13 Trinitatis

SERMON JAMITA TU MINGGU 13 DUNG TRINITATIS, 6 SEPTEMBER 2009
Joh.17:14-23

Patujolo

Sabagian sian tangiang hamalimon ni Tuhan Jesus do turpuk on.

Songon Sintua ni Malim Bolon martangiang do Ibana dison manangianghon diri dohot ulaonNa (17:1-5), manangianghon siseanNa (17:6-19), dohot manangianghon huriaNa di sepanjang abad, i ma angka na naeng porsea dope di Ibana (17:20-26). Dihatahon do i dung salpu hata partadinganNa na tu angka siseanNa (14:1-16:33) di sada inganan di parholangan ni bilut parginjang (pat.Mrk.14:15) tu porlak Getsemane. Sirang ne ma Ibana sian siseanNa i, ai dung salpu i, pintor ihut nama na masa di porlak Getsemane, tartangkup ma Ibana, dung i diuhumi, diparsilanghon, mate jala ditanom; dung i hehe jala manaek tu banua ginjang. Tinggal dope anggo sisean i di portibi on. Hombar tusi, di tangiangNa i dipasahat ma nasida tu pangaramotion ni Ama i (17:11).

Hatorangan

Na ro do Jesus tu portibi on di bagasan otoritas ni Debata AmaNa. Ala ni i, ndang hea Ibana mangula manang manghatai sian roharohaNa sandiri (pat.6:38; 12:49; 14:10), alai hombar tu na jinalo jala na binegeNa sian Ama i do. Angka ulaon na pinatupaNa, ulaon ni Debata do i; na hinatahonNa pe, hata ni Ama i do i (14:24b). Ibana do satu-satunya na umboto hata ni Debata, ai na rap jala sada do Ibana dohot Ama i sian mulana i. Dison, dipartanggungjawabhon Jesus ma naung dilehon Ibana hata i tu sisean i, asa sian nasida sahat i tu sandok portibi on. Ndang ulaon na mura i, ai dihosomi portibi on do sisean i. Boasa? Ai ndang sian portibi on nasida. Molo sahat sisean i tu haporseaon dohot tu pangihuthonon di Kristus i, ndang na sian portibi on i, manang sian mudar, manang sian sangkap ni baoa; na sian ginjang do i, sian Debata (pat.1:12-13; 6:37, 44). Hombar tusi do digoar nasida na so sian portibi on (ida huhut ay.16). Songon halak angka na so sian portibi on, asing do ihutanna, asing nilai hidupna, asing gaya dohot tujuan ni ngoluna. Ala ni i ma asa dihosomi portibi on nasida. Unang ma hansit roha ni na porsea i disi, ai naung jumolo do Kristus i dihosomi (15:18-21). Ndang sumurung sisean sian guruna, naung sun denggan do molo songon na di guruna i jumpang di nasida.

Nang pe diboto Jesus godang ni pangunjunan dohot pangaleleon na naeng masa tu sisean i, ndang dipangido asa ditait Debata nasida sian portibi on. Na mura do nian di Debata manait nasida tu banua ginjang, alai ndang hombar i tu tahiNa sandiri, ai na naeng baritahonon nasida do Barita na Uli i tu sandok portibi on (ida huhut ay.18) umbahen na ditogihon jala dilehon nasida tu Kristus i bahen siseanNa. Ala ni i pangaramotion do dipangido maralohon na jahat i, i ma sibolis dohot surusuruanna ro di hajahaton pada umumna.

Dung i dipangido ma muse asa diparbadiai Debata sisean i. Diparbadiai lapatanna: (1). Disirang manang dipaasing tu sada sangkap manang ulaon na khusus. Na disirang Debata do sisean i sian portibi on, dipaasing sian keluarga dohot dongannasida satingki laho pabangkithon tu ulaon mamaritahon Barita na Uli i. (2). Diurasi mandok, dipintori, diburi, dipaias sian dosa (1 Kor.6:11; 1 Tes.5:23). Sada hal na progressif do pangurasion i, na patauhon na porsea i lam leleng lam sirang sian portibi on jala lam marpangalaho suman tu Debata, jala magolu hombar tu hataNa, hasintongan i. Hasintongan do hata ni Debata, ndang adong gabus disi, ai na sintong do Debata. Sintong do sude patik dohot angka uhumNa, sintong bagabaga dohot lumbalumbaNa. Di bagasan dohot marhite ngolu na berkualitas sisongon i do lam dipatau na porsea i tu ulaon panindangion i.

Di ay.18, diulahi Jesus do muse mangondolhon parsuruonNa di sisean i tu portibi on. ParsuruonNa i ndang tarsirang i sian parsuru ni Debata di Ibana laho paluahon portibi on (pat.3:16). UlaonNa na paluahon i, sitorushononNa ma i tu sandok portibi on marhite na siseanNa i.

Diparbadiai Jesus do diriNa humophop sisean i. “Huparbadiai,” ninna; maksudna, diseahon, diabdikan (consecrate) tu panggohion ni sangkap hatuaon ni Debata. Sandok hangoluanNa do dibaktihon, rohaNa, pingkiranNa, gogoNa, dohot hosaNa sandiri bahen tobus ni sisean i, asa gabe badia (taruras) nasida jala dipatau tu ulaon panindangion i. Na laos gabe tiruan ma i di sisean i, manang ise na naeng marhobas di ulaon panindangion i ingkon marsiajar ma maniru Jesus na marbadiahon diriNa humophop angka siseanNa.

Na luar biasa do tangiang ni Jesus on, ai mamungka ay.20 ditangianghon do nang angka na naeng porsea di Ibana di sude inganan dohot di sepanjang abad. Na mangatasi sandok tingki dohot inganan do Ibana. Hombar tusi nunga diida angka na gabe porsea muse di Ibana ala ni panindangion ni siseanNa i. Sarupa tu sisean i, di portibi on dope nang nasida alai ndang sian portibi on; naung dijou do nasida jala ditubuhon sian ginjang huhut diparbadiai tu ulaon panindangion i. Taonon nasida do tong hosom dohot reherehe ni portibi on, jala ringkot do nang di nasida pangaramotion ni Debata. Ala ni i, dohot ma nasida ditangianghon.

Taringot tu nasida didok: “Asa sada nasida saluhutna.” Mansai arga do hasadaon i, ai marhite i do lam margogo na porsea i jala gabe porsea portibi on di Jesus Kristus na sinuru ni Debata. Pada hakikina parroha diri do jolma, cenderung manulak halak na asing di lambungna, gabe maol sada. Nunga mamungka i sian tingki ni ompunta na parjolo i. Lam tu maolna do na sada i ala ni inganan dohot latar belakang na paasingasing. Molo sada na porsea i gabe sada panindangion do i tu portibi on paboa adong sada hagogoon na so sian tano on na marhuaso pasadahon, i ma Kristus i. Ala ni i gabe porsea ma portibi on paboa na sian Debata do Kristus i. Taringot tu model ni hasadaon i didok do: “Songon Ho, ale Amang di bagasan Ahu jala Ahu di bagasan Ho.” Sada do Ama i tu Anak i; sada di bagasan hasadaon na masihaholongan, ai holong do roha ni Ama i di Anak i, Anak i pe holong do rohaNa di Ama i. Songon i ma na porsea i naeng marsada jala mardomu huhut masijangkonan jala masihaehean di bagasan roha na holong. Di bagasan dohot marhite hasadaon na di bagasan holong i do saor jala mardomu na porsea i tu Kristus, jala marhite Kristus saor jala mardomu dohot Debata.

Demi hasadaon i, dilehon Jesus do hasangaponNa na sian Ama i tu na porsea i. Aha do i? HasadaonNa tu Ama i sandiri do i ro di saluhut na mangihut tusi. Hasangapon do i di Kristus i molo dijangkon Debata Ibana tu hasadaon dohot Ibana; hasangapon do i molo boi Ibana mian di bagasan Debata jala Debata di bagasan Ibana; hasangapon do i molo sai boi Ibana ro tu Ama i jala boi manangihon dohot umboto saluhut na tinahiNa; hasangapon do i molo dipillit Debata Ibana gabe Sipalua portibi on; hasangapon do i molo dilehon Debata tu Ibana hamonangan maralohon dosa, hamatean, dohot banua toru; jala hasangapon do i molo gabe dipatimbo Debata Ibana jala dibasabasahon tu Ibana goar na sumurung asa nasa goar (Pil.2:9). Songon i ma tong Kristus i marbasahon hasangapon tu na porsea. Hasangapon do i di na porsea i molo dijangkon Kristus i nasida tu parsaoran tu Ibana; hasangapon do i molo dipaian na porsea i di bagasan Ibana jala Ibana di bagasan nasida; hasangapon do i molo dipaloas na porsea i umbege jala umboto hata dohot tahi ni Debata naung patar di bagasan dohot marhitehite Ibana; hasangapon do i molo dipadohot Ibana angka na porsea i di ulaon haluaon ni portibi on marhite ulaon panindangion i; hasangapon do i molo dipatau jala dipamonang na porsea i maralohon dosa, sibolis, dohot hamatean; jala hasangapon do i molo gabe donganNa panean nasa na porsea i di Debata AmaNa. Taringot tusi didok: “Nunga Hulehon.” Maksudna, ndang holan sihirimon sogot be hasangapon i di angka na porsea, alai parsaulian naung dijalo do i di ngoluna sinuaeng on jala dinikmati.

