Tu dia ho dung mate ho?

TU DIA HO DUNG MATE HO?

Nunga mansai matua sada ina na mian di tano parserahan.

Lam tu galena do pamatangna, jala ndang apala dirohahon be na manganhon sipanganon. Marnida i disura roha ni angka ianakhonna ma na laho marujung nama ngolu ni inanasida i. Gabe dipados nasida ma roha dohot tahinasida laho mambahen sipanganonna. Dititi ma ari, jala diparade saluhut na hombar tusi.

Jumpang ma ari na tinontuhon, marroan ma sude angka na ginonghon tu ulaon i. Songon i ma antong dos ni rohanasida, parjolo ma dipatupa partangiangan dohot parpadanan na badia. Dipaihutihut inanta i do sude acara ni partangiangan dohot ulaon na badia i, isara tangiang, pujipujian, hamauliateon, panopotion di dosa, manang pe panindangion. Agia pe nanget, dohot do nasida mangendehon angka ende na dipatubegehon di parpunguan i. Torang do pangalusina di sungkunsungkun ni pandita i di na marulaon na badia i, tangkas do boi dijalo jala dipangan roti i, jala diinum dohot anggur i. Marnida i sandok tarhilas do roha ni saluhut na di parpunguan i, lumobi ma roha ni angka anakhonna. Pola do adong tahe na mandok: “Pasti do, tu surgo do Inang on.”

Bodarina i, dung simpul sude ulaon dohot panghataion na marpardomuan tu na pasahathon sipanganon dohot sulangsulang ni natuatuanasida i, disangahon angka ianakhonna i ma manghatahatai dohot inanta i. “Pasingotsingothon tahe asa sai ingot di sambulo ni tondina; manang sadihari pe marujung ngoluna unang gabe manimbil ibana sian i,” ninna nasida be. Gabe didok sahalak sian nasida ma: “Inong, dung na marulaon na badia i ho nangkin, nunga boha nuaeng roham, sonang do?” “Sonang do, Amang,” ninna inanta i nanget mangalusi. Didok anakna i muse: “Ai porsea do ho di Tuhan Jesus Kristus naung ro tu tano on, naung mate jala mangolu asa malua ho sian dosa, sian sibolis, dohot sian hamatean?” “Olo Amang, porsea do ahu,” ninna inanta i mansai nanget magalusi. “I ma da Inong, nunga mansai las rohanami mambege i. Molo tung marujung pe ngolum, tarapul ma rohanami marningot i,” ninna anakna i mangalusi. “Alai tahe Inong,” ninna anakna i muse, “nunga tangkas be nuaeng di ho, molo mate ho, tu dia do ho?” “Tu Toba do ahu Amang,” ninna inanta i mansai hatop jala hirtap.

Mansai tarsonggot do nasida sude umbege i, ai ndang dihirim nasida alus sisongon i, alus na mardomu tu haporseaon do. Alai ndang taralushon agia ise alus sisongon i molo sintap ni angka na di tano on do panatapan ni haporseaonna. Taringot tusi didok si Paulus do: “Anggo holan di tano on do hita manghirim di Kristus i, jolma na dumangol do hita sian saluhutna.” (1 Kor.15:19)

Read More..

Maruhumhon hasintongan

MARUHUMHON HASINTONGAN

“Boti hata ni Jahowa Zebaot: Uhum hasintongan ma paruhumhon hamu, jala denggan basa dohot asi ni roha ulahon hamu ganup tu donganna” (Sak.7:9)

Di jolo ni si Latus didok Jesus do: “Umbahen na tubu Ahu jala umbahen na ro Ahu tu portibi on, asa huhatindanghon hasintongan i.” Mansai eles do alus ni si Latus tusi, didok: “Aha ma i, hasintongan i?” So pola paima alusna, pintor ditadinghon ibana do Jesus i laos laho manopot angka Jahudi. I ma tandana na so apala masalah hasintongan i di ibana. Songon si Latus i, torop do na so pola pusing taringot tu hasintongan i. Pardihana i, ninna rohana, ai na relatif do hasintongan i jala tarihot tu tingki dohot tu inganan. Sude do boi sintong, alai sude do boi ndang sintong; hombar tu halakna do i, tu faham manang pola pikirna. Hombar tusi ndang sai diparungkilhon halak be hasintongan i di pambahenanna maradophon donganna jolma. Di paruhuman rupani, songon partahanan parpudi ni angka silului hasintongan jotjot do masa haputusan na so ojak di hasintongan. Hasintongan naung dipahot di bagasan uhum manang aturan diparmeammeam, dipaboanboan manang dipatongotongon tu lomo ni rohana. Pangalaho i ndang lias sian Israel. Diharinggashon nasida do papuasaon, alai ndang dipardulihon anggo hasintongan. Apala i do na jotjot dipasingothon angka panurirang, isara si Jesaya, si Jeremia, si Hesekiel, si Hosea, dohot na asing. Alai boasa boi masa na songon i? Ala na so adong do di nasida denggan basa dohot asi ni roha. Apala i do na pinasingothon Panurirang Sakarias dison, didok: “Uhum hasintongan ma paruhumhon hamu, jala denggan basa dohot asi ni roha ulahon hamu ganup tu donganna.”

I ma siingotonta di na mardalan hita di bulan Nopember, bulan na parpudi di hita di Taon Parhuriaon on. Alai huhut, di ujung ni bulan on, laos bongotanta do Taon Parhuriaon na imbaru. Songon taon parhuriaon na sai marujung jala digonti dohot na imbaru, songon i laho marujung do saluhut na adong, dung i udutanna ma i muse dohot langit dohot tano na imbaru na so mansohot be salelenglelengna. Ndang adong na tarboan hita tu langit dohot tano na imbaru i so lobi sian ulaon na denggan angka na tapatupa di ngolunta on. Ala ni i, apala di na manatap hita di tingki on tu ujung ni pardalananta dohot tu ujung ni saluhut, naeng paruhumhononta ma hasintongan jala ulahononta denggan basa dohot asi ni roha di na mangulahon hadaulaton ni na marroha (jamita Minggu 01.11.2009); naeng paruhumhononta do hasintongan jala radotanta denggan basa dohot asi ni roha di na mangulahon dohot manghangoluhon aspek teologis dohot aspek antropologis-sosiologis-ekologis ni parugamaon manang peribadahanta (jamita Minggu 08.11.2009); naeng paruhumhononta do hasintongan jala radotanta denggan basa dohot asi ni roha di na mangulahon ulaon panindangion dohot panghophopon di Barita na Uli na pinalumehon ni Tuhan i tu hita (jamita Minggu 15.11.2009); naeng paruhumhononta do hasintongan jala radotanta denggan basa dohot asi ni roha songon pengamalan ni haporseaon dohot panghirimanta di Jesus Kristus haheheon dohot hangoluan i (jamita Minggu 22.11.2009); jala naeng paruhumhononta do hasintongan jala radotanta denggan ni basa dohot asi ni roha di na marhobas hita tu pesta parningotan di hatutubu ni Tuhanta Jesus Kristus dohot di panagamonta di haroroNa na paduahalihon (jamita Minggu 29.11.2009). Tuhanta ma mamasumasu hita.

jkt.01.11.2009/mvs

Read More..

21 Trinitatis

SERMON JAMITA TU MINGGU 21 DUNG TRINITATIS, 1 NOPEMBER 2009
Rom 12:1-3

Patujolo

Nunga marujung sada bagian na balga di surat ni si Paulus na tu halak Rom, i ma bagian teologis-soteriologis (bd.1-11).

Di bagian i, dipajojor do angka na pinatupa ni Debata bahen haluaon ni jolma (indikatif yang besar). Dison, mamungka ma na imbaru, bagian etis (bd.12-16), i ma na taringot tu sipatupaon ni jolma na hombar tu ulaon haluaon naung pinatupa ni Tuhan i (imperatif yang besar). Songon naung pinalua, ingkon hangoluhonon ni angka na porsea i do ngolu hombar tu lomo ni roha ni Debata, parange na badia, na so marlindang jala na so hasurahan.

Hatorangan

Songon na nidok nangkin, dison, dipungka do sada bagian na imbaru. Laho padomuhon tu bagian na di jolona, di aslina dipangke do dison hata oun (therefore/karena itu/ala ni i). Hombar tusi, dumenggan do patariparon ayat on songon on: “Ala ni i, huapoi ma hamu, ale angka dongan ...” Ala ni aha? Ala ni ulaon haluaon ni Debata (naung pinajojorna di bd.1-11 i). Ulaon haluaon ni Debata do na gabe dasor ni apoapo i. So jolo mambahen manang aha di jolma, ndang hea Debata mangigil agia aha pe sian jolma i. Alai ala naung dipatupa haluaon i, ingkon do i sikapan ni jolma. Hombar tusi ma diapoi si Paulus huria i dison menyikapi ulaon haluaon naung pinatupa ni Tuhan i. Pangapoion i diulahon do marhitehite asi ni roha ni Debata. Asi ni roha (Gr. toon oiktirmoon/the mercies) i ma basabasa ni Debata na dipasahat sian habasaonNa sambing so ala ni hadengganon ni jolma. Asi ni roha sisongon i do naung dibasabasahon Debata di bagasan AnakNa Jesus Kristus tu jolma, tu si Paulus, dohot tu huria i. Angka naung manjalo asi ni roha sisongon i tarjou do tu na masiapoan.

Isi ni apoapo i mandok: “Pasahat hamu ma dagingmuna bahen pelean na mangolu, na badia, na hinalomohon ni Debata.” Pasahathon dison sada terminologi parugamoon do i na marhahonaan tu pamelehonon manang pembaktian ni diri. Hata i do dipangke di na pasahat Jesus Posoposo i tu bagas joro (Luk.2:22), tu halak na pasahat dirina tu hajahaton manang na sabalikna tu Debata (Rom 6:13), dohot tu na pajongjonghon halak asa rimpas di bagasan Kristus (Kol.1:28). Di hata i, tersirat do pangantusion kebebasan dohot kerelaan. Na pasahathon i ndang ala ni na pinaksa, na sian roha na bebas do jala na ra. “Pasahat hamu ma dagingmuna,” ninna. Na marlatar belakang do i tu pameleon na masa di hajahudion. Faktualna antong, daging ni pinahan do na dipelehon. Hombar tusi ndang adong di hata ni halak Jahudi pandohan na marlapatan mamelehon roha dohot tondi. Alai sian pandohan na mangihut torang do paboa na so holan daging sipasahaton, tung sandok hadirion ni jolma i do bahen pelean na mangolu. Pelean, i ma silehonlehon na pinasahat tu Debata songon hapataran ni roha na mauliate, na mamuji jala na pasangaphon; manang na manolsoli jala na manopoti angka dosa. Di pelean i tersirat do pangantusion pelepasan hak manang claim ni na mamelehon i taringot tu na pinelehonna i, jala pasahathonsa tu Debata. Nasa naung dipelehon, ndang boi be i unsaton. Apala i do na ginombarhonna di na ingkon ditutung pelean i. Molo dung ditutung, ndang tarpaulak manang tarpangolu be i asa pangkeon muse manang pelehonon sahali nari. Songon i ma halak Kristen i ingkon melepaskan hak dohot claim taringot tu hadirionna jala pasahathonsa tu Tuhan i bahen pelean hamauliateon, hasangapon, dohot pujipujian di Ibana. Alai asing sian na masa di hajahudion, ndang pelean na mate, na mangolu do. Na marlapatan ma i, sipasahatonna do sandok hadirionna ro di saluhut aspekna, i ma ngoluna, gogona, rohana dohot tondina tu Tuhan i; suang songon i hatauonna, pamingkirionna, panggulmitonna manang ulaonna. Torus manorus, saleleng mangolu. Hadirion na pinelehon i ingkon badia do. Hombar tu patik i antong, ingkon na hipas do na boi parbadiaan bahen pelean tu Jahowa. Songon i, ingkon radotan ni halak Kristen do hadirionna asa tongtong di bagasan habadiaon na tarpelehon jala na hinalomohon ni Debata. Pelean sisongon i do na targoar hadaulaton ni na marroha. Hadaulaton (Gr. latreian/service/ibadah) dison, lapatanna ibadah dalam arti yang luas, i ma parsombaon (kebaktian) dohot panghangoluhonna di hangoluan siapari. Na marroha (Gr. logikeen, ro sian hata logos) lapatanna logis/masuk akal (reasonable). Jadi hadaulaton ni na marroha, i ma ibadah na masuk akal/logis/rasional/layak/pantas. Didok na masuk akal, ala na patar do i di parngoluan siapari, na boi ditanggapi secara inderawi.

