2 Trinitatis

SERMON JAMITA TU MINGGU 2 TRINITATIS, 09 JUNI 2013

Luk.7:11-17

Patujolo

Sian Evangelium Johanes torang, dipungka Jesus do ulaonNa di tonga ni Israel tongon andorang so sada Pesta Paskah (pat.Joh.2:13). Mangihuthon angka sipatorang hata ni Debata (penafsir), Pesta Paskah taon 27 AD do i. Ihut ma tusi na ginoar tingki pangulaon di luat Judea ombas na parjolo (Early Judean Ministry). Ndang apala ganjang tingki i, jempek do. Dung i mangihut ma muse tingki pangulaon di luat Galilea ombas na parjolo (Early Galilean Ministry). Dua taon do leleng ni panghobasion i, sahat tu Paskah 29 AD. Disi ma masa jamita on, di taonna na paduahon, di pudi ni Paskah 28 AD. Sian na opat panurat ni Barita Nauli i, holan Evangelis Lukas do paboahon na masa on. Angkup ni i, di evangeliumna i ditambahon ibana dope barita panunggulion ni boru ni si Jairus, naung parjolo binaritahon ni si Markus (ida Luk.8:40-56; pat.Mrk.5:21-43). Di halak Jahudi, ndang na imbaru barita sisongon i, ai naung hea masa do i di Padan Narobi pola tolu hali (pat.1 Raj.17:17-24; 2 Raj.4:18-37; 13:21). Songon sahalak na manurat tu halak Kristen na marharoroan sian na leban, ndang haboratan pola si Lukas paboahon barita na songon i, ai di angka bangso na leban pe adong do angka barita sisongon i. Marhitehite i naeng hatindanghononna do paboa, nunga songgop be Harajaon ni Debata. Di bagasan Jesus Kristus do i songgop, ai Ibana do Mesias na pinarbagabaga i (pat.Mat.11:4; Mrk.7:22)     

            Hatorangan

Nain, sada huta di luat Galilea, di parbalohan ni marga Isakhar; marhira 10 KM dingkan anggoni ni huta Nasaret, 30 KM di nariti ni Kapernaum. Mansai uli parpeakna di robean ni Hermon Nametmet, donok tu dolok Tabor. Hombar tusi digoar ma i Nain, lapatanna na jagar/yang manis. [Tartanda dope pasipasi ni huta i di tingki paprpudi on, i ma sada huta (hamlet=dusun) na metmet na marhapeahan di suhisuhi parmanabia ni sada dolok na margoar Jebel et Duhy. Rap maringan do nuaeng disi halak Jahudi, halak Kristen dohot halak Silom.] Mulak sian Paskah 28 AD (ida di Patujolo), dung mangula sangombas di huta Kapernaum laho do Jesus dohot angka siseanNa tu Nain. Mangihuthon Mat.9:35, memang, songon i do metode panghobasion ni Jesus Kristus i, sai mardalani do Ibana mangaliati angka huta dohot angka sosor, mangajari di angka parguruannasida laho manurasihon Barita Nauli. Ala naung di taon paduahon na masa on, ndang holan na sampuludua i be na porsea di Jesus i, nunga lam torop. Luhutna i ma angka na ginoar siseanNa (sisean dalam arti yang luas), angka na ringgas rohana paihutihuthon Ibana. Angkup ni i, adong dope angka panonton manang pangihutihut sambing. Songon i ma di pardalananNa laho tu Nain i, torop do na mangudurhon Tuhan i.