Rancangan Homiletis

Hajojongjong ni huria di portibi on ndang tarsirang i sian diri dohot ulaon ni Jesus Kristus. Di haroroNa tu portibi on, marhite na manjou jala mamillit siseanNa i, dipaojak huria i (pat.Mat.16:18a), jala ditorushon do i marhite hauuse dohot pangulaon ni Tondi Porbadia (pat.Ul.2:41 du). Sian i, di bagasan bahasa na populer boi ma dohononta, Jesus Kristus do na mambahen rancangan ni ‘bangunan’ huria i, na mameakhon ojahanna, jala na pajongjonghonsa. Selaku perancang, peletak dasar, dohot pelaksana bangunan, Ibana do na umboto aha jala boha do huria i sasintongna. Ala ni i, manang ise na naeng umboto aha jala boha do huria i sasintongna, ingkon marsiajar ma ibana sian Kristus i. Di turpuk on, dibayanghon do manang songon dia do huria na hinasiholan jala sipaojahon ni Jesus Kristus Sintua ni Malim Bolon i.

Di portibi on alai ndang sian portibi on. Molo sahat jolma tu haporseaon di Jesus Kristus, ndang na sian portibi on i; ndang na sian dirina i, manang sian partubu, manang sian sangkap ni baoa, alai na sian ginjang do, sian Debata Ama i. Alai ndang ditait dope na porsea i tu ginjang, dipaian dope di portibi on. Hombar tusi ma targoar huria i na di portibi on alai ndang sian portibi on. Songon na porsea, nunga tarihot ibana tu ginjang, ai di banua ginjang do ihutanna, nilai banua ginjang do nilai hidupna, jala banua ginjang do tujuan ni ngoluna.

Apala i ma na parjolo sibotoon ni saluhut na porsea. Ingkon sadar diri do nasida paboa na sian ginjang do haroroanna jala halak dagang (orang asing) do nasida di portibi on. Songon na sian ginjang, ingkon hangoluhononna do ngolu banua ginjang. Ndang na mura i, ai somalna tar dihasogohon halak do halak dagang. Taringot tusi didok na mandok do: “Resah itu milik orang asing.” Di hata Batak didok: “Tanda do sanggar padang, potang ari marsipusipu; tanda do halak dagang, potang ari mangapusi iluilu.” Dihasogohon ndang ala jungkatna, tung ala ni haasingonna do. Manang na dumenggan haasingonna i ndang parsoalan, sandok asal asing, ditulak. Unang ma gabe hansit roha ni na porsea i disi, ai naung jumolo do Jesus dihosomi. Unang gabe mabiar, jala unang gabe sarombang dohot portibi on (Rom 12:2a). Naung niramotan ni Debata do huria i di portibi on, ala ni i na so tupa do i talu bahenon ni harbangan ni banua toru (Mat.16:18b).

Diparbadiai di bagasan hasintongan. Ia so pintor ditait pe na porsea i sian portibi on ala naung diparbadiai do nasida di bagasan hasintongan. Diparbadiai mandok, disirang jala dipapulik tu ulaon ni Tuhan i. Songon na pinarbadiaan, ingkon badia do pangalahona, ingkon hombar tu hata dohot patik ni Debata, hasintongan i.

I ma muse siingoton ni angka na porsea. Ingkon sadar diri do nasida paboa naung dipapulik Debata do nasida laho mamaritahon Barita na Uli i. Ndang hea malua huria i sian ulaon i, alai saleleng adong portibi on ingkon torus do i patupaonna. Maniru Kristus i, ingkon baktihononna do sandok dirina tu ulaon i. Asa tulus i ingkon na jumolo do huria i mangolu di bagasan hata ni Debata, hasintongan i. Ingkon gabe parhasintongan nasida, lam magodang di na saluhut, jala lam suman tu Kristus, Ulu ni huria i. Alogo na mamolus do i nang dijamitahon habadiaon hape nasida sandiri ndang badia, jala na songon hangsa na manghulinghuling do i manang ogung na maruolol nang dihatahon hasintongan dohot hatigoran hape nasida sandiri marpangalaho songon alo ni hasintongan na mandegedegei hatigoran.

Dipasada di bagasan haholongon. Taringot tu huria i didok Jesus do: “Asa sada nasida saluhutna.” Hasadaon ni huria ndang na borhat i sian hasosadaon tu hasadaon, jala ndang parbue ni usaho ni jolma na saling pasadasadahon dirina, alai na borhat do i sian hasadaon tu hasadaon jala marmula di hasadaon ni Debata Ama i dohot Anak i. Ala ni i ingkon hasadaon ni Ama i tu Anak i do na gabe modelna, i ma hasadaon dohot parsaoran na di bagasan holong.

I ma ma muse siingoton jala sihangoluhonon ni angka na porsea. Na marharoroan do ruas ni huria di sandok portibi on sian inganan dohot latar belakang na paasingasing. Na marhinorhon do i tu parasingasingan ni pemahaman taringot tu pengorganisasian ni huria, taringot tu parsombaon, manang taringot tu sadasada pokok ni haporseaon. Ndang pola sihailahonon i jala sisolsolan, ai pangungkapon ni Debata na marhite Barita na Uli ingkon na gabe membumi do i jala membudaya asa tarhangoluhon. Ala ni i, ndang pola siparsintaonta asa gabe sisada organisasi huria di sandok portibi on, gabe sisada bentuk peribadahan, jala gabe sisada konfessi. Alai on do tahe, ganup na porsea naeng ma boi mamereng dohot manjangkon sesama na porsea sian sude inganan dohot denominasi di bagasan holong ni roha. Sada do Debata na manjou hita, sada do Tuhan na manobus, sada do Tondi Porbadia na pabadiahon, sada do surgo situjuon, sada do hasangapon siteanon. Molo songon i do antong ndang adong alasan ni manang ise pe mangarajumi huriana asing gabe so boi mamereng sesama na porsea na sian huria na asing songon dongan na sada hasadaon dohot nasida na sahuria, ndang adong alasan ni manang ise pe memupuk kesombongan rohani na mangarajumi huriana do satu-satunya huria na sintong gabe so olo marsaor dohot sesama na porsea na sian huria na asing, jala ndang adong alasan ni manang ise pe pajongjonghonhon sada huria na eksklusif na so boi manjangkon jala manghaholongi na porsea na sian huria na asing.

jkt.17.08.2009/mvs

Read More..

Marbulung alai ndang marparbue

Gambar : Pohon Ara

Ro do sahali sahalak pandita manjamita tu sada huria.

I dope ibana martingki tu huria i. Tar sogot do ibana ro. Ndang adong dope halak didapot ibana disi. Gabe disangahon ma mandalani gareja i sahat tu alamanna. Dung i, marroan ma parminggu, jala dung dapot tingkina dipungka ma parmingguan. Jumpang ma ombasna marjamita. Di jamitana i didok pandita i ma songon on: “Hamu angka dongan na sahuria on, padenggan hamu garejamuna on, ai nunga burburon jala rambangrambangon!”
Mansai tarsonggot do huria i mambege i, ai na imbaru dope gareja i jala ndang pola piga minggu dope dung diompoi. Ias dope sude sian lantena sahat tu langitlangitna ro di tarupna, imbaru angka parhohasna jala marhillong dope setna. Alamanna pe ias, pinajagar ni handang bosi na marset na saksak dohot bunga angka na uli. Ala ni i, ndang sonang be roha ni na deba na marminggu i, alai torus nama sai manginongi jala sungkunsungkun.
Simpul parmingguon, ditangkasi angka parhalado ma hata i tu pandita i di bilut parhobasan, gabe didok ma: “I ma da, huantusi do molo sungkunsungkun rohamuna taringot tusi. Sogot do ahu ro na sogot tu gareja on, gabe husangahon ma mardalandalan tu bagasan. Huida do sude, bangkuna, langgatanna, lampuna, sude imbaru. Huida do dohot poti na di jolo ni gareja on. Tarsurat do disi: ‘Sending,’ dohot ‘Diakoni.’ Holan na sasada i do huida ugasan na buruk di gareja on, alai na imbaru dope anggo setna. Ndang adong enselna. Gabe huungkap ma tutupna jala hupamanat tu bagasan. Lam tangkas ma huida naung mansai buruk poti i, nunga pola burburon. Ndang adong manang aha disi dungkon ni burbur dohot rambangrambang. Sian i tarida, ndang adong agia ise na hea mandekdekhon manang aha tusi. Ndang hea i dipareso parhalado. Pardihana i antong, ai diboto be do i na so marisi. Ndang adong pola usaho asa diisi halak i hombar tu sangkapna na sasintongna. Dung i lam mate ma tondi sending dohot diakoni i. Tarida do i sian tingting nangkin. Angka na pasahathon hamauliateon, ganup do mangalehon tu huria dohot tu parhalado. Alai ndang adong nanggo sada na mangalehon tu sending manang tu diakoni. Nang pe songon i, ndang dibolonghon dope poti i, ai ringkot do i antong disi bahen jagarjagar. Gabe songon hau na marbulung ma hamu sude, rugun, alai ndang marparbue.” Umbege i hohom ma angka parhalado i.
Ndang ringkot di Debata jagarjagar, parbue i do. Nda i na pinapatar ni Tuhan Jesus songon na pinaboa ni si Mateus na mandok: “Alai torang arina i, laho mulak tu huta i, male ma dihilala. Dung i diida ma di dalan i hau ara sangkambona, jadi didapot-hon ma i, hape holan bulung sambing do jumpangsa disi, gabe didok ma tu hau i: ‘Na so jadi be ho marparbue olat ni on!’ Jadi pintor rahar ma hau ara i.” (Mat.21:18-19) Ndang barita na jongjong sandiri i, alai na marhahonaan do i tu ngolu ni halak Jahudi satingkiNa, angka na so marparbuehon manang aha. Mansai balga do rohanasida siala haadongon ni bagas joro i, ai mansai uli antong jala jagar (pat.Mat.25:1). Alai olat ni i do, ai ndang dipangke nasida i hombar tu sangkapna na sasintongna; gabe liang ni pandobo do tahe.

