3.28.2010

Paskah-1

SERMON JAMITA TU PESTA PASKAH-1, 4 APRIL 2010
Joh.20:1-10


Patujolo

Dung mate Jesus dipangido si Josep na sian Arimatia do tu si Latus asa dipaloas ibana paijurhon dohot mananom bangke ni Tuhan i. Ro ma dohot si Nikodemus naung ro manopot Jesus bornginborngin uju i (Joh.3:1 duu) mamboan miak mir na marsaor aloe. Dung dipaijur bangke i, dibaluti ma dohot dagangan jala dimiahi, dung i ditanom tu sada tanoman na imbaru na jonok tu inganan pamajalan i. Laos ro do tusi nang angka sisean boruboru, isara si Maria Magdalena dohot si Maria na sada. Dibereng nasida do manang na tu dia jala boha Ibana dipeakhon, dung i muli ma nasida paulihon angka na hushus ro di miak mir, ai adong tahinasida laho mamiahi bangke ni Jesus i dung salpu Sabbat i.

Hatorangan

Ari parjolo dung salpu Sabbat i, tongon ma i ari Minggu, laho do si Maria Magdalena tu tanoman ni Jesus. Sian na tolu evangelium na asing torang, mardongan do ibana hatiha i, ai ditaringoti dope disi si Maria na sada (Mat.28:1), si Maria ni si Jakobus (si Maria na sada?) dohot si Salome (Mrk.16:1), si Johanna dohot angka na asing (Luk.24:10). Ra, rap borhat do nasida sian huta. Alai sian na dao ditatap nasida ma naung ungkap tanoman i. Pintor tubu ma tu rohanasida naung ditangko halak bangke ni Jesus i. Ala ni i mulak ma si Maria Magdalena paboahon na masa i tu si Petrus dohot tu si Johannes. Anggo angka na asing i, ditorushon nasida do laho tu tanoman i, gabe pajumpang ma nasida disi dohot surusuruan i na mandok tu nasida: “Nunga hehe Ibana.” Dung i mulak ma angka sisean parompuan i, jala di tongandalan pajumpang ma nasida dohot Jesus naung hehe i jala mangolu i (Mat.28:9 par). Ala holan sasada si Maria Magdalena do dongan ni si Johannes pajumpang, ndang dohot angka sisean parompuan na asing i, gabe holan sasada ibana ma ditaringoti di evangeliumna on.

Sahat di huta, didok si Maria Magdalena ma tu si Petrus dohot tu si Johannes: “Nunga dibuat na mambuat Tuhan i sian tanomanNa; ndang binoto manang tu dia ditaruhon.” Umbege i, marlojong ma sisean na dua i tu tanoman i. (Si Maria Magdalena pe, mangihut ma muse sian pudinasida, mardalan nangetnanget. Di pudina, sahat ma sisean parompuan na asing i tu huta. Ndang sanga be nasida paboahon na binege dohot na niidanasida tu si Petrus, tu si Johannes dohot tu si Maria Magdalena, ai nunga sanga laho na tolu i tu tanoman i). Marsihatopi do nasida na marjolong i, gabe parjolo ma si Johannes sahat tu tanoman i. Ndang pintor dibongoti ibana tanoman i, alai dipaunduk ma dirina mamereng saluhut. Diida do pangalilit (kain kafan) ni bangke ni Jesus i na denggan dibalun peak di tano, jala sekka panaputi ni uluNa pulik dibalun jala peak di ingananna.

Ihut tusi, sahat ma dohot si Petrus jala pintor bongot ma ibana tu tanoman i. Tar songon i do bangkona, hatophatop do ibana bertindak so pola jolo marpingkir manatmanat jala bagasbagas. Sarupa tu si Johannes diida do sude tanoman i, diida do hapeahan ni bangke ni Jesus i, diida dohot pangalilitNa na denggan binalun jala peak di ingananna be. Alai ndang adong kesan na patuduhon na adong na nidok ni i sude tu ibana. Disura roha tahe, nunga terpengaruh ibana binahen ni hata ni si Maria Magdalena i na mandok naung ditangko halak do bangke ni Jesus i jala ndang binoto manang tu dia ditaruhon. Ala ni i gabe so manghuling be sude na niidana i tu ibana.

