HASANGAPON NI SIIHUTHON KRISTUS
Mrk.10:35-45
Sangap manang hasangapon, mansai ringkot do di roha di jolma. Di halak Batak, siangkup ni hagabeon dohot hamoraon, sangap nama sintasintana na tumimbo. Dihasiholi do i jala dilului. Di angka pesta adat, dihatahon do i di bagasan angka hata sintasinta dohot pasupasuan, jala diolophon natorop do i, didok, “I ma tutu!” Paboa ringkot i, lumobi di na mangadopi halak, ‘barani’ do halak hita ‘manginjam sangap tu babiat.’ Adong do dua faktor na manghorhon hasangapon i. Na parjolo, faktor intern, i ma kondisi na di bagasan diri ni sasahalak, isara gogo, pistar, bisuk, luhur dohot na asing; jala na paduahon, faktor ekstern, i ma kondisi na di ruar ni dirina, isara torop partubuna, mora, adong kesempatanna dohot angka na asing. Mansai jonok do hasangapon i tu huaso, i ma kesempatan ni sasahalak manang sapunguan jolma laho mempengaruhi dohot menyadarkan halak tu hagiot ni rohana sandiri sahat tu na mamaksahon tu angka na rade mangoloi. Hombar tusi, disifathon Tuhanta Jesus Kristus do hasangapon tano on tu hatauon mangarajai jala patunduk dongan.
Di angka na porsea pe, ringkot do hasangapon i. Ringkot, ai Tuhanta Jesus Kristus sandiri do marbagabagahonsa (pat.Mat.19:28). Ala naung diparbagabaga, ba ndang sala i hirimon jala luluan. Alai ringkot situtu do antusan, asing do hakiki ni hasangapon i sian hasangapon na di tano on. Aha jala boha do huroha hasangapon ni siihuthon Kristus i? Apala i ma na naeng pamanatonta sian jamita ari on.
Borhat sian pangantusion dohot panghirimon na sala taringot tu huaso dohot hasangapon na pinarbaga ni Kristus, ro do si Jakobus dohot si Johannes mangido kedudukan na terhormat di siamun dohot di hambirang ni Jesus di harajaonNa. Somal do angka raja ni portibi on pabangkit sisolhotna tu hundulan angka na sumangap di harajaonna. Di roha ni si Jakobus dohot si Johannes, Jesus pe, patut do mambahen songon i tu nasida. Na marpariban do si Maria ina ni Jesus tu si Salome inanasida i. Dunggkon ni si Maria, nasida na dua nama sian sisolhot ni Jesus angka na parjolo porsea di Ibana. Na sai laon pe antong, nunga ‘dipasurung’ Jesus i nasida, ai angkup ni si Petrus, nasida do lingkaran dalam (the inner circle chosen three) ni sisean i. Sude i, secara kumulatif mangonjar nasida pasahat pangidoan i. Alai dipatingkos Jesus do panghirimonnasida i, ditaiti do nasida tu sitaonon dohot tu hamamateNa. Ingkon manaon do Ibana jala mate asa bongot tu hasangaponNa. Marhite i, dipajongjong do hatigoran ni Debata di angka pardosa. Songon Ibana na manaon i, ingkon manaon do nang sisean i. Hombar tusi, disuriranghon Jesus do dison sitaonon dohot hamatean na ingkon masa tu nasida. Sintong do i, ai mate tarbunu do si Jakobus songon martir na parjolo sian na sampulu dua i. Masa do i di taon 44 M di tangan ni Herodes Agrippa (Ul.12:2). Si Johannes pe manaon do, tarbuang tu Patmos (pat.Pgk.1:9) di tingki ni Kesar Deocletianus. Dung i, hombar tu tradisi Papias, mate tarbunu do nang ibana di ujungna. Marhite i, ambil bagian nasida di sitaonon ni Tuhan i, jala di bagasan asi ni roha ni Debata, gabe panean ma nasida di hasangapon ni Kristus i.
Songon i do hatontuan ni Debata tu sandok na porsea, tarmasuk hita. Ia naeng teanonta hasangapon ni Kristus i, ingkon rade do hita sapartinaonan dohot Ibana. Si Paulus mandok, “Molo tung donganNa hita di sitaonon, gabe donganNa hita sogot nang di hasangapon.” (Rm.8:17) Dung i, “Ingkon bolusonta do lan haporsuhon laho bongot tu harajaon ni Debata.” (Ul.14:22) Di hasatiaonta mangihuthon Jesus, manang na boha pe sai na ro do sitaonon i. Bolas do i ro sian sisolhot, sian dongan saulaon, sian dongan sabangso, sian parhoaso manang sian negara. Nda i na nialaman ni deba sian donganta di tingki on di manang piga inganan di Indonesia on? Molo masa na songon i unang hita tarsonggot, unang manarita manang mandele, alai benget ma jala manahan sahat ro di ujung. Tuhanta do patau hita asa monang, ai Ibana sandiri do mandok, “Sai na dongananHu do hamu ganup ari rasirasa ro ajal ni hasiangan on.” (Mat.28:20). Holan angka na manahan do na manjalo hasangapon sogot i.