Hadaulaton ni na marroha i na mangigil hamubaon dohot haimbaruon do i. Hombar tusi ma dipasingothon dison, “Unang gabe sarombang hamu dohot portibi on.” Sarombang (menjadi serupa), na marhahonaan do i tu na mambuat rupa (bentuk) manang na maniru rumang ni na asing. Di portibi on dope na porsea i, alai ndang sian portibi on (Joh.17:11, 14). Ala ni i, unang ma gabe dibuat na porsea i rupa ni portibi on, unang ma gabe ditiru rumangna dohot pangalahona. “Alai gabe imbaru ma hamu, dung muba pingkiranmuna,” ninna. Hurang tingkos do terjemahan on, gabe niuji do patariparhon i songon on: “Alai muba ma hamu marhite haimbaruon ni pingkiranmuna.” Pingkiran (Gr. noos/mind/budi) dison marlapatan jolma parbagasan, i ma keseluruhan ni hadirion ni jolma na so tarrajum tu dagingna, i ma tondina, jiwana, rohana, semangatna, hagiotna dohot na asing. Marhite haimbaruon ni jolma parbagasan i masa do hamubaon na radikal na marhahonaan tu sandok aspek ni parngoluonna, parbagasan dohot parduruna. Gabe na imbaru jolma i, jala na marpangalaho na imbaru. Jolma na imbaru i do na tau manimbangi lomo ni roha ni Debata, na uli, na hinalashonNa dohot na sun denggan. Ndang sai nata dia do lomo ni roha ni Debata di ragam ni parsoalan ni ngolu ariari, ndang sai mura mamolati na uli sian na roa, jala sipata mansai maol do manontuhon dia do na hinalashon ni Debata dohot na sun denggan. Alai angka naung gabe na imbaru di bagasan Jesus Kristus i dipatau do i manimbangi manang na dia do lomo ni roha ni Debata di sadasada tingki dohot inganan manang pangalaho (situasi dohot kondisi).

Ihut tusi, dipungka Apostel Paulus patoranghon taringot tu pamangkeon ni silehonlehon partondion (ay.3-8). Ndang tarsirang i sian apoapo na taringot tu na so sarombang dohot portibi i. Songon na di ay.1 i, dipasasahat do i marhite asi ni roha (Gr. charitos/grace) naung dilehon tu ibana, i ma tohonan haapostelonna i (pat.Rom 1:5; Gal.1:6, 15; 2:9; Eps.3:8; 1 Tim.1:14). Hombar tu otoritas haapostelonna i ma didok tu ruas ni huria Rom, mardomu tu pamangkeon ni silehonlehon partondion i, asa unang adong na mangarajumi dirina torbang manang lobi sian na patut. Songon bagian ni portibi, dirajumi halak Rom do dirina hombar tu standard ni portibi, isara pangkat, hamoraon, hapistaran marpidato, dohot na asing. Ala ni i mansai ungkap do nasida tu ginjang ni roha, jala madabu jotjot tu na mangarajumi diri lobi sian na patut. Unang ma gabe sarombang ruas ni huria i tusi, ai ndang disagihon Debata angka silehonlehon i asa tu haginjangon ni roha. Ala ni i ndang sirajuman i hombar tu standard penilaian ni portibi, jala ndang sipangkeon i gabe ukuran laho manontuhon hasurungan ni sasahalak. Alai sirajuman do silehonlehon partondion i hombar tu standard ni haporseaon manang standard kristiani, i ma haserepon ni Kristus i. Manang ise na mamangke silehonlehon partondion na jinalona di bagasan haserepon ni Kristus i (pat.Pil.2:5-7), i do na tutu mangarajumi diri songon na tama (sebagaimana adanya).

Sipahusorhusoron

Di na mamonai podana taringot tu etika ni halak Kristen, ditaringoti si Paulus do taringot tu hadaulaton. Hadaulaton, lapatanna ibadah di bagasan lapatan na sabidangbidangna, i ma angka upacara keagamaan dohot panghangoluhonna di hangoluan siapari. Ibadah na dipatupa di inganan na tontu, ndang marujung i di inganan i, alai ingkon na ditorushon do i tu ruar, dihangoluhon jala dipapatar di hangoluan ariari marhite panghataion, pangulaon, dohot pambahenan angka na boi ditanggapi secara inderawi. Hombar tusi, digoari ma i hadaulaton ni na marroha, lapatanna na siat tu roha, na masuk akal/logis/rasional/layak/ pantas. Adong manang piga aspek ni hadaulaton i, i ma:

Na parjolo, pasahathon pelean na mangolu. Ingkon pasahaton ni na porseai i do sandok hadirionna gabe pelean hasangapon dohot pujipujian di Debata. Asa jumpang i, ingkon radotan ni halak Kristen do ngoluna asa sai tongtong di bagasan habadiaon, ai ndang tarhalomohon Debata angka parhodar. Angka naung mamelehon dirina songon i do na boi mamelehon na asing, isara hepeng, arta manang ugasanna. Hinaarga ni angka pelean sisongon i ndada di pelean i sandiri, alai di na mamelehon i do. Saargaarga ni pelean ndang adong lapatan ni i di Debata molo na mamelehon i ndang dope pasahathon dirina gabe peleanna na mangolu. Mansai ringkot ma i parrohahononta di na pasahathon angka peleanta. Mnsai ringkot do angka peleanta i, ai marhite i dipatuk do angka na ringkot di huria i dohot di panghobasionna. Ala ni i naeng ma pasahatonta i sian nasa rohanta, jala molo dung tapasahat sai unang be taunsat.

Na paduahon, muba jala imbaru. Hadaulaton ni na marroha i na mangigil hamubaon do i dohot haimbaruon. Adat ni portibi do na pahombar diri. Tu bara ni hambing, marbehet; tu ruang ni babiat, marngaur. Unang ma songon i anggo di halak Kristen, manang na di dia jala sadihari pe ingkon radotanna do dirina asa muba jala imbaru. Haimbaruon i ingkon na dipungka do i sian hajolmaonna parbagasan, dung i mandapot hapataranna ma i muse di hajolmaonna parduru, dohot di hatauonna manimbangi dohot mangulahon lomo ni roha ni Debata. I pe, mansai ringkot do parrohahononta, ai ndang na mura mananda lomo ni roha ni Debata di ragam ni parsoalan ni ngolu ariari. Ala ni i, diigil do haoloonta laho mamarungkilhon i, laho mamingkirmingkiri dohot laho pahusorhusorhon. Ndang sae di hita holan na manjalo alus sian halak. Lumobi, sai unang ma holan na mamonduti na nidok ni na asing. Manang na ruas i, manang na parhalado, manang na kelompok. Ninna roha, dison, godang do hita tardapot songon parhahurangan. Ndang sai ringgas marsiajar manang marungkil sandiri laho mangalului alus ni hata ni Debata tu angka parsoalanna. Lumobi molo mansai maol, demi gampangnya, lomoan ma rohana manungkun na asing. Molo dung jumpangsa na olo mangalusi, so jolo ditimbangi pintor ditohoi jala dibonduti. Angka naung muba jala imbaru, tau do i manimbangi lomo ni roha ni Debata, i ma na uli, na hinalomohonNa, jala na sun denggan.

Na patoluhon, mangarajumi diri songon na tama. Tu huria na pinaluaNa i, dibasabasahon Debata do ragam ni silehonlehon partondion. Sipangkeonnasida ma i laho patureturehon huria i asa diri gabe hasangapon ni Kristus i. Ndang sarupa silehonlehon i, paasingasing do. Na marguna do i, ai marhite i boi sude masihobasan, masitumpahan jala masipatuhan. Ala ni i, unang ma ala ni angka silehonlehon i gabe adong na mangarajumi dirina torbang manang lobi sian na patut, alai sintap ni na tama ma parrohaonna be. I pe, ringkot do parrohahononta, ai mara na ungkap do i di hita halak Kristen. Manang di dia pe di portibi on, di huria Katolik manang Reformasi, di angka huria arus utama manang pe na injili, angka na manjalo silehonlehon partondion na tertentu isara hatauon pamalumhon sahit mansai jotjot do i tarjunjun tu na mangarajumi dirina torbang jala mangigil perlakuan na istimewa sian na asing. Angka na asing i pe antong ndang pola haboratan mangalehon i, dipatujolo do i jala dipapujipuji. Ala ni i gabe adong ma na madabu tu haginjangon ni roha. Na mamangke silehonlehon di bagasan haserepon ni Kristus, i do na mangarajumi dirina songon na tama.

jkt.03.10.2009/mvs

Read More..

20 Trinitatis

SERMON JAMITA TU MINGGU 20 DUNG TRINITATIS, 25 OKTOBER 2009
Jos.1:6-9

Patujolo

Dung monding si Musa, dipabangkit Debata do si Josua manguduti ulaonna manogihon bangso Israel tu tano Kanaan.

Di tingki ni jamita on, nunga salpu be tingki ni uhum na tu bangso i, i ma na madoado di parhorsihan leleng ni 40 taon. Naeng tariparan nasida ma Jordan laho mamongoti Kanaan asa soluhonna bahen partaliannasida. Ulaon na maol do i, ai tano sibongotannasida i naung marpangisi do. Nunga leleng maringanan disi halak Het (Heti, ay.4). Heti dison, goar umum do i tu sude penduduk asli ni tano i, i ma halak Heti, Kanaani, Amori, Hevi, Jebusi (13:5), Keni, Kenisi, Kadmoni, Repaim, (1 Mus.15:19-20), Perisi, Girgasi (Jos.3:10 par.) Paima so sahat tusi, dison, dipargogoi Debata ma si Josua i, dipatogu rohana jala dipapir tondina.

