SERMON JAMITA TU PESTA PASKAH-2, 5 APRIL 2010
Joh.20:24-29
Patujolo
Mangihuthon parpaboa ni si Johannes, dung hehe Jesus dipapatar do diriNa parjolo tu si Maria Magdalena (Joh.20:11 duu). Dung i, pintor dipaboa ibana do i tu angka sisean i (20:18). Alai ndang haru porsea nasida disi (pat.Luk.24:11). Di hasohaporseaonnasida i, tarmara do hasadaonnasida. Merasa terikat dope nian nasida sude tu Jesus dohot tu punguannasida, alai nunga mamungka adong na naeng sumurut. Si Tomas rupani, nunga naeng sumurut. Laos songon i do ra na dua sisean na laho tu Emmaus i (Luk.24:13 duu), na naeng sumurut do nasida. Ndang so mungkin na merasa bersalah do si Petrus ala ni pansoadahonna di Tuhan i jala gabe adong sian nasida na so las be rohana mardonganhon ibana. Angkup ni i, parpunguannasida i pe nunga agoan di citrana gabe parpunguan na so porsea, ai ndang porsea nasida di inti ni Barita na Uli i, i ma hamamate dohot haheheon ni Kristus i. Ala ni i gabe parpunguan na mabiar ma nasida huhut, jala na tertutup. Ala ni i ingkon ulahan ni Jesus Kristus naung hehe jala na mangolu i ma muse papunguhon jala pasadahon nasida, pahothon jala patoguhon roha dohot haporseaonnasida marhitehite na papatarhon diriNa mangolu songon na masa di turpuk on.
Hatorangan
Ia si Tomas na margoar do huhut Didimus, na mandok linduat (kembar). Disura roha ni na deba, siampudan do ibana. Secara psikologis, angka na songon i toropan do ninna na pesimis. Ibana do sian sisean i na parjolo manjalo na laho mate do Jesus i, ai didok ibana do tu angka donganna sisean: “Antong, borhat ma hita, asa rap mate hita dohot Ibana.” (Joh.11:16). Alai ndada sian haporseaonna i didok, sian biarna do. Dung saut songon na pinarhatutuna i, mate do tutu Jesus i, mansai tarhartuk do haporseaonna, gabe mandele. Ndang olo be ibana sauduran dohot sisean na asing. Dipaboa donganna pe tu ibana naung hehe Tuhan i jala nunga papatar diri tu nasida mangolu, ndang porsea ibana. Merasa diri lebih rasional sian angka donganna, didok ibana do: “Na so tupa porsea ahu molo so huida di tanganNa i bogas ni labang i, laos dijama jarijaringku bogas ni labang i, jala ia so dijama tanganhu andoraNa i.” Ra, singkop do dipaboa angka donganna i tu ibana pengalamannasida tu Jesus naung hehe jala mangolu i. Alai ninna rohana, haotoon do i; holan diida pintor dihaporseai. Boha ma molo tondi do na niidanasida i manang halilu? Ala ni i ma asa dipatujolo ibana syaratna, siangkup ni na marnida ingkon jolo dijama do Jesus na hehe jala mangolu i asa porsea.