Nang pe songon i, unang sala, ndada marlapatan na niomo ni sitaonon do hasangapon i, ndang! Asi ni roha ni Debata sambing do i. Ibana do na patauhon hita disi. Ala ni i ingkon tu Ibana sandiri do pujipujian. Hombar tusi, ndang ringkot pola tiruon sikap ni halak manang golongan na ‘sangajo’ mangalului sitaonon. Na jolo i, torop do halak na mamingkir na sumurung do na mate martir sian na mate secara wajar. Gabe marusaho ma na deba mangalului hamartiron i. Di angka huria di ombas parmulaan, dijunjung tinggi do parbahudungon dohot askese manang na pasiaksiak diri. Di tingki on pe, adong do halak na sangajo pasilanghon dirina secara fisik. Di Pilippina rupani, di angka parningotan passion ni Tuhanta Jesus tar jotjot dope i masa. Ndang siluluan sitaonon. “Molo dihuntam Debata baba ni singa i,” ninna Karl Barth, “unang tatariktarik be ihurna.” Alai molo songon i lomo ni roha ni Debata, ingkon ro sitaonon i, unang tasolsoli.
Ra, disi ma parungkilonta. Ala ni hagaleon dohot hagiot ni hajolmaonta, sai naeng do hita pasiding sitaonon. Tahasiholi do angka dalan na jempek, na mura, na mulus. Unang nian marungkil, unang nian moru tingki dohot hasonangan, alai tong sahat nian tu surgo. Tuhanta manontuhon, ingkon inumonta do siinumonNa jala paridionta siparidionNa i, ai i do hakiki ni hasangapon ni angka sisean.
Mulak tu turpuk di hita ari on, di angka sisean na asing pe jumpang do tong kesalahfahaman taringot tu hamesiason ni Jesus. Hombar tusi, nasida pe gulut do di hasangapon na dirajumi dos dohot hasangapon tano on. Sogo pe rohanasida tu si Jakobus dohot tu si Johannes ala ni pangidoannasida i, ndada ala naung tumandaan nasida di pribadi dohot di hamesiason ni Jesus dohot di lapatan ni hasangaponNa. Rap na hurang porsea do nasida jala na gulut di hasurungan (pat.9:33-37). Asa, molo gabe sogo pe rohanasida ala na mabiar do nasida so tung dioloi Jesus pangidoannasida i, so tung dipasurung nasida tu siamun dohot tu hambirangNa, gabe sumangap nasida tutu sian na sampulu nari jala gabe angka pangoloina nasida sude. Dohot hata na asing, elat ni roha do na mangonjar nasida manghasogohon si Jakobus dohot si Johannes i. Borhat sian diajari Jesus ma nasida taringot tu parasingan ni hasangapon portibi sian hasangapon di harajaon ni Debata. Di portibi on, huaso do ojahan ni sangap. Ala ni i, na gabe parsoalan manang sungkunsungkun di angka na sangap ni hasiangan on, i ma, “Aha do naung dibahen halak mangoloi ahu?” Alai di harajaon ni Debata, holong do ojahan ni sangap jala pangoloion manang panghobasion do hataridaan dohot ukuranna. Ala ni i, na gabe parsoalan dohot sungkunsungkun di angka sisean ni Kristus, i ma, “Aha do naung hubahen mangoloi dohot manghobasi dongan?”
I ma nuaeng dijouhon jamita on tu hita. Songon Jesus naeng dohot hita manghobasi haluaon ni portibi on. Sibaritahonon jala sisagihononta do haluaonNa i tu sandok hajolmaon. Molo tataringoti haluaon, na marhahonaan do i tu hadirion ni jolma na utuh, totus homo; tu sandok aspek ni parngoluon, tu partondion dohot tu pardagingon. Sihobasanta do i marhite parhobason di hata i, marhite pelayanan firman. Mamaritahon Barita Nauli, mangapoi na marsak, manosoi jala manogihon pardosa mulak sian hajahatonna (molo porlu marhite na maminsang dohot na manguhum), manarihon dana dohot paradehon prasarana pelayanan dohot angka na asing. Sihobasanta do haluaon i di bidang ni parngoluon siapari, i ma panghobasion di bidang sipanganon, parabiton, perumahan, lapangan kerja dohot angka na asing asa malua jolma sian pardangolan di bagasan hapogoson. Sihobasanta do i dohot di bidang pendidikan, pembinaan manang pelatihan dohot angka na asi asa malua jolma sian haotoon dohot keterbelakanga. Laos songon i di bidang kesehatan, ingkon marhobas do angka sisean ni Kristus asa malua jolma sian sitaonon di bagasan sahit dohot tihas. Ragam tahe bidang ni parngoluon na maimaima di parhobason ni angka na porsea. Parhobason do hakiki ni hasangapon ni sisean na sintong. Hombar tusi, di bagasan haporseaon dohot asi ni roha ni Debata, naeng ringgas do rohanta mangulahon i. Sai unang ma taparsinta jala tahasiholi asa gumodang hita dioloi dohot dihobasi halak, alai naeng ma gumodang hita mangoloi dohot manghobasi dongan di sandok segi ni parngoluon. Ndang na murak hita binahen ni pangoloion dohot parhobason i, alai songon na hinatindanghon ni turpuk ari minggu on, Jes.53:4-12, songon Tuhanta Jesus Kristus na manjalo hasangaponNa marhitehite parhobason haluaonNa, songon i do hita manjalo hasangapon marhitehite parhobason haluaon di bagasan hasiseanonta. Dipargogoi Debata ma hita mangulahon i. Amen.
Tidak ada komentar:
Posting Komentar