23 Trinitatis

SERMON JAMITA TU MINGGU 23 TRINITATIS, 03 NOPEMBER 2013

Mrk.3:31-35

            Turpuk

31 Dung i ro ma inaNa dohot angka anggiNa, jadi di ruar nama nasida jongjong, gabe disuru ma na manjou Ibana. 32 Na hundul do natorop i humaliang Ibana, gabe didok ma, “Di alaman an do inangMu dohot angka anggiM ro di angka ibotoM; diusoi do Ho.” 33 Alai ninna ma mangalusi nasida, “Ise do goaron dainang, jala ise do dohonon angka anggingKu? 34 Jala dibereng ma angka na hundul humaliang Ibana, ninna ma, “Angka on do dainang dohot angka anggingKu. 35 Ai na mangulahon lomo ni roha ni Debata, i do anggingKu, i do ibotongKu, i do dainang.”

            Patujolo

            Disi dipungka Jesus ulaonNa, pintor tahop do paraloan. Parjolo sahali, ro do i sian angka partogi ni bangso i, sian angka malim, parise manang sibotosurat. Ndang ditanda jala ndang diantusi nasida Ibana, ai adong do ulaonNa na dirajumi ‘maralo’ tu patik dohot hasomalan. Dung i, mabiar do nasida agoan sangap nasida di tonga ni natorop i. Ala ni pangulaonNa na gok huaso i antong, songon i nang parjamitaon dohot pangajaranNa na marsahala i, torop do halak na tartait tu Jesus i. Tu dia pe Ibana laho, sai godang do na mangihuthon. Alai sabalikna, manang na tu dia pe Ibana laho sai marusaho do tong angka aloNa mangambati jala manusai Ibana. Songon i ma dison, di na muli Ibana (ay.20) tu hutaNa, tu Kapernaum, dirongom halak do Ibana pola sundat nasida mangan. (Di bona ni pangulaonNa, pinda do Jesus sakeluarga sian Nasaret tu Kapernaum na di luat Sebulon dohot Naptali; pat.Mrk.2: 1; Mat.4:13; 9:1. Ala ni i laos digoar do Kapernaum i hutaNa) Alai songon naung nidok di jolo i, nunga laos disi angka sibotosurat na sangajo tuat sian Jerusalem manggugai roha ni halak unang porsea di Ibana. Ragam ma dipandok nasida taringot tu Jesus i, isara ‘na sibolison’ (ay.21b) manang ‘partondi na hodar’ (30)

            Hatorangan

            Luhut na masa i dipaidaida jala dipabegebege angka sisolhot ni Jesus do. Songon sisolhot na manghaholongi, tontu, diarsakhon nasida do i huhut. Dung lam so tartahan nasida be, ro ma nasida ‘mangalap’ Jesus (21a) Angka ise do i? InaNa, si Maria; dung i angka angina, si Jakobus, si Joses, si Simon dohot si Judas (Mat.13:55b) raphon angka ibotoNa (saotikna dua halak; ida ay.32 dohot ay.35) Di dia si Josep? Ra, nunga jumolo. Molo pinamanat sandok Evangelium i, dung dipungka Tuhan Jesus ulaonNa, ndang hea be martaringot kehadiranna. Di ketidaktahananna, dohot ma nasida gabe so mangantusi be di Ibana, ai [maniru pandok ni angka aloNa (?)] dirajumi nasida ma Jesus i ‘na rintik’ (ay.21b) Didok rohanasida, ndang boi so mamboan mara i molo sai didatdati ‘ulaon harintikon’ i, Manghuling ma holong ni roha parmudaronnasida, na mangonjar nasida laho mangondingi Ibana. Dalan tusi, ndang lobi sian na pasohon Ibana, maboan mulak jala manghurungi di jabu. Sangat menonjol ma dison panghilalaan hainaon ni si Maria. Ra, ndang lupa ibana nian di boaboa sian ginjang na taringot tu ‘Anakna’ i, andorang so hasosorangNa dope. Alai ala ni paraloan na sobu i, gabe ganggu do rohana taringot tusi. Nda saluhut do mangalo Ibana? Partogi ni bangso dohot ugamo; angka malim, saduse dohot parise nda sude do nasida manulak poda dohot pangajaranNa? Hape, pandangan ni angka i dirajumi halak do i ungkuran ni hasintongan jala na mempunyai pretensi na kuat di pengembangan manang di penghempangan ni sada poda. Pangajaran naung tinulak ni sibotosurat ndang na tarharaphon be i marhasil. Dung i, ‘ndang apala menonjol’ antong hamesiason ni Jesus i. Di haposoposoonNa, ro do angka pardisurgo manghalashon dohot mangendehon; dibaritahon do hasosorangNa tu angka parmahan dohot tu parhapistaran sian purba gabe ro sude marsomba Ibana. Molo nunga songon i nian songkalNa di ari hatutubuNa, nda ingkon lobi sian i ma dung mangula Ibana papatarhon hamesiasoNa i? Hape nuaeng, ndang hasongkalon, alai hametmeton do na tarida. Sangat mengejutkan tahe, angka ahli teologi ni bangso i nunga mengharamkan podaNa. Saluhutna i, secara kumulatif merisaukan si Maria. Boha, holan nipi do hasongkalon ni hatutubuNa i? Angka anggiNa dohot angka ibotoNa ndang dohot mengalami i. Tung pe dipaboa si Maria i tu nasida, kenyataan na nialaman ni Jesus nuaeng nunga lobi sian na cukup i di nasida laho manghagangguhonsa. Ala ni i, gabe dibereng nasida ma Jesus i songon haha dohot iboto sambing; haha dohot iboto na istimewa (di bagasan keistimewaan ni na rintik manang na sibolison) Holong pardagingon i sambing nama na mangonjar nasida mangantoi Ibana, panghirimon na asing ndang adong be. Alai ala godang ni jolma, ndang bolas nasida bongot tu jabu parjamitaan ni Jesus i, gabe di alaman i ma nasida jongjong. Di bagasan pos ni roha na argahonon ni Jesus do panarihon dohot pangondingionnasida i, disuru nasida ma sada halak manjou Ibana. Dipaboa na sinuru i do tu Ibana, na di alaman do inaNa dohot angka anggiNa. Ndang songon painondur na so adong hasiatan tu bagasan jabu, alai na naeng mangusoi (Gr.zeetousin/zeeteoo, seek, mencari/berusaha menemui) Ibana do.       