Diboto Jesus naung hehe jala mangolu i do haporseaonna na tongon mengalami proses pematian i, diboto do huhut syarat na pinatujolona i. Alai ndang didapothon ibana tu hapunjunganna i. Ndang dihalomohon Tuhan i halak na padaohon diri sian huria ala ni pingkiranna na mandok na ibana do na ummalo, na ummaju, na lebih rasional, na lebih progresip manang na lebih moderen. Dipasombu do ibana songon i, dipaima sahat tu na mulak. Ndang binoto manang na ala ni aha, dung ualu borngin ro do muse si Tomas tu parpunguannasida. Na manghirim do ibana ulaning naeng marnida Jesus naung hehe jala mangolu i? Manang na sabalikna, na naeng mambuktihon haotoon ni angka donganna i? Molo ndang ro Jesus i antong, nda boi ma ibana mandok na tutu do lebih rasional ibana sian angka donganna i? Manang na dia pe alasanna, na torang, ro do Jesus naung hehe jala mangolu i mandapothon nasida. Bongot do Ibana di na sordak angka pintu. Nunga mardaging na imbaru Ibana na so tarihot tu tingki dohot inganan. Ala ni i, bolas do Ibana mamongoti inganannasida na sordak i sian bagasan. Ndang masalpuhu molo nidok, ro do Ibana khusus mangantoi si Tomas, ai dung ditabei nasida pintor ibana do dipanghulingi, didok: “Boan tu on jarijarimi jala ida ma tanganHu! Surdukhon ma tanganmi manjama andorangKu! Unang ganggu roham; sai porsea ma ho!” Ndang tarbahen so tarsonggot jala maila si Tomas hatiha i. Alai ndang na pailahon sangkap ni Tuhan i, na mangurupi ibana do jala asa malua sian hagangguonna jala sahat tu haporseaon. Alai boha do ibana umbege i? Ndang di ingananna molo tarajumi na hehe si Tomas mangulahon syarat na pinatujolona i. Ndang halak na maotohu ibana na so boi dope manghaporseai Tuhan na hehe i dung sanga diida Ibana patar mangolu. Hapapatar ni Jesus i nunga tuk manghusor pingkiranna sian na tarpusat tu fakta haheheon tu na manghaporseai Jesus na hehe jala mangolu, paunsathon sian na naeng mangantusi peristiwa tu na manghaporseai Oknum. Ala naung dialami na mangolu do Jesus i ndang gabe soal be di ibana manang na masuk akal haheheonNa i manang na so masuk akal, na logis manang na so logis, na rasional manang na so rasional. Alai na pasti, adong do haheheon (na irrasional) i, ai mangolu do Ibana naung hea mate i. Dung i, sahat ma ibana tu haporseaon na tardok mangalobii haporseaon ni angka donganna i, ai dihatindanghon ma: “Tuhanhu jala Debatangku.” Panindangion na balga do i na so dung dope tarbege sian angka donganna. Digoar sisean i do Jesus tutu Anak ni Debata, alai godangan dope i marhahonaan tu hamessiasonNa. Alai si Tomas dison, nunga sahat ibana tu na mananda hasintongan ni hata ni Kristus Jesus i na di Joh.14:9-10 na mandok: “Na marnida Ahu, marnida Ama i do. Ndang porsea ho, Ahu di bagasan Ama i jala Ama i di bagasan Ahu? Apala sian roharohangKu Huhatahon hata angka na Hudok tu hamu. Ama i na maringanan di bagasan Ahu, i do patulus angka ulaonNa i.” Di bagasan Jesus naung hehe jala mangolu i diida si Tomas do bohi ni Ama i. Ala ni i ma asa didok: “Tuhanhu jala Debatangku” (ndang ‘Tuhan’ jala ‘Debata’). Ibana do hapataran ni Debata. So di bagasan jala marhitehite Ibana, ndang tartanda agia ise Ama i.
Nang pe songon i tong do dipaingot Jesus ibana, didok: “Ala diida ho Ahu, umbahen na gabe porsea ho. Martua ma angka na porsea, atik pe so diida.” Dung manaek Jesus tu banua ginjang, ndang adong be kesempatan di manang na ise pe laho marnida Ibana di bagasan daging asa porsea. Manang ise na patujolohon na marnida, marjea ma i ai ndang na laho sahat be i tu haporseaon, alai na patujolohon haporseaon nang pe so diida, i do na martua. Dung pe patar Ibana sogot, asa idaonna rupaNa sandiri.
Rancangan Homiletis
Padua ari on ma hita na marpesta manghalashon Ari Parningotan di Haheheon ni Tuhanta Jesus Kristus manang Paskah. Di pesta parjolo nantoari, dipatubegehon do tu hita Barita Paskah i na mandok: “Nunga hehe Jesus Kristus i.” Barita na tutu do i. Molo gabe porsea sisean i disi, ndang haotoon i jala ndang na magopo, ai naung disungguhkan do i antara lain marhitehite hapataran ni Jesus Kristus na hehe jala mangolu i. Sada sian barita ni hapataranNa i ma na diturpukhon gabe jamita di pestanta Paskah Paduahon sadari on, Tuhanta Jesus Kristus na hehe jala mangolu i ro mandapothon siseanNa laho patoguhon roha dohot haporseaonnasida, laho pahothon hasadaon dohot parsaorannasida. Alai ndang holan sisean i, hita pe, dohot jala tongtong do didapothon Tuhanta Jesus naung hehe jala mangolu i. Laho marhua?
