4 Trinitatis

SERMON JAMITA TU MINGGU 4 TRINITATIS, 23 JUNI 2013

Mat.10:16-22

Patujolo

Umumna, ditanda halak do bindu on songon jamita parsuruon ni Jesus di na paborhathon siseanNa laho mamaritahon Barita Nauli na taringot tu hasosonggop ni Harjaon ni Debata (ay.7) tu halak Israel (ay.5-6; pat.Luk.9:6). Alai ia pinamanat, umbidang sian parsuruon na sahali i do do hinamhamna. Tangkasna, na marhahonaan do i tu tugas haapostelon ni sisean i (na diuduti dohot tugas haapostelon ni huria) tu sandok oikoumene. Rupani, nunga ditaringoti disi paraloan sian Jahudi, sian angka raja dohot sian angka sisolhot. Luhutna i ndang masa dope di parsuruon na sahali i, di pudi ni Pentakoste pe i masa. Asa, hombar tu bangko ni si Mateus songon penulis na sistematis, na marrumang hadomuan ni tona ni Jesus tu angka siseanNa do bindu on. Bagian manang unsur-unsur ni jamita i, dihatahon do i di tingki dohot inganan na paasingasing. Di pudian ni ari, mamangke jamita parsuruon na parjolo i songon kerangka pokokna, disadur si Mateus ma i gabe sada jamita na utuh songon na tarjaha di bindu 10 on.   

           

Hatorangan

Didok Jesus, “Husuru do hamu songon birubiru tu tongatonga ni angka babiat.”  Babiat, sasintongna antuasu (Gr.lukos, wolf, serigala) Molo dipertentangkan dison birubiru tu angka antuasu, parjolo sahali na naeng manggombarhon balga ni parmaraan siadopan ni sisean i do i. Gumale do birubiru marimbanghon antuasu, ai gumogo do i jala gumarang. Songon i, gale do sisean i marimbanghon angka alona. Borhat do nasida so marsinjata, ndang adong hagogoon dohot huasona. Hape angka alo i, adong do sinjatana jala sai boi mamangke huaso dohot hagogoon portibi on. Ala ni i, tarmara situtu do ngolu ni sisean i. Antong, boha ma bahenon nasida mangadopi i? Jesus mandok, “Pantas ma hamu marroha songon ulok, huhut lidang ma rohamuna songon darapati.” Pantas (Gr.fronimoi, wise, bijaksana/cerdik, bisuk). Boasa pola tu ulok ditudoshon? Na marpardomuan do i tu anggapan ni 1 Mus.3:1 na mandok, “Ulok do na umbisuk sian nasa na manggulmit di ladang angka na jindihon ni Debata Jahowa.” Di ‘habisuhon’ i do ondolan ni sipaingot i, ndada di ‘ulok’ i, ai aut disi, ‘licik’ do na hona tusi. Mardomu tusi ma antusan sipaingot na paduahon, lidang ma rohamuna songon darapati. Lidang (Gr.akeraioi, harmless, tulus/ polos) lapatanna, ias, bebas sian hasalaan maradophon diri sandiri, maradophon dongan dohot musu, songon i maradophon Tuhan na marsuru i. Sisada hasadaon do na dua i. Ndang sae holan bisuk, ingkon huhut do lidang. Rupani, boha pe jorbut ni na masa, di sadasada tingki ingkon do na porsea i martahan; molo maporus, sala. Alai di tingki na asing, denggan do maporus (pat.ay.23); molo martahan dos dohot na manjukjukhon diri tu hamatean jala gabe korban na so marguna (?!). Antong, sadihari ma ingkon martahan, jala sadihari muse ma na ingkon maporus, habisuhon i do na tuk manimbangi dohot na mamutushon i. Tiruan na asing, di jolo ni Kapten Lisias (Ul.24:22), diandalhon Apostel Paulus do kewarganegaraanna laho paluahon dirina sian paraloan; hape di Pilippi, ndang (Ul.16:20 duu). Boasa? Ba songon i ma haputusan ni habisuhonna i. Jadi boi ma nuaeng simpulhonon, sipaingot na mandok pantas marroha songon ulok jala lidang songon darapati lapatanna, marusaho pasidinghon dohot mangalo manang manaon angka sitaonon dohot ragam ni tantangan tanpa mengorbankan prinsip haporseaon jala ndang tarramun binahen ni dosa dohot hasalaan.

