Akibatna, na bernit (Gr.thlipsis, tribulation, penderitaan), i ma haporsuhon pardagingon dohot hatahuton (Gr.stenochooria, anguish, kesesakan), mandok haporsuhon ni harohaon manang penderitaan batin. Tu duansa do i mangonai, tu halak Jahudi jumolo, dung i dohot do tu halak Gorik.

Taringot tusi diondolhon di ay.11, didok: “Ai ndang siida rupa anggo Debata.” Ndang gabe marasing perlakuan ni Debata tu halak Jahudi sian tu halak Gorik. Toho nian, adong do hasurungan ni halak Jahudi ala anak ni si Abraham nasida (ida huhut ay.1) Alai nang pe songon i, ndang gabe numeang panimbangion ni Debata tu nasida, dumokdok ia tu parbegu, alai uhumanNa do ganup hombar kaidah dohot patokan na dos (pat.ay.2).

Rancangan Homiletis

Patolumingguhon ma nuaeng dung na bongot hita tu Advent. Mangulahi naung nidok di na dua minggu Advent naung salpu, Advent mandok haroro (coming). Na marhahonaan do i tu haroro ni Kristus na parjolo na marhite hatutubuNa na secara khusus taingot jala tahalashon di Natal, dohot tu haroroNa na paduahalihon di ari parpudi. Suman tu jamita na di Minggu Advent-2 na salpu i, jamita Minggu Advent-3 sadari on pe gumodang do mangarahon rohanta manatap tu ujung, tu haroro ni Kristus na paduahalihon i. Taringot tusi, nunga dipasingothon panurat ni Surat 2 Petrus hian, di angka ari na parpudi ro do parhata insahinsak angka na mandok: “Di dia do haroroNa na pinarbagabaga i?” Di rohanasida, malelenghu do haroroNa i. Nunga pola marmatean angka jolma, marsalpuan angka sundut, tong so ro; portibi on pe hot do, ndang adong na muba sian na di mulana i. Ndang manganto rohanasida, molo so pintor ro dope Kristus i jala so pintor marujung sejarah, lambas ni roha ni Debata do i laho mangalehon tingki parasian tu manisia, ai dipangido rohaNa do naeng unang mago nian agia ise, alai naeng ma sahat saluhutna tu hamubaon ni roha (pat.2 Ptr.3:3-9). I ma deba na naeng parataon ni jamita Advent-3 on tu hita, tingki parasian do nuaeng on. Di tingki parasian i do hita mangolu dohot mangula, disi do hita naeng marsaor, marhobas dohot manindangi, disi huhut naeng maradvent dohot marnatal. Antong, boha ma hita mamangke i? Aha ma na patut sipatupaonta? Tauji ma pamanathon i marhaborhatan sian turpuk di hita ari on.

Na parjolo, tapasiding ma na manguhumuhumi. Di jamita on dipinsang Apostel Paulus do halak Jahudi na mansai ringgas manguhumuhumi halak parbegu. Na sahat do nasida tu bangko i ala ni pangantusionna na sala taringot tu hajongjongannasida songon bangso ni Debata. Didok rohanasida, ala bangso ni Debata nasida gabe numeang do uhum tu nasida, dumokdok ia tu parbegu. Na laos marlapatan ma i na dirajumi nasida do na umpintor nasida di adopan ni Debata marimbanghon bangso na asing. Asa nalnal hapintoranna i, gabe girgir ma nasida manguhumuhumi. Didok rohana, marhite i ma nasida patuduhon keberpihakanna tu hasintongan dohot sogo ni rohana tu hageduhon. Angkup ni i, marhite panguhumuhumion i, mangolu do di nasida giot ni roha na marsintahon na roa taringot tu angka parbegu. Naeng gira hona uhum nian parbegu i di rohanasida, naeng gira mago. So mamoto nasida, songon parbegu i pangalaosi do nang nasida, jala ndang lumomo roha ni Debata mida pangalaosionnasida asa mida pangalaosion ni bangso parbegu. Hombar tu hasintongan do panguhumNa, jala ndang siida bohi Ibana. Ia so pintor diparo pe ari uhum na balga i, tung lambas ni rohaNa do i ai dipangido rohaNa naeng sahat nian sude tu hamubaon ni roha. Di duansa, di Jahudi dohot parbegu. Ala ni i, ndang adong dalanna di Jahudi manguhumuhumi parbegu, ai doshon na manguhumuhumi dirina do nasida disi. Hu ni rohanasida do i huhut di lambas ni roha ni Debata, ai molo nasida mangolu sian denggan ni basa dohot lambas ni roha ni Debata, aha dalanna di nasida marsintahon uhum tu parbegu na tong mangolu sian denggan ni basa dohot halambason ni Debata?