Na parjolo, manubuhon hita tu haporseaon jala pasadahon hita tu parpunguan ni angka na porsea. Dung mate Jesus tarmara do hasadaon ni sisean i. Dihilala be do nian na tarihot dope nasida tu Jesus dohot tu parpunguannasida, alai nunga adong na naeng sumurut. Si Tomas rupani, na marimbang goar Didimus, lapatanna linduat (kembar). Disura roha ni na deba, siampudan do ibana, jala ninna, secara psikologis angka na songon i toropan do i na pesimis. Ibana do sian sisean i na parjolo marhatutuhon na mate do Jesus i. Jala di na jumpang hamamasana, mate do Jesus i tutu, tarhartuk do haporseaonna. Gabe pesimis ma ibana, ndang adong be diida lapatan dohot masa depan ni pardomuanna tu Jesus dohot tu angka donganna. Na tuani do ro Jesus Kristus na hehe jala mangolu i mandapothon jala mangantoi ibana, paulakhon tu haporseaon dohot tu parsaoran ni na porsea i.
Songon i, marhite Barita na Uli na niulahon ni Tondi Porbadia, ro do Kristus na hehe jala mangolu i manopot hita. Tagan so i, di bagasan haholomon do bangsonta, pesimis, ndang adong haporseaon dohot panghirimon taringot tu masa depan dohot hangoluan sogot. Didok angka ompunta do rupani: “Langge, luluk; mate, busuk; sae.” Alai di bagasan Kristus Jesus, marhitehite haheheonNa, ditubuhon Debata do hita paduahalihon asa tu haporseaon dohot panghirimon na mangolu (pat.1 Ptr.1:3). Dipabongot hita tu huria i, gabe ruas ni parsaoran ni halak Kristen angka na badia. Taringot tusi, tatangihon ma sipaingot ni hata i na mandok: “Unang tatadinghon parpunguanta hian, songon na hinasomalhon ni na deba” (Heb.10:25). Sai adong do tutu na songon i. Ragam alana. Adong do i ala ni na lam sumurut haporseaon dohot panghirimanna gabe ndang adong be diida lapatan ni na marhuria, adong ala ni jut ni rohana tu angka donganna ruas manang parhalado angka na so dumenggan marpangalaho dohot marpambahenan, adong ala ni na tarhirim di na so adong na binahen ni huria i laho mangurupi angka na pogos dohot na hurangan, ala ni losok ni huria i mampartahanhon hatigoran dohot hasintongan, manang ala ni biarna manoarahon soara panurirangon di tongatonga ni masyarakat, bangso dohot negara, jala adong ala ni na mangarajumi diri ummalo, umpistar, ummaju, lebih rasional, lebih progresif manang lebih moderen, sementara angka na asing i tarmasuk parhalado dirajumi na kolot, sulit diajak maju, ndang hadonganan. Manang na ala ni aha pe i, ndang lomo roha ni Jesus di halak na sumurut (pat.Heb.10:38). Nang pe songon i, ringkot do antusanta, molo masa na songon i, utang ni hurianta do i. Ala ni i, ingkon na marusaho do huria i mangantoi jala margogoihon nasida, patoguhon roha dohot haporseaonna, manjou jala paulakhonsa tu parsaoran di bagasan huria i.
Na paduahon, pasahathon hita tu panandaon dohot panindangion di Debata na di bagasan Tuhan Jesus Kristus. Dung diida si Tomas Jesus i mangolu jala manghatai tu ibana, pintor mimbar do hadirionna jala humusor sian hagangguon tu haporseaon, sian pesimisme tu panghirimon. Ndang diparsoalhon ibana be manang na masuk akal haheheonNa i manang na so masuk akal, logis manang so logis, rasional manang so rasional, ai molo mangolu naung hea mate, tontu do, na adong do peristiwa hahehehon (nang pe na irrasional) di parholangan ni hamamate dohot hangongoluna i. Tanda ni naung muba ibana jala porsea di Jesus naung hehe jala mangolu i didok ibana ma: “Tuhanhu jala Debatangku.” Di diri ni Jesus i, diida ibana do Debata na mangolu jala na manglului pardomuan tu jolma.