Hatorangan

Di ay.5 didok Debata do: “Ndang adong manang ise na manahan jongjong di jolom saleleng ho mangolu.” Lapatanna, saleleng mangolu si Josua, holan na monang do ibana. Ndang ala ni dirina i, ala ni pandonganion ni Tuhan i do, ala ni hagogoon na nilehonNa tu ibana. Hombar tusi ma didok di ay.6 on: “Pir ma tondim (gogo, Heb. chazaq/be strong/ jadilah kuat) jala marsihohot (togu, Heb. we’emaats/a good courage/teguh)!” (Parenta on diulahi do muse di ay.7 dohot di ay.9). Maksudna hira na mandok: “Nunga Hupargogoi jala Hupatogu ho (indicatif), antong gogo jala togu ma ho (imperatif)!” Dohot hata na asing, ingkon sikapan ni si Josua do hagogoon dohot hatoguon na nilehon ni Debata tu ibana, ingkon auhonon jala hangoluhononna. Boha pe tantangan, ndang jadi mombut manang mangingking, alai ingkon tongtong porsea jala margogo di bagasan hagogoon ni Tuhan i. Boi do pos rohana di pandonganion ni Tuhan i, ai naung dipillit jala ditontuhon Debata do ingkon ibana marbagi tano i bahen partalian ni Israel. Ndang ulaon na mura i, na maol do. Maol ala ni hajungkaton ni bangso i. Nang pe songon i, ala ni pamilliton i, ndang pasombuon ni Debata ibana gagal disi. Lobi pos tahe rohana, ai naung diuarihon Debata do tu ompunasida si Abraham, tu si Isak, dohot tu si Jakob paboa na lehononNa tano i tu bangso i. Diuarihon lapatanna, dijanjihon marhite sumpa manang tolon. Nasa bagabaga ni Debata sai na pasautonNa do i (pat.4 Mus,23:19; Heb.6:13-18), ndang jadi sundat.

Di ay.7 hurang sintong do salinan Batak, ai disirang hata marsihohot (togu) sian pir (ni) tondi (gogo) jala dipadomu tu pangaradotion di patik. Sasintongna, sarupa tu na di ay.6 i, ingkon domu tu pir (ni) tondi (gogo) do marsihohot (togu) i, jala pangaradotion di patik i parenta na mangihut nama i. Songon na nidok ondeng, dison diulahi jala lam diondolhon do muse parenta na di ay.6 i. Hombar tusi ditambahon ma hata asal (Heb.raq/only/hanya) dohot situtu (Heb. ma’od/very/sunguh-sungguh). Na nidokna disi, marhamonangan do si Josua jala marhasil marbagi tano i holan marhite na margogo jala togu situtu ibana di bagasan haporseaon dohot di bagasan hagogoon ni Debata. Na tubu jala na lam tu toguna do haporseaon i di bagasan pangaradotion di patik i (pat.Rom 10:17). Ala ni i disosohon Debata do tu si Josua asa mangaradoti patik i. Patik dia? I ma patik angka na tinonahon ni ni si Musa. Maksudna, patik angka na adong pardomuanna tu si Musa. Deba sian i, isara Patik na Sampulu i dipasahat Debata do secara langsung, na deba marhite si Musa selaku partogi dohot mediator. Alai ndang holan i, dohot dope angka na masa di pardalanan i, isara panogunoguon dohot panarihonon ni Debata, paminsangon dohot panguhumionNa. Ingkon i ma na gabe pamarenta di si Josua, gabe pangguruan di sipatupaon jala sipatudu di sidalananna. Hombar tusi ma diondolhon di ay.8: “Unang meret buku ni patik on sian pamanganmu.” Ra, na ditambahon di pudi do ayat on tu. Nidok songon i, ai di tingki ni si Josua ndang adong dope buku patik i. Tutu, deba sian i, isara Patik na Sampulu i nunga disurathon di dua lei batu (2 Mus.34:1, 4, 28), jala dipamasuk tu bagasan Poti Parpadanan i (pat.2 Mus.25:16, 21; Heb.9:4). Dung i deba barita ni na angka na masa di pardalanan i diparentahon si Musa do i asa disurathon (2 Mus.17:14; 4 Mus.21:14). Mangulahi naung didok di ay.7, ingkon pahombaron ni si Josua do sandok ngoluna tu patik i. Taringot tusi, parjolo: Ingkon dipingkirpingkiri do i arian dohot borngin, dipahusorhusor, direnungkan. Songon i, ingkon pingkirpingkiranna do nang angka na masa, angka na binahen ni Debata di nasida sapanjang pardalanan i laho mambuat parsiajaran sian i. Marhite pamingkirion i jumpang do pangantusion, parsiajaran dohot hatauon manghonahon i tu praktek ni ngolu ariari. Paduahon: Ndang jadi meret patik i sian pamanganna. Songon sahalak partogi si Josua, mansai godang do ibana mamangke pamanganna. Ingkon hatahononna do rupani parenta (komando), uhuman manang haputusan taringot tu sadasada parkaro manang pangalaosion, parbagi ni partalian, dohot na asing. Angka hata na manontuhon do i jala na mengikat. Ala ni i ingkon radotanna do asa hombar saluhutna i tu patik i. Patoluhon: Ingkon radotan jala patupaonna do na hombar tu na tarsurat di patik i. Molo dung songon i, maruntung ma ibana di nasa dalanna jala marmulia di saluhut parulaonna, ai ramotan jala pasupasuon ni Debata ma ibana, jala patongononNa langkana tu hadumaon dohot hamuliaon.

Paposhon roha ni si Josua, di ay.9, didok Debata muse: “Nda nunga Hudok tu ho: Pir ma tondim jala marsihohot?” Ndang holan apoapo i manang sosososo, alai parenta do (Heb. tsiwiytiykaa/have I commanded/telah kuperintahkan). Ndang ringkot si Josua ganggu, ai ndang gaitgait parenta ni Debata; hasintongan do i, na ingkon masa. Dohot hata na asing, di bagasan pandonganion ni Debata di sandok langkana, ingkon jadi do ibana sahalak na gogo jala na togu. Ala ni i didok “Unang manonditnondit roham, jala unang tahutan.”

Sipahusorhusoron

Didok na mandok: “Parporangon do ngolu on.” Tatolopi i manang so tatolopi, na pasti gok paraloan do ngolu on, gok parjuangan. Songon halak Kristen hita, na marungkil do hita laho mamongoti paradianan sogot, i ma tano Kanaan na imbaru, na hot ro di saleleng ni lelengna. Marungkil do hita maralohon dirinta sandiri, marungkil maralohon partibi on, marungkil dohot maralohon sibolis. Lam leleng, lam tu sobuna do paraloan i. Lam samak do parsirangan ni na roa sian na denggan, parsirangan ni dosa dohot na so dosa. Lam majal panghilaan ni jolma, lam barani mangulahon angka na so dung masa. Lam barani do dohot sibolis i papatarhon dirina, mamorangi na porsea i tangkastangkas. Di angka kota na balga rupani jala na maju, marjongjongan do huria ni sibolis, gereja-gereja setan. Ndang buni be, nunga patarpatar. Parpunguan na pinatupanasida rupani laho marsomba sibolis i, sipata nunga disiarhon sian televisi. Di lante ni sada gareja setan na di California ninna, torhon ni pintu masuk, adong do sada gombaran mosaik ni Jesus Kristus. Manang ise pe na bongot sian pintu i, ingkon degeonna do gombaran i jala marsitijur tu bohiNa. Lam so porsea be jolma godangan di lapatan dohot guna ni hatigoran dohot hasintongan, alai angka dia ma dalan na ummura jala na humatop parohon paruntungan tano on, angka i nama na gumodang dipatumorosi. Asal adong kesempatanna, ndang adong be alang ni rohana mangangkali, manipu, manang korupsi, jala angka paruntungan tano on nama na dirajumi suhatsuhat ni hamuliaon. Songon dia ma hita mangadopi angka i?

Marojahan di turpuk jamita ari on, ingkon margogo do hita jala togu. Ndang hagogoon dohot hatoguon na ojak di hatauon ni hajolmaonta i, di hadirion manang di eksistensinta, di bangko manang karakterta, alai di haporseaonta di Debata do dohot di bagabagaNa na tu hita. Di bagasan haporseaon i saor jala domu do hita tu Debata gabe margogo jala togu di bagasan hagogoonNa na togu i (pat.Eps.6:10). Na tubu jala na lam tu toguna do haporseaon i di bagasan hiras dohot ringgas ni rohanta mangaradoti hata ni Debata. Molo didok mangaradoti, na marpamusatan do i di pangulahonon di hata i. Laho mangulahon i ringkot do pangantusion manang pemahaman. Ringkot antusanta, hata ni Debata ndang dipasahat tu hita di bagasan rumang naung singkop jala na ripe ulahonon di sude tingki dohot inganan dohot pangalaho, alai ingkon sipingkiran dope i jala sitimbangan manang na boha pardomuan (relevansi) dohot hahonaan (applikasi) ni i tu sadasada tingki dohot inganan dohot pangalaho (situasi dan kondisi). Hombar tusi, manang na ise pe na naeng mangulahon hata i ingkon adong do hiras dohot ringgas ni rohana laho manjahai dohot manangihon, mangguruhon dohot mamparsiajari, mangarataratai dohot patanaktanakhon, mamarrohahon dohot pahusorhusorhon, mangauhon dohot manghangoluhon. Molo dung songon i, torang ma di ibana siulahononna.

Laos i ma siparrohahononta mardomu tu ari Reformasi siingotonta di ari 31 Oktober on. Sada sian tema ni Reformasi i mandok sola scriptura, lapatanna holan na tarsurat i. Na nidokna disi, i ma hata ni Debata na tarsurat di Bibel i. Tagan so Reformasi, holan angka parhalado (klerus) do na boi manjaha Bibel, ruas ndang boi. Ala ni i, manang dia na hinatahon ni parhalado i, olat ni i ma na boi botoon ni ruas. Dialo si Luther do i, disalin do Bibel i tu hata na niantusan ni ruas, hata Jerman. Ala ni i gabe boi ma ruas manjaha dohot umboto hata ni Debata. Songon huria reformasi, ndang tingkina be di ruas ni hurianta holan na patangitangihon lumobi na mamonduti hata ni parhalado, alai ingkon lam tau do sude manjahai dohot mangguruhon Bibel i asa jumpangan parbinotoan dohot pangantusion na mendasar taringot tu hata ni Debata dohot taringot tu pangulahonna. Si Jakobus mandok: “Alai gabe siulahon hata i ma hamu, unang holan pananginangi, angka na paotootohon dirina.” (Jak.1:22)

Angkup ni i, ingkon tongtong do ingotonta paboa haporseaon dohot pangoloion tu Debata do haroroan ni paruntungan dohot hamuliaon. Molo lomo roha ni Debata marbasahon hamoraon dohot hamuliaon tu hita, na uli do i jala sihalashononhon. Alai unang ma gabe taeahi hamoraon dohot hamuliaon marhite na mangalangkai hatigoran dohot hasintongan. Tuhanta Jesus mandok: “Ai aha ma antong gunana di jolma nang liat portibi on diomo, anggo mago do tondina? Aha ma tarlehon jolma bahen tobus ni tondina?” (Mat.16:26).

jkt.22.09.2009/mvs

Read More..

Jea ni na so mananda

JEA NI NA SO MANANDA

Nunga gok be panompang ni sada bus na naeng borhat sian sada huta.

Holan sada nama hundulan na so marisi, i ma na di hambirang ni supir. Nang pe songon i, laos so marnaborhat dope bus i. Mamungka ma ngolngolan angka panompang. Dung i, didok sada halak ma: “Amang Supir, ai nunga gok be, borhat ma hita.” Alai didok supir i ma: “Satongkin nari Amang, Inang, adong dope na tapaima.”

Dung manang sadia leleng, ro ma sahalak parabit na uli. Mansai gaga pardalanna idaon, martungkot na marulu bosi. Nangkok ma ibana jala dipahundul tu hambirang ni supir i, dung i pintor mardalan ma bus i. Muningan ma roha ni angka panompang mandok: “Ise do on? Holan paimaima on, ingkon harsean iba jala borngaon.”