Read More..

12 Trinitatis

SERMON JAMITA TU MINGGU 12 DUNG TRINITATIS, 30 AGUSTUS 2009
1 Mus.17:15-27

Patujolo

Sisada hasadaon do turpuk ari on dohot turpuk na di jolona.

Di ay.1-9 diparata Debata do padanNa tu si Abram, jala di ay.10-14 diaturhon parsunaton songon tanda manang sahap ni padan i. Di turpuk on, ay.15-22 diuduti do pangarataion na di ay.1-9 i, jala di ay.21-27 hasasaut ni aturan parsunaton na di ay.10-14 i. Dung na di bd.13:14-17; 15:1-21, on ma patoluhalihon Debata paratahon padanNa tu si Abram. Di bd.12:1-3, di na tarjou si Abram, dipadanhon Debata do na patuduhononNa tu ibana tano, bahenonNa ibana gabe bangso na bolon (lehononNa tu ibana pomparan), jala pasupasuonNa ibana asa gabe pasupasu. Di pangarataion na parjolo dohot paduahon, diondolhon do taringot tu tano dohot pomparan na torop, alai di na patoluhon on (17:1-9; 15-22) holan taringot tu pomparan nama. Sian pomparanna i marroan do sogot angka raja, jala hombar ma i tu bagabaga na taringot tu na gabe pasupasu ibana di tongatonga ni angka bangso. Na imbaru dison (khususna di 17:15-22), i ma hajongjongan dohot peranan ni si Sarai di parpadanan i. Di na pinasahat ni Debata padanNa i dohot di pangarataionna na parjolo dohot paduahon i, holan si Abram do ditaringoti, ndang dohot si Sarai. Alai dison, dipadohot ma ibana tu parpadanan i, ditontuhon dohot hajongjonganna. Sian i bolas ma dohonon, ndang holan pangarataion ni padan i na masa dison, pembaharuanna do huhut. Hombar tusi, dipauba Debata ma dohot goarnasida: Abram gabe Abraham, mandok ama ni natorop (father of the multitude).

Hatorangan

Di jolo nunga nidok, di turpuk on dijangkon jala dipabongot Debata do si Sarai tu parpadanan i, ditontuhon dohot hajongjonganna, i ma na gabe ina ni anak bagabaga i. Tumubuhon anak ma nang ibana di si Abraham, jala pasupasuon ni Debata ibana gabe angka bangso. Maksudna, ina ni angka bangso (pat.Alkitab). Ndang holan i, ina ni angka raja do huhut, ai angka raja ni angka bangso pe marroan do sian ibana. Hombar tusi, digonti Debata ma goarna gabe Sarah, lapatanna putri (princess).

Umbege i manungkap ma si Abraham jala mengkel. Marasing sian si Sarah di 18:12-14, engkel ni si Abraham na sian haporseaonna do, sian tondina na gok halalas ni roha. Mansai longang do rohana tubuan anak ibana di umurna naung mandonok saratus taon, jala si Sarah jolmana i siapulu taon. Ndang hadodoan pingkiranna be i, gabe didok di bagasan rohana: “Tung tubuan anak ma jolma sisaratus taon jala manubuhon ma tagamon si Sarah, na marumur sia pulu taon?” Ndang sungkunsungkunna tu Debata i, tu dirina sandiri do, ai na so haantusan do i jala na so hadodoan. Nang pe songon i, porsea do ibana na sintong do i, ingkon tubuan anak do ibana sian si Sarah.

Alai boha ma si Ismael? Songon na nidok di jolo, dison pe asa dipadohot Debata si Sarah di parpadananNa i. Andorang so i, ndang hea ditaringoti na ingkon sian ibana do tubu anak bagabaga i. Ala ni i do asa diusulhon si Sarah tu si Abraham mambuat si Hagar, hatobanna i gabe jolmana laho pajongjong pomparan di ibana, jala si Abraham ndang haboratan taringot tusi (16:2). Dung tubu si Ismael, dirajumi si Abraham dohot si Sarah do na ibana do anak bagabaga i. Nunga sandok sabam rohana disi, ndang dihirim be anak na asing. Alai dison, dung dipatontu Debata na ingkon sian si Sarah do anak bagabaga i, boha ma hajongjongan ni si Ismael? Ganggu do roha ni si Abraham na gabe tersingkir ibana sian adopan ni Debata. Ala ni i dipangido ma tu Debata: “Asal mangolu si Ismael maradophon Ho.” Maksudna, unang ma gabe mago si Ismael i, jala tongtong ma nian di bagasan pardomuan dohot parsaoran tu Debata.

Pangidoanna i ndang pintor dialusi Debata, alai jumolo do diulahi mangondolhon na sian si Sarah do anak bagabaga i, didok: “Ingkon tubuhonon ni si Sarah jolmam anak sada di ho, bahen ma goarna si Isak.” Isak lapatanna, engkel manang mengkel. Mengkel do si Abraham mambege bagabaga i (ay.17), mengkel dohot si Sarah (18:12); mengkel muse dope si Sarah dung hatutubuna, songon i dohot sude na umbegesa (21:6). Taringot tu si Isak i didok do: “PahotonHu ma padanHu dohot ibana, padan na salelenglelengna, ro di pinomparna sogot.” Ibana ma sitean bagabaga na tu si Abraham. Sian ibana ma targoar di si Abraham pomparan, jala pomparanna i ma muse na tumean tano na pinarbagabaga i, jala sian pomparanna i do ro raja sigomgom sandok tano on jala gabe dapotan pasupasu saluhut bangso di tano on.

Dung i pe asa dialusi Debata pangidoan ni si Abraham na taringot tu si Ismael i. Diparbagabaga do na gabe bangso na bolon ibana muse, jala sampulu dua raja tubuna (ida 1 Mus.25:12-16). Ibana ma ompu ni manang piga marga (suku) ni halak Arab.

Di ay.21, diulahi do muse mangondolhon na si Isak do sitean parpadanan na tu si Abraham. Godang pe pomparanna sian si Ismael (di pudian ni ari tamba dope muse sian tubu ni si Ketura, ida 1 Mus.25:1-4), ndang dohot i sitean bagabaga i, holan pinompar ni si Isak do. I pe tahe, ndang sude; ai ndang dohot pinompar ni Esau, holan pinompar ni si Jakob do, i ma bangso Israel.

Luhut panghataion i tarjadi do di bagasan sada parjumpangan ni si Abraham tu Jahowa na ro mandapothon ibana (17:1; pat.18:1), jala dung salpu i, manaek ma Debata sian adopan ni Abraham.

Di ay.22-27 dipatulus si Abraham do aturan taringot tu tanda manang sahap ni parpadanan i, i ma parsunaton i. Disunat do ibana di na sadari i, anakna si Ismael, dohot anak angka na tubu di bagasna ro di sude hatoban na tinuhor ni hepengna angka na mian di jabuna. Sunat, manggotap hulup ni baoa. Hulup, perlambang ni tangkang dohot jahat ni roha do i (pat.5 Mus.10:16; Jer.4:4). Asa, na marhahonaan tu na paimbaruhon roha (pembaharuan hidup) do parsunaton i. Marhite na manggotap jala mambolonghon hulup na songon perlambang ni tangkang dohot hajahaton i, digombarhon do disi hasisirang ni jolma i sian hadirionna na leleng na tineanna sian natorasna mamungka sian hatutubuna, dung i diparbadiai jala dipabongot tu parsaoran tu Debata. Dohot hata na asing, dipamate hajolmaonna na leleng, hajolmaon na tangkang jala na jahat i. Dison marlaku do prinsip pars pro toto, sebagian untuk semua. Hulup na ginotap i, mate do, busuk. Na ‘mewakili’ hamamate ni hajolmaonna na leleng do i secara utuh, jala tinggal ma na imbaru. Ala ni i, di pudian ni ari lam diondolhon do parsunaton ni harohaon (pat.5 Mus.10:16; Jer.4:4; 9:25) ndada parsunaton ni sibuk. Na menarik dison, diulahon do parsunaton i tu si Ismael, atik pe so parsidohot ibana di parpadanan i. Boasa? Ala dakdanak dope ibana jala mangolu di bagasan pangaramotion (asuhan) ni sijalo bagabaga i. Ala ni i, ingkon tunduk do ibana tu aturan ni sijalo bagabaga i (pat.Gal.4:1-2) Marumur 13 taon ma ibana di na tarsunat i. Ninna, marojahan tusi, gabe lumambat do pelaksanaan ni parsunaton i di halak Arab sian di halak Jahudi. Molo di halak Jahudi nunga diulahon i di ari paualuhon dung hatutubu ni sada posoposo, di halak Arab diulahon do i tu na marumur 5-13 taon. Taringot tu hatoban na tinuhor ni hepengna sian halak sileban dohot angka anakna na tubu di bagasan jabuna, hombar tu uhum milikna do i, hakna. Ala ni i, marhuaso do si Abraham manghonahon aturan ni ngoluna tu nasida. Memang dipaloas patik i do ulahonon parsunaton i tu halak sileban angka na giot roha pasaorhon diri tu bangso ni Debata (pat.1 Mus.34:14-17, 22) manang tu na giot parsidohot manganhon paskah i (2 Mus.12:48).