Songon i, di bagasan dohot marhitehite Jesus Kristus na hehe jala mangolu i tartanda hita do ise jala boha do Debata. Tuhanta do Ibana jala Debatanta, na mangungkap pardomuan dohot parsaoran tu hita. Apala dison do pusupusu ni Barita na Uli i di na boi hita mandok Tuhan i Tuhanhu manang Tuhanta, Debata i Debatangku manang Debatanta. Tiruanna ma rupani, aha ma guna ni indahan di sasahalak molo so boi do dohononna i indahanna jala ala ni i ndang boi non i panganonna? Songon i, aha ma labana di hita nang sai tadok Tuhan, Tuhan; Debata, Debata, alai ndang adong pardomuan dohot hahonaan ni Tuhan jala Debata i tu hita, ndang boi dohononta Ibana Tuhanta jala Debatanta, ndang boi hita manghirim jala martangiang tu Ibana, jala ndang boi hita mempercayakan ngolu dohot haluaonta tu Ibana? Alai na martua do hita, ai di bagasan dohot marhite Jesus Kristus na hehe jala mangolu i naung gabe Tuhanta jala Debatanta do Debata, gabe Tuhanmu jala Debatam, gabe Tuhanhu jala Debatangku. Ala Tuhanta jala Debatanta Ibana, Tuhanmu jala Debatam, Tuhanhu jala Debatangku, boi do hita manghirim jala mangido tu Ibana, boi mempercayakan ngolu dohot haluaonta tu Ibana. Ibana nama nampuna hita, jala hita nampuna Ibana. Na gabe tanggungjawab ma i di hita, asa manghatindanghon Ibana tu sandok hajolmaon anggiat lam tu toropna halak porsea di Ibana, jala manjangkon Ibana gabe Tuhan jala Debatana.
jkt.04.03.2010/mvs
Mangihuthon parpaboa ni si Johannes, dung hehe Jesus dipapatar do diriNa parjolo tu si Maria Magdalena (Joh.20:11 duu). Dung i, pintor dipaboa ibana do i tu angka sisean i (20:18). Alai ndang haru porsea nasida disi (pat.Luk.24:11). Di hasohaporseaonnasida i, tarmara do hasadaonnasida. Merasa terikat dope nian nasida sude tu Jesus dohot tu punguannasida, alai nunga mamungka adong na naeng sumurut. Si Tomas rupani, nunga naeng sumurut. Laos songon i do ra na dua sisean na laho tu Emmaus i (Luk.24:13 duu), na naeng sumurut do nasida. Ndang so mungkin na merasa bersalah do si Petrus ala ni pansoadahonna di Tuhan i jala gabe adong sian nasida na so las be rohana mardonganhon ibana. Angkup ni i, parpunguannasida i pe nunga agoan di citrana gabe parpunguan na so porsea, ai ndang porsea nasida di inti ni Barita na Uli i, i ma hamamate dohot haheheon ni Kristus i. Ala ni i gabe parpunguan na mabiar ma nasida huhut, jala na tertutup. Ala ni i ingkon ulahan ni Jesus Kristus naung hehe jala na mangolu i ma muse papunguhon jala pasadahon nasida, pahothon jala patoguhon roha dohot haporseaonnasida marhitehite na papatarhon diriNa mangolu songon na masa di turpuk on.