Mandapothon bahal ni huta i, pajumpang do nasida dohot odoran ni na mangusung na mate tu balian laho mananom. Huta ni halak Israel, somalna dihaliangi parik (tembok) do, na dipature laho mangondingi nasida sian musu. Dalannasida laho ruar dohot laho bongot, dibahen ma sada harbangan. Asing ni raja (pat.2 Raj.21:18) dohot panguhum (pat.1 Sam.28:3), ndang dipaloas tanomon na mate di bagasan parik ni huta, ingkon di balianna do. Aturan na songon i, marlangku do di Nain. Songon i ma di jamita on, tongon ditaruhon halak Nain do sahalak na mate tu parbandaan. Tongon apala di bahal (Gr.pulee, gate, pintu gerbang, harbangan) ni huta i, pajumpang ma nasida dohot Jesus. Torang do dipaboa taringot tu hadirion ni na monding i. Dolidoli (ay.14) dope ibana. Hata Gorik ni dolidoli na dipangke dison, i ma neaniskos (young man, laki-laki muda) lapatanna, baoa naposo (na marumur 24-40 taon); boi naung mangoli, alai boi na so mangoli dope. Dison, godangan do kemungkinanna na so mangoli dope, ai aut naung mangoli ndang tagamon so pardihutana na manghabaluhon i taringotanna. Anak sasada (Gr.monogenees huios, only son, anak tunggal) ni sada ina naung mabalu (Gr.cheera, widow, janda) do ibana. Dipatuduhon i do manang boha ngotngot ni na masa i. Di hadolidolionna (haposoonna) do tardok puncak ni hagogoon ni sasahalak. Ala ni i, ninna roha, manang ise pe halakna ndang tagamon so mansai ngotngot panghilalaanna mambayanghon molo ingkon mate ibana di haposoonna, ponggol di puncak ni hagogoonna. Jala molo tutu masa na songon i, ndang tagamon so ngotngot i di na tinadinghonna. Songon i ma na di jamita on, mansai ngotngot do hamamate ni dolidoli i di inana. Ngotngot do i di pardagingon, ai di anak sasadana i hian nama peak ni panghirimanna taringot tu ari hatutuana. Mansai ngotngot do i huhut di partondion, ai marhite anak sasadana i hian nama nian parsidohotonna di panghirimon ni Israel. Songon na taboto, na manghirim do Israel di haroro ni Messias na pinarbagabaga i. Ia dung ro Ibana, pajongjongonNa ma Harajaon Jahudi Messianis na meliputi sandok portibi on, na pasurunghon halak Jahudi gabe angka wargana na utama. Tontu do, ndang sude halak na sahat tusi. Nang pe songon i, tarapul do roha ni ganup jala manghilala na parsidohot do ibana di harajaon i marhitehite pinomparna. Tu sangkap i, ingkon adong do anakhonna, ai ndang sian dia halak marpinompar molo na pupur do ibana, na so maranak jala na so marboru. Ala ni i, mansai paet do panghilalaan ni halak Israel na pupur, ai na marlapatan do i na so parsidohot ibana di panghirimon ni Israel. Lobi sian i tahe, hira na so dilayakkan do ibana jala ndang dipaloas mewarisi harajaon i. Apala i ma nuaeng na manggopgop di roha ni ina na mabalu na di jamita on, gotap sude panghirimanna taringot tu ari hatutuana dohot taringot tu masa depan ni Israel. Angkup ni i, adong dope na mandondoni roha ni parompuan i, i ma pandangan umum na sala taringot tu hamatean ni dolidoli. Adong do anggapan di masyarakat Jahudi, ia mate poso sasahalak, uhum ni Debata do i tu natorasna ala ni dosana na tertentu. Sude ma i solpa tu ateatena, na marhapusasan di tangisna. Natorop i pe, pangisi ni huta Nain na mandongani ibana, ndang tagamon so dohot manghilala disi.

Marnida ina na mabalu i Tuhan i, maras do rohaNa. Maras (Gr.esplangchnistee, he had compassion, tergerak oleh belas kasihan). Nunga gabe jolma situtu Ibana, na tarbahen manghilala di angka hagaleon ni hajolmaon (pat.Heb.4:15) Alai ndang holan manghilala manang larut dalam kesedihan tanpa dapat berbuat apa-apa, ndang. Adong, jala diboto do sibahenonNa laho mambuat na hansit i. Didok ma tu  natoras ni na monding i, “Unang ho tangis!” Na nidokNa, unang sai datdati be, alai pasohot ma na tumatangis i. Mura do i dohonon, alai ndang na mura i pasingothonon. Alai Tuhanta Jesus boi do pasingothon i, ai – sahali nari – adong, jala diboto do sibahenonNa laho mambuat arsak ni parompuan i.

Didapothon ma batang i, dijama ma, jadi sulon ma na mangusungsa. Batang (Gr.sorou, bier, usungan) Ndang marbatang na mate di halak Jahudi, holan marpangalilit (kapan) do. Somalna nian, molo pajumpang na mangolu dohot siusung na mate, manang ala ni biarna ma i manang ala ni hormatna, na mangolu i do sumisi jala paloashon arak-arakan hamatean i mardalan so haambatan tu haroburan. Alai dison, di na pajumpang dohot Raja Nihangoluan i, arak-arakan hamatean i do na ingkon sulon. Ndang adong na tarbahen hamatean i tu Raja Nihangoluan i. Mangihuthon patik ni Jahudi nian, sitongka do jamaon na mate. Agia paheanna, songon i dohot usunganna, ai molo dijama i, gabe ramun do na manjama i. Angka na manghobasi na mate i rupani, na mangusung dohot na mananomsa, gabe ramun do nasida, jala ingkon jolo ulahononnasida do serangkaian pangurasion asa malua sian haramun i. Ndang adong biar ni Jesus disi, ai ndang haramunan hamatean i Ibana. Laos didok ma, “O Dolidoli, Hudok ma tu ho, hehe ma ho!” Hehe (Gr.egertheeti, arise, bangun). Sada istilah kedokteran do i tu halak na marsahit na gabe malum. Ndang ummaol di Ibana pahehehon na mate asa tu hangoluan sian na pahehehon na marsahit asa tu hamalumon.