Rancangan Homiletis

Di na tarjou si Abaraham, dibagabagahon Debata do paboa na pasupasuonNa ibana asa marhitehite ibana dapotan pasupasu saluhut bangso ni tano on. Na martudutudu do i tu haroro ni Jesus Kristus na tubu sian pomparanna. Nunga dipatulus i, ai nunga ro Jesus Kristus tu portibi on. Di bagasan dohot marhitehite Ibana malua jala dapotan pasupasu saluhut halak na porsea di Ibana. Ulaon haluaonNa i ditorushon do tu saluhut tingki dohot inganan marhitehite huria sepanjang abad, tarmasuk hita angka na mangolu di tingki on. Songon halak angka naung malua jala pinasupasu, tarjou do hita asa gabe pasupasu. Boha ma asa tarpatulus i?

Marsihohot ma hita di haporseaon. Mansai leleng do dipaimaima si Abraham hasasaut ni bagabaga i. Di umurna na papitupululimataonhon ibana manjalo i (1 Mus.12:4), di umurna na pasaratustaonhon pe asa dipatulus. Di masa penantianna na duapulu lima taon i, godang do tantangan tu haporseaonna. Alai luhutna i dihamonanghon ibana do, ai sai marsihohot do ibana di haporseaon tu Debata na marbagahon i. Debata na sun hinagogo do Ibana (1 Mus.17:1), ala ni i tarpasautsa do bagabaga dohot lomo ni rohaNa. Songon i ma dison, nang pe mansai maol siat tu rohana na tubuan anak jolma sisaratus taon jala manubuhon si Sarah na marumur sia pulu taon, porsea do ibana, ai ingkon saut do ibana gabe pasupasu.

Songon i, maol do siat tu roha molo ingkon gabe pasupasu hita halak Kristen di portibi on, tarmasuk di Indonesia on. So na umbalga hita, so gumogo, so ummora, so umpistar. Sambolus, hira saringar sambing do i molo di Taon Diakonia (2009) on barani hurianta HKBP mamangke semboyan menyejahterakan masyarakat. Ndang ulaon na mura i, na dokdok situtu do. Adong pe na tarbahen jala ringgas roha mangulahon, sai adong do na mangalo manang manuhasnuhasi i mandok upaya kristenisasi. Alai unang mabiar jala unang gabe mandele hita, alai marsihohot ma di bagasan haporseaon i. Taingot ma, Kristus i sandiri ndang di bagasan hamoraon, alai ingkon gabe di bagasan hapogoson do asa gabe haluaon dohot pasupasu tu sandok portibi on (pat. 2 Kor.8:9). Songon i do nang Apostel Paulus dohot angka donganna: “Songon angka na pogos, alai torop do dipamora; songon na so paradongan, hape saluhut do digomgom” (2 Kor.6:10). Marhite na godang dohot na otik, marhuaso do Debata mambahen hita gabe pasupasu. Parsoalanna, olo do hita?

Mangolu di bagasan haimbaruon. Songon tanda manang sahap ni parpadananNa i, diaturhon Debata do parsunaton tu si Abraham dohot tu pomparanna. Na marhahonaan tu haimbaruon ni roha manang pembaharuan hidup do parsunaton i. Diulahon ma i di ari paualuhon dung hatutubu ni sada posoposo (baoa) jala laos disi ma dibahen goarna (pat.1 Mus.21:3-4; Luk.2:21). Di hita halak Kristen ndang taulahon be parsunaton i. Singkatna, taulahon do pandidion. Di hurianta, diulahon do i tu sasahalak (pada umumna) di tingki posoposo jala laos disi ma dibahen goarna. Sarupa tu parsunaton i, tahaporseai do na sahap ni angka naung jinangkon tu parpadanan ni Debata do pandidion i (Ida Konfessi Bd.8A, al.67) jala na marhahonaan do i huhut tu haimbaruon ni ngolu (Ida Katekhismus, al.57) manang pangulahion tubu (lahir kembali/lahir baru; Tit.3:5). Jolma na buruk i dipamate jala ditanom tu bagasan hamatean ni Kristus, dung i dipahehe raphon Ibana asa marparange di bagasan ngolu na imbaru (pat.Rom 6:3-4)

Manang ise na naeng gabe pasupasu, ingkon mangolu do di bagasan haimbaruon. Ndang adong boi hirimon pasupasu sian hatangkangon dohot sian hajahaton, sabalikna do tahe, hamagoan do di bagasanna. Ala ni i, sihangoluhononta do tongtong pandidion naung tajalo i. Didok Dr.Martin Luther do: “Siauponta do ganup ari hinorhon ni solsol ni roha dohot hinorhon ni na paimbaruhon roha isara ni ompunta si Adam rap dohot dosanta ro di angka sangkap ni roha na jahat asa mate sudena jala asa mulak mangolu hita ganup ari gabe jolma na imbaru, na tigor jala na ias roha, na mangolu di jolo ni Debata salelenglelengna.” Di bagasan haimbaruon i ma hita marhobas bahen kesejahteraan ni masyarakat dohot huria songon na pinangido ni Taon Diakonia (2009) on asa tutu hita gabe pasupasu.

jkt.11.08.2009/mvs

Read More..

Pendeta Pensiun

PERTEMUAN PENDETA PENSIUN & KELUARGA

Hari ini, Rabu 19 Agustus 2009, dimulai pukul 10.00 WIB, bertempat di gedung gereja HKBP Jatiwaringin, Jalan Kartika Eka Paksi No.3 Kompleks Kodam Jaya Jakarta Timur, telah berlangsung Pertemuan Pendeta Pensiun & Keluarga Sjebodetabek dan Bandung. Pertemuan tersebut adalah kegiatan rutin Parsaoran (Persekutuan) Pendeta Pensiun & Keluarga Jabodetabek-Bandung yang berkedudukan di Jakarta yang telah berdiri sejak tahun 2008 yang lalu, dan telah diberitahukan kepada Praeses HKBP Distrik-VIII Jawa-Kalimantan, Praeses HKBP Distrik-XVIII Jabartengdiy, Praeses HKBP Distrik-XIX Jakarta-2, dan Praeses HKBP Distrik-XXI Jakarta-3.

Persekutuan ini menghimpun semua pendeta HKBP yang telah pensiun dan keluarga yang bedomisili di Jabodetabek dan Bandung. Didirikan berpedoman pada anugerah dan panggilan Allah Bapa, AnakNya Tuhan Yesus Krisstus, dan Roh Kudus dan merupakan wujud persaudaraan yang tetap terpanggil untuk saling mendoakan (Luk.22:40; Yak.5:16; Eps.6:18), saling menolong (Gal.6:2), dan saling menghibur dan menguatkan (1 Tes.4:18). Untuk pertama kalinya persektuan ini dipimpin oleh Pdt.Dr.SM Siahaan selaku kordinator. Persekutuan ini mengadakan pertemuan empat bulan sekali bertempat di salah satu gedung gereja di lingkungan HKBP di wilayah Jabodetabek. Dalam setiap pertemuannya, persekutuan ini mengadakan ibadah yang dilayankan oleh pendeta dan pelayan jemaat/ressort setempat. Selanjutnya, diadakan pembicaraan tentang berbagai pokok penting yang berhubungan dengan kehidupan HKBP.

Demikianlah, dalam pertemuan tersebut di atas telah diadakan ibadah yang dipimpin oleh Pdt.Patar Soaduon Napitupulu, MMin. Pendeta HKBP Ressort Jatiwaringin. Selanjutnya, pertemuan mengadakan pembicaraan dalam rangka menggumuli dan memahami kembali Tata Kebaktian atau Agenda HKBP. Pembicaraan itu sudah dimulai pada pertemuan sebelumnya yang dilaksanakan di gedung gereja HKBP Rawamangun pada tanggal 22 April 2009, dan masih akan dilanjutkan pada pertemuan berikutnya, yang direncanakan dilaksanakan di gedung gereja HKBP Menteng pada tanggal 2 Desember 2009 yang akan datang, dan hasilnya direncanakan akan disampaikan ke HKBP melalui Pimpinan Distrik dan Pimpinan HKBP.

jkt.19.08.2009/mvs

Read More..

11 Trinitatis

SERMON JAMITA TU MINGGU 11 DUNG TRINITATIS, 23 AGUSTUS 2009
Ps.133:1-3

Patujolo

Mangihuthon judulna, margoar do Psalmn 133 on ende hananangkok (mazmur ziarah, aslina sir hamma’alot).