Hatorangan
Ia si Tomas na margoar do huhut Didimus, na mandok linduat (kembar). Disura roha ni na deba, siampudan do ibana. Secara psikologis, angka na songon i toropan do ninna na pesimis. Ibana do sian sisean i na parjolo manjalo na laho mate do Jesus i, ai didok ibana do tu angka donganna sisean: “Antong, borhat ma hita, asa rap mate hita dohot Ibana.” (Joh.11:16). Alai ndada sian haporseaonna i didok, sian biarna do. Dung saut songon na pinarhatutuna i, mate do tutu Jesus i, mansai tarhartuk do haporseaonna, gabe mandele. Ndang olo be ibana sauduran dohot sisean na asing. Dipaboa donganna pe tu ibana naung hehe Tuhan i jala nunga papatar diri tu nasida mangolu, ndang porsea ibana. Merasa diri lebih rasional sian angka donganna, didok ibana do: “Na so tupa porsea ahu molo so huida di tanganNa i bogas ni labang i, laos dijama jarijaringku bogas ni labang i, jala ia so dijama tanganhu andoraNa i.” Ra, singkop do dipaboa angka donganna i tu ibana pengalamannasida tu Jesus naung hehe jala mangolu i. Alai ninna rohana, haotoon do i; holan diida pintor dihaporseai. Boha ma molo tondi do na niidanasida i manang halilu? Ala ni i ma asa dipatujolo ibana syaratna, siangkup ni na marnida ingkon jolo dijama do Jesus na hehe jala mangolu i asa porsea.
Diboto Jesus naung hehe jala mangolu i do haporseaonna na tongon mengalami proses pematian i, diboto do huhut syarat na pinatujolona i. Alai ndang didapothon ibana tu hapunjunganna i. Ndang dihalomohon Tuhan i halak na padaohon diri sian huria ala ni pingkiranna na mandok na ibana do na ummalo, na ummaju, na lebih rasional, na lebih progresip manang na lebih moderen. Dipasombu do ibana songon i, dipaima sahat tu na mulak. Ndang binoto manang na ala ni aha, dung ualu borngin ro do muse si Tomas tu parpunguannasida. Na manghirim do ibana ulaning naeng marnida Jesus naung hehe jala mangolu i? Manang na sabalikna, na naeng mambuktihon haotoon ni angka donganna i? Molo ndang ro Jesus i antong, nda boi ma ibana mandok na tutu do lebih rasional ibana sian angka donganna i? Manang na dia pe alasanna, na torang, ro do Jesus naung hehe jala mangolu i mandapothon nasida. Bongot do Ibana di na sordak angka pintu. Nunga mardaging na imbaru Ibana na so tarihot tu tingki dohot inganan. Ala ni i, bolas do Ibana mamongoti inganannasida na sordak i sian bagasan. Ndang masalpuhu molo nidok, ro do Ibana khusus mangantoi si Tomas, ai dung ditabei nasida pintor ibana do dipanghulingi, didok: “Boan tu on jarijarimi jala ida ma tanganHu! Surdukhon ma tanganmi manjama andorangKu! Unang ganggu roham; sai porsea ma ho!” Ndang tarbahen so tarsonggot jala maila si Tomas hatiha i. Alai ndang na pailahon sangkap ni Tuhan i, na mangurupi ibana do jala asa malua sian hagangguonna jala sahat tu haporseaon. Alai boha do ibana umbege i? Ndang di ingananna molo tarajumi na hehe si Tomas mangulahon syarat na pinatujolona i. Ndang halak na maotohu ibana na so boi dope manghaporseai Tuhan na hehe i dung sanga diida Ibana patar mangolu. Hapapatar ni Jesus i nunga tuk manghusor pingkiranna sian na tarpusat tu fakta haheheon tu na manghaporseai Jesus na hehe jala mangolu, paunsathon sian na naeng mangantusi peristiwa tu na manghaporseai Oknum. Ala naung dialami na mangolu do Jesus i ndang gabe soal be di ibana manang na masuk akal haheheonNa i manang na so masuk akal, na logis manang na so logis, na rasional manang na so rasional. Alai na pasti, adong do haheheon (na irrasional) i, ai mangolu do Ibana naung hea mate i. Dung i, sahat ma ibana tu haporseaon na tardok mangalobii haporseaon ni angka donganna i, ai dihatindanghon ma: “Tuhanhu jala Debatangku.” Panindangion na balga do i na so dung dope tarbege sian angka donganna. Digoar sisean i do Jesus tutu Anak ni Debata, alai godangan dope i marhahonaan tu hamessiasonNa. Alai si Tomas dison, nunga sahat ibana tu na mananda hasintongan ni hata ni Kristus Jesus i na di Joh.14:9-10 na mandok: “Na marnida Ahu, marnida Ama i do. Ndang porsea ho, Ahu di bagasan Ama i jala Ama i di bagasan Ahu? Apala sian roharohangKu Huhatahon hata angka na Hudok tu hamu. Ama i na maringanan di bagasan Ahu, i do patulus angka ulaonNa i.” Di bagasan Jesus naung hehe jala mangolu i diida si Tomas do bohi ni Ama i. Ala ni i ma asa didok: “Tuhanhu jala Debatangku” (ndang ‘Tuhan’ jala ‘Debata’). Ibana do hapataran ni Debata. So di bagasan jala marhitehite Ibana, ndang tartanda agia ise Ama i.