Sahat di Pematangsiantar, mijur ma angka panompang. Amanta parabit na uli i pe mijur ma laos mardalan mandao sian bus i. Pintor marlojong ma kenek ni bus i mandapothon ibana mangido ongkosna. Umbege i mansai muruk ma Amanta i, didok: “Aha nimmu, ongkos? Ndi on,” ninna huhut dijullakhon tungkotna na marulu bosi i mansai gogo tu butuha ni kenek i. Mansai muruk ma kenek i, ai ndang diboto manang aha salana jala ndang na iran hansitna dihilala. Ala ni i pintor dipuhung ma tanganna naeng maninju. Marnida i, pintor hapogan ma supir i mangambat ibana. Ditangkup ibana, jala ditogu mandao sian Amanta i, laos didok: “Nunga sae i, laho ma ho, marjea hita annon.” Dung i, sumurut ma kenek i tu pudi ni bus i, mardalan mamungkukmungkuk; songon na ngal nama hosana mangae hansitna. Ise do Amanta i umbahen songon i murukna holan ala na dipangido kenek i ongkosna? Oh, ibana do hape nampuna bus i.

Sian barita i boi ma enetonta parsiajaran, marjea do hape na so mananda angka na patut tandaonna. Nunga songon i antong uhumna, patut do parkarejo mananda indukna, patut do anak sikola mananda guruna, patut na niuluhon mananda uluanna, jala patut do soldadu mananda pangulimana, dohot angka na asing. Molo ndang songon i, boi do halak sala marpangalaho di adopanna, gabe tarila manang marjea.

Sian saluhut na patut tandaon, sada do na lumobi, i ma Debata naung ro manopot hita di bagasan AnakNa Jesus Kristus. Ro do Ibana paluahon hita. Molo tatanda jala tajangkon Ibana di bagasan haporseaon, basabasahononNa ma tu hita hadameon, jala boanonNa hita tu hasonangan. Alai sabalikna, tu angka na so mananda ndang boi so marsak Ibana jala manolsoli, marro ni rimas jala mandabu uhum. Apala i do naung masa tu halak Jahudi, di na nidokNa: “Aut di arim on ma nian ditanda ho na tau padamehon ho. Alai naung gabe buni do i nuaeng sian matami. Ai na ro ma muse angka ari manahopi ho; hubuon ni musum ma ho disi, halianganna jala sosahonna ma ho humaliang. Jala panepneponna ma ho rap dohot anakkonmu di tongatongami, jala ndang pasombuonna nanggo dua batu martinditindi, ala na so ditanda ho tingki panopoton na tu ho.” (Luk.19:42-44)

Read More..

Manguluhon Liturgi

MANGULUHON LITURGI

Hira di sude hurianta HKBP, marasing do halak ni na marjamita sian na maragenda di parmingguon. Ulaon parjamitaon godangan do i dipasahat tu angka pandita. Hira so hea do angka pandita maragenda, jumotjot do angka sintua, dung i guru huria, bibelvrouw, diakones, dohot evangelis. Nang pe songon i, unang gabe so diboto pandita maragenda, ai manang na boha pe pandita i do uluan dohot panungkunan di huria manang ressortna, tarmasuk dohot di ulaon paragendaon i.

Ingkon tangkas do pangaradeon ni paragenda tu paragendaon i. Tung na so jadi adong pingkiran na magarajumi na ulaon na mura do i. Tangkas do pilliton angka ayat introitus dohot tangiang na hombar tu sadasada minggu di sada taon parhuriaon. Di deba minggu, ndang pola adong sipilliton ai holan sada do ayat, sada dohot tangiangna. Alai di deba minggu, isara di tingki Trinitatis, adong do manang na piga ayat dohot tangiangna, jala ingkon pilliton ni paragenda i do sada sian i. (Di tingki na parpudi on, nunga dipillit angka ayat introitus, tangiang pamungkaan, tangiang panopotion di dosa dohot bagabaga hasesaan ni dosa di Impola. Hita ma manimbangi manang na mendidik i manang ndang).

Mangeahi hadengganon ni paragendaon dohot parmingguan, ingkon "kuasaan" ni paragenda do suasana di gereja i. Ibana do na "maniop komando" di parmingguon i, na "mangatur" angka kegiatan na hombar tu unsur-unsur ni liturgi. Molo adong do sound system, tangkas ma i dipangke paragenda i, ai ndang holan jagarjagar i umbahen dituhor, alai ingkon gabe pangurupi situtu do i tu hadengganon ni parmingguon i. Manang sadihari pe, ingkon parateatehononna do manang naung cukup torang soarana tarbege di sandok inganan parmingguan i. Ndang ingkon tongtong gogo, tingki holan sahalakna manghatai, boi do numanget, asal torang di sude. Alai di na rap sude huria i marsoara, isara di na marende manang di na manghatindanghon haporseaon, ringkot do gumogo, asa boi seirama sude. Molo so adong pe sound system ingkon tongtong do i parateatehononna. Hombar tusi, ingkon diboto paragenda do logu dohot irama ni ende na niendehon di kebaktian i. Di tingki na parpudi on, nunga lam godang huria mamangke pemandu lagu manang song leader. Marhite i diorui do deba beban ni paragenda i. Alai sijagahonon do disi asa seirama paragenda dohot parmusik raphon song leader, unang gabe sabalikna masiboan lehengna be.

Di huria na torus dope mamangke sistim protokoler, ingkon sadar diri do paragenda i paboa na paragenda do ibana, ndang master of ceremony (MC). Ala ni i unang godang hatahatana (Pjm.5:1). Sai dipangke ma joujou manang seruan na paling netral. Rupani, di na mangarahon marende sae ma molo didok: “Marende ma hita, sian Ende Nomor ...” Unang pola dipaganjangganjang i maniruniru gaya ni MC isara na mandok songon on: “Taparade be ma endenta, tapuji ma Tuhanta, marende ma hita marhite Ende Nomor ...” Ndang sintong i, ai ndang na mangarahon parade ende ibana, mangarahon marende do; dung i, ndang sude ende na diendehon di parmingguon i pujipujian, adong do tangiang, adong poda, adong panopotion, dohot na asing. Nda geok do i molo didok paragenda i: “Tapuji ma Tuhanta, marende ma hita sian Ende Nomor 165:2” ninna, hape hata ni ende i mandok: “O Tuhan hutopoti ma luhutna dosangki. Asi rohaM sai sesa ma, di Ho ma tondingki.” Somalna, marningot angka dosana, tar dondon do panghilalaan ni halak mangendehon i. Sahat ro di na tariluilu tahe adong do. Rangkak do halak na boi mangendehon i hinsa songon na patut di ende na marrumang pujipujian. Laos songon i di na manggorahon parkoor, sae ma molo didok: "Marende ma koor adui." Unang pola dipaganjangganjang i maniru gaya ni MC, isara na mandok: “Nuaeng nilehon ma kesempatan tu koor ... laho patubegehon kesaksiannasida.” Kesaksian aha i? Atik boha do jamita isi ni endenasida i, atik boha do poda, tangiang, dohot na asing; ndang kesaksian manang panindangion. Apalagi so tung ma didok agia ise: “Tabege ma marende koor ni ianakhonta naposobulung.” Ai holan hita (huria i) do huroha na naeng umbege ende i, nda dohot do Debata, surusuruanNa bahkan sibolis? Manang na dirimpu paragenda i do na holan milik ni na dewasa do parmingguon i? Boha ma molo adong disi remaja na umposo dope sian naposobulung na marende i na dohot niajak ni paragenda i mambege endenasida i? Na dohot do angka remaja i marianakhon tu naposobulung na marende i?

Taringot tu penampilan, ingkon hormat, daulat, jala badia. Tu sangkap i, denggan do pangkeon angka atribut naung baku di HKBP. Rupani, baju tohonan manang toga di pandita, baju parhobas di guru huria, bibelvrouw, diakones, evangelis, dohot sintua. Tung na so niantusan be i molo ro losok ni roha ni pandita marbaju toga manang angka guru huria, bibelvrow, diakones, evanggelis dohot sintua ndang marbaju parhobas di tingkina be. Ndang sipaubaubaon rumang ni atribut i asa songon na hebat. Pinatudos tu baju toga ni huria na asing, songon GKI, GPIB, dohot GKPI memang lebih sederhana do baju toga ni pandita ni HKBP. Gabe adong ma nuaeng angka pandita na lomoan rohana mamangke baju toga na sian Departemen Agama RI na suman tu baju toga ni GKI, GPIB, manang GKPI. Baju toga na jinalona sian huria di tingki manjalo tohonan hapanditaonna gabe dipasahat ma i pangkeon ni lamarina. Songon i godang do huria na paubaubahon rumang ni baju parhobas ni sintua. Hira rangkak nama tahe nuaeng idaon baju parhobas na dos tu rumangna na asli. Pangurupi situtu do baju tohonan dohot baju parhobas i tu hatohomon ni ulaon dohot na mangulahon i.

Ingkon jongjong do na manguluhon parmingguan i di atas ni dirina sandiri, unang gabe di diri ni na asing. Sinode Godang 53 HKBP mandok: “Pelayan gereja hendaknya tidak menunjukkan gaya yang dibuat-buat dalam melaksanakan tugasnya….” Unang rupani dipaasingasing parjongjongna, panghataion, manang parendeonna asa songon na jago; unang dipatirutiru gaya ni na asing ai ndang sai hombar i tu dirina. Sandok manang songon dia ibana, songon i ma.

Angkup ni i, di udut ni pandohan nangkin didok Sinode Godang 53 i dope: “…, serta setia pada kalimat-kalimat dalam agenda kebaktian, doa-doa, dan kata-kata yang sudah lazim dan baku di HKBP.” Manang songon dia na tarsurat di agenda i songon i ma dijaha, unang dipaubauba manang ditambatambai. Taringot tu partuaon panutup ni turpuk di ari minggu ma rupani, sai adong do paragenda na manambai, didok: “Martua ma angka na umbege hata ni Debata jala na umpeopsa, jala na mangulahonsa.” Hea do hubege diparsoalhon i di sada huria. Didok na mandok i: “Ingkon tambahonon do i, ai ndang sae holan peopon hata i, ingkon ulahonon do.” Mangalusi i hudok: “Tinambaan pe i songon i tong dope ndang singkop. Ai boi do hata i diulahon antong sian na tarpaksa manang sian roha na marsipaulaula. Ala ni i, ra, ringkot ma i muse tambaan gabe songon on, jala na mangulahonsa sian rohana na ias. Dung tinambaan i tarhilala ma muse tong dope adong na hurang, ai ingkon torang do di dia i ulahonon. Ala ni i, ra, tambaan ma i gabe songon on, jala na mangulahonsa sian rohana na ias di gareja dohot di huta, di hauma dohot di partigatigaan, di kantor dohot di parsikolaan, di ... di ... di... Gabe boi ma i mansai ganjang situtu, gumanjang tahe sian jamita.” Adong do pandita di na laho marjamita na manangianghon tangiang na bebas jala na ganjang, dung i dipaujung dohot tabe na mandok: “Dame ni Debata …..” Ninna rohangku na manegai konsentrasi ni parminggu i do ibana disi, ai ndang diparade huria i dirina tu tangiang sisongon i. Didok sada halak: “Sada na tumabo huhilala di parmingguan ni HKBP on do, na parjolo sahali binege sian pandita i i ma hata ni Debata na polin, ndang tangiang na ganjang, ai anggo i do na boi terkontaminasi do i binahen ni hagiot dohot pingkiran ni hajolmaonna.” Adong do muse pandita na pamalohu gabe boi manjaha na so tarsurat, ai tagan so tangiang Ale Amanami didok do songon on: “Tapaujung ma nuaeng parmingguonta on, martangiang ma hita.” Laos songon i di na laho pasahathon hata pasupasu i didok: “Mulak ma hamu di bagasan dame, jalo hamu ma pasupasu ni Debata Amanta i.” Jala di na manghatahon pasupasu i adong do tong na so konsisten, ai didok songon on: “Dipasupasu jala diramoti Tuhan Debata ma ho! Disondanghon Tuhan Debata ma bohiNa tu ho, jala asi ma rohaNa mida ho! Didompakhon Tuhan Debata ma bohiNa tu ho, jala dipasaorhon ma dameNa tu tondimuna be!” Sasintongna, ingkon tondim padanan ni ho; tondimuna be padanan ni hamu do i.