Toropan penafir mangarajumi, angka psalmn sisongon on (Ps.120-134) diendehon halak Israel do i di pardalanannasida nangkok (berziarah) tu huta Jerusalem, manang di upacara habobongot (perarakan, prosesi) ni angka peziarah i tu bagas joro. Judul i, dipadomu do tu goar David (Ende hananangkok sian sian si David). Di sandok buku Psalmn, adong 73 psalmn na dipadomu tu goar David songon i. Taringot tusi adong manang piga kemungkinan. (1). Si David patomutomuhon. Sipatomutomu ende do si David (Am.6:5), penyair (2 Sam.1:17; 3:33), jala paruninguningan/pemusik (1 Sam.16:16; 18:10). (2). Si David papunguhon. Godang sian psalmn i angka ende naung leleng mangolu hian do i di tonga ni Israel. Ndang tarboto be ise na patomutomuhonsa, alai diparhatutu bangso i do hasintongan di bagasanna; ala ni i dijalo do i jala diendehon, gabe mangolu sian sundut tu sundut. Di pudian ni ari, dipapungupungu ma i gabe ende resmi di tonga ni huria. Ra, si David ma sada na gumodang mangula papungupunguhon i. (3). Parningotan tu si David. Halak na asing do patomutomuhon songon parningotan, kenangan, manang penghormatan tu si David. (4). Adong hadosan ni pengalaman ni na manurathon i tu pengalaman ni si David. Angka barita ni si David sar do i di tongatonga ni bangso i sian sundut tu sundut. Dung i, adong ma sada sian nasida na mengalami sada pengalaman na hira dos tu sada sian pengalaman ni si David i, gabe dipatomutomu ibana sada psalmn atas goar ni si David. Rupani Ps.51. Mangihuthon ay.1-2, panopotion ni dosa ni si David do i dung dilangkup ibana si Batseba. Alai di ay.20, tersirat do naung sega angka parik ni Jerusalem. Tontu do, ndang masa dope i di tingki ni si David. Sian i bolas dohonon, halak na asing na mangolu dao di pudi ni si David do na patomutomuhon i. Ra, diulahon ibana do pangalangkupon songon niula ni si David uju i, gabe dipinsang Jahowa ibana. Hombar tusi, dipatomutomu ibana ma sada psalmn na diatasnamahon tu si David.
Mangihuthon isina, tarrajum do Psalmn 133 on tu psalmn habisuhon (mazmur kebijaksanaan, hikmat). Angka psalmn sisongon i na marisi poda do i manang renungan taringot tu tema-tema pokok ni kesusasteraan hikmat, isara guna ni patik di ngolu ni na porsea, sitaonon ni halak na tigor, dohot na asing. Psalmn 133 on sandiri mangajarhon pasupasu di bagasan parhahamaranggion.

Hatorangan

Na marhahamaranggi do sandok halak Israel. Sada do ompunasida, si Jakob, sada do hundulan manang parmianannasida, i ma tano Kanaan na binasabasahon ni Debata tu nasida. Taringot tu nasida didok: “Ida ma dengganna i dohot sonangna i ...” Ndang holan denggan idaon, alai tutu situtu do denggan jala sonang, marparbuehon na denggan (yang baik/pantas), meyebarkan pengaruh na pasonanghon (yang indah/menyenangkan). Ndang dohot sandirina i masa holan ala na saompu nasida jala sahundulan, ndang. Boi do angka na marhahamaranggi ndang denggan jala sonang molo ndang sada songon daion mual, alai mardua songon daion tuak (lapatanna masiboan daina jala masiboan lehengna), molo patampaktampak hundul alai asingasing pandohan. Ala ni i, adong do siradotan ni Israel asa tutu situtu nasida denggan jala sonang. Aha ma i? Taringot tusi didok: “... molo tung pungu” (apabila ... dengan rukun, together in unity). Ingkon radotan nasida do hasadaon, kebersamaan, dohot kerukunan di bagasan haporseaon na nirahutan ni holong. Sada do Debata na manjou jala paluahon nasida, na marbasabasahon tu nasida tano Kanaan jala na paianhon nasida disi, jala sada do patik na gabe ojahan dohot sorminan ni ngolunasida. Marhite na marsihohot di haporseaon dohot di pangoloion tu Debata na sasada i, jala marpangalaho hombar tu patik i, boi ma nasida manghilala jala manghangoluhon na sada do nasida ganup tu nasa na targoar Israel, bangso ni Debata. Ndang holan di tingki pungu, isara di tingki na rap nangkok nasida manang berziarah tu Jerusalem di pestanasida angka na umbalga, di tingki marodor manang prosesi tu bagas joro, dohot di tingki na marpesta manang maribadah disi, alai dohot dope di tingki marserak, i ma na mian di huta dohot di jabuna be. Tolu hali sataon, di pestanasida angka na umbalga, i ma Paskah, Pentakoste, dohot Parlapelapean, nasa baoa na magodang na maringan di areal radius 20 km sian Jerusalem wajib do nangkok tu Jerusalem, tu pesta i. Parompuan dohot angka na mian di ruar ni areal i ndang pola, alai ingkon hea ma nangkok nanggo apala sahali saleleng di ngoluna be. Nang pe songon i, ala ni arga ni pesta i, ganup taon, sai nangkok do nang parompuan dohot angka na di ruar ni areal i tu pesta i hombar tu haboionna be. Pesta i ma sada na pataridahon hinadenggan dohot hinasonangnasida songon bangso ni Debata na marhasadaon, jala laos i ma sada na mangisi jala mamparbohali nasida di pangantusion dohot panghangoluhonon di hasadaon i di na mulak nasida jala mian di huta dohot di jabuna be.
Taringot tu hinadenggan ni bangso na marhasadaon i dipatudos do tu miak dohot pamiahion na badia (2 Mus.30:22-30). Na dipature do miak i hombar tu resep na sian Debata sandiri, jala holan tu pamiahion na badia do i boi pangkeon, ndang boi tu na asing. Dipangke ma i mamiahi laho marbadiahon jala pabangkithon si Aron gabe sintua ni malim. Miak dohot pamiahion pada umumna, simbol ni las ni roha do i, hasonangan (kebahagiaan), dohot haulion (pat.Jes.61:3; Ps.104:15). Di angka pesta halalas ni roha, somal do suhut mamiahi angka tamuena (pat.Ps.23:5; Luk.7:46). Na laos marlapatan ma i, pabangkithon sasahalak tu derajat na tumimbo (gabe tamue na terhormat di pesta i). Dison ma idaonta pardomuan ni ide manang gagasan ni hadengganon di bagasan bangso na marhasadaon dohot pamiahion na marhite miak. Gok do las ni roha, hasonangan, dohot haulion (gagasan pamiahion) di bagasan parsaoran na tarihot di bagasan hasadaon i. Songon miak pamiahion i na manggohi (melimpahi) ulu ni si Aron, mabaor tu mise sahat tu rambu ni ulosna, songon i ma pasupasu ni Debata na pabadiahon jala na palashon roha i mabaor tu bangsoNa di bagasan dohot marhite parsaorannasida na marhasadaon i, na pasurung nasida di tongatonga ni angka bangso na di tano on. Ndang maralangalang Debata mangusehon pasupasuNa i, sandok buas do, maruseuse (berkelimpahan) gariada.
Dipatudos dope muse hinadenggan ni bangso na marhasadaon i tu nambur ni Hermon na mabaor tu angka dolok Sion. Mansai maol do mangantusi ayat on, ai dolok Hermon dao do di utara ni Jerusalem. Songon dia ma boi nambur ni Hermon mabaor tu angka dolok Sion (haojahan ni huta Jerusalem)? Adong mandok, Sion dison ndang Sion haojahan ni huta Jerusalem, alai goar na asing ni Hermon do i [(Sion = Hermon; ida 5 Mus.4:48. Di hata Heber, tarsurat disi Siy’on, Batak Sirion, Indonesia Siryon, King James Version Sion, The New King James Verison Sion.) (Sirion dohot Siryon na di terjemahan Batak dohot Indonesia i hata Siria ni Siy’on do i)]. Molo i do tutu, ndang adong na maol di ayat on. Alai hurang hona do i tu konteksna, ai hira so adong alasan mandok na di Hermon do diparbagabaga Jahowa pasupasu hangoluan sahat ro di salelenglelengna, alai huta Jerusalem do na cocok tusi. Antong boha ma kenyataan na maol on patorangon? Di Barnes’ Notes, Electronic Database, Copyright (c) 1997 by Biblesoft diuji penerjemah do manambahon sisipan di tongatonga ni ayat on gabe songon on: “Songon nambur ni Hermon, jala songon nambur na mabaor tu angka dolok Sion ...” (As the dew of Hermon, and as the dew that descended upon the mountains of Zion …) Menarik do i nian, alai ndang asli. Ndang dua ragam nambur na ditaringoti di ayat on, sada do, i ma nambur ni Hermon. Ninna roha, nambur ni Hermon i kiasan do i tu pasupasu na mabaor tu angka dolok Sion (na tinaringotanna di ujung ni ayat 3 on). Tangkasna, songon nambur ni dolok Hermon na mamornohi jala panapuhon tano, songon i ma pasupasu na songgop tu angka dolok Sion marparbuehon hasadaon dohot holong parhahamaranggion na mauliutus di bangso na marpungu jala maribadah disi. Alasanna, “... ai disi do diparbaga Jahowa pasupasu, hangoluan sahat ro di salelenglelengna.” (Terjemahan Indonesia: “Sebab ke sanalah TUHAN memerintahkan berkat ...,” The New King James Version: “For there the LORD commanded the blessing …”) Lebih kuat do terjemahan Indonesia dohot Inggris i. Disi, dipersonifikasikan do pasupasu i gabe songon sada pribadi na diparentahon Jahowa laho tu Sion asa mangula manubuhon angka na denggan di bangsoNa na mangokui Jerusalem songon pusat ni peribadahanna, baik di tingki marpungu jala maribadah nasida disi manang pe di tingki na marserak jala mian di huta dohot di jabuna be. Angka parbue hadengganon na tinubuhon ni pasupasu i ndang jaloon nasida i holan di ngoluna sinuaeng on, alai na martujuan jala na marudut do i sahat ro di hangoluan na salelenglelengna.