Nang pe songon i tong do dipaingot Jesus ibana, didok: “Ala diida ho Ahu, umbahen na gabe porsea ho. Martua ma angka na porsea, atik pe so diida.” Dung manaek Jesus tu banua ginjang, ndang adong be kesempatan di manang na ise pe laho marnida Ibana di bagasan daging asa porsea. Manang ise na patujolohon na marnida, marjea ma i ai ndang na laho sahat be i tu haporseaon, alai na patujolohon haporseaon nang pe so diida, i do na martua. Dung pe patar Ibana sogot, asa idaonna rupaNa sandiri.
Rancangan Homiletis
Padua ari on ma hita na marpesta manghalashon Ari Parningotan di Haheheon ni Tuhanta Jesus Kristus manang Paskah. Di pesta parjolo nantoari, dipatubegehon do tu hita Barita Paskah i na mandok: “Nunga hehe Jesus Kristus i.” Barita na tutu do i. Molo gabe porsea sisean i disi, ndang haotoon i jala ndang na magopo, ai naung disungguhkan do i antara lain marhitehite hapataran ni Jesus Kristus na hehe jala mangolu i. Sada sian barita ni hapataranNa i ma na diturpukhon gabe jamita di pestanta Paskah Paduahon sadari on, Tuhanta Jesus Kristus na hehe jala mangolu i ro mandapothon siseanNa laho patoguhon roha dohot haporseaonnasida, laho pahothon hasadaon dohot parsaorannasida. Alai ndang holan sisean i, hita pe, dohot jala tongtong do didapothon Tuhanta Jesus naung hehe jala mangolu i. Laho marhua?
Na parjolo, manubuhon hita tu haporseaon jala pasadahon hita tu parpunguan ni angka na porsea. Dung mate Jesus tarmara do hasadaon ni sisean i. Dihilala be do nian na tarihot dope nasida tu Jesus dohot tu parpunguannasida, alai nunga adong na naeng sumurut. Si Tomas rupani, na marimbang goar Didimus, lapatanna linduat (kembar). Disura roha ni na deba, siampudan do ibana, jala ninna, secara psikologis angka na songon i toropan do i na pesimis. Ibana do sian sisean i na parjolo marhatutuhon na mate do Jesus i. Jala di na jumpang hamamasana, mate do Jesus i tutu, tarhartuk do haporseaonna. Gabe pesimis ma ibana, ndang adong be diida lapatan dohot masa depan ni pardomuanna tu Jesus dohot tu angka donganna. Na tuani do ro Jesus Kristus na hehe jala mangolu i mandapothon jala mangantoi ibana, paulakhon tu haporseaon dohot tu parsaoran ni na porsea i.
