5 Trinitatis

SERMON JAMITA TU MINGGU 5 TRINITATIS, 30 JUNI 2013

Mat.8:18-22

Patujolo

Di bindu 5-7 ni evangeliumna on, na somal digoar Jamita Dolok, dipajojor si Mateus do angka pangajaran ni Tuhanta Jesus taringot tu Harajaon ni Debata naung songgop di portibi on. Di bagasan Kristus do i songgop, jala sian asi ni roha ni Debata, ungkap do i bongotan ni ganup jolma. Udut tusi, di bindu 8-9, ditaringoti Evangelis Mateus ma dua pangalaho. Na parjolo, tanda ni hasosonggop ni harajaon i, i ma hatatalu ni harajaon ni sibolis dohot hasesega ni angka ulaonna (pat.1 Joh.3:8b) Taringot tusi, dipajojor do i di barita ni angka tanda halongangan na pinatupa ni Kristus Jesus i (dipaias na huliton, dipamalum na marsahit dohot na martihas nang angka na sinonggopan ni tondi na hodar, dipamenak alogo dohot tao jala dipangolu na mate) Na paduahon, maradophon harajaon ni Debata naung songgop i, ganup do jolma ingkon mambuat haputusan, i ma na manjangkon jala mamongoti manang manulak. Taringot tusi, dipajojor ma i di turpuk ari on dohot di barita panjouon ni si Mateus.

Di Bibel hata Toba, ay.18 ni turpuk on, dipasada do tu barita na di jolona, i ma taringot tu hamamalum ni simatua boru ni si Simon Petrus dohot panghorhonna. Alai di godangan terjemahan, isara di Alkitab, dipasada do i tu barita na di pudina (tu ay.19-22) Ninna roha, humona do na di Bibel Batak i, ai panghorhon ni pangarongom ni natorop na di ay.16 i do ay.18 on.

            Hatorangan

Umbege na dipamalum Jesus simatua boru ni si Simon Petrus, botarina i marroan do isi ni huta Kapernaum mamboan angka na sinonggopan ni sibolis dohot sahit tu Jesus, gabe dipamalum do nasida saluhut. Mansai manarik do tanda i di natorop i, gabe sai disi ma nasida manghaliangi Jesus. Ketertarikan tu tanda dohot panghaliangion ni natorop, ndang sai marlapatan na positif i tu mission ni Jesus, alai bolas do sabalikna, gabe ambatambat tu perkembangan ni Barita Nauli na taringot tu Harajaon i. Tutu, ala ni tanda halongangan na pinatupaNa i, manganto do roha ni natorop i na Jesus i do Mesias na pinarbagabaga i. Alai dipahami nasida do i hombar tu konsepsi hamesiason ni Jahudi. Lobi sian i tahe, adong do kecenderungan di nasida mengupayakan bahkan mamaksa Jesus asa bertindak songon mesias na hinirim ni rohanasida, i ma raja portibi na manaluhon Harajaon Rom, dung i pajongjonghon Harajaon Jahudi Mesianis na meliputi sandok hasiangan on jala na pasurunghon halak Jahudi gabe wargana angka na utama. Di bagasan rumangna na lebih sederhana, panghirimon i do na naeng wujudhonon ni natorop na pinaboa ni si Johannes di evangeliumna i, i ma na naeng ro nasida laho manoro jala pabangkithon Jesus gabe raja, ‘Raja Roti’ na sai tongtong menanggulangi masalah sipanganononnasida marhite roti halongangan na so pola sihalojahononhon (Joh.6:15) I do deba alana asa manang na piga hali Jesus mangorai halak paboaboahon tanda na pinatupana (pat.Mat.12:15-16) dohot paboaboahon hamesiasonNa (pat.Mat.16:20) Songon i ma dison, dihilala Jesus do na adong na maol di panghaliangion ni natorop i, gabe didokhon ma taripar tu bariba, tu ipar ni tao Galilea manang Genesaret.