Rancangan Homiletis

Hasadaon, tema na senteral do i di Bibel dohot di poda ni halak Kristen. Asiasi ni Debata do hasadaon i, ndada usaho ni jolma (hasadaon na indikatif). Alai godang do mara ni hasadaon i, godang alona na boi mamolati, manegai, jala mamuntari. Ala ni i, adong do tanggungjawab ni jolma taringot tu hasadaonna i, i ma na mangaradoti jala mangaramoti hasadaonna i asa tongtong sada (hasadaon na imperatif). Hombar tusi do martangiang Tuhanta Jesus Kristus mandok: “Asa sada nasida saluhutna; songon Ho, ale Amang, di bagasan Ahu jala Ahu di bagasan Ho, songon i ma nang nasida di bagasan Hita, asa porsea portibi on, Ho marsuru Ahu” (Joh.17:21) Boha do hasadaon na niasiasihon ni Debata sijaloon jala siradotan i?
Hasadaon ni na marhahamaranggi. Taringot tusi, didok Tuhanta Jesus Kristus do: “Saluhutna hamu marhahamaranggi” (Mat.23:8c). Na marhahamaranggi do hita tutu, ai sada do Debata, Amanta (Eps.4:6a) naung manubuhon hita paduahalihon sian godang ni asi ni rohana (1 Ptr.1:3b); sada Tuhan na manobus jala paluahon hita (Eps.4:5a), sada do Tondi Porbadia (1 Kor.12:4b; Eps.4:4b) na manjou hita tu bagasan huria i, jala sada do huria (pat.1 Kor.12:20b; Eps.4:4a) na gabe haojahanta. Hombar tusi, na tarjou do hita ganup manjangkon sesama Kristen songon hahaangginta, jala tongtong menyikapi sikap ni na marhahamaranggi, mangolu di bagasan hadameon (kerukunan) jala masihaehan di bagasan roha na holong.
Hasadaon na gok halalas ni roha, hasonangan, dohot haulion. Hinadenggan ni bangso na marhasadaon i dipatudos do tu miak na hushus na mabaor sian ulu tu mise ni si Aron torus tu rambu ni ulosna. Miak dohot pamiahion pada umumna simbol ni halalas ni roha do i, hasonangan, haulion, habadiaon, dohot hasurungan (hababangkit tu derajat na tumimbo). Songon i, gok do halalas ni roha, hasonangan, haulion, habadiaon, dohot hasurungan na manghorhon ngolu na lam marlapatan na dibasabasahon Debata tu hita di bagasan dohot marhitehite huria na sasada i. Hombar tusi, na tarjou do hita mangaradoti asa lam sange ruas ni hurianta mandai halalas ni roha, hasonangan, haulion, habadiaon, dohot hasurungan di bagasan dohot marhite huria i. Unang ma sabalikna, gabe adong na lam didondoni arsak dohot hasusaan ala ni huria i.
Hasadaon na pinasupasu asa gabe pasupasu. Songon nambur na mamornohi tano dohot suansuanan, pasupasu ni Debata ndang na statis i, alai huaso do i dohot hagogoon na sinuru manang tinongosNa laho patupahon angka na denggan di bagasan dohot marhite huria i. Na gabe tanggungjawab ma i di huria i. Manang di dia huria hadir, ingkon tarida jala mangula ma disi daya keselamatan ni Debata na palambokhon dohot pamalumhom, na padomuhon jala pasadahon di bagasan holong. Ndang tardungdung i molo masiboan lehengna do huria i. Alai molo ganup do ruas dohot parhalado mamereng jala memahami dirina songon na pinasupasu ni Debata asa gabe pasupasu, dung i hehe rohana mandohoti ulaon panindangion, ndang tarbahen so gabe patar daya keselamatan ni Debata di tonga ni masyarakat dohot bangso, gabe masa disi hamubaon dohot parhusoran tu hatigoran, hasintongan, hadameon, hamalumon, dohot angka na asing.
Hasadaon ni na marhahamaranggi i, na gok hahalas ni roha, hasonangan, dohot haulion i, na pinasupasu jala na gabe pasupasu i ndang holan di portibi on i daion ni angka na porsea, alai na marudut do i sahat ro di hangoluan sogot na salelenglelengna.

jkt.07.08.2009/mvs

Read More..

10 Trinitatis

SERMON JAMITA TU MINGGU 10 DUNG TRINITATIS, 16 AGUSTUS 2009
2 Mus.13:11-16

Patujolo

Di Bibel manang pe di Alkitab, mansai torang sisada hasadaon do turpuk on dohot turpuk na di jolona, i ma patik na taringot tu buhabaju (13:1-16).

Di Alkitab, ditambahon dope tu judul i taringot tu hari raya roti tidak beragi. Duansa i, bagian na so tarsirang do sian keseluruhan ni kegiatan dohot patik ni paskah i. Dung hamamate ni buhabaju ni Misir, dipaloas Raja Parao do halak Israel ruar. Borhat ma nasida sian tano Gosen parmianannasida na sai laon. Adong manduga, huta Qantir do i, na jonok tu Avaris, ibukota ni Misir hatiha i. Sasintongna, adong do dalan na jempek sian Misir mangireire pasir ni Laut Tonga tolhas tu Kanaan. Alai ndang ditogihon Debata nasida sian i, ai mamolus huta ni halak Palistim do i, parmusu angka na begu, so tung manolsoli maon nasida ia diida hamusuon, gabe mangido mulak nasida tu Misir. Mangaliat do nasida diboan dompak anggoni (tenggara) paihutihut Laut Arung (13:17-18) Paradianannasida na parjolo, disura roha di Sukot (pat.13:20); jala ra, disi ma dilehon Debata patik on tu nasida.