Songon i, marhite Barita na Uli na niulahon ni Tondi Porbadia, ro do Kristus na hehe jala mangolu i manopot hita. Tagan so i, di bagasan haholomon do bangsonta, pesimis, ndang adong haporseaon dohot panghirimon taringot tu masa depan dohot hangoluan sogot. Didok angka ompunta do rupani: “Langge, luluk; mate, busuk; sae.” Alai di bagasan Kristus Jesus, marhitehite haheheonNa, ditubuhon Debata do hita paduahalihon asa tu haporseaon dohot panghirimon na mangolu (pat.1 Ptr.1:3). Dipabongot hita tu huria i, gabe ruas ni parsaoran ni halak Kristen angka na badia. Taringot tusi, tatangihon ma sipaingot ni hata i na mandok: “Unang tatadinghon parpunguanta hian, songon na hinasomalhon ni na deba” (Heb.10:25). Sai adong do tutu na songon i. Ragam alana. Adong do i ala ni na lam sumurut haporseaon dohot panghirimanna gabe ndang adong be diida lapatan ni na marhuria, adong ala ni jut ni rohana tu angka donganna ruas manang parhalado angka na so dumenggan marpangalaho dohot marpambahenan, adong ala ni na tarhirim di na so adong na binahen ni huria i laho mangurupi angka na pogos dohot na hurangan, ala ni losok ni huria i mampartahanhon hatigoran dohot hasintongan, manang ala ni biarna manoarahon soara panurirangon di tongatonga ni masyarakat, bangso dohot negara, jala adong ala ni na mangarajumi diri ummalo, umpistar, ummaju, lebih rasional, lebih progresif manang lebih moderen, sementara angka na asing i tarmasuk parhalado dirajumi na kolot, sulit diajak maju, ndang hadonganan. Manang na ala ni aha pe i, ndang lomo roha ni Jesus di halak na sumurut (pat.Heb.10:38). Nang pe songon i, ringkot do antusanta, molo masa na songon i, utang ni hurianta do i. Ala ni i, ingkon na marusaho do huria i mangantoi jala margogoihon nasida, patoguhon roha dohot haporseaonna, manjou jala paulakhonsa tu parsaoran di bagasan huria i.
Na paduahon, pasahathon hita tu panandaon dohot panindangion di Debata na di bagasan Tuhan Jesus Kristus. Dung diida si Tomas Jesus i mangolu jala manghatai tu ibana, pintor mimbar do hadirionna jala humusor sian hagangguon tu haporseaon, sian pesimisme tu panghirimon. Ndang diparsoalhon ibana be manang na masuk akal haheheonNa i manang na so masuk akal, logis manang so logis, rasional manang so rasional, ai molo mangolu naung hea mate, tontu do, na adong do peristiwa hahehehon (nang pe na irrasional) di parholangan ni hamamate dohot hangongoluna i. Tanda ni naung muba ibana jala porsea di Jesus naung hehe jala mangolu i didok ibana ma: “Tuhanhu jala Debatangku.” Di diri ni Jesus i, diida ibana do Debata na mangolu jala na manglului pardomuan tu jolma.
Songon i, di bagasan dohot marhitehite Jesus Kristus na hehe jala mangolu i tartanda hita do ise jala boha do Debata. Tuhanta do Ibana jala Debatanta, na mangungkap pardomuan dohot parsaoran tu hita. Apala dison do pusupusu ni Barita na Uli i di na boi hita mandok Tuhan i Tuhanhu manang Tuhanta, Debata i Debatangku manang Debatanta. Tiruanna ma rupani, aha ma guna ni indahan di sasahalak molo so boi do dohononna i indahanna jala ala ni i ndang boi non i panganonna? Songon i, aha ma labana di hita nang sai tadok Tuhan, Tuhan; Debata, Debata, alai ndang adong pardomuan dohot hahonaan ni Tuhan jala Debata i tu hita, ndang boi dohononta Ibana Tuhanta jala Debatanta, ndang boi hita manghirim jala martangiang tu Ibana, jala ndang boi hita mempercayakan ngolu dohot haluaonta tu Ibana? Alai na martua do hita, ai di bagasan dohot marhite Jesus Kristus na hehe jala mangolu i naung gabe Tuhanta jala Debatanta do Debata, gabe Tuhanmu jala Debatam, gabe Tuhanhu jala Debatangku. Ala Tuhanta jala Debatanta Ibana, Tuhanmu jala Debatam, Tuhanhu jala Debatangku, boi do hita manghirim jala mangido tu Ibana, boi mempercayakan ngolu dohot haluaonta tu Ibana. Ibana nama nampuna hita, jala hita nampuna Ibana. Na gabe tanggungjawab ma i di hita, asa manghatindanghon Ibana tu sandok hajolmaon anggiat lam tu toropna halak porsea di Ibana, jala manjangkon Ibana gabe Tuhan jala Debatana.
jkt.04.03.2010/mvs
Tidak ada komentar:
Posting Komentar