Na parpudi, didok na mandok: “Manusia bersifat silap.” Manang na boha pe malona, jala boha pe pangaradeonna sai adong do tingkina sala paragenda i. Molo masa na songon i, unang ma gabe didondoni hasalaanna paragenda i, alai ingkon marusaho do ibana hatop malua sian i. Molo sempat ibana didondoni, sai mandatdati nama i sala, gabe lam so diboto be sibahenonna.

jkt.05.09.2009

Read More..

19 Trinitatis

SERMON JAMITA TU MINGGU 19 DUNG TRINITATIS, 18 OKTOBER 2009
2 Mus.4:10-17

Gunung Sinai

Patujolo

Sabagian sian barita panjouon ni si Musa do turpuk on (2 Mus.3:1-4:17).

Dung dipapatar Debata diriNa tu si Musa, disuru do ibana tumopot Raja Parao dohot paruarhon bangso Israel sian Misir (2 Mus.3:10). Maradophon parsuruon i manjua do si Musa. Dipatujolo do lima sidalian. Tolu sian i, dipajojor di jolo ni turpuk on. Na parjolo, dirina. “Ise ma ahu pola,” ninna. Dihilala mametmethu do ibana maradophon Parao, mametmethu huhut gabe partogi ni Israel ruar sian Misir. Ra, panghorhon ni biar dohot kegagalanna sinajolo i do i, na mamaksa ibana ingkon maporus tu Midian (2 Mus.2:12-15). Na paduahon, hadirion ni Debata na buni. “Ise goarNa (goar ni Debata i)?” ninna. Dung marratus taon di Misir, nunga holip be hadirion ni Debata ni si Abraham, si Isak, dohot si Jakob sian bangso i. Ra, mangolu dope anggo parningotan taringot tu Ibana, alai ise do goarNa jala boha do Ibana, adong do pardomuan ni i tu nasida, boi do Ibana jouon jala parsaorhonon nasida, ndang adong be na umbotosa. Antong boha ma bahenon ni si Musa paboahon i tu Israel? (2 Mus.3:13-22). Na patoluhon, Israel. “Ndang porsea nasida di ahu,” ninna. Boha do si Musa meyakinkan bangso i paboa na tutu ibana pajumpang dohot Debata? Aha buktina? (2 Mus.4:1-9). Di turpuk on, mangihut ma muse sidalian na paopathon dohot na palimahon.

Hatorangan

Sidalian paopathon, hagaleonna. “Ndang parhata ahu,” ninna. Ndang parhata, lapatanna ndang malo (fasih) manghatai. Na songon i boi do i ala ni hambatan fisik, ala na hallang manang ala na dokdok pamangan dohot dilana; alai boi do tong ala ni hambatan psikis, ala ndang apala ringgas rohana manghatai (parhohom) manang ala hurang kemampuanna marbahasa. Si Musa sandiri mandok, ia so parhata pe ibana ala ni hambatan fisikna do, ai dokdok pamanganna jala hallang dilana. Sian alus ni Debata na di ay.11 pe, dapot do didadap roha na sintong do songon i. Alai na gabe tubu do hamaolon ai di Ul.7:22 didok si Stepanus do taringot tu si Musa: “... Gabe malo ma ibana di hata nang di ulaon pe.” Boha do i? Adong do na manguji patoranghon i songon on. Di mulana malo do si Musa manghatai. Alai na gabe hallang do ibana muse ala ni liku-liku ni ngoluna. Taboto, holan sangombas do ibana mian di tonga ni keluarga dohot bangsona. Dung i, magodang di istana ni Parao nama ibana, di lingkungan ni Misir. Tontu diboto do hata Misir, jala i do na dipangke leleng ni 40 taon. Hata Heber pe ra, diboto do, alai jarang do i dipangke. Salpu i, ingkon maporus jala mian ibana di tano Midian, jala mamangke hata Midian leleng ni 40 taon. I pe, ala jotjotan di parmahanan do ibana, gabe lelengleleng do ibana ndang manghatai dohot jolma. Luhutna i boi mambahen ibana gabe mengalami duansa, baik hambatan fisik manang pe hambatan psikis di panghataion. Marhata Misir hallang, marhata Heber pe songon i. Tabayanghon ma, 40 taon ndang mamangke hata i, aha so gabe hallang? Hape ingkon manghatai ibana tu Raja Parao, songon i dohot tu halak Israel.

Diboto Debata do na so parhata si Musa. Alai nang pe songon i ndang na sala pillit Ibana. Ibana do sitompa jolma marpamangan, marpinggol dohot marmata; Ibana do sibahen na mangungu, na nengel dohot na marnida. Molo marhuaso Ibana manompa pamangan, laos marhuaso Ibana nang mamangke i hombar tu lomo ni rohaNa. Boha pe hagaleon ni si Musa, boha pe dokdok ni pamangan dohot hallang ni dilana, haurupan Debata do ibana.

Di ay.14 sahat si Musa tu sidalianna na palimahon, panjuaonna. “Iale Tuhan, ua suru ma manang ise lomo ni rohaM,” ninna. Apala on do sasintongna punsu ni saluhut sidalianna i, manjua do ibana di Debata. Ndang porsea ibana di Tuhan i, ala ni i ndang olo ibana suruonNa. Molo ringkot di Tuhan i jolma sisuruonNa, disuru ma manang na ise pe taho na sumuman di rohaNa tu ulaon i, na umpistar di panghataion jala na gumogo (LXX: dunamenon/powerful/lebih dinamis) sian ibana. Sian i torang, ndada panandaon di diri (kesadaran akan kelemahan) na pinatujolo ni si Musa di sidalianna i, hakorason ni rohana do, hajogalon dohot hasounduhonna.

Alai tahi ni Debata ingkon saut. Ndang taralo agia ise Ibana. Hombar tu hagogoonNa, marhuaso do ibana manaluhon hakorason ni roha ni jolma. Dison, ditaluhon Debata do hakorason ni roha si Musa marhite na papatar rimasNa. Ndang rimas na mangalengsehon, alai na mangorui sahala manang wibawa di bagasan parsuruon i do. Sahalakna hian do disangkapi Debata jouonNa, sahalakna hian do naeng suruonNa, jala tu sahalakna hian do naeng basabasahononNa sahala partogi. Alai ala ni panjuaonna, ingkon oruan ni Debata ma sahala i sian ibana jala sagihononNa deba tu si Aron, hahana i. Dison, digoar do si Aron marga Lepi (Heb. ha-Leewiy/the Levite/orang Lewi) Goar on na marhahonaan do tu hamalimon ni si Aron (ndang marga, ai anggo i do si Musa pe marga Lepi do). Ra, na ditambahon di pudi do i, ai so diaturhon dope hamalimon ni si Aron i hatiha i. Na pande do si Aron i manghatai. Ndang adong hambatanna, boi marhata Misir dohot marhata Heber. Saut do i, ai apala di ombas i disungguli Debata do si Aron asa ro mandapothon si Musa, jala nunga pola borhat ibana. Ra, na naeng manjou si Musa do tahina asa mulak tu Misir ala naung mate sude angka na tumahi hosana (pat.ay.19). Alai manang na i pe i, ndang simbil i sian sangkap ni Debata (pat.ay.27).

Pardomuan ni si Musa dohot si Aron di ulaon i suman do tu pardomuan ni Debata dohot panurirang. Ampehonon ni Debata ma hataNa tu pamangan ni si Musa, dung i pasahaton ni si Musa ma i tu si Aron, jala si Aron ma muse na pasahathon i tu bangso i. Gabe hira sipadas hata ni si Musa ma si Aron di bangso i, hira pamangan (panurirang) ia di si Musa, jala si Musa hira debata ni si Aron. Hira debata (Heb. lee-’Elohiym/instead of God/seperti Allah) maksudna, na marhahonaan do i tu pardomuan ni Debata tu panurirangNa. Holan na jinalona sian Debata do sihatahonon ni panurirang, ndang boi non i ambaan manang oruanna, ndang boi patajomon manang patampahonna. Songon i ma si Aron, manang aha na jinalona sian si Musa, ingkon i do hatahononna, ndang boi ambaan manang oruanna. Si Musa pe songon i, nasa hata na niampehon ni Debata tu pamanganna, ingkon i do pasahatonna tu si Aron. Hombar tusi didok, donganan ni Debata do pamangan ni si Musa, dongananna nang pamangan ni si Aron, podahononNa do tu nasida sibahenonnasida asa unang adong na lipe.

Di ay.17 dipaingot Debata do si Musa maniop tungkotna. Tungkot aha i? Tungkot naung adong hian do i di si Musa, na pinangkena marmahan na sai laonna i (ay.2). Tungkot na somal do i nian, alai hombar tu lomo ni rohaNa dipangke Debata do i gabe partanda ni huaso dohot hagogoonNa na sai tongtong mandongani si Musa. Marhite na maniop dohot na mamangke tungkot i boi do pos roha ni si Musa paboa na margogo ibana di bagasan hagogoon ni Debata laho patupa angka halongangan dohot manguluhon bangso i songon sahalak partogi. Jadi, songon tongkat kepemimpinan manang tongkat komando. Sipata, digoar do i tungkot ni Debata (4:20; 17:9).

Sipahusorhusoron

“On pe, laho ma ho, suruonHu ma ho tumopot Raja Parao, asa di paruar ho bangsongKu, halak Israel i sian Misir,” ninna Debata tu si Musa (2 Mus.3:10). Sada rancangan dohot parsuruon na luar biasa do i. Na luar biasa, ai sahalak naung gagal do si Musa paluahon bangso i (2 Mus.2:12-15); sahalak na tarrajum tu daftar pencarian orang (DPO) di Misir, buronan na maporus jala martabuni di Midian, na gale jala na koras roha. Hape mansai balga jala maol do ulaon i, godang tantanganna na marharoroan sian Raja Parao dohot sian Israel sandiri. Alai ndang na sala pillit Debata di si Musa, ndang na sala marsuru, ai ulaon haluaonNa i ndang ojak di hadirion ni jolma, di Debata do. Ala ni i, ndang diuba Debata hadirion ni si Musa i, ndang gabe disingkati hagaleonna i marhite hagogoon, alai dijanjihon do anggo pandonganionNa. Dilehon huhut pandonganina, si Aron; songon i tungkot partanda ni huaso dohot hagogoonNa na tongtong mandongani ibana laho patupa halongangan dohot manguluhon bangso i.