Paboa naung hehe (mangolu) dolidoli i, hundul ma ibana jala dipungka manghatai; dung i, dipasahat Tuhan i ma ibana tu inana. Marujung ma arsak ni parompuan i, mulak muse panghirimanna taringot ari hatutuana dohot tartingot tu panghirimon ni Israel.

Marnida na masa i, songgop ma sada biar tu sude (Gr.elaben de fobos pantas, and there came a fear on all). Biar, reaksi na somal do i sian parbanua tonga maradophon parbanua ginjang. Manang di dia Debata hadir jala pajumpanghon diriNa tu jolma, sai digohi biar do jolma i (pat.1 Mus.3:10; Jes.6:5; Luk.2:9) Songon i do dison, marhite na masa i nalnal do tarida hadebataon ni Jesus i, gabe hatahuton ma natorop i. Alai ndang hatahuton na mangonjarhon tu hamagoan manang tu pandelean gabe maporus sian Ibana, sabalikna do tahe mangonjar tu pamujion do di Debata, ai gabe didok nasida ma, “Panurirang Bolon do dipahehe di tongatonganta jala ditatap Debata do bangsoNa.” Dia do na nidoknasida disi? Di angka abad parpudi ni tarikh sebelum masehi, sange do halak Jahudi mandok naung marujung tingki ni panurirangon. Na marlapatan ma i, ndang  paheheon ni Debata be panurirang songon sinajolo i, si Maleaki nama na parpudi. Dungkon ni i, panurirang di zaman na eskhatologis i nama sipaimaonnasida, na songon si Musa (5 Mus.18:15, 18), sipatindangon ni Jahowa hombar tu bagabaga pangusehonNa di TondiNa (Joel 3:1 duu) Di ombas na so ada panurirang i, maheu jala marhoi do roha ni bangso i. Songon na lam marnginging do di pinggolnasida hoihoi ni parpsalmen i na mandok, “Ndang huida hami be angka partinandaannami, ndang adong be panurirang, ndang adong sian hami na umboto manang na sadia leleng on.” (Ps.74:9) Sadalan tusi, lam masihol ma rohanasida di haroro ni panurirang i. Nuaeng, di diri ni Jesus i, songon na dibereng natorop i do panggohion ni bagabaga i. Didok rohanasida ma, molo nunga songon i leleng tingki ni na so ada panurirang, hape tompu hehe nuaeng sahalak, ndang boi so ingkon naung songgop tingki na eskhatologis i. Tutu, ndang apala sian pangantusionna na tangkas dope i didok, godangan dope sian emosina na tersentuh. Huria na di Padan Naimbaru do na tangkas umboto i. Di nasida, Jesus na targoar huhut panurirang ndang dirajumi sebarisan dohot angka panurirang di Padan Narobi, Panurirang Bolon do, na umboto jala na mamboan hasintongan dohot lomo ni roha ni Debata. Na sinonggopan ni Tondi ni Tuhan Jahowa do Ibana (Luk.4:18 duu); Ibana do Kristus i. Jamita dohot angka tanda na pinatupaNa nunga lobi sian na cukup i mambuktihon paboa Ibana do Raja na Pinarbagabaga i, na di bagasan dohot marhitehitehon Ibana sandiri hadir laho manatap bangsoNa (pat. Luk.1:68), laho sumondangi angka na hundul di bagasan haholomon (linggom ni hamatean, bayangan maut/kematian; pat.Luk. 1:69) Ditatap, humona ditopot (Gr.epeskepsato, had visited, dikunjungi/diindahkan). Di deba naskah (MSS) ditambahon dope tu ayat on eis agathon (for good). Sipata antong, ditopot Debata do bangsoNa laho manguhumi manang laho manudahon angka pangalaosi. Alai dison, bahen hadengganon ni bangsoNa do Ibana ro, laho manolongi dohot paluahon.                

Manang di dia pe Jesus patupa tanda halongangan, pintor gabe barita do i. Songon i ma tong dison, sar do barita i. Ndang holan di Galilea, alai sahat do tu Judea dohot tu angka luat na humaliang.