Di ay.17a, ditambahon dope sada nari sikap na ringkot hangoluhonon ni na porsea i di na mangadopi angka antuasu, didok, “Jaga ma hamu di angka jolma.” Jaga (Gr.prosechete, beware, berhati-hati/waspada terhadap) Ndang sude jolma haporseaan, alai ndang sude ingkon curigaan. Di bagasan habisuhon ingkon manat do mananda ise dongan, ise na so haru dongan (antuasu na marrupahon birubiru), jala ise antuasu. Ise do tutu alo i? I ma angka jolma. Torop do Jahudi na manghasogohon Barita Nauli na taringot tu harajaon i. Sogo ni rohana i dihonahon do tu sisean i. Lam tu bahatna na manghasogohon, gabe meningkat ma paraloan sian pribadi tu Jahudi kesatuan marhite angka lembagana. Hombar tusi ma didok, “Pasahatonna do hamu tu angka paruhuman jala linsinganna do hamu di angka parguruannasida.” Dua ragam do paruhuman i. Na parjolo, pengadilan setempat. Di ganup huta ni halak Israel dipajongjong do badan peradilan agama setempat na tardiri sian angka natuatua (majelis orang-orang tua). Na marfungsi jala na marwewenang do nasida manguhumi parkaro ni angka na tartuhas mangalaosi adat (tradisi) dohot ugamo (patik dohot haporseaon) Jahudi. (Alai ingot, sude ngolu ni halak Israel parugamoon do). Marria do paruhuman i di Sinagoge (parguruan) jala marhuaso mandabuhon uhum linsing (cambuk/sesah). Tu ganup pangalaosion, somal do didabuhon opatpulu linsing (5 Mus.25:1 duu). Alai di pelaksanaanna, ndang hea i sahat tu na sai, sintap ni tolupulusia hali do. Alasanna, so tung sala mamilang, gabe dilaosi maon na nidok ni patik i (pat.2 Kor.11:24). Songon i ma sisean i; panindangionnasida dirajumi do songon pangalaosion tu adat dohot ugamo Jahudi, gabe dilinsingi di angka parguruan. Si Paulus, dialami do na songon i sampe lima hali. Paruhuman paduahon, Rapot Godang. Angka pangalaosion na dirajumi umbalga (isara pangaleaion tu Debata), diuhumi do i di Rapot Godang (Majelis Besar/Sanhedrin) na di huta Jerusalem. Pitupulusada halak do ruasna (tarmasuk uluanna, Sintua Nimalim) na tardiri sian angka malim, pangituai dohot sibotosurat. Marhuaso do rapot i mandabuhon uhuman mate (Ingot paruhuman tu Jesus, Mat.26:59 duu par). Panindangion ni sisean i dirajumi do songon pangalaosion na balga, na patut uhuman di Rapot Godang (pat.Ul.4:5 duu; 5:27 duu; 6:12-7:60; 23:1 duu). Jadi tangkasna, adopan ni sisean i do paraloan sian huria manang agama resmi.    