Songon i, na luar biasa do i molo didok Jesus tu sisean i: “Laho ma hamu, podai hamu ma saluhut bangso, didi hamu ma nasida tu bagasan goar ni Ama, Anak dohot Tondi Parbadia. Laos ajari hamu ma nasida mangaradoti nasa hata naung Hupatikhon tu hamu. Ai ida ma, sai na dongananHu do hamu ganup ari, rasirasa ro ajal ni hasiangan on.” (Mat. 28:19-29). Na luar biasa, ai sampuludua do sisean i jala angka jolma na somal. Marhite na sampuludua i ma naeng dungdungon ni Jesus saluhut bangso laho paluahon, hombar tu na nidokNa i: “Na porsea jala tardidi, dapotan haluaon; alai na so porsea i, hona uhum do.” (Mrk.16:16) Ndang rancangan na muluk-muluk i manang na utopis, ai ulaon haluaon i ndang ojak i di diri ni sisean i, di Ibana naung gabe hasahatan ni nasa huaso na di banua ginjang dohot na di tano on do (Mat.28:18). Ala ni i, atik pe mansai na mura do i nian patupaonNa, ndang diuba Jesus sisean i asa gabe angka jolma na luar biasa. Tu si Paulus na hona basirbasir di sibukna i didok do: “Tuk ma asi ni rohangku di ho, ai di hagaleon do sun timbul hagogoon.” (2 Kor.12:9). Dipasombu do nasida songon i, alai dijanjihon do pandonganionNa jala digohi do i.

Ulaon parsuruon i ditorushon do tu huria di sepanjang abad, tarmasuk tu hita huria angka na mangolu di tingki on dohot di inganan on. Hombar tu hata ni turpuk on, na tarjou do hita di tingki on mamaritahon haluaon tu angka na tarhurung dohot na ginosagosa, angka na tertindas jala na agoan hak dohot martabat hajolmaonna (pat.Luk.4:19). Godang do penindasan manang pangarupaon na masa nuaeng on di tongatonga ni masyarakat dohot bangsonta. Angka na gogo rupani mangarupa na gale, na pistar mangarupa na oto, na mora mangarupa na pogos, pengusaha mangarupa parkarejona, penguasa mangarupa parripena. Turpuk on manjouhon asa tabaritahon tu nasida haluaon, jala asa tatogihon nasida ruar sian pardangolanna. Songon dia do asa tarpatupa hita i? Parjolo sahali, ingkon adong do di hita haoloon; haoloon berpihak, mangantoi, mangurupi, dohot paluahon. Songon si Musa na marhagaleon, hita pe ndang ingkon borhat sian hagogoon, boi do sian hagaleon; ndang ingkon sian na godang, boi do sian na otik. Ndang ummaol di Debata mangurupi na gale sian na mangurupi na gogo, jala ndang ummaol di Ibana manumpahi na otik sian na manumpahi na godang. Na paduahon, ingkon mangula hita di bagasan kebersamaan. Tu si Musa na so parhata i, dilehon Debata do si Aron bahen pangurupina. Songon i do hita ingkon mangolu jala mangula di bagasan kebersamaan. Dokdok jala maol do ulaon i, diigil do godang pamingkirion. Ndang tarula jala ndang haantusan sada halak i, alai ingkon na rap do sandok huria i patupahon i, masiurupan, masitungkolan, jala masitumpahan. Di bagasan kebersamaan i do huria i manimbangi manang dia do lomo ni roha ni Debata na hombar tu ulaon i. Na patoluhon, ingkon mangolu do hita di bagasan haporseaon. Tu si Musa dilehon Debata do sada partanda ni hagogoonNa na mandongani ibana, i ma tungkotna sandiri. Ganup ditiop jala dipangke tungkot i porsea ma ibana di pangurupion ni Debata gabe margogo patupa angka tanda dohot manogihon bangso i. Songon i, marbagabaga do Tuhanta Jesus Kristus paboa na dongananNa do hita tongtong. Porsea di pandonganionNa i, margogo do hita.
jkt.15.09.2009/mvs

Read More..

18 Trinitatis

SERMON JAMITA TU MINGGU 18 DUNG TRINITATIS, 11 OKTOBER 2009
Joh.13:12-17

Patujolo

Sabagian sian barita pamuri ni Jesus di pat ni angka siseanNa do turpuk on (13:1-17).

Barita hapunjungan ni si Johanes do i, ai holan ibana do na manurathon i. Dihaporseai halak do na masa do i di borngin uju na tarjehe Jesus (1 Kor.11:23) di tingki na mangan paska i nasida, dohot di na manotophon parpadanan na badia i. Dohot hata na asing, na tolu peristiwa i masa do di bilut parginjang (Mrk.14:15 par). Taringot tu tingki manang sadiharina, manang na di jolo ni parmanganon paska i non i, manang di parholanganna tu na pahothon parpadanan na badia i, manang na di pudi ni na dua i, ndang adong hadosan ni pamingkirion.

Alai marojahan tu 13:1 na mandok: “Mandapothon pesta Paska i,” dipadomu tu 13:30 na paboahon naung borngin hatiha i, adong do na mandok na so di bilut parginjang hajajadi ni na masa i. Didok songon i, ai molo dung borngin, nunga margonti ari. (Ingot, di halak Jahudi di hamimintop ni mata ni ari do pargontian ni ari). Jadi, molo di sada borngin do hamamasa ni na tolu i, ndang dohononna be i mandapothon pesta Paska, ai nunga Paska hatiha i. Dung i, marningot godang ni kegiatan ni Jesus di parholangan ni halalaho ni si Judas sahat tu ombas ni panjeheon i (13:31-17:26), ra, ndang pintor tu Getsemane dope si Judas laho hatiha i, alai tu godung ni Sintua ni Malim dope laho martuptup dohot angka sintua ni malim raphon angka sintua ni bangso i (pat.Mat.26:3, 15). Hombar tusi, boi do suraon ni roha, di Betania do hamamasa jamita on, dua ari andorang so Paska i (ida Mat.26:2). Boi do i laos di jabu ni si Simon na huliton i, dung salpu pamiahion ni Jesus na pinatupa ni sada parompuan [si Maria? (Mat.26:6-7)], manang di jabu na asing di parmanganon bodari. Ihut tusi sahat ro di marsogotna botari ma ra angka na masa di 13:31-17:26; jala di bodarina ma anggo na manganhon paskah dohot na marulaon na badia na diihuthon panjeheon i.

Hatorangan

Ndang diantusi sisean i pambahenan ni Jesus na tu nasida i (ida ay.7). Ndang hinata, ai andorang so i hira so adong do alasan na rasional na mangonjar Jesus mambahen songon i. Di ay.12 dipungka Jesus ma patoranghon i, didok: “Ai diantusi hamu do pambahenanHi tu hamu?” Ndang sungkunsungkun na mangigil alus i, alai na manghehei rohanasida do laho manimbangi pambahenanNa i sandiri dohot marateatehon lapatanna angka na naeng sipatorangonNa dope. Dohot pandohan na asing, ndang sungkunsungkun na interogatif i, na imperatif do; hira na mandok: “Timbangi hamu ma pambahenanHi tu hamu!” Marhite panimbangion, ungkap ma nasida tu pangantusion na umbagas na sian Tuhan i.

Guru (didaskalos), lapatanna pangajari (master). Tuhan/tuan (kurios/lord), lapatanna parhuaso (penguasa/ruler) manang nampuna (pemilik). Dihonahon do i jotjot tu Debata ai Ibana do nampuna (proprietor) dohot penguasa ni saluhut na adong, jala di Padan na Imbaru dihonahon mansai jotjot tu Jesus Kristus. Di halak Jahudi, na dua goar ondeng (guru dohot tuan) dihonahon do tu angka guru (rabbi) na botulbotul diokui hapistaranna. Dihonahon siseanNa do i nang tu Jesus, ai digoar nasida do Ibana Guru jala Tuhan. Jesus i pe antong, ditohoi do i jala dijalo, ai i do Ibana tutu. Ibana do Guru ni na porsea i, na mangajarhon jala na menginstruksikan hasintongan dohot aturan ni ngolu, panurirang na papatarhon lomo dohot sogo ni roha ni Debata, sitangihonon jala sioloan, sitiruon jala siihuthononhon. Ibana do Tuhan hasahatan ni saluhut huaso na di banua ginjang dohot na di tano on (Mat.28:18), Raja ni angka raja jala Tuhan ni angka tuan (1 Tim.6:15); Ibana do nampuna na porsea i, na manghuasoi jala manggomgomi;. Manang ise na manggoari Jesus i Guru jala Tuhan ingkon antusanna do paboa na so holan gelar panghormation i, alai tung na sasintongna (kenyataan) do; jala ndang ringkot i dohonon anggo sian na tarpaksa, ingkon sian nasa roha dohot tondi do. Manggoari Jesus Guru jala Tuhan sada panindangion do i sian na porsea i paboa na rade ibana manangihon jala mangoloi Ibana, rade maniru pambahenanNa jala mangihuthon Ibana di dalanNa.

Di ay.14-15 sahat ma Jesus tu sintuhu ni pambahenanNa i, didok: “Asa molo Ahu, Tuhan jala Gurumuna mamuri patmuna, tama ma hamu masiburian pat. Ai sitiruon do Hulehon tu hamu, asa dibahen hamu songon naung Hubahen i tu hamu.” Adong do na mangantusi pandohan i secara harfiah, songon pelembagaan ni sada upacara keagamaan, i ma na masiburian pat. Alai toropan do na mangantusi i songon sada perlambang dohot tiruan sambing. Alasanna, parjolo: Ndang adong bukti manang petunjuk paboa na sada ibadah manang upacara keagamaan do na nidok Jesus disi, songon parpadanan na badia dohot pandidion i rupani. Na paduahon: Ndang hea i diulahon angka apostel di huria mulamula. Molo dipatupa pe i di huria na mangihut tu huria na parjolo i (ida 1 Tim.5:10), ndang adong bukti na sada ibadah kristiani do i. Na patoluhon, ndang adong latar belakang keagamaanna, ai adat panjangkonon ni tamue do i na dipasahat ulahonon ni hatoban.

Marhite pambahenanNa i disuanhon Jesus do haserepon ni roha tu sisean i. Andorang so i, nunga jotjot i ditaringoti Jesus (ida Mat.18:4;23:11; Luk.14:11; 18:14), alai sai lupa do nasida disi. Masigulutan nasida tahe taringot tu ise sian nasida na umbalga (Luk.22:24). Dison, marhite tiruan ‘na so tarhalupahon’ diulahi Jesus do mangajarhon i. Diajari do nasida asa olo patutoruhon diri laho manghobashon panghobasion na tumoru jala na lumea bahen hadengganon ni na asing. Ndang ringkot di nasida hatengaon (kebanggaan) diri na mambahen gabe so olo jongjong di inganan partoru, alai ingkon auhononna do tongtong paboa hatoban ni na asing do nasida ganup ari, jala na gabe dongan ni sesama jolma. Lumobi ala na gabe sipeakhon ojahan (peletak dasar, the founders) ni huria nasida, na talup manjalo hasangapon godang, gabe sipaingot do pambahenan ni Jesus on asa unang gabe madabu nasida tu ambisi haportibion, jala asa unang gabe lupa paboa panghobasion do sasintongna sintuhu (hakiki) ni ulaon dohot hajongjongannasida.