Sude i parungkilon do di Jesus i. Parungkilon, ai angka sisolhotNa sandiri ndang mangantusi Ibana. Dihilala Ibana do tangkas, pangulaon ni holong parmudaron na sian hasopangantusion ni keluargaNa i gabe ambatambat do i di Ibana di na mangulahon missionNa di portibi on. Alai dihamonanghon do saluhutna i. Ndang dipasohot Ibana na marjamita i laho manghormati dohot manjumpangi inaNa, anggi dohot ibotoNa i. Ibana sandiri parjolo manghangoluhon pandohanNa na mandok, “Na manjama ninggala huhut mamereng tu pudi, tung na so tau ma i tu harajaon ni Debata” (Luk.9:57 duu; Mrk.8:34 du; 10:29 du par) Ditorushon do na marjamita i laos didok, “Ise do goaron dainang, jala ise do dohonon angka anggingKu?” Huhut mamereng tu angka na hundul manangihon pangajaranNa i, dialusi Ibana sandiri ma i, didok, “Angka on do dainang dohot angka anggingKu. Ai na mangulahon lomo ni roha ni Debata, i do anggingKu, i do ibotongKu, i do dainang.” Ndang na mansoadahon Jesus dison di parinaonNa tu si Maria, songon i di paranggion nang paribotoonNa. Sahat ro di hau pinarsilangNa pe tahe, diingot do inaNa i jala disarihon ari pangapudianna (pat.Joh. 19:26 du) Asa, on do na nidokNa: Di bagasan Ibana nunga dipatubu sada parsisolhoton na imbaru, sada partuturan na so marojahan di parmudaron manang parbangsoon, di haporseaon do. Na gabe sipaingot ma i tu si Maria asa lam pasurut dirina sian hajonjonganna songon inaNa, suang le angka anggi dohot ibotoNa, asa lam pasurut dirina sian hajongjonganna be, dung i porsea di Ibana. Holan marhite i do boi nasida mamongoti parsaoran na imbaru i. Taringot tusi, diondolhon dope di pandohanNa na parpudi, “Ai na manggulahon lomo ni roha ni Debata, i do anggingKu, i do ibotongKu, i do dainang.” Lomo ni roha (Gr.thelema, will/wishes/desires, kehendak/ kemauan) ni Debata nunga dipapatar i di bagasan hata dohot patikNa; di bagasan aturan, tona dohot angka parentana. Tumangkas, di bagasan Kristus i sandiri. Ibana do naung hea mangulahon dohot manggohi hata dohot patik ni Debata sasingkopsingkopna, naung hea jala na boi mangulahon lomo ni roha ni Debata dohot sintong. Ala ni i, manang ise na naeng mangulahon (Gr.poieesee/poieoo, make/do/act/cause, melakukan) lomo ni roha ni Debata, dibereng ma tu Kristus Jesus i, diihuthon ma Ibana jala ditiru. Tarulahon do i? Tarulahon di angka na porsea, di angka naung tartompa gabe ma imbaru. (2 Kor.5:17) Jesus mandok, “Haporseai hamu ma na sinuru ni Debata, i ma ulaon lomo ni rohaNa.” (Joh.6:29) Hombar tusi, nasa ulaon lomo ni roha ni Debata, tubu do i sian haporseaon. Angka naung pinaimbaru di bagasan haporseaon i, angka i do na boi mangulahon lomo ni roha ni Debata. Konsekuensina, tarrajum ma i tu kekeluargaan na imbaru na niwarnaan ni holong na polin na sian Debata.