            Rancangan Homiletis

“Ditatap Debata do bangsoNa.” I do kesimpulan ni natorop di jamita on dung diida nasida tanda na balga na pinatupa ni Jesus. Ditatap lapatanna, ditopot, dilawat, dikunjungi, diindahkan. Pangalaho na luar biasa do i, na dihirim mamboan lan pasupasu na hombar tu na hinirim ni rohanasida. Sadalan tusi, na gabe Barita Nauli do i na manubuhon halalas ni roha. Ndang holan di di Jahudi na satingki dohot Jesus i marlangku, dohot do di hita. Hombar tusi, laos i ma na gabe impola ni Barita Nauli ni jamita ari on di hita: Ditopot Debata do hita di bagasan Jesus Kristus. Tu dia hita ditopot, jala aha do sangkap dohot tujuan ni panopotonNa i? Tauji ma mangalusi i marojahan tu turpuk on.

Ditopot do hita di pardalananta tu hamatean. Di harbangan ni huta Nain, pajumpang do Tuhanta Jesus Raja Nihangoluan i dohot sada pawai kematian, sada iring-iringan manang arak-arakan menuju maut. Sude do pangisi ni huta i terlibat di pardalanan hamatean i. Boha pe pandok ni sasahalak taringot dolidoli i dohot taringot tu inana, anggo na pasti, sabarisan do nasida sude; rap ambil bagian di pawai kematian i. Ndang na kebetulan, alai na masa do parjumpangan i sian tahi ni Debata; masa marpardomuan tu panopotonNa di bangsoNa.

Gombaran ni pardalanan ni ngolunta do odoran ni pangisi ni Nain i. Ndang panonton hita di ruar ni barisan i, alai tung luhut do hita terlibat disi. Portibinta ndang lobi be sian gombaran ni proses menuju maut na berlangsung setiap saat, torus manorus paima ro ari parpudi. Na rap do hita disi apala luhut. Sadasada, dung i sude ingkon mate; marsijoloi, alai ndang adong na lias. Molo disoro hamatean i sasahalak, disonggoti jala dipatuduhon do paboa naung di toru ni huaso jala tarihot di belengguna do angka halak na tinggal dope di tano ni halak na mangolu na hapogan patupahon angka ulaon na memilukan, i ma na manghobasi na mardomu tu pananomon ni na mate i, dung i borhat di bagasan odoran hamatean tu tanoman, tu besteng ni hamatean i. Songon i ma hita saling menguburkan; angka na mate na mananom na mate (Mat.8:22). Saonari, hita on mananom; dung i marsogot, hita ditanom. Golap situtu, mengerikan. Adong dope sihirimon? Adong dope, ai nunga ro Jesus Kristus. Di bagasan dohot marhite Ibana, Debata sandiri ro manopot hita tu pardalananta manuju hamatean i. Laho marhua? Tapamanat ma i di na mangihut on.

Ditopot laho paubahon pardalananta asa tu hangoluan salelengna. Pajumpang dohot pawai hamatean i diboto Jesus do sibahenonNa. Sian asi ni rohaNa, diapuli ma jolo ina na tilahaon i, dung i dipaso arak-arakan hamatean i, dipahehe dolidoli i, jala dilehon tu inana. Marhite i mangantusi ma natorop i naung ditopot Debata do hape bangsoNa jala dipasonggop zaman na eskhatologis laho sumondangi jala patongonhon langkanasida tu dalan hangoluan. Muba ma nuaeng pawai hamatean i gabe pawai las ni roha ni angka na mardalan di dalan tu hangoluan.    

Songon i ma pangalahona, marhite panopoton ni Debata di bagasan Jesus Kristus, pawai kematian diharuskan meminggir secara tak terhormat, jala arak-arakan hangoluan maju di bagasan keangungan. Na mangula do Jesus Kristus Raja Nihangoluan i mensegerakan karya penyelamatanNya. Ndang pola ditaringoti jolo dosa dohot haporseaon ni ina na tilahaon i, alai langsung do Ibana bertindak, ai penghancuran ni huaso ni hamatean i ndang boi dipabenda. Olo, songon i do tangga parjolo ni ulaonNa na pasohot hamatean i. Ai ala ni haporseaonta umbahen na ro Ibana manopot hita, manang ala ni hasintonganta umbahen na dipatupa haluaonta di silang i? Diboto do hita pardosa, angka na mago na so umboto mutmut ni hatigoran dohot hasintongan. Hape apala di tingki pardosaon dohot hamagoanta i do Ibana mate paluahon hita. Marhite hamamate na diihuthon haheheoNa i dipasohot Ibana hamateanta, dipaullop hangoluan dohot hatongtongon di hita. Alai dung dipatupa i, tarjou do hita tu na manghaporseai. Marhite haporseaon i, tarbahen dohot jala mardalan ma hita di pawai hamonangan, di arak-arakan hangoluan na manuju hutaNa, na gok halalas ni roha dohot pamujion di Debata. Malua ma hita huhut sian biar ni roha mida hamatean, lupa di hajorbuton ni batang, di hinabagas ni tanoman dohot di hinatimbo ni hinambor.   

jkt.03.06.2013/mvs