Di ombas i ma ro sada sibotosurat mandok tu Ibana, “Ale Guru, sai naeng ihuthononhu do Ho manang tu dia pe Ho laho.” Sibotosurat (Gr.grammateus, scribe, ahli taurat) i ma goar na asing ni Parise. JT Nielsen mandok, “Parise i ma Sibotosurat, jala Sibotosurat i ma Parise.” Mansai risik situtu do Parise taringot tu patik ni si Musa. Dijahai nasida do i tangkas, disulingkiti, ditafsirhon, diajarhon jala diradoti. Ala ni parbinotoannasida na bagas taringot tu patik i, gabe digoar ma nasida Sibotopatik manang Sibotosurat. Ndang masalpuhu ia nidok, nunga hea sibotosurat na martaringot di turpuk on marnida Jesus, hea mambege pangajaran manang jamitaNa dohot marnida angka pambahenanNa. Lobi sian i tahe, ndang so mungkin naung dohot ibana mengidentifikasikan diri songon sisean dalam artian na paihutihut Jesus, ai digoar ibana do Jesus i guru (Tumangkas, ida di toru hatorangan ni ay.21) Dung i tubu ma dohot giot ni rohana laho mangihuthon Jesus jala dipapatar ma i tu Tuhan i. Sian alus ni Jesus tu ibana, bolas do dodoon ni roha na so sian motifasi na sintong giot ni rohana i. Ra, na naeng marguru do ibana, naeng mangalului parbinotoan na umbidang jala na umbagas songon na di Jesus i sahat tu na jumpangsa status guru. Dung jumpangsa i, tadinghononna ma Jesus i laho membangun komunitasna sandiri, ingananna manghais hasangapon dohot parlabaan tano on.

Mangalusi ibana ditaringoti Jesus do hapogosonNa sandiri, didok, “Na marliang do angka antuasu, na marasar do angka pidong na martongatonga langit, alai anggo Anak ni Jolma i ndang adong hapeahan ni uluNa.” Antuasu (Gr.aloopeks/aloopekes, fox/terrier, rubah) samansam biang harangan (anjing hutan) na mangolu berkelompok; pidong (Gr.peteinon/ peteina, bird, burung) na martongatonga langit, mengacu tu pidong pada umumna. Di ruhut tano on, bolas dohonon, ‘maruntungan’ dope antasu dohot pidong sian Jesus, ai tu angka antuasu dilehon portibi on do liang, jala tu angka pidong diparade do asar bahen parmiananna, alai anggo tu Anak ni Jolma i ndang dilehon agia aha nda holan sada hau na pinarsilang bahen pamajalanNa. “Anak ni jolma i” (Gr.Huios tou Anthroopou, Son of Man, Anak Manusia), ninna Jesus. On dope na parjolo dihonahon Jesus gelar i tu diriNa. Na marmula do i sian panurirangon ni si Daniel di bd.7:13. Disi digombarhon do, di sada pangungkapon borngin, ro sahalak marhitehite ombun di langit, songon anak ni jolma, jala sahat ibana tu na so suda ariNa, jala tarboan tu joloNa. Tibu do dilapathon halak i songon panurirangon taringot tu Mesias na pinarbagabaga i. Dison, ditohoi Jesus do i jala dihonahon tu diriNa. Di sada sisi, hombar tu Dan.7:13 i, sada gelar hamuliaon do i, gelar hasangapon. Di bagasan hamuliaon, manaek do Ibana tu siamun ni Debata di surgo, jala laos di bagasan hamuliaon tuat Ibana muse tu tano on, hinaliangan ni angka surusuruan laho manguhumi angka na mangolu dohot na mate (Mat.24:30) Alai di sisi na asing, laos sada gelar hametmeton do i, ai Ibana na marsangap hian jala na laho marsangap saleleng ni lelengna, ingkon maringan do jolo di tano on songon anak ni jolma, songon jolma na somal na so adong halobianNa sian na asing. Di bagasan hajongjonganNa na songon anak ni jolma i ma ndang dilehon portibi on sada inganan bahen hapeahan ni uluNa. Na gabe sipaingot ma i tu sibotosurat i dohot tu sandok na tarjou tu pangihuthonon di Kristus i. Ndang umbalga sisean sian guruna, molo Jesus Guru i ndang dapotan inganan di portibi on, angka sisean na mangihuthon Ibana pe ingkon gabe halak dagang do di portibi on, gabe paisolat jala panginsua. Ala ni panjouon i, nunga asing haroroanna (pat.Joh.15:19), gabe dihasogohon jala na ditulak portibi on ma nasida. Na laos marlapatan ma i, angka na impolan di hasangapon dohot parlabaan tano on, ndang adong inganan ni i di tongatonga ni siihuthon Jesus.