Sahali nari, di ay.16-17 diondolhon Jesus do manang songon dia ringkotna di sisean i maniru pambahenanNa i, didok: “Tutu situtu do na Hudok on tu hamu: Ndang umbalga anak somang sian indukna, ndang sumurung suruan sian na marsuru ibana. Molo diboto hamu i, martua ma hamu mangulahonsa.” Hasintongan na universal do na umbalga induk sian anak somangna, umbalga na marsuru sian na sinuru. Dison, Jesus do induk i, sisean i anak somangNa; Ibana do na marsuru i (pempsantos), sisean i na sinuruNa (apostolos, apostel). Molo Jesus induk jala na marsuru i rade patutoruhon diriNa laho manghobasi hajolmaon, ingkon songon i ma sisean i rade manghobasi sesamana. Ndang gabe moru manang mago hasurungan dohot hasangapon haapostelonnasida i ala ni i, sabalikna do tahe, songon Kristus i na manjalo hasangaponNa marhite sian hatoruhonNa (pat.Pil.2:9), songon i ma nasida gabe marsangap ala ni hatoruhonna i. Martua do na umboto jala na mangulahon i.

Sipahusorhusoron

Maniru Kristus, Imitatio Christi, sada pingkiran naung leleng do i diparungkilhon halak. Boha do na maniru Kristus i? Sian na jolo torus tu nuaeng ragam do pingkiran ni halak taringot tusi. Dipadomu na deba do i tu pangalaho angka na tarida manang na lahiriah. Rupani tu penampilan. Sitiru Kristus (Imitatores Christi) ingkon tampil songon Jesus Kristus, marsolop jahudi, marjanggut jala marganjang obuk (gondrong), dohot na asing. Na deba tu parngoluon. Imitatores Christi ingkon mangolu suman tu Jesus Kristus, pogos, ndang adong hepeahan ni uluna, marhabadiaon (dalam artian bertarak), selibat, sahat tu na mangalami stigmata (iposipos ni bugang ni Kristus) dohot na asing. Na deba muse tu sitaonon. Sitiru Kristus ingkon ditaon do songon na tinaon ni Jesus Kristus, diinsahi, dileai, dilelei, dilinsingi, sahat tu na dibunu manang mate martir. Taringot tusi, ndang passif na porsea i, ingkon aktif do mangalului sahat tu na memprovokasi situasi laho parohon sitaonon. Di Pilippina, tongon di ari parningotan hamamate ni Tuhan Jesus sai adong do halak na mangalinsingi, mamugangi, dohot na pasiaksiakhon dirina. Adong tahe sahat tu na diparsilanghon. Jala na asing muse tu pambahenan. Imitatores Christi ingkon ditiru do pambahenan ni Jesus. Taringot tu na masiburian pat ma rupani, maniru pambahenan ni Jesus di turpuk on, diulahon si Ambrosius do i di huriana, di Milan. Didok sahalak na margoar Austin: “Kristen na so mangulahon i dohot tanganna, diulahon ma i di bagasan rohana; alai molo adong kesempatanna, dengganan do molo diulahon i marhite tanganna. Manang dia na pinatupa ni Kristus, ndang maleahu i ulahonon ni halak Kristen.” Di Roma Katolik, diulahon Paus do i di ari Kamis Putih (White Thursday, i ma ari Kamis andorang so Jumat Agung) ganup taon. Di tingki na parpudi on, adong do kelompok-kelompok Kristen mangulahon i. Di hurianta pe tahe, di kelompok na tertentu, hea do i gabe sada mode.

Alai na maniru Kristus godangan do i marhahonaan tu parngoluon ni Jesus na rohaniah. Ndang tarsirang i sian lapatan ni na mangihuthon Kristus, i ma na mangolu di bagasan haporseaon dohot di bagasan parsaoran tu Kristus di praktek ni ngolu ariari. Haserepon dohot hatoruhon ni roha, pangarumarion dohot pansoadahonon di diri, haunduhon dohot pangoloion, angka i do ciri ni ngolu ni Jesus Kristus i (pat.Pil.2:5-8). Ndang ro Ibana asa dihobasi halak, Ibana do balik manghobasi jala mangalehon hosaNa bahen tobus ni torop halak. Ndang hea digulut rohaNa na manghuasoi jolma, alai dihasiholi do na manghobasi manisia; ndang hea dipatujolo na ringkot di diriNa sandiri, alai sandok diargahon do na patupahon lomo ni roha ni Debata; ndang hea dipatimbo diriNa sandiri, alai dirumari do diriNa bahen haluaon ni jolma pardosa. Apala i ma na dilambangkan jala diulahon Jesus di jamita on, di na binuriNa i pat ni angka siseanNa i. Na gabe tiruan ma i di siseanNa i asa nasida pe rade patutoruhon diri laho manghobasi hajolmaon.

Sada sipaingot na relevan do i tu angka parhalado lumobi angka na targoar uluan di huria. Songon na taboto, di pudi ni angka apostel manosak do tu huria i tondi huaso haportibion. Siangkup ni huaso partondion, digulut Paus do huaso haportibion. Suang songon i ma angka uskup ni ingananna be. Ndang holan di huria Katolik, di Protestan pe masa do i. Tutu ndang dipodahon i songon dogma manang aturan, alai na tubu do i sian roharoha ni angka parhalado. Di pardalanan ni HKBP, atik pe holan bahasa slang, hea do masa na tar lomo roha ni angka pandita ressort manggoari dirina KDH. [(Di tingki i, angka bupati dohot gubernur do na ginoaran K(epala) D(aerah) H(ukum)]. Ditanggapi sahalak pandita na matua do i hatiha i songon hapataran ni ambisi ni angka pandita di huaso haportibion. Ndang parsoadaon, sian tingki tu tingki, sai adong do parhalado na gulut di sangap, na ripe oloan, alai na so olo mangoloi halak; na ripe pasangapon, ndang olo pasangaphon na asing. Alai taboto ma, hasangapon ni Kristen ndang disuhat i sian godang ni halak na pasangap jala paolooloi ibana, na paihutihut jala patangitangihon ibana, alai sadia dao do ibana boi maniru hatoruhon ni Kristus di bagasan pangoloion dohot panghobasionna tu angka na asing.

Tinutup ma sipahusorhusoron on marhite hata ni ende na mandok:

Sai naeng do tiruonhu Ho Jesus Tuhanhi.
Di serep ni rohaMu nang pe di lambokMi.
Beha ma bahenonhu lao patupahon i?
Sai Ho ma ale Tuhan patauhon au disi.

Sai naeng do tiruonhu Ho Jesus Tuhanhi.
Di na niundukhonMu lomo ni Ama i.
Beha ma bahenonhu lao patupahon i?
Sai ingkon Ho o Tuhan patauhon au disi.

Beha ma bahenonhu maniru Tuhanhi?
Gok dosa do rohangku nang nasa daginghi.
Urupi au o Jesus, sai sesa dosangki.
Lopokhon tu rohangku holong ni rohaMi.

(Dikutip Gr.AH Siregar sian Buku Ende na Marragam No.526 di Immanuel Taon Pa-80 No.31 tanggal 24.12.1969 alaman 12; Logu Psaumenbuch No.462, somal didok logu baru ni Ende Huria No.279: Pasahat ma sudena na hinolsohonmi).

jkt.11.09.2009/mvs

Read More..

Jolma na imbaru

JOLMA NA IMBARU

“Alai gabe imbaru ma hamu, dung muba pingkiranmuna, asa tau hamu manimbangi lomo ni roha ni Debata, i ma na uli, na hinalashonNa dohot na sun denggan.” (Rom 12:2b)

Taringot tu jolma na imbaru, sada pingkiran na na godang do i dihatai halak di tingki na parpudi on. Ragam do panggoarina, isara na tinompa na imbaru, naung marngolu na imbaru, naung tubu paduahalihon, dohot angka na asing. Sude i adong be do ojahanna di Bibel i. Umumna, dihonahon do i tu hatauon dohot usaho ni jolma laho paubahon roha dohot paturehon parangena. Alai sasintongna, hajolmaon na imbaru i, parjolo sahali na marhahonaan do i tu ulaon ni Debata, ndada tu ulaon ni jolma. Fakta do na so tartompa agia ise dirina sandiri, ndang tapangolu manang tartubuhonsa; alai na tinompa do jolma i, na pinangolu jala na tinubuhon ni na asing. Laos songon i ma nang taringot tu haimbaruon i, ndang tartompa agia ise dirina asa gabe na imbaru, alai Debata do na tuk patupahon i. Di bagasan Kristus, nunga dipatupa i. Hajolmaonta na buruk i dipamate jala ditanom raphon Kristus i, dung i dipangolu muse raphon Ibana di bagasan ngolu na imbaru (Rom 6:3-4). Tu nasa naung pinaimbaru songon i disosohon ma asa imbaru. Hira na mandok: “Nunga hupaimbaru ho (indikatif), antong imbaru ma ho (imperatif)!”

Songon i ma dison, disosohon do tu na porsea i asa paubahon (mentransformasi) sandok hadirionna marhite na paimbaruhon pingkiranna. Pingkiran (budi) lapatanna, hajolmaon parbagasan ni sasahalak. Jadi, hamubaon dohot haimbaruon i ingkon na marhahonaan do tu hadirion ni jolma na umbagas, ndada holan tu ngolu parduruna isara ni na marisap hian gabe so marisap. Marhite haimbaruon sisongon i dipatau do jolma i manimbangi manang dia do lomo ni roha ni Debata di hangoluanna ariari, dipatau mamolati na denggan sian na roa (Heb.5:14), dohot manghangoluhon hasintongan i di angka ari hasusaan (hari-hari jahat, Eps.5:16). Ndang ulaon na mura i, na maol do; na mangigil sandok haoloon do i laho mamarungkilhon manang dia do na uli na hinalashon ni roha ni Debata jala na sun denggan.

I ma siingoton jala siparrohahononta di na mandalani bulan Oktober on. Sitimbangan jala siparungkilhononta do manang dia do lomo ni roha ni Debata di parngoluon ni hurianta, di peribadahan dohot di panidangionna di umurna na pa-148 taonhon on (jamita Minggu 04.10.2009); sitimbangan jala siparugkilhononta do manang dia do na uli sipatupaonta laho maniru Tuhanta Jesus Kristus di hangoluanta ariari asa tutu hita angka na serep roha, na rade patutoruhon diri laho manghobasi angka dongan (jamita Minggu 11.10.2009); sitimbangan jala siparungkilhononta do manang dia do na hinalashon ni roha ni Debata sipatupaonta jala songon dia do hita mangulahon i maradophon angka na ginosagosa dohot na hona gaga di tonga ni masyarakat dohot bangso nang huria pe (jamita Minggu 18.10.2009); sitimbangan jala siparungkilhononta do manang dia do na sun denggan sipatupaonta di paraloanta di na mamolus hita di portibi on manuju tu paradianan na hot, i ma tano Kanaan na imbaru i (jamita Minggu 25.10.2009). Di bagasan parsitutuon ni roha, pos ma rohanta, sai na dapot hita do alus na topet, gabe ndang adong sisolsolan di angka pambahenanta. Dipargogoi Tuhanta ma hita disi. Amen.

jkt.01.10.2009/mvs

Read More..

17 Trinitatis

SERMON JAMITA TU MINGGU 17 DUNG TRINITATIS, 4 OKTOBER 2009
Ps.28:6-9

Patujolo

Mangihuthon isina, tarrajum do Ps.28 on tu psalmn tangiang pangidoan marsasahalak, i ma samansam psalmn na tinangiangkon ni sasahalak di bagasan sitaononna.