Rancangan Homiletis

Parsisolhoton manang partuturan mansai na arga do i di hajolmaon. Di bagasan pardomuanna tu sistem kemasyarakatan, partuturan i tarrajum do tu unsur kebudayaan na universal, lapatanna unsur na jumpang di sude masyarakat dohot kebudayaan. Manang na masyarakat na markebudayaan dia pe i, na bersahaja manang na kompleks, ganup do i mananda sistem kekerabatan. Parbinotoan dohot kesadaran di sistem kekerabatan i, na manontuhon situtu do i di sikap dohot di tindakan maradophon sasahalak, marhinorhon sipata dohot tu parsaulian. Ala ni i, relatif martua do halak na marsisolhot tu angka raja dohot na sangap.

Pangalaho na arga i, dipangke hata ni Debata do laho manggombarhon rumang ni parsaoran dohot parsaulian ni angka na porsea. Rupani, digoar do Jahowa i, “Ama,” jala na porsea i digoar, “Anak.” Songon i, digoar Jesus Kristus do siseanNa i, “Anggi,’ jala angka apostel manggoari huria i, “Hahaanggi.” Nda gombaran ni partuturon do i? Tutu, ndada parsisolhoton na somal i, na imbaru nama. Alai aha do ojahan ni parsisolhoton i? Songon dia do sikap hidup na gabe status simbol ala ni parsisolhoton i? I ma na naeng pamanatonta sian jamita on.

Dung dipungka Jesus ulaonNa pintor tubu do paraloan. Parjolo sahali ro do i sian partogi jala sitiop ungkuran ni hasintongan manang ahli teologi ni halak Jahudi, i ma angka malim, saduse dohot parise. Ndang ditanda jala ndang diantusi nasida Ibana, ai godang ulaonNa na dirajumi maralo tu patik dohot hasomalan. Sobu do paraloan i, pola do digoar nasida Jesus na sibolison jala partondi na hodar. Ala ni i, ‘tarmara’ do ngoluNa. Ndang tahan mangadopi na masa i, dohot ma angka sisolhotna, inaNa, anggiNa, dohot angka ibotoNa gabe so mananda jala so mangantusi di Ibana. Marbonsir sian pandohan ni angka aloNa, dohot ma nasida mangarajumi Jesus i, “Na rintik.” Nang pe songon i, ala ni pardagingon i, holong do rohanasida di Ibana. Tung na rintik manang na sibolison pe i, ba na rintiknasida do i. Ala ni i dilului ma dalan manggondingisa, ro ma nasida mangalap Ibana. Alai mengejutkan, ‘ndang diargahon’ Jesus haroronasida i, ndang dipasohot Ibana marjamita demi menghormati jala ruar mandapothon nasida. On do tahe didok, “Ise do goaron dainang jala ise do angka angingKu?” Sambolus begeon hira na mandok do Ibana, “Ndang inangKu i, ndang anggingKu, ndang ibotongKu.” Di rumang hajolmaon hot do si Maria i inaNa, hot do nang angka tinodohonNa i anggi dohot ibotoNa. Ndang disesa i jala ndang disoadahon. Sahat tu hau pinarsilang pe tahe, diingot do i jala dihatindangkon. Antong dia do na nidokNa disi?

Di bagasan Ibana Nunga dipatubu sada parsisolhoton na imbaru, sada partuturon na so marojahan di parmudaron, pardagingon manang parbangsoon, alai di haporseaon do, di panandaon dohot pangantusion di Ibana. Manang di dia jala manang sadihari Jesus Kristus ndang dihaporseai jala ndang diantusi halak, ndang tarbahen tubu disi parsaoran na sintong. Tung adong pe pardomuan na asing, gabe so marlapatan do i. Kecurigaan  do na masa disi, biar, late, hosom dohot parsirangan. Nasa naung porsea di Jesus, angka i do naung gabe anak ni Debata. Konsekuensi ni haanahon i, dipadomu do sude jala dipasada di bagasan parsisolhoton na imbaru; di pardomuan ni angka na marhaha maranggi jala na mangolu di bagasan parsaoran tu Debata dohot tu Kristus Jesus i.