Di ay.18 diondolhon, lam tu bidangna do paraloan i, ai didok, “Toguon nasida do hamu tu jolo ni angka pangomgomi dohot tu jolo ni angka raja ala ni Ahu ...”  Panggomgomi (Gr.heegemonas, governors, wali negeri/penguasa), i ma na mewakili Kekaisaran Rom di sadasada luat (pat.Ul.24:1 duu; 25:1 duu). Dung i, angka raja. Na nidokna dua. Parjolo, Raja Negeri, i ma raja takluk ni Imperium Romanum isara Herodes Agrippa (pat.Ul.12: 1 duu; 23:13-26:1 duu). Paduahon, kesar. (Si Paulus, ala ni pangidoanna sandiri, tarboan do sahat tu paruhuman ni kesar; Ul.25:11; 26:32; 27:1-28:1 duu). Jadi, negara manang  pamarenta jotjot do gabe alo ni sisean i. Sipata tahe, marsada do angka alo i, rap mangula mangambati harararat ni Barita Nauli i. Sejarah Sending dohot Jamita Huria nunga cukup mambuktihon i. Masa pe i sude, nda tung so martujuan manang marlapatan. Taringot tusi didok Jesus do, “Bahen panindangion tu nasida dohot tu angka sipelebegu.” Gabe sada kesempatan na uli do paruhuman i di nasida laho manghatindanghon goar ni Kristus i. Pangaleleon na nialaman ni huria i do na manghorhon hatop rarat Barita Nauli tu Samaria (pat.Ul.8:4 duu) torus tu Penisia, tu Pulo Kipros dohot tu Antiokia (pat.Ul.11:19). Di ombas pangaleleon pe, mardalan torus do ulaon pamaritahon di Barita Nauli i. Tarhurung pe angka apostel, tarrante manang sahat tu na tarbunu, Barita Nauli na binaritahonna i ndang tarrante jala ndang tarbunu agia ise pe.

Di ay.19-20 dibagabagahon Jesus do pangajari di sisean i. Ingkon maralus do nasida di angka paruhuman. Ndang asal alus (isara pollung tubu manang silat lidah) na diulahon dalam rangka usaha mangondingi dohot paluahon dirina, ndang! Ingkon alus na pantas do jala na marguna, alus panindangion (ay.18) Taringot tusi ndang ringkot nasida holsoan, ai ajarhonon ni Tondi ni Ama i (Tondi Porbadia) do tu nasida hata na patut sihatahononna. Ndang pejuang na tersendiri nasida. Manang di gogo, songon i di pingkiran, adong do donganna; pargogo, pangajari, pandongani jala pangondianna. Tutu do, dighohi do i di nasida; digohi di si Petrus, di si Stefanus dohot di si Paulus (pat.Ul.4:8; 6:10; 1 Kor.2:4) Tondi i do tahe na marturasi, holan ulaulana do nasida.

Di ay.21-22 angkup ni angka naung ditaringoti di jolo (ay.17-18), ditaringoti Jesus dope ragam ni angka na boi gabe alo di ulaon panindangion i. Boi do i haha, boi ama, boi anak. Na marlapatan ma i, pardomuan na ojak di parmudaron manang hubungan genealogis ndang boi non i andalhononhon. Ndang tanggung-tanggung paraloan i, ai na boi sahat do i tu bunubunu hosa: Haha pabunuhon anggina, amaama pabunuhon anakna manang anak pabunuhon amana. Lobi sian i tahe, luhut jolma boi gabe alo na manghosomi. Dihosomi ndang ala ni hajahaton manang ala ni hasalaan maradophon uhum na tertentu, alai holan ala ni goar ni Tuhan i do, ala ni pangihuthonna di Ibana. Ala ni i sandok tarmara do ngolu ni angka na porsea i, talpe tu hamatean, ai manang di dia pe di portibi on mansai jonok do hosom tu pamunuon (pat.1 Joh.3:15) Apala disi ma ringkot habengeton dohot hatauon, ai na manahan ro di ujung, i do paluaonNa. Sadihari do ujung i? Boi dua: Na parjolo, ujung ni ngolu (mate martir manang mate wajar); na paduahon, ujung ni saluhut (akhir zaman).     

 

            Rancangan Homiletis

Sada sian angka jamita parsuruon ni Tuhan Jesus tu angka siseanNa do turpuk on. Mansai tangkas do i sian ayatna na parjolo na mandok, “Husuru do hamu ...” Pesan parsuruon i, mulakulak do dihatahon tu sisean i.  Laos i do muse na gabe identitas ni sisean i, ai gabe targoar do nasida apostel, lapatanna na sinuru mamaritahon Barita Nauli na taringot tu hasosonggop ni Harajaon ni Debata. Parsuruon i ditorushon do tu huria sepanjang abad, tarmasuk hita angka na mangolu di tingki on dohot di inganan on.  Dihalomohon rohaNa do asa taoloi i sian nasa rohanta. Apala i ma nuaeng na jinouhon ni jamita on tu hita, asa taoloi parsuru ni Jesus i.