Hatorangan

Pemilikan ni Israel di tano Kanaan i naung dimangmanghon Debata hian do i tu angka ompu, tu si Abraham, tu si Isak, dohot tu si Jakob. Dimangmanghon, ditolonhon, disumpahon mandok, dibagabagahon marhite tolon manang sumpa. Ndang tano kosong be i, naung marnampuna do, marpangisi, i ma halak Kanaani. Hombar tusi digoar do i tano ni halak Kanaani. Kanaani dison, goar umum do i tu sude penduduk asli ni tano i, i ma halak Kanaani, Heti, Amori, Hevi, Jebusi (13:5), Keni, Kenisi, Kadmoni, Repaim, (1 Mus.15:19-20), Perisi, Girgasi (Jos.3:10 par.) Debata do na mamboan Israel tusi, na mangonjar halak Kanaani, jala marbasahon tu nasida tano i.
Ia dung sahat jala mian nasida disi selaku pemilik sah, efektif ma patik na di ay.2 i na mandok: “Parbadiai di Ahu nasa buhabaju.” Taringot tu buhabaju i dipatangkas dope didok: “Na parjolo ruar sian bortian.” Buhabaju ni aha jala na boha? Buhabaju ni jolma dohot buhabaju ni pahanpahanan (ternak) na ganjing panganon manang na halal (isara birubiru, hambing, lombu) dohot na so ganjing panganon manang na haram (isara halode, hoda). Holan buhabaju baoa do (jolma), dohot tunggal (pinahan) angka na so marlindang; anggo boruboru ndang dohot i siparbadiaan. “Parbadiai” mandok, papulik, paasing jala pasahat manang pelehon tu Debata Jahowa ai Ibana do nampunasa. Songon dia ma i dipasahat? Molo buhabaju ni pinahan na ganjing panganon, dipasombu ma i jolo pitu ari raphon inana, dung i di ari paualuhon diboan tu inganan na badia na pinillit ni Jahowa jala dipelehon (2 Mus.22:29); mudarna dipistikhonon tu langgatan, tabotabona ditutung bahen pelean api, bahen uap na hushus di Jahowa (4 Mus.18:17). Asing ni i, dipangan (na mamelehon i) di adopan ni Debata. Maksudna, di inganan na badia manang di inganan pamelean i (5 Mus.15:20) Angka na martihas, isara na mengkat manang mapitung ndang dipelehon, alai dipangan sandiri di huta (dang pola di inganan na badia; 5 Mus.15:21-22).
Buhabaju ni halode (na so ganjing panganon manang na haram) ditobus manang digonti dohot anak ni birubiru, jala panggontina i ma dipelehon dohot cara na di ginjang i. Alai molo so ditobus, dipamate, dipunokhon (diponggolhon) rungkungna. Buhabaju ni jolma ndang songon na masa di sipelebegu, dipelehon jala ditutung di langgatan ni angka debata, alai dipasahat tu Jahowa bahen pelean na mangolu, gabe pangula di panghobasion tu Ibana. Alai ala naung dipillit Debata marga Levi songon singkat ni sude buhabaju ni Israel bahen malim jala parhobas di inganan na badia i (pat.4 Mus.3:12-13), ingkon sitobuson ma buhabaju i. Partobusna, lima sekkel perak sahalak, marguru tu sekkel di inganan na badia i (pat.4 Mus.3:47; 18:16) Sekkel, i ma kesatuan berat. Dipangke do i manontuhon borat ni rempah-rempah, tombaga, perak manang mas. (Alai di sekitar taon 500 SM dipangke ma i muse gabe goar ni kesatuan uang manang coin). Selaku kesatuan berat, adong dua mansam sekkel, i ma sekkel di inganan na badia dohot sekkel di pasaran. Sekkel di inganan na badia dokdokna 14,30 gram (sasekkel 20 gera, sagera 0,715 gram); di pasaran 16,016 gram. (Hepeng, sekkel perak argana + 5 shillings, 4 pences; sekkel mas, + 4 pounds). Dung salpu ariari pangiasan (pat.Luk.2:22) ni ina na mangintubu, dipatupa ma upacara panobuson. (Ariari pangiasan i ma masa haramunon ni sada ina na mangintubu. Nasa ina na manubuhon baoa, 40 ari ma ibana ramun; molo parompuan, 80 ari. Saleleng ariari pangiasanna i, ndang boi nasida jumonok manang bongot tu nasa na targoar na badia). Upacara i ndang pola ingkon di inganan na badia na pinillit ni Jahowa, boi do di sembarang inganan. Alai angka halak na saleh, lomoan do rohana patupahon i di inganan na badia na pinillit ni Debata. Dipasahat ma posoposo i tu malim na manguluhon upacara i; dijalo malim i ma i, diabing jala dipasupasu. Dung i ditobus natorasna ma muse dakdanak i, dipasahat ma na lima sekkel partobusna i tu malim i, jala dijalo muse anakna i.
Patik taringot tu buhabaju i ingkon torushonon ni bangso Israel do tu pinomparna marsundutsundut. Ganup diulahon nasida upacara panobuson i, ingkon manungkun do sada sian anak (manang na umposo sian nasida) mandok: “Ulaon aha do on di hamu?” (pat. 2 Mus.12:26), dung i pajojoron ni natorasna ma sude na binahen ni Debata paluahon nasida sian Misir marhite tanganNa na gogo. Pajojoron nasida ma disi, na hatoban do ompunasida di Misir. Ndang adong na tarbahen nasida paluahon dirinasida sian i. Raja Parao sandiri, dipatangkang do rohana manjua paloashon nasida. Debata do na bertindak paluahon nasida sian i marhite na mamunu nasa buhabaju ni tano Misir. Ala ni i ma umbahen na ingkon pasahathon nasida buhabajuna dohot buhabaju ni pinahanna bahen pelean tu Jahowa. Marhite na pajojorhon i, dihatindanghon Israel do haporseaonna paboa: Debata do Sipalua nasida, jala ia sahat pe nasida tu tano Kanaan jala gabe panean disi, ndang ala ni dirina, tung ala ni asiasi ni Jahowa do.
Panindangion i ingkon gabe partinandaan ma i di tangannasida, jala parningotan di holangholang ni matana (pat.9; 5 Mus.6:8; 11:18) Di pudian ni ari, dilapathon angka siboto patik ni Jahudi ma i secara harpiah, ai di masa parholangan ni Padan na Robi dohot Padan na Imbaru berkembang do sada unsur budaya religi di Israel na margoar filakteri, i ma dua kotak kulit (perkamen) na metmet, na mansai togu jala marset na birong. Di ganup kotak adong opat lembar harotas (perkamen) na sinuratan dohot hata ni patik i. Di na parjolo 2 Mus.13:1-10, paduahon 2 Mus.13:11-16; patoluhon 5 Mus.6:4-9; jala di na paopathon 5 Mus.11:13-21. Dibahen ma i martali. Jumpa martangiang, dirahuthon ma i sada tu uluna, jala kotak i di bohina, di atas ni parholangan ni matana, lapatanna jonok tu utokutok manang pusat ni pingkiranna. Kotak na paduahon dirahuthon di lompitlompit ni tangan dohot botohonna hambirang, lapatanna tondongkon ni ateatena manang pusat ni ngoluna, pusat ni panghilalaan dohot pambahenanna. (Ditaringoti Tuhan Jesus do i di Mat.23:5; digoar ma i disi tali partangiangan) Toropan penafsir mandok, pada aslina, arti kiasan do i, ndang arti sebenarnya (pat.Poda 3:3, 21-22). Marhite i naeng ondolhononna do, ingkon ingoton ni Israel do sian sundut tu sundut paboa pambahenan haluaon ni Debata do na gabe ojahan ni haadongonnasida songon sada bangso na bolon jala na bebas. Ingkon tangkas do i suan di roha, di panghataion, dohot di pambahenannasida. Jala ala ni i ingkon haholongan nasida ma Debata sian nasa pingkiran, sian nasa roha, dohot sian nasa gogona. Dohot hata na asing, patik ni Tuhan i ndang sae i holan dipeop di bagasan rohanasida manang dihatindanghon marhitehite pamangan, alai ingkon na dipasingkop do i marhitehite tangan, marhite ulaon dohot pambahenan. Ingkon gabe tanda ni hadirion do i. Umumna, bohi do tanda ni hadirion; marhite na mamereng bohina, tartanda sasahalak. Songon i ma di ganup hadirion ni halak Israel ingkon tarjaha jala tartanda patik ni Debata.

Rancangan Homiletis

Raphon donganta sabangso, di Indonesia on dohot di sandok portibi on, marsogot rayahononta ma ulang tahun pa-64 ni negaranta, Republik Indonesia. So mansoadahon pambahenan ni angka pahlawan naung maneahon hosana laho pajongjonghon negara on, tahaporseai jala taparhatopot do paboa pasupasu ni Debata do kemerdekaanta on. Ala ni i laos sian Ibana do guruhononta manang songon dia hita patut manghangoluhon dohot mangisi kemerdekaan i. Marojahan di turpuk on, adong dua na patut hangoluhononta.
Mamelehon dirinta gabe pelean na mangolu, na badia, na hinalomohon ni Debata. Tu halak Israel na pinalua ni Debata sian parhatobanon ni Misir dipatikhon do, ingkon parbadiaan nasida do di Jahowa nasa buhabajunasida (baoa) dohot buhabaju (tunggal) ni pinahanna. Tanda ni hamauliateon dohot pamelehonon ni dirinasida ma i tu Jahowa naung manobus nasida marhite tanganNa na gogo, naung mamillit nasida gabe bangsoNa jala pangkithonsa gabe anak sihahaanNa (2 Mus.4:22) dohot parjambaranNa (partalian, partohapan, milik pusakaNya; 5 Mus.32:9; 2 Sam.14:16; 21:3; 2 Raj.21:14) Di bagasan Jesus Kristus, ala ni ulaon panobusion dohot haluaon na pinatupaNa, dipabangkit Debata do nang hita gabe na parjolo tubu (patumonaan/anak sulung, Heb.12:23; Jak.1:18) Ala ni i, hita pe, ingkon pelehononta ma dirinta bahen pelean na mangolu, na badia, jala na hinalomohon ni Debata (pat.Rom 12:1).
Di bagasan sondang ni haluaon dohot haanahonta na di bagsan Jesus Kristus i ma hita manjalo dohot manghangoluhon kemerdekaan dohot kewargaanta di Negara Republik Indonesia na tahaholongi on. Manang aha pe na taula, ingkon gabe hasangapon ma i di Debata, bona ni kemerdekaan i.
Pateanhon panidangion taringot tu Debata tu sundut na mangihut. Tu bangso Israel diaturhon Debata do, ingkon torushonon jala pateanhonon nasida do tu pinomparna marsundutsundut panindangion taringot tu Debata na paluahon i. Ingkon ganup sundut do marhatopothon paboa hatoban do ompunasida di Misir, na so margogo mabahen agia aha bahen haluaonna sandiri. Holan ala ni tindakan ni Debata na marhite tanganNa na gogo i do nasida boi ruar, mardalan tu Kanaan, mewarisi tano i, jala gabe bangso na bolon. Songon i, hatoban ni dosa do hita uju i. Ndang adong na tarbahen hita paluahon dirinta. Alai marhite ulaon haluaon na pinatupa ni Debata di bagasan Jesus Kristus malua hita jala sahat tu hajongjonganta nuaeng.
Di bagasan sondang ni haluaon na di bagasan Jesus Kristus i ma hita manjalo kemerdekaan ni bangsonta, Negara Republik Indonesia on jala pateanhon tu angka sundut na mangihut panindangion taringot tu Debata, pateanhon hata dohot patikNa asa gabe tanda na tarida i di pardompahan dohot tangan ni sasude, gabe surat patik na tarjaha di pribadi dohot di ulaon ni ganup sundut. Molo didok pateanhon panindangion taringot tu Debata na paluahon, tarmasuk do tusi na pateanhon hasil ni tindakan haluaon ni Tuhan i, i ma Negara Republik Indonesia i sandiri. Parcuma do hita mamodahon Debata mangalehon kemerdekaan ni bangsonta, hape negara na mardeka i ndang boi be ditanda jala dinikmati nasida ala naung tahancurhon. Negara Republik Indonesia na songon dia do sipateanhononta tu pinomparta? Na maju, na makmur, jala na adil do manang sabalikna, na terpuruk, na pogos, jala na gaor?

jkt.03.08.2009/mvs

Read More..

9 Trinitatis

SERMON JAMITA TU MINGGU 9 DUNG TRINITATIS, 9 AGUSTUS 2009
4 Mus.11:30-35

Patujolo

Nunga marujung be sude ulaon na mardomu tu pangojakhonon ni parpadanan ni Debata tu bangsoNa, Israel.

