Jamita Minggu 22 Trinitatis, 4 Nopember 2012

TABONGOTI MA HARAJAON NI DEBATA

Mrk.12:28-34

            “Ndang sadia dao ho sian Harajaon ni Debata,” ninna Tuhanta Jesus tu sibotosurat na ro manungkun Ibana di jamita na tabege nangkin. Harajaon ni Debata, apala i do pamusatan ni pangulaon dohot panindangion ni Jesus mangihuthon na tolu panurat ni Evangelium na parjolo, si Mateus, si Markus dohot si Lukas. Molo tapamanat rupani di bona ni Evangelium Markus on, di na dipungka Jesus marjamita apala i do na parjolo dihatindanghon, didok, “Nunga dapot tingkina, nunga songgop Harajaon ni Debata.” (1: 15). Harajaon ni Debata, aha do i?

            Harajaon ni Debata, i ma panghuasoion ni Debata di jolma di bagasan rumang ni parsaoran na mansai rosu, na nirahut ni dame dohot holong ni roha, suman tu holong ni roha ni ama tu angka anakna. Patulushon i, dosa na na manegai dohot mangambati parsaoran i, ingkon do jolo dipasisi, disegai jala dibolonghon. Di bagasan Kristus do i diulahon Debata. Marhite haroroNa, pangulaon dohot panobusionNa nunga be ditaluhon dosa i, dipasidung jala disalesehon. Ala naung disalesehon, tercipta ma muse parsaoran dohot pardomuan tu Debata. Hombar tu lapatan ni Harajaon ni Debata na nidok ondeng, laos dohonon ma, di bagasan Jesus Kristus, ala ni haroroNa, pangulaon dohot panobusionNa, nunga songgop be Harajaon ni Debata, jala sian asi ni rohaNa dijangkon ma jolma tu bagasanna, gabe wargana.

            Mulak tu naung nidok ondeng, tu sibotosurat i didok Jesus do, “Ndang sadia dao ho sian Harajaon ni Debata.” Ndang sadia dao, lapatanna nunga jonok. Alai nang pe naung jonok, ndang bongot dope. Dohot hata na asing, ndang parsidohot dope ibana di harajaon i, ndang parjambar dope; ndang dijangkon dope ibana tu bagasan songon warga na sah. Ndang adong guna ni na songon i. Ingkon na bongot do asa marguna. Songon i, nang pe naung songgop Harajaon ni Debata di tongatonganta, boi do hita holan jonok; boi ndang bongot jala ndang partohap di bagasanna. Asa malua hita sian kenyataan na songon i, marojahan di jamita on naeng pamanatonta do, angka dia ma na patut ulahonon jala hangoluhononta.

            Tabege nangkin, disungkun sibotosurat i do Tuhanta Jesus Kristus, didok, “Dia do patik na umangat sian patik i sudena?” Molo martaringot ‘patik’ di Israel di jaman ni Jesus, boi do dua na nidokna, i ma:

1.      Patik ni Debata songon na tarsurat di Buku Musa. Mansai godang do patik i. Na paling terkenal, i ma Patik na Sampulu i, Kesepuluh Hukum, Dasa Titah manang Decaloog.

2.      Patikpatik. Ala mansai godang jala rumit do patik i, diuji angka rabbi do pahibulhon. Dirumushon nasida ma 613 pasal patik; 248 ma i parenta, 365 oraora. Na 613 patik i, ndang polin be sude na dienet sian patik ni si Musa, alai godangan nama na diojakhon tu tafsiranna. Dipabidang do na deba, diorui na deba nari. Rupani, molo di Buku Musa didok, “Holong ma roham di donganmi,” di patikpatik i ditambai do i, didok, “Holong ma roham di donganmu, hosom ma ia di musum.”

Di pudian ni ari, gabe patikpatik i nama na gumodang ditanda halak. Molo martaringot hata ‘patik’ tusi nama laho rohanasida.