Marragam do sibonsiri ni sitaonon i, isara sahit, panginona ni dosa, dao manang sirang sian Debata, ganggu ni roha taringot tu ariari hatuatuaon, tarunjun dibahen hajahaton, tartuhas (fitnah), dihosomi halak so ada alana, dimusui, dilelei, ditindas, dohot angka na asing. Somalna, dipungka do angka psalmn sisongon i marhite joujou manang pangidoan tu Debata, dung i diuduti dohot deskripsi ni sitaonon i, jala dipaujung marhite panindangion haporseaon, hamauliateon, manang pujipujian tu Jahowa. Ps.28 on sandiri ditangianghon sahalak na talpe tu hamatean; manang na ala ni sahit i, manang na ala ni tuhastuhas ni musu, manang na ala ni hasusaan na asing na manghorhon gabe songon na dao ibana sian Debata. Sian ay.2 na mandok: “... molo hupaherbang tanganhu tu bilut habadiaonMu” disura roha, dipasahat ibana do tangiangna on di bagas joro. Dipungka ibana do tangiangna i marhite na pasahthon joujou dohot soara ni sombasombana tu Debata taringot tu sitaononna di na mangadopi angka parjahat (ay.1-2), dung i diuduti marhite pangidoan taringot tu uhum pamaloson tu angka parjahat i (ay.3-4), jala dipaujung di turpuk ari on marhite pujipujian, panidangionna haporseon, panghiriman, dohot pangidoan.

Hatorangan

Mansai tompu do humusor parpsalmn on sian joujou dohot tangiang na di bagasan hoihoi tu pamujion dohot panindangion haporseaon na taringot tu panangihon ni Debata di soara ni sombasombana. Pangalaho na songon i jotjot do tarjaha di buku Psalmn. Boi do i ala na pintor dijalo ibana alus sian Debata. Songon na nidok nangkin, ra, ditangianghon ibana do tangiangna on di bagas joro, jala dung simpul na martangiang i pintor ihut do dijalo ibana ramalan imam sian malim na marbagahon na tangihonon jala oloan ni Debata do tangiangna i. Boi do i ala pintor dihilala ibana pambahenan ni Debata na paluahon ibana sian hasosahanna i, na manuanhon hadameon tu rohana, hasonangan, dohot pos ni roha. Alai laos boi do i marpardomuan tu proses partubu ni psalmn on, na so di sada ombas alai dua tahap. Parjolo, dialami parpsalmn i do paraloan tu angka parjahat. Dung i di bagasan hagogotanna i martangiang ma ibana mangido haluaon tu Debata dohot pamalosonNa tu angka parjahat i. I ma partubu ni bagian parjolo (ay.1-4). Salpu i, ditangihon Debata ma tangiangna i, dipalua ibana jala diuhum parjahat i. Gabe dipuji ibana ma Debata ala ni i, jala dihatindanghon haporseaonna. I ma partubu ni bagian parpudi on (ay.6-9). Di pudi, dipadomu ibana sandiri (manang sada redaktur) ma na dua bagian i gabe sada psalmn. Didok ibana disi: “Pinuji ma Jahowa, ai nunga ditangihon soara ni sombasombangki.” Marhite pangalamanna i, di sada sisi, lam tangkas do tarida hinasintong ni haporseaonna tu Debata. Sian mulana nunga dihaporseai jala dihaposi ibana paboa sitangihon tangiang do Debata Jahowa i, pargogo (strenght) dohot lombulombu (shield/perisai). Mual ni gogo do Ibana, pangondingi na mangholangholangi jolma sian musuna dohot sian sinjatana. Ala ni haporseaon i do umbahen namarhaposan jala joujou ibana tu Debata di hamamasa ni sitaonon, jala dialami ma na sintong do haporseaonna i, ai dapotan pangurupion do ibana. Di sisi na asing, na gabe lam patoguhon rohana ma i laho manghaporseai dohot manghaposi Debata tu angka ari na mangihut. Parbue ni saluhutna i, gabe mansai las ma rohana jala marolopolop di bagasan parolopolopon na marpusathon Debata (teosentris).

Haporseaon dohot pangalamanna i ndang tarsirang i sian haporseaon dohot pangalaman ni bangso Israel. Ganup halak Israel ingkon do mengimani haporseaon ni bangso i gabe haporseaonna pribadi, jala hombar tusi laos boi ma ganup manghirim mangalami ulaon haluaon ni Debata na tu bangsoNa i gabe haluaonna pribadi. Dohot hata na asing, ganup halak Israel boi do porsea jala manghirim, molo dipalua Debata bangso i, paluaonNa ma nang ibana; songon i sabalikna, molo dipalua Debata sasahalak ala ruas ni Israel ibana, paluaonNa do nang bangso i. Hombar tusi ma didok dison: “Jahowa do pargogonasida.” Na nidokna disi, sarupa tu ibana, bangso i pe Jahowa do dihaporseai pargogona. Ala ni i, songon ibana naung mangalami haluaon sian Debata, songon i ma nang angka donganna sabangso tong ma nian mangalami ulaon haluaon na dos sian Debata. Haluaon ni bangso i, diulahon Debata do i jotjot marhite messias manang na miniahanNa, lapatanna raja. Suang songon ibana, raja i pe, Jahowa do partanobatoan ni angka hatuaonna (tumingkos: partanobatoan hatuaonna/benteng keselamatannya). Ala ni i sahali nari, sarupa tu ibana naung mangalami ulaon haluaon na sian Debata, songon i ma nian raja i mangalami ulaon haluaon ni Debata, jala di bagasan haluaon ni rajanasida i malua ma dohot na sabangso i. Hombar tusi dipaujung ma psalmnna i marhite tangiangna na mandok: “Sai tumpahi ma bangsoMi, jala pasupasu ma bangso na niainMi, sai parmahani jala usungi ma nasida ro di salelenglelengna.” Luhutna i dipasahat ndang ala ni diri manang ala ni bangsona, ala ni haburjuon manang hadengganonna, alai ala ni asi ni roha ni Debata do naung mangain nasida gabe bangsoNa, parjambaranNa. Marojahan tusi do ibana mangido panumpahion dohot pamasumasuon ni Tuhan i, mangido parmahanion dohot pangusungionNa di nasida salelenglenengna.

Sipahusorhusoron

Songon na boi jahaonta di Almanak, parningotan hatutubu ni HKBP do minggunta ari on. Sasintongna nian, 7 Oktober do hatutubu ni hurianta, ai di ari i, di 148 taon naung salpu, disi ma tongon dipungka ulaon sending na terorganisasi rapi di tano Batak. Andorang so i, mangolu dihasipelebeguon do angka ompunta. Mansai dangol do panghilalaannasida uju i. Alai songon na nidok ni endenta No.136:2 i, na joujou do dangolnasida i sahat tu surgo mangido tolong tu Jahowa i. Ditangihon Debata do joujou ni dangolnasida i, disuru do parbarita na uli tu tano Batak, jala di ari na nidohan ondeng marrapot ma opat pandita di Sipirok laho marsagi ulaon sending di tano Batak. Mansai arga do rapotnasida i, balga huhut panghorhonna, ai hatop do rarat Barita na Uli i jala jongjong huria di tano Batak. Ala ni i ma asa ditontuhon i gabe ari hatutubu ni hurianta HKBP. Nuaeng, songon halak angka naung ojak di huria i, songon dia ma hita patut mangolu?

Marojahan di turpukta di Minggu on, siparadeonta do dirinta asa gabe hasangapon dohot pujipujian di Debata. Pamujion di Debata ingkon diojakhon do i di panandaon di Debata. Ise jala boha do Debata sipujion i? Mangihuthon turpuk on, sitangihon tangiang do Ibana, pargogo, partanobatoan, jala lombulombu; na mamillit jala mangain hita gabe bangsoNa, sipartumpak jala pamasumasu, parmahan jala pangusungi sahat ro di salelenglelengna. Luhutna i na marhahonaan do tu haluaon. Sian i bolas ma dohononta, Debata Sipalua do Debatanta i. Hombar tusi ma hita ingkon mamuji jala pasangaphon ibana. Songon angka na pinaluaNa, marlas ni roha jala marolopolop hita mida Ibana di bagasan parolopolopon na marpusathon Ibana.

Pamujion i antara lain siulahononta ma i di parmingguonta. Mardomu tusi, sipamanaton jala siparungkilhononta do, dung 148 taon umur ni hurianta, boha do ulaning pamujionta di Debata di parmingguanta? Lam ture do, manang sabalikna gabe agoan makna? Adong do las ni roha dohot parolopolopon na marpusathon Debata (teosentris) di parpunguanta manang naung mardalan do parmingguonta i tanpa rasa dan tanpa emosi? Taantusi do ulaning lapatan ni unsur-unsur ni liturgi ni hurianta manang ndang? Jotjot do tarbege hata na mandok monoton do liturgi ni HKBP. Tiha do roha na puas do i sian hasopangantusion di liturgi i. Tutu, di angka tingki na parpudi on nunga lam torop halak tarmasuk parhalado na so tangkas be mangantusi liturgi i. Di hasopangantusionna, adong ma na paubaubahon manang na manambanambai. Ndang diboto na gabe ‘panegai’ do i tu lapatan ni sadasada unsur dohot tu keutuhan manang tu prinsip pokok ni liturgi i. Sijagahononta do, unang ala ni pangharonsothon ni roha ni sude di parpunguan na menghibur jala na bersemangat, so tung gabe madabu parmingguonta khususna, ibadahta umumna tu kebaktian na tanpa Allah. (Mardomu tusi, tapamanat ma hatorangan taringot tu liturgi di bagian na asing ni blog on).

Na paduahon, sisarihononta do asa dohot angka na asing dapotan haluaon na sian Tuhan i. Taringot tusi, songon institusi godang do naung pinatupa ni hurianta. Nunga leleng dung taulahon sending tu ruar, isara tu Enggano, tu Mentawai, tu Sengoi Malaysia; dung i diuduti muse tu Sakai, tu Pulau Rupat dohot tu suku-suku Jawa di Sumatera. Taulahon do nang sending tu bagasan, isara panghobasion tu kaum buruh dohot kelompok-kelompok marjinal. Alai songon huria (orangnya), ndang apala tardok dope hita naung missioner. Bolas dohonon, peran serta ni ruas di ulaon sending i hira holan na manangianghon do dohot na manumpahi. I pe, nunga tardok lam surut. Di mulana, mansai balga do peran ni Sending Batak na hibul tinanganan jala tinumpahan ni halak Batak tu harararat ni Barita na Uli di Uluan, Samosir, dohot tu Simalungun. Sahat tu dasawarsa pitupuluan, tarrajum tu na gumogo do Sending Batak di tongatonga ni angka seksi na adong di HKBP. Torop na manghaholongi dohot na manumpahi. Di tingki on, ndang apala songon i be. Tagoari do taon 2008 Taon Marturia. Alai marujung taon i, hira so adong do idaon na muba di panghangoluhonta ni hurianta di ulaon sending i. Sipamanaton jala siparungkilhononta do, boasa songon i jala aha do sibahenonta paulakhon tondi sending i?

Angkup ni i na mangolu do hita di tongatonga ni bangso dohot negaranta, di gomgoman ni pamarentanta. Songon hita, jolma do pamarenta i, angka na gale jala parhahurangan, na butuh di hagogoon dohot panumpahion sian Debata. Molo marhasonangan pamarenta jala marantu mangamudihon bangso dohot negaranta on tu tujuan songon na niamanathon ni undang-undang, marhasonangan do dohot hita. Hombar tusi, siparungkilhononta do, dung 148 taon umur ni hurianta HKBP, angka aha do naung tapatupa bahen hasonangan ni pamarentanta? Sadia dao do hurianta barani patubegehon soara kenabian asa malua nasida sian pangunjunan jala dapotan bisuk laho mangulahon ulaonna.

jkt.08.09.2009/mvs

Read More..