Ihut tusi, adong ma sahalak sian angka siseanNa na mandok tu Ibana, “Ale Tuhan, ua loas ahu jolo mananom damang.” Sisean (Gr.matheetees/matheetoon, learner/disciple/pupil, murid) dison, i ma goar na umum tu halak angka na mangihuthon Jesus. Adong do sian i angka na jinou, naung tumangkas mananda jala marsitutu mangihuthon Ibana, isara ni  na sampuludua i (pat.Mrk.3:14), na pitupulu (pat.Luk.10:1, 17), na saratus duapulu (pat.Ul. 1:15) dohot na lima ratus halak i (pat.1 Kor.15:6), alai adong do na holan paihutihuthon dope. Rap do nasida mardalan di pudi ni Jesus i, rap manjalo pangajaran sian Ibana, jala rap manggoari Ibana Guru (Gr.didaskalos, teacher, pengajar) manang Tuhan (Gr.Kurios/ Kurie, Lord, Tuhan/Tuan) Disura roha, na sahalak sisean na martaringot di ayat 21 on, ndada sian horong na parjolo i dope, alai sian na paduahon i do, i ma sian angka na holan paihutihuthon Tuhan i. “Ua loas ahu jolo mananom damang,” ninna. Pangidoan na sangat masuk akal do i, ai na mangurus natoras, mangolu manang mate, tarmasuk tugas utama do i di adat dohot uhum ni hajolmaon. Ugamo pe, diargahon do i. Alai boha tutu, naung mate do amang ni halak i? Mandok naung mate jala holan na naeng mananom nama, mansai maol do i siat tu roha. JJ de Heer mandok, “Di Palestina di tingki ni Jesus, somalna ditanom do sahalak na mate laos di ari hamamatena, jala jotjotan ndang lobi onom jom sian ombas ni hamamatena.” Molo jinalo hatorangan i, bolas do dohonon, ala naung botari hatiha i (ida ay.16), ndang tingkina be laho mananom na mate. Tung sura pe toho na mate amangna i di ari i, godangan do kemungkinanna ndang pola sahat tu na songon i botarina i asa ditanom. Angkup ni i, molo toho do na mate amangna ari i jala ndang ditanom dope sahat tu ombas ni panghataion i, tung maol do siat tu roha na sanga dope ibana paihutihut Jesus i sadarina i, jala dung pe songon i botarina asa parmisi ibana mulak laho mananomsa. Jadi godangan do kemungkinanna, na mangolu dope amana i. alai ra nunga matua. Dung i, laho manggohi tugas haanahonna maradophon natorasna i sahat ro di ari hamamate dohot hatatanomna, dipangido ma penundaan sementara ni pangihuthonna di Jesus i.    

Dialusi Jesus ma ibana, ninna, “Ahu ma ihuthon! Angka na mate i ma pasombu mananom na matena.” Penundaan ni pangihuthonon di Jesus manang ala ni aha pe i mansai tejek do i tu penundaan selamanya. Kesempatan tu pangihuthonon i ndang sai tongtong ungkap. Ala ni i, manang na sadihari pe i ungkap, patut do i pintor tangkupon jala patujoloon ni jolma. Taringot tusi, tumangkas dipatorang Jesus di umpama na taringot tu arta na buni di ladang dohot mutiha na arga (Mat.13:44-46) Manang ise na patujolohon pangaradotion dohot pangoloion di adat manang aturan ni hajolmaon (isara na taringot tu pananomon ni na mate) sian pangihuthonon di Kristus Jesus dohot pangaradotion di ruhut ni Harajaon ni Debata, tarrajum tu naung mate do i nang pe mangolu; mate di partondion (mati rohani) Sabalikna do anggo angka naung mangolu, i ma angka naung jumpangan jala naung gabe parsidohot di Harajaon ni Debata, dipatujolo do pangihuthonon di Kristus Jesus dohot pangaradotion di ruhut ni Harajaon Banuaginjang i. Hombar tusi ma dipasingothon, “Ahu ma ihuthon! Angka na mate i ma pasombu mananom na matena.”