Paduataonhon, di bulan sipaha dua (4 Mus.10:11), borhat ma nasida si Sinai manuju tu Kanaan. Alai ndang diboto bangso i mandok mauliate, ai hatop do nasida marmungutmungut, gabe marsigorgor rimas ni Debata mida nasida (11:1) Salpu i, manombo ma muse hisap ni halak gambalgambal (bajingan). Ise i? Ra, angka halak sileban na rap ruar dohot halak Israel sian Misir do i (pat.2 Mus.12:38). Ndang dohot nasida nian dijou Debata, alai tartarik nasida mandohoti pardalanan ni Israel laho mangeahi ngolu na tumabo (?). Di na so jumpang nasida i, marungutungut ma nasida. Bali ma muse parungutungutonnasida i tu bangso i, ai gabe luhut ma nasida tumatangis (11:10) manghasiholi juhut (11:13, 18). Ndang parsoadaon, pasti do hurangan nasida di halongonan i. Alai marningot panarihon ni Debata di nasida, ndang ingkon nasida nian marungutungut. Ala ni i ingkon nama nasida hona uhum.
Sudena i menyadarhon si Musa paboa na madokdokhu do di ibana ulaon manguluhon bangso i, ai bangso na tangkang do nasida (2 Mus.33:3, 5) Ala ni dokdokna naeng do ibana mandele (11:15). Diantusi Debata do hoihoi ni si Musa i, gabe dilehon ma tu ibana pangurupi, 70 halak sintua angka na sinonggopanNa marhite TondiNa. Laos dijanjihon ma na gohanNa do na pinarsinta ni bangso i, lehononNa nasida juhut. Alai di bagasan ni i ingkon laos lalu nama tu bangso i uhum ni parungutungutonnasida i, ingkon maradu ruar muesengani juhut i sian igungnanasida jala gialan nasida (11:20).

Hatorangan

Ala naung dapot gogo dohot pangurupion si Musa sian Debata, ndang mabiar be ibana jala ndang mandele. Rap dohot na 70 halak sintua pangurupina i, didapothon ma muse bangso i tu parsaroan i (30) Na marlapatan ma i, di bagasan gogo dohot semangat na imbaru rade ibana muse memikul tanggungjawab manguluhon bangso i di sude situasi dohot kondisi, isara di na manjalo pasupasu mang pe di na manaoni uhum ni Debata, di na laho borhat jala mardalan manang pe di maradian paima sahat tu tano bagabaga i.
Lote, samansam pidong na metmet. Ganup taon, di bulan Maret-April, pinda do pidong i sian Afrika, mangalaosi Laut Rara tu semenanjung Sinai torus tu Palestina, jala mulak muse di bulan September. Ala ni dao dohot ala ni lojana, jotjot do angka lote i mardabuan tu tano laos dipambuati halak laho panganonna. Dison, gejala alam i dipangke Debata do laho mangurupi dohot manguhumi bangsoNa, ai diparo ma alogo mangonjar angka lote i tu parsaroan ni halak Israel. Mansai godang, pola do ditutup sadari mardalan tu sada on, sadari mardalan tu sada an. Sadari mardalan di parhorsihan, sekitar 24-30 KM. Jadi diameter ni inganan na tinutup ni lote na godang i sekitar 48-60 KM humaliang parsaroan ni halak Israel. Timbona dua asta. Saasta, sekitar 45-56 CM. Taringot tusi, adong opat hatorangan. (1). Lote na mardabuan i mansai godang, masidondonan sampe dua asta hapalna. Hurang hona do hatorangan i, ai molo songon i do, pasti do nunga mate angka partoru. Di halak Israel, ndang sipanganon na mate garam songon i. (2) Timbo ni ganup lote, diukur sian ujung ni tuktukna tu ujung ni jarijarina dua asta. Hatorangan i pe hurang do honana. Adong do memang pidong angka na balga di daerah i, alai ndang lote be goar ni i. (3). Timbo ni parhabang ni lote i dua asta sian tano, gabe mura tangkupon marhite jaring. (4). Hasomalan ni halak di inganan i, dung ditangkupi lote i, diseati, diimbului disahei, jala disirai, ditanomhon do tu rihit na mohop i laho pahianghon (songon na mandendeng!). Ala ni godangna, pola do dua asta hapal ni lote i ditanom nasida di rihit i. Ninna roha, humona do na dua hatorangan parpudi i.
Dipapungu halak Israel ma lote i. Adong na papungu godang, adong na otik. Na umotik, 10 homer. Homer, gugun manang tumpuk, ra, ndang sada ukuran na pasti (pat.2 Mus.8:14). Sampulu gugun manang na boha pe nunga mansai godang (magodanghu?) i di sasahalak. Dipatuduhon i do hahisapon manang kerakusan ni halak Israel i, ndang diboto mandok: “Sae.” Dung i dijomur nasida ma i humaliang parsaroan i [(ida hatorangan (4) di ginjang)].
Ndang suda dope dipangan nasida juhut na mansai godang i nunga songgop sahit tu nasida. Ra, akibat logis ni sipanganon i do i. Matompuhu muba sipanganonnasida sian na lembek tu na jogal. Na sai leleng on, Manna do sipanganonnasida. Sipanganon na lembek do i. Nunga terbiasa butuhanasida tu sipanganon i. Alai nuaeng tompu ma muba sipanganonnasida gabe juhut, na pasti jumogal sian Manna. Tole muse, magodanghu. Mansai rahat do sahit i, ai torop do sian nasida na mate. Alai sudena i ndang terlepas sian uhum ni Debata ala ni pangalahonasida na manghahisaphon na roa (pat.1 Kor.10:6)
Dibahen goar ni inganan i tanoman ni hahisapon. Di aslina, kibroth-hattaavah mandok, tanoman ni na hisap, kuburan orang-orang yang dikuasai nafsu. Ndang torang be di tingki on manang na dingkan dia inganan ni i. Adong manduga, Ruweis el Ebeirig do i, sada inganan manang na piga kilometer dingkan irisanna (timur laut) ni dolok Sinai.
Sian i, borhat bangso i tu Hazerot. Adong manduga, El Nain do i, sada inganan na terkenal ala adong disi mata mual (oasis) di bagian timur ni semenanjung Sinai.

Rancangan Homiletis

Suman tu halak Israel na mardalan tu tano Kanaan, Na mardalan do nang hita di portibi on manuju tu paradianan na hot na di lambung ni Debata. Pardalanan na ganjang do i, na maol, gok parungkilon dohot hamaolon. Debata sandiri do na manarihon hita disi. Dilehon do tu hita partogi, angka naung miniahanNa marhite TondiNa; disarihon do ngolunta, haluaon dohot hasonanganta. Ala ni i dijouhon jamita on ma tu hita:
Ihuthon ma angka partogi naung miniahan ni Debata marhite TondiNa. Naeng mandele do si Musa ala ni hatangkangon ni Israel. Songon i, na boi mandele do angka partogi ala ni na tinogihonna. Molo burju angka na tinogihon mangihuthon partogina, gabe gogo do i di partogi i. Lam galak ma Tondi ni Debata naung mian di bagasan ibana, lam marsemangat ibana jala marsitutu. Ala ni i, ganup na tinogihon ndang boi holan na manghirim aha sibahenon ni partogina tu dirina, alai ingkon dohot do mamingkirhon aha sibahenonna margogoihon partogina.
Unang marungutungut manghahisaphon na roa. Taringot tu parmungutmungut didok do di surat Judas: “I ma angka parmungutmungut, angka siburai soro ni arina, alai huhut diulahon hahisaponnasida, dihatahon pamangannasida do hata manggang, jumpa mangellemellem marhata dompak, mambuat laba sian i.” (Jud.1:16) Songon i do halak Israel di jamita on, ndang dihasonanghon keadaan, dihahisaphon na roa, ndang jujur ai didok, tumabo do di Misir (11:5). Jolma siparmungutmungut, ndang hea i merasa puas, ai sai pingkiranna do dipatujolo. Jolma sisongon i mansai talpe do i tu uhum.
Marhitehite caraNa sandiri do Debata paluahon hita, ndang marhitehite caranta. Mansai jotjot do hita manangianghon pangidoan: “Sai saut ma lomo ni rohaM.” Alai di na manangianghon i jarang do sadalan roha dohot bibirta. Di na martangiang hita, jotjot do ndang laho rohanta mangido apala na taharingkothon, alai taalami do muse na dipatuk Debata do i sian lomoNa. Sabalikna, jotjot do hita mangido sesuatu, hape balikna do na ro. Diungutunguthon halak Israel do dison juhut, hape so hea i ditangianghon nasida. Konsekuensina, hamatean ni natorop. Jotjot do pasupasu ni Debata rap mardalan dohot uhumna. Na boi masa do i molo diparsineang jolma i asi ni rohaNa jala sai didatdati pahehe rimasNa. Tasuanhon ma tu rohanta be selaku sada hasintongan na so tarsengsang paboa, tumangkas do di Debata na tahalungunhon dari pada di hita sandiri, umboto do Ibana di parguna (kebutuhan) ni ngolunta dari pada hita sandiri, tumongtong do Ibana manangihon hita dari pada hita martangiang tu Ibana, jala rade do Ibana mangalehon lobi sian na tahirim jala tapangido. Naeng di bagasan na mamuji jala mandok mauliate ma rohanta manjalo i.

jkt.28.07.2009/mvs

Read More..