Taringot tu parsuruon i, ndang marsibuni Tuhan i, alai patar do dipabotohon risikona. Ingkon adopan nasida do paraloan sian pribadi, sian penguasa dohot kekuasaan ni ugamo manang institusi keagamaan resmi, sian oknum ni panggomgomi, sian negara dohot lembaga manang aparatna. Lobi sian i tahe, adopan nasida do i sian angka na solhot di parmudaron, isara haha, ama manang anak. Ala ni i, sandok tarmara do ngolunasida, hira birtubiru di tongatonga ni angka antuasu. Sintong do i, ai dilelei halak Jahudi do huria na parjolo i, dipaporsukporsuk di Harajaon Rom. Alai ndang tuk angka i mangintopi Barita Nauli i. Sabalikna do tahe, na gabe ulaula panindangion do i na marpanghorhon tu harararat ni Harajaon ni Debata. Suman tusi, hita angka na pinadohot ni Tuhan i di parsuruon i, ndang sai malua sian paraloan sisongon i. Boi do i ro sian halak marsadasada, sian masyarakat, sian parugamo na asing manang sian negara. Nda i na nialaman ni angka donganta di deba inganan nuaeng di Indonesia on? Adong na digugai marminggu, dirarang marpesta Natal, ndang dipaloas pajongjong gareja, naung jongjong tahe dirumpakhon, dohot angka na asing. Bahkan sangat mengejutkan, ro do deba paraloan sian bagasan, sian lingkungan Kristen manang huria. Di paraloan na niadopan ni angka donganta na di Bekasi rupani, adong do sian ruas dohot parhalado ni huria na patubegehon komentar na menyudutkan, isara na mandok, “Mereka itu terlalu berani, tidak punya tenggang rasa, mengganggu ketentraman lingkungan,” dohot na asing. Sian halak Kristen sandiri adong do na  menyalahkan Romo Prof. Franz Magnis Suseno ala ni surat protesna tu The Appeal of Concience Foundation na mangalehon World Statesman Award tu Presiden Susilo Bambang Yudoyono marningot “jasa-jasanya pamajuhon toleransi antar umat beragama di Indonesia.” Didok rupani, “Pernyataam Franz Magnis Suseno melukai hati umat Katolik di Indonesia,” na asing, “Franz Magnis Suseno harus cabut pernyataan,” jala na asing muse, “Harusnya Komnas HAM panggil Franz Magnis.” Hape manang ise pe halakna, molo na jujur do ibana tu dirina dohot tu hasintongan ndang tagamon so parhatutuonna na so adong agia aha na binahen ni Presiden Susilo Bambang Yudoyono manumpahi kerukunan antar umat beragama di Indonesia. Unang hita mandele, ai di angka paraloan pe ndang gabe so pardalan ni Barita Nauli i. Sabalikna do tahe, di angka paraloan i gabe boi do humatop. Tarhurung jala tarrante pe parbarita na uli, anggo Evangelium i ndang haotapan. Songon mataniari do i, sanga binsar ndang tarsongsong jala ndang haotapan. Nda mudar ni na mate martir do boni ni huria i?