Ndang dipaboa di turpuk on boha do ujung ni na dua halak i. Torus do sibotosurat i mangihuthon Jesus dung dibege risiko ni pangihuthonon i, manang na gabe sumurut; saut do sisean na sada nari menunda pangihuthononna jala mulak tu hutana, manang gabe marsitutu do hombar tu parenta ni Tuhan i? Ndang i na naeng pabotohonon ni si Mateus dison, alai pangajaran ni Jesus do taringot tu pangihuthonon di Ibana.

Rancangan Homiletis

Mangihuthon Kristus, sada konsep na balga do i di Bibel dohot di parngoluon ni halak Kristen. Jotjot do i dipangke gabe identitas ni halak Kristen, ai na targoar do na porsea i siihuthon Kristus. Songon konsep na balga ndang na tarpatorang jala targombarhon i marhite sada manang dua pandohan sambing. Tuhanta Jesus Kristus i sandiri, dipatorang jala digombarhon do i marhite ragam ni pandohan songon na bolas jahaonta di Padan Naimbaru. Laos songon i ma di jamita di hita ari on, ndang na hataringotan hita sude na marhahonaan tu na mangihuthon Kristus i, alai naeng batasanta do panghataionta olat ni na hinatindanghon ni turpuk i sandiri.

Di jolo ni turpuk on dipaboa do, na dipamalum Jesus do simatua boru ni si Simon Petrus. Umbege i, marroan do isi ni huta Kapernaum mamboan angka na sinonggopan ni sibolis dohot sahit tu Jesus, gabe dipamalum do nasida saluhutna. Binonsir ni na masa i, gabe tartarik ma natorop i tu Ibana. Dihilala be ma na gabe adong hubungan emosionalna tu Jesus i, jadi sai disi ma nasida manghaliangi Ibana. Ndang na dipangido Jesus i, ndang na ditiopi nasida asa sai tongtong disi, alai nasida do na manghilala naung gabe horong ni Jesus i nasida, na mengidentifikasikan dirina songon sisean jala siihuthon Ibana. Ndang panumpak i tu mission ni Jesus. Sabalikna do tahe, adong do diida Ibana na maol disi. Alai ni i, pintor didokhon ma angka siseanNa asa taripar nasida tu bariba ni tao Galilea. Sian i bolas ma idaonta, hasiseanon manang pangihuthonon di Jesus i, ndang hea tubu i sian roharoha manang hagiot ni jolma, alai sian panjouon dohot pamilliton ni Kristus i do. Na dijou jala na dipillit do si Petrus, songon i si Johannes, si Mateus dohot angka sisean na asing i. Di Joh.15:16 mansai tangkas do i didok, “Ndada hamu mamillit Ahu; Ahu do mamillit hamu, …” Jadi, ndang ala na tapilit jala taihuthon Tuhan Jesus umbahen na dijou jala dipillit hita gabe siseanNa, alai ala na dijou jala dipillit do hita gabe siseanNa umbahen na tapillit jala taihuthon Ibana gabe Guru jala Tuhanta. Hata ni endenta No.9:2 mandok, “Dipillit ho hian tondingku, i pe hutodo Ho Tuhanhu.” Mansai ringkot ma i ingotonta, asa unang mangarajumi na ojak di hita hasiseanonta, alai di Tuhan i do; di panjouon dohot di pamillitonNa na bebas. Molo sadar hita disi, taargahon ma hasiseanon jala taharinggashon ma pangihuthonta di Tuhanta Jesus i.