Di pudina, bongot ma dohot si Johannes tu tanoman i. Lam tangkas ma di ibana sude na di tanoman i. Alai asing sian si Petrus, manghuling do i sude tu ibana. Sian pangalilit na denggan binalun jala peak di ingananna be dapot rohana do paboa na so tagamon ulaula ni panangko i, alai naung masa do disi sada na supra natural, i ma peristiwa haheheon. Ala ni i gabe porsea ma ibana. Alai holan peristiwa hahehehon i dope na dapot rohana. Manang na dia pardomuan ni i Surat i (Padan na Robi) ndang diantusi ibana dope. Sarupa taringot tu hamamate ni Kristus i, taringot tu haheheonNa pe naung dibagabagahon hian do i di Surat i (Padan na Robi). Tagan so hamamateNa, jotjot do i ditaringoti Jesus. Alai ndang haantusan nasida i. Di na jumpang tingkina, mate do Jesus i tutu, ndang dibereng nasida i songon hamatean na marlapatan na asing songon na nidok ni Surat i, alai songon hamatean na somal do. Dohot hata na asing, dijalo nasida do hamateanNa i songon sada fakta, alai ndang dapot rohanasida na adong do pardomuan ni i tu sangkap hatuaon ni Debata na taringot tu haluaon ni manisia. Laos songon i ma nang boaboaNa na taringot tu haheheonNa lobi so haantusan nasida dope i. Songon i ma si Johannes dison, sian na niidana di tanoman i ndang tarsoadahonsa naung masa do disi peristiwa haheheon. Alai olat ni fakta i dope na tarjalosa. Manang na aha pardomuan ni fakta i tu sangkap hatuaon ni Debata na taringot tu haluaon ni manisia songon naung pinaandarNa di Surat i, ndang haantusan ibana dope i. Ndang adong lapatan ni panghaporseaion sisongon i tu haluaon.

Dung i muli ma sisean na dua i. [Ndang torang dison manang na rap borhat do nasida sian tanoman i manang na marsijoloi, manang marsihatopi do pardalanna gabe sanga nasida ndang sadalan, manang paasingasing dalan. Alai manang na ala ni aha ma i, ra, sanga do nasida ndang sadalan jala disura roha disi ma dipapatar Jesus naung hehe jala mangolu i diriNa tu si Petrus (pat.Luk.24:34; 1 Kor.15:5). Di pudinasida, sahat ma muse si Maria Magdalena tu tanoman i, jala pajumpang dohot Jesus (Joh.20:11 duu)].

Rancangan Homiletis

Di ari on, tahalashon do sada sian pesta ni huria angka na umbalga, i ma Paskah manang Parningotan di Haheheon ni Tuhanta Jesus Kristus. Barita haheheonNa i mansai godang do i manubuhon insahsinsak dohot parengkelon sian na so porsea. Halak na jolo manang nuaeng, na kolot manang na maju, na kuno manang na moderen, na sian masyarakat na bersahaja manang na kompleks sude do manghilala hinamaol ni na manjalo haadongon ni haheheon i. Ndang siat i tu rohana, maol dicerna utuhutokna. Niantusan do i, ai so hea diida manang dialami toropan halak na songon i. Di hita pe, na maol jaloon do barita haheheon i, na maol siat tu roha jala maol cernaon ni utohutok. Alai tung apala i do na dipasahat tu hita di ari on, didok: “Nunga hehe Jesus Kristus i.”