Di paraloan i mura do halak tarunjun jala madabu tu bagasan pandelean dohot tu dosa. Kecenderungan pasidinghon tantangan dohot paluahon dirina sian angka parmaraan boi mangonjarhon halak tu pambahenan na maralo tu hakiki ni parsuruon dohot tondi ni barita na binaritahonna i. Hombar tusi dipodai Jesus do siseanNa i asa pantas marroha songon ulok, lidang songon darapati; jaga di angka jolma jala manahan ro di ujung. Songon i ma hita angka na pinadohot ni Debata di ulaon parsuruon i di tingki on, ingkon pantas do hita jala lidang di ngolunta. Pantas mandok, marbisuk manang bijaksana (ndang licik); lidang, lapatanna ias, bebas sian tindakan na sala, jala setia tu hasintongan ni Barita Nauli i. Ndang sisirangon na dua sipaingot i, ai sisada hasadaon do i. Dipaingothon i do tu hita asa marusaho pasidinghon, mangalo manang manaonhon angka tantangan dohot sitaonon tanpa menggorbankan prinsip haporseaon jala unang tarramun binahen ni dosa manang hasalaan. Marbisuk ndada na mandok ingkon martahan manang menyerah tu sitaonon, sipata do ingkon maporus; sabalikna, ndang ingkon maporus, sipata ingkon martahan do jala pasrah. Habisuhon dohot halidangon i ringkot do mamangke daya ni utokutok laho manangkasi dohot menilai situasi asa boi mambuat haputusan na topet, martahan do manang maporus. Molo martahan jala mangalo ndada sai na marlapatan i na ‘bunu diri’; sabalikna molo maporus ndang sai na mandok naung ‘marbalik’ (murtad) molo i do haputusan ni habisuhon dohot halidangonna. Ndang sai dos haputusan ni habisuhon dohot halidangon i di na mangadopi masalah na sarupa di situasi dohot kondisi na marasing. Rupani, na boi marasing do haputusan na binuat ni angka na pantas di abad-I tu na binuat ni angka na lidang di abad-XXI di na mangadopi pangaleleon. Alai molo marasing pe rumangna, ingkon di bagasan halidangon do, ingkon bebas sian hasalaan.

Ndang pejuang na tersendiri sisean i. Manang di dia jala sadihari pe, tongtong do adong donganna. Manang di gogo, songon i di pingkiran, Tondi ni Debata tongtong do i gabe gogona, panogunogu, pangondingi, pangajari, pangapuli, pangapoi dohot pangondianna. Ala ni i borat pe ulaon i, gogo jala hebat pe alo i, malo jala pistar, ndang gabe talu nasida jala ndang parsurageonna. Ajarhonon ni Tondi i do alus na pantas tu nasida, alus na gabe panindangion. Tung so pasombuonNa nasida maoto manang mauhom, ai ulaonNa do i, ulaulana do sisean i. Di bagasan panogunoguon dohot pangajarionNa, tarbahen marhasil ma sisean i, ndang tagamon magopo ulaon dohot halojaonna. Luhutna i laos bagabaga tu hita do, tu huria ni Kristus na mangolu jala mangula di tingki on dohot di inganan on. Tondi Porbadia do gogonta, gurunta, pangapuli jala pangondianta. Ala ni i mansai ringkot ma hita tangi jala unduk tu soara ni Tondi i. Holan marhite na songon i do boi hita malua sian alus na asal alus manang hatorangan dohot pembelaan na asal bunyi. Alai songon dia do hita boi tangi tu Tondi i? Marhite hata i do, marhite Barita Nauli i. I do ulaulaNa mamanghulingi hita. Ala ni i, ia naeng torang di hita lomo ni roha ni Tondi i, ingkon na ringgas do hita manangihon hata i, girgir manjaha, mangguruhon jala mamarungkilhonsa. Angka na losok manangihon hata ni Debata, unang pola dirajumi dirina naung tangi jala diboto lomo ni roha ni Tondi Porbadia i. Angkup ni i, ingkon ingotonta do, ndang ulaonta ulaon i, ulaon ni Tuhanta do. Holan ulaula do hita di tanganNa. Asa ndada gogonta, gogoNa do sipangasahononhon; ndang pingkiran manang rencananta, roha dohot tahiNa do siihuthononhon. Di bagasan panogunoguonNa ndang tagamon magopo boti ulaon dohot sitaononta. Marguna do i tahe sude. Laos di bagasan panogunoguonNa i do hita boi manghirim na paluaonNa hita sian parmaraan, hombar tu bagabagaNa i na mandok, “Sai na dongananHu do hamu ganup ari rasirasa ro ajal ni hasiangan on.” Porsea di bagabaga i, manahan ma hita ro di ujung.

jkt.17.06.2013/mvs