3.21.2010

Palmarum

SERMON JAMITA TU MINGGU PALMARUM, 28 MARET 2010
Mrk.14:3-9

Patujolo

Tarjaha do tong jamita on di Evangelium na asing (Mat.26:6 duu; Joh.12:1 duu; pat.Luk. 7:36 duu). Molo pinatudos, siangkup ni hadosanna, adong do tong parasinganna. Nang pe songon i, angka parasingan i ndang pola gabe manubuhon pangantusion na masialoan; sabalikna do tahe, na masipasingkopan do na sada tu na sada nari. Taringot tu inganan ni na masa i, sude do panurat i mandok di Betania, di jabu ni si Simon na huliton na jolo.

Hatorangan

Dua ari (14:1a) tagan so Paskah i (si Johannes mandok onom ari), dipauli sisean i do panganon ujuan di Jesus (Joh.12:1-2) di jabu ni si Simon. Ise do i? Asing ni hatorangan ‘na huliton na jolo’ ndang adong be na binoto taringot tu ibana. (Di sandok Evangelium i holan di jamita on do ibana martaringot). Sian pandohan i torang, nunga malum ibana. Alai sadihari jala boha parmalumna ndang binoto. Nang pe songon i ndang so mungkin na Jesus do pamalum ibana. Somalna, molo ro Jesus tu Betania, tu jabu ni si Marta-Maria-Lasarus do Ibana sorang (pat.Luk.10:38-42). Hape sahali on tu bagas ni si Simon. Tole muse, ndada holan na sorang boti, na manjalo panganon ujuan do. Tontu adong do bonsir ni i na marhahonaan tu dirina. Ra, ibana do na patupahon panganon ujuan i songon hataridaan ni las dohot mauliate ni rohana tu Jesus i. Dung i, ro ma tusi si Maria iboto ni si Lasarus (Joh.11:2) mantat sabotol miak narwastu na polin. Miak sisongon i na dipature halak Hindu do i sian urat ni samansam duhutduhut na margoar narwastu manang nardus (nardostachys jatamansi) na godang jala denggan tubu di Himalaya (di ketinggian 11.000 sahat tu 17.000 kaki dpl). Dikemas di botol alabaster (pat.Luk.7:37) sian batu pualam. Dipangke do i songon ubat dohot parfum. Manjaga unang use, laho menghemat huhut, mansai metmet do rungkung ni botol i dibahen. Huroha, nunga tung diparsinta si Maria miak na sabotol i tu Tuhan i. Ala ni i ndang maralangalang be ibana, diponggolhon do rungkung ni alabaster i jala diusehon sude miak i tu ulu ni Jesus.

Marnida i adong do sian na pungu i na marmungutmungut. Si Johannes mandok, si Judas Iskariot do i. Si Mateus mandok sude sisean i do. Ra sintong do, si Judas Iskariot do mamungka, dung i mangihut ma na asing. Ndang holan na marmungutmungut, dimuruhi tahe si Maria i. Boasa? Ai dibereng nasida do pambahenna i sian panatapan hajolmaon. Sian sudut pandang ekonomi, pemborosan do i, ai songon produk impor na berkualitas sangat tinggi, mansai arga do miak i. Mangihuthon si Judas, arga ni na sabotol i lobi do tolu ratus hupang/dinar. Hepeng na sai godang ndang na tanggung be i di sada keluarga na sederhana, nunga sae i balanjonasida sataon. Di rohanasida, masalpuhu do pambahen ni si Maria i. Molo holan na mamiahi do nian, isara ni na mamiahi tamue (pat.Ps.23:5; Luk.7:46), nda sae do sada manang duantetek? Somalna antong, sasantetek do i dipangke. Ala ni i do asa metmet rungkung ni alabaster i dibahen. Na santetek i pe, ndang hurang be hushus ni i. Asa, mangusehon miak na sai godang (sabotol) sahali mamangke, mubazir do i. Ala ni i ma asa didok: “Magopona i miak i dibahen.” Didok roha ni angka sisean i, dengganan do miak i digadis jala tuhorna i dibasabasahon tu angka na pogos. Pinadomu tu panindangion ni si Johannes (ida 12:6b), huroha, siangkup ni na manjalo silehonlehon tu na ringkot di nasida sandiri (pat.Luk.8:3), dipapungu angka sisean i do asiasi ni halak jala disagihon tu angka na pogos. Si Judas do maniop i. (Ala ni i do ra asa pintor boi ditaksir ibana arga ni miak i. Bendahara ibana antong, na somal mangetongi hepeng). Tolu ratus hupang lobi, nunga tung balga i tu kas diakoni ni sisean i. Hape ambolong ma i songon i sanghidop mata. Ala ni i muruk nasida. Ndang holan tu si Maria i, secara tidak langsung dohot do tu Tuhan i.