            Songon i ma dison, di na sinungkun ni sibotosurat i Jesus taringot tu patik na umangat, sian na 613 i do nidokna, ndang sian patik ni Debata songon na tarsurat di Buku Musa i. Alai Jesus mamboan ibana mulak tu bona, tu surat i, didok, “On do patik na umangat: Tangihon ma ale Israel, Tuhan sasadasa do Debatanta i. Jala sihaholonganmu do Tuhan Debatam sian nasa ateatem, sian nasa hosam, sian nasa roham dohot sian nasa gogom!” Pandohan on dienet sian 5 Mus.6:4-5. (Ida Turpuk Minggu on, 5 Mus.6:1-9). Disi disimpulhon do haporseoan ni halak Israel taringot tu Debata. Ndang adong sian Israel na so umboto i, ai i do ayat na parjolo diajarhon tu ganup dakdanak ni bangso i, jala di ganup kebaktian sai dipajojor do i. Panandaon di Debata na sasada i, ingkon i do haborhatan laho manjalo dohot mangoloi patikNa.

            Laos songon i ma di hita, ia naeng sintong tandaon jala ulahononta sintuhu ni patik dohot lomo ni roha ni Debata, ingkon parjolo do Ibana tandaonta. Debata sasadasa do Ibana, Allah yang Esa; Debata na mangula, na bertindak paluahon jala manobus hita. Luhutna i diulahon sian asi dohot holong ni rohaNa. Ndang adong debata na asing na manghaholongi hita songon i. Hata ni endenta mandok, “Tung di dia jumpang ahu Tuhan sada songon Ho, na manogunogu ahu tu na sonang songon Ho?” (BE 149:2). “Tung sura lao au tu na dao mangalap hatuaon. Ndang dapot i di tano i di nasa hajolmaon.” (BE 162: 2). Olo, ndang adong debata manang tuhan na asing na manghaholongi hita. Di konsepsi hatuhanon ni Batak rupani, ndang adong hea tarjaha taringot tu sumangot manang sombaon na manghaholongi jolma. Di teologi ni  Islam, nang pe sai digoar nasida Allah i yang pengasih dan penyayang (ar’rahman ar’rahim), sasintongna gumodang do dibayanghon nasida Allah i songon panguhum na manguhumi jolma. Sogot di ari uhum i, timbangan do pangkeonna, kilo laho manontuhon na malua dohot na laho mago. Ndang adong disi asi ni roha, ndang adong holong, ndang adong sayang. Ndang songon i anggo Debatanta i. Na holong roha do Ibana, na bertindak manobus jala paluahon hita; naung menciptakan parsaoran na denggan antara ni hita dohot Ibana di bagasan harajaonNa. Maringot i, patut ma hita manghaholongi Ibana sian nasa ateatenta, sian nasa hosa dohot sian nasa gogonta. Ateate manang roha (Heb.labaabkaa/heart), i ma hapeahan ni pangantusion; hosa (Heb.naphsakaa/soul/tondi), i ma pusat ni ngolu dohot hadirion; jala gogo (Heb.maodekaa/might), i ma enerji manang daya hidup. Na nidokna disi, ingkon haholonganta do Debata Jahowa i sian sandok hadirionta, i ma hajolmaonta parbagasan dohot parduru. Maribadah hita tu Ibana di bagasan haholongon. Tu Ibana sambing, ndang tu na asing, ai holan Ibana do na patut manjalo somba dohot pangoloionnasida.  Alai boha ma hita manghaholongi Debata?