Ihut tusi, ditaringoti do di turpuk on sahalak sibotosurat na naeng mangihuthon Jesus. Ibana pe nda tung na dijou, alai ibana sandiri do sian tahi dohot giot ni rohana na naeng mangihuthon Tuhan i. Disura roha nunga hea diida ibana Jesus i, hea dibege pangajaran dohot jamitaNa jala hea dibereng angka pambahenanNa. Dohot ma ibana tartarik jala mengidentifikasikan dirina songon sisean na marhatopothon Jesus i songon guruna; dung i, borhat sian motifasina na so tingkos, naeng ihuthononna ma ninna Jesus i manang tu dia pe Ibana laho. Mangalusi ibana ditaringoti Jesus do hapogosonNa sandiri, didok, “Na marliang do angka antuasu, na marasar do angka pidong na martongatonga langit, alai anggo Anak ni Jolma i ndang adong hapeahan ni uluNa.” Marhite i naeng pasigothonon ni Jesus do, ndang na mura na gabe sisean dohot na mangihuthon Ibana, alai godang do tantangan dohot risikona. Ndang umbalga sisean sian guruna. Molo Jesus Guru i ndang dilehon portibi on inganan nanggo apala hapeahan ni uluNa, songon i do nang siseanNa, hasogohononna do i, sosahanna, leaanna, leleanna, paporsukporsuhonna, dohot  na asing. Mansai ringkot ma i ingotonta asa unang tarsonggot hita molo ro sitaonon ala ni hasiseanon dohot pangihuthonon i. Mauliate do dohonon jala pujionta do Tuhanta molo boi dope hita sonang mangulahon hasiseanonta nuaeng di Indonnesia on. Alai di manang piga inganan, adong do angka donganta na so marhasonangan be, angka na sinusaan jala na sinosahan. Sitangianghononta do asa unang tarsonggot jala mandele nasida disi, ai naung dilumbahon Tuhanta hian do i jala ndang pasombuonNa nasida manaon sandiri. Di sisi na asing, dipaingot do hita asa unang tarpaoto binahen ni pingkiran na mangarajumi na ingkon sonang do siihuthon Kristus i. Parteologi sukses manang teologi anak raja rupani mandok, “Allah kita adalah Allah yang Mahabesar, kaya, penuh berkat dan manusia yang beriman pasti akan mengalami kehidupan yang penuh berkat pula, kaya, sukses dan berkelimpahan materi.” Hombar tusi, angka na so mamora jala na hurangan di sinadongan tano on, dirajumi do i songon Kristen na hurang porsea jala na so pinasupasu ni Debata. Tu angka na tarpaoto binahen ni poda na songon i, diingot ma hata ni Jesus on, “Na marliang do angka antuasu, na marasar do angka pidong na martongatonga langit, alai anggo Anak ni Jolma i ndang adong hapeahan ni uluNa.” Angka na impolan di arta dohot hasangapon tano on, ndang adong inganan ni i di tongatonga ni siihuthon Jesus.

Na parpudi, martaringot do di turpuk on sahalak naung targoar sisean na naeng menunda untuk sementara pangihuthonna di Jesus asa sanga ibana manggohi tugas haanahonna maradophon amana sahat ro di hamamate dohot hatatanomna, didok, “Ale Tuhan, ua loas ahu jolo mananom damang.” Alai ndang dioloi Tuhanta Jesus i, didok do tu ibana, “Ahu ma ihuthon! Angka na mate i ma pasombu mananom na matena.” Penundaan sementara di pangihuthonon di Kristus i manang na ala ni aha pe i mansai tejek do i tu penundaan selamanya, ai kesempatan tu pangihuthonon i ndang sai tongtong ungkap. Mansai ringkot ma i ingotonta asa memprioritaskan pangoloion di panjouon dohot pamilliton ni Tuhanta Jesus di hita gabe siseanNa. Pardomuanta tu Ibana, dao umarga sian pardomuan tu angka na asing, isara tu natoras, tu keluarga, tu punguan paradaton dohot na asing. Taringot tuson, ninna roha, godang do hita tardapot songon parhahurangan. Adong do rupani na mandok, dung matua pe asa burju marhuria; anggo tingki poso mangalului angka na di tano on ma jolo; mangalului hapistaran, mangalului sangap dohot mangalului hamoraon. Ndang sai tarhangoluhon hita dope hata ni Tuhanta Jesus i na mandok,. “Sai jumolo ma lului hamu Harajaon ni Debata dohot hatigoranNa, dung i tambahononNa do sude angka ondeng tu hamuna” (Mat.6:33), alai cenderung do hita patujolohon mangalului angka ondeng, ambaambana do Harajaon ni Debata dohot hatigoranna. Molo diadophon halak hita tu dua pilihan, tuntutan ni adat di sada pihak, tuntutan ni hata ni Debata di pihak na asing; mandohoti ulaon adat di sada pihak, parmingguon di gareja di pihak na asing, ndang pola pabunibunion, godang dope na pamonanghon adat. Jesus mandok, “Ahu ma ihuthon! Angka na mate i ma pasombu mananom na matena.” Na pamatehon dirina do manang ise na patujolohon pardomuanna tu angka na asing sian pardomuanna tu Tuhanta Jesus i.                

jkt.24.06.2013/mvs