Jesus do na umboto lapatan ni na pambahenanna i. Sidodo roha do Ibana, na manangkasi jala menilai pambahenan ni ganup jolma. Ndang holan rumangna, dohot do motivasina. Sintong do panimbangionNa, ndang dung sala. Taringot tu pamiahion i didok: “Na uli do na binahenna i tu Ahu.” Di dia hinaulina? Di roha dohot di haporseaonna do, ai na manjoloani do ibana mamiahi pamatang ni Jesus songon di na mananom. Di jolo ni on, nunga manang na piga hali dipaboa Jesus sitaononNa, hamateanNa, dohot haheheonNa (pat.8:31 duu; 10:32 duu). Ndang so mungkin na tarbege do i tu si Maria. Alai molo so i pe, sian paraloan ni Jesus tu angka partogi ni bangso i naung lam tu sobuna, nunga ditatap rohana na laho marujung do i di pamunuon tu Tuhan i. Alai nunga ditatap roha dohot haporseaonna na hehe do Ibana muse. Haporseaonna i ndang tarhatahonsa dope i tu na asing. Boasa? Ai na pungu i angka halak na so olo porsea do di hamamate ni Tuhan i. Alai ia so tarhatahonsa pe i, saotihotikna papatarhon nunga diulahon i di pambahenanna i. Ala ni holong dohot hormatna tu Jesus, hombar tu adat pananomon ni Jahudi, lomo do rohana mamiahi Ibana di hamamateNa. Alai di bagasan haporseaonna i nunga laos ditatap na so sanga i ulahononna, ai keburu do Jesus i hehe. Tutu, tarlambat do angka donganna tu sangkap i (pat.16:1 duu par). Ibana sandiri ndang tarlambat, ai nunga dipatupa i dao jumolo. Ra, i do alana asa so dohot ibana di panaonon, parsilangon, dohot na mandulo tanoman ni Tuhan i di manogot ni ari parjolo dung Sabbat i. Hatorangan ni Tuhan i na gabe pinsangpinsang do i tu sisean na asing i. Ndang patut nasida mangarsahi halak naung parjolo sahat tu haporseaon. Kesempatan mambahen na songon i ndang sai adong, ai Jesus di bagasan rumang hajolmaonNa ndang hot di tongatonganasida. So pola piga ari nari marujung ma masa inkarnasiNa, ai mate ma Ibana, hehe jala manaek tu surgo, tu hasangapon hadebataonNa. Disi, ndang boi jala ndang porlu be agia ise patupa pambahenan holong na langsung tu Ibana. Anggo na manarihon na pogos, asal ma adong haoloon sai na boi do i ulahononhon. Boi, ai manang di dia jala sadihari pe, di sistem masyarakat dohot perekonomian na songon dia pe tongtong do adong na pogos. Dirajumi Jesus do pamiahion ni si Maria i songon pambahenan na bernilai khusus. Kekhususanna i ma di haporseaonna di Kristus na mate jala hehe tagan so hamamasana dope. Ala ni i dipaboa hian do na ingkon masuk barita ni na binahenna i tu Barita na Uli i. Na gabe sada teladan ma i di haporseaon na marpangulaon jala na marhatauon manatap dao tu jolo.

Rancangan Homiletis

Di ari on sahat hita tu Palmarum, minggu passion na parpudi andorang Pesta Parningotan di Hamamate ni Tuhanta Jesus sipatupaonta di ari Jumat na ro. Di ari on, nunga hira boi hita mambayanghon na jongjong hita manatap Ibana na tarsilang i, jala tabege soaraNa na mandok: “On do hutaon humophop ho, aha do diaton ho humpohop Ahu; songon on do holong ni rohangKu di ho, songon dia do ia holong ni roham di Ahu?” Boha ma hita mangalusi i? Aha ma tutu sibahenonta laho papatarhon holong ni rohanta tu Ibana? Tauji ma pamanathon i marsiajar sian turpuk jamita di hita ari on.