“Nunga hehe Jesus Kristus i,” i do pamusatan ni Barita Paskah i. I do na binege ni angka sisean parompuan sian surusuruan i, i do na hinaporseaan jala na hinatindanghonnasida tu angka sisean baoa, gabe dohot angka i manghaporseai jala manghatindanghonsa, jala laos i ma nuaeng na dipasahat tu hita asa dohot hita manghaporseai jala manghatindanghonsa. Tutu, songon naung nidok di jolo i, na maol do i siat tu roha. Angka sisean i ma tiruanna. Andorang so tarsilang dope Jesus i, nunga jotjot ditaringoti na hehe do Ibana muse di ari patoluhon. Alai di na jumpang hamamasana, mansai maol do i dijalo nasida. Diida si Maria Magdalena do nian naung ungkap tanoman i, alai tu panangko do laho rohana; diida si Petrus do tanoman na rumar dohot pangalilit na binalun denggan, alai tung so laho rohana naung masa disi haheheon; porsea do nian si Johannes naung masa disi haheheon, alai ndang dianto rohana pardomuan ni i tu sangkap hatuaon ni Debata na taringot tu jolma songon naung binagabagahonNa di Surat i. Ringkot antusanta, Barita Paskah i ndang parjolo manjou hita mangantusi dohot manghaporseai peristiwa haheheon ni Kristus i. Molo naeng ujionta parjolo mangantusi peristiwa haheheon i, tung so laho sahat do hita tu haporseaon i. Ndang adong na boi patoranghon i tu hita, ai so adong na marnida na masa i. Tung sura pe adong tahe ndang gabe jaminan i di haporseaonta, ai boi do i na parnidaon. Jala tung sura pe boi dibuktihon i secara ilmiah, jala gabe porsea hita di haheheon i selaku fakta i ndang dohot sandirina marlapatan i tu ngolu dohot haluaonta nuaeng dohot muse. Ala ni i ingkon parjolo do hita manghaporseai Jesus Kristus naung hehe jala mangolu i. Hombar tu sangkap hatuaon ni Debata AmaNa, na ro do Ibana tu portibi on laho manobus jala paluahon hajolmaon. Tu sangkap i dihalomohon Debata do parsipalNa mangae sahit (pat.Jes.53:10) dohot pangalehonNa di hosaNa sian lomoNa. Songon naung marhuaso Ibana mangalehon, laos marhuaso do Ibana manjalosa muse (Joh.10:18). Na marlapatan ma i, marhuaso hehe dohot mangolu. Molo Ibana parjolo tahaporseai, i ma Ibana na di bagasan pardomuan dohot parsaoranNa tu Debata AmaNa i marhuaso hehe dohot mangolu muse, ndang pola gabe masalah be di hita peristiwa haheheonNa i. Manang na masuk akal i manang na so masuk akal, logis manang so logis, molo Ibana naung hea mate gabe mangolu, tontu na adong do peristiwa haheheon di holangholang ni na dua i. Torang do, nunga hea Jesus Kristus i mate. Taringot tusi torop do sitindangi. Sude do halak na di Golgota marnida i, i ma angka soldadu pelaksana ni eksekusi i, malim, panungganei, siboto surat, situan natorop, dohot angka sisesan ni Jesus i. Ditullanghon sahalak sian soldadu i do hujurna tu andoraNa, ndang nanggo humordit be. I ma tandana naung mate situtu Ibana. Torop do na paijur Ibana sian silang i dohot na mambandahonsa. Disi do si Josep na sian Arimatia, si Nikodemus, dohot angka sisean boruboru. Ndang angka na oto nasida tung tanomon nasida na so mate dope. Molo ternyata mangolu naung hea mate, ai pola dope sungkunon boha parngoluna? Songon i do sisean i, dung dialami nasida na mangolu do Kristus i ndang hea disungkun nasida be manang na boha do parheheNa.

Songon i ma hita, molo dung taalami na mangolu do Kristus i, mangolu di rohanta, di ngolunta, di hurianta, di masyarakat dohot sejarahta, ndang gabe parsoalan be di hita boha parheheNa. Asa Kristus i sandiri do bukti ni haheheonNa. Fakta tanoman na rumar i, dohot pangalilit na sorpi i holan samansam sipatudu do i. Kristus na hehe jala mangolu i do sihaporseaan jala sihirimonta, dung i martua ma hita jala malua, ai Jesus naung hea mate jala mangolu i do mandok tu si Tomas si ‘Pencari Fakta,’ si Didimus ‘orang modern tempo doeloe’ i: “Martua ma na porsea atik pe so diida” (Joh.20:29). Antong di na paujunghon jamita on, raphon donganta sahaporseaon na di bariba taendehon ma:

I serve arisen Savior, He’s in the world today;
I know that He was living, what ever men may say.
I see His hand of mercy, I hear His voice cheer;
And just the time I need Him, He’s always near.
He lives, He lives, Christ Jesus lives today;
He walks with me and talks with me along life’s narrow way.
He lives, He lives, salvation to impart!
You ask me how I know He lives?
HE LIVES WITHIN MY HEART.


jkt.01.03.2010/mvs

Tidak ada komentar:

Posting Komentar