Suang songon i do nang di hita, di bagasan haporseaon di Kristus i sambing do hita dijangkon tu parsisolhoton na imbaru i. Alai tapamanat ma nuaeng, boha do hita manghaporseai Kristus Jesus i? Songon dia do pangantusion dohot panandaonta di Ibana? Di rumang ni hajolmaon ndang adong pardomuanta tu Kristus i. Ndang tulangta Ibana manang amangborunta, ai halak Jahudi do Ibana, Batak ia hita. Hombar tusi, ndang boi jala ndang adong hita na mangasahon pardomuan pardagingon tu Ibana. Molo songon i, adong dope hinaringkot ni sipaingot ni jamita on di hita? Adong do, ai pardomuan ala ni haruason di sada organisasi huria sambing, parhuriaon na tinean sian ompu manang sian natoras, ndang hurang i patudoson tu parsaoran na ojak di parmudaron. Ndang sai lias hurianta sian na songon i. Molo di parugamo na asing adong na ginoaran, “Abangan,” di hurianta pe adong do, “Ruas statistik” (ruas iuran, ruas ari pesta, ruas sakramen dohot ruas mate). Ndang dijamin i parsidohotonta di parsisolhoton na imbabru i.

Mulak tu turpuk di hita ari on, huhut mamereng tu angka na hundul manangihon podaNa, didok Jesus do, “Angka on do dainang dohot angka anggingKu.” Tumangkas dipatorang do i di pandohanNa na parpudi, “Ai na mangulahon lomo ni roha ni Debata, i do anggingKu, i do ibotongKu, i do dainang.” Ndang na Mandok na di jolma manang di ulaonna do ojahan ni parsisolhoton i, ndang! Taringot tusi, nunga niondolhon i nangkin. Antong, dia do na nidokna disi? Na marhahonaan do i tu hataridaan ni parsisolhoton i. Nasa naung gabe sisolhot ingkon ulahononna do lomo ni roha ni Debata. Alai dia do lomo ni roha ni Debata? Alusna, hataNa do i, patikNa, tona dohot parentaNa. Konkritna, dipapatar do i di bagasan Kristus i. Ibana do satu-satunya naung hea mangulahon dohot manggohi patik i sasingkopsingkopna, naung dung mangulahon lomo ni roha ni Debata dohot sintong. Manang ise na naeng mangulahon lomo ni roha ni Debata, dibereng ma tu Kristus i; diihuthon ma Ibana jala ditiru. Tarulahon do i? Tarulahon, ai nasa naung porsea jala tartompa gabe na imbaru, dipatau do tu ulaon lomo ni roha ni Debata. Na porsea sambing, na asing ndang boi, ai haporseaon i do ulaon lomo ni roha ni Debata apala na parjolo, parbuena do angka na asing. Jesus mandok, “Haporseai hamu ma na sinuru ni Debata, i ma ulaon lomo ni rohaNa.”

Suang songon i do di hita, haanahon manang parsisolhotonta na di bagasan Jesus Kristus i manang na boha pe na mangigil hita do i asa manghangoluhon ulaon lomo ni roha ni Debata. Nunga nidok nangkin: Haporseaon i do ulaon lomo ni roha ni Debata apala na parjolo. Alai songon dia do asa sahat hita tu haporseaon i? Si Paulus mandok, “Sian na tumangihon do ro haporseaon.” (Rom 10:17) Nda i do na taida di jamita on? Angka na tumangihon jamitaNa tung apala i do na ginoaran ni Jesus anggiNa, ibotoNa dohot inaNa; na dirajumi naung mangulahon lomo ni roha ni Debata. Ninna roha, apala i ma na ringkot parateatehononta. Ndang masalpuhu ia nidok, di tingki on lam tu oruna do halak na ringgas manangihon hata ni Debata, lam losok manjaha manang manangkasi Bibel. Molo songon i do tutu, ndang longang roha molo lam tu oruna bilangan ni angka na porsea jala na hiras roha mangulahon ulaon na denggan na tau lomo ni roha ni Debata.

Jesus manjou hita asa olo manangihon hataNa. Di haoloonta manangihon hata i, manjaha dohot mangguruhon, disi do dipasahat hita tu tangga parjolo ni haporseaon i. Na lam tu toguna ma i muse di bagasan dohot ala ni panangihonta angka na mangihut, dung i margogohon haporseaon i, tarulahon hita ma angka na denggan na tau lomo nji roha ni Debata.

Jkt.28.10.13/mvs