Na parjolo, tapadiri ma di Ibana ngolunta na marhamauliateon. Sian boaboa ni Tuhanta Jesus sandiri manang sian panimbangion haporseaonna di angka na masa, porsea do si Maria di hamamate ni Jesus. Alai diantusi jala dihaporseai do huhut paboa hamatean ni Jesus i ndada hamatean na somal, hamatean na paluahon do. Hombar tusi laos porsea do ibana na hehe do Ibana muse. Ala ni i, di na mangadopi i ndada marsak ibana manang tumatangis, alai dipatupa do pambahenan hamauliateon do dohot hahormaton, i ma na mamiahi Tuhan i. Naeng songon i ma hita di na mangadopi Pesta Parningotan di Hamamate ni Tuhanta Jesus Kristus, naeng di bagasan haporseaon di hamamate dohot di haheheon ni Kristus na paluahon i. Taringot tusi, sasintongna nunga boi tumangkas i di hita, ai asing sian si Maria na mangadopi na ‘naeng masa’, na marningot ‘naung masa’ nama anggo hita. Nunga gumodang di hita hatorangan taringot tusi. Na umarga tahe, nunga ro Tondi Porbadia patoranghon i tu hita. Hombar tusi nunga ummura hita porsea di Jesus naung mate jala hehe bahen haluaonta. Haporseaon sisongon i do na umporlu di hita. Na patupa parningotan na uli do i. Alai unang ma holan parningotan na mangonjar hita tu keharuan dohot iluilu marningot panaonon ni Tuhan i. Boi do masa na songon i, ala tar malo parjamita i mendramatisasikan barita passion i gabe terpancing ma emosi ni na deba gabe tumatangis. Dosana ndang disolsoli, rohana pe ndang porsea. Aha ma guna ni parningotan sisongon i? Ia porsea hita naeng ma pataridahononta i di pambahenan na holong jala na mauliate tu Ibana. Asa tulus i naeng do jolo sapandapot hita dohot Jesus i taringot tu aha do na denggan i. Di jamita on, diungutunguti sisean i do na hinalomohon ni Tuhan i, ai dietong nasida do i pemborosan. Na boi masa do na songon i nang di tingki on. Angka na mangantusi sude hal sian segi materi sambing rupani, ndang tagamon sapandapot i dohot Jesus taringot tu aha do ulaon na denggan i. Ninna roha ni angka na materialistis, haotoon do na mangalehon hepeng tu huria i ai so na laho dapotan imbalan material ibana sian i. Alai di angka na mangantusi i raphon Jesus, ndang dibereng i harugian ai na umarga sian i nunga dijalo ibana sian Tuhan i. Tuhanta Jesus Kristus nunga mangalehon ngoluNa bahen haluaon dohot hangoluanta, hita pe, tanda ni rohanta naung porsea, na holong jala na mauliate, tapelehon ma ngolu dohot sinadonganta tu Ibana.

Na paduahon, di bagasan sandok haoloon ma hita mangurupi na pogos. Nunga niarbis di jolo, diungutunguti sisean i do si Maria ala pamiahion i. Angkup ni alasan pemborosan, muruk nasida ala didok rohana dengganan do digadis miak i arga tolu ratus hupang lobi, dung i dibasabasahon ma i tu na pogos. Na sai laon antong, mangolu do di sisean i ulaon diakoni. Dijalo nasida do asiasi ni halak jala disagihon tu na pogos. Tolu ratus hupang ndang na hurang be na nidok ni i tu kas diakoni ni sisean i. Alai Jesus ndang panolopi di pingkirannasida i. Ndang na mandok na so dihalomohon ulaon asi ni roha, dihalomohon do. Lobi tahe, diulahon do i. Sisean i pe ndang hea dibebashon sian ulaon i. Didok dison: “Tongtong do adong na pogos di tongatongamuna.” Ndang holan boaboaNa i tu nasida, parentaNa do huhut asa tongtong manarihon jala mangurupi na pogos. Songon i do hita dijou jala disuru manarihon dohot mangurupi angka na pogos. Manang songon dia pe antong sistem dohot penataan ni perekonomian ni portibi on, manang na boha pe kemakmuran dohot hamajuon, anggo na pogos tongtong do adong. Di bagasan ni i, diigil do haoloon ni na porsea i manarihon nasida. Ndang holan tugas kemanusiaan i na nionjar ni perikeadilan ni portibi on, alai tugas haporseaon do. Mangurupi na pogos i do sada sian dalanta mambahen na denggan tu Tuhanta Jesus i. Ibana sandiri mandok: “Nasa na binahenmu tu sada sian anggingKu angka na metmet on, na tu Ahu do i dibahen hamu” (Mat.25:40). Dohot hata na asing, pambahenan holong tu Tuhanta Jesus i sipapataron jala siulahononta do i tu sesamanta (pat.1 Joh.4:20 du). I ma siingoton jala siulahononta di na mangadopi Pesta Parningotan di Hamamate dohot Haheheon ni Tuhanta Jesus Kristus. Ndang tarsirang na dua i. Na rap ditatap si Maria do i duansa asa gabe marlapatan situtu pambahenanna i. Songon i, di na mangadopi Jumat Agung, laos tatatap ma tu Paskah, tingkinta papungu Bakti Paskah na gabe ojahan ni parbalajoon ni angka donganta na di Elim dohot Hepata. Tanda na holong jala mauliate rohanta di Tuhanta Jesus i, sai las ma rohanta mangulahon dohot mangalehon i.

jkt.28.02.2010/mvs

Tidak ada komentar:

Poskan Komentar