Laos i ma joujou ni jamita Minggu Advent-3 on tu hita, asa unang hita manguhumuhumi. Ndang adong na tigor nanggo sada, luhut do pardosa jala ndang dapot pintoran ni Debata nasida. Ala ni i do umbahen na ro Tuhanta Jesus Kristus tu portibi on songon na tatagam di Advent dohot na naeng ingoton jala pestahononta di Natal on. Di na saluhutna do Ibana ro, ndada holan di sada bangso; sipalua ni sandok hajolmaon do Ibana, ndada holan sipalua ni sapunguan halak. Olat ni tingki on, nunga torop naung manjangkon haluaonNa i. Alai ndang sae dope olat ni i, sitorushonon jala sidatdatanNa dope i tu angka na asing. Tu sangkap i, sahat ro di haroroNa na paduahalihon i ungkap do tongtong pintu parasian di na saluhut. Ala ni i hita angka naung parjolo manjalo dohot mandai haluaon i, ndang boi manguhumuhumi manang marsintahon uhum taringot tu angka na so manjalosa dope. Taboto ma, sarupa tu nasida, pangalaosi do hita na jolo, jala nang nuaeng pe ndang simbil dope hita sian pangalaosion i. Ia sahat pe hita nuaeng tu panandaon dohot panjangkonon di haluaon i jala ia so songgop dope tu hita uhum i, ndang ala ni hita i, ala ni Tuhan i do, hinorhon ni asi ni roha dohot halambasonNa. Di nasida pe, ungkap do tong asi ni roha dohot halambason sisongon i. Ala ni i ndang adong dalanna di hita manguhumuhumi na asing, ai doshon na manguhumuhumi dirinta sandiri do hita disi. Pamintorion di diri do i, hu ni roha di denggan ni basa dohot di halambason ni roha ni Debata. Alai na tarjou do hita marhaseanghon tingki parasian ni Debata. Apala i ma na mansai ringkot suan jala tarida di ngolunta di Advent on dohot di Natal sipatupaon jala sihalashononna so pola piga ari nari. Naeng lam tangkas tarida na rade hita managam dohot manjangkon haroro ni Tuhanta Jesus Kristus na paduahalihon i. Ala ni i, taparhaseang ma tingki parasian i, tapauba ma rohanta jala tapasiding ma na manguhumuhumi.

Na paduahon, taulahon ma na denggan. Nunga nidok, hombar tu hasintongan do Debata manguhum, jala ndang siida bohi Ibana. Ndang dipintori Ibana Jahudi i ala Jahudi, jala ndang diuhumi Ibana parbegu i ala parbegu, alai diuhumi do sasude hombar tu ulaonna be. Angka siula na denggan manjalo ma i di upana, alai angka siula hajahaton hona uhum do. Ulaon na denggan i, i ma ulaon na pinatupa ni jolma laho mangalului hasangapon, hamuliaon dohot hatongtongon; ulaon na tinubuhon ni pardomuan na sintong tu Debata. Di bagasan Kristus do pardomuan i, ala ni haporseaon di Ibana. Angka naung mangolu di bagasan haporseaon i, gabe ture do parsaoran dohot pambahenan ni i tu donganna jolma; di bagasan haholongon, dao sian tondi panguhumuhumion; ture ma dohot pangalahona jala angka i ma na hinalomohon ni Debata. Jadi tangkasna, ia ulaon na denggan i, i ma ulaon na tubu sian haporseaon. Di angka siulahon na denggan sisongon i, basabasahonon ni Debata do hasangapon, hamuliaon dohot hadameon, i ma hangoluan na saleleng ni lelengna. Sabalikna rimas dohot muruk manang haberniton dohot hatahuton ma di angka parjahat, i ma angka na tongkar, angka na girgir marbada dohot na manarihon dirina sambing, angka pangoloi di hageduhon ndada di hasintongan.

I ma muse sipangot dohot joujou ni jamita Minggu Advent-3 on tu hita ganup, tapasiding ma hajahaton alai taulahon ma na denggan. Unang hita sala, ulaon na denggan i ndang boi i berengon holan sian rumangna, alai ingkon sian haborhatan manang sian motivasina do. Haporseaon, i ma pardomuan dohot parsaoran na sintong tu Debata, na di bagasan hasatiaon dohot haburjuon, ingkon i do haborhatan ni ulaon na niargaan jala na niupaan ni Debata. Sadenggandenggan ni ulaon mangihuthon adat dohot uhum ni portibi manang moral dohot undangundang ni hajolmaon, molo so haporseaon i haborhatanna, siuhuman do i, ai songon na nidok ni apostel i, nasa na so tubu sian haporseaon, i do dosa (Rom 14:23). Mansai ringkot ma i ingotonta, ai ndang sai hapintoran hita dirinta, jotjot do hita lobi mangharingkothon na denggan di jolo ni jolma sian na denggan di adopan ni Debata. Di Advent dohot di Natal rupani, jotjot do hita halak Kristen madabu tu na mangalului na denggan di roha ni jolma, di rohanta sandiri, di roha ni punguan, di roha ni bangso dohot negara, ndada na denggan di roha ni Debata. Molo dung riburan jolma marpesta, bosuran mangan dohot minum, sulean sude di hadiah manang di bingkisan Natal, i do tabahen ukuran ni kesuksesan. Alai boha do pandok ni Debata, sukses do manang gagal? Angkup ni i, na mangulahon na denggan i, ingkon na di bagasan habengeton do; ndang marujuuju, ndang marnaloja manang gabe pargale. Marsalpuan pe angka Advent dohot Natal, anggo na mangulahon na denggan i ingkon torus do i ulahononhon. Angka halak na songon i do na marhaseanghon tingki parasian ni Debata, na tagam jala hobas maimaimahon dohot manjangkon haroro ni Kristus na paduahalihon i.

jkt.24.11.2010/mvs

Read More..