            Tu sibotosurat i diuduthon Jesus do, “Haholongi ma donganmi songon dirim!” Pandohan on dienet sian 3 Mus.19:18. Sian i torang ndang apala marpardomuan i secara langsung tu hata haporseaon ni halak Israel ondeng. Tangkasna, patik taringot tu na manghaholongi Debata dohot patik taringot tu na manghaholongi dongan jolma, dibereng halak Israel do i songon dua patik na jongjong sandiri. Ala na jongjong sandiri do i, ungkap do kemungkinan tu na patujolohon na sada sian na sada nari. Tutu, sai dipatujolo Israel do na parjolo i, i ma holong tu Debata. Mansai tangkas do pangondolhonasida taringot tusi, neang ia tu na paduahon. Di Mrk.7 rupani, ditaringoti Jesus sada contoh ni pangalaho ni Israel na patujolohon holong ni roha tu Debata alai patutoruhon holong ni roha tu dongan jolma, ai dipodahon nasida do na so sala agia ise nang so dianturehon natorasna di ari hatutuana asal ma dipelehon tu Debata hepeng manang ugasan na aturan pangkeonna patureturehon natorasna i. Alai Jesus menyejajarkan na dua i di level na dos. Holong tu Debata ingkon na disorminhon do i di bagasan holong tu dongan jolma. Si Johannes mandok, “Pargabus do halak na mandok: Holong rohana di Debata, hape dihosomi donganna. Ai na so manghaholongi donganna na niidana, tung songon dia ma haholonganna Debata na so niidana?” (1 Joh.4:20). Holan sada do dalan manimbangi holong tu Debata, i ma holong ni rohana tu donganna. Ndang tarsirang na dua i, alai nda ung laos tarpados. Alai ise do dongan i? Dibatasi halak Jahudi do pangantusion ni dongan i olat ni sesama Israel. Alai disalpui Jesus do batas i, dihonahon do i tu saluhut jolma. Secara sangat mengesankan, digombarhon do i di umpama na taringot tu halak Samaria na asi roha i.

            Suang songon i ma hita, di bagasan panghaholongion tu donganta jolma do patuduhononta holong ni rohanta tu Debata. Patokanna, i ma holong ni roha tu diri. “Songon dirim,” ninna Tuhan i. Ndang egoisme na nidokna disi, alai pangargahonon di diri do songon jolma naung pinalua jala na jinangkon ni Debata tu harajaonNa. Arga do ganup hita di Debata, ala ni argana pola do ditobus marhite Jesus Kristus AnakNa i. Molo Debata sandiri nunga mangargahon hita, hita pe patut do mangargahonsa. Alai ndang holan hita na diargahon, ndang holan hita na dipalua jala ditobus, dohot do donganta, tarmasuk musunta. Ala sude diargahon songon hita, hita pe ingkon ma manghaholongi donganta.

            Mulak muse tu turpukta ari on, diparhatopot sibotosurat i do sude na nidok ni Jesus i, didok, “Tingkos do didok Ho Guru hombar tu hasintongan.” Sian i torang, nunga adong hian di ibana parbinotoan di Debata, parbinotoan taringot tu holong dohot pangoloion. Alai olat ni i do. Dung dibege ibana hata ni Jesus i, ndang dibuat ibana haputusan manghaporseai dohot manjangkon Ibana. Ala ni i do asa didok Jesus – sahali nari – “Ndang sadia dao ho sian Harajaon ni Debata.”

            Di hita pe, nunga adong be parbinotoan taringot tu Debata. Nunga tibu taboto paboa holong do na niigilNa sian hita, holong tu Ibana dohot holong tu dongan songon holong tu diri. Masalahna nuaeng, nunga beha parsaoranta tu Debata na badia i? Nunga beha panghaholonginta di Ibana dohot tu sesamanta? Mamoto taringot tu Debata ndang dos i dohot na manghaporseai, mangantusi holong ndang dos i dohot na manghaholongi. Jadi na ringkot di hita, i ma na porsea jala mananda dohot manghaholongi Debata, mananda jala manghaholongi dongan jolma. Holong tu Debata dohot jolma ndang targonti i dohot pelean. Molo dung digarar halak rupani guguan manang iuranna, pelean pembangunan manang persepuluhanna alai ndang hea marminggu, ndang hea ro tu partangiangan, ndang hea marulaon na badia, tung so adong do dalanna mandok naung dihaholongi do Debata. Angka i ma na so sadia dao sian Harajaon ni Debata, alai ndang anggo bongot.

            Naeng bongot do hita sude, naeng partohap jala parjambar di harajaon i? Molo i do, tatanda ma Debata jala tahaholongi, tatanda donganta jala tahaholongi doshon dirinta. Amen.